3 Jon

¹ Na ngwane naonao ’ana ofulada na imole manata mamana ki, nee kekeda kau fuamu tha Gaeas ne nau ku liothau mamana bo ’ani ’oe. ² Ngwane kwaimani nau ’ae, nau ku foa fasi si doo ki sui ka ’okae fuamu, ma fasi ’oko too sulitalaa, ilingia laubo na mangomu ’e ’okae. ³ Nau ku nonithathala ’asiana ’ana si manga tai doora ’akolu ki ’ana tha Jisas Kraes ne da dao mai, ma da ka faarongo nau ne na moorilamu ’e lea sulia na toodoolae mamana. ⁴ ’Ana si manga ku rongoa na ngwela nau ki da roosulia ’ua na toodoolae mamana, nau ku nonithathala ka talua naa doo ’e’ete ki sui. ⁵ Ngwane kwaimani nau tha Gaeas ’ae, ’o rao ’okae ’asiana ’ana na kwai’adomia nee ’o ilia fuana imole ki ne da manata mamana, ma da ka tatha ’ana kula ki sui fonea na toodoolae, sui boroi ’ana ka langi ’o si thaitamada. ⁶ Ma da ka bae fuana ofulada na imole manata mamana ki ’i see sulia na liothaua ’oe. ’Oko ’adomida fasi da ka lea ’ana lealae kera sulia bibirangaa nee tha God ’e nonithathala sulia. ⁷ ’Oko ’adomida sulia da lea ’ana lealae kera ’ana raoa nia tha Jisas Kraes, ma ka langi da si ngala bo ta kwai’adomia faasia imole ki ne langi da si manata mamana. ⁸ Aia, kolu na imole ki ne kolu manata mamana ’ana tha Jisas Kraes, kolu ka ’adomia imole neri ki, fasi kolu ka kwai’adomi ’ana raoa kera ’ana na faarongolae mamana. ⁹ Nau ku kedaa na kau tee leta fuana ofulada imole manata mamana ki ’i see nena. Sui ta tha Diotrefes, na ngwane ne dooria talailamolu, ’e langi si fafurongo bo ’uria si doo ki ne ku thaea. ¹⁰ Ma ’ana si manga ku dao kau, kwau bae sulia si doo ta’ae neri ki ne ’e ilia, ma na sukelae ta’ae nia ki ne ’e ilia fuameli. ’E langi nia si ade bo ’urineri ka too na ’ana, ma nia si konitana laubo tai doora ki ne da lea mai, ma ka luia laubo na imole ki ne da dooria konitailada, ma nia ka thasi ’uria tarilada faasia ofulada na imole manata mamana ki. ¹¹ Ngwane kwaimani nau tha Gaeas ’ae, langi ’o si ade sulia si doo ta’ae ki, ’oko ade ’amu sulia si doo ki ne ’okae. Ma sa ni ti ne ka ilia ta si doo ne ’okae, nia naa na ngwane nia tha God. Ma sa ni ti ne ka ilia ta si doo ta’ae, ’e langi nia si thaitamana bo tha God. ¹² Na imole ki sui, da bae ’okae sulia tha Demitrius, ma na bibirangaa ’okae nia ki ne faamamane nia laubo. Nia nee meli ka faabaita nia laubo, ma ’oko thaitamana si doo nee ki meli thaea ’e mamana. ¹³ Nau ku too ’ana si doo ’oro ki ’uria faarongolamu ’ania, sui ta, ’e langi kwasi dooria bo kedalana. ¹⁴ Ma nau ku manatatoona thasa kwau riki ’oe ’ali’ali bo, fasi koro ka tala bae ’akoro. ¹⁵ Nau ku dooria na enoenoa nia tha God ka too fone ’oe. Na imole kwaimani ’oe ki sui ’i see, da fala kau si baea ’okae kera ki fuamu. Ma ’oko ’ai thatana laubo tetee imole ’ana imole kwaimani kameli bae ki sui bo, si manga ’o fala si baea ’okae nau ki fuada.