2 Tesalonaeka
11 Kameli tha Saelas fonea tha Timoti ma ni nau tha Pol, nee meli kekeda kau fuamolu imole manata mamana nia ki tha God na Maka kolu ma na Aofia tha Jisas Kraes, ne molu too ’i Tesalonaeka. 2 Kameli meli foa fasi tha God na Maka kolu ma na Aofia tha Jisas Kraes daru ka fala ’okaelae nia ma na enoenoa nia fuamolu. 3 Doora nau ki ’ae, ’e tala’ana fasi meli tangoa tha God ka lea lado fuamolu. Si doo neri ’e tala’ana meli ka ilia sulia na manata mamanalae kamolu ki ne ’e ’idu ka baita na mai, ma na liothaua kamolu fuamolu kwailiu ’e ’idu ka baita laubo. 4 Ma sulia na abulolamolu ’e ’urineri, nia nee meli ka bae ’okae suli kamolu fuana imole manata mamana nia ki tha God. Meli bae ’okae sulia na ngadolamolu ’ana manata mamanalae kamolu ki, boroi ’ana molu ka daotoona ’afitaia ’oro ki, sulia tai imole ki da faangada kamolu sulia na manata mamanalae kamolu. 5 Aia, molu ka takwe suukwai ’ana manata mamanalae kamolu ki, sui boroi ’ana molu ka daotoona ’afitaia ’oro ki, si doo neri ’e faatana ne tha God kau ketoa imole ki sui ’ana ’o’oloa. Nia kau adea fasi molu ka tala’ana toolae ’i laona ’initooa nia, ne da faangada kamolu naa ’uria. 6 Na tooketalae nia tha God ’e ’o’olo, sulia nia kau fala ngadalae fuada na imole ki ne da faangada kamolu si manga neri. 7 Ma nia kau lafua ngadalae ki faasi kamolu ma ni kameli laubo. Nia kau ilia si doo neri si manga na Aofia tha Jisas kau dao mai faasia ’i thalo fonea na enselo mamana nia ki, 8 ma fonea meamea na ere. Ma ’ana si manga neri, nia kau fala kwakwaelae fuada ni ti kera ne da otekera ’ana tha God ma ka langi da si roosulia na Faarongolae ’Okae sulia Aofia kolu tha Jisas. 9 Na kwakwaelae nia fuada naa nee nia kau faafunuida na ’ana ma ’e ’afitai ka sui. Ma kera dau too tau naa faasia na Aofia ma na ’initooa nia ma na suukwaia baita nia. 10 Ma si doo neri ki kau fuli ’ana si manga ne nia ’ua kau, fe dani ne na Aofia kau oli lau mai. Nia kau oli lau mai ’i laona molaagali nee fasi na imole nia ki ne da manata mamana ’ana, da ka faabaita nia, ma da ka faa’inito nia. Ni kamolu molu ka ade laubo ’urineri, sulia molu manata mamana ’ana faarongolae nee meli faarongo kamolu ’ania. 11 Nia nee si doo ne adea meli ka foa fuamolu ’ana si manga ki sui. Meli foa fasi tha God ka fala na abulolamolu ka tala’ana mooria ne ’e fili kamolu ’uria. Ma meli ka foa laubo fasi na suukwaia nia ka ’adomi kamolu fasi molu ka tala’ana ililana si doo ’okae ki ne molu doori ilia. Molu doori ilia si doo ’okae neri ki sulia molu manata mamana ’ana tha Jisas. 12 Meli foa ’urineri fasi molu ka faabaitaa Aofia kolu tha Jisas, ma nia kau faabaita kamolu laubo. Ma si doo neri ki kau fuli, sulia na ’okaelae nia tha God ma na Aofia tha Jisas Kraes.
21 Aia, doora nau ki ’ae, kameli meli dooria fasi molu ka thaitamana ’okae ’ana na olilana mai Aofia kolu tha Jisas Kraes ma na ofulakolu fone nia. 2 Meli gani kamolu fasi molu ka too faasia fafurongolae ’uria na imole ki ne da thaea fuamolu thasa fe Dani ne na Aofia kau oli mai ’ania, ’e dao sui naa. Na faarongolae ’urineri ne adea molu ka manata ’a’abo ma molu ka mau. ’E langi molu si manata mamana ’ana si faarongolae neri ki, sui boroi ’ana tai imole ki da ka thaea thasa si faarongolae neri ’e ’ito mai faasi kameli si manga meli faatalo ’ana baelana tha God, ma langi da ka thaea thasa meli kekeda sulia. 3 Ma ka langi molu si manata mamana ’ana faarongolae ki ne thakatafa mai faasia imole susuke ki. Sulia roo si doo ki ne kau fuli sui fatai ka fi dao ’ana fe dani ne tha Jisas kau oli lau mai. Etana si doo ’e ’urii, imole ’oro ki dau ekwatana tha God. Na ruana si doo nee na Ngwane Ta’ae tha Saetan kau daofaatai mai, sui ta, tha God kau alua nia ’i laona fera ’ana kwakwaelae. 4 Na Ngwane Ta’ae ne tha Saetan kau tatae suusia doo ki sui nee tai imole ki da ’alangia ’ana tha God, ma nia ka thaea thasa nia ’e ’inito ka talua doo ki sui ne imole ki da foasia. Ma nia kau too ’i laona Beu Abu tha God, ma ka thaea thasa nia naa ne tha God. 5 Nau ku bae sui naa sulia si doo neri si manga bae ku too ’ua mai fone kamolu. Ma alamia ’e langi molu si manataburo ’ua ’ana tomone? 6 Ma tee si doo ne suusia Ngwane Ta’ae neri. Molu ka thaitamana sui naa si doo neri. Na Ngwane Ta’ae ’e tala’ana kau dao mai si manga ne tha God ’e ’olea bo fuana. 7 Na suukwaia ’ana ta’alae neri ’e rao anggwa bana si manga neri, ma ka too anggwa ’ua, lelea ka dao ’ana ta si manga ne dau lafua ’ana si doo neri ’e suusia. 8 ’Ana si manga neri fatai, na Ngwane Ta’ae ka fi dao faatai mai. Sui na Aofia tha Jisas kau dao, ma nia kau ’asimango faafia Ngwane Ta’ae neri fasi ka thaumaelia, ma nia kau faafunuia ’ana suukwailana folaalae nia. 9 Aia, na Ngwane Ta’ae neri kau dao faatai ma ’e too ’ana suukwaia nia tha Saetan, ma nia kau ilia kwalukaela doo ki ni kwelelae ai ne nia kau suke bana ’ania. 10 Ma nia kau suke ’ana kwalukaela abulo ta’alae fuada na imole ki ne da lea naa ’uria fera ’ana maea ne totoo si sui. Kera dau mae sulia da otekera ’ana Faarongolae mamana. Lelea sa da ka manata mamana ’ana Faarongolae mamana, tha God ka faamoori kera. 11 Ma sulia da otekera ’ana na Faarongolae mamana, tha God kau fala da ka manata mamana ’ada ’ana sukelae baita nia na Ngwane Ta’ae neri. 12 Ma sulia si doo neri, tha God kau ketoa imole ki ne langi da si manata mamana bo ’ana Faarongolae mamana ma da ka nonithathala bada sulia garolae kera ki. 13 Doora nau ki ’ae, ’e tala’ana meli ka faabaitaa na Aofia ’ana si manga ki sui, sulia kamolu na imole ki nee tha God ’e liothau ’ani kamolu. Sulia ’e tau na mai ’ana thathafalia, tha God ’e fili kamolu naa fasi ka lafu kamolu faasia na kwakwaelae. Nia ’e lafu kamolu ’ana suukwaia nia na Mangoedoo Abu ne faafaalu kamolu. Ma tha God ’e lafu kamolu sulia na manata mamanalae kamolu ’ana na Faarongolae mamana. 14 Tha God ’e soe kamolu fasi molu ka too ’ana mooria firi, ’ana si manga bae meli faatalo ’ana Faarongolae ’Okae fuamolu. ’Urineri nee molu kau ’ado ’ana ’initooa fonea na Aofia kolu tha Jisas Kraes. 15 Ma sulia si doo neri ki, doora ki ’ae, molu ka faasuukwaia na manata mamanalae kamolu, ma molu ka dau suukwai faafia na toodoolae mamana bae meli faarongo kamolu ’ania, ma na kekedalae ki bae meli fala laubo kau fuamolu ’i nao. 16 - 17 Kameli meli foa fuana Aofia kolu tha Jisas Kraes ma tha God na Maka kolu daru ka fala rakealae fuamolu, ma daru ka faasuukwai kamolu fasi molu ka ade ’okae, ma molu ka bae ’okae ’ana si manga ki sui. Sulia tha God ’e liothau ’ani kolu, ma ka faamarabibi kolu ’ana si manga ki sui, ma kolu ka kwaimaakwali ’i laona fiitoolae ’uria na doo ’okae ki sui.
31 Doora nau ki ’ae, tee si doo lau ku thaea fuamolu, molu ka foa fuameli, fasi na faatalolae kameli ’ana baelana Aofia ka tagalo ’ali’ali, ma na imole ’oro ki da ka manata mamana ’ana, ma da ka bae ’okae sulia, ilingia laubo ne molu ilia ’i see nena. 2 Molu ka foa laubo fasi tha God ka liosuli kameli faasia na ngwane ta’ae ki. Sulia na imole ’oro ki ne langi da si manata mamana ’ana Faarongolae nia na Aofia. 3 Sui ta, na Aofia, ’e faamamanea banaa na baelana, ma nia kau faasuukwai kamolu ma ka lio suli kamolu faasia tha Saetan. 4 Ma na Aofia ne adea meli ka fiitoomolu ne molu nonimaabe ni roolae sulia si doo ki ne meli bae sulia fuamolu. 5 Meli ka foa laubo fasi na Aofia ka ’adomi kamolu fasi molu ka thaitamana ’okae ’ana na liothaua nia tha God, ma molu ka suukwai ’ana manata mamanalae kamolu ki, ka ilingia tha Jisas Kraes, si manga bae ’e siitatha ’ana ’afitaia ki. 6 Doora nau ki ’ae, sulia na suukwaia nee na Aofia kolu tha Jisas Kraes ’e fala fuameli, nia nee meli bae fifii fuamolu ka ’urii: Molu ka too faasia imole manata mamana ki ne da noni dadaola ni raolae, ma da ka aburongo ’ana si doo ki ne meli toolamana fuamolu. 7 Molu thaitamana sui naa ne fulingana molu ka ade sulia si doo ki nee meli ilia. ’Ana si manga meli too mai fone kamolu, langi meli si noni dadaola ’ana raolae. 8 Ma meli si tofa ngala bo ta si fanga ’ana ta imole, na doo ki sui bo ne meli folia. Sulia dani ma na rodo, meli rao suukwai fasi ka langi molu si daotoona ta ’afitaia ’ana liolae suli kameli. 9 Meli rao ’urineri, sui boroi ’ana meli ka too ’ana suukwaia ’uria tofa ngalilana ta si fanga faasi kamolu. Meli ade ’urineri, fasi molu ka ade sulia abulolameli ’ana raolae. 10 Ma si manga bae meli too fone kamolu, na toodoolae kameli fuamolu ’e ’urii bae, “Ni ti ’ani kamolu ne otenia ’ana raolae, ’e langi molu si fala ta si fanga fuana.” 11 Meli kedaa si doo neri, sulia meli rongoa tai imole ’amolu ’i see nena, da otekera ’ana raolae. Ma da ka tofa kali bada ’uria aefaralana raoa kera tai imole ’e’ete ki. 12 ’Ana suukwaia nia na Aofia tha Jisas Kraes, meli bae fifii kau fuada, ma meli ka odu kera kau fasi da ka too ’o’olo ma da ka ilia tai si raoa fasi da ka ngala si doo ki nee da ’atongia. 13 Ma kamolu laubo doora nau ki ’ae, ’e langi molu si noni dadaola ’ana ililana si doo ’okae ki. 14 Ma sa ni ti ’amolu nee si roo bo sulia tae ki ne meli thaea kau ’i laona kekedalae nee, molu ka lio thaitamana, ma ka langi molu si ilia ta si doo fonea, fasi nia ka ’ida. 15 Ka ’urineri boroi, ’e langi molu si fiia thasa nia ta maalimae ’amolu. Molu ka bae fifii fuana, sulia nia ta doora ’amolu laubo. 16 Meli foa fasi na Aofia ne fala enoenoa fuakolu, ka fala laubo enoenoa fuamolu ’ana si manga ki sui, ma ka too fone kamolu. 17 Nau tha Pol nee, ku tala kedaa kau si doo ’i’isi nee ki. ’Urineri nau ku faasuia naa kekedalae nau ki teefau. Ma ka faatana ne na kekedalae nee ’e lea kau faasi nau. 18 Nau ku foa fasi na ’okaelae nia na Aofia kolu tha Jisas Kraes ka too fone kamolu teefau.