1 Tesalonaeka
11 Kameli tha Saelas ma tha Timoti ma ni nau tha Pol ne meli kekeda kau fuamolu na imole ki ne molu manata mamana ma molu ka too ’i Tesalonaeka, na imole nia ki tha God na Maka kolu ma na Aofia tha Jisas Kraes. Kameli meli foa fasi tha God ka fala ’okaelae nia ma enoenoa nia fuamolu. 2 ’Ana si manga ki sui bana meli faabaitaa tha God fuamolu teefau, si manga meli foa fuamolu. 3 Sulia si manga meli foasia tha God na Maka kolu, meli manatatoona na abulo ’okaelamolu ka lado bana sulia na manata mamanalae kamolu, ma na raoa ’okae ki ne molu ilia sulia na liothaua kamolu ki, ma na fiitooa suukwai kamolu ’ana daolana mai na Aofia tha Jisas Kraes. 4 Doora nau ki ’ae, kameli meli thaitamana tha God ’e liothau ’ani kamolu, ma ka fili kamolu naa fasi molu ka thau ’ana imole nia ki. 5 Si manga bae meli thafali faarongo ’ana Faarongolae ’Okae fuamolu, ’e langi meli si bae bo ’ana si baea kameli ki ’i talameli. ’Ana suukwaia nia na Mangoedoo Abu ’ana bae meli bae ’ana fuamolu, ma meli ka faatana ne meli thaitamana na Faarongolae ’Okae neri ’e mamana teefau. Ma molu ka thaitamana sui naa, ’ana si manga meli too fone kamolu, na abulolameli ’e ’okae teefau fasi meli ka ’adomi kamolu molu ka manata mamana ’ana faarongolae kameli. 6 Molu ka manata mamana naa ’ana Faarongolae ’Okae, ma molu ka nonithathala naa. Sui boroi ’ana imole ki da ka fala ’afitaia ’oro ki fuamolu, na Mangoedoo Abu ne faanonithathala kamolu, sulia molu manata mamana ’ana tha Jisas Kraes. Ma molu ka lilio sulia na abulolameli ma na abulolae nia laubo na Aofia tha Jisas. 7 Ma sulia na abulolamolu ’e ’urineri, na imole manata mamana ki sui ne da too ’i laona bali fera ’i Masedonia ma ’i Gris da ka liosuli kamolu. Ma da ka ade laubo suli kamolu. 8 Ma faasi kamolu laubo ’i see, na faarongolae sulia na Aofia ’e talofia laona bali fera ’i Masedonia ma ’i Gris. Ma na imole ki sui ’ana maetoaa ki sui ne da ka rongoa laubo na manata mamanalae kamolu ’ana tha God. Sulia ’e ’urineri, nia nee meli si faarongoa naa tai imole ’ani kamolu. 9 Na imole neri ki sui ’ana ’i talada, ne da bae sulia na kwaithareia kamolu fuameli, ’ana si manga meli dao kau ’ana maetoaa kamolu. Ma da bae sulia thasa ’i nao mai molu foasia bamolu ’atona bana god ki, sui si manga neri, molu ka foasia naa tha God ne mamana ma ’e moori. 10 Da ka thaea laubo ne molu maasia ’amolu na olilana mai Ngwela nia tha God faasia ’i thalo. Nia nee tha Jisas ne tha God ’e taea faasia maea. Ma tha Jisas ’e faanonilaa kolu naa faasia kwakwaelae ne tha God kau fala mai.
21 Doora nau ki ’ae, molu thaitamana na lealameli kau ’uria ’i laona maetoaa kamolu ’e langi lau na tofa doo. 2 Molu thaitamana si doo ta’ae ki ne da thaea ’ani kameli, ma da ka faangada kameli ’i laona maetoaa ’i Filipae sui fatai meli ka fi lea ’uria maetoaa kamolu. Ma sui boroi ’ana imole ’oro ki laona maetoaa kamolu da ka thasi ’uria suusilameli, ’e langi meli si mau bo ni faarongolamolu ’ana Faarongolae ’Okae ne thakatafa mai faasia tha God. ’E langi meli si mau sulia tha God ’e ’adomi kameli fasi meli ka bae rara’a. 3 Na faatalolae kameli, ’e langi si thakatafa mai ’ana ta manata garolae ma langi ta kwaidooria ne ta’ae. Ma ka langi meli si sukea bo ta imole. 4 Tha God ’e alafaafi kameli ’uria faatalolae ’ania baelana. Ma nia ka fiitoomeli ’uria faatalolae ’ana Faarongolae ’Okae. ’Urineri nee, meli ka thasi ’uria faanonithathalalana tha God ne ’e thaitamana manatalameli. Ma ka langi meli si thasi bo ’uria faanonithathalalana imole ki. 5 Kamolu molu thaitamana laubo si faarongolae bae meli bae sulia ’i malutamolu, ’e langi lau ta sukelae bae ’uria faanonithathalalamolu. Ma si doo bae ki meli thaea, ’e langi lau ’uria todalana ta si malefo. Tha God ’e thaitamana ne ’e langi meli si suke. 6 Ma ’e langi meli si thasi lau ’uria ta faa’initolae faasi kamolu ma langi faasia tai imole lau. 7 Kameli na aposol nia ki tha Jisas Kraes, meli tala’ana fasi meli ka talai kamolu ’uria ililana si doo ki fuameli. Sui ta, ’e langi meli si ade bo ’urineri. Meli marabibi bameli fuamolu, ilingia ta gaa ne lio sulia ngwela nia ki. 8 Kameli meli liothau ’asiana ’ani kamolu nia nee meli ka nonimaabe ’uria faatalolae ’ania na Faarongolae ’Okae ne lea mai faasia tha God. Ma meli ka nonimaabe laubo ’uria maelae fasi meli ka ’adomi kamolu, sulia ne meli manata baita ’asiana ’ani kamolu. 9 Doora nau ki ’ae, kameli meli thaitamana ne molu manatatoona bamolu na rao suukwailae bae ki meli ilia ’i malutamolu. ’Ana si manga bae meli faarongo ’ana na Faarongolae ’Okae ne ’e ’ito mai faasia tha God fuamolu, meli ka rao suukwai laubo sulia dani ma na rodo ’uria fangalameli, fasi na toolameli ka langi si fala ta ’afitaia fuamolu. 10 Kamolu molu thaitamana, ilingia laubo ne tha God ’e thaitamana si doo nee ’e mamana: ’Ana si manga bae meli too mai fone kamolu, na imole manata mamana ki, ’e langi bo ta si doo ne meli ilia ne ’e tala’ana fasi molu ka kefusi kameli ’ana abulolameli fuamolu. Sulia na abulolameli fuamolu ’e ’okae ma ka ’o’olo teefau. 11 Kamolu molu thaitamana sui naa si doo ki ne meli ilia fuana ta tee tee imole ’ani kamolu ’e ’okae teefau, ka ilingia na abulolana ta maka fuana ngwela nia ki. 12 Sulia meli bae ni falelana rakealae fuamolu, ma meli ka radi ’ani kamolu, ma meli ka gwafe kamolu laubo fasi na mooria kamolu ki ka faanonithathalaa tha God. Nia ’e soe kamolu naa fasi nia ka ’inito fuamolu ma molu ka ’ado fonea ’ana ’initooa nia. 13 Aia, ma ta si doo lau ne adea ma meli ka lado faabaitaa tha God faafia, ’e ’urii: ’Ana si manga bae meli faarongo ’ana baelana tha God fuamolu, molu manata mamana ’ana, sulia molu lio thaitamana ’e ’ito mai faasia tha God, ma ka langi lau faasia na imole ki bana. Na baelana tha God neri ’e bulasi kamolu ne molu manata mamana ’ana. 14 Doora nau ki ’ae, na imole kamolu ki ne da faangada kamolu. Nia nee molu ka ade sulia na imole manata mamana ki ’i laona fifigui imole nia ki tha God ne da too ’i Jiudea, sulia da manata mamana ’ana tha Jisas Kraes, ma na imole kera ki ’i Jiu da ka faangada kera laubo. 15 Aia, na Jiu neri ki bae da thaumaelia na profet ki ’i nao mai, da thaumaelia laubo na Aofia tha Jisas. Ma da ka tari kameli laubo. Na abulolada ’e tau ’asiana faasia na kwaidooria nia tha God, ma da ka takwe suusia imole ki sui. 16 Da thasi ’uria suusilameli faasia faatalolae fuamolu imole ki ne langi lau Jiu fasi tha God ka si faamoori kamolu. ’Urineri, kera da lea sulia ta’alae ’oro ’asiana, ma si manga neri, tha God ’e fala naa kwakwaelae fuada. 17 Doora nau ki ’ae, kameli nee, si manga bae na maalimae kameli ki da tari kameli faasi kamolu ’ana si manga kukuru bae, ’e langi meli si manataburo bo ’ani kamolu. Ma meli ka liodila ’asiana sulia meli si too fone kamolu, ma meli ka thasi suukwai ’uria rikilamolu lau ’ana ta si manga. 18 Meli dooria fasi meli ka oli lau mai siamolu ’i Tesalonaeka. Ma nau tha Pol, ne ku thasi ’uria lealae lau kau siamolu ’ana si manga ki, sui ta, tha Saetan ’e suusi kameli faasia lealae kau. 19 Si doo ne ’e adea meli ka dooria lealae kau ’e ’urii: Kamolu molu ngala naa tha Jisas sulia na faarongolae kameli, si doo neri ne ’e adea meli ka nonithathala ’asiana, ma meli ka manatatoona ma meli kau nonithathala ’i maana Aofia tha Jisas ’ana si manga ne nia kau dao mai. 20 Iuka, kamolu naa molu adea meli ka bae rara’a ma meli ka nonithathala!
31 Ma ’ana si manga nee kameli olu ngwane ki, ne meli too tau kau ’ana faasi kamolu, meli manata ’a’abo ’asiana, ma meli ka manata ’ameli thasa ’e ’okae fasi kamiria tha Saelas, miri ka too na ’amiria kau ’i laona maetoaa baita nee ’i Atens, 2 ma miri ka fala kau tha Timoti ’i siamolu. Tha Timoti nee na doorakolu, ma na ngwane ni rao nia tha God laubo fone kamiria ’uria faatalolae ’ania Faarongolae ’Okae sulia tha Jisas Kraes. Miri fala kau fasi nia ka fala rakealae fuamolu ma ka faasuukwaia na manata mamanalae kamolu, 3 ade’ana ta imole ’ani kamolu ka abulo ’e’ete faasia na manata mamanalae, sulia na imole ki ne da faangada kamolu. Aia, molu ka thaitamana, ni kolu na imole ki nee kolu manata mamana, kolu kau too ’ana ’afitaia ki. 4 Sulia si manga bae meli too ’ua mai fone kamolu, meli faarongo kamolu naa ne dau faangada kolu. Ma molu ka thaitamana naa ne da ade naa ’urineri. 5 Ma sulia faangadalae neri, nau ku manata ’a’abo ’asiana suli kamolu, ma ku mau, ade’ana tha Saetan ka siitatha ’ani kamolu ’ana na ilitooa nia ki, ma na rao ulafulae ’okae ki bae meli ilia ’i malutamolu ka ilingia bana ta tofa doo. ’Urineri bae ku fala kau tha Timoti ’i siamolu, fasi nia ka thaitamana na manata mamanalae kamolu ki ’e ’urifita naa. 6 Ma si manga neri, tha Timoti ka fi dao bo mai ’i see, nia ka faarongo ’ana si faarongolae ’okae thasa na manata mamanalae kamolu ’ana tha God ’e suukwai bana, ma na liothaua kamolu fuamolu kwailiu ka baita ’ua bana. Ma nia ka faarongo laubo ’ana ne molu manata ’okae suli kameli, ma molu ka doori riki kameli, ilingia laubo ne meli doori riki kamolu. 7 Doora nau ki ’ae, sulia si faarongolae neri, sui boroi ’ana meli ka liodila ma na ’afitaia baita ki ka dao faafi kameli, meli nonithathala ’asiana suli kamolu ma sulia na manata mamanalae kamolu. 8 Na moorilameli ’e ’okae ’asiana si manga neri, sulia ne meli rongoa na manata mamanalae kamolu ’ana na Aofia ’e suukwai. 9 Meli tangoa ’asiana God kolu, sulia molu takwe suukwai. ’Ana si manga meli foa, meli nonithathala ’asiana suli kamolu. 10 Meli foa suukwai sulia dani ma na rodo fasi tha God ka faangwaludea fuameli ’uria rikilamolu lau fasi meli ka faasuukwaia manata mamanalae kamolu, fasi ka ore suukwai lau. 11 Meli foa fasi tha God na Maka kolu ma na Aofia kolu tha Jisas daru ka faangwaludea fuameli fasi meli ka dao kau siamolu. 12 Meli foa laubo fasi na Aofia ka ’idua liothaua kamolu fuamolu kwailiu ma fuana imole ki sui ka baita laubo ilingia na liothaua kameli fuamolu ne ’e baita. 13 Meli ka foa laubo fasi nia ka faasuukwaia moorilamolu, ma molu kau ’okae teefau ma molu kau ’o’olo ’i maana tha God na Maka kolu, ’ana si manga na Aofia tha Jisas kau dao mai ma kau ofu kolu fonea imole nia ki sui.
41 Aia, doora nau ki ’ae, meli toodoo sui naa fuamolu sulia na abulolae ne faanonithathalaa tha God. Ma ’e ’okae ’asiana ne molu ka lea sui naa sulia. ’Ana si manga neri, meli gani kamolu lau fasi molu ka ilia ka talua lau si abulo ’okaelae neri ki. Meli gani kamolu ’urineri sulia na suukwaia ne na Aofia tha Jisas ’e fala fuameli. 2 Ma molu ka thaitamana na toodoolae ki bae meli toodoo ’ania fuamolu ’e ’ito mai faasia na Aofia tha Jisas. 3 Tha God ’e dooria na abulolamolu ka ’o’olo teefau, ma molu ka too faasia kaubarelae. 4 ’E tala’ana molu ka dau faafia kwaidooria ’ana nonimolu, ma toolae sulia na abulolae ne ’okae ma ka ’o’olo. 5 Ma ka langi molu si lea sulia na kwaidooria ta’ae ki ’ana noni, ilingia na imole ki ne da lalafusia tha God. 6 ’Urineri, ka langi molu si nagaa na dooramolu ki ’ana tha Kraes ’ana garolana ’afe kera ki, sulia na Aofia kau fala kwakwaelae fuana ni ti kera ne da ade ’urineri. Ma kameli nee, meli toolamai folaa sui naa ’ania fuamolu sulia si abulolae neri, ma si manga neri meli bae fifii lau ’ania fuamolu. 7 Sulia tha God ’e fili kolu sui naa fasi na abulolakolu ka ’o’olo, ma ka langi lau ’uria bilialae. 8 ’Urineri, sa ni ti boroi ’ana nee si roosulia na toodoolae neri, ’e langi kolu si otekolu lau ’ani nia, boroi ma nia ka otenia ’ana tha God ne fala Mangoedoo Abu nia fuamolu. 9 Aia, molu ka thaitamana ’okae ’ana ne molu ka liothau ’ani kamolu kwailiu na imole ki ne molu manata mamana, sulia tha God ’e toolamana sui naa fuamolu, ma ’e langi si tala’ana fasi ku toolamana lau fuamolu. 10 Kameli meli thaitamana ne molu liothau naa ’ana imole ki sui ne da manata mamana ma da ka too fone kamolu ’i laona bali fera nee ’i Masedonia. Ka ’urineri boroi, meli gani kamolu doora ki ’ae, molu ka liothau ’ani kera ka talua lau na liothaua ne molu too ’ana fuada si manga neri. 11 Molu ka thasi ’uria too enoenolae, ma tee tee imole ’ani kamolu si susufara ’ana imole ki, ma molu ka rao suukwai fasi molu ka konia fanga ma si doo ’e’ete ki ne molu ’atongia. Meli thaea sui naa si adelae neri ki fuamolu. 12 Ma lelea sa molu ka ilia si doo neri ki, na imole ki ne langi da si manata mamana, dau faarebaita ’ani kamolu, ma molu si reri naa ’ana ta imole fasi ka ’adomi kamolu. 13 Doora nau ki ’ae, kameli meli dooria fasi molu ka thaitamana tae ki ne kau fuli ’ana imole ki ne da mae naa, fasi ka langi molu si liodila ilingia imole ki nee da si manata mamana ’ana tataelae faasia maea. 14 Kolu manata mamana ’ana tha Jisas ’e mae, ma nia ka tatae lau faasia maea. Nia kau ’urineri laubo fuana ni ti kera ne da manata mamana sui da ka mae naa, kolu manata mamana ’ania tha God kau taeda faasia maea, ma kau adea dau oli lau mai fonea tha Jisas. 15 Aia, si doo ki ne meli toolamana fuamolu naa na baelana na Aofia: Kolu ne kolu kau moori ’ua ’ana si manga na Aofia kau dao mai, ’e langi kolu si eta lau ’i nao ’ana imole nia ki ne da mae naa. 16 Na olilana mai na Aofia kau ’urii: Na Aofia tha Jisas kau ’ai baita, ma na gwaulii enselo kau ’ai, ma na bungu nia tha God kau talo mai, sui na Aofia ka fi sifo mai faasia ’i thalo. Ma ni ti kera ne da manata mamana ’ana tha Jisas Kraes, ne da mae naa ’i nao, dau tatae totongenao. 17 ’I buri, na imole ki nee kolu moori ’ua, tha God kau ngali kolu ofu fone kera ’i laona barobaro ki ’uria ofulae fonea Aofia ’i laona mamangaa. Ma kolu ka totoo firi fonea na Aofia. 18 Nia nee molu ka bae ni rakealae fuamolu kwailiu ’ana si baea nee ki ku thaea sui na kau fuamolu.
51 Doora nau ki ’ae, fulingana sa ’e langi meli si kekeda naa kau fuamolu sulia si manga na doo neri ki kau fuli ’ania. 2 Sulia molu thaitamana ’okae sui naa ’ana fe dani ne na Aofia kau oli lau mai, nia kau dao mai ilingia ta ngwane bebeli ne dao mai ’i laona rodo, sulia ’e langi ta imole si thaitamana si manga tae nee nia kau dao mai ’ania. 3 Nia kau fuli ’ana si manga ne imole ki da thaea thasa na doo ki sui ’e ’okae bana ma ka enoeno bana. Ma ’ali’ali na ta’alae kau dao mai faafida ma ka naga kera naa. Nia kau fuli ’ali’ali bana ilingia ta keni bae nonifii ’ana si manga ne karangia kau thare ’ania. Ma ’e ’afitai da ka tafi naa faasia. 4 Sui ta, ni kamolu na doora nau ki, langi molu si too ’i laona maerodo, ilingia na imole ki ne langi da si manata mamana. Ma si manga tha Jisas kau oli mai ’ana fe dani neri, ka langi si faatona kamolu, ilingia ta ngwane bebeli ne faatonaa imole ki. 5 Kamolu teefau molu too ’i laona folaalae ma ’i laona dani. ’E langi kolu si too ’i laona maerodo ’ana ta’alae. 6 Nia nee, ’e tala’ana kolu ka too sulia maalutana mooria kolu ’i tala’akolu, ma kolu ka too ni liliolae, fasi ka langi si ilingia imole ki ne da maleu ’ana si manga tha Jisas kau dao mai. 7 ’I laona rodo naa ne na imole ki da maleu. Ma ’i laona rodo laubo ne na imole ki da kuu baita ’ana kuulae lilinge fasi na manatalada ka langi si ’o’olo. 8 Sui ta, ni kolu ne kolu too ’i laona dani, ’e tala’ana kolu ka too sulia malutana mooria kolu ’i talakolu. Na manata mamanalae, ma na liothaua, ma na fiitooa kolu ne tha Jisas kau faamoori kolu ma kau suusi kolu faasia abulo ta’alae, ilingia ta kifi sadi ma ta talo ne suusia na ngwane ni firu. 9 Kolu ka too sulia malutana mooria kolu ki ’i tala’akolu, sulia tha God ’e langi si fili kolu ’uria falelana kwakwaelae nia fuakolu. Nia ’e fili kolu ’ana ’uria faamoorilakolu ’ana na Aofia kolu tha Jisas Kraes. 10 Tha Jisas ne mae ’uria faamoorilakolu, fasi kolu ka too ’ana mooria fone nia, sui boroi ’ana kolu ka moori ’ua ma langi kolu ka mae naa ’ana si manga na olilana mai. 11 Sulia ne molu thaitamana sui naa si doo neri, molu ka fala rakealae fuamolu kwailiu, ma molu ka ’adomi kamolu kwailiu ’ana manata mamanalae kamolu, ilingia ne molu ilia laubo ’ana si manga neri. 12 Doora nau ki ’ae, meli gani kamolu fasi molu ka faarebaita ’ana imole ki ne na Aofia ’e filida, ma da ka rao suukwai ’uria talailamolu ma na toodoolae fuamolu. 13 Molu ka faarebaita ’ani kera, ma molu ka liothau ’ani kera, sulia na raoa ne da ilia. Ma molu ka too kwaimani fone kamolu kwailiu. 14 Doora nau ki ’ae, meli gwafe kamolu laubo fasi molu ka fala rakealae fuana imole ki ne da noni dadaola ’uria ililana ta si raoa. Molu ka gwafea imole ki ne da liodila. Molu ka ’adomia na imole ki ne da maketho. Ma molu ka too marabibi fonea imole ki sui. 15 Molu si alamatana tai imole ki ’ani kamolu da ka duua ta’alae ’ana ta’alae. Molu ka thasi ’amolu ’uria ililadolae ’ana doo ’okae ki fuamolu kwailiu ma fuada na imole ki sui. 16 Ma molu ka nonithathala ’ana si manga ki sui. 17 Molu ka foa laubo ’ana si manga ki sui. 18 Ma molu ka faabaitaa tha God, boroi ’ana ta si tae nee ka daotoomolu. Sulia si doo neri ki ne tha God ’e dooria fasi molu ka ilia, sulia na moorilamolu ’e too ofu naa fonea tha Jisas Kraes. 19 ’E langi molu si suusia raoa nia na Mangoedoo Abu, 20 ma molu si ekwatana faarongolae ki ne ’ito mai faasia tha God. 21 Molu ka ilitoona si faarongolae ki sui, ma lelea sa ta si faarongolae ka ’okae, molu ka konia. 22 Ma molu ka too faasia bae ta’alae ki sui. 23 Nau ku foa fasi tha God ’ana enoenoa ka adea fasi abulolamolu ki sui ka ’o’olo. Nau ku foa laubo fuana moorilamolu, ma na manatalamolu, ma na noni molu ka too ’o’olo ’i maana tha God, lelea ka dao ’ana olilana mai Aofia kolu tha Jisas Kraes. 24 Tha God ’e fili kamolu, ma nia kau ilia si doo neri, sulia nia ’e ilia si doo ki ne nia ’e thaea. 25 Doora nau ki ’ae, molu ka foa laubo mai fuameli. 26 Molu ka faatana liothaua kamolu fuamolu kwailiu ’ana si manga molu riki kamolu kwailiu. 27 Nau ku bae fifii ’ana na suukwaia nia na Aofia, fasi molu ka teemana laubo si kekedalae nee fuada na imole manata mamana ki sui bo. 28 Nau ku foa fasi na liothaua nia na Aofia kolu tha Jisas Kraes ka too fone kamolu.