GALATEKMA

GALATEKMA

¹ Mɛ Pɔle wiin ɔɔn tɛ fanɛta na, ma bo sɛbɛ fanɛ ka ma. Ma sɔɔn ta fanɛ yira ga, ma tɛ fanɛta na sɔɔn ta sebe hɔn ga. Nka ma tɛ Yezu Krista ɔɔn ta fanɛta na kɔ a Tɔn Wuro wiin ɔɔn n’a winni n’a sabɛ sara yɔ. ² Mɛ kɔ ne na plala pepe wiinye ɔɔn kwɛ ti, ke bire Wuro ta kma na wiinye ɔɔn ti Galate ɔn da: ³ Ke Tɔn Wuro kɔ Matigi Yezu Krista tɛ ye y’a dadiamabe kɔ y’a siara ta ka ma. ⁴ Awe Krista wiin ɔɔn ye yɛrɛ pere kià kakiɛ ye na wiin fa to a ke dɛn ke wa bo diniyan be ta dayaga hɔn ke Tɔn Wuro dungo ye na, ⁵ yirebe tɛ a ma basiɛ ɔnkɔ suu. Amina. ⁶ Wiin te ɔɔn ka wiri Krista baraka hɔn, k’a tɛ ɔn ka timi bere wɔn ma salesale ɔn yaa ne mɔɔ domadazɛ na, wɔn mɛ kabakoya fɔn yaa fɔnɔ. ⁷ Ye tɛ wɔkara domadazɛ ɔɔn tiye ga nka sma ɔɔn tiye wiinye ɔɔn yanganmu ka ka yɔɔ ne kia Krista ta fanɛdia bere. ⁸ Nka wiin te pepe, hali a ma mɛ́ na boo wɛlɛ boo mɛlɛkɛ wiin ɔɔn tuma wuro hɔn, ɔɔn naa bɔɔ domadazɛ yira ka ma wiinye dɛ́gɛ ɔɔn ti mià yira ye wɔ na, a na te tɛ a voda. ⁹ Ke pia n’e yira ka ma, ma ne ne bere n’e yira ka ma basiɛ yɛ mɛ ɔn da wiin te ɔɔn fanɛdiazɛ yira ka ma wiinye dɛ́gɛ ɔɔn ti mià yira ye wɔ na, a na te tɛ a voda. ¹⁰ Awale basiɛ ma ka toga. Wuro ta mɛ togo kia ra, taa sma ta ma togo kia? Sma ma mɛ kia ne da ne dia ra? A m’a ma sma ma ma kia ne da ne dia, ma mane na ne Krista ta baratɛta titiri ga. ¹¹ Bare ma ye yira ka ma, kià kma, ɔn da ma wiinye fanɛdia wɔ yira ka ma, ye sɔɔn ye ga. ¹² Wɔn nii wa mɛ, a yɛrɛ ha sɔɔn ɔɔn n’e yira ne ma ga, sɔɔn ma bere ne kala kɔ lɔgɔ mɛ ga nka Yezu Krista ɔɔn ye yɛrɛ dɔrɔ ne ma ɔn n’e yira ne ma. ¹³ Bare mɛ yɛrɛ mane pia ne wiin fa ta Ziwifu ta landa ye na, ka yɛrɛ wɔn mɔɔ. Ma mane Wuro ta kma yannɛ wiin nɛ n’e togo kia migebɛ na. ¹⁴ Ma mane zin gun ne yaa Ziwifulanda hɔn ne n’a dogore kɔ n’a sii na yaan ye pepe fɔnɔ ne dɔgɔ ta tɛ ɔn mane kiɛ ne tamɛ ta landa na da hɔn. ¹⁵ Nka wiin te ɔɔn ne dɛ́gɛ ne tigɛ n’a bii fɔn ma ne ti ne sie tulu hɔn yɛ ɔn ne wiri y’a woramadiabe baraka hɔn, wɔn n’a za da wagati na fɔrɔ yi wiri wiin sangan ma, ¹⁶ ye ne daga ye Nɔ dɔrɔ ne ma wiin fa to m’a da yira Wurotɔbareyasma ma, wɔnna nɔɔ hɔn, ma mane yaa mɔɔ sɔɔn sii ta ga, ¹⁷ ma yaa Zeruzalɛmukuru hɔn ɔn yaa mɔɔ bɔ fanɛsma ta wiinye ɔɔn pia mɛ zin ga. Ma mane yaa Arabugiamana hɔn, wɔn timi ma ɔɔn ne bere naa Damasekuru hɔn. ¹⁸ Dɔgɔ saa wɔn timi ma, ma ɔɔn yaa Zeruzalɛmukuru hɔn wiin fa to ma Piyɛre tɔɔ. Ma mane yin funkoo ɔɔn ta kɔ lege. ¹⁹ Ma fanɛtaza boo za ga, a ma tɛ Matigi na plalo Zake dama ga. ²⁰ Ma wiin fa sɛbɛ ka ma, m’a yira Wuro yɔnnɔ na, ye niɔn ga. ²¹ Wɔn timi ma ɔɔn yaa Sirigiamana kɔ Silisigiamana hɔn. ²² Nka Krista ta kma wiinye ɔɔn ti Zudegiamana hɔn, wɔnwɔ mane ne tɔɔ ga. ²³ Ye mane mɔɔ yee dama ye da ye wiin sɔɔn we ɔɔn man’e yannɛ gwerena, y’awe yɛrɛ mane wiin yɔnmabe we kia yaga na, y’a yira ne fɔnɔ kɔ lege basiɛ. ²⁴ Ye mane Wuro yirebɛ mɛ ye na.

¹ Dɔgɔ funnaa wɔn timi, ma ɔɔn yaa Zeruzalɛmukuru hɔn kɔ Baranabase. Ma mane yaa kɔ Tite mɛ. ² Kamasɔrɔ dɔreda bɔɔ ɔɔn mane dɔre ne ma, wɔn ɔɔn tɛ ma ɔɔn mane yaa yeyɛ. Wiinye kma ɔɔn smayeye, ma mane nɛmɛzɛ ta kɔ wɔnwɔ ye sana wiin fa to ma wiinye fanɛdia wɔ yira Wurotɔbareyasma ma, ma ɔɔn wɔn na kayan yira ye ma. Ma wiinye bara ta ɔn fɔnɔ wɛlɛ ma ti ne wiinye ta basiɛ, ye na foyi ka tɛ zana ye na ga. ³ Nka ne yakwɛta Tite wiin yɛrɛ ɔɔn Girɛkisi, sɔɔn man’a sigebɛ wɔn ma ɔn d’a daga yaro ga. ⁴ Ye m’a wɔn ta, wɔn mane na tɛ ke na plalayaga ta yira da wiinye ɔɔn foyi tɔɔ ga, ɔn ye nii ka ke hɔn. Ke wiin tisramabe gun Yezu Krista ta, ye ne wɔn yaga wiin fa to ke bere tɛ tɛrɛ na yɛ. ⁵ Mɛ́ dian mɛ́ yɛrɛ to wɔnna sma wɔ ma hali kanyɔnnɔ tala na yɛrɛ ga, wiin fa to ke sbɛ fanɛdia na tian gun ka ma. ⁶ Nka a ma bɔ smayeye wɔ han, ye mane pia ne ti wiin nɛ, ne do ti wɔn hɔn ga. Wuro sma tinɔn na kayan ta ga. Yewɔ smayeye wɔ fangan dɛ mɛ ma foyi tala boo na titiri ga. ⁷ Ye yɛrɛ n’a za da fanɛdia ta wiri yarobareyasma ma, wɔn kalfa mɛ ɔɔn ma wɔkara a kalfa Piyɛre ma wiin nɛ yarosma ye na. ⁸ Bare wiin te ɔɔn mane bara ta Piyɛre hɔn fanɛdia ta yira na yarosma ma, wɔnna te we ɔɔn mane bara ta mɛ hɔn yarobareyasma ye na mɛ. ⁹ Wuro ta woramadiabe wiin fa ta ne ma, Zake kɔ Piyɛre kɔ Zan wiinye ɔɔn mane zɛngɛnkma, wɔnwɔ wɔn yɔnnɔ tɔɔ wiin sangan ma, ye ɔɔn bire mɛ kɔ Baranabase na, mɛ́ yaa Wurotɔbareyasma brɛ, yewɔ yaa yarosma brɛ. ¹⁰ Ke mane daga ne durukma ta da ɔɔn giati, a bere ma wɔn ma ma mane sige mɛ. ¹¹ Nka Piyɛre naa wiri Antiyosekuru hɔn wiin sangan ma, ma ɔɔn gwangwana a ma fɔrɔna bare a mane dayaga ta. ¹² Sanɛ Zake ta kma da ye naa, awe mane tangan ne zɔn kɔ Wurotɔbareyasma bɔɔ. Nka wɔnwɔ naa wiri suu, awe ɔɔn ne pipi n’e sabɛ yarosma na kuun na. ¹³ Ye tɛ yee, bɔ Ziwifusɛrɛ ɔɔn ye nii ka a ta tɛda hɔn, Baranabase nii ɔɔn yaa kɔ ye hɔn mɛ. ¹⁴ Nka ma n’a za wiin sangan ma da ye yaa ne tele fanɛdia na sogo ma ga, ma ɔɔn da Piyɛre ma sma pepe yɔnnɔ na: «Bi wiin te ɔɔn Ziwifu, a ɔɔn ma bo ɔɔn bi tɛnɔn wɔkara Wurotɔbareyata, mane tɛ Ziwifu tɛnɔn na ga, nɛ bi sbɛ ne fangan dɛ Wurotɔbareyasma ma ye ne tɛ wɔkara Ziwifu?» ¹⁵ Ke kɔnɛ, ke vɔrɔ ne Ziwifu, ke bɔ kakiɛtɛre Wurotɔbareyasma bɛ nɛmɛ ga. ¹⁶ Hali kɔ wɔn, ke tɔɔ d’a Tɛn ɔɔn sɔɔn ta sɔntele na ga nka ke wiin yɔnmabe gun Yezu Krista hɔn. Ke mɛ, ke yɔɔn Yezu Krista ma wiin fa to ke sbɛ tɛ smatele na Krista ma yɔnmabe baraka hɔn nka ye ka tɛ Tɛn baraka hɔn ga. Bare sɔɔn sbɛ ne tɛ sɔntele na Tɛn baraka hɔn ga. ¹⁷ Nka ke ɔɔn ne telebe kia Krista baraka hɔn ɔn yaa tɛ kakiɛtɛre na mɛ han, wɔn hɔn Krista ɔɔn sɔɔn ka kakiɛ hɔn wa? Awo rɛ. ¹⁸ Ma wiin fa yaga, ma ɔɔn naa da ma wɔn tɛtɛrɛ ne yɛrɛ ma yɛ mɛ, mɛ ɔɔn ne yɛrɛ na zaraketa yɛ kɛ. ¹⁹ Bare Tɛn yɛrɛ ɔɔn mɛ yɛɛ wiin fa to ma ne ti ni na kɔ Wuro. Mɛ kwangwaga kɔ Krista ²⁰ ɔn ne ti ni na nka wɔn mɛ titiri ga yo, Krista ɔɔn ti ni na mɛ hɔn. Bare wiin ni ɔɔn ti mɛ komavere hɔn, m’a ta Wuro Nɔ ma yɔnmabe hɔn, awe wiin ɔɔn ne da diabɛ ye ma ɔn ye yɛrɛ pere ne ye na. ²¹ Mɛ Wuro ta woramadiabe yaga ga. Bare ke ɔɔn ne telebe gun Tɛn baraka hɔn, wɔn kɔrɔ Krista ta siri tɛ zana.

¹ Ee ki Galatekma, ka debe ne yinni rɛ. Kɔ te ɔɔn ka diɛbɛ kamasɔrɔ a ma ki yɛrɛ ma Yezu Krista ta kwangwaga dɔre kìni? ² Ka fa tala dama yira n’a kìni ne ma: K’a tɛ ɔɔn yɔnmabe na fanɛ mɔɔ, wɔn ɔɔn tɛ ka ɔɔn Wuro ta Ni gun ra, taa k’a tɛ ɔɔn ne kwa Tɛn ma? ³ K’a yinnifrɛ wiri wɔn ma ra? Ki wiinye ɔɔn pia k’a da du bii ne dɔɔ Wuro ma a ta Ni baraka hɔn, ka yɛrɛ ta fangan hɔn ka na n’a wɛbɛ basiɛ ra? ⁴ Ka wiinye da pepe ta ɔɔn fɔnɔ, safɛ wɔnwɔ tɛ zana yee kɛ? Ye sbɛ ne tɛ zana yee ga. ⁵ Wiin te ɔɔn Wuro ta Ni pere ka ma ɔn ne kabakoda ta ka yɔ, k’a tɛ ɔn yɔnmabe na fanɛ mɔɔ, wɔn ɔɔn tɛ a ɔɔn n’e ta ra, taa k’a tɛ ɔn ne kwa Tɛn ma? ⁶ Abrahamu ta tɛ ɔɔn mane yɔɔn Wuro ma, wɔn ɔɔn man’a ta sɔntele na. ⁷ Awale ka ye yɔnnɔ tɔɔ han ɔn tɔɔ da wɔn ɔɔn tɛ yɔnmabe ɔɔn ne ti wiinye kma pepe hɔn, wɔnwɔ ɔɔn ne Abrahamu timi kma. ⁸ Yɛrɛ giatɛ Wuro domada na sɛbɛ mane pia n’a yira n’a dɔrɔ ɔn da Wuro na Wurotɔbareyasma ta smatele na yɔnmabe baraka hɔn, wɔn ɔɔn tɛ a ɔɔn mane bɔ fanɛdia bɛ yira n’e tigɛ Abrahamu ma ɔn da y’awe baraka hɔn sii wɔ pepe na siara gun. ⁹ Ye tɛ yee, yɔnmabe ti wiinye kma hɔn, ye duba gun kɔ Abrahamu yɔnmabe ti wiin hɔn. ¹⁰ Bare wiinye kma pepe ɔɔn kwa Tɛn ma, vodɛ ɔɔn na bɛrɛ ye ma. Bare ye sɛbɛ Wuro domada na sɛbɛ hɔn ɔn da, ye wiinye da pepe ɔɔn sɛbɛ Tɛn na da na sɛbɛ hɔn, ye wiin te pepe ɔɔn kwa wɔnwɔ pepe ma ga, ye wɔnna te voda. ¹¹ Awale ye tɛ yee, foyi n’a dɔrɔ ɔn da sɔɔn sbɛ ne tɛ sɔntele na Wuro yinna hɔn Tɛn baraka hɔn ga bare yɔnmabe ɔɔn wiin te ta sɔntele na, wɔnna te ɔɔn na ni gun. ¹² Kamasɔrɔ a yɔnmabe ɔɔn naa kɔ Tɛn ga. Nka Tɛn n’a yira n’a dɔrɔ ɔn da, ye wiin te ɔɔn kwa yi ma, ye wɔnna te na wɔɔ ni na. ¹³ Nka Krista ye yɛrɛ voda ke ye na wiin fa to a ke wɔnku sara ɔn ke wɔɔn wa bare ye sɛbɛ Wuro domada na sɛbɛ hɔn ɔn da, ye ye wiin te kwangwaga sɔnɔ ma, ye wɔnna te voda. ¹⁴ Wɔn tɛ wiin fa to Abrahamu ma duba sbɛ wiri Wurotɔbareyasma ma Yezu Krista baraka hɔn. Ye tɛ yee, wiin Ni na do ɔɔn mane sɔɔ, ke wɔn gun yɔnmabe baraka hɔn. ¹⁵ Kià kma, ka tɛ ke sma yɛrɛ ta da na kayan ta dɛn han. Sɔɔn ye do sɔɔ wiinye da na, a na te ta da ɔɔn n’e tele, sɔɔn n’a ta dosɔ yaga ga, ɔn mane fa kwɛ ye ma mɛ ga. ¹⁶ Awale, Abrahamu kɔ ye timite ma dosɔ tɛ. Ye d’awe kɔ ye timikma ɔɔn tɛ wɔkara ye yaan ga yo. Nka timite sɔnnala dama na ye da yo. Ye sɛbɛ ɔn da bi ɔnkɔ be timite, wɔn kɔrɔ Krista. ¹⁷ Bo mia giatɛ: Wiin dosɔ ɔɔn ti sogo ma, Wuro ɔɔn pia n’a tigɛ. Wiin Tɛn ɔɔn naa dɔgɔ zɔnaa ne kiofun (430) wɔn timi, wɔn sbɛ n’a yaga ga yo. Ye ɔɔn tɛ yee, dosɔ tɛ zanafa na. ¹⁸ Bare a ɔɔn ma Tɛn baraka hɔn kɔrɔ gun, wɔn kɔrɔ ye dosɔ baraka hɔn titiri ga. Kamasɔrɔ a ma dosɔ baraka hɔn Wuro y’a woramadiabe ta Abrahamu ma. ¹⁹ Wɔnnɔ na Tɛn yɛrɛ tigɛ? A tigɛ wiin fa to sma dayaga yɔnnɔ tɔɔ, dosɔ tɛ wiin timite we ye na sanɛ wɔn ne naa. Mɛlɛkɛ n’a puru n’a yira vɛta boo baraka hɔn wiin ɔɔn Moyizi. ²⁰ Kamasɔrɔ wiin te ɔɔn ne ti ye sana, vɛtada ti wɔnna te ta da hɔn ga, Wuro ne ti ye sɔnnala dama yee. ²¹ Tɛn sbɛ ne Wuro ta dosɔ yaga ra? Awo. Boo Tɛn m’a tigɛ wiin baraka hɔn, sɔɔn sbɛ ne wɔɔ ni na, wɔnna sangan ma Tɛn mane na ne sbɛ ne sɔɔn ta sɔntele na. ²² Nka Wuro domada na sɛbɛ n’a yira n’a dɔrɔ ɔn da, ye diniyan pepe ti kakiɛ soro ma wiin fa to wiin dosɔ ɔɔn tɛ, ye sbɛ wɔn gun Yezu Krista baraka hɔn yɔnmabe do ma. ²³ Sanɛ yɔnmabe da ye naa, ke mane ti Tɛn ta pɛrɛ hɔn ne tɛrɛ ne yɔnmabe ta dɔre yɛ́rɛ. ²⁴ Ye tɛ yee, Tɛn mane tɛ ke na yɛreta na ne Krista ta naa yɛ́rɛ wiin fa to ke sbɛ tɛ smatele na yɔnmabe baraka hɔn. ²⁵ Nka yɔnmabe naa wɛ timi ma, ke ti wɔnna yɛreta we soro ma titiri ga. ²⁶ Bare yɔnmabe ka pepe ta Wuro nɔmanɛ na Yezu Krista baraka hɔn. ²⁷ Ki wiinye kma pepe ɔɔn batize Krista hɔn, ka mane Krista ka wɔkara zogo. ²⁸ Ziwifu tiye titiri ga, Girɛki mane tiye mɛ ga. Tere tiye titiri ga, tisramasɔn mane tiye mɛ ga. Nimisin tiye titiri ga, ya mane tiye mɛ ga bare ka pepe tɛ tala Yezu Krista baraka hɔn. ²⁹ Ka ɔɔn ne Krista ye, wɔn kɔrɔ ka Abrahamu timikma. Dosɔ n’a yira n’a dɔrɔ ɔn da ka kɔrɔzɔnsma.

¹ Bo mia giatɛ: Kɔrɔzɔnta ɔɔn ne nimisalo, foyi n’a dɛ́gɛ wa tere na ga, kamasɔrɔ a ne frɛ pepe wɔnnate. ² Nka a kalfa wiinye kma ma, a na ne ti wɔnwɔ soro ma fɔn yaa kayan tɔn we wiin wagati tigɛ. ³ Yee mɛ, ke mane ti diniyan hɔn da soro ma wiin sangan ma, ke mane ti wɔkara nimisala ne tɛrɛ. ⁴ Nka wagati do naa paga wiin sangan ma, Wuro ɔɔn ye nɔ fanɛ, a ɔɔn naa vɔrɔ ya ta ne ti Moyizi ta Tɛn soro ma ⁵ wiin fa to wiinye kma ɔɔn ti Tɛn soro ma, a wɔnwɔ wɔɔn wa, ke sbɛ tɛ Wuro nɔmanɛ na. ⁶ Ka Wuro nɔmanɛ siɛbɛ na. Wuro ye Nɔ Ni ka ka hɔn, a ne sɔngɔ ne kwa: «Aba ke Tɔn.» ⁷ Ye tɛ yee, be tere titiri ga nka be nɔ. Awale, be ɔɔn ne nɔ, be tɔɔ da Wuro ɔɔn be ta kɔrɔzɔnta na. ⁸ Ka mane Wuro tɔɔ wiin sangan ma dɛn ga, bafrɛ soro ma ka mane ti wiinye ɔɔn Wuro ga. ⁹ Nka basiɛ ka Wuro tɔɔ wɛlɛ basiɛ Wuro ka tɔɔ, nɛ na ka sbɛ ne bere ne yaa wɔnna frɛ wɔ brɛ yɛ, fangan ti wiinye hɔn ga, duru ne ti ye na ɔn yaa ka yɛrɛ ka ye sra hɔn yɛ? ¹⁰ Ka kwa bɔɔ kɔre kɔ bɔɔ yɛgɛ kɔ bɔɔ wora kɔ bɔɔ dɔɔ ma fɔrɔna. ¹¹ Ka ne kwanbɛ kɔ k’a da. Ma ka na baratɛ ka ye na zana yee ga. ¹² N’a kma, ma ka mɛ ka ne tɛ wɔkara ne nɛmɛ bare ma tɛ ka na boo na. Ka foyi boo ta ne na ga. ¹³ Ka n’e yɔnnɔ tɔɔ tian na ɔn da ma gwere da ma fanɛdia yira ka ma, ye mane tɛ laganuruda bɔɔ du ma. ¹⁴ N’a laganuruda mane tɛ tɛsegeda na ka ma nka hali kɔ wɔn, ka ma maga ne hɔn ga, ma ne laga mɛ ga. Nka ka ne foga wɔkara Wuro ta mɛlɛkɛ wɛlɛ Yezu Krista. ¹⁵ Wiin nihɔndiaro ɔɔn mane pia ne ti ka hɔn, nɛ a tɛ? Bare ma sbɛ n’e yira ɔn da ka yɛrɛ mane sbɛ ne ka yinna milɛ, ka mane na n’e milɛ n’e pere ne ma. ¹⁶ N’a tɛ ɔɔn ne tian yira ka ma, wɔn ɔɔn tɛ ma ɔɔn tɛ ka zugu na ra? ¹⁷ Bɔ sma bɛ ka togo yira fɔrɔna nka ye ta giatɛ fɔrɔ ga. Ye kia ka dɛ́gɛ mɛ́ na wiin fa to ka ne k’a tɔnɔ pepe pere ye ma. ¹⁸ Wiin fa ɔɔn fɔrɔ, wɔn ka ne barafɔre ta sangan pepe ma, ye ka ne tɛ mɛ na tisangan ma kɔ ka nɛmɛ dama yee ga. ¹⁹ Mɛ nɔmanɛ, mɛ ni na debe ne ban fɔrɔna rɛ wɔkara wiin ya ɔɔn mana fɔn yaa kayan Krista ta da ta kɔ ma ka kakiri hɔn. ²⁰ Ee ma mane ti kɔ ka nɛmɛ bo basiɛ be na wiin fa to ma ne domada yira ka ma kɔnɛ, bare ma tɔɔ da ma sbɛ ne ka foga wiin nɛ ga yo. ²¹ Ki wiinye kma ɔɔn kia wɔɔ Tɛn soro ma, ka yira ne ma, Tɛn wiin fa yira, ka wɔn mɔɔ ga ra? ²² Ye sɛbɛ ɔn da ye Abrahamu mane nimisininɔmanɛ sma pla ɔɔn gun. Tala man’a ta tɛrɛya nɔ, bo tala n’a ta vɛnɔmaya nɔ. ²³ Nka tɛrɛya we nɔ mane vɔrɔ sɔɔn ta sebe baraka hɔn. Vɛnɔmaya we nɔ ɔɔn vɔrɔ Wuro ta dosɔ baraka hɔn. ²⁴ Wɔnna da wɔ sbɛ ne tɛ tagamase na. Wɔnna yàra sma pla wɔ Wuro ta bɛɛn pla wɔ mɛ. Bo tala wiin ɔɔn tuma Sinayitolo ma, wɔn vɔrɔ tɛrɛbe na. Wɔn Agare. ²⁵ Bare Sinayitolo ti Arabugiamana hɔn. Agare wɔn tɛ wɔkara Zeruzalɛmukuru na basiɛ na yi bare a ti tɛrɛbe hɔn kɔ ye hɔn kma. ²⁶ Nka Zeruzalɛmu na wuro hɔn yi, wɔn ti ye yɛrɛ soro ma. Awe ɔɔn ke sie. ²⁷ Bare ye sɛbɛ Wuro domada na sɛbɛ hɔn ɔn da, ye nihɔndia vɔrɔkaraya. Bi wiin ɔɔn nɔmanɛvoro na bado tɔɔ ga, nihɔndia fɔrɔna. Bare yanma yaga bi wiin ya na, be nɔmanɛ na yaan ye moronaya ye ma. ²⁸ Kià kma, ki tɛ dosɔ na nɔmanɛ na wɔkara Izake. ²⁹ Nka wiin nɔ ɔɔn vɔrɔ sɔɔn baraka hɔn, wɔn mane Wuro ta Ni baraka hɔn vɔrɔ yi yannɛ wiin nɛ, yee ye ti basiɛ yɛ mɛ. ³⁰ Awale, wɔnnɔ Wuro domada na sɛbɛ ɔɔn yira? Tɛrɛdalo we laga kɔ a nɔ bare a nɔ daga gun kɔrɔ na kɔ vɛnɔmaya we nɔ ga. ³¹ Kià kma, ye tɛ yee, ke tɛrɛdalo nɔmanɛ ga nka ke vɛnɔmaya ɔɔn nɔmanɛ.

¹ Krista kia ke ne ti ke yɛrɛ soro ma siɛbɛ na, wɔn ɔɔn tɛ a ɔɔn ke wa tɛrɛbe hɔn. Wɔn ye na, ka ka sige wiin fa to ka ka naa bere kɔ tɛrɛbe na yannɛ hɔn titiri ga. ² Mɛ Pɔle n’a yira n’a dɔrɔ ka ma ɔn da ka ɔɔn yaro, Krista na tɛ foyi na fɔrɔfa na ka ta titiri ga. ³ Wiin te pepe ɔɔn yaro, m’a yira n’a dɔrɔ a na te ma yɛ mɛ ɔn d’a daga Tɛn na da pepe ta. ⁴ Ka ɔɔn n’a giati ɔn da Tɛn ɔɔn na ka ta smatele na, wɔn kɔrɔ ka ti kɔ Krista titiri ga, ka nii ma bere ne ti woramadiabe hɔn titiri mɛ ga. ⁵ A ma mɛ́ han, Wuro ta Ni baraka hɔn ɔnkɔ yɔnmabe baraka hɔn telebe daga wiin fa pere sɔɔn ma, mɛ́ tangan ne wɔn yɛ́rɛ. ⁶ Bare wiin te ɔɔn ti kɔ Krista, yaro kɔ yarobareya foyi wɔnna te ta ga nka wiin yɔnmabe ɔɔn zɛ dadiamabe baraka hɔn, wɔn ɔɔn fa. ⁷ Ka dubinɔn mane fɔrɔ nka kɔ te ɔɔn ka ta ka ɔɔn tian na sogo dra? ⁸ Wɔnna yanganmu we sa ka na wirita hɔn ga. ⁹ Kwindie na zɔgɔ ɔɔn fɔgɔ kobɛ. ¹⁰ Mɛ yɔɔn Matigi ma ka ye na ɔn tɔɔ da ka na soza bii ga. Nka wiin te ɔɔn ka ka yanganmu hɔn, hali a ɔɔn tɛ wiin te pepe, a na n’e na yinna hɔn togo gun. ¹¹ A ma mɛ han kià kma, ma ɔɔn ne yaroda yira, wɔnnɔ na ye ne yannɛ yɛ mɛ? Ye ɔɔn ma ne ti yee, ma Krista ta kwangwaga wiin yira, wɔn mane na ne sɔɔn ba titiri ga yo. ¹² Wiinye kma ɔɔn yanganmu ka ka yɔ, ye y’a sinifrɛ pepe sɔɔ n’e wa melemele kɛ. ¹³ Kià kma, tisramabe ye na ka wiri. Nka ka ka tɛ wɔnna tisramabe we tɛ dɛndɛnmada na ka kɔ ka ma diamada hɔn ga. Dadiamabe do ma, ka ne ka nɛmɛ mako fɔrɔ. ¹⁴ Bare wɔnna domada tala wɔ dama ɔɔn Tɛn pepe na kwɛ yi do pagabɛ ɔn da: Be be nɛmɛ da diabɛ be ma wɔkara be yɛrɛ. ¹⁵ Nka ka kɔrɔse. Wɔn ma tɛ ga, ka ɔɔn ne nɛmɛ win, ne nɛmɛ nɔma, ka na ka nɛmɛ yaga. ¹⁶ Ka mɔɔ ne ta. Ka ne yaa Wuro ta Ni ta kini na, wɔn ɔɔn na tɛ, ka ka ne ka yɛrɛ ma diamada ta titiri ga. ¹⁷ Bare ki kɔ ka ma diamada bɛɛn ne kɔ Wuro ta Ni ga. Wuro ta Ni mane bɛɛn ne kɔ lege mɛ ga. Birisi ɔɔn ti ye yɔ. Ye tɛ yee, ka sbɛ ne ka ma diamada ta ga. ¹⁸ Nka a ɔɔn ma Wuro ta Ni ɔɔn ka diɛma, wɔn kɔrɔ ka ti Tɛn soro ma ga. ¹⁹ Ke komavere ta tɛda tɔɔ: Bo mamafa bo vunafa bo kakalafa ²⁰ bo fiankan bo kiɔnɔ bo yuu bo zugoyagafa bo kiɔn bo woraba bo samanɛ bo nɛmɛdɛ́gɛ ²¹ bo yinnanayanfa bo mɛnɛyingin bo korokunfa ɔnkɔ wɔn nɛmɛ na yaan ye yɛ. Ma ye yira ka ma wɔkara ma mane pia n’e yira ka ma wiin nɛ ɔn da, wiinye kma ɔɔn ti wɔn bɔ pepe hɔn, wɔnwɔ na kɔ Wuro ta kolo hɔn ga. ²² Nka Wuro ta Ni wiin fa ta bo wɔn: Dadiamabe, nihɔndiaro, siara, sɔmna, foro, woramadiabe, yɔnmabe, ²³ woramakuna, yɛrɛfigɛ. Tɛn maga wɔnna da wɔ na ga yo. ²⁴ Wiinye kma ɔɔn Yezu Krista ye, wɔnwɔ y’a mere na da kɔ ye ma diamada yɛɛ yo. ²⁵ A ɔɔn ma Wuro ta Ni baraka hɔn ke ti ni na, ka tɛ ke ne yaa Ni ta kini na mɛ kɛ. ²⁶ Ka ka tɛ ke ne ke yɛrɛ yirebɛ nɛmɛ hɔn ga, ɔn ka ne ke nɛmɛ nabada ta ga, ɔn ka ne ke yinna sabɛ ke nɛmɛ ta frɛ na ga.

¹ Kià kma, ka na wiin ɔɔn figɛ kakiɛ hɔn, ki wiinye kma ɔɔn yaa Wuro ta Ni ta kini na, ki ɔɔn daga n’a telebɛ kɔ kakirifɔrɔ. Be yɛrɛ kɔrɔse bare bi yɛrɛ sbɛ ne kɔ mama hɔn mɛ. ² Ka ne ka nɛmɛ diɛma, wɔn ɔɔn na tɛ ka Krista ta Tɛn do paga. ³ Bare wiin te ɔɔn ye yɛrɛ ta sɔngwaga na kamasɔrɔ a mane ti yee ga, awe ɔɔn ye yɛrɛ lamara yɛ. ⁴ Wiin ti pepe wɔn n’e datɛnɔn kɔrɔse ye sana. A ɔɔn zugofɔre za ye yɛrɛ hɔn, a na te nihɔndia wɔn na, a ka ye yirabɛ kɔ sɔnza ga. ⁵ Bare wiin ti pepe, wɔn na ye yɛrɛ wɔnbie ɔɔn bii. ⁶ Wiin te ɔɔn Wuro domada mɔɔ, wiin te ɔɔn n’a kala kɔ lɔgɔ, a ye sra hɔn frɛ pepe na bɔɔ pere wɔnna te ma. ⁷ Ka ka ka yɛrɛ firebɛ ga. Sɔɔn ka ye yɔnnɔ ka Wuro na ga. Sɔɔn wiin fa tugo, wɔn a na ɔɔn kiɛn. ⁸ Wiin te ɔɔn dɔɔ ye ma diamada ma, siri a na te na ɔɔn gun tɔnɔ na. Wiin te ɔɔn Wuro ta Ni ma diamada ta, wɔnna te na wɛbareyani ɔɔn gun. ⁹ Ka tɛ ke ne dafɔre ta suu ɔn ka da ke bana ga bare ke ɔɔn ma sa ga, wagati ɔɔn naa wiri wiin sangan ma, ke na tɔnɔ gun yaan. ¹⁰ Wɔn ye na wagati ɔɔn ne ti ke ta, ke ne sma pepe mako na fɔrɔda ta. Wiinye kma yɛrɛ ɔɔn ke na plala yɔnmabe hɔn, ke ne wɔnwɔ yɛrɛ mako fɔrɔ. ¹¹ Ka sɛbɛda wɔ za yeye rɛ, mɛ yɛrɛ ɔɔn n’e sɛbɛ ka ma. ¹² Wiinye kma ɔɔn fangan dɛ ka ma yaro na, ye wiinye kma ɔɔn kia n’e yɛrɛ dɔrɔ sma ma yee dama. Ye wɔn ta wiin fa to sma ka na n’e yannɛ Krista ta kwangwagada ye na ga. ¹³ Bare wiinye kma yɛrɛ ɔɔn yaro, ye kwa Tɛn ma ga yo. Nka ye kia ka yaro wiin fa to sma n’e yirebɛ yee dama wɔnna tɔbe wɔ ye na ka ma. ¹⁴ A ma mɛ han, yirebeza ti mɛ ta a ma tɛ Matigi Yezu Krista ta kwangwagasɔ ga. Awe baraka hɔn diniyan kwangwaga mɛ ye na, mɛ ɔn kwangwaga diniyan ye na mɛ. ¹⁵ Bare wiin fa ɔɔn sige yi, wɔn yaro wɛlɛ yarobareya ga nka ke tɛ danfrɛ na wun ye na. ¹⁶ Wiinye kma ɔɔn dɔɔ wɔnna Tɛn we ma, ma da Wuro tɛ a y’a siara kɔ y’a foro ta ye ma ɔnkɔ Wuro ta kma pepe ma mɛ. ¹⁷ N’a bii basiɛ, sɔɔn sii ka da ye ne ninaban titiri ga bare Yezu ta tɔbe ɔɔn ti mɛ kɔn hɔn. ¹⁸ Kià kma, kià Matigi Yezu Krista ta woramadiabe tɛ a ne ka diɛma suu. Amina.