Taetas

Taetas

¹ Taetas ’ae, nau tha Pol na ngwane ni rao tha God ma na aposol tha Jisas Kraes. Tha God ’e talai nau mai fasi ku faasuukwaia na manata mamanalae kera na imole ki ne tha God ’e filida, ma fasi ku toodoo fuada ’ana doo mamana ne kau ’adomia imole ki da ka too sulia mooria ne tha God ’e dooria. ² Ma na toodooa mamana neri, ’e lea sulia na fiitooa kolu nee kolu kau too ’uria na mooria firi, ne tha God ’e bae ’ua na mai sulia totongenao si manga ’e langi si thaungana ’ua na molaagali. Ma tha God ’e langi si suke. ³ Ma ’ana si manga ne nia ’e alua naa ’uria, tha God ’e faatai marabibi naa ’ana faarongolae ’okae nee ’ana si raoa nee nau ku tatha naa ’uria faatalolae ’ania. Ma tha God, ne ’e faamoori kolu, ’e gani nau ’uria ililana si raoa nee. ⁴ Nau ku kekeda kau fuamu ngwalee Taetas ’ae, nee ’o ilingia naa ta ngwela ’aku, sulia ne ku toodoo fuamu sulia na manata mamanalae nee koro ’ado naa ’ania. Nau ku foa fasi tha God na Maka ma tha Kraes Jisas ne faamoori kolu ka liothau ’ani ’oe ma ka fala enoenoa fuamu. ⁵ Nau ku ’akwasi ’oe mai ’i laona auaua ’i Krit, fasi ’oko filia ngwane naonao ki ’uria talailana imole manata mamana ki ’i laona maetoaa ki sui. Si raoa neri koro si faasuia ’ua. Ma ’oko manatatoona si doo bae ku thaea fuamu bae ’e ’urii: ⁶ Na ngwane naonao ki da ka too ’o’olo teefau, ma da ka too ’ana tee ’afe bo, ma da ka too mamana fonea. Ma na ngwela kera ki da ka manata mamana ’ana tha Jisas Kraes, ma ka langi da si ’ifingia moorilada ’uria ta’alae, da ka roosulia baelana maka kera ki ma gaa kera ki. ⁷ Na ngwane naonao ki da ka too ’o’olo teefau naa, sulia ne da lio sulia na ofufua tha God. Langi da si aburongo, ma ka langi da si rakethasu ’ali’ali, ma ka langi da si lado kuufilana na kuulae suukwai ne ’e adea gwauda ka rorodoa, ma ka langi da si susuala, ma ka langi da si anau ’ana malefo. ⁸ Sui ta, na ngwane naonao ki da ka konitana ’ada na imole ki ’i laona luma kera ki, ma da ka dooria ’asiana ililana si doo ’okae ki, ma na abulolada ka marabibi. Ma da ka ilia si doo ki ne ’o’olo, ma da ka too sulia bibirangaa ne tha God ’e dooria, ma da ka tala’ana tanggilae sulia maalutana mooria kera ki ’i talada. ⁹ Da ka manata mamana suukwai ’ana na Faarongolae ’Okae sulia tha Jisas ne meli toolamana fuada. Na Faarongolae ’Okae neri ’e mamana ma ka langi si tatala. Na imole ’urineri ki ne tala’ana bulasilana imole ki ’ana na toodoolae mamana, ma da ka tala’ana laubo faatailana garolae kera na imole ki ne da takwe suusia na toodoolae mamana. ¹⁰ Nau ku bae ’urineri, sulia na imole ’oro ki ne langi da si roosulia na toodoolae mamana. Da bae sulia na tofa doo ki, ma da ka sukea na imole ki. Ma ’e mamana ka tatha naa sulia imole mamana ki ’i Jiu ne da manata mamana naa, da dau suukwai ’ua bada ’ana tai bibirangaa ’ana Jiu ki. ¹¹ ’Oko faabonaa na imole ’urineri ki. Si manga da toodoo ’ana toodoolae garo kera ki, da nanggaa toaa ki, ma ’e adea da ka abulo ’e’ete faasia toodoolae sulia tha Jisas. Da ade ’urineri ’uria na ngalilana bo si malefo faasida. ¹² Ma tee ngwane ’ada ’i Krit ne da ’alangia ’ana na profet kera, ’e bae ’urii, “Kolu imole ki ’i Krit, kolu suke ’asiana ’ana si manga ki sui, ma kolu ka ta’ae ’asiana ilingia na doo kwasi ki, ma kolu ka noni’e’ela ’asiana, ma kolu ka ’anggu fanga ’asiana.” ¹³ Aia, si baea neri ki ’e mamana ’asiana. Nia nee, ’oko balufida, fasi na manata mamanalae kera ka suukwai ma ka ’o’olo, ¹⁴ ma fasi ka langi da si manata mamana ’ana ununua susuke kera Jiu ki, ma na baelae kera na imole ki ne da otekera ’ana na toodoolae mamana. ¹⁵ Kolu na imole ki ne liokolu ’e folaa, kolu thaitamana sui naa si doo ki sui ’e folaa. Aia, ma na imole ki ne lioda ’e rorodoa ’ua, sulia ’e langi da si manata mamana ’ana tha Jisas Kraes, doo ki sui ne da manata sulia ’e rorodoa, sulia na manatalada ’e langi si folaa ma ka langi si ’o’olo. ¹⁶ Da thaea thasa da thaitamana tha God, sui ta, da ilia bada si doo ta’ae ki ne ’e faatana ne langi da si thaitamana bo tha God. Ma na manatalae ngwane kera ki ka ta’ae ’asiana, ma ’e langi da si roosulia baelana tha God, ma ka langi da si tala’ana bo ililana ta si doo ne ’e ’okae.

¹ Ma ni ’oe nena, ’oko toodoo sulia si doo ki ne lea sulia na toodoolae mamana. ² Ma ’oko bae fifii fuana imole ngwaro ki fasi ka langi dasi lea sulia na kwaidooria ta’ae kera ki, fasi na manatalada ka folaa, ma da ka dau faafia na mooria kera ki, ma na manata mamanalae kera ka ’o’olo, ma na liothaua kera ka suukwai, ma da ka suukwai ’ana si manga da daotoona ’ana ’afitaia ki. ³ Ma ’oko bae suukwai laubo ’urineri fuana keni kwasitoola ngwaro ki fasi na abulolada ka ’o’olo ma da ka faatana ne da faa’initooa tha God, ma ka langi da si bae nagaa imole ki, ma langi da si fala moorilada ’uria kuu gwaulilingelae ’ana waen. Ma da ka toodoo ’ana si bibirangaa ne ’e ’okae, ⁴ fasi da ka faamanatainia na kwasitoola fi baita ki fasi da ka liothau ’ana arai kera ki ma na ngwela kera ki, ⁵ ma fasi na kwasitoola fi baita ki da ka liosulia mooria kera ki, ma da ka abulo ’o’olo, ma da ka tanggi ’okae sulia toaa kera ki, ma da ka ilia si doo ’okae ki, ma da ka roosulia baelana arai kera ki. Kera da ka ilia si doo neri ki, fasi ka langi ta imole si ngata ta’ae sulia na baelana tha God. ⁶ ’Oko bae fifii laubo ’urineri fuana ngwane ki ne da fi arai, fasi da ka liosulia mooria kera ki. ⁷ Ma ni ’oe, ’oko ilia si doo ’okae ki ’ana si manga ki sui, fasi na imole ki da ka rikia na raoa ’okae ’oe, ma da ka ade sulia. Ma ’ana si manga ’o toodoo ’ania, ’oko faatana bo si manatalae ngwane folaa, ma ka mamanaa. ⁸ Na baelamu ka ’o’olo ’ana si manga ’o toodoo ’ania, fasi ta imole si bae nagaa baelamu, ma na maalimae ’oe ki dau ’ida, sulia ’e langi da si daotoona bo ta si garolae ’ani kolu. ⁹ Na ngwane ni tofa rao ki, da ka roosulia na ngwane baita kera ki, ma da ka faanonithathala kera ’ana si doo ki ne da ilia, ma ka langi da si olitana baelada. ¹⁰ Ma ka langi da si belia ta si doo faasia ngwane baita kera ki. Da ka abulo ’o’olo fasi na ngwane baita kera ki da ka fiitooda. Ma ’urineri taari ne imole ki sui da ka rikia na ade ’okaelae kera ki, ma da ka iagori ’asiana sulia na toodoolae mamana sulia tha God ne ’e faamoori kolu. ¹¹ ’Oko faamanatai kera teefau fasi da ka too ’o’olo, sulia tha God ’e faatana sui naa na ’okaelana liothaua nia fasi na imole ki sui da ka too ’ana mooria firi. ¹² Ma na ’okaelae neri ’e toolamana fuakolu fasi kolu ka fala dangatai ’ania na bibirangaa ta’ae ki, ma na kwaidoorilae ta’ae ki ’i laona molaagali. Ma kolu ka dau faafia mooria kolu ’ana toolae ’o’olo, ma kolu ka ilia si doo ki ne tha God ’e dooria si manga ne kolu too ’i molaagali. ¹³ Kolu ka ilia si doo neri ki si manga kolu kwaimaakwali maasia fe dani ne tha Jisas Kraes kau dao mai ’ana ’initooa nia. Nia naa na God ’inito kolu ne faamoori kolu. ¹⁴ Nia ’e fale nia ’i tala’ana ’uria faamoorilakolu, fasi ka talai kolu faasia na ta’alae ki sui ma ka faafaalu kolu, fasi kolu ka thau ’ana imole nia ki ’i tala’ana, na imole ki ne da dooria ililana si doo ’okae ki sui. ¹⁵ ’Oko toodoo sulia si doo neri ki fuana imole ki ’i Krit, ma ’oko bae suukwai fasi ’oko fala rakealae fuada ma ’oko ’olosida. Ma ’o si alamataida da ka thaea thasa ’o si too bo ’ana mamanaa ’uria toodoolae sulia si doo neri ki.

¹ ’Oko faamanatatoona imole ’oe ki fasi da ka roosulia ngwane baita ki sui ’ana gafmanu, ma da ka noni maabe ’uria ililana doo ’okae ki ’ana si manga ki sui. ² Ma ’oko thaea fuada fasi ka langi da si bae nagaa ta imole, ma da ka too kwaimani, ma da ka too enoeno fonea imole ki sui. ³ Sulia ’i nao mai, kolu oengwanea laubo, ma kolu ka aburongo, ma tai imole ki da ka talai garo ’ani kolu. Ma kolu ka roo naa sulia na kwalukaela kwaidoorilae ta’ae kwailiu kolu ki. Ma kolu ka aburongo laubo ’ana ililana doo ta’ae ki, ma kolu ka kwaidoori ’uria si doo kera tai imole ’e’ete ki. Na imole ki da ka maalimae ’ani kolu, ma kolu ka maalimae laubo ’ani kera. ⁴ Sui ta, tha God ne faamoori kolu, ’e faatana sui naa na ’okaelae nia ma na liothaua nia fuakolu. ⁵ Nia ’e faamoori kolu, langi lau sulia na raoa ’okae ki ne kolu ilia. Nia ’e faamoori kolu sulia na kwaimanataia nia ’i tala’ana, ma na Mangoedoo Abu ne ’e taufia ta’alae kolu ki, ma ka fala na futafaalulae ma na mooria faalu fuakolu. ⁶ Tha God ’e fala dangatai ’ana na Mangoedoo Abu fuakolu ’ana tha Jisas Kraes ne faamoori kolu. ⁷ Tha God ’e langi si tooketa garo ’ani kolu, sulia ’e liothau ’ani kolu. Ma kolu ka thaitamana sui naa ne kolu too ’ana na mooria ne totoo firi ne kolu kwaimaakwali maasia. ⁸ Si baea neri ki, ’e mamana. Nau ku dooria ’oko bae fifii sulia si doo ne ki, fasi na imole ki ne da manata mamana ’ana tha God, da ka thasi suukwai ’uria na ililana si raoa ki ne ’okae. Sulia si doo neri ki, ’e ’okae ma da ka ’adomi ’okae ’ana imole ki sui. ⁹ Sui ta, ’oko too faasia na olisusuulae oengwanea ki, ma na talisibara tikwa ki, ma na firulae faafia maalutana na bibirangaa nia ki tha Mosis. Sulia si doo neri ki, na tofa doo ki bana, ma ’e langi si ’adomia bo ta imole. ¹⁰ Lelea sa ta imole ka ilia na toota’alae ’i malutana imole manata mamana ki, ’oko ngatafia. Ma lelea sa ’i burina ne ’o ngatafia ’ana roo si manga, ma nia si too bo faasia, ’oko fi faiburi naa ’amu ’ani nia. ¹¹ ’Oko thaitamana, na ngwane ’urineri ’e ta’ae, ma na abulo ta’alae nia ki ’e faatana naa ne nia ’e garo. ¹² Nau ku odua kau tha Artemas langi tha Tikikas ’i siamu. Sui fatai nia ka fi dao ’i siamu, ’oko ilitoona lealae mai siaku ’i Nikopolis. Sulia nau ku manata ’uria kwau too ’i seeri si manga ’ana uuni gwagwaria, sulia na asi ’e koburua. ¹³ Ma si manga tha Senas, na ngwane bae thaitamana na bibirangaa ki, ma tha Apolos daru kwaimaakwali naa ’uria lealae mai, ’oko ’adomi keerua ’ana doo ki sui ne daru dooria ’uria lealae keerua, ade’ana daru ka olikukuru ’ana ta si doo. ¹⁴ Na imole manata mamana ki dau thasi naa ’uria ililana doo ’okae ki ’uria ’adomilana imole ki ne doo ki ’e ’afitai fuada. Ma ka langi da si too tofetoo bada. ¹⁵ Na imole ki sui ne da too fone nau, da fala kau si bae ’okaelae kera ki fuamu. Ma ’oko fala si bae ’okaelae kameli ki fuana imole manata mamana ki ne da thaitamameli. Nau ku foa fasi na liothaua nia tha God ka too fone kamolu teefau.