Hibrus

Hibrus

¹ ’I nao ’ua na mai, tha God ’e bae fuana kokoo abu kolu ki ’ana si manga ’oro ma ’ana si doo ’e’ete kwailiu ki ’ana profet ki. ² Sui ta, ’ana fe dani ’i’isi nee ki, nia ’e bae naa fuakolu ’ana Ngwela nia. Ma ’ana na Ngwela nia neri, nia nee tha God ’e thaungana doo ki sui, ma nia laubo nee tha God ’e filia fasi ka too ’ana si doo ki sui. ³ Na Ngwela nia tha God ’e faatana baitalana ’initooa nia tha God, sulia keerua daru bobola bo. Ma laubo sulia na suukwailana ’ana baelana Ngwela nia ne tha God, ’e dau suukwai ’ana doo ki sui fasi ka langi si sui. Ma ’i burina ne ’e lafua naa na abulota’alae kolu ki, nia ka fi oli ’uria ’i thalo, ma ka too ’ana si kula ’inito ’i bali aolo ’ana tha God ne ’e suukwai ka tatha. ⁴ Tha God ’e faa’initooa Ngwela nia ka baita talua na enselo ki, ilingia laubo si thata ne ’e fala fuana Ngwela nia ’e ’inito ka talua si thata ne ’e fala fuada na enselo ki. ⁵ Sulia tha God bae ’e bae ’urii fuana Ngwela nia, “’Oe naa na Ngwela nau, ma ’i tari’ina nau naa na Maka ’oe.” Sui ta, tha God ’e langi si bae bo ’urineri fuana ta enselo. Ma ’e tau na mai ’i nao, tha God ’e bae laubo ’urineri sulia Ngwela nia, “Nau kwau Maka fuana, ma nia naa na Ngwela nau.” Sui ta, tha God ’e langi si bae bo ’urineri sulia ta enselo. ⁶ Ma si manga ’e karangi naa fasi tha God ka fala mai na Ngwela ulunao nia ’uria ’i molaagali, nia ’e bae ’urii, “Na enselo nau ki sui da ka foasi nia.” ⁷ Sui ta, tha God ’e bae ’urii sulia na enselo ki, “Na enselo nau ki da ka rao fuaku ilingia na thauthau ki, ma na ngwane ni rao nau ki da ka ilingia na ere ki.” ⁸ Ma sulia na Ngwela nia, tha God ’e bae ’urii, “’Oe naa tha God, ma na ’Initooa ’oe naa kau totoo firi. Ma ’oko ’inito faafia na imole ’oe ki ’ana ’o’oloa. ⁹ ’Oe ’o nonithathala sulia ’o’oloa, ma ’oko mamanggu ’ana ta’alae ki. Ma sulia si doo neri, nau na God ’oe, ku fili ’oe, ma ku fala laubo na nonithathalalae baita fuamu ’ana faabaitalae ne tatha talua ne ku fala fuana imole kwaimani ’oe ki.” ¹⁰ Ma tha God ka bae laubo ’urii fuana Ngwela nia, “Aofia ’ae, ’ana thathafalia mai, ’o thaungana molaagali ’ana ’abamu ’i tala’amu, ma ’oko thaungana naa mamangaa. ¹¹ Ma sui boroi ’ana si doo neri ki kau sui, ’oe ’o moori ka totoo firi. Kera dau ta’ae ilingia ta lafui maku. ¹² Ma ’oko kosuda ilingia ta ngwane bae ’e kosua ta lafui maku. ’Oe ’ou kosuda ilingia ta maku. Sui ta, ’oe nee, ’e langi ’o si tatala, ma na moorilamu ’e totoo si sui.” ¹³ Aia, ma tha God ka bae ’urii lau fuana Ngwela nia, “’Oko too ’i bali aolo ’ani nau, lelea ka dao ’ana ta si manga kwau alua ’oko siitatha ’ana maalimae ’oe ki.” Sui ta, tha God ’e langi si bae bo ’urineri fuana ta enselo. ¹⁴ Aia, ma na tae bo ne na enselo ki? Na enselo ki naa na mangoedoo ki ne da rao fuana tha God. Tha God ’e odua na enselo ki ’uria ’adomilana imole ki ne ’e faamoorida.

¹ Ma sulia ’e ’urineri, kolu ka dau suukwai faafia na toodoolae mamana ki ne kolu rongoa sui naa sulia Ngwela nia tha God, ade’ana ’urineri kolu ka lea garo faasia. ² Na bibirangaa ne na enselo ki da fala fuana tha Mosis, nia nee na doo mamana ki sui bo. Ma na ngwane bae ki ’e langi da si roosulia, tha God ka fala naa kwakwaelae ne ’o’olo fuana. ³ Nia ’e ’urineri laubo, ’e langi kolu si tafi faasia kwakwaelae nia lelea sa kolu aburongo ’ana toodoolae sulia na tala ’okae ne tha God ’e faamoori kolu ’ania. Na Aofia tha Jisas ’i tala’ana ne ’e thafali faarongo ’ana na tale ’okae ne tha God ’e faamooria kolu ’ania. Ma na ngwane ki ne da rongo nia, da ka thaea fuakolu, ma da ka faatana na toodoolae neri ’e mamana. ⁴ Ma tha God laubo ne faatana toodoolae neri ’e mamana. Sulia ’e fala na suukwaia fuada fasi da ka ilia si doo ni kwelelae ’ania ki ma si doo ’e’ete ki ni kwelelae ’ania. Ma nia ka fala laubo na suukwaia fuada faasia na Mangoedoo Abu ilingia ne ’e dooria. ⁵ Kolu thaitamana ne tha God ’e langi si filia na enselo ki fasi da ka ’inito faafia na molaagali faalu ne kau dao mai. ⁶ Sulia ta bali ’ana Kekedalae Abu bae ’e bae ’urii, “God ’ae, na ngwane na doo ’urifita fatai nee ’oko manata baita ’asiana ’ania? Sulia kera na ngwane ki bana. Ma ka ’urifita nee ’oko tanggi suli kera? ⁷ ’Oko thaungana fasi da ka faekwa ’i farana enselo ki ’ana kae si manga bo. Ma ’oko faa’inito kera, ma ’oko faabaita kera, ⁸ ma ’oko alu kera da ka ’inito naa faafia doo ki sui.” Aia, si Kekedalae neri ’e thaea ne tha God ’e alua imole ki da ka ’inito faafia doo ki sui. Nia ka faatana ne ngwane ki naa dau ’inito faafia doo ki sui ne tha God ’e thaungada. Sui ta, ’ana si manga neri, ’e langi kolu si rikia ’ua ne na imole ki da ’inito faafia doo ki sui. ⁹ Ma boroi ’ana ka ’urineri, kolu thaitamana sui naa ne tha Jisas naa ne ’inito. Tha God ’e alua fasi nia ka thau ’ana ngwane ma ka too ’i farana enselo ki ’ana kae si manga bo, fasi nia ka mae ’uria faamoorilana imole ki sui, sulia na liothaua nia tha God. Ma ’ana si manga neri, tha God ’e faa’inito nia ma ka faabaita nia, sulia na maelana. ¹⁰ Tha God ’e thaungana naa doo ki sui, ma nia ka dau laubo faafia doo ki sui. Ma nia ’e fala mai tha Jisas fasi ka ngada ma ka mae. Ma sulia ngadalana tha Jisas, ne tha God ka alua tha Jisas, na ngwane ne ’e fono ne ka faamoori kolu. Tha God ’e ilia naa si doo neri fasi ka fala na imole ’oro ki da ka thau ’ana ngwela nia ki, ma da ka ’inito laubo ilingi nia. Na raoa nia tha God ’e ’o’olo teefau. ¹¹ Tha Jisas ’e faafaalua imole ki faasia ta’alae kera ki. Nia nee kera fonea tha Jisas, da ka too ’ana tee Maka. Nia nee ’e adea tha Jisas ka si ’ida ’ana ’alangilada ’ana doorana ki. ¹² Ma tha Jisas ka bae ’urii fuana tha God, “Nau kwau faarongo ’ana fuana dooraku ki ’ana si doo ki ne ’o thaungana, ma kwau faabaita ’oe ’i laona ofulae kera.” ¹³ Nia ka bae lau ’urii, “Nau kwau fiitoona tha God.” Ma nia ka bae laubo ’urii, “Nau ku too ’i see, fone kera na ngwela ki ne tha God ’e faleda fuaku.” ¹⁴ Ma sulia kolu na ngwela neri ki, ma kolu imole ki ne kolu too ’ana nonii doo, tha Jisas ka thaingia laubo nonii doo ma ka imole laubo ilingi kolu. Nia ’e ade ’urineri fasi, ’ana maelana, nia ka faafunua naa tha Saetan ne too ’ana suukwaia ’ana maea. ¹⁵ Ma ’urineri tha Jisas ka lukea naa imole ki ne tha Saetan ’e ’inito faafida sulia na maulae kera ’ana maea. ¹⁶ Kolu thaitamana, ’e langi lau na enselo ki ne tha Jisas ’e ’adomida ’urineri. Sulia na Kekedalae Abu bae ’e thaea naa ka ’urii, “Nia ’e ’adomia naa kwalafa nia ki tha Abraham.” ¹⁷ Sulia si doo neri, nia ’e alua nia ka ilingi kolu naa na doorana ki, fasi nia ka alua ngwane ni foa baita kolu ne kwaimanatai fuakolu, ma ka ’adomi kolu ka lea lado ’i naofana tha God. Ma nia ka afuafu ’ani nia ’i tala’ana, fasi tha God ka manatalukea na abulota’alae kolu ki. ¹⁸ Ma ’ana si manga neri, nia ka tala’ana ’adomilana imole ki ne tha Saetan ’e ilitooda. Tha Jisas ’e tala’ana ililana si doo neri, sulia tha Saetan ’e ilitoona laubo ma nia ka ngada laubo ilingia na imole ki sui.

¹ Doora abu nau ki ’ae, tha God ’e fili kolu ’uria lealae ’i thalo. Aia, molu ka manata fasi sulia tha Jisas, ne kolu thaea ’ana foa ni gwau kolu, ma na ngwane ne tha God ’e fala mai. ² Tha Jisas ’e roosulia na kwaidooria nia ki sui tha God, ma tha God ne fili nia fasi ka rao fuana, ’e ilingia laubo tha Mosis ne roosulia na kwaidooria nia tha God, si manga ’e ’adomia imole nia ki tha God. ³ Sui ta, tha Jisas ’e baita ka talua tha Mosis, ka ilingia laubo na ngwane ne ’e thaungana beu, da faabaitaa nia talua na beu bae ’e thaungana. ⁴ Kolu thaitamana lelea sa kolu rikia ta beu, ’urineri tama ta ngwane naa ne thaungana neri. Ma tha God naa ne thaungana doo ki sui. ⁵ Tha Mosis na ngwane ni rao nia tha God, ’e roosulia tha God si manga ’e ’adomia imole nia ki tha God. Ma nia ka bae sulia si doo ne tha God kau bae sulia si manga ne kau dao mai. ⁶ Sui ta, tha Kraes naa, na Ngwela nia tha God, ma nia ’e ’adomi kolu ka lea lado bana ’i laona raoa nia ’ana ’initolae faafia imole nia ki tha God. Ma kolu naa na imole nia ki tha God, lelea sa kolu dau suukwai ’ana manata mamanalae ma na kwaimaakwalilae ’ana fiitooa ’uria si doo ’okae ki ne tha God kau fala mai fuakolu. ⁷ Nia nee, na Mangoedoo Abu ka bae ’urii, “’I tari’ina, lelea sa molu ka rongoa naa baelana tha God, ⁸ molu si faasadia na manatalamolu ilingia na kokoo abu kamolu ki ’ana si manga da otekera ’ana tha God, ma da ka aburongo ’ana tha God ’i laona bali fera kwasi.” ⁹ Ma tha God ka bae ’urii, “Sui boroi ’ana da ka rikia si doo ni kwelelae ’ania ki ne ku ilia sulia fai akwala fe ngali, da ilitooku si manga da si manata mamana ma da si kwairooi ’ani nau. ¹⁰ Sulia ku rakethasu ’asiana fuada, ma ku bae ’urii, ‘Kera da aburongo ’ani nau, ma da ka otekera ’ana roolae sulia si baea fifii nau ki.’ ¹¹ Aia, ku rakethasu, ma ku bae alangai ’urii, ‘E ’afitai da ka ruu ’i laona maetoaa ne ku kwaimaakwali ’ania fasi da ka momolo ai.’ ” ¹² Iuka, dooraku ki ’ae, molu ka lio suli kamolu ’i tala’amolu, ade’ana ’urineri ta ngwane ’ani kamolu ne manatalana ’e ta’ae, ma nia si manata mamana ’ana tha Jisas Kraes, ma ka otenia naa ’ana tha God ne moori. ¹³ Sui ta, molu ka ’adomi kamolu kwailiu ’ana si manga neri. Nia nee na Kekedalae Abu ’e thaea ’ana, “’i tari’ina.” Molu ka ilia si doo neri, ade’ana ’urineri ta ngwane ’amolu ka manata mamana ’ana sukelae sulia abulota’alae, ma na moorilana ka dola na ’ana faasia tha God. ¹⁴ Kolu fiitoo ’ana tha Kraes si manga kolu thafali manata mamana. Ma lelea sa kolu ka dau suukwai ’ana manata mamanalae kolu ’ana tha Jisas Kraes lelea ka dao ’ana si manga ’i’isi, ’urineri tha God naa kau fala doo ki sui ne ’e alangana fuakolu. ¹⁵ Sulia na Kekedalae Abu bae ’e bae ’urii, “’I tari’ina, lelea sa molu rongoa naa baelana tha God, molu si faasadia na liomolu ilingia na kokoo abu kamolu ki si manga da otekera ’ana tha God.” ¹⁶ Ma ni ti kera nee da rongoa sui naa baelana tha God, ma da ka otekera ’ana? Kera na imole ki ’i Jiu bae tha Mosis ’e talaida faasia ’i Ijip. ¹⁷ Ma ni ti kera ne tha God ’e rakethasu fuada sulia fai akwala fe ngali ki? Kera na imole ki ne da mae ’i laona bali fera kwasi sulia na abulota’alae kera ki ’i seeri. ¹⁸ Ma ni ti kera ne tha God ’e bae alangai suli kera, ka ’urii, “’E ’afitai da ka ruu ’i laona maetoaa ne ku thalungana fasi da ka momolo ’ania?” Tha God ’e bae sulia na imole ki ne da otekera ’ani nia. ¹⁹ Ma kolu thaitamana naa ne ’e langi da si tala’ana ruulae ’i laona maetoaa ni momololae neri, sulia da si manata mamana ’ana tha God.

¹ Ma sui boroi ’ana na imole neri ki ’e langi da si tala’ana ruulae ’i laona maetoaa neri ’uria momololae, na alangaia nia tha God ’e too ’ua bana. Ma kolu nee, tha God ’e soe kolu fasi kolu ka ruu ’uria momololae fone nia. Nia nee, kolu ka lio ’okae suli kolu, ade’ana ’urineri ta tee ngwane ’akolu ka tala faasia ruulae ’i seeri. ² Sulia kolu rongoa sui naa na Faarongolae ’Okae sulia na maetoaa ’ana momololae, ’e ilingia naa kokoo abu kolu ki ’i nao mai. Sui boroi ’ana da ka rongoa sui naa na faarongolae neri, ’e langi si ’adomi kera bo, sulia si manga da rongoa, da si manata mamana bo ’ania. ³ Ma talifili kolu bo, ne kolu manata mamana sui naa, kolu kau ruu ’i seeri ’uria momololae fonea tha God. Sulia nia ’e bae ’urii fuana imole ki da si manata mamana, “Nau ku rakethasu, ma ku alangai ’urii, ‘’E ’afitai da ka ruu ’i laona maetoaa ne nau ku kwaimaakwali ’ania fuada ’uria momololae ’ania.’ ” Tha God ’e bae ’urineri, boroi ’ana nia ka faasuia naa na raoa nia ma na fera neri ni momololae, ’ana si manga ’e thaungana na molaagali. ⁴ Sulia na Kekedalae Abu ’e bae sulia na fiuna fe dani ka ’urii, “’Ana fiuna fe dani, tha God ’e momolo naa faasia raoa nia ki.” ⁵ Ma na Kekedalae Abu ’e bae lau sulia ka ’urii, “’E ’afitai da ka ruu ’i laona maetoaa ne nau ku kwaimaakwali ’ana fasi da ka momolo ’ania.” ⁶ Na imole bae ki da thafali rongoa Faarongolae ’Okae, ’e langi da si ruu mai ’uria momololae, sulia ’e langi da si manata mamana. Nia nee, kolu ka thaitamana, tai imole ’e’ete ki ’ana ne tha God kau alamataida ’uria momololae. ⁷ Sulia tha God ’e alua naa si manga ’e’ete ’uria ruulae ’i laona momololae. Ma tha God ’e thaea si manga neri naa nee “’i tari’ina.” Sulia ’e tau na mai ’i burina si manga ne imole bae ki ’i nao da si manata mamana, tha Deved ka kedaa na baelana tha God ’i laona Kekedalae Abu ne nau ku thaea sui naa ka ’urii, “’I tari’ina, lelea sa molu rongoa naa baelana tha God, ’e langi molu si faasadia naa manatalamolu.” ⁸ Tha Josua bae ’e langi si fala momololae fuada na imole ki ’i Israel, nia nee ’e tala’ana tha God ka bae lau ’ana tha Deved sulia na momololae ’ana ta si manga ’e’ete ’i buri. ⁹ Nia nee, kolu thaitamana na momololae fuana imole nia ki tha God, nia ’e too ’ua, ma nia ta momololae ilingia bae tha God ’e momolo ’ana fiuna fe dani. ¹⁰ Sulia sa ni ti boroi ’ana ne momolo fonea tha God, ’e momolo teefau ’ana raoa nia ki, ilingia laubo tha God ne momolo si manga ’e faasuia raoa nia ’ana thaungailana na molaagali. ¹¹ Nia nee, kolu ka thasi suukwai fasi kolu ka ruu ’ana fera ni momololae ne tha God ’e kwaimaakwali ’ania, ade’ana ’urineri ta ngwane ’akolu ka langi si tala’ana ruulae, ilingia na imole ki ’i nao ne da si manata mamana, ma ’e langi da si ruu ’i laona momololae. ¹² Aia, na baelana tha God ’e ilingia ta doo moori ma ’e ilia si doo baita ki. Ma na baelana tha God ’e ilingia ta ’ila baita bae ’e ngari roo bali, sulia ’e kasi ka ruu ’i laona manatalakolu ma ’i laona moorilakolu, sulia ’e faatana fuakolu si doo ne ’okae ma si doo ne ta’ae ’i laona manatalakolu ma ’i laona kwaidooria kolu. ¹³ Ma ’e langi ta ngwane si thaufangana bo ta si doo faasia tha God, sulia tha God ’e rikia bana doo ki sui. Ma nia kau adea ma kolu ka faarongo ’ana si doo ki sui ne kolu ilia. ¹⁴ Ma sulia si doo neri ki, kolu ka dau suukwai ’ana manata mamanalae ne kolu bae sulia. Sulia kolu too ’ana foa ni gwau ne ’e tae naa ’i thalo, ma ka bae tala kolu ’i maana tha God. Nia naa nee tha Jisas, na Ngwela nia tha God. ¹⁵ Ma tha Jisas ne na foa ni gwau kolu, ’e thaitamana sui naa na maketholae kolu ki, ma nia ka ’adomi kolu sulia ’e siitatha sui naa ’ana ilitooa ki, ilingia tha Saetan ne ’e ilitookolu. Ma boroi ’ana tha Saetan ka ilitoona tha Jisas, tha Jisas ’e langi si ilia bo ta si doo ta’ae. ¹⁶ Nia nee, ’e langi kolu si mau ’ana lealae mai siana tha God ne ’e kwaimanatai fuakolu. Sulia nia kau kwaimanatai fuakolu ma ka ’adomi kolu, ’ana si manga kolu daotoona ’afitaia ki.

¹ Ma lelea sa ta ngwane ne da filia faasia na imole ki ’uria raolae mala ta foa ni gwau, kera da fiitoo ’ani nia thasa nia naa ne ’uria daolae ’i naofana tha God, ma nia na ngwane ne ’e bae ’i talana imole ki. Ma na raoa nia laubo, nia ka fala na falelae ki fonea na afuafulae ki fuana tha God fasi tha God ka manatalukea na abulota’alae kera na imole ki. ² Ma na foa ni gwau, nia na ngwane bana, ma nia ka ilia laubo si doo ki ne garo ’ana tai si manga, ’urineri nia ’e thaitamana ka marabibi fuada imole ki ne da lalafusi doo ma da ka lea garo. ³ Ma sulia na garolae nia ki ’i tala’ana, ’e ’okae fasi nia ka fala afuafulae ki, fasi tha God ka manatalukea na abulota’alae nia fonea na abulota’alae kera na imole ki. ⁴ Ma ’e langi ta ngwane si fili nia ’i tala’ana fasi ka ilia na raoa baita nia na foa ni gwau, sulia tha God ’i tala’ana ne ’e tala’ana fililana, ilingia bae ’e filia naa tha Aron ’ua na mai. ⁵ Nia ’e ’urineri laubo, tha Jisas Kraes ’e langi si fili nia ’i tala’ana fasi ka thau ’ana foa ni gwau, fasi nia ka too ’ana si raoa baita neri. Sui ta, tha God ’ana ne filia tha Jisas Kraes, sulia tha God bae ’e bae ’urii fuana, “’Oe naa na Ngwela nau, ma ’i tari’ina nau naa na Maka ’oe.” ⁶ Ma tha God bae ’e bae lau ’i laona ta Kekedalae Abu ka ’urii, “Ni ’oe ’ou foa ka totoo firi, ilingia tha Melkisadek.” ⁷ Aia, ma ’ana si manga tha Jisas ’e too ’ua ’i laona molaagali nee, nia ’e foa suukwai, ma ka angi ma na kafo ka igwa ’i maana fuana tha God ne ’e tala’ana faamoorilana. Ma tha Jisas ka faafaekwa nia ’i tala’ana, ma ka faare baita ’ana tha God, ma tha God ka rongoa na foalae nia ki. ⁸ Boroi ’ana nia na Ngwela nia tha God, nia ’e tatha ’i laona ’afitaia ki, ma si doo neri ’e toolamana fuana ’uria roolae sulia tha God. ⁹ Ma na ngadalae neri ’e adea ma tha Jisas ka thau ’ana foa ni gwau ne ’e fono, ma nia ka faamooria imole ki sui ne da roosuli nia, fasi da ka ngala na mooria ne totoo firi. ¹⁰ Ma tha God ka ’alangia tha Jisas Kraes ’ana foa ni gwau, ilingia bae tha Melkisadek na ngwane ni foa. ¹¹ Ma kameli meli dooria fasi meli ka bae ’ua sulia doo ’oro ki fuamolu. Sui ta, ’e ’afitai ’uria faamanatailamolu ’ania, sulia molu si tala’ana thaitamanalana ’ali’ali. ¹² Molu manata mamana ’ana tha Jisas ka tau na mai. Ma fulingana kamolu naa ne na ngwane toodoo ki ’ana si manga neri. Sui ta, ’e ’afitai ’asiana, sulia ’e langi molu si thaitamana ’ua ’ana toodoolae totongenao ki bae ’e lea mai faasia baelana tha God. ’E ’okae fasi ta ngwane ka olitana lau toodoolae fuamolu sulia si doo neri ki. ’E ilingia ne molu thasi ’ua ’uria susulae, sulia ne ’e langi molu si tala’ana ’ua na ’anilana fanga sadi ki. ¹³ Si manga na ngwane ’e faekwa ’ua, si fanga ne ’e ’ania banaa na susu, ma ’e langi si thaitamana ’ua si doo ne ’e ’o’olo. ¹⁴ Ma si manga na ngwane ’e baita naa, nia ka fi tala’ana ’anilana fanga sadi ki, ma ka fi thaitamana si doo ki ne ’e ’okae ma si doo ki ne ’e ta’ae.

¹ Ma ’e tala’ana kolu ka thaitamana naa na toodoolae ngwaluda ’urineri ki, ma kolu ka thaitamana naa na bibirangaa nia ki tha Kraes ne adea fiitooa kolu ka suukwai. ’Urifita nee molu ka oli, ma kolu ka toodoo lau ’akolu ’ana toodoolae totongenao nia bae ki tha Jisas? Kolu thaitamana naa ne kolu ka abulo faasia ta’alae, si doo ne tala’ana thaungilakolu ’uria maea. Kolu ka thaitamana naa ne kolu kau manata mamana ’ana tha God. ² Ma kolu ka thaitamana naa na bibirangaa ’ana sisiuabulae, ma bibirangaa ’ana alulana ’abana ngwane ki fafona gwaukolu. Ma kolu ka thaitamana naa ne na ngwane mae ki dau tatae faasia maea. Ma kolu ka thaitamana laubo ne tha God naa kau ketoa ngwane ta’ae ki, ma dau ngada ka totoo firi. ³ Ma lelea sa tha God ’e alamatai kolu, kolu kau thaitamana bibirangaa nia ki tha Kraes ne ’e tala’ana imole baita ki. ⁴ Na imole ki ne da manata mamana, sui lelea sa da fala ekwatai ’ana na manata mamanalae kera ki, ’e ’afitai ’asiana fuada da ka abulo lau fasi da ka manata mamana. ’I nao mai, ’ana si manga da manata mamana ’ua, da too ’i laona folaalae nia tha God, ma da ka ngala na falelae nia, ma da ka ngala teefau naa ’ana Mangoedoo Abu ka too foneda. ⁵ Ma da ka thaitamana laubo si doo ’okae ki sulia na baelana tha God. Ma da ka rikia laubo na suukwaia ne tha God kau faatana ’ana fe dani ki ne nia kau dao mai. ⁶ Ma sui boroi ’ana si doo neri ki ka fuli fuada, da abulo naa faasia na manata mamanalae kera ’ana tha God. Ma ’e ’afitai ’uria ’adomilada ma da ka abulo lau, sulia ’e ilingia da fotoinia lau na Ngwela nia tha God sulia ’airarafolo, ma kera da adea na imole ki da ka liota’ae ’ani nia. ⁷ Aia, na imole ki da ilingia naa raoa ne na uta ’e ’arungia ’ana si manga ’oro ki. Ilingia ta ’ai ’okae ne ta ngwane ’e fasia ma ka tae ’i seeri, tha God kau faa’okaea na raoa neri. ⁸ Ma lelea sa na ’ai ’e’ete ki ma langi na laua kwasi ki bana ne tae, na raoa neri ’e tofadoo bana, ma tha God naa kau fala kwakwaelae fuana raoa neri, ma nia ka suungia. ⁹ Aia, imole kwaimani ki ’ae, sui boroi ’ana na baelameli fuamolu ka ’urineri, kameli meli thaitamana bo ’ameli na manata mamanalae kamolu ki ’e suukwai ma ’e langi si sui, sulia molu too naa ’ana si doo ’okae ki sulia na mooria faalu ne tha God ’e fala naa fuamolu. ¹⁰ Tha God ’e ’o’olo ka lealado bana. Nia ’e langi si manataburo ’ana na raoa ’okae ki ne molu ilia, ma ’e langi si manataburo ’ana liothaua kamolu ne molu faatana, ’ana si manga molu ’adomia na imole nia ki ’i nao mai, ma ’ana si manga neri laubo. ¹¹ Ma na liomeli naa ne kamolu sui bo molu ka liothau ’ana imole ki, lelea ka dao ’ana fe dani ’i’isi, fasi molu ka ngala na doo ki sui ne molu kwaimaakwali ’ania ’i thalo. ¹² Ma ’e langi meli si dooria thasa molu ka noni ’e’ela. Sui ta, molu ka ilingia ’amolu na imole ki ne da manata mamana ’ana tha God ma da ka marabibi, ma ’urineri kera naa dau ngala si doo ki ne tha God ’e alangana. ¹³ Aia, molu ka manata fasi sulia tha Abraham. Si manga tha God ’e alangai fuana, nia ’e faasuukwaia na alangaia nia ’ana thatana ’i tala’ana, sulia ’e langi naa ta ngwane lau ne baita ka talua tha God ’uria faasuukwailana alangaia neri. ¹⁴ Ma tha God ’e bae ’urii, “’E mamana ’asiana, nau kwau faa’okae ’oe, ma nau kwau fala na kwalafa ’oe da ka ’oro.” ¹⁵ Ma tha Abraham ’e marabibi, ma nia ka ngala naa doo ki ne tha God ’e alangana. ¹⁶ Ma lelea sa ta ngwane boroi ’ana ne alangai, nia ka faasuukwaia ’ana thatana ta ngwane ne ’e ’inito ka talu nia. Ma ’urineri imole ki sui, da ka manata mamana ’ana alangaia suukwai neri. ¹⁷ Aia, ma si manga tha God ’e alangai ’ania fuana tha Abraham, nia ’e dooria na imole ki dau ngala si doo neri ki, da ka thaitamana ’okae ’ana ne nia kau faafonoa si baea totongenao nia ki fuada. Ma nia ne ’e adea nia ka faasuukwaia na alangaia neri. ¹⁸ Na roo si doo ki ne too ma ’e langi si tatala naa. Na etana si doo ne, na alangaia nia tha God. Ma na ruana si doo ne na faasuukwailana alangaia nia ’ana thatana. Ma sulia na roo si doo neri ki, kolu thaitamana ne tha God ’e langi si suke. Kolu tafi sui naa siana tha God ne ’e lio suli kolu. Ma na alangaia nia tha God ka gwafe kolu fasi kolu ka takwe suukwai ’ana kwaimaakwalilae maasia si doo ’okae ki ne tha God ’e alangana. ¹⁹ Aia, na fiitooa kolu ’ana tha God ’e faasuukwaia na moorilakolu, ilingia ta gwalu bae ’e dau suukwai faafia ta baru baita fasi ka langi si lea ’e’ete. Ma kolu ka fiitoo ’ana tha Jisas ne ’e ruu mai ’i laona si kula ne ’e abu ’asiana ’i laona Beu Abu nia tha God ’i thalo. ²⁰ Tha Jisas ne na foa ni gwau ne ’e totoo si sui ilingia tha Melkisadek. Ma nia ka ruu ’i nao ’ani kolu ’i laona si kula ’e abu ’asiana ’uria ’adomilakolu.

¹ Tha Melkisadek na ngwane ’inito faafia na maetoaa ’i Salem, ma nia na ngwane ni foa nia tha God ne ’inito ka tatha. ’Ana tee si manga, tha Abraham ’e firu fonea fai nonii ngwane ’inito ki, ma nia ka siitatha ’ani kera. Ma si manga tha Abraham ’e oli ’uria maetoaa nia, nia ka todaa tha Melkisadek sulia tala, ma tha Melkisadek ka fala ’okaelae fuana tha Abraham. ² Ma tha Abraham ka fala tangafulu ’ana si doo ki ne ’e langgua ’ana firua fuana. Ma na maalutana thatana tha Melkisadek ne, “Na ngwane ’inito ’ana ’o’oloa.” Ma nia ne ’inito faafia na maetoaa ’i Salem, ne maalutana “Na ngwane ’inito ’ana enoenoa.” ³ Ma ’e langi kolu si thaitamana bo ni ti nee na maka nia, ma ni ti nee na gaa nia, ma na kwalafaa nia. Ma kolu si thaitamana bo ta si baea sulia na futalana ma langi na maelana. ’Urineri ne tha Melkisadek ’e ilingia bo na Ngwela nia tha God, sulia na raoa nia ’ana foalae ’e langi si sui. ⁴ Aia, molu ka manata fasi sulia na ’initolana tha Melkisadek, sulia na kokoo abu kolu tha Abraham ’e fala naa tangafulu ’ana si doo ki ne ’e langgua faasia maalimae nia ki. ⁵ Aia, na kwalafaa nia ki tha Lifae ne da foa, na bibirangaa ki ’e thaea da ka ngala naa tangafulu ’ana totodaa ki faasia doora kera na Jiu ki, sui boroi ’ana da ka ’ito laubo mai faasia kwalafaa tha Abraham. ⁶ Ma tha Melkisadek ’e langi si thakatafa mai faasia kwalafaa nia tha Lifae. Sui ta, nia ’e ngala bana tangafulu ’ana si doo ki ne tha Abraham ’e ngala mai, ma nia ka fala ’okaelae fuana tha Abraham. Tha Melkisadek ’e ade ’urineri, sui boroi ’ana tha Abraham ’ana ne tha God ’e alangai fuana. ⁷ Ma kolu thaitamana, na ngwane ne fala faa’okaelae fuana ta ngwane, nia ’e ’inito ka talua na ngwane ne da fala okaelae fuana. ⁸ Ma na ngwane ni foa ki ne da lea mai faasia kwalafaa tha Lifae, da ngala naa tangafulu ’ana doo ki sui, sui boroi ’ana kera naa dau mae bada. Sui ta, tha Melkisadek nee, ’e ngala naa tangafulu ’ana doo nia ki tha Abraham, ma kolu thaitamana na Kekedalae Abu bae ’e thaea tha Melkisadek ’e moori ’ua. ⁹ Na kwalafaa nia ki tha Lifae, da thaitamana da ka ngala na tangafulu ’ana si doo ki ’ana si manga neri. Ma kolu tala’ana kolu ka thaea ’ana si manga tha Abraham ’e fala naa tangafulu ’ana na doo nia ki fuana tha Melkisadek, tha Lifae laubo ’e fala tangafulu ’ana doo ki fuana tha Melkisadek, ¹⁰ sulia tha Lifae ’e futa naa ’i buri ’ana kwalafaa tha Abraham ne fala tangafulu ’ana doo ki fuana tha Melkisadek. ¹¹ Aia, kolu thaitamana si manga tha God ’e fala naa bibirangaa ki fuada kulee ngwane ’i Israel, nia ’e filia ngwane ni foa ki ne da lea mai faasia tha Lifae fasi da ka ’inito faafia na bibirangaa neri ki. Ma lelea sa ka ngwaluda fuana ngwane ni foa neri ki da ka adea imole ki da ka ’o’olo ’ana raoa kera ki, tha God ’e langi si fala bo mai ta ngwane ni foa lau ne ilingia tha Melkisadek. Ma na ngwane ni foa faalu neri ’e langi si usulia bo tha Aron ne lea mai faasia kwalafaa tha Lifae. ¹² Sulia si manga da talana na ngwane ni foa ki, ’e tala’ana laubo da ka talana na bibirangaa nia ki tha Mosis ne da dau faafia. ¹³ Ma na Aofia tha Jisas ne da kekeda sulia, ’e langi si thakatafa mai faasia tha Lifae, ma ka langi naa ta ngwane lau ’ana kwalafaa tha Jisas ne foa. ¹⁴ Sulia kolu thaitamana tha Jisas ’e futa mai faasia kwalafaa tha Jiuda. Ma tha Mosis ’e langi si toolamana fasi ta ngwane bana ’ana kwalafaa neri ki ne ka thau ’ana ngwane ni foa. ¹⁵ Aia, kolu thaitamana si doo neri ki ’e folaa ’asiana, sulia tee ngwane ni foa ’e’ete ’e thakatafa lau mai ne ’e ilingia tha Melkisadek. ¹⁶ Ma na ngwane ni foa faalu neri ’e langi lau ta ngwane ni foa sulia ’e futa ’ana kwalafaa ngwane ni foa ki. Nia na ngwane ni foa ’ana sulia na suukwaia ’ana mooria nia ne ’e totoo firi. ¹⁷ Sulia na Kekedalae Abu bae ’e thaea, “’Oe na ngwane ni foa ne ’o totoo firi ilingia tha Melkisadek.” ¹⁸ Kolu thaitamana sui naa na bibirangaa sulia ngwane ni foa, tha God ’e talana teefau, sulia na bibirangaa neri ’e langi si ’adomi kolu, ma ’e tofa doo bana. ¹⁹ Sulia na bibirangaa neri, ’e ’afitai ’asiana ka ’olosia bo ta si doo. Ma ’ana si manga neri, tha God ’e fala sui naa fuakolu na tala ’okae lau fasi kolu ka lea mai ’i siana. ²⁰ Na tala faalu neri ’e ’okae ka tatha, sulia tha God ’e alangai suukwai ’ana si manga ’e alua tha Jisas ka thau ’ana ngwane ni foa. ’Ana si manga ’e alua naa kwalafaa tha Lifae da ka thau ’ana ngwane ni foa, ’e langi nia si alangai suukwai ’urineri. ²¹ Sui ta, tha Jisas nee, tha God ’e alua ka thau ’ana ngwane ni foa nia ’ana alangaia nia fuana, sulia na Kekedalae Abu bae ’e thaea, “Tha God ’e alangai suukwai, ma ’e langi si talana naa manatalana. ‘Ni ’oe ’ou thau ’ana ngwane ni foa ka oli ’alaa.’ ” ²² Ma sulia na alangaia suukwai nia tha God ’e ’urineri, kolu thaitamana na alangaia ne tha Jisas ’e ’inito faafia, ’e ’okae ka talua na alangaia kwali ’ana bibirangaa. ²³ Aia, tee si doo lau ne adea ma kolu ka thaitamana na alangaia faalu neri ’e ’okae ka tatha. Sulia ’i nao mai, na ngwane ni foa ki ne ’ito mai faasia kwalafaa tha Lifae da ’oro, sulia si manga ta ngwane ’ada ’e mae, ’e ngwaluda bana ’uria talalana ’ana ta ngwane lau. ²⁴ Ma tha Jisas ne ’e totoo firi, ma na raoa nia ’ana foalae ka totoo firi laubo. ²⁵ Sulia ’e ’urineri, ’ana si manga ki sui ’e ngwaluda bana fuana tha Jisas ka faamooria na imole ki ne da lea mai ’i siana tha God. Sulia tha Jisas ’e moori ka totoo firi, fasi nia ka ’adomida ’i maana tha God. ²⁶ Aia, sulia si doo neri ki, tha Jisas naa na foa ni gwau ne kolu thasi ’uria, sulia ’e abu ’asiana, ma ka ’o’olo teefau, ma ka langi ta ta’alae ’ani nia. Tha God ’e ngali nia faasia na imole ta’ae ki, ma ’e alua ka too ’i thalo. ²⁷ ’E langi si ilingia na foa ni gwau bae ki ’i nao. Sulia na foa ni gwau bae ki ’i nao, da tala’ana da ka abulo ta’ae, sulia ni kera na ngwane ki bana. Nia nee adea ma da ka fala afuafulae ki sulia dani ’uria lafulana abulota’alae kera ki, sui fatai da ka fala afuafulae ki ’uria lafulana abulota’alae kera na imole ’e’ete ki. Ma tha Jisas nee, ’e langi nia si ade bo ’urineri, sulia nia si too ’ana ta ta’alae. Tha Jisas ’e fala naa moorilana ’uria tee afuafulae nia ’ana tee si manga bo, ma ka langi ta foalae lau. ²⁸ Na bibirangaa faasia tha Mosis, ’e filia naa imole ki ne langi si ’o’olo teefau fasi da ka foa. Sui ta, ’e tau na mai ’i burina bibirangaa neri ki, tha God ’e alangai ma ka filia naa Ngwela nia. Ma tha God ’e alua tha Jisas na foa ni gwau ne ’e fono ma ka totoo firi.

¹ Aia, na maalutana si doo ki ne meli bae sulia fuamolu ’e ’urii: Na foa ni gwau kolu ’e ’okae ka tatha, ma ’e too ’ana fera ne ’e ’inito ka tatha ’i thalo, sulia ’e too ’i bali aolo ’ana tha God. ² Nia ’e ilia na raoa nia foa ni gwau ’i laona si kula ’e abu ’asiana ’i laona ’O’oba Abu mamana ’i thalo ne na Aofia ’e thaungana, ma ka langi lau na imole ki ne da thaungana. ³ Tha God ’e filia naa foa ni gwau ki sui fasi da ka fala na afuafulae fuana tha God. Nia ’e ’urineri laubo ’ana foa ni gwau kolu tha Kraes ’e too ’ana tee afuafulae. ⁴ Lelea sa tha Kraes ’e too naa ’i laona maetoaa ’i thaegano, nia si rao ’ana foalae, sulia kolu too naa ’ana ngwane ni foa ’oro ki ne da fala naa si doo ne na bibirangaa nia ki tha Mosis ’e thaea. ⁵ Ma si kula abu ne da rao ’i laona ’e ilingia bana si kula abu ne ’i thalo, sui ta, ’e langi si ilingia ’asiana doo mamana ne ’e too ’i thalo. Sulia si manga tha Mosis ’e karangi thaungana na ’O’oba Abu nia tha God, tha God ’e thaea fuana ka ’urii, “’Oko thaungai ’o’olo naa ’ania sulia si doo nee ku faatana fuamu ’i gwauna tolo.” ⁶ Ma na raoa nia tha Jisas ’ana foalae ’e ’okae ka talua na ngwane ni foa ki ne ’i molaagali. Sulia nia ne fala alangaia faalu nia tha God ka fuli mamana ne talua alangaia bae ’i nao. Na alangaia faalu neri, ’e baita sulia ’e nia ’i laona alangaia suukwai nia tha God. ⁷ Sui lelea sa na alangaia bae ’i nao ’e rao ’okae bana, ’urineri ’e langi lau ta alangaia faalu ’i burina. ⁸ Sui ta, tha God ’e rikia na imole nia ki ’e langi da si roosulia alangaia bae ’i nao, ma nia ka bae ’urii, “Nau naa na Aofia, ma ’ana si manga neri ’i nao mai, nau ku alua ta alangaia faalu ’uria faamoorilana kulee ngwane ki ’i Israel. ⁹ Ma na alangaia faalu neri, ’e langi si ilingia bo na alangaia bae ’i nao ne nau ku fala fuana kokoo abu kera ki, ’ana si manga ku talai kera mai faasia maetoaa ’i Ijip. Kera da si roo bo sulia alangaia neri. Ma sulia si doo neri, nau ku faiburi naa ’ani kera. ¹⁰ Na alangaia faalu nee kwau ilia ’uria faamoorilana kulee ngwane ki Israel ne ’e ’urii: Nau kwau alua naa bibirangaa nau ki ’i laona manatalada, ma kwau kedaa ’i laona moorilada. Ma nau kwau God fuada, ma kera naa na imole nau ki. ¹¹ Ma ’e langi da si dooria lau ta ngwane fasi ka toodoo fuada suli nau. Sulia ’ana fe dani neri, imole ki sui, na ngwane ’inito ki ma na ngwane ki ’i laona toaa, kera dau thaitamaku. ¹² Ma nau kwau manatalukea na abulota’alae kera ki, ma kwau manataburo ’ania na garolae kera ki.” ¹³ Aia, sulia tha God ’e bae sulia na alangaia faalu neri, nia ’e faatana na alangaia ’i nao ’e kwali naa. Ma kolu ka thaitamana lelea sa ta si doo ne kwali naa, ’urineri nia kau muu tataria, ma nia kau langi ’ana naa.

¹ Aia, ’i laona alangaia bae ’i nao, tha God ’e fala bibirangaa ki ’uria foalae, ma nia ka toodoo laubo sulia na ’O’oba Abu ne ’i molaagali. ² Kera da thaungana naa ’O’oba Abu neri ’ana ’abe maku, ma ’e too ’ana roo kade beu ki. Na etana kade beu da ’alangia ’ana “si kula ’e abu.” Ma da ka alua kwethu ’i seeri, fonea na tefolo, ma na berete ’uria falelana fuana tha God ka too ’i fafona. ³ Ma da ka daurangana laubo na ’abe maku ’i malutana roo kade beu neri ki. Aia, na ruana kade beu da ’alangia ’ana “si kula ne ’e abu ka tatha.” ⁴ Ma ’i laona kade beu neri, da alua naa fuli ere ni kwaisuusia ne da thaungana ’ana gol. Ma fuli ere ni kwaisuusia neri da naarea na ’ai moko ’okae ki ’i fafona. ’I seeri laubo da alua tee fe kisi baita ne da binu faafia ’ana gol. Fe kisi baita neri ’e faatana na alangaia nia tha God. Ma ’i laona fe kisi baita neri tee titiu da thaungana ’ana gol, ma ’i laona da alua na fanga ne da ’alangia ’ana “mana.” Ma ’i laona fe kisi baita neri laubo, da ka alua na kubau bae tha Aron ne tanggwasu, ma na roo rebe fau bae ki ne tha God ’e kedaa ’ana alangaia ’i fafona. ⁵ Aia, ma fe kisi baita neri da alua roo nunui enselo ki ’i fafona. Ma na enselo neri ki da too ’ana kukube doo ki ne faatana tha God ’e too ’i seeri. Na kukube doo neri ki ’e tegwera ’i fafona si kula ne tha God ’e lafua na ta’alae kera na imole ki. Sui ta, ’e langi kwa si toodoo daranini ’okae bo sulia si doo neri ki ’ana si manga neri. ⁶ Ma si manga da kwaimaakwali ’ana si doo ’urineri ki ’e sui, na ngwane ni foa ki da ka ruu ’i laona etana kade beu ’ana fe dani ki sui ’uria ililana raoa kera ki. ⁷ Aia, na ruana mae beu ne da ’alangia ’ana “si kula ’e abu ’asiana,” tee ngwane bo ne ’e ruu ma nia naa na foa ni gwau, ma nia ka ruu ’i seeri ’ana tee si manga bo ’i laona tee fe ngali. Ma si manga ’e ruu ’i laona, nia ka ngala na ’abu ’uria foalae ’ania ’uria na lafulana ta’alae nia ki, ma na ta’alae kera na imole ki laubo ne da ilia ’ana si manga da lalafusia ’ua. ⁸ Aia, fonea si doo neri ki, na Mangoedoo Abu ’e toodoo fuakolu ne ’e langi kolu si ruu ’ua ’i laona si kula neri ne ’e abu ’asiana, ’ana si manga na ’O’oba Abu ’e too ’ua. ⁹ Ma si doo neri ’e faamanatai kolu ’ana tee si doo ’ana si manga nee. Nia ’e faamanatai kolu ’ana na falelana na falelae ki fonea na afuafulae ki ’e langi si faafaalua manatalada na ngwane ki. ¹⁰ Sulia na bibirangaa neri ki ’e bae bo sulia fanga, ma kuulae, ma na faafaalulana nonii doo. Ma na bibirangaa neri ki ’e lea bo sulia bali ’ana noni, ma nia ka baita bo ’ana lelea ka dao ’ana si manga ne tha God kau talana ’ana ta si doo faalu. ¹¹ Ma ’ana si manga ne tha Jisas Kraes ’e dao na mai ’uria ililana na raoa nia foa ni gwau ’ana tala faalu ne ’okae ka talua tala bae ’i nao. Na ’O’oba Abu nee ’e rao ’i laona ’e too ’i thalo, nia ’e ’okae ka tatha ma ka baita talua na ’O’oba Abu ’i molaagali. ’E langi ta ngwane si thaungana na ’O’oba Abu neri, ma na ’O’oba Abu neri ’e langi ka si too ’i laona molaagali nee. ¹² Ma tha Jisas Kraes ’e ruu ’ana tee si manga bo ’i laona si kula abu ’asiana ne too mai ’i thalo, ma ’e langi nia ka si ruu lau. Ma ’ana si manga nia ’e ruu, nia si ngala mai na ’abuna nanigot ki fonea buluka ’uria afuafulae. Sui ta, nia ’e ruu ’ana fasi nia ka fala na ’abuna ’i tala’ana ’uria afuafulae, ma ’urineri nia ’e ilia ka ngwaluda fuakolu ’uria toolae ’ana mooria ne totoo firi. ¹³ Sulia si doo neri na bibirangaa ki ’e toolamana, lelea sa ta ngwane boroi ’ana ’e langi ka si folaa ’i maana tha God, na ngwane ni foa ka faafaalu nia ’ana tangasilana ’ana ’abuna nanigot, ma na buluka, ma na fua ’ana kae buluka. ¹⁴ Aia, ma lelea sa ka ngwaluda bana fuana ta ngwane ka faafaalu nia bana ’ana ’abuna buluka fonea nanigot ki, ’urineri nia ’e tatha ’asiana lelea sa nia ’e folaa ’ana ’abuna tha Jisas Kraes. Ma ’ana na kwai’adomia nia na Mangoedoo Abu ne ’e totoo firi, tha Jisas Kraes ka afuafu ’ana nonina ’i tala’ana fuana tha God, ma ’e langi ka si too bo ’ana ta garolae. Ma sulia na ’abuna, nia ’e faafaalua moorilakolu teefau, fasi kolu ka rao fuana tha God ne moori mamana. Ma ’e langi kolu si ilia lau ta si doo ne ka talai kolu ’uria maea. ¹⁵ Ma sulia ’e ’urineri, tha Jisas Kraes naa na ngwane ’inito faafia na alangaia faalu, fasi na imole ki ne tha God ’e soeda, da kau ngala na mooria ne totoo firi ne tha God ’e alangana. ’E ngwaluda bana fuana tha God ka ade ’urineri, sulia na maelana tha Jisas Kraes. Ma sulia na maelana tha Jisas Kraes, tha God ka lafua naa ta’alae kera imole ki ne da ilia ’ana si manga na alangaia bae ’i nao ’e ’inito ’ua faafi kera. ¹⁶ Aia, molu ka manata fasi sulia na ngwane ne ’e too ma ka kedaa tee si ’abe doo ne faatana lelea sa nia ’e mae, ni ti nee kau ngala na totodaa nia ki. ’Ana si manga na ngwane bae ’e kedaa ’abe doo neri ’e mae, nia ’e ’inito fuana ta ngwane lau ka faatai mamana ’ana ne ’e mae naa, sui fatai na ngwane ne ka bae sulia ’i laona si ’abe doo neri ka fi ngala na totodaa neri ki. ¹⁷ Ma lelea sa ngwane bae ’e kedaa si ’abe doo neri ka moori ’ua, na doo ki bae ’e kedaa ’e ’afitai ka fuli. Ma lelea nia ka mae fatai, na doo ki ne ’e kedaa ka fi fuli. ¹⁸ Nia nee na alangaia totongenao bae tha God ’e dao mamana si manga da tangasia ’ana ’abu. ¹⁹ ’Urineri, tha Mosis ’e toolamana imole ki ’i nao sulia si doo ki sui ne bibirangaa ’e bae fifii fuada fasi da ka ilia, sui nia ka ngala ’abu faasia buluka ki fonea na nanigot ki, ma ka dolaa ’ana kafo. Sui nia ka kurumana ifuna sipsip ne da faa’a’abua ma na tharana ’ai ne da ’alangia ’ana “hisop.” Ma nia ka tangasia na buka ne da kedaa ’ana bibirangaa neri ki, ma ka tangasia laubo ’ana na imole ki. ²⁰ Ma tha Mosis ka bae ’urii, “Na ’abu neri, ’e faamamanea mamana na alangaia ne tha God ’e bae fifii sulia fuamolu fasi molu ka roosulia.” ²¹ Nia ’e ’urineri laubo tha Mosis ’e tangasia naa na ’O’oba Abu ne da thaungana ’ana maku, ma ka tangasia laubo na doo ki sui ’i laona ’uria na foasilana tha God. ²² Ma ka ’urineri laubo, na bibirangaa ki ’e thaea ne ’e too ’uria faafaalulana doo ’oro ki ’ana ’abu. Ma ’e ’urineri laubo, lelea sa ’e langi da si thaumaelia ta doo moori ma ’abuna ka igwa, ’e ’afitai tha God ka manatalukea na ta’alae nia ta ngwane. ²³ Ma si doo ki ’uria foasilana tha God ’i molaagali, da ilingia bada nununa na doo mamana ki mai ’i thalo, nia nee imole ki da ka faafaalu kera ’ana ’abu ’urineri. Sui ta, si doo mamana ki mai ’i thalo ’e dooria na afuafulae ne ’e ’okae ka tatha. ²⁴ Sulia si manga tha Jisas Kraes ’e fala naa afuafulae nia fuana tha God, nia ka si ruu lau mai ’i laona ’O’oba Abu ’i molaagali ne imole ki da thaungana ka ilingia bana na nununa ’O’oba Abu mamana ’i thalo. Nia ’e lea ’i thalo, ma ’i seeri ne nia ’e too fonea tha God ’uria ’adomilakolu. ²⁵ Ma sulia fe ngali ki sui, na foa ni gwau kera imole ki ’i Jiu, ’e ruu ’i laona si kula abu ’asiana ’ana Beu Abu nia tha God ne ’i molaagali, ’ana tee si manga bo ’i laona tee fe ngali ’uria falelana afuafulae ’ana ’abuna doo moori ki. Sui ta, tha Jisas Kraes ’e langi si ruu ’ana si manga ’oro ki ’uria falelana afuafulae ’ani nia ’i tala’ana. ²⁶ Sulia lelea sa ’e ’urineri, ’ito mai ’ana thafalilana thaungailana molaagali, nia ’e ngada ka lea lado ’ana si manga ’oro ki. Sui ta, ’ana si manga ’i’isi nee ki, nia ’e lea mai ’ana tee si manga bo fasi ka lafua ta’alae ki ’ana falelana afuafulae ’ana nonina ’i tala’ana. Ma ’e langi nia si ade naa ’urineri lau. ²⁷ Aia, ma na imole ki ’i laona molaagali nee, da mae ’ana tee si manga bo, sui fatai tha God ka fi keto kera. ²⁸ Ma ’urineri laubo, tha Jisas Kraes ’e mae ’ana tee si manga bo fasi ka afuafu ’uria lafulana ta’alae kera na imole ’oro ki. Ma nia naa kau oli lau mai ’i molaagali, ’e langi lau ’uria lafulana ta’alae kera imole ki, nia kau oli ’ana mai ’uria faamoorilana imole ki ne da kwaimaakwali maakwali nia.

¹ Si baea fifii ki ne tha Mosis ’e fala, na nununa bana na doo mamana ki ne ’e ’okae ka tatha ne tha Jisas ’e ilia fuakolu. Si baea fifii ki ’e thaea da fala afuafulae ka lado bana sulia fe ngali ki sui. Ma kolu ka thaitamana na bibirangaa neri ki, ’e ’afitai bo ka ’olosia na imole ki ne da foasia tha God. ² Lelea sa na afuafulae neri e adea ni ti kera ne da foa ma da ka folaa naa, ’e langi da si tala’ana falelana lau ta afuafulae, sulia da thaitamana tha God naa kau manatalukea na ta’alae kera ki sui, ma ’e langi da si kwaimanatai lau. ³ Sui ta, sulia fe ngali ki sui, na afuafulae kera ki ’e faamanata oli kera ’ana ta’alae kera ki. ⁴ Sulia ’e ’afitai bo na ’abuna buluka ki ma na nanigot ki ka lafua ta’alae kolu ki. ⁵ Nia nee ’ana si manga tha Jisas Kraes ’e karangi kau lea na mai ’i laona molaagali, nia ’e bae fuana tha God ka ’urii, “’E langi lau afuafulae ’ana doo moori ki ne ’o dooria, ’oe ’o kwaimaakwali sui naa ’ana tee nonii doo fuaku. ⁶ Sulia ’e langi ’o si nonithathala bo sulia na afuafulae ’ana doo moori ki ne da naarea ma na ’abuna doo moori ki ’uria lafulana ta’alae ki. ⁷ Sui, nau ku thaea, ‘God ’ae, nau ku dao naa fasi ku ade sulia si tae ki ne ’o dooria, ilingia ne da kekeda naa suli nau ’i laona Kekedalae Abu.’ ” ⁸ Aia, tha Jisas ’e thaea ne tha God ’e langi si dooria bo na falelae ki ma na afuafulae ne da naarea ma na ’abuna doo moori ki ’uria lafulana ta’alae ki. Ma ’e langi nia si nonithathala bo sulia si doo neri ki. Ma nia ’e bae ’urineri, sui boroi ’ana na baea fifii nia ki tha Mosis da bae sulia afuafulae neri ki. ⁹ Ma nia ka bae lau ’urii fuana tha God, “Nau ku dao naa fasi ku ade sulia si doo ki ne ’o dooria.” Ma sulia si baea neri, kolu thaitamana tha God ’e lafua naa afuafulae ’ana na bibirangaa, ma ka talana naa ’ana afuafulae ’ana tha Jisas Kraes. ¹⁰ Ma sulia tha Jisas Kraes ’e ade sulia na kwaidooria nia tha God, ma tha God ka lafua naa ta’alae kolu ki, ma ka faafaalu kolu naa. ’E ’urineri, sulia afuafulae nia tha Jisas Kraes ’ana nonina ’i tala’ana ’ana tee si manga bo, ma ka langi lau ta afuafulae ’ana nonina ’ana ta ruana si manga. ¹¹ Ma na ngwane ni foa ki ’i Jiu da ruu ’i laona Beu Abu ka lado bana sulia fe dani ki, ma da ka ilia na raoa kera ’ana afuafulae ’ana si manga ’oro ki. Sui ta, na afuafulae neri ki, ’e langi si tala’ana lafulana ta’alae kera imole ki. ¹² Ma tha Jisas Kraes nee, ’e fala afuafulae nia ’ana tee si manga bo ’uria lafulana ta’alae ki. Ma nia si dooria kau fala lau ta afuafulae ’ana ta si manga ’e’ete. Ma ’ana si manga ’e fala naa afuafulae nia ’e sui, nia ka too ’i bali aolo ’ana tha God, sulia na raoa nia ’ana afuafulae ’e sui naa. ¹³ Ma tha Jisas Kraes kau too bana ’i seeri, ma nia ka kwaimaakwali ’ana si manga ne tha God naa kau firu ka siitatha ’ana maalimae nia ki. ¹⁴ Aia, sulia tee afuafulae neri, nia ’e lafua naa ta’alae kolu ki, ma ’e adea ne kolu ’o’olo ka totoo firi. ¹⁵ Ma na Mangoedoo Abu ’e bae lau sulia si doo neri ki ka ’urii, ¹⁶ “Nau naa na Aofia, ma ’i laona fe dani ne kau dao mai, nau kwau alua ta alangaia faalu fuada ’uria faamoorilada ka ’urii: Nau kwau alua na bibirangaa nau ki ’i laona manatalada, ma nau kwau kedaa ’i laona moorilada.” ¹⁷ Ma na Mangoedoo Abu ka bae lau ’urii, “Na garolae kera ki ma na abulota’alae kera ki, nau kwau manatalukea, ma ka langi kwasi manatatoona lau.” ¹⁸ Aia, si manga tha God ’e manatalukea naa na ta’alae, ’e langi ka si tala’ana na falelana lau ta afuafulae ’uria lafulana ta’alae ki. ¹⁹ Dooraku ki ’ae, sulia na maelana tha Jisas, kolu thaitamana kolu kau lea nonirara’a ’uria ruulae ’i laona “si kula abu ’asiana.” ²⁰ Sulia tha Jisas ’e thaungana tala faalu fuakolu ’uria lealae mai siana tha God, fasi kolu ka too ’ana mooria firi fone nia. Nia ’e ade ’urineri ’ana na afuafulae ’ana nonina. ²¹ Kolu too naa ’ana tee foa ni gwau ’okae ’asiana ne ’e ’inito faafia imole nia ki tha God. ²² Ma sulia si doo neri ki, kolu kau dao siana tha God fonea na foalae ne mamana, ma na manata mamanalae ne ’e suukwai, ma na manatalae ne ’e faalu, sulia kolu thaitamana tha God ’e faafaalu kolu naa sulia tha Jisas. Ma kolu kau sisiuabu laubo ’uria faatailana tha God ne faafaalu kolu naa. ²³ Kolu thaea fuana ngwane ki ne kolu manata kwaimaakwali naa ’ana tha God. Ma kolu kau dau suukwai ’ana fiitooa ’uria si doo bae ki tha God ’e alangana fuakolu, sulia kolu thaitamana nia kau faamamanea baelana. ²⁴ Ma kolu ka manata sulia na kwaidooria kolu kwailiu, fasi kolu ka kwai’adomi fuakolu kwailiu, ma kolu ka faatana na liothaua fuakolu kwailiu ’ana doo ’okae ki ne kolu ilia. ²⁵ Aia, ’e langi kolu si too faasia na ofulae ’uria foasilana tha God, ilingia tai imole ki ne da ilia. Sui ta, kolu ka ofu fasi kolu ka fala rakealae fuakolu kwailiu, sulia kolu thaitamana fe dani ’ana olilana mai na Aofia tha Jisas ’e karangi naa. ²⁶ Lelea sa kolu thaitamana sui naa na toodoolae mamana ki, ma lelea sa kolu ka ililado bo ’akolu ’ana ililana doo ta’ae ki, ’urineri ’e langi ta afuafulae si tala’ana bo lafulana garolae kolu ki. ²⁷ Ma lelea sa ta ngwane ka ade ’urineri, nia ka mau sulia ’e maasia naa na keketoa baita, ma na ere ’ako’ako neri, tha God naa kau nagaa ’ana ni ti kera ne da tatae suusi nia. ²⁸ Ma ’ana si manga bae ’e sui na mai, ni ti ne ka aburongo bana ’ana na bibirangaa nia ki tha Mosis, ma lelea sa ta olu ngwane ma langi ta roo ngwane daru ka faamamanea na ngwane neri ’e garo, ’e langi da si manatainia, da ka thaumaelia bana. ²⁹ Ma lelea sa ka ’urineri ’ana bibirangaa nia ki tha Mosis, na kwakwaelae ne ’e baita ka tatha fuana ni ti ne otenia ’ana Ngwela nia tha God ’i tari’ina. Sulia na abulolana ngwane ’urineri ’e faatana ne ’e fiia thasa na maelana tha Jisas Kraes ’e langi si ’inito bo, ma ’e fiia thasa na alangaia faalu ne ’e tala’ana ka faafaalu nia, ’e langi si ’inito laubo. Aia, na ngwane ’urineri ’e bae nagaa na Mangoedoo Abu ne liothau ’ani nia. ³⁰ Sulia kolu thaitamana tha God ’e ngata ’urii bae, “Nau ne kwau duumae, ma nau naa kwau fala keketoa fuana imole ki, sulia na abulota’alae kera ki.” Ma na Kekedalae Abu ka bae lau ’urii, “Na Aofia naa kau ketoa na imole nia ki.” ³¹ Lelea sa na God momoori ka dau faafia ta ngwane ’uria tooketalana, na ngwane neri naa kau mau ’asiana. ³² Ma molu ka manatatoona si manga ’afitai ’oro bae ki molu ruu ’i laona, si manga molu eta too ’ana folaalae nia tha Kraes. ³³ Da faangada kamolu, ma da ka bae sualangai kamolu ’i maana imole ’oro ki. Ma ’ana tai si manga, molu ka nonimaabe ’uria ’adolae fonea na imole kwaimani kamolu ki ne tai imole ki da faangada kera ’urineri. ³⁴ Aia, ma ’ana si manga da alua imole manata mamana ki ’i laona dele, molu ka manatai kera, ma molu ka ’adomi kera. Ma molu ka nonithathala bo ’amolu ’ana si manga imole ki da laua na totodaa kamolu ki teefau, sulia molu thaitamana molu kau too lau ’ana totodaa ki ne ’e ’okae ka tatha ne ’e totoo firi ’i thalo. ³⁵ Sulia ’e ’urineri, ’e langi molu si mau. Lelea sa molu ka manata mamana suukwai ’ana tha God, molu kau ngala si doo ki ne nia e alangana fuamolu. ³⁶ Molu ka too ’ana marabibilae, fasi molu ka ade sulia kwaidooria nia tha God, ma molu ka ngala naa si doo ki nee nia ’e alangana fuamolu. ³⁷ Sulia na Kekedalae Abu bae ’e bae ’urii, “’E karangi nia kau lea na mai, ma ’e langi si tau naa. ³⁸ Ma na imole ’o’olo nau ki, dau manata mamana ma dau moori. Sui ta, lelea sa ni ti boroi ’ani kera ne oli fai buri sulia da mau, ’e langi kwasi nonithathala bo suli kera.” ³⁹ Sui ta, ’e langi kolu si ilingia imole ki ne da lea tau naa ’urineri, ma da ka ngala kwakwaelae. Kolu manata mamana ’akolu ’ana tha God, ma nia ka faamoori kolu.

¹ Lelea sa kolu ka manata mamana ’ana tha God, kolu thaitamana sui naa, si doo ’okae ki ne kolu kwaimaakwali ’ania, kolu kau ngala faasi nia, sui boroi ’ana ’e langi kolu si rikida ’ua. ² Aia, ma na imole ki ’i nao mai, tha God ’e alafaafida sulia da fiitoona tha God. ³ Sulia na manata mamanalae kolu ki, kolu thaitamana ne tha God ’e thaungana doo ki sui ’ana bae fifiilae nia. Na doo ki sui ne kolu rikia, da ’ito mai faasia na doo ki ne ’e langi kolu si rikia. ⁴ Tha Ebol bae ’e fiitoona tha God, ma nia ka fala na afuafulae nia fuana tha God ne ’okae ka talua na afuafulae ne tha Kein ’e fala. Ma sulia na manata mamanalae nia tha Ebol, tha God ’e thaea nia ’e ’o’olo, sulia tha God ’e alafaafia na falelae nia ki. Sulia tha Ebol ’e fiitoona tha God, si doo ki ne ’e ilia ’e toolamana fuakolu, sui boroi ’ana nia ka mae naa. ⁵ Ma tha Enok ’e fiitoo ’ana tha God, ma ’e langi nia si mae, sulia tha God ’e ngala ’uria ’i thalo, ma ’e langi ta ngwane ’i molaagali si rikia lau tha Enok. Ma na Kekedalae Abu ’e thaea tha God ’e nonithathala ’asiana sulia tha Enok, ma tha God ka ngali nia naa ’uria ’i thalo. ⁶ Lelea sa ta ngwane si fiitoona tha God, ’e dodoloa ’afitai bo tha God ka nonithathala suli nia. Sulia ni ti ne lea mai siana tha God, nia ka fiitoo naa ne tha God ’e too ma ka faa’okaea na imole ki ne da lea mai ’i siana. ⁷ Ma tha Noa ’e fiitoona tha God, ma nia ka roosulia na bae fifiilae ki ne tha God ’e fala fuana sulia na igwa ne kau dao mai. Nia ka manata mamana, sui boroi ’ana nia si rikia ’ua na igwa neri. Nia ’e roosulia tha God, ma ka thaungana tee baru baita. Ma si manga na kafo baita neri ’e fungu mai, nia fonea na imole nia ki da ka moori. Ma si manga ’e ade ’urineri, nia ka faatana ne imole ’e’ete ki da ta’ae ma da tala’ana naa ngalilana na kwakwaelae nia tha God. Ma tha God ’e thaea ne tha Noa ’e ’o’olo sulia na manata mamanalae nia. ⁸ Ma tha Abraham ’e fiitoona tha God, ma nia ka roosulia na baelana. Tha God ’e talai nia ka lea faasia maetoaa nia ’uria ta bali fera ’e’ete lau ’ana fera ne tha God ’e alangana fasi ka fala fuana. Nia nee tha Abraham ka ’akwasia maetoaa nia, sui boroi ’ana ’e langi nia si thaitamana ’ua ’i fai nee nia ’e lea ’uria. ⁹ Ma si manga ’e dao ’ana bali fera ne tha God ’e alangana fuana, nia ka too ilingia na ngwane maadiu ’ana bali fera neri, ma ka too bana ’i laona ’o’oba. Nia ’e ’urineri laubo ’ana ngwela nia tha Aesak, ma kokoo nia tha Jakob. Daru thaitamana laubo na alangaia ne tha God ’e thaea fuana tha Abraham ’e too laubo fuadarua. ¹⁰ Tha Abraham ’e too ’urineri, sulia ’e kwaimaakwali ’ana maetoaa ’okae ne tha God ’e thaungana ’i thalo ne ’e totoo firi ma ’e langi si sui. ¹¹ Ma sulia na fiitooa nia tha Abraham ’e tala’ana ka too ’ana ngwela, sui boroi ’ana nia ka ngwaro naa, ma na ’afe nia ni Sera ka ’aba’ato laubo. Ma keerua daru ka too ’ana ngwela, sulia daru fiitoona ne tha God kau faamamanea alangaia nia. ¹² Sui boroi ’ana tha Abraham ka ngwaro ma ’e karangia kau mae naa, daru too ’ana kwalafaa ’oro ’asiana. Da ’oro ka ilingia na bubulu ki ’i lofona thalo, ma na one ’i sulia asi ne ’e langi si tala’ana naa teemailana. ¹³ Aia, na imole neri ki da fiitoona tha God, ma da ka mae fasi ’i nao sui fatai da fi ngala doo ki sui ne tha God ’e alangana fuada. Ma da ka manata sulia si doo ki nee tha God ’e alangana, ma da ka thaitamana dau ngala ’ana si manga ’e’ete. Ma da ka thaea laubo na maetoaa ne da too ’ania, ’e langi lau na maetoaa kera, sulia na maetoaa mamana kera ne ’e nia mai ’i thalo. ¹⁴ Aia, ma na imole ki ne da bae ’urineri, da faatana ne da kwaimaakwali ’ana maetoaa mamana kera. ¹⁵ Tha Abraham ma na imole neri ki laubo ’e langi da si manata naa ’uria na maetoaa kera bae da lea mai faasia. Lelea sa ’e ’urineri, ’e tala’ana bana da ka oli ’uria ’i seeri. ¹⁶ Sui ta, da rofe ’uria na maetoaa ’okae ne ’e talua na maetoaa bae da ’akwasia mai, sulia da kwaimaakwali ’uria na maetoaa kera ’i thalo. Sulia si doo neri, tha God ’e nonithathala sulia si manga da ’alangi nia ’ana God kera, sulia ’e kwaimaakwali sui naa ’ana maetoaa baita ni toolae mai ’i thalo. ¹⁷ - ¹⁸ Kolu thaitamana tha God ’e alangana fuana tha Abraham, sulia na ngwela nia tha Aesak ne na kwalafaa nia kau ’oro ’asiana. Ma si manga tha God ’e ilitoona manata mamanalae nia tha Abraham, nia ’e thaea fuana fasi ka thaumaelia tha Aesak ’uria afuafulae ’ania. Ma na manata mamanalae nia tha Abraham ’e suukwai fafona na alangaia nia tha God fuana, ma nia ka kwaimaakwali ’uria thaumaelilana ngwela muutaia nia tha Aesak fasi ka afuafu ’ani nia. ¹⁹ Tha Abraham ’e ade ’urineri sulia ’e fiia thasa lelea sa tha Aesak ’e mae, tha God ’e tala’ana ka tae nia faasia maea. Ma ’e ’urineri ’e ilingia tha God ’e taea mamana naa tha Aesak faasia maea. ²⁰ Tha Aesak laubo, sulia na manata mamanalae nia ’ana tha God, nia ka faa’okaea roo ngwela nia ki tha Jakob fonea tha Iso, ma ka faarongo ’ana si tae nee kau dao mai fuadarua. ²¹ Ma tha Jakob laubo, sulia na manata mamanalae nia, nia ’e faa’okaea na ’alakwa nia ki tha Josef ’ana si manga tha Jakob ’e too naa ’uria maelana. Ma nia ’e takwe oro oro sulia kubau nia, ma ka foasia tha God. ²² Ma tha Josef laubo, sulia na manata mamanalae nia, ’ana si manga ’e too naa maasia maelana, nia ’e bae ka thaea kulee toaa ’i Israel da kau lea faasia maetoaa ’i Ijip. Ma nia ka talaida laubo ’ana si manga neri, si manga kera da lea, da ka ngala laubo na ’okina foneda. ²³ Aia, na maka nia tha Mosis laubo fonea gaa nia, daru fiitoo ’ana tha God. Sui boroi ’ana na ngwane ’inito ’i Ijip ka bae fifii fasi da ka thaumaeli teefau ’ania kae ngwela ngwane ki ’i Jiu, daru ka si mau bo. Ma si manga tha Mosis ’e futa, daru ka thaufangana sulia olu fe sinali, fasi da si thaumaelia, sulia na ngwela neri na rikilana ’e ’okae ’asiana. ²⁴ Ma tha Mosis ’e fiitoona laubo tha God. Ma si manga ’e baita mai, nia ka otenia ’ana da ka thaea thasa na thaarii nia tha Fero ne ’e sului nia. ²⁵ Ma tha Mosis ’e dooria ngadalae fonea na imole nia ki tha God, faasia na too nonithathalalae ’ana ta’alae ne langi si tau bo. ²⁶ Ma nia ka manata ’ana thasa ’e ’okae ’uria faangadalana sulia na fiitooa nia ’ana na Kraes ne tha God naa kau fala mai. Ma ’e langi nia si manata sulia na totodaa baita ne ’e ngala ’i Ijip. Sulia ’e maasia naa doo ’okae ki ne tha God naa kau fala fuana ’ana si manga ne ’e ni ’ua kau. ²⁷ Ma sulia na fiitooa nia tha Mosis, nia ’e lea faasia ’i Ijip. Ma ’e langi nia si mau bo ’ana rakethasua nia na ngwane ’inito ’i Ijip. ’E ilingia tha Mosis ’e rikia tha God ne ’e langi ta ngwane si tala’ana rikilana. ’E ’urineri, tha Mosis ka lea na ’ana. ²⁸ Ma sulia na fiitooa nia tha Mosis, nia ’e thaea fuana kulee toaa ’i Israel da ka lea sulia na fafangaa ’ana Tathalae, ma da ka tangasia na ’olofolo ’ana beu kera ki ’ana ’abuna kae sipsip, fasi na enselo ne tha God ’e fala mai ka langi si thaumaelia na ngwela ngwane ulunao kera ki, ma ka tatha dongaa faasia na beu kera ki. ²⁹ Ma sulia na fiitooa kera kulee toaa ’i Israel, ’e adea ma da ka tala’ana toofololae ’ana Asi ’A’abua. Sulia tha God ’e tolingia na kafo fasi da ka lea ilingia da fali bada ’i fafona thaegano lalanga. Ma ’ana si manga na imole ki ’i Ijip da tarida kau, da ka kuu ma da ka mae teefau naa, sulia tha God ’e adea na asi baita neri ka fungu lau mai faafida. ³⁰ Aia, kulee ngwane ne ’i Israel da fiitoo ’ana tha God. Ma si manga da dao ’ana maetoaa ’i Jeriko, da ka tatha kalia fe labu neri sulia fiu fe dani, sui tha God ka atolia naa labu neri ’i thaegano. ³¹ Ma tee keni kaubare ne ’e too ’i laona maetoaa neri ’i Jeriko, na thatana ni Rahab, nia na keni ne ’e fiitoo ’ana tha God. Sulia si manga roo ngwane ne tha Josua ’e odu keerua mai, daru lea agwa mai ’uria rikilana suukwailana na maetoaa neri, ni Rahab ka ’adomi keerua. Sui, ’e langi da si thaumaelia ni Rahab, si manga ne kulee ngwane ne ’i Israel da thaumaeli teefau ’ana imole ki ne da aburongo ’ana tha God. ³² Ma nau kwau momolo fasi ’urineri ’ana si baea neri, sulia ’e langi kwa si too naa ’ana ta si manga ’uria baelae lau sulia na fiitooa kera na ngwane ki ilingia tha Gideon, tha Barak, tha Samson, tha Jefta, tha Deved, tha Samuel, ma na profet ki. ³³ Sulia da fiitoo ’ana tha God, ma tai imole ’ada ki da firu ka talua ngwane ’oro ni firua ki ’i laona maetoaa baita ki. Ma tai ngwane ’ada da ilia doo ’o’olo ki, ma da ka ngala naa si doo ki ne tha God ’e alangana. Ma tai imole ’ada ’ana si manga da too karangia na laeon ki, ma ’e langi ta laeon si ’aleda bo. ³⁴ Ma tai imole ’ada lau, da fiitoo ’ana tha God, ma na ere ’ako’ako baita ka si tharufida bo. Ma tai imole ’ada lau, na maalimae kera ki ’e langi da si tala’ana bo thaumaelilada. Tai imole ki ’ada, sui boroi ’ana da ka maketho, tha God ’e faasuukwai kera lau. Sui, da ka tarida na ngwane ni omea oro ’e’ete ki. ³⁵ Ma tai keni ’i nao mai, da fiitoo ’ana tha God, ma na ngwela kera ki ne da mae naa, da ka moori lau. Aia, ma tai imole ki lau ne da fiitoo ’ana tha God ’i nao mai, ma na maalimae kera ki da ka nangasida naa ’uria maea. Sui ta, ’e langi da si dooria bo tafilae faasia ngadalae neri, sulia da thaitamai ’okae ’ania ne kera dau tatae lau faasia maea ’uria mooria mamana. ³⁶ Tai imole ’ada ki, na maalimae kera ki da faa’ida kera ma da ka nangasida. Ma tai imole ’ada ki da ka kanifaafida ’ana seni ki ma da ka alu kera ’i laona dele. ³⁷ Tai imole ’ada ki laubo, da ’uida ’ana fau lelea da ka mae. Ma tai imole ki lau da kwae fogeda ’ana roo bali doo ki. Ma tai imole ki ’ada da thaumaelida ’ana ’ila ni firu ki, sulia na fiitooa kera. Ma tai imole ki ’ada, da ka ’afi ’ana ’ungana sipsip fonea nanigot, sulia da siofaa ’asiana. Ma na maalimae kera ki da ka malaliita kera ma da ka faangada kera. ³⁸ Ma na imole ki ’i laona molaagali nee ’e langi da si tala’ana naa too kwaimanilae fonea imole ’o’olo neri ki. Ma tai imole ’ada ki da ’akwasia naa beu kera ki, da ka tatha kwailiu bada ilingia na ngwane ki ne ’e langi da si too bo ’ana ta maetoaa. Da ka too ’i laona bali fera kwasi ki, ma gwauna tolo ki, ma ’i laona maa’ofi ki, ma na kilu ki ’i laona thaegano. ³⁹ Aia, tha God ’e nonithathala ’asiana sulia na imole neri ki, sulia na fiitooa kera, sui ta, da si ngala bo doo ki sui ne tha God ’e alangana fuada, ⁴⁰ sulia tha God ’e manata sulia doo ’okae ki ne kolu too ’ua maasia. Nia ’e dooria imole neri ki da ka too maasia fasi kolu ka ’ado laubo foneda, ’ana si manga nia ’e fala naa doo ’okae ki ne ’e alangana.

¹ Aia, ma na imole ’oro ki ne da manata mamana ’ana tha God ’urineri, ’e ilingia da too fone kolu ’ana si manga neri, ma da ka lilio ’uria si tae ne kolu ilia. Nia nee kolu ka fala ekwatai naa ’ana doo ki sui ne ’e faatau kolu, ma na ta’alae ki ne ’e dau suukwai faafi kolu. Sulia kolu ilingia na imole ki ne da fita ’ana thatholae baita. Ma kolu ka fita suukwai, lelea kolu ka dao ’ana si kula ne kolu kau faasuia ’ania. ² Ma si manga kolu fita ’urineri, kolu ka alua maakolu ’ana tha Jisas, sulia nia nee na ’aena manata mamanalae kolu ki. Nia ’e falania ’i tala’ana ka mae ’ana ’airarafolo. Ma ’e langi nia si manata sulia na ’idalae ’ana maea ’urineri, sulia ’e thaitamana nia kau too ’ana nonithathalalae ’i buri. Ma ’ana si manga nee, nia ’e too naa ’i bali aolo ’ana tha God, si kula ’ana ’initooa. ³ Molu ka manatatoona na ’afitaia bae da ilia ’ana tha Jisas si manga na ngwane ta’ae ki da ote kera ’ani nia. ’Urineri, ’e langi na manatalamolu si maketho ’ana manata mamanalae kamolu ki. ⁴ Molu ka suukwai ’uria firulae fonea bibirangaa ’ana ta’alae. Sui ta, ta ngwane ’amolu ’e langi si mae ’ua ’ana firulae fonea ta’alae. ⁵ Ma ’e langi molu si manataburo ’ana si baea ni faasuukwailamolu bae tha God ’e thaea fuamolu na ngwela nia ki, bae ’e ’urii, “Ngwela nau ’ae, ’oko fafurongo ’okae si manga na Aofia ’e ngatafi ’oe. Ma si manga nia ’e toodoo fuamu, na manatalamu si maketho. ⁶ Sulia na Aofia ’e ngatafia na imole ki ne ’e liothau ’ani kera. Ma nia ka fala kwakwaelae fuana imole ki ne ’e alafaafida fasi da ka thau ’ana ngwela nia ki.” ⁷ Molu ka takwe suukwai si manga molu daotoona ’afitaia, ma molu ka alamatana tha God ka ’olosi kamolu, sulia si doo neri ’e faatana ne tha God ’e tanggi suli kamolu, ka ilingia naa ngwela nia ki. ⁸ Tha God ’e tala’ana ka ’olosia ngwela nia ki sui. Ma lelea sa ’e langi nia si ’olosi ’oe, tama ’oe langi lau ngwela mamana nia. ⁹ Ma si manga na maka kolu ki ’i see ’i laona molaagali nee, da ’olosi kolu, ma kolu ka faare baita ’ani kera. Ka ’urineri laubo, kolu ka alamatana Maka kolu ’i thalo ka ’olosi kolu, ma kolu ka too ’ana mooria ne totoo firi. ¹⁰ Aia, na maka kolu ki ’i laona molaagali nee, da ’olosi kolu sulia kae si manga bo, sulia na bibirangaa ne da thaitamana ’e ’okae. Ma tha God ’e ’olosi kolu fasi ka ’adomi kolu, ma ’e ’olosi kolu fasi kolu ka too ’o’olo laubo ilingi nia. ¹¹ Ma si manga da ’olosi kolu, kolu ka kwaimanatai sulia ’e fii kolu. Sui ta, ’i burina ne ’e ’olosi kolu, kolu thaitamana kolu kau too ’ana enoenoa sulia na abulolakolu naa kau ’o’olo. ¹² Nia nee, molu ka takwe suukwai, ma molu ka dau suukwai ’ana manata mamanalae kamolu. ¹³ Ma molu ka lea sulia na tala ’o’olo, fasi na imole ki ne manata mamanalae kera ’e maketho, da si failuka ’ana manata mamanalae kera, na manata mamanalae kera neri ’ana kau suukwai. ¹⁴ Molu ka thasi ’uria toolae ’ana enoenoa fonea imole ki sui. Ma molu ka thasi suukwai fasi na abulolamolu ka ’o’olo teefau. Lelea sa na moorilakolu ’e langi si ’o’olo, ’e ’afitai kolu ka rikia na Aofia. ¹⁵ Molu ka ade suukwai fasi ka langi ta imole ’amolu si otenia ’ana na liothaua nia tha God. Ma ’e langi molu si alamatana ta imole ka nagaa na manata mamanalae kamolu ki, ilingia ta ’ai bae too ’ana fufue doo lilinge ki ma ka nagaa naa imole ki. ¹⁶ Molu ka lilio ’okae fasi ka langi ta imole si kaubare ma kera da si manata baita ’ana tha God ilingia tha Iso. Tha Iso ’e usi ’ana mamanaa nia na ngwela ngwane ’i nao ’uria tee si titiu fanga bana. ¹⁷ Ma kolu thaitamana, ’i burina ne ’e ade ’urineri, tha Iso ka fi dooria maka nia ka faa’okae nia. Sui ta, maka nia ’e otenia ’ana, ma ka faa’okaea ’ana na doorana, sulia ’e ’afitai naa ’uria olitailana si doo ki ne nia ’e foli sui naa ’ania, sui boroi ’ana nia ka gwafea maka nia ’ana angia. ¹⁸ Na tale ’uria daolae ’i siana tha God ne kolu lea sulia, ’e langi si ilingia bo na tale ne kulee toaa ki ’i Israel da lea sulia ’i nao. Sulia si doo ne da dao karangia, da tala’ana rikilana, ma da ka tala’ana thamotoolana. Sulia ’i seeri gwe tolo ’i Saenae na ere ’e tharu ’ania, ma ka rorodoa ’i seeri, ma na thauthau ka suukwai. ¹⁹ Ma da ka rongoa na lingena bungu, ma na lingena tha God ’e ’ai baita. Ma si manga imole neri ki da rongoa naa lingee doo neri, da ka mau, ma da ka gania fasi nia si bae lau. ²⁰ Sulia da mau ’asiana ’ana baelana tha God ne ’e bae ’urii, “Lelea sa ta ngwane ma langi ta doo moori boroi ’ana ne fikoa gwe tolo neri, molu ka ’uia ’ana fau lelea ka mae bo.” ²¹ Ma sulia si doo ki ne da rikia ’ana si manga neri ’e kwaifemaungi ’asiana, tha Mosis boroi ka thaea, “Nau ku mau ma ku lebelebe naa.” ²² Ma si manga neri, kolu si dao karangia naa si doo ’urineri. Sulia kolu dao naa ’ana tolo ’i Saeon, na maetoaa nia tha God ne ’e moori, na maetoaa baita ’i Jerusalem ’i thalo. Nia naa si kula nee ofulana molee enselo ki da too ’ania. ²³ Kolu ofu mai fonea na ngwela totongenao nia ki tha God ne da nonithathala ’asiana, ma na thatada da ka kedaa mai ’i thalo. Ma kolu ka dao naa siana tha God ne tooketaa na imole ki sui. Ma kolu ka dao laubo siana mangoda na imole ’okae ki ne tha God ’e ’olosida. ²⁴ Ma kolu ka dao naa siana tha Jisas, na ngwane ne thaungana alangaia faalu ’usi kolu fonea tha God. Sulia na ’abuna ne igwa, kolu kau ngala si doo ’okae ki, sui ta, na ’abuna tha Ebol ’e langi si fala doo ’okae neri ki. ²⁵ Molu ka roosulia baelana tha God. Sulia na imole bae ki da otekera ’ana roosulilana tha God ’i gwauna tolo ’i Saenae, da ngala naa kwakwaelae baita. ’Urineri laubo, lelea sa molu ka otekamolu ’ana na ngwane ne bae mai fuakolu faasia ’i thalo, molu kau ngala laubo kwakwaelae. ²⁶ ’E tau na mai, na molaagali nee ’e ’isu sulia lingena baelana tha God. Sui si manga neri, nia ’e alangai ka ’urii, “Ta si manga lau, nau kwau ’isua molaagali nee ma na lofothalo laubo.” ²⁷ Ma si baea neri, “ta si manga lau” ’e faatana tha God naa kau ’isua doo ki ne ’e thaungana, ma ka lafuda teefau, fasi na doo ki ne ’e too ngado bo ne ka ore. ²⁸ Sulia kolu too ’i laona ’initooa ne suukwai ka totoo firi, kolu kau faabaitaa tha God, ma kolu kau faanonithathala tha God ’ana foasilana ma faatailana faabaitalae. ²⁹ Sulia na God kolu, ’e tala’ana faafunuilana imole ki ’ana ere.

¹ Kamolu bare doora ki bo ’ana tha Kraes, molu ka takwe suukwai ’ana liothaua fuamolu kwailiu. ² ’E langi molu si manataburo ’ana konitailana imole dao ki. Sulia tai imole ki da konitana ngwane ki ’i laona beu kera, sui ta, ’e langi da si thaitamana bo ne na ngwane neri ki na enselo ki bana. ³ Aia, molu si manataburo laubo ’ana imole ki ne da too ’i laona dele. Molu ka tanggi ’okae sulida, ilingia ne molu too foneda ’i laona dele. Ma molu ka ’adomia laubo na imole ki ne da too ’ana ’afitaia ki, ilingia ne molu too laubo ’ana ’afitaia foneda. ⁴ Aia, nia ’e ’okae fuamolu teefau fasi molu ka faabaitaa na too ofulae ’ana arailae. Molu ka too mamana fuana arai kamolu ki ma ’afe kamolu ki. Sulia tha God kau fala kwakwaelae fuana ni ti ne abulolana ’e oengwanea ma ka kaubare ’ana oea. ⁵ Aia, molu ka nonilaa faasia doorilana malefo ’oro. Ma molu ka nonithathala sulia si doo ki ne molu too ’ania. Sulia tha God bae ’e thaea, “’E langi kwasi lea faasi kamolu, ma ka langi kwasi otenau ’ani kamolu.” ⁶ Sulia ’e ’urineri, kolu ka bae nonirara’a ’urii, “Na Aofia naa na ngwane kwai’adomi nau. Sulia si doo neri, ’e langi kwasi maungia bo ta si doo na ngwane ki da ilia ’ani nau.” ⁷ ’E langi molu si manataburo lau ’ana ngwane baita kamolu ki ne da toodoo fuamolu ka sui naa ’ana baelana tha God. Molu ka manata sulia na mooria ’okae kera ki fonea na maelada. Ma molu ka ade sulia na manata mamanalae kera ki. ⁸ Tha Jisas Kraes ’e totoo si tatala. Nia ’e bobola bana ilingia ’i rooki, ma ’i tari’ina, ma si manga ne ’e nia ’ua kau. ⁹ Ma molu ka too faasia faamamanelana toodoolae ’e’ete ki ne ’e langi si mamana. Liothaua nia tha God fuakolu ne faasuukwaia na moorilakolu. ’Urineri ne ka ’adomi kolu, sui ta, na roolae sulia na bibirangaa ’ana fanga ki, ’e langi si ’adomi kolu bo. ¹⁰ Sui ta, na imole ki ne da lado lealae sulia bibirangaa ki ’i Jiu ’ana afuafulae, ’e langi da si too ’ana ta suukwaia ’uria ngalilana doo ’okae ki ne lea mai faasia afuafulae nia tha Kraes. ¹¹ Molu thaitamana, si manga ne kulee toaa ’i Israel da fala afuafulae sulia da dooria na faafaalulada faasia na ta’alae kera ki, na foa ni gwau ka ngala mai na ’abu na doo moori ki ’i laona na Beu Abu ’ana “si kula ne ’e abu ’asiana.” Aia na nonii doo ki ne da afuafu ’ania, ka tharufia ’i maa faasia ’i laona maetoaa. ¹² Ma nia nee adea tha Jisas boroi ka mae laubo ’i maa faasia maetoaa ’i Jerusalem, fasi ka faafaalua na imole ki faasia na ta’alae kera ki ’ana na ’abuna. ¹³ Nia nee si doo ne adea kolu ka lea laubo ’i maa faasia maetoaa ’i Jerusalem fasi da ka faa’ida kolu ilingia ne da ilia ’ana tha Jisas. ¹⁴ Sulia ’i laona molaagali nee, ’e langi kolu si too ’ana ta maetoaa ne totoo firi. Sui ta, kolu kwaimaakwali ’ana maetoaa ’i thalo ne kau dao mai. ¹⁵ Nia nee, kolu ka faabaitaa tha God ’ana si manga ki sui. Na tangolae neri, nia naa na afuafulae kolu fuana tha God sulia tha Jisas nee kolu thaea ’ana Aofia kolu. ¹⁶ ’E langi molu si manataburo ’ana ade ’okaelae ma na ’adomilamolu kwailiu. Sulia na abulolae ’urineri ne ’e ilingia na afuafulae laubo ne tha God ’e nonithathala sulia. ¹⁷ Molu ka roosulia na ngwane naonao kamolu ki. Da liosulia na mangomolu, ma dau faarongo ’ania raoa kera ki fuana tha God. Ma lelea sa molu ka roosulia na baelada, da ka nonithathala ’asiana sulia na raoa kera ki. Ma lelea sa ’e langi molu si roo bo suli kera, kera dau kwaimanatai sulia na raoa kera ki, ma ’e ’afitai da ka ’adomi kamolu. ¹⁸ Ma molu ka ililado ’ana foalae fuameli. Kameli meli thaitamana ne ’e langi ta si doo ta’ae bo ’i laona abulolameli, sulia meli thasi ’uria ililana doo ’okae ki ’ana si manga ki sui. ¹⁹ Ma nau ku gani kamolu, fasi molu ka foa fuaku, fasi tha God ka olitai ’ali’ali mai ’ani nau ’i siamolu. ²⁰ Tha God ’e taea na Aofia kolu tha Jisas faasia maea. Ma sulia na afuafulae nia tha Jisas ’ana maelana, nia ’e ilingia ta ngwane ne ’e liosulia sipsip nia ki. Ma tha God ’e thaungana na alangaia faalu ’ana afuafulae nia tha Jisas. Ma na alangaia neri ’e langi si sui. ²¹ Aia, nau ku foa fasi tha God ’ana enoenoa nia kau fala doo ’okae ki sui ne molu ’atongia fasi molu ka ilia si doo ki ne nia ’e dooria. Ma nau ku foa laubo fasi tha Jisas Kraes ka ’adomi kamolu, ma molu ka ilia doo ki ne tha God ’e nonithathala sulia. Ma kolu ka faabaitaa tha Jisas Kraes ne ’e totoo firi! Iuka ka ’urineri naa. ²² Doora nau ki ’ae, nau ku gani kamolu fasi molu ka fafurongo noni maabe ’uria si baea nau ki ’uria faasuukwailamolulae. Sulia na kekedalae nau, ’e langi si tikwa bo. ²³ Nau ku dooria ku faarongo kamolu ’ana doora kolu tha Timoti ’e kotho naa ’i maa faasia na dele. Lelea sa nia ’e dao ’ali’ali mai ’i see, nau ku talaia fone nau si manga ku lea kau ’ana siamolu. ²⁴ Molu ka fala si baea ’okae kameli ki fuana ngwane naonao kamolu ki teefau, ma fuada na imole nia ki tha God sui bo ne da too fone kamolu. Na doora kolu ki faasia ’i Itali, da fala laubo si baea ’okae kera ki fuamolu. ²⁵ Nau ku foa fasi tha God ka liothau ’ani kamolu teefau.