Galesia

Galesia

¹ - ² Na kekedalae nee ’e lea kau faasia nau tha Pol, ma na ange doora nia ki tha Kraes ne da too fone nau ’i seeki, fuamolu imole manata mamana nia ki tha God ’i laona bali fera ’i Galesia. Nau naa ne ta aposol nia tha Jisas. ’E langi ta ngwane si fili nau ’uria si raoa nee. Tha Jisas Kraes fonea tha God na Maka ne ’e taea tha Jisas faasia na maea ’ana nee daru fili nau ’uria raoa nia na aposol. ³ Nau ku foa fasi tha God na Maka kolu fonea tha Jisas Kraes na Aofia daru ka fala ’okaelae ma na enoenoa fuamolu. ⁴ Tha Kraes ’e falania ’i tala’ana ’uria ta’alae kolu ki fasi ka lafu kolu faasia na abulota’alae ’oro ki ne ’e too ’i laona molaagali ’ana si manga neri. ’Urineri, nia ’e roosulia na kwaidooria nia tha God na Maka kolu. ⁵ Nau ku dooria fasi kolu ka faa’initooa tha God ne totoo firi! Iuka nia ka ’urineri naa. ⁶ Nau ku kwele ’asiana ’ana si doo nee molu ilia, sulia ’e langi si tau bo molu ka singgi tau naa faasia tha God ne fili kamolu fasi molu ka too ’i farana ’okaelae nia tha Kraes, ma si manga neri molu ka manata mamana naa ’amolu ’ana ta toodoolae ’e’ete lau ne tai imole ki da ’alangia ’ana na Faarongolae ’Okae. ⁷ Sui ta, na toodoolae neri ’e langi lau na Faarongolae ’Okae mamana sulia tha Kraes. Tai imole ki bana ne da faagaro kamolu, ma da ka thasi ’uria bulasilana Faarongolae ’Okae sulia tha Kraes. ⁸ Ma sui boroi ’ana lelea sa kameli ma langi ta enselo faasia ’i thalo ne ka faatalo ’ana fuamolu ta si faarongolae ne ’e ’e’ete faasia si doo nee meli faatalo naa ’ania fuamolu ’i nao, ’e tala’ana tha God ka ’ui ’ania ngwane neri ’i laona ere ne thatharu si mae. ⁹ Ilingia bae meli thaea ka sui naa ’i nao, ma nau ku thaea lau fuamolu: Lelea sa ta ngwane ka faatalo ’ania fuamolu ta si toodoolae ne ’e ’e’ete faasia si tae nee molu manata mamana sui naa ’ania, ’e tala’ana tha God ka ’ui ’ania ngwane neri ’i laona ere ne thatharu si mae. ¹⁰ Si manga ku thaea si baea neri ki, ’e langi kwa si thasi lau ’uria, fasi na imole ki da ka faabaita nau. ’E langi ’asiana. Nau ku dooria ’aku tha God ’ana ’i tala’ana ne ka faabaita nau. Lelea sa nau ku thasi ’uria fasi na imole ki da ka doori nau, ’urineri nau ’e langi lau ta ngwane ni rao nia tha Kraes. ¹¹ Doora ki ma ngwaingwane ki ’ana tha Kraes ’ae, nau ku thaea fuamolu, na Faarongolae ’Okae nee ku faarongo ’ania, ’e langi lau ta doo ne ’e thafali mai faasia na ngwane ki. ¹² ’E langi kwasi ngala lau faasia ta ngwane, ma ’e langi ta ngwane si faamanatai nau bo ’ania. Tha Jisas Kraes ’ana ne ’e tala faatana fuaku. ¹³ Kamolu molu rongoa sui naa si doo ki sui sulia na toolaku mai ’i nao, si manga bae ku foasia ’ua tha God ilingia na Jiu ki da ilia. Kamolu molu ka rongoa laubo bae ku faangadaa na imole manata mamana nia ki tha God, ma ku thasi suukwai ’asiana ’uria tagalongailada. ¹⁴ Si manga ku daraa ’ua, ’orolana ngwane ki ’i Jiu da daraa laubo fone nau, ku siitatha ’ani kera ’ana roolae sulia na toodoolae kameli Jiu ki ma sulia na bibirangaa kera na kokoo abu kameli ki. ¹⁵ Sui boroi ’ana ka ’urineri, sulia na ’okaelae nia tha God ’i nao ’ana ne ku futa, tha God ’e fili nau naa ’uria ililana raoa nia ki. ¹⁶ Ma tha God ’e nonithathala ’uria faatailana Ngwela nia fuaku, fasi ku faatalo ’ania na Faarongolae ’Okae sulia tha Jisas fuana imole ki ne langi lau Jiu. Ma si manga tha God ’e faatana Ngwela nia fuaku, nau kwasi lea naa siana ta ngwane fasi ka faamanatai nau. ¹⁷ ’Urineri, ’e langi kwa si lea ’alaa ’uria ’i Jerusalem ’uria rikilana aposol ki ne da rao totongenao ’ani nau. Nau ku lea ’aku ’uria bali fera ’i Arabia, sui ku oli lau mai ’uria ’i Damaskas. ¹⁸ Sui burina olu fe ngali, nau ku fi lea ’uria ’i Jerusalem ’uria rikilana tha Pita, ma ku too fonea sulia akwala ma lima fe dani. ¹⁹ Ma nau ku bae laubo fonea tha Jemes, na ngwane ’i burina na Aofia, sui ta, ’e langi kwasi rikia ta aposol lau. ²⁰ Ma si doo nee ki sui ne ku kedaa kau fuamolu, na doo mamana ki sui bo. Tha God ’e thaitamana ne nau ’e langi kwasi suke. ²¹ ’I buri, nau ku lea lau ’uria bali fera ki ’i Siria ma ’i Silisia. ²² ’Ana si manga neri, na imole manata mamana nia ki tha Kraes ’i laona bali fera ’i Jiudea, ’e langi da si thaitamaku bo. ²³ Da thaitamana bada si baea nee tai imole ki da bae suli nau ne da ’urii, “Na ngwane bae ’e faangada kolu ’i nao ma ka thasi ’uria nagalana imole manata mamana nia ki tha Kraes nena. Si manga neri, nia ’e faatalo naa ’ana tha Kraes fasi na imole ki da ka manata mamana ’ani nia.” ²⁴ Ma sulia si faarongolae neri nia nee da ka faabaitaa tha God ’uria si doo ki ne ku ilia.

¹ ’I burina tee akwala ma fai fe ngali, nau ku fi oli lau ’uria ’i Jerusalem fonea tha Banabas, ma ku talaia tha Taetas ka lea laubo fone kamiria. ² Tha God ne dooria ku lea ’i seeri sulia na faataia nia fuaku. Ma ’ana si manga ku bae ofu fonea ngwane naonao ki ’i Jerusalem talifilida, ma ku ’inifita ’okae ’ana na Faarongolae ’Okae neri ku toodoo sulia fuana imole ki ne langi lau Jiu. Nau ku faarongoa ngwane naonao neri ki sulia na raoa nau ki sui, fasi da ka alafaafia, ade’ana ku lada ulafu baku ’ana si raoa nee. ³ Tha Taetas na ngwane ne ’e too fone nau, ’e langi lau ta ngwane ’i Jiu, nia na ngwane ’i Grik ’ana, ma na ngwane naonao ki da si suumai nia bo ’uria ’irimamalafoalae. ⁴ Kameli meli bae sulia si doo neri ki, sulia tai ngwane ki da suke da ka thaea thasa da manata mamana, ma da ka dooria fasi nia ka ’irimamalafoa naa. Na ngwane neri ki da lea agwa mai ’uria nagalana manata mamanalae nee meli too ’ania ’ana tha Jisas Kraes fasi ka faamoori kameli. Da dooria da ka suumai kameli ’uria roolae sulia na bibirangaa ki. ⁵ Sui meli si ala bo faafia imole susuke neri ki ’ana ta tee kae si manga boroi, sulia ’e langi meli si dooria da ka nagaa na mamanaa ’ana Faarongolae ’Okae nee molu manata mamana naa ’ania. ⁶ Ma na ngwane naonao ki ne imole manata mamana ki ’i Jerusalem da alafaafida, ’e langi da si thaea bo ta si doo faalu fuaku sulia toodoolae nau. (Sui ta ’e langi kwa si ’a’abo bo sulia imole neri ki, nee tai imole ki da fiia thasa kera na ngwane baita ki. Sulia talitoona tha God bo ne tala’ana ka thaea na ngwane ’e baita.) ⁷ ’Urineri na ngwane naonao neri ki, tee si doo ne da tala rikia ne tha God ’e fala naa si raoa nee fuaku ’uria faatalolae ’ania fuana imole ki ne langi lau Jiu, ilingia laubo ne ’e fala si raoa nee fuana tha Pita ’uria faatalolae ’ania fuada na Jiu ki. ⁸ Sulia tha God ne alu nau, ku aposol fuana imole ki ne langi lau Jiu, ilingia laubo ne ’e alua tha Pita ka aposol fuada imole ki ’i Jiu. ⁹ Tha Jemes, ma tha Pita, fonea tha Jon, nee na ngwane naonao ki, da thaitamana ne tha God ’e fala si raoa baita nee fuaku ’uria faatalolae ’ani nia fuana imole ki ne langi lau Jiu. Nia nee adea da ka thamo ’ana ’aba aolo kamiria tha Banabas, fasi ka faatana ne da alafaafi kamiria fasi miri ka rao ’i malutamolu imole ki ne langi lau Jiu, ma kera da ka rao ’i malutada na imole ki ’i Jiu. ¹⁰ Ma tee si doo bo ne da doori kamiria fasi miri ka manatatoona na kwai’adomia fuana imole siofaa ki ’i malutana imole manata mamana nia ki tha God ’i Jerusalem. Iuka, si doo neri ne ku rao suukwai ’asiana ’uria ililana. ¹¹ - ¹³ Si manga tha Pita ’e dao ’i Antiok, nia ka fanga bana fonea imola ki ne langi lau Jiu. Sui, tai imole ki ’i Jiu ne tha Jemes ’e faleda kau da ka dao ’i seeri. Na imole neri ki da ka manata ’urii, “Lelea sa ’e langi ta ngwane si ’irimamalafoa, nia ’e langi lau na ngwane mamana nia tha Kraes.” Bo, tha Pita ka langi si fanga naa fonea imole ki ne langi lau Jiu. Nia ’e ade ’urineri sulia ’e mau ’ana olisusuulae fonea imole ki ’i Jiu ne da lea mai faasia ’i Jerusalem. Ma tai Jiu ki ne da manata mamana laubo ’ana tha Kraes, si manga da rikia tha Pita ne ade ’urineri, da ka mau laubo ilingia tha Pita, ma da si fanga naa laubo fonea imole ki ne langi lau Jiu. Ma tha Banabas boroi ka ade laubo sulida. ¹⁴ Sui ta, si manga neri, nau ku rikia ne da garo, sulia ’e langi da si roosulia bo na mamanaa ’ana Faarongolae ’Okae. Ma nau ku ngatafia tha Pita ’i maana imole ’oro ki ne da manata mamana, sulia nia ’e garo ’asiana. Ma ku bae ’urii fuana, “’Oe na ngwane ’i Jiu, sui ta ’o ekwatana naa na bibirangaa kera imole ki ’i Jiu, ma ’oko too na ’amu ilingia ta ngwane ne langi lau Jiu. Kera ’e langi lau imole ki ’i Jiu ’i see. ’Oe ’o garo ’asiana ngwalee ne ’oko suumana imole ki ne langi lau Jiu ’uria roolae sulia bibirangaa kera Jiu ki.” ¹⁵ ’E mamana, nee meli futa mai ’ana Jiu ki, ma kameli ’e langi lau imole maadiu ki ne ’e langi da si lea bo sulia bibirangaa nia ki tha Mosis. ¹⁶ Ma kameli Jiu ki meli thaitamana ne na ngwane ka ’olosia na toolana fonea tha God ’ana manata mamanalae ’ana tha Jisas Kraes, ma ka langi lau ’ana roosulilana bana bibirangaa nia ki tha Mosis. ’Urineri nee meli ka manata mamana laubo ’ana tha Kraes Jisas fasi meli ka ’o’olo ’i maana tha God. Tha God ’e thae ’o’olo ’ani kameli, sulia ne meli manata mamana ’ameli ’ana tha Kraes, ka langi lau ’ana roolae sulia na bibirangaa ki. Sulia na roolae sulia na bibirangaa ki ’e langi si tala’ana kau ’olosia ta ngwane ’i maana tha God. ¹⁷ ’Ana si manga neri, kameli Jiu ki, meli rofe ’asiana ’uria mooria ’ana tha Kraes ka talua fatai roolae sulia bibirangaa ki, ma tai Jiu ki da ka thaea thasa kameli naa na imole abulo ta’ae ki. ’Urii ma, nia ’e toolamana ’ana thasa tha Kraes naa ne adea meli ka abulo ta’ae, sulia ne meli ’akwasia lealae sulia bibirangaa ki? ’E langi si ’urineri lau. ¹⁸ Sui ta, lelea sa nau ku oli, ma ku manata mamana lau ’ana bibirangaa ki ne ku otenau naa ’ania, nau ku ’asi nau naa ’i laona abulota’alae. ¹⁹ Si manga ku too sulia na bibirangaa ki, nau ku rikia fulingana sa ’e langi kwa si fiitoo bo sulia na bibirangaa ki fasi ku ’o’olo ’i naofana tha God. Nia nee ku ekwatana naa bibirangaa fasi ku too ’aku sulia tha God. ²⁰ Tha God ’e ofu nau fonea tha Kraes ne ’e mae naa ’ana ’airarafolo. Nia nee nau ku mae naa, sui ta, tha Kraes ne ’e too ’i laona moorilaku. Ma na mooria ne ku too ’ana si manga neri, nau ku moori ’ana manata mamanalae nau ’ana na Ngwela nia tha God. Nia ’e liothau ’ani nau, ma ka mae fasi ka faamoori nau. ²¹ Tha God ’e alafaafi kolu sulia na ’okaelae nia. ’E langi kwa si otenau ’ana ’okaelae nia. Ma lelea sa ta ngwane ka ’o’olo fonea tha God sulia na bibirangaa ki, nia ’e faatana ne na maelana tha Kraes na tofa doo bana.

¹ Kamolu imole ki ’i Galesia, molu oengwanea ’asiana! Nau ku toolamana sui naa fuamolu na maelana tha Jisas Kraes ’ana ’airarafolo. Sui ta, ’e ilingia ’ana sa tai ngwane ki ne da faagaro kamolu ’uria toodoolae garo ki! ² Nau ku dooria molu ka thaitamana tee si doo ’e ’urii: Kamolu molu si konitana bo na Mangoedoo Abu tha God sulia ne molu roosulia na bibirangaa nia ki tha Mosis, sui ta, sulia nee molu manata mamana ’ana Faarongoa ’Okae sulia tha Jisas, ma molu ka fiitoo ’ani nia. ³ Kamolu molu oengwanea ’asiana. Na Mangoedoo Abu ne adea ma molu ka thafalia na mooria laona toolae faalu, sui ta, ’i tari’ina molu thasi ’uria ililana raoa nia ki na Mangoedoo Abu ’ana suukwaia kamolu ki ’i tala’amolu. ⁴ Kamolu molu ngada ’asiana sulia na fiitooa kamolu ’ana tha Jisas. Lelea sa molu oli faasia ma molu ka ade lau sulia na bibirangaa nia ki tha Mosis, na fiitooa kamolu kau funu. ⁵ Nau ku dooria fasi molu ka thaitamana sulia na liothaua nia tha God, nia ’e tofa fala na Mangoedoo Abu nia fuamolu, ma nia ka ilia si doo ni kwelelae ’ania ki ’i malutamolu, ’e langi lau sulia ne molu roosulia na bibirangaa ki, sulia na fiitooa kamolu ’ana tha Jisas. ⁶ Ma molu ka manata fasi sulia tha Abraham, na Kekedalae Abu bae ’e bae ’urii, “Nia ’e manata mamana ’ana tha God, ma tha God ka faamamane nia na ngwane ’o’olo sulia na manata mamanalae nia.” ⁷ Molu ka thaitamana sa ni ti boroi ’ana ne ka manata mamana ’ana tha God, nia na ngwela nia tha Abraham. ⁸ Na Kekedalae Abu ’e bae ’urii ’i nao mai, tha God kau faare ’o’olo ’ana imole ki ne langi lau Jiu ’ana manata mamanalae kera. Ma tha God ’e faarongo ’ana faarongolae ’okae neri fuana tha Abraham ka ’urii, “Nau kwau faa’okaea na imole ki sui sulia ’oe.” ⁹ Iuka, tha Abraham ’e manata mamana, ma tha God ka ’oilaketana. ’Urineri laubo, sa ni ti kera boroi ’ana ne da manata mamana, tha God kau faa’okae kera laubo ilingia tha Abraham. ¹⁰ Sa ni ti kera ne boroi ’ana ne da manata thasa tha God ’e alafaafida ne da ’o’olo sulia da roosulia na bibirangaa ki, kera dau ngala na kwakwaelae faasia tha God. Sulia na Kekedalae Abu bae ’e bae ’urii, “Sa ni ti boroi ’ana ne langi si ’ara roosulia na bibirangaa ki sui, dau ngala kwakwaelae faasia tha God.” ¹¹ Ma nia ’e folaa ’asiana ’e langi ta ngwane si ’o’olo fonea tha God ’ana na bibirangaa ki, sulia na Kekedalae Abu ’e bae lau ’urii, “Sa ni ti kera boroi ’ana ne da ’o’olo fonea tha God sulia na manata mamanalae, kera dau moori firi.” ¹² Na bibirangaa ’ana mooria sulia manata mamanalae ’e langi si ilingia lau na bibirangaa ’ana lealae bana sulia bibirangaa nia tha Mosis ne ’e bae ’urii, “Lelea sa ’o dooria ’oko daotoona mooria ’ana roolae sulia na bibirangaa, ’oko roo naa sulia bibirangaa nia ki teefau tha God.” ¹³ Na kwakwaelae ne ’ito mai faasia bibirangaa nia ki tha Mosis, tha Kraes ’e lafua naa faasi kolu, ma ka ngala naa ’i tala’ana. Sulia na Kekedalae Abu bae ’e bae ’urii, “Na ngwane ne da thaumaelia ’i thalofana ’ai, nia ’e mae sulia ’e ngala na kwakwaelae nia tha God.” ¹⁴ Tha Jisas Kraes ’e foli olitai kolu naa faasia keketoa ki ’ana bibirangaa. ’Urineri ne tha God ka faa’okaea laubo na imole ki ne langi lau Jiu ’ana na ’okaelae ne ’e alangana fuana tha Abraham. Ma kolu teefau na imole ki ne kolu manata mamana, kolu ka too laubo ’ana Mangoedoo Abu sulia na manata mamanalae neri. ¹⁵ Doora ma ngwaingwane nau ki ’ana tha Kraes ’ae, nau ku ’inifitaa sui naa na maalutana na Kekedalae Abu, si manga neri ku ’inifitaa lau na alangaia neri ’ana na manatalae ngwane kera imole ki ’ana si manga ki. Lelea sa ta roo imole daru ka bae alangai, ’e langi ta imole si talana naa ta si kula ’ana ma laa ’e langi daru si ’oia lau alangaia neri. Na alangaia neri ’e ilingia laubo na alangaia ne lea mai faasia tha God fuana tha Abraham ma na ’alakwa nia. ¹⁶ Iuka, tha God ’e bae alangai fonea tha Abraham ma na ’alakwa nia. Na Kekedalae Abu ’e langi si bae lau ’urii, “Na ’alakwa ’oe ki,” nee maalutana na ngwane ’oro ki. Nia ’e bae ’ana ’urii, “Na ’alakwa ’oe,” nee maalutana tee ngwane bo, ma nia naa nee tha Kraes. ¹⁷ Na maalutana na baelaku ne ’e ’urii: Tha God ’e thafali faasuukwaia na alangaia fonea tha Abraham, ma ka alangana laubo ne nia kau manata mamana. Nia nee na bibirangaa nia ki tha Mosis ne tha God ’e fala fai talange ma olu akwala fe ngali naa ’i burina, ’e ’afitai ’asiana ka muusia na alangaia ne tha God ’e ilia fuana tha Abraham. ¹⁸ Nia nee lelea sa tha God ka fala doo ’okae ki fuakolu sulia ne kolu roosulia na bibirangaa ki, ’urineri ’e langi nia si fala sulia na alangaia nia. Nia ’e fala ’ana sulia na alangaia nia, nia nee tha God ka tofa fala doo ’okae ki fuana tha Abraham. ¹⁹ ’Urifita nee tha God ka fala bibirangaa ki? Tha God ’e fala bibirangaa ki ’i burina alangaia nia, fasi ka faatai folaa ’ana abulota’alae ki, lelea ka dao ’ana fe dani ne ngwela nia tha Abraham, nia nee tha Kraes, ne tha God ’e alangana kau dao mai. Tha God ne fala enselo ki fasi da ka fala si baea fifii ki fuana tha Mosis. Ma tha Mosis ne na ngwane ni ngali baea, sulia nia nee ’e ngala mai si baea fifii ki, ma ka fala fuana imole ki. ²⁰ Sui ta, si manga tha God ’e bae alangai fuana tha Abraham, nia si dooria naa ta ngwane ni ngali baea, sulia nia ’e ilia naa si doo neri ’i tala’ana. ²¹ ’E ’urifita, ’urineri na bibirangaa nia ki tha Mosis ’e langi si alafaafia na alangaia nia ki tha God? ’E langi ’asiana! Sulia lelea sa tha God ka fala bibirangaa neri ’uria faamoorilana imole ki, ’urineri na imole ki da ka roosulia, ma da ka ’o’olo bada ’i maana tha God. ²² Sui ta, na Kekedalae Abu ’e thaea na imole ki sui da dooria abulota’alae, ma ’e langi da si tala’ana naa roolae sulia na bibirangaa ki. ’Urineri ne tha God ka alangana mooria ne totoo firi fuana imole ki ne da manata mamana ’ana tha Jisas Kraes. ²³ ’I nao ’ana fatai si manga neri ’ana manata mamanalae ’ana Jisas Kraes ’e dao mai, tha God ’e ofu kolu Jiu ki ’i farana bibirangaa nia ki tha Mosis, lelea ka dao ’ana si manga ne tha God ’e faatana tale faalu sulia na manata mamanalae ’ana tha Kraes. ²⁴ Kolu too ’i farana bibirangaa ki lelea ka dao ’ana si manga ne tha Kraes ’e dao mai. ’Urineri, ’i burina ne tha Kraes ’e dao naa, kolu ka ’o’olo naa ’i maana tha God, sulia na manata mamanalae kolu ’ani nia. ²⁵ Iuka, si manga neri, kolu si too naa ’i farana bibirangaa ki sulia si manga ’uria manata mamanalae ’ana tha Kraes ’e nii naa fone kolu. ²⁶ Kamolu sui bo na ngwela nia ki tha God, sulia na manata mamanalae kamolu ’ana tha Kraes Jisas. ²⁷ Kamolu molu sisiuabu sui naa ma ka faatana naa ne molu ’ado naa fonea tha Kraes, ’urineri nee na mooria kamolu ka ilingia naa tha Kraes. ²⁸ Nia nee, ka langi naa ta ’e’etelae ’i malutana imole ki ’i Jiu ma na imole ki ne langi lau Jiu, ma na ngwane ki ma na keni ki, ma na ngwane tofa rao ki ma na ngwane ki ne langi ta ngwane si baita faafida. Kamolu teefau, molu bobola bo ’i maana tha God, sulia molu too ofu naa fonea tha Kraes Jisas. ²⁹ Sulia kamolu naa na imole nia ki tha Kraes. Nia nee kamolu laubo na ngwela ki ’ana kwalafa nia tha Abraham, ma molu kau ngala faa’okaelae ki ne tha God ’e alangana fuana tha Abraham.

¹ Nau ku dooria ku ore ’inifita folaa lau ’ania si doo nee ku bae sulia, lelea sa ta ngwane ’e too ’ana ta ngwela, nia kau fala si doo nia ki sui fuana. Sui ta, si manga na ngwela neri ’e faekwa ’ua, ’e ilingia ta ngwane ni rao bana, sulia ’e langi si baita ’ua ’uria liolae sulia na aludooa nia ki ’i tala’ana. ² Si manga ’e faekwa ’ua, tai ngwane ki ne da liosulia aludooa fuana, lelea ka dao ’ana si manga na maka nia ’e ’olea fuana. ³ Nia ’e ’urineri laubo, ’i nao mai ’ana si manga kameli Jiu ki meli si manata mamana ’ua ’ana tha Kraes, meli roo ’ameli sulia na bibirangaa ki ’ana toolae ’i laona molaagali, ilingia ta ngwane tofa rao ne ’e rao bana sulia na ngwane baita nia. ⁴ Ma ’ana si manga neri tha God ’e ’olea fuana ’e dao na mai, ma nia ka fala na mai Ngwela nia ’i laona molaagali. Nia na ngwane, ma ka futa ’ana tee keni, ma nia ka roosulia na bibirangaa kameli Jiu ki. ⁵ Nia ’e ade ’urineri fasi ka lukea ni ti kera ne na bibirangaa ki ’e dau faafida, fasi ka adea kolu ka thau ’ana ngwela nia ki tha God. ⁶ Sulia ne kolu naa na ngwela nia ki tha God, nia ’e fala Mangoedoo Ngwela nia ka too ’i laona mooria kolu. Ma na Mangoedoo Nia ’e adea kolu ka foa ’urii, “Maka ’ae, Maka ’ae.” ⁷ Ma kamolu ’e langi lau na ngwane tofa rao ki. Ni kamolu naa na ngwela inomoori nia ki tha God. Ma sulia ne kamolu naa na ngwela inomoori nia ki, nia kau fala doo ki sui ne ’e alua ’uria falelana fuana ngwela nia ki. ⁸ Si manga ’e langi molu si thaitamana ’ua tha God, doo ’e’ete ki bana ne langi lau god mamana ki, kera ne da ’inito faafia moorilamolu. ⁹ Sui ta, ’ana si manga neri naa, ni kamolu molu thaitamana naa tha God ma langi ku bae ’aku ’urii, tha God ’e thaitamamolu naa. ’Urineri, ’urifita lau nee molu ka oli, molu ka roo lau sulia na bibirangaa ki ’ana toolae ’i laona molaagali? Si doo neri ki ’e langi si ilia bo ta si doo ’okae fuamolu. Ma ’urifita nee molu ka dooria lau raolae fuada? ¹⁰ Nau ku rongoa kau ne molu dau sulia si doo na bibirangaa kera Jiu ki ’e thaea ’uria faabaitalana fe dani ki ’ana Sabat, ma na fafangaa ’ana sinali faalu ki, ma si manga baita ki ’i laona fe ngali ki. ¹¹ Nau ku manata ’a’abo ’asiana suli kamolu, ade’ana na raoa nee nau ku ilia ’uria ’adomilamolu ’uria daotoolana na mooria faalu ka funu. ¹² Doora ki ma ngwaingwane ki ’ae, nau ku gani kamolu, molu ka too naa faasia na roolae sulia bibirangaa nia ki tha Mosis, ilingia laubo nee nau ku too naa faasia. Sulia ne nau ku too naa faasia bibirangaa nia ki tha Mosis, ilingia laubo ne molu too naa faasia roosulilana ’i nao. Fe dani ki ’e sui toli, molu si ilia bo ta si doo garo ’ani nau. ¹³ Kamolu molu thaitamana laubo si manga bae ku faatalo ’ania na Faarongolae ’Okae fuamolu, nau ku matai bae, sui ta, nia ne ’e ade nau fasi ku faatalo ’ana Faarongoa ’Okae fuamolu. ¹⁴ Ma sui boroi ’ana nau ku matai, ma ku fala ’afitaia baita fuamolu, ’e langi molu si manata ta’ae bo fuaku, ma molu si otekamolu bo ’ani nau. Ma molu konitai nau ka ilingia ne molu konitana laubo ta enselo faasia tha God ma langi tha Kraes Jisas ’i tala’ana. ¹⁵ Ma ’ana si manga neri, kamolu molu nonithathala ’asiana. Nau ku thaitamana ne na liothaua kamolu fuaku ’e baita ’asiana. Lelea sa ku gania boroi maamolu ’uria ’adomilaku, molu si luia bo faasi nau. ’Urii ma na nonithathalalae kamolu bae, ’e nia na ’ana ’i fai nee? ¹⁶ ’Urii ma kolu maalimae lau ’i malutakolu, sulia ne ku bae ’ana mamanaa si manga neri langi ’e ’urifita? ¹⁷ - ¹⁸ Nia ’e ’okae ’asiana fuana ta ngwane ka bae alingana tai imole ’e’ete ki lelea sa ’e ilia ’uria ’okaelae. ’E mamana ’asiana, ma langi lau ’ana si manga neri ne ku too bo fone kamolu, ’ana si manga ku too tau boroi faasi kamolu laubo. Ma na ngwane bae da rao suukwai ’uria bulasilana Faarongolae ’Okae, da dooria ’asiana da ka bae alingamolu, sui ta, ’e langi si ’okae bo fuamolu. Tee si doo ne da dooria naa ne molu ka too tau ’amolu faasi nau, fasi kera bana ne molu ka lea sulida. ¹⁹ Ngwela nau ki ’ana tha Kraes ’ae, na manatalaku ’e fii ’asiana ’uri kamolu, ilingia ta keni ne ’e karangi thare ngwela. Na fiilae neri ’e langi si sui lelea ka dao ’ana fe dani ne na bibirangaa kamolu ’e lea lau sulia tha Kraes. ²⁰ ’Ana si manga neri, nau ku dooria ’asiana ku too fone kamolu, fasi kwa si bae suukwai lau ’urii fuamolu. Nau ku lalafusia naa ta si doo ne ku thaea lau fuamolu! ²¹ Nau ku soetalafamolu fasi, ni ti ’amolu ne dooria roolae sulia na bibirangaa ki, ’Urii ma kamolu thaitamana ’okae naa ’ania si doo ki ne na bibirangaa ’e thaea? ²² Na Kekedalae Abu ’e thaea thasa tha Abraham ’e too ’ana roo ’alakwa ki. Ta ngwela, ne tha Ishmael, ne ’e futa ’ana keni tofa rao nia ni Hega. Ma ta ngwela ai, ne tha Aesak, ne ’e futa ’ana ni Sera na keni tofetoo, ma nia naa na ’afe nia tha Abraham. ²³ Tha Ishmael, na ngwela ne futa ’ana ni Hega, na keni tofa rao, nia ’e futa ilingia bana ngwela ki sui. Sui ta, tha Aesak, na ngwela ne futa ’ana ni Sera, na keni ne ’e tofetoo, nia ’e futa sulia na alangaia ne tha God ’e ilia fonea tha Abraham. ²⁴ ’Urineri ne nau ku ’inifitaa fulilana si doo neri ki ’ana si omelangwane. Na roo keni neri ki daru ilingia roo alangaia ki ne tha God ’e ilia fonea imole nia ki. Ni Hega ’e ilingia na alangaia ’ana na bibirangaa ne fuli ’i gwauna tolo ’i Saenae ’i laona bali fera ’i Arabia, fera ne tha God ’e fala ’ana si baea fifii ki fuana tha Mosis. Na ngwane ki ne da lea sulia na alangaia ’ana bibirangaa, kera nee da tofa rao ’i farana na bibirangaa. Ma ’e ilingia ni Hega na keni tofa rao neri, nia talifilia bo ne kau tharea ngwela ki ne da tofa rao. ²⁵ Ma ni Hega ne ’e takwe fuana imole ki ’i Jerusalem ’i tari’ina, sulia ne da too bada ’uria raolae sulia na bibirangaa nia ki tha Mosis. ²⁶ Sui ta, ni Sera ne takwe ’uria ’i Jerusalem ne ’i thalo. Nia ’e too nonilaa, ma ’e ilingia gaa fuakolu imole ki ne kolu fiitoo ’ana tha Jisas. ²⁷ Si doo neri ne tha Aesaea ’e bae sulia ’i laona Kekedalae Abu ka ’urii, “Na keni ki ne molu ’aba’ato, ma ’e langi molu si too matafana ’ua na nonifiilae ’ana ngwela, molu ka nonithathala, ma molu ka ’ai ’amolu ’i laona nonithathalalae. Sulia na keni ne ’aba’ato, ’e too ’ana ngwela ’oro ka talua na keni ne na arai nia ’e too fonea.” ²⁸ Doora nau ki ma ngwaingwane ki ’ae, kamolu na ngwela nia ki tha God sulia na alangaia nia, ilingia tha Aesak bae ’e futa ’ana ni Sera, sulia tha God ’e alangana fuana tha Abraham. ²⁹ ’Ana si manga neri, tha Ishmael, na ngwela ni Hega ne ’e futa mai ilingia na ngwela ki sui bana ’i laona molaagali, nia ’e faangadaa tha Aesak na ngwela ni Sera, ne futa sulia na suukwaia ’ana Mangoedoo Abu nia tha God. Ma nia ’e ’urineri laubo ’ana si manga neri, na imole ki ne da rao sulia bibirangaa ki, da faangada kolu ’ana si manga neri. ³⁰ ’Urii na Kekedalae Abu ’e bae ’urifita bae? Nia ’e bae ’urii bae, “Taria na keni tofa rao nee fonea ngwela nia, daru ka lea tau kau ’adarua. Sulia na ’alakwa nia ngwela keni tofa rao nee ’e langi si tala’ana ka ngala ta si doo ’ana totodaa nia maka keerua, sulia na doo ki sui na doo nia ki tha Aesak ne ’e futa ’ani Sera na keni ne ’e too nonilaa sulia na alangaia nia tha God.” ³¹ Doora ki ma ngwaingwane ki ’ae, nia ’e ’urineri laubo, kolu langi lau ngwela nia ki ni Hega ne kolu tofa rao ’i farana bibirangaa. Kolu na ngwela nia ki ni Sera ’ana, sulia kolu fiitoo ’ana tha Jisas.

¹ Tha Kraes ne ’e lafu kolu naa, fasi kolu ka too tofetoo naa. ’Urineri molu ka takwe suukwai, ma molu ka too naa ilingia imole ki ne da nonilaa, ma ka langi lau na ngwane ni tofa rao ki fuana bibirangaa nia tha Mosis. ² Fafurongo ’okae fasi! Nau tha Pol, ku bae kau fuamolu, lelea sa molu ’irimamalafoa fasi molu ka ’o’olo ’i naofana tha God, ’e ’afitai ’asiana tha Kraes ka ’adomi kamolu bo. ³ Nau ku bae fifii lau fuana ta ngwane ne alamatana ’uria ’irimamalafoalae, nia ka ade naa sulia na bibirangaa lalau nia ki tha Mosis. ⁴ Ni ti ’amolu ne da thasi ’uria ’o’oloa ’i maana tha God ’ana roolae sulia si doo ne na bibirangaa ki ’e thaea, dau too tau naa faasia tha Kraes, ma dau muusi kera naa ’i talada faasia na liothaua nia tha God. ⁵ Sui ta, na Mangoedoo Abu ’e adea kolu ka manatatoona ne tha God ’e alafaafi kolu, sulia fiitooa kolu ’ana tha Kraes. ⁶ Sulia si manga neri kolu ’ado naa fonea tha Kraes Jisas, ma lelea sa ta ngwane ka ’irimamalafoa ma langi ka langi si ’irimamalafoa, nia ’e langi si ’e’ete bo. Si doo ’inito ’ana ne na fiitooa ’oe ne adea ma ’oko liothau ’ana imole ki sui. ⁷ ’I nao mai, manata mamanalae kamolu ’ana tha Jisas ’e ’okae ’asiana. Sui ta ’i tari’ina, ta imole ne ’e kaubarea manatalamolu ka ’urii naa faasia na toodoolae mamana. ⁸ Tha God ’e langi si ade ’urineri, sulia nia ne fili kamolu fasi molu ka manata mamana ’ana tha Kraes. ⁹ Sui ta, ta kae si toodoolae garo ne ’e too ’i malutamolu kau funguli kamolu teefau, ilingia ta kae si ’isi bae ’e tathafia gwe kumu lalau ’ana berete. ¹⁰ Nau ku thaitamana ne ’e ’afitai molu ka manata mamana ’ana toodoolae garo neri, sulia ne kolu ofu naa fonea tha Kraes ’ana manata mamanalae. Ma sa ni ti mone ne ’e fala na manata ’a’abolae fuamolu, nau ku thaitamana, nia kau ngala naa kwakwaelae faasia tha God. ¹¹ Doora nau ki ’ae, nau ’e langi kwasi faatalo ’ana fasi ngwane ki da ka ’irimamalafoa, sui boroi ’ana tai ngwane da ka thaea thasa nau ne ku ilia si doo neri. Sulia lelea sa nau ku toodoo ’urineri, ma ’urifita mone nee na imole ki ’i Jiu da ka faangada nau bada rongwane? Sui ta, da rakethasui nau, sulia nau ku bae sulia na maelana tha Kraes ’ana ’airarafolo ’uria faamoorilana imole ki. ¹² Tai imole ki da fala manata ’a’abolae fuamolu ’ana toodoolae kera ki sulia na ’irimamalafoalae. Alamia da fiia ’ada thasa tha God ’e nonithathala faafia si manga da ’irimamalafoa, lelea sa ’e ’urineri, ’urifita nee da si tala ’iri kera ’ada? ¹³ Ma kamolu doora nau ki, tha God ’e fili kamolu naa fasi molu ka tofetoo faasia bibirangaa nia ki tha Mosis. Sui boroi ’ana molu ka too tofetoo ’urineri, ’e langi molu si manata thasa ’e ’okae bana fasi molu ka roosulia na kwaidooria ta’ae ki ’ana nonimolu. Sui ta, kamolu molu tofetoo naa fasi molu ka liothau ’ani kamolu, ma molu ka ’adomi kamolu kwailiu. ¹⁴ Sulia na bibirangaa nia ki sui tha Mosis da konia bo ’ana tee bibirangaa ne ’urii, “’Oko liothau ’ana imole ki sui ka ilingia laubo ne ’o liothau ’ani ’oe ’i tala’amu.” ¹⁵ Sui ta, lelea sa molu ka firu bamolu fuamolu kwailiu ilingia na doo kwasi ki, ’urineri molu faangada kamolu kwailiu bamolu neri. Molu ka lilio ’okae, ade ’ana molu ka tagalangai kamolu kwailiu bamolu. ¹⁶ Nau ku bae ’urii: Lelea sa molu alamatana Mangoedoo Abu nia tha God ka talaia na mooria kamolu, molu ka too faasia na kwaidooria ta’ae ki ’ana noni. ¹⁷ Sulia na kwaidooria ’ana noni ’e firu ’usia na doo ne na Mangoedoo Abu ’e dooria, ma na Mangoedoo Abu ka otenia laubo ’ana na doo nee na noni ’e dooria. Na roo si doo neri ki daru maalimae ’ani keerua kwailiu. Nia ’e faatana ne, lelea sa na Mangoedoo Abu ’e talai kamolu, ’e ’afitai molu ka ilia ta si doo boroi ’ana ne molu dooria ililana ’uria faafonolana kwaidoorilae ta’ae ’ana noni. ¹⁸ Lelea sa na Mangoedoo Abu ’e talai kamolu naa, na bibirangaa ki faasia tha Mosis ’e langi si ’inito naa faafi kamolu. ¹⁹ Kolu thaitamana naa si doo ta’ae ’urineri ki ne ’ito mai faasia na kwaidooria ta’ae ’ana noni: na oea, ma manata ta’alae, ma ’abufanelae. ²⁰ Ma foasilana nunui doo ki, ma raoa ’ana dongana gano ma na kwaidoreilae. Ma na maalimaelae ’uria firulae, ma bae nagalana imole ki, ma na liota’alae, ma na firufirulae, ma na ’agudoolae, ma na toota’ale, ma na rakethasulae fuada kwailiu, ²¹ ma na malaurulae, ma kuufilana doo ne kau burasia ngwane, ma na thatholae ’ana ngwaelae ta’ae, ma na ililana doo garo ’oro ’urineri ki. Nau ku bae fifii ’ani kamolu ilingia bae ku thaea ’i nao, sa ni ti kera ne da ilia doo ’urineri ki, ’e langi da si tala’ana ruulae ’i laona na mooria ne tha God ’e ’inito faafia. ²² Sui ta, na Mangoedoo Abu ne ’e adea na imole ki da ka liothau, da ka nonithathala, da ka enoeno, da ka fefelete, da ka ade ’okae, da ka ’okae, da ka abulo mamana, ²³ da ka abulo enoeno, ma da ka dau faafia kwaidoorilae ’ana noni. Lelea sa molu ka ade sulia si doo neri ki, ’e ’afitai molu ka ’oia bo ta bibirangaa. ²⁴ Ma na imole ki ne da too naa ’ana tha Kraes Jisas ’i laona moorilada, da foto naa faafia na kwaidooria ta’ae suukwai kera ki ’i fafona ’airarafolo. ²⁵ Sulia na Mangoedoo Abu ’e fala naa mooria faalu fuakolu, ’e ’okae fasi kolu ka roosulia naa na kwaitalailae nia ’i laona mooria kolu. ²⁶ Ka langi kolu si too naa ’ana naunaulae, ma langi na faarakethasulae, ma langi na ’ugalilakolu kwailiu.

¹ Doora ma ngwaingwane nau ki ’ae, lelea sa ta ngwane ne molu daotoona ’e ilia ta si doo ne ’e garo, sa ni ti ’ani kamolu ne na Mangoedoo Abu ’e talaia, nia kau olitana mai faasia na ta’alae nia. ’Oko bae thatha’ore fuana, ma ’oko liosuli ’oe laubo ade’ana ’oko ilia laubo ta garolae ilingi nia. ² Ma molu ka ’adomia ni ti boroi ’ana ne ’e too ’ana ta ’afitaia. Ma si manga molu ade ’urineri, molu roosulia naa na toodoolae ne tha Kraes ’e fala mai. ³ Lelea sa ta imole ’e thaea thasa nia ta ngwane ’inito, ma nia si ’adomia bo ta ngwane, nia ’e suke nia bana ’i tala’ana. Nia ’e langi lau ta ngwane mamana. ⁴ Alu tee tee ngwane ’ani kamolu ka filongai ’okae ’ana na abulolae kamolu ki ’i tala’amolu. Ma nia ka manata sulia na abulolana ’e ’okae ma laa ’e langi. Ma lelea sa na abulolana ’e ’okae, tala’ana nia ka bae ’okae ’ana ’i talana. Sui ta, nia si faabobolangana abulolana ’i tala’ana fonea abulolana ta ngwane ’e’ete lau. ⁵ Sulia ’e ’urineri tee tee ngwane ’akolu ka tanggi sulia abulolana ’i tala’ana. ⁶ Na ngwane ne ’e toodoo fuamolu sulia baelana tha God, tala’ana molu ka fala naa na kwai’adomia ki fuana sulia na toodoolae ’okae neri. ⁷ Langi molu si manata garo lau sulia si doo nee ki ku thaea: ’E ’afitai ’asiana ta ngwane ka thaufangana ta si doo faasia tha God. Na ngwane kau ngala na kwaiaraa nia faasia tha God sulia si doo ki ne ’e ilia, ilingia na ngwane ne ’e konia fufue doo ki ’ana si doo ki ne ’e fasia. ⁸ Lelea sa nia si too faasia ililana doo ta’ae ki ne na nonina ’e dooria, nia kau maelia. Sui ta, lelea sa nia ka ilia na doo ki ne Mangoedoo Abu ’e dooria, na Mangoedoo Abu kau fala mooria ne totoo firi fuana. ⁹ Langi kolu si noni dadaola ’ana ililana raoa ’okae ki. Sulia lelea sa kolu ka noni maabe ’uria ililana doo ’okae ki, fe dani ne tha God ’e filia kau dao mai, kolu kau ngala kwaiaraa kolu ki faasia tha God. ¹⁰ Aia, si manga kolu ’uria ’adomilana imole ki ne da too ’ana ’afitaia ki, ma tatha ’asiana fuana ange doora kolu ki ne da manata mamana ’ana tha Kraes. ¹¹ Rikia fasi na kekedalae baita ki nee ku kedaa kau fuamolu ’ana ’abaku ’i tala’aku. ¹² Na ngwane ki ’i seenena da thasi ’uria na suumailamolu ’uria na ’irimamalafoalae, da dooria faanonithathalana imole ki ’i Jiu ’ana ’idulana bibirangaa ’uria ’irimamalafoalae. Da dooria ’irilamolu, sulia da mau ’ana ngwane ki ’i seenena ne da faangadaa na ngwane ki ne da bae sulia na maelana tha Kraes ’ana ’airarafolo. ¹³ Ma na ngwane ki ne da ’irimamalafoa boroi, ’e langi da si roo bo sulia bibirangaa nia ki tha Mosis. Sui ta, da dooria fasi molu ka ’irimamalafoa naa, fasi da ka bae naunau ’i maana imole ki ’i Jiu faafia ne molu alamatai kamolu ’uria ’irimamalafoalae. ¹⁴ Aia, ma nau ’i tala’aku ne ku bae naunau ’aku sulia si doo ne na Aofia kolu tha Jisas Kraes ’e ilia ’ana ’airarafolo. Sulia maelana tha Kraes ’ana ’airarafolo, ’e langi kwa si dooria bibirangaa ta’ae ki ’i laona molaagali ne imole ki da si manata mamana ’ana tha Kraes da dooria. Ma kera boroi ’e langi da si dooria laubo na doo ki ne ku dooria sulia na manata mamanalae nau. ¹⁵ Ma ’e langi si ’e’ete bo lelea sa ta ngwane ka ’irimamalafoa, ma langi ka langi si ’irimamalafoa. Sui ta, si doo baita neri naa na toolae ’ana mooria faalu ne tha God ’e fala mai. ¹⁶ Ma fuana ni ti kera ne da lea sulia na toodoolae neri ’i laona moorilada, tha God kau fala enoenoa ma na kwaimanataia ka too foneda, sulia kera naa na ngwela mamana nia ki. ¹⁷ ’Urineri, si baea ’i’isi nau naa fuamolu ’e ’urii, alua ta ngwane si fala lau ta ’afitaia fuaku, sulia na kida nee ki ’i noniku ’e faatana naa ne nau na ngwane rao nia tha Jisas. ¹⁸ Doora ma ngwaingwane nau ki ’ae, nau ku gania na Aofia kolu tha Jisas Kraes ’uria ’okaelae nia ma na ’oilakea nia ka too fone kamolu teefau. Iuka nia ka ’urineri naa.