1 Timoti

¹ Nau tha Pol, na aposol nia tha Jisas Kraes. Tha God ne ’e faamoori kolu, ma tha Jisas Kraes na ngwane ne kolu kwaimaakwali maasia, daru bae fifii fuaku fasi ku thau ’ana ta aposol. ² Nau ku kekeda kau fuamu tha Timoti. ’Oe ’o ilingia naa ngwela nau, sulia ’o faamamanea baelaku sulia tha Kraes. Nau ku foa fasi tha God na Maka ma tha Jisas Kraes na Aofia kolu ka fala ’okaelae, ma na kwaimanataia, ma na enoenoa fuamu. ³ - ⁴ Nau ku dooria ’oko too fasi ’amu ’i Efesas, ilingia bae ku odu ’oe ’ana si manga ku lea ’uria ’i Masedonia. Sulia tai ngwane ki ’i Efesas da toodoo ’ana toodoolae susuke ki. Da toodoo ’ana ununua susuke ki ne da faangadoa ’ana talisibaraa sulia kokoo abu kera ki. Ma nau ku dooria ’oko luida. Si manga da toodoo sulia si doo neri ki, na imole ki da olisusuu sulia, ma langi da si lea sulia na manatalae doo nia tha God ’uria faamoorilana imole ki. Si manga kolu manata mamana ’ana tha Kraes, kolu tala’ana thaitamanalana na manatalae doo nia tha God. ⁵ ’Oko bae fifii fuada fasi ka langi da si olisusuu ’urineri, fasi kamolu imole manata mamana ki molu ka liothau ’ani kamolu kwailiu. Lelea sa molu ka liothau ’urineri, molu kau too ’ana mooria ne folaa, ma na manatalae ngwane ne ’e folaa, ma na manata mamanalae ngwane ne ’e mamana. ⁶ Sui ta, tai imole ki da abulo ’e’ete na ’ada faasia si doo neri ki, ma da ka lea na ’ada sulia na olisusuulae oengwanea ki. ⁷ Kera da dooria fasi da ka takwe ilingia na ngwane toodoo ki ’ana bibirangaa nia ki tha Mosis. Sui ta, ’e langi da si thaitamana bo na bibirangaa nia ki tha Mosis, sui boroi ’ana da ka bae suukwai sulia. ⁸ Ma kolu thaitamana sui na bibirangaa ki ’e ’okae, lelea sa na imole ki da ade ’o’olo sulia. ⁹ Ma kolu ka thaitamana laubo ne tha God ’e langi si thaungana bibirangaa ki ’uria ’olosilana imole ’okae ki. Nia ’e thaungana ’ana ’uria ’olosilana imole ki ne da ilia doo ta’ae ki, ma na imole ki ne da aburongo, ma na imole ki ne langi da si faabaitaa tha God, ma na imole ki ne da abulo ta’ae, ma na imole ki ne da ekwatainia tha God ma doo abu ki. Ma ’e thaungana na bibirangaa ki fuana ngwane ki ne da thaungwane, ma na ngwane ki ne da thaumaelia na maka kera ki ma gaa kera ki, ¹⁰ ma na ngwane kaubare ki ma na ngwane ki ne da kaubarea ngwane ki, ma na keni ki ne da kaubarea keni ki, ma na ngwane ki ne da belia ngwane ki ma da usi ’anida ilingia tai ngwane tofarao ki, ma na ngwane susuke ki, ma ngwane ki ne da ’oia bae alangaia kera ki, ma na ngwane ki ne da ilia tai si doo ne ’e’ete faasia na toodoolae mamana sulia na Faarongolae ’Okae. ¹¹ Tha God ne ’e ’inito ’asiana ma ka ’okae ’asiana, ’e alua na Faarongolae ’Okae neri ’i ’abaku fasi ku faarongo ’ania. ¹² Nau ku faabaitaa tha Jisas Kraes na Aofia kolu, na ngwane ne ’e fala suukwaia fuaku ’uria ililana si raoa nau. Ma ku faabaitaa laubo sulia ’e fiitooku ma ka fili nau ’uria raolae fuana. Nia ka fili nau, ¹³ boroi ’ana si manga bae ’i nao, nau ku faangada nia ma ku bae naga nia. Ma tha God ’e kwaimanatai fuaku, sulia ’e langi kwasi faamamanea ’ua, ma kwasi thaitamana ’ua si doo ne ku ilia. ¹⁴ Ma na Aofia kolu ’e fala ’okaelae fuaku ka baita ’asiana, ma ka ’adomi nau fasi ku faamamane nia, ma ku liothau laubo ’ani nia. Nia ’e tala’ana ka ade ’urineri fuakolu na imole ki ne kolu too ngado ’ana tha Jisas Kraes. ¹⁵ Ma si baea nee ’e mamana, ma kolu ka manata mamana ’ana bae ’e ’urii, “Tha Jisas Kraes ’e lea mai ’i laona molaagali fasi ka faamooria imole ki na abulolada ’e ta’ae.” Aia, ’i nao mai, nau ku abulo ta’ae ka talu kera teefau. ¹⁶ Sui boroi ’ana nau ku abulo ta’ae ’urineri, tha God ’e kwaimanatai fuaku, ma ’e langi nia si kwae nau. Nia ’e ade ’urineri fasi ka faatana na marabibia nia tha Jisas Kraes fuaku, na ngwane ne ku ta’ae ’asiana. Nia ’e ade ’urineri fasi imole ki da ka thaitamana ne nia ’e manatalukea bana sa ni ti ne ka manata mamana ’ani nia, ka ilingia laubo ne nia ’e manataluke nau. Ma tha God ka fala mooria firi fuada. ¹⁷ Ma nau ku dooria kolu ka faabaitaa ma kolu ka faa’initooa tha God ne totoo firi. Tha God naa na ngwane ’inito ne totoo firi, ma ’e ’afitai ka mae, ma ’e langi kolu si rikia, ma talifili nia bo ne ’e God. Iuka ’e mamana. ¹⁸ Ma ni ’oe, ngwela nau tha Timoti, nau ku bae fuamu sulia si ngataa bae na Mangoedoo Abu ’e bae ’ana na gwaulii ngwane ki da ka thaea suli ’oe ’ana si manga bae ’e sui na mai. ’Oko roosulia si baea neri ki, fasi ’oko firu ’okae, ma ’oko suukwai ’usia na ngwane toodoo susuke ki. ¹⁹ Ma ’oko takwe suukwai ’ana manata mamanalae ’oe ’ana tha Kraes, ma ’oko ilia si doo ki ne ’o thaitamana ’e ’o’olo. Tai imole ki da ekwatai falaburi naa ’ana si doo ki ne da thaitamana ’e ’o’olo, ma ka langi da si manata mamana naa ’ana tha Kraes. ²⁰ Ma tai ngwane ’ada ne tha Haemeneas ma tha Aleksanda. Ma nau ku ekwataidarua naa fuana tha Saetan fasi ka ilia na ’ana ta si doo ’adarua. Nau ku ade ’urineri fasi daru ka thaitamana si doo ne daru ilia ’e garo, ma daru ka too faasia bae garolae sulia tha God.

¹ Si doo nee ne baita, nau ku gani kamolu fasi molu ka foasia tha God, ma molu ka faabaita nia, ma molu ka gani nia ’uria kwai’adomia fuana imole ki sui. ² Ma molu ka foa fuana ngwane ’inito ki, ma ni ti kera ne da too ’ana na ’initooa, fasi kolu teefau kolu ka too ’ana mooria ’ana enoenoa ma na marabibia. ’Urineri kolu thaitamana kolu ka faa’initooa tha God ma ililana doo ’o’olo ki. ³ Na foalae ’urineri ’e ’okae ma ka faanonithathalaa tha God ne faamoori kolu. ⁴ Sulia tha God ’e dooria imole ki sui da ka thaitamana doo mamana ki sulia tha Kraes, ma da ka too ’ana mooria firi. ⁵ Sulia tee God bo ne too, ma tee ngwane bo ne olifana imole ki fuana tha God. Nia nee tha Jisas Kraes. ⁶ Sulia tha Jisas ’e fala naa mooria nia ’i tala’ana fasi ka lafua imole ki sui faasia kwakwaelae. ’Urineri nee, si manga bae tha God ’e filia, nia ’e faatana naa na kwaidooria nia fuana imole ki sui fasi da ka too ’ana mooria firi. ⁷ Nia nee, tha God ka fili nau fasi ku thau ’ana aposol, ma nau ku faarongo, ma ku toodoo ’ana faarongolae mamana sulia tha Jisas Kraes fuana imole ki ne langi lau Jiu. Nau ’e langi kwasi suke. Doo mamana ne ku thaea. ⁸ Nau ku dooria ngwane ki sui ’ana kula ki sui da ka foa. Ma ’ana si manga da uua ’abada ’uria foalae, da ka too ’o’olo ma na moorilada ka folaa, ma ka langi da si rakethasu ma da si olisusuu fonea ta ngwane. ⁹ Nau ku dooria laubo na keni ki da ka ’afi ’o’olo ’ana maku kera ki. Ma ka langi da si ’afi ’ana maku ne ngwane ki da ka bubu tetee ’ani kera. Lelea si manga da kania ifuda, ka langi lau ’ana si doo ki na liulana ’e baita ’asiana ne da laungi ’ania, ma ka langi lau ’ana maku ki ne liulana ’e baita ’asiana ma ka faagaroa manatalana ngwane ki ’uria ta’alae. ¹⁰ Lelea sa na keni ki da ka doori too ’ana mooria ne rikilana ’e ’okae, kera da ka ilia si raoa ’okae ki fasi ka faatana ne da manata mamana ’ana tha God. ¹¹ Na keni ki da ka too enoeno, ma da ka nonieno ’ana si manga da fafurongo ’uria toodoolae ki. ¹² Nau kwasi alamatana keni ki fasi da ka toodoo ma da ka ’inito faafia ngwane ki. ’E tala’ana da ka too enoeno bada. ¹³ Sulia tha Adam ne tha God ’e thaungana ’i nao, sui fatai ni Eve. ¹⁴ Sulia ’e langi lau tha Adam bae tha Saetan ’e sukea, ni Eve ’ana bae ’e faamamanea sukelae nia ki tha Saetan, ma ka ’oia bibirangaa nia ki tha God. ¹⁵ Sui ta, sulia na keni ki ne da thare ngwela, nia nee tha God kau faamoorida lelea sa da manata mamana ’ana tha Kraes, ma da ka liothau, da ka too ’o’olo, ma da ka nonieno.

¹ Si baea bae ’e ’urii ’e mamana, “Lelea sa ta ngwane ’e dooria ka kwaitalai fuana ofulada na imole manata mamana ki, ’urineri na ngwane neri ’e dooria si raoa ’okae ’asiana.” ² Ma na ngwane kwaitalai ’ana ofulada na imole manata mamana ki, na abulolana ka ’o’olo teefau, ma nia ka too ’ana tee ’afe bo ma ka too ngado fonea, ma nia ka lio ’okae suli nia ’i tala’ana, ma ka manata ’o’olo, ma ka ilia si doo ’okae ki. Ma nia ka konitana imole ki ’i beu nia, ma ka tala’ana toodoolae sulia baelana tha God. ³ Nia ka langi si kuu baita lelea na gwauna ka lilinge. Ma nia ka si dooria firulae, nia ka too enoeno ma ka nonieno fuada na imole ki. Ma nia si olisusuu ngwaluda fonea imole ki. Ma nia si anau ’ana malefo. ⁴ Ma nia ka tala’ana ’olosilana ngwela nia ki ma na ’afe nia, ma ka toodoo fuana ngwela nia ki fasi da ka roosulia, ma da ka faare baita ’ani nia. ⁵ Nia nee lelea sa na ngwane langi si thaitamana liolae sulia ngwela nia ki ma ’afe nia, nia ka liosuli ’urifita ’ana imole manata mamana nia ki tha God? ⁶ Na ngwane nee manata mamana ka tau na mai, nia ne tala’ana ka kwaitalai. Na ngwane ne ka fi ruu bo mai laona ofulada na imole manata mamana ki, ade’ana ka faabaita nia bana ’i tala’ana ilingia tha Saetan, ma tha God ka keto nia laubana. ⁷ Nia ta ngwane ne na imole ki ’i thara faasia na siosi da ka faare baita ’ani nia, ma da si thaea ta si doo ta’ae suli nia. ’Urineri taari ka si ’asi nia ’i laona ’aukwai nia tha Saetan. ⁸ Na ngwane kwai’adomi fuada na ofulada na imole manata mamana ki laubo, na abulolana ka ’okae, ma imole ki da ka faarebaita ’ani nia. Nia ka bae mamana. Ma ka langi si kuu baita ’ana kuulae lilinge ki, ma ka langi si anau ’ana malefo. ⁹ Nia si manata ruarua, nia ka manata mamana suukwai bo ’ana faarongolae nia tha God ne ’e faatana fuakolu. ¹⁰ Ma na ngwane ki ne da manata mamana, da ka ilitoona fasi ’i nao, fasi da thaitamana ne nia ’e ’o’olo naa, sui fatai nia ka fi rao. ¹¹ Ma na ’afe nia laubo, na abulolana ka ’okae, ma na imole ki da ka faarebaita ’ani nia. Nia si bae buri ’ana imole ki. Nia ka lio ’okae sulia mooria nia, ma ka tala’ana fasi nia ka ’olosia mooria nia ’i tala’ana, ma ka ’o’olo ’ana doo ki sui. ¹² Ma na ngwane kwai’adomi fuada na imole manata mamana ki, nia ka too ’ana tee ’afe bo, ma ka too mamana fonea. Ma nia ka tala’ana ’olosilana ’afe nia ma na ngwela nia ki. ¹³ Ma ni ti ne ’e rao ’okae laona siosi, ’e ’o’olo ma ka ’okae, fasi nia ka bae rara’a sulia manata mamanalae nia ’ana tha Jisas Kraes. ¹⁴ ’Ana na si manga nee ku kekeda kau fuamu, nau ku manata ’aku thasa kwau lea kau ma kwau riki ’oe ’ali’ali baku. ¹⁵ Ma lelea sa ka tee ore tau kau, na kekedalae nee kau faatana fuamu si abulolae ’urifita nee kolu kau too sulia ’i laona ofulae kera ngwela nia ki tha God. Kolu naa na ofulada na imole nia ki tha God momoori. Ma na ofulada na imole manata mamana ki ne faasuukwaia na toodoolae mamana nia tha God, ilingia na bae ’ai ki ne faasuukwaia ta beu. ¹⁶ ’E mamana naa, si faarongolae nia tha God ne ’e faatana fuakolu ’e mamana teefau. Na faarongolae neri ’e ’urii, “Tha Kraes ’e faatai nia ’i tala’ana ’ana nonii doo mala ngwane. Ma na Mangoedoo Abu ’e faatana na ’o’oloa nia. Ma na enselo ki da rikia naa. Ma meli ka faarongo naa ’ani nia fuana kwalukulee ngwane ki. Ma na imole ki ’i laona maetoaa ’oro ki da ka manata mamana naa ’ani nia. Ma tha God ka ngala naa ’uri thalo.”

¹ Na Mangoedoo Abu ’e bae folaa naa sulia thasa tai imole ki dau ekwatana manata mamanalae kera, sui fatai tha Jisas ka fi oli lau mai. Da roosulia ’ada na anoedoo susuke ki, ma na toodoolae kera na anoedoo ta’ae ki. ² Na toodoolae neri ki ’e ’ito mai faasia na ngwane susuke ki ne langi da si liodila bo sulia na abulo ta’alae kera ki. Lelea sa na imole ’e’ete ki da abulo ta’ae, da ka liodila. Sui ta, na ngwane susuke neri ki, ’e langi da si liodila bo uria na manata ta’alae kera ki sui. ³ Na ngwane susuke neri ki, da toodoo thasa na arailae ma na ’afelae ’e garo. Da toodoo laubo sulia na ’anilana tai fanga ’e garo. Sui ta, tha God ’e thaungana fanga ki fasi na imole manata mamana ki da ka ’ania, ’i burina ne da fala naa si foalae ni tangolae fuana tha God. Ma tha God ’e thaungana fanga neri ki fuada na imole ki ne da thaitamana naa na toodoolae mamana. ⁴ Sulia na fanga ki sui ne tha God ’e thaungana, ’e langi ta doo si ta’ae, nia ’e ’okae teefau. Sulia lelea sa kolu ka foa ’ana tangolae ’uria ’anilana, ’e faatana ne langi kolu si otekolu naa ’ana ’anilana ta si fanga. ⁵ Na fanga ’e ’okae ’uria ’anilana, sulia tha God ’e thaea nia ’e ’okae, ma na foalakolu ne adea na fanga ka ’okae. ⁶ Timoti ’ae, lelea sa ’oko fala si toodoolae nee ki fuana imole manata mamana ki, ma lelea sa ’oko moori ’ana Faarongolae ’Okae, ma ’oko too ni roolae sulia na toodoolae mamana, ’urineri ’oe na ngwane rao ’okae nia tha Jisas Kraes. ⁷ Aia, langi ’o si fafurongo ’uria na ununua kaubare ki. ’Oko suukwai ’amu ’uria adelae sulia na kwaidooria nia tha God. ⁸ - ⁹ ’Oko thaitamana imole ki da thaea ka ’urii, “’E ’okae fasi na ngwane ka faasuukwaia bo nonina, sulia ’e ’adomia mooria ’ana si manga nee.” Sui ta, ’e ore ’okae lelea sa na ngwane ka thasi suukwai ’ana adelae sulia na kwaidooria nia tha God. Sulia si doo neri ’e ’adomia na mooria si manga nee, ma si manga ne nia ’ua kau laubo. Si baea neri ’e mamana, ma kolu ka manata mamana naa ’ania. ¹⁰ Kolu ka thasi suukwai bo ’urineri, sulia kolu fiitoo ’ana God momoori. Sulia ’e thaitamana kau faamooria imole ki sui, ma ka tatha ’asiana fuana ni ti kera ne da manata mamana ’ani nia. ¹¹ ’Oko toolamana doo nee ki fuada na imole ki, ma ’oko bae fifii ’ani kera fasi da ka roosulia. ¹² Ma ’o si alamatana imole ki da ka thaea thasa ’oe ’o si tala’ana kwaitalailae sulia ’oe na ngwane daraa. ’Oko faatana too ’okaelae fasi na imole manata mamana ki da ka lio suli ’oe, ’ana na baelamu, ma na abulolamu, ma na liothaulamu, ma na manata mamanalamu, ma na too folaalamu. Sulia lelea sa da rikia na toolamu ’e ’okae, da ka ade ’urineri laubo sulia. ¹³ Si manga ’o kwaimaakwali ’ana daolaku mai, ’oko teemana Kekedalae Abu ki fuana imole ki, ma ’oko faatalo ’ania na Faarongolae ’Okae, ma ’oko toodoo fuada na imole ki. ¹⁴ Ma ka langi ’o si ekwatana falelae ’oe ne Mangoedoo Abu ’e fala fuamu, si manga bae na profet ki da bae sulia ma na ngwane naonao ki da ka alua naa ’abada faafi ’oe. ¹⁵ ’Oko ilia si doo neri ki sulia dani fasi na imole ki sui da ka rikia ’okaelana raoa ’oe ne baita na mai. ¹⁶ ’Oko lilio ’okae sulia na abulolamu ’i tala’amu, ma si doo ki ne ’o manata mamana ’ania. Ma ’oko ililado ’ania si raoa neri ki, sulia lelea sa ’oko ade ’urineri, tha God kau faamoori ’oe fonea ni ti kera ne da rongoa baelamu.

¹ Langi ’o si ngatafia ta ngwane ngwaro, ’e tala’ana ’oko bae ’okae bo ’amu fonea ilingia na maka ’oe. Ma si manga ’o ilia ta si doo fuana ngwane daraa ki, ka ilingia ne ’o ilia fuana dooramu. ² Ma si manga ’o ilia ta si doo fuana ’afe ki, ka ilingia ne ’o ilia fuana gaa ’oe ki. Ma si manga ’o ilia ta si doo fuana keni thaarii ki, ka ilingia ne ’o ilia fuana ngwaingwane ’oe ki ’i laona manatalae ngwane ne ’okae teefau. ³ Fulingana imole manata mamana ki da ka lio sulia gwe ’oru ki ne da too talifilida. ⁴ Sui ta, lelea sa gwe ’oru ne too ’ana ngwela ki ma langi na kokoo ki, da ka rao naa fuana tha God ’ana liolae suli nia. Kera da ka lio sulia gaa kera ki, sulia gaa kera ki ne da eta lio sulida. Si doo neri, ne tha God ’e nonithathala ’asiana sulia. ⁵ Molu ka ’adomia gwe ’oru ne too talifilia ma ka langi ta imole ’uria tanggilae suli nia. Nia ’e fiitoo ’ana tha God, ma ka ililado ’ana foalae ma ganilae ’uria kwai’adomia sulia rodo ma dani. ⁶ Sui ta, na gwe ’oru ai ne kau thasi laubana ’uria kwaidoorilae ’ana noni, ka langi molu si ’adomia. Sui boroi ’ana nia ka moori ’ua, na mooria nia fonea tha Kraes ’e mae sui naa. ⁷ ’Oko fala si toodoolae nee ki fuana imole manata mamana ki, fasi ta imole si daotoona ta si garolae ’ani kera. ⁸ Ma lelea sa ta imole ka langi si lio sulia na doorana ki, ma na imole ki ’i laona ’aebara nia, na ngwane ’urineri ’e ’akwasia naa na toodoolae nia tha Kraes, ma ’e ta’ae ka talua fatai na imole ki ne langi da si manata mamana. ⁹ Ma gwe ’oru ne langi si dao ’ua ’ana ono akwale fe ngali, langi ’o si eta ofu ’ana fonea na ’oru ki. ’Oko etamia bo gwe ’oru ne ’e ngwaro naa, ma ka totoo mamana fonea arai nia. ¹⁰ Ma da ka thaitamana ne nia ’e ilia si raoa ’okae ki ne ’e ’urii: Nia ’e lio ’okae sulia ngwela nia ki, ma ka konitana imole dao ki ’i luma nia, ma ka nonieno, ma ka ’adomia imole manata mamana ki fonea ni ti kera ne da too ’ana ’afitaia, ma ka fala teefau naa ’ani nia ’uria ililana si raoa ’okae ki. ¹¹ Ma gwe ’oru ki ne langi da si ngwaro bo, ’e langi ’o si eta ofu ’ani kera fonea na ’oru ki. Sulia lelea si manga na kwaidooria ’ana noni ’e adea da ka abulo ’e’ete faasia raolae fuana tha Jisas, da ka dooria ’ada ’afe faalulae. ¹² Ma lelea sa ’e ’urineri, ni kera da garo sulia da ’oia naa bae alangaia ne da ilia totongenao fuana tha Jisas Kraes. ¹³ Ma lelea sa ka langi da si ’afe faalu lau, ’urineri da nagaa bada si manga kera ki ’ana tathafilana maana luma ki. Ma si doo ne ta’ae ka tatha ne da too ni unuunulae bada sulia tai imole ki, ma da ka bae bada sulia doo ki ne langi si alamia dau bae sulia. ¹⁴ Nia ne ku manata thasa ’e ’okae fuana ’oru fi baita ki da ka ’afe faalu lau ’ada, ma da ka thare ngwela, ma da ka lio sulida ma na luma kera ki, fasi na maalimae kolu ki ka langi da si too ’ana ta si doo ta’ae ni baelae ’ana suli kolu. ¹⁵ Sulia tai gwe ’oru ki da abulo ’e’ete naa, ma da ka lea na ’ada sulia tha Saetan. ¹⁶ Sulia lelea sa ta keni ne manata mamana ’ana tha Jisas Kraes, ma ta gwe ’oru ka too ’i laona luma nia, nia ka lio sulia, sulia ’e langi si ’okae da ka faa’aberotana lau imole ki ne da manata mamana. ’Urineri na imole manata mamana ki da ka lio na ’ada sulia gwe ’oru ki ne da too talifilida. ¹⁷ Ma na ngwane naonao ki ne da rao ’okae fuana ofulada na imole manata mamana ki, ’e tala’ana molu ka faarebaita ’ada ma molu ka foli ’okae ’ani kera. Tatha ’asiana fuana ni ti ne rao suukwai ’ana faatalolana Faarongolae ’Okae ma na toodoolae. ¹⁸ Sulia na Kekedalae Abu bae ’e bae ’urii, “Langi ’o si kani faafia fakana buluka ni rao, ’ana si manga ’e uria mingge doo ki.” Ma ta si baea ka ’urii laubo, “Na ngwane ni rao ’e tala’ana ka ngala bo fofolia nia.” ¹⁹ Aia, ma ka langi ’o si fafurongo ’uria ta si baea ne ta imole ka fai faafia bana ’ana ta ngwane naonao, lelea ta roo ngwane ma langi ta olu ngwane da lea mai, da ka faamamanea bo si doo neri. ²⁰ Aia, ’oko ngatafia ngwane naonao ne na abulolana ’e ta’ae. ’Oko ade ’urineri ’i nao ’ani kera na imole ki sui, fasi na imole ki sui ne da too ’i seeri da ka rongoa, ma da ka mau. ²¹ Nau ku bae fifii fuamu ’i maana tha God, ma tha Jisas Kraes, ma na enselo abu ki, fasi ’oko roosulia si toodoolae nee ki, ma ka langi ’o si faafefe, ma langi ’o si kwai’ilisi ’ana ta imole sulia si tae nee ’o rikia ’i thara. ²² Ka langi ’o si ’ali’ali ’uria alu ’abalae faafia ta ngwane ’uria raolae fuana Aofia. Ma ka langi ’o si ’ado fonea ta ngwane ’ana si manga ’e ilia ta si doo garo. ’Oko too folaa faasia ta’alae ki! ²³ ’Oko kuufia ta kae si waen fonea ta si kafo fasi ka ’adomia ruruumu fasi ka ’okae, sulia ni ’oe na ngwane ne ’o matai ka lado bana. ²⁴ Na abulo ta’alae kera tai imole ki ’e ngwaluda ’asiana ’uria rikilana, ma imole ki sui da ka thaitamana ne tha God kau keto kera. Sui ta, na abulo ta’alae kera tai imole ki, ’e langi da si rikia ’ana si manga neri. ²⁵ Ka ’urineri laubo, tai imole ki da ilia si doo ’okae kera ki ka too faatai ’asiana ’uria rikilana. Ma si manga neri na rao ’okaelae kera tai imole ki ’e langi si faatai bo, sui ta, ’ana ta si manga na kau da fi rikia.

¹ Na imole manata mamana ki ne da tofa rao, da manata baita ’ana ngwane baita kera ki, fasi ta imole si bae tataga ’ana thatana tha God ma na toodoolae kolu. ² Ma na imole tofa rao ki ne na ngwane baita kera ki da manata mamana ’ana tha Jisas Kraes, ’e langi da si manata ’urii, “Na ngwane baita nau ’e manata mamana laubo, ’urineri ’e langi kwa si faarebaita bo ’ani nia ma langi ku rao suukwai fuana.” Si manatalae doo ’urineri ’e langi si ’okae! Da ka rao ore ’okae lau fuada, sulia kera too bo ’ana tee manata mamanalae ma da ka liothau ’ana tha God. Nia nee, ’oko toodoo ma ’oko bae sulia si doo neri ki. ³ Tai imole ki ’e langi da si toodoo sulia si doo nee ki. Ma ka langi da si alafaafia bo si baea mamana nia na Aofia kolu tha Jisas Kraes, ma na toodoolae kolu sulia too ’o’ololae. ⁴ Na imole neri ki da nauni baita, ma ka langi da si thaitamana bo ta si doo. Ma na kwaidooria kera ka ta’ae ’uria olisusuulae sulia maalutana si baea ki. Ma na manatalae doo ’urineri ki, ’e adea ma da ka liota’ae, ma da ka olisusuu kwailiu, ma da ka bae tataga, ma da ka manata ta’ae sulia imole ki. ⁵ Ma da ka olisusuu sulia dani. Ma na manatalada ka langi si rao. Ma ka langi da si thaitamana doo mamana ki. Da manata ’ada thasa lelea sa da lea sulia tha God, da ka todaa malefo baita. ⁶ Aia, na lealae sulia tha God naa ne ’okae ’asiana, sulia na kwaidooria nia ki ’e fono naa ’ana si tae ki ne nia ’e too naa ’ania. ⁷ Aia, si tae ki ne kolu ngala mai ’i laona molaagali nee? ’E langi bo! Ma si tae ki ne kolu kau ngala faasia na molaagali ne? ’E langi laubo! ⁸ Nia nee, lelea sa kolu ka too naa ’ana si fanga ma si maku, ’urineri si doo neri ki ’e ’okae naa fuakolu neri. ⁹ Tai imole ki da dooria ’asiana totodaa. Ma ka ngwaluda fuada ’uria ililana doo ta’ae ki ’uria todalana malefo. ’Urineri, da ka daotoona ne da ’asida ’i laona ’aukwai ilingia doo moori kwasi ki. Da dooria ililana doo ’oro ta’ae ki ma na doo oengwanea ki ne ta’ae fuada. Ma da ka daotoona naa na ngadalae baita ’asiana. ¹⁰ Tai ngwane ki da dooria ’asiana toolae ’ana malefo, ma da ilia kwalukaela doo ta’ae ki ’uria ngalilana malefo. Tai ngwane ki da thasi ’uria malefo, ma da ka lea tau na ’ada faasia manata mamanalae ’ana tha God, ma na liodilalae ’oro ki ka nagaa mooria kera. ¹¹ Ngwalee Timoti ’ae, ’oe na ngwane nia tha God, ’oko too faasia doo neri ki. Ma ’oko thasi suukwai ’uria ’o’oloa, ma na toolae ne ’e abu, ma na manata mamanalae, ma na liothaua, ma na ngadolae ’i laona si manga ’ana ’afitaia ki, ma na toolae ’ana enoenoa. ¹² ’Oko rao suukwai ’uria na mooria ’i laona manata mamanalae. ’Ana si manga bae ’o bae suukwai sulia na manata mamanalae ’oe fuana imole ’oro ki, ’oe ’o ngala naa na mooria firi ne tha God ’e fili ’oe ’uria. ¹³ Nau ku bae fifii fuamu ’i naofana tha God ne fala mooria fuana doo ki sui, ma ’i naofana tha Jisas Kraes na ngwane bae ’e bae suukwai fuana tha Pontias Paelat, ¹⁴ fasi ’oko roosulia si doo neri ki, ma ’oko ade sulia fasi ’oko folaa, ma ka langi ’o si garo, lelea ka dao ’ana fe dani na Aofia kolu tha Jisas Kraes kau oli mai ’ania. ¹⁵ Nia kau dao faatai ’ana si manga ne tha God ’e ’olea. Tha God ne na imole ki da faabaitaa, nia ’i talana ne ’e ’inito ka tatha faafia doo ki sui, ma ka ’inito faafia na ngwane ’inito ki sui, ma ka Aofia faafia na aofia ki sui. ¹⁶ Ma talifili nia bo ne ’e moori ka totoo firi ma ’e langi si mae. Nia ’e too ’i laona folaalae ne langi ta imole si tala’ana naa dao karangilana. Ma ’e langi ta imole si riki nia ’ua, ma ka langi ta imole si tala’ana naa kau riki nia. Na imole ki da ka faare baita ’ani nia. Ma nia ka ’inito ’ana suukwaia ne totoo firi! Iuka nia kau ’urineri naa. ¹⁷ ’Oko thaea fuana imole ki ne da too ’ana totodaa ’i laona molaagali nee, ka langi da si nauni baita. Da ka alua fiitooa kera ’ana tha God, ma ka langi lau ’ana totodaa kera ki ne kau sui ’ali’ali bana. Sulia tha God ’e fala doo ki sui fuakolu ’uria nonithathalalae sulia. ¹⁸ ’Oko thaea fuada, da ka ade ’okae fasi da ka totoda ’ana raoa ’okae ki, ma da ka nonimaabe ’uria faledoolae ’uria ’adomilana imole ki. ¹⁹ Lelea sa da ka ade ’urineri, kera dau konia na totodaa ki ne ’adomi kera ’ana si manga ne ’e nii ’ua kau. Ma da ka too ’ana mooria ne mamana. ²⁰ Ngwalee Timoti ’ae, ’oko lio ’okae sulia si tae ne tha God ’e fala fasi ’oko lio sulia. Ma ka langi ’o si rongo ’uria si baea ta’ae ki ma na olisusuulae oengwanea ki ne tai imole ki da bae garo sulia ma da ka thaea ’ada thasa “na thaitamedooa.” ²¹ Sulia tai imole ki da fiitoona ’ada si baea oengwanea neri, ma da ka lea garo na ’ada faasia na manata mamanalae ’ana tha Jisas Kraes. Nau ku foa fasi na ’okaelae nia tha God ka too fone kamolu sui bo.