Filipae

Filipae

¹ Nau tha Pol fonea tha Timoti, na roo ngwane ni rao nia ki tha Jisas Kraes. Miri kekeda kau fuamolu imole ki sui ne molu manata mamana ’ana tha Jisas Kraes, ma molu ka too ’i laona maetoaa baita ’i Filipae. Miri kekeda fuana ngwane naonao kamolu ki fonea laubo na ngwane ki ne da kwai’adomi ’ana ofulada na imole manata mamana ki. ² Nau ku foa fasi tha God na Maka kolu ma na Aofia tha Jisas Kraes daru ka fala ’okaelae ma na enoenoa fuamolu. ³ Nau ku tangoa ’asiana God nau fuamolu, ’ana si manga ki sui ne ku manatatoomolu. ⁴ Ma ku ele ’asiana si manga ku foa fuamolu sui bo, ⁵ sulia ku manatatoona na kwai’adomia ki ne molu ilia fuaku ’ana raolae ’ana na Faarongolae ’Okae, ’e thafali mai ’ana si manga bae molu manata mamana ’ania, lelea ka dao naa ’i tari’ina. ⁶ ’Ana si manga neri, tha God ’e thafalia na raoa ’okae nia ki ne ’e ilia ’i laona moorilamolu. Ma nau ku thaitamana nia kau faafonoa si manga ne nia kau faasuia ’ana raoa neri fe dani ne tha Jisas Kraes kau oli mai ’ania. ⁷ Nia ’e tala’ana fasi ku nonithathala ’urineri suli kamolu, sulia ku liothau ’ani kamolu, ma molu ka ’adomi nau fonea na raoa nee tha God ’e fala fuakolu. Kamolu molu ’adomi nau si manga bae ku too ’i laona dele, ma si manga ku faatalo ’ana na Faarongolae ’Okae, ne ku firu suusia. ⁸ Nau ku rofe kamolu ’asiana sulia na liothaua baita nau fuamolu ’e ilingia laubo na liothaua ne tha Jisas Kraes ’e too ’ania fuamolu. Tha God ’e alafaafia si doo nee ki ne ku thaea ’e mamana. ⁹ Nau ku foa laubo fasi na liothaua kamolu ka ’idu ma ka lea lado ma ka baita. Nau ku foa fasi molu ka thaitamana ’okae ’ana tha God, ma molu ka thaitamana ’okae ’ana abulolae ’okae ki ma na abulolae ta’ae ki, ¹⁰ fasi molu ka tala’ana fililana si doo ’okae ki ma ka ’o’olo, fasi molu ka too ’o’olo ’ana fe dani ne tha Jisas Kraes kau oli mai ’ania. ¹¹ Nau ku foa fasi na moorilamolu ka ’o’olo teefau sulia na kwai’adomia ne tha Jisas Kraes ’e ilia fuamolu. Ma si manga na moorilamolu ’e ’o’olo ’urineri, imole ’oro ki dau faabaitaa tha God. ¹² Doora nau ki ’ae, nau ku dooria molu ka thaitamana na ’afitaia ki ne ’e daotooku ’ana si manga neri, ’e ’adomi nau ’asiana ’uria faatalolana na Faarongolae ’Okae. ¹³ Sulia na ngwane ni firu ki ne da folo ’i see laona beu baita nia na ngwane ’inito, ma imole ’oro ’e’ete ki ne da too ’i see, da thaitamana bada ne ku too ’i laona dele sulia nau na ngwane rao nia tha Jisas Kraes. ¹⁴ Ma laubo sulia ne ku too ’i laona dele, ma si doo neri ne faasuukwaia imole ’oro ki ne da manata mamana ’ana Aofia, fasi da ka nonirara’a ni faatalolae ’ana na Faarongolae ’Okae, ma ka langi da si mau. ¹⁵ - ¹⁷ Tai ngwane da faatalo ’ana tha Jisas Kraes sulia da liota’ae ’ani nau. Na lioe ngwane kera ’uria faatalolae ’ana tha Jisas Kraes ’e langi si ’okae. Sulia da dooria faatalolae kera ’ana tha Jisas ka baita talu nau. Da ade ’urineri sulia da dooria da ka baita talu nau ma da ka fala tai ’afitaia fuaku si manga nee ku too ’i laona dele. Ma tai ngwane lau, da too ’ana si lioe ngwane ’okae ki ’uria faatalolae ’ana na Faarongolae ’Okae. Da faarongo ’ana sulia na liothaua kera ’ani nau, ma sulia da thaitamana tha God ne fili nau ’uria suusilana na Faarongolae ’Okae. ¹⁸ Ma nia ’e ’okae bana. Sui boroi ’ana na lioe ngwane kera ka ’okae ma langi ka ta’ae, da faarongo naa sulia tha Jisas Kraes. Nau ku nonithathala ’asiana, sulia da faarongo sulia tha Jisas Kraes. Iuka nau kwau nonithathala ’aku, ¹⁹ sulia ku thaitamana tha God kau ’adomi nau ’ana si manga ’afitai nee, sulia na foalae kamolu fuaku ma na kwai’adomia nia na Mangoedoo nia tha Jisas Kraes. ²⁰ Ma si kwaidooria baita nau ’e ’urii: Nau ku fiitoo ’ana tha God fasi ku roo na ’aku sulia na kwaidooria nia, ma kwa si mau ’ana faatalolae sulia tha Kraes. Nau ku nonirara’a ’i nao ka lado bana, ma ku dooria fasi ku nonirara’a laubo ’ana si manga neri, fasi na imole ki da ka faabaitaa tha Jisas Kraes suli nau. Sui boroi ’ana ku moori ’ua ma langi ku mae naa, nau ku dooria da ka faabaitaa tha Jisas Kraes sulia si doo ki ne ku ilia. ²¹ ’Uria tae nee imole ki da ka moori? Ni nau mone, ku moori ’uria raolae fuana tha Jisas Kraes. Ma lelea sa ku mae, ka ’okae bana sulia kwau too ’aku fonea tha Jisas Kraes ’i thalo. ²² Sui ta, ’e langi kwasi thaitamana ta si tae nee nau kwau filia. Sulia nau ku doori moori ’ua, fasi ku ulafu ’aku ’ana raolae fuana tha Kraes. ²³ Ma ku doori mae laubo, fasi ku too fonea tha Jisas Kraes, sulia nia naa neri si doo ne ’okae ’asiana fuaku. Nau kwasi thaitamana bo si tae nee ku dooria. ²⁴ Sui ta, ’e ’okae fasi ka langi kwa si mae ’ua, fasi ku ’adomi kamolu. ²⁵ Nau ku thaitamana si doo neri, ma nia nee adea ku thaitamana kwau moori ’ua ’aku fone kamolu, fasi ku faasuukwaia na manata mamanalae kamolu ki. Ma na manata mamanalae kamolu ka faanonithathala kamolu, ²⁶ fasi si manga ku oli lau kau siamolu, molu ka faabaitaa tha Jisas Kraes ka tatha suli nau. ²⁷ Ma lelea sa ta si tae boroi ’ana ka fuli fuaku, na abulolamolu ka ’o’olo ma ka lea sulia na Faarongolae ’Okae sulia tha Jisas Kraes. Molu ka ade ’urineri, ma lelea sa nau ku lea kau siamolu ma laa ka langi, nau kwau rongo bo ’aku kau sulia na abulolae ’okae kamolu ki. Ma nau kwau thaitamana ne manata mamanalae kamolu ki ’e suukwai, ma molu ka too ’ana tee si manatalae, ma tee kwaidooria bo ’uria rao ofulae ’ana na Faarongolae ’Okae, fasi na imole ’oro ki da ka manata mamana ’ania. ²⁸ Langi molu si mau ’ana maalimae kamolu ki. Sulia si doo ne faatana fuada ’e ’urii, kera dau ngala keketoa kera, ma kamolu molu kau ngala mooria ne totoo firi. Tha God ne kau ilia si doo neri. ²⁹ Tha God ’e fili kamolu fasi molu ka manata mamana ’ana tha Jisas Kraes, ma molu ka ngada laubo fuana. ³⁰ ’I nao mai, molu rikia naa ne ku ngada. Ma ’ana si manga neri molu ka rongoa naa ne da ade ’urineri laubo ’ani nau. Ma kamolu molu kau ngada laubo ’urineri.

¹ Nau ku thaitamana na ofulae kamolu fonea tha Jisas Kraes ne faasuukwai kamolu, ma na liothaua nia fuamolu ne faasuukwai kamolu. Ma ku thaitamana laubo ne molu too ofu fonea na Mangoedoo Abu, ma molu ka ade ’okae, ma molu ka liothau ’ani kamolu kwailiu. ² ’Uria si doo neri ki, ne ku gwafe kamolu, fasi na liomolu ma na kwaidooria kamolu ki ka thau ’ana tee doo, ma molu ka thaungana liothaua kamolu fuamolu kwailiu ka baita lau. Lelea sa molu ka ade ’urineri, na nonithathalalae nau ka fi ore baita lau fuamolu. ³ Ma ka langi molu si ilia ta si doo sulia liomolu ne molu doori baita ’i talamolu, ma molu ka doori faabaitalamolu ’i talamolu. Sui ta, molu ka faafaekwa ’ani kamolu ’i talamolu, ma ’e ’okae fasi molu ka manata ’uria imole ’e’ete ki ne da ore ’okae ka talu kamolu. ⁴ Molu ka too faasia manatalae sulia si tae ki ne molu dooria ’i talamolu, molu ka manata ’amolu sulia na kwaidooria kera imole ’e’ete ki. ⁵ Na manatalamolu ka ilingia na manatalana tha Jisas Kraes. ⁶ Boroi ’ana tha Kraes naa na God mamana, nia ’e langi si manata ’ana thasa nia ka too ngado ’ana ’i fulina fonea tha God. ⁷ Nia ’e failuka naa ’ana doo ki sui, ma ka futa ’ana nonii doo mala imole, ma ka thau bana ’ana ngwane ni rao. ⁸ Ma nia ka faarefaekwa bana ’ani nia ’i tala’ana. Sui boroi ’ana da ka fotoinia ma ka mae ’i fafona ’airarafolo, nia ’e roo naa sulia na kwaidooria nia tha God. ⁹ Ma ’uria si doo neri, ne tha God ka faabaita nia, ma ka fala naa si thata ne ’inito ka talua thata ki sui fuana. ¹⁰ Ma ’uria na faa’initolana thatana tha Jisas, na doo moori ki sui ne da too ’i thalo, ma ’i molaagali, ma na maetoaa kera imole mae ki, da ka boruru fuana. ¹¹ Ma kera sui bo da ka faataloa ne tha Jisas Kraes naa na Aofia, fasi da ka faa’initooa tha God na Maka. ¹² Nia nee imole liliothau nau ki ’ae, ’e ’okae ’asiana fasi molu ka roosulia si faarongolae nau ki fuamolu, ilingia molu ilia ’ana si manga bae ku too mai ’ania fone kamolu. Ma ’ana si manga neri, molu ka thasi suukwai ’uria roolae sulia si faarongolae nau ki, si manga ku too tau kau ’ana faasi kamolu. ’E ’okae fasi tee tee imole ’ani kamolu ka thasi suukwai ’uria roolae sulia tha God ’ana faarebaitalae. Ma molu ka too ’ana ta mooria ne tala’ana imole ki ne tha God ’e faamoorida faasia ta’alae ki. ¹³ Sulia tha God ne adea molu ka dooria roolae suli nia, ma ’e adea molu ka tala’ana roolae sulia si tae ki ne nia ’e dooria fasi molu ka ilia. ¹⁴ Ma ’ana doo ki sui ne molu ilia, molu ka too faasia na ngunungunulae ma na olisusuulae, ¹⁵ fasi molu ka too ’o’olo, ma ka langi da si daotoona ta si doo fasi da ka suke ’ania faafi kamolu. Sui boroi ’ana molu ka too ’ua ’i laona molaagali nee ’i malutana imole ki ne abulo ta’ae, molu ka too naa ilingia ngwela nia ki tha God. ’E ’okae fasi molu ka ilingia na kwethu ki ne tala ’adomida ’i laona molaagali rorodoa nee, ¹⁶ sulia molu faarongo kera ’ana si faarongolae ne fala mooria ne totoo firi fuada. Ma lelea sa molu ka ilia si doo neri, nau kwau nonithathala ’asiana ’ana fe dani ne tha Jisas Kraes kau oli mai ’ania, sulia si raoa neri ki molu ilia kau faatana ne na raoa nau ki ’i malutamolu ’e langi si tofe too. ¹⁷ Na manata mamanalae kamolu ’ana tha God ’e ilingia ta afuafulae ne molu fala fuana. Ma lelea sa nia ’e dooria ku mae laubo ilingia ta afuafulae, nau kwau nonithathala ’asiana laubo, ilingia ne molu nonithathala si manga neri. ¹⁸ Ma molu ka nonithathala laubo ’urineri fone nau. ¹⁹ Nau ku fiitoo ’ana na Aofia thasa nia kau ’adomi nau fasi ku fala ’ali’ali kau ’ana tha Timoti ’i siamolu, fasi si manga nia kau oli mai ’i see, ma ka faarongo nau ’ana na toolamolu, nau kwau nonithathala ’asiana. ²⁰ ’E langi bo ta imole ’i see fone nau ne ilingia tha Timoti ne ka ogoni ’ani kamolu ma ka liothau ’ani kamolu. ²¹ Sulia na imole ’e’ete ki, da manata bada sulia si doo ki ni kera bana ’i talada da dooria, ma ka langi lau sulia na kwaidooria nia tha Jisas Kraes. ²² Ma tha Timoti bae molu thaitamana si raoa ki ne nia ’e ilia ka ’okae, sulia nia ’e ilingia naa na ngwela mamana nau ’uria ’adomilaku ’ana faatalolae ’ania na Faarongolae ’Okae. ²³ Nia nee, ’ana si manga ku thaitamana si tae ne kau fuli fuaku ’i see, nau ku dooria kwau fala’ali’ali kau ’ani nia siamolu. ²⁴ Ma nau ku manata mamana ’ana na Aofia kau faangwaludea fuaku fasi ku lea ’ali’ali laubo kau ’i siamolu. ²⁵ Ma nau ku manatatoona laubo thasa kwau fala kau doora kolu tha Epafroditus ka eta kau ’i nao, na ngwane bae molu fala mai ’i see fasi ka ’adomi nau. Nia ’e fone nau ’ana raolae fuana tha God, ma nia ka takwe fone nau fasi miri ka firu suusia maalimae kolu ki. ²⁶ Tha Epafroditus ’e dooria ’asiana thasa ka riki kamolu sui bo. Ma nia ’e manata ’a’abo, sulia molu rongoa mai thasa nia ’e matai ’i see. ²⁷ Ma nia ’e matai ’asiana, ma ’e karangi kau mae. Sui ta, tha God ’e manatai nia, ma ka guraa naa. ’Urineri, tha God ’e manatai nia laubo, sulia lelea sa nia ka mae naa, na liodilalae nau kau baita ’asiana. ²⁸ Nia nee adea ku dooria ’asiana kwau olitana kau ’i siamolu, fasi molu ka nonithathala lau si manga molu riki nia. Ma ka langi kwasi ’a’abo lau sulia. ²⁹ Nia nee, molu ka konitainia ’i laona nonithathalalae ne baita, sulia nia nee doora kolu sulia na manata mamanalae kolu ’ana na Aofia. Molu ka faarebaita laubo ’ana imole ki sui ’urineri. ³⁰ Sulia nia noni thathala bana ’uria maelae ma ka karangi mae banaa si manga ’e rao fuana tha Jisas Kraes. Nia ’e ’adomi nau ’i fulingamolu, sulia ’e ’afitai naa fasi molu ka ’adomi nau lau si manga neri.

¹ Doora nau ki ’ae, molu ka nonithathala sulia na ofulae kamolu fonea na Aofia. Sui boroi ’ana nau ku kedaa si faarongolae neri ki sui ’i nao, ’e ’okae fasi ku kedaa lau, sulia si faarongolae nau ki ne kau ’adomi kamolu, si manga tai ngwane ki da thasi ’uria talai garolae ’ani kamolu. ² Molu ka liosuli kamolu faasia ngwane ta’ae neri ki. Kera da abulo ta’ae. Kera da toodoo da ka thaea thasa kolu ka roosulia na bibirangaa ’ana ’irimamalafoalae fasi kolu ka thau ’ana imole nia ki tha God. ³ Kolu ’ana, ka langi lau ni kera, nee na imole nia ki tha God, sulia kolu foasia tha God ’ana Mangoedoo Abu, ma kolu ka nonithathala sulia si doo ki ne tha Jisas Kraes ’e ilia fuakolu. ’E langi kolu si fiitoona bo bibirangaa kera ki na Jiu ki ’ana ’irimamalafoalae fasi kolu ka thau ’ana imole nia ki tha God. ⁴ Sui boroi ’ana nau ku roosulia na bibirangaa neri ki, ’e langi kwasi fiitoona bo si doo neri ki. Ma lelea sa ta ngwane ne fiia thasa nia na ngwane tha God sulia nia ’e roosulia na bibirangaa ’ana ’irimamalafoalae, nau naa ne ku talu nia ’ana roolae sulia bibirangaa ’urineri ki. ⁵ Kwalu fe dani ’i burina ne ku futa mai ’ania, bo da ka ’irimamalafoa naa ’ani nau. Ma nau ku futa mai ’ana ngwane mamana ’i Jiu, sulia ku futa mai ’ana ’aebara tha Benjamin. Ma ku lea ’o’olo naa sulia bibirangaa kera Jiu ki, sulia nau boroi ta ngwane laubo ’ana Farasi ki. ⁶ Ma sulia na kwaidooria nau ’e suukwai ’asiana ’ana bibirangaa kera Jiu ki, nau ku faangadaa na imole ki ne da manata mamana ’ana tha Jisas. Ma ku roosuli teefau ’ana bibirangaa nia ki tha Mosis, ma ka langi kwa si garo ’ana ta si bibirangaa. ⁷ ’I nao mai, nau ku manata thasa si doo neri ki ’e ’okae fuaku. Sui ta, ’i tari’ina, nau ku thaitamana si doo neri ki na tofa doo ki bana, sulia si doo ki ne tha Jisas Kraes ’e ilia fuaku. ⁸ Si doo neri ’e mamana! Nau ku daotoona si doo ki ne ku ilia ’i nao, na tofa doo ki sui bo. Sui ta, si doo ne ’e baita ma ka mamana, nia naa nee fasi ku thaitamana ’okae ’ana na Aofia nau tha Jisas Kraes. Ma sulia nia ne adea ma nau ku ekwatana doo ki sui ne nau ku ilia ’i nao. Ma nau ku manata sulia si doo neri ki ilingia bana doo ta’ae ki. Nau ku ade ’urineri fasi ku ’ado fonea tha Jisas Kraes, ⁹ ma ku thau naa ’ana tee doo fone nia. ’E langi kwa si ’o’olo ’i maana tha God sulia si tae nee ku ilia ’i tala’aku ’ana roolae sulia na bibirangaa kera Jiu ki. Sui ta, tha God ’e thaea ku ’o’olo sulia na manata mamanalae nau ’ana tha Jisas Kraes. Tha God naa ne ’olosia imole ki sulia na manata mamanalae kera ki. ¹⁰ Si doo baita ne ku dooria naa na thaitamanalana tha Jisas Kraes ma na suukwaia nia tha God ne faatana ’ana tataelana faasia maea. Ma nau ku dooria laubo ’adolae fone nia ’ana ngadalae nia, ma ku dooria laubo maelae ilingi nia ’i laona maelana. ¹¹ Ma ’e ’urineri, nau ku thaitamana kwau tatae laubo faasia maea. ¹² Langi kwa si thaea lau thasa ku thaitamana doo ki sui sulia tha Jisas ma langi ku ’o’olo teefau naa. Sui ta, nau ku thasi suukwai fasi ku thaitamana tha Kraes Jisas ma ku too ’o’olo teefau sulia nia ’e fili nau ’uria ililana si doo neri. ¹³ Doora nau ki ’ae, nau ku thaitamana si doo neri ki sui bo ’e langi si fuli ’ua fuaku. Sui ta, tee si doo bo ne ku ilia, ku manataburo naa ’aku ’ana doo ki sui ne ’e sui na mai ’i buriku, ma ku thasi suukwai ’aku ’uria toolae ilingia tha Jisas ’ana si manga ne nia ’ua kau. ¹⁴ ’Urineri nee, nau ku thasi suukwai naa fasi ku ngala na kwaiaraa nia tha God si manga ne nia kau talai nau ’uria ’i thalo, sulia ku manata mamana ’ana tha Jisas Kraes. Ma si doo neri naa na kwaiaraa nau. ¹⁵ Kolu sui bo ne na manata mamanalae kolu ’e suukwai, kolu too laubo ’ana si manatalae ngwane ’urineri ’i laona mooria kolu. Ma lelea sa tai imole ’amolu ’e langi da si ala bo faafia si doo neri ki ku thaea, tha God ne kau faatai folaa ’ania na tale ne ’o’olo. ¹⁶ Aia, ’e ’okae ’asiana fasi kolu ka roosulia na doo mamana ki ne kolu roosulia na mai ’i nao, lelea ka dao ’ana si manga neri. ¹⁷ Doora nau ki ’ae, molu ka thasi ’uria lealae sulia abulolae nau ki. Molu ka ilia laubo ilingia ni ti kera ne da lea ’o’olo sulia na abulolae ne meli faatana fuamolu. ¹⁸ Nau ku thaea sui naa fuamolu si manga ’oro ki ’i nao, na imole ’oro ki da thaea thasa da manata mamana ’ana tha Jisas Kraes, sui ta, na abuloda ’e faatana ne da maalimae bada ’ana Faarongolae ’Okae sulia na maelana tha Jisas Kraes ’ana ’airarafolo. Nau kwau bae lau ’aku sulia. Nau ku angi, ma ku liodila, sulia ¹⁹ da lea bada ’uria si kula ’ana kwakwaelae. Si doo ne baita fuada naa na kwaidooria bana ’ana nonida. ’E ’okae fasi da ka ’ida sulia si doo ki ne da ilia, sui ta, da nonithathala bada sulia. Ma tee si doo ne da manata sulia naa, si doo ki ’i laona molaagali nee bana. ²⁰ Sui ta, ni kolu nee, na maetoaa mamana kolu ’e nia ’i thalo. Ma kolu ka kwaimaakwali ’akolu ’ana daolana mai Aofia kolu tha Jisas Kraes ne faamoori kolu, sulia ni nia kau oli mai faasia ’i thalo. ²¹ Ma nia kau talana noni kolu nee maketho ma kau mae lau bana, ma kau thaungana noni kolu ka ngwaasinasina ilingia nonina. Nia kau faafaalua noni kolu ’urineri ’ana suukwaia baita ne ’e too ’ana ’uria ’initolae faafia doo ki sui.

¹ Doora nau ki ’ae, molu ka takwe suukwai ’ana Aofia. Nau ku liothau ’asiana ’ani kamolu, ma ku dooria kwai rikilamolu. Nau ku nonithathala ’asiana suli kamolu. ² Iuka, kamurua ni Iudia ma ni Sintike, nau ku gani kamurua fasi muru ka too faasia olisusuulae, sulia muru ngwaithaasina ki naa ’ana na Aofia. ³ Ma tha Sisigus, ’oe laubo na ngwane rao kwaimani ’okae fone nau. Nau ku dooria ’oko ’adomia roo keni neri ki, sulia daru rao suukwai fone nau, ma fonea tha Klement, ma fonea imole ’oro ki ’uria faatalolae ’ana Faarongolae ’Okae. Tha God ’e kedaa naa thatada teefau ’i laona buka nia, si kula ne ’e kedaa naa thatana imole ki ne dau too ’ana mooria ne totoo firi. ⁴ Molu ka nonithathala ’ana si manga ki sui sulia na ofulae kamolu fonea na Aofia. Ma ku thaea lau, molu ka nonithathala! ⁵ Molu ka faatana na enoenoa fuana imole ki sui, sulia na Aofia kau dao ’ali’ali na mai. ⁶ Molu ka too faasia manata ’a’abolae sulia ta si doo bana. Sui ta, molu ka foasia ’amolu tha God, ma molu ka gania ’uria si doo ki ne molu ’atongia, ma molu ka tangoa. ⁷ Ma na enoenoa nia tha God kau too ’i laona moorilamolu ma ’i laona manatalamolu, fasi molu ka too faasia na ’a’abolae ma na maulae. Ma tha God kau fala enoenoa nia fuamolu, sulia molu too ofu fonea tha Jisas Kraes. Ma na enoenoa nia ’e langi ta imole si thaitamana teefau ’ania. ⁸ Doora nau ki ’ae, si baea ’i’isi nau fuamolu naa nee. Molu ka manata sulia si doo mamana ki, ma si doo ki ne imole ki da faare baita ’ania, ma si doo ’o’olo ki, ma si doo ne folaa faasia ta’alae, ma si doo ’okae ki. ⁹ Molu ka roosulia na toodoolae nee ku fala fuamolu. Ma molu ka ade sulia na abulolaku ne molu rikia ku too ’ania, ma ku bae ’ania. Ma tha God ne fala enoenoa fuakolu, nia kau too fone kamolu. ¹⁰ Sulia na ofulae nau fonea na Aofia, nau ku nonithathala ’asiana sulia si falelae bae molu fala lau fuaku. ’E tau na mai, ne ’afitai fuamolu ’uria faatailana liothaua kamolu fuaku, sulia ’e langi molu si too ’ana ta si manga fasi molu ka fala. ¹¹ ’E langi kwasi ’uga bo nee ku olikukuru ’ana ta si doo. Sulia si manga neri, na toolaku ’e langi si ’okae, sui ta, na manatalaku ’e fono bana sulia si doo ne ku too naa ’ania. ¹² Si manga ki sui, nau ku siofaa baku. Ma tai si manga, ku too baku ’ana doo ’oro ki. Ma ku thaitamana na manatalaku ’e fono bana ’ana si manga ki sui, boroi ’ana si manga ’ana abusua ma langi si manga ’ana fioloa, ma si manga ku too ’ana doo ’oro ki ma langi si manga ku too ’ana ange si doo bo. ¹³ Nau ku tala’ana baku ililana doo neri ki sui, sulia tha Jisas Kraes ne faasuukwai nau. ¹⁴ Ma boroi ’ana ka ’urineri, na kwai’adomia bae molu fala mai fuaku si manga ku too ’ana ’afitaia, ’e ’okae ’asiana. ¹⁵ Kamolu imole ki ’i Filipae, kamolu molu thaitamana sui naa, ni kamolu banaa na imole manata mamana ki ne molu ’adomi nau. ’Ana si manga bae molu fi thafali rongoa na Faarongolae ’Okae, si manga bae ku ’akwasi kamolu laona bali fera ’i Masedonia, ’e langi ta kulee toaa si fala bo ta si malefo fuaku. Tee talifili kamolu bo bae molu ’adomi nau mai. ¹⁶ Ma si manga ku dooria kwai’adomia ’i laona maetoaa ’i Tesalonaeka, kamolu bae molu fala malefo fuaku ’ana roo si manga. ¹⁷ Nau kwa si bae lau ’urineri fasi too molu ka fala bo ’amolu ’aku. Nau ku dooria ’aku thasa na kwaiaraa nia tha God fuamolu ka baita. ¹⁸ Aia, nau ku ngala sui naa doo ki sui ne molu fala mai fuaku, ma ka baita talua naa si doo ki ne ku dooria. Nau kwasi dooria naa ta si doo, sulia tha Epafroditus ’e fala sui naa kwai’adomia kamolu fuaku. Si doo neri ’e ilingia ta foalae nee moko ’okae, ne tha God ’e nonithathala sulia. ¹⁹ Ma tha God ne nau ku rao fuana, nia kau fala doo ki sui ne molu ’atongia fuamolu, faasia na doo ’oro ’okae nia ki. Nia ’e fala doo neri ki fuakolu sulia tha Jisas Kraes. ²⁰ Kolu sui bo kolu ka faabaitaa tha God na Maka kolu ne totoo firi! ’E mamana. ²¹ Nau ku fala kau si bae ’okaelae nau ki fuamolu teefau ne molu manata mamana ’ana tha Jisas Kraes. Ma na doora kolu ki nee meli too kau ’i see, kera teefau laubo da fala kau si bae ’okaelae kera ki fuamolu. ²² Na imole manata mamana ki sui ne da too ’i see ’i Rom, ma ka tatha ’asiana, faasia na doora kolu ki ne da too ’i laona beu nia na ngwane ’inito ’i Rom, kera laubo da fala kau si bae ’okaelae kera ki fuamolu. ²³ Nau ku foa fasi na Aofia tha Jisas Kraes ka ade ’okae fuamolu ’ana faatailana na liothaua nia fuamolu teefau.