1 Иоаннай

¹ Бидэ амидаралгын Үгэ тухай иигэжэ мэдээсэнэбди: анханһаа нааша амидаралгын Үгэ бии байгаа, бидэ тэрэ Үгэ дуулаа шагнаабди, нюдѳѳрѳѳ хараабди, гараараа хүрѳѳбди. ² Тэрэ амидаралга бидэндэ харуулагдаһан байна, тэрэ амидаралгые хараабди. Тиин тэрэ амидаралга тухай гэршэлнэбди. Хэтэ мүнхын тэрэ амидаралга Эсэгэтэй хамта байжа, бидэндэ үзүүлэгдэһэн юм гээд бидэ таанарта мэдээсэнэбди. ³ Бидэнтэй таанарай нүхэсэхын тула хараһан, дуулаһан юумэеэ бидэ таанарта мэдээсэнэбди. Харин бидэнэр Эсэгэ Бурхантай, тэрэнэй хүбүүн Иисус Христостой нүхэсэнэбди. ⁴ Ехэтэ баясахынгаа тула бидэ энээн тухай бэшэнэбди. ⁵ Тэрээнһээ дуулаһан мэдээсэлээ бидэ таанарташье дуулганабди: Бурхан хадаа гэрэл туяа мүн, харанхы ямаршье юумэн Бурханда байдаггүй! ⁶ «Бидэ Бурхантай нүхэсэнэбди», – гэжэ хэлээд, урдынхяараал нүгэлэй харанхы соо һуугаа һаа, бидэ худалаар хэлэһэн болонобди, үнэн зүб бэшээр ажаһууна гээшэбди. ⁷ Хэрбээ Бурхандал адляар гэрэл туяа соо бидэн байгаа һаа, хоорондоо бидэ эбтэй гээшэбди, тиин Бурханай Хүбүүн Иисусай шуһаниинь маниие ямаршье нүгэл шэбэлһээ арюудхан сэбэрлэнэ гээшэ. ⁸ Бидэ нүгэл хилэнсэ хээгүйбди гээ һаа, бидэ ѳѳһэдыгѳѳ мэхэлнэбди. Энэнь манда үнэн зүб юумэн үгы гэһэн удхатай болоно. ⁹ Хэрбээ нүгэл шэбэл хэһэнээ бидэнэй мэдэрээ юм һаа, үнэншэ зүб Бурхан нүгэл шэбэл хэһыемнай хүлисэхэ, бүхы муу юумэнһээ маниие арюудхан сэбэрлэхэ. ¹⁰ «Бидэ нүгэл хээгүйбди», – гэжэ бидэнэй хэлээ һаа, Бурханиие бидэ худалша мэтээр харуулһан болонобди. Бурханай Үгэ бидэнтэй байгаагүй болоно гээшэ.

¹ Үхибүүдни, саашадаа нүгэл шэбэл хэхэгүйнтнай тула би энээниие бэшэнэб. Хэрбээ хэн нэгэнэй нүгэл хээ һаа, Эсэгэ Бурханай урда маниие Хамгаалагша, үнэн сэдьхэлтэ Иисус Христос бии юм. ² Бидэнэй хэһэн нүгэлэй, гансашье бидэнэй бэшэ, харин бүхы дэлхэйнхинэй хэһэн нүгэлэйнь түлѳѳ Иисус ѳѳрыгѳѳ үргэл болгоһон байна. ³ Бурханай захяа заабариие сахидаг болоходоол Бурханиие бидэ мэдэнэбди гэжэ лаб найдахабди. ⁴ Бурханай захяа заабариие сахидаггүй аад, «Бурханиие би мэдэнэб», – гэжэ хэлэдэг хүн худалша гээшэ, үнэн юумэн тэрэ хүндэ үгы! ⁵ Бурханай үгэ дуулагша хүн Бурханда үнэн сэдьхэлһээ дуратай байна. Бурхантай нэгэн хамта байһанаа бидэ иигэжэл мэдэхэ болонобди. ⁶ Бурхантай нэгэн хамта байнаб гэгшэ болбол Иисустал адляар ажаһууха ёһотой. ⁷ Инаг хайрата нүхэдни, минии бэшэжэ байһан юумэн шэнэ захяа заабари бэшэ, хуушан захяа заабари юм. Энэ захяа заабариие таанар анханһаа хойшо мэдэнэт. Тэрэ хуушан захяа заабари – бидэнэй дуулаһан мэдээсэл гээшэ. ⁸ Гэхэтэй хамта, минии бэшэжэ байһан юумэн шэнэшье захяа заабари мүн. Энэ захяа заабари үнэн зүб юм гэжэ Христосойшье, таанарайшье ажабайдал харуулна. Нүгэлэй харанхы һүнэн ошожо байна, ёһотой гэрэл туяа сасаран гэрэлтэжэ байна! ⁹ Би гэрэл туяа соо байнаб гэдэг аад, ѳѳрынгѳѳ аха дүүдэ дурагүй хүн мүнѳѳ болотор нүгэлэй харанхыда байна гээшэ. ¹⁰ Аха дүүдээ дуратай хүн гэрэл туяа соо ябана. Тэрэ хүн ѳѳрынгѳѳ аяг зангаар дүтынгѳѳ хүниие нүгэлдэ оруулха ушар шалтагааниинь болохогүй. ¹¹ Аха дүүдээ дурагүй хүн нүгэлэй харанхы соо ябана, тэрэ хүн хайшаа тэмтэржэ ябаһанаа мэдэнэгүй, яахадааб гэбэл, тэрэ хүниие нүгэлэй харанхы һохор болгоно. ¹² Үхибүүдни, би таанадта хандажа бэшэнэб: таанарай хэһэн нүгэл хилэнсэтнай Христосой алдар нэрын аша туһада хүлисэгдэбэ. ¹³ Эсэгэнэр, би таанадта хандажа бэшэнэб: анханһаа хойшо оршожо байдаг Бурханиие таанар мэдэнэт. Залуушуул, би таанадта хандажа бэшэнэб: таанар шолмосые диилээт. ¹⁴ Үхибүүд, би таанадта бэшэбэб: таанар Эсэгэ Бурханиие мэдэбэт. Эсэгэнэр, би таанадта бэшэбэб: анханһаа хойшо оршожо байдаг Бурханиие таанар мэдэбэт. Залуушуул, би таанадта бэшэнэб: таанар ехэ хаба шадалтайт, Бурханай Үгэ таанартай байна, тиин таанар шолмосые диилээт. ¹⁵ Газар дэлхэйдэ бү дурлагты, газар дэлхэй дээрэхи юумэндэ бү дурлагты. Газар дэлхэйдэ дурлаа һаа, Эсэгэ Бурханда дурагүй гээшэт. ¹⁶ Ушарынь гэбэл, газар дэлхэйн бүхы юумэнүүд: нүгэл шэбэлые хэхэ шунал, нюдэнэй хүсэл шунал, омог бардам зан Эсэгэ Бурханһаа заяагдаагүй, харин газар дэлхэйһээ бии болоо. ¹⁷ Харин газар дэлхэй энэ дэлхэйдэ һайшаагдадаг бүхы юумэнтэй хамта һүнэн һалаха. Эсэгэ Бурханай дура хүсэлые сахин бэелүүлэгшэл хэтэ мүнхэдѳѳ амиды ябаха юм. ¹⁸ Үхибүүд, һүүлшын саг хүрэжэ ерэбэ! Христосой дайсан ерэхэ ёһотой гэжэ таанар дуулаһан байхат. Тиин Христосой дайсад мүнѳѳ олон болонхой. Иихэдээ һүүлшын саг хүрэжэ ерэбэ гэжэ мэдэнэбди. ¹⁹ Христосой дайсад маниие хаяад ябаа һэн, теэд тэдэнэр манай хүнүүд байгаа гэхын аргагүй. Хэрбээ манай хүнүүд байгаа һаа, тэдэнэр манаар сугтаа үлэхэ һэн. Теэд бидэниие орхёод ошоһон ушарынь тодоруулбал, тэдэ манай хүнүүд бэшэ һэн. ²⁰ Таанарта Нангин Һүлдэ Бурханһаа үгтѳѳ, тиимэһээ таанар бүхы юумэ мэдэнэт. ²¹ Таанар үнэн зүбые мэдэнэгүйт гэжэ би таанадта бэшээгүйб. Үгы даа, таанадта иигэжэ бэшээ һэм: таанар үнэн зүбые мэдэнэт, тиин ямаршье худал юумэн үнэн юумэнһээ тад ондоо байдаг гэжэ бэшээб. ²² Худалша гээшэмнай хэн гээшэб? Иисусые Бурханай табисуурта Христос гэжэ тоолодоггүй хүн худалша мүн. Христосой дайсан хадаа Эсэгэ Бурханай, тэрэнэй Хүбүүнэй оршожо байһые арсагша юм. ²³ Хүбүүндэнь этигэдэггүй һаа, Эсэгэгүй байна гэһэн удхатай юм. Хүбүүндэнь этигэдэг хүн Эсэгэтэйнь хамта байна. ²⁴ Анха түрүүн юун гэжэ дуулаа һэмта, тэрээндээл этигэжэ байгты! Хэрбээ энээндэ саашадаа этигэжэ байгаа һаа, таанар Хүбүүнтэйнь, Эсэгэтэйнь хамта байхат. ²⁵ Христос бидэндэ мүнхын Амидаралга үгэхэб гэжэ найдуулаа! ²⁶ Таанарые мэхэлхэеэ һанагшад тухай эдэ бүгэдые би таанадта бэшэбэб. ²⁷ Бурханай таанадта үгэһэн Нангин Һүлдэ сэдьхэлдэтнай байна, тиимэһээ таанарые хэн нэгэнэй һургаһанай хэрэгынь үгы. Нангин Һүлдэ таанарта үнэн зүб юумэ хэлэнэ, худал юумэ хэлэнэгүй, тиигэжэ таанарые бүхы юумэндэ һургана. Нангин Һүлдын һургаһан ёһоор таанар Христостой нэгэн хамта байгты. ²⁸ Үхибүүд, мүнѳѳ таанар Христостой нэгэн хамта байгты. Тиигээ һаа, тэрэнэй бусажа ерэхэдэнь, бидэ айхые мэдэхэгүйбди, эшэхэгүйбди. ²⁹ Христосые үнэн сэдьхэлтэй гэжэ таанар мэдэдэгта, тиимэһээ үнэн сэдьхэлээрнь байдаг хүн Бурханһаа түрэһэн хүн гэжэ таанар баһа мэдэнэт.

¹ Таанар хараад үзыт, Эсэгэ Бурхан маанадта ямар ехэ дуратай байгаа гээшэб! Бидэнэр Бурханай үхибүүд гэжэ нэрлэгдэнэбди. Үнэхѳѳрѳѳшье тиимэбди! Газар дэлхэйнхин бидэниие Бурханай үхибүүд гэжэ мэдэнэгүй, юундэб гэбэл, Бурханиие тэдэ мэдэнэгүй бшуу. ² Инаг хайрата аха дүүнэрни, бидэ мүнѳѳ Бурханай үхибүүд гээшэбди, теэд саашадаа ямар болохомнай үшѳѳл мэдэгдэнэгүй. Христосой ерэхэдэ тэрээндэл адли болохобди гэжэ ойлгонобди, юундэб гэбэл, бидэ тэрэниие үнэн бодото зандань харахабди. ³ Христосто иимэ этигэл найдабаритай байгаа һаа, алишье хүн ѳѳрыгѳѳ арюудхана, ушарынь гэбэл, Христос арюун нангин байгаа. ⁴ Нүгэл хилэнсэ хэгшэ хүн бүхэн гэмтэ ябадал гаргана; нүгэл хилэнсэ болбол гэмтэ ябадал мүн. ⁵ Христос ѳѳрѳѳ нүгэл хээгүй аад, хүнүүдые хэһэн нүгэлһѳѳнь сүлѳѳлхэеэ ерээ гэжэ таанар мэдэнэт. ⁶ Тэрээнтэй нэгэн хамта байгшад нүгэл хэдэггүй. Нүгэл хэгшэд Христосые хараагүй, мэдэрээгүй гээшэ. ⁷ Үхибүүд аа, хэншье таанарые зүб харгыһаатнай бү хадууруулаг! Үнэн зүб юумэ хэгшэ Христостол адли үнэн зүб байгты. ⁸ Нүгэл шэбэл хэгшэ шолмосһоо болоно, юундэб гэбэл, шолмос анханһаа хойшо нүгэл хилэнсэ хэдэг юм. Тиимэһээ шолмосой үйлэ уршагые үгы хэхын тула Бурханай Хүбүүн ерэһэн юм. ⁹ Бурханһаа мүндэлэн гарагша нүгэл хэдэггүй, яахадааб гэхэдэ, тэрэ хүн Бурханай үршѳѳһэн шэнэ амидаралай ёһоор ажаһууна. Тэрэ хүн ондоо нүгэл хэхэгүй, ушарынь гэхэдэ, тэрэ Бурханһаа мүндэлѳѳ. ¹⁰ Бурханай үхибүүд шолмосой үхибүүд хоёр хоорондоо иимэ илгаатай: үнэн зүб юумэ хэдэггүй хүнүүд, ѳѳрынгѳѳ ахада дурагүй хүнүүд адли – Бурханай бэшэ юм. ¹¹ Бидэ бэе бэедээ дуратай байха ёһотойбди гэһэн мэдээсэл таанар анханһаа хойшо дуулаат. ¹² Бидэнэр Каин шэнги байха ёһогүйбди. Каин хадаа шоломосой түрэлэй байжа, дүүгээ алаа һэн. Юундэ тиигээб гэхэдэ, Каинай үйлэ хэрэгынь харатай муухай байгаа, харин дүүгэйнь хэрэг үнэн зүб байгаа бшуу. ¹³ Аха дүүнэрни, таанарта газар дэлхэйнхин дурагүй байна гэжэ бү гайхагты. ¹⁴ Үхѳѳд амидыраат гэжэ бидэ мэдэнэбди, ушарынь хадаа, аха дүүнэртээ бидэ дуратайбди. Аха дүүнэртээ дурагүй хүнүүд үхэһэн зандаа үлэнэ. ¹⁵ Аха дүүгээ үзэн ядагша алууршан гээшэ. Харин ямаршье алууршан мүнхын амидаралда хүртэдэггүй гэжэ таанар мэдэнэт. ¹⁶ Ѳѳрынгѳѳ ами наһые бидэнэй түлѳѳ Христосой үгэһыень дуран гээшэ гэжэ бидэ ойлгонобди. Тиин бидэшье аха дүүнэрэйнгээ түлѳѳ ами наһаяа үгэхэ ёһотойбди. ¹⁷ Энэ дэлхэйдэ юумээр дутадаггүй баян һуудаг хүн аад, аханар дүүнэрэйнгээ үгытэй ядуу һуухадань һанаагаа зободоггүй хүн: Бурханда дуратайб гэжэ яагаад хэлэжэ шадаха гээшэб? ¹⁸ Үхибүүдни, иигэжэ дэмы хооһон ама хэлээрээ дурлаһан хэбэр үзүүлээд бү байя, харин үнэхѳѳрѳѳ дуратай байһанаа үнэн бодото хэрэгээрээ харуулая! ¹⁹ Үнэн бодото хэрэгтэ хабаатай байһанаа, Бурханай урда этигэл зоригтой байһанаа яажа мэдэхэбибди. Хэрбээ маниие зүрхэ сэдьхэлнай зэмэлээ һаа, Бурхан бидэнэй зүрхэ сэдьхэлһээ ехэ, бүгэдые мэдэгшэ юм гэжэ бидэ ойлгонобди. ²¹ Инаг хайрата аха дүүнэрни, хэрбээ зүрхэ сэдьхэлнай маниие зэмэлээгүй һаань, Бурханай урда этигэл зоригтой байхабди. ²² Тиин бүхы эриһэн юумэеэ Бурханһаа абанабди, юундэб гэбэл, тэрэнэй захяа заабариие бэелүүлэн сахинабди, тэрээндэ һайшаагдаха юумэ хэнэбди. ²³ Бурханай захяа заабаринь иимэ: Бурханай Хүбүүн Иисус Христосто этигэхэ, Иисус Христосой захиһан ёһоор бэе бэедээ дуратай байха зэргэтэйбди. ²⁴ Бурханай захяа заабариие сахигшад тэрээнтэй нэгэн хамта байна, Бурхан тэдэнтэй нэгэн хамта байна. Иигэжэл Бурханай бидэнтэй нэгэн хамта байдагые бидэ мэдэхэ аргатайбди, бидэндэ Бурханай заяаһан Нангин Һүлдын ашаар мэдэхэ аргатайбди.

¹ Инаг хайрата аха дүүнэрни, али бүхы һүлдэнүүдтэ бү этигэгты, Бурханһаа эльгээгдэһэн һүлдэнүүд гү гэжэ шалгагты, юундэб гэбэл, худал хуурмаг лүндэншэд газар дэлхэй дээрэ олон болошонхой. ² Бурханай һүлдые иигээд мэдэхэт: Иисус Христос хүн боложо, газарта ерээ гэдэг һүлдэ бүхэн Бурханай Һүлдэ мүн. ³ Иисусые хүн боложо, газарта ерээгүй гэдэг һүлдэ Бурханай бэшэ, харин Христосой дайсанай һүлдэ гээшэ. Тиимэ һүлдэ тухай таанар дуулаһан байнат, тэрэ һүлдэ газар дэлхэйдэ ерэхэ гэжэ таанар мэдэнэт, тэрэнь дэлхэйдэ ерэшоод байна. ⁴ Үхибүүд, таанар Бурханһаат, тиимэһээ худал хуурмаг лүндэншэдые диилээт, яахадааб гэбэл, таанарай досоо байдаг Бурхан газар дэлхэйдэ байдаг шолмосһоо ехэ юм. ⁵ Тэдэ хуурмаг лүндэншэд газар дэлхэйнхин мүн, юундэб гэбэл, тэдэнэр газар дэлхэйнхинэй хэлээр дуугаралсана, газар дэлхэйнхин тэдэ лүндэншэдэй хэлэһые шагнана. ⁶ Харин бидэнэр Бурханай хүнүүдбди. Тиимэһээ Бурханиие мэдэгшэнь бидэниие шагнана, Бурханай бэшэ хүн шагнанагүй. Иигэжэл бидэ үнэн зүбэй һүлдые худал хуурмагай һүлдэһѳѳ илгаруулан мэдэнэбди. ⁷ Инаг хайрата аха дүүнэрни, бэе бэедээ дуратай байябди, юундэб гэбэл, хайра дуран Бурханһаа заяагдаһан юм. Али бүхы хайра дуратай зон Бурханһаа түрѳѳ, Бурханиие мэдэнэ. ⁸ Хайра дурагүй хүн Бурханиие мэдэнэгүй, яахадааб гэхэдэ, Бурхан гээшэ дуран мүн. ⁹ Бидэндэ дуратай байдагаа Бурхан иигэжэ харуулаа: Хүбүүгээрнь дамжан бидэнэй мүнхэдѳѳ амиды ябахын тула Бурхан ори ганса Хүбүүгээ газар дэлхэйдэ эльгээгээ. ¹⁰ Дуран гээшэ иимэ: Бурханда бидэ дурлаагүйбди, Бурхан ѳѳрѳѳ бидэндэ дурлажа, бидэнэй хэһэн нүгэлэй түлѳѳ үргэл болгон, ѳѳрынгѳѳ Хүбүүе эльгээгээ. ¹¹ Инаг хайрата аха дүүнэрни, Бурханай иимэ ехээр манда дурлаһан хадань бидэшье бэе бэедээ дуратай байха ёһотойбди. ¹² Бурханиие хэншье хэзээшье хараагүй юм. Теэд хэрбээ бидэнэй бэе бэедээ дуратай байхада, Бурхан бидэнтэй нэгэн хамта байна гээшэ. Бурханай дураниинь бидэнэй зүрхэ сэдьхэлдэ тон ехэ юм. ¹³ Бурхан бидэнтэй нэгэн хамта байна гү, бидэ Бурхантай нэгэн хамта байна гүбди гэжэ маанадта Бурханай заяаһан Нангин Һүлдѳѳрнь мэдэнэбди. ¹⁴ Эсэгэ Бурхан газар дэлхэйе Абарагша болгон, Хүбүүгээ эльгээгээ гэжэ бидэ хараабди, гэршэлэн баталнабди. ¹⁵ Иисус болбол Бурханай Хүбүүн гэжэ мэдэрдэг хүн Бурхантай нэгэн хамта байна, Бурхан тэрэ хүнтэй нэгэн хамта байна. ¹⁶ Бидэндэ Бурхан дуратай гэжэ мэдээд, бидэ тэрэ дурандань этигэн найданабди. Бурхан болбол дуран гээшэ. Хайра дуратай хүн Бурхантай нэгэн хамта байдаг, Бурхан тэрэ хүнтэй нэгэн хамта байдаг, Бурхан тэрэ хүнэй досоонь байдаг. ¹⁷ Энээгээрээ дуран бидэнэй зүрхэ сэдьхэлдэ тон ехэ байна. Тиимэһээ Зарга шүүбэриин болохо Үдэрые бидэ айнгүйгѳѳр угтахабди, юундэб гэбэл, энэ дэлхэйдэ бидэнэр Христостол адляар ажаһуунабди. ¹⁸ Дуран айхые мэдэдэггүй: ёһотой дуран айлтые зайлуулдаг, яахадааб гэбэл, айха гээшэ хэһээлтэтэй холбоотой, тиигээд хэн айнаб, тэрэ хүн дуранай эрхим шанарые туйлаагүй гээшэ. ¹⁹ Бидэ Бурханда дуратайбди, юундэб гэбэл, бидэндэ түрүүшээр Бурхан дурлаа. ²⁰ «Би Бурханда дуратайб» гэдэг аад, ѳѳрынгѳѳ ахада дурагүй хүн худалша гээшэ. Ахаяа хаража байгаад, тэрээндээ дурагүй хүн Бурханиие хараагүй аад, Бурханда дурлахагүй бшуу. ²¹ Бидэндэ Бурхан иимэ захяа заабари үгѳѳ: Бурханда дуратай хүн ахадаашье дуратай байха ёһотой.

¹ Иисус Бурханай табисуурта мүн гэжэ этигэдэг хүн бүхэниие Бурхан бүрилдүүлээ. Эсэгэ Бурханда дуратай хүн Бурханай үхибүүдтэшье дуратай юм. ² Бурханай үхибүүдтэ дуратай байһанаа иигэжэ мэдэнэбди: Бурханда дуратай һаа, тэрэнэй захяа заабарииень сахинабди. ³ Бурханай захяа заабариие сахихадаа, Бурханда бидэ дуратай байнабди. Бурханай захяа заабаринь хүшэр хүндэ бэшэ юм. ⁴ Бурханһаа түрэһэн хүн оршолонто дэлхэйе диилэгшэ юм. Бидэнэй этигэл найдабари болбол илалта мүн. Тэрэ этигэлэйнгээ ашаар бидэ оршолонто дэлхэйе диилэнэбди. ⁵ Иисус Бурханай Хүбүүн гэжэ этигэдэг хүн лэ дэлхэйе илагша юм. ⁶ Тэрэ бидэндэ уһа шуһан хоёрой ашаар ерээ. Тэрэмнай Иисус Христос мүн. Иисус уһанһаа гадна, уһа шуһан хоёртой хамта ерээ. Энээниие Нангин Һүлдэ гэршэлнэ, яахадааб гэбэл, Нангин Һүлдэ үнэн бодото зүйл мүн. ⁷ Тэнгэридэ гурбан гэршэ бии бшуу: Эсэгэ, Үгэ, Нангин Һүлдэ гурбан. Эдэ гурбан гэршэнүүд нэгэл юумые баталан гэршэлнэ. ⁸ Газар дээрэ һүлдэ, уһан, шуһан гурбан гэршэлнэ. ⁹ Бидэ хүнэй гэршэлһыел хараадаа абанабди, харин Бурханай гэршэлгэ хүнэй гэршэлгэһээ холо шухала юм. Энэ Бурханай ѳѳрынь гэршэлгэ мүн: Бурхан ѳѳрынгѳѳ Хүбүүн тухай гэршэлнэ. ¹⁰ Бурханай Хүбүүндэ этигэдэг хүнэй зүрхэ сэдьхэлдэнь энэ гэршэлгэнь байна. Харин Бурханда этигэдэггүй хүн Бурханиие худалша мэтэ харуулжа байна, ушарынь гэбэл, Бурханай ѳѳрынгѳѳ Хүбүүн тухай гэршэлхэдэнь, тэрэ хүн этигээгүй. ¹¹ Иимэ гэршэлгэ байгаа: Бурхан бидэндэ хэтэ мүнхын амидарал олгоо. Бурханай Хүбүүн хэтэ мүнхын амидаралай эхин мүн. ¹² Бурханай Хүбүүнтэй хүндэ хэтэ мүнхын амидарал үршѳѳгдэхэ, Бурханай Хүбүүнгүй байһан хүндэ тиимэ амидарал үгтэхэгүй. ¹³ Таанадта хэтэ мүнхын амидаралай үршѳѳгдэһые мэдэжэ байхынтнай тула Бурханай Хүбүүнэй алдар нэрэдэ этигэгшэ таанарта хандан, эдэ бүгэдые би бэшэбэб. ¹⁴ Тиимэһээл Бурханай урда этигэл зоригтой байхабди. Бурханай дура хүсэлѳѳр бидэнэй юушье эреэ һаа, Бурхан дуулажа байна. Энээндэ бидэ этигэн найданабди. ¹⁵ Юу эриһыемнай Бурханай дуулажа байһые мэдэжэ байһан туладаа, Бурханһаа эриһэн бүхы юумые бидэ абахабди гэжэ мэдэнэбди. ¹⁶ Хэрбээ ахань үхэлдэ хүргэдэггүй нүгэл хэнэ гэжэ мэдэжэ хаража байһан хүн Бурханда мүргэг, тиихэдэнь Бурхан тэрээниие амиды байлгаха. Үхэлдэ хүргэдэггүй нүгэл хэһэн хүн тухай эндэ би хэлэжэ байнаб. Харин үхэлдэ хүргэдэг нүгэл гэжэ бии юм. Тиимэ нүгэл хэгшэдэй түлѳѳ зальбарха ёһотой гэжэ би эндэ хэлэнэгүйб. ¹⁷ Үнэн бэшэ алишье үйлэ нүгэл гээшэ, теэд үхэлдэ хүргэдэггүй нүгэл гэжэ бии юм. ¹⁸ Бурханһаа түрэһэн хүн бүхэн нүгэл хэгшэгүй гэжэ бидэ мэдэнэбди: Бурханһаа түрэһэн хүниие Бурханай Хүбүүн хаража аршалжа байдаг. Шолмос тэрэ хүндэ муу юумэ хэжэ шадахагүй. ¹⁹ Бидэ Бурханай үхибүүдбди, бүхы газар дэлхэйнхин шолмосой эрхэ мэдэлдэ байна гэжэ мэдэнэбди. ²⁰ Ёһотой Бурханиие бидэнэй танидаг болохын тула маанадта Бурханай Хүбүүн ерэжэ ойлгуулаа гээд бидэ мэдэнэбди. Бидэ Бурхантай нэгэн хамта, тэрэнэй Иисус Христостой нэгэн хамта байнабди. Иисус Христос хадаа ёһотой Бурхан гээшэ, хэтэ мүнхын амидарал гээшэ. ²¹ Үхибүүд, ѳѳһэдыгѳѳ хуурмаг бурхадһаа һэргылжэ ябагты.