2 Timoti

¹ Nau tha Pol, na ngwane ni rao nia tha Jisas Kraes, sulia tha God ’e nonithathala ’uria fililaku fasi nau ku aposol. Tha God ’e fale nau fasi ku faarongo ’ana mooria firi ne ’e alangana fuakolu, na imole ki ne kolu manata mamana ’ana tha Jisas Kraes. ² Ngwalee Timoti ’ae, nau ku kekeda kau fuamu sulia ne ’o ilingia na ngwela liliothau nau ne ku liothau ’ania. Nau ku foa fasi tha God na Maka ma tha Jisas Kraes na Aofia kolu, daru ka fala ’okaelae, ma na kwaimanataia, ma na enoenoa fuamu. ³ Nau ku faabaitaa tha God ne ku rao fuana ’ana na lioe ngwane folaa, ilingia na kokoo nau ki bae da rao fuana. Ma nau ku faabaita nia sulia dani ma na rodo, ’ana si manga ku foa ’ana, ma ku gania tha God ’uria kwai’adomia fuamu. ⁴ Nau ku dooria ’asiana fasi ku riki ’oe lau, sulia ku manatatoona si angilae ’oe bae, ’ana si manga bae koro lea ’e’ete kwailiu ’ania. Ma ku nonithathala ’asiana ’ana si manga koro kau oli lau mai. ⁵ Ma ku manatatoona na manata mamanalae ’okae ne ’o too ’ania, ilingia laubo na manata mamanalae keerua bae kokoo ’oe ni Lois ma gaa ’oe ni Iunis daru too ’ania. Ma ku thaitamana nia nee ’o too laubo ’ania. ⁶ Nia nee, ku fa’amanatatoomu lau fasi ’oko faasuukwaia na falelae ne tha God ’e fala ’ana fuamu, ’ana si manga bae ku alua ’abaku faafi ’oe. ⁷ Sulia tha God ’e langi si fala Mangoedoo Abu nia fuakolu fasi kolu ka mau. Nia ’e fala ’ana Mangoedoo Abu fuakolu fasi ka faasuukwai kolu, ma fasi kolu ka liothau ’ani kolu kwailiu, ma fasi kolu ka tala dau faafia mooria kolu ki. ⁸ Nia nee, ka langi ’o si ’ida ’ana faamamanelana Aofia kolu, ma ka langi ’o si ’ida laubo ’ani nau, na ngwane ne ku too ’i laona dele ’uria na raoa nau fuana tha Jisas Kraes. ’Oko rao fone nau ’uria faatalolae ’ania na Faarongolae ’Okae, sui boroi ’ana da ka faangada ’oe, sulia tha God kau fala suukwaia fuamu ’uria ililana. ⁹ Tha God ’e faamoori kolu ma ka fili kolu naa fasi kolu ne kolu thau na ’ana imole nia ki, ’e langi lau sulia na raoa kolu ki. Nia ’e faamoori kolu ma ka fili kolu naa, sulia na manatalana ’i tala’ana, ma na liothaua nia ’i tala’ana fuakolu. ’I nao ’ana ne ’e langi si thaungana ’ua ta si doo, nia ’e manatatoona sui naa ne kau fala mai tha Jisas Kraes fasi ka faatana ’okaelae nia fuakolu. ¹⁰ Ma ’ana si manga neri, tha God ’e faatana naa na manatalana ma na liothaua nia fuakolu ’ana daolana mai na Ngwane Faamoori kolu tha Jisas Kraes. Tha Jisas ka lafua naa na suukwailana maea. Ma ka faatana mooria firi ne na Faarongolae ’Okae ’e fala fuakolu. ¹¹ Ma tha God ’e fili nau fasi ku thau ’ana ta aposol, ma na ngwane toodoo ’uria faatalolae ’ana Faarongolae ’Okae. ¹² Nia nee, ku ngada ’i laona dele ’uria si doo neri ki. Ka ’urineri boroi kwa si ’ida bo ’ana toolae ’i laona dele ’uria ku faatalo ’ana tha Jisas, sulia na fiitooa nau ’ani nia. Ma ku thaitamana mamana tha Jisas ’e tala’ana fololae ’usia na toodoolae mamana ne ’e alua ’i ’abaku, lelea ka dao ’ana fe dani ne nia kau oli lau mai. ¹³ Nau ku dooria fasi ’oko toodoo fuada na imole ki sulia na toodoolae mamana ne ku fala fuamu. Ma ’oko manata mamana laubo ’ana tha God, ma ’oko liothau ’ana imole ki. ’Oko ilia si doo neri ki, sulia tha God ’e ofu kolu naa fonea tha Jisas Kraes. ¹⁴ Ma ’ana suukwaia nia na Mangoedoo Abu ne ’e too ’ani kolu, ’oko lio sulia na toodoolae mamana ne tha God ’e alua ’i ’abamu. ¹⁵ ’O thaitamana bamu ne na imole ’oro ki ’i laona bali fera ’i Eisia, da abulo ’e’ete naa faasi nau. Tha Figelus fonea tha Hermogenes nee na roo ngwane neri ki. ¹⁶ Na Aofia ’e manatainia tha Onesiforus ma na ’aebara nia, sulia nia ’e faanonithathala nau ’ana si manga ’oro, ma ka langi si ’ida ’ani nau ’i laona dele. ¹⁷ Sulia si manga nia ’e dao ’i Rom, nia ka rofe ’uri kolu ma ’e lea mai ka dao siaku. ¹⁸ ’Oe ’o thaitamana ’okae ’ana na kwai’adomia ’oro bae nia ’e ilia fuaku ’i laona maetoaa ’i Efesas. Nau ku foa fasi na Aofia ka manatai nia ’ana fe dani neri nia kau oli lau mai.

¹ ’Oe ’o ilingia na ngwela nau, alua tha God ka faasuukwai ’oe. Nia ’e tala’ana ka ilia si doo neri, sulia na liothaua nia fuamu, na ngwane ne ’o manata mamana ’ana tha Jisas Kraes. ² Ma na doo ki ne ’oko rongoa ku toodoo sulia fuana imole ’oro ki, ’oko fala fuana imole ki ne ’o fiitoo ’ani kera ne da tala’ana toodoolae lau fuana tai imole ki. ³ ’Oko ’ado ’ana na ngadalae sulia na raoa ’oe fuana tha Jisas Kraes, ilingia ta ngwane ni firu ’okae nia. ⁴ Ta ngwane ni firu ne dooria kau faanonithathalaa na ngwane ’inito nia, nia si ’abero ’i tala’ana ’ana si raoa ’e’ete ki. ⁵ Ma na ngwane ni fifita ’e ’afitai ka siitatha, lelea sa ’e langi si lea sulia na bibirangaa ki ’ana fifitalae. ⁶ Ma na ngwane ne rao suukwai ’i laona raoa nia, ’e tala’ana ka ’ania ’ana si doo ki laona raoa nia ’i nao. ⁷ ’Oko manatatoona si doo bae ku thaea, sulia na Aofia kau ’adomi ’oe fasi ’oko thaitamana doo neri ki sui. ⁸ ’Oko manatatoona tha Jisas Kraes, na ngwane ’ana kwalafa tha Deved, bae tha God ’e taea faasia maea, ilingia bae ku faatalo ’ania ’i laona na Faarongolae ’Okae. ⁹ Ma si manga neri, nau ku ngada ma ku too ’i laona dele, ilingia na ngwane bae ’e ilia ta si doo ne garo, sulia ku faatalo ’ana na Faarongolae ’Okae. Sui ta, na baelana tha God, ’e ’afitai da ka kani faafia ’i laona dele. ¹⁰ Nia nee, ku nonimaabe baku fasi ku ngada ’ana doo ki sui ’uria ’okaelada na imole ki nee tha God ’e filida, fasi da ka ngala laubo na mooria firi sulia tha Jisas Kraes, ma na toolae ’ana ’initooa ’i thalo. ¹¹ Si baea ne ’e mamana bae ’e ’urii, “Ilingia kolu mae ka sui naa fonea tha Jisas Kraes, kolu kau moori laubo fone nia. ¹² Lelea sa kolu ka takwe suukwai ’i laona ngadalae, kolu kau ’inito laubo fone nia. Sui ta, lelea sa kolu ka tofea thasa ’e langi kolu si thaitamana bo, nia kau tofe kolu laubo. ¹³ Lelea sa kolu ka aefara nia ’ana baelakolu, ma ka langi kolu si ade naa sulia kwaidooria nia ki, ’e ’afitai nia ka ekwatana bo si doo ne ’e thaea nia kau ilia fuakolu, sulia ’e langi nia si aefaraa baelana.” ¹⁴ ’Oko faamanatatoona imole ki ’i see nena ’ana si doo neri ki, ma ’oko bae fifii ’ani kera ’i maana tha God, fasi ka langi da si olisusuu faafia si baea ki. Sulia si adelae ’urineri ’e langi si fala bo ta si doo ’okae, ma ka nagaa bana imole ki ne da fafurongo. ¹⁵ ’Oko rao suukwai fasi tha God ka nonithathala faafia na raoa ’oe, ilingia ta ngwane rao bae ’e langi si ’ida ’ana raoa nia, ma na ngwane ne toodoo ’o’olo sulia baelana tha God ne ’e mamana teefau. ¹⁶ ’Oko too faasia na baelae kaubare ki, sulia si doo neri kau talaia na imole ki faasia tha God. ¹⁷ Na baelae ’urineri ’e ilingia ta mae tharu bae ’e tharufia nonina ta ngwane. Ma na roo ngwane ki ne da bae ’urineri ki ne tha Haemeneas ma tha Filetus. ¹⁸ Daru toodoo thasa na tataelakolu faasia na maea ’e fuli sui naa. ’Urineri daru lea teefau naa faasia na toodoolae mamana, ma daru ka nagaa naa na manata mamanalae kera ki tai imole. ¹⁹ Sui ta, na imole nia ki tha God da takwe suukwai ilingia ta fau baita, sulia ’e langi si ’idu, ma da ka kekeda ’urii ’i fafona fau neri, “Na Aofia ’e thaitamana bana imole nia ki,” ma, “Sa ni ti ne ’e thaea thasa ’e lea sulia na Aofia, nia kau abulo faasia abulo ta’alae ki.” ²⁰ ’I laona beu baita, na doo ni fanga ki ’e ’oro. Tai si doo ki da thaungana ’ana gol ma na silva, ma tai si doo da ka thaungana ’ana ’ai ma na thaegano. Tai si doo ’ana doo neri ki da too ’uria fangalae ’ana fe dani baita ki, ma tai si doo lau da ka too ’uria mamalana bana si manga. ²¹ Ma lelea sa ta imole ka faafaalu nia ’i tala’ana faasia doo ta’ae ki, nia ’e ilingia na doo ni fangalae ’ana fe dani baita ki. Sulia ’e abutai nia ’i tala’ana, ma ka thalungatai nia ’uria ililana raoa ’okae ki fuana ngwane baita nia. ²² ’Oko too faasia na kwaidoorilae ta’ae kera ngwane daraa ki. ’Oko thasi suukwai ’uria toolae ne ’o’olo, ma faamamanelana tha Jisas, ma liothaulae ’ana imole ki, ma toolae enoeno fonea imole ki. ’Oko too kwaimani, ma ’oko foa fonea ni ti kera ne na lioda ’e folaa. ²³ Ma ’oko too faasia na olisusuulae oengwanea ki, sulia ’o thaitamana si doo neri ki ne thaungana firua ki. ²⁴ Sulia na ngwane ni rao nia na Aofia ’e langi si too ’ana olisusuulae. Nia ka ade ’okae ’ana fuana imole ki sui, ma ka toodoo ’okae ’ana marabibilae. ²⁵ Ma ’oko marabibi fuana imole ki ne da tatae rakethasu ’uri ’oe, ’ana si manga ’o faatalo ’ania garolae kera ki. Alamia tha God kau bulasia lioda fasi da ka thaitamana na mamanaa. ²⁶ Ma na manatalada kau oli, ma kera dau tafi faasia na ’aukwai nia tha Saetan ne ’e dau faafida, ma ka suumai kera ’uria ililana si doo ki ne nia ’e dooria.

¹ ’Oko manatatoona si doo nee: Si manga ’afitai ki kau dao mai ’i nao sui tha Jisas ka fi dao mai. ² Ma na imole ki dau manatatooda bada ’i talada, ma dau dooria malefo, ma dau faabaita kera bada ’i tala’ada, ma dau bae buri ’ana imole ki. Ma ka langi da si roosulia baelana maka ma gaa kera ki, ma ka langi da si tangoa bo ni ti kera ne da ade ’okae fuada, ma kera dau thaeta’a ’ana si doo nia ki tha God. ³ Ma dau abulo ta’ae, ma ka langi da si kwaimanatai fuana imole ’e’ete ki, ma dau suke faafia imole ki, ma dau dooria firulae, ma dau sukudoo, ma dau otekera ’ana doo ’okae ki. ⁴ Ma kera dau ’olea maelana imole ki, ma ka langi da si manata bo sulia si doo ki ne da ilia, ma dau naunibaita ’asiana, ma dau nonithathala ’ada sulia na kwaidooria kera ki ’ana noni ma tha God ka langi. ⁵ Kera dau thaea thasa da manata mamana ’ana tha God, sui ta, ’e langi da si alamatana na suukwaia tha God ka bulasia moorilada. ’Oko too tau faasia na imole ’urineri ki. ⁶ Ma tai imole ’urineri ki ne da ruu ’i luma kera imole ki, ma da ka toodoo, ma da too ’ana suukwaia ’uria talailana keni ki faasia na mamanaa. Ma na keni neri ki, na garolae kera ki ’e faamaketho kera, ma na kwalukaela ’ana kwaidooria ta’ae ki ka ’inito faafi kera, ⁷ ma da dooria da ka fafurongo lado bada ’uria thaitamedooa, sui ta, ’e ’afitai da ka thaitamana na mamanaa. ⁸ Na ngwane toodoo ta’ae neri ki, da firu ’usia na toodoolae mamana. Na manatalada ’e langi si rao ’o’olo, ma na manata mamanalae kera ’e langi si mamana. Da ilingia tha Janes ma tha Jambres bae daru firu ’usia tha Mosis. ⁹ Sui ta, ’e ’afitai fuana imole ’urineri ki da ka faagaroa imole ’oro ki, sulia na imole ki sui da rikia naa oengwanealae kera ki, ilingia bae ’e fuli fuana tha Janes ma tha Jambres. ¹⁰ Sui ta, ni ’oe ne ’o lio thaitamana na toodoolae nau, ma na abulolaku, ma si doo ne ku doori ilia ’ana na moorilaku. Ma ’oko rikia naa na manata mamanalae nau, ma na marabibilae nau, ma na liothaua nau, ma na ngadolae nau, ¹¹ ma ’oko rikia naa na ngadalae nau ki. Ma ’oko thaitamana sui naa si doo ’afitai ki ne da ilia ’ani nau ’i laona maetoaa ’i Antiok ma ’i Ikonium ma ’i Listra. Sui ta, na Aofia ’e ’adomi nau, fasi ka langi kwa si mae. ¹² Mamana ’asiana, ni ti ne ’e dooria ka too ’o’olo ’i laona too ofulae fonea tha Jisas Kraes, kera dau faangadaa. ¹³ Na imole ta’ae ki ma na imole toodoo susuke ki dau ta’ae ka tatha, ma dau talai garo ’ana tai imole, ma ni kera ’i talada laubo. ¹⁴ Sui ta, ni ’oe nee, ’oko suukwai ’ana ’idulana na doo mamana ki ne ’o manata mamana suukwai naa ’ania. ’O thaitamana bamu si doo neri ’e mamana, sulia ’o fiitoo ’ani kameli ne meli toodoo fuamu. ¹⁵ Ma ’oko manatatoona, ’e ’ito ’ana si manga bae ’o faekwa mai ’ania, ’o thaitamana naa na Kekedalae Abu ki ne tala’ana ka faatana fuamu ne tha God kau faamoori ’oe si manga ’o manata mamana ’ana tha Jisas Kraes. ¹⁶ Tha God naa ne fala na Kekedalae Abu ki sui. Ma na Kekedalae Abu ki ’e ’okae ’uria na toodoolae, ma na ’olosilana si doo ki ne garo, ma ka faatana na toolae ’o’olo, ¹⁷ fasi na ngwane ne rao fuana tha God, ka tala’ana ililana si raoa ’okae ki sui.

¹ Nau ku gani ’oe ’i maana tha God ma tha Jisas Kraes, na ngwane ne kau toketaa na imole moori ki ma na imole mae ki, ma kau oli mai fasi ka ’inito. Ma ku gani ’oe, ² fasi ’oko faarongo ’ana Faarongolae ’Okae. Ma ’oko thathalu ’uria ililana ’ana si manga ki sui. Si manga ’o toodoo ’ana marabibia, ’oko bulasia lioda na imole ki, ma ’oko ngatafia na imole ki ne da abulo ta’ae, ma ’oko fala rakealae fuada. ³ ’Oko ilia naa si doo neri ki sulia si manga kau dao mai fasi na imole ki da si dooria fafurongolae ’uria na toodoolae mamana. Sui ta, da dooria ’ada lealae sulia na kwaidooria kera ki ’i tala’ada, ma da ka rofe ’ada ’uria na imole toodoo ’oro ki fasi da ka thaea si doo ki ne da doori rongo. ⁴ Ma da ka abulo ’e’ete ’ada faasia rongolana si doo mamana ki, ma da ka fafurongoa ’ada na ununua kaubare ki. ⁵ Sui ta, ni ’oe nee, ’oko liosuli ’oe ’i tala’amu ’ana si manga ki sui, ma ’oko suukwai ’ana raoa ’oe, boroi ’ana si manga ’ana ’afitaia ki. ’Oko ilia raoa ’oe ’ana faatalolana Faarongolae ’Okae, ma ’oko ilia si raoa ki sui ne tha God ’e fala fuamu. ⁶ Aia, ma nau nee, ’e dao naa ’ana si manga fasi da ka thaumaeli nau ilingia ta afuafulae. ⁷ Nau ku faasuia naa na raoa ki sui ne tha God ’e fala fuaku, ilingia na ngwane ne fita ma ka faasuia naa na fifitalae nia, ma ku dau naa ’ana na manata mamanalae. ⁸ Ma na kwaiaraa nau ’e kwaimaakwali naa maasi nau, sulia na too ’o’ololae nau. Ma na Aofia, na ngwane ne ’e tooketa ’ana ’o’oloa, kau fala naa kwaiaraa neri fuaku, ’ana fe dani ne nia kau oli mai ’ania. ’E langi lau talifili nau, na imole ki sui ne da liothau laubo ’ana tha Jisas Kraes ma da ka kwaimaakwali ’ana daolana mai. ⁹ ’Oko thasi suukwai fasi ’oko dao ’ali’ali ’i siaku. ¹⁰ Sulia tha Demas ’e ’akwasi nau naa, ma ka lea na ’ana ’uria ’i Tesalonaeka. Nia ’e lea, sulia ’e liothau ’ana lealae sulia molaagali nee. Ma tha Kresens ka lea na ’ana ’uria bali fera ’i Galesia, ma tha Taetas ka lea na ’ana ’uria bali fera ’i Dalmatia. ¹¹ Talifilia tha Luk bo ne ’e too fone nau. ’Oko talaia mai tha Mak fone ’oe, sulia nia ’e tala’ana ’adomilaku ’ana raoa nee. ¹² Nau ku fala naa tha Tikikas ’uria ’i Efesas. ¹³ Ma si manga ’o lea mai ’ana, ’oko ngala mai maku tikwa nau bae ku ’akwasia mai siana tha Karfus ’i Troas. Ma ’oko ngala laubo mai na buka nau bae ki, ma tatha ’asiana na buka ’okae nau bae ki da thaungana ’ana ’ungana sipsip. ¹⁴ Tha Aleksanda, na ngwane ne ’e rao ’ana kakai thalo ki, ’e fala naa ngadalae baita ’asiana fuaku. Ma na Aofia kau duua si doo ki ne nia ’e ilia. ¹⁵ ’Oko lilio ’okae laubo suli ’oe, sulia nia ’e firu suusia na faarongolae kolu. ¹⁶ Ma ’ana etana si manga da tooketa nau ’ania, ’e langi ta imole si ’adomi nau bo. Na imole ki sui da ekwatai nau naa. Nau ku foa fasi tha God si fala na kwakwaelae fuada ’uria si doo neri. ¹⁷ Sui ta, na Aofia ne ’e too naa fone nau ma ka faasuukwai nau fasi ku tala’ana faatalolae ’ania na Faarongolae ’Okae ki sui fuana imole ’oro ki ne langi lau Jiu, ma da ka rongoa. Ma na Aofia ’e faamoori nau faasia imole ki ’uria thaumaelilaku. ¹⁸ Ma na Aofia kau faamoori nau faasia doo ta’ae ki sui, ma ka ngali nau ’uria ’i laona ’initooa nia ’i thalo. Na ’initooa fuana sulia dani ma ’e totoo si sui! Iuka, ’e mamana. ¹⁹ Nau ku fala si bae ’okaelae nau ki fuana ni Prisila ma na arai nia tha Akuila, ma na lumengwela tha Onesiforus. ²⁰ Tha Erastus ’e too bana ’i Korint, ma nau ku ’akwasia mai tha Trofimus ’i Miletus, sulia ’e matai. ²¹ ’Oko thasi suukwai fasi ’oko dao ’i seeki ’i nao ’ana si manga ’ana gwagwaria. Tha Iubulus, ma tha Pudens, ma tha Linus, ma ni Kladia, ma na imole manata mamana ki sui ’ana tha Jisas Kraes ne da too laubo ’i see, da fala laubo kau si bae ’okaelae kera ki fuamu. ²² Nau ku foa fasi na Aofia ka too fone ’oe, ma na ’okaelae nia tha God ka too fone kamolu teefau.