Efesas

Efesas

¹ Nau tha Pol nee, ku kekeda kau. Nau ta aposol nia tha Jisas Kraes sulia na kwaidooria nia tha God. Nau ku fala kau si kekedalae nee fuamolu imole nia ki tha God ne molu too ’i laona maetoaa baita ’i Efesas, ma molu ka too mamana fonea tha Jisas Kraes. ² Nau ku foa fasi tha God na Maka kolu, ma na Aofia tha Jisas Kraes daru ka liothau ’ani kamolu ma daru ka fala enoenoa fuamolu. ³ Kolu ka faabaitaa tha God na Maka nia na Aofia kolu tha Jisas Kraes. Sulia tha God ’e faa’okae kolu ’ana falelana doo ’okae ki sui ’i thalo ’ana na mangoe doo sulia na ’adolae kolu fonea tha Jisas Kraes. ⁴ ’I nao ’ana na thaungailana molaagali, tha God ’e fili kolu sui naa fasi kolu ka thau ’ana imole nia ki sulia tha Kraes, ma fasi kolu ka ’o’olo ’i maana, ma ka langi ta imole si suke faafi kolu ’ana ta’alae. Ma sulia na liothaua nia tha God fuakolu, ⁵ nia ’e alua sui na mai ’i nao fasi ka adea ma kolu ka thau ’ana ngwela nia ki sulia tha Jisas Kraes. Tha God ’e ade ’urineri sulia na kwaidooria nia, ma nia ka nonithathala sulia. ⁶ Aia, kolu faabaitaa tha God sulia ’e tofa fala na liothaua baita nia fuakolu sulia na Ngwela liliothau nia. ⁷ Tha God ’e lafu kolu naa faasia na keketoa ma nia ka manatalukea naa na abulo ta’alae kolu ki ’ana na maelana tha Kraes. ’Urineri, tha God ’e faatana naa na liothaua nia ne baita ’asiana fuakolu. ⁸ ’Ana na liotooa ma na thaitamedooa baita nia, ⁹ tha God ’e faatana fuakolu na lioe ngwane nia ma ’e langi nia si faatai folaa ’ana fuada imole ki mai ’i nao. Tha God kau ilia si lioe ngwane nia neri ’ana tha Kraes. ¹⁰ Na lioe ngwane neri ’e ’urii: ’Ana si manga ne nia ’e ’olea, nia kau konia doo ki sui ne ’e thaungana mai ’i thalo ma ’i see ’i molaagali, fasi tha Kraes ka ’inito faafia doo neri ki sui. ¹¹ Na doo ki sui ne tha God ’e ilia, nia ’e ilia ’uria faafonolana na manatalana ma na kwaidooria nia. Ma laubo sulia na kwaidooria nia tha God, nia ’e fili kameli imole ki ’i Jiu fasi meli ka thau ’ana imole nia ki ’ana ’adolae kameli fonea tha Kraes. Tha God ’e ade ’urineri sulia na lioe ngwane nia ne alua ’ua na mai ’i nao ’ana ne ’e thaungana doo ki sui. ¹² Ma sulia ne ’e ’urineri, kameli na imole ki ’i Jiu, kameli naa na imole totongenao ki ne meli manata mamana ’ana tha Kraes, ma meli ka faabaitaa na ’initooa nia tha God. ¹³ Ma nia ’e ’urineri laubo fuamolu na imole ki ne langi lau Jiu. Sulia si manga ne molu rongoa na faatalolae mamana ’ana Faarongolae ’Okae, molu ka too ’ana mooria faalu, ma molu ka thau naa ’ana imole nia ki tha God. Kamolu molu manata mamana ’ana tha Kraes, ma tha God ka fala Mangoedoo Abu fuamolu fasi ka faatana ne kamolu na imole nia ki, ilingia ne ’e alangana na mai ’i nao. ¹⁴ Ma na Mangoedoo Abu ka too ’i laona mooria kolu, ma si doo neri ne ’e faatana fuakolu ne kolu thaitamana naa kolu kau ngala si doo ki sui ne tha God ’e alangana fuana imole nia ki. Ma na Mangoedoo Abu kau too fone kolu lelea ka dao ’ana si manga tha God kau oli mai ’uria imole nia ki, ma da ka too thakwadoloa ka totoo firi. Kolu ka faabaitaa tha God ne ’e ’inito ka tatha! ¹⁵ ’Ito ’ana si manga ku rongoa na manata mamanalae kamolu ’ana Aofia tha Jisas, ma na liothaua kamolu fuana imole nia ki sui bo tha God, ¹⁶ nau ku faabaitaa tha God ka lado bana fuamolu ’ana si manga ki sui. Ma ku foa laubo fuamolu ’ana si manga ’oro ki. ¹⁷ Ma tha God na Maka baita ne na God nia na Aofia kolu tha Jisas Kraes, nau ku gani nia fasi ka fala na Mangoedoo Abu fuamolu. Sulia na Mangoedoo Abu neri, nia kau fala liotooa fuamolu, ma ka faatana laubo tha God fuamolu, fasi molu ka ore thaitamana ’okae lau ’ania tha God. ¹⁸ Nau ku foa laubo fasi tha God ka adea na manatalamolu ka ’okae fasi molu ka thaitamana doo ’okae ki ne ’e too ’ania fuamolu. Molu ka thaitamana ’okae ne molu kau too ’ana si doo ’okae neri ki, sulia ’e soe kamolu fasi molu ka thau ’ana ngwela nia ki. Ma nau ku foa fasi molu ka thaitamana na ’okaelae baita nia, ne ’e alangana kau fala fuana imole nia ki. ¹⁹ Ma nau ku foa fasi molu ka thaitamana laubo na suukwaia baita ’asiana ne tha God ’e rao ’ani kolu na imole manata mamana ki. Ma na suukwaia neri naa ²⁰ ne tha God ’e rao ’ania si manga bae ’e taea tha Jisas Kraes faasia na maea ma ka alua ’i bali aolo ’ani nia ’i thalo. ²¹ Ma ’i thalo, ne tha Jisas Kraes ’e ’inito faafia na enselo ki ma na mangoedoo ki sui ’i thalo. Ma na thatana tha Kraes ’e baita ka tatha faafia na ngwane baita ki sui ’ana si manga neri, ma laubo ’ana si manga ne kau dao mai ne ’e totoo si sui. ²² Tha God ’e alua naa doo ki sui ’i farana suukwaia nia tha Kraes, ma ka fala tha Kraes ka ’inito faafia na doo ki sui, fasi tha Kraes ka ’adomi kolu na imole ki ne kolu manata mamana ’ani nia. ²³ Aia, kolu na imole ki ne kolu manata mamana ’ani nia, kolu naa ne kolu ilingia nonina tha Kraes. Ma kolu ka fungu naa ’ana tha Kraes, na ngwane ne ’e fungulia doo ki sui.

¹ ’I nao mai, kamolu molu ilingia ta ngwane ne ’e mae naa ne ’e langi si too sulia si tae ne tha God ’e dooria, sulia molu too ’ua ’i laona ta’alae. ² ’Ana si manga neri ’i nao, molu lea ’amolu sulia na bibirangaa ta’ae ki ’i laona molaagali, ma molu ka roosulia tha Saetan ne ’inito faafia na mangoedoo ta’ae ki, ma ka talaia imole ki ne da aburongo ’ana tha God. ³ Ma kolu ’urineri laubo bae, ’ana si manga bae ’i nao mai, na abulolakolu ’e ta’ae, sulia kolu roosulia na kwaidoorilae ta’ae ki ’ana noni, ma na manatalae ta’ae kolu ki. Kolu ilingia na imole ki sui, sulia na abulolakolu ’e ta’ae, ma kolu ka tala’ana ngalilana na kwakwaelae faasia tha God. ⁴ Ma ka ’urineri boroi ’ana, na kwaimanataia nia tha God fuakolu ’e baita, ma na liothaua nia fuakolu ka baita laubo. ⁵ Ma sulia tha God ’e ’urineri, nia ’e ’adomi kolu si manga kolu aburongo ’ua ’ani nia, ma kolu ka ilingia imole ki ne da mae naa. Tha God ’e ofu kolu fonea tha Kraes ma nia ka fala mooria ne totoo firi fuakolu. Tha God ’e faamoori kolu sulia nia ’e liothau ’ani kolu! ⁶ Ma sulia kolu ’ado fonea tha Jisas Kraes, nia nee tha God ka tae kolu laubo fonea tha Kraes, fasi kolu ka too ma kolu ka ’inito fone nia ’i thalo. ⁷ Tha God ’e ade ’urineri fasi nia ka faatana na liothaua baita ne ’e too ’ania fuakolu ’ana tha Jisas Kraes, fasi na imole ki sui ’ana si manga ne kau dao mai, da ka thaitamana na liothaua nia. ⁸ Tha God ’e faamoori kolu ’ana na liothaua nia sulia na manata mamanalae kolu. Nia ’e langi si faamoori kolu bo ’uria ta si raoa ne kolu ilia ’i tala’akolu. Tha God ’e tofa fala bana na mooria faalu fuakolu. ⁹ Nia nee, ’e ’afitai ta imole ka bae naunau sulia na mooria faalu nia, sulia tha God ’e langi si fala sulia ta si raoa ne kolu ilia. ¹⁰ Tha God ’e thaungai faalu ’ana mooria kolu ’ana tha Jisas Kraes, fasi kolu ka ilia raoa ’okae ki ne ’e alangana mai ’i nao fuakolu ’uria ililana. ¹¹ Ma kamolu na imole ki ne langi lau Jiu, molu ka manata fasi sulia na toolamolu ’i nao. Na imole ki ’i Jiu da ’alangi kera ’i tala’ada ’ana na “Imole nia ki tha God” sui ta, da thaea ’ada thasa kamolu “Langi lau imole nia ki tha God,” sulia ’e langi molu si ’irimamalafoa ’ana ngwela ngwane kamolu ki. ¹² Molu thaitamana, ka tau na mai, ne molu too tau faasia tha Kraes, ma kamolu ’e langi lau tai imole ki ’ana imole fifilia nia ki tha God ’i Israel, ma ka langi molu si too ’ana doo ’okae ki ne tha God ’e alangana fuana imole nia ki. Ma molu ka too bo ’amolu ’i laona molaagali nee, sui ta, ’e langi molu si thaitamana bo tha God, ma ka langi molu si maasia bo ta si doo ’okae faasia tha God. ¹³ Sui ta, boroi ’ana molu ka too tau faasia tha God si manga bae ’i nao, si manga neri sulia molu ’ado naa fonea tha Jisas Kraes, molu ka too karangia naa tha God, sulia na afuafulae ’ana maelana tha Kraes. ¹⁴ Ma kameli Jiu ki fone kamolu imole ki ne langi lau Jiu, tha Kraes ’e fala naa ofulae ’ana kwaimania kolu ’ana enoenoa fasi kolu ka alua bo tee ofufua. Sulia ’e alamatana ’i tala’ana da ka thaumaeli nia ’i fafona ’airarafolo, ma nia ka lafua si doo ne suusia na imole ki ’i Jiu ma na imole ki ne langi lau Jiu fasi ka langi da si kwaimani. ¹⁵ Sulia tha Kraes ’e lafua naa bibirangaa ki ne tha Mosis ’e fala fasi kolu na roo fifigui imole neri ki kolu ka alua bo tee doo, sulia kolu ofu naa fonea tha Kraes. ’Urineri tha Kraes ’e adea kolu ka kwaimani fone kolu kwailiu. ¹⁶ Aia, ’ana maelana tha Kraes ’ana ’airarafolo, nia ’e lafua naa maalimaelae ’i malutana imole ki ’i Jiu fonea imole ki ne langi lau Jiu. Ma ’ana maelana laubo, nia ’e konia naa roo fifigui imole neri ki fasi kolu ka alua bo tee ofufua, ma ka olitai kolu ’i siana tha God. ¹⁷ Nia nee, tha Kraes ka sifo mai ’i molaagali, ma ka faatalo ’ana Faarongolae ’Okae sulia na enoenoa fuamolu imole ki ne langi lau Jiu ne molu too tau faasia tha God ’ana si manga ’i nao, ma fuameli laubo na Jiu ki ne meli too karangia tha God. ¹⁸ Sulia si doo ne tha Kraes ’e ilia, kameli imole ki ’i Jiu ma kamolu imole ki ne langi lau Jiu, kolu ka tala’ana lea ofulae mai siana tha God na Maka ’ana tee Mangoedoo Abu. ¹⁹ Sulia si doo neri, kamolu imole ki ne langi lau Jiu, ’e langi molu si ’e’ete bo faasi kameli imole ki ’i Jiu. Ma si manga neri, kamolu na imole nia ki tha God naa fone kameli, ma tha God naa na Maka kolu. ²⁰ Kolu imole manata mamana ki, kolu ilingia na beu ne tha God ’e thaungana ’i fafona fau. Tha Jisas Kraes naa na fau neri. Ma na aposol nia ki fonea na profet ki naa na bae ’ai ki ’ana beu neri. ²¹ Ma kolu naa nee tai doo ’ana si doo ki ’uria thaungailana beu neri. Ma tha Kraes naa ne thaungana beu neri lelea nia ka faasuia bo beu abu ’uria foasilana tha God. ²² Ma kamolu na imole ki ne langi lau Jiu laubo, tha Kraes ’e ofu kamolu fonea na imole nia ki tha God. Nia ne ’e ade ’urineri ’ana si manga ’e thaungana beu ne tha God ’e too ’i laona ’ana na Mangoedoo Abu.

¹ Nau tha Pol, ne ku too ’i laona dele sulia ku faatalo ’ania Faarongolae ’Okae sulia tha Jisas Kraes fuamolu na imole ki ne langi lau Jiu. ² Nau ku thaitamana, ne molu rongoa sui naa tha God ne fili nau naa sulia na liothaua nia, fasi ku rao ’uria ’adomilamolu ’urineri. ³ Ilingia bae ku kedaa sui naa, tha God ’e faatana naa lioe ngwane nia fuaku. Na lioe ngwane neri ’e langi nia si faatai folaa ’ana fuana imole ki ’i nao mai. ⁴ - ⁵ Ma lelea sa molu ka teemai ’okae ’ana si kekedalae nee, molu kau thaitamana ne nau ku thaitamana doo ’oro ki sulia tha Kraes ne tha God si faatai folaa ’ania fuana imole ki ’i nao mai. Sui ta, ’ana si manga neri, sulia na raoa nia na Mangoedoo Abu, tha God ’e faatana sui naa fuada na aposol ki ma na profet abu nia ki. ⁶ Ma na lioe ngwane neri ’e ’urii: Kamolu imola ki ne langi lau Jiu, molu ka manata mamana ’ana Faarongolae ’Okae, ma tha God ka fala ’okaelae fuamolu laubo fonea na imole ki ’i Jiu. Ma kolu ka too ofu ’ana tee fifigui imole, ma kolu kau ngala doo ki sui ne tha God ’e alangana sulia tha Jisas Kraes. ⁷ Ma tha God ’e fala fasi nau na ngwane rao nia, ku faarongo ’ana na Faarongolae ’Okae. Tha God ’e fala fasi nau na ngwane rao nia ’ana liothaua nia ma ’ana suukwaia baita nia. ⁸ Ma na imole ki sui ne da manata mamana ’ana tha God, da baita ka talu nau. Ma sui boroi ’ana ka ’urineri, tha God ’e faa’okae nau ’ana falelana raoa fuaku ’uria faatalolana na Faarongolae ’Okae sulia na doo ’okae ’asiana ki ne tha Kraes kau fala fuamolu imole ki ne langi lau Jiu. Si doo ’okae neri ki ’e baita ka talua thaitamedooa kera imole ki. ⁹ Tha God ne thaungana doo ki sui, nia si faatai folaa ’ania si lioe ngwane neri ’ua mai ’i nao. Ma nia ’e fale nau fasi ku faatana si lioe ngwane nia fuana imole ki sui. ¹⁰ ’Ana si manga neri, na imole ki ’i Jiu ma na imole ki ne langi lau Jiu, da ofu ’i laona tee fifigui imole ’ana tha Kraes. Ma tha God ka fi faatana si doo neri fuana enselo ki ma na ngwane kwaitalai ki ’i thalo, fasi da ka thaitamana na liotooa nia ne ’e baita ma ka ’e’ete kwailiu. ¹¹ Tha God ’e ilia si doo neri sulia manatalana, ’ito ’ua na mai ’ana thathafalia. Tha God ’e ilia si doo neri si manga ’e arasia mai tha Jisas Kraes na Aofia kolu. ¹² Ma sulia kolu ofu naa fonea tha Kraes, ma na manata mamanalae kolu ’ani nia, ’e langi kolu si mau ’ana daolae ’i maana tha God. ¹³ Sulia si doo neri, ne nau ku gani kamolu fasi ka langi molu si liodila sulia na ngadalae nau fuamolu. Sulia nau ku ngada fasi ka ’adomi kamolu. ¹⁴ Ma ’uria si doo neri, nau ku boruru ku foasia tha God na Maka, ¹⁵ nia ne thaungana doo ki sui ’i molaagali ma ’i thalo. ¹⁶ Ma nau ku gania sulia na ’okaelae baita nia ne ’e alangana kau fala fuana imole nia ki. Ma nau ku gani nia fasi ka fala suukwaia fuamolu ’ana na Mangoedoo Abu, fasi na mooria kamolu ka suukwai teefau. ¹⁷ Ma nau ku foa laubo fasi tha Kraes ka too ’i laona moorilamolu sulia na manata mamanalae kamolu ’ani nia. Ma nau ku foa laubo fasi na doo ki sui ne molu ilia, molu ka ilia sulia na liothaua nia. ¹⁸ Nau ku foa ’urineri fasi kamolu ma na imole nia ki sui tha God, kolu ka tala’ana thaitamanalana na liothaua nia tha Kraes fuakolu ne ’e totoo firi. ¹⁹ Iuka, nau ku foa fasi molu ka thaitamana na liothaua nia tha Kraes, boroi ’ana ka ’afitai fuana ta ngwane ka thaitamana ’okae teefau ’ania. Ma lelea sa molu ka thaitamana na liothaua nia tha Kraes, na bibirangaa kamolu ki kau ilingia laubo na bibirangaa nia ki tha God. ²⁰ Kolu ka faabaitaa tha God sulia na suukwaia baita nia ne rao ’i laona mango kolu, nia ka tala’ana ililana doo ’oro ki ’uria ’adomilakolu, ka talua lau ne kolu tala’ana ganilana ma langi na manatalae ’uria. ²¹ Kolu ka faabaitaa tha God ne ’e too ’ana tha Jisas Kraes ma ’ana imole nia ki, si manga neri ma ka totoo firi. Iuka ka ’urineri naa.

¹ Nau ku too ’i laona dele sulia ku rao fuana Aofia, ma ku gani kamolu fasi molu ka ade ’okae ilingia na abulolae ne tala’ana imole nia ki tha God da too ’ania, sulia tha God ’e ’alangi kamolu ’ana imole nia ki. ² Molu ka faafaekwa kamolu ’i tala’amolu, ma molu ka too marabibi. Ma molu ka faatana liothaua kamolu ’ana marabibilae fuamolu kwailiu. ³ Molu ka rao suukwai fasi molu ka too ’ana kwaimanilae fuamolu kwailiu ne na Mangoedoo Abu ’e fala fuamolu. Molu ka ofu kamolu ’ana enoenoa. ⁴ Kolu imole ki ne kolu manata mamana ’ana tha Jisas Kraes, kolu ilingia naa tee nonii doo bo fone nia. Ma tee Mangoedoo Abu laubo ne talai kolu teefau. Ma tee mooria totoo firi nee bo ne tha God ’e soe kolu mai ’uria ne kolu kwaimaakwali ’ania. ⁵ Ma kolu ka too ’ana tee Aofia bo, nia naa ne tha Jisas. Ma talifili nia bo ne kolu manata mamana ’ani nia. Ma nia nee adea kolu ka sisiuabu. ⁶ Ma tee God bo ne ’e too, ma nia na Maka kolu teefau. Ma nia ’e ’inito faafi kolu teefau, ma ka rao fone kolu, ma ka too ’i laona mooria kolu. ⁷ Ma kolu teefau ne kolu manata mamana ’ana tha Jisas Kraes, nia ’e fala tee tee ngwane ’ani kolu fasi ka too ’ana suukwaia ’uria raolae fuana. Nia ’e fala suukwaia nia fuakolu sulia na kwaidooria nia. ⁸ Sulia na Kekedalae Abu bae ’e thaea ka ’urii, “Si manga ’e tae ’uria ’i thalo, nia ’e ngala imole ’oro ki fone nia ne ’e siitatha ’ani kera. Ma nia ka fala naa si falelae ki fuana imole nia ki.” ⁹ Aia, ma tae nee na maalutana si baea ne ’e ’urii, “Nia ’e lea ’uria si kula ne ’e too ’i langi?” Na maalutailana ’e ’urii, tha Jisas Kraes ne ’e sifo totongenao fasi mai ’i molaagali. ¹⁰ Ma tha Jisas Kraes neri ne ’e sifo mai ’i molaagali, nia laubo ne ’e tae ’uria ’i thalo, na fera ne talua na fera ki sui ’i thalo. Nia ’e ilia si doo neri fasi ka faatana ne nia ’e too ’ana kula ki sui. ¹¹ Ma tha Jisas Kraes laubo ne fala si falelae ’okae ki fuana imole ki. Tai imole ’akolu, nia ’e alua da ka thau ’ana aposol ki, ma tai imole ’akolu nia ’e alua da ka thau ’ana profet ki. Ma tai imole ki lau, nia ’e alua da ka thau ’ana ngwane ni faatalolana Faarongolae ’Okae. Ma tai imole lau, nia ’e alua da ka thau ’ana ngwane kwaitalai ki ma ngwane toodoo ki fuana imole manata mamana ki. ¹² Nia ’e ade ’urineri, fasi kolu ka tala’ana raolae fuana tha God, ma fasi kolu, na nonina tha Kraes, kolu ka suukwai. ¹³ Na nonina tha Kraes kau moori ’urineri lelea da ofu ’ana tee fifigui imole ’ana na manata mamanalae ma na liotooa kolu ’ana Ngwela nia tha God. Ma na manata mamanalae kolu kau suukwai, ma na bibirangaa kolu kau fono ilingia laubo tha Jisas Kraes. ¹⁴ Ma ’ana si manga kolu ka rafo naa ’urineri, ’e langi kolu si ilingia naa kae ngwela ki. Ma ’e langi kolu si ilingia naa ta baru ne oru ’e babalangana ma na nanafo ki da kwaelangana ka lea garo bana. Sulia ’e ’afitai kolu ka manata mamana ’ana ta toodoolae ne ’e’ete kwailiu ne ngwane susuke ki da toodoo ’ania. ¹⁵ Ma kolu nee, kolu bae mamana ’ana bibirangaa ne ’e faatana na liothaua kolu ki, ma na abulolakolu teefau ne, ’e ilingia naa na abulolana tha Jisas Kraes na ngwane baita kolu. ¹⁶ Ma kolu ka ilingia tee nonii doo, ma tha Kraes naa na gwauna. Ma tee tee ngwane, naa ta bali ’ana noni, ma ka too ’ana si raoa nia. Ma tha Jisas Kraes ne adea kolu ka too ofu fasi kolu ka thau ’ana tee noni doo neri. Ma si manga kolu ilia naa raoa ne tala’akolu, na noni doo neri ka baita mai ma ka suukwai sulia na liothaua kolu ki ’ani kolu kwailiu. ¹⁷ Sulia na mamanaa nee na Aofia ’e fala mai fuaku, nau ku bae fifii ’ani kamolu fasi molu ka lukatana naa na bibirangaa ta’ae ki ne na imole ki ne langi da si manata mamana ’ana tha Jisas Kraes da ilia. Na manatalada laubo na doo ta’ae ki sui bo ma na tofa doo ki sui bo. ¹⁸ Ma kera ’e langi da si thaitamana laubo na bibirangaa ki sulia tha God. Ma ’e langi da si too ’ana mooria faalu ne tha God ’e fala, sulia manatalada ’e rorodoa, ma da ka faasadia ruruuda, ma da ka oengwanea. ¹⁹ Ma da si ’ida bo sulia na abulota’alae kera ki, ma da ka roosulia na kwaidooria ta’ae kera ki, ma da ka suukwai ’ana ililana kwalukaela doo ta’ae ki. ²⁰ Sui ta, kamolu nee, ’ana si manga bae na imole ki da faatalo ’ania tha Jisas Kraes fuamolu, ’e langi da si toodoo fuamolu fasi molu ka abulo ta’ae ’urineri. ²¹ Da faatalo fuamolu ’ana na mamanaa sulia tha Jisas Kraes, ma molu ka manata mamana naa ’ana toodoolae mamana nia. ²² Ma da faatalo da ka ’urii, molu ka ekwatana bibirangaa ta’ae kamolu ki bae ne molu mai too sulia ’i nao. Na bibirangaa ta’ae neri, ’e talai garo ’ani kamolu ma ka naga kamolu. ²³ Da faatalo ’ania fuamolu fasi molu ka alamatana tha God ka faafaalua na moorilamolu fonea na manatalamolu. ²⁴ Ma na bibirangaa kamolu ki sui ka thau ’ana ngwane faalu ne tha God ’e thaungana ka ilingia na bibirangaa nia. Aia, na ngwane faalu ’urineri, nia ka faatana na faalulana ’ana na abulolana ne ’e ’o’olo ma ka abu. ²⁵ Sulia si doo neri, molu ka ekwatana naa na sukelae. Si doo ki sui ne molu thaea fuana imole manata mamana ki molu ka bae mamana, sulia kolu teefau kolu ilingia na nonina tha Jisas Kraes. ²⁶ Ma lelea sa ta ngwane ’ani kamolu ka rakethasu, ’e langi ’o si alamatana na rakethasua neri ka talai ’oe, ma ’oko ilia si doo ne ta’ae. Ma ’e ’okae fasi ’oko faasuia ’ali’ali naa na rakethasua ’oe sui fatai na thato ka fi suu, ²⁷ ade’ana lelea sa ’e ’urineri tha Saetan ka too ’ana si manga ’uria talailamu ’ana rakethasua ’oe. ²⁸ Ma sa ni ti ’ani kamolu ne ka beli, nia ka too naa faasia na belilae. Ma nia ka rao ’o’olo fasi ka too ’ana tai si doo ’uria moorilana, ma ka ’adomia naa na imole siofaa ki laubo. ²⁹ Ma molu ka too faasia na baea ta’ae ki. Molu ka thaea ’amolu si baea ne tala’ana ka fala kwai’adomia, fasi molu ka faanonithathala na imole ki ne da rongoa baelamolu. ³⁰ Ma molu ka too faasia ililana si doo ki ne tala’ana ka faaliodilaa na Mangoedoo Abu nia tha God. Sulia na Mangoedoo Abu naa na mamalafoa ’i laona moorilamolu ne kamolu naa na doo nia ki tha God, fasi ka faatana ne tha God kau faanonilaa kamolu ’ana fe dani ’i’isi. ³¹ Aia, molu ka too faasia maalimaelae ’ani kamolu kwailiu, ma molu ka too faasia na rakethasulae fuamolu kwailiu, ma faasia na olisusuulae ’ana ’ailae fuamolu kwailiu ma na baeta’alae ki. Molu ka too faasia ililana doo ’e’ete kwailiu ki sui ne ta’ae. ³² Ma na abulolamolu ka ’okae fuamolu kwailiu, ma molu ka nonithathala, ma molu ka kwaimanatai fuamolu kwailiu. Ma molu ka manataluke kamolu kwailiu ’ana si doo ta’ae ki ne molu ilia, ilingia bae tha God ’e manataluke kamolu teefau, sulia si doo ki ne tha Jisas Kraes ’e ilia.

¹ Kamolu naa na ngwela ’inito nia ki tha God, molu ka liokwaisuli sulia na bibirangaa nia. ² ’Ana si manga ki sui, molu ka liothau ’ana imole ki, ilingia laubo ne tha Kraes ’e liothau ’ani kolu teefau, ma ka fala naa moorilana ’uria faamoorilakolu. Sulia nia ’e fale nia ’i tala’ana, ma tha God ka nonithathala sulia na afuafulae nia. ³ Ma sulia kamolu na imole nia ki tha God, molu ka too faasia abulolae oengwanea ki ilingia na oea, ma na ’agudoolae. Molu ka too faasia na doo neri ki sui, fasi ka langi ta imole si bae sulia ta si doo boroi ’ana ’urineri suli kamolu. ⁴ Ma molu ka too faasia bae ta’alae ki, ma na bae oengwanealae ki, ma na ’onionga ta’alae ki. Sui ta, ’e ’okae fasi molu ka faabaitaa ’amolu tha God. ⁵ Doo mamana ku thaea fuamolu, sa ni ti ne abulolana ’e oengwanea ma langi ka kaubare, ’e ’afitai ka ruu ’i laona ’initooa nia tha Jisas Kraes ma tha God. Ma ’e ’urineri laubo fuana ni ti ne ’e doori ’agudoo, ’e ilingia naa ne nia ’e foasia nunui doo ki. ⁶ ’E langi ’o si alamatana ta imole ka suke ’oe ’ana doo ’oro ta’ae ’urii ki, “’E ’okae bana fuana imole ka kaubare ma langi ka doori ’agudoo.” Tha God kau rakethasu ma kau fala kwakwaelae fuana imole ki ne da aburongo ’ani nia. ⁷ Molu ka too faasia na imole ’urineri ki. ⁸ ’I nao ’ua mai, kamolu ’i tala’amolu ne molu too mai ’i laona maerodo, sui ta, ’i tari’ina molu thau naa ’ana imole nia ki na Aofia, ma molu ka too naa ’i laona folaalae. Nia naa ne abulolamolu ka tala’ana imole ki ne da too ’i laona folaalae. ⁹ Sulia na imole ki ne da too ’i laona folaalae, tha God kau ’adomi kera fasi na abulolada ka ’okae ma ka ’o’olo, ma na baelada ka mamana. ¹⁰ Molu ka thasi ’uria thaitamanalana si doo ne faanonithathalaa na Aofia. ¹¹ Ma ka langi molu si ilia doo ta’ae ki, ilingia imole ki ne da too ’i laona maerodo, da ilia. Sui ta, ni kamolu molu ka faatana ’amolu na garolae kera ki, ma molu ka bae fifii fuada. ¹² Nau ku ’ida ’asiana laubo ’ana baelae sulia si doo ki ne da ade agwa ’ania ’i laona moorilada. ¹³ Sui ta, si manga na folaalae kau talafida, kera dau thaitamana doo ta’ae ki ne da ilia. ¹⁴ Sulia si doo nee na folaalae ’e talafia, na imole ki dau rikia. Nia nee da ka bae ’urii, “Kamolu na imole ki ne molu maleu, ma molu ka mae naa, molu tatae faasia maea, ma na folaalae nia tha Kraes kau talafi kamolu.” ¹⁵ ’E ’urineri nee, molu ka lio’okae sulia na bibirangaa kamolu ki fasi na abulolae kamolu ka ilingia na imole liotoo ki ma ka langi si ilingia lau na imole lalafusi doo ki. ¹⁶ Ma ’ana si manga ki sui, molu ka ilia doo ’okae ki ne tala’ana molu ka ilia. Sulia si manga neri, na imole ’oro ki ne na abulolada ’e ta’ae. ¹⁷ Nia nee, langi molu si oengwanea, molu ka manata ’okae ’amolu sulia si doo ki ne na Aofia ’e dooria fasi molu ka ilia. ¹⁸ Aia, ma molu ka too faasia kuu lilingelae ’ana waen, sulia si doo neri kau naga kamolu. Sui ta, na Mangoedoo Abu ka funguli kamolu ’ana fasi nia ka talai kamolu. ¹⁹ Ma ’ana si manga molu ofu, molu ka bae ’ana si baea ki ’i laona Sams, ma molu ka nguulia nguu abu ki. Molu ka faatana nonithathalalae kamolu si manga molu faabaitaa tha God ’ana nguulilana nguu ki. ²⁰ ’Ana si manga ki sui, ma fuana doo ki sui ne da dao mai, molu ka faabaitaa tha God na Maka sulia na ofulae kamolu fonea na Aofia kolu tha Jisas Kraes. ²¹ Molu ka thasi ’uria roolae sulia na kwaidooria kamolu ki kwailiu, sulia na manata baitalae kamolu ’ana tha Jisas Kraes. ²² Kamolu na ’afe ki, molu ka roosulia arai kamolu ki, ilingia laubo ne molu roosulia na Aofia. ²³ Sulia na ngwane arai ’e too ’ana suukwaia faafia na ’afe, ilingia laubo ne tha Jisas Kraes ’e too ’ana suukwaia faafi kolu na imole ki ne kolu manata mamana ’ani nia. Ma tha Jisas Kraes ne faamoori kolu, ma kolu ka ilingia naa na nonina. ²⁴ Ma ka ilingia laubo na bibirangaa neri, na keni ne ’e ’afe naa ka roo naa sulia arai nia ’ana si doo ki sui, ilingia laubo kolu na imole manata mamana ki kolu roo sulia tha Jisas Kraes. ²⁵ Kamolu ngwane arai ki, molu ka liothau ’ana ’afe kamolu ki, ilingia laubo tha Jisas Kraes ne liothau ’ani kolu na imole ki ne kolu manata mamana, ma nia ka alamatana ’i tala’ana da ka thaumaelia ’usi kolu fasi nia ka faamoori kolu. ²⁶ ’E ade ’urineri fasi ka faabua na imole manata mamana ki, ma ka faafaalu kera ’ana sisiuabulae ma ’ana baelana. ²⁷ Ma nia ka ade laubo ’urineri ’uria ngalilana imole manata mamana ki fuana ’i tala’ana, ilingia kolu na ’afe ’okae nia ki ma ka langi ta doo si ta’ae, sulia kolu folaa naa, ma kolu ka ’o’olo naa, ma kolu ka ’okae naa ’i maana. ²⁸ Kamolu na ngwane arai ki, molu ka liothau ’ana ’afe kamolu ki, ilingia laubo ne molu liothau ’ana nonimolu ’i tala’amolu. Na ngwane ne ’e liothau ’ana ’afe nia, nia ’e liothau laubo ’ana nonina ’i tala’ana. ²⁹ ’E langi ta imole si ekwatana nonina ’i tala’ana. Nia ’e tharea ’ana ma ka liosulia nonina ’i tala’ana, ilingia laubo tha Jisas Kraes ne ilia fuana imole manata mamana ki. ³⁰ Ma kolu na imole ki ne kolu manata mamana ’ani nia, kolu naa na nonina tha Jisas Kraes. ³¹ Sulia na Kekedalae Abu bae ’e thaea ka ’urii, “Na ngwane kau ’akwasia gaa nia ma maka nia, ma ka arai. Aia, na ngwane neri fonea keni neri, daru ka thau ’ana tee doo bo.” ³² Tha God ’e toolamana doo ’okae ki fuakolu ’ana si baea neri, ma nau ku thaitamana ’e bae sulia tha Jisas Kraes ma kolu imole ki ne kolu manata mamana. ³³ Ma na Kekedalae Abu ’e faatana laubo si doo ki sulia arai ki ma na ’afe ki bae ’e ’urii: Na ngwane ne ’o arai naa, ’oko liothau ’ana ’afe ’oe, ka ilingia laubo ne ’o liothau ’ani ’oe ’i tala’amu. Ma na keni ne ’o ’afe naa, ’oko faare baita ’ana arai ’oe.

¹ Kamolu na ngwela ki, molu ka roosulia baelana maka ki ma gaa kamolu ki, sulia nia nee si abulolae ’okae ne tha Jisas Kraes ’e dooria. ² Sulia si bibirangaa totongenao ne tha God ’e ofua fonea tee si alangaia ’e ’urii, “Molu ka faare baita ’ana maka ma gaa kamolu ki, ³ fasi molu ka too ’ana mooria ’okae, ma na moorilamolu ka tau ’i laona molaagali nee.” ⁴ Aia, kamolu na maka ma gaa ki, molu ka too faasia faarakethasulana ngwela kamolu ki. Ma molu ka toodoo fuada, ma molu ka bae fifii fuada sulia bibirangaa ne tala’ana imole ki ne da manata mamana ’ana Aofia. ⁵ Aia, ma kamolu ngwane tofa rao ki, molu ka roosulia baelana ngwane baita kamolu ki ’i laona molaagali nee, ma molu ka faare baita ’ani kera. Ma molu ka roosuli kera ’ana nonithathalalae ilingia ne molu rao fuana tha Jisas Kraes. ⁶ Molu ka faanonithathala kera ’urineri, ka langi lau ’ana si manga ne ngwane baita kamolu ki da lio bada faafi kamolu. Molu ka roo ’amolu sulida ’ana si manga ki sui ilingia tha God ’e dooria, sulia kamolu na ngwane rao nia ki tha Jisas Kraes. ⁷ Molu ka nonithathala ’uria raolae, ilingia ne molu rao fuana tha God, ma ka langi lau fuana imole ki ’i laona molaagali bana talitoona. ⁸ Sulia kolu thaitamana sui naa lelea sa na raolakolu ’e ’okae, tha God kau kwaiarangai kolu ’ana doo ’okae ki, sui boroi ’ana kolu na ngwane tofa rao ki ma laa ka langi. ⁹ Aia, ma kamolu ngwane baita faafia ngwane tofa rao ki, molu ka abulo ’okae laubo ’urineri fuana ngwane tofa rao kamolu ki. Molu ka too faasia bae rakethasulae ’uria faamaulada. Sulia molu thaitamana sui naa, ne kamolu fonea na ngwane tofa rao kamolu ki, kamolu teefau molu too bana tee God ne na ngwane ’inito kamolu. Sulia tha God ka si faafefea bo ta ngwane. ¹⁰ Aia, si baea ’i’isi nau ki fuamolu naa nee, molu ka faasuukwai kamolu ’i talamolu ’ana Aofia ma ’ana na suukwaia baita nia. ¹¹ Molu ka dau ’ana raunga ni firua ne tha God ’e fala, fasi molu ka siitatha ’ana tha Saetan si manga ’e thasi ’uria ilitoolamolu. ¹² ’E langi kolu si firu lau fonea na ngwane ki bana, kolu ka firu ’akolu fonea tha Saetan ma fonea na suukwaia nia. Kolu ka firu fonea mangoedoo ta’ae ki, ma fonea na gwaungai kera ki ne da ’inito ’ana maerodo ’i laona molaagali nee. ¹³ Sulia ne ’e ’urineri, molu ka dau ’ana raunga ni firua ki sui ne tha God ’e fala, fasi lelea ’e dao ’ana si manga ni firulae fonea na maalimae ’e dao mai, molu kau tala’ana bamolu siitathalae ’ana maalimae kamolu. Ma ’ana si manga ’ana firulae ’e sui, molu ka takwe suukwai ’ua. ¹⁴ Nia nee molu ka folo ’okae ’usi kamolu. Ma si baea mamana kamolu ki ’e ilingia na foorake ’i liitamolu. Ma na abulolae ’o’olo kamolu ki ka ilingia na rebe doo ne suusia maana ruruumolu. ¹⁵ Ma molu ka kwaimaakwali ’ana si manga ki sui ’ana baelae sulia Faarongolae ’Okae ne ’e fala enoenoa, sulia nia naa na tae butu ki ’i ’aemolu. ¹⁶ Ma na manata mamanalae kamolu ne ilingia na talo ki ’uria fotalana sima kwekwethu ki tha Saetan ’e basi mai ’ania. ¹⁷ Ma na kwaifaamooria nia tha God fuamolu ne ilingia na kifi ne thuu faafia gwaumolu. Ma na baelana tha God, ’e ilingia na ’ila ni firu ne Mangoedoo Abu ’e fala fuamolu. ¹⁸ Ma molu ka foa suukwai ’ana si manga ki sui, ilingia na Mangoedoo Abu ’e talai kamolu ’ania. Molu ka gania kwai’adomia faasia tha God. Molu ka lilio ma ka langi molu si maketho ’ana foalae fasi tha God ka ’adomia imole manata mamana ki sui. ¹⁹ Ma molu ka foa laubo fuaku fasi si manga ku bae, tha God ka fala si baea nia ki fuaku, fasi ka langi kwasi mau, ma kwau faafolaalia laubo si manatalae doo nia ki tha God nee na Faarongolae ’Okae fuana imole ki ne langi lau Jiu. Na manatalae doo neri ki, tha God ’e langi si faafolaalia fuada na imole ki ’i nao mai. ²⁰ Nau naa na ngwane nia tha Jisas Kraes ’uria faatalolae ’ania Faarongolae ’Okae neri, ma ku too ’i laona dele ’uria na faarongolae nau ki. Molu ka foa fasi ku bae nonirara’a sulia na Faarongolae ’Okae ilingia ne tha God ’e dooria. ²¹ Tha Tikikas, na doora liliothau kolu ma na ngwane rao mamana nia na Aofia, nia kau faarongo kamolu ’ana toolaku, fasi molu ka thaitamana si doo ki sui ne ’e fuli fuaku ’i see. ²² Nia nee adea ma nau ku fala kau ’i siamolu, fasi nia ka bae sulia toolameli ’i seeki, ma fasi nia ka faasuukwai kamolu laubo. ²³ Nau ku foa fasi tha God na Maka fonea na Aofia tha Jisas Kraes daru ka fala enoenoa, ma liothaua fonea na fiitooa fuamolu imole ki ne molu manata mamana ’ana tha Jisas Kraes. ²⁴ Ma nau ku dooria tha God ka faatana ’okaelae nia fuana imole ki sui ne da liothau ’ana Aofia kolu tha Jisas Kraes ’ana na liothaua kera ne totoo si sui.