ZUDE

ZUDE

¹ Mɛ Zude Zake na plalo Yezu Krista ta baratɛta. Ma bo sɛbɛ fanɛ Tɔn Wuro ta wirisma ma, wiinye kma da ɔɔn dia a ma Yezu Krista ne yɛre ye na. ² Makare kɔ siara kɔ dadiamabe tɛ a tɛ ka ma yaan. ³ Ne mare, wiin kisi ɔɔn ke pepe ta da, ma mane kia wɔn nɔma sɛbɛ n’e yira ka ma, ɔn n’a za da ma daga n’e ta wiin fa to wiin yɔnmabe ɔɔn pere Wuro ta dɛ́gɛwɛsma ma melemele, ma ka wora sigebɛ ka taa wɔn ta da na. ⁴ Bare wiinye kma ta yinna hɔn togo ɔɔn yira tigɛ n’a bii fɔn dubisangan ma, wɔnwɔ na bɔɔ naa ye nii ka ka hɔn. Yewɔ Wurotogayagasma wɔ wiinye ɔɔn kia Wuro ta woramadiabe yagayaga ne kakaladatɛ ne kwa, ye ke wɔnnate sɔnnala dama Matigi Yezu Krista ta da tian ga. ⁵ Hali ka ɔɔn n’e yɔnnɔ tɔɔ, ma kia ka kakiri tugo kɔ lɔgɔ yɛ ɔn da Matigi y’a kma kisi n’e wɛ Ezipitigiamana hɔn wiin sangan ma, wiinye kma ɔɔn mane maga yɔɔn na a ma, a mane wɔnwɔ yɛɛ. ⁶ Wiinye mɛlɛkɛ ɔɔn mane wɔɔ y’a tado hɔn ga, ɔn ye wɔdo za n’a to yɛ, a wɔnwɔ pɛrɛ n’e ka tunio hɔn sangan pepe ma na ne kɔgwaga ma kiti yɛ́rɛ. ⁷ Wiin togo ɔɔn wɛnnɛ mane dibe ga, yewɔ ti wɔn na tagamase hɔn. Wiin togo we ɔɔn Sodɔmukma kɔ Gomɔrekma ɔnkɔ ye kiɛgɛ ma kire hɔn kma wɔnna, wiinye ɔɔn man’e yɛrɛ ka ye ta tɛda nɛmɛ hɔn ɔn kakalatɛ fɔn yaa fɔnɔ. ⁸ Yee yewɔ sma wɔ tɔrɔ y’a giatiyaga ma n’e yɛrɛ yanganmu ne Krista ta sebe dɛgɛbɛ ne wuro hɔn kma vini y’a bɛreda hɔn. ⁹ Kamasɔrɔ hali mɛlɛkɛ wɔnnate Misɛle yɛrɛ na kwinisangan ma kɔ Sitanɛ, ye ne ti dakwiɛro hɔn, Moyizi na soro ye na, a dian n’a vini ga, nka a d’a ma, ye Matigi tɛ a a yɔnnɔhɔntoba. ¹⁰ Nka yewɔ sma wɔ, ye wiinye da tɔɔ ga, wɔnwɔ na wu ye ɔɔn wa. Ye wiin fa tɔɔ fɔrɔna y’a yinnibe do ma wɔkara worofrɛ, wɔn ɔɔn n’e firebɛ. ¹¹ Gwale na sa ye ma bare ye dɔɔ Kayɛn ta sogo ɔɔn ma. Ye tɔrɔ sara ma ɔn yaa kɔ Balamu ta fireda nɛmɛ hɔn ɔn siri wɔkara Kore mane maga ɔn siri wiin nɛ. ¹² Yewɔ ɔɔn tɛ n’e yɛrɛ dama ta da giati ne zɔn ne mɛnɛ ne yingin ne k’a forobazama ta yaga ye na. Ye ti wɔkara wiin wuro ɔɔn sige tuma pangan ma, wɔkara wiin sɔnɔ ɔɔn nɔmanɛvɔrɔ ga, wiin sɔnɔ ɔɔn kwiɛ melemele, sile mane ti a ta ga. ¹³ Ye pere na frɛ wɔkara yilabisɔgɔ, wɔkara tangando ti wiinye mamala ta ga, Wuro tunio tɛtɛrɛ n’e tigɛ wiinye ma melemele na. ¹⁴ Henɔke wiin ɔɔn mane Adama timikma na doga kopraro na boo, yewɔ ye na a mane Wuro domada bɛ yira ɔn da, ye bo Matigi ti ne naa kɔ y’a mɛlɛkɛ na kwɛ ye sana funfun, ¹⁵ wiin fa to a diniyan pepe kiti ɔn Wurotogayagasma ta sɔnyɛda pepe wa ye hɔn kɔ kakiɛtɛre wiinye bɛredayaga pepe yira a ma. ¹⁶ Wɔnna sma wɔ wiinye wora ɔɔn kuna ne zɛ ga, ye ne gwangwana sangan pepe ma, wiin fa ɔɔn dia ye ma wɔn ye ɔɔn ta ne yɛrɛfaradabɛre ne sma diɛbɛ ne y’a tɔnɔ kia. ¹⁷ A ma ki han ne mare, kià Matigi Yezu Krista ta fanɛsma pia wiinye bɛreda yira ka ma, ka ka kakiri to kɔ wɔnwɔ. ¹⁸ Ye mane kwa ka ma, ye diniyan wɛsangan ma, ye smazisma na ne tiye wiinye ɔɔn na ne dɔɔ y’a Wurotogayagada na giatɛ ma. ¹⁹ Ye yewɔ. Ye sma dɛ́gɛ nɛmɛ na, diniyan hɔn da na giatɛ ɔɔn ti ye ta, Wuro ta Ni ti ye hɔn ga. ²⁰ Nka ki han ne mare, ka ne dɔɔ yɔnmabe na fɔrɔ yi ma ne Wuro mɛ a ta Ni baraka hɔn. ²¹ Ka wɔɔ Wuro ta dadiamabe hɔn ne yɔɔn kià Matigi Yezu Krista ta woramadiabe ma wɛbareyani ye na. ²² Wiinye kma wora ɔɔn sige dɛn ga, ka ye wora sigebɛ. ²³ Ka ye dɛn n’e wa togo hɔn. A ma bɔ sɛrɛ wɔ han, ka makare ye ma nka ne ka yɛrɛ kɔrɔse ye na. Hali ye ta zoga wiinye ɔɔn yanganmu ye ta kakiɛ do ma, ka ka da ka le wɔnwɔ ma ga. ²⁴ Wiin te ɔɔn sbɛ ne kwa ka ma wiin fa to ka ka bɛrɛ ga, ɔn ne sbɛ ne ka ta zarakedo ka zɛ ka na ga y’a yirebe zin hɔn nihɔndiaro hɔn. ²⁵ Wuro sɔnnala dama wiin ɔɔn ke na kisita kià Matigi Yezu Krista baraka hɔn, yirebe kɔ fanganmabe kɔ sebe wiri a ma gwerena kɔ basiɛ ɔnkɔ suu. Amina.