1 Pita

1 Pita

¹ Faasia tha Pita, na aposol nia tha Jisas Kraes. Nau ku kekeda kau fuamolu imole ki ne tha God ’e fili kamolu, ma molu ka too ilingia imole maadiu ki ’i laona molaagali nee sulia na maetoaa mamana kamolu ’e nia ’i thalo. Ma molu ka tagalo naa ’i laona bali fera ki ’i Pontus, ’i Galesia, ’i Kapadosia, ’i Eisia, ma ’i Bitinia. ² ’I nao ’ua mai, tha God na Maka ’e fili kamolu sulia na kwaidooria nia, ma na Mangoedoo nia ’e adea fasi kamolu na imole nia ki molu ka abu fasi molu ka roosulia tha Jisas Kraes, ma nia ka faafaalu kamolu ’ana ’abuna. Iuka, nau ku foasia tha God fasi ka ade ’okae fuamolu ma ka fala enoenoa fuamolu. ³ Kolu ka faabaitaa tha God na Maka nia na Aofia kolu tha Jisas Kraes, sulia na kwaimanataia baita nia tha God, nia nee ka fala mooria faalu fuakolu ’ana tataelana tha Jisas Kraes faasia maea. ’Urineri kolu ka fiitoona ne kolu kau ngala na doo ’okae ki. ⁴ Kolu ka kwaimaakwali ’ana doo ’okae ki ne tha God ’e kwaimaakwali ’ania fuana imole nia ki. Nia ’e konia naa doo neri ki fuamolu ’i thalo, si kula ne si doo neri ki ’e ’afitai ka fura, ma ’e langi si ta’ae, ma ’e totoo si funu. ⁵ Ma tha God kau folo ’usi kamolu ’ana suukwaia baita nia sulia na manata mamanalae kamolu. Tha God ’e folo ’usi kamolu lelea ka dao ’ana fe dani ’isi. ’Urineri nia kau faamoori kamolu, ka ilingia bae ’e manatatoona sui naa ’uria ililana fuamolu. ⁶ Molu ka nonithathala ’amolu sulia si doo neri, sui boroi ’ana molu ka liodila ’ana kae si manga neri sulia na faangadalae ’oro ki ne molu tatha mai ’i laona. ⁷ Na faangadalae neri ki kau faatana manata mamanalae kamolu ’e mamana. Na manata mamanalae kamolu ’e ilingia na gol ne da alua ’i laona ere ’uria tharufilana fasi ka faalu. Ma tha God ’e dooria na manata mamanalae kamolu ka tatha talua gol, sulia na gol kau funu bana, na manata mamanalae kamolu ’ana ne langi si sui. Ma tha God kau bae ’okae suli kamolu, ma ka faa’inito kamolu, ma ka faare baita ’ani kamolu ’ana fe Dani ne tha Jisas Kraes kau oli mai. ⁸ Kamolu na imole ki ne molu liothau ’ana na Aofia, sui boroi ’ana ’e langi molu si rikia ’ua. Ma molu ka manata mamana ’ana, sui boroi ’ana ’e langi molu si rikia ’ana si manga neri. Nia nee, molu ka nonithathala ’ana nonithathalalae baita ne ’e langi ta si baea si tala’ana naa baelae sulia. ⁹ Molu ka nonithathala ’urineri, sulia molu ngala naa mooria firi fuana mangomolu. Ma na mooria firi neri naa na kwaiaraa ’ana ’isilana na manata mamanalae kamolu. ¹⁰ Aia, na mooria ne totoo firi ne na profet ki da rofe ma da dooria da ka thaitamana ’okae ’ania. Ma da ka thafali bae sulia na mooria totoo firi neri ’i nao ’ana ne tha God ’e fala fuamolu. ¹¹ Sulia na Mangoedoo nia tha Jisas Kraes ’e too naa ’ani kera, ma ka faatana thasa na Kraes kau ngada sui fatai nia ka fi ’inito. Ma da ka thasi ’uria daotoolana si manga ’urifita nee na Kraes kau dao mai, ma si tae nee kau fuli ’ana si manga ne kau dao mai ’ania. ¹² Ma tha God ka faatana fuana profet neri ki thasa si doo neri ki ’e langi si fuli ’ua ’ana si manga da too ’i laona molaagali, sui ta, nia kau fuli ’i buri, ’ana si manga ne molu too ’ania. Da bae sulia si doo ki ne molu rongoa ’ana si manga tai imole ki da faatalo ’ana Faarongolae ’Okae. Na Mangoedoo Abu ne tha God ’e fala mai faasia ’i thalo, nia naa nee ka fala ngwane neri ki fasi da ka faatalo ’ania suukwaia nia. Ma na enselo ki boroi, da dooria da ka thaitamana ’okae laubo ’ania sulia na mooria ne totoo si sui ne ’e ’okae ka tatha. ¹³ Molu ka lilio ’okae, ma molu ka manata ’o’olo. Molu ka too ’ana fiitooa, sulia tha God kau ade ’okae fuamolu ’ana si manga tha Jisas Kraes kau dao mai. ¹⁴ Molu ka roosulia tha God, ma ka langi molu si lea sulia kwaidooria ne molu too ’ania ’ana si manga bae molu si thaitamana ’ua na Faarongolae ’Okae. ¹⁵ Sui ta, molu ka too abu ’ana doo ki sui ne molu ilia, ilingia tha God ne ’e fili kamolu, ’e abu. ¹⁶ Sulia ’i laona Kekedalae Abu, tha God ’e thaea ka ’urii, “Molu ka abu, sulia ni nau ku abu.” ¹⁷ Ma molu ’alangia tha God ’ana “Maka” si manga molu foa. Ma molu ka manatatoona laubo ne nia kau ketoa imole ki sui ’uria si doo ki ne da ilia, ma ’e langi nia si kwai’ilisi ’ana ta ngwane. Nia nee, molu ka faare baita ’ani nia ’ana si manga ne molu too ilingia imole maadiu ki ’i laona molaagali nee. ¹⁸ Molu thaitamana sui naa, ne tha God ’e foli olitai kamolu ’ana doo baita ’asiana, fasi ka lafu kamolu faasia bibirangaa kera na kokoo abu kamolu ki ne ’e ’ura bana tofa doo. Tha God ’e foli olitai kamolu ’ana si doo ne ’e talua silva ma langi na gol. ¹⁹ Tha God ’e foli olitai kamolu ’ana na maelana tha Jisas Kraes ne ilingia ta kae sipsip ne ’okae teefau ’uria afuafulae ’ania. ²⁰ Tha God ’e fili nia naa ’i nao mai fatai ’ana thaungailana molaagali. Ma ’ana si manga neri naa, ’ana fe dani ’i’isi ki, tha Jisas Kraes ’e dao na mai fasi ka faamoori kamolu. ²¹ Ma sulia tha Jisas Kraes, nia nee molu ka manata mamana ’ana tha God ne ’e taea faasia maea ma ka faa’initooa, fasi na manata mamanalae kamolu ma na fiitooa kamolu ka suukwai ’ana tha God. ²² Ma sulia ne molu roosulia naa toodoolae mamana, ma molu ka faafaalu kamolu naa ’i tala’amolu faasia abulota’alae kamolu ki, nia nee molu ka liothau mamana ’ani kamolu kwailiu na imole ki ne molu manata mamana. Sulia ’e ’urineri, molu ka faasuukwaia naa liothaua fuamolu kwailiu. ²³ Kamolu molu futa faalu ’ana tha God ne totoo firi, ma nia nee na Maka kamolu. Ma molu ka futa faalu sulia baelana tha God ne totoo firi ma ’e langi si sui. ²⁴ Sulia na Kekedalae Abu ’e bae ’urii, “Na imole ki sui bo da ilingia na kirasi, ma na kwangalae kera ’e ilingia na takana ’ai kwasi. Sulia na kirasi ka kuku, ma na takana ka ’asia. ²⁵ Sui ta, na baelana tha God ’e totoo firi.” Ma na baelana neri nee na Faarongolae ’Okae ne da faarongo naa ’ania fuamolu.

¹ Aia, sulia molu futa faalu ’urineri, molu ka too faasia na abulota’alae ki sui. Ma molu ka too faasia sukelae, ma na doo ki ne langi si ’o’olo, ma na kwaifiilae, ma na bae ta’aelae ki. ² Molu ka ilingia kae ngwela ki ne da susu ’ua, ma da ka dooria ’asiana susulae ’ana si manga ki sui. ’Urineri laubo, ’e ’okae fasi molu ka dooria na baelana tha God fasi na manata mamanalae kamolu ka suukwai ma tha God ka faamoori kamolu. ³ Sulia molu thaitamana ’okae naa ’ana Aofia ne ’e ade ’okae ’asiana fuamolu. ⁴ Iuka, molu ka lea mai siana tha Jisas, ne ’e moori firi. Tha Jisas ’e ilingia ta fau ’uria thaungailana beu ne na ngwane ki ne da thaungai beu da otekera ’ania, sui ta, nia naa na ngwane ne tha God ’e filia sulia ’e ’okae ka tatha. ⁵ Kamolu laubo molu ka ilingia fau ki ne ’e moori, ma molu ka alamatana tha God ka thaungana beu nia ’ani kamolu. Ma molu kau ilingia na ngwane ni foa nia ki tha God ne molu lea ’uria raolae ’i laona beu abu neri, ma molu ka afuafu ’ana doo abu ki ne tha God ’e dooria. Molu kau ’urineri, sulia tha Jisas Kraes. ⁶ Sulia ’i laona Kekedalae Abu tha God ’e thaea ka ’urii, “Rikia fasi, nau kwau filia ma kwau alua tee gwe fau ’i laona maetoaa ’i Saeon. Ma nia naa na fau baita ’okae ne suukwai ’ana beu. Ma na imole ki ne da manata mamana ’ani nia, ’e langi da si nonisusuala ’ani nia.” ⁷ Ma na fau neri ’e ’okae ’asiana fuamolu ne molu manata mamana. Sui ta, fuana ni ti kera nee ’e langi da si manata mamana ’ania, da faatana na Kekedalae Abu bae ’e thaea, “Na fau bae na ngwane thaungai beu ki da otekera ’ania, nia naa na fau baita ’okae ne suukwai ’ana beu.” ⁸ Ma na Kekedalae Abu ’e bae ’urii lau sulia fau neri, “Ma na imole ki dau lakwadora ’ania, ma dau ’asi kera ’ania.” Da ka lakwadora ’ania sulia ’e langi da si manata mamana ’ana baelana tha God, ma da ka lakwadora sulia ne tha God ’e alua si doo neri ka fuli naa ’urineri fuada. ⁹ Sui ta, kamolu naa na imole ki ne tha God ’e filida. Kamolu naa na ngwane ni foa nia ki na Aofia. Ma kamolu naa na ofulada na imole abu nia ki tha God. Nia ’e fili kamolu ’uria faatalolae ’ania raoa ’okae nia ki. Ma ka soe kamolu faasia na rorodoa ’uria ’i laona folaalae ’okae nia. ¹⁰ ’Ana si manga ki ne ’e sui na mai, kamolu langi lau na imole nia ki tha God. Sui ta, si manga neri, kamolu naa na imole nia ki. Ma ’ana si manga ne sui naa mai, ’e langi molu si thaitamana bo kwaimanataia nia tha God, ma si manga neri, molu ngala naa na kwaimanataia nia. ¹¹ Imole liliothau nau ki ’ae, ’ana si manga molu too ’ua ’i laona molaagali nee molu ilingia imole maadiu ki sulia na maetoaa mamana kamolu naa ne ’i thalo. Ma sulia si doo neri nau ku gani kamolu fasi molu ka abulo faasia kwaidooria ta’ae ki ’ana noni. Sulia na kwaidooria ta’ae neri ki, da firu fonea na mooria faalu kamolu. ¹² Na toolamolu ka ’okae teefau ’i malutana toolamolu ki ne langi da si manata mamana ’ua. Sui boroi ’ana da ka suke faafi kamolu ’ana abulota’alae, kera dau rikia na raoa ’okae kamolu ki, ma da ka faabaitaa tha God ’ana fe Dani ne nia kau dao mai ’ania. ¹³ Ma sulia kamolu na imole nia ki na Aofia, molu ka roosulia na bibirangaa ki faasia na ngwane baita ki ’i laona molaagali nee. Molu ka roosulia na bibirangaa ki faasia na ’initooa baita ’i Rom, ¹⁴ ma na ngwane ’inito neri ka filida ’uria falelana keketoa fuana ni ti kera ne da abulo ta’ae, ma da ka faabaitaa ni ti kera ne na abulolada ’e ’okae. ¹⁵ Sulia tha God ’e dooria molu ka ilia doo ’okae ki fasi molu ka faabonaa na baelae kaubare kera na imole oengwanea ki ne da bae naga kamolu. ¹⁶ Molu ka too ilingia imole ki ne da too tofetoo. Sui ta, ’e langi molu si fiia thasa ’e tala’ana molu ka abulo ta’ae sulia molu too tofetoo. Molu ka too ilingia imole ki ne da rao fuana tha God. ¹⁷ Molu ka faarebaita ’ana imole ki sui, ma molu ka liothau ’ani kera na imole manata mamana ki, ma molu ka faare baita ’ana tha God, ma molu ka faare baita laubo ’ana ngwane ’inito ’i Rom. ¹⁸ Kamolu na ngwane tofa rao ki, molu ka roosulia baelana ngwane baita kamolu ki, ma molu ka faabaita ’ani kera. Molu ka ilia si doo neri fuana imole ki sui ne da baita faafi kamolu, ’e langi lau fuana ni ti kera bana ne da ade ’okae fuamolu, ma fuana ni kera laubo ne da faangada kamolu. ¹⁹ Sulia tha God kau faa’okae kamolu lelea sa molu daotoona ngadalae sulia molu ade sulia na kwaidooria nia, ma ’e langi lau sulia molu ilia ta si doo ta’ae. ²⁰ Kwaiaraa tae ne molu kau ngala, lelea sa da ulasi kamolu faafia tae ne molu ilia ka ta’ae? ’E langi! Sui lelea sa molu ka ngada sulia molu ilia si doo ne ’o’olo, tha God kau faa’okae kamolu ’uria. ²¹ Ma tha God ’e soe kamolu ’uria ngadalae ’urineri. Sulia tha Jisas Kraes ’ana ’i tala’ana ne ’e ngada fasi ka faamoori kamolu, ma ’urineri nia ka faatana naa fuamolu fasi molu ka thasi ’uria adelae sulia na bibirangaa nia. ²² Tha Jisas ’e langi si ilia ta si doo ta’ae, ma nia si thaea ta si doo susuke. ²³ Ma si manga da baetataga fuana, ’e langi nia si olisi kera bo ’ana ta si baea ta’ae. Ma si manga nia ’e ngada, ’e langi si faamauda bo ’ana ta si baea. Nia ’e fiitoo bana ’ana tha God ne ’e keto kera ’ana ’o’oloa. ²⁴ Ma tha Jisas Kraes ’i tala’ana ne ’e ngala abulota’alae kolu ki ’ana nonina ’ana ’airarafolo, fasi kolu ka ekwatana abulota’alae kolu ki, ma kolu ka too ’ana bibirangaa ’o’olo. Ma nia ka gura kolu naa ’ana ngadalae nia. ²⁵ Ma si manga bae sui naa mai, molu ilingia na sipsip ki ne da lea garo faasia na ngwane ni folo kera. Sui ta, ’ana si manga neri, molu oli naa ’i siana tha Jisas Kraes, na ngwane ne ’e liosulia na mangomolu, ilingia ta ngwane bae ’e liosulia sipsip nia ki.

¹ ’Urineri laubo, kamolu ’afe ki, molu ka roosulia baelana arai kamolu ki, fasi lelea sa tai ngwane ’ada ’e langi da si manata mamana ’ana baelana tha God, dau manata mamana bada sulia na abulo ’okaelae kamolu ki. Sui boroi ’ana ’e langi molu si faatalo ’ua fuada, kera dau manata mamana bada, ² sulia da rikia na abulolamolu ’e ’o’olo ma molu ka faare baita ’ana tha God. ³ Aia, kamolu keni ki ’ae, ’e langi molu si thasi ’uria thasa na lio kwangalae kamolu ka lea mai faasia na kani ifulae kamolu ki, ma langi na thaingilana doo ngwaasinasina ki, ma langi na ’afilae ’ana maku ’okae ki ne liulada ’e baita ’asiana. ⁴ Na rikilamolu ka kwanga ’ana sulia na marabibilae kamolu ki ne lea mai faasia ’i laona mooria kamolu. Na bibirangaa kamolu ’uria ade ’okaelae fuana imole ki, ma na bae marabibilae, sulia nia nee na abulolae ne tha God ’e dooria. Ma na ililana doo ’okae ki ’urineri, ’e langi si ta’ae ’ana si manga molu ngwaro naa. ⁵ Sulia ’i nao mai, na keni abu ki ne da manata mamana ’ana tha God, da adea fasi da ka lio kwanga ’ana roolae sulia na baelana arai kera ki. ⁶ Ma ni Sera ’e ’urineri. Nia ’e roosulia tha Abraham, ma ka ’alangia ’ana ngwane baita nia. Ma kamolu laubo, lelea sa molu si alamatana ta ngwane ka faamau kamolu faasia ililana doo ’o’olo ki, molu kau ilingia laubo ni Sera. ⁷ Ka ’urineri laubo fuamolu arai ki, molu ka thaitamana ’okae ’ana ne na ’afe kamolu ki da maketho ka talu kamolu, ’urineri ne molu too foneda ma molu ka ade ’okae fuada. Molu ka faare baita ’ani kera, sulia tha God ’e fala naa mooria faalu fuada ilingi kamolu laubo. Molu ka ilia si doo ’okae neri fasi ta si doo si takwe suusia na foalae kamolu ki fuana tha God. ⁸ Aia, nau ku too ’ua ’ana tai si doo lau fasi ku thaea fuamolu. ’E ’okae fasi na manatalamolu ka alua bo tee doo. Molu ka liothau ’ani kamolu kwailiu ilingia bare ngwai doorana ki, ma molu ka kwaimani fone kamolu kwailiu ma molu ka enoeno. ⁹ ’E langi molu si duua ta’alae ’ana ta’alae. Ma lelea sa ta imole ka kwalangi kamolu, ’e langi molu si olisia ’ana kwalalae. Sui ta, molu ka duua ’amolu ’ana ganilana tha God ’uria na faa’okaelana. Molu ka ade ’urineri, sulia ’ana si manga tha God ’e soe kamolu, nia ’e alangana ’ana ne kau faa’okae kamolu. ¹⁰ Sulia na Kekedalae Abu bae ’e thaea ka ’urii, “Sa ni ti ne ’e dooria na moorilana ’i laona molaagali nee ka ’okae ma ka nonithathala, ’e ’okae fasi nia si bae ta’ae ma si suke. ¹¹ Ma nia ka abulo faasia ililana doo ta’ae ki, ma na abulolana ka ’okae. Ma nia ka thasi suukwai ’uria toolae ’ana enoenoa. ¹² Sulia tha God kau liosulia imole ki ne da too ’o’olo, ma ka fafurongo ’uria na foalae kera ki. Sui ta, na imole ki ne abulolada ’e ta’ae, nia kau takwe suusida.” ¹³ ’E ’afitai ta imole ka ilia ta si doo ta’ae fuamolu, lelea sa na abulolamolu ’e ’okae bana. ¹⁴ Ma sui boroi ’ana lelea sa molu ka ngada sulia molu ilia doo ’o’olo ki, tha God kau faa’okae kamolu. ’E langi molu si mau ’ana ta imole, ma ka langi molu si manata ’a’abo. ¹⁵ Sui ta, molu ka faare baita ’amolu ’ana tha Jisas Kraes sulia nia ne na Aofia faafia mooria kamolu. Ma molu ka kwaimaakwali ’ana si manga ki sui ’uria olisilana ni ti kera ne dau soetalafana ’urii ’ani kamolu, “’Urifita nee ’oko manata mamana ’ana tha Jisas?” Ma si manga molu bae sulia na manata mamanalae kamolu, molu ka bae enoeno bo ’amolu, ma molu ka faare baita laubo ’ani kera. ¹⁶ Ma molu ka too faasia na abulota’alae, fasi lelea sa tai imole ki da ka bae ta’ae sulia na abulolae ’okae kamolu ki na bare ngwane fafurongo nia ki tha Jisas Kraes, dau ’ida sulia si doo ki ne da thaea. ¹⁷ Lelea sa sulia na kwaidooria nia tha God ne molu ka ngada, ’e ore ’okae ne molu ka ngada ’amolu sulia na abulae ’okae kamolu, ka talua lelea sa molu ka ngada sulia na abulota’alae kamolu ki. ¹⁸ Tha Jisas Kraes ’e ngada ma ka mae naa ’uria lafulana abulota’alae ki sui, ma ’e langi si mae lau. Sui boroi ’ana nia na ngwane ’o’olo, nia ’e mae fuamolu na imole ki ne abulolamolu ’e ta’ae, fasi nia ka talai kamolu siana tha God. Ma da ka thaumaelia nonina tha Jisas Kraes ’ana ’airarafolo, sui ta, tha God ’e faamooria ’ana Mangoedoo Abu. ¹⁹ Ma sulia na Mangoedoo Abu nia ’e lea siana mangoe doo ki ne da too ’i laona dele, ma nia ka faataloa fuada ne nia ’e siitatha naa. ²⁰ Na mangoe doo neri ki naa na imole ki ne da mae ’ua naa mai ’i nao, ’ana si manga tha Noa ’e thaungana na baru baita bae. Kera da si roosulia tha God. Sui ta, nia ’e marabibi fone kera lelea ka dao ’ana si manga tha Noa ’e faasuia na baru baita bae. Si manga ’e faasuia na baru neri, kwalu imole bo ne da lea ’i laona ma na kafo ka ngalida naa faasia na kwakwaelae nia tha God. ²¹ Na kafo neri, ’e ilingia faatailana ’ana sisiu abulae ne tala’ana ka faamoori kamolu ’ana si manga neri. Ma na sisiu abulae neri ’e langi lau ’uria faafaalulana nonimolu ’ana na kafo, na sisiu abulae ’e faatana ’ana ne molu gania tha God fasi nia ka lafua na ta’alae kamolu ki ma ka faafaalua moorilamolu. Ma na sisiuabulae neri ka faamoori kamolu sulia na tataelana tha Jisas Kraes. ²² Tha Jisas ’e oli naa ’uria ’i thalo, ma si manga neri nia ’e too naa ’i bali aolo ’ana tha God, ma tha God ’e alua nia ka ’inito naa faafia enselo ki sui ne da suukwai ma da ka ’inito ’i thalo.

¹ Kamolu molu thaitamana ne si manga tha Jisas Kraes ’e too ’i molaagali, nia ’e ngada. Ma sulia ’e ’urineri, kamolu laubo molu ka kwaimaakwali ’uria ngadalae. Sulia na ngwane ne ’e ngada ’urineri, nia ’e langi si dooria abulota’alae. ² Nia nee, ’e thafali ’ana si manga neri ka oli ’alaa, molu ka ngengea na kwaidooria ta’ae kamolu ki, molu ka roo ’amolu sulia na kwaidooria nia tha God. ³ Si manga ’e sui na mai, na abulolamolu ’e ilingia na imole ki ’ana tala bae ’i buri. ’Ana si manga neri molu alamatana naa mooria kamolu ’uria kaubarelae, ma na kwaidooria ta’ae ki, ma na kuu lilingelae, ma na fafangaa ta’ae ki. Ma tha God ’e rakethasu laubo fuamolu sulia molu foasia na nunui doo thaungailana ki. ⁴ Ma ’ana si manga neri, imole ki ’ana tala ’i buri da kwele, sulia ’e langi molu si ’ado naa foneda ’ana si doo ta’ae ki ne da ilia. Nia nee, da ka thaea si baea ta’ae ki suli kamolu. ⁵ Sui ta, tha God ’e lilio bana suli kera maasia fe dani ne dau bae sulia doo ki sui ne da ilia. Ma tha God ka kwaimaakwali ’uria tooketalana imole moori ki ma imole ki ne da mae naa. ⁶ Ma nia nee adea na imole ki da ka faarongo ’ana Faarongolae ’Okae fuana imole ki ne da mae naa. ’Ana si manga da moori ’ua, na imole ki ’ana tala bae ’i buri da keto kera, sui ta, si manga neri na mangoda ’e moori naa fonea tha God. ⁷ Si manga fasi na doo ki sui ka funu, ’e karangi naa. Nia nee, molu ka lilio ’okae, ma molu ka manata ’o’olo, fasi molu ka tala’ana foalae. ⁸ Si doo ne ’e baita ka tatha ’ana si doo ki sui naa ne molu ka liothau mamana ’ani kamolu kwailiu, sulia lelea sa ta ngwane ka liothau ’urineri, ’e ngwaluda fasi nia ka manatalukea ni ti ne ilia ta si doo ta’ae ’ani kamolu. ⁹ Molu ka konitai kamolu kwailiu ’i laona beu kamolu ki, ma molu ka too faasia ngungunu burilae si manga molu konitana imole ki. ¹⁰ Tha God ’e fala naa thaitamedooa ’e’ete ki fuamolu imole ki ne molu manata mamana ’ana tha Jisas Kraes. Ma tha God ’e dooria fasi tee tee imole ’ani kamolu, ka ’adomi kamolu kwailiu ’ana thaitamedooa neri. ¹¹ Ma sa ni ti boroi ’ana ne tha God ’e fala thaitamedooa ’uria faatalolae, nia ka faatalo ’ania baelana tha God. Ma sa ni ti boroi ’ana ne tha God ’e fala thaitamedooa ’uria kwai’adomia, nia ka kwai’adomi ’ana suukwaia ne tha God ’e fala fuana, fasi ’ana si doo ki sui ne molu ilia, tha God ka ngala faabaitalae sulia tha Jisas Kraes. Ma tha Jisas ’e ’inito ka tatha ma ka too ’ana suukwaia ne totoo firi. Iuka ka ’urineri naa. ¹² Imole kwaimani ’okae nau ki ’ae, ’e langi molu si kwele ’ana ta ilitooa ne molu ngada ’ania. Sulia na imole ki ne da manata mamana ’ana tha Jisas Kraes, da thaitamana tathalae ’i laona ’afitaia ’oro ki. ¹³ ’E ’okae fasi molu ka nonithathala ’amolu sulia ne molu ’ado fonea tha Jisas Kraes ’ana ngadalae nia, fasi molu ka nonithathala ka tatha ’ana si manga tha Jisas Kraes kau dao mai ’ana ’initooa nia. ¹⁴ Ka ’oilakea fuamolu lelea sa da faangwaela ’ani kamolu sulia kamolu na bare ngwane fafurongo nia ki tha Jisas Kraes, sulia ’e faatana naa Mangoedoo Abu ’inito nia tha God ’e too fone kamolu. ¹⁵ Lelea sa ta ngwane ’ani kamolu ka thaungwane, ma langi nia na ngwane beli, ma langi ta ngwane ne ilia kwalukaela doo ta’ae ’e’ete ki, ma langi ta ngwane bae kali bana ’uria nagalana si doo kera tai imole ki, ’urineri ’e tala’ana fasi nia ka ngada. ¹⁶ Sui ta, lelea sa molu ka ngada sulia molu manata mamana ’ana tha Jisas Kraes, ’e langi molu si ’ida ’ania. Molu ka faabaitaa ’amolu tha God, sulia da ’alangi kamolu ’ana “Na imole nia ki tha Kraes.” ¹⁷ Si manga ’uria thafalilana keketoa ’e dao na mai. Ma tha God kau ketoa fasi imole nia ki totongenao. Ma lelea sa nia ka ketoa fasi imole nia ki, nia kau faasuukwaia naa kwakwaelae nia ’ana si manga nia kau faasuia kwakwaelae ne nia ’e fala fuana imole ki ne langi da si manata mamana ’ana Faarongolae ’Okae nia. ¹⁸ Sulia na Kekedalae Abu ’e bae sulia si manga tha God kau ketoa imole ki ka ’urii, “Lelea sa ’e ’afitai fuana imole ’o’olo ki da ka moori, ’e ’afitai ka tatha naa fuana imole ta’ae ki ne langi da si manata mamana ’ana tha God.” ¹⁹ Nia nee, lelea sa molu ka ngada sulia na kwaidooria nia tha God fuamolu, molu ka alua naa mooria kamolu ’i laona ’abana tha God ne ’e thaungai kamolu, sulia nia kau liosuli kamolu. Ma molu ka ililado ’ana ililana doo ’okae ki.

¹ Aia, nau ku bae fuamolu ngwane naonao ki ’ana ofulada na imole manata mamana ki. Nau ta ngwane naonao laubo, ma ku rikia sui naa ngadalana tha Jisas Kraes, ma kwau ’inito fonea si manga ne nia kau oli mai. Nia nee, nau ku gani kamolu, ² fasi molu ka lio ’okae sulia imole ki ne da manata mamana. Tha God ’e alua naa ’i laona ’abamolu. Molu ka lio ’okae sulida ilingia ta ngwane ne liosulia sipsip nia ki. Tha God ’e dooria fasi molu ka ilia si raoa neri ki sulia na nonimaabelae kamolu, ma ’e langi lau sulia molu fiia thasa tha God ’e oro kamolu ’uria. Nia ’e ’okae fasi molu ka lio sulida sulia molu dooria ’adomilada, ma ’e langi lau sulia da foli kamolu ’uria. ³ Ma ka langi molu si suumana imole ki ne tha God ’e alua laona ’abamolu, molu ka talaida ’amolu fasi da ka lea suli kamolu ’uria ililana raoa ’okae ki. ⁴ Ma lelea sa molu ka lio sulida ’urineri, tha Jisas ne ilingia na ngwane ’inito ni liosulilana sipsip, nia kau fala na kwaiaraa ’inito ne ’okae ka totoo firi fuamolu, ’ana si manga ne nia kau oli mai. ⁵ Ma ’urineri laubo, kamolu na ngwane daraa ki, molu ka roosulia ngwane baita ki. Ma kamolu sui ne molu manata mamana, molu ka enoeno fasi molu ka kwai’adomi fuamolu kwailiu. Sulia na Kekedalae Abu bae ’e thaea ka ’urii, “Tha God kau takwe suusia imole ki ne da bae naunau, ma nia kau ade ’okae fuana imole ki ne da enoeno.” ⁶ Nia nee, molu ka enoeno ma molu ka roosulia tha God ne suukwai ka tatha, fasi nia ka faabaita kamolu ’ana si manga ’olea nia. ⁷ Ma molu ka alua naa manata ’a’abolae kamolu ki sui ’i laona ’abana, sulia nia ’e tanggi suli kamolu. ⁸ Molu ka lilio ’okae, sulia na maalimae kamolu tha Saetan, ’e kali bana ilingia ta doo kwasi ’uria ’anilana imole ki. Sulia tha Saetan ’e dooria ’asiana kau naga kamolu. ⁹ Molu ka faasuukwaia manata mamanalae kamolu, ma molu ka otekamolu ’ana tha Saetan, sulia molu thaitamana na imole manata mamana ki ’ana maetoaa ’oro ki ’i laona molaagali nee, da ngada laubo ’urineri ilingi kamolu. ¹⁰ Ma ’i burina molu ngada ’ana si manga kukuru, tha God kau faafaalu kamolu, ma nia kau faasuukwai kamolu fasi na manata mamanalae kamolu si sui. Tha God ’e soe kamolu naa fasi molu ka ’ado fonea tha Kraes ma molu ka too ofu fonea ’i laona ’initooa nia ne totoo firi. Tha God ’e soe kamolu fasi molu ka too ngado fonea tha Kraes ma molu ka ’inito fonea ka totoo firi. ¹¹ Ma nia ’e too ’ana suukwaia baita ne totoo firi! Iuka ka ’urineri naa. ¹² Tha Saelas ne ’adomi nau ’ana kedalana si kekedalae kukuru nee. Nia nee na doorakolu, sulia ’e manata mamana ’ana tha Jisas Kraes. Ma nau ku thaitamana ne raoa tha Saelas, ’e ’okae teefau. ’Uria si doo nee nau ku fala si kekedalae nee fuamolu ’uria faasuukwailamolu ma baelae sulia na liothaua mamana nia tha God. Aia, molu ka takwe suukwai ’i laona liothaua neri. ¹³ Ma na imole ki ne da manata mamana ’i laona maetoaa ’i Babilon, da fala si baea ’okae kera ki fuamolu. Tha God ne fili kera, ilingia laubo ne fili kamolu. Ma tha Mak ka fala laubo kau si baea ’okae nia ki fuamolu. Nia ’e ilingia naa ta ngwela mamana ’aku. ¹⁴ Ma ’ana si manga molu riki kamolu kwailiu, molu ka faatana liothaua kamolu fuamolu kwailiu. Nau ku foa fasi kamolu sui bo na imole nia ki tha Jisas Kraes, molu ka too ’ana enoenoa.