DƆREDA
11 Bo Yezu Krista ta dɔreda. Wiinye da ɔɔn na tɛ bɛɛ yɔɔ ne zɔgɔ, wɔnwɔ Wuro mane ɔɔn pere a ma wiin fa to a ye dɔrɔ y’a baratɛre ma. A y’a mɛlɛkɛ fanɛ y’a baratɛta Zan ta wiin fa to a naa n’e nɔma dɔrɔ a ma. 2 Awe Zan ɔɔn Wuro domada yira. A wiin fa pepe za Yezu Krista ta da na mɛ, a wɔnwɔ pepe na siɛrɛbe ta. 3 Wiin te ɔɔn Wuro domada na sɛbɛ kala, ɔn ne mɔɔ bɔ dɔreda bɛ na domada na, wiin fa ɔɔn sɛbɛ ye hɔn a ne dɔɔ wɔn ma, wɔnna te dangamu bare wɔnna da wɔ pepe tɛsangan vetra. 4 Mɛ Zan ɔɔn bɔ sɛbɛ fanɛ Wuro ta kɔnkma ta nɛmɛ kwɛkuru kopra ma wiinye ɔɔn ti Azigiamana hɔn ɔn da: Wuro wiin ɔɔn mane pia ne tiye, awe wiin ɔɔn tiye ɔn ne naa, awe kɔ y’a ni kopra wiinye ɔɔn taa a ta fanganmakware kiege ma, ye tɛ ye y’a woramadiabe kɔ y’a siara ta ka ma. 5 Yezu Krista wiin ɔɔn siɛrɛta na tele yi, awe wiin ɔɔn pia winnisa sara yɔ, awe wiin ɔɔn diniyan hɔn fanganmɛ na fanganma, a tɛ a y’a woramadiabe kɔ y’a siara ta ka ma. Awe Yezu Krista wiin ɔɔn ke da diabɛ ye ma ɔn ke dɛn ke wa kakiɛ hɔn ye too baraka hɔn, 6 ɔn ke ta salakawɛkuru na ye Tɔn Wuro ma, yirebe kɔ sebe wiri a ma sangan pepe ma. Amina. 7 Ka bo a ti ne naa daba woro hɔn, sma pepe ne na n’a za hali kɔ wiinye kma yɛrɛ ɔɔn n’a wuro n’a sɔro. Diniyan hɔn kma pepe na ti ninabannɔ hɔn awe ye na. Ɔɔn, wɔn tian. Amina. 8 Matigi Wuro da ye ɔɔn Alefa ɔn ne Womega. Wɔn kɔrɔ dubido kɔ wɛbɛdo. Sbɛpepenate wiin ɔɔn mane tiye, ɔn ne tiye, ɔn ne naa. 9 Mɛ Zan, ka na plalo ne ka tikwɛta yannɛ hɔn kɔ sɔmna hɔn, Yezu ye na wiinye ɔɔn n’a ta fanganmabe hɔn kma gun, ma mane ti yɛngɛnzu na korilɔ ma Patimɔse bare ma mane Wuro domada yira ne Yezu siɛrɛ. 10 Wuro ta Ni mane zii ne ma Matigi ta kɔɔ ma, ma ɔɔn bɛrekɔn na yire yi boo mɔɔ ne timi wɔkara tolakɔn, 11 a ne kwa: «Be wiinye frɛ za, ye sɛbɛ bɔɔ sɛbɛ hɔn ɔn n’e fanɛ Wuro ta kɔnkma na nɛmɛ kwɛkuru kopra ma wiinye ɔɔn ti Efɛse kɔ Simirine kɔ Pɛregame kɔ Tiyatire kɔ Sarɛde kɔ Filadɛlefi kɔ Lawodise.» 12 Wiin bɛrekɔn we ɔɔn mane yira ne ma, ma naa ne zin bere, da ye tɛ m’a na te sege, ɔn da m’a sege, a ma sanɔ na fintinadɛfrɛ kopra ma ɔɔn za. 13 Yewɔ fintinadɛfrɛ wɔ woro hɔn, fa mane ti yeyɛ ne sa sansukanpla ta. Zogwaga boo mane kiɛ a ta, sanɔ na yɔyɔsɔfa ne ti a dun hɔn. 14 A wɔɔn pepe mane furo perepere, a yinna ne wɔkara togakini. 15 A kaɛn mane wɔlɔ wɔkara danyan wiin ɔɔn yuu togo hɔn ɔn nɔnɔbɛ, a bɛrekɔn ne wɔkara yɛngɛnzu digekɔn. 16 Mamala nɔma kopra mane ti a digesoro hɔn. Tabaku na dapla na dodia yi ne sa a do hɔn. A zin ne wɔlɔ wɔkara sin tɛ ne ti wiin nɛ ye na tobasangan ma. 17 M’a za wiin sangan ma, ɔn zii bɛrɛ a wee wɔkara soro. A ɔɔn ye digesoro dɛ ne ma ɔn da: «Ka kwan ga. Mɛ ɔɔn dubido ɔn ne wɛbɛdo 18 ɔn ne ti ni na. Ma mane siri nka ma ti ni na basiɛ ɔnkɔ suu. Siri kɔ wara na kore na sɔgɔlɔ ti ne ta. 19 Awale be wiinye frɛ za, ye sɛbɛ. Wiinye frɛ ɔɔn tiye, ɔnkɔ wiinye da ɔɔn na ne tɛ. 20 Be wiinye mamala nɔma kopra wɔ za ne digesoro hɔn kɔ wiin sanɔ na fintinadɛfrɛ kopra wɔ, bɔ wɔnwɔ na bunu. Mamala kopra wɔ wɔn Wuro ta kɔnkma na nɛmɛ kwɛkuru kopra wɔ ta mɛlɛkɛ. Fintinadɛfrɛ kopra wɔ ne a ta kɔnkma na nɛmɛ kwɛkuru kopra wɔ.»
21 Wuro ta kɔnkma wiinye ɔɔn ti Efɛse, sɛbɛ fanɛ ye ta mɛlɛkɛ ma ɔn da: «Mamala nɔma kopra ti wiin te digesoro hɔn, a ne yara sanɔ na fintinadɛfrɛ kopra woro hɔn, a da, 2 ye y’a ta tɛda pepe tɔɔ. Y’a mane bara na sige ye ta ɔn da na yaan ye sɔmna. Ye ye tɔɔ d’a sbɛ ne zugoyagasma ta da sɔmna ga. Ye wiinye kma ɔɔn kwa, ye yiwɔ fanɛsma kamasɔrɔ ye mane wɔnwɔ ga, y’a man’e taa n’e sege ɔn n’a za da ye niɔnsɔsma. 3 Y’a woro sige, y’a mane yannɛ yi togo ye na nka hali kɔ wɔn, y’a sɔmna wɔnna yannɛ wɔ hɔn ɔn ma ye kɔn siribɛ ga. 4 Ye nka y’a yi dadiabɛ ye ma wɔkara a mane pia n’e ta wiin nɛ ga. Ye wɔn ye na y’a zarake. 5 Y’a fire wiinye hɔn, y’a ye kakiri to wɔnwɔ ɔn ye zugo katra ɔn y’a gweretɛda ta. Y’a ma wɔn ta ga, ye ye na naa a brɛ ɔn naa y’a fintina bii n’a wa a tido hɔn. 6 Ye nka a ta tɛ ɔɔn mane dian Nikolayitekma ta tɛda nɛmɛ na wɔkara mɛ ga, ye wɔn ɔɔn n’a da dia ye ma. 7 Ye Wuro ta Ni wiin fa yira Wuro ta kɔnkma ma, ye tra ɔɔn ne ti wiin te ta, y’a mɔɔ a na. Ye ni na sɔ wiin ɔɔn ti Wuro ta sɔkoro hɔn, ye ye na wɔn nɔmanɛ pere sbɛsma ma zama na.» 8 Wuro ta kɔnkma wiinye ɔɔn ti Simirine, be sɛbɛ fanɛ ye ta mɛlɛkɛ ma ɔn da, ye wiin ɔɔn gwere yi ne wɛbɛ yi, wiin ɔɔn mane siri ɔn bere winni, ye wɔn da: 9 «Y’a ta yannɛ kɔ a ta duru yɔnnɔ tɔɔ. Ye nka a frɛte. Ye wiinye kma ɔɔn ye yɛrɛ ta Ziwifu na kamasɔrɔ ye ma ne wɔnwɔ ga, ye wɔnwɔ n’a togo yaga. Ye y’e tɔɔ. Ye wɔnna sma wɔ Sitanɛ ta nɛmɛ kwɛkuru na bɔɔ. 10 Ye wiinye yannɛ ɔɔn na n’a gun, y’a ka kwan ye na foyi na ga. Segerɛ, ye Sitanɛ na n’e na bɔɔ taa n’e sege ɔn n’e ka kaso hɔn. Ye ye na yin fun gun yannɛ hɔn. Ye ye daga tɛ yɔnmasma na fɔn yaa kayan y’a siri ma. Ye ye ɔɔn wɔn ta, ye ye na ni na fanganmabanfola pere ye ma. 11 Wuro ta Ni wiin fa yira a ta kɔnkma ma, turu ɔɔn ne ti wiin te ta, a mɔɔ a na. Wiinye ɔɔn sebe gun, wɔnwɔ na yannɛ siri plalo ta ga.» 12 Wuro ta kɔnkma wiinye ɔɔn ti Pɛregame, be sɛbɛ fanɛ ye ta mɛlɛkɛ ma ɔn da: «Tabaku na dapla na dodia yi ti wiin te soro hɔn, wɔn bɔ da bɛ yira 13 ɔn da, ye m’a ta tangando tɔɔ, Sitanɛ ta fanganmakware tido hɔn. Ye nka a yɔɔn yi ma yɛ mane ye do bere yi ye na ga, hali ye yi siɛrɛta na fɔrɔ yi Antipase yɛɛ wiin sangan ma ye brɛ Sitanɛ ta tangando hɔn. 14 Ye nka y’a zarake zɔgɔ. Ye bɔɔ sma ti a brɛ wiinye ɔɔn dian Balamu ta da na kala na. Wiin Balamu we ɔɔn mane da Balake ma, y’a gian wɔrɔ Isirayɛlenɔmanɛ na n’e mama n’e ka fiankankika ta nɛmɛ hɔn kɔ vunafa hɔn. 15 Ye yee bɔɔ sma ti ka brɛ yɛ mɛ wiinye ɔɔn dian Nikolayitekma ta kala na. 16 Ye ka daga ka zugo katra. Ye ka ma ka zugo katra ga, ye ye na naa nɔɔ hɔn yɛ o, ɔn naa n’e kwini kɔ ye do hɔn taba. 17 Wuro ta Ni wiin fa yira a ta kma ma, turu ɔɔn ne ti wiin te ta, a mɔɔ a na. Wiinye ɔɔn sebe gun, ma na maanɛ boo pere wɔnwɔ ma, wiin ɔɔn mane dɔɔn sma na. Ma na dɔgɔnɔ na furo yi pere ye pepe tala tala ma mɛ, togawun sɛbɛ wiin ma. Sɔɔn sii n’a tɔɔ ga fɔn a na gunta.» 18 Wuro ta kɔnkma wiinye ɔɔn ti Tiyatire, be sɛbɛ fanɛ ye ta mɛlɛkɛ ma ɔn da: «Wuro Nɔ ɔɔn bɔ da bɛ yira. A yinna kini wɔkara togakini. A kaɛn ne ti wɔkara dayan na wɔlɔ yi. 19 Ye m’a ta tɛda pepe tɔɔ, a ta dadiamabe kɔ a ta yɔnmabe kɔ a ta bara kɔ a ta sɔmna pepe. Y’a ta basiɛ tɛda yaan ye gwere ye ma. 20 Ye m’a zarake wiinye na, bo wɔnwɔ, y’a dian Zezabɛle to a ɔɔn wɔɔ ye brɛ. Wɔnna ya we wiin ɔɔn yira ne kwa, yi Wuro ta daberebɛtaya ne y’a baratɛre firebɛ n’e kala kɔ vunatɛ kɔ fiankankikɛ ta nɛmɛ. 21 Ye ye mane wagati pere a ma wiin fa to a ye zugo katra, ye nka a kia ye zugo katra ɔn saa y’a vunafa na ga. 22 Ye wɔn ye na ye na ninabannɔ na yaga yi dra a ma kɔ a vunatɛkwɛre ma mɛ fɔn ye ɔɔn saa a ta tɛda na. 23 Wiinye kma ɔɔn dɔɔ a ma, ye ye na n’e yɛɛ wiin fa to Wuro ta kɔnkma pepe tɔɔ da yi ɔɔn sɔɔn kɔrɔ hɔn da tɔɔ n’a ta giatɛ tɔɔ ɔn ne na ka pepe talatala ta tɛda na ku sara a ma. 24 Ye nka ki Tiyatirekmasɛrɛ, wiinye ɔɔn ka nii ka wɔnna kala we hɔn ɔn ma dian Sitanɛ ta fafɔrɔ we hɔn ga, ye ye bɔɔ barakwɛ ka ye ma ga. 25 Ye nka wiin ɔɔn ti ka ta, ye ka kwa wɔn ma fɔrɔna fɔn yaa kayan y’a naa ma. 26 Ye wiin te ɔɔn wɔɔ y’a bara hɔn fɔn yaa kayan wɛbɛsangan ma, ye wɔnna te ɔɔn sbɛta. Ye ye na tɛ a ne ti sii wɔ wɔɔn na. 27 Y’a na n’e nɛ kɔ balogwangan. Ye ye vɛrɛsu webe wiin nɛ, 28 ye yi yɛrɛ n’e na sebe gun ye Tɔn ta wiin nɛ mɛ, ye ye na kɔmulu pere a na te ma. 29 Wuro ta Ni wiin fa yira a ta kɔnkma ma, tra ɔɔn ne ti wiin te ta, a mɔɔ a na.»
31 Wuro ta kɔnkma wiinye ɔɔn ti Sarɛde, sɛbɛ fanɛ ye ta mɛlɛkɛ ma ɔn da: «Wuro ta mɛlɛkɛ kopra kɔ mamala kopra ti wiin te soro hɔn, wɔn bɔ da bɛ yira ɔn da, ye y’a ta tɛda tɔɔ, ye d’a togo tuma ɔn d’a ti ni na kamasɔrɔ a ne siri. 2 Y’a ye yɛrɛ kɔrɔse, ye wiinye sɛrɛ wɔ ɔɔn tɛ siri na, y’a ye wora sigebɛ. Ye bare y’a ta tɛda za ye ne fɔrɔ y’a Wuro yinna hɔn ga. 3 Ye wɔn ye na, y’a wiin fa mɔɔ ɔn wiin fa za, y’a ye kakiri to kɔ wɔn. Y’a kwa a ma, ɔn ye zugo katra. Y’a ɔɔn ma kɔrɔse ga, ye ye na naa wɔkara panɔ. A tɔɔ da wiin sangan ma ye na naa bare a na ga. 4 Ye nka hali kɔ wɔn, ye bɔɔ sma ti a ta Sarɛde wiinye ɔɔn ye yɛrɛ yanganmu ga. Ye wɔnna sma wɔ na zofuro ka ɔn yaa yi yee bare ye daga n’e ta. 5 Ye yee sbɛta na zofuro ka. Ye ye na n’a togo dibe ni na sɛbɛ hɔn ga, ɔn ne na taa a ta da na ye Tɔn kɔ y’a mɛlɛkɛ zin hɔn mɛ. 6 Wuro ta Ni wiin fa yira a ta kma ma, turu ɔɔn ne ti wiin te ta, a mɔɔ a na.» 7 Wuro ta kɔnkma wiinye ɔɔn ti Filadɛlefi, be sɛbɛ fanɛ ye ta ni ma ɔn da: «Wiin ɔɔn kìni yi ne tian na te, Davidi ta kɔɔn na lɛgɛfrɛ ti wiin te ta, wiin te ɔɔn koro koba, sɔɔn sii sbɛ n’a pi ga. A ɔɔn n’a pi mɛ, sɔɔn sii sbɛ n’a koba ga, wɔn da: 8 Ye ye bia tɛda tɔɔ. Ye ye tɔɔ da fanganduru ti be na. Ye hali kɔ wɔn pepe, be ne kwa y’a bɛreda ma mɛ. Ye be be do bere ye togo ye na ga. Ye yi mane do kɔba be zin hɔn, sɔɔn sii ma sbɛ n’a gwolo ga. 9 Ye ye Sitanɛ ta nɛmɛ kwɛkuru na sma pere be ma. Bare ye niɔn sɔɔ ne yira ne kwa, ye yiwɔ Ziwifu kamasɔrɔ ye mane wɔnwɔ ga. Ye ye na tɛ ye naa zii yoloko be wee ɔn tɔɔ da yi ɔɔn be da diabɛ ye ma. 10 Ye bia tɛ ɔɔn kwa ye domada ma kɔ yɔnmabe, ye wiinye yannɛ ɔɔn na sma pepe gun, ɔn tɛ diniyan hɔn kma pepe na, ye yi na kwa be ma wɔnwɔ sangan ma mɛ. 11 Ye bɛɛ yɔɔ ne zɔgɔ, ye na naa. Ye wiin fa ɔɔn ti be sra hɔn, ye be kwa a ma, ka tɛ sɔɔn naa bia fanganmabanfola tɔɔ be ta ga. 12 Ye wiin te ɔɔn sebe gun, ye ye na wɔnna te ta sɔpagalo na y’a Wuro ta kɔɔn hɔn. Y’a na sa yeyɛ titiri ga. Ye ye na Wuro togo sɛbɛ a ma. Ye y’a Wuro ta kuru Zeruzalɛmuwun wiin ɔɔn tuma y’a Wuro brɛ wuro hɔn ɔn zii, ye ye na wɔn togo sɛbɛ a ma mɛ. Ye ye na ye togawun sɛbɛ a ma mɛ. 13 Wuro ta Ni wiin fa yira a ta kma ma, turu ti wiin te ta, a mɔɔ a na.» 14 Wuro ta kɔnkma wiinye ɔɔn ti Lawodise, be sɛbɛ fanɛ ye ma ɔn da: «Ye ye wiin te wiri Amina, awe wiin ɔɔn siɛrɛta na tele yi ne a na siɛbɛ yi, awe wiin ɔɔn Wuro ta danfrɛ pepe sabɛdo, a da, 15 ye ye bia tɛda za. Ye be kuna ga, ɔn mane toba mɛ ga. Ye nka be ma ne toba wɛlɛ ne kuna, ye wɔn mane na dia yi ye ma. 16 Ye nka bia tɛ ɔɔn ne saa yee, mane toba ga, mane kuna mɛ ga, ye ye na be bɛn be wa ye do hɔn. 17 Ye bia tɛ ɔɔn ne yira ne kwa, ye be naforote, ye be be yɛrɛ ta naforote na, ye be mako sa foyi hɔn ga, ɔn ma tɔɔ da be durute ga, ne makaredia, ne fangandan, ne fuu, be kɔn ne gwelengwele, 18 ye wɔn ye na y’a kia be ta ɔn da wiin sanɔ ɔɔn tɛtɛrɛ kìnibɛ togo hɔn, ye be naa wɔn tɛrɛ ye ta ɔn be yɛrɛ ta naforote na ɔn zogafuro tɛrɛ ɔn n’e ka wiin fa to be du ka naa sa sire ga ɔn suu tɛrɛ n’a ka be yinna hɔn wiin fa to be yinna kibɛ. 19 Ye wiinye kma pepe da ɔɔn dia yi ma, y’e yinna hɔn toba n’e ladi. Ye wɔn ye na, be daga bia giatɛ bere ɔn be zugo katra. 20 Ye bo ye taa kuledo ma ne kwangwaga. Ye wiin te ɔɔn ye kɔn mɔɔ ɔn kibɛ ye ma, ye ye na kɔ a na te brɛ ɔn zɔn kɔ lege, a na te zɔn kɔ ye nɛmɛ mɛ. 21 Ye ye na tɛ sbɛta tangan kɔ ye nɛmɛ y’a fanganmakware ma wɔkara yi yɛrɛ sebe gun wiin nɛ ɔn yaa tangan kɔ ye Tɔn a ta fanganmakware ma. 22 Wuro ta Ni wiin fa yira a ta kɔnkma ma, turu ti wiin te ta, a mɔɔ a na.»
41 Wɔn timi ma ɔɔn koro boo za, a ne kibɛ wuro hɔn, ma mane pia wiin bɛrekɔn we mɔɔ, a ne bɛre ne ta ne wɔkara tola digekɔn, wɔn ɔɔn da ne ma, ye ma ba bɛɛ, ye wiin fa ɔɔn na tɛ, ye ɔɔn sbɛ wɔn dɔrɔ ne ma. 2 Wɔnna nɔɔ tala hɔn Wuro ta Ni mane zii ne ma. Ma da ma sege ɔn fanganmakware boo za wuro hɔn, sɔɔn boo ne tangan a ma. 3 Wiin te ɔɔn mane tangan a ma, a zin mane wɔlɔ ne sa dɔge na tereba ye ta. Yirebe mane wɔrɔ ne kware we mini wɔkara bɛgɛfrɛ na sarazu na ye. 4 Fanganmakwara kioro ne nɔma naa mane tigɛ ne fanganmakware we mini, sɔnmlala sma kioro ne nɔma naa ne tangan wɔnwɔ ma, zogafuro ne ti ye ta, sanɔ na fanganmabanfolɛ ne pipi ye pepe ta. 5 Wurosian kɔ bɛrekɔn kɔ gwɛnmɛkɔn mane sa fanganmakware we hɔn. Fintina nɔma kopra mane kini fanganmakware we zin. Wɔn Wuro ta ni kopra wɔ. 6 Zu na yaan ye mane wɔrɔ fanganmakware we wee, a zin ne wɔkara bulazu. Nimafrɛ naa mane taa kware we mini mɛ, yinna ne ti ye ta zin kɔ timi. 7 Nimafrɛ wɔ na gwere yi mane sa zara ta, plalo we ne sa yantolazoro ta, saaro we zin ne saa sɔɔn yi ta, naanɔ we zin ne sa susugo yi ta wiin ɔɔn ti tire hɔn. 8 Kaba konalanala mane ti wɔnna nimafrɛ wɔ pepe talatala ta. Ye kɔrɔ hɔn kɔ ye kiɛgɛ pepe ne paga yinna na. Sin kwɛ wuru ma ye mane turo sɔn, mane bɔɔ ga. Ye mane sɔn ne kwa, ye kìni yi, kìni yi, kìni yi, Matigi Wuro Sbɛpepenate ɔɔn kìni yi. Awe wiin ɔɔn mane tiye, ɔn ne tiye, ɔn ne naa. 9 Nimafrɛ wɔ mane fanganmakware ma tanganta we yirebɛ wiin sangan ma pepe, n’a togo ta ne baraka yira a ma, awe wiin ɔɔn ti ni na sangan pepe ma, 10 sɔnmlala sma kioro ne nɔma naa wɔ mane tɛ ne zii ne yoloko fanganmakware ma tanganta we zin. Wiin te ɔɔn ti ni na sangan pepe ma, ye ne wɔn yirebɛ ne y’a fanganmabanfolɛ dra a wee ne kwa, 11 ye Matigi kià Wuro, be daga yirebɛ na, togo kɔ sebe pere be ma bare bi ɔɔn frɛ pepe dan, be mane kia ye ne tiye, ye ɔɔn dan.
51 Wiin te ɔɔn mane tangan fanganmakware ma, ma mane sɛbɛ na kwini yi za wɔn digesoro hɔn. Sɛbɛda mane ti wɔnna sɛbɛ wɔ kɔrɔ hɔn kɔ a ku pepe ma, tɔbe kopra ne dɛ a ma. 2 Ma mane mɛlɛkɛ boo za sebe ti wiin ta, a ne sɔngɔ ne kwa, ye kɔ te ɔɔn sbɛ ne sɛbɛ wɔ na tɔbe yaga ɔn n’e koba? 3 Nka wurokɔn ma yo, lagakɔn ma yo, lagakɔn wee yo, sɔɔn sii mane gun yeyɛ wiin ɔɔn sbɛ ne sɛbɛ wɔ koba wɛlɛ ɔn sege ye hɔn ga. 4 Sɔɔn ta tɛ ɔɔn ma mane gun wiin ɔɔn sbɛ ne sɛbɛ wɔ koba wɛlɛ ɔn sege ye hɔn ga, wɔn mane mɛ ta ma ɔɔn ne mɔgɔ fɔrɔna. 5 Nka sɔnmlala wɔ na boo ɔɔn da ne ma, ye ma ka mɔgɔ ga. Ye ma sege rɛ, ye Zuda dumakma na boo wiin ɔɔn wɔkara zara, Davidi timikma na boo, ye wɔn sebe gun. Y’a na sɛbɛ wɔ na tɔbe kopra wɔ yaga ɔn n’e koba. 6 Ye da ye tɔɔ, ma ɔɔn Gwanɔ boo za fanganmakware we woro hɔn kɔ nimafrɛ naa wɔ woro hɔn kɔ sɔnmlala wɔ woro hɔn, a ɔɔn tuma taa, ye ne wɔkara a mane wɛ salaka na. Bian nɔma kopra kɔ yinna nɔma kopra mane ti a ta wiinye ɔɔn Wuro ta ni kopra wɔ wiinye ɔɔn fanɛ lagakɔn na bii pepe hɔn. 7 Wiin te ɔɔn mane tangan fanganmakware ma, a ɔɔn ye dɔbɛ ɔn naa sɛbɛ wɔ tɔɔ wɔn digesoro hɔn. 8 A sɛbɛ wɔ gun wiin sangan ma, nimafrɛ naa wɔ kɔ sɔnmlala sma kioro ne nɔma naa wɔ ɔɔn zii yoloko awe Gwanɔ we wee. Kolinzo mane ti ye pepe ta kɔ sanɔ na mɛnɛfrɛ wiinye ɔɔn pagapaga wunnudiafrɛ na, wɔn wiinye ɔɔn mane dɛ́gɛwɛsma ta wuromɛ. 9 Ye mane yirebɛturu na wun yi sɔn ne kwa: «Bi ɔɔn daga sɛbɛ bii na ɔn n’e na tɔbe yaga. Bare be mane wɛ salaka na, be ɔɔn dumakma hɔn kma pepe kɔ sidabɛrere hɔn kma pepe kɔ giamana hɔn kma pepe kɔ sii pepe hɔn kma wɔɔn wa Wuro ma be too baraka hɔn. 10 B’e ta salakawɛkuru na kià Wuro ma, ye ne na tangan fanganmabe na lagakɔn ma.» 11 Ye da ye tɔɔ, ma ɔɔn mɛlɛkɛ na yaan ye kɔn mɔɔ fanganmakware we kɔ nimafrɛ wɔ kɔ sɔnmlala wɔ kiege ma. Ye mane yaan fɔrɔna, ye do mane sbɛ ne tɔɔ ga. 12 Ye mane kwɛ ne sɔngɔ fɔrɔna ne kwa, ye wiin Gwanɔ ɔɔn mane wɛ salaka na, ye wɔn ɔɔn daga sebe kɔ yirebe kɔ naforo kɔ datɔ kɔ fangan kɔ togo gun, yirebe pere a ma n’a yirebɛ. 13 Danfrɛ pepe wurokɔn ma kɔ lagakɔn ma kɔ lagakɔn wee kɔ yɛngɛnzu hɔn, ye pepe kɔn ma mane ɔɔn mɔɔ, ye ne kwa: «Wiin te ɔɔn tangan fanganmakware ma, wɔnna te kɔ Gwanɔ ma yirebe kɔ togo kɔ sebe daga wiri sangan pepe ma.» 14 Nimafrɛ naa wɔ mane kwa, ye Amina. Sɔnmlala wɔ ɔɔn zii yoloko ɔn yirebe ta.
61 Bo wɔn ɔɔn tɛ, Gwanɔ we naa tɔbe kopra wɔ na gwere yi yaga wiin sangan ma, ma ɔɔn nimafrɛ naa wɔ na gwere yi sɔngɔkɔn mɔɔ yire fɔrɔna wɔkara wuropɛlɛlo kɔn, a ɔɔn da ye naa. 2 Ma mane siofuru boo ɔɔn za. Wiin te ɔɔn mane tangan a ma, dɔngɔn mane ti wɔn ta, fanganmabanfola ɔɔn pere a ma, a ɔɔn yaa ne sbɛta sebe gun na. 3 A naa tɔbe wɔ na plalo yaga, ma ɔɔn sɔkobafa plalo sɔngɔkɔn mɔɔ, wɔn ɔɔn da ye naa. 4 Boo sioza ɔɔn sa ne pɛnɛ bɛnbɛn. Wiin te ɔɔn mane tangan a ma, sebe mane pere wɔn ma ɔn siara wɛ lagakɔn ma wiin fa to sma n’e nɛmɛ yɛɛ. Kunkwinitaba na kuro yi boo mane pere a ma. 5 A naa tɔbe wɔ na saaro yaga wiin sangan ma, ma ɔɔn sɔkobafa saaro sɔngɔkɔn mɔɔ, a ɔɔn da ye naa. Ma ɔɔn siodungun boo za. Wiin te ɔɔn mane tangan a ma, frɛzinzinifa mane ti wɔn soro hɔn. 6 Ma mane bɛrekɔn boo mɔɔ nimafrɛ wɔ woro hɔn a ne kwa, ye frɛyirabɛfa na yɔnnɔ tala bile na wɔn sin tala na bara na sara, a na yinna saa ɔreze na ne sin tala na bara na sara mɛ. Ye sɔɔn ka da ye le yìn kɔ duvɛn ma ga. 7 A naa tɔbe wɔ na naanɔ yaga wiin sangan ma, ma ɔɔn nimafrɛ wɔ na naanɔ sɔngɔkɔn mɔɔ, a ɔɔn da ye naa. 8 Ma mane sio boo za, a ne sarazu. Wiin te ɔɔn mane tangan a ma, ye ɔɔn wɔnna te togo dɛ da Siri, Wara ne dɔɔ a ma. Ye mane sebe pere ye ma ye sbɛ diniyan na sodinida naanɔ ta wiin fa to ye sma yɛɛ kun kɔ wu kɔ laganuru ɔnkɔ sɔkobafrɛ na ba ye baraka hɔn. 9 A naa tɔbe wɔ na kooru yaga wiin sangan ma, ye mane wiinye kma yɛɛ Wuro domada ye na kɔ wiinye kma ɔɔn mane siɛrɛbe ta, ma ɔɔn wɔnwɔ pepe ni za tala tala, ye ne yɔro salakawɛdo wee. 10 Ye mane kwɛ ne sɔngɔ fɔrɔna ne kwa: «Matigi bi wiin ɔɔn kìni ne siɛbɛ yi, wee sangan ma be na kiti sɔɔ ɔn mɛ́ na yɛku wa diniyan hɔn kma hɔn?» 11 Wɔn tɛ ye ɔɔn forokiafuro perepere ye pepe ma ɔn yira ye ma, ye ye sɔmna zɔgɔ yɛ fɔn yaa kayan ye tikwɛre pepe kɔ ye na plala pepe wiinye ɔɔn daga yɛɛ na, wɔnwɔ do paga. 12 A naa tɔbe wɔ na konalalo yaga wiin sangan ma, lagakɔn ɔɔn sma fɔrɔna. Sin ɔɔn dungun wɔkara dungun, yu ɔɔn kwɛ tɛ wɔkara too. 13 Mamala mane bɛrɛ lɔ ma wɔkara kafɔnɔnɔmanɛ na bile ye, wuropangan wiinye vɔro. 14 Wurokɔn man’e sabɛ wɔkara ye wiinye sɛbɛ muluku. Tola pepe kɔ yɛngɛnzu na korilaga pepe ɔɔn sma. 15 Lagakɔn ma fanganmɛ kɔ smayeye kɔ sɔrɔdasi na zɛngɛnkma kɔ frɛkma kɔ fangankma, ye pepe, tɛrɛ kɔ vɛnɔma pepe ne tɔngɔn ne yɔro wura hɔn kɔ tɔnkɔkɔ kɔ tola hɔn. 16 Ye mane kwa tola kɔ tɔnkɔkɔ ma, ye ye bɛrɛ yiwɔ ma ɔn pi ye ma, ye brɛ dɛrɛ fanganmakware ma tanganta na ɔn dɛrɛ Gwanɔ woro na ba yi na. 17 Ye bare ye wora na ba ye na kɔgwaga wiri, sɔɔn mane na sbɛ taa gun ga.
71 Wɔn timi, ma ɔɔn mɛlɛkɛ naa za, ye ne taa lagakɔn na wurogwala naa ma. Ye mane figɛ kɔ lagakɔn na pangan naa wɔ wiin fa to pangan sii ka wirɛ lagakɔn ma kɔ yɛngɛnzu ma kɔ sɔ sii ma mɛ ga. 2 Ma mane mɛlɛkɛ boo za, a ɔɔn tuma wurodu hɔn ne ba. Ni na te Wuro ta tɔbedɛfa mane ti a ta. Wiinye mɛlɛkɛ wɔ ɔɔn mane sebe gun wiin fa to ye lagakɔn kɔ yɛngɛnzu yaga, a ɔɔn sɔngɔ wɔnwɔ ma yire fɔrɔna ɔn da: 3 «Ka ka da ka lagakɔn kɔ yɛngɛnzu kɔ sɔ sii yaga ke ma tɔbe dɛ kià Wuro ta baratɛre kini ma dɛn ga.» 4 Ye mane tɔbe dɛ wiinye sma do ma, ma man’e mɔɔ. Ye mane sma sana zɔlo ne sana kiepla ne sana naa (144,000). Ye mane sa Isirayɛle dumakma pepe hɔn. 5 Tɔbe mane dɛ wiinye kma ma Zuda timikma hɔn, wɔnwɔ mane sma sana funpla (12,000). Urubɛn timikma hɔn ye mane sma sana funpla. Gate timikma hɔn ye ne sma sana funpla. 6 Asɛre timikma hɔn ye ne sma sana funpla (12,000). Nɛfutali timikma hɔn ye ne sma sana funpla. Manase timikma hɔn ye ne sma sana funpla. 7 Simeyɔn timikma hɔn ye ne sma sana funpla (12,000). Levi timikma hɔn ye ne sma sana funpla. Isakare timikma hɔn ye ne sma sana funpla. 8 Zabulɔn timikma hɔn ye ne sma sana funpla (12,000). Zozɛfu timikma hɔn ye ne sma sana funpla. Bɛnzamɛ timikma hɔn ye ne sma sana funpla. 9 Wɔn timi ma ɔɔn zamɛ na yaan ye za, sɔɔn sii mane sbɛ n’e zio ga. Ye mane sa sii pepe hɔn kɔ dumakma pepe hɔn kɔ timikma pepe hɔn. Ye mane taa fanganmakware kɔ Gwanɔ zin hɔn, zogafuro ne ti ye ta, tegeledazugo ne ti ye sra hɔn. 10 Ye mane sɔngɔ yireyire ne kwa: «Kià kisi sa kià Wuro ta wiin ɔɔn tangan fanganmakware ma ɔnkɔ Gwanɔ ta.» 11 Wiinye mɛlɛkɛ pepe ɔɔn mane taa ne fanganmakware kɔ sɔnmlala kɔ nimafrɛ wɔ kori, ɔn zii bɛrɛ ye zɛngɛn sugu lɔ ma fanganmakware zin hɔn, wɔnwɔ Wuro yirebɛ 12 ne kwa: «Amina. Yirebɛ kɔ yirebe kɔ datɔ kɔ barakayira kɔ togo kɔ sebe kɔ fanganmabe kià Wuro ye sangan pepe ma. Amina.» 13 Sɔnmlala wɔ na boo ɔɔn bɛreda bii ɔn da ne ma: «Zofurokma bɛ kɔ kma? Wee ye tuma?» 14 Ma ɔɔn d’a ma: «Bi ɔɔn n’e tɔɔ mɛ Matigi.» A ɔɔn da ne ma, ye wiinye ɔɔn sa yannɛ na yire ye hɔn, ɔn y’a zoga waa n’e kìnibɛ Gwanɔ na too hɔn, ye ye wɔnwɔ. 15 Ye wɔn ye na ye taa Wuro ta fanganmakware zin hɔn, ne bara ta Wuro ma sin kwɛ wuru ma a ta kɔɔn hɔn. Ye wiin te ɔɔn tangan fanganmakware ma, ye wɔnna te na kwa ye ma. 16 Ye wu na n’e foga titiri ga, mulu mane na n’e foga titiri mɛ ga. Ye sin na n’e wɔnna titiri ga, tuu mane na n’e yannɛ titiri mɛ ga. 17 Ye bare wiin Gwanɔ ɔɔn tangan fanganmakware woro hɔn, ye wɔn na tɛ ye na nɛta na. Ye wiinye pɛnzu ɔɔn ni pere, ye wɔn brɛ a na n’e nɛ yaa kɔ lɔgɔ. Ye Wuro na n’e yinnazio pepe vɔro.
81 Gwanɔ we naa tɔbe wɔ na kopraro yaga wiin sangan ma, wurokɔn pepe ɔɔn kwɛ kuna sɛnɛsɛnɛ fɔn yaa lɛrɛ tala na sodinikobi nɛmɛ wa. 2 Wiinye mɛlɛkɛ kopra wɔ ɔɔn taa Wuro zin hɔn, ma ɔɔn wɔnwɔ za, ye ɔɔn tolɛ nɔma kopra pere ye ma. 3 Mɛlɛkɛza boo mane naa taa salakawɛdo kiege ma. Wunnudiafa na wɛnnɛfa mane ti a ta ne sanɔ na yi. Ye ɔɔn wunnudiafrɛ pere a ma yaan wiin fa to a ye wa salaka na sanɔ na salakawɛdo ma wiin ɔɔn ti fanganmakware zin hɔn kɔ dɛ́gɛwɛsma pepe ta wuromɛ. 4 Wunnudiafrɛ wɔ na tioro mane tuma mɛlɛkɛ we sra hɔn ne ba Wuro brɛ kɔ dɛ́gɛwɛsma ta wuromɛ. 5 Wɔn tɛ mɛlɛkɛ we ɔɔn wunnudiafa na wɛnnɛfa we bii, ɔn togadɔlɔ tee salakawɛdo ma n’a paga, n’a dra lɔ ma. Wɔnna nɔɔ hɔn ye da, ye tɔɔ a ma wuropɛlɛlokɔn kɔ sɔngɔkɔn kɔ wurosian kɔ lagakɔn ɔɔn sma. 6 Tolɛ mane ti wiinye mɛlɛkɛ kopra wɔ ta, wɔnwɔ ɔɔn ye yɛrɛ tɛtɛrɛ ye pɛn na. 7 Gwere yi we ɔɔn yi pɛn. Wurodɔgɔlɔ kɔ togo na yanganmu yi kɔ too ɔɔn kwɛ ne vunu lagakɔn ma. Lagakɔn na sodinida saaro ɔɔn wɛnnɛ. Sɔ na sodinida saaro ɔɔn wɛnnɛ. Sɔgɔbin pepe ɔɔn wɛnnɛ. 8 Mɛlɛkɛ plalo ɔɔn y’a tola pɛn. Ye ɔɔn tɛ wɔkara tolo na yire yi, togakini ti wiin ma, wɔn ɔɔn bɛrɛ yɛngɛnzu hɔn. Yɛngɛnzu na sodinida saaro ɔɔn tɛ too na. 9 Yɛngɛnzu hɔn frɛ na sodinida saaro ɔɔn siri. Yɛngɛnzu wɔɔn ma kɔre na sodinida saaro ɔɔn yaga. 10 Mɛlɛkɛ saaro ɔɔn y’a tola pɛn. Mumulugwaga boo ɔɔn tuma wuro hɔn ɔn bɛrɛ ne kini wɔkara wɛpere na yire yi. A mane bɛrɛ kuu na sodinida saaro ma kɔ pɛnziori ma. 11 Wɔnna mumulu we togo ti Sagaro. Zu na sodinida saaro ɔɔn saga. Sma na yaan ye mane siri zu we ta bare a mane saga. 12 Mɛlɛkɛ naanɔ ɔɔn y’a tola pɛn. Sin na sodinida saaro kɔ yuu na sodinida saaro kɔ mamala na sodinida saaro ɔɔn kwɛ dungun. Wɔnna sodinida saaro wɔ mane kwɛ tɛ tunio na. Kini mane ti kɔɔ na sodinida saaro na ga, wuru ɔɔn tɛ yee mɛ. 13 Wɔnna sangan ma ma susugo boo za a ne tire wurokɔn yɔfa hɔn ne sɔngɔ ne kwa, ye gwale sa, ye gwale sa diniyan hɔn kma ma, mɛlɛkɛ saa ta tola digekɔn ye na wiinye ɔɔn daga pɛn yɛ.
91 Wɔn timi mɛlɛkɛ kooru ɔɔn y’a tola pɛn. Ma ɔɔn mumulu boo za, a ɔɔn tuma wuro hɔn ɔn bɛrɛ lɔ ma pɛnziori ma, wuragwaga na sɔgɔlo ɔɔn pere a ma. 2 A mane pɛnziori wɔ na wuragwaga koba, tioro boo ɔɔn sa yeyɛ wɔkara dungwaga hɔn yi ɔn sin kɔ pangan tunio. 3 Gwale mane sa wɔnna tioro we hɔn, ɔn vunu lagakɔn ma. Wiin sebe ɔɔn ti lagakɔn ma yɛnmɛ ta, wɔn nɛmɛ ɔɔn mane pere yewɔ gwale wɔ ma. 4 A mane yira dɔre ye ma ɔn da, ye ka da ye foyi ta sɔgɔ na ga ɔn ka da ye foyi ta nugunfrɛ na ga ɔn ka da ye foyi ta sɔ na mɛ ga. Nka fɔn Wuro ta tɔbe ti wiinye kma kini ma ga dama. 5 Sogo mane pere ye ma ɔn da y’e yɛɛ ga nka ye y’e yannɛ yɛgɛ koo yɔ. Wiinye yannɛ ɔɔn mane daga dɛ ye ma, wɔn wiinye nɛmɛ ɔɔn sɔɔn gun yɛnmɛwindo ta. 6 Sma na ne siri kia wɔnna kɔɔ wɔ ma nka ye na n’a gun ga. Ye na ne siri kia nka siri na ne tɔngɔn ye na. 7 Gwale wɔ mane ti wɔkara siori wiinye ɔɔn tɛtɛrɛ tigɛ kunkwini na, ye ne wɔkara sanɔ na fanganmabanfolɛ ɔɔn ti ye wɔan hɔn, ye zɛngɛn ne wɔkara sma ye. 8 Wɔnsoga mane ti ye ta wɔkara yàra ye, ye yinni ne wɔkara zara ye. 9 Ye mane ti wɔkara bala na kunkwinifrɛ, ye kaba digekɔn ne wɔkara kunkwiniwotori digekɔn, siori na yaan ye wiinye suru, ye ne tɔngɔn ne yaa kun na. 10 Pɛgɛ mane ti ye ta wɔkara yɛnmɛ digi ne ti ye na. Sebe mane ti ye pɛgɛ ɔɔn hɔn wiin ɔɔn sma ninaban yɛgɛ koo yɔ. 11 Wiin mɛlɛkɛ ɔɔn ti wuragwaga we wɔɔn na, ye n’a togo wiri Abadɔn Heburoda hɔn n’a wiri Apoliyɔn Girɛkida hɔn, wɔn kɔrɔ yaga, wɔn ɔɔn man’e ta fanganma. 12 Gwereyannɛ mane fɔnɔ, yannɛ nɔma pla ne ti timi yɛ ne naa. 13 Wɔn timi mɛlɛkɛ wɔ na konalalo ɔɔn y’a tola pɛn. Sanɔ na salakawɛdo wiin ɔɔn ti Wuro zin hɔn, ma mane kɔn boo mɔɔ wɔn na lologo hɔn. 14 Tola mane ti wiin mɛlɛkɛ konalalo we ta, kɔn we mane da wɔn ma: «Wiinye mɛlɛkɛ naa wɔ ɔɔn ti zɔgɔre hɔn Efurataku ma, ye firi.» 15 Wiinye mɛlɛkɛ naa wɔ ɔɔn mane tɛtɛrɛ tigɛ wɛ wagati kɔ kɔɔ kɔ yuu kɔ dɔɔ na ne daga sma na yaan ye yɛɛ, ye n’e firi. 16 Kunkwinikuru wɔ na siorikma mane yaan fɔrɔna. Ma man’e do mɔɔ. 17 Yee ma man’ewɔ siori wɔ kɔ ye ma basma za dɔreda hɔn. Kunkwinibɛgɛfrɛ mane ti ye ta wɔkara togo ne wɔkara blazu ne wɔkara giribi mɛ. Siori wɔ wɔan mane wɔkara zare ye, togo kɔ tioro kɔ giribi ne sa ye da hɔn. 18 Wɔnna yagafrɛ saa wɔ ɔɔn mane sma na yaan ye yɛɛ. Bo togo, bo tioro, bo ma giribi wiin ɔɔn mane sa ye da hɔn. 19 Bare siori wɔ ta sebe ti ye da kɔ ye pɛgɛ ɔɔn hɔn. Ye pɛgɛ mane ti wɔkara san. Wɔan mane ti wɔnna pɛgɛ wɔ ta ne sbɛ ne sɔɔn ninaban. 20 A ma bɔ smasɛrɛ wɔ wiinye ɔɔn mane siri yaga wɔ ta ga han, ye mane ye kɔrɔ bere y’a tɛda na ga. Ye mane bere ne zini ɔɔn kan yɛ kɔ sanɔ wɛlɛ gwanafuro na fian kɔ dayan na ye kɔ dɔge wɛlɛ sɔ na ye, wiinye ɔɔn sege ne zɛ ga, mane mɔɔ ga, mane sbɛ ne yaa mɛ ga. 21 Ye mane ye kɔrɔ bere y’a smayɛ wɛlɛ y’a kiɔnɔ na ga, ma ye kɔrɔ bere y’a vunatɛ wɛlɛ y’a panɔbe na mɛ ga.
101 Wɔn timi ma mane mɛlɛkɛ na kɛnɛ yi boo za wiin ɔɔn tuma wuro hɔn ne zii. Daba ɔɔn man’a ta zogo yirebe ne ti a kini hɔn. A zin mane ti wɔkara sin, a kaɛn ne ti wɔkara togo na kansoga. 2 Sɛbɛslalo boo mane ti a sra hɔn, a do ne kibɛ. A ɔɔn ye digesra ma kaan dɛ yɛngɛnzu ma ɔn ye ninagan ma kan dɛ lagakɔn ma 3 ɔn sɔngɔ yire wɔkara zara tɛ ne mɔgɔ wiin nɛ. A naa sɔngɔ yee, wuropɛlɛlɛ kopra wɔ ɔɔn gwɛnmɛ. 4 Wuropɛlɛlɛ kopra wɔ naa gwɛnmɛ yee, mia tɛ ɔɔn mane kia sɛbɛ, wɔn tɛ kɔn boo ɔɔn ye to wuro hɔn ɔn da ne ma: «Wuropɛlɛlɛ kopra wɔ wiinye fanɛ yira, tɛ wɔn tɛ bunu na, ka b’e sɛbɛ ga.» 5 Ma mane wiin mɛlɛkɛ we za taa yɛngɛnzu kɔ lagakɔn ma, wɔn ye digesoro duro wuro hɔn. 6 Wiin te ɔɔn ti ni na sangan pepe ma, awe wiin ɔɔn wurokɔn kɔ ye ma frɛ dan, ɔn lagakɔn kɔ ye ma frɛ dan, ɔn yɛngɛnzu kɔ ye hɔn frɛ dan, ɔn ye sun wɔn togo na ɔn da: «Wagati ti ye na titiri ga. 7 Nka mɛlɛkɛ kopraro kɔn ɔɔn naa mɔɔ wiin sangan ma pepe, a ɔɔn naa dutigɛ ne y’a tola pɛn wiin sangan ma, wɔn ɔɔn na tɛ Wuro ta bunu do ta paga wɔkara a man’e yira y’a baratɛre daberebɛre wɔ ma wiin nɛ.» 8 Ma mane wiin kɔn we mɔɔ wuro hɔn, wɔn ɔɔn da ne ma: «Wiin mɛlɛkɛ we ɔɔn taa yɛngɛnzu kɔ lagakɔn ma, wiin sɛbɛ we ɔɔn ti a sra hɔn ne kibɛ, yaa n’a tɔɔ.» 9 Ma ɔɔn ne dɔbɛ mɛlɛkɛ we na, n’a mɛ d’a sɛbɛslalo we pere ne ma. A ɔɔn da ne ma, ye m’a tɔɔ, n’a nɔma, y’a na ne dia ne do hɔn wɔkara yi nka ne saga ne kɔrɔ hɔn. 10 Ma ɔɔn sɛbɛslalo we tɔɔ mɛlɛkɛ we ta n’a nɔma. A mane dia ne do hɔn wɔkara yi. Nka a nɛmɛ wɛ timi ne ta, ne kɔrɔ mane saga. 11 Ye ɔɔn da ne ma: «Wuro ta fanɛ wiinye ɔɔn daga yira sii na yaan ye kɔ sisma na yaan ye kɔ sidabɛrere na yaan ye kɔ fanganmɛ na yaan ye ye na, be daga bere yaa wɔnwɔ yira yɛ.»
111 Wɔn tɛ ye ɔɔn frɛyirabɛsɔgɔlo boo pere ne ma a ne wɔkara gwangan ɔɔn da ne ma: «Tuma Wuro ta kɔɔn kɔ salakawɛdo yirabɛ ɔn n’eyɛ Wuroyirebɛsma zio. 2 Nka ka kɔɔn we na luu kɔrɔ hɔn yirabɛ ga. Bare wiinye sii ɔɔn na kuru na kìni yi yara n’a yaga dɔgɔ saa yɔ ne kobi, wɔnwɔ ma yeyɛ pere. 3 Ma na ne siɛrɛkma sma pla fanɛ, ye ne n’a fanɛ yira yin zɔfunpla ne yin kiesaa (1,260) yɔɔ, ninabanzoga ne kiɛ ye ta. 4 Wiinye olivusɔrɔ pla kɔ fintina nɔma pla ɔɔn taa lagakɔn na te Matigi zin hɔn, ye wɔnwɔ. 5 Wiin te ɔɔn ne kia n’e yannɛ, togo na sa ye da hɔn, ɔɔn n’e zugi yɛɛ. Yee mɛ, ye na yannɛta na siri. 6 Sebe ti ye ta ɔɔn wurokwe nabɛ wiin fa to ye ɔɔn ne Wuro domada yira, wuro ka mɛnɛ ga. Sebe ti ye ta mɛ ɔn zu bere n’a ta too na ɔn yannɛ sii pepe dra lagakɔn ma wiin wagati pepe ɔɔn dia ye ma. 7 Ye ɔɔn naa waro y’a siɛrɛbe na bɛreda na wiin sangan ma, wiin nimafa ɔɔn sa pɛnziori na wuragwaga hɔn, wɔn na n’e kwini ɔn sbɛ ye ta n’e yɛɛ. 8 Ye Sodɔmu kɔ Ezipititogo dɛ wiin kiregwaga we ma yeyɛkma ta tɛda ye na, ye Matigi kwangwaga wiin wɛɛn we, wɔnna kuru we na gwendege hɔn ye na sara na wɔɔ. 9 Sii pepe kɔ dumakma pepe kɔ sidabɛrere pepe kɔ sisma pepe hɔn kma na bɔɔ na naa ye sege na yin saa yɔ ne kobi, y’e sitra ga. 10 Diniyan hɔn kma na nihɔndia ye ye na. Ye na nihɔndia ne yirebɛfrɛ pere ye nɛmɛ ma bare wɔnna daberebɛre sma pla wɔ man’e ninaban fɔrɔna. 11 Nka wɔnna yin saa ne kobi wɔ fɔnɔ wɛ timi ma, Wuro na ni ka ye hɔn, ye tuma. Ye tɛ yee, wiinye kma ɔɔn man’e sege, kuun na yire yi wɔnwɔ foga. 12 Ye ɔɔn kɔn na yire yi bo mɔɔ wuro hɔn, a ne kwa ye ma, ye ye ba bɛɛ. Ye ɔɔn ba daba hɔn ye zugi yɔnnɔ na. 13 Wɔnna sangan we yɛrɛ ma yɛ, lagakɔn ɔɔn sma fɔrɔna. Kuru we na sodinida funnɔ ɔɔn bɛrɛ, sma sana kopra ɔɔn siri wɔnna yaga we ta. Wiinye kma ɔɔn mane wɔɔ ni na, wɔnwɔ mane wurokɔn hɔn Wuro yirebɛ kuun sra hɔn.» 14 Yannɛ na plala mane fɔnɔ. Yannɛ na saaro ne na wiri wɔnna nɔɔ hɔn yɛ. 15 Mɛlɛkɛ kopraro ɔɔn y’a tola pɛn. Bɛrekɔn yeye bɔɔ ɔɔn mɔɔ wuro hɔn ne kwa, ye diniyan hɔn fanganmabe kià Matigi kɔ ye na Dɛ́gɛwɛta yi basiɛ. Y’a na ne ti fanganmabe hɔn sangan pepe ma. 16 Wiinye sɔnmlala sma kioro ne nɔma naa ɔɔn tangan y’a fanganmakwara ma Wuro zin hɔn, wɔnwɔ ɔɔn kwɛ zii bɛrɛ ye zɛngɛn sugu ne Wuro yirebɛ 17 ne kwa: «Matigi Wuro Sbɛpepenate bi wiin ɔɔn tiye, ɔɔn mane pia ne tiye ke baraka yira be ma. Bare be bia sebe na yire yi dɔrɔ ɔɔn bia fanganmabe tigɛ. 18 Sii wora mane ba nka bi woro ta ba yɔnnɔ ɔɔn tɔɔ. Wɔn ɔɔn sara na kitiwagati. Wɔn ɔɔn bia baratɛre bia daberebɛre yirebɛwagati. Dɛ́gɛwɛsma wiinye kma ɔɔn kiu ka be togo ma smayeye kɔ durukma. Wiinye kma ɔɔn lagakɔn yaga, a wɔnwɔ na yagawagati.» 19 Ye da ye tɔɔ, Wuro ta kɔɔn wiin ɔɔn ti wuro hɔn, wɔn do ɔɔn kibɛ bɛɛn na kuku ɔɔn zɛ a ta kɔɔn hɔn. Wɔn tɛ wurosian ɔɔn ne sa kɔ bɛrekɔn bɔɔ kɔ gwɛnmɛkɔn bɔɔ ne mɔɔ lagakɔn ne sma wurodɔgɔlɔ ne zii fɔrɔna.
121 Tagamase na yire yi boo mane sa wurokɔn ma. A mane ya boo sin ne filɛ a ma wɔkara sɔɔn zogo filɛ ye ma wiin nɛ. Yuu ne ti a kaɛn wee. Mamala nɔma funpla ne kori a wɔɔn hɔn fanganmabanfola na. 2 A mane ti tulu ne sɔngɔ ye tulu ta ne mana ne tɛ vɔrɔ na. 3 Wɔn tɛ tagamaseza boo ɔɔn naa sa wurokɔn ma mɛ. Wɔn mane sɔnfigɛfa na yire yi boo wiin ɔɔn mane pɛnɛ bɛnbɛn wɔntala kopra ne ti a ta kɔ bian nɔma fun fanganmabanfolɛ kopra ne pi pi a wɔan wɔ ma. 4 A pege mane mamala na sodinido na saaro sare n’e dra lɔ ma. Wiin ya we ɔɔn mane tɛ vɔrɔ na, sɔnfigɛfa we mane naa taa a zin hɔn wiin fa to a ɔɔn vɔrɔ suu, a nɔ we nɔma. 5 Ya we mane nimisininɔ ɔɔn vɔrɔ wiin ɔɔn daga diniyan hɔn sii pepe nɛ kɔ balogwangan. Ye mane ya we nɔ bii ɔɔn yaa kɔ lege Wuro kɔ y’a fanganmakware brɛ. 6 Wɔn tɛ ya we ɔɔn tɔngɔn yaa kibɛkolo hɔn Wuro mane tangando tɛtɛrɛ a ma wiin wɛɛn wiin fa to ye ne zɔnfa pere a ma yin zɔfunpla ne yin kiesaa (1,260) yɔ. 7 Wɔn tɛ kun ɔɔn tuma wurokɔn hɔn Misɛle kɔ y’a mɛlɛkɛ ɔɔn mane sɔnfigɛfa we kwini. Sɔnfigɛfa we mane kwɛ kɔ y’a mɛlɛkɛ n’e kwini mɛ. 8 Nka sɔnfigɛfa we sbɛ gun ga. Tangando gun a kɔ y’a mɛlɛkɛ ta wurokɔn hɔn titiri ga. 9 Ye ɔɔn n’awe sɔnfigɛfagwaga we dra sire. Awe ye ɔɔn sanbiri, ye wiin wiri Sitanɛ. Awe ɔɔn diniyan hɔn kma pepe firebɛ. Ye man’a kwɛ kɔ a ta mɛlɛkɛ ɔn n’e dra lagakɔn ma. 10 Ma mane bɛrekɔn na yire yi boo mɔɔ wuro hɔn, a ne kwa ye bo ɔɔn kià Wuro ta kisi kɔ a ta sebe kɔ a ta fanganmabe na wagati ɔɔn ne Krista ta sin na wagati. Ye bare wiin te ɔɔn mane ke na plala zarake, wiin te we ɔɔn man’e zarake Wuro zin hɔn sin ne wuru, ye ye wɔnna te we dra. 11 Ye nka ke na plala wɔ sbɛ a ta kɔ Gwanɔ too ɔnkɔ domada baraka hɔn ye wiinye na siɛrɛbe ta. Ye ye ye ni da diabɛ ye ma ɔn kwan siri na ga. 12 Ye wɔn ye na, ki wurokɔn kɔ wiinye kma ta wɔdo ɔɔn ti yeyɛ, ka nihɔndia. Ye bi lagakɔn kɔ yɛngɛnzu, gwale na sa ka ma bare Sitanɛ zii ka brɛ a woro ne ba fɔrɔna a ne tɔɔ da wagati zɔgɔ dama ɔɔn ti ye ta yee. 13 Sɔnfigɛfa we naa n’a za da ye ye dra lagakɔn ma wiin sangan ma, wiin ya we ɔɔn mane nimisininɔ vɔrɔ, a ne lɛ ne dɔɔ wɔn ma. 14 Nka susugo na yire yi kaba pla mane pere ya we ma wiin fa to a tire yaa kibɛkolo hɔn wiin wɛɛn ɔɔn tigɛ a ma wiin fa to y’a woro dɔgɔ saa yɔ ne kobi a brɛ ne dɛrɛ san na. 15 Wɔn tɛ san ɔɔn zu sabɛ ye do hɔn ya we timi wɔkara kuu wiin fa to wɔnna zu we ya we bii. 16 Nka lagakɔn mane tɛ ya we ma ɔn kibɛ ɔɔn wɔnna kuu we bra wiin ɔɔn mane sa sɔnfigɛfa we do hɔn. 17 Sɔnfigɛfa we woro ta ba do ma ya we ta, a mane wɔnna woro we sɛsɛ ya we timikma sɛrɛ ma wiinye ɔɔn dɔɔ Wuro ta yirada ma ne Krista siɛrɛ. 18 Wɔn timi a ɔɔn yaa taa yɛngɛnzu na banyege ma.
131 Wɔn timi ma ɔɔn sɔkobafa boo za, a ne sa yɛngɛnzu hɔn. Bian nɔma fun kɔ wɔntala kopra ne ti a ta. Fanganmabanfolɛ mane pi pi wɔnna bian nɔma fun wɔ pepe ma Wuro togo na yagada ne sɛbɛ sɛbɛ wɔntala wɔ pepe ma mɛ. 2 Sɔkobafa we mane wɔkara sɔgɔ a kaɛn ne wɔkara sɔnfigɛfa ye a do ne wɔkara zara yi. Bo sɔnfigɛfa we ɔɔn y’a fangan kɔ y’a fanganmakware pere a ma kɔ sebe na yire yi boo. 3 Bado na yire yi boo mane ti a wɔntala wɔ na boo ma nka wɔnna bado we naa wɛ. Sɔkobafa we da mane dia lagakɔn ma kma pepe ma ye ɔɔn dɔɔ a ma. 4 Ye mane sɔnfigɛfa we yirebɛ bare a mane wɔnnakmabe pere sɔkobafa we ma. Ye mane sɔkobafa we yirebɛ ne kwa: «Kɔ te ɔɔn tala kɔ sɔkobafa we ne sbɛ ne kwini kɔ lege?» 5 Do mane pere sɔkobafa we ma wiin fa to a ne bɛredayaga yira ne Wuro togo yaga. Sebe mane pere a ma wiin fa to a y’a fangan ta yɛgɛ kiepla ne nɔma pla yɔɔ. 6 A mane bɛreda bii Wuro togo yaga na wiin fa to a a togo yaga ɔn n’a ta kɔɔn togo yaga ɔnkɔ wiinye kma ta wɔda ɔɔn ti wuro hɔn mɛ. 7 Sebe mane pere a ma wiin fa to a dɛ́gɛwɛsma kwini ɔn sbɛ ye ta. A mane daga ne sbɛ dumakma pepe kɔ sii pepe kɔ sidabɛrere pepe kɔ giamana pepe ta mɛ. 8 Wiinye kma pepe ɔɔn ti lagakɔn ma, wiinye kma wɔ pepe toga ɔɔn sɛbɛ n’a bii diniyan dutigɛsangan ma ga, ni na sɛbɛ hɔn Gwanɔ ta wiin ɔɔn yɛɛ. 9 Turu ti wiin te ta, a mɔɔ. 10 Wiin te ɔɔn daga tɛ tere na, wɔnna te ɔɔn na yaa tɛrɛbe na. Wiin te ɔɔn daga yɛɛ kɔ kunkwinitaba, wɔnna te ɔɔn na yɛɛ kɔ kunkwinitaba. Bo wɔn ye na dɛ́gɛwɛsma daga sɔmna ɔn yɔnmabe ka ye yɛrɛ hɔn. 11 Wɔn timi ma ɔɔn sɔkobafa boo za yɛ mɛ wɔn ne sa lagakɔn hɔn. Bian pla mane ti a ta wɔkara Gwanɔ nka a mane bɛre wɔkara sɔnfigɛfa. 12 Wiin sebe pepe ɔɔn mane ti sɔkobafa na gwere yi we ta, wɔn mane ti awe bo we soro ma. Bado na yire yi mane ti wiin sɔkobafa we ma ɔɔn wɛ, bo we mane tɛ diniyan kɔ ye hɔn kma pepe ne wɔn yirebɛ. 13 A mane kabakoda na yire ye ta fɔn ne togo tumabɛ wuro hɔn a ne zii sma pepe yɔnnɔ na. 14 A mane sebe gun ne wiinye kabakoda ta sɔkobafa we yɔnnɔ na, a mane lagakɔn ma kma pepe lamara kɔ wɔn. Kunkwinitaba bado mane ti wiin sɔkobafa we ma a ɔɔn ye bere kɛnɛ, a mane sma ta ye ɔɔn n’a na tagamase ta. 15 Sebe mane pere a ma a ɔɔn sɔkobafa we na tagamase ta a ne sbɛ ne bɛre wiin fa to wiin te pepe ɔɔn ma tagamase we yirebɛ ga, a ne sbɛ ne wɔnna te yɛɛ. 16 A mane tɔbe dɛ sma pepe digesra ma sra wɛlɛ ye kini hɔn. Smayeye kɔ durukma pepe, naforokma kɔ fangandɛn pepe, tɛrɛ kɔ tisramakma pepe. 17 Wɔnna sɔkobafa we togo wɛlɛ a na tagamase na tɔbe mane ti wiin te pepe ma ga, a na te sbɛ ne foyi tɛrɛ wɛlɛ n’a zabire ga. Kakiri ɔɔn ne ti wiin te hɔn, a sɔkobafa we togo na tagamase na kayan ta. 18 Da kɔrɔ na tɔsangan wiri. Bare wɔnna tagamase we wɔn sɔɔn yi ɔn ne zɔkonala ne kiesaa ne nɔma konala (666).
141 Wɔn timi ma ɔɔn Gwanɔ za, a ne taa Siyɔntolo ma. Sma sana zɔlo ne sana kiepla ne nɔma naa (144,000) ne ti kɔ lege. Gwanɔ kɔ ye tɔn toga ne sɛbɛ ye kini ma. 2 Ma mane bɛrekɔn boo mɔɔ wuro hɔn wɔkara zu na yaanye digekɔn kɔ wurogwɛnmɛkɔn na yire yi. Ma wiin bɛrekɔn we mɔɔ, a mane ti wɔkara kolinzokɔn a na tomata tɛ n’a toma wiin sangan ma. 3 Ye mane turuwun ɔɔn sɔn fanganmakware zin hɔn kɔ nimafrɛ naa wɔ zin kɔ sɔnmlala wɔ zin. Sɔɔn mane tiye wiin ɔɔn sbɛ ne wɔnna turu we sma ga a ma tɛ sma sana zɔlo ne sana kiepla ne nɔma naa (144,000) wɔ ga wiinye wɔɔn ɔɔn wɛ diniyan hɔn. 4 Wɔnwɔ ye yɛrɛ yanganmu kɔ yàra ga bare ye yàrada tɔɔ ga. Gwanɔ ne yaa wiin wɛɛn pepe, ye ne dɔɔ a ma. Ye ye wɔɔn wa, ye ɔɔn tɛ gwere ye na sma yɔ Wuro kɔ Gwanɔ ta. 5 Ye niɔn sii sɔɔ n’a za ga, zarakedo mane ti ye na mɛ ga. 6 Wɔn timi ma ɔɔn mɛlɛkɛza boo za, a ne tire wuro hɔn dɛrɛdo hɔn. Fanɛdia na wɛbareya ye mane ti a ta n’e yira lagakɔn ma kma ma. Sii wɔ pepe kɔ dumakma wɔ pepe kɔ sidabɛrere pepe kɔ giamana hɔn kma pepe. 7 A mane sɔngɔ fɔrɔna ne kwa: «Ka kiu ka Wuro ma n’a yirebɛ bare a ta kiti na wagati wiri. Ka lagakɔn kɔ wurokɔn kɔ yɛngɛnzu kɔ ziosada na danta yirebɛ.» 8 Boo mɛlɛkɛza mane dɔɔ a ma ne kwa, y’a bɛrɛ, Babilɔnikiregwaga we bɛrɛ. Awe wiin ɔɔn mane diniyan hɔn sii wɔ pepe ka y’a vunafa hɔn, Wuro woro ɔɔn bɛrɛ ye ma. 9 Boo saaro mane dɔɔ ye ma ɔn sɔngɔ fɔrɔna ɔɔn da: «Wiin te ɔɔn sɔkobafa kɔ ye gia yirebɛ, a na tɔbe ɔɔn tɛ a soro wɛlɛ a kini hɔn, 10 wɔnna te na Wuro woro na bafɔrɔ yi yɔnnɔ tɔɔ mɛ. A na te yɔnnɔhɔn na toba togo kɔ giribi hɔn mɛlɛkɛ na kìni ye kɔ Gwanɔ yɔnnɔ na. 11 Wiinye kma ɔɔn sɔkobafa kɔ ye gia yirebɛ, a na tɔbe ne ti ye kini kɔ ye sra ma, ye ta yinnahɔntogo na tioro na ne tuma sangan pepe ma ye mane na ne makunabɛ abada ga sin kwɛ wuru ma. 12 Wiinye dɛ́gɛwɛsma ɔɔn kwa Wuro ta yirada ma ne yɔɔn Yezu ma, wɔnwɔ ta yɔnmabe na wagati ɔɔn wiri.» 13 Wɔn timi ma ɔɔn bɛrekɔn boo mɔɔ wuro hɔn a ne kwa: «Ye sɛbɛ. N’a bii basiɛ, wiinye kma ɔɔn siri ne yɔɔn Matigi ma, wɔnna kma dangamu. Wuro ta Ni da ye tian na ye ye na y’a bara na makunabɛ ta ye bare ye ta tɛda dɔɔ ye ma.» 14 Wɔn timi ma mane dabafuro bɔɔ za, fa ne tangan ye ma wɔkara sansukanpla. Sanɔ na fanganmabanfola mane ti a wɔɔn hɔn, fɛnyalo na dadia yi ne ti a sra hɔn. 15 Wɔn timi boo mɛlɛkɛ ɔɔn saa Wuro ta kɔɔn hɔn ɔn sɔngɔ fɔrɔna ɔn da daba ma tanganta we ma: «Bia fɛnyalo ta ɔɔn yaro. Yarosangan wiri bare diniyan hɔn sɔnfrɛ pra.» 16 Ye tɛ yee, wiin te we ɔɔn mane tangan daba ma, wɔn ɔɔn y’a fɛnyalo dra lɔ ma, lagakɔn ma sɔnfrɛ pepe ɔɔn yaro. 17 Wɔn timi boo mɛlɛkɛza ɔɔn ye bere sa Wuro ta kɔɔn hɔn wiin ɔɔn ti wuro hɔn. Fɛnyalo na dadia yi boo mane ti wɔn ta mɛ. 18 Wɔn timi boo mɛlɛkɛ mane sa salakawɛdo hɔn. Sie mane pere a ma a ne sbɛ togo ta. Fɛnyalo na dodia yi mane ti wiin mɛlɛkɛ we ta, a mane sɔngɔ wɔn ma yuu ɔn da: «Bia fɛnyalo na dodia yi we ta ɔɔn lagakɔn ma erezɛnnɔmanɛ pepe vɔro bare ye pra.» 19 Mɛlɛkɛ we ɔɔn y’a fɛnyalo dra lɔ ma ɔn lagakɔn ma erezɛnnɔmanɛ vɔro n’e ka Wuro woro na ba yi na kunagwaga hɔn. 20 Ye mane kuna we voo sa kɔ lege kuru we timi too ne wɔrɔ ne sa a hɔn fɔn ne wiri siori da hɔn garefrɛ ma ne kilo zɔsaa (300) nɛmɛ wa ye na kuro wuro hɔn ne mɛtɛrɛ tala ne kobi nɛmɛ wa.
151 Ma mane tagamase boo za wurokɔn ma yɛ mɛ wiin ɔɔn mane yire ne kabako yi. Bu kopra mane ti mɛlɛkɛ kopra ta wiinye ɔɔn mane wɛbɛsangan ma ye bare yewɔ baraka hɔn Wuro woro na tuma. 2 Ma mane fa boo za, a ne wɔkara yɛngɛnzu ne yanganmu kɔ togo ne wɔlɔ wɔkara dubale. Wiinye kma ɔɔn sbɛ sɔkobafa we ta, kɔ a gia ta, kɔ a togo na tagamase ta, wɔnwɔ mane taa wɔnna yɛngɛnzu we ma, Wuro ta kolinzo ne ti ye ta. 3 Ye mane Wuro ta baratɛta Moyizi ta turu kɔ Gwanɔ ta turu sɔn ne kwa ye ee Matigi Wuro Sbɛpepenate bia tɛda yire ne kabako ye. Be sii pepe ta fanganma, bia soga tele ne tian na ye. 4 Matigi kɔ te ɔɔn na kiu ka be togo ma n’a yirebɛ ga? Bare bi dama ɔɔn kìni. Sii pepe na naa yoloko be wee. Bare bia kiti ye yɛrɛ dɔrɔ. 5 Wɔn timi Wuro ta bɛɛn na kuku ti wiin kɔɔn hɔn, ma ɔɔn wɔn za, a do ɔɔn kibɛ. 6 Bu kopra mane ti wiinye mɛlɛkɛ kopra wɔ ta, wɔnwɔ ɔɔn sa Wuro ta kɔɔn we hɔn. Lɛndasi yɛrɛworo na zoga na wɔlɔ ye ɔɔn mane kiɛ ye ta sanɔ na yɔyɔsɔfa ne pɛrɛ ye kwini. 7 Nimafrɛ wɔ na tala ɔɔn sanɔ na mɛnɛfrɛ kopra pere mɛlɛkɛ kopra wɔ ma ye ne paga sangan pepe ma Wuro woro na ba yi na. 8 Wuro ta kɔɔn mane paga tioro na a ta yirebe kɔ a ta sebe do ma. Sɔɔn sii mane sbɛ ne kɔ Wuro ta kɔɔn hɔn ga fɔn yaa kayan bu kopra wɔ ta tɛ ma mɛlɛkɛ kopra wɔ ta.
161 Wɔn timi ma ɔɔn bɛrekɔn na yire yi boo mɔɔ Wuro ta kɔɔn hɔn, a ne kwa mɛlɛkɛ kopra wɔ ma, ye Wuro woro wiin ɔɔn ti mɛnɛfrɛ kopra wɔ hɔn, ye ye yaa n’e vunu lagakɔn ma. 2 Mɛlɛkɛ wɔ na gwere yi ɔɔn yaa yi vunu lagakɔn ma. Sɔkobafa we na tagamase mane ti wiinye kma ma, ye n’a kan, dae na yagayaga ye na ba ye ɔɔn sa wɔnwɔ ma. 3 Mɛlɛkɛ wɔ na plalo ɔɔn y’a mɛnɛfa bebere yɛngɛnzu ma, a ɔɔn tɛ wɔkara too. Wiinye nimafrɛ pepe ɔɔn mane ti yɛngɛnzu hɔn, wɔnwɔ pepe ɔɔn siri. 4 Mɛlɛkɛ wɔ na saaro ɔɔn y’a mɛnɛfa bebere kuu kɔ ziopɛnwura ma, wɔnwɔ ɔɔn tɛ too na. 5 Wiin mɛlɛkɛ ɔɔn ti ziori wɔɔn na, ma mane wɔn bɛrekɔn mɔɔ, a ne kwa, ye bi wiin te ɔɔn kìni, bi wiin te ɔɔn mane pia ne tiye, ne na ne tiye sangan pepe ma, be tele. Bare yee be bia telebe ta. 6 Yewɔ debe dɛ́gɛwɛsma kɔ daberebɛre too vunu han, wɔn ɔɔn tɛ be ɔɔn too ta ye ta mɛnɛfa na mɛ. Wɔn ɔɔn daga. 7 Wɔn timi ma ɔɔn bɛrekɔn boo mɔɔ salakado ma, wɔn ne kwa, ye tian na Matigi Wuro Sbɛpepenate, bia kiti pepe tian kɔ telebe na ye. 8 Mɛlɛkɛ wɔ na naanɔ ɔɔn y’a mɛnɛfa bebere sin ma sebe ɔɔn pere sin ma wiin fa to a sma pepe wɔnna kɔ ye na togo. 9 Sin mane toba popopo ɔn sma wɔnna. Sebe ti wiin Wuro we ta a ne sbɛ wɔnna bu wɔ ta, ye mane wɔn togo yaga. Ye man’e zugo katra ɔn n’a yirebɛ ga. 10 Mɛlɛlɛ wɔ na kooru ɔɔn y’a mɛnɛfa bebere sɔkobafa we ta fanganmakware ma a ta sebe ɔɔn kɔ tunio hɔn. Sma man’e sra win ninabannɔ ta. 11 Ye wurokɔn hɔn Wuro togo yaga y’a yannɛ kɔ y’a dae ye na. Nka ye mane dian ye zugo katra ɔn saa y’a tɛdayaga na ga. 12 Mɛlɛkɛ wɔ na konalalo ɔɔn y’a mɛnɛfa bebere Efurataku ma, a hɔn zu ɔɔn yara wiin fa to a sogo tɛtɛrɛ n’a tigɛ fanganmɛ ma wiinye ɔɔn na tuma wurodu hɔn piri ma ɔn naa. 13 Wɔn timi ma mane zini nɔma saa za wɔkara kwie, ye ne sa sɔnfigɛfa we do hɔn kɔ sɔkobafa we do hɔn kɔ daberebɛta na niɔnsɔ yi do hɔn. 14 Tian na, ye mane Sitanɛ ta zini wiinye ɔɔn kabakoda ta. Ye yaa diniyan hɔn fanganmɛ pepe brɛ wiin fa to ye ye kwɛ Sbɛpepenate Wuro ta kɔgwaga kɔɔ ma kun na. 15 Matigi da, ye bo ye ti ne naa wɔkara panɔ. Ye wiin te ɔɔn ye yinna doma ɔn ne yɛre y’a zoga na wiin fa to a ka naa ne yara dukuru, sma n’a du za ga, ye wɔnna te dangamu. 16 Ye wiin wɛɛn wiri da Aramagedɔn Heburoda hɔn, wɛɛn zini wɔ mane yaa fanganmɛ wɔ kwɛ. 17 Mɛlɛkɛ wɔ na kopraro mane y’a mɛnɛfa bere n’a sɛrɛ wuro hɔn. Bɛrekɔn na yire yi boo ɔɔn sa Wuro ta kɔɔn hɔn fanganmakware ma ɔn da, ye da wɛ han. 18 Ye da ye tɔɔ a ma wurosian ɔɔn sa, bɛrekɔn kɔ wurogwɛnmɛkɔn ne mɔɔ, lagakɔn ne sma fɔrɔna, wiin nɛmɛ ɔɔn tɛ zɛ dɛn sɔɔn dan ma da hɔn a ma ga. 19 Kiregwaga ɔɔn webe kuru saa, sii wɔ ta kire ɔɔn bɛrɛ. Wɔn mane Wuro kakiri tugo kɔ Babilɔnikiregwaga da wiin fa to a woro wiin ɔɔn ba a ta fɔrɔna ne fɔgɔ, a wɔn pere a ma. 20 Yɛngɛnzu na korilaga pepe mane yaga, tola ɔɔn bɛrɛ. 21 Wiinye wurodɔgɔlɔ ta tɛnɛ ɔɔn mane kilo kieplapla wa, wɔnwɔ ɔɔn mane tuma wuro hɔn ne bɛrɛ sma ma. Sma mane Wuro togo yaga wɔnna wurodɔgɔlɔ wɔ ye na bare wɔnna bu we mane kwandia fɔrɔna.
171 Mɛnɛfrɛ mane ti wiinye mɛlɛkɛ kopra wɔ ta, wɔnwɔ na boo ɔɔn ye dɔbɛ ɔn da ne ma: «Wiin vunatɛya we togo ɔɔn sa, a ne tangan yɛngɛnzu do ma, wiin kiti ɔɔn na bɛrɛ a ma, naa m’a dɔrɔ be ma. 2 Diniyan hɔn fanganmɛ vunatɛ kɔ lege, lagakɔn ma kma ɔɔn mɛnɛyingin a ta vunafa na.» 3 Wɔn tɛ Wuro ta Ni ɔɔn ne bii dɔreda hɔn ɔn yaa kɔ ne nɛmɛ kibɛkolo hɔn, ma ɔɔn ya boo za a ne tangan sɔkobafa na pɛnɛ yi boo ma, Wuro togo na yagatoga ne kori a ma, a wɔan ne kopra, a bian ne fun. 4 Zopɛnɛ bɛnbɛn mane ti ya we ta ne wɔlɔ sanɔ kɔ terebadɔge kɔ denɔma na. Sanɔ na mɛnɛfa mane ti a sra hɔn ne paga frɛyaga na wiinye ɔɔn n’a ta vunafa na yanganmu na ye. 5 Togo boo mane sɛbɛ a kini ma ne bunu na yi ɔn da: «Babilɔnikiregwaga, diniyan hɔn vunatɛyàra kɔ frɛyaga sie.» 6 Ma mane ya we za, a ɔɔn mɛnɛyingin dɛ́gɛwɛsma kɔ Yezu siɛrɛkma too na. A ta zɛ na, ma ɔɔn kaba fɔrɔna. 7 Wɔn tɛ mɛlɛkɛ we ɔɔn da ne ma: «Wɔnnɔ na be kaba yee? Wiin ya we ɔɔn tangan wɔntala kopra na sɔkobafa kɔ bian fun te ma, ma na n’a ta bunu yira be ma. 8 Be mane wiin sɔkobafa we za, a mane tiye nka basiɛ a tiye titiri ga. A na tuma lɔ kɔrɔ hɔn ɔn yaa fire melemele. Diniyan hɔn kma wiinye toga ɔɔn sɛbɛ ni na sɛbɛ hɔn n’a bii diniyan dan ma da hɔn ga, wɔnwɔ ɔɔn naa sɔkobafa we za wiin sangan ma, ye na ne kaba. Bare a mane pia ne tiye, ɔn mane tiye basiɛ ga, nka ne na bere naa. 9 Datɔ wiinye da kìnibɛ, sɔɔn daga kakiri gun wɔnwɔ na basiɛ. Sɔkobafa we bian kopra wɔ, wɔnwɔ tola nɔma kopra, ya we tangan wiinye ma. Wɔnwɔ fanganmɛ kopra mɛ. 10 Ye na sma koo bɛrɛ, konalalo we tiye yɛ. Kopraro we naa dɛn ga nka a ɔɔn na naa wiin sangan ma, a na sangan dɛrɛ ga. 11 Sɔkobafa wiin ɔɔn mane tiye nka mane tiye titiri ga, wɔn yɛrɛ ɔɔn fanganmɛ wɔ na korosɔɔnnɔ. A nii ti kopra wɔ hɔn wiinye ɔɔn na yaa yaga melemele. 12 Be wiinye bian nɔma fun wɔ za, wɔnwɔ fanganmɛ sma fun wiinye ɔɔn fanganmabe gun dɛn ga. Nka ye na fanganmabe we ta kɔ sɔkobafa we wagati tala dama. 13 Giatɛ tala dama ɔɔn ti ye ta. Wɔn ye y’a sebe kɔ y’a fanganmabe to sɔkobafa we soro ma. 14 Ye na Gwanɔ kwini nka Gwanɔ na sbɛ ye ta bare awe ɔɔn wɔnnakma ta Matigi ne fanganmɛ ta Fanganma. Wiinye kma ɔɔn wiri, wiinye ɔɔn dɛ́gɛ, wiinye ɔɔn smatele, wɔnwɔ na kwɛ kɔ lege ɔn sbɛ.» 15 Wɔn timi, mɛlɛkɛ we man’e bere da ne ma yɛ mɛ: «Be wiinye ziori za vunatɛya we ta wɔdo hɔn, wɔnwɔ zamɛ, sii kɔ sidabɛrere. 16 Be wiinye bian nɔma fun wɔ za, wɔnwɔ kɔ sɔkobafa we na vunafa na wu wa. Ye na n’a piribɛ n’a dukuro firi. Ye na n’a nɔma n’a wɔnna. 17 Bare Wuro wiin fa giati, a wɔnna tɛ ka ye hɔn. Wɔn giatɛ tala dama. Wɔn ye y’a fanganmabe to sɔkobafa we soro ma fɔn yaa kayan Wuro domada ta paga ma. 18 Be wiin ya we za, wɔn wiin kiregwaga ɔɔn ti diniyan hɔn fanganmɛ pepe wɔɔn na.»
181 Wɔnna da timi, ma ɔɔn boo mɛlɛkɛ za, a ɔɔn tuma wuro hɔn ne zii. Sebe na yire yi mane ti a ta, lagakɔn ɔɔn kwɛ ne kini pepe a ta yirebe ta. 2 A mane sɔngɔ yire ɔn da: «A bɛrɛ, Babilɔnikiregwaga bɛrɛ. A tɛ ziniyaga pepe ta wɔdo na, wiinye yala kɔ wiinye frɛ na wu ɔɔn naa ga, ye na kikiɛ mane nɛmɛ ga, a tɛ wɔnwɔ ta wɔdo na. 3 Bare a sii wɔ pepe ta ye ɔɔn mɛnɛyingin y’a vunafa na yaga yi na. Diniyan hɔn fanganmɛ vunatɛ kɔ lege, lagakɔn ma frɛzabiresma ɔɔn ye yɛrɛ ta naforokma na a ta foro na sebe baraka hɔn.» 4 Wɔn timi ma mane bɛrekɔn boo mɔɔ wuro hɔn, a ne kwa: «Ka sa wɔnna kuru we hɔn n’a kma, ka tɛ ka nii naa kɔ a ta kakiɛ hɔn ga. Wiin bu ɔɔn na bɛrɛ a ma, ka nii ka naa kɔ wɔn hɔn mɛ ga. 5 Bare a ta kakiɛ yaan fɔn yaa ne wiri wuro hɔn, Wuro kakiri ɔɔn tugo kɔ a ta telebareyada. 6 K’a ta tɛda na ku sara a ma. A wiin fa ta, ka wɔn nɛmɛ na kanyinna pla ta a na. A y’a duvɛn yɔgɔ wiin mɛnɛfa hɔn, ka yɔge wɔn hɔn a ma kayinna pla na. 7 A mane wiin yirebe kɔ wiin foro dɛ ye yɛrɛ ma, ka wɔn nɛmɛ na yannɛ kɔ ye na ninabannɔ dɛ a ma mɛ bare a yira ne kwa ye kɔrɔ hɔn, ye ye tangan fanganmayàrabe hɔn ɔn mane yɔfuroya ga, ninabannɔ mane na ye gun abada mɛ ga. 8 Wɔn ye na wiinye bu ɔɔn tɛtɛrɛ a ye na, wɔnwɔ na bɛrɛ a ma kɔɔ tala ma. Bo siri, bo ninabannɔ, bo ma wu. A na wɛnnɛ bare wiin Matigi Wuro ɔɔn na n’a kiti, wɔn sbɛta. 9 Wɔnna sangan ma, lagakɔn ma fanganmɛ wiinye ɔɔn mane kwɛ kɔ lege a ta vunafa hɔn kɔ a ta foro hɔn, wɔnwɔ ɔɔn naa a na yagatioro za wiin sangan ma, ye na ne mɔgɔ ne sisigile a ye na. 10 Ye na taa dɛrɛ do hɔn a ta yannɛ na kuun na ne kwa, ye gwale sa, gwale sa. Wee Babilɔnikiregwaga sbɛkuru wagati zɔgɔ dama ɔn kayan be yɔnnɔhɔn ta toba na yee.» 11 Lagakɔn ma frɛzabiresma mɔgɔ ne ninaban a ye na bare sɔɔn n’e ta zabirefrɛ tɛrɛ titiri ga. 12 Bo sanɔ na frɛ, bo gwanafuro na ye, bo terebadɔge na ye, bo ma denɔma na ye kɔ lɛndasi na ye, bo ma pɛnɛ ye wɔ na sii pepe kɔ ye na wɔlɔwɔlɔ ye. Bo wunnudiasɔ na ye, bo ma kɔrɔyinni na ye, bo ma sɔfɔrefɔre na ye, bo ma dayan na ye, bo ma bala na ye, bo ma dɔgeyeye na wɔlɔwɔlɔ ye na ye. 13 Bo ye ta wunnudiafrɛ kɔ wunnudiayìn na ye, bo ma duvɛn kɔ yìn, bo ma fɔgɔ, bo ma bile. Bo yangannɛ bo ma gware, bo siori, bo ma wotori. Bo tɛrɛ, bo ma ye ta figɛsma. 14 Wiinye frɛfɔrefɔre da ɔɔn mane dia be ma, wɔnwɔ brɛ dɛrɛ be na. Bia naforo pepe kɔ bia frɛfɔrefɔre pepe brɛ dɛrɛ be na mɛ. Ye na n’e za titiri abada ga. 15 A mane wiinye frɛzabiresma ta naforokma na wɔnna frɛzabire we hɔn, wɔnwɔ na tɔrɔ a na kuun ma ɔn taa dɛrɛdo hɔn. Ye na ne mɔgɔ ne ninaban 16 ne kwa, ye gwale sa, gwale sa. Wiin kiregwaga we ɔɔn mane bɛgɛ kɔ lɛndasi na zoga kɔ zoga na pɛnɛpɛnɛ ye kɔ ye na wɔlɔwɔlɔ ye, ne wɔlɔ sanɔ na, ne fɔrɔ terebadɔge na kɔ denɔma na, 17 wagati tala dama kayan wɔnna naforo we pepe ta yaga na. Wiinye kma pepe ɔɔn kɔrɔwirɛ, wiinye pepe ɔɔn dɔɔ ne fɔnɔ yeyɛ wɔla hɔn kɔ zokɔre, wiinye pepe ɔɔn ti zu ma kɔ wiinye pepe ɔɔn ye do na zio gun yɛngɛnzu hɔn, wɔnwɔ pepe mane taa dɛrɛdo hɔn 18 ne kaba a na yaga tioro ye na ne kwa, ye wee kuru ɔɔn mane tala kɔ bo kiregwaga be? 19 Ye mane yege turu n’a ka ye wɔan hɔn, ne mɔgɔ ne ninabansɔngɔ ne kwa: «Gwale sa. Gwale sa. Awe kiregwaga we ɔɔn mane zokɔrekma ta naforokma na y’a naforo baraka hɔn. Wagati tala dama kayan a ta yaga na melemele.» 20 Nihɔndia a ta yaga na, wurokɔn. Ki dɛ́gɛwɛsma wɔ kɔ fanɛsma wɔ kɔ Wuro ta daberebɛre wɔ, ka nihɔndia mɛ. Bare Wuro n’a kiti ɔn tian pere ka ma. 21 Wɔn tɛ mɛlɛkɛ na kɛnɛ yi boo ɔɔn dɔgɔnɔ na tɛnɛ yi boo bii wɔkara yulu ɔn n’a dra yɛngɛnzu hɔn ɔn da: «Yoo Babilɔnikuru kiregwaga na drɛ yɛ o. Sɔɔn mane na bere n’a za titiri ga. 22 Sɔɔn na kolinzo tomasma kɔ kirekma kɔ tolɛkma ta turokɔn mɔɔ be hɔn titiri ga. Sra hɔn bara tala bɔɔ na tɛ ta tala boo na ne zɛ be hɔn titiri ga. Yulukɔn mane na ne mɔɔ be hɔn titiri mɛ ga. 23 Kini na ne wɔlɔ be hɔn titiri ga, sɔɔn mane na ne damorobangan kɔ y’a damoro kɔn mɔɔ be hɔn titiri mɛ ga bare bia frɛzabiresma mane diniyan hɔn smayeye. Bare be diniyan hɔn sii wɔ pepe lamara kɔ bia lamara. 24 Wɔn nii wɛ mɛ, ye mane Wuro ta daberebɛre kɔ dɛ́gɛwɛsma too za be hɔn ɔnkɔ ye wiinye kma pepe moga sɔɔ diniyan hɔn mɛ.»
191 Wɔn timi ma ɔɔn sɔngɔkɔn na yire yi boo mɔɔ wɔkara zamɛ na yaan yi sɔngɔkɔn wuro hɔn, a ne kwa: «Ka Matigi yirebɛ. Kisi kɔ yirebe kɔ sebe kià Wuro ye. 2 Bare a ta kiti pepe tian kɔ telebe na ye. Wiin vunatɛtagwaga we ɔɔn mane diniyan pepe yaga kɔ y’a vunafa, a a kiti ɔn y’a baratɛre na yɛku wa a hɔn.» 3 Wɔn timi ye ye bere da yɛ mɛ: «Ka Matigi yirebɛ. Kuru we na yagatioro tɛ a ne tuma sangan pepe ma.» 4 Sɔnmlala sma kioro ne nɔma naa wɔ kɔ nimafrɛ naa wɔ ɔɔn zii yoloko, wiin Wuro ɔɔn tangan fanganmakware ma, ye mane wɔn yirebɛ ɔn da: «Amina. Ka Wuro yirebɛ.» 5 Bɛrekɔn boo mane sa fanganmakware we hɔn ne kwa: «Ki Wuro ta baratɛre pepe kɔ ki wiinye kma pepe ɔɔn kiu ka a ma, smayeye kɔ durukma, k’a yirebɛ.» 6 Wɔn timi ma mane zamɛ na yaan ye sɔngɔkɔn mɔɔ, a ne wɔkara yɛngɛnzu sɔngɔkɔn, wɔkara wuropɛlɛlo gwɛnmɛkɔn. Ye mane kwa: «Ka Matigi yirebɛ. Bare Matigi kià Wuro Sbɛpepenate y’a fanganmabe dɔrɔ. 7 Ka tɛ ke nihɔndia ɔn n’a yirebɛ bare Gwanɔ ta damarasɔn wiri. A ta damoro ye yɛrɛ tɛtɛrɛ wɛ. 8 Ye sogo pere a ma ɔn d’a lɛndasi na zogo ka wiin ɔɔn kìni ne wɔlɔ. Bare dɛ́gɛwɛsma ta tɛdafɔre ɔɔn lɛn na dasi we.» 9 Mɛlɛkɛ boo ɔɔn da ne ma: «Ye sɛbɛ. Wiinye kma pepe ɔɔn wiri Gwanɔ ta damarazama na, wɔnwɔ dangamu.» Wɔn timi a ye bere da ne ma yɛ mɛ: «Ye Wuro yɛrɛ domada.» 10 Wɔn tɛ ma ɔɔn zii yoloko a wee ɔn n’a yirebɛ. Nka a ɔɔn da ne ma: «Ka be wɔn ta ga. Bi kɔ be na plala wiinye ɔɔn dɔɔ Yezu ta siɛrɛbe ma, ma ki baratɛkwɛta. Wuro be daga ɔɔn yirebɛ bare Yezu mane wiin tian yira n’a dɔrɔ, wɔn Wuro ta daberebɛre mane ɔɔn gun.» 11 Wɔn timi ma ɔɔn wurokɔn za, a do ɔɔn kibɛ. Ma mane siofuru boo za. Wiin te ɔɔn mane tangan a ma, wɔnna te togo mane ti Telebe kɔ Tian. A kiti ta ne y’a kun kwini kɔ tian. 12 A yinna mane kini wɔkara togakini. Fanganmabanfolɛ na yaan ye ne pi a ta. Togo na sɛbɛ yi ne ti a ta. Sɔɔn sii wɔnna togo we tɔɔ a ma tɛ awe dama ga. 13 Wiin zogwaga ɔɔn mane ti a mogo hɔn, wɔn mane yɔge too hɔn, a togo ne ti «Wuro domada.» 14 Wurokɔn hɔn kunkwinini mane ti siorifuru ma ne dɔɔ a ma, lɛndasi na zofuro na kìni ye ne titi ye ta. 15 Kunkwinitaba na dadia yi mane sa a do hɔn sii wɔ yɛɛ na. A na n’e nɛ kɔ balogwangan. Sbɛpepenate Wuro woro na ba yi ti wiin suu hɔn, a na wɔn bogobogo. 16 Togo boo mane sɛbɛ a ta zogo kɔ a zogabɛlo ma ɔn da: «Fanganmɛ ta Fanganma, vɔre ta Vɔ.» 17 Wɔn timi ma ɔɔn mɛlɛkɛ boo za taa sin hɔn. Wiinye yala pepe ɔɔn mane ti wurodu hɔn piri ma, a ɔɔn sɔngɔ wɔnwɔ ma fɔrɔna ɔn da: «Ka naa kwɛ Wuro ta zamaye ye na. 18 Wiin fa to ka fanganmɛ na kikiɛ kɔ zɛngɛnkma na kikiɛ kɔ sbɛkma na kikiɛ kɔ siori kɔ ye ma basma na kikiɛ kɔ tisramasma na kikiɛ kɔ tɛrɛ na kikiɛ kɔ smayeye kɔ durukma na kikiɛ bra.» 19 Wɔn timi ma ɔɔn sɔkobafa we za kɔ lagakɔn ma fanganmɛ kɔ ye ta kunkwinini, ye ne kwɛ wiin fa to ye siote we kɔ y’a kunkwinini kwini. 20 Ye mane sɔkobafa we foga kɔ wiin daberebɛta na niɔnsɔ yi ɔɔn mane kabakoda ta a zin hɔn ɔn sma lamara, wɔnwɔ ɔɔn n’a na tɔbe gun ɔn n’awe sɔkobafa we kɔ ye gia yirebɛ. Ye man’e pepe pla kwɛ n’e dra togo na yire yi hɔn, giribi ti wiin hɔn. 21 Wiin kunkwinitaba na dodia yi ɔɔn mane sa siote we do hɔn, wɔn mane bɔ sɛrɛ wɔ yɛɛ, yala pepe ɔɔn n’e na kikiɛ bra yingin ye na.
201 Wɔn timi ma ɔɔn mɛlɛkɛ boo za, a ɔɔn tuma wuro hɔn ne zii. Wuragwaga na sɔgɔlɔ kɔ zɔgɔre na tɛnɛ ye bɔɔ mane ti a ta. 2 A sɔnfigɛfa we foga, wiin ɔɔn saan na bire yi. Wɔn kɔrɔ Sitanɛ. A n’a pɛrɛ wiin fa to a dɔgɔ zɔfun (1,000) ta pɛrɛ hɔn. 3 Mɛlɛkɛ we man’a dra wuragwaga hɔn n’a do pi n’a pɛrɛ wiin fa to a ka ne sii wɔ lamara titiri ga fɔn yaa kayan dɔgɔ zɔfun (1,000) wɔ do ta paga ma. Wɔn timi ma a na drɛ ɔn wagatizɔgɔ ɔɔn dama ta yee. 4 Wɔn timi, ma mane fanganmakwara za. Wiinye kma ɔɔn mane naa tangan ye ma, sebe mane pere wɔnwɔ ma kitisɔ na. Ye mane wiinye kma moga sɔɔ Yezu na siɛrɛbe kɔ Wuro domada ye na kɔ wiinye kma ɔɔn mane sɔkobafa we kɔ ye gia yirebɛ ga ɔn m’a na tɔbe ta ye kini wɛlɛ ye sra ma mɛ ga, ma mane wɔnwɔ ni za. Ye mane bere winni ɔn tangan fanganmabe na kɔ Krista dɔgɔ zɔfun (1,000) yɔ. 5 Bɔ sarasɛrɛ bere winni ga fɔn yaa kayan wɔnna dɔgɔ zɔfun (1,000) wɔ do ta paga ma. Wɔn ɔɔn sara ta winnisa na gwere yi. 6 Wiinye kma nii ɔɔn ti wɔnna gwerewinnisa we hɔn, wɔnwɔ dangamu. Wiin siri plalo ɔɔn na naa, a na sbɛ wɔnwɔ ta ga. Ye na tɛ Wuro kɔ Krista ta salakawɛre na ɔn tangan kɔ lege fanganmabe na dɔgɔ zɔfun (1,000) yɔ. 7 Dɔgɔ zɔfun (1,000) do ɔɔn naa paga, Sitanɛ na firi ɔn sa y’a kaso hɔn. 8 A na yaa diniyan hɔn kma pepe diɛbɛ, bo Gɔge kɔ Magɔge. A na n’e kwɛ kun na, ye ne yaan wɔkara yɛngɛnzu do ma banyege. 9 Ye na zanzan lagakɔn pepe ma ɔn Wuro ta dɛ́gɛwɛsma kɔ a madiamakuru pepe kori paga. Nka togo na tuma wuro hɔn ɔn zii n’e wɔnna. 10 Sitanɛ wiin ɔɔn n’e firebɛ, wɔn drɛ togo hɔn, giribi ti wiin hɔn, sɔkobafa we kɔ daberebɛta na niɔnsɔ yi kiege ma. Wɛɛn ye na ne yannɛ fɔrɔna sin kwɛ wuru ma sangan pepe ma. 11 Wɔn timi ma mane fanganmakware na yire yi boo za kɔ ye ma tanganta, a ne furo. Lagakɔn kɔ wurokɔn mane tɔngɔn ye dɔɔn a na, ye zɛnɛ yɛrɛ mane zɛ titiri ga. 12 Wɔn timi ma ɔɔn sara pepe za, smayeye kɔ durukma na ye, ye ne taa fanganmakware we zin, sɛbɛ bɔɔ da ɔɔn kibɛ. Sɛbɛ boo do mane kibɛ. Wɔn mane ni na yi. Ye mane sara kiti ɔn kayan kɔ ye ta tɛda kɔ sɛbɛ wɔ koro hɔn da mɛ. 13 Yɛngɛnzu mane y’a sara pere, siri kɔ wara ɔɔn y’e pere mɛ, ye pepe ɔɔn kiti ɔn kayan kɔ y’a tɛda. 14 Wɔn tɛ ye ɔɔn mane siri kɔ wara kwɛ n’e dra togo na yire yi hɔn. Togo na yire yi ɔɔn siri plalo. 15 Wiin te pepe togo ɔɔn sɛbɛ ni na sɛbɛ hɔn ga, wɔnna te mane drɛ wɔnna togagwaga we hɔn mɛ.
211 Wɔn timi ma ɔɔn wurokɔnwun kɔ lagakɔnwun za. Wurokɔn na bire yi kɔ lagakɔn na bire yi mane fɔnɔ. Yɛngɛnzu mane tiye titiri ga. 2 Ma mane kuru na kìni yi Zeruzalɛmuwun za, a ɔɔn tuma Wuro brɛ wuro hɔn ne zii. A mane tɛtɛrɛ fɔrɔ wɔkara damoro wiin ɔɔn ye yɛrɛ tɛtɛrɛ n’e bangan yɛrɛ. 3 Ma mane bɛrekɔn na yire yi boo mɔɔ fanganmakware brɛ, a ne kwa: «Bo Wuro ta wɔdo sma yɔ. A na tangan kɔ lɔgɔ, ye tɛ a ta kma na, awe tɛ Wuro na wiin ɔɔn ti kɔ lɔgɔ. 4 A na n’e yinnazio pepe vɔro. Siri na ne tiye titiri ga. Ninabannɔ mane na ne tiye titiri mɛ ga wɛlɛ mogo wɛlɛ yannɛ bare gwerefrɛ pepe fɔnɔ.» 5 Wiin te ɔɔn mane tangan fanganmakware ma, wɔn da: «Bo ma ti ne frɛ pepe ta wun ye na.» Wɔn timi a ye bere da yɛ mɛ: «Ye sɛbɛ. Bɔ domada bɛ tian na ye ne na tɛ. 6 Da wɛ. Mɛ ɔɔn Alefa ɔn ne Womega. Dubido ɔn ne wɛbɛdo. Mulu ɔɔn ne ti wiin te na, ma na ni na zu pere a na te ma zana. 7 Wiin te ɔɔn sbɛta, wɔnna te na wɔnna kɔrɔ wɔ gun, mɛ tɛ a ta Wuro na, awe tɛ mɛ nɔ na. 8 A ma zanfansma kɔ telebareyasma kɔ smayaga kɔ smayɛsma kɔ vunasma kɔ lagwɛsma kɔ fiankansma ɔnkɔ niɔnsɔsma pepe han, yewɔ na yaa ye nii gun togo na yire yi kɔ giribi hɔn. Wɔn siri plalo.» 9 Mɛnɛfrɛ kopra wiinye ɔɔn paga yannɛ na wɛbɛ ye kopra na, wɔnwɔ mane ti wiinye mɛlɛkɛ kopra sra hɔn, wɔnwɔ na tala ɔɔn naa da ne ma: «Naa ma damoro we dɔrɔ be ma wiin ɔɔn Gwanɔ ta ya.» 10 Wuro ta Ni mane ne bii dɔreda hɔn ɔn yaa kɔ ne nɛmɛ tolo na kuro yi ne a na yire yi boo ma ɔn kuru na kìni yi Zeruzalɛmukuru dɔrɔ ne ma wiin ɔɔn mane tuma Wuro brɛ wuro hɔn ne zii. 11 Wuro ta yirebe na kini man’a wɔlɔbɛ mulamulamula wɔkara dɔgɔnɔ na tereba yi. 12 A na korikulu mane kuro ne tara, kuleda funpla ne ti a na, mɛlɛkɛ konala ne ti wɔnna kuleda wɔ ma, toga ne sɛbɛsɛbɛ ye ma. Wɔnwɔ mane Isirayɛle ta dumakma funpla wɔ toga. 13 Kuleda nɔma saa mane ti wurodu hɔn piri ma, saa ne ti kudo ma piri ma, saa ne ti saan hɔn piri ma, saa ne ti wurowɔn ma piri ma. 14 Kuleda nɔma funpla wɔ pepe mane dɛ dɔge nɔma funpla ma mɛ Gwanɔ ta fanɛsma funpla wɔ toga sɛbɛ wiinye ma. 15 Wiin mɛlɛkɛ ɔɔn mane bɛre ne ta, frɛyirabɛsɔgɔlo mane ti wɔn soro hɔn ne sanɔ na yi wiin fa to a kuru we kɔ ye na kulu kɔ ye na kuleda yirabɛ. 16 A kiɛgɛ naa pepe mane tala. A na tara ne tala kɔ a na kuro lɔ ma. A man’a yirabɛ kɔ sɔgɔlo we, a ta kuro lɔ ma ne kilo sana pla ne zɔpla (2,200). A mane tara lɔ ma wiin nɛ, yee a mane kuro yɛ, ne yire mɛ. 17 Mɛlɛkɛ we mane kulu we yirabɛ mɛ sma ta frɛyirabɛnɔn na, wɔn ɔɔn tɛ mɛtɛrɛ kiesaafun ne nɔma pla. 18 Kwala wɔ na frɛ mane terebadɔge na ye, kuru we ne sanɔyɛrɛworo ne wɔlɔ mulamulamula. 19 Kuru we na korikulu du mane dɛ wiinye dɔge ma, wɔnwɔ mane bɛgɛ kɔ dɔge na tereba ye sii pepe. Dudɛdɔge wɔ na gwere yi mane sarazu, plalo we ne bula na yi, saaro we ne yɔrɔrɔ yi, naanɔ we ne sarazu kwirikwiri, 20 kooru we ne pɛnɛsan, konalalo we ne pɛnɛ bɛnbɛn, kopraro we ne furo ma tɛ gun sarazu ga, korosɔɔnnɔ we ne furo ma pɛnɛ gun ga, koronɔɔnɔ ne nɛfogo na yi, funnɔ ne sarazu na yanganmu yi kɔ nɛfogo funnalalo ne nɛfogo na yanganmu yi kɔ pɛnɛ yi na yi, funplalo ne yìnzio na yi. 21 Kuleda funpla wɔ mane denɔma nɔma funpla wiin kuledo ti, wɔn ne tɛ kɔ denɔmasi tala dama. Kuru we na dayinnahɔnwɛdo mane tɛ kɔ sanɔyɛrɛworo na yi wɔkara kirisitale na kini yi. 22 Ma mane Wuro ta kɔɔn za kuru we hɔn ga bare Matigi Wuro Sbɛpepenate kɔ Gwanɔ, ɔɔn n’a ta Wuro ta kɔɔn. 23 Kuru we mako sa sin wɛlɛ yuu hɔn, kini sabɛ na ye hɔn ga bare Wuro ta yirebe ɔɔn n’a ta kini. Gwanɔ n’a ta fintina. 24 Sii na ne yaa a ta kini na, diniyan hɔn fanganmɛ ne naa yeyɛ kɔ y’a yirebe na frɛ. 25 A na kɔre na ne gwolo ga bare wuru na ne ba yeyɛ titiri ga. 26 Ye na naa kɔ sii ta yirebe na frɛ kɔ ye ta togo na frɛ yeyɛ. 27 Doma na fa na kɔ yeyɛ ga, wiin te ɔɔn dakurotɛta wɛlɛ niɔnsɔta mane na kɔ yeyɛ mɛ ga fɔn wiinye kma dama toga ɔɔn sɛbɛ ni na sɛbɛ hɔn Gwanɔ ta.
221 Wɔn timi mɛlɛkɛ we ɔɔn ni na zu na kuu dɔrɔ ne ma. A mane wɔrɔ ne sa Wuro kɔ Gwanɔ ta fanganmakware hɔn ne wɔlɔ mulamulamula. 2 Ni na sɔnɔ mane taa kuru we woro hɔn kɔ kuu we na wɔrɔkala pla dɛdo hɔn ne vɔrɔ kanyinna funpla na dɔɔ tala kɔrɔ hɔn. A mane vɔrɔ yuu o yuu, a dazugo ne tɛ su na sii wɔ ma mɛ. 3 Voda na ne tiye titiri ga. Wuro kɔ Gwanɔ ta fanganmakware na ne ti kuru we hɔn, a ta baratɛre n’a yirebɛ. 4 Ye na n’a zin za, a togo ne na ne sɛbɛ ye kini ma. 5 Wuru na ne ba yeyɛ titiri ga, ye mako mane na ne sa fintina na kini na ga wɛlɛ sin na kini ga bare Matigi Wuro yɛrɛ na y’a kini sabɛ ye ma. Ye na tɛ wɔnnakma na sangan pepe ma. 6 Wɔn timi mɛlɛkɛ we ɔɔn da ne ma: «Bɔ domada bɛ tian, be ne daga yɔɔn ye ma. Wiinye da ɔɔn daga tɛ bɛɛ yɔ ne zɔgɔta, Matigi Wuro wiin ɔɔn y’a Ni pere daberebɛre ma, a mane y’a mɛlɛkɛ fanɛ wiin fa to ye naa n’e nɔma dɔrɔ y’a baratɛre ma. 7 Yezu da ye bɛɛ yɔ ne zɔgɔta, ye ye na naa. Ye wiin te ɔɔn kwa bɔ sɛbɛ bɛ hɔn dɔreda na fanɛ ma, ye wɔnna te dangamu.» 8 Mɛ Zan man’e mɔɔ ɔn n’e za. Ma ye mɔɔ ɔn n’e za n’e wɛ wiin sangan ma, wiin mɛlɛkɛ ɔɔn man’e dɔrɔ ne ma, ma ɔɔn zii yoloko a wee a yirebɛ na. 9 Nka a ɔɔn da ne ma: «Ka da be wɔn ta ga. Bi kɔ be na plala daberebɛre kɔ wiinye kma ɔɔn kwa bɔ sɛbɛ bɛ hɔn da ma, mɛ ka baratɛkwɛta. Wuro be daga ɔɔn yirebɛ.» 10 Wɔn timi a ye bere da ne ma: «Ka bɔ sɛbɛ bɛ hɔn dɔreda na fanɛ ta bunuda na ga bare ye na wagati vetra. 11 Telebareyata tɛ a wɔɔ y’a telebareyafa hɔn, kakiɛtɛta wɔɔ y’a kakiɛtɛ hɔn. Nka sɔntele tɛ a ne telebe ta, dɛ́gɛwɛta ne fa kwɛ y’a kìni ma. 12 Bɛɛ yɔɔ ne zɔgɔta ma na bere naa. N’a sara na frɛ na ti ne ta. Ma na sma pepe sara tala tala n’e kayan kɔ ye ta tɛda. 13 Mɛ ɔɔn Alefa ɔn ne Womega, wɔn kɔrɔ gwere yi ne wɛbɛ yi. Dubido kɔ wɛbɛdo. 14 Wiinye kma ɔɔn y’a zoga waa wiin fa to ye gun ni na sɔnɔ na ɔn kɔ kuru na kuledo hɔn, wɔnna kma dangamu. 15 Smakuro kɔ lagwɛsma kɔ vunatɛsma kɔ smayɛsma kɔ fiankansma kɔ niɔnsɔ dia wiinye kma pepe ma wɛlɛ ye ne niɔnsɔ, wɔnwɔ pepe na wɔɔ sire. 16 Mɛ Yezu n’a mɛlɛkɛ fanɛ wiin fa to a naa bɔ da bɛ yira ka ma Wuro ta kɔnkma ye na. Mɛ Davidi timikma na boo. Kɔmulu wiin ɔɔn wɔlɔ kikima.» 17 Wuro ta Ni kɔ damoro da: «Naa.» Wiin te ɔɔn wɔn mɔɔ, wɔnna te daga da: «Naa.» Mulu ɔɔn ne ti wiin te na, a naa. Wiin te ɔɔn ne kia mɛnɛ, a naa mɛnɛ ni na zu na zana. 18 Wiin te pepe ɔɔn bɔ sɛbɛ bɛ hɔn dɔreda na fanɛ mɔɔ, ma ne bere n’e yira a na te ma yɛ ɔn da: «Wiin te ɔɔn bɔɔ kwɛ ye ma, wiinye bu wɔ da ɔɔn yira sɛbɛ wɔ hɔn, Wuro na bɔɔ kwɛ wɔnwɔ ma a na te ma. 19 Wiin te ɔɔn fa wa bɔ sɛbɛ bɛ hɔn dɔreda na fanɛ hɔn, Wuro na wɔnna te nii wa ni na sɔnɔ hɔn kɔ kuru na kìni yi hɔn wiinye da ɔɔn yira sɛbɛ wɔ hɔn.» 20 Wiin te ɔɔn wɔnna tian yira n’a kìnibɛ, wɔnna te da: «Ɔɔn, bɛɛ yɔ ne zɔgɔ ma na naa. Ye tɛ, ye tɛ yee, naa Matigi Yezu.» 21 Matigi Yezu tɛ a y’a woramadiabe ta ka pepe ma.