TITE

TITE

¹ Mɛ Pɔle wiin ɔɔn Wuro ta baratɛta ne Yezu Krista ta fanɛta wiin fa to ma sbɛ yɔnmabe kɔ tian na tɔɔ ka Wuro ta dɛ́gɛwɛsma hɔn wɔkara yɔnmabe n’a kia wiin nɛ, ² wiin fa to awe Wuro wiin ɔɔn niɔn sɔɔ ga, a y’a wɛbareyani wiin na do sɔɔ n’a bii fɔn diniyan na dutigɛsangan ma, ye ne yɔɔn wɔn ma, ³ awe wiin ɔɔn ye domada kalfa ne ma fanɛ hɔn wagati na tigɛ yi ma ke na kisita Wuro yirado ma. ⁴ Ma bo sɛbɛ fanɛ Tite ma, wiin ɔɔn ne nɔ yɛrɛworo yɔnmabe baraka hɔn, ke kwɛ wiin ma ɔn da Tɔn Wuro kɔ ke na kisita Yezu Krista tɛ ye y’a woramadiabe kɔ y’a siara ta be ma. ⁵ Be ɔɔn n’a za da ma be to Kerɛtekma brɛ, wiinye bara ɔɔn dutigɛ yeyɛ, wɔnwɔ ma kia be ɔɔn sɛrɛ ta ɔn zɛngɛnkma tigɛtigɛ kire wɔ hɔn wɔkara ma ye yira be ma wiin nɛ. ⁶ Zarakɛdo daga ne ti ye na sɔɔn sii na ga. Yàra tala tala kma, yɔnmabe ne ti ye nɔmanɛ hɔn, sɔɔn sbɛ ne wiinye zarake telebareyafa wɛlɛ magada na ga. ⁷ Wiinye kma ɔɔn na ne ti Wuro ta kɔnkma zin, zarakedo daga ne ti ye na ga bare ye ti Wuro tado hɔn. A ka ne yɛrɛyirebɛta ga, ɔn ka ne worote ga, ɔn ka ne mɛnɛta ga, ɔn ka ne birisikwinita ga, ɔn ka ne peremagafrɛkiata ga. ⁸ A daga tɛ samarafigɛta na, dafɔretɛ ne dia a ma, a ne kakirite, ne sɔntele ne sɔɔn na kìni yi, ne sbɛ n’e yɛrɛ foga. ⁹ A daga tɛ sɔɔn na wiin ɔɔn dɔɔ yɔnmabe na bɛreda ma kala wiin pere sɔɔn ma. Wɔn ɔɔn na tɛ a ne sbɛ ne sma kala kɔ tɔɔ na kìni yi ne sbɛ ne firesma ta firedo yira ye ma. ¹⁰ Bare sma na yaan ye ɔɔn ti Ziwifu wɔ hɔn wiinye ɔɔn maga ne sma firebɛ kɔ y’a dakwiɛro. ¹¹ Ka b’e to ga. Bare wiinye da ɔɔn daga ga, wɔn ye sma kala kɔ ɔɔn ne peremagagwana tɔɔ ye ta. Ye kɔnkma na yaan ye firebɛ fɔrɔna. ¹² Ye na boo yɛrɛ, wiin ɔɔn mane Wuro ta daberebɛta mane da ye Kerɛtekma niɔnsɔsma sangan pepe ma, ye ye wɔkara sɔkobafrɛ na yaga ye, ye ye yɔngɔnsma wiinye ɔɔn zɔnfrɛda dama ɔɔn giati. ¹³ Wɔnna domada wɔ tian. Wɔn ye na be daga ne gwangwana ye ma fɔrɔna wiin fa to ye sbɛ yɔnmabe na fɔrɔ yi gun. ¹⁴ Ye ka ne dɔɔ Ziwifu ta sian ma ga, kɔ sma ta yirada ma wiinye ɔɔn ye timi bere tian ma ga. ¹⁵ Wiinye kma ɔɔn kìni, wɔnwɔ ta frɛ pepe kìni. Nka wiinye kma ɔɔn yanganmu ɔn mane dian yɔnmabe na ga, foyi kìni wɔnwɔ ta ga. Ye kakiri kɔ ye ta tɔɔ pepe yɛrɛ dɔɔn mɛ. ¹⁶ Ye Wuro ta tɔɔ ta y’a bara na nka ye ta tɛda n’a dɔrɔ da ye tian ga. Ye dayagatɛsma, magasma wiinye kma ɔn sbɛ ne dafɔre ta ga.

¹ A ma bi han, wiin kala ɔɔn tɔɔ na fɔrɔ yi ka sɔɔn hɔn, sma kala kɔ wɔn. ² Be yira sɔnmlala ma, ye ye tɛ siɛbɛsma na ne da giati, yɔnmabe na fɔrɔ yi ne ti ye hɔn kɔ dadiamabe, ye ne sɔmna. ³ Yee yàrasɔnmlala daga ne ti mɛ, ye ta sirewɔ ne tele. Ye ka ne dakuro na baro ta ga, ɔn ka tɛ mɛnɛfa ta tere na ga. Ye daga ne ladi na fɔrɔ ye ɔɔn yira sma ma. ⁴ Wɔn ɔɔn na tɛ ye sbɛ yɔdala sma, ye sbɛ ye bangannɛ da diabɛ ye ma kɔ ye nɔmanɛ. ⁵ Ye kɔrɔ hɔn ne kìni, ye ne tele, ne kwa y’a kɔnkma ma, ye zugo ne dia, ye ne mɔɔ ye bangannɛ ta wiin fa to sɔɔn ka naa bɛredayaga yira n’e dɛ Wuro domada ma ga. ⁶ Smazɔre ladi kɔ datɔ mɛ. ⁷ Tɛ bia tɛdafɔre yɔnnɔ ne tɔɔ bia tɛda pepe hɔn, bia kala hɔn kɔ bia siɛbɛ hɔn. ⁸ Bia bɛreda ne kìni ɔn ka ne sɔndakia ye ga, wiin fa to zugu ka naa fa gun n’a yira n’a dɛ ke ma ga, nka a piri. ⁹ Be tɛrɛ ladi ye ne mɔɔ ye wɔnnakma ta ye ta da pepe na, ye ka n’e dakwiɛ ga wiin fa to ye da ne dia ye ma. ¹⁰ Ye ka ne kimi ga. Ye ne y’a telebe dɔrɔ sangan pepe ma. Wɔn ɔɔn na tɛ ye ke na kisita Wuro ta kala wiin gun, ye sbɛ kiu ka a ma y’a da pepe hɔn. ¹¹ Bare Wuro ta woramadiabe wiin ɔɔn kisi sulu, a dɔre sma pepe ye na. ¹² A ke kala ke ne sbɛ ne maga datɔbareyafa kɔ bo diniyan be hɔn da na wiin fa to ke ne ti diniyan hɔn ne ke yɛrɛ kɔrɔse ne telebe ta ne makare. ¹³ Ke yɔɔn wiin nihɔndiakɔ we ma, yee ke daga tangan n’a yɛ́rɛ. Awe kɔɔ we ma kià Wurogwaga ne ke na kisita Yezu Krista na dɔre. ¹⁴ A ye yɛrɛ pere ke ye na wiin fa to a ke dɛn ke wa telebareyada pepe hɔn, ɔn ke ta y’a kma na wiinye ɔɔn kìni ne sbɛ ne dafɔre ta. ¹⁵ Yee be daga ne bɛre ne sma ladi ne yira sma ma kɔ sebe wiin fa to sɔɔn ka ne be dɛgɛbɛ ga.

¹ Be yira sma pepe ma, ye ye daga ne mɔɔ kitisɔre ta kɔ fanganmɛ ta ne dian dafɔre ta tɛ na sangan pepe ma. ² Ka ka sɔɔn sii vini ga, ɔn ka ne birisikwini ga, ne makare, ka woro ma ne dia sangan pepe ma sma pepe ma. ³ Bare ke yɛrɛ mane pia ne kakiridarakma mɛ, ne magasma ne fire nihɔndiada sii pepe kɔ dangamu na da sii pepe ne dia ke ma, ke ne ti zugoyagafa kɔ yinnanayanfa hɔn ne ke yɛrɛ yirebɛ ne ke ne plala dɛgɛbɛ. ⁴ Nka ke na kisita Wuro ta foro kɔ a ta woramadiabe naa dɔre sma ye na wiin sangan ma, ⁵ a ɔɔn ke kisi. A na ke kisi kià dafɔretɛ do ma ga, nka a na ke kisi bare a makare ke ma. A ke kisi ɔn niwun pere ke ma, zio kɔ Wuro ta Ni baraka hɔn. ⁶ A wɔnna Ni we zibɛ ke ma yaan ke na Kisita Yezu Krista baraka hɔn, ⁷ wiin fa to ke sbɛ tɛ smatele na a ta woramadiabe baraka hɔn ɔn tɛ wɛbareyani na kɔrɔzɔnsma na kià yɔnmabe baraka hɔn. ⁸ Wɔnna bɛreda yɔnmabe na ye. Ma kia be be yinnamalɔ n’e na kayan ta wiin fa to wiinye kma pepe ɔɔn yɔɔn Wuro ma, ye ye yangan ne dafɔre ta. Wɔn ɔɔn fɔrɔ ɔn ne daga sma ta. ⁹ Nka wiinye da ɔɔn zanada, ka be ka wɔnwɔ hɔn ga. Bo dumakma ta da, bo dakwiɛro bo tɛn na da na kayan. Ye foyi fɔrɔ ga, ye zanada. ¹⁰ Wiin te ɔɔn sma ta dɛ́gɛ kia, be ɔɔn bɛre a ma tele da pla, a ma dian ga, be be kiɛlɛ a ma. ¹¹ Be tɔɔ da wɔnna sɔɔn sii sofɔrɔ dra. A kakiɛtɛta, a wɔɔ y’a kakiɛtɛ hɔn ye sana. ¹² Ma ɔɔn Aritemase wɛlɛ Tisike fanɛ be ta wiin sangan ma, be sige be yɛrɛ ma ɔn naa ne brɛ Nikopolisekuru hɔn bare wɛɛn ma kia pian hɔn ta. ¹³ Taa kitisɔta Zenasi kɔ Apolɔse ta yuru na da na wiin fa to ye ka pna foyi na ga. ¹⁴ Kià kma daga dafɔretɛnɔn sma mɛ wiin fa to ye ne sbɛ ne bɔɔ durukma ta da yɔnnɔhɔnwa wiinye ɔɔn sbɛ ne naa. Wɔn ɔɔn na tɛ ye ka ne tiye zana yee ga. ¹⁵ Ne tikwɛre pepe bire be na. Ke da dia wiinye kma ma yɔnmabe do ma, kià foo wiribɛ ye ma. Wuro tɛ a y’a woramadiabe ta ka pepe ma.