1 TIMOTE

¹ Mɛ Pɔle Yezu Krista ta fanɛta ke na kisita Wuro kɔ awe Yezu Krista yɛrɛ kià yɔnmata yirado ma. ² Ma bo sɛbɛ fanɛ Timote ma wiin ɔɔn ne vɔrɔnɔ yɛrɛworo yɔnmabe na sogo ma, ɔn da Tɔn Wuro kɔ kià Matigi Yezu Krista tɛ ye y’a woramadiabe kɔ y’a makare kɔ y’a siara ta be ma. ³ Ma mane yira be ma wiin nɛ ɔn sbɛ ne yaa Masedowanegiamana hɔn, wɔɔ Efɛsekuru hɔn wiin fa to wiinye kma ɔɔn ti yeyɛ ne kala na yaga yi ta sma ma, be yira ye ma, ye ye saa ye na. ⁴ Be yira ye ma, ye ye ka ne dɔɔ gwereda ma ne dumakma ta da na kayan ta ga. Yɔnmabe Wuro ta giati na da wiinye ta sɔɔn ma, ye wɔn fɔrɔ sɔɔn ma ga, fɔn dakwiɛro dama ye ɔɔn tumabɛ. ⁵ Mɛ bɔ yira be ma wiin fa to wiin dadiamabe ɔɔn sa kɔrɔ na kìni ye kɔ giatɛ na fɔrɔ yi kɔ yɔnmabe na siɛbɛ yi hɔn ye sbɛ wɔn nɔma tɔɔ. ⁶ Bɔɔ ta tɛ ɔɔn ye wa wɔnna sogo we ma, wɔn tɛ ye ɔɔn yaa fire dakwiɛro na zana yi ta. ⁷ Ye yira ne kwa, ye yiwɔ Tɛn na kma kamasɔrɔ ye wiin fa yira ne wiin fa puru yireyire, ye man’a tɔɔ ga. ⁸ Kamasɔrɔ ke tɔɔ da be ɔɔn bia da ta n’e tele kɔ Tɛn, wɔn ɔɔn tɛ a tɛ fa na fɔrɔ yi na. ⁹ Ke daga tɔɔ da Tɛn tigɛ smatele ye na ga nka dayagatɛre kɔ magasma kɔ zugoyagasma kɔ wiinye kma ɔɔn kiu ka Wuro ma wɛlɛ frɛ na kìni ye ma ga, kɔ wiinye kma ɔɔn ye tamɛ yɛɛ wɛlɛ wiinye ɔɔn ye sieri yɛɛ ɔnkɔ smayɛsma, wɔnwɔ ye na Tɛn tigɛ. ¹⁰ Bo ma kakaladatɛsma kɔ wiinye sini ɔɔn ye nɛmɛ sini sian kɔ wiinye kma ɔɔn tɛrɛ zabire kɔ niɔnsɔre kɔ siɛrɛyaga wiinye ɔɔn ye sun niɔn na ɔnkɔ wiinye kma pepe ɔɔn dian kala na kìni yi na ga. ¹¹ Dangamu na te Wuro ta yirebe na fanɛdia wiinye ɔɔn kalfa ne ma, wiin fa ɔɔn bɛɛn kɔ wɔn, bo ɔɔn wɔn. ¹² Kià Matigi Yezu Krista wiin ɔɔn fangan ka ne hɔn, ma baraka yira a ma. Awe ɔɔn ne sege ɔn yɔɔn ne ma ɔn ne ka y’a bara hɔn. ¹³ Mɛ wiin te ɔɔn mane pia ne Wuro togo na yagata, ne sma yannɛ ne yaga ta fɔrɔna. Nka a makare ne ma bare ma mane pia n’e tɔɔ ga, yɔnmabe ma bere mane ti ne hɔn ye na tɛsangan ma mɛ ga. ¹⁴ Tian na, kià Matigi ta woramadiabe kɔ wiin yɔnmabe ɔnkɔ wiin dadiamabe ɔɔn ti Yezu Krista hɔn, a wɔnwɔ ta mɛ ma yaan. ¹⁵ Bɔ domada bɛ wiinye ɔɔn n’a yira n’a dɔrɔ ɔn da ye kakiɛtɛre kisi na Yezu Krista naa diniyan hɔn, ye yɔnmabe na ye ne daga figɛ na. Mɛ yɛrɛ kakiɛtɛre wɔ pepe hɔn yire yi. ¹⁶ Nka a ta tɛ ɔɔn makare mɛ ma, wɔn tɛ wiin fa to a pia y’a foro dɔrɔ ɔn mɛ ta tagamase na, sma sbɛ tɔɔ da wiin te ɔɔn yɔɔn a ma, wɔn tɔɔ da ye na wɛbareyani gun. ¹⁷ Wiin fanganma ɔɔn tiye suu, wiin Wuro tala dama ɔɔn tiye ma ne siri ga, sɔɔn man’a za ga, sebe kɔ yirebe tɛ a ma sangan pepe ma. Amina. ¹⁸ Ne nɔ Timote, Wuro ta fanɛ wiinye ɔɔn pia yira tigɛ be ye na wiin fa to ye fangan ka be hɔn, be sbɛ kun na fɔrɔ yi kwini, ma wiin fa yira n’a tigɛ be ma, bo wɔn: ¹⁹ Tɛ yɔnmabe ne ti be hɔn, be gia ne tangan. Bɔɔ mane maga mɔɔ na y’a giatɛ ta, ye ta yɔnmabe ɔɔn yaga. ²⁰ Himɛne kɔ Alɛkisandire n’e na bɔɔ. Ma ye ka Sitanɛ sra hɔn wiin fa to ye ka ne Wuro togo yaga titiri ga.

¹ M’a yira n’a sigebɛ da da pepe zin, ka Wuro mɛ ɔn vɛ a ta, ɔn baraka yira a ma sma pepe ye na. ² K’a mɛ fanganmɛ kɔ wɔnnakma pepe ye na wiin fa to ke ne ti siara hɔn, ke kakiri ne tangan, ke ne sbɛ ne dɔɔ Wuro ma, kiu ne ti ke ma. ³ Wɔn ɔɔn fɔrɔ ne dia ke na kisita Wuro ma. ⁴ Awe wiin ɔɔn kia sma pepe kisi ɔn tian tɔɔ. ⁵ Bare Wuro tala dama ɔɔn tiye, vɛta sɔnnala dama mɛ Wuro kɔ sma yɔ. Wɔn Yezu Krista wiin ɔɔn ye yɛrɛ ta sɔɔn na. ⁶ Awe ɔɔn ye yɛrɛ pere sma pepe ye na. Wiin siɛrɛbe ɔɔn tɛ wagati na tigɛ yi ma, bo ɔɔn wɔn. ⁷ Wɔn ye na mɛ dɛ́gɛ mɛ ɔɔn tɛ fanɛta na ne sma kala. Tian ma ɔɔn yira, ma niɔn sɔɔ ga. Ma tɛ sii wɔ ma fanɛta na wiin fa to ye yɔnmabe gun ɔn tian tɔɔ. ⁸ Wɔn ye na ma kia sini n’e sra na kìni ye duro, woro ka ne ti ye hɔn ga, dakwiɛro ka ne ti ye yɔ ga, ye ne Wuro mɛ bii pepe hɔn. ⁹ A ma yàra han, ma kia wɔnwɔ ne zoga ka n’e fɔrɔ n’e yɛrɛ tɛtɛrɛ kɔ yirebe kɔ kiu. Ye ta bege ka tɛ wɔndɔgɔle kɔ sanɔ na frɛ kɔ denɔma na tereba ye ga. ¹⁰ Nka ye ye yɛrɛ tɛtɛrɛ kɔ tɛdafɔre wɔkara Wurotɔyàra daga ne tɛ wiin nɛ. ¹¹ Kalasangan ma, yàra daga bɔɔ ɔn ye yɛrɛ mazibɛ. ¹² Ma dian ya tɛ nimisin na kalata wɛlɛ a wɔnnate na ga. Wɔn ye na a daga ne bɔɔ ɔɔn. ¹³ Adama Wuro pia ɔɔn dan dɛn ɔn sbɛ ne Awa dan. ¹⁴ A Adama Sitanɛ ɔɔn diɛbɛ ga, nka ya ɔɔn dian Sitanɛ ta diɛbɛ na ɔn Tɛn na yagada ta. ¹⁵ Hali kɔ wɔn, a ɔɔn dian wɔɔ yɔnmabe hɔn kɔ dadiamabe hɔn ne kìni ne kiu ka ye yɛrɛ ma, a ta voro sbɛ n’a kisi.

¹ Wiinye domada wɔ ɔɔn n’a yira n’a dɔrɔ ɔn da wiin te pepe ɔɔn kia tɛ Wuro ta kma na zɛngɛnte na, ye bara na fɔrɔ ye a ɔɔn kia, wɔnna domada wɔ yɔnmabe na ye ne daga figɛ na sma pepe ta. ² Wɔn ye na zarakedo daga ne ti Wuro ta kma na zɛngɛnte na ga, a ne ya tala dama te, ne sbɛ n’e yɛrɛ foga, kakiri ne ti a hɔn, a ta da ne tele, a ne samarafigɛ, ne sbɛ ne sma kala. ³ A ka tɛ mɛnɛta na wɛlɛ dasigeta ga nka a woroma ne kuna. A ka tɛ birisikwinita ga, ɔn ka ne dɔɔ gwanada ma ga. ⁴ A daga ne sbɛ ne y’a kɔnda tɛtɛrɛ, ɔn ye nɔmanɛ ta ye ne mɔɔ a ta n’a yirebɛ. ⁵ Tian na, wiin te ɔɔn mane sbɛ n’e yɛrɛ ta kɔnda tɛtɛrɛ ga, nɛ a na te na tɛ ɔn sbɛ taa gun Wuro ta kma ta da na? ⁶ Wiin te ɔɔn dɔ kɔ Wuro ta kma hɔn, a ka tɛ wɔn mɛ ga, ka tɛ a naa tɔrɔ yɛrɛyirebɛfa ma ɔn bɛrɛ Sitanɛ ta pɛrɛ hɔn ga. ⁷ A togafɔrɔ daga ne wiri smazɛ ta mɛ wiin fa to dɛgɛbe ka naa n’a gun ga, a ka naa bɛrɛ Sitanɛ ta wɔrefrɛ hɔn mɛ ga. ⁸ Zɛngɛnkma na diɛmasma daga ne siɛbɛsma mɛ. Domada tala dama ne ti ye ta. A ka tɛ mɛnɛfa ta tere na ga, ɔn ka ne bɛrɛ sma ma ga. ⁹ Wuro yɔnmabe na da wiinye dɔrɔ ke ma, ye daga ne kwa wɔnwɔ ma fɔrɔna, ye gia ne tangan. ¹⁰ Ye daga n’e ta n’e sege dɛn. Zarakɛdo ɔɔn ma zɛ ye na ga, wɔnna sangan ma ye sbɛ ne tɛ zɛngɛnkma na diɛmasma na. ¹¹ Yee ye na yàra daga ne ti yɛ, sma kiu ka wiinye ma, ye ka ne barozana ta ga, n’e yɛrɛ figɛnɔn tɔɔ ne tele da pepe hɔn. ¹² Zɛngɛnkma na diɛmasma daga ne yàratala dama kma ne sbɛ n’e nɔmanɛ ta da kɔ y’a kɔnda tɛtɛrɛ fɔrɔna. ¹³ Bare wiinye kma ɔɔn zɛngɛnkma na diɛmabara ta n’e fɔrɔ, ye datɔ na fɔrɔ yi kɔ yɔnmabe na yire yi gun Yezu Krista hɔn. ¹⁴ Ma bɔ sɛbɛ be ma ne yɔɔn ɔn da bɛɛ yɔɔ ne zɔgɔ, ke na ke nɛmɛ za. ¹⁵ Ye tɛ yee, hali ma ɔɔn sangan dɛrɛ, be tɔɔ da be daga wiin fa ta Wuro ta kɔɔn hɔn wiin ɔɔn Wuro na siɛbɛ yi ta kma na kwɛ ye. Yewɔ wiinye ɔɔn tian na bintae kɔ a na figɛfrɛ. ¹⁶ Tian na, yɔnmabe na bunu yire. Krista man’e yɛrɛ ta sɔɔn na, Wuro ta Ni ɔɔn n’a ta telebe dɔrɔ. Mɛlɛkɛ man’a za, n’a ta da puru n’e yira sizɛ ma. Diniyan hɔn kma yɔɔn a ma, a ɔɔn duro ba wuro hɔn yirebe hɔn.

¹ Wuro ta Ni n’e yira n’e kìni ɔn da, ye wɛbɛsangan ma, ye bɔɔ na ye timi bere, y’a yɔnmabe dra ne mɔɔ ziniyaga ta kala na yaga yi ma. ² Niɔnsɔre wiinye ɔɔn ninaban y’a tɛda na ga, wɔnwɔ ɔɔn na n’e firebɛ kɔ y’a daplabɛre. ³ Ye na sɔɔ yanma ma, ɔn da sma ka ne bɔɔ zɔnfrɛ zɔn ga, kamasɔrɔ a ma Wuro ɔɔn n’e dan ɔn da y’a kma wiinye ɔɔn tian tɔɔ fɔrɔna, n’e zɔn ne baraka yira. ⁴ Bare Wuro wiinye frɛ pepe dan, be ɔɔn n’e zɔn ne baraka yira, ye dia, foyi mane ti ye hɔn wiin ɔɔn daga drɛ ga. ⁵ Wuro domada kɔ wuromɛ n’e kìnibɛ. ⁶ Be ɔɔn be na plala kala kɔ wɔnna da wɔ pepe, be na tɛ Yezu Krista ta kma na zɛngɛnkma na diɛmata na fɔrɔ yi na wiin ɔɔn ye yɛrɛ woro kɔ yɔnmabe na bɛreda kɔ kala na fɔrɔ yi, be be yinnamalɔ ɔn mɔɔ wiin na. ⁷ A ma yàrasɔnmlala ta zanabere wiin ɔɔn yɔnmabe ka sɔɔn hɔn ga han, ka ne mɔɔ wɔn na ga. Ne dɔɔ Wuro ta da ɔɔn ma. ⁸ Tɔnɔ zɔgɔ dama ɔɔn ti sɔɔn kɔn na darobɛda hɔn yee nka tɔnɔ na yire ye ɔɔn ti daro na Wuro ta da na. Tamara ni na dosɔ ti ye hɔn wa. Basiɛ ni ɔnkɔ wɛbareyani. ⁹ Bɔ domada bɛ yɔnmabe na ye ne daga figɛ na sma pepe ta. ¹⁰ Bare ke ɔɔn ne yannɛ ɔn ne kwini, wɔn kɔrɔ ke kià yɔnmabe dɛ Wuro na siɛbɛ yi ma wiin ɔɔn sma pepe na kisita n’a bii yɔnmasma ma dɛn. ¹¹ Bɔɔ be daga ɔɔn yira sma ma n’e kala kɔ lɔgɔ. ¹² Sɔɔn sii ka tɔrɔ bia nimisalabe ma ne be yagayaga ga. Nka be daga tɛ tagamase na Wuro ta kma ta bia bɛreda hɔn kɔ bia tɛda hɔn kɔ bia dadiamabe hɔn kɔ bia yɔnmabe hɔn kɔ bia kìni hɔn. ¹³ Sanɛ ma ne naa, be yangan ne Wuro domada kala n’e kɔrɔ giati ne sma kala. ¹⁴ Wuro wiin kiɛn ta be ma y’a fanɛ baraka hɔn sɔnmlala ta nɛmɛ kwɛkuru ɔɔn ye sra dɛ be wɔɔn hɔn, ka wɔn yagayaga ga. ¹⁵ Be daga kwa wiin fa ma fɔrɔna, bo ɔɔn wɔn. Wɔn ma be daga ne dɔɔ fɔrɔna mɛ. Wɔn ɔɔn na tɛ, be ne yaa zin sma pepe yinna hɔn suu. ¹⁶ Be yɛrɛ kɔrɔse ɔn bia kala kɔrɔse mɛ. Sige a ma. Be ɔɔn ne tɛ yee, wɔn ɔɔn na tɛ wiinye kma ɔɔn mɔɔ be ta, ɔnkɔ bi yɛrɛ, ka sbɛ kisi.

¹ Ka ne gwangwana sɔnmlalo ma ga nka bɛre a ta wɔkara be tɔn, ne yɛlɛnɔma foga wɔkara be piare. ² Ne yasɔnmlala foga wɔkara be sieri ne dala foga wɔkara bia ligeyàra kɔrɔhɔnkìni hɔn. ³ Diɛmasma ti wiinye yɔfuroyàra na melemele ga, ne wɔnwɔ yirebɛ. ⁴ Nka nɔmanɛ wɛlɛ mamanɔmanɛ ɔɔn ne ti wiin yɔfuroya ta, wɔnwɔ ɔɔn daga dafɔre ta y’a kma ma dɛn wɔkara Wuro n’e kia wiin nɛ ɔn n’e na vɔrɔre ta dafɔre nɛmɛ ta ye ma. Wɔn ɔɔn dia Wuro ma. ⁵ Nka wiin yɔfuroya ɔɔn wɔɔ ye sana, wɔn yɔɔn Wuro ɔɔn ma ɔn wɔɔ wuromɛ hɔn sin kwɛ wuru ma. ⁶ Nka wiin ya ɔɔn nihɔndiaro dama giati, hali a na ni ma yi giatɛ siri wɛ. ⁷ Be daga wiin fa yira ye ma wiin fa to ye ka naa zarakedo gun ga, bo ɔɔn wɔn. ⁸ Wiin te ɔɔn mane kwa y’a kma ma ga, y’a kɔnkma yɛrɛ ma, wɔn kɔrɔ wɔnna te maga yɔnmabe hɔn. Wurotɔbareyata yɛrɛ fɔn kɔ lege. ⁹ Wiin ya sii ɔɔn dɔgɔ kiesaa gun, a ma bangan tala dama ta a mane yɔn mɛ, wɔn nii ɔɔn sbɛ ne kɔ yɔfuroyàra hɔn. ¹⁰ A togafɔrɔ daga ne wiri a ta dafɔre ye na. A wiin ya ɔɔn bɔɔ nimisala woro, ɔn mane kwa samara ma, ɔn mane taa y’a kma ta da na, ɔn mane ninabansma zigi tugu, ɔn mane dafɔre sii pepe ta. ¹¹ A ma yɔfuroyàrazɔrɔ han, ka wɔnwɔ nii ka ga. Bare ga ye ma diamada ɔɔn naa n’e timi bere Krista ma wiin sangan ma, ye ne yanma kia. ¹² Ye tɛ yee, kiti na bɛrɛ ye ma ye ta gweredosɔ ye na. ¹³ Wɔn nii wɛ mɛ, ye ta tɛ ɔɔn mane ti bara hɔn ga, ye ne yara ne fɔnɔ sma brɛ. Ye tɛ yee, ye ta bɛreda yaan ye ma bere ne bɛre ne kɔrɔse mɛ ga. Ye ne bɛre ne drɛ yee. ¹⁴ Wɔn ye na ma kia yɔfuroyàrazɔrɔ ne bere ne yɔn ne nɔmanɛ vɔrɔ ne taa ye ta da na wiin fa to ke zugu ka naa dɛndɛnmada sii gun ɔn ke dayagabɛre ga. ¹⁵ Bare wɔnna yɔfuroyàra wɔ na bɔɔ sotele dra n’a wɛ ɔn dɔɔ Sitanɛ ma. ¹⁶ Yɔnmabe ti wiinye yàra hɔn, yɔfuroya ɔɔn ne ti ye na boo ta kma hɔn, a daga ne kwa a ma. A k’a wɔnda dɛ Wuro ta kɔnkma ma ga wiin fa to wiinye ɔɔn yɔfuroyàra na siɛbɛ ye, Wuro ta kɔnkma sbɛ wɔnwɔ diɛma ne gun. ¹⁷ Wiinye kma ɔɔn zɛngɛnkmabe ta n’a fɔrɔ, wɔnwɔ daga yirebe na kanyinna pla gun. Wiinye kma yɛrɛ ɔɔn yannɛ Wuro domada ye na ɔnkɔ kala ye na wɔnwɔ yaga yi. ¹⁸ Ye sɛbɛ Wuro domada na sɛbɛ hɔn ɔn da, ye wiin yangan ne ti sɔnfrɛnɔmanɛ vuro hɔn, ye be daga n’a do pɛrɛ ga. Ye bere n’a sɛbɛ yɛ mɛ ɔn da, ye baratɛta daga kɔ y’a sara. ¹⁹ Ka be dian ne zɛngɛnte zarake ga, a ma tɛ sma pla wɛlɛ sma saa ta siɛrɛbe do ma ga. ²⁰ Wiinye kma ɔɔn kakiɛ ta, gwangwana ye ma sma pepe yɔnnɔ na wiin fa to bɔ sɛrɛ kwan. ²¹ Ma ne sun ye na be ma Wuro yɔnnɔ na kɔ Yezu Krista yɔnnɔ na ɔnkɔ Wuro ta mɛlɛkɛ yɔnnɔ na ɔn da be kwa wɔnna da wɔ pepe ma ɔn ka n’e ta ne sɔɔn dɛ́gɛ ga. ²² Ka be sale ne be sra dɛ sɔɔn sii ma ga, ka da be be nii ka sɔɔn sii ta kakiɛ hɔn mɛ ga. Wɔɔ bia kìni hɔn. ²³ Saa ziokuna dama ta mɛnɛ na ɔn ne duvɛn zɔgɔzɔgɔ mɛnɛ be kɔrɔ ye na kɔ bia sangan pepe ma laganurumɛngɛn ye na. ²⁴ Bɔɔ sma tiye ye n’e ta kakiɛ nɔma tɔɔ y’e kiti dɛn ga. Nka bɔɔ ye tɛ mane zɛ ga, fɔn yaa kayan boo sangan ma ma. ²⁵ Yee tɛdafɔre tɛ ne zɛ yɛ. Hali wiinye ɔɔn ma zɛ wɔnna nɔɔ hɔn ga, ye sbɛ ne wɔɔ dɔndo hɔn ga.

¹ Wiinye kma pepe ɔɔn ti tɛrɛbe hɔn, wɔnwɔ daga ye wɔnnakma yirebɛ wiin fa to sɔɔn sii ka naa Wuro togo kɔ kala na fɔrɔ yi yaga ga. ² Yɔnmabe ti wiinye tɛrɛ wɔnnakma hɔn, ye ka da ye nɛmɛ tɛ plala na, wɔn ye na ye daga n’e yirebɛ ga rɛ. Ye yɛrɛ daga bere fa kwɛ y’a barafɔre ma yɛ bare bɔɔ sma yɔnmabe ti wiinye hɔn, ye da ne dia ye ma, wɔnwɔ ɔɔn n’e ta barafɔre na tɔnɔ gun. Be daga sma kala kɔ wiin fa n’a yira n’a sigebɛ ye ma, bo wɔn: ³ Wiin te ɔɔn ne boo kala na za yi ta ye ma, ɔn mane kià Matigi Yezu Krista ta domada na kìni ye yira ye ma ga, man’e kala kɔ Wuro ta tɔɔ ga, ⁴ wɔn kɔrɔ wɔnna te yɛrɛyirebɛta. A foyi tɔɔ ga, a wiin te ɔɔn yaa bɛrɛdo hɔn ne birisi kia. Wɔn hɔn yinnanayanfa kɔ dakwiɛro kɔ Wurotogayaga kɔ giatiyaga sa. ⁵ Wɔn hɔn giatiyaga na kma ta bɛredayan sa mɛ, ɔnkɔ wiinye kma ɔɔn tian tɔɔ mɛ ga, n’a giati da ɔn dɔɔ Wuro ta da ma, wɔn tɔnɔkiada. ⁶ Tian na, wiin te ɔɔn kayan ye sra hɔn fa dama ma, Wuro ta tɔɔ tɔnɔ na yire yi wɔnna te ta. ⁷ Ke na kɔ foyi ke sra hɔn diniyan hɔn wiin nɛ ga, yee ke na sa kɔ foyi ke sra hɔn ɔn yaa kɔ lɔgɔ mɛ ga. ⁸ Wɔn ye na zɔnfa kɔ zoga ɔɔn ne ti ke ta, wɔn daga ke wa. ⁹ Nka wiinye kma ɔɔn kia tɛ frɛkma na han, wɔnwɔ bɛrɛ mama hɔn. Giatiyaga na yaan ye wiinye ɔɔn sɔɔn ka bɛrɛ hɔn kɔ fire hɔn, wɔnwɔ ɔɔn bɛrɛ ye ma. ¹⁰ Dayaga sii pepe sulu, wɔn gwana na wu. Bɔɔ tɔrɔ a ye ma ɔn yɔnmabe na sogo dra ɔn yannɛ na yire ye kia n’e dra ye yɛrɛ ma. ¹¹ A ma bi Wuro ta sɔɔn han, be yɛrɛ wa wɔnna da wɔ hɔn. Telebe kɔ Wuro ta tɔɔ kɔ yɔnmabe kɔ dadiamabe kɔ woramakɔn kia. ¹² Yɔnmabe na kun na fɔrɔ yi kwini wiin fa to be wiri wiin wɛbareyani we na, be wɔn gun. Be wiin yɔnmabe we n’a fɔrɔ yi yira siɛrɛkma na yaan ye yɔnnɔ na. ¹³ Ma ye na sogo pere be ma Wuro yɔnnɔ na wiin ɔɔn ni ka frɛ pepe hɔn kɔ Yezu Krista yɔnnɔ na wiin ɔɔn yɔnmabe na siɛrɛbe na fɔrɔ yi ta Pɔnsipilate yɔnnɔ na, ¹⁴ ɔn da be kwa bɔ yirada bɛ ma ɔn ka tɛ zarakedo zɛ be na ga fɔn yaa kayan kià Matigi Yezu Krista ta naa ma ɔn ye yɛrɛ dɔrɔ. ¹⁵ Dangamu na te wiin dama ɔɔn fanganmagwaga wiin ɔɔn dɔre wagati na tigɛ yi ma. Awe ɔɔn fanganmɛ na fanganma, wɔnnakma wɔnnate. ¹⁶ Awe dama ɔɔn siri ga. Sɔɔn wiri ne gun wiin kini na ga, m’a za n’a za ga, mane na n’a za mɛ ga, wɛɛn a tangan. Yirebe kɔ sebe n’a ye sangan pepe ma. Amina. ¹⁷ Yira diniyan hɔn naforokma ma, ye ye ka ye yɛrɛ yirebɛ ɔn ka yɔɔn naforo ma wiin ɔɔn foyi na fa ga. Nka ye yɔɔn Wuro ma wiin ɔɔn frɛfɔrefɔre pepe pere ke ma yaan wiin fa to ke ne nihɔndia. ¹⁸ Ye ye ne dafɔre ɔɔn ta n’e yɛrɛ dangamubɛ kɔ wɔnwɔ n’e sra hɔn frɛ pere ka ne giati ga, ne dini ne kɔ bɔ sɛrɛ. ¹⁹ Ye wɔn ɔɔn na tɛ ye naforo na fɔrɔ yi gun n’a tigɛ ye yɛrɛ ma sɛn wiin fa to ye wɛbareyani gun. ²⁰ Timote we, wiinye frɛ ɔɔn kalfa be ma, kwa ye ma fɔrɔna. Ka dian dakwiɛro na zana yi na wiin ɔɔn yɔnmabe ka sɔɔn hɔn ga. Ka dian baro na zana yi na ye yira ne kwa, ye wiin ɔɔn datɔ kamasɔrɔ ye mane tian ga. ²¹ Bɔɔ ta tɛ ɔɔn mane yɔɔn wɔn ma, wɔn ɔɔn tɛ ye ɔɔn yɔnmabe na sogo dra. Wuro tɛ a y’a woramadiabe ta ka pepe ma.