2 Korint
11 Nau tha Pol, ta aposol nia tha Jisas Kraes sulia kwaidooria nia tha God. Nau fonea tha Timoti na doora kolu, miri kekeda kau fuamolu na imole nia ki tha God ne molu too ’i laona maetoaa baita ’i Korint, ma fuana imole nia ki tha God teefau laubo ne da too ’i laona bali fera ’i Gris. 2 Nau ku foa fasi tha God na Maka kolu ma na Aofia tha Jisas Kraes ka faa’okae kamolu ma ka fala enoenoa fuamolu. 3 Kolu faabaitaa tha God na Maka nia tha Jisas Kraes na Aofia kolu. Tha God nee na Maka ’ana kwaimanataia fuakolu, ma nia naa na ’aena faa’okaelana manatalae doo ki sui. 4 Tha God ’e ’adomi kolu, ’ana si manga kolu too ’ana ’afitaia ki, fasi kolu ka ’adomia laubo tai imole ki ne da daotoona kwalukaela ’afitaia ki. Kolu tala’ana ’adomilana imole ki, sulia na kwai’adomia nee tha God ’e fala fuakolu. 5 Kolu daotoona ngadalae ’oro ki, ka ilingia bae tha Jisas Kraes ’e ngada. Sui ta, tha God ’e ’adomi kolu ka baita laubo, ka ilingia bae ’e ’adomia tha Jisas Kraes. 6 Kameli meli ngada fasi ka ’adomi kamolu ma ka faamoori kamolu. ’Ana si manga meli ngada, tha God ka ’adomi kameli, ma meli ka ’adomi kamolu laubo, ma meli ka faasuukwai kamolu. ’Urineri kamolu molu kau tala’ana marabibilae si manga molu tatha ’i laona ngadalae ilingia laubo ne meli tatha ’i laona. 7 Ma kameli meli thaitamana si doo neri: Si manga molu tatha ’i laona ngadalae ilingia laubo ne meli tatha ’i laona, tha God naa kau ’adomi kamolu, ilingia laubo ne ’e ’adomi kameli. 8 Doora ki ’ae, kameli meli dooria molu ka thaitamana na ’afitaia baita nee meli daotoona si manga meli too ’i laona bali fera ’i Eisia. ’Ana si manga neri, meli fiia thasa meli kau mae, sulia na ’afitaia neri ’e baita ’asiana. 9 Meli fiia thasa na moorilameli ’i laona molaagali ’e karangi kau sui naa. Ma meli ka thaitamana si doo neri ki ’e fuli fuameli, fasi ka langi meli si fiitoo ’ani kameli ’i tala’ameli, meli ka fiitoona ’ameli tha God ne ’e thaitamana taelana imole mae ki. 10 Tha God ’e ’adomi kameli fasi meli ka si mae ’ana ’afitaia neri ki. Ma nia naa kau ’adomi kameli laubo fasi na maalimae kameli ki ka langi da si tala’ana thaumaelilameli. Kameli meli fiitoona tha God naa kau ’adomi kameli ’urineri, 11 si manga molu ’adomi kameli ’ana foalae kamolu ki. Nia nee, tha God naa kau ’adomi kameli sulia na imole ki da foa ’urineri fuameli si manga ’oro ki. Nia nee, na imole ’oro ki da ka faabaitaa tha God sulia na kwai’adomia nia fuameli. 12 Doora ki ’ae, meli manata ngado sulia meli thaitamana ’okae ’ana abulolameli fuana imole ki sui ’e ’okae ma ka mamana, ma ka tatha ’asiana fuamolu ’i Korint. Na abulolameli ’e ’urineri langi lau sulia na liotooa kera imole ki, sulia na kwai’adomia nia tha God fuameli ’ana. 13 - 14 Na kekedalae nau ki fuamolu, ’e ngwaluda bana ’uria thaitamanalana. Sui ta, ’e langi molu si thaitamana ’okae ’ani kameli ’ana si manga neri. Ma nau ku dooria molu ka thaitamana ’okae ’ani kameli, fasi ’ana fe dani na Aofia tha Jisas kau oli mai, molu ka nonithathala fone kameli, ilingia laubo ne meli nonithathala fone kamolu. 15 Ma sulia nau ku thaitamana ’okae ’ana ne kolu kau nonithathala ’uria rikilakolu kwailiu, nau ku manata ’uria daotoolamolulae ’ana ruana si manga, fasi ku ’adomi kamolu. 16 ’I nao, nau ku fiia thasa si manga ku lea ’uria ’i Masedonia, kwau tatha kau siamolu. Si manga ku oli mai kwau tatha laubo kau siamolu, fasi molu ka ’adomi nau ’ana lealaku ’uria bali fera ’i Jiudea. 17 Sui boroi ’ana ku manata ’uria daolae ’ana roo si manga siamolu ’urineri, ’e langi kwasi daotoomolu naa. Molu si fiia thasa na manatalaku ’e tatala kwailiu ’ana si manga ki sui ’uria ne ’e langi kwasi dao siamolu. Nau ’e langi kwasi ilingia imole ki ’ana molaagali nee da bae ’urii, “Iuka, nau kwau ade ’urineri,” ma burina da ka bae ’ada ’urii, “Nau ’e langi kwa si ade bo ’urineri.” 18 Na baelaku ’e mamana ilingia laubo na baelana tha God ’e mamana 19 sulia manatalaku ’e ilingia laubo na manatana tha Jisas Kraes na Ngwela nia tha God ne kameli tha Saelas fonea tha Timoti meli faatalo ’ania fuamolu. Ma na manatalana tha Jisas ’e langi si tatala kwailiu ’ana si manga ki sui. Sui ta, nia naa ne ngwane ne thaea, “Iuka, nau kwau ade ’urineri,” ma nia ka ade ’urineri banaa. 20 Tha God ’e faafonoa na bae alangaia nia ki sui ’ana tha Jisas Kraes. Ma kolu alafaafia ne tha Kraes ’e faafonoa na bae alangaia nia tha God. ’Urineri kolu ka faabaitaa tha God. 21 Ma tha God ne adea ni kameli ma kamolu laubo, kolu ka too ngado ’ana tha Jisas Kraes. Ma tha God laubo ne fili kolu, 22 ma ka alua na mamalafoa nia ’ani kolu na imole nia ki ’ana Mangoedoo Abu. Nia ’e fala Mangoedoo Abu fuakolu ’uria toolae ’i laona mango kolu, fasi kolu ka thaitamana laubo tha God naa kau fala doo ’okae ’oro ki fuakolu. 23 Aia, tha God ’e thaitamana si baea nau ki ’e mamana ’asiana. ’E langi kwa si lea kau ’i nao siamolu ’i Korint sulia ’e langi kwa si dooria balufilamolu ’uria si doo bae ki molu ilia. 24 ’E langi meli si dooria meli ka ’inito faafi kamolu ’ana suumailamolu ’uria si doo ki ne molu manata mamana ’ania. Sulia meli thaitamana na manata mamanalae kamolu ’ana tha Jisas ’e suukwai naa si manga neri. Sui ta, meli dooria meli kau ’adomi kamolu, fasi molu ka nonithathala.
21 Si manga bae ku dao mai siamolu ’i nao, nau ku balufi kamolu, ma ku faaliodila kamolu. Si doo bae ’e adea ka langi kwa si lea lau kau siamolu, sulia ’e langi kwa si doori faaliodila kamolu lau. 2 Fulingana sa molu ka faanonithathala nau. Ma lelea sa nau ku faaliodila kamolu, ’urineri sa ni ti mone ne ka faanonithathala nau? Sulia talifili kamolu bo ne molu faanonithathala nau. 3 Sulia si doo neri ne adea ka langi kwa si lea kau siamolu, nau ku kekeda baku kau fuamolu ’uria ’olosilana tai imole ki ’ani kamolu. Ma si manga kwau dao kau siamolu, molu si faaliodila nau lau ’ana si doo bae molu ilia. Kamolu na imole ki ne ku dooria molu ka faanonithathala nau. Sulia nau ku thaitamana lelea sa nau ku nonithathala, ’urineri kamolu teefau molu kau nonithathala laubo. 4 Si manga bae ku kekeda kau fuamolu, nau ku kwaimanatai ’asiana, ma ku angi ma na kafo na maaku ka igwa. ’E langi kwasi kekeda kau fuamolu fasi molu ka liodila, nau ku kekeda ’aku kau fasi molu ka thaitamana na liothaua baita nau fuamolu teefau. 5 Aia, fuana ngwane ne ’e abulo ta’ae ma ka thafalia liodilalae nee ’i malutakolu. Nia ’e faaliodila nau, sui ta, nia ’e faaliodila kamolu ka tatha. Na liodilalae nia bae ’e sui naa, sulia 6 ’orolamolu molu fala kwakwaelae fuana ngwane bae, ma ka tala’ana naa. 7 Ma si manga neri, ’e ’okae fasi molu ka manataluke nia naa, ma molu ka bae ni rakealae fuana, ade’ana nia ka kwaimanatai ’asiana, ma ka oli fai buri. 8 Nia nee, nau ku gani kamolu fasi molu ka faatana fuana nee molu liothau mamana ’ani nia. 9 Sulia si doo bae ku kedaa kau ’i nao sulia nau ku dooria ku ilitoomolu, fasi ku daotoona lelea sa molu ka roosulia si baea fifii nau ki teefau. 10 Ma si manga molu manatalukea naa ngwane bae, nau boroi ku manataluke nia laubo. Ma ku manatalukea sui naa ngwane bae ’e ilia si doo ta’ae bae fuaku. Tha Kraes ’e thaitamana ne nau ku manataluke nia naa, fasi kwa ’adomi kamolu ’ana too ofulae ne ’e ’okae. 11 Ma nau ku dooria kwau manataluke nia, ade’ana tha Saetan ka siitatha ’ani kolu. Sulia kolu thaitamana tha Saetan ’e dooria ka fala ’afitaia ki fuakolu. 12 Aia, si manga ku dao ’i Troas ’uria faatalolae ’ana Faarongolae ’Okae sulia tha Jisas Kraes, nau ku daotoona ne na Aofia ne adea ka ngwaluda fuameli fasi meli ka rao ’i seeri. 13 Sui boroi ’ana ka ’urineri, nau ku manata ’a’abo baita ’asiana ’uri kamolu, sulia ’e langi kwa si daotoona doora kolu tha Taetas, ngwane bae ’e ngala si baea suli kamolu. Nia nee adea ku bae alualu fuana imole ki ’i Troas, ma ku lea na ’aku ’uria ’i Masedonia ’uria daotoolana tha Taetas. 14 Aia, nau ku faabaitaa tha God sulia ’e adea kolu ka too ngado fonea tha Kraes. ’Ana si manga ki sui, tha Kraes ’e talai kolu ’i laona leaa nia ’ana siitathalae ’i nao ’ana imole ki sui. Ma tha God ka adea kolu ka faatalo ’ana na faarongolae sulia tha Jisas Kraes ’ana maetoaa ki sui. Ma na faarongolae neri, ’e ilingia ta doo moko ’okae ne lea ’ana kula ki sui. 15 - 16 Si manga kolu faarongo ’urineri sulia tha Jisas Kraes, kolu adea tha God ka nonithathala. Ma kolu ka fala ’ai moko ’okae ’ana Faarongolae ’Okae ka tatha ’i laona maetoaa ki sui. Ma na imole ki ne dau too ’ana mooria firi, na Faarongolae ’Okae ’e ilingia na doo moko ’okae ne ngala mai na mooria firi fuada. Ma na imole ki ne da ngala kwakwaelae faasia tha God, na Faarongolae ’Okae ’e ilingia ta doo moko ta’ae ne thaumaeli kera naa. Aia, na rikilana ’e ilingia ’ana ’e langi ta ngwane si tala’ana naa faatalolae ’ana si Faarongolae nee, lelea sa tha God si ’adomi nia. 17 Ma ’e langi meli si ilingia na imole ’oro ki ne da faarongo ’ana baelana tha God fasi da ka todaa ’ana malefo. Sui ta, kameli meli faatalo ’ameli ’ana Faarongolae ’Okae, sulia tha God ne ’e fili kameli. Kameli meli thaea doo mamana ki ’ana suukwaia nia tha Jisas Kraes. Tha God naa ne thaitamana doo ki sui ne meli ilia.
31 Si manga meli bae sulia raoa kameli ’urineri, ’e langi molu si manata thasa meli naunau. Kameli ’e langi meli si thasi bo ’uria fasi tai imole ’e’ete da ka kekeda suli kameli fasi molu ka thaitamameli na ngwane rao nia ki tha God. Ma kameli ’e langi meli si thasi bo ’uria fasi molu ka kekeda suli kameli fuana tai imole ’e’ete ki, fasi da ka thaitamameli ne kameli na ngwane rao nia ki tha God. Tai imole ’e’ete ki da ade ’urineri, sui ta, ni kameli ne ’e langi. 2 Kamolu naa ne molu ilingia na kekedalae neri, sulia na manata mamanalae kamolu ’e faatana ne kameli na aposol mamana ki. Kameli ma na imole ki sui ne meli thaitamana si doo neri. 3 Ma na manata mamanalae kamolu ne ilingia na kekedalae ne faatana ni kameli na aposol ki, ma tha Jisas Kraes ne kedaa si doo neri, ma ka fala fuameli. Ma nia ’e langi si kedaa ’ana sului doo boboraa ’uria kekedalae, nia ’e kedaa ’ana, ’ana Mangoedoo nia tha God momoori. Ma nia ka si kekeda ’i fafona ta fau ilingia si baea fifii ki ne tha God ’e fala fuana tha Mosis, nia ’e kedaa ’ana ’i laona mango kolu. 4 Kameli meli manata mamana ka tatha ’ana si doo neri ki ’e mamana, sulia meli fiitoona tha God ne ’adomi kameli sulia tha Kraes. 5 ’E langi meli si thaea ne kameli meli tala’ana si raoa neri sulia na thaitamedooa kameli ki. Sui ta, tha God ne faagwaludea fuameli ’uria raolae fuana. 6 Tha God naa ne ’adomi kameli, fasi meli ka tala’ana toodoolae sulia na alaofua faalu nia. Ma na alaofua faalu neri, ’e langi lau na doo ’ana si baea fifii ki ne tha Mosis ’e kedaa, nia na doo nia Mangoedoo Abu ’ana. Sulia si baea fifii ki ’e fala maea, sui ta, na Mangoedoo Abu ’e fala mooria ne totoo firi. 7 Ma ’i nao mai, si manga tha God ’e kedaa si baea fifii ki ’i fafona rebe fau ki, na folaalae nia tha God ’e ngwaasinasina kalikalia tha Mosis. Ma na maana tha Mosis ka ngwaasinasina sulia na folaalae nia tha God, ma ka talafia maana imole ki ’i Jiu, ma ’e ’afitai da ka lio naa ’uria maana tha Mosis, sui boroi ’ana na ngwaasinasinalana maana tha Mosis ka sifo naa faasia ngwaasinasinalae. Aia lelea sa si baea fifii neri ne fala maea ka dao mai ’ana ’initooa, 8 ’urineri na ’initooa ’ana raolana Mangoedoo Abu ’e baita ka tatha. 9 Ma lelea sa na alaofua ’ana baea fifii ki ne ’e fala keketoa ’ana ’initooa, tama na alaofua faalu ne adea kolu ka ’o’olo ’i maana tha God, ’e ’inito ka tatha. 10 Ma si manga neri, na ’initooa ’ana alaofua ’ana baea fifii ki ’e ilingia ta tofa doo bana, sulia na alaofua faalu ne ’e ’inito ka tatha. 11 Na ’initooa ’ana alangaia ’ana baea fifii ki, ’e sifo naa, sui ta, na ’initooa ’ana alaofua faalu ne ’e totoo firi. 12 Ma sulia kolu thaitamana ’okae ’ania na alaofua faalu, nia nee adea ka langi meli si mau ’ana faatalolae fuamolu. 13 ’E langi meli si ilingia tha Mosis bae alua ’abe maku faafia maana, fasi na imole ki ’i Jiu da si rikia na ngwaasinasinalae bae ’i maana ’e sifo naa faasia ngwaasinasinalae. 14 ’I nao mai, na manatalada na imole ki ’i Jiu ’e suukwai. Sui ta, ’e ’afitai da ka thaitamana si doo ne ’e mamana, sulia si manga da teemainia ’ana Kekedalae Abu, tee si doo ’e thuu faafia manatalada, ilingia si ’abe maku bae ’e thuu faafia maana tha Mosis. Ma sa ni ti ’ani kera ne ’e manata mamana ’ana tha Jisas Kraes, tha God kau lafua si doo ne thuu faafia manatalana, fasi nia ka thaitamana lau si doo ne mamana. 15 Ma ’i tari’ina boroi, si manga da teemainia ’ana na baea fifii nia ki tha Mosis, ’e langi da si thaitamana bo. 16 Sui ta, sa ni ti ne abulo ’uria na Aofia, na Aofia kau lafua si doo ne thuu faafia manatalana. 17 Ma na Aofia naa na Mangoedoo Abu. Ma lelea sa ta ngwane ka too naa ’ana Mangoedoo Abu ’i laona moorilana, nia ’e too thakwadoloa naa. 18 Ma ’urineri na maa kolu ’e langi ta si doo si suusia naa, nia ’e faatana folaalana ngwaasinasinalae nia na Aofia. Ma na Mangoedoo nia na Aofia ’e bulasi kolu lelea kolu ka ilingia naa Aofia ’inito kolu.
41 Sulia na kwaimanataia nia tha God fuameli, nia ne ’e talai kameli ’uria ililana si raoa neri ’ana faatalolae. Nia nee, ka langi meli si too naa faasia faatalolae. 2 Ma ka langi meli si ilia na abulolae ta’ae ki ne ’e agwa ma si doo ki ni ’idalae ’ania ki. Ma ka langi meli si suke, ma ka langi meli si talana baelana tha God. Tha God ’e thaitamana ne meli faarongo ’ana si doo mamana ki fasi imole ki sui da ka manata mamana ’ana raoa kameli. 3 Lelea sa na Faarongolae ’Okae ne meli faarongo ’ania ’e ’afitai ’uria thaitamanalana, ’urineri ’e ’afitai fuana ngwane ne ’e langi si ngala mooria ne totoo firi. 4 ’E langi da si manata mamana, sulia tha Saetan ’e thuu faafia na manatalada. Tha Saetan ’e ’inito faafia doo ta’ae ’i laona molaagali nee. Nia ’e lui kera fasi ka langi da si rikia na folaalae ne lea mai faasia na Faarongolae ’Okae sulia na ’initooa nia tha Jisas Kraes ne na nununa tha God. 5 ’E langi meli si faatalo ’ani kameli ’i tala’ameli. Meli faatalo ’ameli ’ana tha Jisas Kraes ne ’e Aofia. Ma meli ka thaea ni kameli na ngwane ni rao nia ki tha Jisas ne ’e falakameli ’uria ’adomilamolu. 6 Si manga tha God ’e thaungana doo ki sui, nia ’e bae ’urii, “Alua folaalae ka tala ’i laona maerodo.” Ma nia ka faafolaalia laubo na manatalakolu, fasi kolu ka thaitamana ’initooa nia tha God ne tha Jisas Kraes ’e faatana. 7 Na folaalae ma na suukwaia ne tala ’i laona nonimeli nee maketho, ’e ilingia ta doo ’okae ’asiana ne tha God ’e alua ’i laona ta kufi doo ne ’e maketho. ’Urineri, imole ki sui da ka rikia ne meli too ’ana suukwaia baita faasia tha God, ’e langi lau doo kameli ’i tala’ameli. 8 Si manga ’oro meli daotoona ’afitaia ki, boroi ’ana ka ’urineri, kameli meli si too faasia na raoa kameli. Ma tai si manga, meli si thaitamana si tae nee kau fuli fuameli, boroi ’ana ka ’urineri, meli fiitoo ’ua ’ana tha God. 9 Ma sui boroi ’ana meli ka too ’ana maalimae ’oro ki, tha God ’e langi si ekwatai kameli. Ma sui boroi ’ana maalimae kameli ki da ka ’ui’ani kameli ’i thaegano, sui meli ka tatae laubo ’ameli. 10 - 11 Iuka, ’e ilingia na maalimae kameli ki da thaumaeli kameli ’ana fe dani ki sui, sulia meli faatalo ’ana tha Jisas. Na nonimeli ’e ilingi nia naa ’ana maelana, fasi na imole ki da ka rikia mooria nia ’ani kameli. 12 Nia nee, da ka doori thaumaeli kameli, sulia na raoa kameli. Ma kamolu ne, molu ngala mooria ne totoo firi, sulia na raoa kameli. 13 Na Kekedalae Abu bae ’e bae ’urii, “Nau ku manata mamana ’ana tha God, nia nee adea ku bae suli nia.” Ma na manata mamanalae kameli ’e ’urineri laubo, sulia meli bae sulia tha God sulia meli manata mamana ’ani nia. 14 Meli thaitamana ne tha God ne taea na Aofia tha Jisas ’uria mooria. Ma ka ilingia laubo ne tha God ’e taea tha Jisas, nia kau tae kameli ’uria mooria, ma ka ngali kameli laubo fone kamolu ’uria toolae fone nia. 15 Meli tatha ’i laona ’afitaia ’oro ki ’urineri, fasi ka ’adomi kamolu. Ma si manga na imole ’oro ki da thaitamana liothaua nia tha God ’uria kwaifaamooria, ma imole ’oro ki da ka faabaita nia. 16 Sulia ’e ’urineri, ’e langi meli si too faasia faatalolae. Sui ta, ’ana fe dani ki sui, na nonimeli kau ngwaro ma ka maketho, ma ’ana fe dani ki sui laubo tha God ka faasuukwaia mangomeli. 17 Ma na ’afitaia ne meli tatha ’i laona si manga neri ki kau sui. Ma sulia meli tatha ’i laona si doo neri ki, tha God kau fala ’initooa baita ne totoo firi fuameli. Ma na ’initooa ne meli kau ngala, ’e baita ka tatha talua na ’afitaia ki ne meli too ’ania ’ana si manga neri. 18 ’E langi meli si manata sulia si doo ki ne meli tala’ana rikilana, meli manata ’ameli sulia si doo ki ne meli si tala’ana rikilana si manga neri. Sulia si doo ki ne meli rikia ’e too si tau bo, sui ta, si doo ki ne meli si rikia ne ’e totoo si sui.
51 Kolu thaitamana si manga na nonikolu ’e mae, tha God ’ana kau fala nonii doo faalu fuakolu ’uria toolae ’i thalo. Sulia si manga neri, na nonikolu ’e ilingia na beu ki ’i laona molaagali, ne dau onggosia laubada. Sui ta, kolu kau too ’i laona nonii doo ki ne tha God ’e thaungana ’i thalo. Ma na noni faalu kolu ’e ilingia beu ne ’e totoo firi. 2 ’Ana si manga neri, kolu dooria ’asiana ekwatailana molaagali nee, fasi tha God ka fala na noni faalu fuakolu ne ’e too ’i thalo. 3 Ma si manga kolu too ’i thalo, kolu kau too ’ana nonii doo faalu. 4 Aia, si manga kolu too ’ua ’i laona molaagali nee, na nonikolu ’e dadaola sulia na ’afitaia ki. Ma kolu si doori ekwatana bo nonii doo kolu neri, sulia kolu dooria ’akolu toolae ’ana noni faalu kolu ki ’i thalo, fasi na nonikolu ne tala’ana kau mae, tha God kau bulasia ’ana nonii doo ne langi si dura, nia kau totoo firi. 5 Aia, tha God ’e kwaimaakwali naa ’ani kolu fasi si doo neri ka fuli ’urineri. Ma nia ka fala laubo na Mangoedoo Abu fasi ka faatana ne tha God kau ili mamana ’ania ’urineri fuakolu. 6 Nia nee adea kolu si mau ’ana ta si doo. Ma kolu ka thaitamana si manga kolu too ’ua ’ana nonikolu ’i laona molaagali, ’e langi kolu si too ’ua fonea na Aofia ’i thalo. 7 Na Aofia ne kolu manata mamana ’ania, nia naa ne talai kolu ’ana toolae ’i laona molaagali nee, ’e langi kolu si lea sulia si doo ki ne kolu rikia ’i laona molaagali. 8 Ma kolu si mau lau ’ana maea. Sulia kolu dooria ’asiana lealae kau faasia nonii doo nee ’i molaagali, fasi kolu ka too ’ana maetoaa mamana kolu ’i thalo fonea na Aofia. 9 Aia, sui boroi ’ana kolu ka too ’ua ’i laona molaagali nee ma langi kolu ka too ’i thalo, ma na kwaidooria kolu ’e baita ka tatha fasi kolu ka faanonithathalaa na Aofia. 10 Ma kolu sui bo, kolu kau takwe ’i naofana tha Jisas Kraes, fasi nia ka tooketaa raoa kolu ki. Ma nia kau fala kwaiaraa ki fuana tee tee imole ’ani kolu ne rao ’okae fuana ’i laona molaagali nee. Ma ’e langi nia ka si fala ta kwaiaraa fuana tee tee imole ne raolana ’e ta’ae ’i laona molaagali nee. 11 Kameli meli faarebaita ’ana Aofia, nia nee meli ka thasi ’uria ’adomilana imole ki fasi da ka manata mamana. Tha God ’e thaitamana ne meli bae mamana, ma nau ku dooria fasi molu ka thaitamana laubo si doo neri. 12 Ma na baelaku ’urineri, ’e langi lau fasi ku bae ’okae suli kameli fuamolu. Sui ta, meli dooria fasi molu ka faarebaita ’ana raoa ’o’olo kameli, fasi molu ka tala’ana olisilana imole ki ne da faarebaita ’ana si doo ne imole ki da rikia bada ’ana maada ma ’e langi lau ’ana si doo ’i laona mangoda. 13 Tai imole ki da thaea thasa meli oengwanea. Aia, da bae ’urineri sulia meli rao suukwai fuana tha God. Ma ka mamana ’asiana, kameli meli si oengwanea, ma nia nee adea meli ka tala’ana rao suukwailae fuamolu. 14 Kameli meli rao suukwai, sulia meli thaitamana tha Jisas Kraes ne liothau ’ani kolu. Kameli meli thaitamana laubo ne talifilia tha Jisas Kraes bo ne mae ’i talana imole ki sui, ma ka ilingia na imole ki sui da mae naa fone nia. 15 Nia ’e mae fasi ka faamooria imole ki sui. Nia ’e mae fasi na imole ki ne da too ’ana mooria faalu, ka langi da si too bada ’uria adelae sulia kwaidooria kera ki ’i tala’ada, na kwaidooria nia tha Jisas Kraes ne ’e mae, ma nia ka tatae laubo ’uria faamoorilada. 16 Nia nee, na manatalae ngwane kolu sulia ta ngwane ’e langi si ilingia lau na manatalae ngwane kera na imole ki ’ana molaagali nee. Ma sui boroi ’ana si manga bae ’e sui ne na manatalae ngwane kolu ki ’e ’urineri sulia kolu manata garo thasa tha Jisas Kraes ta tofa ngwane bana. Sui ta, si manga neri, kolu thaitamana, nia ’e langi lau ta tofa ngwane bana. 17 Ma lelea sa ta ngwane ka manata mamana ’ana tha Jisas Kraes, nia ’e thau naa ’ana ngwane faalu. Si doo kwali ki ’e sui naa, ma si doo faalu ki naa kau dao mai. 18 Tha God ’e ilia si doo neri ki sui bo sulia tha Jisas Kraes. Nia ka bulasi kolu faasia maalimae ki fasi kolu ka thau ’ana imole kwaimani nia ki. Ma nia ka fala si raoa fuameli ’uria talalana imole ki, fasi da ka thau ’ana imole kwaimani nia ki. 19 Si doo neri ne meli faarongo naa ’ania ne tha God ’e fala imole ki sui da ka kwaimani fonea sulia tha Jisas Kraes. Ma nia ka manatalukea na abulota’alae kera ki. Ma ka fala naa si raoa fuameli fasi meli ka faarongo ’ana Faarongolae ’Okae sulia tha God, na ngwane ne bulasia imole ki fasi da ka thau ’ana imole kwaimani nia ki. 20 Nia nee, kameli naa na ngwane ki ’uria thaelana si baea nia ki tha Jisas Kraes. Ma ’ana si manga meli faarongo ’ania, ’e ilingia tha God ’ana ’i tala’ana ne ’e bae. Aia, ma sulia tha Jisas Kraes, kameli meli gani kamolu fasi molu ka alamatana tha God ka bulasi kamolu faasia maea fasi molu ka thau ’ana imole kwaimani nia ki. 21 Sui boroi ’ana tha Jisas Kraes ka langi ta ta’alae ’ani nia, tha God ’e falea ma nia ka ngala naa abulota’alae kolu ki, fasi tha God ka ’olosi kolu ilingia ne nia ’e ’o’olo sulia na manata mamanalae kolu ki ’ani nia.
61 Sulia meli rao kwaimani fonea tha God, ma meli ka gani kamolu ne molu ngala ’okaelae nia tha God, ka langi molu si alamatana ’okaelae nia neri ka tofa lea bana fuamolu. 2 Sulia tha God bae ’e thaea ’i laona Kekedalae Abu ka ’urii, “Si manga ’uria faatailana ade ’okaelae nau fuamolu, nau ku fafurongo ’uria foalae kamolu ki. Ma ’ana fe dani ’uria faamoorilamolu, nau ku ’adomi kamolu.” Aia, nia nee ku bae ’urii fuamolu: Si manga neri naa ne si manga fasi molu ka ngala na ade ’okaelae nia tha God, ma ’i tari’ina naa ne fe dani fasi molu ka ngala na mooria faalu. 3 Kameli meli thaitamana ’e langi meli si ilia bo ta si doo ta’ae, sulia meli si dooria ta imole ka ’ugali kameli ’uria na raoa kameli. 4 Sui ta, meli ade ’okae ’ana si manga ki sui, fasi na abulolameli ka faatana ne ni kameli na ngwane ni rao nia ki tha God. Ma sulia ’e ’urineri, meli ka marabibi fuana imole ki ne da fala na ’afitaia ’oro ki fuameli. 5 Ma da ka nangasi kameli, ma da ka alua kameli ’i laona dele, ma da ka thaungi kameli ’i laona konia baita. Meli ka rao suukwai ’asiana, ma tai si manga ’e langi meli si maleu, ma meli si fanga. 6 Kameli meli faatana thasa kameli naa na ngwane rao nia ki tha God ’ana si doo ’o’olo ki ne meli ilia, ma na thaitamedooa kameli, ma na marabibilae kameli, ma na ade ’okaelameli fuana imole ki. Ma na Mangoedoo Abu fonea na liothaua kameli ne ’e mamana, nia ka faatana laubo. 7 Ma na baelae mamana kameli fonea na suukwaia nia tha God laubo, si doo neri ki ’e faatana laubo ne kameli naa na ngwane ni rao nia ki tha God. Aia, na talo kameli ma na ’ila ni firu kameli, nia naa nee na abulo ’o’ololameli. 8 Tai imole ki da manata baita ’ani kameli, ma tai imole ki ka langi. Ma tai imole ki da faabaita kameli, ma tai imole ki da ka bae tataga suli kameli. Sui boroi ’ana meli ka bae mamana, tai imole ki da thaea thasa kameli na ngwane susuke ki bana. 9 Sui boroi ’ana tai imole ki da si dooria bo thaitamalameli, na imole ’oro ki da thaitamameli. Ma sui boroi ’ana imole ’oro ki da dooria meli ka mae, kameli meli moori ’ua. Ma sui boroi ’ana da ka fala kwakwaelae fuameli, ’e langi da si thaumaeli kameli bo. 10 Ma sui boroi ’ana tai si doo ka faaliodilaa kameli, kameli meli nonithathala bo ’ameli sulia dani. Ma sui boroi ’ana meli ka siofaa ’ana si doo ki ’i laona molaagali, kameli meli thaitamana meli ’adomia imole ’oro, da ka todaa na doo ’oro ki ’i thalo. Ma sui boroi ’ana meli si too ’ana doo ’oro ki ’i laona molaagali, kameli meli too ’ana doo ’okae ki sui ’i thalo. 11 Imole kwaimani ’okae nau ki ’ae ne molu too ’i Korint, meli kekeda naa sulia na ’afitaia kameli ki, ma ’e langi meli si thaufangana bo manatalameli faasi kamolu. 12 ’E langi lau kameli nee meli bokosia na liothaua kameli fuamolu. Ni kamolu ’ana nee molu bokosia na liothaua kamolu faasi kameli. 13 Nau ku bae fuamolu ilingia kamolu na ngwela nau ki. Aia, na liothaua kamolu ka baita fuameli ilingia laubo ne meli liothau ’ani kamolu. 14 Aia, ’e langi molu si ’ado ofu fonea imole ki ne ’e langi da si manata mamana ’ana tha Jisas Kraes. Sulia na ngwane ne ’e too ’o’olo ma na ngwane ne ka si too ’o’olo, daru ’e’ete kwailiu teefau. Ma na folaalae ’e ’afitai ka too ofu fonea maerodo. 15 Tha Jisas Kraes ma tha Saetan, ’e ’afitai daru ka too ’ana tee si manatalae doo. Ma ta ngwane ne ’e manata mamana ’ana tha Jisas Kraes, nia ka si tala’ana ka rao ofu fonea na ngwane ne ’e otenia ’ania tha Jisas Kraes. 16 Ma na Beu Abu tha God, ’e langi si ’okae fuana ta ngwane ka foasia na nunui doo ki laubo ’i seeri. Ma kolu na imole manata mamana ki, kolu ilingia na beu abu nia tha God. Sulia tha God ’e bae ’urii, “Nau kwau too fonea imole nau ki. Ma nau kwau kwairooi ’ani kera. Ma nau naa nee na God kera, ma ni kera naa na imole nau ki.” 17 Ma na Aofia ka bae lau ’urii, “Molu ka too tau ’amolu faasia imole ki ne ’e langi da si manata mamana, ma molu ka lea ’amolu faasida. Ma lelea sa molu si fikoa ta si doo ne ’e sua, ’e ’urineri taari ku noni thathala suli kamolu. 18 Lelea sa molu ka ade ’urineri, nau kwau Maka fuamolu, ma kamolu naa na ngwela nau ki. Nau, na Aofia ne ku suukwai ka tatha, ne ku thaea si baea neri.”
71 Imole kwaimani ’okae nau ki ’ae, si doo neri ki ne tha God ’e alangana fuakolu. Nia nee, kolu ka faafaalu kolu ’i tala’akolu faasia ta’alae ne adea na nonikolu ma na moorilakolu ka sua. Ma kolu ka too ’o’olo teefau, sulia kolu faarebaita ’ana tha God. 2 Aia, meli dooria ’asiana fasi molu ka konitai kameli. Sulia meli si ilia bo ta si doo ta’ae fuana ta imole, ma meli si fala bo fiilae fuana ta imole, ma meli si sukea bo ta imole. 3 Nau kwasi thaea lau si doo neri ki ’uria balufilamolulae. Sulia nau ku thaea sui naa ne meli liothau ’asiana ’ani kamolu. Nia nee, si manga meli moori ’ua ma langi si manga meli ka mae naa, ’e ’afitai ta si doo ne ka lafua liothaua kameli fuamolu. 4 Nau ku fiitoo ma ku nonithathala ’asiana fone kamolu. Nia nee, sui boroi ’ana meli ka tatha ’i laona ’afitaia ’oro ki, nau kwasi mau bo, ma ku nonithathala ’asiana. 5 Ma ’ana si manga meli dao ’i Masedonia, meli si too naa ’ana ta si manga ’uria momololae, sulia na ’afitaia ki ka si sui faasi kameli, ma na maalimae kameli ki da ka olisusuu ’asiana fone kameli, ma meli ka manata ’a’abo ’asiana laubo suli kamolu. 6 Sui ta, tha God, ne tala’ana ka faanonithathalaa imole ki ne da kwaimanatai, nia ne adea meli ka nonithathala ’ana daolana mai tha Taetas. 7 Na daolana mai tha Taetas ’e adea meli ka nonithathala, ma meli ka nonithathala laubo sulia si baea ki ne nia ’e ngala mai, sulia ’e thaea molu fala rakealae fuana. Ma nia ka faarongo kameli ne molu dooria ’asiana fasi ku lea kau ku daotoomolu. Ma nia ka faarongo kameli laubo ’ana ne molu kwaimanatai sulia na ’afitaia bae molu fala fuaku. Ma nia ka faarongo kameli laubo ’ana na liothaua mamana kamolu fuaku. Ma sulia si doo neri ki, nia nee ku nonithathala ’asiana. 8 Sui boroi ’ana molu ka kwaimanatai sulia si kekedalae bae ku fala kau, nau ku manata sulia thasa ’e ’okae fasi ku fala kau. ’I nao, ’ana si manga ku thaitamana molu kwaimanatai, ma ku kwaimanatai sulia nau ku fala kau. Sui ta, na liodilalae kamolu ka si tau bo. 9 Ma si manga neri, nau ku nonithathala. Nau ku nonithathala, ’e langi lau sulia molu kwaimanatai, sulia molu ’olosia naa na abulolamolu sulia ne molu kwaimanatai. Tha God ’e ’adomi kamolu ’ana liodilalae neri. Nia ne adea meli si bae naga kamolu bo ’i laona leta bae. 10 Lelea sa tha God ka faaliodilaa ta ngwane, nia ’e ’adomia ’ana ’uria manataolilae faasia ta’alae, fasi tha God ka faamooria. Ma nia nee si doo ’okae ’asiana, kolu ka nonithathala sulia. Sui ta, lelea sa ta ngwane ka liodila ma ka langi si abulo naa faasia ta’alae nia, liodilalae neri ’e tala’ana ka thaumaelia ngwane. 11 Molu ka rikia fasi si doo ’okae nee na liodilalae ne ’e lea mai faasia tha God ’e ilia fuamolu. Nia ’e adea molu ka dooria ’asiana faatailana ’o’oloa kamolu. Molu rakethasu sulia ku ngatafi kamolu, ma molu ka mau, ma molu ka dooria ’asiana rikilaku, ma molu ka dooria ’asiana ililana si doo ’o’olo ki, ma molu ka dooria ’asiana falelana keketoa fuana ngwane ne abulo ta’ae. ’I laona si doo ki sui ne molu ilia, molu faatana naa ne langi molu si ’ado bo fonea ’ana doo ta’ae ki ne nia ’e ilia. 12 Nia nee si doo ne adea ku fala kau kwai kekedalae bae, ’e langi lau sulia na ngwane ne abulo ta’ae bana, ma ka langi lau sulia na ngwane ne ’e ade ta’ae fuada ki. Nau ku kekeda ’aku kau, fasi molu ka faatana liothaua kamolu fuameli. Ma tha God ’e thaitamana liothaua kamolu ’e mamana. 13 Nia nee adea meli ka nonithathala ’asiana sulia. Ma ’e langi lau si doo neri ki bana ne adea meli ka nonithathala, meli nonithathala laubo sulia tha Taetas ’e nonithathala sulia si doo ’okae ki ne molu ilia ’uria falalana rakealae fuana. 14 Nau ku tango kamolu siana tha Taetas. Ma si manga ’e daotoomolu, molu ka manata mamana ’ana si baea nau ki. Si doo ki sui ne meli bae sulia fuamolu, ’e mamana. Ma ’urineri molu ka faatana naa tangolae kameli suli kamolu ’uria tha Taetas ’e mamana laubo. 15 Nia nee, na liothaua nia fuamolu ka baita ’asiana, sulia ’e manatatoona roosulibaealae ne molu ilia ’ana si doo ki ne ’e thaea fuamolu. Ma nia ’e liothau ’ani kamolu sulia ’e manatatoona si manga molu konitana, ma molu ka faarebaita ’ani nia. 16 Nau ku nonithathala ’asiana sulia ku manata ngado ’ani kamolu.
81 Doora nau ki ’ae, kameli meli dooria fasi molu ka thaitamana si doo ne ’e fuli ’i malutana imole manata mamana ki ’i laona bali fera ’i Masedonia sulia na liothaua nia tha God. 2 Sui boroi ’ana da ka tatha ’i laona ilitooa ma na ’afitaia baita ki, kera da nonithathala ’asiana. Ma sui boroi ’ana da ka siofaa ’asiana, da fala naa doo ’oro ki ’uria ’adomilana imole ki. 3 Nau ku faamamanea da fala ka tala’ana laubo si doo ki ne da fala, ma da fala ka tatha talua naa si doo ki ne tala’ana da ka fala. Ma sulia na kwaidooria kera ’i tala’ada, 4 da ka gani kameli laubo fasi meli ka alamatana da ka ’adomia imole ki ’i Jiudea ne da manata mamana. 5 Kameli meli kwele ’asiana, sulia da ade ’urineri. Totongenao da manata kalia si doo ne tha God ’e dooria fasi da ka ilia. Ma da ka manata kalia laubo ililana si doo ne meli dooria. 6 Ma tha Taetas ne thafalia na raolae ’i Korint ’uria konilana malefo ’uria ’adomilana imole ki ’i Jiudea, kameli meli ka gani nia fasi ka suukwai ’ana ’adomilamolu ’uria faasuilana si raoa ’ana konilana si malefo neri. 7 Nau ku thaitamana na manata mamanalae kamolu ’e baita, ma molu ka thaitamana faatalolae, ma molu ka thaitamedoo, ma molu ka dooria ’asiana ’adomi ’ali’alilae ’ana imole ki, ma na liothaua kamolu fuameli ’e baita ’asiana laubo. Nia nee, meli ka dooria kwai’adomia kamolu fuana imole ki ’i Jiudea ka baita laubo, sulia na liothaua kamolu. 8 Aia, fonea si baea neri, ’e langi kwa si suumai kamolu lau ’uria ililana. Sui ta, nau ku dooria molu ka thaitamana imole manata mamana ki ’i Masedonia, da ’ali’ali ’ana falelana kwai’adomia kera. Ma ku faarongo kamolu naa ’ania, fasi molu ka faatana baitalana liothaua kamolu. 9 Molu thaitamana na liothaua nia na Aofia kolu tha Jisas Kraes ’e baita ’asiana fuakolu. Sui boroi ’ana nia ka ’inito ’asiana mai ’i thalo, nia ’e alua nia ’i tala’ana ’uria siofaalae ’ana lealana mai ka too ’ana nonii ngwane fasi ka ’adomi kolu. Ma sulia na siofaalae nia ne ’e adea kolu ka ’inito. 10 Aia, nau ku thaea thasa ’e ’okae fasi molu ka faasuia na koni malefolae bae molu thafalia mai ’ana fe ngali bae sui kau. Kamolu naa na imole totongenao ki ne molu koni malefo ’uria ’adomilana imole ki ’i Jiudea. Ma kamolu laubo na imole totongenao ki ne molu dooria ililana. 11 Nia nee, ’e ’okae fasi molu ka takwe suukwai ’uria faasuilana si raoa neri. ’E ’okae lelea sa na kwaidooria kamolu ’e baita ’uria faasuilana si raoa neri, ka ilingia laubo si manga bae molu thafali ’ania. Ma molu ka fala bamolu ta fita si malefo ne molu tala’ana konilana ’ana si manga neri. 12 Sulia lelea sa na kwaidoorilae kamolu ’e baita ’uria falelana kwai’adomia, tha God ’e nonithathala sulia si doo neri. Sulia nia ka si dooria molu ka fala si doo ki ne ’e langi molu si too ’ania, si doo neri ki ’ana ne molu tala’ana falelana. 13 - 14 Na manatalaku ’e langi si dooria fasi molu ka too ’ana ’afitaia sulia molu ’adomia imole ki ne da too naa ’ana ’afitaia ki. Sui ta, ’e ’okae ’asiana fasi molu ka ’adomia imole siofaa ki, sulia molu too naa ’ana si doo ’oro ki si manga neri. Ma si manga ne ’e nii ’ua kau, lelea sa molu ka too ’ana ’afitaia, ma da ka too ’ana doo ’oro ki, da ka ’adomi kamolu laubo. Lelea sa molu ade ’urineri, na kwaidooria kera imole ki sui ka fono. 15 Sulia na Kekedalae Abu bae ’e thaea, “Na ngwane ne konia doo ’oro, ’e langi si too bo ’ana doo ’oro talua si doo ki ne nia ’e thasi ’uria. Ma na ngwane ne konia bana ange si doo, ’e langi si oli kukuru bo ’ana ta si doo.” 16 Kameli meli tangoa ’asiana tha God sulia ’e fala kwaidooria baita fuana tha Taetas fasi nia ka ’adomi kamolu, ilingia laubo na kwaidooria kameli ’uria ’adomilamolu. 17 Ma si manga meli gani nia fasi ka ’adomi kamolu, nia ka nonithathala ’asiana ’uria ililana, sulia ’e dooria ’asiana ’adomilamolu teefau. Ma sulia na kwaidooria nia, nia ka manata ’uria olilae lau kau siamolu. 18 Kameli meli fala kau tee ngwane ’ana doora kolu ki fone nia. Nia na ngwane ne imole manata mamana ki sui da manata baita ’asiana ’ani nia sulia ’e rao suukwai ’ana faatalolae ’ana Faarongolae ’Okae. 19 Ma na imole manata mamana ki da filia fasi ka lea fone kameli si manga meli lea ’uria konilana malefo fuana imole manata mamana ki ’i Jiudea. Na imole ’oro ki da faabaitaa na Aofia sulia si raoa neri. Ma na raoa neri ki naa kau faatana laubo ne meli dooria ’asiana ’adomilana imole manata mamana ki ne da siofaa. 20 Kameli meli lio ’okae ’asiana sulia si malefo neri, ade’ana ta ngwane ka bae naga kameli faafia. 21 Sulia meli dooria fasi meli ka ilia si doo ne ’e ’o’olo ’i maana tha God ma ’i maana imole ki sui laubo. 22 Nia nee adea meli ka fala lau kau tee doora ’akolu laubo fonea tha Taetas. Si manga ’oro ki, ngwane neri ’e faatana fuameli ne ’e dooria ’asiana kwai’adomilae. Ma si manga neri, nia ’e fiitoomolu, ma nia nee adea nia ka dooria ’asiana ’adomilamolu. 23 Ma tha Taetas, naa na ngwane ne rao fone nau ’uria ’adomilamolu. Ma na roo doorakolu ki ne daru lea kau fonea, na ofulada na imole manata mamana ki ne da fili keerua fasi daru ka lea ’i talada, ma na raoa keerua naa kau faa’initooa tha Jisas Kraes. 24 ’E ’okae fasi molu ka faatana liothaua kamolu fuada, fasi na imole manata mamana ki sui, da ka rikia ma da ka faamamanea na tangolae mamana kameli fuamolu.
91 Aia, ’e langi ka si tala’ana bo kwau kekeda kau fuamolu sulia na kwai’adomia ne kolu kau fala kau fuana imole manata mamana ki ’i Jiudea ne da siofaa, sulia nau ku thaitamana ne molu thafalia naa ofulana malefo fuada. 2 Nau ku thaitamana ne molu dooria ’asiana fasi molu ka kwai’adomi. Ma nau ku faabaita kamolu ’uria imole ki ’i Masedonia, nau ku ’urii, “Na doora kolu ki ’i laona bali fera ’i Gris, ’ana thafalilana mai fe ngali bae sui kau, da kwaimaakwali ’uria falelana si malefo ’uria kwai’adomia.” Ma ’ana si manga na imole ki ’i Masedonia da rongoa si doo neri, na ’orolada laubo da ka dooria na kwai’adomilae. 3 Aia, nau ku faabaita kamolu ’uria imole ki ’i Masedonia ne molu kwaimaakwali naa ’uria ofulana malefo. ’Urineri, si manga neri, nau kwa fi fala kau na doorakolu bae ki ’i siamolu, fasi da ka ’adomi kamolu ’uria faasuilana ofulana si malefo neri, ade’ana ku tofa tango kamolu baku ’uria si raoa neri. 4 Ma lelea sa ’e langi molu si kwaimaakwali, ma lelea sa tai imole manata mamana ki ’i Masedonia da ka lea mai fone nau si manga ku lea kau siamolu, ma da ka rikia ne ’e langi molu si kwaimaakwali ’ana malefo kamolu, meli kau ’ida sulia na fiitooa kameli ’ani kamolu. Ma kamolu boroi molu kau ’ida ’asiana laubo. 5 Nia nee, nau ku thaea thasa ’e ’okae fasi ku fala na kau na dooraku neri ki fasi da ka lea kau siamolu ’i nao, fasi da ka ’adomi kamolu ’uria kwaimaakwalilae ’ana si malefo bae molu alangana. ’Urineri, na falelae kamolu ka too maasia si manga ku lea kau. Ma na imole ki sui da ka thaitamana ne molu fala si malefo neri sulia na kwaidoorilae kamolu ’i tala’amolu, ma ’e langi lau sulia ta ngwane ne ’e suumai kamolu ’uria falelana. 6 Aia, ’e langi molu si manataburo ’ana si omelangwane bae ’e ’urii: Lelea sa kolu fasia ange si mingge doo, ange si doo laubo ne kolu kau konia. Ma lelea sa kolu ka fasia doo ’oro, doo ’oro ki laubo ne kolu kau konia. 7 Nia nee, imole ki sui da ka fala si doo ne da thaitamana ’e ’okae. Ma ’e langi si ’okae fasi ta ngwane ka fala si doo ne nia boroi si dooria bo falelana. Ma ’e langi si ’okae fasi ta imole ka fala sulia nia ’e fiia thasa da suumana bada fuana. Sulia tha God ’e nonithathala sulia ngwane ne ’e nonithathala ’uria falelae. 8 Ma tha God ’e tala’ana falelana doo ’oro ki fuamolu talua si doo ne molu ’atongia, fasi si manga ki sui molu kau too ’ana doo ki sui ne molu ’atongia, ma molu ka too ’ana doo ’oro ki lau ’uria ’adomilana lau tai imole. 9 Sulia na Kekedalae Abu bae ’e thaea ka ’urii, “Sulia da fala baita ’asiana fuana imole siofaa ki, nia nee tha God si manataburo ’ana kwai’adomia kera ki.” 10 Ma tha God ne ’e fala mingge doo ki fuana ngwane ne ’e fasi doo, ma nia ka alua laubo fanga ’oro. Ma ka ’urineri laubo, tha God naa kau fala doo ki fuamolu, fasi molu ka fala tai si doo fuana imole ki ne da ’atongia. Ma kamolu naa molu kau too ’ana doo ’okae ’oro ki, ilingia na ngwane ne ’e fasia mingge doo ki, nia naa kau konia fanga ’oro. 11 Sulia si manga ki sui, tha God ’e falea molu ka too ’ana doo ki ne tala’ana ’adomilana imole ki, fasi da ka faabaitaa tha God ’uria kwai’adomia ne molu kau fala ma kera naa dau ngala faasi kameli. 12 Na doo ne molu fala, nia naa kau ’adomia imole nia ki tha God, ma nia naa ne adea imole ’oro ki laubo da ka faabaitaa tha God. 13 Kamolu naa molu kau faa’initooa tha God ’ana falelae baita kamolu ki. Na falelae baita kamolu ki fuada naa kau faatana ne molu roosulia na Faarongolae ’Okae nia tha Kraes. 14 Ma da ka foa fuamolu ’ana liothaua sulia na liothaua nia tha God ne ’e faatana fuada ’ani kamolu. 15 Aia, kolu ka tangoa tha God ’uria Ngwela nia. Sulia nia naa na falelae ne ’e ’okae ka tatha ne tha God ’e fala fuakolu. Ma ’e langi ta si baea si tala’ana naa ’inifitalana si falelae neri.
101 Aia, nau tha Pol, ku gani kamolu ’uria tee si doo. Nau ku gani kamolu ’ana bibirangaa ’ana enoenoa ilingia laubo bibirangaa nia tha Jisas Kraes, sui boroi ’ana tai imole ki ’ani kamolu da ka thaea thasa nau ku mau ma ku enoeno si manga ku too fone kamolu, sui ta, na baelaku ’e suukwai si manga ku too tau kau faasia kamolu ma ku kekeda kau. 2 Nau ku gani kamolu, molu ka ’olosia abulolamolu, fasi na baelaku fuamolu ’e langi ka si suukwai si manga ku dao kau siamolu. Sulia ku thaitamana nau ku tala’ana susualalae fuana ngwane ki ne da thaea thasa meli lea bameli sulia na bibirangaa ta’ae ’i laona molaagali. 3 ’E mamana kolu too ’ua ’i laona molaagali. Sui ta, si manga meli firu fonea maalimae kameli ki, meli si firu ’ana bibirangaa ta’ae ki ’i laona molaagali. 4 Sulia na raunga ki ne meli firu ’ania ’e langi lau doo ki ’i molaagali. Na raunga kameli ki ’e lea ’ana mai faasia tha God ne fala suukwaia fuameli fasi meli ka faafunuia suukwai kera maalimae kameli ki. Kameli meli tala’ana siitathalae ’ana manatalae susuke ki, 5 ma meli ka tala’ana ogosilana toodoolae susuke ne ngwane nauni baita ki da alua ’uria suusilana imole ki fasi da si thaitamana tha God. Ma meli ka thaitamana siitathalae ’ana manatalae garo kera imole ki, ma meli ka suusi kera fasi da ka roosulia baelana tha Jisas Kraes. 6 Ma si manga molu faatana ne molu roosulia baelameli, meli ka kwaimaakwali naa ’uria falelana kwakwaelae fuana sa ni ti ’amolu ne ’e langi si roosulia. 7 Fulingana sa molu ka thaitamana si doo ki ne ’e fuli ’i malutamolu. Ta tee ngwane ’amolu ’e manata ’ana thasa nia na ngwane rao nia tha Jisas Kraes, ’e ’okae fasi nia ka thaitamana laubo ne kameli na ngwane rao mamana nia ki tha Jisas Kraes. 8 Sulia na Aofia ’e fala mamanaa fuameli ’uria talailamolu. Ma nia ka talai kameli ’uria ’adomilamolu, ma ’e langi lau ’uria nagalamolu. Nau ku bae rara’a sulia na suukwaia ne na Aofia ’e fala fuameli. Sui boroi ’ana ka ’urineri, nau kwasi ’ida bo. 9 ’E langi kwasi dooria molu ka manata thasa nau ku faamau kamolu ’ana kekedalae ki ne ku ilia fuamolu, 10 sulia tai imole ki da bae ’urii, “Na kekedalae nia ki tha Pol ’e suukwai. Sui ta, si manga ’e too fone kolu, nia ’e mau ma ka langi si thaitamana bo baelae.” 11 Aia, na ngwane ne thaea si doo neri, ’e ’okae fasi nia ka thaitamana si tae ne meli thaea si manga meli kekeda, ’e tala’ana naa si doo ki ne meli kau ilia si manga meli kau too fone kamolu. 12 ’E langi meli si faabobolangai kameli fonea ngwane rao bae ki da thaea da ’inito ’asiana. Ma da ka talatango kera ’ana si doo ki ne ’e langi si tala’ada! 13 Ma kameli nee, ’e langi meli si talatango kameli ’ana ta suukwaia ne ’e langi meli si too bo ’ania. Sui ta, kameli meli tango kameli sulia na raoa ne tha God ’e falakameli ’uria ililana, ma kamolu ne tai ngwane laubo ’ana raoa neri. 14 ’E langi meli si garo si manga meli thaea ne kameli meli too ’ana suukwaia faafi kamolu, sulia kameli na ngwane totongenao ki ne meli lea kau siamolu fonea na Faarongolae ’Okae nia tha Jisas Kraes. 15 ’E langi meli si thaea thasa kameli meli too ’ana suukwaia faafia na raoa ne tai imole ’e’ete ki da ilia ’i laona maetoaa ki ne tha God ’e langi ka si talai kameli ’uria. Ma kamolu tai imole ki ne tha God ’e falakameli kau siamolu, meli dooria na manata mamanalae kamolu ka baita ma ka suukwai. Ma meli ka dooria laubo ililana si raoa ne ’e baita ka tatha fone kamolu. 16 Ma ’i burina ne meli rao laubo fone kamolu, meli ka daraninia maetoaa ki kali kamolu ’uria faatalolae ’ana Faarongolae ’Okae. Ma ’e langi meli si dooria meli ka thaea thasa meli too ’ana suukwaia faafia raoa ne tai imole ’e’ete ki da ilia ’ana maetoaa ki ne tha God ’e arasi kera ’uria. 17 Sulia na Kekedalae Abu bae ’e thaea, “Lelea sa ta ngwane ’e dooria ka talatango nia ’i tala’ana, nia ka tangoa bana si doo ne tha God ’e ilia.” 18 Ma na ngwane ne ’e talatango nia, ka si too bana ’initooa. Ma na ngwane ai ne tha God ’e ala ’ana faafia, nia nee na ngwane ’inito mamana.
111 Sui boroi ’ana ku manata thasa ’e langi si tala’ana fasi ta ngwane ka bae suli nia ’i tala’ana, nau ku dooria molu ka marabibi fasi fone nau, si manga ku bae fasi suli nau ’i tala’aku. 2 Nau ku manata ’a’abo suli kamolu, ilingia laubo ne tha God ’e manata ’a’abo suli kamolu. Sulia molu ilingia ta keni thaarii bae ’e lalau ’ua ne ku alu faafia maasia daolana mai tha Jisas Kraes. Aia, na thaarii ne da alu faafia ’uria ’afelae, nia ka too lalau mamana. 3 Nau ku manata ’a’abo suli kamolu, ade’ana molu ka manata mamana ’ana toodoolae nia ta ngwane, ma na liothaua kamolu fuana tha Jisas Kraes ka tagalo, ilingia bae ni Eve ’e manata mamana ’ana sukelae nia na loi bae. 4 Nau ku manata ’a’abo suli kamolu, ade’ana ’urineri ’ali’ali molu ka manata mamana ’ana ta toodoolae ne ’e’ete faasia na toodoolae kameli. Sulia lelea sa ta ngwane ka lea kau siamolu, ma nia ka faarongo ’ana faarongolae ’e’ete sulia tha Jisas, molu ka fi manata mamana bamolu ’ani nia. Ma molu ka nonimaabe ’uria ngalilana ta anoedoo ne ’e’ete faasia na Mangoedoo Abu ne molu ngala naa si manga meli faarongo kamolu ’ania. 5 Aia, ma na imole ki ne da lea kau siamolu, ma da thaea thasa kera na aposol baita ki, nau kwasi manata bo thasa da baita ka talu nau. 6 Sui boroi ’ana ’e langi kwa si thaitamana baelae ’okae, nau ku thaitamana doo ’oro ki ’ana Faarongolae ’Okae. Molu thaitamana si doo neri, sulia meli faamanatai kamolu ’ania si manga ’oro ki. 7 Si manga ku faarongo ’ana Faarongolae ’Okae nia tha God fuamolu, ’e langi kwa si gani kamolu ’uria ta folilae, ma ta tee mingge malefo boroi ka langi bo. Ma ’ana si manga ku too siamolu, nau ku faafaekwa nau ’i tala’aku fasi na imole ki da ka faabaita kamolu. ’E ’urifita, molu fiia thasa nau ku ade garo neri? 8 Si manga ku toodoo fuamolu, tai imole ki ne da manata mamana ’i laona maetoaa ’e’ete ki, da foli nau. Nia nee, ku ngala si doo ki faasida, fasi ku ’adomi kamolu. 9 Ma si manga ku too fone kamolu, lelea sa ku dooria ta si malefo, ’e langi kwa si gani kamolu bo ’uria. Ma na doora ki ne da lea mai faasia ’i Masedonia ne da fala si doo ki ne ku dooria. ’E langi kwa si gani kamolu ’uria ta si doo, ma ka langi kwa si gani lau. 10 Ma ku bae naunau sulia kwasi gani kamolu bo ’uria ta si doo. Ma si doo neri, ’e ’afitai ka tatala ’ana ta si manga, sulia kwasi ngala ta si malefo faasia ta imole ’i laona fera lalau ’i Gris. Si doo neri ’e mamana ilingia laubo na baelana tha Jisas Kraes ’e mamana. 11 Alamia molu manata garo bamolu thasa kwasi liothau bo ’ani kamolu sulia kwasi ngala bo ta si malefo faasi kamolu. Sui ta, tha God ’e thaitamana ne ku liothau ’asiana ’ani kamolu. 12 Nau kwau ililado baku ’ana si bibirangaa neri, fasi na imole ki ne da thaea thasa kera na aposol ki, ka langi da si tala’ana thaelana si raoa kera ne ’e ’okae ka ilingia si raoa kameli. 13 Da thaea thasa kera na aposol ki, sui ta, kera langi lau na aposol mamana nia ki tha Jisas Kraes. Da suke kamolu ’ana raoa kera ki, fasi molu ka manata thasa kera naa na aposol ki. 14 Ma ’e langi kwasi kwele bo ’ana si doo neri, sulia tha Saetan boroi, ’e tala’ana ka tatala fasi ka ilingia ta enselo ’ana folaalae. 15 Nia nee, ka langi kolu si kwele lelea sa na ngwane ni rao nia ki tha Saetan laubo, da ka lio ilingia ngwane ni rao mamana nia ki tha God. Kera dau ngala naa kwakwaelae baita ne ’e tala’ada sulia na abulota’alae kera ki. 16 - 17 Sui boroi ’ana kwasi dooria bo bae naunaulae, si manga neri nau kwau bae naunau suli nau ’i tala’aku. Si manga ku bae suli nau ’i tala’aku ’urineri, tai imole ki ’ani kamolu da manata ’ada thasa ku bae ilingia ta ngwane oengwanea, ma nau kwa si bae bo sulia si doo ne na Aofia ’e thaea. Sui boroi ’ana molu ka manata ’urineri, molu fafurongo fasi ’uria si doo nee ku thaea. 18 ’I burina si manga tai imole ki da bae naunau suli kera ’i talada, molu kau roo laubo suli kera. ’Urineri kamolu teefau molu fafurongoa fasi ’uria si doo nee ku thaea fuamolu suli nau ’i tala’aku. 19 Ma molu ka manata thasa molu thaitamedoo ’asiana, sui ta, molu nonimaabe ’asiana ’uria rongolana imole ki ne baelada ’e oengwanea. 20 Molu ka alamatai kera bamolu fasi da ka baita faafi kamolu, ma da ka kaubarea si doo kamolu ki, ma da ka suke kamolu, ma da ka talatango kera ’i tala’ada, ma da ka faa’idaa kamolu bada ’ana faamaabobokolamolu. 21 Kameli ’e langi meli si ade ’urineri ’ani kamolu. Ma ’urifita nee molu ka manata thasa meli garo, sulia meli si ade ’urineri bo fuamolu? Na imole ki ne da manata thasa kera tai aposol baita ki, kera da bae naunau suli kera ’i tala’ada. Ma nau ku bae naunau laubo ka ilingi kera, sui boroi ’ana ka langi si ’okae ’uria baelae ’urineri. 22 Aia, kera da thaea thasa kera na imole ki ’i Jiu, ma nau ta ngwane ’i Jiu laubo nee. Ma da ka thaea thasa kera na imole ’i Israel, ma nau ta ngwane ’i Israel laubo nee. Ma da ka thaea thasa kera na imole ki ’ana kwalafaa tha Abraham, ma nau ta ngwane ’ana kwalafaa tha Abraham laubo nee. 23 (Nau kwa si dooria bo bae faa’okaelaku ’i tala’aku ’urineri.) Kera da thaea thasa kera naa na ngwane rao nia ki tha Jisas Kraes. Sui ta, nau naa na ngwane rao ’okae nia tha Jisas Kraes ka talu kera. Sulia nau ku rao suukwai ka talu kera, ma na imole ki da ka alu nau ’i laona dele ’ana si manga ’oro ka talu kera, ma imole ki da ka nangasi nau ’ana si manga ’oro ka talu kera, ma ’e karangi ku mae ’ana si manga ’oro ka talu kera. 24 Lima si manga na ngwane baita ki ’i Jiu da nangasi nau ’ana olu akwala ma sikwa fe kwaelae. 25 Ma olu si manga na ngwane baita ki ’i Rom da ka nangasi nau ’ana si nanange ’ai. Ma ’ana tee si manga, tai ngwane ki da thasi ’uria ’uimaelilaku ’ana fau. Ma olu si manga na baru ne ku lea ’ana ka kuruu naa fone nau, ma ’ana tee si manga ku too ’i laona asi sulia tee fe rodo ma tee fe thato. 26 Ma ’ana leaa ’oro nau ki, ku daotoona ’afitaia ’oro ki ’ana igwa, ma na ngwane bebeli ki, ma na imole ki ’i Jiu, ma na imole maadiu ki da ka maalimae ’ani nau. Ma ku daotoona ’afitaia ’i laona maetoaa baita ki, ma ’i laona bali fera kwasi, ma ’i laona asi laubo. Ma tai si manga na imole susuke ki da ka thaea thasa kera na imole manata mamana ki ’ana tha Jisas, da fala laubo ’afitaia baita ki fuaku. 27 Nau ku rao suukwai ’asiana, ma tai fe rodo ’e langi kwasi maleu. Ma tai si manga kwasi too ’ana ta si fanga ma ta si kafo. Ma tai si manga ku gwagwari sulia ku olikukuru ’asiana ’ana maku. 28 ’E langi lau si doo neri ki bana, sulia ’ana fe dani ki sui bo ku too ’ana ’afitaia sulia ku manata ’a’abo sulia ofulada na imole manata mamana ki sui. 29 Ma lelea sa ta ngwane ne ’e manata mamana ma ka daotoona ’afitaia sulia ilitooa baita, nau ku too ’ana ’afitaia laubo, sulia ku manata ’a’abo suli nia. Ma lelea sa ta ngwane ka ilia ta si doo ta’ae, nau ku kwaimanatai ’asiana. 30 Sulia da suumai nau ku bae naunau suli nau ’i tala’aku, nau ku bae sulia si doo ki ne faatana nau ta ngwane ku maketho. 31 Tha God na Maka nia na Aofia kolu tha Jisas, ’e thaitamana si doo ne ku thaea ’e mamana. Nau ku dooria imole ki sui da ka faabaitaa tha God ka totoo firi. 32 Si manga ku too ’i Damaskas, na ngwane ne tha Aretas na ngwane ’inito ’e filia ’uria ’initolae faafia maetoaa neri, ’e fala ngwane ’ana ngwane ni omea ki da ka folo ’usia na maethakaa ki ’ana maetoaa neri, fasi da ka dau nau ’ana si manga ku kotho ’i maa. 33 Sui ta, tai ngwane ki da ’adomi nau, ma da ka alu nau ’i laona tee kukudu baita, ma da ka faasifo nau sulia na maethakaa ’ana ’onggu neri ’uria ’i maa, ma ku tafi naa.
121 Kera da suumai nau fasi ku bae naunau suli nau ’i tala’aku, sui ta, na baelae ’urineri ’e langi si faamamanea bo ne nau na aposol. Sui boroi ’ana ka ’urineri, nau ku bae sulia si doo ne na Aofia ’e faatana fuaku. 2 Iuka, na akwala ma fai fe ngali ’e sui naa, ne tha God ’e ngali nau ’uria si kula ne tha God ’e too ’ania ’i thalo. (Aia, nau ku lalafusia, alamia na noniku laubo tomone ne dao ’i seeri, ma langi tha God bana tomone ne faatana si doo neri ki fuaku, sulia talifilia tha God bo ne ’e thaitamana.) 3 - 4 Aia, nau ku thaea lau, nau ku thaitamana bo ne tha God naa ne ngali nau ’uria ’i thalo. (Ma nau kwasi thaitamana lelea sa na noniku ’e dao laubo ’i seeri tomone, ma langi tha God bana ne faatana fuaku, sulia talifilia tha God bo ne ’e thaitamana.) Aia, si manga ku too mai ’i seeri ’i thalo, ku rongoa doo ki ne ’e ’afitai naa ta ngwane ka bae sulia ’ana ta si baea ’i laona molaagali nee. 5 Si fafaataia neri si doo fuakolu fasi kolu ka bae rara’a sulia. Sui ta, nau kwa si ilia si doo neri. Sulia si doo ne ku bae rara’a sulia naa ne si doo ne faatana ne nau na ngwane ku maketho. 6 Ma lelea sa ku dooria talatangolaku, ’e tala’ana ku bae ’urineri sulia na baelaku ’e mamana. Sui ta, ’e langi kwasi talatango nau, sulia ’e langi kwasi dooria imole ki da ka manata thasa nau na ngwane baita talua si doo ki ne da rikia ku ilia, ma si doo ki ne da rongoa ku thaea. 7 Aia, tha God ’e alamatana naa mataia fuaku fasi ka langi kwa si bae rara’a sulia si doo ’okae ’oro ki ne ku rikia ’i thalo. Ma na mataia nee, tha Saetan ne sukua fasi ka faangada nau ma fasi ka langi kwasi naunau. 8 Ma olu si manga ne ku foa, ma ku gania na Aofia fasi ka lafua. 9 Sui ta, nia ’e olisi nau ka bae ’urii, “Na ’okaelae nau talitoona bana nee ’o ’atongia. Sulia lelea sa ’oko maketho, na suukwaia nau ’uria ’adomilamolu naa kau baita ka tatha.” Sulia si doo neri, nau ku nonithathala ’asiana, ma ku bae naunau sulia na maketholae nau, fasi na suukwaia nia tha Jisas Kraes ne ka ’adomi nau. 10 Nau ku nonithathala baku ’uria ’afitaia nau ki sulia tha Jisas Kraes. Nau ku nonithathala baku lelea sa da ka bae naga nau, ma langi da ka faangada nau. ’E ’okae bana lelea sa ku too ’ana maketholae, sulia si manga ku maketho, tha Jisas Kraes naa kau faasuukwai nau. 11 Aia, ’e langi ka si tala’ana fasi ku bae naunau, sui ta, kamolu ne molu adea ma ku bae ’urineri. Fulingana molu ka faabaita nau bamolu. Sui boroi ’ana nau na ngwane bana, na imole bae ki da thaea thasa kera na aposol baita ki, ’e langi da si baita bo talu nau. 12 Si manga ku rao ’i malutamolu ’ana marabibilae, tha God ’e ilia si doo ’oro ki ni kwelelae ’ania ’ani nau. Ma si doo neri ki, ’e faatana ne nau na aposol mamana. 13 Si doo ki ne ku ilia fuamolu, ’e ilingia si doo ki ne nau ku ilia fuana ofulada na imole manata mamana ki sui. Tee si doo ne ka si ilingia bo si doo ne ku ilia ’ana maetoaa ’e’ete ki: Nau kwasi gania ta si malefo siamolu ’uria ’adomilaku. Ma molu ka thaea thasa ku ilia doo ta’ae fuamolu ’urineri, sui ta, ’e langi kwa si bae ni kwaimanataia bo fuamolu si manga neri fasi molu ka manataluke nau. 14 ’Ana si manga neri, ku kwaimaakwali naa fasi ku daotoomolu lau ’ana oluna si manga. Ma ’e ilingia laubo ’i nao, ’e langi kwasi gania ta si malefo faasi kamolu. Sulia ’e langi kwa si dooria bo malefo kamolu ki. Si doo ne ku dooria ’aku ne fasi molu ka nonithathala si manga ku dao kau. Nau ku ilingia ta maka fuamolu, sulia ku ’adomi kamolu ’uria manata mamanalae ’ana tha Jisas Kraes. Ma ’e langi ka si tala’ana fasi na ngwela ki da ka fala si malefo fuana maka kera, ma ’e ’okae fasi na maka ka fala si malefo fuana ngwela nia ki. 15 Ma lelea sa ku fala si doo nau ki teefau ma ni nau ’i tala’aku laubo ’uria ’adomilamolu, nau ku nonithathala baku. Ura tae ne na liothaua kamolu fuaku ka faekwa bana, sulia na liothaua nau fuamolu ne ’e baita ka tatha. 16 Aia, molu thaitamana ’e langi kwa si gania ta si malefo faasi kamolu. Sui ta, na maalimae nau ki da bae ’urii, “Tha Pol ’e too ’ana tee manatalae ngwane agwa ’uria sukelamolulae.” 17 Molu ka thaitamana si baea neri ’e langi si mamana. Ma ’e langi kwasi fala kau ngwane ki ’i siamolu ’uria faagulalamolu ’uria malefo. 18 Nau ku gania tha Taetas fasi ka lea kau ’i siamolu, ma ku fala kau tee doora ’akolu lau fone nia. Ma molu thaitamana ’okae ’ania tha Taetas ka si oroi kamolu bo ’uria ta si malefo. Ma molu ka thaitamana tha Taetas fone nau, miri ilia si doo ’o’olo ki ne bobola ma ka ’o’olo teefau. 19 Alamia molu manata thasa meli bae ’urineri ’uria suusilameli ’i tala’ameli. Aia, na manatalaku ’e langi si ’urineri. Sulia tha God ’e thaitamana si doo ki ne meli thaea, ’e lea sulia si doo ki ne tha Jisas Kraes ’e dooria fasi meli ka thaea. Imole kwaimani ’okae nau ki ’ae, si doo ki sui ne meli ilia, meli ilia ’uria ’adomilamolu. 20 Nau ku manata ’a’abo, ade’ana ’urineri si manga ku lea kau, ma ku rikia na abulolamolu ’e ’e’ete faasia si doo ki ne ku dooria. Ma lelea sa ’e ’urineri, nau kwau fala kwakwaelae fuamolu, ma ’e langi molu ka si nonithathala bo sulia. Nau ku manata ’a’abo ade’ana ’urineri tai imole ki ’i see loko da ka olisusuu, ma da ka liota’ae, ma da ka rakethasu, ma da ka manata ta’ae, ma da ka bae ta’ae, ma da ka bae sulia imole ’e’ete ki, ma da ka aburongo, ma na bibirangaa kera ki ka langi si ’o’olo. 21 Ma ku manata ’a’abo ade’ana ’urineri si manga ku lea lau mai, ma tha God ka faa’ida nau ’uri kamolu. Nau kwau angi fuana imole ’oro ki ’ani kamolu, sulia da ilia doo ta’ae ki, ma ’e langi da si abulo naa faasia na kaubarelae kera ki.
131 Aia, nau kwau dao kau siamolu ’ana oluna si manga. Na Kekedalae Abu bae ’e thaea, “’E langi molu si tooketaa ta imole lelea molu ka rongoa bo ta roo ngwane ma langi ta olu ngwane ne da bae mamana sulia si tae ne nia ’e ilia.” 2 ’Ana ruana si manga ku lea kau, ku ngata suukwai fuana tai imole ki ’ani kamolu na abulolada ’e ta’ae. Ma si manga neri, ku ngata suukwai laubo fuada ’i laona kekedalae nee. Ma si manga ku dao kau siamolu, ’e langi ta imole ne ilia ta si doo ta’ae kau tafi faasia na kwakwaelae nau fuana. 3 ’Ana si manga neri, kamolu naa molu kau thaitamai ’okae ’ana tha Jisas Kraes ne fala baelana fuaku fasi ku bae ’ania. Ma si manga ’e ilia ta si doo fuamolu, nia ’e langi si maketho. Sui ta, nia ’e faatana suukwaia baita fuamolu. 4 Sulia tha Jisas Kraes ’e maketho si manga da fotoinia ’i thalofana ’airarafolo, nia ka tatae naa faasia maea ’ana na suukwaia baita nia tha God. Ma kameli meli ka maketho laubo ilingia tha Jisas Kraes, sui ta, kameli naa meli kau too ’ana suukwaia baita nia tha God ’ana tha Jisas Kraes, si manga meli kau dao kau siamolu. 5 ’E ’okae fasi molu ka manata sulia moorilamolu, fasi molu ka thaitamana na abulolamolu ’e tala’ana imole ki ne da fiitoo ’ana tha Jisas Kraes ma laa ’e langi. Molu ka thaitamana ne tha Jisas Kraes bo ne ’e too ’i laona moorilamolu. Ma lelea sa ’e langi nia si too ’i laona moorilamolu, na manata mamanalae kamolu ’e langi si mamana bo. 6 Nau ku dooria fasi molu ka thaitamana na manata mamanalae kameli ’e mamana. 7 Ma meli ka foa fuana tha God fasi molu ka too faasia abulota’alae. Ma ’e langi meli si foa bo ’ameli ’urineri fasi ta ngwane ka manata thasa na raoa kameli ’e ’okae. Meli foa ’urineri fasi molu ka ilia si doo ’o’olo, boroi ’ana tai ngwane ki da ka manata ’ada thasa na raoa kameli na tofa doo bana. 8 Kameli meli ilia bo si doo sulia toodoolae mamana, ma ka langi meli si takwe suusia na toodoolae ne ’e mamana. 9 Kameli meli nonithathala sulia ne meli maketho, lelea sa molu ka suukwai mamana. Ma meli foa fasi molu ka ’olosia abulolamolu teefau. 10 Nia nee adea ku kedaa si doo neri ki si manga ku too tau ’ua kau faasi kamolu. Nau ku ilia si doo neri fasi si manga ku lea kau siamolu, kwasi balufi kamolu ’ana na suukwaia ne na Aofia ’e fala fuaku. Nia ’e fala naa suukwaia neri fuaku fasi ku ’adomi kamolu, ma langi lau ’uria nagalamolu. 11 Aia, doora ki ’ae, si doo neri ki sui banaa ku thaea fuamolu. Molu ka talana bibirangaa kamolu ki, ma molu ka fafurongo ’uria si doo nee ku kedaa kau fuamolu, ma molu ka too ’ana tee si manatalae ngwane, ma molu ka too ’ana enoenoa fone kamolu kwailiu. Ma tha God ne liothau ’ani kolu ma ka fala enoenoa, nia kau too fone kamolu. 12 Aia, molu ka faatana naa liothaua kamolu fuamolu kwailiu ’ana si manga molu riki kamolu kwailiu. Na imole nia ki tha God teefau ’i see, da fala kau si baea ’okae kera ki fuamolu. 13 Ma nau ku foa fasi na Aofia kolu tha Jisas Kraes ka ade ’okae fuamolu, ma tha God ne ’e liothau ’ani kamolu, ma na Mangoedoo Abu ka too fone kamolu teefau.