1 PIYƐRE
11 Mɛ Piyɛre Yezu Krista ta fanɛta, ma bo sɛbɛ fanɛ Wuro ta dɛ́gɛwɛsma ma, wiinye ɔɔn ti samarabe hɔn ne zanzan Pɔn kɔ Galate kɔ Kapadɔse kɔ Azi kɔ Bitinigiamana pepe hɔn. 2 Tɔn Wuro ka dɛ́gɛ ye yɛrɛ dungo na ɔn ka ta sma na kìni ye na y’a Ni baraka hɔn wiin fa to ka ne mɔɔ Yezu Krista ta ɔn sbɛ min kìni a too baraka hɔn. Wuro tɛ a y’a woramadiabe kɔ y’a siara ta ka ma yaan. 3 Ka baraka yira kià Matigi Yezu Krista Tɔn Wuro ma bare a ta woramadiabe baraka hɔn, a tɛ ke ɔɔn bere vɔrɔ wiin fa to yɔnmabe na sugu yi kɔ ke hɔn Yezu Krista ta winni sa baraka hɔn sara yɔ 4 wiin fa to ke kɔrɔ gun wiinye ɔɔn vra ga, mane dɔɔn ga, mane yaga ga. Wɔnna kɔrɔ wɔ tigɛ ka ma wuro hɔn. 5 Wuro ta sebe yɔnmabe ka ki wiinye kma hɔn kisi ye na wiin ɔɔn na tɛ wɛbɛsangan ma. 6 Wɔn ye na hali yannɛ sii pepe ɔɔn ne na ka gun ɔɔn ka ni na ban boo wagati zɔgɔ hɔn, ka ne nihɔndia. 7 Wɔnna yannɛ wɔ k’a yɔnmabe na tɛsege ye. Sanɔ wiin ɔɔn na yaga, tamara ye tɛ n’a ka n’a sege togo hɔn wa, a ɔɔn ma k’a yɔnmabe wiin ɔɔn fɔrɔ yi sanɔ ma. Wɔn tɛ wiin fa to a na kayan tɔɔ Yezu Krista ɔɔn naa ye yɛrɛ dɔrɔ wiin sangan ma, ka ɔɔn sbɛ yirebe kɔ togo gun. 8 K’a za ga, a da ne dia ka ma ɔn m’a za dɛn mɛ ga, ɔn ne yɔn a ma. Wɔn ye na ka nihɔndia fɔrɔna, k’a nihɔndiaro mane sbɛ ne lakare ga. 9 Ka k’a yɔnmabe na sara gun, wɔn k’a kisi. 10 Wiin woramadiabe ɔɔn daga wiri ka ma, wɔn da Wuro ta daberebɛre mane ɔɔn yira. Wɔn ye na ye mane toga kìni wɔnna kisi we na. 11 Krista Ni wiin ɔɔn mane ti ye hɔn, wɔn baraka hɔn ye man’e na tɛwagati kɔ ye na dɛndɛnmada kia. Bo wɔn ɔɔn tɛ wiinye yannɛ ɔɔn mane na Krista gun ɔnkɔ wiin yirebe ɔɔn mane na dɔɔ wɔn timi, ye ɔɔn mane wɔn yira. 12 A mane yira dɔre ye ma ɔn da, y’a yewɔ yɛrɛ ye na ye yira ga nka ki ye na wɔnna fanɛ wɔ mane yira ye ma, fanɛdia na yirasma wiinye yira ka ma basiɛ Wuro ta Ni baraka hɔn wiin ɔɔn tuma wuro hɔn mɛlɛkɛ kia ne wiin sege. 13 Awale ka tɛ ka kakiri ne ti kɔ lɔgɔ sangan pepe ma, ka ka yɛrɛ tɛtɛrɛ ɔn tigɛ, Yezu Krista ɔɔn naa ye yɛrɛ dɔrɔ wiin sangan ma. A ta woramadiabe wiin ɔɔn na pere ka ma, ka ne yɔɔn wɔn ma. 14 Ka mane foyi yɔnnɔ tɔɔ wiin sangan ma dɛn ga, ka mane dɔɔ ka ma diamada wiinye ma, ka wɔnwɔ za n’e to ɔn tɛ wɔkara damɔnimisala. 15 Nka ka na wirita kìni wiin nɛ, ki mɛ, ka tɛ sma na kìni ye na yee mɛ k’a tɛda pepe hɔn. 16 Bare ye sɛbɛ Wuro domada na sɛbɛ hɔn ɔn da, ye Wuro da ye ka daga tɛ sma na kìni ye na, bare yi kìni. 17 Wiin te ɔɔn sma pepe kiti ye ta tɛda ma, mane sɔɔn dɛ́gɛ sɔɔn na ga, ka ɔɔn n’a wiri ɔn da ka Tɔn, ka ne k’a tɛda ta ne kiu ka a ma k’a sirewɔ hɔn. 18 Ka daga tɔɔ da wiinye frɛ ɔɔn yaga, gwana wɛlɛ sanɔ, a wɔn ye ka wɔɔn wa kɔ ɔɔn, ka tamɛ ta soyɔ ma ga. 19 Nka Krista too na kìni ye baraka hɔn, wiin ɔɔn tɛ wɔkara gwanɔ, yagado kɔ doma ti wiin ma ga. 20 Awe wiin ɔɔn mane tɛtɛrɛ tigɛ n’a bii diniyan ma dan dɛn ga ɔn dɔre wɛbɛdo ma ka ye na. 21 Awe baraka hɔn ka yɔɔn Wuro ma, wiin ɔɔn n’a winni n’a sabɛ sara yɔ ɔn yirebe pere a ma wiin fa to ka ne yɔɔn Wuro ɔɔn ma. 22 K’a tɛ ɔɔn dian mɔɔ tian na, wiin fa to ka dadiamabe ta daplaplabɛre ka ne ti a hɔn ga, ka ka yɛrɛ kìnibɛ. Ka ka nɛmɛ dadiabɛ ka ma fɔrɔna. 23 Wuro domada baraka hɔn wiinye ɔɔn yaga ga, ne tiye sangan pepe ma, ka bere vɔrɔ. Ka bere vɔrɔ Tɔn ta ga, wiin ɔɔn siri nka wiin ɔɔn siri abada ga. 24 Wɔkara ye sɛbɛ wiin nɛ Wuro domada na sɛbɛ hɔn ɔn da, ye sma pepe ti wɔkara sɔgɔ. Ye ye ta yirebe pepe ne ti wɔkara sɔgɔtulo. Ye sɔgɔ tɛ kwiɛ, ye tulo dɔrɔ. 25 Ye nka Matigi domada tiye suu. Kamasɔrɔ wɔnna domada wɔ wɔn wiinye fanɛdia ɔɔn yira ka ma.
21 Wɔn ye na ka zugoyagafa sii pepe kɔ lamara sii pepe kɔ daplaplabɛre kɔ yinnanayanfa kɔ sɔndabɛre do dra. 2 Ka tɛ fanɛdia na bɛreda da ne dia ka ma wɔkara yingin dia bibi ma wiin nɛ, wiin fa to ka sbɛ kisi awe baraka hɔn. 3 Ye sɛbɛ Wuro domada na sɛbɛ hɔn ɔn da, ye ka Matigi taa n’a sege, ɔn tɔɔ d’a fɔrɔ. 4 Ka ka dɔbɛ Yezu Krista na. A dɔgɔnɔ na sugu yi, sma maga wiin hɔn nka Wuro n’a dɛ́gɛ, a ne fɔrɔ a yinna hɔn. 5 Ki mɛ, ka na tɛ dɔge na sugu ye na ɔn tɛ kɔɔn na, Wuro ta Ni ti wiin hɔn, ɔn kwɛ tɛ Wuro ma salakawɛre na wiin fa to ka ne salaka na kìni ye wa a ma wiinye da ɔɔn dia a ma Yezu Krista baraka hɔn. 6 Bare ye sɛbɛ Wuro domada na sɛbɛ hɔn ɔn da, ye bo ma lologo hɔn dɔgɔnɔ tigɛ Siyɔnkuru hɔn. A dɔgɔnɔ na fɔrɔ yi wiin ɔɔn dɛ́gɛ wɛ. Wiin te ɔɔn yɔɔn a ma, wɔnna te na piri ga. 7 Yɔnmabe ti ki wiinye kma hɔn, wɔnna dɔgɔnɔ we fɔn frɛ pepe ka yinna hɔn. Nka yɔnmabe ti wiinye kma hɔn ga han, kɔntɔgesma mane maga wiin dɔgɔnɔ we hɔn, wɔn bere tɛ lologo hɔn dɔgɔnɔ na. 8 A tɛ sma ta dundɔgɔnɔ na wiin siriritiri ɔn sma bɛrɛbɛ. Ye dun a hɔn bare ye yɔɔn Wuro domada ma ga. Wɔn ye na ye mane dan. 9 Nka ki han, ki dɛ́gɛwɛsi, fanganma ma salakawɛre sii na kìni yi, Wuro wiinye kma ta y’e na wiin fa to wiin te ɔɔn ka wiri ka wa tunio hɔn ɔn ka ka y’a kini na kabako yi hɔn, ka sbɛ n’a ta kabakotɛda yira. 10 Ki wiinye kma ɔɔn mane pia n’a ta kma ga ɔn naa tɛ Wuro ta kma na basiɛ. Woramadiabe mane tɛ ki wiinye kma ma ga ɔn naa tɛ ka ma basiɛ. 11 Kià kma, ki wiinye ɔɔn samara diniyan hɔn, m’a kia ka ta ɔn da ka diniyan hɔn diamada wiinye ɔɔn kwini ne kɔ sɔɔn ni, ka ka da ka kɔ wɔnwɔ hɔn ga. 12 Ka ka yɛrɛ foga ka fɔrɔ sisma yɔ wiin fa to ye ne ka yagabɛ wiinye da na ɔn da ye ka dayagatɛre, ye ka sbɛ wɔn gun ga, k’a tɛdafɔre sbɛ kini dɔrɔ ye ma, ye sbɛ Wuro yirebɛ a nakɔ ma. 13 Ka ka yɛrɛmazibɛ sma ta tɛn na da pepe ma Matigi ye na. Hali kɔ fanganma ma a ta fanganmabe ye na. 14 Hali a ma fanganma ta dayinnahɔnwɛta a wiin dɛ́gɛ n’a tigɛ wiin fa to a ne dayagatɛsma yɔnnɔhɔntoba ne dafɔretɛre yirebɛ. 15 Bare ka ɔɔn ne dafɔre ta, wɔn ma ka na datɔbareyasma ta datɔbareyafa wɛ. Wɔn yɛrɛ Wuro dungo mɛ. 16 Ka ka yɛrɛ ta wɔkara tisramasma nka ka ka tɛ wɔnna tisramabe we ka ta dayagatɛsma na ga, nka ka tɛ k’a tɛda n’a dɔrɔ ɔn da ka Wuro ta baratɛre. 17 Ka ne sma pepe yirebɛ. Ka ka na plala da diabɛ ka ma ne kiu ka Wuro ma ne fanganma yirebɛ. 18 Ki tɛrɛ, ka ne mɔɔ k’a wɔnnakma ta kɔ kiu. Ma da ye na fɔrɔ ye kɔ ye na woramadia ye dama ga nka kɔ ye na zugoyaga ye pepe. 19 Ye baga sɔɔn ma ne wiinye yannɛ dɛ a ma a n’e sɔmna Wuro ye na, wɔn fɔrɔ bare kiu a ɔɔn ka Wuro ma. 20 Bi sɔɔn ɔɔn dayaga ta, ye ne be vuro ye na, wee yirebe ɔɔn ti wɔn na? Nka be ɔɔn dafɔre ta, ye ne be yannɛ be n’e sɔmna, wɔn ɔɔn fɔrɔ Wuro yinna hɔn. 21 Awale, wɔn ye na Wuro ka wiri bare Krista yɛrɛ yannɛ ki ye na mɛ ɔn tɛnɔn dɔrɔ ka ma wiin fa to k’a zugo bii. 22 Awe wiin te ɔɔn kakiɛ ta ga, lamarabere ma sa zɛ a do hɔn mɛ ga. 23 Ye man’awe wiin te vini a ta yannɛ hɔn, a mane vini ga, mane gwangwana ga, fɔn a ne mɔɔ kitisɔta na tele yi ta. 24 Awe wiin ɔɔn taa kià kakiɛ na kwangwagasɔ ma wiin fa to ke wɛ kakiɛ sra hɔn ne ti ni na telebe hɔn. Awe tabada ɔɔn ka kɛnɛ. 25 Bare ka mane fire wɔkara worofrɛ nka basiɛ ka ka zin bere worofrɛnɛta kɔ ka ni na yɛreta ma.
31 Ki yara mɛ, ka ne mɔɔ ka bangannɛ ta wiin fa to hali wiinye kma ɔɔn dian ne yɔɔn Wuro domada ma ga, ye ta yàra ta tɛda sbɛ tɛ yɔnmabe kɔ ye hɔn, sɔɔn fa yira ye ma ga. 2 Ye n’a za da ka tɛnɔn fɔrɔ, ka ne kiu ka nɛmɛ ma. 3 K’a bege ka tɛ kɔn ma bege yee ga, bo wɔndɔgɔlenɔn bo sanɔ na bɛgɛfrɛ, bo ma bɛgɛzoga. 4 Nka k’a bege daga ne ka kɔrɔ hɔn yi wiin ɔɔn kìni, mane sbɛ ne yaga ga, ka woroma ne kuna, ka kakiri ne tangan. Wɔn ɔɔn dia Wuro ma fɔrɔna. 5 Gweregwerena wiinye yàra ɔɔn mane yɔɔn Wuro ma, yee ye mane bɛgɛ ne mɔɔ ye bangannɛ ta. 6 Yee Sara mane ti ne mɔɔ Abrahamu ta n’a wiri ye na te. Ki wiinye kma ɔɔn dafɔretɛ, mane dian ne kwan foyi na ga, ka Sara nɔmanɛ. 7 Ki sini mɛ, ka k’a yara foga kɔ kakiri ɔn tɔɔ da fangan ti ye hɔn ga. Ka n’e yirebɛ bare ka na kwɛ Wuro ta woramadiabe gun kɔrɔ na k’a sirewɔ hɔn wiin fa to foyi ka k’a wuromɛ yaga ga. 8 Wɔn nii wɛ mɛ, ka tɛ ka pepe zugo ne tala. Ka ne makare, ka da ne dia nɛmɛ ma, ka worama ne dia, ka ne mɔɔ ka nɛmɛ ta. 9 Ka ka ne dayaga na ku sara kɔ dayaga ga, ɔn ka ne vini na ku wa kɔ vini ga. Nka ka ne duba ɔɔn ta bare wɔn ye na ka wiri wiin fa to ka Wuro ta siara gun. 10 Wɔkara ye sɛbɛ wiin nɛ Wuro domada na sɛbɛ hɔn ɔn da ye wiin ɔɔn ne kia sirewɔ na dangamu gun, ne kia dangamu za, wɔnna te daga kɔ dayaga hɔn ga, mane daga lamarabɛre yira ga. 11 A daga ye sabɛ dayaga na ne dafɔre ta. A daga ne siara kia ne dɔɔ a ma. 12 Bare Matigi yɔnnɔ ti smatele na. A mɔɔ ye ta mɛ na. Nka Matigi ye zin wa dayagatɛre brɛ piri. 13 Ka ɔɔn ne sige ka yɛrɛ ma ne dafɔre ta, kɔ te ɔɔn na dayaga ta ka na? 14 Ka ɔɔn ne yannɛ k’a telebe ye na, ka dangamu. Ka ka kwan sɔɔn sii na ga, ka ka ka kakiri yanganmu ga. 15 Nka Krista wiin ɔɔn Matigi, ka wɔn yirebɛ ka kɔrɔ hɔn. Wiinye kma ɔɔn ka toga k’a yɔnmabe wɔɔn na, ka ye yira n’e kini ye ma sangan pepe ma. 16 Nka ka wɔn ta kɔ woramakɔn kɔ yɛrɛmazibɛ, ka kakiri ne tangan wiin fa to wiinye kma ɔɔn ka dayagabɛre k’a tɛdafɔre ye na, ye ɔɔn ka tɛnɔn za Krista timi, ye piri y’a yirada hɔn. 17 Bare ye ɔɔn ma Wuro dungo sɔɔn yannɛ y’a dafɔretɛ ye na, wɔn fɔn a yannɛ dayagatɛ ye na. 18 Tian na, Krista yɛrɛ siri kanyɔnnɔ tala na dama kakiɛ ye na. Awe wiin ɔɔn sɔntele, a siri telebareyasma ye na wiin fa to y’awe wiin yɛɛ, a ɔɔn winni sa Wuro ta Ni baraka hɔn, a sbɛ ka pere Wuro ma. 19 Wɔnna Ni we baraka hɔn a yɛrɛ mane yaa fanɛdia yira sma ma kaso hɔn wara. 20 Wɔn wiinye kma ɔɔn mane maga Wuro ma gwerena wiin sangan ma ye mane tangan ne Wuro ta naa yɛ́rɛ, wiin sangan we ma Nowe mane zokoro tɛtɛrɛ sma damanɛ sma korosɔɔn kisi zu ta wiin koro we hɔn. 21 Wiin batize ɔɔn ka kisi basiɛ, wɔn mane wɔn na tagamase. Wiinye doma ɔɔn ti kɔn ma a wɔnwɔ a ɔɔn kìnibɛ n’e wa ga nka a kia yɛrɛ pere Wuro ma kɔ kɔrɔhɔnkìni. A ka kisi Yezu Krista ta winnisa baraka hɔn sara yɔ. 22 Awe wiin ɔɔn ba wuro hɔn, ɔn yaa tangan Wuro digesoro ma. Mɛlɛkɛ kɔ fanganmabe kɔ sebe pepe ti a soro ma.
41 Awale Krista debe yannɛ ye kɔn hɔn han le. Ki mɛ, ka wɔnna giatɛ we ka ka hɔn mɛ. Wiin te ɔɔn yannɛ ye kɔn hɔn, wɔnna te kakiɛ ta da wɛ, 2 wiin fa to a y’a sirewɔ sere ta ye kɔn hɔn nka a a ta sma ma diamada hɔn ga, a a ta Wuro dungo na tɛ na. 3 Tian na, ka pia wiin fa ta fɔnɔ gwerena wɔkara bɔ sismasɛrɛ ye dungo na da ta wiin nɛ, ne ti kakalafa hɔn kɔ ye yɛrɛ ma diamada kɔ mɛnɛyingin kɔ fɛtitɛ kɔ fianyagakan, wɔn kayan yee. 4 Basiɛ y’a za da ka kwɛ ne kɔ ye nɛmɛ wɔnna kakalada wɔ hɔn titiri ga, ye ne kaba wɔn na ne ka vini. 5 Nka wiin te ɔɔn tɛtɛrɛ tangan ne na nima kɔ sara kiti, ye na n’e wɔɔn yira wɔnna te ma. 6 Bo wɔn ye na fanɛdia mane yira warakma yɛrɛ ma wiin fa to ye kiti wɔkara nima ɔɔn ni gun wɔkara Wuro a ta Ni baraka hɔn. 7 Da pepe wɛsangan vetra. Ka ka kakiri tanganbɛ ɔn wɔɔ wuromɛ hɔn sangan pepe ma. 8 Ka ka da diabɛ nɛmɛ ma fɔrɔna bare dadiamabe kakiɛ na yaan ye do dibe. 9 Ka ka nɛmɛ foga fɔrɔna ka brɛ ɔn ka ne yɔyɔledabɛre ga. 10 Wuro wiin kiɛn ta ka pepe tala tala ma, ka nɛmɛ mako fɔrɔ kɔ wɔn wɔkara wiinye kma ɔɔn kwa a ta kiɛn ma. 11 Wiin te ɔɔn da ye puru, ye daga tɛ Wuro domada a ɔɔn yira. Wiin te ɔɔn ne diɛma ta, a na te n’e ta kɔ Wuro ta fangan wiin fa to sma pepe sbɛ Wuro yirebɛ Yezu Krista baraka hɔn. Yirebe kɔ sebe wiri awe wiin ma sangan pepe ma. Amina. 12 N’a kma fɔre, k’a tɛ ɔɔn ne yannɛ wɔkara ye mane daga tɛ na ga, ka ka kaba wɔn na ga. 13 Nka k’a tɛ ɔɔn ka nii gun Krista ta yannɛ hɔn, ka nihɔndia wiin fa to a ta yirebe ɔɔn naa dɔre wiin sangan ma, ka ne ti nihɔndiaro hɔn mɛ. 14 Ye ɔɔn ne ka vini Krista togo ye na, ka dangamu bare yirebe na Ni Wuro ta Ni ti ka hɔn. 15 Ka na sɔɔn sii ka ne ti yannɛ hɔn sɔnyɛ do ma wɛlɛ panɔfa do ma wɛlɛ dayagatɛ do ma wɛlɛ wiin te ɔɔn ye do ka da pepe hɔn ga. 16 Nka a ɔɔn ma k’a tɛ ɔɔn ne Krista timikma, wɔn ye na ka yannɛ, ka ka piri kɔ wɔn ga. A na te yɛrɛ daga Wuro yirebɛ wɔnna togo we ye na wiin ɔɔn dɛ a ma. 17 Kitisɔwagati yɛrɛ wiri. Kiti na pia bii Wuro ta kma ma. Awale kiti ɔɔn ne pia ke ma dɛn, wiinye kma ɔɔn maga Wuro ta fanɛdia hɔn, wɔnnɔ ɔɔn na tɛ wɔnwɔ na han? 18 Tamara ye sɛbɛ Wuro domada na sɛbɛ hɔn wa ɔn da, ye sɔntele ta kisi ɔɔn ne na sige, nɛ Wurotɔbareyata kɔ kakiɛtɛta ye na tɛ? 19 Ye tɛ yee, wiinye kma ɔɔn ti yannɛ hɔn Wuro dungo ye na, ye ye ni ka danta sra hɔn, sɔɔn daga yɔɔn wiin ma ne dafɔre ta.
51 Wuro ta kma na zɛngɛnkma wiinye ɔɔn ti kɔ ka nɛmɛ, ma ye mɛ tian na. Mɛ wiin te yɛrɛ ɔɔn zɛngɛnte, mɛ ne Yezu ta yannɛ na siɛrɛta, wiin yirebe ɔɔn na dɔre mɛ wiin te ɔɔn na ne nii gun wɔn na. 2 Wuro ta worofrɛ wiinye ɔɔn kalfa ka ma, ka ye nɛ. Ka ka ye ta ɔn da fangan ye ɔɔn dɛ ka ma ga, ɔn ka ne ta tɔnɔ na ga, nka ka ye ta kɔ nihɔndiaro Wuro dungo na. 3 Wiinye kma wɔ ɔɔn kalfa ka ma, ka ka boo fangan dɛ ye ma ga nka ka tɛ tagamase na worofrɛ wɔ ta. 4 Ye ɔɔn tɛ yee, worofrɛnɛsma pepe na fan yi ɔɔn na naa wiin sangan ma, wiin yirebe na tɔnɔ ɔɔn wɛ ga, ka na wɔn gun. 5 Ki smazɔre mɛ ka ne mɔɔ sɔnmlala ta. Ka ɔɔn nɛmɛ kwɛ wiin wɛɛn pepe, ka ka yɛrɛmazibɛ ye ma. Bare ye sɛbɛ Wuro domada na sɛbɛ hɔn ɔn da, ye Wuro bɛɛn ne kɔ yɛrɛyirebɛsma ga nka a y’a woramadiabe ta yɛrɛmazibɛsma ma. 6 Wɔn ye na ka ka yɛrɛmazibɛ Wuro ta sebe wee wiin fa to wiin wagati ɔɔn tigɛ, wɔn ɔɔn naa wiri wiin sangan ma, a ka yirebɛ. 7 Ka k’a ninabanda pepe dɛ a ma bare a kwa ka ma. 8 Ka ka yɛrɛ kɔrɔse ɔn ka yinna doma. Ka zugu Sitanɛ ti ne yara wɔkara zara wiin ɔɔn mɔgɔ ne y’a kika kia. 9 Ka taa a na fangan ma yɔnmabe baraka hɔn ɔn tɔɔ da ka na plala wiinye ɔɔn ti diniyan hɔn, wɔnna yannɛ wɔ nɛmɛ ɔɔn wɔnwɔ gun mɛ. 10 Ka yannɛ wɛ timi ma zɔgɔ, woramadiabe pepe na te Wuro wiin ɔɔn ka wiri Krista baraka hɔn y’a yirebe ye na wiin ɔɔn wɛ ga, awe yɛrɛ na ye bere fangan ka ka hɔn yɛ. A na fangan ka ka hɔn ɔn ka wora sigebɛ ɔn ka tanganbɛ ka fɔrɔ. 11 Sebe wiri awe ɔɔn ma sangan pepe ma. Amina. 12 Silivɛn, ma yɔɔn wiin ma plalobe na awe ma ɔɔn mɛ, a ɔɔn bo sɛbɛ slalo be sɛbɛ ne ma ka ye na wiin fa to ɔn ka mɛ ka taa ye na, n’a yira n’a dɔrɔ ɔn da Wuro ta woramadiabe na siɛbɛ yi ma ka dɔɔ. 13 Wuro ta kma wiinye ɔɔn ti Babilɔni, kɔ ne nɔ Mareke ye bire ka na. 14 Ka foo na siɛbɛ yi bire nɛmɛ na. Ki wiinye kma pepe ɔɔn Krista timikma, Wuro tɛ a siara ta ka ma.