2 KORƐNTEKMA
11 Mɛ Pɔle Yezu Krista ta fanɛta Wuro dungo baraka hɔn kɔ ke na plalo Timote bo sɛbɛ ta n’e fanɛ Wuro ta kɔnkma pepe ma wiinye ɔɔn ti Korɛntekuru hɔn kɔ Wuro ta dɛ́gɛwɛsma pepe ma wiinye ɔɔn ti Akayi na mara pepe hɔn. 2 Ke Tɔn Wuro kɔ Matigi Yezu Krista tɛ ye y’a woramadiabe kɔ y’a siara ta ka ma. 3 Yirebe tɛ kià Matigi Yezu Krista Tɔn Wuro ma, awe wiin ɔɔn woramadiatɔn ne zigitugu pepe na Wuro. 4 A ke zigi tugu kià ninabanda pepe na wiin fa to wiinye kma pepe ɔɔn ti ninabannɔ hɔn, ke sbɛ wɔnwɔ zigi tugu kɔ zigitugu ke wiin gun awe Wuro ta. 5 Tian na, Krista yannɛ ke ye na wiin nɛ fɔrɔna, yee ke zigitugu na yire yi gun awe Krista baraka hɔn yɛ mɛ. 6 Mɛ́ ɔɔn ne ti yannɛ hɔn, be tɔɔ k’a zigitugu kɔ k’a kisi ye na mɛ́ yannɛ. Mɛ́ zigi ɔɔn ne tugu, wiin zigitugu ɔɔn tɛ ka ne sbɛ ne k’a yannɛ sɔmna, wɔn ɔɔn mɛ́ zigi tugu mɛ. 7 Wiin yɔnmabe ɔɔn ti mɛ́ hɔn ka ye na, wɔn yire. Mɛ́ tɔɔ da ka yannɛ ne kɔ mɛ́ wiin nɛ, yee ka zigi tugu ne kɔ mɛ́ yɛ mɛ. 8 Kià kma, mɛ́ kia ka wɔɔ yee ɔn ka ye yɔnnɔ tɔɔ ga. Wiinye yannɛ ɔɔn mɛ́ gun Azi, wɔn mɛ́ banabɛ fɔn yaa fɔnɔ ɔn ke fangan wɛ fɔn ke yɛrɛ ma tɔɔ ta ke sbɛ ne wɔɔ ni na titiri ga. 9 Mɛ́ yɛrɛ man’a giati ɔn da mɛ́ sirisangan ɔɔn wiri wɛ. Ye tɛ yee, mɛ́ mane yɔɔn ke yɛrɛ ma titiri ga nka Wuro ma wiin ɔɔn sara winni. 10 Awe ɔɔn mɛ́ dɛn mɛ́ wa wɔnna siri we hɔn ɔn ne na ne mɛ́ dɛn ne mɛ́ wa a hɔn suu. Awe ma ke yɔɔn, awe ɔɔn na ne ke dɛn suu. 11 Ki ka nii ka wɔn hɔn k’a wuromɛ baraka hɔn mɛ. Ye tɛ yee, mɛ́ na wiin woramadiabe we gun sma na yaan ye ta wuromɛ baraka hɔn, wɔn na tɛ barakayira na sma na yaan ye ta mɛ́ ye na. 12 Mɛ sbɛ ne nihɔndia wiin kɔrɔ ma na, bo wɔn: Mia tɛ ɔɔn n’e yɔnnɔ tɔɔ mɛ sana ɔɔn da mɛ Wuro ta telebe kɔ a ta kɔrɔhɔnkìni ta diniyan hɔn ɔnkɔ ki mɛ, wɔn ma tɛ sansukanpla ta datɔ baraka hɔn ga fɔn Wuro ta woramadiabe baraka hɔn. 13 Tian na ke na foyi boo sɛbɛ n’a yira ka ma ga fɔn ka wiinye kala ɔɔn n’e kɔrɔ tɔɔ. Nka ma ye yɔnnɔ tɔɔ ɔɔn tɔɔ da ka na kia yirada kɔrɔ tɔɔ. 14 Ka debe n’e na bɔɔ yɔnnɔ tɔɔ n’e wɛ han, mɛ ɔɔn k’a nihɔndiaro wɔkara ki mia nihɔndiaro wiin nɛ Matigi Yezu ta kɔɔ ma. 15 Wɔnna yɔnmabe we do ma, ma mane kia dɔɔ ka brɛ dɛn ɔɔn fa kwɛ k’a nihɔndiaro ma. 16 Ma ɔɔn tuma ka brɛ, ma yaa Masedowane. Ma ɔɔn tuma wɛɛn, ma bere naa ka brɛ wiin fa to ka n’a Zudegiamana hɔn yuru pepe na da yɔnnɔhɔnwa. 17 K’a giati da ma wɔnna giatɛ we ta ma ne kakiri tanganbɛ ga ra? Taa mɛ nɛmɛ ne ɔɔn kɔ awo yira k’a giati ɔn da mia giatɛ sansukanpla ta giatɛ le? 18 Wuro n’e yɔnnɔ tɔɔ ɔn tɔɔ da mɛ́ wiin fa yira ka ye na, wɔn «ɔɔn» ɔn ne bere ne «awo» ga. 19 Bare mɛ kɔ Silivɛn kɔ Timote Wuro nɔ Yezu Krista wiin ta da yira ka ma, wɔn «ɔɔn» ɔn ne bere ne «awo» ga nka a «ɔɔn» sangan pepe ma. 20 Tian na, awe ɔɔn «ɔɔn» we wiin ɔɔn Wuro ta dosɔ pepe do paga. Awe Yezu Krista baraka hɔn ke amina yira Wuro ma a ta yirebe ye na. 21 Wiin te ɔɔn mɛ kwɛ kɔ ki Krista hɔn, ɔɔn ne ke tɔbe, a Wuro. 22 Awe ɔɔn y’a tɔbe dɛ ke ma ɔn y’a Ni ka ke hɔn wiin ɔɔn n’a ta perefrɛ na zin hɔn yi. 23 Ma Wuro ta ne siɛrɛte na. A ɔɔn ma niɔn ma ɔɔn sɔɔ, a ka ne to ni na ga. Ka na makare ɔɔn tɛ ma ma dian naa Korɛnte ga. 24 Ye tɛ wɔkara ke ti ne fangan dɛ ka ma yɔnmabe na ga rɛ, bare yɔnmabe ti ka hɔn fɔrɔna nka ke kia baratɛ kɔ ka nɛmɛ k’a dangamu ye na.
21 Wɔn tɛ ma ɔɔn da ma na bere yaa ka brɛ titiri ga, ka tɛ ma naa ka ninaban ga. 2 Bare ga mɛ ɔɔn ne ki nina ban, kɔ te ɔɔn na mɛ nihɔndia? Ma ki wiinye kma ninaban, ye ki ga ra? 3 Wɔn ɔɔn mane n’a sɛbɛ tɛwɔn wiin fa to ma ka na naa wiin sangan ma a ma ninabannɔ ma naa ɔɔn gun ka ta ga, kamasɔrɔ a ma nihɔndiaro ɔɔn mane daga ne tiye. Ma wɔn yɔnnɔ tɔɔ ɔn tɔɔ da n’a nihɔndiaro wɔn k’a nihɔndiaro mɛ. 4 Ninabannɔ hɔn ma ti, ne yinnazio ne wɔrɔ fɔrɔna ɔn ne bɔ sɛbɛ bɛ ta ka ma. Ma kia ka ninaban ga nka wiin fa to ka tɔɔ da wiin dadiamabe ɔɔn ti ne hɔn ka ye na. 5 Wiin te ɔɔn dayaga ta, a ye ta mɛ na ga nka ki pepe na. Ke ɔɔn da ke ka ye sigebɛ ga, ke na da ki na bɔɔ na a ye ta yɛ. 6 Ka na yaan ye ɔɔn daga n’a na te yɔnnɔhɔntoba yee dama. 7 Bo wɔn ɔɔn tɛ ma ɔɔn da ka ma basiɛ da ka yafa a na te ma ɔn n’a woro sigebɛ wiin fa to a bona ka na tɛgɛ ɔn yaa fɔnɔ ga. 8 Wɔn nii wa mɛ, m’a kia ka ta ɔn da k’a na te da diabɛ ka ma. 9 Bare bo sɛbɛ be tɛwɔn ne ta, ma kia ka ta ka sege ka ɔn ne mɔɔ ne ta fɔrɔna. 10 Ka ɔɔn yafa wiin te ma, ma yafa wɔnna te ma mɛ. Mɛ ɔɔn yafa, bare ma daga ne yafa ta, ma ye ta ki ɔɔn ye na Krista zin hɔn 11 wiin fa to Sitanɛ ta mama ka naa ke gun ga. Bare ke a ta giatɛ tɔɔ. 12 Ma mane yaa Krista ta fanɛdia yira na Torowasekuru hɔn, Matigi kɔnɛ mane na tɛ ma barafɔre ta yeyɛ. 13 Nka ne kakiri mane tangan bii tala hɔn ga bare ma mane ne na plalo Tite za ga. Wɔn tɛ ma ɔɔn sogo kia ye ta ɔn yaa Masedowane. 14 Ke baraka yira Wuro ma wiin ɔɔn sebe pere ke ma sangan pepe ma Krista baraka hɔn. A tɛ Krista na tɔɔ ne wiri bii pepe hɔn wɔkara wunnudiafa wunnu. 15 Ye tɛ yee, wiinye kma ɔɔn ti kisi na sogo ma kɔ wiinye kma ɔɔn ti firesogo ma, ke ɔɔn tɛ wunnudiafa na Krista ta Wuro ma wɔnwɔ ye na. 16 Wiinye kma ɔɔn ti firesogo ma, a wunnu naa kɔ siri wɔnwɔ ma. Wiinye kma ɔɔn ti kisi na sogo ma, a wunnu ni pere wɔnwɔ ma. Kɔ te ɔɔn tiye ne sbɛ ne wɔnna bara wɔ nɛmɛ ta? 17 Wiinye sma na yaan ye wɔ ɔɔn Wuro domada katra ne tɔnɔ kia ye hɔn, mɛ́ wɔnwɔ nɛmɛ ga. Tian mɛ́ ɔɔn yira Wuro togo na wɔkara Krista ta baratɛre daga n’e ta wiin nɛ.
31 Bɔ domada bɛ n’a dɔrɔ ɔɔn da mɛ́ mɛ́ yɛrɛ yirebɛ yɛ mɛ ra, taa ke kià sɛbɛ fanɛ ka ma wɔkara bɔɔ tɛ ne tɛ wiin nɛ wiin fa to k’e yira ka ma wɛlɛ ɔn da ka ke yirebɛ? 2 Ki ɔɔn mià sɛbɛ, wiinye ɔɔn sɛbɛ mɛ kɔrɔ hɔn, sma pepe n’e yɔnnɔ tɔɔ n’e kala. 3 Ka ye yɔnnɔ tɔɔ ɔn tɔɔ da ki ɔɔn Krista ta sɛbɛ wiin ɔɔn kalfa mɛ ma. A sɛbɛ kɔ tɔbetɛzio ga, nka a sɛbɛ kɔ Wuro na siɛbɛ yi ta Ni. A sɛbɛ dɔge na walage ma ga nka komavere na ye ma ka kɔrɔ hɔn. 4 Wiin yɔnmabe ɔɔn ti mɛ́ hɔn Krista baraka hɔn Wuro zin hɔn, bo ɔɔn wɔn. 5 A mɛ́ yɛrɛ ta sebe baraka hɔn, mɛ́ sbɛ n’e ta ga, Wuro ta mɛ́ yɛrɛ mià sebe gun. 6 Awe ɔɔn tɛ mɛ́ ne sbɛ ne tɛ bɛɛn na wun yi na baratɛre na wiinye ɔɔn sɛbɛ hɔn ye ga, ke Wuro ta Ni ɔɔn na ye. Bare sɛbɛ sɔɔn yɛɛ nka Wuro ta Ni wɔn wɛbareyani ka sɔɔn hɔn. 7 Awale siri na sɛbɛ wiin ɔɔn mane sɛbɛ dɔgɔnɔ ma, wɔn ɔɔn yirebe gun wɔkara Moyizi, Isirayɛlenɔmanɛ mane sbɛ n’e yinna duro ɔn wiin sege a ta yirebe do ma ga, kamasɔrɔ wɔn ne fɔnɔ wɔnna zin we ma. 8 Nɛ ni ta yirebe na tɛ ɔn ma yalo wɔn ma ga? 9 Wiin fa ɔɔn sma ka siri hɔn, wɔn ɔɔn yirebe gun, nɛ telebe yi na tɛ ɔɔn ma yalo wɔn ma ga? 10 Ke sbɛ ne da wiin yirebe ɔɔn pia wɔlɔ gwerena, wɔn wiri bo basiɛ yi ta wiin nɛmɛ ɔɔn tiye ga. 11 Bare wiin fa ɔɔn fɔnɔ, wɔn ɔɔn yirebe gun, wiin fa ɔɔn wɔɔ, nɛ wɔn yi na tɛ ɔn mane yaga yi ga? 12 Wɔnna yɔnmabe we ta tɛ ɔɔn ne ti mɛ́ hɔn, wɔn tɛ mɛ́ ɔɔn tɔɔ da ye tian. 13 Mɛ́ zogo pi mɛ́ zin ma wɔkara Moyizi mane tɛ wiin nɛ ga wiin fa to Isirayɛlenɔmanɛ ka naa yirebe za wiin ɔɔn fɔnɔ. 14 Ye kakiri mane yaga fɔnɔ. Bo wɔn ɔɔn tɛ hali naa n’a kwɛ sma ma, ye ɔɔn ne Wuro ta bɛɛn na bire yi na sɛbɛ kala wiin sangan ma wɔnna zogo we ne pi yɛ. A kibɛ ga bare Krista baraka hɔn a daga wɛ. 15 Tian na, hali ɔɔn naa n’a kwɛ sma ma, ye ne Moyizi ta sɛbɛ kala wiin sangan ma, fa tɛ ne pi ye kakiri ma. 16 Zugokatra dama ɔɔn dɔɔ Matigi ma, wɔn ɔɔn sbɛ ne tɛ fa we kibɛ wɛ. 17 Bare Matigi ɔɔn Ni. Matigi ta Ni ɔɔn ne ti wiin wɛɛn, wɛɛn tisramabe ti. 18 Ke wiinye kma pepe yinna hɔn ɔɔn kìni, ke na Matigi ta yirebe nɔma dɔrɔ, ke tɛ wɔkara wɔnna gia we mɛ, yirebe we ne yire ne yaa suu mɛ Matigi baraka hɔn, wiin ɔɔn Ni.
41 Wɔn nii wa mɛ, a debe ma woramadiabe do ma mɛ́ wɔnna bara wɔ gun, mɛ́ mɛ́ koma siribɛ ga. 2 Mɛ́ foyi boo ta wiinye ɔɔn dɔnda ga, ma peremagada ta ga ɔn mane na dian bɛrɛmafa na ga ɔn mane Wuro domada katra mɛ ga. Nka ke telebe ɔɔn ta wiin fa to ke sma pepe ta yɔnmabe gun Wuro yɔnnɔ na. 3 Hali ɔɔn naa n’a kwɛ sma ma, mià fanɛdia ɔɔn mane kini dɛn ga, wiinye kma ɔɔn fire, wɔnwɔ ta a kini ga. 4 Wɔn yɔnmabe ti wiinye kma hɔn ga, Sitanɛ wiinye kma yinna pi ɔn n’e kakiri yaga, wiin fa to Krista wiin ɔɔn Wuro gia, ye ka wɔn ta yirebe na fanɛdia na kini za ga. 5 Mɛ́ mɛ́ yɛrɛ da yira ga nka Matigi Yezu Krista ta da mɛ́ ɔɔn yira. A ma mɛ́ han, mɛ́ a yira n’a dɔrɔ ka ma da mɛ́ tɛ k’a baratɛre na Yezu ye na. 6 Bare wiin Wuro ɔɔn da ye kini sa tunio hɔn, awe yɛrɛ ɔɔn wɔlɔ ke kɔrɔ hɔn wiin fa to a ta yirebe wiin ɔɔn wɔlɔ Krista zin ma, ke sbɛ wɔn na tɔɔ gun. 7 Nka mɛ́ wɔnna naforo we bii vɛrɛsia hɔn wiin fa to wɔnna sebe we wiin nɛmɛ ɔɔn tiye ga, wɔn ka ne sa mɛ́ hɔn ga nka a sa Wuro ɔɔn hɔn. 8 Wiinye yannɛ ɔɔn dɛ mɛ́ ma bii pepe hɔn, wɔnwɔ foyi ta ke na ga. Ninabanda sii pepe ɔɔn tɛ ke na nka ke koma siri ga. 9 Ye mɛ́ laga mane ke gun ga, ne mɛ́ bɛrɛ mane sbɛ ne fa ta ke na ga. 10 Mɛ́ taa Yezu ta da na yannɛ na wiin fa to a ni ne ti ke hɔn. 11 Sangan pepe ma ye mɛ́ nima ka siri hɔn Yezu ye na wiin fa to Yezu ni ne ti mià sirewɔ hɔn. 12 Ye tɛ yee, siri bara ta mɛ́ hɔn nka ni ne ti ki hɔn. 13 Nka wɔnna yɔnmabe tala we wiin da ɔɔn sɛbɛ ɔn da, ye yɔnmabe ɔɔn kɔ ne hɔn, ye wɔn ɔɔn tɛ ma ɔɔn bɛre, wɔn tɛ yɔnmabe ɔɔn kɔ mɛ́ hɔn mɛ, mɛ́ ɔɔn ne bɛre. 14 Bare ke ye yɔnnɔ tɔɔ ɔn tɔɔ da wiin te ɔɔn Matigi Yezu winni, wɔnna te na ke winni kɔ Yezu mɛ ɔn mɛ́ kɔ ki tigɛ ye kiege ma. 15 Wiin fa pepe ɔɔn tɛ mɛ́ na, ki ye na a tɛ mɛ́ na wiin fa to woramadiabe ɔɔn ne yire ne yaa, zamɛ na yaan ye ne baraka yira Wuro ta yirebe ma. 16 Bo wɔn ɔɔn tɛ mɛ́ koma ɔɔn mane siri ga. Hali mɛ́ yasɔ ɔɔn ne kiɛgɛ ne yaa ne vetra ne yaa sirido ma, mɛ́ tɔɔ da mɛ́ kakiri bere ne tɛ wun yi na kɔɔ pepe ma. 17 Bare mià kanyɔnnɔ tala na ninabannɔ yirabɛ ne kɔ a wiin yirebe na wɛbareya yi tɛtɛrɛ n’a tigɛ ke ma ga. 18 Wiin fa ɔɔn zɛ, a wɔn mɛ́ ɔɔn giati ga, nka wiin ɔɔn zɛ ga. Wiin fa ɔɔn zɛ, wɔn na yaga nka wiin ɔɔn zɛ ga, wɔn wɛbareya yi.
51 Wiin kɔn ɔɔn ti mɛ́ ta ne wɔkara wiin wɔdo ɔɔn na yaga, mɛ́ tɔɔ da wɔdo ti ke ta wuro hɔn wiin ɔɔn na yaga ga. Wɔn Wuro ta tɛtɛrɛ yi, a sɔɔn ta tɛtɛrɛ yi ga. 2 Mɛ́ sige mɛ́ yɛrɛ ma fɔrɔna wiin fa to mɛ́ sbɛ yaa gun wɔnna wuro hɔn kɔɔn we hɔn. 3 Wiin fa to ke sbɛ yaa kià zoga ka ɔn ka wɔɔ gwelengwele ga. 4 Bare ke wiinye kma ɔɔn ti bo tinɔn be na, ke yannɛ fɔrɔna. Ye tɛda ke kia ke wola ga nka ke kia bɔɔ zoga ka n’e dɛ bɔ ma wiin fa to wiin fa ɔɔn siri yi, ni sbɛ pi wɔn ma. 5 Wiin te ɔɔn ke tɛtɛrɛ wɔnna nada wɔ na, a Wuro wiin ɔɔn y’a Ni pere ke ma y’a perefrɛ na zin hɔn ye na. 6 Ye tɛ yee, yɔnmabe ti ke hɔn sangan pepe ma, ke ɔɔn tɔɔ da a ɔɔn ma bɔ koma bɛ ɔɔn ti ke ta, ke ti kià wɔdo hɔn ga, ke brɛ ne dɛrɛ Matigi na. 7 Bare yɔnmabe ma ke dɔɔ, ke dɔɔ zɛda ma ga. 8 Tian na, yɔnmabe ɔɔn ti ke hɔn, wɔn ɔɔn tɛ ke ɔɔn ne kia sa bɔ koma bɛ hɔn ɔn yaa wɔɔ Matigi kiege ma. 9 Nka mɛ́ wiin fa kia, bɔ kɔn bɛ ti ke ta yo, ke sa a hɔn yo, wɔn ke dia a ma. 10 Bare ke pepe na sa kiti na Krista zin wiin fa to wiin te ɔɔn ti, wɔn wiinye dafɔre wɛlɛ wiinye dayaga ta y’a sirewɔ hɔn, a na te ye na sara gun. 11 Wiin fa ɔɔn kiu ta kiɛ Matigi ma, mià tɛ ɔɔn ne wɔn tɔɔ, bo wɔn ɔɔn tɛ mɛ́ ɔɔn n’a da yira sma ma wiin fa to zarakedo ka zɛ mɛ́ na Wuro zin hɔn ga. Mɛ́ yɛrɛ kia zarakedo ka zɛ mɛ́ na ki ta mɛ ga. 12 Mɛ́ da ka mɛ́ yirebɛ ga rɛ nka mɛ́ kia dɛndɛnmada ɔɔn yira ka ma, ka nihɔndia mɛ́ ye na wiin fa to wiinye kma ɔɔn ye yɛrɛ yirebɛ sma ta zɛda na wiinye ɔɔn ti ye kɔrɔ hɔn ga, ka sbɛ fa yira ye ma. 13 Mɛ́ ɔɔn ne kakaba, Wuro ye na mɛ́ kakaba. Mɛ́ ɔɔn ne datɔsma, ki ye na mɛ́ datɔ. 14 Krista ta dadiamabe n’a dɔrɔ ke ma ɔn da sɔnnala dama ɔɔn siri sma pepe ye na, sma pepe ɔɔn siri mɛ. 15 A siri sma pepe ye na wiin fa to wiinye kma pepe ɔɔn ti ni na, ye ka ne ti ni na ye yɛrɛ ye na titiri ga nka wiin te ɔɔn siri ɔn winni sa ye ye na, ye ne ti ni na wɔnna te ye na. 16 Ye tɛ yee, ke sɔɔn yɔnnɔ tɔɔ kanpla titiri ga. Ke ɔɔn mane Krista tɔɔ kanpla, basiɛ ke a tɔɔ yee titiri ga. 17 Wɔn tɛ, wiin te ɔɔn ne ti Krista hɔn, a na te tɛ danfawun na. Dabire fɔnɔ, dawun ɔɔn tiye basiɛ. 18 Wiin Wuro ɔɔn tɛ ke ɔɔn bere bɛɛn kɔ ye nɛmɛ Krista baraka hɔn ɔn wɔnna berebɛn we na bara kalfa mɛ́ ma, awe hɔn da pepe sa. 19 Bare hali ye ɔɔn tɛ wiin nɛ pepe, Wuro ɔɔn mane tɛ diniyan ne bere ne bɛɛn kɔ ye nɛmɛ Krista baraka hɔn, a mane sma ta kakiɛ giati ga, ne berebɛn na domada yira mɛ́ ma. 20 Mɛ́ Krista togo na fanɛsma, Wuro ne ka wiri mɛ́ baraka hɔn. Ke ka mɛ Krista togo na ɔn da ka tɛ bɛɛn bere kɔ ka yɔ kɔ Wuro. 21 Wiin te ɔɔn mane kakiɛ ta ga, a wɔnna te ta kakiɛtɛta na ke na ku na wiin fa to ke tɛ smatele na Wuro yinna hɔn wɔnna te we baraka hɔn.
61 Mɛ́ debe ne ti bara hɔn kɔ lege han, wɔn ye na mɛ ka mɛ ɔɔn da ka wiin woramadiabe gun Wuro ta, ka ka tɛ a tɛ zanafa na ga. 2 Bare Wuro da ye ye mɔɔ bia mɛ na wagati na fɔrɔ yi ma, ne tɛ́ be ma kisi na kɔɔ ma. Sege rɛ, bo ɔɔn wagati na fɔrɔ yi basiɛ. Bo ɔɔn kisi na kɔɔ. 3 Mɛ́ kia sɔɔ sɔɔn sii ma wiin fa to zarakedo ka zɛ mia bara na ga rɛ. 4 Nka mɛ́ a sigebɛ ke yɛrɛ ma da pepe hɔn ɔɔn da ke Wuro ta baratɛre. Yɔnmabe na yire yi hɔn kɔ yannɛ hɔn kɔ ninabannɔ hɔn. 5 Bo vurofrɛ bo kaso bo siri bo bananɔ bo siyanna bo sunkiɛ. 6 Ke a dɔrɔ da ke Wuro ta baratɛre kià telebe kɔ kia tɔɔ kɔ kià woramakɔn kɔ kia foro kɔ ni na kini yi kɔ dadiamabe baraka hɔn. 7 Kɔ kia tɛ ɔɔn ne tian ɔɔn yira kɔ Wuro ta sebe baraka hɔn ne tian ta kià kunkwinifa na. 8 Yirebe hɔn kɔ wopa hɔn, togayɔ kɔ togafɔrɔ hɔn. Bɔɔ ne ke giati niɔnsɔsma kamasɔrɔ a ma tian ke ɔɔn yira. 9 Bɔɔ mane ke tɔɔ ga kamasɔrɔ ke ne tɔɔ fɔrɔna, ye ne ke giati siwɛsma kamasɔrɔ ke ne kɛnɛ fɔrɔna, ye ne ke na wu wa mane ke yɛɛ ga. 10 Ye ke yannɛ ke nihɔn ne dia, ye ke ta durukma na kamasɔrɔ ke ne naforokma, y’a giati da foyi ti ke ta ga kamasɔrɔ frɛ pepe ne ti ke ta. 11 Mɛ́ fangan dɛ ka ma ga Korɛntekma ke ke kɔrɔ hɔn kìni ka ma. 12 Ka mɛrɛ mɛ ta ga ki ɔɔn ka yɛrɛ mɛrɛbɛ. 13 Ma bɛre ka ta wɔkara ne nɔmanɛ. Ka ka kɔrɔ hɔn kìni ke ma ɔɔn kià tɛda na ku sara ke ma mɛ. 14 Ka ka bɛɛn ka kɔ Wurotɔbareyasma ga. Ye k’a kwɛwɔsma ga. Nɛ fa na tele yi sbɛ ne kwɛ ne kɔ fa na telebareya yi? Nɛ kini sbɛ ne kwɛ ne kɔ tunio? 15 Nɛ Krista sbɛ ne kwɛ ne kɔ Sitanɛ? Wiin te ɔɔn Wuro tɔɔ, nɛ wɔn sbɛ ne kwɛ ne kɔ Wurotɔbareyata? 16 Nɛ Wuro ta kɔɔn sbɛ ne tɛ fiankɔn na? Bare ke Wuro ta kɔan na nima ye wɔkara Wuro n’e yira wiin nɛ ɔɔn da ye yewɔ woro hɔn ye na tangan ɔɔn ne yara. Ye ye na tɛ ye ta Wuro na, ye tɛ y’a kma na. 17 Ye wɔn ye na ka sa ka wa bɔ sma bɛ hɔn ɔɔn tangan kiege ma. Ye ka ka le fa na dɔɔn yi ma ga. Ye wɔn ɔɔn na tɛ ye dian ka hɔn. Matigi ɔɔn da yee. 18 Ye yi na tɛ ka Tɔn na, ka na tɛ yi nɔmanɛ na. Matigi Sbɛpepenate ɔɔn da yee.
71 Ne marefɔre, wɔnna dosɔ we ta tɛ ɔɔn ne ti ke ta, ka tɛ ke ke yɛrɛ kìnibɛ kɔn na dɔnbɛda kɔ ni na dɔnbɛda pepe ma ɔn ne ke yɛrɛ kìnibɛ kɔ kiu ta kiɛ Wuro ma. 2 Ka ka kɔrɔhɔnkìni mɛ́ ma. Mɛ́ dayaga ta sɔɔn sii na ga, ma sɔɔn sii togo yaga ga, ma sɔɔn sii lamara mɛ ga. 3 Ma ye yira ka zarake na ga bare ma ye yira n’e wɛ ɔn da mɛ k’a da giati. Ke ɔɔn ne na siri, ke kwɛ siri, ke ɔɔn ne na wɔɔ ni na yo, ke kwɛ wɔɔ. 4 Mɛ yɔɔn ka ma fɔrɔna ne yɛrɛyirebɛ ka ye na. Ne zigi tugu mià yannɛ pepe hɔn fɔrɔna ne nihɔn ne dia. 5 Mɛ́ yaa wiri Masedowane wiin sangan ma, mɛ́ makunabɛ ga. Ke mane yannɛ fɔrɔna, birisi ne ti bo piri, kuun ne ti bo piri ma mɛ. 6 Nka Wuro wiin ɔɔn ninabansma zigi na tuguta, wɔn mɛ́ zigi tugu kɔ Tite ta naa. 7 A a ta naa dama ga, nka ka man’a woro sigebɛ wiin nɛ, a wɔn yira ke ma mɛ. Mɛ na wu ti ka na wiin nɛ, a wɔn nɔma yira mɛ́ ma mɛ. Ye ka ninaban fɔrɔna. Ye ka mia da giati fɔrɔna, ye tɛ yee fɔn mɛ nihɔn ɔɔn dia fɔrɔna yɛ mɛ. 8 Hali ma ɔɔn ka ninaban kɔ n’a sɛbɛ, ma ma mane tɔɔ yira wɔn na ga. Bare m’a za da wɔnna sɛbɛ ka ninaban zɔgɔ nka ma na ma mane tɔɔ yira ye na ga. 9 Mɛ nihɔndia basiɛ. Mɛ nihɔndia k’a ninabannɔ na ga nka ma nihɔndia bare wɔnna ninabannɔ mane ka zugo katra. Wuro mane wɔnna ninabannɔ we bere n’a ta dafɔre na. Mɛ́ dayaga sii ta ka na ga. 10 Wuro wiin ninabannɔ bere n’a ta zugokatra na, wɔn kisi pere sɔɔn ma. Ma mane tɔɔ sii ti wɔn na ga. Wiin ninabannɔ ɔɔn ti diniyan hɔn kma ma, wɔn yaa wɛbɛ siri ma. 11 Wuro wiin fa ta ka na kɔ wɔnna ninabannɔ we, k’a tɔɔ. A kwamafa ka ka hɔn, ɔn vɔrɔvɔrɔdatɛ ka ka hɔn. A dagiati ka ka hɔn, ka ne kiu ka Wuro ma ne mɛ kia zɛ na salesale ne bara ta, mane dian dayaga na ga. K’a dɔrɔ da pepe hɔn ɔn da tian ti ka ta. 12 Ma ɔɔn sɛbɛ fanɛ ka ma, m’a fanɛ dayagatɛta ye na ga, a dayaga ta wiin te na, ma m’a fanɛ wɔn ye na mɛ ga. Nka m’a fanɛ ka ma n’a dɔrɔ ka ma Wuro togo na da mià da sige ka ma fɔrɔna. 13 Wɔn ɔɔn mɛ zigi tugu. Wɔn nii wa mɛ, mɛ́ nihɔndia fɔrɔna Tite ta nihɔndiaro ye na. Ka man’a zigi tugu wiin nɛ, wɔn man’a nihɔndia. 14 Bare ma mane ka togafɔrɔ yira a ma, ka ma ne piribɛ ga. Mɛ́ tian yira ka ma sangan pepe ma. Ye tɛ yee, ma mane ka togafɔrɔ wiin yira Tite ma, wɔn tɛ tian. 15 K’a tɛ ɔɔn ne mɔɔ sma pepe ta, ɔn kiu k’a ma ɔn n’a foga kwa a ma, a kakiri tɛ tugo kɔ wɔn wiin sangan ma, ka da dia a ma fɔrɔna. 16 Mia tɛ ɔɔn yɔɔn ka ma da pepe na, wɔn mɛ nihɔndia fɔrɔna.
81 Wuro wiin foro ta Masedowanekma ma, wɔn nɔma ke kia ɔɔn yira ka ma, kià kma. 2 Wiinye yannɛ na yire ye wɔ ɔɔn mane bɛrɛ ye ma, ye ta nihɔndiaro mane moro ne yaa. Duru kɔnɛ mane ti ye na nka yee ye ye sra hɔn frɛ pere yɛ. 3 Mɛ yɛrɛ n’e siɛrɛ ɔn da wiinye sie ɔɔn mane ti ye ma, hali yɛrɛ ɔn yalo wɔnna sie wɔ ma zɔgɔzɔgɔ, 4 ye man’a sigebɛ ke ma fɔrɔna ɔn da ke yaa y’a diɛmafrɛ pere Wuro ta dɛ́gɛwɛsma ma wiinye ɔɔn ti Zudegiamana hɔn. 5 Mɛ́ yɛrɛ mane wiin fa giati ye ta da hɔn ga, wɔn ye ɔɔn ta ɔn frɛ pere ɔn yalo wɔn ma. Ye pia ye yɛrɛ pere Matigi ma dɛn, wɔn timi ye ye yɛrɛ pere mɛ́ ma Wuro dungo na. 6 Wɔn tɛ mɛ́ ɔɔn n’a sigebɛ Tite ma ɔn d’a wɔnna perefrɛ wɔ na bara du bii wiin nɛ, a yaa kɔ lɔgɔ fɔn ye tege na. 7 Nka frɛ pepe debe ne ti ka ta yanyan, yɔnmabe kɔ bɛreda kɔ datɔ kɔ datɛnɔn sii pepe kɔ dadiamabe ka wiinye gun mɛ́ ta, wɔn ye na k’a dɔrɔ ɔn da ka frɛkma ne sbɛ ne pere yaan mɛ. 8 Ma fangan dɛ ka ma ga rɛ nka ma bɔ sɛrɛ ye yira ka ma wiin fa to ka sbɛ k’a zugodiafa dɔrɔ mɛ. 9 Ka kià Matigi Yezu Krista ta woramadiabe nɔma tɔɔ. Awe wiin ɔɔn mane naforote, a ye yɛrɛ ta durute na ka ye na wiin fa to a sbɛ ki ta naforokma na y’a duru hɔn. 10 Mɛ wiin fa giati ye hɔn, bo wɔn: Ki yɛrɛ ma ye mane dia bare kabe ki yɛrɛ ɔɔn mane pia pere, ɔn bere n’e dutigɛ mɛ. 11 Wɔn ye na, ka ye ta n’e do paga basiɛ, wɔn ɔɔn na tɛ k’a giatɛ tɛ tɛda na fɔrɔ ye na wiinye na sie ɔɔn ti ka ma. 12 Bia giatɛ ɔɔn ne fɔrɔ, wiin fa ɔɔn ti be ta, yee ye be foga ne be fɔrɔ kɔ wɔn yɛ. Wiin fa ɔɔn ti be ta ga, ye be giati wɔn na ga. 13 Ka ka ka yɛrɛ ka ninabannɔ hɔn ne bɔ sɛrɛ zigi kia tugu na ga nka ka srasra ɔɔn ka ka yɔ. 14 Ye ɔɔn tɛ yee, wiinye ɔɔn dɛ ki ye ma, wɔn na n’ewɔ ye pagabɛ, wɔn na tɛ boo kɔɔ ma mɛ, wiinye ɔɔn dɛ yewɔ ye ma, wɔn ki ye pagabɛ mɛ, wɔn ɔɔn na tɛ srasra na. 15 Yee ye sɛbɛ Wuro domada na sɛbɛ hɔn ɔn da, ye wiin te ɔɔn mane yaan yi turu, wɔn yi mane yanfɔnɔ ga. Wiin te ɔɔn mane zɔgɔ turu, wɔn yi ma mane dɛgɛ yi mɛ ga. 16 Ke baraka yira Wuro ma bare a k’a giatɛ nɛmɛ ka Tite hɔn mɛ. 17 A dian kià wiri na salesale ɔn naa ye bere yaa ki brɛ wɔnna nɔɔ hɔn. 18 Wuro ta kma pepe ke na plalo wiin ta da yira fanɛdia ye na, ke wɔn kwɛ kɔ lege. 19 Wɔn nii wa mɛ, Wuro ta kɔnkma ɔɔn n’a dɛ́gɛ n’a ta mɛ́ yakwɛta na bɔ bara bɛ hɔn perefrɛda na. Ke wiinye bara wɔ ta Matigi togo ta yire na ɔnkɔ kià giatɛfɔrɔ we ta fɔrɔ na. 20 Wiinye gwana na yaan ye wɔ ɔɔn kiɛ mɛ́ sra hɔn, mɛ́ mɛ́ yɛrɛ kɔrɔse fɔrɔna wiin fa to zarake ka zɛ mɛ́ hɔn ye na da na ga. 21 Mɛ́ dafɔre ta Wuro dama yɔnnɔ na ga, nka k’e ta sma yɔnnɔ na mɛ. 22 Ke na plalo wiin ɔɔn ti kɔ ke nɛmɛ da na yaan ye hɔn, awe wiin ɔɔn yannɛ barafɔretɛ na, ne bere ne za ye ta basiɛ yɛ mɛ ɔn yalo gwere ye ma, mɛ́ a kwɛ kɔ mià fanɛsma bare a yɔn ka ma fɔrɔna. 23 Tite wɔn mɛ yakwɛta ɔn ne ne baratɛkwɛta ki kiege ma. Ke na plala wɔ wɔn Wuro ta kma Krista ta yirebe ta dɛ́gɛwɛsma wɔ. 24 Ka k’a dadiamabe dɔrɔ ye ma wɔkara Wuro ta kma n’e ta wiin nɛ ɔnkɔ mɛ́ ka togafɔrɔ wiin yira ye ma mɛ.
91 Ke na wiin diɛma fanɛ Wuro ta dɛ́gɛwɛsma ma wiinye ɔɔn ti Zudegiamana hɔn, yirawɔn ti ka ma wɔn na ga. 2 Wiin giatɛfɔrɔ ɔɔn ti ka hɔn, ma wɔn tɔɔ ɔn ne togo gun a na Masedowanekma ta. Ma mane da ye ma da n’a bii fɔn kabe, Akayikma kia frɛ pere. Ye tɛ yee, k’a da mane dia Wuro ta kma na yaan ye ma. 3 Ma bɔ plala bɛ fanɛ ka brɛ wiin fa to ma wiin togo gun ka ye na, a ka tɛ zana ga ɔnkɔ ma ma n’e yira wiin nɛ mɛ ga, ka ne tɛtɛrɛ tigɛ wɛ mɛ. 4 Masedowanekma ɔɔn naa kɔ mɛ, ka ma tɛtɛrɛ tigɛ gun dɛn ga, wɔn fɔrɔ ga. Wiin yɔnmabe ɔɔn mane ti mɛ́ hɔn ka ye na, wɔn na tɛ pere na ke ma, ma da ki ma han. 5 Wɔn tɛ ma ɔɔn da, ye tɛ ma pia ke na plala fanɛ dɛn wiin fa to ka ne tɛtɛrɛ ne tigɛ. Ka togafɔrɔ wiin ɔɔn pia yira tigɛ, wɔn wɔɔ ka ma, a ka tɛ togayɔ na ga. 6 Ka tɔɔ da wiin te ɔɔn ma tugo yaan ga, wɔnna te sbɛ ne kiɛn yaan ga. Wiin te ɔɔn tugo yaan, wɔnna te ɔɔn kiɛn yaan mɛ. 7 Wiin te ti pepe, wɔn y’e pere kɔ y’a giatɛ. A ka ye ta ɔn ninaban ga, ka ka fangan dɛ sɔɔn ma mɛ ga bare wiin te ɔɔn pere kɔ nihɔndiaro, wɔnna te da ɔɔn dia Wuro ma. 8 Woramadiabe sii pepe ɔɔn ti Wuro ta, a ne sbɛ n’e ta ka ma wiin fa to frɛ pepe ɔɔn ne ti ka ta, ka ne sbɛ ne fa kwɛ k’a barafɔre ma yɛ mɛ. 9 Wɔkara ye sɛbɛ wiin nɛ Wuro domada na sɛbɛ hɔn ɔn da, ye a dini ɔn durukma ka, a ta woramadiabe wɛ abada ga. 10 Wiin te ɔɔn tugofrɛ pere tugota ma, ne buru pere zɔnfa na, a na tugofrɛ pere ka ma mɛ ɔn n’e yanbɛ ɔn k’a telebe na sara ta yaan. 11 Ka na tɛ naforokma na fɔrɔna sangan pepe ma wiin fa to ka ne sbɛ ne bɔ sɛrɛ ka sangan pepe ma mɛ wiin fa to ka wiinye frɛ pere, mɛ́ ne yaa n’e pere ye ma, ye ne baraka yira Wuro ma wɔn ye na. 12 Bare k’a perefrɛ Wuro ta kma mako fɔrɔ dama ga nka ye tɛ sma ne baraka yira Wuro ma fɔrɔna. 13 Ye ɔɔn naa k’a tɛda na kayan ta, k’a tɛ ɔn mɔɔ Krista ta fanɛdia na ɔn tɛ ka yɛrɛ soromakma na ne dini ne kɔ yewɔ ɔnkɔ sma pepe, ye na baraka yira Wuro ma wɔn na. 14 Ye na ne Wuro mɛ ka ma ne k’a da giati fɔrɔna bare Wuro y’a woramadiabe ta ka ma. 15 Ke baraka yira Wuro ma a ta perefa ye na, wiin nɛmɛ ɔɔn tiye ga.
101 Mɛ Pɔle ma ka mɛ Krista ta makare kɔ a ta foro do ma. Ke tɛ ne kwɛ ne ti wiin sangan ma, mɛ wiin ɔɔn tɛ ne ne yɛrɛ ma zibɛ nka ne brɛ ɔɔn dɛrɛ ka na wiin sangan ma n’a da ne sige hali na. 2 Ka ka fangan dɛ ne ma ɔn da ma gwangwana bɔɔ ma ka brɛ ga. Bare ma ye yɔnnɔ tɔɔ ɔn tɔɔ da wiinye kma ɔɔn kià tɛda sege ɔn da ye sma ta tɛda nɛmɛ, ma na gwangwana ye ma. 3 Ke kɔnɛ sma nka ke kun kwini wɔkara sma ga. 4 Kià kunkwinifrɛ sma ta tɛtɛrɛ ye ga nka Wuro ta ye ta sebe sa ɔn ne yɔnmakire yaga. Wiinye giatɛ ɔɔn giatɛ na fɔrɔ ye ga, ke wɔnwɔ yaga 5 ɔnkɔ wiin yɛrɛyirebɛta ɔɔn tuma Wuro ta tɔɔ yaga na mɛ. Ke kun sii pepe kwini wiin fa to sma pepe ta giatɛ ne dɔɔ Krista ma. 6 K’a damɔ do ɔɔn naa paga wiin sangan ma, ke na damɔbareyasma pepe yɔnnɔhɔntoba. 7 Ka ne frɛ pepe na kayan ta. Wiin te pepe ɔɔn tɔɔ da yi Krista yi, a ye yɔnnɔ tɔɔ wɔnna nɔɔ hɔn yɛ sin ɔn tɔɔ da ye ɔɔn ne Krista yi, ke Krista ye mɛ. 8 Matigi wiin sebe pere ke ma a mane ka na yaga yi ga fɔn ka na fɔrɔ yi, hali ma ɔɔn ne ne yɛrɛ yirebɛ wɔn ye na, ma na piri ga. 9 Ma kia ka kwanbɛ kɔ n’a sɛbɛ ga. 10 Bare ye da ye mia sɛbɛ hɔn da tɛ ne sige hali han. Nka sɔɔn ɔɔn da ye ne za, fangan ti ne hɔn ga, ne domada mane foyi mɛ ga. 11 A na te n’e yɔnnɔ tɔɔ n’e tigɛ ɔn da ke tɛ ne ti dɛrɛdo hɔn ke domada ne ti wiin nɛ sɛbɛ hɔn, ye yee kià tɛda na ne ti yɛ mɛ. 12 Bare wiinye kma ɔɔn ye yɛrɛ yirebɛ, ke dian ne ke yɛrɛ yirebɛ wɛlɛ ɔn ke ta tala kɔ lɔgɔ ga. Ye ta tɛ ɔɔn n’e yɛrɛ yirabɛ ɔn n’e kayanbɛ, wɔn ɔɔn n’e kakababɛ. 13 A ma mɛ́ ta, ke ke yɛrɛ yirebɛ wiinye da na, ke na wɔnwɔ yirabɛ ga. Nka Wuro wiin tɛn tigɛ ke ma ɔn sbɛ ne ke yabɛ ka brɛ, wɔn ke na ke yɛrɛ na kayan ta kɔ ɔɔn. 14 Bare mɛ́ mɛ́ tege fɔnɔ ga wɔkara ke yɛrɛ naa ka brɛ ga. Mɛ́ ɔɔn pia naa ka brɛ kɔ Krista ta fanɛdia. 15 Mɛ́ dɛndɛn smaza ta bara ma ne mɛ́ yɛrɛ yirebɛ zana ga. Nka mɛ́ tɔɔ da wiin yɔnmabe ɔɔn ti ka hɔn, wɔn yire ne yaa wɔkara mɛ́ ye yira ka ma wiin nɛ. 16 Ke naa fanɛdia yira ka ma wiin sangan ma ɔn fɔnɔ yaa biza hɔn ɔn ma ke yɛrɛ yirebɛ kɔ smaza ta bara ga. 17 Wɔkara ye sɛbɛ Wuro domada na sɛbɛ hɔn wiin nɛ ɔn da, ye wiin te ɔɔn n’e yɛrɛ yirebɛ, a ye yɛrɛ yirebɛ Matigi ye na. 18 Wiin te ɔɔn ye yɛrɛ yirebɛ, a wɔnna te ɔɔn yirebe gun ga nka Matigi wiin te yirebɛ wɔn ɔɔn yirebe gun.
111 Ee ka m’a dian mia yinnifrɛ sɔmna zɔgɔ kɔnɛ, tian na ma ka mɛ ka n’a da sɔmna. 2 Ma ba k’a da na wɔkara Wuro ba k’a da na wiin nɛ. Bare ka tɛ wɔkara danzoro na paga yi, ma wiin pere bangan tala dama ma wiin ɔɔn Krista. 3 Nka san mane Awa diɛbɛ kɔ y’a yinnamakwiɛ wiin nɛ, ma kwan da ki kakiri ka naa yaga mɛ, ka ka timi bere Krista ma ɔn n’a ta dadiamabe wa ka hɔn ga. 4 Tian na, wiin te ɔɔn na naa ɔn boo Yezuza da yira ka ma wɔn dɛ́gɛ ne ti mià yira yi we na, ɔn boo kakiriza ka ka hɔn wɔn dɛ́gɛ ne ti mɛ́ yi na, wɛlɛ ka ɔɔn dian bɔɔ fanɛdiaza hɔn wɔnwɔ dɛ́gɛ ne ti mià yira ye na, ka na dian wɔn hɔn mɛ yo. 5 Ye tɛ wɔkara dɛ́gɛdo ti ke na, mɛ kɔ wɔnna fanɛsma wɔ wiinye ɔɔn ye yɛrɛ ta fɔrefɔre na ga yo. 6 Ke pepe bɛrenɔn tala nka kià datɔ ɔɔn dɛ́gɛ. Ke wɔn nɔma dɔrɔ ka ma da pepe hɔn. 7 Ma mane Wuro ta fanɛdia yira ka ma zana wiin sangan ma ne ne yɛrɛ ma zibɛ ne ka yirebɛ, wɔn mane tɛ dayaga na ne ta ra? 8 Ma Wuro ta kma bɔɔ bɛrɛbɛ bare ye mane wiinye frɛ pere ne ma n’a sirewɔ ye na, ma mane dian n’e tɔɔ ne ki mako fɔrɔ kɔ lɔgɔ. 9 Ne na tisangan ma ka brɛ mɛ, duru ne ti ne na, ma mane sɔɔn sii ta fa tɔɔ ga. Bare ke na plala wiinye ɔɔn mane tuma Masedowane ɔn naa, wɔnwɔ mane fɔrɔ ne ma. Ye tɛ yee, ma ma tɛ bie na ka ta ga, ɔn mane na dian tɛ bie na ka ta mɛ ga. 10 Krista ta tian wiin ɔɔn ti ne hɔn, wɔn do ma m’a yira n’a dɔrɔ da wiin yɛrɛyirebɛfa ɔɔn ti ne hɔn Akayigiamana hɔn, ma sbɛ n’a dɔɔn ga. 11 Wɔnnɔ na ma wɔn yira? Ka da ta tɛ ɔɔn mane dia ne ma ga ra? Wuro n’e yɔnnɔ tɔɔ. 12 Ma mane wiin fa ta, ma na wɔn nɛmɛ ta yɛ mɛ wiin fa to wiinye kma ɔɔn mane bɔɔ dɛndɛnmada kia wiin fa to ye sbɛ ye yɛrɛ yirebɛ wɔkara mɛ́, ma sbɛ n’e ta yirebe yaga. 13 Wɔnna sma wɔ fanɛsma na niɔnsɔ ye. Ye niɔnsɔsma wiinye ɔɔn ye yɛrɛ ta Krista ta fanɛsma na. 14 Wɔn kabada ga. Sitanɛ yɛrɛ tɛ n’e yɛrɛ dɔɔn n’e ta mɛlɛkɛ na fɔrɔ yi na. 15 A ta baratɛre ta tɛ ɔɔn n’e yɛrɛ dɔndɔn n’e yɛrɛ ta tian ta baratɛre na, wɔn foyi na da ga. Ye wɛbɛnɔn ɔɔn na tɛ tala kɔ ye ta tɛda. 16 Ma ye yira n’e dɔrɔ ka ma ɔn da ka k’a giati ɔn da ma yinni ga wɛlɛ mɛ, ka dian n’a yinnibe na wiin fa to mɛ sbɛ ne yɛrɛ yirebɛ zɔgɔ mɛ. 17 Ma na wiin fa yira, m’a yira Matigi togo na ga nka m’a yira yinnibe ɔɔn na ɔn tɔɔ da a na tɛ yɛrɛyirebɛdo na ne ta. 18 Sma na yaan ye debe n’e yɛrɛ yirebɛ y’a sansiobe na da do ma han, mɛ na ne yɛrɛ yirebɛ mɛ kɛ. 19 Ki wiinye kma ɔɔn da tɔɔ fɔrɔna, tamara ki dian ne mɔɔ kakabasma ta yirada na wa. 20 Ka dian ye ne bɛrɛ ka ma ne ka nɔma wɔ kika ne k’a frɛ tɔɔ n’e tɔɔ melemele ne ka yinna pi. 21 Mɛ piri kɔ wɔn, sma ye to ne kwa, ye ye na tɛsie ti mɛ́ ma ga. Mɛ ne worosige mɛ ɔn n’a yira n’a dɔrɔ da ma bɛre wɔkara yinni. 22 Ye ɔɔn ne Heburo, mɛ boo mɛ. Ye ɔɔn ne Isirayɛlesi, mɛ boo mɛ. Ye ɔɔn ne Abrahamu timikma, mɛ boo mɛ. 23 Ye ɔɔn ne Krista ta fanɛsma, ma na yinnida bɔɔ yira. Ma wɔn na yannɛ ta ɔn fan ye ma. Yannɛ hɔn, ma fan ye ma. Kaso hɔn, ma fan ye ma. Vurofrɛ ta, ma fan ye ma melemele na. Ne tɛ siri na boo sangan ma ra, ma fan ye ma wɔn na mɛ. 24 Ma gwelekamɛ yinna kiofun ne nɔma koronɔɔnɔ na kanyinna koo gun Ziwifu ta. 25 Ye ne vaan kanyinna saa na, ɔn ne dra kɔ dɔge kanyɔnnɔ tala na, koro ɔɔn yaga zɛ kɔ ne nɛmɛ kanyinna saa zu ma, ma ɔɔn sin tala ta n’a za zu hɔn. 26 Ma mane kireyuru ta kaɛn ma kanyinnayan na, bo kuu na kwanda kɔ bɛrɛmasma ta da na kuun, kɔ n’a sii ta da na kuun, kɔ Wurotɔbareyasma na kuun, kɔ kuru kɔrɔ hɔn kuun, kɔ kibɛkolo hɔn kuun, kɔ yɛngɛnzu ma kuun, bo ma bɔ plalayaga na kuun. 27 Bo bananɔ, bo barasige, bo siyanna, bo wu, bo mulu, bo sunkiɛ, boo sangan ma bo ma luu kɔ zogaduru. 28 Bɔ sɛrɛ nii mane ti ga, n’a kɔɔ pepe ma tɛbara bo ma Wuro ta kɔnkma ta da na giatɛ. 29 Kɔ te ɔɔn tɛ fangandurute na, mɛ ma tɛ fangandurute na kɔ a na te mɛ ga? Kɔ te ɔɔn bɛrɛ ye ma mɛ ba ga? 30 A ɔɔn ma yɛrɛyirebɛ ɔɔn n’e wɔɔn, mɛ na n’a fanganduru ɔɔn ta n’a yɛrɛyirebɛfa na. 31 Matigi Yezu Tɔn Wuro wiin ɔɔn yirebe na te sangan pepe ma, wɔn tɔɔ da mɛ niɔn sɔɔ ga. 32 Mɛ na tisangan ma Damasekuru hɔn, fanganma Aretase ta kuru wɔnnate ɔɔn yɛresma tigɛtigɛ wiin fa to ye mɛ foga. 33 Nka ye mɛ ka kungo hɔn ɔn ne sabɛ finɛtire hɔn ɔn ne zibɛ kuru na korikulu timi ma ɔn dɛɛ a na.
121 Wɔɔn ti yɛrɛyirebɛ na ga nka Matigi wiinye frɛ dɔrɔ ne ma zɛda hɔn, wɔnwɔ ma na ɔɔn yira ka ma. 2 Ma Krista timite boo tɔɔ, bo ɔɔn n’e dɔgɔ fun naa. Mɛ kɔn hɔn a mane ti wa, a mane ti mɛ kɔn hɔn mɛ ga wa, mɛ tɔɔ ga nka Wuro ɔɔn n’e tɔɔ. Wɔnna sɔɔn we mane bii ɔn yaa fɔn Aregiana hɔn. 3 Wɔnna sɔɔn we mane ti kɔ ye kɔn wa, a mane ti kɔ ye kɔn ga wa, mɛ tɔɔ ga nka Wuro n’e tɔɔ. 4 Sɔɔn we mane bii ɔn yaa fɔn Aregiana hɔn ɔn yaa bɛreda bɔɔ mɔɔ yeyɛ wiinye ɔɔn sbɛ ne yira ga, sɔɔn mane daga n’e bere n’e yira mɛ ga. 5 Ma na ne yɛrɛ yirebɛ wɔnna sɔɔn we ye na nka mɛ yɛrɛ na n’a yɛrɛyirebɛfa ka n’a fanganduru hɔn. 6 Mɛ m’a da ma ne yɛrɛ yirebɛ kɔnɛ, ma mane na tɛ yinni na ga, tian dama ma mane na ne ɔɔn yira. Nka ma na n’e ta ga wiin fa to sma ne za wiin zɛ na, ye ka naa ne da yira ɔn yaa fɔnɔ wɔn ma ga wɛlɛ ye wiin fa mɔɔ ne ta, ye ka na yira yaa fan wɔn ma ga. 7 Wɔnna zɛda wɔ ta tɛ ɔɔn mane tɛ kabakoda na, wɔn tɛ yannɛ bɔɔ ɔɔn mane bɛrɛ ne ma wiin fa to ma ka naa ne yɛrɛ yirebɛ ga. Sitanɛ ta fanɛta boo mane tigɛ ne vuro na wiin fa to ma ka naa ne yɛrɛ yirebɛ ga. 8 Ma mane Matigi mɛ kanyinna saa na wiin fa to a a brɛ dɛrɛbɛ ne na. 9 Nka a ɔɔn da ne ma, ye y’a woramadiabe ne wa, ye y’a sebe ne y’a tɛda pepe ta fanganduru hɔn. Bo wɔn ɔɔn tɛ mɛ ɔɔn ne n’a yɛrɛyirebɛfa ka n’a fanganduru hɔn wiin fa to Krista ta sebe zii ne ma. 10 Ye tɛ yee, ma ne yɛrɛ pagabɛ fanganduru hɔn kɔ vini kɔ bonatɛgɛ kɔ yannɛ kɔ ninabannɔ hɔn Krista ye na. Bare fanganduru tɛ ne ti ne na wiin sangan ma, wɔnna sangan ma kɛnɛro tɛ ne ti ne hɔn bɛrɛ. 11 Bo mɛ tɛ yinni na han, a ma ki ɔɔn mɛ ka ye hɔn kamasɔrɔ a ma ki ɔɔn mane daga taa mia da na fangan ma. Bare ga, hali ma ɔɔn mane foyi ga, wiinye fanɛsma wɔ ɔɔn ye yɛrɛ ta fɔrɔ ye na, ye fɔn kɔ ne nɛmɛ abada ga. 12 Wiinye tagamase ɔɔn fanɛta dɛ́gɛ wa, wɔnwɔ tɛ ka woro hɔn. A dian yannɛ pepe na bo kabakoda, bo ma sebe na da. 13 Wɔnnɔ ɔɔn tɛ Wuro ta kma sɛrɛ ma ɔn ma tɛ ki ma ga? A ma tɛ mia tɛ ɔɔn ma bɛrɛ ka ma ga. Ka yafa ne ma wɔnna telebareyafa we na. 14 Bo ma na naa ka brɛ kanyinna saaro na nka ma na bɛrɛ ka ma ga. Bare mɛ k’a frɛ kia ga nka ki yɛrɛ ma ɔɔn kia. A nɔmanɛ ɔɔn daga ne kia ne tigɛ ye na vɔrɔre ma ga nka vɔrɔre ɔɔn daga ne kia ne tigɛ ye nɔmanɛ ma. 15 Mɛ dian ne n’a gwana pepe ka ki wɔnda hɔn ne dian ne ne yɛrɛ yannɛ ka ye na. Ki da ɔɔn ne dia mɛ ma yee, wɔnnɔ ɔɔn na tɛ mɛ da ka ne dia ki ma yee mɛ ga? 16 Ka tɔɔ da ma wɔnda pere n’e za ka ma ga rɛ nka ma kɔ n’a yinnibe, ma yinnamakwiɛtɛ ɔn ka gun. 17 Ma wiinye kma pepe fanɛ ka brɛ, ka ye pepe na kayan ta. Ma ka lamara ka za ye na boo baraka hɔn ra? 18 M’a sigebɛ Tite ma ɔn n’a fanɛ ka brɛ kɔ ke na plalo we, ma mane wiin da yira ka ma. Tite mane ka lamara ra? A kakiri tala ke ɔɔn yira ka ma ɔn soga tala dɔrɔ ka ma mɛ ga ra? 19 Dora n’a bii siɛ dɛrɛ ma da hɔn k’a giati da mɛ́ tɛ naa ne vɛ ka ta ɔɔn. Awo rɛ, Krista togo na mɛ bɛre ka ta Wuro yɔnnɔ na. N’a kma fɔre, ke wɔn pepe ta wiin fa to fa sbɛ kwɛ k’a yɔnmabe ma. 20 Wiin fa ɔɔn ne ninaban, wɔn ma ka na naa ka gun wɔkara ma ye giati wiin nɛ ga, ki ka mɛ za wɔkara ka ye giati wiin nɛ mɛ ga. Ka ka tɛ bɛnbareyafa kɔ kiɔn kɔ woro kɔ yannɛ kɔ nɛmɛdabɛre kɔ dakwiɛro kɔ birisi kɔ kiɔn kɔ ka yɔ ga. 21 Ne nina ban ɔn da ma ɔɔn bere naa wiri ka brɛ wiin sangan ma ma ka naa piri Wuro ta ka yɔnnɔ na ɔn mɔgɔ ka na yaan ye ye na wiinye ɔɔn mane pia kakiɛ ta ɔn ma dian ye zugo katra y’a yagada kɔ y’a dakuro ɔnkɔ y’a vunada ye na ga.
131 Bo na tɛ ye kanyinna saa ma ne naa ka brɛ. Ke ɔɔn naa da ke wiinye da pepe yɔnnɔhɔnwa, ke na n’e ta siɛrɛkma sma pla wɛlɛ sma saa ta yirada ma. 2 Ma pia n’e yira ka ma ɔn bere n’e yira ka ma sma yɛ mɛ wɔkara ne yaa kanyinna plalo na ka brɛ, da wiinye kma ɔɔn pia kakiɛ ta ɔnkɔ bɔ sɛrɛ, ma bɛɛn kɔ lɔgɔ ga. Ma ɔɔn naa bere naa wiin sangan ma, ma na makare ye ma ga 3 bare wiin fa ɔɔn n’a dɔrɔ ɔn da Krista domada mɛ ɔɔn yira, a debe ma wɔn ka ɔɔn kia. Fanganduru ti a na ga nka a y’a sebe dɔrɔ ka yɔ. 4 Tian na, a ta fanganduru do ma y’a kwangwaga nka a ti ni na Wuro ta sebe baraka hɔn. Mɛ́ kwɛ kɔ lege fanganduru hɔn mɛ nka ke na ti ni na kɔ lege Wuro ta sebe baraka hɔn ki ye na. 5 Ka k’a da na kayan ta ka yɛrɛ ma ɔn da yɔnmabe ti ka hɔn ra. Ki yɛrɛ tɔɔ da Yezu Krista ti ka woro hɔn rɛ. Fɔn ka ɔɔn mane sbɛ ne yɔnmabe na da kɔrɔ tɔɔ ga. 6 Ka na tɔɔ da mɛ́ sbɛ ne yɔnmabe ka sɔɔn hɔn. 7 Mɛ́ Wuro mɛ wiin fa to ka ka dayaga tala bɔɔ ta ga. Mɛ kia n’e nɔma yira ka ma ga nka mɛ kia ka za ka ne dafɔre ɔɔn ta hali mɛ mane sbɛ ne wɔn nɛmɛ ta ga. 8 Bare mɛ sbɛ ne foyi boo ta tian na ga, tian ye na fangan ti mɛ hɔn. 9 Fanganduru tɛ ne ti mɛ́ na wiin sangan ma ki ne kɛnɛ, mɛ́ nihɔn ne dia. Mɛ́ Wuro mɛ wiin fa na, wɔn k’a yɔnmabe Krista hɔn do ne paga. 10 Bo wɔn ɔɔn tɛ ma ɔn ne to dɛrɛdo hɔn yɛ n’e sɛbɛ ka ma wiin fa to ma ka naa dɛndɛn Matigi ta fangan ma ɔɔn ne dasige ta ka na ga. A a ka ne hɔn wiin fa to ma ne yɔnmabe ka sma hɔn, a da ma ne yaga ta ga. 11 Awale n’a kma, ke na ti boo kɔɔ. Ka tɛ fa ne kwɛ ne yaa k’a yɔnmabe ma, ka ne nɛmɛ wora sigebɛ ne bɛɛn fɔrɔna ne siara ta nɛmɛ ma, dadiamabe kɔ bɛɛn na Wuro na ka diɛma. 12 Ka Wuro ta dɛ́gɛwɛsma ta foo bire nɛmɛ na. Wuro ta dɛ́gɛwɛsma pepe bire ka na. 13 Matigi Yezu Krista ta woramadiabe kɔ Wuro ta dadiamabe kɔ Wuro ta Ni ta dokwɛ tɛ ye ne ka pepe diɛma.