2 PIYƐRE

¹ Mɛ Simɔn Piyɛre Yezu Krista ta baratɛta ne a ta fanɛta ma bo sɛbɛ fanɛ sma ma wiinye ɔɔn mia yɔnmabe nɛmɛ gun kià Wuro kɔ ke na kisita Yezu Krista ta telebe do ma, ² ɔn da Wuro kɔ kià Matigi Yezu na tɔɔ tɛ ye y’a dadiamabe kɔ y’a siara ta ka ma yaan. ³ Tian na, wiin fa ɔɔn ke kayan kià sirewɔ hɔn kɔ kià Wuro ta da hɔn, Wuro ta sebe wɔn pere ke ma. Wiin te ɔɔn ke wiri y’a yirebe kɔ y’a fangan baraka hɔn, a tɛ ke ɔɔn wɔnna te tɔɔ. ⁴ Wiinye frɛ na do ɔɔn mane sɔɔ ke ma, ye tere ne ba yi frɛ pepe tere ma, yewɔ baraka hɔn wɔnwɔ pere ke ma wiin fa to wɔnwɔ baraka hɔn diniyan hɔn diamada ki wiinye kma paga, ka nii sbɛ wɛ wɔnna vrada wɔ hɔn ɔn kɔ Wurobe hɔn. ⁵ Wɔn ye na ka k’a sbɛ ye pepe ta ɔn foro kwɛ k’a yɔnmabe ma ɔn tɔɔ kwɛ foro ma. ⁶ Ka yɛrɛfigɛ kwɛ tɔɔ ma ɔn sɔmna kwɛ yɛrɛfigɛ ma ɔn Wuro na tɔɔ kwɛ sɔmna ma. ⁷ Ka marebe kwɛ Wuro na tɔɔ ma ɔn dadiamabe kwɛ marebe ma. ⁸ Bare wɔnna zugo wɔ ɔɔn ne ti ka hɔn yaan, ka sbɛ ne wɔɔ yee ɔn ka ne foyi ta ga, ɔn mane sbɛ ne wɔɔ yee ɔn ka kià Matigi Yezu Krista tɔɔ mɛ ga. ⁹ Tian na, wɔnna zugo wɔ ɔɔn mane ti wiin te hɔn ga, wɔnna te fuu wiin ɔɔn yaa ne lɔgelɔge yee. A na te sanfire ɔn da ye mane min ɔɔn kìni y’a gwerekakiɛ na. ¹⁰ Wɔn ye na kià kma, Wuro ka wiri ɔɔn ka dɛ́gɛ wiin dɛ́gɛ we na, ka fangan ka ka yɛrɛ hɔn yɛ ɔn wɔnna wiri wɔ do paga. Ka ɔɔn wɔn ta, ka ka kɔ dayaga hɔn abada ga. ¹¹ Wɔn ɔɔn na tɛ ka sbɛ kɔ kià Matigi kɔ ke na kisita Yezu Krista ta kolo na yagabareya yi hɔn zana. ¹² Wɔn ye na hali ka n’e nɔma tɔɔ, ne ti basiɛ tian hɔn siɛbɛ na, yee ma bere ne ka kakiri tugo kɔ lɔgɔ yɛ. ¹³ Nka ma tɔɔ mɛ ɔn da ma ne ti bo diniyan be hɔn, ma daga ne ka kakiri tugo. Ye bere ne daga mɛ. ¹⁴ Mɛ tɔɔ ne sirisangan wiri wɛ wɔkara kià Matigi Yezu Krista n’e nɔma yira ne ma wiin nɛ. ¹⁵ Nka ma na sige ne yɛrɛ ma wiin fa to ne siri wɛ timi ma, ma ka kala kɔ wiinye da, ka ne sbɛ ne ka kakiri tugo kɔ lɔgɔ sangan pepe ma. ¹⁶ Tian na, ye tɛ wɔkara bɔɔ sian na kayanbɛ ye ma mɛ́ pɛrɛbɛ ɔn ne kià Matigi Yezu Krista ta nada na sebe yira ka ma ga rɛ, nka mɛ́ a ta yirebe na kini za kɔ ke yinna. ¹⁷ Bare a togo kɔ yirebe gun Wuro ta wiin sangan ma, kɔn boo mane sa Wuro ta yirebe na kabako yi hɔn ɔn d’a ma, ye bo n’a moronanɔ wiin da ɔɔn dia ne ma, ma n’a dɛ́gɛ. ¹⁸ Mɛ́ yɛrɛ mane ti kɔ lege Wuro ta tolo ma, mɛ́ mane wɔnna kɔn we mɔɔ a ɔɔn tuma wuro hɔn. ¹⁹ Wɔn nii wɛ mɛ, Wuro ta daberebɛre domada wiinye ɔɔn n’e yira n’e kìni, wɔnwɔ ti mɛ́ ta mɛ. Wiinye domada wɔ na kayan ka daga ɔɔn ta, ye ye kinibɛ ka ma wɔkara fintina kini sabɛ tunio hɔn wiin nɛ fɔn yaa kayan kɔɔ ta kiɛ ma ɔn yaa kayan kikima mumulu ta sa ma ka kɔrɔ hɔn. ²⁰ Wɔn nii wa mɛ, ka daga tɔɔ da sɔɔn sbɛ ne Wuro domada kɔrɔ yira ye sana yee ga. ²¹ Tian na, sɔɔn dungo Wuro domada tala bɔɔ ta n’e za ga, nka Wuro ta Ni baraka hɔn bɔɔ sma mane Wuro domada yira.

¹ Daberebɛre na niɔnsɔ ye mane ti zamɛ yɔɔ wiin nɛ gwerena, yee kalasma na niɔnsɔ ye na ti ye yɔɔ yɛ. Ye na ne ka kala kɔ niɔn na da wiinye ɔɔn sma firebɛ, Matigi wiin yɛrɛ ɔɔn n’e wɔɔn wa, ye na ne kwa, ye wɔn tian ga. Wiinye bɔnɔ ɔɔn na sangan dɛrɛ ɔn naa ga, ye ne wɔnwɔ kia n’e dra ye yɛrɛ ma. ² Sma na yaan ye na dɔɔ ye ma ye ta kakalafa hɔn. Yewɔ ye na tian na sogo na tɛ Wuro togo na yagafa na. ³ Ye na ne lamarabɛreda yira ka ma ne k’a gwana tɔɔ. Ye na kiti dubi wɛ ye na yaga foyi wɔn yaga abada ga. ⁴ Bare wiinye mɛlɛkɛ ɔɔn kakiɛ ta, Wuro makare wɔnwɔ ma ga, a ye dra giaganɔma hɔn n’e tigɛ ne kitikɔ yɛ́rɛ. ⁵ Wuro makare diniyanbiri ma ga nka a mane zu na yaan yi nabɛ dayagatɛsma na wiin sangan ma, Nowe wiin ɔɔn mane dɛsma wɔ na sɔn korosɔɔnnɔ ne telebe puru n’a yira, a mane wɔn nii wa. ⁶ Wɔn timi a ɔɔn Sodɔmukuru kɔ Gomɔrekuru zarake ɔn togo ka ye ma n’e wɔnna. A wɔn ta tagamase na n’a dɔrɔ smayaga ma wiinye ɔɔn naa zin. ⁷ Lɔti sɔntele wiin ɔɔn mane yannɛ wɔnna vunatɛsma wɔ tɛnɔn ta, a mane wɔn dɛn. ⁸ Bare wɔnna sɔntele we mane tangan kɔ lɔgɔ n’e ta tɛda za n’e ta bɛreda mɔɔ. Kɔɔ pepe ma a mane yannɛ ye kɔrɔ hɔn ye ta tɛdayaga ta. ⁹ Yee Matigi sbɛ ne smatele dɛn n’e wa yannɛ hɔn n’e tigɛ ye yɛrɛ soro ma kitikɔ ma na telebareyasma yaga na. ¹⁰ Wiinye kma ɔɔn dɔɔ ye ma diamada ma ne Wuro ta da na wu wa, a na yaga yi wɔnwɔ. Wɔnna sma wɔ yɔɔn fɔnɔ ye yɛrɛ ma n’e yɛrɛyirebɛ, mane kwan kɔ wuro hɔn frɛ ta vini ga. ¹¹ Kamasɔrɔ mɛlɛkɛ wiinye ɔɔn fɔn kɔ yewɔ fangan kɔ sebe na, wɔnwɔ yɛrɛ mane dian ne wuro hɔn frɛ na zarakeda yira Matigi zin ga. ¹² Nka yewɔ sma wɔ wiinye ɔɔn wɔkara worofrɛ na yinni wiinye ɔɔn tɛtɛrɛ tigɛ wɔrefrɛ ye na ɔn yɛɛ, ye wiinye frɛ tɔɔ ga, wɔnwɔ ye ɔɔn vini ne na siri wɔkara sɔkobafrɛ. ¹³ Ye na telebareyafa na tɔnɔ gun. Ye dayagatɛ sin togo hɔn n’e yɛrɛ nihɔndia. Ye tɛ ne naa k’a zɔndo hɔn wiin sangan ma ne nihɔndia y’a lamara na, wɔn tɛ ma pere kɔ dayaga na yire ye. ¹⁴ Wiinye yàra yinna ma ɔɔn lɔ ga, wɔnwɔ ye kia ne fɔnɔ kɔ ɔɔn ye ta kakiɛ ne yaan ne yaa. Fanganduru ti wiinye kma na, wɔnwɔ ye ɔɔn gun y’a wɔrefrɛ hɔn. Gwanada na giatɛ ɔɔn ti ye kɔrɔ hɔn. Wuro ta vodɛ ti ye ma. ¹⁵ Ye sofɔrɔ dra ɔn dɔɔ Bosorasɔn Balamu ta sogo ma wiin ɔɔn mane tɔrɔ sara na telebareya yi ma, ɔn tɛ ye n’a diɛbɛ. ¹⁶ Nka a mane zarake ye yɛrɛ ta damɔbareyafa ye na. Worofa wiin yɛrɛ ɔɔn sbɛ ne bɛre ga, wɔn ɔɔn mane bɛre wɔkara sɔɔn ɔn sɔɔ daberebɛta we ta yinnida ma. ¹⁷ Yewɔ sma wɔ tɛ wɔkara wɔlokwiɛ, wɔkara wiin wuro ɔɔn sige pangan n’a tumabɛ. Tunio na yaga ye ɔɔn tigɛ ye ma. ¹⁸ Yɛrɛyirebɛbɛreda kɔ yinnibɛreda ye ɔɔn yira n’e yɛrɛ ma diamada na giatɛ bii n’e yira sma ma wiinye ɔɔn dɔ sa firesma hɔn n’e foga y’a wɔrefrɛ hɔn. ¹⁹ Ye tisramabe na do sɔɔ ye ma kamasɔrɔ yewɔ n’e yɛrɛ ta daronada ta tɛrɛ wiinye ɔɔn na n’e yaga. Bare wiinye da ɔɔn sbɛ be ta, be wɔnwɔ ta tere. ²⁰ Wiinye kma ɔɔn ye yɛrɛ dɛn ye wa diniyan hɔn doma hɔn kià Matigi kɔ ke na kisita Yezu Krista na tɔɔ baraka hɔn ɔn bere ye yɛrɛ to wɔnwɔ n’e yannɛ ne bɛrɛ ye ma yɛ mɛ, ye ta da na yaga yi ɔɔn yalo gwerena ma. ²¹ Bare ye ma mane telebe na sogo tɔɔ ga, wɔn mane na fɔn yi ye ma kɔ a ta tɔɔ ɔn ye timi bere Tɛn na kìni yi ma wiin ɔɔn mane yira ye ma. ²² Dakalo ma wiin fa yira kiɔ ga ɔn da, ye gwege bere ne y’a bian zɔn yɛ, wɔn ɔɔn tɛ ye na. Boo bere da mɛ, ye wiin tege ɔɔn dɔɔ min, y’a bere yaa ne pilemile vɔlɔ hɔn.

¹ N’a kma, bo ɔɔn n’a sɛbɛ plalo ka ma sin. Wɔnna sɛbɛ pla wɔ pepe hɔn, ma ka kakiri tugo kɔ giatɛ na fɔrɔ yi. ² Daberebɛre na fɔrɔ ye mane pia wiinye domada yira kɔ fanɛsma wiin tɛn yira ka ma, kià Matigi kɔ ke na kisita ta tɛn, ka ka kakiri to kɔ wɔnwɔ. ³ Ka daga pia tɔɔ dɛn da diniyanwɛsangan ma bɔɔ sma na naa wiinye ɔɔn na ne dɔɔ ye ma diamada ma. Ye na ne ka wopa ⁴ ne kwa ka ma, y’a wiin dosɔ ta ɔn da ye ye na naa, ye wee a ti? Ye bare ke tamɛ siri ma da hɔn, ye diniyan ti ye dannɔn na yɛ. ⁵ Ye na ne wɔn yira ne sanfire ɔn da gwerena Wuro ɔɔn bɛre, wurokɔn kɔ lagakɔn ɔɔn dan. Lagakɔn sa zu hɔn ɔn tɛtɛrɛ kɔ zu. ⁶ Wɔnna dadogo tala we ɔɔn pia gwerediniyan yaga mɛ n’a brabɛ zu hɔn. ⁷ A ma bo basiɛ wurokɔn kɔ lagakɔn mɛ han, wɔnna domada tala wɔ ɔɔn n’e tɛtɛrɛ n’e tigɛ togo ma. A ye tigɛ kitikɔ ma na kɔ zugoyagasma yɛkɔ ma na. ⁸ Nka fa tala kɔnɛ tiye, n’a kma ka daga sanfire kɔ wiin ga. Kɔɔ tala dama ti wɔkara dɔgɔ zɔfun (1,000) Matigi ta, dɔgɔ zɔfun ne wɔkara kɔɔ tala a ta. ⁹ Matigi wiinye da na do sɔɔ, a sangan dɛrɛ ɔn n’e ta ga, kamasɔrɔ bɔɔ ne kwa, y’a sale n’e ta ga. Nka a ka da sɔmna, a kia ka na bɔɔ naa siri ga, nka a kia ka pepe ka zugo katra. ¹⁰ Matigi ta kɔɔ na naa wɔkara panɔ. Wɔnna kɔɔ we ma, wurokɔn na mige kɔ digekɔn na yire yi. A na frɛ wiinye ɔɔn malo nɛmɛ ma, wɔnwɔ na walaka, lagakɔn kɔ ye ma tɛda mige. ¹¹ Wɔnna frɛ wɔ pepe debe ne daga yaga yee han, ki daga tɛ nɛ na sma sii na? Ka daga tɛ k’a tɛda ne kìni, ka ne dɔɔ Wuro ma siɛbɛ na. ¹² Ki wiinye ɔɔn Wuro ta kɔɔ yɛ́rɛ ne kia a sale wiri, togo na tuma wurokɔn ma wiin kɔɔ we ma a walaka wɛ nɛmɛ hɔn, a na frɛ wiinye ɔɔn malo nɛmɛ ma, wɔnwɔ na yuu wiin kɔɔ we ma. ¹³ A ye na do sɔɔ ke ma wiin nɛ ɔn da, ye telebe ti wiin wurokɔnwun kɔ wiin lagakɔnwun ma, ye wɔnwɔ na dan, ke tangan n’e yɛ́rɛ. ¹⁴ Wɔn ye na, n’a kma ka ɔɔn ne ti wɔnna yɛre we hɔn, ka sige ka yɛrɛ ma wiin fa to a na ka gun siara na tele yi hɔn, zarakedo ka ne ti ka na ga. ¹⁵ Ka daga tɔɔ da kià Matigi ɔɔn sɔmna sangan dɛrɛ ka wee, wɔn k’a kisi. Bo wɔn nɛmɛ ke na plalo ne ke maa Pɔle mane ɔɔn sɛbɛ n’e yira ka ma a ta tɔɔ baraka hɔn, Wuro wiin pere a ma. ¹⁶ A bɔ da bɛ na bɛreda yira wiin wɛɛn pepe, wɔn a ɔɔn sɛbɛ y’a sɛbɛ hɔn. Ye na bɔɔ sige. Wiinye kma ɔɔn foyi tɔɔ ga, ɔn mane kala mɛ ga, wɔnwɔ n’e kɔrɔ katra wɔkara ye Wuro domada na sɛbɛ kɔrɔ katra wiin nɛ mɛ y’a yaga ye na. ¹⁷ Awale n’a kma, ka dafa n’e mɔɔ n’e wɛ. Ka ka yɛrɛ kɔrɔse ka ka ka yɛrɛ to smayaga ma wiinye ɔɔn fire, ye naa ka firebɛ, ka ti wiin yɔnmabe hɔn, ye naa ka wa wɔn hɔn ga. ¹⁸ Nka ka ne fa kwɛ k’a tɔɔ ma kià Matigi ne ke na kisita Yezu Krista na suu. Yirebe tɛ a ma n’a bii basiɛ fɔn sangan pepe ma. Amina.