2 ZAN

2 ZAN

¹ Mɛ sɔnmlalo ɔɔn bo sɛbɛ fanɛ Wuro ta dɛ́gɛwɛya kɔ ye nɔmanɛ ma, wiinye da ɔɔn dia ne ma tian na. Ye da dia mɛ dama ma ga, nka wiinye kma pepe ɔɔn tian tɔɔ, ye da dia wɔnwɔ ma mɛ, ² tian ye na wiin ɔɔn ti ke hɔn ɔn ne na ne ti kɔ ke nɛmɛ sangan pepe ma mɛ. ³ Woramadiabe kɔ makare kɔ siara wiinye ɔɔn sa Tɔn Wuro ta kɔ Tɔn Nɔ Yezu Krista ta tian kɔ dadiamabe hɔn, wɔnwɔ na ne mɛ́ diɛma sangan pepe ma. ⁴ N’a tɛ ɔɔn be nɔmanɛ na bɔɔ za, ye ne yaa tian na sogo ma wɔkara Tɔn n’e yira ke ma wiin nɛ, wɔn nihɔndiaro na yire yi ka ne hɔn fɔrɔna. ⁵ Basiɛ han ya, m’a kia be ta ɔn da: Ye tɛ wɔkara boo tɛn na wun yi ma ɔɔn sɛbɛ be ma yɛ mɛ ga rɛ, nka a bo bire yi we yɛ wiin ɔɔn ti ke ta, n’a bii fɔn sangan dɛrɛ ma da hɔn ɔn da ka tɛ ke ke nɛmɛ da diabɛ ke ma. ⁶ Bo dadiamabe kɔrɔ: Ke ne yaa Wuro ta Tɛn na sogo ma. Wɔnna tɛn we ɔɔn pia yira ka ma n’a bii fɔn dubisangan ma wiin fa to ka ne yaa wɔnna sogo we ma. ⁷ Bare smafirebɛsma na yaan ye ti diniyan hɔn. Yezu Krista ta tɛ sɔɔn naa ɔn naa diniyan hɔn, ye wɔnna yɔnmabe we yira ga. Yewɔ ɔɔn niɔnsɔsma ne Krista zugi. ⁸ Ka ka yɛrɛ kɔrɔse wiin fa to ka ka naa bɔnɔ k’a bara na tɔnɔ hɔn ga. Nka ka ye na sara gun yaan. ⁹ Wiin te kɔrɔ hɔn ɔɔn toba fɔnɔ, ɔn ma wɔɔ Krista ta da na kala hɔn ga, Wuro ti wɔnna te ta ga. Wiin te ɔɔn wɔɔ Krista ta da na kala hɔn, Tɔn kɔ Nɔ ti wɔnna te ta. ¹⁰ Wiin te ɔɔn naa ka brɛ, wɔnna kala we mane ti a hɔn ga, ka ka tɛ a vɛ ka brɛ ga, ka k’a foga ga. ¹¹ Wiin te ɔɔn bire a na, wɔnna te tɛ a nɛmɛ barayagatɛta na. ¹² Da na yaan ye ti ne ta ɔn n’e yira ka ma nka ma kia n’e ka sɛbɛ hɔn ga. Bare ma kia naa ka brɛ ɔn n’e yira ka ma kɔ ne do wiin fa to kià nihɔndiaro sbɛ yire. ¹³ Be na plalo Wuro ta dɛ́gɛwɛya nɔmanɛ bire be na mɛ.