1 ZAN

¹ Gwere da ye gwere wiin fa ɔɔn mane tiye, mɛ́ wiin fa mɔɔ, ɔn wiin fa za, mɛ́ wiin fa sege, ɔn le a ma ni na domada na. ² Bare ni ye yɛrɛ dɔrɔ, mɛ́ n’a za, mɛ́ a siɛrɛ ɔn ne wɛbareyani nɔma yira ka ma wiin ɔɔn mane ti Tɔn Wuro brɛ ɔn ye yɛrɛ dɔrɔ mɛ́ ma. ³ Mɛ́ wiin fa mɔɔ ɔn n’a za, mɛ́ a yira ki ma mɛ wiin fa to ki ne kwɛ ne ti kɔ mɛ́. Kià kwɛti ne kwɛ kɔ Tɔn yi ɔnkɔ a nɔ Yezu Krista yi. ⁴ Mɛ́ ye sɛbɛ ka ma wiin fa to mia nihɔndiaro do paga. ⁵ Mɛ́ wiinye domada mɔɔ a ta, ɔn n’e yira ka ma, bɔ wɔnwɔ: Wuro kini, tunio ti a hɔn ga. ⁶ Mɛ́ ɔɔn ne da ye mɛ́ kwɛ kɔ lege, a ma tunio hɔn ke yaa, mɛ niɔnsɔ ɔn mane tian ta ga. ⁷ Nka ke ɔɔn ne yaa kini na wɔkara awe yɛrɛ ti kini hɔn wiin nɛ, wɔn n’a dɔrɔ ɔn da ke kwɛ ne ti. A nɔ Yezu too ne kià kakiɛ pepe wa. ⁸ Ke ɔɔn ne yira ne kwa ye kakiɛ ti ke hɔn ga, ke ɔɔn ke yɛrɛ firebɛ. Tian ma bere ne ti ke hɔn mɛ ga. ⁹ Ke ɔɔn ne kià kakiɛ yira ye tinɔn na, a na yafa ke ma ɔn ke kìnibɛ kià yagada pepe na. ¹⁰ Ke ɔɔn ne yira ne kwa, ye ke kakiɛtɛre ga, ke a ta niɔnsɔta na, a domada mane ti ke hɔn mɛ ga.

¹ Ne nɔmanɛ, ma bɔ sɛbɛ n’e yira ka ma wiin fa to ka ka kakiɛ ta ga. Nka wiin te ɔɔn kakiɛ ta, vɛta ti ke na Tɔn brɛ. Wɔn Yezu Krista wiin ɔɔn tele. ² Bare awe ɔɔn wɛ salaka na kià kakiɛ ye na. Ye ke dama ta kakiɛ ye na ga nka kɔ diniyan kma pepe ye na mɛ. ³ Mɛ́ Wuro dɛ́gɛ tɔɔ wiin fa ma, bo wɔn. Wɔn ke ɔɔn ne dɔɔ a ta tɛn ma. ⁴ Wiin te ɔɔn da ye y’a tɔɔ, nka mane dɔɔ a ta tɛn ma ga, wɔnna te niɔnsɔta tian ma bere ne ti a na te hɔn mɛ ga. ⁵ Nka wiin te ɔɔn kwa a domada ma, Wuro ta dadiamabe ti wɔnna te hɔn tian na. Wɔn ma ke a tɔɔ da ke kwɛ kɔ lege. ⁶ Wiin te ɔɔn yira ne kwa, ye yi ti kɔ Wuro, Yezu mane yaa wiin sogo ma, fɔn wɔnna te ne yaa wɔn ma mɛ. ⁷ N’a kma fɔre, a tɛn na wun yi ma ɔɔn sɛbɛ ka ma ga nka a bire yi wiin ɔɔn mane pia ne ti ka ta fɔn gwerena. Wɔnna tɛnbiri we, wɔn Wuro domada ka wiinye mɔɔ. ⁸ Nka hali kɔ wɔn, a tɛn na wun yi, ma wiin sɛbɛ ka ma. Wɔn tian awe ta kɔ ki ta mɛ. Bare tunio tiye titiri ga, kini na siɛbɛ yi ne wɔlɔ sin. ⁹ Wiin te ɔɔn yira ne kwa, ye yi ti kini na a na plalo da mane dia a ma ga, wɔnna te ti tunio hɔn yɛ. ¹⁰ Wiin te ɔɔn ye na plalo da diabɛ ye ma, wɔnna te ti kini na, foyi mane ti a na te hɔn wiin ɔɔn sbɛ ne sɔɔn firebɛ ga. ¹¹ Nka wiin te na plalo da ɔɔn dia a ma ga, wɔnna te ti tunio hɔn. A na te yaa tunio hɔn ɔn man’e yado tɔɔ ga bare a sege ne zɛ tunio hɔn ga. ¹² Ki nimisala, ma bɔ sɛbɛ n’e yira ka ma ɔn da k’a kakiɛ yafa ka ma awe Yezu togo na. ¹³ Ki tamɛ, ma bɔ sɛbɛ n’e yira ka ma ɔn da n’a bii dubisangan ma, wiin te ɔɔn mane tiye k’a tɔɔ. Ki smazɔre, ma bɔ sɛbɛ n’e yira ka ma ɔn da ka sbɛ dayaga na te ta. ¹⁴ Ki nimisala, ma man’e sɛbɛ n’e yira ka ma, ka Tɔn tɔɔ. Ki tamɛ, ma man’e sɛbɛ n’e yira ka ma, wiin te ɔɔn tiye n’a bii dubisangan ma, k’a tɔɔ. Ki smazɔre, ma man’e sɛbɛ n’e yira ka ma, fangan ti ka hɔn. Wuro domada ti ka kakiri hɔn, ka ne sbɛ dayaga na te ta. ¹⁵ Ka ka diniyan da diabɛ ka ma ga, ɔn k’a hɔn frɛ da diabɛ ka ma mɛ ga. Diniyan da dia wiin te ma, Tɔn da dia wɔnna te ma ga. ¹⁶ Bare wiinye frɛ pepe ɔɔn ti diniyan hɔn, kɔn ma diamada kɔ yinna ma diamada kɔ gunfrɛ na yɛrɛyirebɛfrɛ, wɔnwɔ sa Tɔn hɔn ga, diniyan hɔn ye sa. ¹⁷ Kamasɔrɔ diniyan kɔ ye hɔn diamafrɛ na wɛ nka wiin te ɔɔn Wuro dungo na da ta, wɔnna te na ne tiye suu. ¹⁸ Mɛ nɔmanɛ, wɛbɛsangan wiri. Ka mɔɔ ye da Krista zugu boo na naa. Kamasɔrɔ Krista zugu na yaan ye ne tiye basiɛ sin. Wɔn ma ke tɔɔ da wɛbɛsangan wiri wɛ. ¹⁹ Ke brɛ ye sa nka ye mane ke na bɔɔ ga. Ye mane ke na bɔɔ, ye mane na kwɛ kɔ ke nɛmɛ. Nka ye ta tɛ ɔɔn mane daga dɔre, ye ye pepe ti wiin nɛ, ye ye ke na bɔɔ ga. ²⁰ A ma ki han, Wuro ta Ni gun, ka pepe bere ne wɔn yɔnnɔ tɔɔ mɛ. ²¹ Ma sɛbɛ ka ma ɔn da ka tian tɔɔ ga rɛ nka ma sɛbɛ ka ma ɔn da k’a tɔɔ ɔnkɔ mɛ ka tɔɔ da niɔn na da tala bɔɔ sa tian hɔn ga. ²² Kɔ te ɔɔn niɔnsɔta a ma tɛ wiin te ɔɔn wee ye Yezu Krista ga? Wiin te ɔɔn wee Tɔn kɔ Nɔ ta da na, wɔnna te ɔɔn Krista zugu. ²³ Wiin te ɔɔn maga Nɔ hɔn, wɔnna te maga Tɔn hɔn mɛ. Wiin te ɔɔn Nɔ da yira, wɔnna te Tɔn tɔɔ mɛ. ²⁴ A ma ki han, ka wiinye fanɛ mɔɔ n’a bii fɔn dubisangan ma, ye tɛ ye wɔɔ ka kakiri hɔn. Ka wiinye fanɛ mɔɔ n’a bii fɔn dubisangan ma, ye ɔɔn wɔɔ ka kakiri hɔn, ka na ti kɔ Nɔ kɔ Tɔn sangan pepe ma mɛ. ²⁵ Awe yɛrɛ wiin fa na do sɔɔ ke ma, wɔn wɛbareyani. ²⁶ Wiinye kma ɔɔn kia ka firebɛ, ma wiin fa sɛbɛ ye ye na, bo ɔɔn wɔn. ²⁷ A ma ki han, ka wiinye Ni gun a ta, wɔn ti ka hɔn, ka mako ma bere ne sa kala hɔn titiri mɛ ga. Nka a ta Ni ka kala kɔ da pepe. Wɔnna ni we tian yira, ye niɔn yira ga. A debe ma wɔnna Ni we ɔɔn ka kala han, wɔn ɔɔn tɛ ka ne kwɛ ne ti kɔ lege. ²⁸ Awale nimisala, ka kwɛ kɔ lege wiin fa to a ɔɔn naa ye yɛrɛ dɔrɔ wiin sangan ma, yɔnmabe na yire yi ne ti ke hɔn ke ka naa piri ke brɛ ne dɛrɛ a na a nasangan ma ga. ²⁹ Ka debe tɔɔ da Krista tele han, ka daga tɔɔ da wiin te pepe ɔɔn telebe ta, wɔnna te Wuro nɔ.

¹ Tɔn wiin dadiamabe na yire yi ta ke ma, ka wɔn na kayan ta. Bo wɔn ɔɔn tɛ ye ɔɔn ne ke wiri Wuro nɔmanɛ. Ke bere ne Wuro nɔmanɛ tian na mɛ. Bo wɔn ɔɔn tɛ diniyan hɔn kma ɔɔn mane ke tɔɔ ga bare ye Wuro tɔɔ ga. ² N’a kma fɔre, n’a bii basiɛ ke Wuro nɔmanɛ. Nka ke na tɛ wiinye frɛ na, wɔn nɔma yira dɛn ga. Ke tɔɔ da Krista ɔɔn na naa wiin sangan ma, ke na ne tala kɔ lege bare a na ne ti wiin nɛ, yee ke na n’a za. ³ Wiin te pepe ɔɔn wɔnna yɔnmabe we gun a ye na, wɔnna te ye yɛrɛ kìnibɛ wɔkara awe Yezu kìni wiin nɛ. ⁴ Wiin te pepe ɔɔn kakiɛ ta, wɔnna te Wuro ta Tɛn yaga mɛ. Bare kakiɛ ta tɛ wɔn ɔɔn tɛn ta yaga. ⁵ Nka ka tɔɔ d’awe Yezu ye yɛrɛ dɔrɔ kakiɛ wɛ na, kakiɛ ma bere ne ti a hɔn mɛ ga. ⁶ Wiin te pepe ɔɔn wɔɔ kɔ lege, wɔnna te kakiɛ ta ga. Wiin te ɔɔn kakiɛ ta, wɔn n’a za ga, ɔn man’a tɔɔ mɛ ga. ⁷ Ka ka tɛ sɔɔn ka firebɛ ga. Wiin te ɔɔn telebe ta, wɔnna te sɔntele wɔkara awe Yezu tele wiin nɛ. ⁸ Wiin te ɔɔn kakiɛtɛ, wɔnna te Sitanɛ ta sɔɔn bare n’a bii dubisangan ma, Sitanɛ kakiɛtɛta. Wuro Nɔ naa wiin wɔɔn na, bo wɔn: A naa wiin fa to a Sitanɛ ta tɛda yaga. ⁹ Wiin te pepe ɔɔn Wuro nɔ, wɔnna te kakiɛ ta titiri ga. Bare Wuro ta tugofa ti wɔnna te hɔn, bo wɔn ɔɔn tɛ a ɔɔn mane kakiɛ ta titiri ga, ɔnkɔ mɛ, Wuro ɔɔn n’a na te vɔrɔ. ¹⁰ Wuro nɔmanɛ dɛ́gɛ tɔɔ wiin fa ma, Sitanɛ ye ne tɔɔ wiin ma mɛ, bo wɔn: Wiin te pepe ɔɔn telebe ta ga, a na plalo da mane dia a ma ga, wɔnna te Wuro nɔ ga. ¹¹ Tian na ka wiinye fanɛ mɔɔ n’a bii fɔn dubisangan ma, bo wɔnwɔ: Ye ke ke nɛmɛ da diabɛ ke ma. ¹² Ke ka tɛ wɔkara Kayɛn ga. Wɔn mane dayaga na te ta soromasɔn ɔn ye na plalo yɛɛ. Wɔnnɔ na a yɛrɛ man’a yɛɛ? Bare awe yɛrɛ ta tɛda mane fɔrɔ ga, a na plalo ye ne tele. ¹³ Diniyan hɔn kma ɔɔn ne ka na wu wa, ka ka kaba wɔn na ga, n’a kma. ¹⁴ Ke tɔɔ da ke sa siri hɔn, ɔn kɔ ni hɔn. Bare ke na plala da dia ke ma. Dadiamabe ti wiin te hɔn ga, wɔnna te ti siri hɔn yɛ. ¹⁵ Wiin te pepe ɔɔn ye na plalo na wu wa, wɔnna te sɔnyɛta. Ka tɔɔ da wiin te ɔɔn ne sɔnyɛta, wɛbareyani ti wɔnna te hɔn ga. ¹⁶ N’a bii basiɛ ma, ke dadiamabe tɔɔ wiin fa ma, bo wɔn: Awe Yezu ye ni pere ke ye na. Ke mɛ, ke daga ke ni pere ke na plala ye na. ¹⁷ Bo diniyan be hɔn gunfrɛ ɔɔn ne ti wiin te pepe ta, ɔn ye na plalo za, a ne ti duru na, a ma dian dafɔre sii ta a ma ga, nɛ na ke sbɛ ne da, ye Wuro ta dadiamabe ti a na te hɔn? ¹⁸ Ka ka tɛ kià dadiamabe ne ti ke do hɔn ga, nka ka tɛ a ne zɛ kià tɛda hɔn kɔ tian hɔn. ¹⁹ Ke ke yɛrɛ tɔɔ tian ta kma wiin fa ma, ke wora ne na kuna a zin, bo ɔɔn wɔn. ²⁰ Bare ke gia ɔɔn mane tangan ga, Wuro yire yi kià giatɛ ma ɔn bere ne da pepe tɔɔ mɛ. ²¹ N’a kma fɔre, ke gia ɔɔn mane tangan ga, ke na bɛre Wuro ta kɔ yɔnmabe. ²² Ke ɔɔn wiin fa pepe mɛ a ta, ke na wɔn gun bare ke kwa a ta tɛn ma, n’a ma diamada ta. ²³ Bo a ta tɛn: ɔn dɔɔ a Nɔ Yezu Krista ma ne yɔɔn a ma fɔrɔna, ɔn ke nɛmɛ da diabɛ ke ma wɔkara a tɛn we pere ke ma wiin nɛ. ²⁴ Wiin te ɔɔn kwa Wuro ta Tɛn ma, wɔnna te ti kɔ Wuro, Wuro ne ti kɔ lege mɛ. Wɔn ma ke tɔɔ d’a ti kɔ ke nɛmɛ, a ta Ni baraka hɔn, a wiin pere ke ma.

¹ Wiinye kma pepe ɔɔn yira ne kwa, ye Wuro ta Ni ti yiwɔ hɔn, ka ka yɔɔn ye pepe ma ga, n’a kma. Nka ka ye taa n’e sege dɛn, a ɔɔn ma Wuro ta Ni tian na bare Wuro ta daberebɛre na niɔnsɔ ye na yaan ye ti diniyan hɔn. ² Ka Wuro ta Ni dɛ́gɛ tɔɔ wiin fa ma, bo wɔn: Wiin te pepe ɔɔn n’a yira n’a dɔrɔ ye Yezu Krista vɔrɔ diniyan hɔn, Wuro ta Ni ɔɔn ti wɔnna te hɔn. ³ Nka wiin te pepe ɔɔn da, ye Yezu vɔrɔ diniyan hɔn ga, a Wuro ta Ni ɔɔn ti wɔnna te hɔn ga. Ka pia Krista zugu wiin ta da mɔɔ y’a ti ne naa, wɔn wɔn ta ni. A ti diniyan hɔn n’a bii basiɛ sin. ⁴ Ki wiinye kma ɔɔn Wuro ye, ka sbɛ wɔnna daberebɛre wɔ ta bare wiin te ɔɔn ti ka yɔɔ, wɔnna te fan yi diniyan hɔn tita ma. ⁵ Yewɔ diniyan hɔn kma, bo wɔn ɔɔn tɛ ye ɔɔn ne diniyan hɔn da bɛre, diniyan hɔn kma ne mɔɔ ye ta. ⁶ A ma ke han, ke Wuro ye. Wiin te ɔɔn ne kia Wuro tɔɔ, wɔnna te mɔɔ ke ta. Wiin te ɔɔn mane Wuro yi ga, wɔnna te mɔɔ ke ta ga. Wɔn ma ke tian na kakiri tɔɔ n’a wa niɔn na yi na. ⁷ Ka tɛ ke ke nɛmɛ da diabɛ ke ma, n’a kma fɔre bare dadiamabe sa Wuro ta. Dadiamabe ɔɔn ne ti wiin te hɔn, Wuro ɔɔn wɔnna te vɔrɔ a ne bere ne na Wuro tɔɔ mɛ. ⁸ Dadiamabe ti wiin te hɔn ga, wɔnna te Wuro tɔɔ ga bare Wuro ɔɔn dadiamabe. ⁹ Wuro ta dadiamabe ye yɛrɛ dɔrɔ ke yɔ wiin nɛ, bo wɔn: Wuro y’a nɛmɛtala fanɛ diniyan hɔn wiin fa to ke ne ti ni na a baraka hɔn. ¹⁰ Dadiamabe wiin fa, bo wɔn: A ke ɔɔn Wuro da diabɛ ke ma ga, awe ɔɔn ke da diabɛ ye ma ɔn ye nɔ fanɛ, wɔn ɔɔn siri kià kakiɛ na yafa ye na. ¹¹ N’a kma fɔre, Wuro ɔɔn ke da diabɛ ye ma yee, ke mɛ, ke daga ke nɛmɛ da diabɛ ke ma. ¹² Sɔɔn sii Wuro za n’a za ga. Ke ɔɔn ne ke nɛmɛ da diabɛ ke ma, Wuro na wɔɔ kɔ ke nɛmɛ, a ta dadiamabe ne na paga ke hɔn mɛ. ¹³ Wiin fa ma ke tɔɔ da ke ti kɔ Wuro, a ne ti kɔ ke nɛmɛ, bo wɔn: A y’a Ni ka ke hɔn. ¹⁴ Mià tɛ ɔɔn n’a za, mɛ́ wɔn na siɛrɛbe ta ɔn da Tɔn ye Nɔ fanɛ diniyan kisi na. ¹⁵ Wiin te pepe ɔɔn n’a yira n’a dɔrɔ ɔn da Yezu Wuro Nɔ, Wuro ti kɔ wɔnna te, a na te ne ti kɔ Wuro mɛ. ¹⁶ A ma mɛ́ han, mià tɛ ɔɔn n’e na yɔnmabe gun, wɔn ɔɔn tɛ mɛ́ ɔɔn n’e yɔnnɔ tɔɔ ɔn da Wuro ta dadiamabe ti ke yɔ. Wuro ɔɔn dadiamabe. Dadiamabe ɔɔn ne ti wiin te hɔn, wɔnna te ti kɔ Wuro, Wuro ne ti kɔ a na te mɛ. ¹⁷ Dadiamabe do paga ke yɔ wiin nɛ, bo wɔn: Kitikɔ ma da na yɔnmabe ti ke hɔn, bare Yezu ti wiin nɛ, yee ke ti bo diniyan be hɔn mɛ. ¹⁸ Kuun ti dadiamabe hɔn ga. Dadiamabe na siɛbɛ yi kuun yɔnnɔ tɔɔ ga bare kuun naa kɔ yinna hɔn togo. Wiin te ɔɔn kwan, dadiamabe paga wɔnna te hɔn ga. ¹⁹ A ma ke han, dadiamabe ti ke hɔn bare awe ɔɔn pia ke da diabɛ ye ma. ²⁰ Wiin te ɔɔn yira ne kwa, ye Wuro da dia ye ma, kamasɔrɔ a n’e na plalo na wu wa, a na te niɔnsɔta. Tian na, be na plalo, be yɔnnɔ ti wiin na, wɔn da ɔɔn mane dia be ma ga, Wuro be wiin za ga, be sbɛ ne wɔn da diabɛ be ma ga. ²¹ Ke wiin tɛn gun a ta, bo wɔn: Wiin te ɔɔn da Wuro da dia ye ma, a ye na plalo da diabɛ ye ma mɛ.

¹ Yɔnmabe ti wiin te pepe hɔn, ɔn da Yezu ɔɔn Krista, Wuro ɔɔn wɔnna te vɔrɔ. Wuro wiin te ɔɔn vɔrɔta, wɔn da dia wiin te pepe ma, yee Wuro nɔmanɛ da dia wɔnna te ma yɛ. ² Ke ɔɔn ne Wuro da diabɛ ke ma, ne kwa a ta tɛn ma, wɔn ma ke tɔɔ da Wuro nɔmanɛ da dia ke ma mɛ. ³ Bare Wuro ta dadiamabe wiin fa, bo wɔn: Ke ne kwa a ta tɛn ma. A ta tɛn ma bere ma bie na tɛnɛ ye mɛ ga. ⁴ Wiinye kma pepe ɔɔn Wuro nɔmanɛ, wɔnwɔ debe sbɛ diniyan ta han, wiin sebe ɔɔn tɛ ke ɔɔn sbɛ diniyan ta, wɔn kià yɔnmabe. ⁵ Kɔ te ɔɔn sbɛta diniyan hɔn, a ma tɛ wiin te hɔn yɔnmabe ti ɔn da, ye Yezu Wuro Nɔ ga? ⁶ Yezu Krista wiin ɔɔn naa zio kɔ too baraka hɔn, a naa kɔ zio dama ga, a naa kɔ zio ɔnkɔ too. Wuro ta Ni ɔɔn n’e na siɛrɛbe ta bare Wuro ta Ni ɔɔn tian. ⁷ Ye frɛ saa wiinye ɔɔn siɛrɛ wɔ. ⁸ Bo Wuro ta Ni, bo zio, bo ma too. Yewɔ siɛrɛ saa wɔ ta siɛrɛbe ne tala mɛ. ⁹ Ke ɔɔn ne dian sma ta siɛrɛbe na, Wuro ta siɛrɛbe yire yi. Bare Wuro ta siɛrɛbe n’a yira n’a dɔrɔ ɔn d’a ye nɔ siɛrɛ. ¹⁰ Wiin te ɔɔn yɔɔn Wuro Nɔ ma, bo siɛrɛbe be ti wɔnna te hɔn. Wiin te ɔɔn ma yɔɔn Wuro ma ga, a Wuro ta niɔnsɔta na. Bare Wuro wiin siɛrɛbe ta ye Nɔ ye na, a na te yɔɔn wɔn ma ga. ¹¹ Bo wɔnna siɛrɛbe we: Wuro wɛbareyani pere ke ma. Wɔnna Ni we, wɔn a Nɔ. ¹² Wiin te ɔɔn dian Nɔ we hɔn, wɔnna te ni gun. Wiin te ɔɔn ma dian Wuro Nɔ hɔn ga, wɔnna te ni gun mɛ ga. ¹³ Ma bɔɔ pepe sɛbɛ n’e fanɛ ka ma wiin fa to ka tɔɔ da yɔnmabe ti ki wiinye kma hɔn Wuro Nɔ togo na, wɛbareyani ti ka hɔn. ¹⁴ Wiin worasigi ɔɔn na ti ke hɔn Wuro zin, bo wɔn: Ke ɔɔn wiin fa mɛ a ta a dungo na, a a pere ke ma. ¹⁵ Ke ɔɔn ne wiin fa pepe mɛ a ta ɔn tɔɔ d’a mɔɔ ke ta, ke wiin fa mɛ a ta, ke tɔɔ da ke wɔn gun wɔn wɛ. ¹⁶ Wiin te ɔɔn ye na plalo za a ne kakiɛ ta, ye ma wiinye kakiɛ ɔɔn sɔɔn ka siri hɔn ga, a wiinye kakiɛ wɔ ta, ye mane naa kɔ siri ga, a ɔɔn Wuro mɛ, a na ni pere a ma. Bɔɔ kakiɛ tiye wiinye ɔɔn naa kɔ siri sɔɔn ma. A wɔnwɔ ye na ma da ka ne Wuro mɛ ga. ¹⁷ Tɛdayaga sii pepe kakiɛ nka ye kakiɛ pepe ɔɔn naa kɔ siri sɔɔn ma ga. ¹⁸ Ke tɔɔ da wiin te pepe ɔɔn ne Wuro Nɔ, wɔnna te kakiɛ ta titiri ga. Wuro Nɔ yɛre a na te na, dayaga na te mane sbɛ n’a gun ga. ¹⁹ Ke tɔɔ da ke Wuro ye. Diniyan hɔn kma pepe ne ti dayaga na te soro ma. ²⁰ Ke tɔɔ da Wuro Nɔ naa ɔn naa kakiri pere ke ma wiin fa to ke Wuro na siɛbɛ yi dɛ́gɛ tɔɔ ye nɔ Yezu Krista baraka hɔn. Awe ɔɔn Siɛbɛ yi, awe Wuro ɔɔn wɛbareyani pere. ²¹ Ka ka yɛrɛ kɔrɔse fianda na, nimisala.