Jemes

Jemes

¹ Nau tha Jemes na ngwane ni rao nia tha God ma tha Jisas Kraes na Aofia. Na bae ’okaelae nau ki fuamolu imole nia ki sui bo tha God, ne molu too ’ana si kula ki sui ’i laona molaagali. ² Nau ku ’alangi kamolu ’ana dooraku ki sulia tha God naa na Maka kolu teefau. Si manga molu daotoona ilitooa ’oro ’e’ete kwailiu ki, molu ka nonithathala, ma molu ka manata sulia si doo neri kau ’okae fuamolu. ³ Molu thaitamana, si manga molu kau daotoona ilitooa, molu ka takwe suukwai ’ana manata mamanalae kamolu ki, ’urineri na manata mamanalae kamolu ’e suukwai ’asiana. ⁴ Molu ka takwe suukwai ’urineri lelea ka dao ’ana suilana molaagali, fasi molu ’okae teefau ma molu ka si oli kukuru ’ana ta si doo. ⁵ Sui ta, lelea sa ta imole ’ani kamolu ’e langi si too ’ana liotooa ’uria takwelae suusia ilitooa, nia ka gania tha God, ma tha God kau fala fuana. Sulia tha God ’e nonithathala ’asiana ’uria falelana mai doo ’oro ki fuana imole ki sui, ma ’e langi si ekwatana bo ta imole ne ’e gani nia. ⁶ Si manga ta imole ’e gania tha God, nia ka fiitoo ’ana tha God ma ka langi si manata ruarua lelea sa ’e dooria kwai’adomia. Ma lelea sa ta imole ka manata ruarua ’urineri, nia ’e ilingia na nanafo ’i asi bae na thauthau ’e thaulia ma ka tagalangana bana. ⁷ - ⁸ Na imole ’urineri, ’e too ’ana roo si lioe ngwane ’ana abulolana teefau, sulia na manatalana ’e langi si ngado ’ana tee si doo. Sulia ’e ’urineri, nia si fiia bo thasa na Aofia kau fala ta si doo fuana. ⁹ - ¹⁰ Doora nau ki ’ae, sui boroi ’ana tai ngwane ’amolu da ka siofaa ma tai ngwane da ka totoda, kamolu sui bo molu ka nonithathala, sulia tha God ’e faa’initooa na ngwane siofaa ki, ma ka faafaekwaa na ngwane totoda ki. Sui boroi ’ana ta ngwane ’e totoda ka baita, na doo ’oro nia ki kau funu, ilingia na takana ’ai ’okae ki ne da afurangga, ma ka too bo sulia kae si manga kukuru. ¹¹ Ma si manga na thato ’e tae mai ma ka thatofia takana ’ai neri ki, da ka kuku, ma da ka mae naa, ma da ka ’asida naa ’i thaegano, ma na kwangalada kau sui laubana. Ma ka ’urineri laubo fuana na ngwane totoda, nia kau mae laubo si manga nia ’e ilia raoa ’ana konilana malefo fuana ’i tala’ana. ¹² Ka ’oilakea fuana imole ne ’e daotoona ilitooa ’oro ma na manata mamanalae nia ka ngado bana. Sulia, si manga na imole ’e manata mamana ma ka suukwai ’i laona na ilitooa ki, tha God kau fala mooria ne ’e totoo firi fuana. Na mooria ne totoo firi neri, tha God ne ’e alangana fuana imole ki ne da liothau ’ani nia. ¹³ ’E langi si ’okae fuana ta imole thasa tha God naa ne fala ilitooa fuana ’uria ililana ta si doo ne ta’ae. ’E langi si ’okae fasi nia ka manata ’urineri, sulia tha God ’e ’afitai ka ilitoona ta ngwane ’uria ililana ta si doo ta’ae, ma ’e ’afitai laubo fuana ta imole ka ilitoona tha God ’uria ililana ta si doo ta’ae. ¹⁴ Na kwaidooria ta’ae nia ngwane ’i tala’ana ne ’e ilitoona ma ka are nia ’uria ililana doo ta’ae. ¹⁵ Ma na kwaidooria ta’ae neri kau baita ma ka thau ’ana ta si doo ne ta’ae ’asiana. Ma si manga si doo ta’ae neri ’e baita, nia kau thaumaelia ngwane. ¹⁶ Nia nee, doora ’okae nau ki ’ae, ’e langi molu si fiia thasa na ilitooa ’uria ta’alae ’e ’ito mai faasia tha God. ¹⁷ Sulia na doo ’okae ki sui ne ’ito mai faasia tha God ’i thalo. Ma ’e ’afitai fuana tha God ka bulasia bibirangaa nia ’i tala’ana. Sulia nia ’e langi si ilingia na doo ki ’i lofona thalo ne ’e thaungana da ka rara mai, ma da ka ’idu, ma da ka tatala, ma da ka rorodoa. ¹⁸ Tha God ’e fili kolu ma ka fala mooria ne totoo firi fuakolu ’ana bae mamanalae nia. Ma ’ana na doo ki sui ne tha God ’e thaungana, kolu imole ki naa na doo ki ne ’e ’okae ka tatha. ¹⁹ Doora ’okae nau ki ’ae, molu ka manata ’okae sulia na baelaku ne ’e ’urii: Molu ka ’ali’ali ’uria fafurongolae, ma ka langi molu si ’ali’ali ’uria baelae, ma ka langi molu si rakethasu ’ali’ali. ²⁰ Lelea sa ta imole ka rakethasu, ’e ’afitai nia ka ilia ta si doo ’o’olo ne tha God ’e dooria. ²¹ Nia nee molu ka failuka naa ’ania ililana doo ta’ae ki, ma molu ka abulo naa faasia ta’alae kamolu ki teefau. Ma molu ka noni maabe ’uria roolae sulia baelana tha God ne alua naa ’i laona moorilamolu, ma ’e tala’ana kau faamoori kamolu. ²² ’E langi molu si suke kamolu ’i tala’amolu, alamia molu manata ’amolu thasa na rongolana bana baelana tha God ’e ’okae. ’E langi si ’urineri lau! ’E langi molu si fafurongoa bo ’amolu na baelana tha God, sui molu ka roosulia laubo si doo ki ne nia ’e thaea. ²³ Na ngwane ne ’e rongoa bana si baea nee ki, ma ’e langi si ade bo sulia si doo ki ne ’e rongoa, ’e ilingia na ngwane ne ’e rikia bana nununa maana ne ’e bilia ’i laona rebe iroiro. ²⁴ Ma na ngwane neri, ’i burina ne ’e lio ’okae ’ani nia ’i tala’ana, nia ka lea naa ’ana, ma ka manataburo ’ali’ali naa ’ana maana ’e lio ’urifita bae. ²⁵ Sui ta, na ngwane ne ’e lilio ’okae ’ana bibirangaa nia ki tha God, ma nia ’e langi si rongoa bana ma ka manataburo ’ania, ma ka ilia si doo ne na bibirangaa ki ’e thaea, tha God kau faa’okae nia ’ana si doo ki sui ne nia ’e ilia. Sulia na bibirangaa nia ki tha God ne ’e ’okae teefau, ma ka faanonilaa na imole ki. ²⁶ Lelea sa ta imole ’e fiia thasa nia ’e lea naa sulia bibirangaa nia ki tha God, sui nia ’e langi si dau faafia bo baelana, nia ’e suke nia bana ’i tala’ana, ma na foalae nia ki ’e langi si mamana bo. ²⁷ Tha God na Maka kolu ’e thaitamana bana ngwane ki ne da foasi mamana ’ani nia, ma da ka ilia si doo ’okae ki fuana imole ki, ilingia ’adomilana gwe ’oru ki, ma na ngwela inomae ki ne da too ’ana ’afitaia ki. Na ngwane ’urineri ki, ’e langi da si alamatana doo ta’ae ki ’i laona molaagali ka nagaa bibirangaa ’okae kera ki.

¹ Doora ’okae nau ki ’ae, sulia molu manata mamana ’ana tha Jisas Kraes na Aofia kolu ne ’e ’inito, ’e langi molu si kwai’ilisi bo ’i malutana imole ki ’ana rikilana bana bali ’ana nonii doo. ² - ³ Lelea sa ta roo ngwane daru dao mai ’ana ofulae kamolu, ta ngwane ne na ngwane totoda ma ta ngwane ai ka siofaa. Na ngwane totoda neri ’e ’afi ’ana maku ’okae ’asiana ki, ma ka alua fe kome ’okae ’i ’abana ma na doo ngwaasinasina ’ana kakauna. Ma si manga molu rikia ’ana, molu ka faa’initooa, ma molu ka bae ’urii, “Lea mai, ’oko too ’okae ’amu ’i see.” Sui, na ngwane siofaa neri ’e ’afi mumuu bana ’ana na mumui maku, molu ka bae ’urii, “O takwe kau ’i see loko, ma langi ’o gooru ’amu ’i thaegano ’i ninimana ’aeku.” ⁴ Lelea sa molu ka ade ’urineri, molu garo ’asiana, sulia molu tolingia imole ki ’urineri, ma molu ka kwai’ilisi sulia na manatalae ngwane kamolu ki ne ’e ta’ae. ⁵ Nia nee, doora nau ki ’ae, molu fafurongo fasi mai. Tha God ’e filia imole ki ne da siofaa ’i laona molaagali nee fasi da ka too ’ana manata mamanalae baita. Ma nia ka filia imole ’urineri ki fasi da ka too ’ana ’initooa ne ’e alangana naa totongenao ’uria falelana fuada na imole ki ne da liothau ’ani nia. ⁶ Sui ta, kamolu nee molu faasiofaa ’asiana imole siofaa ki. ’Urineri, ni ti kera ne da ilia na ta’alae fuamolu, ma da ka ngali kamolu ’uria keketoa? Na ngwane totoda neri ki naa! ⁷ ’Urii ma kamolu molu thaea thasa ni ti ne nagaa thata ’okae nia tha Jisas Kraes ne molu too laubo ’ana? Na ngwane totoda neri ki banaa! ⁸ Lelea sa molu ka roosulia na bibirangaa nia na Aofia ne ’e baita ka tatha, ’urineri tama nia ’e ’okae laubo fuamolu. Na Kekedalae Abu ki ’e thaea ka ’urii, “Molu ka liothau ’ana imole ki sui bo ka ilingia laubo ne molu liothau ’ani kamolu ’i tala’amolu.” ⁹ Sui ta, lelea sa molu ka kwai’ilisi ’i malutana imole ki ’ana rikilana bana bali ’i maa, ’urineri molu garo naa. Na bibirangaa ki ne faatana molu garo naa. ¹⁰ Molu thaitamana, lelea sa ta ngwane ka roosulia doo ki sui ne bibirangaa ki ’e thaea, sui ta, tee si doo bana ’ana bibirangaa neri ki ne ngwane neri ’e langi si roosulia, nia ’e ’oia naa na bibirangaa neri ki teefau. ¹¹ Sulia tha God ’e bae ’urii, “’E langi molu si kaubare.” Ma nia ka bae laubo ’urii, “’E langi molu si thaungwane.” Lelea sa ta ngwane si kaubare, sui nia ka thaungwane, nia ’e ’oia naa bibirangaa neri ki. ¹² Na bibirangaa neri ki ’e faanonilaa imole ki faasia ta’alae, ma na bibirangaa neri ki laubo ne tha God kau tooketa kamolu ’ania. Nia nee, molu ka lilio ’okae ’uria si doo ki ne molu thaea ma molu ka ilia. ¹³ Sulia si manga tha God ’e ketoa ’ana imole ki, nia ’e langi si manatainia ta ngwane ne ’e langi si manatainia imole ’e’ete ki. Ma na ngwane ne kwaimanatai ma ka ade ’okae fuana imole ki, tha God kau manatainia, ma kau ade ’okae fuana ’ana si manga ne nia kau ketoa imole ki. ¹⁴ Doora ’okae nau ki ’ae, ’e langi si ’okae fasi ta ngwane ka thaea thasa nia ’e manata mamana ’ana tha God, lelea sa nia ’e langi si ilia bo ta si doo ’okae ’uria faatailana manata mamanalae nia. Na manata mamanalae ’urineri ’e ’afitai ka faamoori nia. ¹⁵ Lelea sa ta doora ’amolu, ma langi ta ngwaingwane ’amolu ’e langi si too ’ana ta si maku ma langi ta si fanga, ¹⁶ ma molu ka bae bamolu ’urii fuana, “’E langi ’oe ’o si manata ’a’abo lau, ’o lea, ma ’oko ’afi ’okae ’amu, ma ’oko fanga abusu ’amu.” Lelea sa molu ka bae ’urineri, ma ka langi molu si fala bo ta si doo ’uria ’adomilana, ’urineri ’e langi lau na kwai’adomia neri. ¹⁷ Nia nee, lelea sa ta imole ka thaea thasa ’e manata mamana ’ana tha God, sui ta ’e langi si ilia bo ta si doo ’okae, na manata mamanalae ’urineri ’e langi si mamana bo. ¹⁸ Alamia ta imole ka bae bana ’urii, “Tai imole ki da manata mamana ’ana tha God, ma tai imole ’e’ete ki da ka ilia doo ’okae ki.” Sui ta, nau ku thaea, lelea sa ta imole ’e langi si ilia doo ’okae ki, nia ’e faatana ne na manata mamanalae nia ’ana tha God ’e langi si mamana bo. Sulia na ngwane ne manata mamana, nia kau faatana laubo manata mamanalae nia ’ana ililana doo ’okae ki. ¹⁹ Nau ku thaitamana molu manata mamana thasa tee God bo ne ’e too, ma si doo neri ’e ’okae ’asiana. Ma na mangoedoo ta’ae ki boroi da manata mamana laubo ’ana tee God bo ne ’e too, ma si doo neri ne adea da ka mau ma da ka lelebe. ²⁰ ’E langi molu si oengwanea! Nau ku faatana fuamolu, lelea sa ta ngwane ka thaea thasa nia ’e manata mamana ’ana tha God, sui ka langi si ilia bo doo ’okae ki, na manata mamanalae ’urineri ’e tofa doo bana. ²¹ Kamolu molu thaitamana naa ne kolu futa ’ana kwalafa nia tha Abraham. ’Urineri ’urifita nee tha God ka thaea thasa tha Abraham naa na ngwane ’o’olo? Nia ’e ilia doo ’okae ki ne adea ma nia ka ’urineri. Sulia ’e alua ’alakwa nia ’i fafona fuli ere ’uria afuafulae ’ani nia fuana tha God. ²² Molu riki folaa naa ’ania ne tha Abraham ’e manata mamana ’ana tha God ma ka ilia laubo doo ’okae ki. Ma na doo ’okae neri ki naa ne ’e adea manata mamanalae nia ka fono. ²³ Ma na doo ’okae ne tha Abraham ’e ilia, ’e faatana ne na Kekedalae Abu ki bae ’e ’urii, “Tha Abraham ’e manata mamana ’ana tha God, nia nee tha God ka ’alangi nia ’ana ngwane ’o’olo, sulia na manata mamanalae nia.” Nia nee, da ka ’alangia ’ana na ngwane kwaimani nia tha God. ²⁴ Kamolu molu rikia ma molu ka thaitamana naa, si manga ta ngwane ’e ilia si doo ’okae, nia nee tha God ka fi thaea ’ana na ngwane ’o’olo. Ma ka langi lau sulia na manata mamanalae nia tee bali bana. ²⁵ Ma ka ’urineri laubo ’ana ni Rahab na keni kaubare bae. Nia ’e konitana roo ngwane bae ki ’i Jiu ne tha Josua ’e odu keerua kau. Sui ’i burina, nia ka ’adomi keerua fasi daru ka tafi sulia ta tale ’e’ete na ’ana. Nia nee, sulia si doo ’okae neri ki ni Rahab ’e ilia, tha God ka thaea ni nia na keni ’o’olo. ²⁶ Nia nee, lelea sa na nonii doo nee ka langi ta mangoe doo ’i laona, na nonii doo neri ’e mae. Nia ka ’urineri laubo ’ana manata mamanalae. Lelea sa ta ngwane ka thaea thasa nia ’e manata mamana ’ana tha God, sui ka langi si ilia bo ta si doo ’okae, na manata mamanalae nia ’e langi si mamana laubo.

¹ Doora nau ki ’ae, ’e langi si tala’ana fasi imole ’oro ki ’i malutamolu da ka dooria toodoolae fuana imole ki. Molu thaitamana, kameli na ngwane ki ne meli toodoo fuana imole ki, tha God kau tooketa kameli ka talua imole ki sui. ² Kolu sui bo ne kolu abulo garo ’ana si manga ’oro ki. Sui ta, lelea sa ta imole ka dau faafia baelana, nia naa na ngwane ne fono. Ma nia ’e tala’ana ka dau faafia moorilana teefau. ³ Si doo neri ’e ilingia kae si thalo bae da alua ’i fakana hos, ma da ka bulasia nonina hos neri teefau ’ana kae si thalo neri bana, fasi ka lea ’ana ta si kula bana ne da dooria nia ka lea ’uria. ⁴ Ma kae si rebe ’ai ’uria tarilana baru ’e ’urineri laubo. Boroi ’ana na baru ka baita, ma na thauthau baita ka kwaea, kae si rebe ’ai neri ’e tala’ana bana tarilana baru neri fasi ka lea sulia manatalana ngwane ne ’e baita ’ana ngalilana baru neri. ⁵ - ⁶ Ma na meana imole ’e ’urineri laubo, sui boroi ’ana ka faekwa, nia ’e bae naunau ’asiana sulia doo baita ki. Na baelana imole ki ’e ilingia laubo na ere. Boroi ’ana ta kae si meakwethu, si manga ’e tharu, nia ka tharufia bana gano baita. Na baelana ngwane ne fungu ’ana doo ta’ae ’oro ki ’e ’urineri laubo. Nia na kae si doo bana ’i laona mooria kolu, sui ta ’e tala’ana ka nagaa mooria kolu teefau. Sulia na doo ta’ae ki ne imole ki da thaea, ’e ’ito mai faasia tha Saetan, ma ka nagaa moorilana imole. ⁷ Na ngwane ’e tala’ana ka faaraoa bana doo moori kwasi ki, ma na tha’aro ki, ma na loi ki, ma na thakwari ki. ⁸ Sui ta, ’e langi ta ngwane si suukwaia tala’ana faaraolana baelana ’i tala’ana. Sulia na baelana ngwane ’e ta’ae ’asiana, ma ka thaea doo ’afae ’asiana ki ’uria thaumaelilana ngwane, ma ’e ’afitai ta ngwane ka dau faafia baelana. ⁹ ’Ana na baelakolu ne, kolu faabaitaa ’ana na Aofia ma na Maka kolu, ma kolu ka taofia laubo ’ana tai imole ki ne tha God ’e thaungaida da ka ilingi nia laubo. ¹⁰ Si baea ’okae ki ma si baea ta’ae ki da kotho sui bo mai faasia tee fakae doo neri bo. Doora ki ’ae, doo ’urineri ki ’e langi si ’okae. ¹¹ Na kafo fonea na asi ’e ’afitai daru ka ’e thakatafa mai faasia tee mae busu bo. ¹² Ma ka ’afitai fuana kafo ni kuu ka busu mai faasia asi. Ma na ’ai ne da ’alangia ’ana figi, ’e ’afitai ka fungu ’ana fufue ’ai ne da ’alangia ’ana olif. Ma na ’oko ne da ’alangia ’ana grep, ’e ’afitai ka fungu ’ana fufue figi. Ma langi ta tee mae busu ’ana asi ’e langi si busu ’ana kafo ’okae. ¹³ Lelea sa ta imole ’ani kamolu ne thaea ’e too ’ana liotooa ma ka thaitamana si doo ne tha God ’e dooria kolu ka ilia, na ngwane neri ka faatana liotooa nia ma na thaitamedooa nia ’ana ililana si doo ’okae ki, ma nia ka faafaekwa nia ’i tala’ana. ¹⁴ Sui ta, lelea sa na liomolu ’e fungu bana ’ana liota’alae, ma na rakethasulae, ma na ’agudoolae, ’urineri ’e langi ’o si faabaita ’oe bo ’i tala’amu thasa ’oe ta ngwane liotooa ne ’o ade sulia kwaidooria nia tha God. Lelea sa ’oko faabaita ’oe ’i tala’amu ’urineri ’e langi ’o si mamana bo. ¹⁵ Na liotooa ’urineri ’e langi si lea mai faasia tha God ’i thalo. Doo neri ki ’e lea mai faasia ngwane ki bana ’i laona molaagali ma faasia tha Saetan. ¹⁶ ’Ana si manga na liona imole ’e fungu ’ana kwaifiilae ma na ’agudoolae, ’urineri nia ’e kaubarea bana doo ki sui, ma na doo ta’ae ’oro ki ka fuli laubo. ¹⁷ Sui ta, na imole ne ’e too ’ana na liotooa ne ’ito mai faasia tha God, ’e langi nia si ilia ta si doo ta’ae. Ma ’e langi si dooria firulae. Nia ’e kwaimani ’okae fonea imole ki sui, ma ka nonimaabe ’uria rongolana imole ki, ma ka too ’ana kwaimanataia fuana imole ki, ma ka ade ’okae fuada. Ma nia ka noni maabe fonea imole ki sui, ma nia si manata ruarua, ma ka langi si thasi ’uria sukelae ’ana abulolae nia. ¹⁸ Na imole ki ne da ’olosia firufirua ki ’i laona enoenoa, ni kera banaa na imole ’o’olo ki.

¹ ’Urii ma kamolu molu thaitamana si doo ne adea molu ka olisusuu, ma molu ka dooria firulae? Na manatalae ngwane ’uria doorilana doo ’oro ki fuamolu ’i talamolu ne ade ’urineri ’ani kamolu! Na manatalae ta’ae ’urineri ki ne firu fonea na manatalae ’okae kamolu ki. ² Kamolu molu dooria ’asiana doo ’oro ki, sui ta, ’e langi molu si too ’ania, nia nee molu ka dooria thaungwanelae. Ma ’ana si manga ’e langi molu si ngala doo ne molu dooria ’asiana, molu ka thafalia naa olisusuulae, ma molu ka firu na ’amolu. Molu thaitamana si doo ne ’e adea molu si too ’ana si doo ki ne molu dooria, sulia ’e langi molu si gania bo faasia tha God. ³ Molu gania tha God ’uria doo ki ma ’e langi molu si ngala, sulia na manatalamolu ’e ta’ae. Ma molu ka dooria bamolu si doo ne fala noni nonithathalalae fuamolu ’i tala’amolu bana. ⁴ Ma molu ka lea bamolu faasia tha God, ilingia ta ’afe ne lea bana faasia arai nia. Lelea sa molu kwaimani bamolu fonea doo ta’ae ki ’i laona molaagali, ’e ’urineri molu maalimae naa ’ana tha God. Lelea sa ta ngwane ka dooria lealae sulia na manatalae ’i laona molaagali, ’e ’afitai nia ka lea sulia na manatalana tha God. ⁵ Kamolu molu thaitamana naa na Kekedalae Abu ne ’urii, “Tha God ’e tanggi ’okae ’asiana sulia na Mangoe doo ne ’e alua ’i laona mooria kolu.” Si manga tha God ’e bae ’urineri, ’e langi nia si tofa bae bana. ⁶ Ma na liothaua nia tha God ’e baita fuakolu. Nia nee na Kekedalae Abu ki ka bae ’urii, “Tha God ’e otenia ’ana ngwane naunau ki, sui ta, nia ’e ade ’okae ’ana fuana ngwane ki ne da enoeno.” ⁷ Nia nee, molu ka faafaekwa kamolu ’i tala’amolu, ma molu ka ilia si doo ki ne tha God ’e thaea. Molu ka takwe suusia tha Saetan, ma nia ka tafi faasi kamolu. ⁸ Molu ka ’idu karangia tha God fasi nia ka ’idu karangi kamolu laubo mai. Molu ka faafaalua naa moorilamolu! Molu ka failuka naa ’ania doo ta’ae ’oro ki ne molu ilia! ’E langi molu si manata ruarua ’ana roolae sulia tha God. ⁹ Molu ka kwaimanatai ma molu ka angi faafia ta’alae kamolu ki, sulia ’e langi si ’okae ne molu ka ngwaela ma molu ka nonithathala. ¹⁰ Ma molu ka enoeno ’i maana Aofia fasi nia ka faabaita kamolu. ¹¹ Doora nau ki ’ae, molu ka too faasia na bae ta’alae fuamolu kwailiu. Lelea sa molu ka bae ta’ae fuana ta imole ne manata mamana laubo ’ana tha Kraes, ma langi molu ka ngenge nia, ’urineri molu ngengea naa na bibirangaa nia ki tha God. Ma ’ana si manga molu ngengea naa bibirangaa neri ki, kamolu ’e langi lau na ngwane ’uria roolae sulia bibirangaa ki. Kamolu ’ana ’i tala’amolu ne molu adea molu ka ilingia ’amolu na ngwane ’uria tooketalana na bibirangaa ki ne garo ma langi ka ’o’olo. Ma ’ana si manga molu ade ’urineri, molu si roo bo sulia na bibirangaa ki. ¹² Tha God ’e fala bibirangaa ki, ma nia ka tooketa kolu ’ania. Talifilia nia bo ne tala’ana faamoorilana ngwane ma na thaumaelilana ngwane. ’Urineri nee ’e langi ’o si too naa ’ana ta suukwaia ’uria ngengelana dooramu ne ’e manata mamana laubo. ¹³ Tai ngwane ’amolu da manata sulia si doo ki ’i laona manatalamolu molu ka bae ’urii, “’I tari’ina ma langi ’i bobongi, meli ka lea naa ’uria tee maetoaa baita. Ma meli kau too mai seeri sulia tee fe ngali, fasi meli ka ilia raoa kameli ki ’uria todalana malefo ’oro ki.” ¹⁴ Aia, nau ku thaea fuamolu, ’e langi ta ngwane ’ani kamolu si thaitamana ta si doo ne kau dao mai ’i bobongi. Sulia kolu ilingia bakolu gwe datha ’i laasikadangi ne thakatafa mai, ma na imole ki da ka rikia, sui ka langi ’ana laubana. ¹⁵ Fulingana si doo ne molu ka thaea ’e ’urii ’ana, “Lelea sa tha God ’e alamatai kolu fasi kolu ka moori ka tau ’ua kau, kolu ka ilia kwalukaela doo ki ne kolu manatatoona.” ¹⁶ Sui ta, molu faabaita kamolu ’asiana, ma molu ka faa’okae kamolu bamolu ’i tala’amolu. Ililana si doo ’urineri ki ne ’e garo ’asiana. ¹⁷ Nia nee ’ana si manga ne ta ngwane ’e thaitamana bana si doo ’okae ki ’uria ililana, ma ’e langi si ilia, na ngwane neri ’e abulo ta’ae naa.

¹ Ma kamolu na imole ki ne molu totoda, fulingana sa molu ka angi baita, ma molu ka isigwau naa ’ana si manga neri. Sulia na ’afitaia ne kau toe kamolu ’e baita ’asiana. ² Sulia na totodaa kamolu ki kau fura. Ma na maku kamolu ki, na ’aide ki dau ’ania. ³ Ma na malefo kamolu ki kau fura teefau laubo. Aia, tha God kau rikia na totodaa ne fura, ma nia kau kwae kamolu ’ana ere, sulia molu ’etea totodaa kamolu ki ’ana fe dani ’i’isi neri ki. ⁴ Molu ka manata fasi sulia na angia kera na ngwane rao kamolu ki ne da rao ’i laona raoa kamolu ki. Da angi sulia molu dau faafia fofolia kera ki ’ana si manga ki sui. Ma tha God kolu ne suukwai ka tatha, ’e rongoa sui naa angilae kera na ngwane rao neri ki. ⁵ ’Ana si manga neri, molu too ’ana doo ’okae ’oro ’asiana ki. Molu ka too ’ana si doo neri ki ma molu ka nonithathala ’asiana faafia. Sui ta, molu ilingia na buluka ne da faakobua, fasi ka tala’ana fe dani ne dau thaumaelia ’ania. ⁶ Ma molu ka ketoa ma molu ka thaumaelia naa ngwane ’o’olo ki, sui boroi ’ana ’e langi da si tae rakethasu bo ’uri kamolu. ⁷ Doora nau ki ’ae, molu ka fefelete, si manga molu kwaimaakwali ’ana fe dani ne na Aofia kau dao mai. Molu ka manata fasi sulia si manga ne ngwane ne rao ’i laona raoa, nia ’e noni maabe ni kwaimaakwalilae maasia na uta fasi ka ’aru, sui ka fi kwaimaakwali maasia na konidoolae. ⁸ Molu ka fefelete laubo. Molu ka takwe suukwai, sulia fe dani nia na Aofia ’uria daolae mai ’e karangi naa. ⁹ Doora nau ki ’ae, ’e langi molu si ’ugalia ta imole ’ani kamolu, fasi tha God ka langi si tooketa kamolu. Sulia tha God ’e kwaimaakwali naa ’uria tooketalana imole ki sui. ¹⁰ Doora ki ’ae, molu manata fasi sulia na profet bae ki ’i nao, bae tha God ’e bae ’ani kera. Sui boroi ’ana imole ki da ilia naa doo ta’ae ’oro ki fuada, da suukwai enoeno bada. Ma kamolu boroi, molu ka ade laubo ilingi kera. ¹¹ Kolu thaitamana, da nonithathala sulia na manata mamanalae kera ’e ngado. Molu rongoa sui naa si baea bae sulia tha Job. Na doo ta’ae ’oro ’asiana ki bae ’e daotoona, sui ta, ’e manata mamana bana ’ana tha God. Ma ’i buri, tha God ka liosuli nia, sulia tha God ’e manatainia imole ki, ma ka dooria ’asiana ’adomilana imole ki. ¹² Doora nau ki ’ae, tee si doo baita fasi molu ka thaitamana ’e ’urii, ’e langi molu si tofe ’urii, “’E mamana mai ’i thalo,” ma ka langi molu si bae ’urii, “’E mamana mai ’i laona molaagali nee.” Ma lelea sa molu thaitamana si doo ne ’e mamana, molu ka bae ’amolu ’urii, “Iuka ’e mamana.” Ma lelea sa molu thaitamana si doo neri ’e langi si mamana, molu ka bae laubo ’urii, “’E langi si mamana.” Ma lelea sa ka langi molu si roosulia si doo neri, tha God kau fala kwakwaelae fuamolu. ¹³ Ma lelea sa ta imole ’ani kamolu ka too ’ana ta ’afitaia, nia ka foa. Ma lelea sa ta imole ka nonithathala ’asiana, nia ka nguulia nguu ni tangolae fuana tha God. ¹⁴ Ma lelea sa ta imole ’ani kamolu ka matai, nia ka gania ngwane naonao ki ’ana ofulada na imole manata mamana ki fasi da ka foa faafia, ma da ka gwaia ’ana thatana na Aofia. ¹⁵ Ma tha God kau guraa imole matai neri sulia da foa faafia ma da ka manata mamana ’ana tha God. Tha God kau gura nia, ma na abulota’alae nia ki, tha God kau manatalukea naa faasi nia. ¹⁶ Nia nee, molu ka faatalo ’ania garolae kamolu ki fuamolu kwailiu, ma molu ka foa fuamolu kwailiu fasi molu ka ’okae lau. Na ngwane ’okae, na foalae nia ’e suukwai ma ka mamana. ¹⁷ Tha profet Elaeja, nia na ngwane bana laubo ilingi kolu. Ma si manga bae ’e foa suukwai fuana tha God fasi ka faasuia na uta, na uta neri ’e langi si ’aru sulia olu fe ngali ma na ono fe sinali. ¹⁸ Ma ’i buri, nia ka foa lau fuana tha God fasi ka fala lau mai na uta, ma na uta ka ’aru lau, ma na doo ki sui ’i fafona thaegano da ka moori, ma na ’ai ki da ka fungu naa ’ana fufue doo ki. ¹⁹ Doora nau ki ’ae, lelea sa ta imole ’ani kamolu ’e lea garo faasia na toodoolae mamana, ’e ’okae ’asiana ta ngwane ’ani kamolu ka olitana mai. ²⁰ Sulia si manga molu ade ’urineri, molu ’adomi nia naa neri, fasi tha God ka faamooria na mooria nia faasia maea, ma ka manatalukea naa ta’alae nia ki sui faasi nia.