Rom

Rom

¹ Na kekedalae faasia tha Pol, na ngwane ni rao nia tha Jisas Kraes. Nau ta aposol laubo sulia tha God ’e fili nau, ma ka arasi nau ’uria faatalolae ’ania na Faarongolae ’Okae nia. ² Na Faarongolae ’Okae neri tha God ’e alangana ’ua na mai ’i nao ’ana profet ki, ma da ka kedaa ’i laona Kekedalae Abu ki. ³ - ⁴ Ma na Faarongolae ’Okae neri sulia na Ngwela nia, na Aofia kolu tha Jisas Kraes. Nia ’e thau ’ana imole, ma ka futa ’ana kwalafa tha Deved na ngwane ’inito. Ma kolu thaitamana naa na bibirangaa abu nia, sulia tha God ’e faatana ne nia na Ngwela nia ’ana si manga ne tha God ’e taea faasia maea ’ana suukwaia baita nia. ⁵ Ma ’ana tha Jisas Kraes, nia nee tha God ’e faa’okae nau fasi ku thau ’ana ta aposol ’uria raolae fuana tha Jisas Kraes, fasi ku talaia imole ki ne langi lau Jiu, ’ana maetoaa ki sui, fasi da ka manata mamana ’ani nia, ma da ka roosulia baelana. ⁶ Ma kamolu laubo na imole ki ne molu too ’i Rom, tha God ’e soe kamolu fasi molu ka thau ’ana imole nia ki tha Jisas Kraes. ⁷ Aia, nau ku kekeda kau fuamolu sui bo na imole ki ne molu too ’i Rom ne tha God ’e liothau ’ani kamolu ma ka soe kamolu fasi molu ka thau ’ana imole nia ki. Nau ku foa fasi na liothaua ma na enoenoa nia tha God na Maka kolu, ma na Aofia tha Jisas Kraes ka too fone kamolu teefau. ⁸ Si doo totongenao, nau ku tangoa God nau fuamolu teefau sulia tha Jisas Kraes, sulia na imole ki ’ana maetoaa ’oro ki ’i laona molaagali lalau da rongoa naa na manata mamanalae kamolu. ⁹ Tha God ’e thaitamana si doo nee ku thaea ’e mamana. Nia nee tha God ne ku rao mai fuana ’i laona moorilaku teefau, ’uria faatalolae ’ania Faarongolae ’Okae sulia Ngwela nia. Tha God ’e thaitamana ne ku manatatoomolu, ¹⁰ ’ana si manga ki sui ne ku foa, ku gania tha God, ilingia ’e dooria, nia ka faangwaludea fuaku fasi ku lea mai ku daotoomolu ’ana si manga nee. ¹¹ Sulia nau ku dooria ’asiana kwau riki kamolu, fasi ku bae ’aku fone kamolu sulia si doo ’okae ne tha God ’e ilia fuakolu teefau fasi ka faasuukwai kamolu. ¹² ’Urineri nau ku dooria fasi kolu ka ’adomi kolu kwailiu, ma ku ’adomi kamolu ’ana manata mamanalae nau, ma molu ka ’adomi nau ’ana manata mamanalae kamolu. ¹³ Doora liliothau nau ki ’ae ’ana tha Jisas, nau ku dooria molu ka thaitamana laubo, si manga ’oro ki ne ku manata ’uria daotoolamolulae sui ta, si manga ki sui nau ku daotoona ’afitaia ’uria ililana. Nau ku dooria lealae kau siamolu, fasi tai imole ki lau ne da too ’i Rom da ka manata mamana ’ana tha Jisas Kraes, ilingia ne ku ilia laubo fuana tai imole ki ’ana maetoaa kera imola ki ne langi lau Jiu. ¹⁴ Tha God ’e fale nau na ngwane ni rao ’uria faatalolae ’ana Faarongolae ’Okae fuana imole ki sui, sui boroi ’ana ngwane ki ne da thaitamedoo ilingia ngwane ki ’i Grik, ma na ngwane ki ne langi da si thaitamedoo ilingia ngwane ki ne langi lau Grik. Ma si raoa nee ’e ’oga nau naa. ¹⁵ Nia ne ’e adea ma nau ku dooria faatalolae ’ana Faarongolae ’Okae fuamolu ngwane ki ne molu too laubo ’i Rom. ¹⁶ ’E langi kwasi ’ida bo ’ana baelae sulia na Faarongolae ’Okae nee, sulia tha God ’e rao ’ana suukwaia nia ’uria faamoorilana imole ki sui ne da manata mamana ’ana Faarongolae ’Okae neri. Kameli imole ki ’i Jiu ne meli rongoa si baea neri totongenao, ma si manga neri fatai kamolu imola ki ne langi lau Jiu. ¹⁷ Na Faarongolae ’Okae ’e faatai folaa naa ’ana maalutana bibirangaa nia tha God ’uria ’olosilana imole. Ma nia ka ’olosia imole ki sulia da manata mamana ’ana tha Jisas Kraes. ’E langi lau ta si doo ’e’ete ne tha God ’e ’olosia imole ki ’ana. Sulia si doo neri bae na Kekedalae Abu ki ’e thaea ka ’urii, “Na imole ki ne tha God ’e ’olosida sulia na manata mamanalae kera ki, ni kera naa ne dau moori.” ¹⁸ Ma tha God ’i thalo ’e faatana ne ’e rakethasuia imole ki ne da ilia doo ta’ae ki, ma da ka aburongo. Da ilia doo ta’ae ki, ma da ka suusia doo mamana ki sulia tha God faasi kera. ¹⁹ Tha God ’e fala naa kwakwaelae fuada, sulia ’e faatai folaa ’ana doo ki suli nia ’i tala’ana, ma ka ngwaluda naa fuada ma fasi da ka thaitamana. ²⁰ ’Ana thathafalia mai, tha God ’e thaungana molaagali, ma na imole ki da ka thaitamana naa na suukwaia nia ne langi si sui, ma da ka thaitamana laubo ne nia naa na God mamana. Sui boroi ’ana na imole ki ’e langi da si tala’ana rikilana tha God, kera da rikia na doo ki ne ’e thaungana, ma nia ne adea da ka thaitamana na doo ki sulia tha God. Ma sulia ’e ’urineri, ’e ’afitai bo da ka thaea thasa da lalafusia tha God. ²¹ Da thaitamana tha God, sui ta, ’e langi da si dooria bo faabaitalana, ma ’e langi da si dooria bo na tangolana ’uria doo ki ne ’e fala fuada. Ma da ka manata oengwanea sulia tha God. Ma ’e langi da si thaitamana bo doo mamana ki ne tha God ’e dooria fasi da ka thaitamana. ²² Iuka, da thaea thasa kera na ngwane liotoo ki sulia tha God, sui ta kera na ngwane oengwanea ki bana. ²³ Ma ’e langi da si foasia bo tha God ne moori firi, ma da ka foasia ’ada nunui doo ki ne da thaungana bada ilingia nununa ngwane ne langi si totoo firi, ma na tha’aro ki, ma na doo ’a’ala ki, ma na doo angoango ki. ²⁴ Ma sulia si doo neri ki, ne tha God ka ekwatai kera na ’ana fasi da ka lea na ’ada sulia lioda, ma da ka ilia naa ’ada doo ta’ae ki ’ani kera kwailiu ’ana nonida. ²⁵ Da ka otekera ni faamamanelana doo mamana ki sulia tha God, ma da ka manata mamana ’ada ’ana sukelae ki. Ma da ka foasia na ’ada, ma da ka rao naa fuana doo ki ne tha God ’e thaungada. Ma ’e langi da si foasia tha God ne thaungana doo neri ki sui, ma ka langi da si roo naa sulia. Talifili nia ne tala’ana imole ki da ka faabaitaa ka totoo firi. Iuka ka ’urineri naa! ²⁶ Ma sulia na abulolana imole ki ne ta’ae ’urineri, tha God ka otenia ’ani kera fasi da ka ilia naa ’ada doo ni ’idalae ’ania ki ne lea sulia na kwaidoorilana nonida. Ma na keni ki laubo, da ka otekera na ’ada ’ana ngwane ki, ma da ka tio ofu na ’ada fonea keni ki. ²⁷ Ma ka ’urineri laubo, na ngwane ki da ka otekera na ’ada ’ana keni ki, ma da ka dooria na ’ada tio ofulae fonea ngwane ki. Ma ’e ’urineri, na ngwane ki da ka ilia na ’ada na doo ni ’idalae ’ania ki fuada kwailiu. Nia nee da ka ngala banaa si kwakwaelae ne ’e tala’ana da ka ngala sulia na abulo ta’alae kera ki. ²⁸ Ma sulia na ngwane neri ki da otekera ’ana tae ne da thaitamana sulia tha God, nia ka ekwa naa ’ani kera fasi da ka manata ta’ae na ’ada, ma da ka ilia na ’ada si doo ki ne langi si ’okae ’uria ililana. ²⁹ Da ka ililado naa ’ana doo ta’ae ki, ma da ’agudoo, da ka abulo ta’ae naa foneda kwailiu, da ka liota’ae, da ka thaungwane, da ka firu, da ka suke, ma da ka otekera ’ani kera kwailiu, ma da ka unuunu buri ’ana imole ki. ³⁰ Ma da ka bae ta’ae suli kera kwailiu, ma da ka otekera ’ana tha God, ma da ka aefara kera kwailiu, ma da ka aburongo, ma da ka bae naunau ’asiana, ma da ka manata ’asiana ’uria ililana si doo ta’ae ki, ma da ka aburongo ’ana maka ma gaa kera ki. ³¹ Ma da ka ilia doo oengwanea ki, ma ka langi da si faamamanea naa si baea alangaia kera ki, ma ka langi da si liothau ma ka langi da si kwaimanatai naa fuana imole ’e’ete ki. ³² Aia, ma da thaitamana naa si bae fifiilae nia ki tha God ne ’e ’o’olo, ne ’e thaea thasa na imole ki ne da too ’urineri, da tala’ana banaa maea. Sui ka ’urineri boroi, da si too bo faasia ililana doo ta’ae neri ki, ma da ka dooria na imole ’e’ete ki fasi da ka ilia laubo si doo neri ki.

¹ Kamolu ne molu ketoa imole ki ne da abulo ta’ae ’urineri, molu keto kamolu laubo ’i tala’amolu. Sulia molu ilia laubo na doo ta’ae ki ne da ilia, ma ’e ’afitai molu ka tofe thasa ’e langi molu si garo bo. ² Ma kolu sui bo kolu thaitamana na kwakwaelae nia tha God ’e ’o’olo si manga ’e ketoa imole ki ne da ilia si doo ’urineri. ³ Ma si manga molu ade laubo ’urineri ilingia na imole ki ne molu keto kera, molu thaitamana tha God kau keto kamolu laubo. ⁴ Alamia molu manata garo thasa tha God ’e langi si keto kamolu, sulia na liothaua baita nia fuamolu, ma ka marabibi laubo fuamolu. ’E ’okae fasi molu ka thaitamana ne tha God ’e ade ’okae ’urineri fuamolu fasi molu ka abulo naa faasia abulo ta’alae kamolu ki. ⁵ Ma sulia ’e langi molu si dooria bo abulolae ’urineri, kamolu ’ana ’i tala’amolu ne molu ’idu baita ’ana kwakwaelae kamolu ki maasia fe Dani ne tha God kau faatana rakethasua nia, ma na imole ki sui dau rikia tooketalae nia ’ana ’o’oloa. ⁶ Tha God kau fala si doo ki fuana imole ki sui sulia si raoa ’e’ete ki ne da ilia. ⁷ Tai imole, tha God kau fala na mooria ne totoo firi fuada, sulia da noni maabe ’uria ililana si doo ’okae ki, ma da ka dooria tha God ka faabaita kera ma ka faa’inito kera ma ka fala mooria firi fuada. ⁸ Sui ta, tai imole ki da fangabila, ma da ka otekera ’ada ’ana doo mamana ki sulia tha God, ma da ka dooria ’ada lealae sulia na doo garo ki. Ma sulia ne da ’urineri, tha God kau faatana naa ne nia ’e rakethasui kera, ma ka fala kwakwaelae baita fuada. ⁹ Ma sa ni ti kera ne da abulo ta’ae, dau too ’ana ’afitaia ma na manata ’abonelae. Tha God kau ade ’urineri fuana imole ki ’i Jiu, ma fuana imola ki ne langi lau Jiu laubo. ¹⁰ Ma tha God kau fala na ’initooa, ma na faabaitalae, ma na enoenoa fuana sa ni ti kera ne da ilia doo ’okae ki. ’E ade ’urineri fuana imole ki ’i Jiu ma fuana imola ki ne langi lau Jiu laubo. ¹¹ Nia ’e ade ’urineri sulia na kwakwaelae nia tha God fuana imole ki sui ’e tala’ana, ma ’e langi si kwai’ilisi ’ana ta ngwane. ¹² Ma na imola ki ne langi lau Jiu, ’e langi da si too farana si baea fifii nia ki tha Mosis. Ma tha God ’e langi si keto kera ’ana si baea fifii neri ki. Tha God kau tooketa kera sulia da ilia doo ta’ae ki. Nia kau keto kera ’uria maea, sulia na abulo ta’alae kera ki. Ma na imole ki ’i Jiu ne da too ’i farana si baea fifii nia ki tha Mosis. Tha God kau tooketa kera, sulia da ilia doo ta’ae ki ’ana aburongolae ’ana si baea fifii neri ki, ¹³ ma sulia ’e langi lau na rongolana si baea fifii ki ne kau ’olosia imole ki fuana tha God, na ililana si doo ki ne na baea fifii ki ’e thaea, nia ’ana ne kau ’olosia imole ki. ¹⁴ Na imola ki ne langi lau Jiu, da si too farana si baea fifii neri ki. Sui ta, lelea sa da ilia si doo ’okae sulia na manatalada, ma ka lea sulia si baea fifii neri ki, da faatana ne da tolingia na ’o’oloa faasia garolae, sui boroi ’ana kera da si rongoa ’ua si baea fifii nia ki tha Mosis. ¹⁵ Na abulolada ’e ’okae ’urineri ne faatana si baea fifii nia ki tha God ’e too naa ’i laona lioda. Ma na manatalada laubo ka faatana si doo ne ’e mamana, sulia si manga da ilia doo ta’ae ki, kera da ka ’ida, ma si manga da ilia doo ’okae ki, kera da ka nonithathala. ¹⁶ Tha God kau ketoa imole abulo ta’ae ki ’ana fe dani ne ’e fala tha Jisas Kraes ka ’inito faafia imole ki fasi nia ka keto kera sulia na doo garo ki ne da ade faatai ’ania ma na doo garo ki ne da ade agwa laubo ’ania. Na Faarongolae ’Okae nee nau ku bae sulia,nia ne bae ’urineri. ¹⁷ Aia, kamolu imole ki ’i Jiu, molu fiia thasa tha God kau ’okae fuamolu, sulia ’e fala si baea fifii ki faasia tha Mosis fuamolu. Ma molu ka faabaita kamolu ’amolu ’i tala’amolu, sulia kamolu na imole nia ki tha God. ¹⁸ Ma molu ka thaea thasa molu thaitamana si doo ne tha God ’e dooria molu ka ilia, ma molu ka thaitamana fililana si doo ne ’e ’o’olo sulia molu thaitamana si baea fifii ki. ¹⁹ Ma molu ka thaea laubo, thasa molu thaitamana talailana ni ti kera ne da ilingia imole ki na maada ’e rodo sulia da lalafusia tha God. Ma molu ka thaea laubo, thasa molu ilingia na kwethu fuana ni ti kera ne da too ’i laona maerodo fasi da ka lea mai siana tha God. ²⁰ Molu ka thaea thasa molu too ’ana thaitamedooa fono ma na doo ki sui ne mamana, sulia molu too ’ana si baea fifii ki faasia tha Mosis. Ma molu ka thaea kamolu na ngwane toodoo ki fuana ngwane oengwanea ki ma na ngwane lalafusi doo ki. ²¹ Ma molu ka thaitamana faamanatailana imole ’e’ete ki, ma ’urifita mone nee ka langi molu si faamanatai kamolu ’i talamolu? Molu bae fuana imole ki molu ka ’urii, “’E langi molu si beli.” Sui ta, kamolu ’i talamolu molu beli bo ’amolu. ²² Molu ka thaea laubo fuana imole ki, “’E langi molu si kaubare.” Sui ta, molu kaubare laubo. Molu ka thaea laubo, thasa na nunui doo ki ne ngwane ki da foasia ’e ta’ae ’asiana. Sui ta, molu ruu bo ’amolu ’i laona beu abu kera ki, ma molu ka belia bo ’amolu doo neri ki. ²³ Ma molu ka bae naunau suli kamolu ’i tala’amolu, sulia molu too ’ana si baea fifii nia ki tha Mosis. Sui ta, molu aburongo bo ’amolu ’ana si baea fifii neri ki. Ma nia ne adea na imole ki da ka bae ta’ae ’ana tha God. ²⁴ Nia nee na Kekedalae Abu ka bae ’urii, “Sulia kamolu na imole ki ’i Jiu molu abulo ta’ae ’asiana, nia nee na imola ki ne langi lau Jiu, da ka baetataga ’ana tha God.” ²⁵ Kamolu imole ki ’i Jiu, molu thaea thasa na ’irimamalafoalae ne faatana ne kamolu imole nia ki tha God. Lelea sa molu roosulia si baea fifii nia ki God, na ’irimamalafoalae ne molu ilia na doo ’okae. Ma lelea sa ’e langi molu si roosulia si baea fifii neri ki, na ’irimamalafoalae ne molu ilia boroi, ’e langi si ’adomi kamolu bo ’i maana tha God. Ma molu ka ilingia bamolu na imole ki ne langi da si thaitamana tha God. ²⁶ Aia, ma lelea sa ta imole ne langi lau Jiu, ma nia ka roosulia si baea fifii neri ki, tha God kau ’alangi nia ’ana imole nia, ka ilingia laubo ngwane ne ’irimamalafoa. ²⁷ Ma imole ki ne da roosulia si baea fifii ki, sui boroi ’ana ka langi da si ’irimamalafoa, kera dau faatana ne molu garo, ma tha God kau tooketa kamolu. Tha God kau tooketa kamolu, sulia molu aburongo ’ana si baea fifii ki, sui boroi ’ana molu ka too ’ana si baea fifii kedalana neri ma molu ka ’irimamalafoa. ²⁸ Ni ti nee na ngwane ’i Jiu mamana? ’E langi lau ta ngwane ne roo bana sulia si baea fifii kera Jiu ki ma langi ka ’irimamalafoa bana ’ana nonina, ma na liona ka ta’ae ’ua bana. ²⁹ Na ngwane mamana ’i Jiu, nia na ngwane ne moorilana ’e ’o’olo ’i maana tha God, sulia tha God ’e bulasia na manatalamolu. Ma na raoa nia Mangoedoo Abu ’uria ’olosilana moorilana imole, ma ka langi lau na raolana si baea fifii ki. Na ngwane ’urineri, tha God ’e faabaita nia, sui boroi ’ana imole ki da si faabaita nia.

¹ ’Urineri ’e ’urifita, ’e ’okae bana fuamolu imole ki ’i Jiu molu ka ’irimamalafoa fasi ka faatana ne kamolu na imole nia ki tha God? ² Iuka, si doo ’oro ’okae ki ne nii ’ana si doo neri. Si doo totongenao, tha God ’e fala naa baelana fuana imole ki ’i Jiu. ³ ’Urineri boroi ’ana, tai imole ki ’i Jiu ’e langi da si manata mamana bo ’ana baelana tha God. Sui boroi ’ana da ka ’oia na alangaia kera ki fonea tha God, si doo ki ne tha God ’e alangana, nia ’e ilia ka lado bana. ⁴ Sulia tha God ’e mamana, sui boroi ’ana imole ki da ka suke. Sulia na Kekedalae Abu bae ’e thaea ka ’urii, “Ta si doo bana ne tha God ’e thaea kau ilia ’ana imole abulo garo ki, nia kau ilia banaa. Ma sa ni ti boroi ’ana ne ’e thaea thasa tha God ’e langi si tooketa ’o’olo, tha God ’e faatana nee nia ’e ’o’olo ka tatha ’asiana.” ⁵ Ma tai imole ki ’i Jiu da soetoo oengwanea ’ani nia da ka ’urii, “Sui lelea sa na abulo ta’alae kolu ki ’e faatai folaa ’ana fuana imole ki ne tha God ’e ’o’olo si manga ’e tooketa kolu. ’Urineri ma tha God ’e garo si manga ’e fala keketoa fuakolu?” ⁶ ’E langi ’asiana! Sulia ’e ’afitai tha God ka garo. Sulia lelea sa nia si ’o’olo, nia si tala’ana bo tooketalana imole ki. ⁷ Ma tai imole ki ’i Jiu da soetalafana ’ana si soetoolae oengwanea da ka ’urii, “’E ’urifita, lelea sa kolu ’oia si bae alangaia kolu ki, ma na imole ki da ka riki folaa ’ania thasa tha God ’e lea naa sulia alangaia nia, ma nia ne adea ma da ka faabaita tha God? Lelea sa ’e ’urineri, ’urifita mone nee tha God ka tooketa kolu faafia garolae kolu ki?” ⁸ Ma si baea ’urii ’e oengwanea laubo, “Kolu abulo ta’ae ’akolu fasi si doo ’okae ka dao mai.” Tai imole ki da suke faafi nau thasa nau ku thaea si doo neri. Ma na imole neri ki, tha God kau keto kera. ⁹ Ma fuakolu imole ki ’i Jiu, ’urii ma moorilameli ma na abulolameli ’e ’okae faasia na imole ki ne langi lau Jiu? ’E langi ’asiana! Sulia nau ku faatana naa na imole ki ’i Jiu, ma na imola ki ne langi lau Jiu, da tala’ana sui bada toolae ’i farana na suukwaia ’ana ta’alae. ¹⁰ Si doo neri ’e mamana sulia na Kekedalae Abu ’e thaea, “E langi ta imole si ’o’olo bo. ¹¹ Ma ’e langi ta imole si thaitamana bo maalutana tha God, ma ’e langi ta imole si dooria bo thaitamanalana tha God. ¹² Sulia kera sui bo da abulo ’e’ete faasia tha God, ma da ka lea garo naa, ma ’e langi ta imole si ilia bo ta si doo ne ’e ’o’olo. ¹³ Na fakada ’e ilingia ta kwainaia ne ’e langi da si asi bo faafia ’ana thaegano, sulia na baelada ’e ta’ae ’asiana. Da thaea doo ta’ae ki ne langi si mamana ’ana meada. Ma da faangadaa imole ki ’ana baelada, ilingia na baekwa tolo ne ’alea ta imole. ¹⁴ Ma na baelada laubo ’e fungu ’ana kwaiagiilae ne ta’ae ’asiana. ¹⁵ Ma na imole neri ki da ’ali’ali ’uria thaungwanelae. ¹⁶ Ma ’i fai boroi ’ana ne da ka lea ’uria, da ka nagaa bo si doo ki, ma da ka fala bo ngadalae fuana imole ki. ¹⁷ Ma na enoenoa ’e langi si too bo ’i laona moorilada. ¹⁸ Ma ’e langi da si mau bo ’ana tha God.” ¹⁹ Ma kolu thaitamana si doo ki sui bo ne tha God ’e thaea ’i laona si baea fifii nia ki, si doo neri ki nia ’e fala fuada na imole ki ’i Jiu. Nia ’e fala si baea fifii nia ki fasi ka langi ta imole si thaea nia ’e langi si ilia bo ta si doo ta’ae. Ma tha God kau ketoa imole ki sui ’uria na garolae kera ki. ²⁰ ’E langi ta imole si ’o’olo bo ’i maana tha God, ’ana roosulilana bana ma na adesulilana bana si baea fifii ki. Iuka, si baea fifii ki ’e too fasi na imole ki da ka thaitamana ne da abulo ta’ae. ²¹ Sui ta, ’ana si manga neri, tha God ’e faatana naa tale ’uria ’olosilana imole ki ’i maana. Ma ka langi lau sulia roolae sulia si baea fifii ki, sui boroi ’ana si baea fifii neri ki da ka lea mai faasia tha Mosis ma na profet ki, da kekeda naa sulia na tale neri. ²² Tha God ’e ’olosia na imole ki sulia na manata mamanalae kera ’ana tha Jisas Kraes. Nia ’e ade ’urineri fuana imole ki sui bo ne da manata mamana ’ana tha Jisas Kraes, sulia imole ki sui da bobola bo ’i maana tha God. ²³ Imole ki sui bo da abulo ta’ae, ma da ka oli kukuru ’ana ’okaelae nia tha God. ²⁴ Sui ta, sulia na liothaua nia tha God ne ’e tofa fala bana, nia ka lukeda faasia na kwakwaelae ’ana abulo ta’alae kera ki ’ana na afuafulae nia tha Jisas Kraes. ²⁵ Tha God ’e fala mai tha Jisas Kraes fasi ka afuafu ’ani nia ’ana maelana, fasi tha God ka manatalukea na abulo ta’alae kera na imole ki, sulia na manata mamanalae kera ’ani nia. Tha God ’e ade ’urineri fasi ka faatana na keketoa nia ’e ’o’olo ’asiana, sui boroi ’ana ’e tau naa mai nia si fala bo ta kwakwaelae fuana imole ki sulia na marabibilae nia. ²⁶ Ma tha God ’e faatana ne nia ’e ’o’olo ’uria tooketalana ta’alae ki, ’ana si manga ’e fala na kwakwaelae fuana tha Jisas Kraes. ’Urineri tha God ’e faatana ’e ’o’olo ma ka ’olosia na imole ki ne da manata mamana ’ana tha Jisas. ²⁷ Ma ’uria tae ne kolu ka bae naunau? ’E langi bo! Langi kolu si tala’ana bo ’uria thaelana thasa kolu ’o’olo, sulia kolu roosulia si baea fifii ki. Sui ta, tha God ’ana ne ’e ’olosi kolu, sulia kolu manata mamana ’ana tha Jisas. ²⁸ Kolu thaitamana ne tha God ’e ’olosia na imole ki sulia na manata mamanalae kera, ma langi lau sulia na roolae sulia tae ne si baea fifii ki ’e thaea. ²⁹ ’Urineri ma ’o manata thasa tha God ’e alafaafia bo talifilia imole ki ’i Jiu? ’E langi! Na imola ki ne langi lau Jiu boroi tha God ’e ala faafi kera laubo. ³⁰ Tha God ’e tee God bo, ma ’e tala’ana ka ’olosia imole ki ’i Jiu lelea sa da manata mamana, ma ’e ’olosia laubo imola ki ne langi lau Jiu lelea sa da ka manata mamana. ³¹ Sulia tha God ’e ’olosia imole ki sulia manata mamanalae kera, ’urineri kolu ka ekwatana ’akolu si baea fifii nia ki tha Mosis? ’E langi. Sui ta, si doo ne ku toolamana ’ana ne faatana ne si baea fifii ’e ’inito laubo.

¹ ’Urii ma tae ne kolu kau thaea sulia tha Abraham na kokoo abu kolu imole ki ’ana kwalafaa ’i Jiu? ’Urifita nee tha God ka thaea ne nia na ngwane ’o’olo ’i maana? ² Lelea sa tha God ’e faare ’o’olo ’ana tha Abraham sulia rao ’okaelae ki ne ’e ilia, tha Abraham tala’ana ka si bae naunau lau sulia. Sui ta, ’e langi nia si tala’ana bae naunaulae ’i maana tha God. ³ Sulia na Kekedalae Abu bae ’e bae ’urii, “Tha Abraham ’e manata mamana ’ana si bae alangaia nia tha God, ma sulia na manata mamanalae nia nee tha God ka thaea tha Abraham ’e ’o’olo ’i maana.” ⁴ ’Ana si manga ta ngwane ’e rao, nia ka ngala bo fofolia nia. Ma na malefo ne ’e ngala, na ngwane baita nia si tofa fala fuana, sulia na ngwane ni rao ’e tala’ana ka ngala bo fofolia nia. ⁵ Ma si manga tha God ’e faare ’o’olo ’ani kolu ’i maana, nia si ilingia lau si manga ngwane baita ’e fala fofolia fuana ngwane ni rao nia. Sulia ’e langi lau sulia na raolakolu ne tha God ’e faare ’o’olo ’ani kolu, sulia na fiitooa kolu ’ana tha God ’ana nee nia ’e thaitamana ka ’olosia na imole ta’ae ki. Ma tha God ’e rikia na fiitooa kolu, ma sulia si doo neri ne tha God ka ’alangi kolu ’ana imole ’o’olo ki. ⁶ ’Urineri tha Deved si bae sulia na nonithathalalae kera na imole ki ne tha God ’e thaea da ’o’olo, sui boroi ’ana ’e langi da si roosulia si baea fifii nia ki sui tha God. Tha Deved ka si bae ’urii, ⁷ “Ka ’oilakea fuana ni ti kera ne tha God ’e manatalukea naa na garolae kera ki, ma ka lafua naa abulo ta’alae kera ki. ⁸ Ka ’oilakea laubo fuana ngwane ne tha God ’e langi si manata ’uria na abulo ta’alae nia ki.” ⁹ ’Urii ma, na nonithathalalae ne tha Deved ’e bae sulia, na doo bana fuana imole ki ’i Jiu ne kolu ’irimamalafoa? ’E langi! Na doo laubo fuana imola ki ne langi lau Jiu ne langi da si ’irimamalafoa. Kolu thaitamana sui naa na Kekedalae Abu bae ’e bae ’urii, “Tha Abraham ’e manata mamana ’ana tha God, ma sulia nia ’e manata mamana, tha God ka ’alangi nia ’ana ngwane ’o’olo.” ¹⁰ ’Ana si manga tae bae tha God ’e thaea tha Abraham ’e ’o’olo? ’I burina ne ’e ’irimamalafoa sui naa, ma langi ’ana si manga ’e langi si ’irimamalafoa ’ua? ’I naona fatai ne ’e ’irimamalafoa tha God ’e thaea sui naa nia na ngwane ’o’olo. ¹¹ ’I burina fatai ne tha God ’e faare ’o’olo ’ana tha Abraham, tha Abraham ka fi ’irimamalafoa. Ma na ’irimamalafoalae, na mamalafoa fasi ka faatana tha God ’e thaea nia na ngwane ’o’olo sulia na manata mamanalae nia ’ana si manga ’e langi nia si ’irimamalafoa ’ua. Nia ne adea tha Abraham ka ilingia kokoo abu fuana imole ki ne langi lau Jiu ne da si ’irimamalafoa, ma da ka manata mamana ’ana tha God, ma da ka thau ’ana ngwane ’o’olo ki. ¹² Ma nia na kokoo abu fuana imole ki ’i Jiu ne da ’irimamalafoa ma da ka faamamanea alangaia nia tha God. ’E langi lau sulia ne da ’irimamalafoa, sulia da manata mamana ’ada ilingia na kokoo abu kera tha Abraham bae ’e manata mamana sui fatai, nia ka fi ’irimamalafoa. ¹³ Tha God ’e alangana fuana tha Abraham ma na kwalafaa nia, nia ’e thaea na molaagali ne na doo nia. Tha God ’e alangai ’urineri, langi lau sulia ne tha Abraham ’e roosulia si baea fifii ki, sulia na manata mamanalae nia ’ana, ma tha God ka ’alangi nia ’ana na ngwane ne ’o’olo. ¹⁴ Ma lelea sa tha God ka fala bana si bae alangaia nia fuana ni ti kera ne da roosulia si baea fifii ki, ’urineri na manata mamanalae kera na imole ki na tofa doo bana, ma na alangaia nia tha God na tofa doo laubo. ¹⁵ Si baea fifii ki e langi si fala mai na alangaia tha God, ’e fala ’ana mai na rakethasua nia tha God, sulia ngwane ki ne da ’oia si baea fifii nia. Ma si manga si baea fifii ’e too, na ngwane ki da oli’aingenge ’ana si baea fifii ki ka lado bana. ¹⁶ Tha God ’e alangana doo ki fuana tha Abraham sulia na manata mamanalae nia, fasi ka faatana na alangaia neri sulia na kwaimanataia nia ne kau tofa fala fuana kwalafa nia tha Abraham. Ma na kwalafa nia tha Abraham, ’e langi lau kera talifilida bo ne da roosulia na baea fifii ki, kera imole ki ne da manata mamana laubo ilingia tha Abraham. Sulia tha Abraham na kokoo abu kolu teefau, na imole ki ’i Jiu, ma na imola ki ne langi lau Jiu. ¹⁷ Si doo nee ’e mamana, sulia tha God ’e thaea fuana tha Abraham ’i laona na Kekedalae Abu ka ’urii, “Nau ku fili ’oe, ma ku alua ’oko maka fuana kwalafa ki ’ana imole ki ’ana maetoaa ’oro ki.” Na alangaia nee tha God naa ne tala faasuukwaia ma ka mamana. Tha Abraham ’e manata mamana ’ana tha God neri, nia naa na God ne ’e taea imole mae ki ’uria mooria, ma ka thaungana doo faalu ki. ¹⁸ Si manga tha God ’e alangainia fuana tha Abraham thasa nia na maka fuana kwalafaa ’ana imole ki ’ana maetoaa ’oro ki, tha Abraham ’e faamamanea. Tha God ’e thaea laubo ka ’urii, “Na imole ki ne dau futa olitamu dau ’oro ilingia bubulu ki laona thalo.” Tha Abraham ’e manata mamana, sui boroi ’ana ’e ’afitai fasi si doo neri ka mamana. ¹⁹ ’Urineri boroi ’ana tha Abraham ’e karangia ka tee talange fe ngali naa ’ana moorilana, na manata mamanalae nia ’e langi si maketho bo si manga ’e manata sulia nonina ne maketho, ma ni Sera boroi ka ’aba’ato laubo. ²⁰ Ma na manata mamanalae nia ’e langi si maketho faasi nia, ma ka langi si manata ruarua ’ana alangaia nia tha God. Nia ’e suukwai sulia na manata mamanalae nia, ma ka faabaitaa tha God. ²¹ Sulia ’e thaitamana ’okae ’ana ne tha God ’e tala’ana ililana si doo neri nia ’e alangana. ²² Nia nee sulia manata mamanalae nia, tha God ’e ’alangi nia ’ana na ngwane ’o’olo. ²³ Ma ta kekedalae bae ’e ’urii, “Tha God ’e ’alangia ’ana na ngwane ’o’olo,” langi lau fuana tha Abraham bo talifilia. ²⁴ Da kedaa laubo fuakolu imole ki ne tha God ’e ’alangi kolu ’ana imole ’o’olo ki, sulia kolu manata mamana ’ana tha God ne ’e taea tha Jisas na Aofia kolu faasia maea. ²⁵ Tha God ’e fale nia ka mae ’uria ta’alae kolu ki, ma tha God ka faamooria laubo ’uria ’olosilakolulae ’i maana.

¹ Si manga neri, kolu manata mamana ’ana tha Jisas Kraes, ma tha God ka ’olosi kolu ’i maana. ’Urineri, kolu ka too ’ana enoenoa fonea tha God, sulia na raoa nia tha Jisas Kraes na Aofia kolu ne ’e ilia. ² Ma sulia na manata mamanalae kolu, tha Jisas Kraes ’e ngali kolu ’i siana tha God, fasi ka liothau ’ani kolu ma ka faa’okae kolu. Ma sulia ’e ’urineri, kolu ka nonithathala ’asiana sulia si doo ne kolu kwaimaakwali ’ania, ne tha God kau fala fasi kolu ka rikia na ’initooa nia. ³ Ma ’e langi lau na doo ’okae ki bo ne kolu nonithathala sulia, kolu nonithathala laubo si manga ’ana ’afitaia ki, sulia kolu thaitamana na ’afitaia ki na doo ’uria faasuukwailakolu, ma ka adea kolu ka takwe suukwai. ⁴ Ma lelea sa kolu ka takwe suukwai ’urineri, tha God kau nonithathala fone kolu. Ma si manga tha God ’e nonithathala suli kolu ’urineri, kolu ka manata ngado fasi tha God ka fala fasi kolu ka rikia na ’initooa nia. ⁵ Ma na fiitooa neri ’e langi si adea kolu ka tofa kwaimaakwali bakolu, sulia tha God ’e faatana na liothaua baita nia fuakolu ’ana na Mangoedoo Abu ne ’e fala fuakolu. ⁶ Kolu thaitamana tha God ’e liothau ’ani kolu, sulia si manga ’e ’afitai ’uria ’adomilakolu ’i tala’akolu, tha Jisas Kraes ’e mae ’usi kolu na imole ta’ae ki ’ana si manga ne tha God ’e filia. ⁷ ’E ’afitai fuana ta ngwane ka nonimaabe ma ka mae ’uria ’adomilana ta ngwane ’o’olo. ’Urineri boroi ’ana, tai ngwane nonimaabe ki da mae bada ’uria ’adomilana ta ngwane ne ’okae. ⁸ Sui ta, tha God ’e faatana sui naa na liothaua nia fuakolu, ’ana si manga ne mooria kolu ’e ta’ae ’ua, tha Jisas Kraes ’e mae ’usi kolu. ⁹ Tha God ’e ’olosi kolu naa sulia tha Jisas Kraes ne mae naa ’usi kolu. Lelea sa ’e ’urineri, tha Jisas Kraes kau ’adomi kolu ka tatha fasi kolu ka moori faasia na kwakwaelae nia tha God. ¹⁰ ’I nao mai, kolu na maalimae nia ki tha God, sui ta, si manga neri nia ’e kwaimani naa fone kolu sulia na maelana na Ngwela nia. Ma sulia ne kolu imole kwaimani nia ki tha God, nia kau faamoori mamana ’ani kolu sulia tha Jisas Kraes ’e moori lau. ¹¹ Iuka, ’e langi lau si doo neri bana ne kolu nonithathala sulia. Kolu nonithathala laubo sulia si doo ne tha God ’e ilia ’ana tha Jisas Kraes na Aofia kolu ne ’e olitai kolu fasi kolu ka kwaimani lau fonea tha God. ¹² Na imole ki sui ’i laona molaagali da thafalia ililana doo ta’ae ki sulia tha Adam na ngwane totongenao ’e abulo ta’ae. Ma tha God ’e fala tha Adam ka mae sulia ’e abulo ta’ae. Ma sulia ’e ’urineri, na maea ka dao mai fuana imole ki sui, sulia na imole ki sui da abulo ta’ae. ¹³ Ma ’i nao ’ana ne tha God ’e fala si baea fifii ki fuana tha Mosis, na ngwane ki ’e langi da si thaitamana ne da abulo ta’ae ’urifita ’i naofana tha God. ¹⁴ Sui boroi ’ana ’e langi da si ’oia si baea fifii ne ’e lea mai faasia tha God ilingia tha Adam, imole ki sui da mae sulia da abulo ta’ae bada. Tee si doo baita ne ’e ’e’ete ’i malutana tha Adam ma tha Jisas Kraes ne dao mai ’i burina. ¹⁵ Na roo ngwane neri ki ’e langi daru si bobola, sulia si doo ’okae ne tha Kraes ’e ilia fuakolu ’e langi si ilingia lau na doo ta’ae ne tha Adam ’e ilia. ’E mamana na imole ’oro da mae sulia na abulo ta’alae nia tee ngwane neri. Ma nia ’e mamana ’asiana na liothaua nia tha God, ma na tofa falelae nia tha God ’e baita ka tatha laubo fuana na imole ’oro ki sulia tha Jisas Kraes ma na liothaua nia. ¹⁶ Ma tee si ’e’etelae lau ne ’e too ’i malutana na falelae nia tha God ma na ta’alae ne tha Adam ’e ilia. Sulia ’i burina na ta’alae nia tha Adam, tha God ’e fala kwakwaelae. Ma sulia si doo ’okae ne tha God ’e tofa fala fuakolu, ’e ’olosia na imole ’oro ki ’i maana, sui boroi ’ana da ka ilia doo ’oro ta’ae ki. ¹⁷ Aia, ’e mamana, imole ki sui da mae sulia na abulo ta’aelana tee ngwane. Ma ’e mamana ’asiana laubo, ni ti kera ne da ngala na liothaua nia tha God fonea na falelae nia ’ana na ’o’ololae, da too ’ana mooria ne totoo firi ma na ’initooa sulia tha Jisas Kraes. ¹⁸ Nia nee, tee ngwane tha Adam ’e ilia tee si doo ta’ae, ma tha God ka fala kwakwaelae fuana imole ki sui. Ma ka ’urineri laubo, tee ngwane tha Jisas ’e ilia tee si doo ’okae, ma ka ’olosia imole ki sui, ma nia ka fala naa mooria ne totoo firi fuada. ¹⁹ Ma imole ki sui da too ’ana abulo ta’alae, sulia na aburongolae nia tee ngwane. Ma ’e ’urineri, tha God ’e ’olosia imole ki ’i maana, sulia na roosuli baelana tee ngwane. ²⁰ Tha God ’e fala naa si baea fifii ki fuana tha Mosis fasi na imole ki da ka thaitamana si doo ’oro ki ne da ilia ka garo. Sui ta, si manga na imole ki da ilia doo ’oro ta’ae ki, tha God ka fi faatana na liothaua nia ne baita ka tatha. ²¹ Nia nee, ’i nao ’ana mai, na abulo ta’alae ’e ’inito faafia na imole ki ’uria maea. Ma ka ’urineri ’ana si manga neri, na liothaua nia tha God ’e ’inito faafia na imole ki fasi da ka ’o’olo. Ma nia nee adea kolu ka ngala naa mooria ne totoo firi sulia si doo ne tha Jisas Kraes na Aofia kolu ’e ilia fuakolu.

¹ Tae ne kolu kau thaea sulia baea nee ku kedaa? Kolu ka ililado ’akolu ’ana kwalukaela abulo ta’alae, fasi tha God ka ililado laubo ’ana faatailana liothaua nia fuakolu si manga ’e lukea ta’alae kolu ki, langi ’e ’urifita? ² ’E langi ’asiana! Si manga na manatalae ngwane ta’ae ’e dao ka gatha kolu ’uria abulo ta’alae, kolu si ilia ta si doo, ilingia nonii doo ne ’e mae naa, ma ’e langi si ’isu si manga da gathaa. ³ Molu thaitamana sui naa si doo nee: Si manga kolu sisiuabu ’ana nia nee na faatailana ofulae kolu fonea tha Jisas Kraes, kolu ofu laubo fonea ’ana maelana. ⁴ Iuka ’ana na sisiuabulae kolu, kolu mae naa fonea tha Jisas Kraes, ma da ka alua kolu laubo fonea, fasi kolu ka tatae ma kolu ka too ’ana mooria faalu, ilingia ne tha Jisas Kraes ne tha God na Maka ’e taea faasia na maea ’ana suukwaia nia. ⁵ Sulia kolu ofu fonea tha Jisas Kraes ’ana maelana, tha God kau tae kolu laubo ilingia bae ’e taea tha Jisas Kraes. ⁶ Ma kolu thaitamana naa ne na mooria kolu bae ’i nao, ’e mae naa fonea tha Jisas Kraes ’ana ’airarafolo, fasi na bibirangaa ta’ae kolu ki ’i nao ka funu, ma na ta’alae ka langi si ’inito faafi kolu. ⁷ Sulia ne ’e ’urineri, si manga ta ngwane ’e mae naa, nia ’e langi si too naa ’i farana ta’alae ⁸ Ma sulia kolu mae naa fonea tha Jisas Kraes, kolu manata mamana ’ania ne kolu kau moori laubo fone nia. ⁹ Sulia kolu thaitamana tha Jisas Kraes ’e tatae naa faasia maea, ma ’e ’afitai ’asiana nia ka mae lau, ma na maea ka langi si ’inito naa faafi nia. ¹⁰ Nia ’e mae ’ana tee si manga bo fasi ka siitatha ’ana ta’alae, ma si manga neri nia ’e moori naa ’uria faa’initolana tha God. ¹¹ Ma ka ’urineri laubo, molu ka manatatoona thasa ne molu mae naa ma ka langi molu si abulo ta’ae naa. Ma molu ka moori naa ’uria faa’initolana tha God sulia tha Jisas Kraes. ¹² Nia nee, ka langi molu si alamatana abulota’alae ka ’inito naa faafia nonimolu fasi ka langi molu si lea naa sulia kwaidooria ta’ae ki. ¹³ Ma ka langi molu si alamatana ta si kula ’ana nonimolu ’uria ta’alae, fasi molu ka ilia ’ana doo ta’ae ki. Molu ka falakamolu ’amolu ’i talamolu fuana tha God, ilingia na ngwane ki ne tha God ’e taeda faasia na maea ’uria mooria faalu, ma molu ka fala naa nonimolu ma na moorilamolu teefau fuana tha God, fasi molu ka ilia na doo ’o’olo ki. ¹⁴ Nia nee, ka langi molu si alamatana abulota’alae ka ’inito faafi kamolu, sulia molu si too lau ’i farana si baea fifii ki, molu too ’amolu ’i farana liothaua nia tha God. ¹⁵ Kolu too bakolu ’i farana liothaua nia tha God. ’E ’urifita, kolu ka dau bakolu ’ana abulota’alae, sulia ’e langi kolu si too ’i farana si baea fifii ki? ’E langi! ¹⁶ Aia, ma kamolu molu thaitamana sui naa, sa ni ti boroi ’ana ne molu filia fasi molu ka rao fuana, molu ka roosulia, sulia kamolu na ngwane ni rao nia ki. Ka ’urineri laubo, lelea sa molu filia na roolae sulia abulota’alae, molu kau mae. Ma lelea sa molu ka filia roolae sulia tha God, molu kau too ’ana ’o’oloa. ¹⁷ Nau ku faabaitaa tha God! Sui boroi ’ana ’i nao molu ka roosulia abulota’alae, si manga neri molu roosulia teefau naa na toodoolae mamana ne tha God ’e fala fuamolu. ¹⁸ Nia nee, tha God ka lafu kamolu faasia na suukwaia ’ana ta’alae, ma molu ka thau ’ana ngwane ni rao nia ki tha God fasi molu ka ilia naa doo ’o’olo ki. ¹⁹ Nau ku bae ’urineri ’ana si omelangwane sulia na ngwane ni rao ki fonea na ngwane baita ki, sulia ’e ngwaluda fasi molu ka thaitamana. ’Ana si manga bae ’e sui na mai, molu falakamolu teefau ’uria abulota’alae. Molu ka ilia doo ta’ae ki fuamolu kwailiu ’ana nonimolu ma na kwalukaela doo ta’ae ki. Ma si manga neri, molu ka falakamolu teefau naa fuana tha God fasi molu ka ilia naa doo ’o’olo ki. ²⁰ ’Ana si manga na ta’alae ’e ’inito faafi kamolu, ’e langi molu si manata ’a’abo bo ’uria ililana si doo ’o’olo ki. ²¹ Aia, kamolu molu si ngala ta si doo ’okae faasia na abulota’alae ki bae molu ekwatana naa. Ma si manga neri, molu ’ida sulia na abulota’alae ki ne molu ilia ’i nao. Na imole ki ne da abulo ta’ae ’urineri, dau mae. ²² Sui ta, ’ana si manga neri, tha God ’e lafu kamolu naa faasia abulota’alae, ma kamolu naa na ngwane ni rao nia ki tha God. Ma sulia molu ’urineri, ka ’oilakea fuamolu sulia molu roosulia kwaidooria nia tha God, ma molu ka ngala naa na mooria ne totoo firi. ²³ Na abulota’alae ne fala maea fuakolu, ka ’urineri boroi, na tofa falelae nia tha God ’ana mooria ne ’e totoo firi sulia tha Jisas Kraes na Aofia kolu, nia nee ’e ’okae ka tatha.

¹ Doora ki ’ae ’ana tha Jisas Kraes, nau ku thaitamana ne molu thaitamana si baea fifii ki. Fulingana sa molu ka thaitamana na ngwane ’e too ’i farana si baea fifii ki si manga ’e moori ’ana. ² Ka ’urineri laubo fuana keni ne ’afe naa. Si manga na arai nia ’e moori ’ua, na baea fifii ki ’e thaea nia ’e langi si tala’ana kau ’afe lau ’ana ta ngwane ’e’ete. Sui ta, lelea sa na arai nia ka mae naa, nia ka fi too tofetoo faasia si baea fifii ki ’ana maikwainalae, ma nia ka fi tala’ana kau ’afe lau. ³ ’E ’urineri, lelea sa na ’afe neri ka too fonea ta ngwane ’e’ete ’ana si manga arai nia ’e moori ’ua bana, na ’afe neri da ’alangia ’ana keni olodola. Ma lelea sa na arai nia ka mae naa, ma nia ka too thakwadoloa naa faasia si baea fifii ki ’ana maikwainalae, ma nia ka ’afe lau ’ana ta ngwane, ’e langi da si ’alangia ’ana keni olodola. ⁴ Doora nau ki ’ae, nia ’e ’urineri laubo fuakolu. Sulia si manga tha Jisas Kraes ’e mae, ’e ilingia ’ana ne kolu boroi kolu mae naa laubo. Sulia kolu mae naa, kolu tofetoo naa faasia si baea fifii nia ki tha Mosis. ’Urineri ’e ngwaluda fasi tha God ka ofu kamolu fonea ta ngwane lau, ma nia nee tha Jisas. ’Ana si manga neri, kolu na imole nia ki tha Jisas Kraes ne tha God ’e taea faasia na maea, fasi kolu ka faa’initooa tha God ’ana toolae ’o’olo. ⁵ ’Ana si manga kolu roosulia na kwaidooria ta’ae kolu ki, kolu dooria ’asiana laubo ililana si doo ne si baea fifii ki da thaea ’e abu. Ma sulia kolu ilia naa si doo ta’ae ki ’urineri, kolu ka tala’ana naa maelae sulia kudu. ⁶ Sui ta, ’ana si manga neri, kolu too tofetoo naa faasia si baea fifii ki ne ’e totoo firi faafi kolu ’i nao mai, sulia na mooria kolu ’i nao mai ’e mae naa. Ma ’ana si manga neri, kolu rao naa fuana tha God, ma kolu ka lea naa sulia na tala faalu ’ana roolae sulia na kwaidooria nia na Mangoedoo Abu. Ma ’e langi kolu si lea naa sulia na tala bae ’i nao ’ana si baea fifii ki ne tha Mosis ’e kedaa. ⁷ ’Urineri kolu ka thaea si baea fifii ki ’e ta’ae? ’E langi! Si baea fifii ki ’e langi si ta’ae, sulia si baea fifii ki ne adea ma nau ku thaitamana tae nee na ta’alae. Lelea sa si baea fifii ki ’e langi si thaea ka ’urii, “Langi ’o si dooria ta si doo ’ana ta imole,” ’Urineri tama nau kwa si thaitamana bo ne na kwaidooria ’urineri ’e ta’ae. ⁸ Ma si manga si baea fifii ki ’e thaea fuaku na kwaidooria ’urineri ’e ta’ae, nau ku firu suusia si baea fifii ki ne ’e thaea ne nau ku ta’ae, ’urineri nau ku dooria ’asiana si doo kera na imole ’e’ete ki. Lelea sa ’e langi bo ta si baea fifii ne luia abulota’alae, ’urineri na kwaidooria ’uria firulae suusia si baea fifii ki ’e langi si suukwai bo. ⁹ ’Ana toolaku mai ’i nao, si manga ku lalafusia ’ua si baea fifii ki, ’e langi kwa si daotoona bo ta si doo ne ka faa’ida nau. Sui ta, si manga ku daotoona doo mamana ’ana si baea fifii ki ne ’e ’urii, “Langi ’oe ’o si dooria ta si doo ’ana ta ngwane,” nia ne adea ma nau ku fi thaitamana ne nau na ngwane abulo ta’ae, ma ku tala’ana naa maea ne ’e totoo firi. ¹⁰ Si baea fifii ki ne tha God ’e fala fasi ka faatana tale ’o’olo ’uria toolae sulia, nia ka faatana ne nau ku tala’ana naa maea ne ’e totoo firi. ¹¹ Na ta’alae ’e suke nau ’ana si baea fifii ki. Na kwaidooria ta’ae nau ki ’e ngala si baea fifii ’okae neri ki, ma ka keto nau naa ’uria maea. ¹² ’Urineri nee, si baea fifii nia ki tha Mosis ka abu, ka ’o’olo, ma ka ’okae ’asiana. ¹³ ’E ’urifita, si baea fifii ’okae neri ki ne adea ma nau ku mae? ’E langi! Na abulota’alae ’ana ne adea ma nau ku mae. Na liona tha God sulia si baea fifii nia ki ne na ta’alana ta’alae kolu ki kau thakatafa. Sulia na ta’alae kolu ki, kolu faatana si baea fifii ’okae nia tha God ’uria si doo ne tha God ’e tooketa kolu ’ania. ’Urineri sulia si baea fifii ki, ta’alana ta’alae kolu ki kau thakatafa. ¹⁴ Kolu thaitamana si baea fifii ki ’e lea mai faasia na Mangoedoo Abu nia tha God. Ma nau na ngwane bana. Ma nau ku ilingia bo na ngwane ne ta’alae ’e ’inito faafi nau. ¹⁵ ’E langi kwasi thaitamana tae ne nau ku ilia, sulia ’e langi kwasi ilia bo ta si doo ’okae ne ku dooria ililana, ma ku ilia ’aku doo ta’ae ki ne ku otenau ’ania. ¹⁶ Ma sulia ku ilia ’aku si doo ki ne ’e langi kwasi dooria ililana, nia ’e faatana nau ku alafaafia si baea fifii nia ki tha God ’e ’okae. ¹⁷ Sulia si doo nee, na ku thaitamana, ’e langi lau nau ne ku ilia doo ta’ae ki, sui ta, na ta’alae ne ’e too ’ana ’ani nau. ¹⁸ Nau ku thaitamana na ’okaelae ’e langi si too ’ani nau ’i laona kwaidooria ta’ae nau. Sulia ’e langi si ngwaluda fuaku ’uria ililana doo ’okae ki, sui boroi ’ana nau ku dooria ililana doo ’okae ki. ¹⁹ Ma ’e langi kwasi ilia bo na doo ’okae ki ne ku dooria ililana, ma ’e langi kwasi too bo faasia ililana doo ta’ae ki ne ’e langi kwasi dooria bo ililana. ²⁰ Ma lelea sa ku ilia naa si doo ne ’e langi kwasi dooria ililana, ’urineri ’e langi lau nau ne ku ilia, sui ta, na ta’alae ne too ’ani nau ne ’e ilia. ²¹ Nau ku olitana lau si doo ne ku daotoona ne ’urii: Si manga ku dooria ililana si doo ’okae, na ta’alae ’i noniku ka lui nau. ²² Na mooria nau ’e dooria ’asiana adelae sulia si baea fifii nia ki tha God. ²³ Sui ta, na ta’alae ’i noniku ’e firu suusia na ’okaelae ne ’i laona moorilaku. Ma na ta’alae neri ’e rao ’i laona noniku ka suumai nau ’uria ililana doo ta’ae ki. ²⁴ Kwaimanatai fuaku nau na ngwane ta’ae ’urii! Sa ni ti nee kau ’adomi nau fasi kwa si roosulia ta’alae ne ngali nau ’uria maea? ²⁵ Nau ku faabaitaa tha God, sulia nia naa ne ’adomi nau ’ana tha Jisas Kraes na Aofia kolu! ’O thaitamana sui naa ’ana: ’I laona manatalaku, nau ku dooria fasi ku roosulia si baea fifii nia tha God, sui ta, sulia na kwaidooria ta’ae nau, nia nee na ta’alae ka ’inito faafi nau.

¹ Tha God ’e thaea kolu ka ’o’olo naa ’i naofana sulia kolu manata mamana ’ana tha Jisas. ’Urineri laubo, na imole ki ne da too ofu naa fonea tha Jisas Kraes, tha God ’e langi si fai faafida ma ka fala na kwakwaelae fuada. ² Kolu thaitamana ’e mamana, sulia na suukwaia nia na Mangoedoo Abu ’e adea ma kolu ka too ’ana mooria faalu sulia kolu ’ado fonea tha Jisas Kraes. Ma ’urineri nia ka lafu kolu faasia na suukwailana na abulota’alae ne ’e ’inito faafi kolu ma ka talai kolu naa ’uria maea. ³ Si baea fifii ki faasia tha Mosis, ’e ’afitai ka lafu kolu faasia na suukwaia ’ana ta’alae ma na maea, sulia na kwaidooria ta’ae ne ’e adea kolu ka maketho ’uria lealae sulia si baea fifii neri ki. Sui ta, tha God ’ana ne lafu kolu faasia suukwailana ta’alae ma na maea. Sulia ’e fala naa Ngwela nia fasi ka too ’ana noni ilingia imole, sui ta, nia ’e langi si abulo ta’ae ilingia imole ki, ma tha God ka afuafu ’ani nia fasi ka lafua na ta’alae kolu ki. ’Urineri ne tha God ka tooketaa abulota’alae kolu ki. ⁴ Tha God ’e ade ’urineri fasi kolu ka tala’ana lealae sulia si doo ’o’olo ki ne si baea fifii ki ’e thaea fasi kolu ka ilia. Ma ka ngwaluda bana sulia kolu roosulia na Mangoedoo Abu, ma ’e langi kolu si roosulia na kwaidooria ta’ae ki ’ana noni. ⁵ Ma sa ni ti kera ne da lea sulia na kwaidooria ta’ae ’ana noni, da manata bada sulia si doo ki ’uria faafonolana na kwaidooria ta’ae ki ’ana noni. Sui ta, sa ni ti kera ne na Mangoedoo Abu ’e talaida, da manata bada ’uria ililana kwaidooria nia na Mangoedoo Abu. ⁶ Ma lelea sa na kwaidooria ta’ae ’ana noni ’e talaia ta ngwane, nia kau mae. Ma lelea sa na Mangoedoo Abu ka talaia ta ngwane, nia kau too ’ana mooria faalu ma na enoenoa. ⁷ Ma lelea sa na kwaidooria ta’ae ’ana noni ’e talaia ta ngwane, nia naa na maalimae nia tha God, sulia ’e langi nia si roosulia si baea fifii nia ki tha God, ma ’e langi nia si tala’ana roolae sulia. ⁸ Na imole ki ne da roosulia na kwaidooria ta’ae ’ana noni, ’e ’afitai ’asiana da ka faanonithathalaa tha God. ⁹ Sui ta, ni kamolu ’e langi molu si roo lau sulia na kwaidooria ta’ae ’ana noni. Lelea sa na Mangoedoo Abu ’e too ’i laona moorilamolu, ’urineri molu ka roosulia na kwaidooria nia. Ma sa ni ti ne na Mangoedoo nia tha God ’e langi si too ’i laona moorilana, nia ’e langi lau na ngwane nia tha Jisas Kraes. ¹⁰ Ma tha Jisas Kraes ka too ’i laona moorilamolu, sui boroi ’ana na nonimolu kau mae sulia na abulota’alae ki. Ma na mangomolu ’e moori, sulia tha God ’e ’olosi kamolu naa. ¹¹ Ma na Mangoedoo nia tha God ne taea tha Jisas Kraes faasia na maea, ’e too naa ’i laona moorilamolu. Ma tha God kau taea laubo nonimolu ’ana na Mangoedoo Abu ne too ’i laona moorilamolu. ¹² Nia nee doora ki ’ae, kolu ka too ’ana tee si doo ’uria ililana, ne kolu ka too sulia na kwaidoorilae nia na Mangoedoo Abu. ’E langi kolu si roo lau sulia na kwaidooria ta’ae ’ana nonikolu. ¹³ Lelea sa molu ka roosulia na kwaidooria ta’ae ’ana noni, molu kau mae. Ma lelea sa molu ka roosulia na Mangoedoo Abu fasi molu ka ekwatana na abulota’alae, molu kau too ’ana mooria ne totoo firi. ¹⁴ Ma sa ni ti kera ne na Mangoedoo nia tha God ’e talaida, kera naa na ngwela nia ki tha God. ¹⁵ Na Mangoedoo Abu ne tha God ’e fala fuamolu, ’e langi si adea molu ka mau ’ana tha God ilingia ta ngwane ni rao ne ’e mau ’ana ngwane baita nia. Sui ta, na Mangoedoo Abu ne adea molu ka thau naa ’ana ngwela nia ki tha God. Nia nee ’e faangwaludea naa fuakolu fasi kolu ka ’alangia tha God ’ana “Maka kolu.” ¹⁶ Na Mangoedoo nia tha God ’e ’alangi kolu ’ana ngwela nia ki tha God, ma kolu ka alafaafia si doo neri. ¹⁷ Ma sulia kolu na ngwela nia ki, ma kolu kau ngala naa doo ’okae ki ne ’e konia fuana ngwela nia ki, ka ilingia laubo ne ’e fala fuana tha Jisas Kraes. Kolu ngala doo neri ki, sulia kolu ’ado fonea tha Jisas Kraes ’ana ngadalae nia, fasi kolu ka ’ado laubo fonea ’i laona mooria ’ana ’initooa nia. ¹⁸ Sui boroi ’ana kolu ka too ’ana ngadalae ki ’i laona molaagali nee, nau ku manatatoona na ’initooa ne tha God kau fala fuakolu, ’e baita ka tatha talua na ’afitaia ne kolu tatha ’i laona ’ana si manga neri. ¹⁹ Na doo ki sui ne tha God ’e thaungana, da kwaimaakwali sui bo ’ania si manga ne tha God kau faatana fuana ngwela nia ki, ma da ka dooria si manga neri kau dao ’ali’ali naa. ²⁰ Tha God ’e manata suukwai naa ’uria kae si manga bo na doo ki sui ne ’e thaungana dau mae ma dau dura. Tha God ’e ade ’urineri, langi lau sulia na kwaidooria ’ana si doo neri ki, sulia na kwaidooria nia tha God ’ana ’i tala’ana. Ma na doo ki sui ’e kwaimaakwali ’ana ²¹ si manga ne tha God ’e lukeda faasia maea ma na duralae fasi da ka too thakwadoloa teefau naa fonea na ngwela nia ki. ²² Kolu thaitamana, ne ’e ’ito ’ua na mai lelea ka dao ’ana si manga neri, na doo ki sui bo da too ’ana ngadalae ilingia na ngadalae ’ana si manga na keni ’e fii ngwela. ²³ Ma kolu ne kolu too ’ana Mangoedoo Abu ne tha God ’e fala fuakolu fasi ka adea kolu ka manata ngado ne nia ’e fala doo ’okae ki fuakolu, kolu ka ngada laubo. Kolu dooria ’asiana, ma kolu ka kwaimaakwali ’ana si manga tha God kau adea ma kolu na ngwela inomoori nia ki, ma ka fala nonii ngwane faalu ki fuakolu. ²⁴ ’E thafali ’ana si manga ne tha God ’e faamoori kolu, kolu ka lilio maasia fulilana si doo neri ki. Sui ta, lelea sa kolu ka too naa ’ana si doo ne kolu lilio maasia, ’urineri na fiitooa neri ’e langi si mamana bo. Sulia ’e langi ta ngwane si manata ngado bo ’uria ta si doo ne ’e too naa ’ania. ²⁵ Sui ta, lelea sa kolu ka lilio maasia ta si doo ne langi kolu si too ’ua ’ania, kolu ka kwaimaakwali ’ana marabibilae. ²⁶ Ma ka ’urineri laubo na Mangoedoo Abu ’e lea laubo mai ’uria ’adomilakolu, ’ana si manga mooria kolu ’e maketho ma kolu ka lalafusia kolu kau foasi ’urifita ’ana tha God fasi ka ’adomi kolu. Sui ta, na Mangoedoo Abu ’ana ’i tala’ana ne gania tha God fuakolu ’i laona si lingee doo ne ’e langi ta si baea si tala’ana naa. ²⁷ Ma tha God ne ’e thaitamai ’okae ’ania mooria kolu teefau, nia ka thaitamana laubo na manatalana Mangoedoo Abu. Ma na manatana Mangoedoo Abu ’e ’urii, nia ’e gania tha God ’i fulinga kolu na imole nia ki, sulia na kwaidooria nia tha God. ²⁸ Ma kolu thaitamana si doo neri: Na imole ki ne kolu liothau ’ana tha God, tha God ’e faa’okae kolu ’ana si doo ta’ae ki ma si doo ’okae ki ne fuli fuakolu. Nia ’e ade ’urineri ’ani kolu, imole ki ne ’e fili kolu, sulia na kwaidooria nia fuakolu ne ’e ’urineri. ²⁹ Sulia ’e tau na mai, tha God ’e fili kolu, ma ka alua fasi kolu ka ilingia Ngwela nia tha Jisas, fasi tha Jisas ka naonao fuakolu na doorana ki. ³⁰ Aia, ma fuakolu na imole ki ne tha God ’e fili kolu ’ua na mai fasi kolu ka thau ’ana ngwela nia ki, nia ’e soe kolu ’i siana. Ma kolu nee nia ’e soe kolu ’urineri, nia ’e ’olosi kolu ’i maana. Ma kolu nee nia ’e ’olosi kolu, nia ’e fala laubo ’initooa fuakolu. ³¹ Ma ’ana si manga kolu manata sulia si doo neri ki, kolu thaitamana ne ’e langi ta imole si tala’ana naa tataelae suusi kolu, sulia tha God ’e ’adomi kolu. ³² Sulia na Ngwela nia tha Jisas boroi, ’e langi nia si ogoni lau ’ania, nia ’e fala banaa ’uria afuafulae ’ani nia ’usi kolu. Ma sulia ’e ilia si doo ’okae neri fuakolu, nia kau fala laubo doo ki sui fuakolu. ³³ ’E langi ta imole bana si tala’ana ka kefusi kolu ne tha God ’e fili kolu, sulia tha God ’i tala’ana ’e thaea ne kolu ’o’olo naa. ³⁴ Ma ka langi laubo ta imole bana ne ka tooketa kolu, sulia tha Jisas Kraes ’e mae naa ’usi kolu, ma nia ka tatae laubo, ma ’ana si manga neri, nia ’e too naa ’i bali aolo ’ana tha God, ma nia ka gania tha God fasi ka ’adomi kolu. ³⁵ Ma sulia ’e ’urineri, tama ’e langi bo ta si doo fasi ka ngali tau ’ani kolu faasia na liothaua ne tha Jisas Kraes ’e too ’ania fuakolu. Sui boroi ’ana kolu ka too ’ana ’afitaia baita, ma na imole ki da ka ilia doo ta’ae fuakolu, ma kolu ka fiolo, ma kolu ka siofaa, ma da ka thaumaeli kolu, ’e ’afitai da ka ngali kolu faasia na liothaua ne tha Jisas Kraes ’e too ’ania fuakolu. ³⁶ Sulia na Kekedalae Abu bae ’e thaea, “’Ana si manga ki sui, da thasi ’uria thaumaelilameli, sulia meli lea suli ’oe. Kameli meli ilingia naa sipsip ne da kwaimaakwali ’ania ’uria thaumaelilana.” ³⁷ Sui boroi ’ana kolu ka too ’i laona ’afitaia baita ’urineri, kolu thaitamana kolu kau siitatha, sulia tha Jisas Kraes ’e liothau ’ani kolu. ³⁸ Nau ku thaitamana ’e langi ta si doo si tala’ana lafulakolu faasia na liothaua baita nia fuakolu. Sui boroi ’ana si manga kolu moori ’ua, ma langi ’ana si manga kolu ka mae, kolu ngala naa liothaua nia. ’E langi ta enselo, ma langi ta mangoedoo ta’ae, ma langi ta suukwaia ka lafua na liothaua nia tha Jisas Kraes faasi kolu. Ma ka ’afitai laubo fuana ta si doo ’ana si manga neri, ma langi si manga ne nia ’ua kau ka lafu kolu faasia na liothaua nia fuakolu. ³⁹ ’E langi ta si doo laubo ’i laona molaagali, ma langi ’i thalo, ma langi ta si doo ’ana doo ki ne tha God ’e thaungana si tala’ana lafulana liothaua nia. ’E ’afitai ’asiana da ka lafu kolu faasia na liothaua nia God fuakolu, ne ’e faatana fuakolu ’ana tha Jisas Kraes na Aofia kolu.

¹ Ma tee si doo ne nau ku dooria kwau thaea fuamolu, ma si doo neri ’e mamana ’asiana. Nau kwasi suke kamolu, sulia nau na aposol nia tha Jisas Kraes. Ma ku thaitamana na baea nee nau kwau thaea fuamolu, ’e mamana, sulia na Mangoedoo Abu ne talaia manatalaku. ² Si doo nee nau ku thaea ’e ’urii, nau ku liodila ’asiana ’ana si manga ki sui, sulia na imole ki ’i Jiu ne langi da si manata mamana ’ana tha Jisas Kraes. ³ Kera nee na imole nau ki, sulia nau ta ngwane ’i Jiu laubo. Nau ku dooria lelea sa ’e ngwaluda bana, nau ku lea na ’aku faasia na ’adolae fonea tha Jisas Kraes, ma ku ngala na ’aku na kwakwaelae ’usi kera. ⁴ Sulia na Jiu ki, kera na imole nia ki tha God. Ma tha God ’e suluida ’ua na mai, fasi da ka ilingia na ngwela nia ki, ma nia ka faatana na ’initooa nia fuada. Tha God ’e bae alangai fuada, fasi ka faa’okae kera. Ma tha God ka fala naa si baea fifii ki fuada. Ma da ka thaitamana foalae mamana ’ana tha God. Ma tha God ka alangai fuada. ⁵ Ma na kwalafa kera naa na ngwane baita ki ne tha God ’e filida ’ua na mai. Ma tha Jisas Kraes laubo, ’ana si manga ne ’e futa mai fasi ka thau ’ana imole, nia naa ta ngwane ’i Jiu. Nia naa tha God ne ’e ’inito faafia doo ki sui. Ma nia ’e tala’ana da ka faabaitaa ka totoo firi! Iuka nia ’e ’urineri naa. ⁶ Sui boroi ’ana imole ki ’i Jiu da ka ote kera ’ana tha Kraes, tha God ’e langi si ’oia alangaia nia fuada. Sulia ’e langi lau na imole ki ’i Jiu teefau bo nee na imole ki ne tha God ’e filida. ⁷ Ma ’e langi lau imole ki sui bo ne da futa ’ana tha Abraham na ngwela nia ki tha God. Sui boroi ’ana tha Abraham ka too ’ana ta ngwela lau, tha God ’e bae ’urii fuana tha Abraham, “Tee ngwela ’oe tha Aesak bo ne kwau rikia ka ilingia na kwalafaa bae ku alangana fuamu.” ⁸ Ma si doo ne ’e faatana fuakolu ne ’e langi lau imole ki sui ne da futa ’ana tha Abraham na ngwela ki ne tha God ’e filida. Sui ta, na imole ki ne da futa mai sulia na bae alangaia nia ki tha God, kera naa na ngwela mamana nia ki tha Abraham. ⁹ Na alangaia bae tha God ’e thaea fuana tha Abraham ’e ’urii, “’Ana si manga ’olelana, nau kwau oli lau mai siamu, ma ni Sera na ’afe ’oe kau tharea tee ngwela ngwane.” Ma na ngwela neri nee tha Aesak. ¹⁰ Ma ’e langi lau si doo neri ki bana. Sulia tha Aesak ma ni Ribeka na roo kokoo abu kolu ki, daru too ’ana roo ’iu ngwane ki. ¹¹ - ¹² Ma ’i nao, sui fatai ni Ribeka ka fi tharea ’iu neri ki, tha God ’e bae ’urii fuana, “Na ngwela ulunao ’oe kau rao fuana ngwela ’i buri.” Nia ’e thaea si doo neri sui fatai na roo ’iu neri ki daru fi futa mai, ma sui fatai daru fi ilia ta si doo ne ’e ’okae ma langi ka ta’ae. Nia ’e ’urineri sulia tha God ’e faatana fuakolu ne ’e filia tee ngwela sulia liona ’i tala’ana, langi lau sulia na raoa ki ne daru ilia. ¹³ Ma tha God bae ’e thaea ’i laona Kekedalae Abu ka ’urii, “Nau ku filia tha Jakob, ma ku otenau ’ana tha Iso.” ¹⁴ Ma lelea sa ta ngwane ka thaea ne tha God ’e langi si ’o’olo sulia ’e filia tee ngwela ma ta ngwela ai ka langi, si baea neri ’e garo ’asiana. ¹⁵ Sulia tha God ’e thaea ’ua na mai fuana tha Mosis ka ’urii, “Nau ’ana nee ku filia ni ti ne nau kwau kwaimanatai fuana. Ma nau ku filida sulia na kwaidooria nau ’ana ’i tala’aku.” ¹⁶ Sulia si doo neri ki, kolu ka thaitamana ne tha God ’e filia imole ki, sui ta, ’e langi lau sulia si doo ne da dooria ma langi da ka ilia, tha God ’ana ne filia imole ki sulia na kwaimanataia nia. ¹⁷ Ma tha God ’e bae fuana ngwane ’inito ’i Ijip laona Kekedalae Abu ka ’urii, “Nau ku alua ’oe, ’oko ’inito fasi ku faatana suukwaia nau ’ana si doo ne nau kwau ilia fuamu, ma fasi na imole ki ’ana maetoaa ki sui da ka thaitamana suukwaia nau.” ¹⁸ Nia nee, tha God ka kwaimanatai fuana ni ti bana ne nia ’e manatainia, ma ka faasadia manatanalana ni ti ne nia ’e dooria ka faasadia. ¹⁹ Alamia ta imole kau bae ’urii, “Lelea sa ’e ’afitai fuada ’uria takwelae suusia na kwaidooria nia tha God, ’urifita mone nee tha God ka rakethasu fuana imole ki ’uria na lioda ’e sadi?” ²⁰ Ma nau ku olisia kwa ’urii: Kolu na imole ki ne tha God ’e thaungai kolu, ’e langi kolu si tala’ana bo olisilana tha God ’urineri! Ma kolu ilingia na tiu ne ta ngwane ’e thaungana ’ana kade ’ai. Na tiu neri ’e langi si tala’ana soetalafanalana ’urii ’ana ngwane ne ’e thaungana, “’Urifita nee ’oko thaungai nau kwa ’urii?” ²¹ Ma na ngwane ne thaungana tiu ki ’ana kade ’ai, ’e too ’ana suukwaia ’uria ililana ta si doo bana sulia kwaidooria nia. Nia ’e thaitamana ka laungia fasi ka lio ’okae, ma laa ka langi, fasi ta tiu ’uria dani ’inito ki, ma ta tiu ’uria tofa si manga ki bana. ²² Ma ’e ’urineri laubo ’uria si doo ki ne tha God ’e thaungana. Sulia si manga ’e dooria ka faatana rakethasua nia ma na suukwaia nia fuana imole abulo ta’ae ki, nia ’e marabibi ’asiana ma ’e langi si ’ali’ali ’uria faatailana rakethasua nia fuana imole ki ne nia kau ketoda. ²³ Ma nia ’e marabibi ’urineri fasi ka faatana doo ’inito ’okae nia ne ’e ilia ’ani kolu na imole ki ne ’e kwaimanatai ka tatha fuakolu. Sulia tha God ’e kwaimaakwali ’ani kolu ’uria ’adolae fone nia ’i laona ’initooa nia. ²⁴ Sulia kolu naa na imole fifilia nia ki, ’e langi lau faasia na Jiu ki bana, faasia na imola ki ne langi lau Jiu laubo. ²⁵ Sulia na imola ki ne langi lau Jiu, tha God bae ’e bae ’urii laona Kekedalae Abu ne tha Hosea ’e kedaa, “Na imole ki ne langi lau imole nau ki, nau kwau ’alangi kera ’ana imole nau ki. Ma na imole ki ne langi kwa si liothau ’ani kera, nau kwau ’alangi kera ’ana imole ’okae nau ki.” ²⁶ Ma tha God ’e thaea fuana tha Hosea ka kedaa lau ka ’urii, “Kamolu molu rongoa ’i nao ne nau ku thaea, ‘Kamolu ’e langi lau na imole nau ki.’ Sui ta, si manga neri da ’alangi kamolu naa ’ana ngwela nia ki tha God momoori.” ²⁷ Ma tha Aesaea bae ’e bae sulia na imole ki ’i Jiu ka ’urii, “Sui boroi ’ana imole ki ’i Israel da ka ’oro ilingia one sulia asi, kae bare ngwane bo ’ani kera ne tha God ’e faamoorida. ²⁸ Sulia tha God kau tooketa ’ali’ali bana ’ana imole ki sui ’i laona molaagali.” ²⁹ ’E ilingia laubo bae tha Aesaea ’e thaea laubo mai ’i nao ka ’urii, “Lelea sa tha God ne ’e suukwai ka tatha ’e langi si faamooria bo tai imole ’ana kwalafa kolu ’ana si manga ’e tooketa kolu, ’e langi ta imole ’i Jiu si moori bo, ilingia na imole ki sui ’i Sodom ma ’i Gomora ne da mae naa.” ³⁰ Aia, sulia si doo neri ki, kolu thaitamana na imola ki ne langi lau Jiu, da daotoona tale ne tha God ’e ’olosia, sui boroi ’ana ’e langi da si thasi ’uria daotoolana. Ma tha God ’e ’olosida sulia na manata mamanalae kera. ³¹ Sui ta, fuana imole ki ’i Jiu, sui boroi ’ana da ka thasi ’uria ’olosilada ’i talada ’ana roolae sulia si baea fifii ki, ’e langi da si daotoona bo. ³² Ma ’e langi da si tala’ana bo ililana, sulia da fiitoona raoa ’okae kera ki, ma ’e langi da si fiitoona bo manata mamanalae kera. Da ’asida ’urineri, sulia da lakwadora ’ana fau baita. ³³ Tha God ’e bae sulia tha Kraes naa na fau baita neri ’i laona Kekedalae Abu ka ’urii, “Lio fasi, nau kwau alua tee gwe fau ’i laona maetoaa ’i Saeon. Ma na imole ki dau lakwadora ’ania, ma kera dau ’asi kera ’ania. Sui ta, na imole ki ne da manata mamana ’ani nia, ’e ’afitai da ka ’ida.”

¹ Doora nau ki ’ae, nau ku foa ma ku dooria ’asiana tha God ka faamooria na imole nau ki ’i Jiu. ² Nau ku thaitamana ma ku thaea fasi da ka suukwai ’uria lealae sulia tha God. Sui ta, ’e langi da si thaitamana ’okae ’ana tale mamana ’uria lealae sulia tha God. ³ Kera da lalafusia na tale ne tha God ’e thaungana ’uria ’olosilana na imole ki ’i maana. Ma da ka thasi ’ada ’uria ’olosilada ’i talada ’ana tala ne da tala thaungana ’ada. ’Urineri da ka otekera ’ana tale ne tha God ’e thaungana ’uria ’olosilana imole ki. ⁴ Ma na tale ’uria ’olosilana imole ki sulia si baea fifii nia ki tha Mosis, tha Jisas Kraes ’e faasuia naa, fasi ni ti kera ne da manata mamana ’ani nia, da ka ’o’olo naa ’i maana tha God. ⁵ Na tale ’uria ’olosilana imole ki sulia si baea fifii ki, tha Mosis ’e kekeda sulia ka ’urii, “Lelea sa ’o dooria ’oko daotoona mooria ’ana roolae sulia si baea fifii ki, ’oko roo naa sulia si baea fifii teefau nia ki tha God.” ⁶ Sui ta, na tale ne tha God ’e thaungana ’uria ’olosilana imole ki ’i maana, sulia da manata mamana ’ana tha Jisas, ’e langi si ’afitai bo ’uria lealae sulia. Sulia tha God ’e bae ’urii, “’E langi ’oe ’o si bae ’urii fuamu ’i tala’amu, ‘Ta imole ka tae naa ’i thalo fasi ka faasifoa mai tha Jisas Kraes ’i thaegano.’ Langi ’o si bae ’urineri sulia tha Jisas ’e sifo sui na mai faasia ’i thalo. ⁷ Ma langi ’oe ’o si bae ’urii, ‘Ta ngwane ka sifo naa ’i laona fera ni maea fasi ka taea mai tha Jisas Kraes.’ Langi ’o si bae ’urineri sulia tha Jisas ’e tatae sui naa faasia fera ni maea.” ⁸ Na tale ne tha God ’e thaungana ’uria ’olosilana imole ki sulia da manata mamana ’ana tha Jisas, nia ne na faarongolae ne meli faatalo ’ania, ma ’e ngwaluda fasi molu ka daotoona. Nia nee na Kekedalae Abu ka bae laubo ’urii, “Na faarongolae nia tha God ’e dao karangi naa, ’e too naa ’i laona baelamu ma ’i laona moorilamu.” ⁹ Lelea sa molu ’alangia tha Jisas ’ana na Aofia, ma molu ka manata mamana ne tha God ’e taea naa faasia maea, tha God kau faamoori kamolu. ¹⁰ Na imole ne ’e manata mamana ’ana tha Jisas ’i laona moorilana ’e ’o’olo naa ’i maana tha God. Ma na ngwane ne ’e bae tafa ’ana tha Jisas na Aofia, tha God kau faamoori nia. ¹¹ Ilingia bae na Kekedalae Abu ’e thaea ka ’urii, “Na imole ki ne da manata mamana ’ani nia, ’e langi da si liodila suli nia.” ¹² Tha God ’e langi si kwai’ilisi ’ana imole ki ’i Jiu ma langi na imola ki ne langi lau Jiu laubo, sulia imole ki sui ne da manata mamana ’ani nia, da too bo ’ana tee Aofia. Ma nia ka faa’okaea na imole ki sui ne da gani nia ’uria ta kwai’adomia. ¹³ Na Kekedalae Abu ’e thaea lau ka ’urii, “Tha God kau faamooria imole ki sui ne da ’ai thatana ’uria kwai’adomia.” ¹⁴ Alamia tai imole ki ’i Jiu da bae ’urii, “’Urii ma imole ki ’i Jiu dau gani ’urifita ’ana Aofia ’uria kwai’adomia, lelea sa ’e langi da si manata mamana ’ani nia? Ma da ka manata mamana ’urifita, lelea sa ’e langi da si rongoa ’ua na faarongolae? Ma da ka rongoa ’urifita ’ana faarongolae, lelea sa ’e langi ta imole si faatalo ’ani nia? ¹⁵ Ma na imole ki da ka faatalo ’urifita ’ana faarongolae, lelea sa tha God ’e langi si fala tai ngwane ’uria faatalolae?” Tha God ’e odua ngwane rao nia ki ilingia bae na Kekedalae Abu ’e thaea ka ’urii, “Si manga tai imole ki da dao mai fonea na Faarongolae ’Okae, nia ’e ’okae ’asiana!” ¹⁶ Sui ta, ’e langi lau na imole ki sui ’i Jiu ne da manata mamana ’ana Faarongolae ’Okae. Sulia tha Aesaea bae ’e bae ’urii fuana tha God, “Aofia, ’e langi lau na imole ki sui ne da manata mamana ’ana faarongolae kameli.” ¹⁷ Ma na imole ki da tala’ana da ka manata mamana si manga da rongoa na Faarongolae ’Okae. Ma da ka rongoa na Faarongolae ’Okae si manga na imole ki da faatalo ’ania tha Jisas Kraes. ¹⁸ Ma nau ku soetalafana ’urii ’ana si doo neri: ’E mamana ne na imole ki ’i Jiu ’e langi da si rongoa na Faarongolae ’Okae? ’E langi! Da rongoa naa, sulia na Kekedalae Abu bae ’e bae ’urii, “Na lingena ngwane ni rao nia ki tha God ’e talofia ’i laona molaagali lalau. Ma na faatalolae ’ana baelana ’e lea ka dao naa ’i laona molaagali lalau.” ¹⁹ Ma nau ku soetalafana lau kwa ’urii: Na imole ki ’i Jiu, ’e langi da si thaitamana bo na faarongolae neri? ’E langi. Da thaitamana naa, sulia tha Mosis bae ’e kedaa naa baelana tha God ka ’urii, “Nau kwau adea fasi kamolu imole ki ’i Jiu molu ka ’uga sulia na imola ki ne langi lau Jiu. Nau kwau faamoorida, sui boroi ’ana molu ka thaea da si baita bo. Ma nau kwau adea molu kau rakethasu, sulia nau ku liothau ’ana imole ki ne langi lau Jiu ne molu thasa ’amolu da si thaitamaku bo.” ²⁰ Ma tha Aesaea ’e bae nonirara’a ’i nao sulia imole ki ne langi lau Jiu ka ’urii, “Na imole ki ne langi da si rofe nau, da daotooku naa. Ma na imole ki ne langi da si rofe bo ’uri nau, nau kwau faatai fuada fasi da ka thaitamaku.” ²¹ Ma fuana imole ki ’i Jiu, tha Aesaea ’e bae ’urii suli kera, “’E tau na mai, nau ku soeda fasi da ka lea mai ’i siaku, sui ta, na manatalada ’e sadi ma da ka aburongo.”

¹ ’Urii tha God ’e otenia ’ana imole nia ki ’i Jiu ma laa ’e langi? ’E langi! Nau boroi ’i tala’aku nau na ngwane ’i Jiu laubo, sulia nau ta ngwane ’ana kwalafa tha Abraham ’ana kulee ngwane tha Benjamin. ² Tha God ’e langi si otenia bo ’ana imole nia ki ne ’e filida ’ua na mai ’ana thathafalia. Kamolu molu thaitamana si tae bae na Kekedalae Abu ’e thaea sulia tha Elaeja, si manga ’e ’ugalia tha God sulia na imole ki ’i Jiu ka ’urii, ³ “God ’ae, da thaumaelia naa profet ’oe ki, ma da ka tagalangana naa fuli ere ni kwaisuusia ’oe ki. Ma talifili nau naa ne ku too ’ua, ma da ka thasi laubo ’uria thaumaelilaku.” ⁴ Ma tha God ’e olisia ka ’urii, “’E langi lau tee ’oe bo ne ’o too. Nau ku too ’ana fiu tooni imole ki ’i Jiu ne ’e langi da si foasia ’atona bana god ne tha Baal.” ⁵ Ma ’e ’urineri laubo ’ana si manga neri, sulia kae ange imole ki ’i Jiu bo ne da manata mamana. Ma tha God ’e filida sulia na ’okaelae nia. ⁶ Ma nia ’e filida sulia na ’okaelae nia, langi lau sulia si doo ki ne da ilia. Sulia lelea sa tha God ka filia naa imole ki sulia si doo ki ne da ilia, ’urineri ma na fifililae nia tha God ’e langi lau sulia na ’okaelae nia. ⁷ Ma sulia ’e ’urineri, na imole ’oro ki ’i Jiu ’e langi da si daotoona bo na ’o’ololae ne da rofe ’uria. Talifilia ange imole ’ada bo ne tha God ’e filida ne da daotoona. Ma tai imole ’ada, da otekera ni rongolana tha God. ⁸ Ilingia bae na Kekedalae Abu ’e thaea ka ’urii, “Tha God ’e adea na manatalada ka rorodoa, ma ka langi da si thaitamana si doo ki ne da rikia ma si doo ki ne da rongoa, lelea ka dao bo ’i tari’ina.” ⁹ Ma tha Deved ka bae ’urii laona Kekedalae Abu, “Alamatana da ka nonithathala ma da ka ele ’ada ’ana fafangaa kera ki. Alua da ka fiitoona na ’okaelae ’oe, ma da ka kwele si manga ’o kwaeda, ilingia ngwane ki ne da ’asi kera ’i laona ’aukwai. ¹⁰ Nau ku foa fasi na maada ka rodo fasi ka langi da si lilio. Ma nau ku foa fasi da ka tatha ’ana ’afitaia ’oro sulia dani ka totoo firi.” ¹¹ Iuka, na Jiu ki da lakwadora sulia ’e langi da si manata mamana ’ana tha Jisas Kraes. Sui ta ’e langi molu si fiia bo thasa ’e langi da si oli mai ’uria manata mamanalae. Na imola ki ne langi lau Jiu da too laubo ’ana mooria faalu faasia tha God, sulia na abulota’alae kera Jiu ki. Si doo neri ’e ’urineri fasi na imole ki ’i Jiu da ka liota’ae ’uria ngalilana mooria faalu neri. ¹² Sulia na abulota’alae kera na Jiu ki, tha God ’e fala doo ’okae ’oro fuakolu na imole ki sui ’i laona molaagali. Ma sulia da otekera ’ana tha Jisas Kraes, ne tha God ka faa’okaea ’ana na imola ki ne langi lau Jiu. Ma ’ana si manga neri na Jiu ’oro ki da ka manata mamana ’ana, tha God kau faa’okae kolu ka tatha. ¹³ Aia, nau kwau bae fuamolu na imole ki ne langi lau Jiu. Nau na aposol fuana imole ki ne langi lau Jiu, ma nau ku nonithathala ’asiana sulia na raoa nau ’ana faatalolae ’ania na Faarongolae ’Okae fuamolu. ¹⁴ Na imole ki ’i Jiu ne da ilingi nau, lelea sa ni nau ku bae suli kamolu, ’urineri na lioda ka ta’ae fuamolu sulia si na mooria faalu ne molu too ’ania. ’Urineri, nau kwau ’adomi kera fasi da ka too laubo ’ana mooria faalu. ¹⁵ Si manga tha God ’e otenia ’ani kera, nia ka bulasia naa imola ki ne langi lau Jiu faasia na maalimae nia ki ’uria na imole kwaimani nia ki. Ma ’ana si manga tha God ’e konitana lau na Jiu ki, ’e ilingia ne nia ’e taea imole ki faasia maea, ma nia ka faa’okaea ka tatha na imole nia ki sui. ¹⁶ Ma lelea sa na mamagana berete ’ana siina fe berete totongenao ne da fala fuana tha God ’e abu, tama fe berete neri teefau banaa na doo nia tha God. Ma lelea sa na lalina na ’ai ka abu, ’urineri tama na thare doo ki boroi ’e abu laubo. ¹⁷ Ma na Jiu ki, da ilingia ta ’ai ne tha God ’e fasia. Ma tai thare doo ’ana ’ai neri, tha God ka ’oia. Ma fuamolu imola ki ne langi lau Jiu, molu ilingia na thare ’ai kwasi ne tha God ’e ngala ma ka katangai kamolu ’ana si kula ne ’e ’oia na thare doo ki faasia. Ma ka ’urineri laubo ’ana si manga neri, sulia tha God ’e faa’okae kamolu ka ilingia laubo ne ’e faa’okaea ’ua na mai na imole ki ’i Jiu. ¹⁸ Ma ’e langi molu si fiia thasa molu baita ka tatha talua na imole ki ’i Jiu ne da ilingia na thare ’ai ki ne tha God ’e ’oia, sulia kamolu na thare doo ki bana, ma na moorilana thare ’ai ki ’e lea bo mai faasia na lalina ’ai. Ma na moorilana lalina ’ai ’e langi si lea mai faasia na thare doo ki. ¹⁹ Alamia ’e ngwaluda bana fuana ta imole ne langi lau Jiu ka bae ’urii, “Tha God ka lafua na Jiu ki fasi meli ka talada.” ²⁰ ’E mamana, kamolu molu talada. Tha God ’e lafua imole ki ’i Jiu sulia ’e langi da si manata mamana. Ma sulia si doo neri, nia ’e alua kamolu molu ka talada sulia molu manata mamana. Ma ’e langi si ’okae fasi molu ka naunau sulia si doo neri, sui ta, molu ka maungia tha God. ²¹ Sulia lelea sa tha God ka fala kwakwaelae fuana imole ki ’i Jiu ne da ilingia naa thare doo mamana ki, nia kau fala laubo na kwakwaelae fuamolu ne molu ilingia na thare doo faasia na ’ai ’e’ete ki, lelea sa molu ka otekamolu ’ani nia. ²² Sulia si doo neri, ne kolu ka thaitamana na ’okaelae nia tha God fonea na keketoa nia. Nia ’e fala naa kwakwaelae fuana ni ti kera ne langi da si manata mamana ’ani nia. Ma nia ’e ade ’okae fuamolu, lelea sa molu ka ililado ’ana manata mamanalae. Ma lelea sa ’e langi molu si manata mamana, nia kau singgi muusi kamolu laubo. ²³ Ma lelea sa na imole ki ’i Jiu da ka ekwatana naa na abu manata mamanalae kera ki, tha God kau olitaida ’uria si kula ne da totoo mai ’ana ’i nao. Sulia tha God ’e tala’ana ililana si doo neri. ²⁴ Ma kamolu na imola ki ne langi lau Jiu, kamolu ’e langi lau na thare doo mamana faasia na ’ai ne tha God ’e fasia. Sulia molu lea mai faasia na ’ai kwasi, ma tha God ka ’oi kamolu, ma ka katangai kamolu bana ’ana ’ai ne nia ’e fasia. Ma lelea sa ka ngwaluda fuana tha God nia kau katangai kamolu bana ’ana ’ai ne nia ’e fasia, ma nia ’e ngwaluda ’asiana fuana tha God ka olitana na Jiu ki ’uria na ’ai ne ’e ’oida mai faasia. ²⁵ Iuka doora ki ’ae, nau ku dooria fasi molu ka thaitamana si doo ne tha God ’e langi si faatana ’i nao. Nau ku ’inifitaa fuamolu fasi ka langi molu si aburongo. ’Orolana imole ki ’i Jiu, da otekera ni rongolana Faarongolae ’Okae. Sui ta, na abu manata mamanalae kera ’e too lelea ka dao ’ana si manga na imola ki ne langi lau Jiu ne tha God ’e filida, kera teefau dau manata mamana ’ani nia. ²⁶ ’Urineri fatai, tha God ka fi faamoori teefau ’ana imole ki ’i Jiu. Ka ilingia naa Kekedalae Abu bae ’e thaea ka ’urii, “Na Ngwane Faamoori kau lea mai faasia ’i Saeon, ma ka lafua naa abulota’alae ki faasia na kwalafaa ne ’i Israel. ²⁷ Ma nau kwau faamamanea na alangaia nau foneda, sulia nau ku lafua naa abulota’alae kera ki.” ²⁸ Ma na imole ki ’i Jiu ne da otekera ’ana Faarongolae ’Okae, ’urineri kera naa na maalimae nia ki tha God. Ma sulia si doo neri ne kamolu na imola ki ne langi lau Jiu molu ka rongoa na Faarongolae ’Okae neri. Sui ka ’urineri boroi ’ana, tha God ’e liothau ’ani kera, sulia ’e filida naa, sulia na alangaia nia ’ua na mai fuana kokoo abu kera ki. ²⁹ Sulia tha God ’e langi si bulasia na manatalana sulia ni ti kera ne ’e filida ma ka faa’okae kera. ³⁰ ’Ana si manga bae ’e sui na mai, kamolu imole ki ne langi lau Jiu, ’e langi molu si roo bo sulia tha God. Sui ta, si manga neri, molu ngala naa kwaimanataia nia tha God, sulia na imole ki ’i Jiu ’e langi da si roosulia bo tha God. ³¹ Ma ka ’urineri laubo, na imole ki ’i Jiu da aburongo ’ana tha God, nia nee tha God ka faatana laubo kwaimanataia nia fuada. Nia ’e ade ’urineri, sulia ’e faatana kwaimanataia nia fuamolu. ³² Na imole ki sui da oli’aingenge ’ana tha God, si doo ne ’e adea nia ka rikida ka ilingia imole ki ne da too ’i laona dele ne da too maasia keketoa. Nia ’e ade ’urineri fasi nia ka faatana kwaimanataia nia fuada teefau. ³³ Tha God ’e ’okae ka tatha! Na ’okaelae nia ’e baita ka tatha! Na liotooa ma na thaitamedooa nia ’e baita ka tatha! ’E langi ta imole si thaitamana fifililae nia tha God ma na bibirangaa nia ki. ³⁴ ’E ilingia bae na Kekedalae Abu ’e thaea ka ’urii, “’E langi ta imole si thaitamana manatalana tha God, ma ’e langi ta imole si tala’ana ka ’adomia tha God ’ana manatalae ngwane nia. ³⁵ Ma ’e langi ta imole si tala’ana falelana ta si doo fuana tha God fasi tha God ka duua laubo fuana.” ³⁶ Sulia tha God ne thaungana doo ki sui, ma na doo ki sui da totoo mai sulia suukwaia nia ma fuana. Kolu ka faabaitaa tha God ne totoo firi! Iuka ka ’urineri naa.

¹ Aia, doora nau ki ’ae, sulia na kwaimanataia nia tha God fuakolu ’e baita ka tatha, nau ku gani kamolu, fasi molu ka fala naa moorilamolu teefau fuana tha God ilingia ta afuafulae. Na afuafulae neri ’e moori, ma ka abu, ma tha God ka nonithathala sulia. Sulia nia naa nee na bibirangaa mamana ’uria foasilana tha God. ² Ma ’e langi molu si ade sulia bibirangaa ta’ae ’i laona molaagali nee. Sui ta, molu ka alamatana tha God ka bulasia moorilamolu ’ana faafaalulana na manatalamolu, fasi molu ka thaitamana si doo ne tha God ’e dooria molu kau ilia. Molu ka thaitamana si doo ne ’e ’okae, ma si doo ne ’e faanonithathalaa tha God, ma si doo ne ’e ’o’olo. ³ Tha God ’e faa’okae nau fasi kwa thau ’ana aposol nia, fasi ku thaea fuamolu teefau: ’E langi molu si faabaita kamolu ’i tala’amolu. Molu ka manata ’o’olo ’amolu sulia na toolamlu ne ’e lea sulia na manata mamanalae nee tha God ’e fala fuamolu. ⁴ Kolu thaitamana ne na nonii ngwane ’e too ’ana si kula ’e’ete ’oro ki. Ma na tee tee si doo ’ana doo neri ki ’e too ’ana si raoa ’e’ete kwailiu ki laubo. ⁵ Ma ’e ’urineri laubo ’ana nonina tha Jisas Kraes. Kolu si bali ’e’ete ki ’ana nonina. Ma kolu ka too ’ana si raoa ’e’ete ki. ’Urineri nee kolu ka rao naa ’uria ’adomilakolu kwailiu. ⁶ Ma kolu ka too ’ana suukwaia ’e’ete ki ne tha God ’e fala fuakolu sulia na liothaua nia. Ma tai ngwane ’akolu, lelea sa tha God ka fala suukwaia ’uria faatalolae ’ania Faarongolae nia, tama nia kau bae naa sulia na manata mamanalae nee tha God ’e fala fuana. ⁷ Ma ta ngwane lau, lelea sa tha God ka fala suukwaia ’uria kwai’adomia, alua nia ka ’adomia naa ’ana imole ki. Ma ta ngwane lau, lelea sa tha God ka fala suukwaia ’uria faamanatailana imole ki, alua nia ka toodoo na ’ana. ⁸ Ma ta ngwane lau, lelea sa tha God ka fala suukwaia ’uria faasuukwailana manatalana imole ki, nia ka ilia na ’ana. Ma ta ngwane lau, lelea sa tha God ka fala suukwaia ’uria fala doolae fuana imole ki, ’oko ilia ’ana ade ’okaelae. Ma ta ngwane lau, lelea sa tha God ka fala suukwaia ’uria naonaolae, ’oko rao suukwai ’i naofana imole ki. Ma ta ngwane lau, lelea sa tha God ka fala suukwaia ’uria faa’okaelana manatalana imole ki, nia ka ilia ’ana noni thathalalae. ⁹ Ma na liothaua ne kolu too ’ania fuana imole ki, ’e tala’ana kolu ka liothau mamana, ma ka langi kolu si suke. Ma molu ka otekamolu ’ana si doo ne ta’ae, ma molu ka dau suukwai ’ana si doo ne ’okae. ¹⁰ Molu ka kwaimani fone kamolu kwailiu, sulia kamolu ne bare doora ki ’ana tha Jisas Kraes. Ma molu ka faare baita ’ani kamolu kwailiu. ¹¹ Molu ka rao suukwai, ma ka langi molu si noni ’e’ela. Molu ka rao suukwai fuana Aofia. ¹² Molu ka nonithathala sulia na fiitooa kamolu. Ma molu ka marabibi si manga molu daotoona ’afitaia ki. Ma molu ka foa ’ana si manga ki sui. ¹³ Ma molu ka tolingia si doo kamolu ki ’i malutamolu fonea dooramolu ki ’ana tha Jisas Kraes ne da siofaa. Ma molu ka konitana imole dao ki, fasi da ka too ’i laona luma kamolu ki. ¹⁴ Ma na imole ki ne da faangada kamolu, molu ka foa fasi tha God ka faa’okae kera. Molu ka foa fasi tha God ka faa’okae kera, ma ka langi molu si agida. ¹⁵ Molu ka nonithathala fonea imole ki si manga da nonithathala, ma molu ka liodila fonea imole ki si manga da liodila. ¹⁶ Molu ka too kwaimani fonea imole ki sui. ’E langi molu si naunau, sui molu ka ilia bamolu si raoa ne imole ki da si manata baita ’ania. Ma ka langi molu si thaea thasa molu liotoo ’asiana. ¹⁷ Lelea sa ta imole ’e ilia ta si doo ta’ae fuamolu, ’e langi molu si duua ’ana ta si doo ta’ae. Molu ka thasi ’uria ililana si doo ne imole ki sui da manata sulia ’e ’okae. ¹⁸ Molu ka ilia si doo ki sui ne ’e ngwaluda fuamolu fasi molu ka too kwaimani fonea imole ki sui. ¹⁹ Imole kwaimani nau ki ’ae, lelea sa ta imole ka ilia ta si doo ta’ae fuamolu, ’e langi molu si duua ’ana ta si doo ta’ae. Alamatana tha God ’ana ne ka kwaeda ’ana rakethasua nia. Sulia na Kekedalae Abu bae ’e thaea ka ’urii, “Tha God ’e bae ’urii, ‘Nau ne kwau duumae, ma kwau duua ’oke doo nia ki.’ ” ²⁰ Ma molu ka roosulia na Kekedalae Abu bae ’e thaea, “Lelea sa na maalimae ’oe ’e fiolo, ’oko tharea. Ma lelea sa ’e maelikuu, ’oko fala si kafo fuana fasi nia ka kuu. Sulia lelea sa ’o ade ’urineri fuana, nia kau ’ida ’asiana sulia si doo ta’ae ki nee nia ’e ilia fuamu.” ²¹ Ma ka langi molu si alamatana ta’alae ka siitatha ’ani kamolu. Molu ka siitatha ’amolu ’ana ta’alae ’ana ade ’okaelae kamolu ki.

¹ Kamolu sui bo, molu ka roosulia na ngwane baita ki ne da ’inito ’ana maetoaa kamolu ki, sulia na ’initooa kera ’e ’ito mai faasia tha God, ma tha God ka alamatai kera ’uria talailamolu. ² Ma ni ti ne ka thasi ’uria takwelae suusia na ngwane ’inito nee ki, ’e takwe suusia laubo si doo ki ne tha God ’e alua. Ma ta ngwane ne ’e ade ’urineri, nia kau ngala kwakwaelae. ³ Na ngwane ne ilia doo ’okae ki, ’e langi da si mau ’ana ngwane ’inito ki. Na ngwane ki ne da ilia doo garo ki, kera ’ana ne da mau ’ana ngwane ’inito ki. Ma lelea sa molu dooria fasi ka langi molu si mau ’ana ngwane ’inito ki, ’urineri molu ka too ’o’olo, ma kera dau faabaita kamolu. ⁴ Sulia kera na ngwane rao nia ki tha God ’uria ’adomilamolu. Ma lelea sa molu ka ilia doo garo ki, molu ka mau ’ani kera, sulia da too ’ana suukwaia ’uria falelana kwakwaea. Sulia kera na ngwane ni rao nia ki God ’uria falelana kwakwaelae fuana ni ti ne ’e ilia doo ta’ae. ⁵ Sulia ’e ’urineri, molu ka roosulia ngwane ’inito ki ’ana fera, sulia ’e ’o’olo ’uria ililana, ma lelea sa molu ilia doo ta’ae, kera dau kwae kamolu. ⁶ Sulia si doo neri ki laubo, molu ka folia takisi, sulia na ngwane ’inito ki da rao fuana tha God, ma da ka rao suukwai ’uria ’adomilana imole ki. ⁷ Molu ka folia takisi ma si doo ki sui ne si baea fifii ki ’ana fera kamolu ’e thaea. Ma molu ka faare baita ’ana ngwane ’inito ki sui. ⁸ Lelea sa molu ka ngalilanga ’ana ta si doo ’ana ta imole, molu ka duu ’ali’ali ’ana. Ma ta si doo ne tala’ana molu ka ilia naa, nia nee molu ka too ni liothaulae ’ani kamolu kwailiu. Ma ni ti boroi ’ana ne ’e liothau ’urineri, nia ’e roo naa sulia si baea fifii nia ki tha God. ⁹ Sulia si baea fifii ki bae ’e ’urii, “’E langi ’o si kaubare, ’e langi ’o si thaumaelia ta ngwane, ’e langi ’o si beli, ’e langi ’o si dooria ta si doo nia ta imole.” Si baea fifii neri ki fonea tai si baea fifii ki lau, da ofu bo ’ana tee si baea fifii bae ’e ’urii, “’Oko liothau ’ana imole ki sui ka ilingia laubo ne ’o liothau ’ani ’oe ’i tala’amu.” ¹⁰ Sulia lelea sa molu ka liothau ’ana ta imole, ’e langi molu si tala’ana ililana ta si doo ta’ae fuana. Nia nee, lelea sa molu ka liothau, molu ka roosulia si baea fifii ki teefau. ¹¹ Molu ka ade ’urineri, sulia molu thaitamana naa si manga ne tha Jisas Kraes kau dao mai ’uria faamoorilakolu ’e karangi ’asiana ka talua si manga bae kolu thafali manata mamana ’ania. Nia nee, molu ka kwaimaakwali ’uria konitailana tha Jisas Kraes, ma ka langi molu si ilingia na ngwane ki ne da maleu bada. ¹² Iuka, ’e rodo ka tau naa, ma fe dani ’uria faamoorilamolu ’e karangi na mai. Nia nee, kolu ka too faasia abulota’alae ki ilingia na imole ki ne da ilia si doo ki ’i laona rodo. Ma na raoa ’okae kolu ki ’e ilingia na raunga kolu ki ’uria firulae suusia ta’alae. ¹³ ’E tala’ana na abulolakolu ka ’o’olo, ilingia na imole ki ne da too ’i laona folaalae ’ana fe dani. ’E langi molu si kuufia ta si doo ne ka burasia ngwane, ma na thatholae ’ana ngwaelae ta’ae ki, ka langi molu si kaubare, ma ka langi molu si ilingia koito rarae ki, ’e langi molu si firu, ma ka langi molu si kwaifii. ¹⁴ Molu ka too bo ilingia na Aofia tha Jisas Kraes, ma ka langi molu si manata ’uria faanonithathalaa kwaidoorilae ta’ae ki ’ana nonimolu.

¹ Aia, ta imole ne ’e manata mamana ’ana tha Jisas Kraes, molu ka konitana, sui boroi ’ana manata mamanalae nia ka langi si suukwai ’ua. Ma ’e langi molu si olisusuu fonea sulia si manatalae ngwane nia ki. ² Ma tai imole ki ne manata mamanalae kera ’e suukwai, ’e tala’ana da ka ’ania bada fanga ’e’ete kwailiu ki sui. Sui ta, tai imole ki na manata mamanalae kera ’e maketho, kera da thaea thasa ’e abu ’uria ’anilana. ³ Ma na ngwane ki ne da tala’ana da ka ’ania kwalukaela fanga, ’e langi da si manata ta’ae sulia na ngwane ki ne langi da si ’ania mariko. ’E ’urineri laubo, na ngwane ne ’e langi si ’ania mariko, ’e langi si bae nagaa na ngwane ki ne ’e tala’ana da ka ’ania kwalukaela fanga. Sulia kera na ngwane ki ne tha God ’e ala naa faafida. ⁴ ’E langi si tala’ana kolu ka bae nagaa na ngwane ni rao nia tha God. Sulia tha God naa na ngwane ’inito kera, nia ’ana ne kau thaea thasa na raoa kera ki ’e ta’ae ma langi ka ’okae. Ma da ilia doo ’okae, sulia na Aofia ’e tala’ana ka ’adomi kera fasi da ka ilia doo ’okae ki. ⁵ Ma ’e ’urineri laubo, tai imole ki da thaea tee fe dani ’e ’inito ka tatha talua ta fe dani ’e’ete. Ma tai imole ki da ka thaea fe dani ki sui da bobola bada. Aia, ma ’e ’okae fuada sui bo ne da roosulia si doo ki ne da thaitamana ’e ’o’olo. ⁶ Ma na ngwane ne ’e manata baita ’ana tee fe dani, ’e ilia ’uria na faa’initolana Aofia. Ma na ngwane ne ’e tala’ana ka ’ania ta si fanga bana, nia ’e ilia ’uria faa’initolana Aofia, sulia ’e tangoa tha God ’uria si fanga neri. Ma ni ti ne ’e otenia ’ana ’anilana mariko, nia ’e ade ’urineri ’uria faa’initolana Aofia, ma nia ka tangoa tha God. ⁷ Sulia ’e langi ta imole si moori bo fuana ’i tala’ana, ma ’e langi ta imole si mae fuana ’i tala’ana. ⁸ Sulia lelea sa kolu ka moori, kolu moori naa fuana Aofia. Ma lelea sa kolu ka mae, kolu mae naa fuana Aofia. Nia nee, sui boroi ’ana kolu ka moori ma langi kolu ka mae, kolu naa na doo nia ki na Aofia. ⁹ Sulia tha Jisas Kraes ’e mae, ma ka tatae naa ’uria mooria fasi ka ’inito fuana imole moori ki, ma imole ki ne da mae naa laubo. ¹⁰ Iuka, ma kamolu ne langi molu si thaitamana ’anilana mariko, molu ka too faasia bae nagalana dooramolu ki. Ma kamolu ne molu ’ania kwalukaela fanga, molu ka too faasia bae tolingilana dooramolu ki. Sulia kolu sui bo ne kolu kau takwe ’i naofana tha God ’uria tooketalakolu. ¹¹ Sulia na Kekedalae Abu bae ’e bae ’urii, “Tha God ’e bae ’urii, ‘’E mamana, nau naa na God momoori. Ma ’e mamana laubo ’urineri, sulia na imole ki sui dau boruru ’i nao’aku, ma dau thaea ne nau naa na God.’ ” ¹² Nia nee, kolu ka thaitamana, na doo ki sui bo ne kolu ilia, kolu kau thaea fuana tha God. ¹³ Aia, ’e langi kolu si bae naga kolu kwailiu lau. Ma ’e ’okae fasi kolu ka too faasia ililana si doo ne kau adea moorilana doorakolu ka ’asi nia. ¹⁴ Sulia na ofulae nau fonea na Aofia tha Jisas, nau ku thaitamana ’okae naa ’ania ’e langi ta fanga si faasuaa ta imole ’i maana tha God. Sui lelea sa ta imole ka fiia thasa tai fanga ’e sua ’uria ’anilana, ’urineri tama nia ’e garo fuana uria ’anilana. ¹⁵ Ma lelea sa ta doora ’amolu ka liodila sulia si doo ne molu ’ania, ’urineri tama ’e langi molu si faatana bo liothaua kamolu fuana neri. ’E langi molu si alua na fanga ne molu ’ania ka nagaa na ngwane ne tha Jisas Kraes ’e mae ’usia. ¹⁶ ’E langi molu si ilia ta si doo ne molu thaea thasa ’e ’okae ma ta doora ’amolu ka liodila sulia, fasi na imole ki da ka thae ta’ae ’ani kamolu faafia. ¹⁷ Si manga tha God ’e ’inito faafi kolu, si doo baita ’e langi lau sulia na doo kolu ’ania ma langi kolu ka kuufia. Si doo ne baita ’ana nee kolu ka ilia si doo ’o’olo fuana imole ki, ma kolu ka too ’ana enoenoa fonea imole ki, ma kolu ka too ’ana nonithathalalae ne na Mangoedoo Abu ’e fala fuakolu. ¹⁸ Ma lelea sa ta ngwane ka rao fuana tha Jisas Kraes ’urineri, tha God ’e nonithathala suli nia, ma imole ’e’ete ki boroi da ka alafaafia. ¹⁹ Nia nee, kolu ka thasi ’uria ililana si doo ne ’e fala enoenoa ma ka faasuukwaia manata mamanalae kolu ki kwailiu. ²⁰ ’E langi molu si tagalangana raoa nia tha God ne ’e ilia ’i laona moorilana ta ngwane, sulia molu ’ania ta fanga ne nia ’e thaea thasa ’e abu. Sui boroi ’ana na fanga ki sui bo ka ’okae ’uria ’anilana, ’e ta’ae ’asiana lelea sa na fanga ne molu ’ania, ’e faagaroa ta doora ’amolu. ²¹ ’Urineri ’e tee ore ’okae lelea sa ’e langi molu si ’ania marikona ta doo moori, ma langi molu si kuufia ta doo suukwai ne ka burasi kamolu, ma ’e langi molu si ilia ta si doo lau ne ka talaia dooramolu ki da ka lea garo. ²² Ma na manatalamolu sulia na fanga ne tai imole ki da thaea thasa ’e abu, si doo neri si doo ’i malutamolu bana fonea tha God. Ka ’oilakea fuana imole ki ne da ilia si doo ne da thaitamana ’e ’o’olo, ma na moorilana ka langi si ketoa nia. ²³ Sui ta, lelea sa na ngwane ne manatalana ’e ruarua sulia si doo ne ’e abu ’i maana tha God ’uria ’anilana, ma nia ka ’ania si doo neri, nia ’e ilia si doo ’e garo, sulia na ngwane neri ka si roosulia si doo ne ’e manata sulia ne ’e ’o’olo. Sulia lelea sa kolu ilia ta si doo ne kolu manata ruarua sulia thasa ’e ’okae ’i maana God, ’urineri si doo neri ’e ta’ae.

¹ Iuka, kolu na imole ki ne manata mamanalae kolu ’e suukwai, ’e tala’ana kolu ka fefelete fonea ni ti kera ne manata mamanalae kera ki ’e maketho, ka langi lau ni kolu ’i tala’akolu bana. ² Ma nia ’e tala’ana kolu ka faanonithathalaa na doora kolu ki fasi ka ’okae fuada, ma fasi kolu ka faasuukwaia na manata mamanalae kera ki. ³ Tha Jisas Kraes ’e langi si ilia lau si doo ki ’uria faanonithathalalana ’i tala’ana. Sulia na Kekedalae Abu bae ’e thaea ka ’urii, “God ’ae, na bae ta’alae kera fuamu ’e naga nau laubo.” ⁴ Na doo ki sui ne da kedaa ’i laona Kekedalae Abu, da kedaa ’uria faamanatailakolulae. Na Kekedalae Abu ’e ’adomi kolu ’uria marabibilae, ma ka fala rakealae fuakolu. Ma si doo neri ki ’e adea kolu ka manata ngado ’ana tha God ne faamamanea alangaia nia ki fuakolu. ⁵ Nau ku foa fasi tha God ’ana thathafalilana marabibilae ma na faasuukwailae, nia ka falea fasi molu ka too sulia tee manatalae doo ilingia laubo ne tha Jisas Kraes ’e too fone kamolu. ⁶ ’Urineri, molu ka too ’ana tee si lioe ngwane ma tee si baea, molu ka faa’initooa tha God na Maka nia tha Jisas Kraes na Aofia kolu. ⁷ Ma molu ka konitai kamolu kwailiu ka ilingia laubo ne tha Jisas Kraes ’e konitai kamolu. Lelea sa molu ka ade ’urineri, na imole ki da ka faabaitaa tha God. ⁸ Nau ku thaea fuamolu, tha Jisas Kraes ’e lea mai ’i laona molaagali fasi ka ’adomia imole ki ’i Jiu, ma fasi ka faatana na alangaia nia ki tha God fuana kokoo abu kera ki kau fuli mamana. ⁹ Ma nia ’e lea laubo mai fasi na imole ki ne langi lau Jiu da ka thaitamana faabaitalana tha God ’uria kwaimanatailae nia. Ilingia bae na Kekedalae Abu ’e thaea ka ’urii, “’Ana si manga ku too fonea imole ki ne langi lau Jiu, nau ku faabaita ’oe, ma ku bae ’okae suli ’oe ’ana nguu ki.” ¹⁰ Ma na Kekedalae Abu ka bae lau ’urii, “Kamolu imole ki ne langi lau Jiu, molu ka nonithathala fonea imole nia ki tha God ne ’i Jiu!” ¹¹ Ma na Kekedalae Abu ka bae lau ’urii, “Kamolu imole ki ne langi lau Jiu, molu ka faabaitaa tha God, ma na imole ki sui, molu ka faabaita nia!” ¹² Ma ’ana ta Kekedalae Abu lau, tha Aesaea ’e bae ’urii, “Tee ngwane ’ana kwalafa tha Jesi kau lea mai, ma nia kau ’inito faafia imole ki ne langi lau Jiu, ma kera dau fiitoo ’ani nia.” ¹³ Ma nau ku foa fasi tha God ne ’e falea fasi kolu ka too ’ana fiitooa, ka faanonithathala kamolu, ma ka fala enoenoa fuamolu sulia na manata mamanalae kamolu ’ani nia, fasi na fiitooa kamolu ka moori ’ana suukwaia nia na Mangoedoo Abu. ¹⁴ Doora nau ki ’ae, nau ku thaitamana ’okae ’ania ne na abulolamolu ’e ’okae ’asiana, ma molu ka thaitamedoo, ma molu ka tala’ana faamanatailamolu kwailiu. ¹⁵ Sui boroi ’ana ka ’urineri, ’i laona kekedalae nee, nau ku bae folaa sulia tai si doo ki ne nau ku dooria kwau fa’amanatatoomolu ’ania. Nau ku bae nonirara’a sulia tha God ’e fili nau sulia na liothaua nia, ¹⁶ ma nia ne adea ma ku thau ’ana na ngwane ni rao fuana tha Jisas Kraes ’i malutana imole ki ne langi lau Jiu. Nau ku rao ilingia ta ngwane ni foa ’ana faatalolae ’ania na Faarongolae ’Okae faasia tha God, fasi na imole ki ne langi lau Jiu da ka ilingia ta afuafulae ne tha God ’e nonithathala sulia, ma na Mangoedoo Abu ka faafaalu kera. ¹⁷ Ma ’ana ofulae nau fonea tha Jisas Kraes, nau ku bae rara’a sulia raoa nau fuana tha God. ¹⁸ Nau ku bae bo sulia si doo ki ne tha Jisas Kraes ’e ilia ’ani nau ’uria talailana imole ki ne langi lau Jiu ’uria roolae sulia tha God. Da roosulia tha God, sulia da rongoa baelaku, ma da ka rikia si doo ki ne nau ku ilia. ¹⁹ Ma nau ku ilia si doo ni kwelelae ’ania ki ma si doo ni mangosilana ki ’ana na suukwailana na Mangoedoo Abu nia tha God. ’Urineri, nau ku thafalia raoa nau ’i Jerusalem, ma ku tatha ’ana si kula ki sui lelea ka dao ’i Ilirikum. Ma si manga neri, nau ku faatalo ’ana Faarongolae ’Okae sulia tha Jisas Kraes ’ana si kula neri ki. ²⁰ ’I fai boroi ’ana nau ku lea ’ania, nau ku ililado ’ana si doo nee: Nau ku faatalo ’ana na Faarongolae ’Okae ’ana maetoaa ne langi da si rongoa ’ua tha Jisas Kraes, fasi kwa si ilingia ta ngwane ne thaungana ta beu ’i fafona fafarangadoa ne ta ngwane ’e’ete lau bana ’e thaungana. ²¹ Ilingia bae na Kekedalae Abu ’e bae sulia na Kraes ka ’urii, “Imole ki ne ’e langi da si rongoa ’ua, kera dau rikia, ma dau thaitamana.” ²² Ma sulia nau ku ’a’abo ’ana faatalolae ’urineri ’i laona maetoaa ’e’ete ki, nia nee si doo ’e suusia ka langi kwa si lea kau ’uria daotoolamolulae. ²³ Ma ’ana si manga neri, nau ku faasuia naa na raoa nau ki ’i see ’i laona maetoaa nee ki. Ma sulia ange fe ngali naa ne nau ku dooria lealae kau siamolu, ²⁴ ma si manga neri nau ku manata naa ’uria tathalae kau ’i siamolu, si manga ku lea ’uria ’i Spen. Nia nee nau ku manatatoona lealae kau ’i siamolu, nau kwau nonithathala ’uria toolae fone kamolu teefau, ma nau ku dooria fasi molu ka ’adomi nau ’ana lealae nau ’uria ’i Spen. ²⁵ Nau kwau lea fasi ’aku ’i Jerusalem ’uria ’adomilana imole nia ki tha God ’i seeri, sui fatai kwa fi lea ’uria ’i Spen. ²⁶ Sulia na imole manata mamana ki ’i Masedonia ma ’i Gris, da manata thasa ’e ’okae fasi da ka fala si malefo ’uria ’adomilana imole manata mamana ki ne da siofaa ma da ka too ’i Jerusalem. ²⁷ Ma si lioe ngwane neri, si doo kera bana ’i talada. Ma ka ’urineri boroi, ’e tala’ana da ka ’adomi kera. Sulia na imole ki ’i Jiu da ’ado kwailiu ’ana Faarongolae ’Okae fonea na imola ki ne langi lau Jiu, ma ka ’okae fuana imole ki ne langi lau Jiu, fasi da ka tolingia toodooa kera ki fonea imole ki ’i Jiu. ²⁸ Ma ’ana si manga ku faasuia naa na raoa ’ana falelana si malefo ne da konia fuada ’e sui, nau kwau lea ’uria ’i Spen, ma kwau tatha kau ’i siamolu ’ana lealae nau. ²⁹ Si manga ku dao kau siamolu, nau ku thaitamana tha Jisas Kraes kau faa’okae kamolu suli nau. ³⁰ Doora nau ki ’ae, sulia na Aofia kolu tha Jisas Kraes, ma sulia na liothaua ne na Mangoedoo Abu ’e fala fuakolu, nau ku gani kamolu fasi molu ka foa suukwai fone nau, fasi tha God ka ’adomi nau. ³¹ Molu ka foa fasi tha God ka ’adomi nau fasi na imole ki ’i Jiudea ne langi da si manata mamana, ka langi da si faangada nau. Ma molu ka foa laubo fasi na imole nia ki tha God ’i Jerusalem da ka nonithathala sulia si malefo bae ku fala ’uria ’adomilada. ³² ’Urineri, lelea sa na kwaidooria nia tha God, si manga ku faasuia raoa nau ’i Jerusalem, nau kwau lea kau siamolu ’i laona nonithathalalae ne baita, ma kwau momolo ’okae ’aku fone kamolu. ³³ Aia, nau ku foa fasi tha God ne ’e fala enoenoa fuakolu, ka too fone kamolu teefau. Iuka ka ’urineri naa.

¹ Iuka, nau ku dooria kwau bae ’okae sulia na ngwaingwane kolu ni Fobi ne rao fuana imole manata mamana ki ’i Kenkrae. ² ’Ana si manga ni nia kau dao mai siamolu, molu ka konitana sulia na manata mamanalae nia ’ana na Aofia, ma sulia imole nia ki tha God ’e tala’ana da ka ade ’urineri. Ma molu ka ’adomia ’ana ta si doo ne ’e dooria, sulia ni nia ’e ’adomia laubo imole ’oro ki ma ni nau laubo. ³ Ma ku fala si baea ’okae fuana tha Akuila ma ni Prisila ne daru rao fone nau fuana tha Jisas Kraes. ⁴ ’Ana si manga daru ’adomi nau, karangia dau thaumaeli keerua. Ma sulia si doo neri, nau ku tango keerua ’asiana. Ma ’e langi lau talifili nau, na imola ki ne langi lau Jiu teefau ne da manata mamana laubo, da tango keerua. ⁵ Aia, ma nau ku fala si baea ’okae laubo fuana imole ki ne da manata mamana, ma da ka ofu ’i laona beu keerua ’uria foasilana tha God. Ma nau ku fala si baea ’okae laubo fuana tha Epaenetus, na ngwane kwaimani ’okae nau. Nia na ngwane totongenao ne ’e manata mamana ’ana tha Jisas Kraes ’i Eisia. ⁶ Ma nau ku fala si baea ’okae laubo fuana ni Meri, keni bae ’e rao suukwai fuamolu. ⁷ Ma si baea ’okae laubo fuana tha Andronikus, ma tha Junias, na roo ngwane ki ’i Jiu ilingi nau laubo ne daru totoo fone nau ’i laona dele. Ma keerua na roo ngwane daru manata mamana ’ana tha Jisas Kraes totongenao sui fatai ni nau. Ma na aposol ki, da thaitamana ’okae laubo ’ani keerua. ⁸ Ma si baea ’okae nau fuana tha Ampilatus, na ngwane kwaimani ’okae nau sulia na manata mamanalae kamiria ’ana na Aofia. ⁹ Si baea ’okae laubo fuana tha Urbanus, na ngwane ni rao fone nau fuana tha Jisas Kraes. Ma si baea ’okae laubo fuana tha Stakis, na ngwane kwaimani ’okae nau. ¹⁰ Ma si baea ’okae fuana tha Apeles, na ngwane ’okae ne tha Jisas Kraes ’e alafaafia. Ma si baea ’okae ki fuana tha Aristobulus fonea na toaa nia. ¹¹ Ma si baea ’okae fuana tha Herodion, ta ngwane ’i Jiu ilingi nau laubo. Ma si baea ’okae laubo fuana ni ti kera ne da manata mamana ’i laona beu tha Narsisus. ¹² Aia, si baea ’okae nau ki fuana ni Trifaena ma ni Trifosa, ne daru rao suukwai fuana na Aofia. Ma si baea ’okae laubo fuana ai kwaimani nau ni Persis, na keni ni rao nonimaabe fuana na Aofia. ¹³ Nau ku fala si baea ’okae nau ki fuana tha Rufus, na ngwane rao ’okae fuana na Aofia. Ma si baea ’okae laubo fuana gaa tha Rufus, ne ’e ’adomi ’okae ’ani nau ilingia naa ta ngwela ’ana. ¹⁴ Si baea ’okae nau ki fuana tha Asinkritus, tha Flegon, tha Hermes, tha Patrobas, tha Hermas, ma na imole ki sui ne da manata mamana ma da ka too foneda. ¹⁵ Si baea ’okae ki fuana tha Filologus, ma tha Julia, ma tha Nereus fonea ngwaingwane nia, ma fuana tha Olimpas fonea na imole nia ki tha God teefau ne da too foneda. ¹⁶ Ma ’ana si manga molu kau riki kamolu kwailiu, molu ka faatana na liothaua kamolu fuamolu kwailiu. Aia, ma na imole manata mamana nia ki sui tha Jisas Kraes ’i see, da fala kau si baea ’okae kera ki fuamolu. ¹⁷ Doora nau ki ’ae, nau ku thaea fuamolu, molu ka lio suli kamolu faasia imole ki ne da adea ma molu ka firu, ma da adea ma tai imole ki da ka lea garo faasia tha Kraes. Da toodoo sulia na doo ne lea ’e’ete faasia na toodoolae mamana ne molu manata mamana ’ania. Molu ka too tau faasida. ¹⁸ Sulia sa ni ti kera ne da ade ’urineri, ’e langi da si rao bo fuana tha Kraes na Aofia kolu, da rao bada sulia lioda ’i tala’ada. ’Ana si baea ’okae kera ki fonea si baea kwaigwafei kera ki, da ka sukea imole ki ne langi da si thaitamana ’ua ’ana doo ki. ¹⁹ Sui ta, na imole ki sui da rongo naa ne molu roosulia tha Kraes. Ma nau ku nonithathala ’asiana suli kamolu. Nau ku dooria molu ka liotoo sulia si tae ne ’e ’okae, ma molu ka too faasia na doo ta’ae ki. ²⁰ ’Urineri, tha God na thathafalilana enoenoa kolu, nia kau ’ali’ali ka adea ma molu ka siitatha ’ana tha Saetan. Nau ku foa fasi na Aofia kolu tha Jisas ka ililado ’ana liothaulae ’ani kamolu. ²¹ Ma tha Timoti, na ngwane ne rao fone nau, ’e fala laubo kau si baea ’okae nia ki fuamolu. Ma tha Lusias, tha Jason, ma tha Susipater, na ngwane ki ’i Jiu ilingi nau laubo, da fala si baea ’okae kera laubo fuamolu. ²² Ma nau tha Tertius, na ngwane ne ku ’adomia tha Pol ’uria kedalana si baea neri ki, ku fala kau si baea ’okae nau nee fuamolu sulia na manata mamanalae kolu ’ana tha Jisas na Aofia. ²³ - ²⁴ Aia, ma tha Gaeas ’e fala kau si baea ’okae nia ki. Nau ku too fonea ’i see, ma na imole manata mamana ki ne da ofu laubo ’i beu nia. Ma tha Erastus, na ngwane ne ’e liosulia malefo ’i laona maetoaa baita neri, fonea doora kolu tha Kuartus, daru fala laubo si baea ’okae keerua ki fuamolu. ²⁵ Kolu ka faare ’inito ’ana tha God, sulia ’e tala’ana ka faasuukwai kamolu sulia na Faarongolae ’Okae ne nau ku faatalo ’ania. Na Faarongolae ne ’e lea sulia tha Jisas Kraes. ’E tau na mai ne tha God ’e langi si faatai folaa ’ania Faarongolae ’Okae nee. ²⁶ Sui ta, ’ana si manga neri, nia ’e faatana naa na Faarongolae ’Okae. Na profet ki da kekeda sulia na Faarongolae ’Okae nee. Ma tha God ne ’e moori ka totoo firi, ’e arasi kameli fasi meli ka faarongo lalae ’ania na Faarongolae ’Okae nee fuana imole ki ’ana maetoaa ki sui, fasi na imole ki sui, da ka manata mamana ’ani nia, ma da ka roo sulia laubo. ²⁷ Talifilia tha God bo ne ’e liotoo ’ana doo ki sui, kolu ka faabaitaa tha Jisas Kraes ka totoo firi. Iuka nia ka ’urineri naa.