2 Pita
11 Nau tha Saemon Pita, na ngwane ni rao ma na aposol nia tha Jisas Kraes, ne ku kekeda kau fuamolu. Tha Jisas Kraes naa na God kolu ma nia naa ne faamoori kolu. ’Ana na ’o’oloa nia, nia ’e adea molu ka manata mamana, ilingia laubo ne ’e ilia ’ani kameli. 2 Nau ku foa fasi tha God ka liothau ’ani kamolu ma ka fala enoenoa mamana fuamolu sulia molu thaitamana tha God ma na Aofia kolu tha Jisas. 3 Kolu too ’ana doo ki sui ne kolu ’atongia ’uria toolae nee lea sulia bibirangaa nia ki God. Na doo neri ki sui tha God ne fala ’ana suukwaia nia. Tha God ne ’e ’inito ka tatha ma ka ’okae, ma sulia kolu thaitamana ’okae ’ani nia, nia ka soe kolu fasi kolu ka too ’ana ’okaelae nia ne thaluthalu. 4 ’Urineri, nia ka fala si doo ’okae ’asiana ki fuakolu ne nia ’e alangana, fasi na bibirangaa kamolu ki ka ’okae ilingia bibirangaa nia tha God, ma molu ka thaitamana takwelae ’usia na kwaidooria ta’ae ki ’ana molaagali nee ne ’e naga kamolu. 5 Ma sulia God ’e fala naa doo ki sui fuamolu ’urineri, molu ka thasi suukwai fasi na manata mamanalae kamolu ka suukwai. Ma molu ka ilia laubo si doo neri ki: molu ka abulo ’o’olo, ma molu ka thaitamana tha God, 6 ma molu ka lio sulia malutana mooria kamolu ’i talamolu, ma molu ka takwe lalifuu si manga ’ana ’afitaia, ma molu ka lea sulia bibirangaa nia ki tha God 7 fonea na kwaimania ma na liothaua kamolu fuamolu kwailiu. 8 Ma lelea sa na bibirangaa kera imole neri ki ka baita ’i laona moorilamolu, ’e ’urineri molu tala’ana naa ililana doo ’okae ’oro ki sulia na thaitamedooa kamolu ’ana Aofia kolu tha Jisas Kraes. 9 Ma sa ni ti boroi ’ana ne ’e langi si too ’ana bibirangaa kera imole neri ki, nia ’e ilingia ta ngwane maa rodo, sulia ’e manataburo ’ana ne tha God ’e manatalukea naa na ta’alae nia ki. 10 Nia nee dooraku ki ’ae, molu ka thasi suukwai fasi ka faatana ne tha God ’e fili kamolu, ma ka soe kamolu ’ana imole nia ki. Adelae ’urineri ne fasi ka langi molu si lakwadora ma molu si ’asi kamolu, 11 ma tha God kau konitai kamolu ’i laona ’initooa nia na Aofia kolu tha Jisas Kraes ne faamoori kolu. Ma na ’initooa neri ’e totoo si sui. 12 Sui boroi ’ana molu ka thaitamana teefau ’ana si doo neri ki, ma molu ka manata mamana naa ’ana toodoolae mamana ne molu rongoa naa, ’e ’okae fasi ku faamanatatoo kamolu lau ’ana si manga ’oro ki. 13 Sulia si manga ku moori ’ua ’i laona molaagali nee, nau ku fiia thasa ’e ’okae fasi nau ku thaea lau si doo neri ki fuamolu fasi ka langi molu si manataburo ’ania. 14 Sulia nau ku thaitamana ’e langi si tau bo ku mae lau baku, ilingia na Aofia tha Jisas Kraes ’e thae folaa sui naa ’ania fuaku. 15 Ma sulia ’e ’urineri, nau ku rao suukwai fasi ka langi molu si manataburo ’ana si doo ki ne ku toolamana fuamolu ’i burina ne ku mae naa. 16 Aia, ma si doo nee meli toolamana sulia na daolana mai na Aofia kolu tha Jisas Kraes ’ana suukwaia baita, ’e langi lau na ununua ne tai ngwane ki da boaa bada ’i tala’ada. Sulia kameli ’i tala’ameli ne meli rikia naa na babaitaa nia ma na raralana. 17 Sulia meli too ’ua na mai fonea ’ana si manga tha God na Maka ’e fala naa babaitaa ma na ’initooa fuana. Ma meli ka rongoa lingena tha God ne suukwai ka tatha ’e bae ’urii fuana, “Na ngwela nau nee, ne nau ku liothau ’asiana ’ania, ma ku nonithathala ’asiana suli nia.” 18 Kameli ’i tala’ameli ne meli rongoa lingena tha God faasia ’i thalo, ’ana si manga meli too fonea tha Jisas ’i gwauna fe tolo abu bae. 19 Ma sulia si doo neri, kameli meli ka manata mamana suukwai naa ’ania ne na baelana profet ki sulia tha Kraes ’e mamana. Ma ’e ’okae fasi molu ka manata mamana laubo ’ania. Sulia na baelana profet neri ki, ’e ilingia na kwethu ne tala ’i laona maerodo, lelea ka dao ’ana fe dani ne tha Kraes kau dao faatai lau mai ’ania ma na gwaasinasinalana ka folaa ’i laona manatalamolu. 20 Ma si doo ne ’e baita ka tatha ’asiana nee: Molu ka thaitamana ne ’e langi ta si doo na profet ki da kekeda sulia ’i laona Kekedalae Abu ’e langi si fuli bo mai ’ada ’i talada, 21 ma langi sulia ne da dooria da ka bae bada sulia. Sulia na baelana profet ki ’e langi lau faasia manatalana ta ngwane bana, ’e lea ’ana mai faasia tha God. Sulia na Mangoedoo Abu ne ’e talaia na profet ki ’ua na mai ’i nao fasi da ka bae sulia na baelana tha God.
21 ’Ana si manga ’ua na mai ’i nao ’i Israel, tai ngwane susuke ki da dao mai, ma da ka thaea thasa kera naa na profet nia ki tha God. Ma ka ’urineri laubo, tai ngwane dau dao mai, ma dau toodoo fuamolu ’ana sukea ki. Ma na toodoolae kera ki kau nagaa manata mamanalae kera tai imole ki. Ma dau toodoo laubo, thasa tha Jisas, na ngwane ne mae ’uria faamoorilada, ’e langi lau na Aofia mamana. Ma sulia si doo neri ki, ’ali’ali bana tha God kau fala kwakwaelae fuada. 2 Sui ka ’urineri boroi ’ana, imole ’oro ki dau lea sulia na abulota’alae kera ki. Ma sulia si doo ki ne da ilia ka ta’ae, tai imole ki dau bae nagaa na toodoolae mamana nee. 3 Ma na ngwane toodoo susuke neri ki, dau ngala malefo ’ana bae susukelae kera ki ne da suke kamolu ’ania. Dau ade ’urineri, sulia da ’agudoo. Aia, ’e tau na mai ne tha God ’e rikia naa si doo ki ne da ilia, ma nia ka kwaimaakwali naa ’uria ketolada ma na nagalada. 4 Sulia na enselo ki mai ’i nao ne da abulo ta’ae, ma tha God ka fala kwakwaelae fuada, ma ka aluda ’i laona fera ’ana kwakwaelae, ma ka kanifaafida ’ana seni, ma da ka too ’ua bada ’i seeri ’i laona maerodo. Da kwaimaakwali naa ’uria fe dani neri ’ana keketoa. 5 Ka ’urineri laubo fuana imole bae ki ’i laona molaagali ne da too ’ua na mai, sulia na abulolada ’e ta’ae ’asiana ma ’e langi da si faa’initooa bo tha God. Tha God ’e thaumaeli kera ’ana inggwa baita ’asiana. Talifilia tha Noa bo ne tha God ’e faamooria fonea fiu imole ki laubo. Tha God ’e faamoori kera, sulia tha Noa ’e toodoo sulia na bibirangaa ne ’o’olo. 6 Iuka, ma tha God ’e fala laubo na kwakwaelae fuana imole ki ’i Sodom ma ’i Gomora. Nia ’e thaumaeli kera ’ana ere, fasi ka faatana fuana imole ki sui, si doo ne kau fuli fuana imole ki ne da aburongo ’ani nia. 7 Sui ta, tha God ’e faamooria tha Lot, sulia tha Lot na ngwane ’o’olo, ma nia si dooria na abulota’aelae kera na imole ki ne da aburongo ’ana bibirangaa nia ki tha God. 8 Ma tha Lot na ngwane ’o’olo, ’e too foneda, ma ka riki kera, ma ka rongo kera sulia dani, ma ka liodila ’asiana sulia na abulo ta’aelae kera. 9 Nia nee, na Aofia ka ’adomia na imole ki ne da manata mamana ’ani nia, fasi na ’afitaia ki ka langi si naga kera. Ma nia ka fala laubo na kwakwaelae fuana imole ta’ae ki, lelea ka dao ’ana fe dani ’ana keketoa mamana. 10 Ma nia ka fala na kwakwaelae ne baita ka tatha fuana imole ki ne da roosulia na kwaidooria ta’ae kera ki ’ana nonida, ma da ka otekera ’ana na gwaungaia nia tha God. Ma na imole ki ne ku bae sulida ne da toolamana sukelae ki, da bae naunau ma da ka bae nonirara’a ’asiana. Ma ’e langi da si manata baita bo ’ana mangoedoo ’inito ki ’i thalo, ma da ka ililado laubo ’ana baetatagalae ’ani kera. 11 Aia, ma na enselo ki boroi, ne da too ’ana suukwaia baita talua na toodoolae susuke neri ki, ’e langi da si bae nagaa bo na mangoedoo ’inito ki ’i thalo ’ana baea faangwaela ’urineri ki ’i nao ’ana na Aofia. 12 Ma na ngwane toodoo susuke neri ki ’e langi da si manata bo sulia si doo ki ne da ilia. ’Urineri, da ilingia naa doo moori kwasi ki ne ’e tala’ana dau dauda ma dau thaumaelilada. Sulia na imole neri ki, da faangwaela ’ana si doo ki ne ’e langi da si thaitamana. ’Urineri, tha God kau thaumaeli kera ilingia na doo moori kwasi ki. 13 Ma sulia na ngadalae ne da fala fuana imole ki, tha God kau duua laubo ’ana ngadalae. Na ngwane toodooe susuke neri ki, da fanga baita, ma da ka kuu, ma ka langi da si lio sulia moorilada ’ana fangalae ’ana fe dani ki. Kamolu nena, molu kau ’ida ’asiana si manga da fanga fone kamolu ’i laona ofulae kamolu ki, sulia na abulolada ’e ta’ae ’asiana, ma da thaitamana ’asiana sukelae ’ana si manga ki sui. 14 Ma si manga da rikia keni ki, da ka dooria ’asiana kaubarelada. ’E langi da si momolo bo faasia abulota’alae. Ma da ka talaia imole ki ne na manata mamanalae kera ’e maketho ’uria ililana doo ta’ae ki. Ma da ka dooria ’asiana ’agudoolae. Ma sulia si doo neri ki, ne tha God kau fala kwakwaelae fuada. 15 Da lea ’e’ete faasia tale ’o’olo, ma da ka lea na ’ada sulia bibirangaa ta’ae nia tha Balaam, na ’alakwa tha Beor. Sulia tha Balaam ’e dooria ’asiana ngalalana malefo ’ana ililana doo ta’ae ki. 16 Nia nee tha God ka fala dongki nia ka balufi nia ’ana si lingee doo ilingia ta ngwane. Ma si manga tha Balaam na profet ’e rongoa ne na dongki nia ’e bae ’urineri, nia ka ekwatana naa abulo oengwanealae nia ki. 17 Aia, ma na imole ki ne da toolamana sukelae, da ilingia bada ta mae kafo busu bae ’e langi ta si kafo ’i laona ma ka lalanga naa. Ma da ka ilingia laubo si datha bae na thauthau ’e thaulia fasi na uta ka langi si ’aru. Nia nee tha God ka kwaimaakwali ’ana dele rorodoa fuada. 18 Da faabaita kera bada ’i tala’ada ma na baelada ka oengwanea bana. Ma tai imole ki ne da abulo ’o’olo sui naa, ma da ka thafalia naa talalana bibirangaa kera ki, ma ’e langi da si abulo ta’ae naa fonea imole ki ne da garo. Ma na imole ki ne da toolamana sukelae, da faagaroa laubo imole neri ki ’ana kwaidooria ta’ae ki ’ana nonida. 19 Sulia na ngwane toodoo neri ki, da bae ’urii fuada, “Kameli meli alangai fuamolu fasi molu ka nonilaa ma fasi molu ka ilia ’amolu ta si doo bana ne molu dooria ililana.” Sui ta, na ngwane toodoo neri ki ’i tala’ada ’e langi da si nonilaa. Da ilingia na ngwane tofa rao ki sulia na bibirangaa ta’ae kera ki ne naga kera. Sulia kwaidooria ta’ae kera ki ’e ’inito faafida, ma ’e langi da si too naa faasia ililana doo garo. 20 ’I nao mai, na ngwane toodoo susuke neri ki da thaitamana na Aofia kolu tha Jisas Kraes ne faamoori kolu, ma da ka abulo naa faasia ta’alae ki ’i laona molaagali ne ’e naga kera. Sui ta da oli lau ’uria ililana ta’alae kera ki bae da ililia mai ’i nao, ma na ta’alae ki ka ’inito lau faafi kera. Ma si manga neri da ta’ae ka talua fatai si manga bae da si thaitamana ’ua ’ana tha Jisas Kraes. 21 ’E ore ’okae bana fuada fasi ka langi da si daotoona tale ’uria ’o’oloa. Ma ka ta’ae ’asiana fuada ne da daotoona lau na tale ’uria ’o’oloa, ma da ka abulo ’e’ete lau faasia. Ma ’e langi da si roosulia toodoolae ne tha God ’e fala naa fuada. 22 Kera da faatana mamana si baea bae ’e ’urii, “Na koito ’e oli ka ’ania laubana si doo ne ’e moatana.” Ma ta si baea lau ka ’urii, “Botho ki ne da taufida sui naa, da oli da ka gagano laubada ’i laona mamago.”
31 Imole kwaimani nau ki ’ae, ruana si manga ne nau ku kekeda naa fuamolu nee. Si doo ne adea ku kedaa lau kau si kekedalae nee fuamolu, sulia ku dooria faamanatatoolamolu ’ana si doo neri ki, ade’ana molu ka manata garo. 2 Nau ku dooria fasi molu ka manatatoona si baea kera ki na profet abu bae ki ’i nao mai, fonea na toodoolae nia na Aofia kolu ne faamoori kolu. Na aposol ki ne da faatalo ’ania fuamolu, kera ne da thaea si toodoolae nee fuamolu. 3 Iuka, si doo baita ne ku dooria fasi molu ka thaitamana ’ana fe dani ’i’isi ki bae. Tai imole ki dau lea mai, ma na kwaidooria ta’ae kera ki ’ana noni kau talai kera. Ma da ka bae faangwaela ’urii ’ani kamolu, 4 “Na Kraes bae ’e nii na ’i fai? Sulia ’e alangana nia kau oli lau mai ’i laona molaagali nee, sui ta, ’e langi nia si dao ’ua. Na ngwane naonao totongenao kolu ki da mae naa. Ma lelea ka dao ’ana si manga neri, ’e langi ta si doo si tatala bo, thafali mai ’ana thafalilana molaagali lelea ka dao ’i tari’ina, na doo ki sui ’e bobola ’ua bana.” 5 Aia, imole ki ne da bae ’urineri, da dooria da ka manataburo ’ana ne tha God ’e thaungana bana ’i thalo ma na molaagali ’ana baelana. Nia ’e thaungana molaagali ’ana kafo, ma nia ka fulina na thaenggano ka thakatafa mai faasia na kafo. 6 Ma ’ana kafo laubo, ne tha God ’e faafunuia ’ana molaagali nee ’i nao. 7 Aia, ma ’ana baelana tha God laubo, ne ’e adea na molaagali nee ka too ’ana lalifuulae maasia si manga nia kau faafunuia ’ana ere. ’Ana fe dani neri, tha God kau ketoa na imole ki ne ’e langi da si manata mamana ’ani nia, ma nia kau faafunui kera. 8 Aia, imole kwaimani nau ki ’ae, ’e langi molu si manataburo ’ana si baea bae ’e ’urii, thasa tee fe dani ’e ilingia tee tooni fe ngali ’i maana tha God, ma tee tooni fe ngali ’e ilingia laubo tee fe dani ’i maana tha God. 9 Nia nee na Aofia ’e langi si tau bo ’uria faatai mamanalae ’ania baelana sulia olilana mai, sui boroi ’ana tai imole ki da fiia ’ada thasa nia kau tau ’ua mai. Sui ta, na Aofia ’e marabibi ’asiana fone kamolu. Nia ’e langi si dooria ta imole kau funu. Nia ’e dooria ’ana imole ki sui da ka abulo naa faasia ta’alae kera ki. 10 Ma fe dani ne na Aofia kau oli mai, nia kau dao mai ilingia ta ngwane bebeli, sulia na imole ki dau tona. Ma ’ana fe dani neri, dau rongoa na lingee doo baita, ma na kwalimangaa kau sui. Tha God kau faafunuia doo ki sui ’i laona mamangaa ’ana ere. Ma na molaagali ma na doo ki sui bo ’i laona, kau langi ’ana naa. 11 Ma sulia tha God kau faafunuia doo neri ki ’urineri, molu ka manata ’okae sulia na bibirangaa kamolu ki. Na abulolamolu ka ’o’olo, ma molu ka roosulia na kwaidooria nia ki tha God. 12 Molu ka kwaimaakwali maasia fe dani neri tha God kau tooketa ’ania, ma molu ka thasi fasi fe dani neri ka dao ’ali’ali mai. ’Ana fe dani neri, tha God kau faafunuia na mamangaa ma na doo ki sui ’i laona ’ana ere. 13 Aia, ma kolu lilio maasia na molaagali faalu ma na thalo faalu ne tha God ’e alangana fuakolu. Ma na imole ki sui ’i seeri, dau roosulia tha God. 14 Iuka, imole kwaimani nau ki ’ae, si manga molu kwaimaakwali ’ua bamolu maasia fe dani neri, molu ka thasi suukwai ’uria ’olosilana abulolamolu, fasi tha God ka langi si faangada kamolu faafia ta si doo, ma molu ka too kwaimani fone nia. 15 ’E langi molu si manataburo ’ana ’uria tae nee na Aofia ka marabibi fone kamolu, nia ’e ilia sulia ’e dooria fasi molu ka abulo naa ma fasi nia ka faamoori kamolu. Aia, si doo neri laubo bae na doorakolu tha Pol ’e kekeda kau fuamolu sulia. Tha God ne fala liotooa fuana tha Pol fasi nia ka kekeda ’urineri. 16 ’I laona kekedalae nia ki sui tha Pol ’e toodoo sulia si doo neri ki. Tai si doo ki ne tha Pol ’e toolamana, ’e ’afitai ’uria thaitamanalana. Ma na imole ki ne langi da si thaitamedoo ma na manata mamanalae kera ’e langi si suukwai, da bulasia si doo ki ne tha Pol ’e thaea, ma da ka toolamana sukelae sulia, ilingia laubo bae da ilia ’ana tai bali ’ana Kekedalae Abu. Ma sulia da ade ’urineri, tha God kau fala kwakwaelae fuada. 17 Iuka imole kwaimani nau ki ’ae, molu ka thaitamana si doo neri ki teefau. Nia nee, molu ka lilio ’okae, ade’ana molu ka manata mamana ’ana sukelae nee imole ta’ae ki da toolamana, ma na manata mamanalae kamolu ka ’asia. 18 Ma molu ka thasi ’uria suukwailae ’ana ngalilana na liothaua nia na Aofia kolu tha Jisas Kraes ne faamoori kolu, fasi molu ka thaitamana ’okae ’ani nia. Kolu ka faabaitaa si manga neri ma ka totoo firi! Iuka ka ’urineri naa.