Filemon

Filemon

¹ Nau tha Pol, ne ku too ’i laona dele sulia na raoa nau fuana tha Jisas Kraes. Kamiria tha Timoti na doora kolu ’i laona manata mamanalae, kamiria miri fala kau si bae ’okaelae kamiria ki fuamu tha Filemon, na ngwane kwaimani kamiria ne ’e rao ofu fone kamiria. ² Ma miri ka fala laubo si bae ’okaelae ki fuada na imole manata mamana ki ’ana tha Jisas Kraes ne da ofu mai ’i beu ’oe, ma na ngwaingwane kolu ’ana tha Kraes ni Afia, ma tha Arkipus na ngwane ne ’e suusia na faarongolae ’okae fone kamiria. ³ Nau ku foa fasi tha God na Maka kolu ma na Aofia tha Jisas Kraes daru ka fala ’okaelae ma enoenoa fuamolu. ⁴ Filemon ’ae, ’ana si manga ki sui ne ku foa fuamu, nau ku faabaitaa God nau, ⁵ sulia ku rongoa na liothaua ’oe fuana imole nia ki sui tha God, ma na manata mamanalae ’oe ’ana tha Jisas na Aofia. ⁶ Nau ku foa fasi na ’ado kwaimanilae nee molu ilia fonea tai imole ki ne da manata mamana kau adea molu ka thaitamana si doo ’okae ki ne tha God ’e fala fuakolu ’ana tha Kraes. ⁷ Doora ’ae, ’oko liothau ma ’oko faanonithathalaa imole nia ki sui tha God ’i see nena. Si doo neri ne adea ma ku nonithathala ’asiana ma ka faaenoenoa ’asiana mangoku! ⁸ - ⁹ Sulia ’e ’urineri, nau ku gani ’oe ’uria tee si doo ne fulingana ’oko ilia. Sui boroi ’ana ku too ’ana suukwaia ne tha Jisas ’e fala fuaku ’uria ganilamulae ’uria si doo nee, langi ku si ade bo ’urineri. Nau ku gani ’oe, sulia ku liothau ’ani ’oe. Nau tha Pol, na ngwane ne ku ngwaro naa ne ku too ’i laona dele sulia na raoa nau fuana tha Jisas Kraes, ¹⁰ nau ku gani ’oe ’uria tha Onesimus, na ngwane ni tofa rao ’oe, bae ’e tafi faasi ’oe. Nau ku dooria ’oko manataluke nia naa. Nia ’e ilingia naa ngwela nau sulia si manga ku too ’i laona dele, ku ’adomi nia fasi nia ka manata mamana. ¹¹ ’Ana si manga bae sui kau, tha Onesimus na tofa doo bana fuamu sulia ’e tafi, sui ta, si manga neri nia ’e ’adomi ’oe naa ma ni nau laubo. ¹² Boroi ’ana ku liothau ’asiana ’ana tha Onesimus, nau ku olitana na kau ’i siamu. ¹³ Nau ku too ’i laona dele, ’uria ’okaelana na Faarongolae ’Okae. Ma ku dooria fasi tha Onesimus ka too fasi ’ana ’i see siaku si manga neri, fasi ka ’adomi nau ’i fulingamu. ¹⁴ Ka ’urineri boroi ’ana, nau kwasi suumana lau thasa ’oko ’adomi nau, sui ta, nau ku dooria ’aku thasa ’oko ilia sulia na liomu ’ana ’i tala’amu. Ma ’e langi kwasi ilia ta si doo, lelea sa ’e langi ’o si alafaafia. ¹⁵ Alamia tha Onesimus ’e lea ka too tau faasi ’oe ’ana si manga kukuru neri bana tomone, fasi nia ka too ngado fone ’oe ’ana si manga ne oli ’alaa. ¹⁶ Ma ’ana si manga neri, ’e langi lau ta ngwane ni tofa rao bana, nia ’e talua naa ngwane tofa rao. Nia na doora liliothau ’okae koro ’ana tha Jisas Kraes. Nau ku manata baita ’asiana ’ani nia, ma ni ’oe tha Filemon, ’oko manata baita ’ana tha Onesimus ka talu nau lau, sulia nia na ngwane tofa rao ’oe, ma nia ta doora laubo ’amu ’ana na Aofia. ¹⁷ ’Oko konitana lau tha Onesimus, ka ilingia ne ’o konitai nau, sulia ’o manata baita ’ani nau, na ngwane ne koro rao kwaimani fuana Aofia. ¹⁸ Ma ilingia ne ’e ilia ta si doo ne garo fuamu ma langi ka ngalilanga ’ana ta si doo faasi ’oe, ’oko alua ’amu faafi nau fasi nau naa ne ku duua kau fuamu. ¹⁹ Aia, nau ku kedaa kau si kekedalae nee ’ana ’abaku ’i tala’aku ku ’urii, “Nau tha Pol ne kwau duua fuamu si doo ki ne nia ’e ngalilanga ’ania.” (Sui ta, ’e langi ’o si manataburo ’ana na ngalilangaa ’oe faasi nau ’e baita ’asiana, sulia ku ’adomi ’oe ’uria manata mamanalae ’ana tha Jisas Kraes.) ²⁰ Nia nee, doora ’okae nau ’ana tha Kraes, nau ku dooria ’oko ’adomi nau ’ana si doo nee, sulia kwaimania koro ’ana na Aofia. ’Oe ’o faanonithathala nau ’asiana lelea sa ’o ilia mai si doo neri fuaku! ²¹ ’Ana si manga neri ku kekeda kau, nau ku manatatoona ne ’ou ilia bamu ta si doo ne nau ku gani ’oe kau ’uria, ma nau ku thaitamana ’ou ilia bamu ta si doo baita talua si doo nee nau ku gani ’oe ’uria. ²² Ma ’oko kwaimaakwali laubo ’ana ta kade beu fuaku, sulia ku manatatoona ne tha God kau fala teefau ’ania si doo bae ki molu gani ’uria ’ana foalae, ma nia kau olitai nau kau ’i siamolu faasia ’i laona dele nee. ²³ Ma tha Epafras, nee ’e too laubo fone nau ’i laona dele sulia ’e rao fuana tha Jisas Kraes, nia ’e fala kau si bae ’okaelae nia ki fuamu. ²⁴ Ma tha Mak, ma tha Aristakus, ma tha Demas, ma tha Luk, na ngwane rao kwaimani nau ki, da fala laubo kau si bae ’okaelae kera ki fuamu. ²⁵ Nau ku foa fasi na ’okaelae nia tha Jisas Kraes na Aofia ka too fone kamolu teefau.