2 Jon

¹ Nau na ngwane naonao ’ana ofulada na imole manata mamana ki, ku kekeda kau fuamu keni ne tha God ’e filia naa. Nau ku liothau mamana ’asiana ’ani ’oe ma na ngwela ’oe ki. Langi lau talifili nau, na imole ki sui bo ne da thaitamana na faarongolae mamana nia tha God, da liothau laubo ’ani kamolu. ² Meli liothau ’ani kamolu sulia kolu manata mamana ’ana na faarongolae mamana ne ’e totoo firi fone kolu. ³ Nau ku foa fasi tha God na Maka, ma tha Jisas Kraes na Ngwela nia daru ka ade ’okae fuakolu ma daru ka manatai kolu, ma daru ka fala enoenoa fuakolu ne kolu manata mamana ’ana faarongolae mamana, ma kolu ka liothau ’ani kolu kwailiu. ⁴ Nau ku nonithathala ’asiana sulia ku daotoona naa tai ngwela ’ana ngwela ’oe ki, da too sulia na faarongolae mamana ilingia na Maka ’e bae fifii mai ’ana fuakolu. ⁵ Ma imole kwaimani ’ae, nau ku thaea kau fuamu fonea ngwela ’oe ki fasi kolu ka liothau ’ani kolu kwailiu. Si doo neri ’e langi lau ta si baea fifii faalu ne ku kedaa kau fuamolu, si baea fifii bae kolu thaitamana ’ua na mai si manga bae kolu thafali manata mamana mai ’ania. ⁶ Na maalutana liothaua nee nau ku bae sulia ’e ’urii: Kolu ka roosulia si baea fifii nia ki tha God. Si baea fifii bae molu rongoa ’ua na mai si manga bae molu thafali manata mamana mai ’ania, nia nee molu ka liothau ’ani kamolu kwailiu. ⁷ Na ngwane susuke ’oro ki da lea sui naa ’i laona molaagali. Ma kera na imole ki ne da thaea thasa tha Jisas Kraes ’e sifo mai sui ta, ’e langi si too ’ana ta nonii imole. Ma na imole ’urineri ki naa na imole susuke ki ma na Maalimae nia ki tha Jisas Kraes. ⁸ Molu ka thaitamana ade’ana da ka ’oi ’ani kamolu ma na kwaiaraa ne molu rao ’uria ka funu. Nia nee molu ka takwe suukwai fasi molu ka ngala na kwaiaraa lalau kamolu. ⁹ Ma ta imole ne ’e bulasia na toodoolae nia tha Jisas Kraes, ma ka manata mamana ’ana ta toodoolae ’e’ete, ’e langi nia si too ofu fonea tha God. Ma sa ni ti ne ’e manata mamana ’ua ’ana toodoolae mamana, nia ’e too ofu fonea na Maka ma na Ngwela. ¹⁰ Nia nee, lelea sa ta ngwane ka dao siamolu fasi ka toodoo, ma nia ka ngala mai ta toodoolae ’e’ete, langi molu si konitana ’i laona beu kamolu ki, ma ka langi molu si ’adomia ’ana ta si doo boroi. ¹¹ Sulia lelea sa ta imole ka ’adomia ’ana ta si doo ’urineri, nia ’e ’ado kwaimani naa fonea ’ana si doo ta’ae ki ne nia ’e ilia. ¹² Nau ku too ’ana si doo ’oro ki ’uria faarongolamolulae ’ania, sui ta, ’e langi kwa si dooria bo kedalana. Nau ku manata ’uria daotoolamolulae, fasi kolu ka tala bae ofu ’akolu, ma fasi kolu ka nonithathala ’akolu. ¹³ Na keni futa ’oe ne tha God ’e filia, na ngwela nia ki da fala laubo kau si bae ’okaelae kera ki fuamu.