Kolose

Kolose

¹ Nau tha Pol, na aposol nia tha Jisas Kraes sulia kwaidooria nia tha God, fonea na doora kolu tha Timoti, kamiria ne miri kekeda kau fuamolu. ² Kamiria miri bae ’okae kau fuamolu imole nia ki tha God ne molu too ’i Kolose. Ma kamolu doora kamiria ki, sulia molu takwe suukwai ’ana manata mamanalae ’ana tha Jisas Kraes. Na foalae kamiria fuamolu ne tha God na Maka kolu ka liothau ’ani kamolu ma ka fala enoenoa fuamolu. ³ ’Ana si manga ki sui ne miri foa fuamolu, miri faabaitaa tha God, na Maka nia tha Jisas Kraes na Aofia kolu. ⁴ Kamiria miri faabaitaa tha God, sulia miri rongoa si adelae nee molu manata mamana naa ’ana tha Jisas Kraes ma na liothaua kamolu ’ana imole nia ki sui tha God. ⁵ Aia, ’ana si manga molu eta rongoa si baea mamana ne da ’alangia ’ana Faarongolae ’Okae, molu ka manata mamana, ma molu ka liothau ’ana imole ki, sulia molu kwaimaakwali ’ana si doo ’okae ki ne tha God ’e thalungana fuamolu mai ’i thalo. ⁶ Na Faarongolae ’Okae neri ’e tagalo fuana imole ’oro ki ’ana fera ’e’ete ki ’i laona molaagali, ma nia ne adea na imole ’oro ki da ka ilia si doo ’okae ki. Si doo neri ne fuli ’i malutamolu ’ana si manga ne molu thafali rongoa na Faarongolae ’Okae ma molu ka thaitamana na liothaua nia tha God. ⁷ Tha Epafras, na ngwane bae faarongo kamolu ’ana Faarongolae ’Okae, nia naa na ngwane kwaimani ’okae kameli. Nia nee na ngwane rao ’okae nia tha Jisas Kraes fone kamiria, ma nia ka rao ’okae ’i malutamolu laubo. ⁸ Tha Epafras ne faarongo kamiria ’ana liothaua kamolu ’ana imole ki ne da manata mamana. Na Mangoedoo Abu ’e fala naa liothaua neri fuamolu. ⁹ ’Ito ’ua mai si manga miri rongo kamolu molu ’urineri, miri ka ililado ’ana foalae fasi tha God ka faatana si doo neri ki ’e dooria molu kau ilia, ma na Mangoedoo Abu ka ’adomi kamolu fasi molu ka manata ’o’olo ma molu ka thaitamana kwaidooria nia ki. ¹⁰ Kamiria miri foa ’urineri, fasi na toolamolu ka lea sulia kwaidooria nia na Aofia, ma ka faanonithathala nia, ma molu ka tala’ana ililana si raoa ’okae ’e’ete ki sui, ma molu ka thaitamana ’okae ’ana tha God ka ore tatha lau. ¹¹ Nau ku gania tha God fasi ka faasuukwai kamolu ’ana suukwaia baita nia, fasi molu ka tala’ana suukwailae ’uria ililana ta si doo bana ’i laona marabibilae. Ma molu ka nonithathala, ¹² ma molu ka tangoa tha God na Maka kolu, ne adea molu ka tala’ana toolae ’ana doo ki ne tha God ’e taingana ’i thalo fuana imole nia ki. ¹³ Tha God ’e lafu kolu naa faasia ’initooa nia na maerodo ne tha Saetan ’e ’inito ’ania, ma ka talai kolu kau ’uria ’i laona ’initooa na Ngwela nia ne ’e liothau ’ana. ¹⁴ Ma na Ngwela nia ’e lafu kolu naa faasia tha Saetan, sulia ’e manatalukea naa garolae kolu ki. ¹⁵ Tha Kraes ne kolu rikia naa, nia nee na nununa tha God ne langi kolu si rikia ’ana maakolu. Ma nia ka ’inito faafia doo ki ne tha God ’e thaungana, ilingia ta ngwela naonao ne liosulia doo ki sui. ¹⁶ Tha Jisas Kraes ’e fonea tha God ’ana si manga tha God ’e thaungana ’ana doo ki sui mai ’i thalo ma ’i ano, ma na doo ki sui ne kolu rikia, ma na doo ki sui laubo ne ’e langi kolu si rikia, ma na mangoedoo ki ne da suukwai, ma da gwaungai, ma da ka ’inito. Ma ’ana tha Jisas Kraes, ne tha God ’e thaungana doo ki sui, ma tha God ka thaungada fuana tha Jisas Kraes. ¹⁷ Tha Kraes ’e too naa sui fatai na doo ki sui, ma na doo ki sui ka too ’okae sulia ’e ’inito faafida. ¹⁸ Tha Jisas Kraes naa ne ’e gwaungai fuana nonina. Ma na imole ki ne da manata mamana ’ani nia, kera naa na nonina, ma nia ka fala mooria fuada. Nia na ngwane totongenao ne tha God ’e taea faasia maea, fasi ka ’inito ka tatha faafia doo ki sui. ¹⁹ Tha Jisas ’e usulia sui naa tha God, sulia nia nee na kwaidooria nia tha God. ²⁰ Ma ’ana tha Jisas, ne tha God ’e olifana mai doo ki sui ’i ano ma ’i thalo fuana. Tha God ’e thaungana na enoenoa ’ana na maelana tha Jisas ’ana ’airarafolo. ²¹ ’Ana si manga ’i nao, molu too tau faasia tha God ma molu ka maalimae laubo ’ani nia, sulia na abulo ta’alae ma na manatalae garo ki ne molu ilia. ²² Sui ta, ’ana si manga neri, sulia tha Kraes ’e thau ’ana imole ma nia ka mae, nia nee tha God ka thaungana enoenoa fone kamolu. Tha God ’e ade ’urineri fasi molu ka folaa, ma ka langi ta ngwane si fai faafi kamolu ’ana ta si doo ta’ae, si manga tha God ’e ngali kamolu mai ’i naofana. ²³ Nia kau ’urineri, lelea sa molu ka suukwai ’ana manata mamanalae kamolu ’ana tha Jisas Kraes, molu ka takwe suukwai ’ana fiitooa kamolu ki ’ana si doo ki ne molu rongoa sulia na Faarongolae ’Okae. Na Faarongolae ’Okae neri ne da bae sulia sui naa fuana imole ’oro ki ’i molaagali. Aia, nau tha Pol laubo ne ta ngwane ni rao ’uria faatalolae ’ania na Faarongolae ’Okae neri. ²⁴ ’Ana si manga neri, nau ku nonithathala sulia ku ngada na ’aku ’uria ’adomilamolu. ’I laona noniku, nau ku ngada ilingia tha Kraes bae ’e ngada. Na ngadalae nau nee, ku ngada fuana ofulada na imole manata mamana ki nee na nonina tha Kraes. ²⁵ Tha God ne fili nau ’uria raolae fuana imole manata mamana ki. Na raolae nau naa na faatalolae teefau ’ania na baelana tha God fuamolu. ²⁶ ’I nao mai, tha God ’e langi si faatai folaa ’ua ’ana Faarongolae neri. Sui ta, ’ana si manga neri, nia ka fi faatana fuana imole nia ki. ²⁷ Tha God ’e nonithathala ka faatana fuakolu na imole nia ki, ne na Faarongolae neri, ’e too fuana imole ki ne langi lau Jiu laubo. Ma na Faarongolae neri, ne tha Jisas Kraes ’e too naa ’ani kolu. Ma sulia ’e ’urineri, kolu thaitamana kolu kau ’inito fonea tha God. ²⁸ ’Urineri, kamiria miri ka faatalo ’ania tha Jisas Kraes fuana imole ki sui. Kamiria miri toodoo fuada na imole ki sui sulia tha Kraes, ma miri ka bae fifii fuada fasi da ka lea sulia. Kamiria miri ade ’urineri ’ana liotooa ne miri too ’ania. Kamiria miri ade ’urii fasi miri ka talaia imole ki sui siana tha God ilingia na imole ki ne da manata suukwai ’ana tha Jisas Kraes. ²⁹ Nau ku rao suukwai ma ku thasi suukwai ’ana suukwaia baita ne tha Jisas Kraes ’e fala fuaku, fasi ku ilia si raoa nee.

¹ Nau ku dooria fasi molu ka thaitamana ne nau ku rao suukwai fuamolu, ma fuana imole ki ne da too laubo ’i laona maetoaa ’i Laodisea, ma fuana ni ti ne langi si riki nau ’ua. ² Nau ku rao ’urineri sulia ku dooria fasi ku fala rakealae fuamolu, ma fasi molu ka liothau ’ani kamolu kwailiu, ma molu ka thaitamana teefau ’ana faarongolae sulia tha Jisas Kraes ne tha God ’e langi si faatana ’i nao mai. ³ Sulia tha Jisas Kraes naa na ngwane ne tala’ana falelana thaitamedooa ma liotooa mamana fuana imole ki. ⁴ Na maalutailana kekedalae nau nee fuamolu ’e ’urii: Molu si manata mamana ’ana toodoolae susuke ne tai ngwane ki da thaea, sui boroi ’ana si baea neri ki na rongolana ka ’okae. ⁵ Sui boroi ’ana nau ku too tau faasi kamolu, nau ku manatatoomolu baku sulia dani. Ma ku nonithathala ’asiana sulia ne ku thaitamana na manata mamanalae kamolu ’e ofu ma ka suukwai ’ana tha Jisas Kraes. ⁶ Aia, sulia ne molu manata mamana sui naa ’ana tha Jisas Kraes naa na Aofia, na abulolamolu ka faatana laubo ne molu ofu naa fone nia. ⁷ Molu ka dau suukwai naa ’ana, ilingia ta ’ai bae lalifuu naa ’i laona thaegano ma ka takwe suukwai. Ma molu ka thaungana moorilamolu ’i fafona na doo ki sui ne ’e thaea fuamolu fasi na manata mamanalae kamolu ka suukwai ’ani nia, ilingia ne da toolamana fuamolu sui naa suli nia. Ma molu ka faabaitaa tha God. ⁸ Ma molu ka liosuli kamolu ade’ana ’urineri ta ngwane ka suke kamolu ’ana toodoolae ne ’e langi si mamana. Na toodoolae neri, ’e lea mai faasia ngwane ki bana, ma faasia na bibirangaa ki ne ngwane ki da tala thaungana bada, ma sulia mangoedoo ta’ae ki ne too ’i laona mamangaa, ma langi lau faasia tha Jisas Kraes. ⁹ Tha God teefau naa ne too ’ana nonina tha Jisas Kraes. ¹⁰ Ma kamolu, tha God ’e fala sui naa mooria mamana fuamolu ’ana ’adolae kamolu fonea tha Jisas Kraes. Tha Jisas Kraes ’e ’inito naa faafia mangoedoo kwailiu ki ma na suukwaia ki sui. ¹¹ Aia, tha Jisas Kraes ’e singgilia sui naa na manatalae ngwane garo ki ne suumai kamolu ’uria ta’alae, ka ilingia ’irimamalafoalae ’ana si ’unga faasia noni. ¹² Sulia ’ana si manga molu sisiuabu, ’e ilingia da ano naa faafi kamolu ’i laona kilu gwau ilingia ne da ilia ’ana tha Jisas Kraes. Ma ’ana sisiuabulae laubo, molu ka tatae naa faasia maea fonea tha Jisas Kraes sulia na manata mamanalae kamolu ’ana suukwaia nia tha God ne taea tha Kraes faasia maea. ¹³ Kamolu molu mae naa, sulia molu abulo ta’ae, ma kamolu ’e langi lau na imole nia ki tha God. Ma tha God ’e alamatana tha Jisas Kraes ka faamoori kamolu, ’ana si manga ’e lukea na ta’alae kamolu ki sui. Ma si manga neri, tha God ’e fala naa mooria faalu fuamolu, ilingia bae ’e taea tha Jisas Kraes. Ma tha God ka manatalukea naa na ta’alae kolu ki teefau. ¹⁴ Nia ’e usu teefau naa ’ania ta’alae kolu ki ne da kedaa. Nia ’e lafuda teefau, ilingia ne da fotoinia naa ’ana ’airarafolo fonea tha Jisas Kraes. ¹⁵ Ma ’ana maelana tha Jisas Kraes ’ana ’airarafolo, nia ’e siitatha naa ’ana mangoedoo ta’ae ki ma ka lafua naa suukwaia kera ki sui. Ma nia ka faa’ida kera ’i maana imole ki sui. ¹⁶ Ma molu si fafurongo ’uria ta imole ne ’e bae naga kamolu sulia ’e langi molu si roosulia bibirangaa kera ki sulia fanga tae ne molu kau ’ania, ma tae ne molu kau kuufia, ma laubo sulia fe dani tae ne molu ka faabua, ma fe dani ne molu faabaita sulia fe dani ’ana sinali faalu ki, ma sulia fe dani ’ana Sabat. ¹⁷ Sulia na bibirangaa ’urineri ki, ’e ilingia bana nunui doo ne kau dao mai ’i nao ’ana doo mamana. Na doo mamana neri naa ne tha Jisas Kraes. ¹⁸ Langi molu si alamatana ta imole ka faagaro kamolu ’ana toodoolae garo ki, sulia molu too ’ana kwaiaraa ne tha God ’e dooria ka fala fuamolu. ’E langi molu si lea sulia ngwane ki ne da suke bada ’ana enoenolae, ma da ka faabaitaa bada enselo ki. Da bae naunau sulia na fafaataia ki ne da rikia. Sui ta, si doo neri ki, ’e lio oengwanea sui bo. ¹⁹ Ma na ngwane ’urineri ki da dola naa faasia tha Jisas Kraes ne ’e too ofu foneda ’i nao. Tha Jisas Kraes naa na ngwane ’inito fuana imole ki ne da manata mamana ’ana, ilingia na gwauna ngwane ne ’e gwaungai ’ana nonina. Ma kolu ilingia na nonina, ma tha God ka fala mooria fuakolu, ma ka faasuukwai kolu, ma ka dau ofu ’ani kolu, fasi kolu ka baita mai ’ana tee nonii doo sulia na kwaidooria nia tha God. ²⁰ ’Ana si manga tha Jisas Kraes ’e mae, molu ilingia molu mae naa laubo fone nia, ma nia ka lafu kamolu naa faasia na bibirangaa ne imole ki bana da thaungana ’i talada. Aia, ’urifita nee na bibirangaa kamolu ka lea bana sulia na bibirangaa ne imole ki da thaungana bada ’i talada? ’Urifita nee molu ka roosulia si baea fifii ki ne da bae ’urii sulia, ²¹ “’E langi ’o si fikoa si doo loko, ma ka langi ’o si ’anitoona si fanga loko.” ²² Na bibirangaa neri ki da bae bada sulia si doo ki ne kau funu lau bana ’i burina ne imole ki da ’ania sui naa. Na ngwane bana ne thaungana si toodoolae neri ki. ²³ Na bibirangaa neri ki na rongolana ’e ’okae, ilingia ’e thakatafa mai faasia ta ngwane liotoo. Da ka suumai kamolu ’uria foasilana enselo ki, ma na enoenoa susuke bana, ma ’uria faangadalana bana noni doo. Sui ta, si bibirangaa neri ki ’e langi si tala’ana bo ’adomilana ta ngwane fasi nia ka nonilaa faasia kwaidooria ta’ae ki ’ana nonina.

¹ ’Ana si manga tha God ’e taea tha Jisas Kraes faasia maea ’uria mooria, nia ’e ’urineri laubo, sulia nia ’e fala laubo mooria mamana fuakolu fonea tha Kraes. Sulia si doo neri, molu ka manata sulia si doo ki ’i thalo, na fera ne tha Jisas Kraes ’e too ’ana ’initooa ’i bali ’aba aolo ’ana tha God. ² Molu ka manata sulia si doo ki ’i thalo, ma langi lau sulia si doo ki ’i laona molaagali nee bana. ³ Si manga tha Kraes ’e mae, kamolu boroi molu mae laubo ma na mooria mamana kamolu ka too agwa naa fonea tha Kraes ne too fonea tha God. ⁴ Tha Jisas Kraes naa na ’aena mooria mamana kamolu. Ma si manga nia kau daofaatai mai ’i see, na mooria mamana kamolu laubo kau faatai mai fonea ma molu ka ’inito fone nia. ⁵ Sulia si doo neri, molu ka thaumaeli teefau ’ana kwaidooria ta’ae kamolu ki ’ana noni ’uria kaubarelae, ma na abulota’alae, ma na kwaidooria ta’ae ki, ma na ’agudoolae (sulia na ’agudoolae ’e ilingia laubo na foasilana ta god ’e’ete). ⁶ Na abulo ta’alae ki ’urineri, nia nee tha God kau fala kwakwaelae fuana imole ki ne ’e langi da si roosulia. ⁷ ’Ana tee si manga ’i nao, sui fatai molu ka fi manata mamana ’ana tha Jisas, molu dooria ’amolu lealae sulia kwaidooria ta’ae neri ki. ⁸ Sui ta, ’ana si manga neri, molu ka tafi naa faasia na mooria kamolu ’ana abulo ta’alae neri ki: rakethasua, ma na maasusualalae, ma na baea ta’ae ki, ma na bae rakethasulae ki. ⁹ Ma ka langi molu si suke kamolu kwailiu, sulia molu ekwatana sui naa na bibirangaa ’ana mooria neri ’i nao, ¹⁰ ma molu ka too naa ’ana mooria faalu ne tha God ’e thaungana. Sulia ’e faafaalu kamolu sulia dani fasi na moorilamolu ka usuli nia, ma molu ka thaitamana ’okae ’ani nia. ¹¹ Ma sulia ne tha God ’e faafaalu kolu, ’e langi ta ’e’etelae ’i malutana imole ki ’i Jiu, ma na imole ki ne langi lau Jiu, ma na ngwane ki ne da ’irimamalafoa fonea ngwane ki ne da si ’irimamalafoa. Langi ta ’e’etelae ’i malutakolu ma na imole ki ne langi da si thaitamana baelae ’i Grik ilingia na imole ki ’i Sitian. Ma ’e langi ta ’e’etelae ’i malutana ngwane ni rao, ma na ngwane baita. Tha Jisas Kraes bo ne ’e baita, ma nia ka too ’i laona moorilana imole ki sui ne da too ’ana mooria faalu neri faasi nia. ¹² Kamolu naa na imole nia ki tha God, ma nia ka liothau ’ani kamolu, ma ka fili kamolu fasi molu ka thau naa ’ana imole nia ki. Sulia si doo neri, molu ka manatainia imole ki, ma molu ka ade ’okae, ma molu ka faafaekwa kamolu ’i talamolu, ma molu ka too enoeno, ma molu ka marabibi. ¹³ Ma ka langi molu si rakethasu ’ali’ali fuamolu kwailiu. Ma lelea sa ta imole ka ilia ta si doo ta’ae ’ani kamolu, molu ka manataluke nia faafia. Molu ka manataluke kamolu kwailiu, ilingia laubo na Aofia ’e manatalukea naa na garolae kamolu ki. ¹⁴ Ma ka tatha ’asiana ’ana si doo neri ki sui, molu ka liothau ’ani kamolu kwailiu fasi molu ka too ’ana ofulae ’okae. ¹⁵ Na enoenoa ne tha Jisas Kraes ’e fala, ’e talai kamolu ’ana doo ki sui ne molu ilia. Sulia tha God ’e thaungai kamolu fasi molu ka ’ado ofu ’ana tee noni, ma fasi molu ka too ’ana enoenoa neri. Ma molu ka faabaitaa tha God sulia dani. ¹⁶ Molu ka alamatana si baea ’okae nia tha Jisas Kraes ka too ma ka fungu ’i laona moorilamolu. Molu ka toodoo fuamolu kwailiu ’ana si baea nia ki tha Jisas. Molu ka ade ’urineri ’ana liotooa ne molu too ’ana. Molu ka nguulia Sams ki ma na nguu abu ki. Molu ka sili sulia tha God ’i laona tangolae. ¹⁷ Ma doo ki sui ne molu ilia ma molu ka thaea, molu ka ilia ilingia na imole nia ki tha Jisas na Aofia. Ma ’ana tha Jisas Kraes, molu ka faabaitaa tha God na Maka. ¹⁸ Aia, keni ki ne molu ’afe naa, molu ka roosulia arai kamolu ki, sulia si bibirangaa neri ’e tala’ana imole ki ne da manata mamana ’ana tha Kraes da ka ade sulia. ¹⁹ Ngwane ki ne molu arai naa, molu ka liothau ’ana ’afe kamolu ki, ma molu ka marabibi fone kera. ²⁰ Ngwela ki, molu ka roosulia maka ma gaa kamolu ki sulia dani, sulia nia nee si doo tha God ’e nonithathala sulia. ²¹ Ma na maka ki ma gaa ki, ka langi molu si bae susuala fuana ngwela kamolu ki, ade’ana ’urineri da si dooria roolae suli kamolu. ²² Ma kamolu ngwane tofa rao ki, molu ka roo naa sulia ngwane ki ne da baita faafi kamolu. ’E langi lau ’ana si manga ne da bubu suli kamolu bo fasi da ka alafaafia raolae kamolu ki. Molu ka thasi ’uria raolae ’okae ’uria na faabaitalana Aofia. ²³ Ta si raolae tae ne molu ilia, molu ka ilia ’ana suukwaia kamolu teefau, ilingia ne molu rao fuana Aofia, ma ka langi lau fuana ngwane bana. ²⁴ Molu ka manatatoona si doo nee: Na Aofia kau fala kwaiaraa nia ne ’e alangana fuana imole nia ki. Ma tha Jisas Kraes ne na ngwane baita mamana ne molu rao fuana. ²⁵ Ma sa ni ti ne ka ilia na ta’alae, nia kau ngala laubo na kwakwaelae ’uria garolae ne nia ’e ilia. Sulia tha God ’e langi si faafefe ’ana keketoa nia.

¹ Kamolu ngwane baita ki, molu ka ade ’okae fuana ngwane rao kamolu ki ’ana bibirangaa ne ’e ’o’olo ma ’e tala’ana kau ’adomi kera. Molu ka manatatoona ne tee ngwane baita fuamolu ’e too laubo mai ’i thalo. ² Si manga molu foa, molu ka too ni liliolae, ma molu ka faabaitaa tha God ka lea lado bana. ³ Si manga ki sui ne molu foa ’ania, molu ka foa laubo fuamiria fasi tha God ka faangwaludea fuamiria, ’uria faatalolana baelana sulia tha Kraes, ne tha God ’e langi si faatai folaa ’ania ’i nao. Aia, nau ku too ’i laona dele ’ana si manga neri, sulia ne ku faarongo ’ana baelana tha God. ⁴ Aia, molu ka foa fasi ka ngwaluda fasi ku faatalo folaa ’ania baelana tha Kraes. ⁵ Molu ka too ’ana liotooa fuana imole ki ne ’e langi da si manata mamana ’ua ’ana tha Kraes. ’Ana si manga ki sui, molu ka faatana fuada ne na toolamlu ’e ’o’olo. ⁶ Ma si manga molu bae foneda, na baelamolu ka too folaa ma ka ’okae. Ma molu ka thaitamana olisi ’o’ololae ’ana si soetoolae kera imole ki sui. ⁷ Tha Tikikas, nia ta doora liliothau ’akolu, ma nia ’e rao ’okae fuana tha Jisas, ma nia ta ngwane rao fone nau ’ana raoa nia na Aofia kolu. Nia kau bae suli nau fuamolu. ⁸ Nau ku falania kau siamolu, fasi ka faanonithathala kamolu ’ana baelana suli kameli. ⁹ Tha Onesimus ’e lea laubo kau fone nia, na doora kwaimani liliothau bae ne rao noni maabe ma nia laubo ta ngwane ’ana ofulae kamolu. Kolu ka nonithathala suli nia. Keerua daru kau faarongo ’ana si doo ki sui ne ’e fuli kau ’i seeki. ¹⁰ Tha Aristakus ne ’e too ’ua ’i see fone nau ’i laona dele, nia ’e fala kau si baea ’okae nia ki fuamolu, fonea laubo tha Mak, na dii bae tha Banabas. (Nau ku fala na kau si baea nau ki fuamolu sulia tha Mak, fasi molu ka konitana lelea sa ’e dao kau siamolu ’ana ta si manga.) ¹¹ Ma tha Josua bae da ’alangia laubo ’ana tha Justus ’e fala laubo kau si baea ’okae nia ki fuamolu. Na olu ngwane ki ’i Jiu neri, da rao fone nau ’uria na ’initooa nia tha God, sulia ’e langi ta ngwane ’i Jiu lau ne ’e rao fone nau. Na olu ngwane neri ki bo ne da ’adomi ’okae ’ani nau. ¹² Tha Epafras ’e fala laubo kau si baea ’okae nia ki fuamolu. Nia ta ngwane ’ana ofulae kamolu ma na ngwane rao nia tha Jisas Kraes laubo. Nia ’e foa fuamolu sulia dani, ka gania tha God fasi molu ka takwe suukwai, ma molu ka suukwai ’ana manata mamanalae kamolu ’ana roolae sulia kwaidooria nia ki tha God. ¹³ Nau ’i tala’aku, ne ku thaitamana ’okae ’ani nia ne rao suukwai ’uria ’adomilamolu fonea na imole ki ne da too ’i laona maetoaa ’i Laodisea ma ’i Herapolis. ¹⁴ Ma tha Luk na ngwane kwaigurai kolu fonea tha Demas, daru fala laubo kau si baea ’okae keerua ki fuamolu. ¹⁵ Molu ka fala laubo si baea ’okae kameli ki fuana na ngwaithaasina kolu ki ne da too ’i laona maetoaa ’i Laodisea ma fuana ni Nimfa fonea na imole manata mamana ki ne da ofu ’i laona luma nia. ¹⁶ Burina ne molu teemainia naa si kekedalae ne ’e sui, molu ka fala laubo fuana ofufua ’i Laodisea fasi da ka teemana. Ma molu ka teemainia laubo na kekedalae ne ku kedaa fuana ofulada na imole ki ’i Laodisea. ¹⁷ Molu ka faarongoa tha Arkipus fasi ka faasuia naa si raoa ne na Aofia ’e fale nia ’uria ililana. ¹⁸ Aia, ’ana ’abaku ’i tala’aku ne ku kedaa si baea ’okae nee ki fuamolu. ’E langi molu si manataburo laubo ’ana ne nau ku too ’i laona dele. Nau ku foa fasi tha God ka ade ’okae fuamolu ’ana na liothaua nia.