Jiud
11 Nau tha Jiud, na ngwane ni rao nia tha Jisas Kraes ma na doorana tha Jemes. Nau ku kekeda kau fuamolu imole ki ne tha God na Maka ’e fili kamolu ma ka liothau ’ani kamolu, ma tha Jisas Kraes ka lio suli kamolu. 2 Nau ku foasia tha God fasi nia ka kwaimanatai fuamolu ma ka fala na enoenoa mamana fuamolu ma na liothaua baita nia fuamolu. 3 Imole kwaimani nau ki ’ae, ’i nao, nau ku dooria ’asiana kekedalae kau fuamolu sulia na kwaifaamooria nee tha God ’e faamoori kolu ’ania. Sui ta, ’ana si manga neri nau ku dooria kwau kekeda sulia ta si doo ’e’ete lau fuamolu. Nau ku dooria kwau bae fifii fasi molu ka takwe suukwai ’usia na ngwane ki ne da thasi ’uria bulasilana toodoolae mamana ne tha God ’e fala fuakolu na imole nia ki. Tha God ’e fala dangatai naa ’ania toodoolae ’uria si manga ki sui, ma ’e langi nia si dooria ta ngwane ka talana toodoolae mamana neri. 4 Nau ku thaea si doo neri sulia tai imole ki ’e langi da si manata mamana ’ana tha God, da lea mai, da ka ofu fone kamolu. Ma da ka thaea thasa da manata mamana, sui ta, da bulasia na toodoolae mamana sulia na liothaua nia tha God, fasi na oea ne da ilia na rikilana ka ilingia ’ana ta doo ’o’olo bana. Ma ’e langi da si manata mamana bo ’ana tha Jisas Kraes. Talifilia nia bo na ngwane ’inito kolu ma na Aofia kolu. Aia, na Kekedalae Abu ’i nao ’ua na mai ’e bae sulia na kwakwaelae kera neri. 5 Si doo nee kwau bae kau sulia, molu thaitamana sui naa. Sui boroi ’ana, nau ku thaea lau fuamolu fasi ka langi molu si kwaiborotai ’ania. ’Ana si manga ’i nao ’ua na mai, tha God ’e ’adomia imole nia ki fasi da ka tafi faasia maetoaa ’i Ijip. Ma ’i burina ne da lea faasia ’i Ijip, tha God ka thaumaelia ta bali ’ada ne ’e langi da si manata mamana ’ani nia. 6 Molu ka manata sulia na enselo ki ’i thalo ’ana si manga ’ua na mai. Ta bali ’ada da dooria da ka ’inito talua na doo ne tha God ’e fala fuada, ma da ka lea faasia na fera ni toolae mamana kera. Sulia da ’urineri, tha God ka alu kera ’i laona dele ne rorodoa. Ma nia ka kanifaafida ’ana kwale seni ne totoo firi ne ’afitai naa da ka nagaa. Ma da ka too naa ’urineri maasia fe Dani ne kau dao mai fasi tha God ka fala na kwakwaelae fuada. 7 Molu ka manata laubo sulia na imole ki ne da too ’i laona maetoaa ki ’i Sodom ma ’i Gomora, ma na maetoaa karangi kera ki. Da ilingia laubo na enselo neri ki, sulia da too laubo ’ana oea ma toolada ka ta’ae ’asiana. Ma na imole ki ’i seeri, ma ’e langi lau na keni ki talifilida nee na ngwane ki da ’a’abo ’ani kera, sulia na ngwane ki da kaubare laubo fone kera kwailiu. Ma sulia si doo neri, ne tha God ka fala kwakwaelae ’ana ere ne totoo firi fuada. Ma si doo neri ne ilingia na bae fifiilae nia tha God fuana imole ki sui ’uria si manga ne kau lea mai, ne kau fala na kwakwaelae ’urineri. 8 Ka ’urineri laubo fuana imole ki ne da toolamana sukelae ki ’i malutamolu. Da ilia naa si doo ta’ae ki ’ana nonida, ma da thaea thasa da roosulia si doo ki ne da rikia ’i laona maleubolelae ki. Ma da ka otekera ’ana ’initooa nia tha God, ma da ka baetataga ’ana enselo ’inito ki ’i thalo. 9 Tha Maekol boroi, na enselo ’inito ’ana enselo nia ki tha God, ’e langi si ilia bo si doo ’urineri. Sulia si manga tha Mosis ’e mae naa, tha Maekol ma tha Saetan daru olisusuu sulia sa ni ti ne kau ngala nonina tha Mosis. Ma tha Maekol boroi ’e langi si nonirara’a bo fasi ka baetataga fuana tha Saetan. Sui ta, nia ’e bae bana ’urii, “Tha God kau balufi ’oe.” 10 Sui ta, fuana ngwane bae ki da toodoo susuke, da bae ta’ae ’asiana sulia si doo ki ne ’e langi da si thaitamana. Da ilingia doo moori kwasi ki ne ’e langi da si manata. Sulia imole neri ki da ilia bada si doo ki ne nonida ’e dooria, ma si doo neri ki ne ’e faafunui kera. 11 Kwaimanatai fuada, sulia tha God kau fala kwakwaelae baita fuada! Sulia da ade ta’ae ilingia tha Kein. Ma da ilingia tha Balaam ne ilia bana si doo ne ’e thaitamana kau toda malefo ’ania. Ma da ilingia laubo tha Kora ne ’e tatae suusia tha God, ma tha God ka faafunuida laubo ilingia tha Kora. 12 Ma na ngwane toodoo susuke neri ki, da ofu fone kamolu ’ana si manga ne molu ofu ’uria fanga kwaimanilae, ma da si ’ida bo ’ana suumailada ’i tala’ada ’uria fangalae. Ma sui boroi ’ana ’e langi da si ’ida, kamolu nee ’e ’okae fasi molu ka ’ida ’ana si manga da ofu fone kamolu. Sulia kera na tofa doo bana, ilingia ta si datha ne langi si fala ta uta, ma na thauthau ka thaulia laubana. Ma da ilingia laubo na ’ai ki ne langi da si fungu ’ana si manga ’uria fungulae, sulia da mae sui naa, ma da ka kasi teefau naa ’anida. 13 Ma na imole neri ki, da ilia doo ta’ae ki ni ’idalae ’ania, da ilingia na nanafo baita ki ne da ofua ngingisu bilia ’oro ki sulia one. Ma sulia na toodoolae susuke kera ki, da ka ilingia laubo na bubulu ki ne da ’idu faasia si kula mamana kera ki. Ma God ka kwaimaakwali naa ’ana fera rorodoa ni toolae ’ana fuada ne ’e totoo si sui. 14 Iuka, ma tha Enok ne na fiuna uni ngwane ’ana kwalafaa faasia tha Adam ne bae sulia na ngwane neri ki ’ua na mai ka bae ’urii, “Na Aofia kau lea mai fonea mola ma na tooni enselo abu nia ki, 15 fasi ka ketoa imole ki sui. Ma nia kau fala naa kwakwaelae fuana imole ki sui ne ’e langi da si manata mamana ’ani nia, sulia na doo ta’ae kera ki ne da ilia ma sulia na bae ta’alae kera fuana tha God.” 16 Na imole neri ki, da ngunungunu ma da ka ’ugalia imole ki. Ma da ka roosulia na kwaidoorilae ta’ae kera ki. Ma da ka tango kera ’i tala’ada, ma da ka gaea imole ki fasi da ka ngala tai si doo faasida. 17 Sui ta, imole kwaimani nau ki ’ae, molu ka manatatoona si baea bae na aposol nia ki na Aofia kolu tha Jisas Kraes da thaea fuamolu. 18 Da bae ’urii fuamolu, “’Ana si manga neri ka lea mai ’ana fe dani ’i’isi ki, tai imole ki ne da faangwaela ’ani kamolu dau dao mai. Ma da ka roo ’ada sulia na kwaidooria kera ki ’i tala’ada ne da takwe suusia tha God.” 19 Na imole neri ki da tagalangainia ofulada na imole manata mamana ki. ’E langi da si too ’ana Mangoedoo Abu, ma na kwaidooria ta’ae kera ki ’i tala’ada ne ’e talaida. 20 Ma kamolu na imole kwaimani nau ki, molu ka suukwai ’ana ’adomilamolu kwailiu fasi molu ka suukwai ’i laona toodoolae nia tha God ne ’e fala fuamolu. Ma molu ka foa ’ana suukwaia nia na Mangoedoo Abu. 21 Molu too kwaimani ma molu ka thaitamana ne tha God ’e liothau ’ani kamolu. Ma molu ka kwaimaakwali maasia na Aofia kolu tha Jisas Kraes ne fala mooria ne totoo firi fuamolu sulia na kwaimanataia nia. 22 Ma fuana imole ki ne manata mamanalae kera ka si suukwai, molu ka liothau ’ani kera. 23 Ma molu ka ’adomia tai ngwane ki lau ’ana laulada fasi ka langi da si lea ’uria si kula ni kwakwaelae ’ana ere. Ma tai imole ki lau, molu ka kwaimanatai fuada, ma molu ka mau laubo ade’ana molu ka ade ta’ae laubo ilingi kera. Molu ka otekamolu ’ana ade ta’alae kera ki ne da ilia sulia na kwaidooria ta’ae kera ki. 24 Kolu ka faabaitaa tha God ne ’e tala’ana ’adomilamolu faasia na abulota’alae fasi molu ka too ’o’olo ’ana nonithathalalae si manga ne nia kau ngali kamolu ma molu ka too fonea ’i laona ’initooa ’okae nia. 25 Ma talifilia tha God bo ne ’e faamoori kolu ’ana Aofia kolu tha Jisas Kraes. Ilingia ’i nao mai, ma ’ana si manga neri, ma ’ana si manga ne kau dao mai ne totoo si sui, tha God ’e too ’ana ’initooa, ma na gwaungaia, ma na mamanaa, ma na suukwaia! Iuka ka ’urineri naa.