1 TESALONIKEKMA

¹ Pɔle kɔ Silivɛn kɔ Timote ɔɔn bo sɛbɛ fanɛ Wuro ta kma ma wiinye ɔɔn Tɔn Wuro kɔ Matigi Yezu Krista ta kma ne ti Tesalonikekuru hɔn, ɔn da Wuro tɛ a y’a dadiamabe kɔ y’a siara ta ka ma. ² Mɛ́ tɛ ne Wuro mɛ wiin sangan ma pepe, ke ne baraka yira a ma ka ye na. ³ Wiin yɔnmabe ɔɔn ti ka hɔn ka ne bara ta kɔ wiin dadiamabe ɔɔn ka ta baratɛre na, kɔ ka yɔɔn kià Matigi Yezu Krista ma wiin yɔnnɔn na, mɛ́ tɛ ne wɔn pepe giati ke Tɔn Wuro zin hɔn ⁴ ɔn tɔɔ da Wuro ɔɔn ka dɛ́gɛ, kià kma ka da ne dia a ma. ⁵ Tian na, mɛ́ wiinye fanɛdia wɔ yira, ye mane yira ka ma wɔkara bɛredazana yee ga. Nka ye y’a sebe ta n’a dɔrɔ Wuro ta Ni baraka hɔn. Mɛ́ mɛ́ yɛrɛ foga wiin nɛ k’a foro na, ka wɔn dɛ́gɛ tɔɔ. ⁶ Ki mɛ, ka ɔɔn mɛ́ kɔ Matigi zugo bii ne ti ninabannɔ hɔn, ɔn dian Wuro domada hɔn kɔ Wuro ta Ni ta nihɔndiaro hɔn. ⁷ Ye tɛ yee, Wuro ta kma pepe hɔn Masedowane kɔ Akayi, ka tɛ tagamase na wɔnwɔ ta. ⁸ Matigi ta bere tuma ka brɛ ɔn wiri Masedowane kɔ Akayi wiin nɛ, yee k’a yɔnmabe Wuro ma na da na bɛreda wiri bii pepe hɔn yɛ fɔn yirawɔn yɛrɛ mane ti ye na mɛ́ ta titiri ga. ⁹ Bare ka mɛ́ foga wiin figɛnɔn na, kɔ ka ka timi bere fian ma wiin nɛ ɔn ne bara ta ni na te Wuro kɔ a na siɛbɛ yi ma wiin nɛ, wiin te tɛ da ye mià da bɛre, a ma wɔn a ɔɔn yira. ¹⁰ Wuro Nɔ wiin ɔɔn na tuma wuro hɔn ɔn naa, a ye Nɔ Yezu wiin winni n’a sabɛ sara yɔ, a Nɔ wiin ɔɔn na ke dɛn ke wa a ta kiti hɔn wiin ɔɔn vetra, wɔn ka ɔɔn yɛ́rɛ.

¹ Kià kma, ki yɛrɛ n’e yɔnnɔ tɔɔ fɔrɔna ɔn d’a zana ka mane mɛ foga ga. ² Nka ke mane dɔɔ sa yannɛ kɔ vini hɔn Filipekma ta wɔkara ka ye yɔnnɔ tɔɔ wiin nɛ, nka yee Wuro worasigi ka ke hɔn. Hali sma ɔɔn ne ke kwini, ke n’a ta fanɛdia yira ka ma. ³ Wɔn kɔrɔ kià pile sɔnfirebɛ ye ga, ɔn mane giatiyaga na ye ga, ɔn mane lamara ye mɛ ga. ⁴ Nka Wuro ta tɛ ɔɔn ke ta ke sege wiin fa to a fanɛdia kalfa ke ma, wɔn ɔɔn ke ka ye na yira hɔn. Mɛ́ kia sma ma diamada ta ga nka Wuro wiin ɔɔn ke kɔrɔ hɔn da tɔɔ, wɔn ma diamada ke kia ɔɔn ta. ⁵ Bo wɔn ɔɔn tɛ mɛ́ ɔɔn ma lamarabɛreda gun n’e za ga, ki yɛrɛ n’e yɔnnɔ tɔɔ mɛ́, ɔɔn da mɛ́ yɛrɛ ta tɔnɔ na da na giati mane ti ke hɔn mɛ ga. Wuro ke siɛrɛ ye na. ⁶ Mɛ́ yirebe kia na za sɔɔn sii ta ga, m’a kia ki ta ga, m’a kia n’a za sɔnza ta mɛ ga. ⁷ Kamasɔrɔ kià tɛ ɔɔn ne Krista ta fanɛsma, ke mane sbɛ ne fangan dɛ ka ma. Nka ke mane ke woramakunabɛ ka ma wɔkara sie kwa ye nɔmanɛ ma wiin nɛ. ⁸ Ka da mane dia ke ma fɔrɔna fɔn ke ne Wuro ta fanɛdia yira ka ma ne ke ni yɛrɛ kia pere na ka ye na. Bare k’a da mane sige fɔnɔ ke ma. ⁹ Mɛ́ wiinye yannɛ ta, ka kakiri ti kɔ lɔgɔ kià kma. Kià tɛ ɔɔn mane baratɛ sin kwɛ wuru ma wiin fa to ke ka tɛ wɔnbie na ka na boo ma ga, wɔn tɛ ke ɔɔn sbɛ Wuro ta fanɛdia yira ka ma. ¹⁰ Ka ke siɛrɛ ye na, Wuro yɛrɛ ne ke siɛrɛ mɛ ɔn da yɔnmabe ti ki wiinye kma hɔn, ke mane kìni kɔ telebe na sogo ɔɔn yaa kɔ ka nɛmɛ, zarakedo mane ti ke na ga. ¹¹ Ka yɛrɛ n’e yɔnnɔ tɔɔ mɛ ɔn da ke mane ka pepe foga wɔkara tɔn ye nɔmanɛ foga wiin nɛ. ¹² Ke mane ka mɛ ne ka wora sigebɛ n’a kia ka ta da Wuro wiin ɔɔn ka wiri y’a kolo kɔ y’a yirebe ye na, d’a wiin fa kia ka ta, da ka ka yɛrɛ foga yee. ¹³ Bo wɔn ɔɔn tɛ mɛ́ ɔɔn tɛ ne baraka yira Wuro ma ka ye na sangan pepe ma. Mɛ́ mane Wuro domada yira ka ma wiin sangan ma, ka mane dian ye na. Ka mane dian ye na ɔn da ye ye sɔɔn domada ga, nka ye wiin fa tian na, wɔn na ka mane dian. Yɔnmabe ti ki wiinye kma wɔ hɔn, Wuro domada wɔ wiinye ɔɔn bara ta ka hɔn. ¹⁴ Tian na kià kma, Wuro ta kma wiinye ɔɔn ti Zudegiamana hɔn ne dɔɔ Yezu Krista ma, wɔnwɔ zugo ka ɔɔn bii bare ki na plala yɛrɛ ɔɔn ki yannɛ mɛ wɔkara Ziwifu n’ewɔ yannɛ wiin nɛ. ¹⁵ Yewɔ Ziwifu wɔ ɔɔn Matigi Yezu yɛɛ ɔn Wuro ta daberebɛre yɛɛ mɛ, yewɔ ɔɔn mɛ́ yannɛ. Ye da dia Wuro ma ga, ɔn ne sma pepe zugi mɛ. ¹⁶ Ye sɔɔ ke ma wiin fa to ke ka fanɛdia yira sizɛ ma n’e kisi ga. Ye tɛ yee, ye fa kwɛ ne yaa y’a kakiɛ ma sangan pepe ma. Nka wɛbɛdo ma, Wuro woro bɛrɛ ye ma. ¹⁷ A ma mɛ́ han kià kma, ke brɛ dɛrɛ nɛmɛ na wagati zɔgɔ dɛn. Ke nɛmɛ za ga nka ke nɛmɛ ta da giati. Ke mane sige ke yɛrɛ ma wiin fa to ke yaa ka sege bare ka na wu mane ti ke na fɔrɔna. ¹⁸ Bo wɔn ɔɔn tɛ mɛ́ ɔɔn mane kia yaa ka brɛ. Mɛ Pɔle yɛrɛ mane wɔn giati kanyinnayan na nka Sitanɛ ɔɔn sɔɔ ne ma. ¹⁹ Awale wɔnnɔ ɔɔn na tɛ mià yɔnmabe kɔ mià nihɔndiaro kɔ mià yɛrɛyirebɛ na fanganmabanfola Matigi Yezu zin a na nasangan ma, a ma tɛ ki ga? ²⁰ Tian na, ki ɔɔn mià yirebe ne mià nihɔndiaro.

¹ Wɔn timi ke naa za da ye fɔrɔ wiin na ga, ke wɔɔ Atɛne ke sana. ² Ke mane ke na plalo Timote, Wuro ta baratɛta Krista ta fanɛdia na yira na, ke mane wɔn fanɛ ka brɛ wiin fa to a yaa fangan ka ka hɔn, ɔn ka wora sigebɛ k’a yɔnmabe hɔn, ³ wiin fa to wiinye yannɛ wɔ ɔɔn tiye basiɛ, wɔnwɔ ka sɔɔn sii kwanbɛ ga. Bare ka yɛrɛ tɔɔ da yee kià sirewɔ ti. ⁴ Ke na tisangan ma ka brɛ, ke mane ka sɔnmɛbɛ ne kwa ka daga ka yɛrɛ tɛtɛrɛ ɔn dian yannɛ na. Ka yɛrɛ tɔɔ da yee ye naa tɛ mɛ. ⁵ Bo wɔn ɔɔn tɛ ne woro ɔɔn ma mane sige titiri ga, ma ɔɔn Timote fanɛ d’a yaa toga k’a da na bare ma mane kwan da mamata ka naa ka mama, mià yannɛ tɛ zana ga. ⁶ Basiɛ Timote tuma ka brɛ ɔn naa k’a yɔnmabe na da yira ke ma kɔ k’a dadiamabe. A da mɛ, ye ka kakiri ti mɛ́ da sangan pepe ma fɔrɔna, ye mɛ́ na wu ti ka na wɔkara ka na wu ti mɛ́ na wiin nɛ. ⁷ Ye tɛ yee kià kma mɛ́ zigi tugu mià yannɛ kɔ mià ninabannɔ na k’a yɔnmabe baraka hɔn. ⁸ Basiɛ mɛ́ bere ni gun yɛ mɛ bare ka dɔɔ Matigi ma tian na. ⁹ Mɛ wiin nihɔndiaro we pepe gun Wuro ta ka ye na, nɛ mɛ́ sbɛ ne baraka yira a ma ka ye na yɛ? ¹⁰ Bo wɔn ɔɔn tɛ mɛ́ ɔɔn tɛ ne Wuro mɛ wiin sangan ma pepe, mɛ́ n’a sigebɛ fɔrɔna wiin fa to a mɛ́ diɛma mɛ́ sbɛ sogo gun ɔn yaa ka sege, wiin fa ɔɔn k’a yɔnmabe do pagabɛ, mɛ́ sbɛ wɔn pere ka ma. ¹¹ Ke Tɔn Wuro yɛrɛ kɔ kià Matigi Yezu tɛ ye ka brɛ yasogo pere mɛ́ ma. ¹² Wiin dadiamabe ɔɔn ti ki kɔ ka nɛmɛ yɔ, sma pepe da ne dia ka ma mɛ, Matigi tɛ a wɔn yirebɛ ka yɔɔ yɛ wɔkara ka da dia mɛ́ ma wiin nɛ. ¹³ A tɛ a ka wora sigebɛ, ka tɛ sma na kìni ye na, zarakedo ti wiinye na ga, ke Tɔn Wuro zin hɔn kià Matigi Yezu nasangan ma kɔ y’a dɛ́gɛwɛsma pepe.

¹ Kià kma, ke wiin fa kia ka ta ne ka mɛ wiinye da na Matigi Yezu togo na, bo lɔgɔ: Ka daga figɛ wiin nɛ ka da ɔɔn dia Wuro ma, mɛ́ wɔn yira ka ma, a bere ma yee ka figɛ mɛ. Ka ne yaa zin suu. ² Mɛ ka kala kɔ wiinye da Matigi Yezu togo na, ka wɔnwɔ tɔɔ. ³ Wiin fa ɔɔn dia Wuro ma, wɔn ka ne kìni ɔn ka da ka kɔ kakalafa hɔn ga. ⁴ Ka na wiin ti pepe wɔn wɔɔ kɔ y’a ya ɔɔn dama ne siɛbɛ tɛ kɔ lege ne kiu ka a ma. ⁵ Kakalafa na wu k’a foga ga, wɔkara sizɛ wiinye ɔɔn Wuro tɔɔ ga, tɛ ne tɛ wiin nɛ. ⁶ Sɔɔn sii ka ye na plalo nabada ta ɔn kɔ a tɛgɛ na da hɔn bɔ da bɛ na ga bare Matigi y’a ku wa wɔn pepe na wɔkara ke pia n’e yira ka ma wiin nɛ, n’e nɔma dɔrɔ ka ma mɛ. ⁷ Tian na, Wuro ke wiri wiin fa to ke tɛ kakalɛ na ga nka wiin fa to ke ne kìni. ⁸ Wɔn ye na wiin te ɔɔn maga bɔ ladi bɛ na, a maga sɔɔn hɔn ga nka Wuro wiin ɔɔn y’a Ni pere ka ma, wɔn hɔn a maga. ⁹ A ma ka yɔ dadiamabe han, sɔɔn daga fa yira ka ma wɔn na titiri ga bare ka daga ne nɛmɛ da diabɛ ka ma wiin nɛ, ka wɔn mɔɔ Wuro ta. ¹⁰ Ka yɛrɛ wɔn ta ka na plala pepe ye na Masedowanegiamana pepe hɔn mɛ. Kià kma, ke a kia ka ta ɔn da ka ne yaa zin sangan pepe ma. ¹¹ Ka ne yinnamalɔ ɔɔn kia sangan pepe ɔn ne taa k’a da ɔn na ne bara ta ka yɛrɛ ma wɔkara ke ye yira ka ma wiin nɛ, ¹² wiin fa to sma ne kiu ka ka ma, ka mako ka ne sa sɔɔn hɔn k’a wɔnda na ga. ¹³ Awale kià kma, sara ta da ti wiin nɛ, ke kia ka wɔn nɔma tɔɔ n’e kìni wiin fa to ka ka na wɔɔ ninabannɔ hɔn wɔkara yɔnmabe ti wiinye kma hɔn ga. ¹⁴ Ke ɔɔn n’e yɔnnɔ tɔɔ ɔn tɔɔ da tian na Yezu siri ɔn winni, yee mɛ́ wiinye kma ɔɔn siri Wuro na ne winni Yezu baraka hɔn ɔnkɔ awe Yezu yɛrɛ. ¹⁵ Ke mane wiin fa yira ka ma Matigi yɛrɛ yiranɔn na, bo wɔn: Ke wiinye kma ɔɔn ti ni na ɔn ne na wɔɔ fɔn Matigi nasangan ma, ye tɛ wɔkara ke ɔɔn na sige sara zin ga. ¹⁶ Bare sogo ɔɔn naa pere wiin sangan ma, mɛlɛkɛkɔn ɔɔn naa mɔɔ wiin sangan ma kɔ Wuro ta tolakɔn, awe Matigi yɛrɛ ɔɔn na tuma wuro hɔn ɔn zii. Wɔnna sangan ma wiinye kma ɔɔn siri kɔ Krista wɔnwɔ na winni dɛn. ¹⁷ Wɔn timi ke wiinye kma ɔɔn ti ni na, ke na kwɛ yaa kɔ lege daba hɔn Matigi tɛndo hɔn pangan hɔn, ɔn wɔɔ kɔ lege melemele. ¹⁸ Wɔn ye na ka ne nɛmɛ zigi tugu kɔ wɔnna domada wɔ.

¹ A ma ye na wagati kɔ ye na wuru han kià kma, sɔɔn daga wɔn yira ka ma ga. ² Ki yɛrɛ n’e tɔɔ n’e kìni ɔn da Matigi ta nakɔ naa wɔkara panɔ yi wuru hɔn. ³ Sma na ne kwa wiin sangan ma, ye ye ti siara hɔn, ye ye ti yinnamalɔ hɔn, wɔnna sangan ma yaga na bare bɛrɛ ye ma ye sbɛ ne dɛɛ ga, wɔkara tɛrɛbɛya tulu tɛ ne bare ne bɛrɛ a ma wiin nɛ. ⁴ Nka a ma ki han kià kma, ka ti tunio hɔn ga, wɔnna kɔɔ we ɔɔn ne na naa bare ka na wɔkara panɔ ga. ⁵ Tian na, ka pepe kini na nɔmanɛ, kɔɔ na nɔmanɛ. Ke wuru ye ga, ɔn mane tunio ye mɛ ga. ⁶ Wɔn ye na ka ka yin wɔkara bɔ sɛrɛ ga nka ke daga ke yinna doma ɔn ne ke yɛrɛ kɔrɔse. ⁷ Wiinye kma ɔɔn yin, wuru hɔn ye yin. Wiinye kma ɔɔn mɛnɛ ne yingin, wuru hɔn wɔnwɔ mɛnɛ ne yingin mɛ. ⁸ Nka ke wiinye kma ɔɔn kini na nɔmanɛ han, ka tɛ ke ne ke yɛrɛ kɔrɔse. Ke yɔnmabe kɔ dadiamabe ta kià balozogo na ɔn kisi na yɔnmabe ta kià kunkwinibanfola na. ⁹ Bare Wuro ke dan ɔn da y’a woro wiri ke ma ga nka a ke dan ɔn da ke kisi gun kià Matigi Yezu Krista baraka hɔn ¹⁰ wiin ɔɔn siri ke ye na wiin fa to a ne yɛre sirisma na. Ke siri yo, ke ti ni na yo, ke sbɛ winni ne kwɛ kɔ lege. ¹¹ Wɔn ye na ka ne nɛmɛ zigi tugu fɔrɔna ne nɛmɛ kala wɔkara ka ye ta wiin nɛ sin. ¹² Kià kma, ke a kia ka ta ɔn da ka na wiinye ɔɔn ye yɛrɛ yannɛ ka ye na, ne ka kala kɔ Matigi ta da, ka ne kwa ye ma. ¹³ Ka n’e yirebɛ fɔrɔna n’e da diabɛ ka ma ye ta bara ye na. Ka tɛ siara ne ti ka yɔ. ¹⁴ Kià kma, ke a kia ka ta ɔn da wiinye kma ɔɔn ti dakuro hɔn, ka ye ladi. Wiinye kma wora ɔɔn sige siɛ ga, ka ye wora sigebɛ. Fanganduru ti wiinye kma na, ka ye diɛma. Ka ne sma pepe ta da sɔmna. ¹⁵ Ka ka yɛrɛ kɔrɔse, sɔɔn sii ka da ye dayaga na ku sara kɔ dayaga ga nka ka ne dafɔre ta ka nɛmɛ ma kɔ sma pepe ma mɛ. ¹⁶ Ka ne ti nihɔndiaro hɔn sangan pepe ma ¹⁷ ne Wuro mɛ sangan pepe ma. ¹⁸ Ka ne baraka yira Wuro ma da pepe na Yezu Krista baraka hɔn bare wɔn ɔɔn n’a dungo. ¹⁹ Ka ka sɔɔ Wuro ta Ni ma ga. ²⁰ Ka ka Wuro ta daberebɛre ta yirada na wu wa ga. ²¹ Ka ne da pepe na kayan ta kɔ kakiri, ne fɔrɔ ye to ka kakiri hɔn. ²² Ka siɛ dayaga sii pepe ma. ²³ Siara na te Wuro yɛrɛ tɛ a ka kìnibɛ melemele ɔn yɛre ka na wiin fa to zarakedo ka zɛ ka na foyi boo na kià Matigi Yezu nasangan ma ga. ²⁴ Wiin te ɔɔn ke wiri, a tele. A wiin fa yira, a bere ne naa n’a ta mɛ. ²⁵ Ka ne Wuro mɛ mɛ́ ma mɛ, kià kma. ²⁶ Ka foo na fɔrɔ yi bire ke na plala pepe na. ²⁷ Ma ka mɛ fɔrɔna Matigi togo na da ka bɔ sɛbɛ bɛ kala kià kma pepe yɔnnɔ na. ²⁸ Kià Matigi Yezu Krista tɛ a y’a woramadiabe ta ka ma.