TƐDA

TƐDA

¹ Ne mafɔrɔ Tewofili, Yezu mane wiin fa pepe ta ɔn sma kala kɔ wiinye da pepe, n’a bii ye na dubisangan ma, fɔn yaa kayan a durobakɔ ma wuro hɔn, ma mane wɔn nɔma yira be ma n’a gweresɛbɛ hɔn. Sanɛ a da ye ba wuro hɔn, a mane fanɛsma wiinye dɛ́gɛ, a ɔɔn wɔnwɔ ladi Wuro ta Ni baraka hɔn. ³ A siri wɛ timi ma, yewɔ ma a na sugu yi man’e yɛrɛ dɔrɔ nɔma na yaan ye na bare a man’e yɛrɛ dɔrɔ ye ma yin kiepla yɔ ne barotɛ kɔ lɔgɔ ne Wuro ta kolo na da yira ye ma. ⁴ Boo kɔɔ ma, ye mane ti zama hɔn, a ɔɔn n’a yira n’a sigebɛ ye ma, ye ye ka da ye sa Zeruzalɛmukuru hɔn ga, ye Tɔn wiin fa na dosɔ ta, ye n’a da yira ye ma, ye ye wɔɔ yeyɛ ɔn wɔn yɛ́rɛ. ⁵ Ye Zan kɔnɛ mane sma batize zu hɔn, ye nka bɛɛ yɔ ne yin damanɛ, Wuro ta Ni baraka hɔn yewɔ na batize. ⁶ Yezu ta kalanɔmanɛ pepe mane kwɛ ɔn n’a toga, ye Matigi, ye basiɛ a na Isirayɛle ta fanganmabe tigɛ ra? ⁷ A ɔɔn da ye ma, ye Tɔn wiin wagati tigɛ y’a sebe hɔn, y’a yewɔ ɔɔn daga wɔn tɔɔ ga. ⁸ Ye nka, ye ye na sebe boo gun wiin ɔɔn Wuro ta Ni yi wiin ɔɔn na zii ye ma. Ye wɔn na tɛ ye tɛ yi siɛrɛ na Zeruzalɛmukuru hɔn kɔ Zudegiamana pepe hɔn kɔ Samari wola hɔn kɔ lagakɔn pepe tege na. ⁹ Wɔnna domada wɔ yira wɛ timi ma suu, a ɔɔn duro wuro hɔn ye yɔnnɔ na, dabanɔ boo ɔɔn pi a ma, ye man’a za titiri ga. ¹⁰ Yezu ba wiin wuro hɔn, ye mane taa ne ti sege hɔn wɛɛn yɛ, ye da ye tɔɔ, zogafurokma sma pla bɔɔ ne taa kɔ lɔgɔ ¹¹ ɔn da ye ma: «Galilekma, wɔnnɔ na ka taa wɔɔ bɛɛ ne wurokɔn sege? Wiin Yezu we ɔɔn duro wɛ ka yɔ, a ba wuro hɔn wiin nɛ, yee a na bere naa yɛ wɔkara k’a na yaa yi za wiin nɛ.» ¹² Ye wiin tolalo we wiri da Olivutolo, wɔnna tolalo we ti dɛrɛ Zeruzalɛmukuru na siɛ ga, ye kayan kilo tala nɛmɛ. Fanɛsma ɔɔn tuma wɛɛn ɔn ye bere bige. ¹³ Ye naa bige, ɔn yaa ba zangan hɔn. Bo mane Piyɛre, bo ma Zake kɔ Andre, bo ma Filipu kɔ Toma, bo ma Baretelemi kɔ Matiye, bo ma Alife nɔ Zake, bo ma Simɔn wiin ɔɔn mane sma magabɛ Ɔrɔmukma ta fanganma ma, bo ma Zake nɔ Zude. ¹⁴ Ye pepe man’e nɛmɛ kwɛ ne Wuro mɛ kɔɔ pepe ma kɔ yàra sma damanɛ bɔɔ mɛ. Bo mane Yezu sie Mari ɔnkɔ Yezu na plala. ¹⁵ Wɔnna kɔɔ we ma, sma zɔlo ne kioro (120) nɛmɛ mane kwɛ, Piyɛre ɔɔn tuma taa ye woro hɔn ɔn da: ¹⁶ «Kià kma, Wuro ta Ni mane wiin fa yira Wuro domada na sɛbɛ hɔn Davidi baraka hɔn Zuda ta da na, wiin ɔɔn tɛ Yezu na figɛsma na yeta na, wɔn mane daga tɛ na. ¹⁷ Zuda mane mɛ́ na boo, a man’e nii gun mià bara na mɛ. ¹⁸ Ye man’a sara kɔ wiinye gwana a ta dayaga ye na, a lɔ boo tɛrɛ kɔ lɔgɔ. A da ye bɛrɛ ɔn baga ye wɔɔn ma yeyɛ, a tulu ɔɔn fɛtɛ, a kɔrɔnɔmanɛ pepe ɔɔn zanzan. ¹⁹ Zeruzalɛmukma pepe mane wɔnna da wɔ yɔnnɔ tɔɔ. Bo wɔn ye na ye wɔnna lɔ we wiri y’a sida hɔn, ye Hakɛledama. Wɔn kɔrɔ too na lɔ. ²⁰ Ye sɛbɛ Wuroyirebɛturo na sɛbɛ hɔn ɔn da, y’a ta kɔɔn daga wɔɔ kebe, sɔɔn ka ne ti yeyɛ ga. Ne bere ne sɛbɛ yɛ mɛ ɔn da, ye sɔnza daga n’a ta bara bii. ²¹ Awale n’a bii fɔn Matigi Yezu na tisangan ma kɔ ke nɛmɛ, bɔɔ sma mane dɔɔ ke ma ²² n’a bii a batize wɛ timi ma Zan ta fɔn yaa kayan wiin kɔɔ ma awe Yezu yɛrɛ tɔɔ ke ta ɔn duro ɔn ba wuro hɔn. Wɔn ye na, yewɔ sma wɔ na boo daga kwɛ kɔ ke nɛmɛ ɔn tɛ Yezu ta winnisa na siɛrɛ na.» ²³ Ye ɔɔn sma pla dɔrɔ. Bo mane Zozɛfu, ye wiin wiri Barasabase, bɔɔ n’a togo dɛ da Zusetuse mɛ, bo ma Matiyase. ²⁴ Ye mane bo wuromɛ be ta ɔn da: «Matigi bi wiin ɔɔn sma pepe kɔrɔ hɔn da tɔɔ, be wiin te dɛ́gɛ bɔ sma pla bɛ hɔn, wɔn dɔrɔ ²⁵ wiin fa to a tɛ fanɛsma na boo na Zuda na ku na, wiin ɔɔn ye tado to ɔn yaa ye yado hɔn.» ²⁶ Ye mane vɛngɛnɛ dra, ye ɔɔn bɛrɛ Matiyase ma, wɔn ɔɔn kwɛ kɔ fanɛsma sma funnala wɔ sin.

¹ Pantekɔte kɔɔ naa wiri, yɔnmabe ti wiinye kma hɔn, wɔnwɔ pepe na kwɛ ye mane ti bii tala hɔn. ² Ye da ye tɔɔ, digekɔn na yire yi ɔɔn sa wuro hɔn wɔkara wuropangan digekɔn. Ye mane ti wiin kɔɔn hɔn, wɔn pepe ɔɔn paga digekɔn we na. ³ Bo wɛɛn, ye ɔɔn frɛ bɔɔ za, ye ne wɔkara toganiɔn ɔɔn sodinidini ɔn tangantangan ye pepe ma. ⁴ Ye pepe mane paga Wuro ta Ni na ɔn dutigɛ ne bɛre sidazɛ hɔn, Wuro ta Ni mane wiinye ka ye da hɔn. ⁵ Kamasɔrɔ ye na kɔɔ we ma, Ziwifu wiinye ɔɔn kwa wurosogo ma fɔrɔna wɔnwɔ mane sa sii wɔ pepe hɔn diniyan hɔn ɔn naa Zeruzalɛmukuru hɔn. ⁶ Wiinye da wɔ ɔɔn mane tɛ, wɔn ta mɔɔ mane zamɛ ta ye ɔɔn yaa ye nɛmɛ kwɛ wiin ti pepe wɔn ne kaba bare ye pepe man’e ta bɛreda mɔɔ ye yɛrɛ ta sida hɔn. ⁷ Ye pepe kakiri mane yanganmu, ye ne kaba ne kwa ye nɛmɛ ma: «Bɔ sma bɛ pepe ɔɔn bɛre, ye Galilekma ga ra? ⁸ Nɛ na ye tɛ ke pepe ɔɔn n’e ta bɛreda mɔɔ kià sida hɔn? ⁹ Ke na bɔɔ tuma Paratigiamana hɔn, bɔɔ ɔɔn tuma Medigiamana hɔn kɔ Elamegiamana hɔn, bɔɔ ɔɔn tuma Mezopotamigiamana hɔn, bɔɔ ɔɔn tuma Zudegiamana hɔn, bɔɔ ɔɔn tuma Kapadɔse bɔɔ ɔn tuma Pɔn, bɔɔ ɔɔn tuma Azigiamana na wola hɔn. ¹⁰ Bɔɔ tuma Firizigiamana hɔn, bɔɔ ɔɔn tuma Panfiligiamana hɔn, bɔɔ ɔɔn tuma Ezipitigiamana hɔn, bɔɔ ɔɔn tuma Sirɛnegiamana na wola hɔn, bɔɔ ɔɔn tuma Libigiamana hɔn, bɔɔ ɔɔn tuma Ɔrɔmukuru hɔn. ¹¹ Bɔɔ ti ke hɔn wiinye ɔɔn vɔrɔ ne Ziwifu, bɔɔ ma wiinye ɔɔn kɔ Ziwifube hɔn. Bɔɔ Kerɛtekma, bɔɔ ma Arabu. Hali kɔ wɔn, ke pepe n’e ta bɛreda mɔɔ kià sida hɔn zɛzɛ, ye ne Wuro ta kabakoda yira ke ma.» ¹² Ye pepe kakiri mane yanganmu, ye ma tɔɔ da wiin fa ɔɔn tɛ ga, ye ɔɔn ne kwa ye nɛmɛ ma: «Wɔnnɔ ɔɔn bɔ kɔrɔ?» ¹³ Bɔɔ mane kwa, ye ye yingin duvɛndia ɔɔn na. ¹⁴ Wɔn tɛ Piyɛre wiin ɔɔn mane ti kɔ fanɛsma funnala wɔ, wɔn ɔɔn taa ɔn ye kɔn duro ɔn da: «Zudekma kɔ ki wiinye kma pepe ɔɔn ti Zeruzalɛmukuru hɔn, wiin fa ɔɔn tɛ ka wɔn kɔrɔ tɔɔ fɔrɔna ɔn ka tra taba n’a bɛreda na. ¹⁵ Ka wiin fa giati ne kwa, ye bɔ sma bɛ mɛnɛyingin, ye ti yee ga bare ye kikimasin ma yɛ. ¹⁶ Wuro ta daberebɛta Zowɛle mane wiin fa yira, wɔn ɔɔn ti ne tɛ basiɛ. ¹⁷ A mane da, ye Wuro da, ye wɛbɛsangan ma, ye ye na y’a Ni zibɛ sma pepe ma. Ye ka nɔmanɛ dala kɔ sini na tɛ daberebɛsma na. Ye k’a smazɔre na ne dɔreda za. Ye k’a sɔnmlala na ne sɔnyangan. ¹⁸ Ye wɔnna kɔɔ ma, ye ye na y’a Ni zibɛ y’a baratɛre ma, sini na ye kɔ yàra na ye pepe, ye tɛ daberebɛsma na. ¹⁹ Ye ye na kabakoda ta wurokɔn ma wuro hɔn ɔn tagamase ta lagakɔn ma bɛɛ. Ye wɔn na ne too kɔ togo ɔnkɔ tioro. ²⁰ Ye sanɛ Matigi ta kɔɔ ne wiri, wiin kɔɔ we ɔɔn yire, yirebe ne ti a ma, ye sin na bere ɔn tɛ tunio na yuu pɛnɛ wɔkara too. ²¹ Ye wɔnna sangan ma, wiin te pepe ɔɔn Matigi togo wiri, ye wɔnna te na kisi. ²² Ka mɔɔ ne domada na Isirayɛlenɔmanɛ. Nazarɛtinɛmɛ Yezu, Wuro mane wiin sɔɔn we fanɛ ka brɛ, a ne kabakoda sii pepe ta Wuro yɛrɛ baraka hɔn ka yɔ wɔkara ka ye nɔma tɔɔ wiin nɛ, ²³ Wuro mane pia n’a ta da giati n’e tigɛ wiin nɛ, yee ye tɛ. K’a ka smayaga sra hɔn, wɔnwɔ ɔɔn n’a nii wa ɔn n’a kwangwaga sɔnɔ ma. ²⁴ Nka Wuro n’a winni na wa siri na yannɛ hɔn bare a mane sbɛ ne wɔɔ siri sra hɔn ga. ²⁵ Davidi man’a da yira ɔn da, ye yi mane Matigi za ye zin sangan pepe ma, y’a ti ye kiege ma wiin fa to ye ka sma ga. ²⁶ Ye wɔn ye na yi nihɔndia, ne sɔn nihɔndiaro hɔn. Ye wɔn pepe nii wa mɛ, ye na ne tangan yɔnmabe hɔn. ²⁷ Ye bare be na ye za ye to wara ga, ye be na bia sɔnfɔrɔ to a vra ga. ²⁸ Ye be kisi na sogo dɔrɔ ye ma ɔn ne na ye nihɔndiabɛ kɔ bia zɛ. ²⁹ Kià kma, wɔn ye na ma daga n’a yira n’a dɔrɔ ka ma pasaa na ɔn da ke bɛma Davidi siri, ye n’a sitra, a bona ne ti ke brɛ hali naa n’a kwɛ sma ma yɛ. ³⁰ Nka a mane Wuro ta daberebɛta ɔn tɔɔ da Wuro ye do sɔɔ ye ma ɔn ye sun ye na ɔn da ye na ye timikma na boo wiin ɔɔn ye yɛrɛ ta vɔrɔ yi tanganbɛ y’a fanganmakware ma. ³¹ Wɔn kɔrɔ a pia Krista ta winni yɔnnɔ tɔɔ n’e tigɛ, bo wɔn tɛ a ɔɔn man’a da yira ɔn da, ye Wuro na n’a za n’a to wara ga, y’a kɔn ma bere ne na vra mɛ ga. ³² Awe Yezu we, Wuro n’a winni, mɛ́ pepe wɔn na siɛrɛ. ³³ A duro ɔn ba yaa tangan Wuro digesoro ma. Wuro ta Ni wiin na do ɔɔn mane sɔɔ Tɔn ta, a wɔn gun ɔn n’a zanzanbɛ wɔkara ka ye za wiin nɛ ɔn n’e mɔɔ wiin nɛ. ³⁴ Davidi wiin ɔɔn ba wuro hɔn ga, wɔn n’a yira n’a dɔrɔ ɔn da, ye Matigi da y’a Matigi ma, y’a tangan ye digesoro ma ³⁵ fɔn yaa kayan y’a zugi pepe bɛrɛbɛ a wee. ³⁶ Wɔn ye na Isirayɛlenɔmanɛ pepe daga n’e yɔnnɔ tɔɔ n’e kini ɔn da ka wiin Yezu we kwangwaga sɔ ma, Wuro n’a ta Matigi ne Krista na.» ³⁷ Ye naa wɔnna bɛreda wɔ mɔɔ wiin sangan ma, wɔn n’e nina ban fɔrɔna, ye ɔɔn Piyɛre kɔ bɔ fanɛsmasɛrɛ toga ɔn da: «Kià kma, wɔnnɔ mɛ́ daga wɔn ta?» ³⁸ Piyɛre ɔɔn da ye ma: «Ka ka zugo katra. Ka na wiin ti pepe a batize Yezu Krista togo na wiin fa to a y’a kakiɛ na yafa gun. Wuro ta Ni na pere ka ma. ³⁹ Bare ki kɔ ka nɔmanɛ ma dosɔ daga wiri ɔnkɔ wiinye sma na yaan ye pepe ɔɔn ti dɛrɛdo hɔn Matigi kià Wuro na wiinye wiri.» ⁴⁰ Piyɛre mane y’a siɛrɛbe ta kɔ bɛredazɛ na yaan ye yɛ n’e mɛ fɔrɔna ne kwa ye ma: «Ka ka nii wa bɔ firesma bɛ hɔn ɔn ka ni kisi.» ⁴¹ Wiinye kma ɔɔn mane dian mɔɔ a domada na, wɔnwɔ mane batize. Ye na kɔɔ ma, sma sana saa (3,000) nɛmɛ mane kwɛ yɔnmabe na kma wɔ ma. ⁴² Ye mane kwa fanɛsma wɔ ta kala ma ne kwɛ ne y’a zɔnfa zɔn ne kwɛ ne buru dini ne kwɛ ne Wuro mɛ. ⁴³ Kuun mane sma pepe foga bare fanɛsma wɔ mane kabakoda kɔ tagamase na yaan ye ta. ⁴⁴ Yɔnmabe mane kɔ wiinye kma pepe hɔn, ye pepe mane kwɛ ne y’a frɛ pepe kwɛ. ⁴⁵ Ye mane y’a laga kɔ ye sra hɔn frɛ zabire n’e na gwana dini nɛmɛ hɔn, wiin ti wɔn kɔ ye na kayan ye. ⁴⁶ Ye pepe mane kwɛ ne yaa Wuro ta kɔɔn hɔn kɔɔ pepe ma ne kwɛ ne buru dini ye nɛmɛ hɔn ye brɛ ne kwɛ ne zɔn nihɔndiaro hɔn kɔ kɔrɔhɔnkìni hɔn. ⁴⁷ Ye mane Wuro yirebɛ, ye da ne dia sma pepe ma. Matigi mane wiinye kma kisi, a mane wɔnwɔ kwɛ y’a kma ma kɔɔ pepe ma.

¹ Boo kɔɔ ma, Piyɛre kɔ Zan mane yaa Wuro ta kɔɔn hɔn wuromɛdo hɔn limasin ma. ² Ye mane tɛ ne bii ne naa kɔ sɔɔn boo yeyɛ kɔɔ pepe ma wiin ɔɔn mane muruku n’a bii fɔn ye vɔrɔsangan ma. Ye mane tɛ ne naa n’a tigɛ Wuro ta kɔɔn na kuledo ma, ye wiin wiri da Kuledofɔrɔ, wiin fa to a ne mɛ sma ta wiinye ɔɔn naa ne kɔ yeyɛ. ³ A naa Piyɛre kɔ Zan za, ye ne kɔ Wuro ta kɔɔn hɔn wiin sangan ma, a ɔɔn mɛ ye ta. ⁴ Wɔn tɛ Piyɛre kɔ Zan ɔɔn ye yinna baga a hɔn, Piyɛre ɔɔn d’a ma: «Mɛ́ sege.» ⁵ Sɔɔn we n’e sege fɔrɔna bare a man’a giati ɔn da ye na boo fa gun ye ta. ⁶ Piyɛre ɔɔn d’a ma: «Gwana wɛlɛ sanɔ ti ne ta ga. Nka wiin fa ɔɔn ti ne ta, ma na wɔn pere be ma. Nazarɛtisɔn Yezu Krista togo na, tuma ɔn yaa.» ⁷ A n’a foga a digesoro ma n’a tumabɛ. Wɔnna nɔɔ tala hɔn sɔɔn we kaɛn kɔ a kannile ɔɔn sige. ⁸ A tuma tige ne yaa. A kwɛ kɔ kɔ lɔgɔ Wuro ta kɔɔn hɔn ne yara ne tigetige ne Wuro yirebɛ. ⁹ Sma pepe n’a za, a ne yara ne Wuro yirebɛ. ¹⁰ Ye man’a dɛ́gɛ tɔɔ, y’awe sɔɔn we wiin ɔɔn mane tɛ ne tangan ne mɛ Wuro ta kɔɔn na Kuledo ma, ye wiin wiri Kuledofɔrɔ. Wiin fa ɔɔn mane tɛ a na, ye mane kaba wɔn na ne kwan mɛ. ¹¹ Sɔɔn we man’e sabɛ Piyɛre kɔ Zan na ga. Sma pepe mane tɔngɔn naa taa n’e kori kuledo boo ma, ye wiin wiri Salomɔn ta Kuledo ne kaba fɔrɔna. ¹² Piyɛre naa wɔn za wiin sangan ma, ɔn da zamɛ ma: «Wiin fa ɔɔn tɛ, wɔnnɔ na ka kaba wɔn na Isirayɛlenɔmanɛ? Taa wɔnnɔ na ka mɛ́ sege yee ɔn tɛ wɔkara mià sebe wɛlɛ mià Wurotɔ baraka hɔn mɛ́ bo sɔɔn be ta a ne yaa ne gun? ¹³ Abrahamu ta Wuro kɔ Izake ta Wuro kɔ Zakɔbe ta Wuro kɔ ke tamɛ ta Wuro y’a baratɛta Yezu yirebɛ, ki n’a ka sra hɔn ɔn maga a hɔn Pilate brɛ, wɔn wiin te ɔɔn mane kia n’a dra a yaa. ¹⁴ Ki maga sɔɔn na kìni yi ne a na tele yi hɔn ɔn da, ye Pilate sɔnyɛta to wɔn yaa. ¹⁵ Ka mane wiin ni na te we yɛɛ, Wuro n’a winni n’a sabɛ sara yɔ. Mɛ́ ye na siɛrɛ. ¹⁶ Yɔnmabe baraka hɔn Yezu togo na, wɔnna togo we ɔɔn bo sɔɔn be kɛnɛ, ka yɔnnɔ ti wiin na, ka n’a tɔɔ. Wiin yɔnmabe ɔɔn gun Yezu ta, wɔn ɔɔn bo sɔɔn be ta kɛnɛya pepe pere a ma ka pepe yɔnnɔ na. ¹⁷ Awale kià kma, mɛ yɛrɛ tɔɔ da datɔbareyafa ɔɔn mane tɛ ka pepe ɔɔn dɔɔ k’a zɛngɛnkma timi. ¹⁸ Wuro yɛrɛ mane pia n’a yira n’a dɔrɔ y’a daberebɛre baraka hɔn ɔn da ye y’a Dɛ́gɛwɛta na yannɛ. A bere ma yee ye tɛ mɛ. ¹⁹ Wɔn ye na, ka ka zugo katra ɔn ka zin bere Wuro ma wiin fa to k’a kakiɛ sbɛ dibe. ²⁰ Ye tɛ yee, Matigi mane wiin makunabɛwagati tigɛ, ka na wɔn gun. A ta Dɛ́gɛwɛta wiin ɔɔn Yezu, a mane pia wiin dɛ́gɛ, a wɔn nabɛ ka ma. ²¹ Awe Yezu we wiin ɔɔn daga wɔɔ wuro hɔn dɛn fɔn yaa kayan bo wagati we ma, Wuro mane pia wiin da yira y’a sma na kìni ye y’a daberebɛre baraka hɔn gwerena. ²² Moyizi mane pia da, ye Matigi Wuro na yi nɛmɛ na daberebɛta dɛ́gɛ ka yɔ ka na plala hɔn, ye ka ne mɔɔ a ta a ta yirada pepe na. ²³ Ye wiin te pepe ɔɔn ma mɔɔ wɔnna daberebɛta we ta ga, ye wɔnna te nii na wɛ y’a kma hɔn. ²⁴ Wuro ta daberebɛre wɔ pepe, n’a bii Samiyɛle ma ɔn naa n’a kwɛ sma ma, wiin fa ɔɔn tɛ sma ke n’a za, wɔn yewɔ daberebɛre wɔ pepe ɔɔn yira n’a tigɛ. ²⁵ Ki ɔɔn Wuro ta daberebɛre nɔmanɛ. Wuro mane wiin bɛɛn ka kɔ ka tamɛ wiin sangan ma a mane da Abrahamu ma, y’awe timikma baraka hɔn diniyan hɔn kma pepe na siara gun, ki ɔɔn wɔnna bɛɛn we na nɔmanɛ. ²⁶ Ki ye na Wuro pia y’a baratɛta tumabɛ dɛn ɔn n’a fanɛ wiin fa to a naa duba ta ka ma ɔn ka pepe timi bere k’a yagada ma.»

¹ Piyɛre kɔ Zan mane ti bɛreda hɔn zamɛ ta yɛ, ye da ye tɔɔ salakawɛre kɔ Wuro ta kɔɔn na zɛngɛnte kɔ Saduseyɛn ɔɔn naa n’e kori. ² Ye ta tɛ ɔɔn mane zamɛ kala ne Yezu ta winnisada yira n’a dɔrɔ sma ma ɔn da sara na winni, wɔn mane dia ye ma ga. ³ Ye mane tɛ ye n’e foga n’e ka kaso hɔn fɔn yaa wɔnna winnisin kɔɔ kiɛ bare lii mane ba wɛ ye na kɔɔ we ma. ⁴ Wiinye kma ɔɔn mane mɔɔ fanɛsma wɔ ta, yɔnmabe mane kɔ ye na yaan ye hɔn. Yɔnmabe na kma mane yaan ne sma sana koo (5,000) nɛmɛ wa. ⁵ Winnisin kikima we ma, Ziwifu na zɛngɛnkma kɔ sɔnmlala kɔ Tɛn na kma kɔ sɛbɛsɛbɛre wiinye ɔɔn mane ti Zeruzalɛmukuru hɔn ɔɔn ye nɛmɛ kwɛ. ⁶ Bo mane salakawɛvɔ Ane, bo ma Kayifu, bo ma Zan, bo ma Alɛkisandire, bo ma salakawɛvɔre pepe ta kɔnkma. ⁷ Ye mane tɛ ye ɔɔn yaa Piyɛre kɔ Zan wiri naa n’e tabɛ ye woro hɔn n’e toga ne kwa: «Wee sebe wɛlɛ kɔ te togo baraka hɔn ka bo sɔɔn be kɛnɛ?» ⁸ Piyɛre mane paga Wuro ta Ni na, wɔn tɛ a ɔɔn da: ⁹ «Zamɛ na zɛngɛnkma kɔ Isirayɛlesɔnmlala, mià tɛ ɔɔn dafɔre ta ɔn bo muruku be ta a ɔɔn kɛnɛ, wɔn ye na ye mɛ́ wiri sma ɔn da ke tɛ wiin nɛ wɔnna sɔɔn ɔɔn kɛnɛ, ye ke wɔn yira. ¹⁰ Ki pepe ɔnkɔ Isirayɛlenɔmanɛ pepe, ka ye yɔnnɔ tɔɔ ɔn tɔɔ da ka wiin Yezu Krista Nazarɛtinɛmɛ we kwangwaga sɔ ma, Wuro n’a winni n’a sabɛ sara yɔ, ye wɔn togo baraka hɔn bo sɔɔn be kɛnɛ ne taa bɛɛ ka zin hɔn. ¹¹ Awe dɔgɔnɔ we ki kɔntɔgesma mane ɔɔn dra. Nka be lege tɛ lologo hɔn dɔgɔnɔ na. ¹² Kisi gun biza hɔn a m’awe baraka hɔn ga. Bare togoza tiye diniyan hɔn wiin ɔɔn pere sma ma ne sbɛ ne tɛ ke kisi ga.» ¹³ Kitisɔre wɔ mane Piyɛre kɔ Zan ta yɔnmabe nɔma za ɔn n’a za mɛ da ye wiinye sma, ye kala ga, ye smazana yee, wɔn n’e kabakoya fɔrɔna. Ye man’e dɛ́gɛ tɔɔ Yezu yakwɛre. ¹⁴ Wiin sɔɔn we ɔɔn mane kɛnɛ, ye mane wɔn sege taa ye kiege ma ɔn ma fa gun n’a yira titiri ga. ¹⁵ Ye mane da, ye ye fanɛsma wɔ foga n’e sabɛ kitisɔdo hɔn dɛn, yewɔ kitisɔre ɔɔn ye nɛmɛ za ¹⁶ ɔn da: «Wɔnnɔ ke na ɔɔn ta bɔ sma bɛ na? Sma pepe tɔɔ da yewɔ ɔɔn bɔ kabakoda bɛ ta. Zeruzalɛmukma pepe n’e yɔnnɔ tɔɔ, ke mane sbɛ ne wee ye na ga. ¹⁷ Nka ke daga sɔɔ ye ma, da wɔ ka yire zamɛ yɔ ga. Wɔn ye na, ke daga gwangwana ye ma ye ka da ye wɔnna Yezu we togo yira sɔnnala boo yɔnnɔ na titiri ga.» ¹⁸ Wɔn tɛ ye ɔɔn n’e wiri n’e kɔbɛ ɔn da ye ma, ye ye ka da ye Yezu togo yira wɛlɛ ɔn sma kala kɔ lege titiri melemele ga. ¹⁹ Nka Piyɛre kɔ Zan ɔɔn da ye ma: «Wɔnnɔ ɔɔn daga Wuro ta? Ke mɔɔ ki ta ra, taa ke mɔɔ awe ɔɔn ta? Ki yɛrɛ n’e na kayan ta han. ²⁰ Mɛ́ wiinye da za n’e mɔɔ, mɛ́ sbɛ ne bɔɔ wɔnwɔ ma ga.» ²¹ Ye man’e bere gwangwana ye ma ɔn n’e to ye yaa bare ye mane zarakedo gun ye na zamɛ na kuun na ga. Bare wiin fa ɔɔn mane tɛ, sma pepe mane Wuro yirebɛ wɔn ye na. ²² Wɔnna kabakoda wɔ mane tɛ wiin sɔɔn we na a ɔɔn kɛnɛ, a mane fan dɔgɔ kiepla ma. ²³ Piyɛre kɔ Zan drɛ wɛ timi ma, ye ɔɔn yaa ye na plala gun. Salakawɛvɔre kɔ sɔnmlala mane wiin fa yira ye ma, ye n’a pepe yira plala wɔ ma. ²⁴ Ye mane mɔɔ ye ta, wɔn timi ye pepe ɔɔn kwɛ tuma ɔn Wuro mɛ ɔn da: «Mɛ́ na te, bi ɔɔn wurokɔn kɔ lagakɔn kɔ yɛngɛnzu kɔ ye hɔn frɛ pepe dan. ²⁵ Bi ɔɔn bɔ domada bɛ ka mɛ́ tɔn bia baratɛta Davidi do hɔn bia Ni baraka hɔn ɔn da, ye wɔnnɔ na sisma kurukuru yee? Ye wɔnnɔ na giamanɛ hɔn kma du ka zana yee? ²⁶ Ye diniyan hɔn kma ta fanganmɛ ye dɔbɛ, ye zɛngɛnkma ɔɔn ye nɛmɛ kwɛ wiin fa to ke kwɛ Matigi ma ɔn kwɛ a ta Dɛ́gɛwɛta ma. ²⁷ Tian na, ye ye nɛmɛ kwɛ bo kuru be hɔn. Bo Herode bo Pɔnsipilate bo sii wɔ, bo ma Isirayɛlenɔmanɛ. Ye ye nɛmɛ kwɛ bia baratɛta na kìni yi bia Dɛ́gɛwɛta Yezu ye na. ²⁸ Ye tɛ yee, be mane wiinye da giati n’e tigɛ, be mane be dungo na da wiinye kia tɛ na, ye wɔnwɔ pepe ta. ²⁹ Basiɛ Matigi ye ta gwangwana kɔrɔse ɔn sebe pere bia baratɛre ma, ye ne sbɛ ne be domada yira ɔn ka ne kwan ga. ³⁰ Be soro sana wiin fa to parere ne kɛnɛ, tagamase ne zɛ, kabakoda ne tɛ Yezu togo baraka hɔn wiin ɔɔn bia baratɛta na dɛ́gɛwɛ yi.» ³¹ Ye ta wuromɛ naa wɛ wiin sangan ma, ye mane ti wiin kɔɔn hɔn, wɔn ɔɔn sma, ye pepe ɔɔn paga Wuro ta Ni na ne Wuro domada yira, mane kwan ga. ³² Wiinye smayan wɔ ɔɔn mane yɔnmabe gun, ye pepe ta giatɛ mane tala, ye kakiri ne tala. Ye na sɔɔn sii mane y’a frɛ na foyi giati yi sɔnnala ye ga nka ye pepe mane y’a frɛ pepe kwɛ foroba hɔn. ³³ Sebe na yire yi mane fanɛsma wɔ ta siɛbɛ do pagabɛ Matigi Yezu ta winni na, Wuro ne siara na yaan yi na yire yi ta ye pepe ma. ³⁴ Ye na sɔɔn sii mane pna foyi na ga bare laga kɔ kɔan mane ti wiinye ta, wɔnwɔ mane wɔn zabire ne naa kɔ ye na gwana ³⁵ n’e pere fanɛsma ma. Wiin ti pepe, wɔn man’e dungo na ye gun. ³⁶ Yee mɛ, lɔ boo mane ti Zozɛfu ta, fanɛsma mane wiin wiri Baranabase, wɔn kɔrɔ zigituguta. A mane Levi timikma na boo ɔn sa Sipregiamana hɔn. ³⁷ A mane lɔ we zabire ɔn naa kɔ a na gwana n’e pere fanɛsma wɔ ma.

¹ Sɔɔn boo mane tiye, ye n’a togo wiri Ananiyase. A mane bɛɛn ye na kɔ y’a ya Safira ɔn y’a lɔ zabire. ² Wɔn timi a mane bɛɛn ye na kɔ ya we yɛ ɔn bɔɔ wa gwana wɔ hɔn ɔn naa n’e sɛrɛ pere fanɛsma ma. ³ Nka Piyɛre ɔɔn d’a ma: «Ananiyase, nɛ be tɛ Sitanɛ ɔɔn sbɛ be ta fɔn be ɔɔn yaa ne niɔn sɔɔ Wuro ta Ni ma ɔn bɔɔ wa lɔ we na gwana hɔn? ⁴ Be mane sbɛ n’a to yɛ ɔn k’a zabire ga ra? Wɛlɛ mɛ, be ɔɔn n’a zabire wɔnnɔ ɔɔn tɛ be ma kayan gwana wɔ pepe ma ga? Nɛ be tɛ wɔnna giatɛ we ɔɔn kɔ be hɔn? A sma ma be niɔn sɔɔ ga nka Wuro ma be a sɔɔ.» ⁵ Ananiyase wɔnna bɛreda wɔ mɔɔ wiin sangan ma suu, ɔn bɛrɛ siri. Wiinye kma pepe ɔɔn man’e na bɛreda mɔɔ, kuun na yire yi mane wɔnwɔ foga. ⁶ Yɛlɛ mane naa a na soro ka zogo hɔn ɔn yaa n’a sitra. ⁷ Lɛrɛ saa nɛmɛ wɔn timi, a ta ya ɔɔn naa. Wiinye da ɔɔn mane tɛ, a mane wɔnwɔ yɔnnɔ tɔɔ ga. ⁸ Piyɛre ɔɔn d’a ma: «Yira wa, wɔnna do we na ka lɔ we zabire tian na ra?» A ɔɔn da: «Ɔɔn yee ke a zabire.» ⁹ Wɔn tɛ Piyɛre ɔɔn ye bere da: «Nɛ ka tɛ ɔɔn kwɛ bɛɛn ye na ɔn Matigi ta Ni ta n’a sege? Wiinye yɛlɛnɔma ɔɔn yaa be bangan sitra, wɔnwɔ ti kuledo ma. Ye na yaa bi sitra mɛ.» ¹⁰ Wɔnna nɔɔ tala hɔn a ɔɔn bɛrɛ Piyɛre wee ɔn siri. Yɛlɛnɔma wɔ naa kɔ naa n’a za, ɔn n’a bii yaa n’a sitra a bangan kiege ma. ¹¹ Kuun na yire yi mane Wuro ta kɔnkma pepe foga ɔnkɔ wiinye kma pepe ɔɔn man’e na bɛreda mɔɔ mɛ. ¹² Fanɛsma wɔ mane tagamase na yaan ye kɔ kabakoda na yaan ye ta zamɛ yɔ. Yɔnmabe ti wiinye kma hɔn, ye pepe man’e nɛmɛ kwɛ Salomɔn ta paa wee. ¹³ Sɔnza mane dian n’e nii ka ye hɔn ga, zamɛ bere man’e togo ta mɛ fɔrɔna. ¹⁴ Yàra na yaan ye kɔ sini na yaan ye wiinye ɔɔn mane yɔn Matigi ma, wɔnwɔ mane kwɛ bɔ wɔ ma suu ne yaa. ¹⁵ Ye mane sa kɔ parere n’e sianbɛ sianfrɛ ma wisoga hɔn wiin fa to Piyɛre ɔɔn naa ne fɔnɔ wiin sangan ma, a na sinwunna sbɛ tɛ ye na bɔɔ ma. ¹⁶ Sma na yaan ye mane tuma Zeruzalɛmukuru na kiregwala ma ne naa kɔ parere kɔ zinifigɛsma, ye pepe ne kɛnɛ. ¹⁷ Wɔnna tɛda wɔ ta mɔɔ na, salakawɛvɔ kɔ ye datɛkwɛre pepe, wɔn kɔrɔ Saduseyɛn wɔ pepe wora ɔɔn ba fɔrɔna. ¹⁸ Ye ɔɔn fanɛsma wɔ foga n’e ka kaso hɔn sma pepe yɔnnɔ na. ¹⁹ Nka wuru hɔn Matigi ta mɛlɛkɛ ɔɔn naa kasokɔn do koba ɔn n’e sabɛ ɔn da ye ma: ²⁰ «Ka yaa taa Wuro ta kɔɔn hɔn, ɔn ne niwun na da na domada pepe yira zamɛ ma.» ²¹ Fanɛsma wɔ ɔɔn n’a domada ta. Kɔɔ da ye kiɛ suu, ye ɔɔn yaa Wuro ta kɔɔn hɔn ɔn yaa ne sma kala. Salakawɛvɔ kɔ ye tikwɛre naa Ziwifu na sɔnmlala wiri n’e kwɛ kɔ kitisɔre, wɔn timi ye ɔɔn fanɛ da ye yaa n’e wa kaso hɔn ɔn naa kɔ lɔgɔ. ²² Nka fanɛsma wɔ naa yaa wiri wiin sangan ma, ma Yezu ta fanɛsma za kaso hɔn ga ɔn ye bere naa da ye ma: ²³ «Mɛ́ yaa kaso do na sɔge yi za a nɔma na yɛ, yɛresma wɔ ne taa a do ma y’a tada hɔn. Nka ke kɔre wɔ koba ɔn kɔ, ma yaa sɔɔn za yeyɛ ga.» ²⁴ Wɔnna domada wɔ ta mɔɔ na, Wuro ta kɔɔn wɔnnate kɔ salakawɛvɔre pepe kakiri ɔɔn yanganmu fanɛsma wɔ ta da na, ye ma tɔɔ da wiin fa ɔɔn n’e gun ga. ²⁵ Nka sɔɔn boo mane naa da ye ma: «Ka sege rɛ, ka wiinye kma wɔ foga n’e ka kaso hɔn, ka bo ye ti Wuro ta kɔɔn hɔn ne zamɛ kala.» ²⁶ Wuro ta kɔɔn wɔnnate ɔɔn yaa kɔ yɛresma wiin fa to ye ye foga dege ɔn naa kɔ lɔgɔ bare ye mane kwan ɔn da, ye zamɛ ka naa dɔge tee n’e dra ga. ²⁷ Ye man’e foga naa n’e pere kitisɔre ma, salakawɛvɔ ɔɔn n’e toga ɔn da: ²⁸ «Mɛ́ man’e yira n’e sigebɛ ka ma ɔn da ka ka da ka sma kala kɔ bo sɔɔn be togo ga ra? Ka sege rɛ, bo ka Zeruzalɛmukuru pepe paga kɔ k’a kala. Ka kia sɔɔn we too na kakiɛ bɛrɛ mɛ́ ma ra?» ²⁹ Wɔn tɛ Piyɛre kɔ bɔ fanɛsma wɔ ɔɔn d’a ma: «Mɛ́ daga Wuro dungo ɔɔn ta, a sma dungo mɛ́ daga ɔɔn ta ga. ³⁰ Ki mane wiin Yezu we kwangwaga sɔ ma n’a yɛɛ, ke tamɛ ta Wuro n’a winni. ³¹ Awe Wuro ɔɔn ta fanganma ne kisita na y’a sebe baraka hɔn wiin fa to a zugokatra kɔ kakiɛ na yafa ta Isirayɛlesi ma. ³² Mɛ́ wɔnna da wɔ na siɛrɛ. Mɛ́ kɔ Wuro ta Ni awe Wuro yɛrɛ wiin pere ye na mɔsma ma.» ³³ Kitisɔre naa wɔnna domada wɔ mɔɔ wiin sangan ma, ye wora ɔɔn ba fɔrɔna, ye ne kia fanɛsma wɔ yɛɛ. ³⁴ Nka Fariziyɛn boo mane ti kitisɔre wɔ hɔn, ye n’a togo wiri Gamaliyɛle. A mane Tɛn na tɔta, a da ne dia zamɛ pepe ma. A mane tuma taa ɔn da, ye ye sma wɔ sabɛ sire dɛn. ³⁵ Wɔn timi a ɔɔn da: «Ka na wiin fa ta bɔ sma bɛ na, ka ka yɛrɛ kɔrɔse wɔn na fɔrɔna Isirayɛlenɔmanɛ. ³⁶ Wɔn siɛ dɛrɛ dɛn ga ke mane Tedasi za bɛɛ, a ne yira ne kwa, ye yi sɔngwaga. Sma zɔnaa (400) nɛmɛ mane dɔɔ a ma. Ye naa n’a yɛɛ, a timikma pepe ɔɔn zanzan, foyi ma wɔɔ a ta da na titiri ga. ³⁷ Wɔn timi Galilesɔn Zuda ɔɔn naa tuma togasɛbɛsangan ma. A mane sma na yaan ye gun ye timi hali na. Awe naa siri mɛ, wiinye kma pepe ɔɔn mane dɔɔ a ma, wɔnwɔ ɔɔn zanzan. ³⁸ Wɔn ye na m’a yira n’a dɔrɔ ka ma ɔn da ka bɔ sma bɛ za n’e to ye yaa. A ɔɔn ma sma hɔn ye ta tɛda kɔ ye ta bara sa, ye na mige ye sana. ³⁹ Nka a ɔɔn ma Wuro hɔn ye sa siɛbɛ na, ka na sbɛ n’e yaga ga. Ka ka yɛrɛ kɔrɔse ɔɔn ka naa kɔ kun hɔn kɔ Wuro ga.» Kitisɔre mane dian a domada na ⁴⁰ ɔn bere fanɛsma wɔ wiri ɔn tɛ ye n’e vaan fɔrɔna ɔn n’a yira n’a sigebɛ ye ma fɔrɔna, ye ye ka da ye Yezu togo yira titiri ga ɔn n’e to ye ɔɔn yaa. ⁴¹ Fanɛsma naa sa kitisɔre brɛ wiin sangan ma, ne nihɔndia fɔrɔna bare ye ta yɛ ɔɔn mane yannɛ Yezu togo ye na, wɔn mane tɛ yirebe na ye ma. ⁴² Kɔɔ pepe ma ye mane Wuro ta Dɛ́gɛwɛta Yezu ta da na fanɛdia yira sma ma n’e kala Wuro ta kɔɔn hɔn kɔ sma ta lɛgɛ ma.

¹ Wɔnna sangan we ma, kalanɔmanɛ mane yaan ne yaa. Wiinye Ziwifu ɔɔn Girɛkida bɛre, wɔnwɔ ne dumudumudabɛre bɔ Ziwifu ma wiinye ɔɔn Heburoda bɛre. Bare ye mane kwa yɔfuroyàra ma kɔɔ pepe ma zɔnfrɛdinido hɔn ga. ² Bo wɔn ɔɔn tɛ fanɛsma sma funpla wɔ ɔɔn kalanɔmanɛ wɔ pepe wiri ɔn da ye ma: «Mɛ́ daga Wuro domada na yirabara za n’e to zɔnfrɛbara ye na ga. ³ Wɔn ye na kià kma, ka sma kopra kia ka hɔn wiinye ɔɔn siɛbɛsma, Wuro ta Ni kɔ datɔ ne ti ye hɔn, mɛ́ na n’e ka wɔnna bara wɔ hɔn. ⁴ A ma mɛ́ han, mɛ́ na wɔɔ wuromɛbara kɔ Wuro domada na yirabara hɔn.» ⁵ Wɔnna bɛreda wɔ mane dia zamɛ pepe ma. Ye ɔɔn Etiyɛni dɛ́gɛ, yɔnmabe mane ti wiin hɔn, a ne paga Wuro ta Ni na. Bo ma Filipu kɔ Porokɔre kɔ Nikanɔre kɔ Timɔn kɔ Paramenase kɔ Nikola wiin ɔɔn mane Antiyosesɔn ɔn mane pia ye yɛrɛ ta Ziwifu na. ⁶ Ye n’e dɔrɔ fanɛsma wɔ ma ɔn Wuro mɛ ye ma ɔn ye sra dɛ ye ma. ⁷ Wuro domada mane yira ne yaa suu, kalanɔmanɛ ne yaan ne yaa Zeruzalɛmukuru hɔn suu mɛ. Salakawɛre na yaan ye mane dian yɔnmabe hɔn mɛ. ⁸ Etiyɛni mane paga Wuro ta kiɛn kɔ a ta sebe na ne kabakoda kɔ tagamase na yaan ye ta sma yɔnnɔ na. ⁹ Bo wɔn ɔɔn tɛ bɔɔ sma ɔɔn mane tuma a na. Bo mane Wuro ta kɔɔn hɔn baratɛsma, ye wiinye wiri da tɛrɛ na tisrama ye, bo ma Sirɛnekma, bo ma Alɛkisandirekma, bo ma Silisikma, bo ma Azikma. ¹⁰ Nka ye ta tɛ ɔɔn mane sbɛ ne dakwiɛ ne gun kɔ Etiyɛni a ta datɔ baraka hɔn kɔ Wuro ta Ni baraka hɔn wiin ɔɔn mane ti a hɔn ga. ¹¹ Wɔn tɛ ye ɔɔn sma sinsanganbɛ ɔn da wɔnwɔ yaa n’a dayagabɛ ɔn da, ye yiwɔ n’e mɔɔ a do hɔn ɔn da y’a mane Moyizi togo yaga ne Wuro togo yaga mɛ. ¹² Ye mane zamɛ gwangwanabɛ kɔ sɔnmlala kɔ Tɛn na kma, ye ɔɔn yaa mu Etiyɛni ma n’a foga ɔn yaa kɔ lege kitisɔre brɛ. ¹³ Ye yaa wiri wɛɛn wiin sangan ma, ne niɔn sɔɔ n’a dɛ a ma ne kwa: «Bo sɔɔn be kia Wuromɛkɔn yagayaga ne Moyizi ta Tɛn yagayaga mɛ. ¹⁴ Mɛ́ ye mɔɔ a do hɔn, a ne kwa ye wɔnna Nazarɛtisɔn Yezu we na Wuromɛkɔn webe, Moyizi wiinye Tɛn yira ke ma, a wɔnwɔ katra.» ¹⁵ Wiinye kma ɔɔn mane tangan kitisɔdo we hɔn, wɔnwɔ mane Etiyɛni sege, a zin ɔɔn katra tɛ wɔkara mɛlɛkɛ yi.

¹ Salakawɛvɔ ɔɔn Etiyɛni toga, ye wɔnna da wɔ tian ra? ² Etiyɛni ɔɔn d’a ma: «Mɛ tamɛ kɔ mɛ na plala, ka mɔɔ ne ta. Ke bɛma Abrahamu mane ti Mezopotamigiamana hɔn, yirebe na te Wuro ɔɔn ye yɛrɛ dɔrɔ a ma, a ɔɔn sbɛ ne yaa tangan Harankuru hɔn. ³ Wuro mane d’a ma, y’a sa y’a giamana hɔn kɔ ye tɔn ta kɔnkma yɔ. Ye ye na wiin giamana dɔrɔ a ma, y’a yaa tangan wɛɛn. ⁴ Wɔn tɛ Abrahamu ɔɔn sa Kalidegiamana hɔn, ɔn yaa tangan Harankuru hɔn. A tɔn naa siri wɛ, ka tangan bo giamana wiin be hɔn basiɛ, Wuro ɔɔn n’a nabɛ wɔn hɔn. ⁵ Wuro mane lɔ sii pere Abrahamu ma bo giamana be hɔn ga, hali kɔntɔgedo yɛrɛ. Nka a ye do sɔɔ a ma ɔn da, ye ye na bɛɛ pere awe kɔ ye timikma ma. Wɔnna sangan ma, nɔ mane ti Abrahamu ta dɛn ga. ⁶ Wuro mane wiin fa yira a ma, ɔn da y’a timikma na tɛ wɔyirɛ na smazɛ ta giamana hɔn, wɔnwɔ n’e ta tɛrɛ na ɔn dayaga ta ye na dɔgɔ zɔnaa (400) yɔ. ⁷ Wuro da, ye ye na tɛ wiinye sii ta tɛrɛ na, ye ye na wɔnwɔ kiti. A da, ye wɔn timi, ye ye na sa wɛɛn ɔn naa yi Wuro yirebɛ bo bii be hɔn bɛɛ. ⁸ Wɔn timi Wuro mane bɛɛn ka kɔ Abrahamu, yaro ɔɔn tɛ wɔnna bɛɛn na tagamase. Abrahamu ye nɔ Izake yaro a vɔrɔkɔ na yin korosɔɔnnɔ ma. Izake ɔɔn Zakɔbe yaro. Zakɔbe ɔɔn ke bɛmae funpla wɔ yaro. ⁹ Zozɛfu na woro mane ti ke bɛmae hɔn. Ye n’a zabire Ezipitiyasma ta. ¹⁰ Nka Wuro wɔɔ kɔ lege ɔn n’a wa a ta yannɛ pepe hɔn, ɔn kakiri ka a hɔn n’a da diabɛ Ezipitikma ta fanganma ma. Wɔn n’a tanganbɛ Ezipitigiamana kɔ ye yɛrɛ ta kma pepe wɔɔn na. ¹¹ Awale bo wu naa bɛrɛ Ezipitigiamana kɔ Kanangiamana pepe ma, wɔnna yannɛ wɔ mane yire fɔrɔna. Ke bɛmae mane zɔnfa gun ga. ¹² Zakɔbe mane mɔɔ wiin sangan ma ye da, ye zɔnfa gun Ezipitigiamana hɔn, a ɔɔn ke bɛmae fanɛ yeyɛ kanyɔnnɔ tala na. ¹³ Plalo na, Zozɛfu ɔɔn ye yɛrɛ da yira ye vɔre wɔ ma. Yee Zozɛfu y’a sii ta da yira Ezipitikma ta fanganma ma. ¹⁴ Wɔnna sangan ma Zozɛfu fanɛ, ye ye yaa ye tɔn Zakɔbe kɔ y’a kɔnkma pepe foga naa kɔ lɔgɔ. Ye mane sma kiesaafun ne nɔma koo. ¹⁵ Zakɔbe yaa Ezipitigiamana hɔn, kɔ ke bɛmae wɛɛn ye siri. ¹⁶ Ye man’e na sara bii yaa kɔ lɔgɔ Sikɛmukuru hɔn, Abrahamu mane wiin bona tɛrɛ gwanafuro na Hemɔre nɔmanɛ ta Sikɛmukuru hɔn, ɔn yaa n’e sitra wɛɛn. ¹⁷ Wuro mane wiin dosɔ ta Abrahamu ma, wɔn do pagasangan ta tɛ ɔɔn mane vetra, Isirayɛlenɔmanɛ ne yaan ne yaa Ezipitigiamana hɔn. ¹⁸ Wɔn timi fanganmaza boo mane tangan Ezipitigiamana wɔɔn na, wɔn mane Zozɛfu tɔɔ ga. ¹⁹ Wɔnna fanganma we ɔɔn du ka kià sii na ɔn ke bɛmae foga yagayaga. A fangan dɛ ye ma ye n’e nɔmanɛ tigɛ sire wiin fa to ye ne siri. ²⁰ Bo wɔnna sangan we ma Moyizi mane vɔrɔ. A mane fɔrɔ Wuro yinna hɔn. A mane yɛgɛ saa ta ye tɔn ta kɔɔn hɔn. ²¹ Ye naa n’a bii n’a tige sire wiin sangan ma, Ezipitikma ta fanganma ta nɛmɛdalo n’a bii n’a woro wɔkara ye yɛrɛ nɔ. ²² Bo wɛɛn Moyizi mane Ezipitikma ta kakirikmabe na da pepe kala. Sebe mane ti a ta a ta bɛreda kɔ a ta tɛda hɔn. ²³ A naa dɔgɔ kepla gun wiin sangan ma, ɔn yaa sa y’a sii Isirayɛlenɔmanɛ ma. ²⁴ A yaa Ezipitisɔn boo za, wɔn ne dayaga ta a ta sisɔn boo na. A kwɛ y’a sisɔn we timi ɔn wɔnna Ezipitisɔn we yɛɛ. ²⁵ A man’a giati ɔn da, ye ye na plala Isirayɛlenɔmanɛ na wɔnna da wɔ kɔrɔ tɔɔ ɔn da, ye Wuro kia n’e kisi yi baraka hɔn nka ye mane wɔnna da wɔ kɔrɔ tɔɔ ga. ²⁶ Wɔnna winnisin, Moyizi yaa Isirayɛlenɔmanɛ sma pla bɔɔ za, ye ne kwini. A mane kia wɔnna birisi wɛ ye yɔ. Wɔn tɛ a ɔɔn da ye ma, ye ki nɛmɛ na plala, wɔnnɔ na ka kwini? ²⁷ Wiin ɔɔn mane ti ne bɛrɛ ye na plalo ma, wɔn ɔɔn Moyizi yɛn ɔn d’a ma, ye kɔ te ɔɔn n’a ta yiwɔ wɔnnate kɔ yiwɔ ta kiti na sɔta na? ²⁸ Y’a kia yi yɛɛ mɛ wɔkara a bo Ezipitisɔn yɛɛ wiin nɛ dugu ra? ²⁹ Wɔnna bɛreda ta mɔɔ na, Moyizi ɔɔn tɔngɔn yaa tangan Madiangiamana hɔn. A nɔmanɛ sma pla vɔrɔ wɛɛn. ³⁰ Dɔgɔ kiepla wɔn timi, Moyizi mane ti Sinayitolo na kibɛkolo hɔn, mɛlɛkɛ boo ɔɔn ye yɛrɛ dɔrɔ a ma togakini hɔn sɔzoro boo ma. ³¹ Moyizi wɔn za wiin sangan ma, ɔn kaba fɔrɔna. A ye dɔbɛ a na wiin sangan ma, ɔn n’a sege ɔn Matigi bɛrekɔn mɔɔ, wɔn ɔɔn d’a ma, ³² ye yi a tamɛ ta Wuro kɔ Abrahamu ta Wuro kɔ Izake ta Wuro ɔnkɔ Zakɔbe ta Wuro. Moyizi ɔɔn kwan ne sma ɔn ma sbɛ n’a sege ga. ³³ Matigi ɔɔn d’a ma, y’a y’a kanɛgɛ wa. Y’a taa wiin wɛɛn, ye wɔn bii hɔn na kìni yi. ³⁴ Ye y’a kma wiinye ɔɔn ti Ezipitigiamana hɔn, ye y’e ta yannɛ za ɔn n’e manakɔn mɔɔ. Ye ye zii ye dɛn na. Y’a yaa basiɛ, ye ye ti n’a fanɛ Ezipitigiamana hɔn. ³⁵ Isirayɛlenɔmanɛ mane maga wiin Moyizi we hɔn ɔn da, ye kɔ te ɔɔn n’a ta yiwɔ wɔnnate kɔ ye yɔ kitisɔta na? Wuro n’a ta zɛngɛnte kɔ dɛndrɛta na mɛlɛkɛ ta diɛma baraka hɔn. Wɔnna mɛlɛkɛ we man’e yɛrɛ dɔrɔ a ma sɔzoro ma. ³⁶ Wiin Moyizi ɔɔn Isirayɛlenɔmanɛ sabɛ Ezipitigiamana hɔn, awe ɔɔn mane kabakoda kɔ tagamase ta Buruku na Zu kɔ kibɛkolo hɔn dɔgɔ kiepla yɔ. ³⁷ Awe Moyizi we ɔɔn mane da Isirayɛlenɔmanɛ ma, ye Wuro na daberebɛta boo sabɛ ye yɔ wɔkara yi. ³⁸ Awe Moyizi we ɔɔn mane ti Isirayɛlenɔmanɛ yɔ kibɛkolo hɔn. A mane ti kɔ ke tamɛ kɔ mɛlɛkɛ wiin ɔɔn mane bɛre a ta Sinayitolo ma. Awe ɔɔn ni na bɛreda mɔɔ n’e yira ke ma. ³⁹ Ke tamɛ ma dian mɔɔ a ta ga. Ye maga a hɔn ne kia ye bere yaa Ezipitigiamana hɔn yɛ. ⁴⁰ Ye mane da Arɔn ma, y’a bɔɔ yirebɛfrɛ tɛtɛrɛ ye ma wiin fa to wɔnwɔ ne sige zin. Ye wiin Moyizi ɔɔn ye sabɛ Ezipitigiamana hɔn, ye ye da bo a tɛnɔn ga. ⁴¹ Ye yannɔ gia tɛtɛrɛ ɔn salaka wa wɔnna fiɔn we ma. Ye nihɔn ɔɔn dia ye yɛrɛ sra ta tɛbara na. ⁴² Bo wɔnna sangan ma Wuro ye timi bere ye ma ɔn n’e to ye ne mamala yirebɛ wɔkara ye sɛbɛ wiin nɛ Wuro ta daberebɛre ta sɛbɛ hɔn ɔn da, ye Isirayɛlenɔmanɛ ka mane worofrɛ na salaka kɔ salakazɛ wa mɛ ma kibɛkolo hɔn dɔgɔ kiepla yɔ ra? ⁴³ Ye awo, nka ka mane Molɛke ta bugo kɔ k’a yirebɛfa Arafan ta mumulu ɔɔn gia bii. Ye ka mane wɔnwɔ gia saga n’e yirebɛ. Ye wɔn ye na ye na ka bii ka tigɛ dɛrɛdo hɔn Babilɔnigiamana timi. ⁴⁴ Tɛn na walaga mane ti wiin bugu hɔn, wɔn mane ti ke tamɛ ta kibɛkolo hɔn. A mane tɛtɛrɛ wɔkara Wuro man’e yira Moyizi ma wiin nɛ, ye ye wiin bugu dɔrɔ a ma, y’a tɛtɛrɛ wɔkara wɔn. ⁴⁵ Ke tamɛ wiinye ɔɔn naa wɔn timi, bugu we mane pere wɔnwɔ ma. Zozuwe mane yaa kɔ lege ɔn yaa kɔ sisma ta giamana hɔn. Wuro ɔɔn wɔnna sii laga n’e wa ye zin hɔn. Wɔnna bugu we mane wɔɔ yeyɛ fɔn yaa wiri fanganma Davidi ta sin hɔn ma. ⁴⁶ Davidi yirebe gun Wuro ta. A Wuro mɛ da, ye ye kia kɔɔn tɔgɔ Zakɔbe ta Wuro ma. ⁴⁷ Hali kɔ wɔn, Salomɔn ɔɔn mane kɔɔn tɔgɔ Wuro ma. ⁴⁸ Nka Vɔwuro tangan sɔɔn soro ta tɛtɛrɛkɔn hɔn ga wɔkara Wuro ta daberebɛta n’e yira wiin nɛ, ⁴⁹ ye Matigi da, ye wurokɔn ɔɔn y’a fanganmakware. Lagakɔn ne y’a kandɛfa. Ye wee kɔɔn sii ka na ɔɔn tɔgɔ yi Matigi ma? Ye wee piri ma ɔɔn na tɛ y’a makunabɛdo na? ⁵⁰ Y’a Wuro ɔɔn frɛ pepe tɛtɛrɛ ga ra? ⁵¹ Ki mɔmagasma, worasigesma ka ka tra pi, ka Wuro wirikɔn mɔɔ ga. Ka Wuro ta Ni dakwiɛ sangan pepe ma, ka tala kɔ ka tamɛ. ⁵² Wee Wuro ta daberebɛta ka tamɛ ɔɔn yannɛ ga? Wiinye ɔɔn Tele yi ta nada yira, ye yɛrɛ wɔnwɔ yɛɛ ɔn wɔnna Tele yi we ka sma sra hɔn basiɛ n’a yɛɛ. ⁵³ Ki wiinye ɔɔn Wuro ta Tɛn gun mɛlɛkɛ baraka hɔn, ka maga mɔɔ na wɔnna Tɛn we na.» ⁵⁴ Kitisɔre naa wɔnna bɛreda wɔ mɔɔ wiin sangan ma, ye wora ɔɔn ba fɔrɔna fɔn ye n’e yinni win Etiyɛni ye na. ⁵⁵ Nka Etiyɛni mane pagaa Wuro ta Ni na. A ye yinna duro wuro hɔn, ɔn Wuro ta yirebe za ɔn Yezu na taa yi za Wuro digesoro ma ⁵⁶ ɔn da: «Mɛ wurokɔn do na kibɛ yi za, Sɔɔn Nɔ ne taa Wuro digesoro ma.» ⁵⁷ Wɔn tɛ ye ɔɔn sɔngɔ yuu ɔn pin ye tra ma. Ye pepe ɔɔn yiri naa kwɛ a ma. ⁵⁸ Ye man’a yɛnyɛn sa kɔ lege kuru timi, ɔn n’a dra kɔ dɔge wiin fa to y’a yɛɛ. Siɛrɛkma mane y’a zoga tigɛ yaliɔ boo brɛ, ye mane wiin togo wiri Sɔle. ⁵⁹ Ye mane Etiyɛni dra n’a yɛɛ wiin sangan ma, a ɔɔn Wuro mɛ da: «Matigi Yezu, ma ne ni ka be sra hɔn.» ⁶⁰ Wɔn timi a ɔɔn zii yoloko ɔn sɔngɔ yuu ɔn da: «Matigi ka ye ta kakiɛ giati ga.» Wɔn yira wɛ timi a ta, a ɔɔn siri.

¹ Etiyɛni ta siri mane dia wiinye kma ma, Sɔle nii mane ti wɔnwɔ hɔn. Wuro ta kɔnkma wiinye ɔɔn ti Zeruzalɛmu, yannɛ na yire ye mane bɛrɛ ye ma wɔnna kɔɔ we ma. Yɔnmabe ti wiinye kma pepe hɔn, wɔnwɔ mane zanzan yaa Zude kɔ Samarigiamana hɔn fɔn fanɛsma dama. ² Wiinye kma ɔɔn kiu ka Wuro ma, wɔnwɔ mane Etiyɛni na soro bii n’a sitra ɔn mɔgɔ a ta siri na fɔrɔna. ³ A ma Sɔle han, wɔn mane Wuro ta kɔnkma yɛɛ fɔrɔna. A mane kɔ kɔan hɔn ne nimisini kɔ yàra foga yeyɛ n’e ka kaso hɔn. ⁴ Wiinye kma ɔɔn mane zanzan, wɔnwɔ mane yara bii pepe hɔn ne fanɛdia na domada yira. ⁵ Bo yee Filipu mane yaa Samarikire na boo hɔn ne Krista ta da yira yeyɛ. ⁶ Zamɛ pepe mane dɔɔ Filipu domada ma bare a mane wiinye kabakoda ta, sma man’e da mɔɔ n’e za mɛ. ⁷ Ziniyaga na yaan ye mane ti wiinye kma hɔn, ye mane sa ye hɔn ne sɔngɔ fɔrɔna. Muruku na yaan ye kɔ bagaparesma na yaan ye mane kɛnɛ mɛ. ⁸ Nihɔndiaro na yire yi mane ti wɔnna kuru we hɔn. ⁹ Sɔɔn boo mane ti wɔnna kuru we hɔn, ye n’a togo wiri Simɔn. Awe sɔɔn we mane ginamoritɛ ne Samarikma pepe kabakoya. A man’a yira n’a dɔrɔ da yi sɔngwaga. ¹⁰ Sma pepe mane mɔɔ a ta, sɔɔn dɛ́gɛ sɔɔn na ga. Sma mane kwa, ye bo sɔɔn be Wuro ta Sebe na te ye wiin wiri ɔn da yire yi. ¹¹ A ta tɛ ɔɔn mane sma kabakoya kɔ y’a fianda n’a bii fɔn siɛ dɛrɛ ma da hɔn, wɔn tɛ sma ɔɔn mane mɔɔ a ta yee. ¹² Nka Filipu wiin ɔɔn mane Wuro ta kolo na da yira ye ma kɔ Yezu Krista togo, ye mane yɔɔn wɔn ma, wɔn n’e batize sini kɔ yàra. ¹³ Yɔnmabe mane kɔ awe Simɔn yɛrɛ hɔn mɛ, a ɔɔn batize ne dɔɔ Filipu ma suu. Wiinye kabakoda kɔ wiinye da ɔɔn mane tɛ, a n’e za, awe yɛrɛ ɔɔn man’e bere ne kaba. ¹⁴ Wiinye fanɛsma ɔɔn mane ti Zeruzalɛmu, wɔnwɔ naa mɔɔ ye da Samarikma dian Wuro domada hɔn, ye ɔɔn Piyɛre kɔ Zan fanɛ yeyɛ. ¹⁵ Wɔnwɔ yaa wiri, ɔn Wuro mɛ ye ma wiin fa to ye Wuro ta Ni gun. ¹⁶ Tian na, Wuro ta Ni mane zii ye na sɔɔn sii ma dɛn ga. Ye mane batize Matigi Yezu togo na yee dama. ¹⁷ Wɔn tɛ Piyɛre kɔ Zan ɔɔn man’e sra dɛ ye ma, ye ne Wuro ta Ni gun. ¹⁸ Nka Simɔn naa n’a za da Wuro ta Ni gun fanɛsma ta sra dɛ ɔɔn baraka hɔn, a ɔɔn gwana na do sɔɔ ye ma ¹⁹ ɔn da: «Ka wɔnna sebe we pere ne ma mɛ wiin fa to ma ɔɔn ne sra dɛ wiinye kma ma, ye na kma sbɛ Wuro ta Ni gun mɛ.» ²⁰ Nka Piyɛre ɔɔn d’a ma: «Wuro wiin kiɛn ta zana, be a giati da be sbɛ ne wɔn tɛrɛ ra? Yaa be wa bɛɛ kɔ bia gwana. ²¹ Wiin fa ɔɔn tɛ bɛɛ, be nii na yi ti ye hɔn ga bare bia giatɛ tele Wuro yinna hɔn ga. ²² Ninaban bia zugoyagafa ye na ɔn Matigi mɛ. Be ma farasi ga, wiin giatɛ we ɔɔn ti be kɔrɔ hɔn, a na yafa be ma a na. ²³ M’a za da giatɛ na yagayaga yi ti be hɔn. Be tɛ dayaga ta tere na.» ²⁴ Wɔn tɛ Simɔn ɔɔn da: «Ki yɛrɛ Matigi mɛ ne ma wiin fa to ka wiinye da pepe yira, ye na foyi ka ne gun ga.» ²⁵ Piyɛre kɔ Zan naa y’a siɛrɛbe ta n’a wɛ, ɔn Matigi domada yira, ɔn ye bere yaa Zeruzalɛmukuru hɔn. Ye mane fanɛdia yira Samarikire na yaan ye hɔn. ²⁶ Matigi ta mɛlɛkɛ mane da Filipu ma: «Tuma yaa saan hɔn piri ma na sogo ma, wiin sogo ɔɔn tuma Zeruzalɛmu ne yaa Gaza, sɔɔn dɔɔ a ma ga.» ²⁷ Filipu ɔɔn tuma sale yaa. Bo Etiyopikma ta fanganmaya ta dayinnahɔnwɛta boo wiin ɔɔn mane ti a ta naforoda wɔɔn na, mane yaa yazarayado hɔn Zeruzalɛmu. ²⁸ A mane tuma wɛɛn ne bere ne naa ye brɛ. A mane tangan y’a wotoro hɔn ne Wuro ta daberebɛta Izayi ta sɛbɛ kala. ²⁹ Wuro ta Ni ɔɔn da Filipu ma: «Be dɔbɛ bo wotoro be na o.» ³⁰ Filipu ɔɔn tɔngɔn ye dɔbɛ ɔn mɔɔ Etiyopisɔn we ta a ne Wuro ta daberebɛta Izayi ta sɛbɛ kala. A ɔɔn d’a ma: «Be wiinye sɛbɛ wɔ kala, be ye kɔrɔ tɔɔ tian na ra?» ³¹ Sɔɔn we ɔɔn d’a ma: «Sɔɔn ma n’e yira ne ma ga, nɛ na ma na tɛ ɔn n’e kɔrɔ tɔɔ?» A ɔɔn da Filipu ma, y’a ba naa tangan ye kiege ma. ³² A mane wiin wɛɛn kala sɛbɛ wɔ na, bo wɔn: Y’a foga wɔkara ye yaa kɔ wiin gwa yɛdo hɔn, wɔkara wiin gwanɔ ɔɔn bɔɔ mane fa yira ye wian na sɛnta ma ga. ³³ A ta yɛrɛmazibɛ baraka hɔn a tian gun ga. Kɔ te ɔɔn na n’a timikma ta da yira? Bare y’a nii wa diniyan hɔn kma hɔn. ³⁴ Wɔn timi sɔngwaga we ɔɔn Filipu toga da: «Ma be mɛ, yira ne ma. Kɔ te na Wuro ta daberebɛta da? Awe yɛrɛ ra, taa sɔnza na a da?» ³⁵ Filipu ɔɔn n’a bii wɔnna sɛbɛ wɔ ma ɔn Yezu ta da na fanɛdia yira a ma. ³⁶ Bo ye mane ti y’a yuru hɔn, ɔn yaa wiri zu boo brɛ, sɔngwaga we ɔɔn da: «Bo zu, wɔnnɔ ɔɔn sbɛ ne sɔɔ ne ma ma ka batize ga?» [ ³⁷ Filipu ɔɔn d’a ma: «Yɔnmabe ɔɔn kɔ be hɔn, ye sbɛ ne tɛ.» Etiyopisɔn we ɔɔn d’a ma: «Ma tɔɔ da tian na Yezu Krista ɔɔn Wuro Nɔ.»] ³⁸ A ɔɔn da, ye ye wotoro we tabɛ. Ye pepe sma pla ɔɔn kwɛ zii zu hɔn, awe sɔngwaga we kɔ Filipu. Filipu ɔɔn n’a batize. ³⁹ Bo ye na sa zu hɔn, Matigi ta Ni ɔɔn bii yaa kɔ Filipu, sɔngwaga we m’a za titiri ga nka a mane y’a sogo sere yaa nihɔndiaro hɔn. ⁴⁰ A ma Filipu han, wɔn mane ti Azɔtekuru hɔn. A mane dɔɔ wiinye kire pepe hɔn ɔn yaa wiri Sezare, a mane fanɛdia yira yeyɛ.

¹ Sɔle ta tɛ ɔɔn mane Matigi ta kalanɔmanɛ ɔɔn kia yannɛ na n’e yɛɛ sangan pepe ma. ² Wɔn tɛ a ɔɔn mane bii yaa salakawɛvɔ gun, y’a sɛbɛ ta n’e pere ye ma Damasekuru hɔn Kalakɔan ye na wiin fa to a ɔɔn m’a yaa Matigi ta sogomakma na bɔɔ za yeyɛ, ye tɛ yara wɛlɛ sini yo, a m’a n’e foga n’e pɛrɛ kɔ zɔgɔre ɔn naa kɔ lɔgɔ Zeruzalɛmukuru hɔn. ³ Bo a mane ti y’a sogo ma ɔn yaa vetra Damasekuru na wiin sangan ma, ye da ye tɔɔ kini boo ɔɔn tuma wuro hɔn ɔn zii n’a kori. ⁴ Sɔle ɔɔn bɛrɛ. A mane bɛrekɔn boo mɔɔ, wɔn n’a wiri ne kwa a ma: «Sɔle, Sɔle, wɔnnɔ na be ne yannɛ?» ⁵ Sɔle ɔɔn n’a toga da: «A bi kɔ te mɔ Matigi?» Bɛrekɔn we ɔɔn d’a ma: «A mɛ Yezu, be ti ne wiin yannɛ. ⁶ Nka tuma kɔ kuru kɔrɔ hɔn. Be daga wiin fa ta, ye na wɔn yira be ma.» ⁷ Sɔle yakwɛre mane taa wɔɔ, mane sbɛ ne bɛre ga. Ye mane bɛrekɔn we mɔɔ nka ye mane sɔɔn sii za ga. ⁸ Sɔle naa tuma, a yinna ne kibɛ yee nka a mane sege ne zɛ ga. Ye n’a soro foga ɔn suru yaa kɔ lege Damasekuru hɔn. ⁹ A ɔɔn yin saa ta mane sege ne zɛ ga, mane zɔn ga, mane mɛnɛ mɛ ga. ¹⁰ Kalanɔ boo mane ti Damasekuru hɔn, ye n’a togo wiri Ananiyase. Matigi ɔɔn ye dɔrɔ wɔn ma sɔnyangan hɔn, ɔn d’a ma: «Ananiyase.» A ɔɔn da: «Bo ne nɛmɛ Matigi, ma ti bɛɛ.» ¹¹ Matigi ɔɔn d’a ma: «Tuma sale yaa wisogo hɔn yoo, ye wiin wiri wisogo na Tele yi. Be yaa kɔ Zuda brɛ ɔn toga Tarasesɔn Sɔletogote boo na. A ti yeyɛ ne Wuro mɛ. ¹² A mane sɔɔn boo za sɔnyangan hɔn, ye wiin togo wiri Ananiyase, wɔn ɔɔn naa kɔ a brɛ ɔn ye sra dɛ a ma wiin fa to a sege zɛ.» ¹³ Ananiyase ɔɔn d’a ma: «Matigi, bo sɔɔn be wiinye yannɛ dɛ bia kma ma Zeruzalɛmukuru hɔn, sma na yaan ye wɔn nɔma yira mɛ ma. ¹⁴ Sebe ti a ta bɛɛ mɛ, salakawɛvɔ sebe pere a ma y’a yaa be togo na wirisma pepe foga n’e pɛrɛ kɔ zɔgɔre.» ¹⁵ Nka Matigi ɔɔn da Ananiyase ma: «Yaa bare m’awe sɔɔn we dɛ́gɛ n’a ta ne togo na yirata na sisma ma wiinye ɔɔn ne tɔɔ ga kɔ fanganmɛ kɔ Isirayɛlenɔmanɛ ma. ¹⁶ A daga wiinye yannɛ pepe ta mɛ togo ye na, mɛ yɛrɛ na wɔnwɔ dɔrɔ a ma.» ¹⁷ Wɔn tɛ Ananiyase ɔɔn tuma yaa wɔnna kɔɔn we hɔn ɔn yaa ye sra dɛ Sɔle ma ɔn d’a ma: «Ne na plalo Sɔle, be na tisangan ma sogo ma, Matigi Yezu wiin ɔɔn man’e yɛrɛ dɔrɔ be ma, wɔn ɔɔn ne fanɛ be ta wiin fa to ma naa ne sra dɛ be ma, be sbɛ bere sege ɔn zɛ, ɔn paga Wuro ta Ni na.» ¹⁸ Wɔnna nɔɔ tala hɔn frɛ bɔɔ ɔɔn sa a yinna hɔn wɔkara koba ɔn bɛrɛ, a yinna ɔɔn kini, a ne sege ne zɛ. A ɔɔn tuma batize. ¹⁹ A naa zɔn wiin sangan ma, fangan ɔɔn ye bere kɔ a hɔn. Wiinye kalanɔmanɛ ɔɔn mane ti Damasekuru hɔn, Sɔle mane yin damanɛ ta kɔ lɔgɔ. ²⁰ Wɔnna sangan yɛrɛ ma a dutigɛ ne Yezu da yira Kalakɔan hɔn, y’a Wuro Nɔ. ²¹ Wiinye kma pepe ɔɔn man’a domada mɔɔ, wɔnwɔ mane kaba ne kwa: «Wiin sɔɔn we ɔɔn mane Yezu togo na wirisma yannɛ Zeruzalɛmu, a bo ga ra? A na bɛɛ mɛ wiin fa to a ye foga ɔn yaa n’e ka salakawɛvɔre sra hɔn ga ra?» ²² Nka Sɔle mane Wuro domada yira sangan pepe ma kɔ sebe. Wiinye Ziwifu ɔɔn ti Damasekuru hɔn, a man’a dɔrɔ ye ma ɔn da, ye Yezu ɔɔn Wuro ta Dɛ́gɛwɛta. Yewɔ ma da bo y’a yirafa a ma ga. ²³ Sangan naa dɛrɛ wɔn timi, wɔnna Ziwifu wɔ ɔɔn ye do kwɛ wiin fa to y’a yɛɛ. ²⁴ Nka Sɔle naa n’e ta du yɔnnɔ tɔɔ. Bare ye mane wisoga pepe kɔrɔse sin kwɛ wuru ma wiin fa to y’a gun n’a yɛɛ. ²⁵ Bo boo kɔɔ ma wuru hɔn, a ta kalanɔmanɛ ɔɔn n’a ka kungo boo hɔn, n’a zibɛ kwala timi. ²⁶ Sɔle yaa wiri Zeruzalɛmu wiin sangan ma, ɔn ne tɛnɔn kia wiin fa to a sbɛ kwɛ kɔ kalanɔmanɛ wɔ. Nka wɔnwɔ pepe mane kwan a na. Ye mane tɔɔ da yɔnmabe kɔ a hɔn tian na ga. ²⁷ Wɔn tɛ Baranabase n’a foga yaa kɔ lege fanɛsma wɔ brɛ. Sɔle Matigi za wiin nɛ sogo ma, Matigi bɛre a ta wiin nɛ, Baranabase ɔɔn wɔn pepe yira ye ma. Sɔle mane Yezu ta da yira wiin nɛ Damasekuru hɔn kɔ worasigi, a wɔn pepe nɔma yira ye ma mɛ. ²⁸ Wɔnna sangan ma Sɔle wɔɔ kɔ kalanɔmanɛ wɔ Zeruzalɛmu ne yara kɔ lɔgɔ ne Matigi togo yira sma ma kɔ worasigi. ²⁹ Wiinye Ziwifu ɔɔn Girɛkida bɛre, a mane dakwiɛ kɔ wɔnwɔ. Nka wɔnwɔ man’a kia yɛɛ na. ³⁰ Plala wɔ na wɔn yɔnnɔ tɔɔ wiin sangan ma, ɔn yaa kɔ lege Sezarekuru hɔn, ɔn n’a to a ɔɔn yaa Tarase. ³¹ Wuro ta kɔnkma mane ti siara hɔn Zude kɔ Galile kɔ Samarigiamana pepe hɔn, ye ta yɔnmabe ne yire ne yaa, ye ne kiu ka Matigi ma ne yaan ne yaa suu Wuro ta Ni baraka hɔn mɛ. ³² Piyɛre mane yaa bii pepe hɔn. Boo kɔɔ ma, a ɔɔn yaa Wuro ta kma brɛ wiinye ɔɔn ti Lidakuru hɔn. ³³ A yaa sɔɔn boo za yeyɛ, ye n’a togo wiri Ene. Wɔn mane sian bo wɔn dɔgɔ korosɔɔn. A mane muruku. ³⁴ Piyɛre ɔɔn d’a ma: «Ene, Yezu Krista be kɛnɛ. Tuma bia sianfa bii.» Wɔnna nɔɔ hɔn a ɔɔn tuma. ³⁵ Lidakma kɔ Sarɔnkma pepe wɔn za ɔn dian Matigi ma. ³⁶ Ya boo mane ti Zopekuru hɔn ne kalanɔ, ye n’a togo wiri Tabita. Girɛkida hɔn ye da Dɔrɔkasi, wɔn kɔrɔ wogo. A mane dafɔre na yaan ye ta ne durukma diɛma sangan pepe ma. ³⁷ Bo wɔnna yin plala wɔ ma, a mane bɛrɛ ne pare ɔn naa siri. Ye n’a na soro min ɔn n’a sianbɛ zangan hɔn. ³⁸ Lida kɔ Zope yɔfa dɛrɛ ga. Kalanɔmanɛ naa mɔɔ ye da Piyɛre ti Lida, ye ɔɔn sma pla fanɛ, ye ye yaa n’a wiri a sale naa. ³⁹ Wɔnna nɔɔ hɔn Piyɛre ɔɔn tuma kwɛ kɔ lɔgɔ. Piyɛre yaa wiri wiin sangan ma, ye n’a babɛ zangan we hɔn. Yɔfuroyàra pepe mane ti yeyɛ ne mɔgɔ. Dɔrɔkasi na tisangan ma ni na a mane wiinye forokia kɔ wiinye zoga kwaro, ye ne wɔnwɔ dɔrɔ Piyɛre ma. ⁴⁰ Piyɛre ɔɔn sma pepe sabɛ sire ɔɔn zii yoloko ɔn Wuro mɛ. Wɔn timi a ye bere soro we brɛ piri ma ɔn da: «Tabita tuma.» A ɔɔn ye yinna kɔba. A naa Piyɛre za, ɔn tuma tangan. ⁴¹ Piyɛre ɔɔn ye soro sɔrɔ a ma n’a tumabɛ. Wɔn timi a ɔɔn yɔfuroyàra wɔ pepe kɔ Wuro ta kma wɔ wiri ɔn n’a dɔrɔ ye ma. ⁴² Zopekma pepe naa wɔnna da wɔ mɔɔ, ye na yaan ye ɔɔn yɔn Matigi ma. ⁴³ Piyɛre mane sangan dɛrɛ Zopekuru hɔn Simɔntogote boo brɛ wiin ɔɔn mane komawurɛta.

¹ Sɔɔn boo mane ti Sezarekuru hɔn, ye n’a togo wiri Kɔrenɛye. Ye mane wiin sɔrɔdasikuru togo wiri da Itali, a mane wɔn na zɛngɛnte. ² A ta tɛ ɔɔn mane Wuro yirebɛ ne kiu k’a ma kɔ y’a kɔnkma pepe, wɔn ɔɔn tɛ a ɔɔn mane Ziwifu na durukma na yaan ye diɛma ne Wuro mɛ sangan pepe ma mɛ. ³ Boo kɔɔ ma limasin ma, a mane Wuro ta mɛlɛkɛ boo za, a ɔɔn naa kɔ a brɛ ɔn n’a wiri ɔn da: «Kɔrenɛye!» ⁴ A ɔɔn ye yinna baga mɛlɛkɛ we hɔn n’a sege, kuun ɔɔn n’a foga, a ɔɔn da: «Wɔnnɔ ɔɔn tɛ Matigi?» Mɛlɛkɛ we ɔɔn d’a ma: «Bia mɛ kɔ bia dafɔretɛ tɛ kakiritugoda na Wuro ta. ⁵ Sma fanɛ Zopekuru hɔn basiɛ, Simɔntogote boo ti yeyɛ, ye n’a togo wiri da Piyɛre mɛ. Ye yaa n’a wiri a naa. ⁶ A vɛ komatɛtɛrɛta boo brɛ, ye wɔn wiri Simɔn mɛ. A ta kɔɔn ti yɛngɛnzu do ma.» ⁷ Wiin mɛlɛkɛ we ɔɔn mane bɛre a ta, wɔn naa sa wɛ wiin sangan ma, Kɔrenɛye ɔɔn y’a kma na boo fanɛ kɔ y’a sɔrɔdasi na boo wiin ɔɔn mane Wuro yirebɛ mɛ ne ti a soro ma n’a bii fɔn sangan dɛrɛ ma da hɔn. ⁸ Ye mane daga wiinye da pepe yɔnnɔ tɔɔ n’e kìni, a mane wɔnwɔ yira ye ma ɔn n’e fanɛ Zopekuru hɔn. ⁹ Ye na winnisin sma wɔ mane ti sogo ma yɛ, ɔn vetra kuru we na, Piyɛre ɔɔn ba wuromɛ na zɛn ma sin hɔn. ¹⁰ Nka wu naa n’a foga, a ne kia zɔn. Ye mane ti zɔnfrɛtɛ hɔn a ma, ye da ye tɔɔ, a ɔɔn fa boo za. ¹¹ A mane wurokɔn za, a ne kibɛ, fagwaga boo ɔɔn sa yeyɛ ne zii. A mane wɔkara zogo na yire yi, frɛ ne ti a danɔma naa na, a ne zii wɔkara a na naa tigɛ lɔ ma. ¹² Kannaafrɛ sii pepe kɔ wiinye ɔɔn vololo kɔ wiinye ɔɔn tire, wɔnwɔ ɔɔn mane ti a hɔn. ¹³ Bɛrekɔn boo mane da Piyɛre ma: «Tuma Piyɛre, be boo yɛɛ n’a nɔma.» ¹⁴ Nka Piyɛre ɔɔn da: «Awo Matigi, wiin fa ɔɔn yanganmu mane daga nɛmɛ na ga, ma wɔn nɔma n’a za ga.» ¹⁵ Bɛrekɔn we man’e bere d’a ma yɛ mɛ: «Wuro wiin fa kìnibɛ, wɔnnɔ na bi da wɔn yanganmu?» ¹⁶ Yee ye mane tɛ fɔn yaa wiri kanyinna saa. Wɔn timi fa we ɔɔn ye bere ba wuro hɔn yɛ. ¹⁷ Piyɛre mane ti ne wɔnna zɛfrɛ wɔ kɔrɔ giati, ma da bo ye na kayan ga, ye da ye tɔɔ Kɔrenɛye ta fanɛsma wɔ ɔɔn togatoga Simɔn brɛ na soo ɔn naa wiri kuledo ma. ¹⁸ Ye mane toga, ye ye wiin Simɔn we wiri ɔn da Piyɛre, ye bɛɛ a vɛ ra? ¹⁹ Wɔn da ye tɛ Piyɛre mane ti ne y’a zɛfrɛ wɔ ta da kɔrɔ giati yɛ. Nka Wuro ta Ni ɔɔn d’a ma: «Bo sma pla bɔɔ ti ne be kia. ²⁰ Tuma zii yaa kɔ lɔgɔ basiɛ be yɛ o, ka sigi ga bare mɛ ɔɔn n’e fanɛ.» ²¹ Piyɛre ɔɔn zii yaa sma wɔ gun ɔn da ye ma: «Ka wiin te kia, a mɛ. Ye dia ra?» ²² Ye ɔɔn da: «Sɔrɔdasi ta zɛngɛnte Kɔrenɛye wiin ɔɔn sɔntele ne kiu ka Wuro ma, Ziwifu pepe n’a togafɔrɔ yira, wɔn ma Wuro ta mɛlɛkɛ boo ye yɛrɛ dɔrɔ ɔn d’a daga be wiri be naa ye brɛ, a mɔɔ be ta.» ²³ Piyɛre ɔɔn n’e kɔbɛ, ye ɔɔn sian yeyɛ. Ye na winnisin yɛrɛ, Piyɛre ɔɔn tuma kwɛ kɔ ye na plala bɔɔ wiinye ɔɔn mane Zopekma ɔn yaa kɔ sma wɔ. ²⁴ Ye yakɔ na winnisin ye mane yaa wiri Sezarekuru hɔn. Kɔrenɛye wiin ɔɔn man’e yɛ́rɛ, wɔn mane fanɛ y’a kma ta kɔ ye mare na siɛbɛsiɛbɛ ye ta. ²⁵ Piyɛre naa wiri wiin sangan ma, Kɔrenɛye ɔɔn n’a tɛn ɔn zii yoloko a wee ɔn n’a yirebɛ. ²⁶ Nka Piyɛre n’a foga n’a tumabɛ ɔn d’a ma: «Tuma. Mɛ yɛrɛ sɔɔn mɛ yo.» ²⁷ Ye mane barotɛ ne kɔ. Piyɛre naa yaa sma za yaan, ²⁸ ɔn da: «Ka yɛrɛ tɔɔ da Ziwifu daga kwɛ kɔ siza wɛlɛ ɔn kɔ a ta kɔɔn hɔn ga. Nka Wuro n’a dɔrɔ mɛ ma, ye ma ka sɔɔn sii sege d’a yanganmu ga. ²⁹ Bo wɔn tɛ be ɔɔn fanɛ ne ta, ma ɔɔn naa ma dakwiɛ ga. Nka basiɛ, be fanɛ ne ta wiin wɔɔn na, wɔn yira ne ma.» ³⁰ Kɔrenɛye ɔɔn da: «Ye yin saa wa sma, bo wagati be nɛmɛ ma yɛ limasin ma, ma mane ti wuromɛ hɔn n’a kɔɔn hɔn, ɔn da ma tɔɔ, zogawɔlɔwɔlɔte boo ɔɔn bare naa taa ne zin ³¹ ɔn da ne ma, ye Wuro dian n’a mɛ na Kɔrenɛye, n’a dafɔre ne ti a kakiri hɔn mɛ. ³² Ye ma sɔɔn fanɛ Zope Simɔn ta, ye wiin wiri Piyɛre, a naa bɛɛ ne brɛ. Y’a vɛ komatɛtɛrɛta Simɔn brɛ yɛngɛnzu do ma. ³³ Wɔn tɛ ma ɔɔn fanɛ da ye yaa be wiri wɔnna nɔɔ hɔn yɛ, be ɔɔn bere dian naa ke brɛ mɛ. Awale bo ke nɛmɛ, Matigi kia be wiin fa yira ke ma, ke mɔɔ be ta.» ³⁴ Wɔn tɛ Piyɛre ɔɔn bɛreda bii ɔn da: «Tian na ma tɔɔ da Wuro sɔɔn dɛ́gɛ sɔɔn na ga. ³⁵ Ma tɔɔ da wiin te pepe ɔɔn tɛ wiin sii pepe ɔn ne kiu ka a ma ne telebe ta, wɔnna te da ɔɔn dia a ma. ³⁶ Isirayɛlenɔmanɛ ye na a y’a fanɛ pere. Wɔn siara na fanɛdia Yezu Krista baraka hɔn wiin ɔɔn sma pepe ta Matigi. ³⁷ Ka ye yɔnnɔ tɔɔ ɔn tɔɔ da yewɔ da wɔ mane zanzan Zudegiamana pepe hɔn. A y’a da dubi Galilegiamana hɔn Zan ta batize na pile fɔnɔ wɛ timi ma. ³⁸ Awe Nazarɛtisɔn Yezu we, Wuro mane y’a Ni kɔ y’a sebe pere a ma wiin nɛ, ka wɔn nɔma tɔɔ. A mane dɔɔ bii pepe hɔn ne dafɔre ta. Sitanɛ mane wiinye kma pepe parebɛ n’e yannɛ, a mane wɔnwɔ kɛnɛbɛ bare Wuro mane ti kɔ lege. ³⁹ A wiin fa pepe ta Ziwifu ta giamana hɔn kɔ Zeruzalɛmukuru hɔn, mɛ́ wɔn siɛrɛ. Y’a kwangwaga sɔ ma n’a yɛɛ. ⁴⁰ Nka yin saaro kɔɔ ma, Wuro n’a winni ɔn d’a ye yɛrɛ dɔrɔ. ⁴¹ Nka a ye yɛrɛ dɔrɔ sma pepe ma ga, fɔn siɛrɛkma ma Wuro mane pia wiinye dɛ́gɛ. Wɔn mɛ wiinye kma ɔɔn zɔn ɔn mɛnɛ kɔ lege a winni wɛ timi ma ɔn sa sara yɔ. ⁴² A fanɛ yira mɛ́ ma, ye mɛ́ ye puru ɔn n’e na siɛrɛbe ta. Awe Wuro ɔɔn dɛ́gɛ n’a ta nima kɔ sara na kitita na. ⁴³ Wuro ta daberebɛre pepe wiin te we siɛrɛ n’a da yira ne kwa, ye wiin te pepe ɔɔn yɔɔn a ma y’a togo baraka hɔn, wɔnna te na y’a kakiɛ pepe na yafa gun, a awe.» ⁴⁴ Piyɛre mane ti wɔnna bɛreda hɔn yɛ, Wuro ta Ni ɔɔn zii sma wɔ pepe ma wiinye ɔɔn mane mɔɔ a ta. ⁴⁵ Yɔnmabe ti wiinye Ziwifu hɔn ye ne yaro, wiinye wɔ ɔɔn mane naa kɔ Piyɛre, wɔnwɔ mane kaba fɔrɔna bare Wuro ta Ni mane zii sizɛ ma mɛ. ⁴⁶ Ye mane sma wɔ bɛrekɔn mɔɔ sidazɛ hɔn, ye ne Wuro ta kabakoda yira. Wɔn tɛ Piyɛre ɔɔn ye bere bɛreda bii yɛ ɔn da: ⁴⁷ «Wiinye kma bɛ ɔɔn Wuro ta Ni gun wɔkara ke, sɔɔn sbɛ ne maga ye ta batize na kɔ zio ra?» ⁴⁸ A ɔɔn sogo pere ɔn da, ye y’e batize Yezu Krista togo na. Wɔn timi ye n’a mɛ y’a yin damanɛ ta ye brɛ.

¹ Fanɛsma kɔ bɔ plala wiinye ɔɔn ti Zudegiamana hɔn mane naa mɔɔ ye da sisma dian Wuro domada ma mɛ. ² Piyɛre naa bere yaa Zeruzalɛmu wiin sangan ma, yɔnmabe ti wiinye Ziwifu hɔn, wɔnwɔ ɔɔn dakwiɛro gun kɔ lege. ³ Ye mane d’a ma: «Be mane yaa yarobareyasma brɛ ɔn kwɛ zɔn kɔ lɔgɔ.» ⁴ Wɔn tɛ Piyɛre ɔɔn da wɔ bii fɔn ye du ma n’e pepe yira ye ma tala tala ɔn yaa n’e wɛ. A mane da ye ma: ⁵ «Mɛ mane ti Zopekuru hɔn ne Wuro mɛ, ɔn wɔnna dɔreda wɔ za. Fasi boo mane sa wuro hɔn ne zii wɔkara zogo na yire yi, kiɛgɛ naa ne ti a na. A mane zii fɔn naa wiri mɛ na kayan na. ⁶ Ma mane ne yinna baga a hɔn n’a sege ɔn diniyan hɔn kannaafrɛ za a hɔn kɔ sɔkobafrɛ wiinye ɔɔn vololo kɔ wiinye ɔɔn tire. ⁷ Wɔn timi ma ɔɔn kɔn boo mɔɔ wiin ɔɔn mane da, ye tuma Piyɛre, be ye yɛɛ ɔn n’e nɔma. ⁸ Wɔn tɛ mɛ ɔɔn da, da awo Matigi. Da bare ne vɔrɔ ma da hɔn, wiin fa ɔɔn yanganmu, mane daga nɛmɛ na ga, wɔn kɔ zɛ ne do hɔn ga. ⁹ Bɛrekɔn we man’e to wuro hɔn ɔn da yɛ mɛ, ye Wuro da wiin fa ɔɔn fa na kìni yi, ye mɛ ka da wɔn fa na dɔn yi ga. ¹⁰ Wɔn mane tɛ fɔn kanyinna saa na, wɔn timi ye pepe ɔɔn ye bere ba wuro hɔn yɛ. ¹¹ Bo wɔnna nɔɔ tala hɔn yɛ, mɛ mane ti wiin wɛɛn sma saa bɔɔ ɔɔn naa taa wɔnna kuledo ma. Ye mane tuma Sezare, ye n’e fanɛ mɛ ta. ¹² Wuro ta Ni ɔɔn da, ye ma yaa kɔ lɔgɔ ɔn ka sigi ga. Bɔ plala sma konala bɛ na ka yɔnnɔ ti, wɔnwɔ ɔɔn yaa ne yee. Ke mane yaa kɔ sɔɔn we brɛ. ¹³ Mɛlɛkɛ mane naa kɔ a brɛ wiin nɛ ɔn wiin fa yira a ma, a mane wɔn yira ke ma ɔn da, y’a da, ye ye sɔɔn fanɛ Zopekuru hɔn a yaa Simɔntogote boo wiri, ye wiin wiri mɛ ɔn da Piyɛre. ¹⁴ Ye wiinye da ɔɔn na tɛ awe kɔ y’a kma pepe kisi, y’a na wɔnwɔ yira a ma. ¹⁵ Mɛ bɛreda bii wiin sangan ma suu, Wuro ta Ni ɔɔn dutigɛ ne zii ye ma wɔkara a mane tɛ wiin nɛ ke ma dubisangan ma. ¹⁶ Wɔn tɛ mɛ kakiri ɔɔn tugo kɔ Matigi domada, a mane wiinye yira ɔn da, ye Zan mane sma batize zu hɔn nka ki na n’e batize kɔ Wuro ta Ni ɔɔn. ¹⁷ Yewɔ sma wɔ ɔɔn yɔɔn Matigi Yezu Krista ma, Wuro ɔɔn y’a kiɛn ta ye ma wɔkara a ye ta ke ma wiin nɛ, mɛ mane sbɛ ne sɔɔ Wuro ma ɔn d’a ka ye ta ga ra?» ¹⁸ Wɔnna domada wɔ ta yira na, ye na mɔsma wora ɔɔn kuna, ye ne baraka yira Wuro ma ne kwa: «Wiin zugokatra ɔɔn sɔɔn ka ni hɔn, Wuro wɔn pere sisma ma mɛ.» ¹⁹ Etiyɛni yɛɛ wɛ timi ma, wiinye yannɛ ɔɔn mane dɛ sma ma, wɔnwɔ man’e zanzanbɛ. Ye na bɔɔ mane yaa Fenisigiamana hɔn, bɔɔ ɔɔn yaa Sipregiamana hɔn, bɔɔ ɔɔn yaa Antiyosekuru hɔn. Ziwifu dama ma ye mane Wuro domada yira. ²⁰ Hali kɔ wɔn, ye na bɔɔ wiinye ɔɔn mane Siprekma kɔ wiinye ɔɔn mane Sirɛnekma, wɔnwɔ yaa wiri Antiyose suu, ne Matigi Yezu ta fanɛdia yira Girɛkisi ma. ²¹ Matigi man’e diɛma fɔrɔna, wɔn tɛ sma na yaan ye ɔɔn man’e zin bere Matigi ma, yɔnmabe ɔɔn kɔ ye hɔn. ²² Wɔnna da wɔ na bɛreda mane wiri Wuro ta kɔnkma ma wiinye ɔɔn ti Zeruzalɛmu, ye ɔɔn Baranabase dɛ́gɛ n’a yabɛ yeyɛ. ²³ A naa yaa wiri yeyɛ ɔn Wuro ta tɛda za wiin sangan ma, ɔn nihɔndia ɔn n’a yira n’a dɔrɔ ye ma, ye ye y’a giatɛ pepe bere Matigi ma. ²⁴ Baranabase mane sɔɔn na tele yi ne pagaa Wuro ta Ni na, yɔnmabe ne ti a hɔn. Ye tɛ yee, sma na yaan ye man’e zin bere Matigi ma. ²⁵ Wɔn tɛ Baranabase ɔɔn yaa Tarasekuru hɔn Sɔle kia na. ²⁶ A yaa n’a za, ɔn naa kɔ lege Antiyose. Ye mane dɔɔ tala pepe ta yeyɛ ne kwɛ ne baratɛ kɔ Wuro ta kɔnkma ne sma na yaan ye kala. Wiin Kiretiyɛntogo ɔɔn dɛ kalanɔmanɛ ma, ye n’e wiri kɔ lege, Antiyosekuru hɔn wɔn pia dutigɛ. ²⁷ Wɔnna sangan ma Wuro ta daberebɛre bɔɔ mane tuma Zeruzalɛmu ɔn yaa Antiyose. ²⁸ Ye na sɔnnala, ye mane wiin togo wiri Agabuse, wɔn man’a yira n’a dɔrɔ Wuro ta Ni baraka hɔn ɔn da, ye wu na yire yi na figɛ diniyan pepe hɔn. Tian na, Kulode ta sin hɔn, wɔnna wu we mane naa bɛrɛ. ²⁹ Wɔn tɛ kalanɔmanɛ ɔɔn mane bɛɛn ye na ye nɛmɛ hɔn ɔn da kɛrɛ ye na y’a frɛ na bɔɔ kwɛkwɛ wiin ti wɔn kɔ y’a sbɛ, ye n’e fanɛ ye na plala ma wiinye ɔɔn ti Zudegiamana hɔn. ³⁰ Ye n’e ta yee. Ye mane frɛ wɔ pere Baranabase kɔ Sɔle ma ɔn da ye yaa n’e pere sɔnmlala ma.

¹ Wɔnna sangan we ma fanganma Herode man’a giati ɔn da ye daga Wuro ta kɔnkma na bɔɔ yannɛ. ² A mane Zan na plalo Zake yɛɛ kɔ kunkwinitaba. ³ A naa wɔn za da wɔn dia Ziwifu ma, a ɔɔn tɛ ye ɔɔn Piyɛre foga mɛ. Wɔn mane tɛ Kwindiekiɛbareyaburo na fɛti kɔɔ ma. ⁴ A mane tɛ ye ɔɔn Piyɛre foga n’a ka kaso hɔn ɔn sɔrɔdasikuru naa na sma naa naa ta ye ne yɛre a na. A mane giati ne kwa, ye Yɛrɛgun na fɛti ɔɔn fɔnɔ, ye ye na n’a kiti zamɛ yɔnnɔ na. ⁵ Piyɛre na tisangan ma kaso hɔn, Wuro ta kɔnkma mane Wuro mɛ a ye na sangan pepe ma. ⁶ Herode mane kia Piyɛre kiti wiin kɔɔ ma, wɔn na siankɔ ma wuru hɔn, Piyɛre mane sian sɔrɔdasisma sma pla woro hɔn ne yin, ne pɛrɛ kɔ zɔgɔre nɔma pla, bɔɔ sɔrɔdasi ne titi y’a yɛreda hɔn kasokɔn do ma. ⁷ Nka nɔɔ tala hɔn Matigi ta mɛlɛkɛ ɔɔn naa kɔ kini na yire yi ɔn kasokɔn we paga. Mɛlɛkɛ we ɔɔn Piyɛre pamare n’a winni ɔn d’a ma: «Tuma salesale.» Zɔgɔre wɔ ɔɔn sele wɛ a sra hɔn. ⁸ Mɛlɛkɛ we ɔɔn ye bere d’a ma yɛ mɛ: «Bia yɔyɔsɔfa pɛrɛ ɔn bia kanɛgɛ ka.» A n’e ta yee. Mɛlɛkɛ we ɔɔn ye bere d’a ma yɛ mɛ: «Bia zogwaga ka, be dɔɔ ne ma.» ⁹ Piyɛre ɔɔn sa dɔɔ a ma. Mɛlɛkɛ mane wiin fa ta, Piyɛre mane wɔn yɔnnɔ tɔɔ tian na da ga nka a man’a giati ɔn da ye ti ne sɔnyangan. ¹⁰ Ye mane yaa dɔɔ fɔnɔ sɔrɔdasi na gwerekuru ma ɔn yaa fɔnɔ kuru plalo ma ɔn fɔnɔ yaa wiri balo na koro ma wiin ɔɔn tele kuru kɔrɔ hɔn ma. Wɔnna koro we mane kibɛ ye ma ye sana. Ye naa sa yaa wiri sire wiin sangan ma, ɔn yaa wiri sogo tege na, mɛlɛkɛ we ɔɔn bare yaa Piyɛre to. ¹¹ Wɔnna sangan ma Piyɛre yinna hɔn kini, a ɔɔn da: «Mɛ tɔɔ basiɛ tian na da Matigi ɔɔn y’a mɛlɛkɛ fanɛ wiin fa to a naa ne dɛn ne wa Herode sra hɔn kɔ Ziwifu pepe ta giatɛ na da hɔn.» ¹² A naa bii hɔn na kayan ta, ɔn yaa Zan sie Mari brɛ, ye mane wiin Zan we wiri da Mareke mɛ. Sma na yaan ye mane ti wuromɛ hɔn wɛɛn. ¹³ Piyɛre naa koro kwangwaga wiin sangan ma, baratɛdalo boo ye mane wiin wiri Orode, wɔn ɔɔn naa sege. ¹⁴ A Piyɛre bɛrekɔn dɛ́gɛ tɔɔ wiin sangan ma, ɔn tɔrɔ nihɔndiaro ma, ma sbɛ koro koba ga nka ɔn tɔngɔn kɔ yaa yira, ye Piyɛre taa kuledo ma. ¹⁵ Ye ɔɔn d’a ma, y’a kakaba ra? Nka a mane kwa, ye ye tian. Wɔn tɛ ye ɔɔn da, ye be ma farase ga, y’a ma Piyɛre mɛlɛkɛ. ¹⁶ Wɔn hɔn ye mane ti yɛ, Piyɛre ne taa ne koro kwangwaga. Ye naa koro koba, a ɔɔn tɛ awe Piyɛre. Ye ma sbɛ n’e tɔɔ tian ga. ¹⁷ A ɔɔn yanmɛ yira ye ma ye ye bɔɔ. Matigi man’a sabɛ kaso hɔn wiin nɛ pepe, a ɔɔn wɔn nɔma yira ye ma. A ta bɛreda wɛbɛdo hɔn, a ɔɔn da ye ma: «Ka yaa n’e yira Zake kɔ ke na plala ma.» Wɔn timi a ɔɔn sogo bii ɔn yaa biza hɔn. ¹⁸ Kɔɔ naa kiɛ wiin sangan ma sɔrɔdasi gia ɔɔn tuma fɔrɔna bare ye mane da bo Piyɛre yado ga. ¹⁹ Herode mane da ye yaa n’a kia. Ye ɔɔn yaa kia bana a ma. A mane da, ye ye sɔrɔdasi wɔ foga naa kɔ lɔgɔ, y’e toga, wɔn timi a ɔɔn da ye y’e yɛɛ. Wɔn timi a ɔɔn tuma yaa Zudegiamana hɔn ɔn naa tuma wɛɛn ɔn yaa Sezare ɔn yaa wagati zɔgɔ ta wɛɛn. ²⁰ Herode woro mane ba Tirekma kɔ Sidɔnkma ta fɔrɔna. Wɔnwɔ ɔɔn bɛɛn ye nɛmɛ hɔn wiin fa to ye kwɛ yaa a brɛ. Ye mane bɛɛn kɔ awe fanganma ta kɔnyɛrevɔ Bilasetuse, wɔn timi ye ɔɔn yaa vɛ awe Herode ta ɔn d’a siara ta ye ma bare awe fanganma ta giamana hɔn ye man’e do na zio gun. ²¹ Ye mane bɛɛn wiin kɔɔ ma, wɔn naa wiri, Herode ɔɔn y’a fanganmazogo ka ɔn yaa tangan fanganmakware ma ne bɛre ye ta. ²² Zamɛ man’a yirebɛ ne kwa, ye bafa ɔɔn bɛre, y’a sɔɔn ga. ²³ Nka ye da ye tɔɔ, Matigi ta mɛlɛkɛ ɔɔn n’a vuro bare a mane Wuro yirebɛ ga. Tɔntɔna n’a nɔma, a ɔɔn siri. ²⁴ Wuro domada mane yire ne yaa suu. ²⁵ A ma Baranabase kɔ Sɔle han, wɔnwɔ mane waro y’a bara na Zeruzalɛmukuru hɔn ɔn ye bere, ye mane wiin Zan we togo wiri ɔn da Mareke mɛ, ye ɔɔn wɔn foga yaa kɔ ye nɛmɛ.

¹ Wuro ta daberebɛre kɔ smakalasma bɔɔ mane ti Antiyose Wuro ta kma yɔ. Wɔnwɔ mane Baranabase kɔ Simeyɔndungun kɔ Sirɛnesɔn Lusiyuse kɔ Manayɛn kɔ Sɔle. Manayɛn kɔ giamana wɔnnate Herode kwɛ pra kɔɔn tala hɔn. ² Boo kɔɔ ma, ye mane ti Matigi yirebɛ hɔn ne sun ka, Wuro ta Ni ɔɔn da ye ma: «Ma Baranabase kɔ Sɔle dɛ́gɛ wiinye bara na, ka ye tigɛ ne ma wɔnwɔ ye na.» ³ Bo wɔn ɔɔn tɛ ye naa sun ka na wɛ wiin sangan ma, ɔn Wuro mɛ, ɔn ye sra dɛ ye ma, ɔn n’e to ye ɔɔn yaa. ⁴ Bo Wuro ta Ni naa n’e fanɛ yee, Baranabase kɔ Sɔle ɔɔn yaa Selusikuru hɔn ɔn yaa kɔ koro hɔn wɛɛn ɔn yaa Sipre piri ma. ⁵ Ye yaa wiri Salamine wiin sangan ma, ne Wuro domada yira Ziwifu ta Kalakɔan hɔn. Zan Mareke mane ti kɔ lɔgɔ n’e diɛma. ⁶ Ye naa zu na korido pepe fɔnɔ na wɛ wiin sangan ma, ɔn yaa wiri Pafɔse, ɔn ginamori boo za yeyɛ, a n’e yɛrɛ ta Wuro ta daberebɛta na. A mane Ziwifu, ye n’a togo wiri Bareyezu. ⁷ Mara we wɔnnate Sɛrizi Pɔluse wiin ɔɔn mane tangan yeyɛ, a kakiri ne dia fɔrɔna, a mane wɔn ta kma na boo. Wɔn mane Baranabase kɔ Sɔle wiri wiin fa to ye naa Wuro domada yira ye ma. ⁸ Awe ginamori we togo kɔrɔ mane ti Elimase Girɛkida hɔn. A mane Baranabase kɔ Sɔle dakwiɛ ne kia mara wɔnnate we ta yɔnmabe yaga. ⁹ Wɔn tɛ Sɔle, ye wiin wiri Pɔle mɛ, wɔn ɔɔn pagaa Wuro ta Ni na ɔn ye yinna baga a hɔn fɔrɔna, ¹⁰ ɔn d’a ma: «Bi wiin te be ɔɔn paga yinnamakwiɛ kɔ lamara sii pepe na, be Sitanɛ nɔ wiin ɔɔn telebe pepe zugu. Be sbɛ ne saa Matigi ta giatɛ yaga na ga ra? ¹¹ Sege rɛ, taa Matigi na be vuro. Bo be na tɛ fuu na fɔn yaa kayan boo wagati ma. Be na ne sin za titiri ga.» Wɔnna nɔɔ hɔn yɛ, tunio ɔɔn bɛrɛ a ma, a ne lɔgelɔge ne yeta kia. ¹² Wiin fa ɔɔn mane tɛ, mara we wɔnnate naa wɔn za suu, yɔnmabe ɔɔn kɔ a hɔn bare Matigi ta da na kala man’a kabakobɛ fɔrɔna. ¹³ Pɔle kɔ ye yakwɛre mane kɔ koro hɔn Pafɔsekuru hɔn, ɔn yaa Pɛrezekuru hɔn Panfiligiamana hɔn. Zan Mareke mane dɛ́gɛ ye na ɔn bere yaa Zeruzalɛmu. ¹⁴ A ma yewɔ han, ye mane tuma Pɛreze, ɔn yaa wiri Antiyosekuru hɔn Pisidigiamana hɔn. Tangantun kɔɔ ma, ye mane yaa kɔ Kalakɔn hɔn ɔn tangan. ¹⁵ Wuro ta daberebɛre ta Tɛn na sɛbɛ kala wɛ timi ma, Kalakɔn wɔnnakma ɔɔn da, ye ye yira ye ma, ye bɛreda ɔɔn ne ti ye ta n’e yira zamɛ ma n’e wora sigebɛ, ye ye sbɛ ne bɛreda bii. ¹⁶ Wɔn tɛ Pɔle ɔɔn tuma taa ɔn ye soro duro ɔn da: «Ki Isirayɛlenɔmanɛ ɔnkɔ ki wiinye kma ɔɔn salaka wa Wuro ma a yirebɛ na, ka mɔɔ ne ta. ¹⁷ Kià sii Isirayɛle ta Wuro ɔɔn ke tamɛ dɛ́gɛ. A sii we yanbɛ ye na tisangan ma Ezipitigiamana hɔn. Wɔn timi a n’a sabɛ yeyɛ y’a sebe baraka hɔn, ¹⁸ ɔn n’e woro kibɛkolo hɔn dɔgɔ kiepla nɛmɛ yɔ. ¹⁹ Wɔn timi, a naa sii kopra togo migebɛ n’e wa Kanangiamana hɔn, n’e ta bii hɔn pere ke tamɛ wɔ ma kɔrɔ na. ²⁰ Wɔnna da wɔ pepe mane tɛ dɔgɔ zɔnaa ne kieplafun (450) nɛmɛ yɔ. Wɔn timi a ɔɔn diɛmasma pere ye ma fɔn naa wiri Wuro ta daberebɛta Samiyɛle ma. ²¹ Wɔn timi ye mane fanganma kia Wuro ta, a ɔɔn Kisi nɔ Sayule pere ye ma ɔn sa Bɛnzamɛ dumakma hɔn, wɔn ɔɔn tangan ye wɔɔn na dɔgɔ kiepla yɔ. ²² Wuro da ye Sayule dra, ɔn Davidi ta fanganma na ye ma. Wɔn ma a mane bo siɛrɛbe be ta ɔn da, ye ye Zese nɔ Davidi za wiin da ɔɔn dia ye ma. Y’awe ɔɔn na ye dungo na da pepe ta. ²³ Awe Davidi timikma hɔn Wuro Yezu sabɛ, wiin ɔɔn Isirayɛlesi na kisita wɔkara a man’e na do sɔɔ wiin nɛ. ²⁴ Sanɛ Yezu da ye na, Zan mane zugokatra na batize da yira wiin fa to Isirayɛlenɔmanɛ pepe sbɛ ye zugo katra. ²⁵ Sanɛ Zan da ye waro y’a bara na, a mane sma toga ne kwa, ye k’a giatɛ ma ye mɛ kɔte? Y’a yi ga. Ye nka sɔɔn tiye ne naa yi timi, ye yi yɛrɛ dɛgɛ a ta kanɛgɛ firi hɔn. ²⁶ Kià kma, ka tɛ Abrahamu ta sii hɔn kma na boo yo, wɛlɛ ka na bɔɔ wiinye ɔɔn kiu ka Wuro ma yo, ke pepe ma bɔ kisi na domada bɛ fanɛ. ²⁷ Zeruzalɛmukma kɔ y’a zɛngɛnkma mane Yezu dɛ́gɛ tɔɔ ga. Ye Wuro ta daberebɛre ta sɛbɛ wiinye kala Tangantun o Tangantun, y’a zarake ɔn wɔnwɔ do paga. ²⁸ Ye yɛrɛ mane yagada sii za a zɛnɛ hɔn ga, ɔn n’a kia Pilate ta yee yɛ, y’a yɛɛ. ²⁹ Wiinye da pepe ɔɔn mane sɛbɛ a ta da na, ye naa wɔnwɔ do paga n’e wɛ wiin sangan ma, ɔn n’a zibɛ n’a wa sɔnɔ ma ɔn yaa n’a tigɛ bona boo hɔn. ³⁰ Nka Wuro n’a winni n’a sabɛ sara yɔ. ³¹ Wiinye kma ɔɔn mane tuma Galilegiamana hɔn, ɔn kwɛ kɔ lege ɔn yaa Zeruzalɛmu, wiinye kma wɔ ɔɔn n’a siɛrɛ zamɛ yɔ basiɛ, a man’e yɛrɛ dɔrɔ wɔnwɔ ma yin damanɛ yɔ. ³² A ma mɛ́ han, wiin dosɔ ɔɔn tɛ ke tamɛ ma, mɛ́ wɔnna fanɛdia wɔ yira mɛ. ³³ Wuro Yezu winni n’a sabɛ sara yɔ wiin sangan ma, a wɔnna do sɔɔ we ta n’a do paga mɛ́ ma wiinye ɔɔn n’e nɔmanɛ wɔkara ye sɛbɛ wiin nɛ Wuroyirebɛturo na plala na sɛbɛ hɔn ɔn da, ye be ne nɔ, mɛ ɔɔn be vɔrɔ sma. ³⁴ Ɔn da, ye Wuro n’a winni n’a sabɛ sara yɔ, a mane na vra abada ga, wɔn a mane ɔɔn yira n’a dɔrɔ ɔn da, ye ma na duba na yɔnma ye pere ka ma, ma wiinye duba na do sɔɔ Davidi ma. ³⁵ Bo wɔn ɔɔn tɛ a ɔɔn n’a yira n’a dɔrɔ boo piri ma yɛ mɛ ɔn da, ye be daga be yi to a vra ga. ³⁶ Kamasɔrɔ Davidi ta sin hɔn, a mane bara ta Wuro ma a dungo na. A naa siri, ye n’a sitra kɔ a tamɛ, a ɔɔn vra. ³⁷ Nka Wuro wiin te winni, wɔnna te vra ga yo. ³⁸ Wɔn ye na kià kma ka daga tɔɔ da kakiɛ na yafa wiin ɔɔn yira ne wiri ka ma awe baraka hɔn, ka wɔn gun. Ka mane wiin telebe we gun Moyizi ta Tɛn hɔn ga, ³⁹ awe baraka hɔn ka wɔn pere sɔɔn sii pepe ma yɔnmabe ti wiin hɔn. ⁴⁰ Wɔn ye na, ka ka yɛrɛ kɔrɔse wiin fa to Wuro ta daberebɛre wiin fa yira, wɔn ka na tɛ ka na ga. Ye mane da, ⁴¹ ye ka yannɛ na sma sege mɛ ma rɛ, ka tɛ kuun ka foga ka mige. Bare ga ma na ka to ni na yɛ ɔn bɔɔ kabakoda ta, hali sɔɔn man’e yira ka ma ka mane na n’e tɔɔ tian ga.» ⁴² Ye na sasangan ma, ye man’a sigebɛ Pɔle kɔ Baranabase ma fɔrɔna ɔn da ye Tangantunza, ye tɛ ye wɔnna da wɔ na bɔɔ ɔɔn yira yɛ. ⁴³ Zamɛ na zanzan wɛ wiin sangan ma, bɔɔ Ziwifu na yaan ye kɔ wiinye kma ɔɔn mane yaro ɔn tɛ Ziwifu na, wɔnwɔ ɔɔn yaa Pɔle kɔ Baranabase yee, wɔnwɔ n’a yira n’a sigebɛ ye ma ye ta baro hɔn ɔn da, ye ye wɔɔ Wuro ta woramadiabe hɔn fɔrɔna. ⁴⁴ Tangantun kɔɔ naa wiri, ye ɔɔn tɛ wɔkara kirekma wɔ pepe ɔɔn naa ye nɛmɛ kwɛ wiin fa to ye mɔɔ Matigi domada na. ⁴⁵ Wɔn ta zɛ na Ziwifu ta, ye wora ɔɔn ba, ye ne Pɔle vini a ta bɛreda ye na. ⁴⁶ Wɔn tɛ Pɔle kɔ Baranabase ɔɔn n’a yira n’a dɔrɔ ye ma kɔ yɔnmabe ɔn da: «Ki ma Wuro domada mane daga pia yira dɔre dɛn. Ka debe maga a hɔn ɔn n’a yira n’a dɔrɔ ɔn da ki daga kɔ wɛbareyani hɔn ga han, awale bo wɔn ɔɔn tɛ mɛ́ ɔɔn mɛ́ zin bere sizɛ ma kɛ. ⁴⁷ Bare mɛ́ wiinye domada gun Matigi ta, bo ɔɔn wɔnwɔ ɔn da, ye ma be tigɛ ɔn be ta diniyan ta kini na wiin fa to be sbɛ kisi wiribɛ diniyan hɔn kma pepe ma.» ⁴⁸ Wɔnna bɛreda wɔ ta mɔɔ na, sisma wɔ pepe mane nihɔndia ne Matigi domada yirebɛ. Wiinye kma pepe ɔɔn mane daga wɛbareyani gun, yɔnmabe ɔɔn kɔ wɔnwɔ hɔn. ⁴⁹ Matigi domada mane wiri yeyɛ wola pepe hɔn. ⁵⁰ Nka Antiyose kuru hɔn zɛngɛnkmayàra kɔ smayeye wiinye ɔɔn mane Wuro yirebɛ, Ziwifu mane wɔnwɔ gwangwanabɛ Pɔle kɔ Baranabase na. Ye ɔɔn bɛrɛ ye ma n’e yannɛ n’e laga n’e wa y’a giamana hɔn. ⁵¹ Ye mane ye kaɛn na tulu sɛnsɛnɛ n’a dra ye ma n’a dɔrɔ ye ma ɔn da ye maga ye hɔn, ɔn yaa Ikoniyumekuru hɔn. ⁵² A ma kalanɔmanɛ wɔ han, wɔnwɔ mane ti nihɔndiaro hɔn ne paga Wuro ta Ni na sangan pepe ma.

¹ Pɔle kɔ Baranabase mane wiin fa ta Antiyose, wɔn nɛmɛ ye mane ɔɔn ta Ikoniyumekuru hɔn mɛ. Ye mane yaa kɔ Ziwifu ta Kalakɔn hɔn ɔn bɛre yeyɛ fɔn yɔnmabe ɔɔn kɔ ye na yaan ye kɔ Girɛkisi na yaan ye hɔn mɛ. ² Nka yɔnmabe mane kɔ wiinye Ziwifu hɔn ga, wɔnwɔ mane bɔ sizɛ sinsanganbɛ ye na plala na. ³ Pɔle kɔ Baranabase mane wɔɔ Ikoniyumekuru hɔn ɔn sangan dɛrɛ yeyɛ. Ye mane yɔɔn Matigi ma wiin ɔɔn man’e domada na kiɛn na siɛrɛbe ta ne sebe pere ye ma ye ne sbɛ ne kabakoda ta. ⁴ Kirekma wɔ mane sodini kuru pla. Kuru tala ne ti Ziwifu wɔ timi, bo kuru tala ne ti fanɛsma wɔ timi. ⁵ Sizɛ wɔ kɔ Ziwifu wɔ man’a giati ɔn da ye daga balabe tumabɛ wiin fa to ɔn fanɛsma wɔ dra n’e laga kɔ dɔge. ⁶ Wɔnwɔ naa n’e yɔnnɔ tɔɔ, ɔn tɔngɔn yaa tɛɛ Likayonigiamana na kire bɔɔ hɔn kɔ ye na wola. Bo Lisitirekuru, bo ma Dɛrebekuru. ⁷ Ye mane ti wɛɛn mɛ ne fanɛdia yira. ⁸ Sɔɔn boo mane ti Lisitirekuru hɔn ne muruku n’a bii fɔn ye vɔrɔ ma da hɔn. A yɛrɛ mane tuma yaa zɛ tala na ga. ⁹ Boo kɔɔ ma, a mane ti ne mɔɔ Pɔle ta, ye da ye tɔɔ wɔn n’a sege ɔn tɔɔ yɔnmabe ti a hɔn ne sbɛ n’a kɛnɛbɛ, ¹⁰ ɔn ye kɔn duro yuu ɔn da: «Tuma taa be kaɛn ma.» Sɔɔn we ɔɔn tuma tige taa ɔn ne yaa ne gun. ¹¹ Sma naa Pɔle ta tɛda za wiin sangan ma, sɔngɔkɔn ɔɔn sa zamɛ yɔ, ye ne yira ne kwa Likayonida hɔn, ye «Bafrɛ ye ta sma nɛmɛ na ɔn naa ke brɛ.» ¹² Ye mane Baranabase togo dɛ ɔn da Zeyuse, wɔn kɔrɔ bafrɛ ta vɔ ɔn Pɔle togo dɛ da Hɛremɛse, wɔn kɔrɔ ye ta fanɛta. Bare Pɔle ɔɔn mane bɛreta. ¹³ Wiin bafa ɔɔn ti kuru we hɔn, ye n’a togo wiri Zeyuse, wɔn ma salakawɛta ɔɔn naa kɔ yantolɛ kɔ wɔnna tolɛ wɔ wɔan hɔn pibanfolɛ, kuru we na kɔdo hɔn ɔn naa bɛɛn kɔ zamɛ ne kia salaka wa. ¹⁴ Wɔn ta mɔɔ na, fanɛsma wɔ Pɔle kɔ Baranabase ɔɔn y’a zoga barabara ne tɔngɔn ne yaa zamɛ wɔ brɛ ne sɔngɔ ¹⁵ ne kwa: «Wɔnnɔ na yi ka ɔɔn ta yee? Mɛ́ sma mɛ wɔkara ki yo. Mɛ́ wiinye fanɛdia wɔ yira ka ma, wɔn ka saa bɔ yinnida bɛ nɛmɛ na o ɔn ka zin bere Wuro na Siɛbɛsiɛbɛ yi ma wiin ɔɔn wurokɔn kɔ lagakɔn kɔ yɛngɛnzu kɔ ye hɔn frɛ pepe dan. ¹⁶ Gwerena, a mane sii wɔ pepe to wiin ti wɔn ne y’a sogo yaa. ¹⁷ Hali kɔ wɔn, yee a ye yɛrɛ dɔrɔ y’a dafɔretɛ hɔn yɛ. Bare a wurozu tumabɛ wuro hɔn n’a zibɛ ka ma, ka ne sɔnfrɛtɛtɛrɛ ye na tɛtɛrɛsangan ma, ɔn ne zɔnfa pere ka ma ka nihɔn ne dia.» ¹⁸ Wɔnna bɛreda wɔ mane sige fɔrɔna ɔn sbɛ sɔɔ gun zamɛ wɔ ma ye ta salaka ta wɛ na. ¹⁹ Bɔɔ Ziwifu mane tuma Pisidi kɔ Antiyose kɔ Ikoniyume na kire hɔn, ɔn naa sma gwangwanabɛ n’e kwɛ ye ma, ye ɔɔn Pɔle dra kɔ doge n’a vugo sa yaa n’a to kuru timi n’a giati ɔn d’a siri. ²⁰ Nka kalanɔmanɛ naa ye nɛmɛ kwɛ a do na wiin sangan ma, a ɔɔn tuma ɔn kɔ kuru kɔrɔ hɔn. Winnisin, a ɔɔn kwɛ kɔ Baranabase ɔn yaa Dɛrebekuru hɔn. ²¹ Pɔle kɔ Baranabase naa fanɛdia yira Dɛrebekuru hɔn, ɔn kalanɔmanɛ na yaan ye gun yeyɛ, ɔn tuma yaa Lisitirekuru hɔn kɔ Ikoniyume kɔ Antiyosekuru hɔn wiin ɔɔn ti Pisidigiamana hɔn. ²² Ye mane kalanɔmanɛ wora sigebɛ ne yira ye ma, ye ye wɔɔ yɔnmabe hɔn. Ye mane kwa ye ma mɛ ye: «Sanɛ ke da ke kɔ Wuro ta kolo hɔn, ke daga dian yannɛ na yaan ye na dɛn.» ²³ Wuro ta kɔnkma wiinye ɔɔn titi wɔnna kire wɔ hɔn, ye mane sma dɛ́gɛdɛ́gɛ ye hɔn n’e ta ye na zɛngɛnkma na ɔn Wuro mɛ ye ma ɔn sun ka ɔn n’e kalfa Matigi ma ye mane yɔɔn wiin ma. ²⁴ Bo wɔn fɔnɔ wɛ timi ma ye Pisidigiamana yaa n’a kwire ɔn yaa Panfili na wola hɔn. ²⁵ Ye mane Wuro domada yira Pɛreze ɔn fɔnɔ yaa Atali. ²⁶ Ye naa tuma wɛɛn ɔn koro bii ɔn yaa Antiyosekuru hɔn, ye mane pia tuma wiin wɛɛn, ye man’e kalfa Wuro ta woramadiabe ma wiin wɛɛn. Wiin woramadiabe we ɔɔn n’e diɛma ye ta bara na ye wiinye ta n’e gun. ²⁷ Ye naa wiri wiin sangan ma, ɔn Wuro ta kɔnkma pepe kwɛ. Wuro mane wiinye bara pepe ta kɔ yewɔ, ɔnkɔ ye mane yɔnmabe na sogo dɔrɔ sizɛ ma wiin nɛ pepe, ye ɔɔn wɔn nɔma yira ye ma. ²⁸ Wɔn timi ye ɔɔn yin damanɛ ta kɔ kalanɔmanɛ wɔ.

¹ Sma bɔɔ mane tuma Zudegiamana hɔn ɔn naa Antiyose ne kia bɔ plala wɔ kala. Ye mane da ye ma: «Ka ɔɔn ma yaro Moyizi ta Tɛn yiranɔn na ga, ka sbɛ ne kisi ga.» ² Pɔle kɔ Baranabase mane maga ye domada na, a ɔɔn tɛ dakwiɛro na yire yi na ye yɔ. Ye mane bɛɛn ye na ɔn da, ye Pɔle kɔ Baranabase kɔ bɔɔ sma daga yaa Zeruzalɛmu ɔn yaa fanɛsma wɔ kɔ sɔnmlala toga n’e kìni wɔnna da wɔ nɔma na. ³ Wuro ta kɔnkma wiinye ɔɔn ti Antiyose wɔnwɔ man’e ta sogomazɔnfa pere ye ma. Ye mane dɔɔ Fenisi kɔ Samari ɔn yaa kayan ye na plala ma wiinye ɔɔn mane sizɛ ɔɔn yɔnmabe gun. Wɔn mane tɛ nihɔndiaro na yire yi na ye ma fɔrɔna. ⁴ Ye naa yaa wiri Zeruzalɛmu, Wuro ta kɔnkma wiinye ɔɔn ti wɛɛn kɔ fanɛsma wɔ kɔ sɔnmlala wɔ ɔɔn kwa ye ma fɔrɔna. Wuro mane wiinye bara ta yewɔ baraka hɔn, ye ɔɔn wɔnwɔ pepe yira. ⁵ Wɔn tɛ, wiinye Fariziyɛn ɔɔn mane yɔnmabe gun, wɔnwɔ ɔɔn bɛreda bii ɔn da, ye yɔnmabe kɔ wiinye sizɛ wɔ hɔn, ye wɔnwɔ daga yaro na ne Moyizi ta Tɛn na da ta mɛ. ⁶ Fanɛsma wɔ kɔ sɔnmlala ɔɔn yaa ye nɛmɛ kwɛ wiin fa to ye wɔnna da wɔ nɔma sege. ⁷ Dakwiɛro we ta tɛ ɔɔn mane sige, wɔn tɛ Piyɛre ɔɔn tuma bɛreda bii ɔn da: «Kià kma, ka tɔɔ da Wuro ɔɔn ne dɛ́gɛ, wɔn ɔɔn tɛ n’a bii fɔn gwerekɔ ma ka brɛ sizɛ ɔɔn fanɛdia na bɛreda mɔɔ ne ta yɔnmabe ɔɔn kɔ ye hɔn. ⁸ Wuro wiin ɔɔn sma pepe kɔrɔ hɔn da tɔɔ, a y’a Ni pere ye ma wiin sangan ma wɔkara ke ma, a ye siɛrɛ yo. ⁹ A ye kìnibɛ yɔnmabe baraka hɔn ɔn ma ke dɛ́gɛ wa ye na tintingini yɛrɛ ga. ¹⁰ A ɔɔn ma yee, wɔnnɔ ɔɔn tɛ ke tamɛ wɛlɛ ke yɛrɛ sbɛ wiinye yannɛ ta ga, ke ɔɔn ne wɔn kia dɛ na kalanɔmanɛ ma basiɛ ne Wuro do kia? ¹¹ Wɔn nii wa mɛ, ke yɛrɛ tɔɔ tian na ɔn da Matigi Yezu ta woramadiabe baraka hɔn ke kisi wɔkara yewɔ sma wɔ.» ¹² Bo wɔn ɔɔn tɛ sma pepe ɔɔn mane bɔɔ ne mɔɔ Pɔle kɔ Baranabase ta. Wuro mane wiinye tagamase kɔ wiinye kabakoda pepe ta sizɛ wɔ brɛ yewɔ baraka hɔn, ye ɔɔn wɔnwɔ pepe yira. ¹³ Ye naa waro wiin sangan ma, Zake ɔɔn bɛreda bii ɔn da: «Ka mɔɔ ne ta kià kma. ¹⁴ N’a bii gwerena Wuro boo sii dɛ́gɛ wiin dɛ́gɛnɔn na sizɛ wɔ yɔ ɔn n’a ta ye togo ma yi na, Simɔn Piyɛre wɔn nɔma dɔ yira ke ma. ¹⁵ Wɔnna da wɔ yɛrɛ kayan kɔ Wuro ta daberebɛre domada. Bare ga ye sɛbɛ Wuro domada na sɛbɛ hɔn ɔn da, ¹⁶ ye Matigi da, ye wɔn fɔnɔ wɛ timi ma, ye Davidi ta kɔɔn wiin ɔɔn webe, ye ye na bere naa n’a tɔgɔ yɛ. Ye wiin kɔankuro ɔɔn mane wɔɔ yɛ, ye ye na n’e bere n’e tɛtɛrɛ ɔn n’a bere n’a tumabɛ. ¹⁷ Ye na bii wɔnna sangan ma, ye smasɛrɛ wɔ pepe, ye ye wiinye sii wɔ pepe ta ye togo ma ye na, ye wɔnwɔ na ne yi Matigi brɛ kia ¹⁸ Matigi wiin fa yira, bo ɔɔn wɔn. A bere ma yee a y’a yirada ta mɛ n’a bii fɔn siɛ dɛrɛ ma da hɔn. ¹⁹ Wɔn ye na, sizɛ wɔ na wiinye ɔɔn ye zin bere Wuro ma, ɔn da ke ka bɔɔ da ta wiinye ɔɔn sɔɔ ye ma ga, ma dian wɔn na. ²⁰ Wɔn ye na, ka tɛ ke sɛbɛ ta n’a fanɛ ye ma ɔn yira ye ma, ye ye yɛrɛ kɔrɔse fiankankika na da na kɔ wiin kika mogo ɔɔn sɔɔ ga kɔ wiin worofa ɔɔn siri kɔ ye na too ɔnkɔ vunada na. ²¹ N’a bii siɛ dɛrɛmada hɔn, Moyizi ta Tɛn na bɛreda na yirasma ti kire pepe hɔn bare Tangantun o Tangantun ye wɔnna Tɛn wɔ na sɛbɛ kala Kalakɔan hɔn.» ²² Wɔn tɛ fanɛsma wɔ kɔ sɔnmlala kɔ Wuro ta kɔnkma wɔ pepe ɔɔn mane bɛɛn ye na ɔn da ye bɔɔ sma dɛ́gɛ ye hɔn n’e fanɛ, ye kwɛ yaa Antiyose kɔ Pɔle kɔ Baranabase. Bo mane Zuda, ye wiin wiri Barasabase ɔnkɔ Silase. Ye man’e giati ye na plala yɔ fɔrɔna. ²³ Ye man’a sɛbɛ sɛbɛ wɔ hɔn n’a pere ye ma ɔn da: «Kià kma, wiinye ɔɔn sizɛ ne ti Antiyose kɔ Siri kɔ Sisili, fanɛsma kɔ sɔnmlala kɔ ka na plala bɔ sɛbɛ fanɛ ka ma ɔn bire ka na. ²⁴ Mɛ́ mɔɔ da ye da ye mɛ́ na bɔɔ mane yaa ka kwanbɛ ɔn ka kakiri yanganmu kɔ y’a bɛreda. Sɔɔn man’e fanɛ ga. ²⁵ Mɛ́ kwɛ bɛɛn ye na ɔn sma dɛ́gɛ n’e fanɛ ka ta wiinye ɔɔn kwɛ ti kɔ Baranabase kɔ Pɔle. ²⁶ Ye wiinye kma ɔɔn ye ni katra siri na kià Matigi Yezu Krista togo ye na. ²⁷ Awale, mɛ́ Zuda kɔ Silase fanɛ ka ta wiin fa to mɛ́ bɛɛn wiin fa ma bɛɛ n’a sɛbɛ, y’a yira ka ma kɔ ye do. ²⁸ Wuro ta Ni kɔ mɛ́ bɛɛn ye ma ɔn da Tɛn na sige ye nii wɛ, mɛ́ na da tala bɔɔ dɛ ka ma ga. ²⁹ Ka ka ne sizɛ ta salakawɛkikɛ nɔma ga, ɔn ka ne too nɔma mɛ ga, ɔn ka ne kikɛsara nɔma mɛ ga, ɔn ka ne kɔ vunada hɔn mɛ ga. Ka ɔɔn kwa wɔnna da wɔ ma fɔrɔna, ka dafɔre ta. Ke ti boo kɔɔ ma.» ³⁰ Wɔnna fanɛsma wɔ naa sogo gun wiin sangan ma, ɔn yaa Antiyose ɔn yaa zamɛ wiri n’e kwɛ wiin fa to ye sɛbɛ wɔ kɔrɔ hɔn da yira ye ma. ³¹ Sɛbɛ wɔ ta kala wiin worasigi ka ye hɔn, wɔn mane tɛ nihɔndiaro na. ³² Zuda kɔ Silase wiinye ɔɔn mane tɛ daberebɛre na, wɔnwɔ mane barotɛ ɔn sangan dɛrɛ kɔ lɔgɔ n’e wora sigebɛ n’e gia tabɛ. ³³ Ye mane yin damanɛ ta yeyɛ, wɔn timi plala wɔ ɔɔn n’e yee ɔn duba ta ye ma wiin fa to wiinye kma ɔɔn n’e fanɛ, ye bere yaa wɔnwɔ gun siara hɔn. [ ³⁴ Nka Silase mane kia wɔɔ yeyɛ.] ³⁵ A ma Pɔle kɔ Baranabase han, wɔnwɔ mane wɔɔ Antiyose yɛ. Ye mane kwɛ kɔ sma na yaan ye ne sma kala ne fanɛdia yira wiinye ɔɔn Matigi domada na ye. ³⁶ Boo sangan naa wiri, Pɔle ɔɔn da Baranabase ma: «Ke Matigi domada yira yira wiinye kire wɔ hɔn, tɛ ke bere yaa yeyɛ ɔn yaa ke na plala wɔ sege, wɔn ɔɔn na tɛ ke ye tinɔn nɔma tɔɔ.» ³⁷ Ye wiin Zan we togo wiri ɔn da Mareke mɛ, Baranabase mane kia ye kwɛ yaa kɔ wɔn mɛ. ³⁸ Nka wiin sɔɔn we ɔɔn mane dɛ́gɛ ye na Panfili, ma kwɛ baratɛ kɔ lɔgɔ ga, Pɔle mane kia wɔn bere tɛ ye yakwɛta na ga. ³⁹ Ye yɔ dakwiɛro mane sige fɔn ye ɔɔn dɛ́gɛ nɛmɛ na ɔn yaa zɛzɛ. Baranabase mane kwɛ kɔ Mareke, ye ɔɔn kɔ koro hɔn, ɔn yaa Sipregiamana hɔn. ⁴⁰ A ma Pɔle han, wɔn mane Silase kwɛ ye ma, ye na plala ɔn duba ta ye ma Matigi togo na ye ɔɔn yaa. ⁴¹ Pɔle mane Sirigiamana kɔ Silisigiamana pepe yara. Wuro ta kma wiinye ɔɔn ti wɔnna wɛɛn, a ne wɔnwɔ wora sigebɛ.

¹ Pɔle naa yara yara yee, ɔn yaa wiri Dɛrebe, wɔn timi a ɔɔn fɔnɔ yaa Lisitire. Kalanɔ boo mane ti wɛɛn, ye n’a togo wiri Timote. A sie mane Ziwifu, yɔnmabe mane kɔ wiin hɔn, a tɔn ne Girɛkisi. ² A na plala wiinye ɔɔn mane ti Lisitire kɔ wiinye ɔɔn mane ti Ikɔnimu, wɔnwɔ man’a togafɔrɔ yira. ³ Pɔle mane kia yaa kɔ lege, wɔn tɛ a ɔɔn n’a foga n’a yaro Ziwifu wɔ ye na wiinye ɔɔn mane ti yeyɛ wola hɔn bare ye pepe mane tɔɔ d’a tɔn Girɛkisi. ⁴ Fanɛsma kɔ wiinye sɔnmlala ɔɔn ti Zeruzalɛmu mane bɛɛn wiin fa na, wɔn Pɔle kɔ Silase mane ɔɔn yira ye yada pepe hɔn ne kwa sma ma, ye ye kwa wɔn ɔɔn ma. ⁵ Yɔnmabe mane yire ne yaa Wuro ta kɔnkma hɔn, ye ne yaan ne yaa kɔɔ o kɔɔ. ⁶ Pɔle kɔ Silase mane yaa Firizigiamana kɔ Galate na wola ɔɔn yara bare Wuro ta Ni mane dian ye fanɛdia yira Azigiamana hɔn ga. ⁷ Ye naa yaa wiri Misigiamana tege ma wiin sangan ma, ne kia yaa Bitinigiamana hɔn nka Yezu ta Ni ma dian ga. ⁸ Wɔn tɛ ye ɔɔn dɔɔ fɔnɔ Misigiamana hɔn, ɔn zii Torowasegiamana hɔn zokɔretado hɔn. ⁹ Bo boo kɔɔ ma wuru hɔn Pɔle sɔnyangan. A mane Masedowanesɔn boo za taa, wiin ɔɔn man’a kia a ta ne kwa: «Naa Masedowanegiamana hɔn ɔn naa tɛ́ mɛ́ ma.» ¹⁰ Wɔnna sɔnyangan wɔ ye na Pɔle ta, ke mane tuma wɔnna nɔɔ tala hɔn ne yaa Masedowane bare ke man’e yɔnnɔ tɔɔ ɔn tɔɔ da Wuro ɔɔn ke wiri wiin fa to ke yaa y’a fanɛdia yira yeyɛ. ¹¹ Ke mane kɔ koro hɔn Torowase ɔn tele yaa Samɔterase wɔn timi, winnisin, ke ɔɔn yaa Neyapolise. ¹² Ke naa tuma wɛɛn ɔn yaa Filipekuru hɔn, Masedowanekma ta kiregwaga, wiin yɛrɛ ɔɔn paga Ɔrɔmukma na. Ke mane wagati zɔgɔ ta awe kuru we hɔn. ¹³ Tangantun kɔɔ ma, ke mane sa kuru we hɔn wiin fa to ke yaa wɔlo boo do ma. Ke man’a giati ɔn da ke sbɛ ne boo piri ma gun wɔnna wɛɛn we wuromɛ na. Ke naa tangan wiin sangan ma, wiinye yàra ɔɔn mane kwɛ yeyɛ, ke ɔɔn bɛre wɔnwɔ ta. ¹⁴ Ye na boo mane tiye, ye n’a togo wiri Lidi, a mane Tiyatiredalo ne zopɛnɛ zabire. A mane Wuro yirebɛ. Awe man’e yinnamalɔ ne mɔɔ fɔrɔna bare Matigi man’a kakiri bere wiin fa to a ne mɔɔ Pɔle domada na. ¹⁵ A naa batize wiin sangan ma kɔ y’a kɔnkma ɔn ke wiri ye brɛ ɔn da: «Ka debe n’a giati ɔn da ma yɔɔn Matigi ma han, ka naa vɛ ne brɛ.» A man’a sigebɛ ke ma, ke ɔɔn dian. ¹⁶ Bo boo kɔɔ ma ke mane ti ne yaa wuromɛdo hɔn, tɛrɛdalo boo ɔɔn naa ke tɛn, ziniyɔ mane ti wiin hɔn, a ne nada yira wiinye ɔɔn mane tɔnɔ na yire ye pere a wɔnnakma ma. ¹⁷ A mane dɔɔ ke ma, Pɔle kɔ mɛ́, ne sɔngɔ ne kwa: «Bɔ sma bɛ Vɔwuro ta baratɛre. Ye kisi na sogo ɔɔn yira ka ma.» ¹⁸ A mane wɔn ta yin damanɛ yɔ. Bo Pɔle woro naa ba, a ɔɔn taa ye bere ɔn da zini we ma: «Ma ye yira be ma Yezu Krista togo na ɔn da be sa be wa bo dalo be hɔn.» Wɔnna nɔɔ tala hɔn, zini we ɔɔn sa dalo we hɔn. ¹⁹ Tɛrɛdalo we wɔnnakma naa n’a za da ye ye na ne gwana gun titiri ga, ye ɔɔn Pɔle kɔ Silase foga ɔn yaa kɔ lɔgɔ dabɛredo hɔn kitisɔre brɛ. ²⁰ Ye mane yaa n’e tabɛ kitisɔre na zɛngɛnkma brɛ ɔn da: «Bɔ sma bɛ mià kuru yanganmu. Ye Ziwifu. ²¹ Mɛ́ Ɔrɔmukma daga wiinye da ta ga, mane daga dɔɔ ye ma ga, wɔnwɔ ye ɔɔn yira ke ma.» ²² Zamɛ wora mane ba ye ta. Kitisɔre na zɛngɛnkma ɔɔn da, ye y’e ta zoga wa ɔn n’e vaan kɔ gwelekamɛ. ²³ Ye naa n’e vaan n’e wɛ wiin sangan ma, n’e ka kaso hɔn ɔn da yɛreta ma, ye wɔn n’e kɔrɔse fɔrɔna. ²⁴ Ye ta tɛ ɔɔn mane da yee yɛreta we ma, wɔn tɛ wɔn ɔɔn n’e ka kasokɔn na dɛrɛ yi hɔn ɔn n’e kaɛn ka sɔ hɔn n’e sɔgɔ. ²⁵ Bo boro na pra wiin sangan ma, Pɔle kɔ Silase ne Wuroyirebɛturo sɔn, bɔ kasonɔmanɛsɛrɛ ne mɔɔ ye ta. ²⁶ Ye da ye tɔɔ, lagakɔn ɔɔn bare sma ɔn kasokɔn we du smabɛ. Kɔre wɔ pepe mane kibɛ wɔnna nɔɔ hɔn, kasonɔmanɛ wɔ pepe na pɛrɛfrɛ ɔɔn firi. ²⁷ Yɛreta we naa da ye winni, ɔn kasokɔn we na kɔre za kibɛ, ɔn n’a giati da kasonɔmanɛ wɔ sa tɔngɔn, a ɔɔn yaa kunkwinitaba wa ne kia ye yɛrɛ yɛɛ. ²⁸ Nka Pɔle ɔɔn sɔngɔ ɔn d’a ma: «Ka dayaga tala bɔɔ ta be yɛrɛ na ga, mɛ́ pepe tiye.» ²⁹ Yɛreta we ɔɔn da, ye ye naa togo pere ye ma. A mane sale kɔ kasokɔn we hɔn ne sma ɔn yaa zii yoloko Pɔle kɔ Silase wee. ³⁰ Wɔn timi a n’e sabɛ ɔn da ye ma: «Babae, wɔnnɔ ma daga ɔɔn ta ɔn sbɛ kisi?» ³¹ Ye ɔɔn d’a ma: «Yɔn Matigi Yezu ma, be na kisi kɔ bia kma pepe.» ³² Wɔn tɛ ye ɔɔn mane Matigi domada yira awe kɔ ye brɛ kma pepe ma. ³³ Wɔnna wagati we yɛrɛ ma yɛ, boro we ma, yɛreta we yaa kɔ lɔgɔ n’e ta dae waa ɔn batize wɔnna nɔɔ hɔn yɛ kɔ y’a kma pepe. ³⁴ A mane Pɔle kɔ Silase kɔbɛ ye brɛ wɔn timi ma ɔn zɔnfa pere ye ma. Ye ta tɛ ɔɔn yɔɔn Wuro ma, a mane nihɔndia wɔn na kɔ y’a kma. ³⁵ Bo kɔɔ na kiɛ, kitisɔre na zɛngɛnkma ɔɔn y’a dayinnahɔnwɛre fanɛ, ye ye yaa yira yɛreta we ma y’a sma wɔ dra. ³⁶ Yɛreta we mane wɔnna da wɔ yira Pɔle ma ɔn da: «Kitisɔre na zɛngɛnkma fanɛ da ye naa yira ne ma, ye ma ka dra. Wɔn ye na, ka sa ɔn yaa siara hɔn.» ³⁷ Nka Pɔle ɔɔn da ye ma: «Mɛ́ wiinye kma ɔɔn Ɔrɔmukma, ye ke foga ke vaan sma yɔnnɔ na, zarakedo mane ti ke na ga, ɔn ke ka kaso hɔn, basiɛ ye naa ne ke yɔle ne ke sabɛ ra? Wɔn sbɛ ne tɛ ga. Tɛ yewɔ yɛrɛ naa ke sabɛ.» ³⁸ Dayinnahɔnwɛre wɔ yaa wɔn yira kitisɔre na zɛngɛnkma ma wiin sangan ma, ye ɔɔn tɔɔ da ye ye Ɔrɔmukma, ye gia ɔɔn tuma fɔrɔna. ³⁹ Ye na yafa kia ye ta, n’e sabɛ n’a kia ye ta, ye ye sa kuru we hɔn. ⁴⁰ Pɔle kɔ Silase sa wɛ timi kaso hɔn, ɔn yaa Lidi kɔ bɔɔ plalasɛrɛ wɔ gun ɔn n’e wora sigebɛ ɔn sbɛ ne yaa.

¹ Pɔle kɔ Silase naa dɔɔ Anfipolise kɔ Apolini ɔn fɔnɔ yaa wiri Tesalonike, Ziwifu ta Kalakɔn mane ti wiin wɛɛn. ² Pɔle mane yaa n’e gun wɔkara a mane daro ne tɛ wiin nɛ ɔn Tangantun saa ta kɔ lɔgɔ ne Wuro domada na sɛbɛ yira ye ma. ³ A man’a yira n’a dɔrɔ ye ma ɔn da Wuro ta Dɛ́gɛwɛta mane daga yannɛ ɔn siri, wɔn timi a winnisa sara yɔ. A mane kwa ye ma: «Ma wiin Yezu we da yira ka ma, awe ɔɔn Wuro ta Dɛ́gɛwɛta we.» ⁴ Bɔɔ Ziwifu man’e yɛrɛ to Pɔle kɔ Silase ɔɔn sbɛ ye ta ɔnkɔ bɔɔ Girɛki na yaan ye mɛ wiinye ɔɔn mane Wuro yirebɛ ɔnkɔ bɔɔ zɛngɛnkmayàra na yaan ye mɛ. ⁵ Nka Ziwifu wora mane ba, ye ɔɔn yaa smakuro bɔɔ kia wiinye ɔɔn mane yara ne fɔnɔ wisoga hɔn, ɔn sma gwangwanabɛ ɔn yanganmu ka kuru we hɔn. Ye mane tuma yaa Zasɔn brɛ ne Pɔle kɔ Silase kia figɛ na wiin fa to ye yaa kɔ lɔgɔ n’e kiti zamɛ yɔnnɔ na. ⁶ Ye ta tɛ ɔɔn ma yaa n’e za ga, ye ɔɔn Zasɔn kɔ bɔɔ plala foga ɔn yaa kɔ wɔnwɔ kirevɔre brɛ ne sɔngɔ ne kwa: «Wiinye kma wɔ ɔɔn yanganmu ka bii pepe hɔn, ye naa bɛɛ basiɛ, Zasɔn ɔɔn vɛdo pere ye ma. ⁷ Fanganma wiin fa yira, yewɔ sma wɔ na sɔɔn sii dian ne wɔn ta ga, ne yira ne kwa, ye boo fanganmaza tiye wiin ɔɔn Yezu.» ⁸ Wɔnna sɔngɔre we mane zamɛ kɔ kirevɔre wora ba, ⁹ ye ɔɔn sɔgɔre dɛ Zasɔn kɔ bɔ sɛrɛ wɔ ma dɛn ɔn da ye wɔn sara ɔn sbɛ ye yɛrɛ gun. ¹⁰ Bo wuru naa ba wiin sangan ma kià kma ɔɔn Pɔle kɔ Silase yabɛ Berekuru hɔn. Ye wiri wɛɛn wiin sangan ma, ɔn yaa kɔ Ziwifu ta Kalakɔn hɔn. ¹¹ Wɔnwɔ ta tɛ ɔɔn mane sɔnfigɛ yi Tesalonikekma ma, ye mane mɔɔ Wuro domada na fɔrɔna kɔ kɔrɔhɔnkìni. Kɔɔ o kɔɔ ye mane Wuro domada na sɛbɛ kia n’e sege, a ɔɔn ma yee ye ti tian na. ¹² Ye na yaan ye mane yɔnmabe gun kɔ Girɛkiyàra na smayeye kɔ nimisini na yaan ye mɛ fɔrɔna. ¹³ Nka Tesalonikekuru hɔn Ziwifu naa mɔɔ wiin sangan ma ye da Pɔle ti Berekuru hɔn ne Wuro domada yira, ye ɔɔn tuma yaa wɛɛn mɛ wiin fa to ye sma gwangwanabɛ ɔn yanganmu ka zamɛ yɔ. ¹⁴ Wɔn tɛ plala wɔ ɔɔn ma yɛ́rɛ titiri ga ɔn tuma Pɔle foga yaa kɔ lege wiin fa to a sbɛ wiri yɛngɛnzu brɛ. Silase kɔ Timote mane wɔɔ yeyɛ. ¹⁵ Wiinye kma ɔɔn mane yaa kɔ Pɔle, ye mane yaa wiri fɔn Atɛne ɔn sbɛ ne bere ne naa. A mane da ye ma, ye ye tɛ ye yira Silase kɔ Timote ma, ye ye sale naa ye gun. ¹⁶ Pɔle na tisangan ma Atɛnekuru hɔn ne Silase kɔ Timote yɛ́rɛ, wɔnna kuru we ta tɛ ɔɔn mane paga fian na, wɔn man’a ninaban fɔrɔna. ¹⁷ Bo wɔn ɔɔn tɛ a ɔɔn mane barotɛ kɔ Ziwifu wɔ Kalakɔn hɔn kɔ wiinye kma ɔɔn Wuro yirebɛ ɔnkɔ wiinye kma pepe ɔɔn mane naa kuru na dayinnahɔnwɛdo hɔn kɔɔ pepe ma mɛ. ¹⁸ Kakirikma bɔɔ mane tiye, ye n’e na bɔɔ wiri Epikurikma ne bɔɔ wiri Setoyisikma. Wɔnna kakirikma wɔ na bɔɔ mane barotɛ kɔ Pɔle. Bɔɔ ne kwa: «Bo wuwulukwata be da wɔnnɔ yɛrɛ ha?» Bɔɔ ne kwa mɛ: «A daga ne boo wurosogowun na da ɔɔn yira n’e tigɛ kiɔ.» Bare Pɔle mane Yezu ta da ɔnkɔ sara ta winnisada ɔɔn yira. ¹⁹ Wɔn tɛ ye ɔɔn mane Pɔle foga ɔn yaa kɔ lege tolalowɔnmakitisɔre brɛ ɔn n’a toga d’a ma: «Be ti ne wiin kala na wun yi be ta, be sbɛ n’a nɔma yira n’a kìni ke ma ra? ²⁰ Tian na, be ke tra ba kɔ bɛreda, ke wiinye kɔrɔ tɔɔ ga. Wɔn ye na, ke kia be ye kɔrɔ yira n’e kìni ke ma.» ²¹ Tian na, Atɛnekma pepe kɔ wiinye samara pepe ɔɔn mane tangan awe kuru we hɔn, ye mane y’a wagati pepe na yaan yi ta dawun na yira hɔn wɛlɛ dawun na mɔɔ ɔɔn hɔn. ²² Wɔn ɔɔn tɛ Pɔle ɔɔn mane tuma taa tolalowɔnmakitisɔre wɔ woro hɔn ɔn bɛreda bii ɔn da: «Atɛnekma mɛ kɔnɛ n’a kɔrɔse n’a za da ka pepe wurosogo na yasma k’a tɛda pepe hɔn. ²³ Ma tɛ ne yara k’a wisoga hɔn, ma ne k’a kanda na frɛ za. Ma yɛrɛ salakawɛdo boo za mɛ sɛbɛda bɔɔ ne ti a ma, ye Ke wiin bafa tɔɔ ga. Wɔn kɔrɔ ka wiin fa we yirebɛ ɔn man’a dɛ́gɛ tɔɔ ga, wɔn nɔma yira na ma naa ka ma. ²⁴ Wuro wiin ɔɔn diniyan kɔ ye hɔn frɛ pepe dan, awe wiin ɔɔn wurokɔn kɔ lagakɔn na te, a tangan sma ta tɔgekɔan hɔn ga. ²⁵ A kia sma bara ta ye ma kɔ ye sra wɔkara boo fa hɔn a mako sa ga. Awe ɔɔn ni kɔ bɔ frɛsɛrɛ pepe pere sma pepe ma. ²⁶ A sii pepe sabɛ sɔnnala hɔn wiin fa to ye ne ti lagakɔn pepe ma. A wura tigɛ ye ma ye ta da na ɔn tege wa ye ma ye ta tanganda na wola na. ²⁷ A wɔn ta ye ma wiin fa to ye Wuro brɛ kia. Be ma farase ga, ye na ye to lɔgelɔge hɔn ɔn n’a za, awe wiin brɛ ɔɔn dɛrɛ ke na sɔɔn sii na ga. ²⁸ Bare awe baraka hɔn ke ti ni na, ɔn ne berebere ne gun ɔn ne tiye wɔkara k’a dakalayirasma n’e yira wiin nɛ. Bare ke yɛrɛ n’a nɔmanɛ. ²⁹ Awale ke debe ma Wuro nɔmanɛ han, wɔn ye na, ke daga n’a giati ɔn da Wurobe ti wɔkara sanɔ wɛlɛ gwana wɛlɛ kɔrɔyinni ga wɛlɛ fa na tɛtɛrɛfɔrɔ yi ga wɛlɛ sɔɔn ta giatɛ mɛ ga. ³⁰ Awale wiin tɔbareyafa ɔɔn mane ti sma hɔn n’a bii fɔn sangan dɛrɛ, Wuro wɔn giati ga nka a a kia ye pepe ta basiɛ ye ti wiin wɛɛn pepe, ye m’a ye zugo katra. ³¹ Tian na, a boo kɔɔ tigɛ, a na diniyan hɔn kma pepe kiti wiin ma telebe hɔn, y’a dɛ́gɛwɛta baraka hɔn wɔkara a ye dɔrɔ n’e tigɛ sma pepe ma wiin nɛ wiin sangan ma. A wɔnna dɛ́gɛwɛta we winni n’a sabɛ sara yɔ.» ³² Pɔle sara ta winnida yira wiin sangan ma, bɔɔ man’a zi, bɔɔ ne kwa: «Ke na naa mɔɔ be ta kɔza ma.» ³³ Ye tɛ yee, Pɔle ɔɔn n’e za n’e to. ³⁴ Nka bɔɔ mane dɔɔ a domada ma ɔn tɛ yɔnmasma na. Wɔnna sma wɔ hɔn, tolalowɔnmakitisɔta Deni nii mane ti kɔ ya boo, ye mane wiin togo wiri Damarisi ɔnkɔ bɔɔ smazɛ yɛ mɛ.

¹ Pɔle naa tuma Atɛne ɔn yaa Korɛntekuru hɔn. ² A mane yaa kayan Ziwifu boo ma yeyɛ wiin ɔɔn mane Pɔnsɔn, ye n’a togo wiri Akilase. Wɔnna sɔɔn we mane dɔ tuma Italigiamana hɔn kɔ y’a ya Pirisile bare Ɔrɔmukuru wɔnnate Kulode man’a yira n’a dɔrɔ ɔn da Ziwifu pepe daga tuma Ɔrɔmukuru hɔn. Pɔle mane yaa n’e gun, ³ ye pepe ta tɛ ɔɔn mane kwɛ ne baradogo tala na tɛsma, wɔn tɛ Pɔle ɔɔn mane wɔɔ ye brɛ ne baratɛ yeyɛ. ⁴ Tangantun o Tangantun, Pɔle mane bɛreda bii Kalakɔn hɔn wiin fa to a sbɛ Ziwifu kɔ Girɛkisi ka tian na sogo hɔn. ⁵ Nka Silase kɔ Timote naa tuma Masedowane ɔn naa wiin sangan ma, wɔnna sangan ma Pɔle wɔɔ Wuro domada na yirabara ɔɔn dama hɔn n’a yira n’a dɔrɔ Ziwifu ma, ye Yezu ɔɔn Wuro ta Dɛ́gɛwɛta. ⁶ Ye ta dakwiɛro kɔ ye ta vini mane Pɔle ta a ɔɔn y’a zoga sɛnsɛnɛ ɔn da ye ma: «K’a yagada tɛ ye wɔɔ ka wɔɔn hɔn yɛ. Mɛ nii ti ye hɔn ga. Sma ɔɔn naa fɔnɔ a hɔn, sizɛ brɛ ma na yaa.» ⁷ A naa tuma wɛɛn, ɔn yaa sɔɔn boo brɛ wiin ɔɔn mane Wuro yirebɛ, ye n’a togo wiri Titiyuse Zusetuse. Wɔnna sɔɔn we ta kɔɔn mane ti Kalakɔn brɛ. ⁸ Kirisipuse wiin ɔɔn mane Kalakɔn wɔnnate, wɔn kɔ y’a kɔnkma pepe kɔ Korɛntekma na yaan ye mane mɔɔ Pɔle ta ne yɔnmabe gun ne batize. ⁹ Bo boo kɔɔ ma wuru hɔn Matigi ɔɔn da Pɔle ma sɔnyangan hɔn: «Ka kwan ga, ne bɛre suu, ka saa ga. ¹⁰ Mɛ ti kɔ be nɛmɛ, sɔɔn sii mane na ye soro dɛ be ma ɔn da ye be yannɛ mɛ ga bare sma na yaan ye ti bo kuru be hɔn wiinye ɔɔn na dɔɔ ne ma.» ¹¹ Pɔle mane wɔɔ yeyɛ dɔɔ tala ne yɛgɛ konala ne sma kala ne Wuro domada yira ye ma. ¹² Galiyɔn ta sin hɔn Akayigiamana wɔɔn na, Ziwifu pepe mane tuma ye nɛmɛ kwɛ Pɔle ye na ɔn n’a foga yaa kɔ lege kitisɔdo hɔn ¹³ ɔn yaa ne kwa: «Wiin Wuroyirebɛ ɔɔn yaa ne kɔ kià Tɛn ga, wɔn hɔn bo sɔɔn be ti ne sma kia kiɛ na.» ¹⁴ Pɔle mane kia bɛreda bii, ye da ye tɔɔ Galiyɔn ɔɔn da Ziwifu ma: «Ziwifu, ye m’a tɛ bɔɔ sɔnyɛda wɛlɛ bɔɔ dayaga ye na, ma mane na mɔɔ ka ta. ¹⁵ Nka k’a birisi ta tɛ ɔɔn ma kalada kɔ togada kɔ Tɛn na da wiinye ɔɔn k’a da, wɔn ki yɛrɛ ta da yo. Mɛ kia tɛ wɔnna dasie bɛ nɛmɛ na kiti na sɔta na ga.» ¹⁶ A n’e laga n’e sabɛ kitisɔdo hɔn. ¹⁷ Wɔn hɔn ye pepe ɔɔn kwɛ Sɔsetɛne ma wiin ɔɔn mane Kalakɔn wɔnnate ɔn n’a foga ɔn n’a vuro kitisɔdo zin hɔn yɛ. Nka Galiyɔn mako mane ti wɔn hɔn ga. ¹⁸ Pɔle man’e bere wɔɔ Korɛntekuru hɔn yɛ ɔn sangan dɛrɛ. Wɔn timi, a ɔɔn tuma plala wɔ brɛ ɔn yaa kɔ koro hɔn wiin fa to a yaa Siri. A mane ti kɔ Pirisile kɔ Akilase. A man’e wɔɔn sɛn Sankire y’a dosɔ boo ye na. ¹⁹ Ye mane yaa wiri Efɛsekuru hɔn, Pɔle ɔɔn dɛ́gɛ ye yakwɛre na. Awe Pɔle mane yaa kɔ Kalakɔn hɔn ɔn barotɛ kɔ Ziwifu. ²⁰ Wɔnwɔ mane d’a ma, y’a yin pla ta ye brɛ, a ma dian ga. ²¹ Nka sanɛ a da ye yaa, a mane da ye ma: «Wuro ɔɔn dian ye na, ma na bere naa ka brɛ kɔza ma.» A mane kɔ koro hɔn Efɛsekuru hɔn ɔn yaa. ²² A yaa zii Sezarekuru hɔn, ɔn fɔnɔ yaa bire Wuro ta kɔnkma na wiinye ɔɔn ti Zeruzalɛmukuru hɔn ɔn fɔnɔ yaa Antiyosekuru hɔn. ²³ A yaa wiri wɛɛn, ɔn wagati zɔgɔ ta. Wɔn timi a ɔɔn sogo bii ɔn yaa Galategiamana kɔ Firizigiamana yara ne kalanɔmanɛ wora sigebɛ. ²⁴ Ziwifu boo wiin ɔɔn mane Alɛkisandiresɔn, ye n’a togo wiri Apolɔse, wɔn mane naa wiri Efɛsekuru hɔn. A mane datɔta ne Wuro domada na sɛbɛ kɔrɔ tɔɔ mɛ fɔrɔna. ²⁵ A mane Matigi ta sogo na da tɔɔ ɔn ne sma kala kɔ Yezu ta da fɔrɔna. Nka a ta kala tege mane taa Zan batizeta ɔɔn ma yee dama. ²⁶ A mane kɔ Kalakɔn hɔn ne bɛre kɔ yɔnmabe. Nka Pirisile kɔ Akilase naa n’a domada mɔɔ wiin sangan ma, ɔn n’a foga ɔn Wuro ta sogo dɔrɔ n’a kìni a ma. ²⁷ A ta tɛ ɔɔn mane kia yaa Akayi, wɔn mane dia plala wɔ ma, ye ɔɔn sɛbɛ ta n’a fanɛ kalanɔmanɛ wɔ ma wiin fa to wɔnwɔ n’a foga n’a fɔrɔ. A naa yaa wiri yeyɛ wiin sangan ma, wiinye kma ɔɔn mane tɛ yɔnmasma na Wuro ta woramadiabe baraka hɔn, a mane wɔnwɔ diɛma fɔrɔna ²⁸ bare a ta bɛreda hɔn a mane sbɛ Ziwifu wɔ ta dabɛredo hɔn wiin sangan ma, a mane maga ye ta yira ye na, a man’a yira n’a dɔrɔ Wuro domada na sɛbɛ baraka hɔn ɔn da, ye Yezu ɔɔn Wuro ta Dɛ́gɛwɛta.

¹ Apolɔse na tisangan ma Korɛnte Pɔle mane dɔɔ giamana na tola hɔn piri ma ɔn naa wiri Efɛse. A mane bɔɔ kalanɔmanɛ gun yeyɛ ² ɔn n’e toga ɔn da ye ma: «Ka yɔnmabe gun wiin sangan ma, ka mane Wuro ta Ni gun ra?» Wɔnwɔ ɔɔn d’a ma: «Mɛ yɛrɛ wɔnna Ni we ta da na bɛreda mɔɔ n’e za mɔ?» ³ Pɔle ɔɔn da ye ma: «Wee batize ki ɔɔn gun ɔɔn?» Ye ɔɔn da: «Zan yi.» ⁴ Pɔle ɔɔn ye bere da ye ma: «Zan mane zugokatra na batize ɔɔn ta n’a yira n’a dɔrɔ sma ma, ye wiin te ɔɔn na naa yi timi, ye ye yɔɔn wɔnna te ɔɔn ma, wɔn kɔrɔ Yezu.» ⁵ Ye ɔɔn mɔɔ a ta ɔn batize Matigi Yezu togo na. ⁶ Pɔle ɔɔn ye sra dɛ ye ma, Wuro ta Ni ɔɔn zii ye ma. Ye mane bɛre sidazɛ hɔn ne Wuro ta fanɛ yira. ⁷ Ye pepe na kwɛ yi mane sma funpla nɛmɛ wa. ⁸ Pɔle mane tɛ ne yaa Kalakɔn hɔn. Yɛgɛ saa yɔ, a mane bɛreda bii yɔnmabe hɔn ne Wuro ta kolo na da yira wiin fa to a tian yira ye na mɔsma ma. ⁹ Bɔɔ ta tɛ ɔɔn man’e wora sige, mane dian tian na ga, ne Wuro ta sogo na wu wa zamɛ woro hɔn. Wɔn tɛ Pɔle ɔɔn man’e za n’e to ɔn kalanɔmanɛ wɔ foga ye sana ne barotɛ kɔ lɔgɔ kɔɔ pepe ma Tiranuse ta kalado hɔn. ¹⁰ A mane dɔgɔ pla ta wɔn hɔn fɔn Azikma pepe wiinye ɔɔn Ziwifu kɔ wiinye ɔɔn Girɛkisi wɔnwɔ pepe ɔɔn Matigi domada mɔɔ. ¹¹ Wuro mane kabakoda na yire ye ta Pɔle baraka hɔn. ¹² Ye tɛ yee, a ta baratɛzoga wɛlɛ wiinye labanɔma ɔɔn mane tɛ ne le a ma, ye ne wɔnwɔ bii ɔn yaa n’e dɛ bagaparesma ma. Wɔnwɔ ta bu mane wɛ ye hɔn, ziniyaga ne sa zinifigɛsma hɔn. ¹³ Wiinye Ziwifu ɔɔn mane tangan bii tala hɔn ga, ne ziniyaga laga n’e wa sma hɔn, wɔnwɔ mane da ye tɛ ye ne Matigi Yezu ɔɔn togo yira n’a sege. Bo wɔn ɔɔn tɛ ye ɔɔn mane yira ne kwa: «Ma ye yira ka ma Yezu togo ye na Pɔle wiin da yira ɔn da ka sa.» ¹⁴ Ziwifu ta salakawɛvɔ boo ye mane wiin togo wiri Seva, wɔn nɔmanɛ sma kopra mane wɔnna da wɔ nɛmɛ ta n’e sege. ¹⁵ Ziniyɔ we mane taa fangan ma ɔn da ye ma: «Ma Yezu tɔɔ, ɔn ne Pɔle tɔɔ mɛ. Nka ki kɔkma?» ¹⁶ Ziniyɔ mane ti wiin sɔɔn we hɔn, a ɔɔn bɛrɛ yewɔ nimisala wɔ ma ɔn sbɛ ye pepe ta fɔrɔna, ye ɔɔn tɔngɔn sa kɔɔn we hɔn ye ta zoga ne barabara ye koma pepe ne dae. ¹⁷ Efɛsekma pepe Ziwifu kwɛ Girɛki mane wɔnna da wɔ na bɛreda mɔɔ, kuun n’e pepe foga, ye ne Matigi Yezu togo yirebɛ. ¹⁸ Yɔnmabe mane kɔ wiinye kma hɔn, ye mane naa ne y’a gweretɛdayaga yira sma pepe yɔnnɔ na. ¹⁹ Kiɔnɔbɛ na yaan ye mane naa kɔ y’a sɛbɛ ɔn naa n’e kwɛ n’e wunna sma yɔnnɔ na. Ye naa n’e na kayan ta, ɔn n’a za da ye gwanafuro sana kieplafun (50,000) na ye mane ti ye hɔn. ²⁰ Ye tɛ yee Matigi ta sebe baraka hɔn, Wuro domada mane zin gun ne yaa ne sebe gun ne yaa mɛ. ²¹ Wɔnna da wɔ fɔnɔ wɛ timi ma, Pɔle naa giati n’a za da ye daga dɔɔ Masedowane kɔ Akayi ɔn yaa Zeruzalɛmu. Bo wɔn ɔɔn tɛ a ɔɔn mane yira ne kwa: «Ma ɔɔn naa wiri yeyɛ, fɔn ma fɔnɔ yaa Ɔrɔmu mɛ.» ²² A man’e timikma na sma pla fanɛ Masedowane. Wɔn mane Timote kɔ Erasite. Awe yɛrɛ ɔɔn wɔɔ Azi ɔn yin damanɛ ta wɛɛn yɛ. ²³ Bo wɔnna wagati we ma yanganmu na yire ye mane tuma wurosogo ma da ye na. ²⁴ Sanɔtɛtɛrɛta boo mane tiye, ye n’a togo wiri Demetiriyuse. Awe sɔɔn we man’e ta fiɔn boo na munɔma tɛtɛrɛ kɔ fiɔn we ta kɔɔn hɔn gwana. Ye mane wɔnna fiɔn we togo wiri Aratemise. Ye tɛ yee, wɔn mane tɛ sababu frɛtɛtɛrɛsma ne gwana gun fɔrɔna. ²⁵ Awe sɔɔn we mane wɔnna frɛtɛtɛrɛsma wɔ wiri n’e kwɛ kɔ bɔ srahɔnbaratɛresɛrɛ ɔn da ye ma: «Kià kma, ka tɔɔ da bɔ bara bɛ hɔn ke kià dangamu gun. ²⁶ Awale dɔra ka ye kɔrɔse n’e za wɛlɛ ka yɛrɛ n’e mɔɔ ɔn tɔɔ da ye yɛrɛ Efɛse dama ga nka Azigiamana na fangan pepe hɔn wɔnna Pɔletogote we sma na yaan ye kakiri bere ne yira ne kwa ye ma, ye ke wiinye bafrɛ wɔ tɛtɛrɛ, ye ye siɛbɛfrɛ ga. ²⁷ Ye tɛ wɔkara kià bara dama na wu ɔɔn na wɛ sma na ga rɛ nka kià bafagwaga Aretemise yɛrɛ na wu na wɛ sma na mɛ, y’a za n’a to wiin yirebe ɔɔn ti a ma, Azikma pepe n’a kan, wɔnna yirebe we na bɛrɛ.» ²⁸ Wɔn ta yira na, a na mɔsma wora ɔɔn ba fɔrɔna, ye ne sɔngɔ ne kwa: «Ebe, Efɛsekma ta bafagwaga Aretemise yire fɔnɔ!» ²⁹ Sɔngɔro we mane kirekma wɔ pepe tumabɛ, ye ɔɔn yiri yaa ye ta wobi hɔn. Ye na yasangan ma, ye mane Pɔle yakwɛre Masedowanekma sma pla bɔɔ foga yaa kɔ lɔgɔ mɛ. Bo mane Gayuse, bo ma Arisitarake. ³⁰ Pɔle mane kia yaa zamɛ wɔ brɛ nka kalanɔmanɛ ma dian n’a to a yaa ga. ³¹ Mara we hɔn dayinnahɔnwɛre na bɔɔ wiinye ɔɔn n’awe Pɔle mare, wɔnwɔ mane fanɛ yaa yira a ma mɛ, y’a diande, y’a ka da ye naa yeyɛ ga. ³² Zamɛ pepe mane kwɛ ne sɔngɔ fian yee, yaan ye yɛrɛ ma tɔɔ da wiin wɔɔn na ye ye nɛmɛ kwɛ ga. ³³ Bɔɔ sma mane da wɔ wɔɔn yira Alɛkisandiretogote boo ma, Ziwifu mane wiin dɛ́gɛ n’a ta zɛngɛnte na. A ɔɔn ye soro ta ɔn yanmɛ yira zamɛ ma, ye ye kia bɛre ye ta. ³⁴ Nka ye tɔɔ d’a Ziwifu wiin sangan ma, ye mane lɛrɛ pla nɛmɛ ta ne kwɛ ne sɔngɔ fɔrɔna ne kwa: «Efɛsekma ta fiɔngwaga Aretemise yire fɔnɔ!» ³⁵ Hali kɔ wɔn dayinnahɔnwɛta we mane naa sbɛ zamɛ woromakunabɛ ɔn da ye ma: «Efɛsekma, sɔɔn tiye wiin ɔɔn tɔɔ da Efɛsekuru Aretemisegwaga ta kiregwaga ga ra? Sɔɔn tiye wiin ɔɔn tɔɔ da wuro hɔn a na tagamase tuma ɔn zii ga ra? ³⁶ Awale wɔɔn ta tɛ ɔɔn mane ti wɔnna togaro we na ga, ka ka yinnamalɔ ɔn ka tɛ sɔɔn ka ka dakuro hɔn ga. ³⁷ Ka sma foga naa kɔ lɔgɔ bɛɛ wiinye ɔɔn dayaga ta ga, ma kia bafa togo yaga mɛ ga. ³⁸ Bɔɔ da ɔɔn kɔ Demetiriyuse kɔ srahɔnbaratɛre kɔ boo sɔɔn yɔ, kitisɔdo tiye, kitisɔre ne tiye mɛ. Wɛɛn ye daga yaa kɔ y’a da. ³⁹ Wɔn nii wa, daza ɔɔn ne tiye ka wiinye kia, wɔn sbɛ ne yinnahɔnwɛ nɛmɛ kwɛsangan ma. ⁴⁰ Ka ma farase ga, ke wiin nɛmɛ kwɛ be ta sma o, ke sbɛ ne zarakedo gun a na ɔn da, ye ke gwangwana ɔɔn. Bare ga wɔɔn tala boo zɛ a na, ke sbɛ ne wiin yira ɔn ke yɛrɛ wa ga.» ⁴¹ Wɔnna domada wɔ yira wɛ timi ma, a ɔɔn sogo pere zamɛ ma, ye ye bige.

¹ Bo sɔngɔro we naa kuna, Pɔle ɔɔn kalanɔmanɛ wɔ wiri ɔn n’e wora sigebɛ, wɔn timi a ɔɔn tangandia yira ye ma ɔn Masedowanesogo bii. ² A naa yaa wɔɔ kɔ ye na plala, ɔn sangan dɛrɛ n’e wora sigebɛ, ɔn n’eyɛ wola yaa n’e sɛlɛ, ɔn yaa wiri Girɛkigiamana hɔn. ³ A yaa wiri wɛɛn ɔn yɛgɛ saa ta. A mane daga kɔ koro hɔn wiin sangan ma ɔn yaa Sirigiamana hɔn, ɔn n’a za da Ziwifu ti ne du flɛ ye na, ɔn da, ye ye daga bere yaa dɔɔ Masedowane yɛ. ⁴ Beresɔn Piruse nɔ Sopatɔrɔse kɔ Arisitarake kɔ Tesalonikesɔn Sekunduse kɔ Dɛrebesɔn Gayuse kɔ Timote kɔ Tisike kɔ Tirofime wiin ɔɔn mane Azigiamana hɔn sɔɔn, wɔnwɔ ɔɔn man’a yakwɛre. ⁵ Wɔnna sma wɔ ta tɛ ɔɔn mane sige ke zin, ye mane yaa ke yɛ́rɛ Torowasekuru hɔn. ⁶ A ma mɛ́ han, Kwindiekiɛbareyaburo na kɔre fɔnɔ wɛ timi ma, ke mane kɔ koro hɔn ɔn dɔɔ ye ma. Yin koo wɔn timi, ke ɔɔn yaa n’e gun Torowasekuru hɔn, koro mane taa kɔ ke nɛmɛ wiin wɛɛn tun tala yɔ. ⁷ Bo Sibiri kɔɔ lii ma, ke naa kwɛ wiin fa to ke buru dini, Pɔle wiin ɔɔn mane daga yaa winnisin, a mane barotɛ kɔ ke na plala. Ye mane barotɛ fɔn yaa boro pra. ⁸ Ke mane kwɛ wiin zangan hɔn, fintinɛ mane ti yeyɛ. ⁹ Yɛlɛnɛmɛ boo mane tiye, ye n’a togo wiri Etike. A mane tangan finɛtire hɔn ɔn yin. Pɔle ta baro ta tɛ ɔɔn ma mane wɛ ga, nɛmɛ we ɔɔn wɛ zangan saaro we na finɛtire hɔn yin ta ɔn bɛrɛ lɔ ma. Ke da ke zii ne yaa n’a tumabɛ, a ne siri. ¹⁰ Wɔn tɛ Pɔle ɔɔn zii yaa zii yoloko a wɔɔn hɔn, n’a foga, ɔn da: «Ka ka ka kakiri yanganmu ga, a ti ni na yɛ.» ¹¹ Pɔle naa ye bere ba, ɔn buru dini ɔn ye bere baro bii yɛ mɛ fɔn yaa kɔɔ kiɛ, wɔn timi a ɔɔn ne sbɛ ne yaa. ¹² A ma nɛmɛ we han, ye mane yaa kɔ a na sugu yi. Wɔn mane tɛ zigitugu na yire yi. ¹³ Mɛ mane sige ye zin ɔn kɔ boo koro hɔn ɔn yaa Asɔse, ke mane daga yaa Pɔle gun wiin wɛɛn bare a mane yaa kaɛn ma wɔkara a man’e yira wiin nɛ. ¹⁴ A naa ke gun Asɔse, ke ɔɔn n’a bii koro hɔn ɔn yaa Mitilɛnekuru hɔn. ¹⁵ Ke naa tuma wɛɛn winnisin kikima, ɔn koro bii ɔn yaa fɔn yaa wiri Siyokuru na kayan na. Wɔn na winnisin, ke ɔɔn dɔɔ fɔnɔ Samɔsekuru hɔn, sin tala wɔn timi, ke ɔɔn yaa dɔɔ Torogiliyɔn, ɔn yaa wiri Milɛkuru hɔn. ¹⁶ Efɛsekuru hɔn dɔɔ mane dia Pɔle ma ga bare a mane kia wagati na zana yi ta Azigiamana hɔn ga. Giatɛ tala dama ɔɔn man’a salesalebɛ. A mane kia Pantekɔte na kɔɔ wiri ye gun Zeruzalɛmukuru hɔn. ¹⁷ Pɔle man’e to Milɛ ɔn fanɛ Wuro ta kɔnkma na zɛngɛnkma ta Efɛse. ¹⁸ Ye naa n’a gun wiin sangan ma, a ɔɔn da ye ma: «N’a bii ne naa ma da hɔn Azigiamana hɔn, ma mane figɛ wiin nɛ kɔ ka nɛmɛ, ka yɛrɛ wɔn nɔma tɔɔ. ¹⁹ Ma mane bara ta Matigi ma kɔ yɛrɛmazibɛ yannɛ hɔn kɔ ninabannɔ hɔn Ziwifu ta du do ma, ye mane wiinye flɛ ne na. ²⁰ Wiin fa pepe ɔɔn mane ka mako na fɔrɔ yi, ma mane koko wɔn ta da na ga. Ma yɛrɛ mane Wuro domada yira, ɔn ne ka kala gwendege na kɔ ki yɛrɛ na tisangan ma ka sana mɛ. ²¹ Ma mane yira Ziwifu kɔ Girɛkisi ma da ye ye zugo katra ɔn dɔɔ Wuro ma ɔn yɔɔn kià Matigi Yezu Krista ma. ²² Awale bo basiɛ ma ti ne yaa Zeruzalɛmu. Wuro ta Ni ta fangan do ma ɔɔn ma tɔɔ da wiin fa ɔɔn na yaa tɛ ne ne yeyɛ ga. ²³ Nka Wuro ta Ni yɛrɛ n’e nɔma dɔrɔ ne ma kire wɔ pepe hɔn ma dɔɔ wiin wɛɛn ɔn da, ye pɛrɛfrɛ kɔ ninabannɔ ɔɔn na yaa ne gun yeyɛ. ²⁴ Yɛrɛ giati mɛ ne ni ta da foyi ne yinna hɔn ga. Wiin fa ɔɔn sige ne ma, wɔn ma sbɛ n’a bara ta fɔn ye tege na, Matigi Yezu wiinye bara kalfa ne ma wɔn fanɛdia Wuro ta woramadiabe na siɛrɛbe, ma sbɛ wɔn do paga. ²⁵ Ma ye yɔnnɔ tɔɔ ɔn tɔɔ da ma mane dɔɔ fɔnɔ ki wiinye kma pepe brɛ ne Wuro ta kolo na da yira, sma ɔɔn naa fɔnɔ a hɔn, ka na sɔɔn na ne za titiri ga. ²⁶ Wɔn ye na ma sbɛ n’a yira n’a dɔrɔ ka yɔnnɔ na bɛɛ sma ɔn da ne nii ti sɔnnala boo ta fire hɔn ga. ²⁷ Tian na, ma wɔnwɛ foyi tala boo hɔn ga Wuro ta da pepe na kwɛ yi ma ɔɔn yira ka ma. ²⁸ Ka ka yɛrɛ kɔrɔse. Wuro ta Ni ka ta wiinye worofrɛkuru wɔ na nɛsma na, ka kwa ye ma. Wuro ta kɔnkma, a wiinye kma wɔ ta y’e na ye yɛrɛ too baraka hɔn, ka tɛ ye na yɛresma na. ²⁹ Ma yɛrɛ n’e yɔnnɔ tɔɔ tian na ɔn tɔɔ da ne yaa wɛ timi ma, sanmilele na ba ye na kɔ ka yɔ wiinye ɔɔn na siɛ worofrɛ wɔ na foyi ma ga. ³⁰ Sma na sa ki yɛrɛ hɔn wiinye ɔɔn na ne niɔnsɔ, kalanɔmanɛ na bɔɔ ne dɔɔ ye ma. ³¹ Wɔn ye na, ka ka yɛrɛ kɔrɔse ɔn ka kakiri tugo ɔn tɔɔ da dɔgɔ saa yɔ sin kwɛ wuru ma ma mane ti n’a mogo hɔn ɔn ne ka ladi yee yɛ. ³² Awale basiɛ, ma ka kalfa Wuro ma kɔ a ta woramadiabe na domada ma. Sebe ti awe ɔɔn ta ɔn ka wora sigebɛ. A wiinye frɛfɔre tɛtɛrɛ n’e tigɛ y’a kma ma, awe ɔɔn sbɛ ne wɔnwɔ pepe pere ka ma mɛ. ³³ Ma mere zɛ sɔɔn sii ta gwana wɛlɛ a ta sanɔ wɛlɛ a ta zogo na ga. ³⁴ Ka yɔnnɔ ti ne sra wiinye bɛ na, wɔnwɔ ma mane baratɛ kɔ ɔɔn ne yɛrɛ ye na kɔ ne yakwɛre ye na. ³⁵ Ma n’a sbɛ ye pepe ta n’a dɔrɔ ka ma da yee sɔɔn daga bara ta ɔn sbɛ durukma diɛma ɔn ye kakiri tugo mɛ kɔ Matigi Yezu yɛrɛ domada, a wiinye yira ɔn da ye wiin te ɔɔn fa pere wɔnna te dangamu yi fa na gunta ma.» ³⁶ Wɔnna domada wɔ naa wɛ a ta, a ɔɔn tuma yoloko kɔ ye pepe ɔn Wuro mɛ. ³⁷ Sma wɔ pepe mane mɔgɔ n’e sra flɛ awe Pɔle mogo hɔn ne bire a na. ³⁸ A ta tɛ ɔɔn mane da, ye ye na sɔɔn na ye za titiri ga, wɔn yɛrɛ ɔɔn man’e ninaban fɔn yaa fɔnɔ. Wɔn timi ye ɔɔn tuma yaa n’a yee n’a ka koro hɔn.

¹ Ke naa dɛ́gɛ ye na yee, ɔn kɔ koro hɔn ɔn tele yaa Kɔse. Winnisin, ke ɔɔn yaa Orodɛ ɔn naa tuma wɛɛn ɔn yaa Patara. ² Ke naa yaa koro boo za wɛɛn wiin ɔɔn ti ne yaa Fenisi, ke ɔɔn kɔ wɔn hɔn. ³ Ke naa yaa vetra Sipre na wiin sangan ma, ɔn yɛngɛnzu na korilɔ we za n’a to ɔn fɔnɔ yaa Siri piri ma ɔn yaa zii Tirekuru hɔn, koro we mane daga y’a bie zibɛ wiin wɛɛn. ⁴ Ke mane wɔɔ wɔnna wɛɛn we yin kopra bare ke mane kalanɔmanɛ bɔɔ za yeyɛ. Wuro ta Ni baraka hɔn wɔnwɔ mane kwa Pɔle ma, y’a ka yaa Zeruzalɛmu ga. ⁵ Kià yindo naa paga wiin sangan ma ke ne bere ne yaa, ye pepe mane tuma ne ke yee, yàra kɔ nimisala pepe, fɔn yaa sa kuru kɔrɔ hɔn. Ke naa sa yaa wiri sire wiin sangan ma zu do ma, ɔn kwɛ yoloko wɛɛn ɔn Wuro mɛ. ⁶ Wɔn timi ke ɔɔn fobire nɛmɛ na mɛ ɔn kɔ koro hɔn, yewɔ ɔɔn fɔnɔ bige ye brɛ. ⁷ A ma mɛ́ han, ke naa kwire wɛ wiin sangan ma n’a bii fɔn Tire ɔn yaa wiri Petolemayisekuru hɔn, ɔn bire kià kma na ɔn sin tala ta kɔ lɔgɔ. ⁸ Ke naa tuma winnisin, ɔn yaa Sezarekuru hɔn ɔn yaa vɛ Filipu brɛ wiin ɔɔn mane fanɛdia na yirasma sma kopra wɔ na boo. ⁹ Nɛmɛdala sma naa mane ti a ta wiinye ɔɔn mane sinida tɔɔ dɛn ga ne Wuro ta fanɛ yira. ¹⁰ Kià tɛ ɔɔn mane yin damanɛ ta yeyɛ, daberebɛta boo mane tuma Zudegiamana hɔn ɔn naa yeyɛ, ye n’a togo wiri Agabuse. ¹¹ A naa ke gun, ɔn Pɔle ta yɔyɔsɔfa bii ɔn ye sra kɔ ye kaɛn pɛrɛ kɔ lege ɔn da: «Wuro ta Ni wiin fa yira, bo wɔn: Ye bo yɔyɔsɔfa be wiin te yi, ye yoo Ziwifu na n’a pɛrɛ Zeruzalɛmu ɔn n’a ka sizɛ sra hɔn.» ¹² Wɔn ta mɔɔ na, mɛ́ kɔ kià kma wiinye ɔɔn ti kuru we hɔn, ke man’a kia Pɔle ta ɔn d’a ka yaa Zeruzalɛmu ga. ¹³ Wɔn tɛ a ɔɔn da ke ma: «Wɔnnɔ na ka mɔgɔ ne ne bona tɛgɛ? Mɛ ne yɛrɛ tɛtɛrɛ ne wɛ. Ma da n’a pɛrɛ dama na Zeruzalɛmu ga nka kɔ n’a siri na mɛ Matigi Yezu togo ye na.» ¹⁴ A ta tɛ ɔɔn ma mane dian kià bɛreda na ga, wɔn tɛ ke ɔɔn n’a za n’a to ɔn da: «Matigi dungo tɛ a tɛ.» ¹⁵ Wɔnna yin damanɛ wɔ naa fɔnɔ, ke ɔɔn ke yɛrɛ tɛtɛrɛ ɔn yaa Zeruzalɛmu. ¹⁶ Sezarekuru hɔn kalanɔmanɛ na bɔɔ wiinye ɔɔn mane ti ne yaa yeyɛ mɛ kɔ ke nɛmɛ, wɔnwɔ ɔɔn mane bii ɔn yaa ke vɛbɛ Sipresɔn Menasɔn brɛ wiin ɔɔn mane pia ne kalanɔ gwerena. ¹⁷ Ke yaa wiri Zeruzalɛmu wiin sangan ma, kià kma ɔɔn ke tɛn kɔ nihɔndiaro. ¹⁸ Winnisin Pɔle ɔɔn kwɛ kɔ ke nɛmɛ ɔn yaa Zake brɛ, sɔnmlala pepe mane kwɛ wiin wɛɛn mɛ. ¹⁹ A naa bire wɛ ye na wiin sangan ma, Wuro mane wiin fa pepe ta sizɛ brɛ awe baraka hɔn, a ɔɔn wɔn pepe nɔma yira ye ma talatala. ²⁰ Wiinye kma ɔɔn mane mɔɔ Pɔle ta, ye mane baraka yira Wuro ma ɔn d’a ma: «Ke maa Pɔle, yɔnmabe kɔ wiinye Ziwifu hɔn, wɔnwɔ yanɔn sege rɛ, ye pepe mane dɔɔ Tɛn na da ma fɔrɔna. ²¹ Kamasɔrɔ sma wiin fa pepe yira ne fɔnɔ bia da na, ye wiinye Ziwifu pepe ɔɔn tangan sizɛ yɔ, ye bia kala na n’e pepe ta, ye ye timi bere Moyizi ta Tɛn ma, ye be na da ye ma, ye ye ka n’e nɔmanɛ yaro titiri ga, ɔn ka ne landa na da ta titiri ga, ye pepe ti wɔn na tian. ²² A ɔɔn ma wɔnnɔ ke na ɔɔn ta han? Bare foyi wɔn yaga ga, ye na tɔɔ da be naa. ²³ Awale ke ɔɔn wiin fa yira be ma, be dian wɔn na. Sma naa ti ke ta wiinye ɔɔn ye do sɔɔ. ²⁴ Kwɛ kɔ lɔgɔ, ka kwɛ ka yɛrɛ kìnibɛ, be taa ye ta da na. Ye tɛ yee, ye na ye wɔan sɛn. Wɔn ɔɔn na tɛ sma pepe tɔɔ da, ye ye wiin fa yira n’a dɛ be ma, ye ye tian ga nka ye bi yɛrɛ dian Tɛn na da na mɛ. ²⁵ Yɔnmabe ti wiinye sizɛ hɔn han, ke sɛbɛ fanɛ wɔnwɔ ma ɔn da ye ka bɔɔ da ta ga. Ye ye yɛrɛ kɔrɔse, ye ka fiankankika nɔma ga, wɔn kɔ too kɔ fa mogo na fɛnɛnɛ yi na kika. Ye daga ye yɛrɛ kɔrɔse kakaladatɛ na mɛ.» ²⁶ Ye na winnisin, Pɔle ɔɔn kwɛ kɔ wɔnna sma wɔ, ye ɔɔn kwɛ dutigɛ n’e yɛrɛ kìnibɛ, a ɔɔn yaa kɔ lɔgɔ Wuro ta kɔɔn hɔn wiin fa to yɛrɛkìnibɛ we ɔɔn naa wɛ wiin sangan ma, ye pepe tala tala ta salaka daga wɛ wiin kɔɔ ma, a wɔn nɔma yira ye ma. ²⁷ Bo yin kopra wɔ mane tɛ paga na, wiinye Ziwifu ɔɔn tuma Azigiamana hɔn, wɔnwɔ man’a yɔnnɔ tɔɔ Wuro ta kɔɔn hɔn, ɔn yaa zamɛ gwangwanabɛ, ye ɔɔn naa n’a foga. ²⁸ Ye mane sɔngɔ ne kwa: «Ka naa tɛ́ ke ma Isirayɛlenɔmanɛ. Wiin sɔɔn we ɔɔn kià sii kwini ne bo bii be hɔn Tɛn yaga, a sma pepe kala kɔ wiinye da bii pepe hɔn, be lege ti ye hɔn. A yɛrɛ Girɛkisi foga naa kɔ lɔgɔ Wuro ta kɔɔn hɔn ɔn naa ne bii hɔn kìni we dɔnbɛ.» ²⁹ Wɔn da ye tɛ, ye mane pia Efɛsesɔn Tirofime za kɔ Pɔle kuru kɔrɔ hɔn ɔn n’a giati da Pɔle n’a kɔbɛ n’a wɛ Wuro ta kɔɔn hɔn. ³⁰ Kirekma wɔ pepe mane sɔngɔ, zamɛ ɔɔn tuma yiri naa yaan. Ye mane Pɔle foga Wuro ta kɔɔn hɔn ɔn suru sa kɔ lege sire ɔn kɔɔn we na kɔre pi wɔnna nɔɔ hɔn sin. ³¹ Ye mane Pɔle kia yɛɛ na. Bo wɔn hɔn ye mane ti yɛ, Ɔrɔmukma ta sɔrɔdasi na zɛngɛnte wiin ɔɔn ti mara we wɔɔn na, ye na bɛreda ɔɔn yaa wiri wɔn ma ɔn da, ye Zeruzalɛmukma pepe ɔɔn gwangwana. ³² A ɔɔn tuma sɔrɔdasi kɔ dayinnahɔnwɛre pepe kwɛ wɔnna nɔɔ tala hɔn ɔn yaa zamɛ na. Ye naa sɔrɔdasi na zɛngɛnte kɔ sɔrɔdasi za wiin sangan ma, ɔn saa Pɔle vuro na. ³³ Wɔn tɛ sɔrɔdasi na zɛngɛnte naa ye dɔbɛ, ɔn Pɔle foga ɔn da, y’a pɛrɛ kɔ zɔgɔre nɔma pla. Wɔn timi a n’a toga, y’awe kɔ te, ye wɔnnɔ a ɔɔn yaga? ³⁴ Nka zamɛ wɔ pepe mane kwɛ ne sɔngɔ fian yee, mane mɔɔ nɛmɛ ta yɛrɛ ga. Wɔnna sɔngɔro we mane tɛ sɔrɔdasi na zɛngɛnte we mane foyi mɔɔ n’a kìni ga, wɔn tɛ a ɔɔn da, ye ye yaa kɔ Pɔle yɔnmakɔn hɔn. ³⁵ Pɔle naa yaa wiri digebabala ma wiin sangan ma, sɔrɔdasi n’a bii, zamɛ ta vuro nɔmayɔ nabada ta. ³⁶ Bare zamɛ wɔ pepe mane sɔngɔ ne dɔɔ ne kwa, y’a daga yɛɛ na. ³⁷ Ye da ye Pɔle ka kaso hɔn wiin sangan ma, a ɔɔn da sɔrɔdasi na zɛngɛnte we ma: «Ma sbɛ ne domada zɔgɔ yira be ma ra?» Sɔrɔdasi na zɛngɛnte we ɔɔn d’a ma: «Be Girɛkida mɔɔ ra? ³⁸ Wiin Ezipitisɔn we ɔɔn sma gwangwanabɛ ɔn tabekma sma sana naa (4,000) kwɛ ye ma ye ɔɔn yaa kibɛkolo hɔn wɔn hɔn, wɔn bi ga wa?» ³⁹ Pɔle ɔɔn d’a ma: «Mɛ Ziwifu. Mɛ tuma Tarasekuru hɔn, Silisigiamana hɔn. Wiin kuru we togo ɔɔn sa fɔrɔna, mɛ wɛɛn sɔɔn. Ma be mɛ da be sogo pere ne ma ma bɛre zamɛ ta.» ⁴⁰ Sɔrɔdasi na zɛngɛnte we naa sogo pere Pɔle ma, a ɔɔn tuma taa digebabala na boo ma ɔn ye soro ta zamɛ ma. Ye pepe mane kwɛ bɔɔ gurun, a ɔɔn bɛreda bii Heburoda hɔn ɔn da ye ma:

¹ «Kià kma kɔ ne tamɛ, ma na wiin fa yira ka ma ne yɛrɛ ye na, ka wɔn mɔɔ basiɛ.» ² Pɔle ta tɛ ɔɔn mane bɛre ye ta Heburoda hɔn, wɔn man’e ta ye ɔɔn ye yinnamalɔ ɔn fa kwɛ y’a mɔɔ ma. ³ Pɔle mane da ye ma: «Mɛ Ziwifu. Tarasekuru hɔn ma vɔrɔ Silisigiamana hɔn. Nka bɛɛ bo kuru be hɔn mɛ pra Gamaliyɛle brɛ wiin ɔɔn mane ne kala kɔ ke tamɛ ta Tɛn na da kiɔkiɔ. Wuro ta da mane sige ne ma fɔrɔna wɔkara ki yɛrɛ ti wiin nɛ bo sma be o. ⁴ Ma mane Wurosogo ma kma yannɛ n’e yɛɛ, ma yɛrɛ bɔɔ nimisini kɔ yàra pɛrɛ n’e ka kaso hɔn. ⁵ Salakawɛvɔ kɔ sɔnmlala yɛrɛ sbɛ n’e na tian yira. Yewɔ yɛrɛ ɔɔn mane sɛbɛ ta n’e pere ne ma ɔn sogo pere ne ma wiin fa to ma yaa Damase. Worosogo na yasma wiinye ɔɔn ti yeyɛ, ma yaa n’e pɛrɛ ɔn naa kɔ lɔgɔ Zeruzalɛmu ɔn naa n’e yɔnnɔhɔntoba.» ⁶ «Mɛ mane sogo bii ne yaa ɔn yaa vetra Damasekuru na. Ye da ye tɔɔ, sintogo hɔn sangan nɛmɛ ma, kini na yire yi boo ɔɔn tuma wuro hɔn ɔn zii naa pi ne ma. ⁷ Mɛ ɔɔn bɛrɛ lɔ ma, kɔn boo ne ne wiri ne kwa, ye Sɔle Sɔle, ye wɔnnɔ na be ne yannɛ? ⁸ Ma ɔɔn toga d’a bi kɔ te Matigi? Kɔn we ɔɔn da ne ma, y’a yi Nazarɛtinɛmɛ Yezu. Ye yi ma ɔɔn yannɛ. ⁹ Mɛ yakwɛre kɔnɛ mane kini we za nka wiin kɔn we ɔɔn mane bɛre ne ta, ye mane wɔn mɔɔ ga. ¹⁰ Ma ɔɔn toga da wɔnnɔ ma daga ɔɔn ta Matigi? Matigi ɔɔn da ne ma, ye ma tuma yaa Damasekuru hɔn, ye ma daga wiin fa ta, ye ye na yaa wɔn pepe yira ne ma wɛɛn. ¹¹ Nka kini we na wɔlɔ ta tɛ ɔɔn mane mɛ yinna yaga, ne yakwɛre ɔɔn mane ne foga ne soro ma ɔn suru yaa kɔ ne nɛmɛ Damasekuru hɔn. ¹² Sɔɔn boo mane ti yeyɛ, ye n’a togo wiri Ananiyase. A mane sɔntele ne kwa Tɛn ma. Wiinye Ziwifu pepe ɔɔn ti yeyɛ, wɔnwɔ yɛrɛ man’a togo ta fɔrɔna. ¹³ Wɔn mane naa ne gun ɔn da ne ma, ye ne na plalo Sɔle ye bere sege zɛ. Wɔnna nɔɔ tala hɔn mɛ yinna ɔɔn kibɛ, ma ɔɔn sege n’awe za. ¹⁴ A ɔɔn da ne ma, ye ke tamɛ ta Wuro ne dɛ́gɛ wiin fa to ma ye dungo tɔɔ ɔn Sɔntele za ɔn n’a yɛrɛ bɛrekɔn mɔɔ. ¹⁵ Ye ma wiin fa za ɔn wiin fa mɔɔ, ye ma daga tɛ a siɛrɛta na sma pepe yɔnnɔ na wɔn ye na. ¹⁶ Ye wɔnnɔ na ma sigi yɛ? Ye ma tuma ɔn n’a togo wiri ɔn batize ɔn n’a kakiɛ na yafa gun. ¹⁷ Ma naa bere yaa Zeruzalɛmu. Boo kɔɔ ma, ma ɔɔn yaa kɔ Wuro ta kɔɔn hɔn ne Wuro mɛ ɔn dɔrefrɛ bɔɔ za. ¹⁸ Ma mane Matigi za a ne kwa ne ma, ye ma sale sa Zeruzalɛmukuru hɔn, ye bare ma na wiin siɛrɛbe ta ye togo na, ye yeyɛ kma na dian wɔn na ga. ¹⁹ Ma ɔɔn d’a ma da Matigi d’a yɛrɛ tɔɔ da yɔnmabe ti wiinye kma hɔn mɛ yɛrɛ ɔɔn mane yaa Kalakɔan hɔn n’e foga n’e ka kaso hɔn n’e vaan kɔ gwelekamɛ. ²⁰ Da y’a siɛrɛte Etiyɛni yɛɛ wiin sangan ma, da mɛ yɛrɛ mane tiye mɛ yo. D’a na yɛsma yɛrɛ da mane dia mɛ ma, ma ne taa ne yɛre ye ta zoga na. ²¹ Nka a ɔɔn da ne ma, ye ma yaa dɛrɛdo hɔn sizɛ brɛ, ye wɛɛn ye ne fanɛ.» ²² Wiinye Ziwifu ɔɔn mane wɔnna domada wɔ pepe mɔɔ Pɔle ta, wɔnwɔ mane dutigɛ ne sɔngɔ ne kwa: «Bo sɔnsi be sii daga migebɛ na ɔn wɛ lagakɔn ma. A daga wɔɔ na ni na ga.» ²³ Ye ta tɛ ɔɔn mane sɔngɔ, ne y’a zoga wola n’e dra ne yege turu n’a sɛrɛ wuro hɔn, ²⁴ wɔn tɛ sɔrɔdasi na zɛngɛnte we ɔɔn da, ye ye kɔ kɔ Pɔle kasokɔn hɔn ɔn n’a vaan fɔrɔna wiin fa to a zamɛ sɔngɔwɔn yira n’a kìni. ²⁵ Ye mane kia Pɔle pɛrɛ n’a vaan wiin sangan ma, wiin te ɔɔn ti a na vanda wɔɔn na, a ɔɔn da wɔn ma: «Ɔrɔmusɔn wiin yɛrɛ ɔɔn kiti ga, wɔn na vansogo ti ki ta ra?» ²⁶ Wɔn ta mɔɔ na, a na vansma wɔ na zɛngɛnte ɔɔn yaa n’e yira sɔrɔdasi na zɛngɛnte ma ɔn da: «Wɔnnɔ be mane na ɔɔn ta yee? Taa sɔɔn we Ɔrɔmusɔn.» ²⁷ Wɔn tɛ sɔrɔdasi na zɛngɛnte we ɔɔn ye bere naa Pɔle toga ɔn d’a ma: «Yira ne ma wa, bi Ɔrɔmusɔn tian na ra?» Pɔle ɔɔn da ɔɔn. ²⁸ Sɔrɔdasi na zɛngɛnte we ɔɔn da: «Mɛ yɛrɛ gwana na yaan ye ɔɔn sara ɔn sbɛ ne wɔnna togo we gun.» Pɔle ɔɔn d’a ma: «Mɛ vɔrɔ ne Ɔrɔmusɔn.» ²⁹ Ye tɛ yee, wiinye kma ɔɔn mane na n’a vaan, wɔnwɔ ɔɔn n’a za n’a to wɔnna nɔɔ hɔn. Pɔle ta tɛ ɔɔn ne Ɔrɔmusɔn ɔn ne ti pɛrɛ hɔn ɔn yaa kayan wɔnna wagati we ma yɛ, wɔn mane kuun babɛ sɔrɔdasi na zɛngɛnte we ma. ³⁰ Winnisin, sɔrɔdasi na zɛngɛnte we ta tɛ ɔɔn mane kia Pɔle ta yagada tɔɔ Ziwifu ta, wɔn mane tɛ a ɔɔn n’a wa pɛrɛfrɛ hɔn ɔn fanɛ yaa salakawɛvɔre pepe wiri n’e kwɛ kɔ kitisɔre pepe ɔn Pɔle zibɛ n’a pere ye ma kiti na.

¹ Pɔle naa ye yinna baga kitisɔre hɔn, ɔn da: «Kià kma, mɛ yɛrɛ tɔɔ da hali ɔɔn naa n’a kwɛ sma ma, zarakedo ti ne na Wuro ta ga.» ² Salakawɛvɔ Ananiyase ɔɔn d’a kiege ma tasma ma, ye y’a do zɛngɛn. Wɔn tɛ Pɔle ɔɔn da: ³ «Taa bi kulu na furobɛ yi be, Wuro na ɔɔn vuro. Be tangan bɛɛ wiin fa to be mɛ kiti Tɛn yiranɔn na. Tɛn dian wiin fa na ga, a ma wɔn be ɔɔn ta ɔn da, ye ye mɛ vuro.» ⁴ Wiinye kma ɔɔn mane ti yeyɛ, wɔnwɔ ɔɔn gwangwana a ma ɔn d’a ma: «Taa Wuro ma salakawɛvɔ be ɔɔn vini.» ⁵ Pɔle ɔɔn da: «Kià kma, mɛ mane tɔɔ d’a salakawɛvɔ ga yo, bare ye sɛbɛ Wuro domada na sɛbɛ hɔn ɔn da, ye be daga bia kma na zɛngɛnte vini ga.» ⁶ Pɔle naa n’a za da zamɛ sodini, bɔɔ ne Saduseyɛn, bɔɔ ne Fariziyɛn, a ɔɔn ye to kitisɔre wɔ woro hɔn ɔn sɔngɔ ɔn da: «Kià kma, mɛ Fariziyɛn, ne na vɔrɔre ne Fariziyɛn. Kià yɔnmabe do ma wiin ɔɔn sara ta winnisa, wɔn ye na ye mɛ kiti.» ⁷ Wɔnna domada wɔ ta wɛ na suu, Fariziyɛn kɔ Saduseyɛn ɔɔn bla ye nɛmɛ na, zamɛ wɔ ɔɔn sodini. ⁸ Bare Saduseyɛn wɔnwɔ yira ne kwa, ye sara na winni ga, ye mɛlɛkɛ tiye ga, zini mane tiye mɛ ga, kamasɔrɔ Fariziyɛn wɔnwɔ ne kwa wɔn tian ga. ⁹ A mane tɛ sɔngɔro na yire yi na. Sɛbɛtɔre na bɔɔ wiinye ɔɔn mane Fariziyɛn, wɔnwɔ mane tuma taa ɔn gwangwana fɔrɔna ɔn da: «Ke zarakedo tala boo za bo sɔɔn be na ga. Be ma farase ga, a ma boo zini wɛlɛ boo mɛlɛkɛ ɔɔn bɛre a ta.» ¹⁰ Dakwiɛro we ta tɛ ɔɔn mane yire ne yaa, kuun ɔɔn sɔrɔdasi na zɛngɛnte we foga, a n’a giati ɔn da, ye ye na Pɔle bogobogo. Wɔn tɛ a ɔɔn da yɛresma wɔ ma, ye ye zii n’a foga n’a wa zamɛ wɔ yɔ ɔn yaa n’a ka yɔnmakɔn hɔn yɛ. ¹¹ Wuru naa ba, Matigi ɔɔn ye yɛrɛ dɔrɔ Pɔle ma ɔn d’a ma: «Be woro sige. Be mane mɛ siɛrɛ Zeruzalɛmukuru hɔn fɔn be ne siɛrɛ Ɔrɔmukuru hɔn mɛ.» ¹² Bo kɔɔ naa kiɛ wiin sangan ma, Ziwifu ɔɔn du flɛ ɔn ye sun ɔn da, ye ye ma Pɔle yɛɛ ga, ye ye na foyi zɔn ga ɔn mane na mɛnɛ mɛ ga. ¹³ Wiinye kma ɔɔn mane wɔnna du we flɛ, ye mane fan sma kiepla ma. ¹⁴ Ye mane yaa salakawɛvɔre kɔ sɔnmlala gun ɔn da ye ma: «Mɛ́ mɛ́ sun ɔn mɛ́ do sɔɔ ɔn da ke ma Pɔle gun n’a yɛɛ ga, ke na foyi boo ka ke do hɔn ga. ¹⁵ Wɔn ye na, ki daga yaa bɛɛn kɔ kitisɔre ɔn fanɛ yaa yira sɔrɔdasi na zɛngɛnte ma, y’a foga naa kɔ lege ka brɛ wiin fa to k’a ta da na kayan ta n’e fɔrɔ. A ma mɛ́ han, mɛ́ na n’a yɛɛ wiin nɛ a wiri dɛn ga, wɔn ti mɛ́ ta.» ¹⁶ Nka Pɔle ligenɔ mane wɔnna du we na da mɔɔ, ɔn tuma yaa yɔnmakɔn hɔn, ɔn yaa kɔ n’e nɔma yira Pɔle ma. ¹⁷ Pɔle ɔɔn boo sɔrɔdasisɔn wiri ɔn d’a ma: «Bo yɛlɛnɛmɛ be foga yaa n’a yee sɔrɔdasi na zɛngɛnte brɛ o, domada ti a ta n’e yira a ma.» ¹⁸ Sɔrɔdasisɔn we ɔɔn n’a foga yaa kɔ lege y’a zɛngɛnte brɛ ɔn yaa d’a ma: «Kasonɛmɛ Pɔle ne wiri ɔn da ne ma, ye ma bo nɛmɛ be foga naa n’a yee be brɛ, ye domada ti a ta n’e yira be ma.» ¹⁹ Sɔrɔdasi na zɛngɛnte we ɔɔn nɛmɛ we foga a soro ma ɔn ye sabɛ kɔ lege ɔn d’a ma: «Wɔnnɔ ɔɔn ti be ta n’a yira ne ma?» ²⁰ Nɛmɛ we ɔɔn d’a ma: «Ziwifu bɛɛn ye na ɔn da ye na naa yira be ma, ye sɛn be naa kɔ Pɔle kitisɔre brɛ, ye wiin fa to ye y’a ta da na kayan ta n’e kìni. ²¹ Ka tɛ ye be diɛbɛ ga. Ye fan sma kiepla ma wiinye ɔɔn na ne pi n’a yɛ́rɛ. Ye bɛɛn ye na ɔn ye sun ɔn da, ye ye m’a gun n’a yɛɛ ga, ye ye na foyi bo zɔn ga ɔn mane na mɛnɛ mɛ ga. Ye y’a da yɔnnɔhɔnwa n’e wɛ, bia dian ye ɔɔn yɛ́rɛ.» ²² Sɔrɔdasi na zɛngɛnte we ɔɔn yɛlɛnɛmɛ we to a ɔɔn yaa. A mane d’a ma: «Ka b’e yira sɔɔn sii ma ɔn da ye be du we nɔma yira n’e wɛ mɛ ma ga.» ²³ Wɔn tɛ a ɔɔn y’a sɔrɔdasikuru na zɛngɛnkma sma pla bɔɔ wiri ɔn da ye ma: «Ka ka yɛrɛ tɛtɛrɛ Sezareyuru na wuru na ba fɔrɔ yi. Ka na yaa kɔ sɔrɔdasi sma zɔpla (200) kɔ siorikma sma kiesaafun kɔ dɔngɔnkma sma zɔpla. ²⁴ Ka bɔɔ siori kia mɛ, Pɔle na ba wiinye ma, ka yaa n’a ka giamana wɔnnate Felikisi sra hɔn, foyi k’a gun ga.» ²⁵ A mane sɛbɛ wɔ ka mɛ ɔn da: ²⁶ «Mɛ Kulode Liziyase ɔɔn bɔ sɛbɛ be fanɛ ne na fan yi giamana wɔnnate Felikisi ma ɔn bire a na. ²⁷ Ma bo sɔɔn wiin be fanɛ be ma, Ziwifu man’a foga, ne kia n’a yɛɛ. Ma naa tɔɔ d’a Ɔrɔmusɔn wiin sangan ma, ma ɔɔn kwɛ kɔ n’a sɔrɔdasi ɔn n’a tɔɔ ye ta. ²⁸ Y’a zarake wiin wɔɔn na, ma mane kia wɔn tɔɔ wɔn kìni, wɔn tɛ ma ɔɔn man’a yabɛ ye ta kitisɔre brɛ. ²⁹ Nka ma n’a za da ye ta dakwiɛro foyi boo na da wiin ɔɔn n’a wɛwɔn wa ga, mane pɛrɛwɔn wa mɛ ga, fɔn ye ta Tɛn na da. ³⁰ Ma naa mɔɔ ye da, ye ye ti ne du flɛ a na, wɔn ɔɔn tɛ ma ɔɔn n’a fanɛ be ma n’a yira n’a dɔrɔ a na zarakesma ma da ye yaa y’a da yɔnnɔhɔnwa kɔ lege bi brɛ.» ³¹ Sɔrɔdasi wɔ mane Pɔle foga wuru hɔn wɔkara ye mane yira ye ma wiin nɛ ɔn yaa kɔ lege Antipatise. ³² Kɔɔ naa kiɛ, ye ɔɔn siorikma wɔ to, wɔnwɔ ɔɔn yaa kɔ lege, yewɔ ɔɔn ye bere naa yɔnmakɔn brɛ. ³³ Siorikma wɔ yaa wiri Sezare suu, ɔn sɛbɛ wɔ ka giamana wɔnnate sra hɔn ɔn Pɔle dɔrɔ a ma mɛ. ³⁴ Giamana wɔnnate naa sɛbɛ wɔ kala n’e wɛ wiin sangan ma, ɔn Pɔle toga, ye wee mara hɔn awe sa? A naa tɔɔ da Silisi a tuma, ³⁵ a ɔɔn d’a ma: «Be na zarakesma ɔɔn na naa wiin sangan ma, ma na be toga.» A mane da, ye y’a foga yaa kɔ lege Herode ta luu ma.

¹ Yin koo wɔn timi, salakawɛvɔ Ananiyase kɔ sɔnmlala kɔ Tɛretulusetogote boo wiin ɔɔn man’e na diɛmata bɛreda hɔn, mane kwɛ tuma Sezare ɔn naa wiin fa to ye Pɔle yagabɛ mara wɔnnate ta. ² Ye mane Pɔle wiri n’a nabɛ Tɛretuluse ɔn bɛreda bii n’a yagabɛ ne kwa: «Mɛ na te, bi baraka hɔn ke ti siara hɔn, a bere ma bia datɛtɛrɛkakiri ɔɔn tɛ kià sii ɔɔn ne ti yinnamalɔ hɔn mɛ. ³ Mɛ́ na te Felikisi, be wɔnna dafɔre wiinye wɔ ta mɛ́ ma bii pepe hɔn kɔ sangan pepe ma, mɛ́ baraka yira be ma ye ye na. ⁴ Nka ma kia be banabɛ kɔ bɛredayan ga. Wɔn ye na ma be mɛ da be dian bia woramadiabe ta ɔn mɔɔ ke ta zɔgɔ. ⁵ Mɛ́ a za da bo sɔɔn be tɛ bu na yire yi na ne diniyan hɔn Ziwifu pepe gwangwanabɛ. Wiinye kma ɔɔn Nazarɛtisɔn we timikma, awe ɔɔn n’e na zɛngɛnte. ⁶ A yɛrɛ mane kia Wuro ta kɔɔn dɔnbɛ. Wɔn ɔɔn tɛ ke ɔɔn n’a foga. [Ke mane kia n’a kiti kià Tɛn yiranɔn na, ⁷ nka sɔrɔdasi na zɛngɛnte Liziyase naa sɔɔ ke ma n’a tɔɔ ke ta fangan. ⁸ Wɔn timi a ɔɔn da ke ma, ye wiinye kma ɔɔn ne kia n’a zarake, ye ye naa bi brɛ.] Mɛ́ wiinye da pepe yira n’e dɛ a ma, be ɔɔn n’a toga ye na, bi yɛrɛ na n’e mɔɔ a do hɔn.» ⁹ Ziwifu mane da, ye Tɛretuluse ta yirada tian. Ye yee ye ti. ¹⁰ Mara wɔnnate naa yanmɛ bɛreda pere Pɔle ma, a ɔɔn da: «Ma tɔɔ da bi ɔɔn kià sii ta kiti sɔɔ n’a bii fɔn dɔgɔyan yɔ. Wɔn ye na, ma na n’a da yira be ma kɔ yɔnmabe. ¹¹ Be sbɛ n’e na kayan ta n’e sege ɔn tɔɔ da ne yaa ma da hɔn Zeruzalɛmu Wuroyirebɛ na, ye yalo yin funpla ma ga. ¹² Ye tɛ Wuro ta kɔɔn hɔn yo, wɛlɛ Kalakɔn hɔn yo, wɛlɛ wisogo hɔn yo, sɔɔn sii ne za ne za ma ne dakwiɛ kɔ boo wɛlɛ ne zamɛ gwangwanabɛ ga. ¹³ Zarakewɔn ti mɛ na bɔ sma bɛ ta ga. ¹⁴ Mɛ kɔnɛ wiin fa yɔnnɔ tɔɔ, bo wɔn. Mɛ kɔnɛ ti ke tamɛ ta Wuro ta bara ɔɔn hɔn ne dɔɔ Wurosogo ma, yewɔ yira da wiin ɔɔn tian ga. Wiin fa ɔɔn sɛbɛ Tɛn na sɛbɛ hɔn kɔ daberebɛre ta sɛbɛ hɔn, mɛ kɔnɛ tɔɔ da wɔn pepe tian. ¹⁵ Mɛ yɔɔn Wuro ma wiin nɛ, yee yewɔ yɔɔn a ma yɛ, mɛ ɔɔn tɔɔ da smatele na winnisa sara yɔ smayaga winni mɛ. ¹⁶ Bo wɔn tɛ mɛ ɔɔn ne sige ne yɛrɛ ma wiin fa to zarakedo ka zɛ n’a giatɛ na ga Wuro zin hɔn kɔ sma zin hɔn mɛ. ¹⁷ Dɔgɔyan fɔnɔ wɛ timi ma, ma mane bere naa yirebɛfrɛ kɔ salaka na frɛ pere na n’a sii ma. ¹⁸ Bo wɛɛn ye ne za Wuro ta kɔɔn hɔn n’a yɛrɛkìnibɛ wɛsangan ma. Zamɛ mane tiye ga, sma ma bere mane sɔngɔ mɛ ga. ¹⁹ Nka bɔɔ Ziwifu wiinye ɔɔn tuma Azigiamana hɔn, be ma farase ga wɔnwɔ ɔɔn naa be brɛ wiin fa to ye mɛ zarake. Hali kɔ wɔn, ye yɛrɛ fa gun n’a yira ga. ²⁰ Wɔn nii mane ti ga, yewɔ wiinye kma ɔɔn ti bɛɛ, ye mane yaa kɔ ne nɛmɛ kitisɔre brɛ wiin sangan ma, ye wiinye dayaga za ne hɔn, ye wɔnwɔ yira kɛ. ²¹ Ma tuma taa ye woro hɔn ɔn wiinye domada wɔ yira ɔn da, ye sara ta winnisada ye na ka kia ne kiti sma ra? A ma tɛ wɔnna domada wɔ dama yee ga.» ²² Felikisi ta tɛ ɔɔn mane Wurosogomada nɔma tɔɔ, wɔn tɛ ɔɔn man’e bigebɛ dɛn ɔn da ye ma: «Sɔrɔdasi na zɛngɛnte Liziyase ɔɔn na naa wiin sangan ma, ma na k’a kiti sɔɔ.» ²³ A mane yira sɔrɔdasi wɔnnate ma, y’a ne Pɔle kɔrɔse. Ye nka y’a to a yɛrɛ soro ma zɔgɔ, y’a mare wiinye ɔɔn naa a brɛ, y’a ka ne sɔɔ ye ma kɔ na ga. ²⁴ Yin damanɛ wɔn timi, Felikisi ɔɔn naa kɔ y’a ya Durusiye wiin ɔɔn mane Ziwifu mɛ. A mane fanɛ yaa Pɔle wiri naa ɔn ne mɔɔ Yezu Krista ta da na a ta. ²⁵ Nka Pɔle ta bɛreda ta tɛ ɔɔn mane yaa telebe brɛ piri ma kɔ yɛrɛfigɛnɔn kɔ sɛn kiti na da ma, wɔn ɔɔn mane Felikisi nina ban, a ɔɔn d’a ma: «Tuma yaa dɛn. Ne mako ɔɔn naa ne sa be hɔn, ma na fanɛ be ta.» ²⁶ A man’a giati ɔn da Pɔle na gwana pere ye ma, bo wɔn ɔɔn tɛ a ɔɔn man’a wiri kanyinnayan na ne barotɛ kɔ lege. ²⁷ Dɔgɔ pla wɔn timi, Porosiyuse Fɛsetuse ɔɔn tangan Felikisi timi. Felikisi ta tɛ ɔɔn mane kia ye da dia Ziwifu ma, wɔn tɛ a ɔɔn mane Pɔle to yɛresma sra hɔn.

¹ Bo Fɛsetuse wirikɔ na yin saaro kɔɔ ma y’a mara hɔn, a ɔɔn tuma Sezare ɔn yaa Zeruzalɛmukuru hɔn. ² Salakawɛvɔre kɔ Ziwifu na zɛngɛnkma mane yaa Pɔle yagabɛ a ta. Ye mane d’a ma, ³ y’a tɛ ye Pɔle nabɛ Zeruzalɛmu. Ye mane du ɔɔn flɛ a na wiin fa to y’a yɛɛ sogo ma. ⁴ Nka Fɛsetuse n’a yira n’a dɔrɔ ye ma ɔn da, ye Pɔle ta kaso wɔn daga ne Sezare yi, ɔnkɔ mɛ, yi yɛrɛ na bere yaa wɔnna nɔɔ hɔn yɛ. ⁵ A mane da ye ma mɛ: «K’a zɛngɛnkma ne sbɛ, ye dɔɔ ne ma, ke kwɛ yaa Sezare. Bɔɔ da ɔɔn zɛ awe sɔɔn we hɔn wiinye ɔɔn daga ga, y’a zarake.» ⁶ Fɛsetuse mane yalo yin korosɔɔn wɛlɛ yin fun ma ye brɛ ga. A naa yaa wiri Sezare suu, winnisin a ɔɔn yaa tangan kitisɔdo hɔn ɔn fanɛ da ye yaa Pɔle foga naa kɔ lege. ⁷ Pɔle naa wiri wiin sangan ma, wiinye Ziwifu ɔɔn mane tuma Zeruzalɛmu, wɔnwɔ ɔɔn naa taa n’a kori ne zarake na yaga ye na yaan ye yira n’e dɛ a ma nka ye mane sbɛ n’e kìnibɛ ga. ⁸ Nka Pɔle man’e yɛrɛ wɔɔn wa ne kwa: «Ma foyi tala boo yaga ga, ma Ziwifu ta Tɛn na da yaga ga, ma Wuro ta kɔɔn na da yaga ga, ɔn ma boo fa yaga Ɔrɔmukma ta fanganmagwaga ta mɛ ga.» ⁹ Fɛsetuse ta tɛ ɔɔn mane kia ye da dia Ziwifu ma, wɔn tɛ a ɔɔn mane da Pɔle ma: «Be kia yaa Zeruzalɛmu wiin fa to ma bia kiti sɔɔ wɛɛn ra?» ¹⁰ Nka Pɔle ɔɔn d’a ma: «Ma ti fanganmagwaga ta kitisɔre zin hɔn yo. Wɛɛn ma daga kiti na. Ye tɛ wɔkara ma boo fa ta Ziwifu na ga yo, bi yɛrɛ n’e yɔnnɔ tɔɔ. ¹¹ Tian na, ye ɔɔn ne yaga mɛ ta, ma ɔɔn bɔɔ dayaga ta wiinye ɔɔn ne siriwɔn wa, ma sbɛ ne maga siri na ga yo. Nka bɔ sma bɛ wiin fa yira n’a dɛ mɛ ma, wɔn ɔɔn mane tian ga, sɔnnala boo sbɛ ne mɛ ka ye sra hɔn ga. M’a kia fanganmagwaga ta a n’a da yɔnnɔhɔnwa.» ¹² Fɛsetuse naa nɛmɛzɛ ta kɔ ye kitisɔkwɛre, ɔn da: «Bia tɛ ɔɔn ne kia fanganmagwaga bia da yɔnnɔhɔnwa, wɔn ɔɔn na n’e yɔnnɔhɔnwa.» ¹³ Yin damanɛ wɔn timi fanganma Agiripa kɔ Berenise naa wiri Sezare, ɔn yaa bire Fɛsetuse na. ¹⁴ Ye ta tɛ ɔɔn mane ti ne yin damanɛ ta yeyɛ, wɔn tɛ Fɛsetuse ɔɔn Pɔle ta da yira fanganma ma ɔn da: «Felikisi mane sɔɔn boo to kaso hɔn bɛɛ. ¹⁵ Mɛ yaa wiinye yin damanɛ ta Zeruzalɛmu, salakawɛvɔre kɔ Ziwifu ta sɔnmlala man’a yagabɛ n’a kia ne ta, ye m’a yɛɛ. ¹⁶ Mɛ n’a yira n’a dɔrɔ ye ma ɔn da Ɔrɔmukma tɛ mane daro ne tɛ yee ga, da ye tɛ mɔɔ sɔɔn kɔ ye na zaraketa ta dɛn ɔn n’e ta da kiɛkiɛ n’e fɔrɔ. ¹⁷ Ye yɛrɛ yɛre mɔɔ mɛ ta dɛn ga, ɔn bii naa bɛɛ. Ye na winnisin yɛ, ma ɔɔn yaa tangan kitisɔdo hɔn ɔn fanɛ da ye yaa sɔɔn we foga naa kɔ lege. ¹⁸ Ye naa wiri kɔ lege wiin sangan ma, mɛ yɛrɛ mane wiinye dayaga giati a ta da na, a na zarakesma yɛrɛ ma sbɛ wɔnwɔ na foyi yira n’e dɛ a ma ga. ¹⁹ Ye yɛrɛ ta Wurosogo ma da na ye mane dakwiɛ. Yezutogote boo ta da na ye da wiin ɔɔn siri nka awe Pɔle ne yira ne kwa, y’a ti ni na yɛ. ²⁰ Mia tɛ ɔɔn ma tɔɔ da ma sbɛ ne wiin fa yira ye hɔn ga, wɔn tɛ mɛ ɔɔn d’a yaa Zeruzalɛmu wiin fa to ye yaa n’a ta da yɔnnɔhɔnwa wɛɛn. ²¹ Nka Pɔle naa n’a yira n’a dɔrɔ ɔn da, ye fanganmagwaga ɔɔn daga y’a da yɔnnɔhɔnwa na. Wɔn tɛ mɛ ɔɔn da, y’a to kaso hɔn yɛ fɔn yaa kayan a ta yuru ma fanganmagwaga brɛ.» ²² Wɔn tɛ Agiripa ɔɔn da Fɛsetuse ma: «Mɛ yɛrɛ kia mɔɔ wɔnna sɔɔn we ta mɛ.» Fɛsetuse ɔɔn d’a ma: «Sɛn be na mɔɔ a ta.» ²³ Ye na winnisin Agiripa kɔ Berenise ɔɔn naa kɔ kitisɔdo hɔn, fanganmabɛgɛfrɛ na fɔrɔ ye hɔn, sɔrɔdasi na zɛngɛnkma ne ti kɔ lɔgɔ kɔ kuru na smayeye. Fɛsetuse ɔɔn fanɛ ye ɔɔn yaa Pɔle foga naa kɔ lege. ²⁴ Fɛsetuse mane bɛreda bii ɔn da: «Fanganma Agiripa kɔ ki wiinye kma pepe ɔɔn ti kɔ ke nɛmɛ, ka yɔnnɔ ti bo sɔɔn be na. Ziwifu pepe na kwɛ yi naa ne gun a ye na Zeruzalɛmu, hali ɔn bii naa bɛɛ mɛ, ne sɔngɔ ne kwa, y’a daga wɔɔ ni na titiri ga. ²⁵ Mɛ kɔnɛ ta, mɛ foyi boo za a hɔn wiin ɔɔn n’a yɛwɔn wa ga. Nka a ta tɛ ɔɔn da, ye giamana wɔnnate ɔɔn daga y’a da yɔnnɔhɔnwa, wɔn ye na ma da ma daga n’a fanɛ a ma. ²⁶ Nka bɔɔ da na kìni ye ta tɛ ɔɔn mane tiye a ta da na, ma sbɛ ne wiinye sɛbɛ ɔn sbɛ n’a fanɛ giamana wɔnnate ma ga, wɔn ye na m’a sabɛ ka zin bɛɛ, bi fanganma Agiripa yɛrɛ zin wiin fa to bo kiti be ɔɔn fɔnɔ ma sbɛ fa gun n’a sɛbɛ a ma. ²⁷ Bare mia giatɛ ma, sɔɔn sbɛ ne kasonɔ yabɛ yee ɔn ka sbɛ n’a na zarakeda sɛbɛ, ye ne kìni ga. Wɔn yinnibe»

¹ Agiripa mane da Pɔle ma: «Be sbɛ ne bia da yira.» Wɔn ɔɔn tɛ Pɔle ɔɔn ye soro sɔrɔ ɔn da: ² « Ziwifu wiinye da pepe yira n’e dɛ mɛ ma, fanganma Agiripa, mɛ ne sbɛ ne taa bi zin sma ɔn ne domada yira, wɔn mɛ nihɔndia. ³ Bia tɛ yɛrɛ ɔɔn ne Ziwifu ta landa pepe kɔ ye ta dakwiɛro na da pepe tɔɔ, wɔn ye na m’a kia be ta da be be woromakuna ɔn mɔɔ ne ta. ⁴ Mɛ na yɛlɛsangan ma, ma n’a sirewɔ ta wiin nɛ n’a sii yɔ Zeruzalɛmukuru hɔn, Ziwifu pepe wɔn tɔɔ. ⁵ Ye yɛrɛ tɔɔ da n’a bii fɔn sangan dɛrɛ ma da hɔn, kià Wurosogo ma da mane sige mɛ ma fɔrɔna wɔkara Fariziyɛn. Ye ɔɔn dian ye na, ye sbɛ n’e na tian yira. ⁶ Wuro wiin dosɔ ta ke tamɛ ma, mia tɛ ɔɔn yɔɔn wɔn ma, bo wɔn ɔɔn tɛ ye ɔɔn ne mɛ kiti sma. ⁷ Ke sa wiinye dumakma funpla wɔ hɔn, wɔnna dosɔ we ye na ye Wuro yirebɛ sin kwɛ wuru ma wiin fa to y’a gun. Be za rɛ fanganma wɔnna yɔnmabe we ye na Ziwifu mɛ zarake. ⁸ Wuro ta tɛ ɔɔn ne sara winni n’e sabɛ, wɔnnɔ ɔɔn tɛ ki Ziwifu mane wɔn tɔɔ tian ga? ⁹ Mɛ yɛrɛ man’a giati da ma na n’a sbɛ ye pepe ta ɔn sɔɔ Nazarɛtisɔn Yezu togo ma. ¹⁰ A bere ma wɔn ma ɔɔn ta Zeruzalɛmukuru hɔn mɛ. Salakawɛvɔre mane wiin sebe pere ne ma, wɔn baraka hɔn, mɛ yɛrɛ dɛ́gɛwɛsma na yaan ye ka kaso hɔn fɔrɔna. Ye tɛ da y’e yɛɛ wiin sangan ma, ma dian wɔn na. ¹¹ Ma mane yara ne kɔ Kalakɔan pepe hɔn ne fangan dɛ ye ma wiin fa to ye ne Wuro togo yaga. N’a banɔmayɔ do ma yɛrɛ, ma mane lɛ ne dɔɔ ye ma ne yaa kirezɛ hɔn. ¹² Bo yee boo kɔɔ ma, ma mane ti ne yaa Damasekuru hɔn, salakawɛvɔre ta sebe ne ti ne ta, ma ne yaa ye ta fanɛ na. ¹³ Bo mɛ mane ti sogo ma fanganma, sintogo hɔn nɛmɛ. Ye da ye tɔɔ mɛ ɔɔn kini boo za, a ɔɔn tuma wuro hɔn ɔn wɔlɔ yi sin na kini ma ɔn zii naa pi mɛ kɔ ne yakwɛre ma. ¹⁴ Mɛ́ pepe ɔɔn kwɛ bɛrɛ, ye da ye tɔɔ mɛ ɔɔn bɛrekɔn boo mɔɔ Heburoda hɔn a ne kwa ne ma, ye Sɔle Sɔle, ye wɔnnɔ na be ne yannɛ? Ye hali ma ɔɔn bere wiin nɛ pepe, ye ma sbɛ ne dɛ ga, wɔkara worofa sbɛ ne dɛɛ ye na worota ta gwangan ta wiin nɛ ga. ¹⁵ Mɛ ɔɔn toga d’a bi kɔ te Matigi? Matigi ɔɔn da, y’a yi Yezu ma wiin yannɛ. ¹⁶ Ye nka ma bere tuma, ye ma tuma taa ne kaɛn ma. Ye ye ye yɛrɛ dɔrɔ ne ma wiin fa ye na, ye bo wɔn: Ye ye ye yɛrɛ dɔrɔ ne ma wiin dɔre we na ɔnkɔ ma na bere n’e za wiinye dɔreda hɔn yɛ, ye ye kia ma tɛ wɔnwɔ na siɛrɛte na ɔn tɛ y’a baratɛta na. ¹⁷ Ye ye na ne yabɛ wiinye sii kɔ wiinye sizɛ brɛ, ye ye ne dɛn ne ne wa ye sra hɔn sin ¹⁸ wiin fa to ma ye yinna koba, ye ye timi bere tunio ma ɔn ye zin bere kini ma. Ye ye timi bere Sitanɛ ma ɔn ye zin bere Wuro ma wiin fa to ye y’a kakiɛ na yafa gun ɔn ye nii gun yi ta kɔrɔ na yɔnmabe baraka hɔn kɔ Wuro ta kma. ¹⁹ N’a bii wɔnna do hɔn yɛ fanganma Agiripa, mɛ maga wɔnna wuro hɔn zɛfa we ta da na ga. ²⁰ Nka n’a bii Damasekma ma kɔ Zeruzalɛmukma kɔ Zudegiamana pepe hɔn, ɔn fɔnɔ yaa wiri sizɛ brɛ, m’a yira n’a dɔrɔ ye ma ɔn da ye ye zugo katra ɔɔn ye zin bere Wuro ma ɔn ye datɛnɔn kayan kɔ wɔnna zugokatra we. ²¹ Bo wɔn ye na Ziwifu ne foga Wuro ta kɔɔn hɔn ne kia ne yɛɛ. ²² Nka Wuro ta diɛma baraka hɔn, ma tiye hali naa n’a kwɛ sma ma n’a ta da yira smayeye kɔ durukma ma. Wuro ta daberebɛre kɔ Moyizi mane pia wiin fa yira ɔn da wɔn ɔɔn na tɛ, ma foyi yira n’a kwɛ wɔn ma ga. ²³ Ye Krista yannɛ, y’awe ɔɔn pia winnisa sara yɔ ne daga kini da yira kià sii kɔ sizɛ ma.» ²⁴ Pɔle mane ti y’a da nɔma yira hɔn, ye da ye tɔɔ Fɛsetuse ɔɔn bare gwangwana yuu ɔn da: «Taa be kakaba Pɔle. Bia tɔɔ pepe be ta be ne kakaba.» ²⁵ Nka Pɔle ɔɔn d’a ma: «Mɛ na te Fɛsetuse, ma kakaba ga. Tian na bɛreda kɔ yinnamalɔda ma ɔɔn yira. ²⁶ Fanganma, ma ti ne wɔnna da wɔ yira bi wiin te ma kɔ worasigi, ma tɔɔ da b’e pepe yɔnnɔ tɔɔ, ye na foyi mane dɔn be na ga bare ye tɛ bɔɔ kɔkɔgɔlɔ hɔn ga. ²⁷ Fanganma Agiripa, be Wuro ta daberebɛre ta bɛreda tɔɔ tian ra? Ma tɔɔ da b’e tɔɔ tian.» ²⁸ Wɔn tɛ Agiripa ɔɔn da Pɔle ma: «Be m’a yira nɛ ga, be wɔɔ zɔgɔ ɔn ne ta Krista timite na.» ²⁹ Pɔle ɔɔn da: «Ye zɔgɔ na da nka ne da na yire ye mɛ. Wuro ɔɔn dian ye na, a na ne bi dama ga nka wiinye kma pepe ɔɔn mɔɔ ne ta bo sma be o, mɛ wiin fa, ka na tɛ wɔn na mɛ. Nka wiinye zɔgɔre ɔɔn ti ne sra hɔn, wɔnwɔ nɛmɛ na ne ti ka sra hɔn ga.» ³⁰ Fanganma kɔ mara wɔnnate Berenise kɔ wiinye kma ɔɔn mane kwɛ ne tangan kɔ lege, ye mane kwɛ tuma. ³¹ Ye na sasangan ma, ye mane baro boo ta ye nɛmɛ hɔn ɔn da: «Bo sɔɔn be foyi ta wiin ɔɔn n’a yɛwɔn wɛlɛ n’a pɛrɛwɔn wa kɔ zɔgɔre ga.» ³² Agiripa ɔɔn da Fɛsetuse ma: «Bo sɔɔn be m’a da ye fanganmagwaga ɔɔn daga y’a da yɔnnɔhɔnwa ga, a mane sbɛ ne drɛ.»

¹ Ye naa bɛɛn mià Italiyuru na wiin sangan ma koro hɔn, ɔn Pɔle kwɛ kɔ bɔɔ kasonɔma n’e pere Ogusite ta sɔrɔdasi na zɛngɛnte boo ma wiin ɔɔn mane kasoyɛrevɔ, ye n’a togo wiri Zuliyuse. ² Ye tɛ yee ke mane kɔ Adaramitimekma ta koro boo hɔn wiin ɔɔn mane ti ne yaa Azigiamana hɔn. Masedowanegiamana hɔn sɔɔn Arisitarake wiin ɔɔn tangan Tesalonikekuru hɔn, wɔn mane ti kɔ ke nɛmɛ. ³ Ye na winnisin, kià tɛ ɔɔn mane taa Sidɔnkuru hɔn. Zuliyuse ta tɛ ɔɔn mane kwa Pɔle ma, a mane sogo pere a ma ɔn d’a mare wiinye ɔɔn ti yeyɛ, a yaa bire ye na ɔn ye mako na frɛ gun ye ta. ⁴ Ke naa tuma wɛɛn, ɔn ke bere kɔ koro hɔn yɛ ɔn yaa dɔɔ Sipre na tolo wee bare pangan mane wirɛ ne ke tɛn. ⁵ Ye tɛ yee, ke mane dɔɔ Silisi kɔ Panfili, ɔn yaa zii Mire Lisigiamana ma. ⁶ Sɔrɔdasi na zɛngɛnte we mane Alɛkisandirekma ta koro boo za wɛɛn wiin ɔɔn ti ne yaa Itali. A ɔɔn ke kɔbɛ wɔn hɔn. ⁷ Yin damanɛ yɔ, kià koro mane tɔngɔn ne gun siɛsiɛ ga. Ye tɛ yee, ke mane bana fɔrɔna ɔn sbɛ ne wiri Kenidikuru hɔn. Pangan ta tɛ ɔɔn mane wirɛ ne ke tɛn, ke mane dɔɔ Kerɛte na tolo wee Salamone ta zokɔretado brɛ piri ma. ⁸ Ke mane wɔnna bii we hɔn fɔnɔ salesale ɔn yaa wiri boo piri boo ma Lasekuru kiege ma, ye wɔn wiri da Zokɔretado na Fɔrɔ yi. ⁹ Wagati na yaan yi mane fɔnɔ. Wiin wuru ɔɔn mane naa, wɔn mane tɛ farasi na yi zokɔrewirɛ na bare Ziwifu ta sun na wagati mane fɔnɔ wɛ. Pɔle mane kia y’a giatɛ yira, ¹⁰ ɔn da ye ma: «Ka sege rɛ kià kma, mɛ a za da kɔrewirɛ be na naa kɔ yaga kɔ bɔnɔ na yire ye bie wɔ kɔ koro we ma ɔnkɔ ke yɛrɛ ma mɛ.» ¹¹ Nka sɔrɔdasi na zɛngɛnte we mane dɔɔ koro wɔnnate kɔ koro na te ta fanɛta domada ma ɔn yalo Pɔle ye ma. ¹² Zokɔretado we ta tɛ ɔɔn ma mane fɔrɔ siɛ, koro ne sbɛ ne wɔɔ yeyɛ ɔn pian hɔn pepe ta ga, sma wɔ na yaan ye yɛrɛ mane kia ke kià yuru ta ɔn sege da ke na sbɛ wiri Fenikisi ɔn pian hɔn ta wɛɛn ra? Wɔn boo zokɔretado wiin ɔɔn ti Kerɛtegiamana hɔn ne kibɛ saan hɔn piri ma na wurowɔn ma piri ma kɔ kudoma piri ma na wurowɔn ma piri ma mɛ. ¹³ Pangan zɔgɔ bɔɔ mane tuma saan hɔn piri ma, ye n’a giati ɔn da, ye ye mane wiin giatɛ we bii, ye wɔn sbɛ ne tɛ. Ye tɛ yee, ye ɔɔn koro na tabɛbalo duro suu ɔn da, ye ye tɛ ye dɔɔ Kerɛte na tolo kiege ma. ¹⁴ Nka ye tɛ wɔkara wɔnna nɔɔ hɔn yɛ sin panganye bɔɔ ɔɔn tuma kudo ma piri ma ɔn naa bɛrɛ ye ma. ¹⁵ Koro we ɔɔn fɔnɔ zii du hɔn piri ma, mane sbɛ ne bere ne ba pangan ta titiri ga. Ye tɛ yee, ke ɔɔn ke yɛrɛ to pangan wɔ ma. ¹⁶ Ye mane tɔngɔn yaa yɛngɛnzu na korilɔ boo brɛ, ye wiin wiri da Koda. Wɛɛn kɔnɛ ke wɔnnadia, ke ɔɔn sbɛ koro na diɛmakoro boo gun. ¹⁷ Ye naa sbɛ wɔn kɔbɛ n’a gun koro we hɔn wiin sangan ma, ɔn bɔɔ pɛrɛnɔma pɛrɛ kià koro kiɛgɛ pepe ma. Ye ta tɛ ɔɔn mane kwan ɔn da, ye koro we ka naa yaa kɔ ke nɛmɛ Libigiamana na banyege ma ga, koro na tabɛfa wiin ɔɔn sbɛ ne tɛ koro we ne dɔɔ pangan ma yɛ, ye ɔɔn wɔn wa wɔn ka zu hɔn. Ye tɛ yee, pangan ɔɔn mane ke yɛn yɛ. ¹⁸ Ye na winnisin pangan ta tɛ ɔɔn mane ke yannɛ yɛ, ye ɔɔn dutigɛ ne koro we hɔn frɛ wa n’e dra yɛngɛnzu hɔn. ¹⁹ Ye na yin saaro kɔɔ ma yewɔ yɛrɛ ɔɔn koro we na frɛ wa ne dra kɔ ye sra. ²⁰ Yin damanɛ mane fɔnɔ, sɔɔn mane sin za ga, mane mamala za mɛ ga. Pangan mane wirɛ ye wirɛnɔn na yɛ fɔrɔna fɔn ke nina ɔɔn ban fɔrɔna, ke mane yɔɔn kisi tala boo ma titiri ga. ²¹ N’a bii siɛdɛrɛ ma da hɔn, ke mane foyi zɔn titiri ga. Bo wɔn ɔɔn tɛ Pɔle ɔɔn mane tuma taa ye woro hɔn ɔn da ye ma: «Ka za rɛ kià kma, ka mane daga dian n’a yirada na ke m’a wɔɔ Kerɛte ɔn ka bɔnɔ bɔ frɛ bɛ hɔn ga. ²² Nka basiɛ m’a kia ka ta ka ka wora sige bare ka na sɔɔn sii na siri ga, koro we dama ɔɔn na yaga. ²³ Sma wuru be yɛrɛ hɔn, mɛ wiin Wuro yi ne bara ta a ma, a ta mɛlɛkɛ boo ye yɛrɛ dɔrɔ ne ma ²⁴ ɔn da ne ma, ye ma ka kwan ga Pɔle. Ye fanganmagwaga na ne kiti, ye ma ti kɔ wiinye kma pepe n’a yuru hɔn mɛ, ye Wuro n’e pepe to ni na y’a woramadiabe baraka hɔn, a wiin ta ne ma. ²⁵ Wɔn ye na, kià kma ka ka wora sige. Mɛ yɔɔn Wuro ma. A ye yira ne ma wiin nɛ, yee ye na tɛ. ²⁶ Nka ke na yaa drɛ yɛngɛnzu na korilɔ boo ɔɔn ma.» ²⁷ Yin funnaanɔ kɔɔ ma, boroma wola hɔn, pangan wɔ ɔɔn ke yɛn yaa kɔ ke nɛmɛ Yɛngɛnzugwaga brɛ. Kɔrɔwirɛsma wɔ mane sɔnmɛ ɔn tɔɔ da ke vetra lagakɔn na. ²⁸ Ye ɔɔn zioyirabɛfa wa n’a ka zu hɔn n’a yirabɛ. A ta dɛrɛ mane kayan mɛtɛrɛ kiofun ne nɔma kopra. Ye naa ye yabɛ zin zɔgɔ yɛ, ɔn n’a yirabɛ ye mɛ. A ta dɛrɛ mane mɛtɛrɛ kioro ne nɔma korosɔɔn. ²⁹ Ye mane kwan ɔn da kià koro na yaa vuro bɔɔ dɔge hɔn. Wɔn tɛ ye ɔɔn koro na tabɛbala naa wa n’e ka koro we timi ne kɔɔ ta kiɛ yɛ́rɛ salesale. ³⁰ Nka kɔrɔwirɛsma wɔ ta tɛ ɔɔn mane kia tɔngɔn, ye ɔɔn koroslalo wa n’a zibɛ zu hɔn ɔn yira da, ye ye yaa bɔɔ tabɛbala ka koro we zin hɔn. ³¹ Wɔn tɛ Pɔle ɔɔn da sɔrɔdasi na zɛngɛnte ma kɔ sɔrɔdasi wɔ ma: «Bɔ sma bɛ ma wɔɔ bɛɛ ga, ka na dɛɛ ga.» ³² Wɔn tɛ suu sɔrɔdasi wɔ ɔɔn pɛrɛnɔma wɔ sɔɔ ɔn koroslalo we to a ɔɔn yaa. ³³ Sanɛ kɔɔ ne kiɛ Pɔle man’a kia sma pepe ta ɔn da ye zɔn. A mane da ye ma: «Sma ɔɔn n’e yin fun naa ka ne yɛre ɔn mane foyi zɔn ga. ³⁴ Wɔn ye na, m’a kia ka ta da ka zɔn bare wɔn ɔɔn sbɛ ne tɛ ka kisi. Ma ye yira ka ma yɛ mɛ ɔn da foyi tala boo na tɛ ka na sɔɔn sii na ga.» ³⁵ Wɔnna domada wɔ yira wɛ timi ma, a ɔɔn buru bii, ɔn baraka yira Wuro ma sma pepe yɔnnɔ na, n’a yɔyɔ, ɔn n’a zɔn. ³⁶ Wɔn ɔɔn mane tɛ sma pepe wora ɔɔn sige, ye ɔɔn zɔn mɛ. ³⁷ Ke pepe na kwɛ yi mane sma zɔpla ne kiesaafun ne nɔma konala (276) koro we hɔn. ³⁸ Ye naa zɔn yingin wiin sangan ma, wiin bile ɔɔn mane ti koro we hɔn, ye ɔɔn wɔn wa wɔn dra yɛngɛnzu hɔn wiin fa to koro we zara zɔgɔ. ³⁹ Bo kɔɔ naa kiɛ wiin sangan ma kɔrɔwirɛsma wɔ ma lagakɔn we dɛ́gɛ tɔɔ ga nka ye yɔnnɔ mane ti dungundo boo ɔɔn na yee ɔnkɔ banyege. Ye mane giati ne kwa, ye ye ɔɔn mane na sbɛ, ye mane na yaa koro we tabɛ yeyɛ. ⁴⁰ Ye mane koro na tabɛbala firi ne to yɛngɛnzu hɔn yɛ, wiinye pɛrɛnɔma ɔɔn mane ti koro we na ne figɛ kɔ a na paga, ye ɔɔn wɔnwɔ firi mɛ. Wɔn timi ye ɔɔn zogo boo pɛrɛ koro we zin wiin fa to pangan n’a yɛn yaa kɔ lege yege we brɛ. ⁴¹ Nka ye yaa kayan banyege na kwɛ yi boo ma zu kwɛdo hɔn, koro we ɔɔn taa wɔɔ. Koro we na zin hɔn piri ma mane mɛrɛ wɔɔ, koro we mane sbɛ ne yaa titiri ga. Wɔn da ye tɛ, zu na fangan ne koro we na timi piri ma yaga. ⁴² Sɔrɔdasi mane kakiri gun ɔn da, ye ye tɛ ye kasonɔma wɔ yɛɛ, ka tɛ ye na yinna ɔn tɔngɔn ga. ⁴³ Nka sɔrɔdasi wɔ ta zɛngɛnte ta tɛ ɔɔn mane kia Pɔle kisi, wɔn tɛ a ɔɔn ma dian ye ta giatɛ we ta tɛ na ga. A mane da, ye wiinye kma ɔɔn yinnanɔn tɔɔ, ye wɔnwɔ pia zii zu hɔn dɛn ɔn yinna yaa sa. ⁴⁴ Ye bɔ sɛrɛ na dɔɔ sɔrɔ wɛlɛ koro na yɔyɔ yi sere ma. Yee ke pepe mane tɛ ɔn yaa sa siara hɔn.

¹ Ke dɛɛ wɛ timi ma, ke mɔɔ ye da, ye wɔnna zu na korido we togo ti Malete. ² Yeyɛ kma mane dafɔre na yire ye ta ke ma. Wuro mane mɛnɛ, luu ne pɛ fɔrɔna. Ye ɔɔn togo na yire yi mulu ɔn ke pepe wiri ke ɔɔn yaa timi. ³ Pɔle mane yaa sɔkala bɔɔ bii n’e ka togo hɔn. Kɛbɔ ɔɔn sa ye hɔn tuu sra hɔn ɔn Pɔle wiin ɔn zolo wɔɔ a soro ma. ⁴ Yeyɛ kma ɔɔn kɛbɔ we na zɔlɔ yi za Pɔle soro ma, ɔn da ye nɛmɛ ma: «Tian na, bo sɔɔn be sɔnyɛta, a kɔnɛ dɛ yɛngɛnzu ta nka Wuro ta kiti kia n’a to ni na ga.» ⁵ Nka Pɔle ye soro sɛrɛ, kɛbɔ we ɔɔn bɛrɛ togo hɔn, foyi ma tɛ awe Pɔle na ga. ⁶ Bɔɔ mane giati ɔn da Pɔle soro na yɔn wɛlɛ a na bɛrɛ siri wɔnna nɔɔ tala hɔn. Nka ye n’a sege fɔn y’a siɛ dɛrɛ, n’a za da foyi tɛ a na ga. Wɔnna sangan ma ye ta giatɛ ɔɔn bere, ye ɔɔn da y’a boo yirebɛfa. ⁷ Zu we na korido hɔn sɔngwaga ta bii hɔn mane vetra yeyɛ na. Wɔnna sɔɔn we togo mane ti Pubiliyuse. Wɔn ke vɛbɛ ye brɛ. Ke yin saa ta yeyɛ, a ɔɔn dafɔre na yaan ye ta ke ma. ⁸ Pubiliyuse tɔn kɔn mane toba, a ne sian, sanganfa ne ti kɔ lege. Pɔle ɔɔn kɔ yaa n’a sege ɔn Wuro mɛ a ma ɔn ye sra dɛ a ma n’a kɛnɛbɛ. ⁹ Wɔn timi zu we na korido hɔn komatogapareresɛrɛ pepe mane naa a brɛ, a n’e kɛnɛbɛ. ¹⁰ Ye mane ke yirebɛ fɔrɔna. Ke na sasangan ye brɛ, ke mako mane sa wiin fa pepe hɔn, ye ɔɔn wɔn pere ke ma. ¹¹ Yɛgɛ saa wɔn timi, ke ɔɔn kɔ Alɛkisandirekma ta koro hɔn ɔn yaa. Wɔnna koro we mane pian hɔn ta zu we na korido hɔn. Ye man’a wiri da Girɛkisi ta Kwiyeri. ¹² Ke yaa wiri Serakusekuru hɔn, ɔn yin saa ta wɛɛn. ¹³ Ke naa sa wɛɛn, ɔn mini yaa wiri Ereziyo. Wɔnna winnisin, saan hɔn piri ma pangan mane wirɛ ne ke yɛn. Yin plalo kɔɔ ma ke ɔɔn yaa wiri Puzɔle. ¹⁴ Ke mane ke na plala bɔɔ za wɔnna kuru we hɔn. Ye n’a kia ke ta, ye ke yin kopra ta ye brɛ. Wɔn timi ke ɔɔn yaa Ɔrɔmu. ¹⁵ Ke na plala wiinye ɔɔn ti Ɔrɔmukuru hɔn, wɔnwɔ naa kià da mɔɔ wiin sangan ma, ɔn naa ke tɛn fɔn Apiyusetun hɔn kɔ Vɛda Saa brɛ. Pɔle ye za wiin sangan ma ɔn baraka yira Wuro ma, a woro ɔɔn ye bere sige. ¹⁶ Ke yaa wiri Ɔrɔmu wiin sangan ma, ye mane dian kɔɔn pere Pɔle ma a sana kɔ wiin sɔrɔdasisɔn ɔɔn man’a kɔrɔse. ¹⁷ Yin saa wɔn timi, Pɔle ɔɔn Ɔrɔmukma ta Ziwifu na sɔnmlala wiri ye brɛ. Ye naa kwɛ wiin sangan ma, a ɔɔn da ye ma: «Kià kma ma dayaga sii ta kià sii na ga, ma ke tamɛ ta landa yaga mɛ ga. Hali kɔ wɔn, ye ne foga Zeruzalɛmu ɔn ne ka Ɔrɔmukma sra hɔn. ¹⁸ Wɔnwɔ ne foga wiin sangan ma, ye mane kia ne to ma yaa bare ye da sii za ne hɔn wiinye ɔɔn ne yɛwɔn wa ga. ¹⁹ Nka Ziwifu da wɔn tɛ ga. Wɔn ye na ma n’a da to fanganmagwaga ma. Ye tɛ wɔkara ma kia n’a sii yagabɛ ga rɛ. ²⁰ Wɔn ye na ma ka wiri bɛɛ ɔn nɛmɛzɛ kɔ ka nɛmɛ. Tian na Isirayɛlesi ta yɔnmabe do ma bɔ zɔgɔre bɛ ti ne sra hɔn.» ²¹ Ye ɔɔn d’a ma: «Sɛbɛ sii tuma Zudegiamana hɔn ɔn naa pere mɛ́ ma bia da na ga. Ke na plala na sɔɔn sii ma bere naa bɛɛ ɔn naa bɔɔ bɛredayaga sii yira bia da na mɛ ga. ²² Nka wiin fa ɔɔn ti be kɔrɔ hɔn, mɛ́ kia wɔn mɔɔ bi yɛrɛ do hɔn bare sma bia nɛmɛ kwɛkuru togo yaga bii pepe hɔn.» ²³ Ye mane bɛɛn boo kɔɔ na kɔ Pɔle ɔn naa wɔnna kɔɔ we ma yaan a ta vɛdo hɔn. N’a bii kikima fɔn yaa lii ba, Pɔle wɔnna sogo we na da pepe kìnibɛ ye ma ɔn Wuro ta kolo hɔn da yira ye ma. Yezu ta da wiinye ɔɔn sɛbɛ Moyizi ta Tɛn hɔn kɔ Wuro ta daberebɛre ta sɛbɛ hɔn, a mane kia n’e zin bere wɔnna da wɔ ma. ²⁴ Ye na bɔɔ mane tɔɔ d’a ta yirada tian, bɔɔ ma yɔɔn ye ma ga. ²⁵ Ye mane bɛɛn ga. Sanɛ ye da ye yaa, Pɔle ɔɔn da ye ma: «Wuro ta Ni wiin fa yira ka tamɛ ma Wuro ta daberebɛta Izayi baraka hɔn, wɔn tian. ²⁶ A mane da, ye yaa yira bo sii be ma, ye ye na ne mɔɔ fɔrɔna nka ye na ne da kɔrɔ tɔɔ ga. Ye ye na ne sege fɔrɔna nka ye ye na ne foyi za ga. ²⁷ Ye bare bo sii be kakiri dɛgɛ fɔnɔ. Ye ye tɛ tramakwiɛsma na, ye ye ye yinna pi wiin fa to ye ka ne zɛ ga wiin fa to ye ka ne da mɔɔ ga ɔn n’e kɔrɔ tɔɔ ga, wiin fa to ye ka ne da na kayan ta ga wiin fa to ye ye zin bere yi Wuro ma ga wiin fa to yi ka naa n’e kisi ga. ²⁸ Wɔn ye na, ka tɔɔ da Wuro y’a kisi na bere fanɛ sisma ma wɔnwɔ ne na mɔɔ a ta.» [ ²⁹ Wɔnna domada wɔ yira wɛ timi ma Pɔle ta, Ziwifu ɔɔn yaa. Ye man’e nɛmɛ dakwiɛ fɔrɔna.] ³⁰ Pɔle mane kɔɔn boo kia sɔɔn boo ta ɔn dɔgɔ pla pepe ta wɛɛn n’a sara ye sana. Wiinye kma pepe ɔɔn mane naa a brɛ, a mane kwa ye pepe ma fɔrɔna. ³¹ A mane Wuro ta kolo hɔn da yira sma ma n’e kala kɔ Matigi Yezu Krista ta da yɔnmabe hɔn. Sɔɔn sii ma sɔɔ a ma ye na ga.