1 Jon
11 Nau ku kekeda kau fuamolu sulia si Baea ne ’e fala mooria mamana. Na Kraes naa si Baea ni Mooria mamana neri. Ma ’e too fatai ’ua na mai ’ana thafalilana molaagali. Sui ta, ma si manga neri, kameli na aposol ki meli rongoa naa, ma meli ka rikia naa ’ana maameli. Ma meli ka thamotoona naa ’ana ’abameli. 2 Na Mooria mamana neri ’e thau naa ’ana imole, ma meli ka rikia naa. Nia nee meli ka bae sulia, ma meli ka faarongo kamolu ’ania sulia na Mooria ne totoo firi nee ’e too fonea tha God na Maka. Ma tha God ka faatana naa Moori mamana neri fuameli. 3 Meli rikia ma meli ka rongoa naa na Kraes nee si Baea ni Mooria mamana neri, ma meli ka faarongo laubo ’ania fuamolu, fasi molu ka ofu fone kameli ’i laona mooria nee meli too ’ania fonea na Maka ma tha Jisas Kraes na Ngwela nia. 4 Ma meli kedaa kau si doo nee ki fuamolu fasi na nonithathalalae kolu ka fono. 5 Ma na faarongolae nee meli rongoa faasia Ngwela nia tha God ma meli ka thaea fuamolu ’e ’urii: Tha God ’e ilingia ta folaalae sulia nia ’e ’okae ka tatha, ma ka langi ta maerodo ’ani nia. 6 Ma lelea sa kolu thaea thasa kolu ’ado kwaimani naa fonea tha God, ma kolu ka too ’ua bakolu ’i laona maerodo, na baelakolu ’e langi si mamana, ma na birangakolu ka si lea bo sulia mamanaa. 7 Sui ta, lelea sa kolu ka too sulia na mooria ’ana folaalae nia tha God, ilingia tha God ’e too sulia na folaalae nia, ’urineri kolu ka ofu fone kolu kwailiu, ma na maelana tha Jisas, na Ngwela nia, ka faafaalu kolu faasia ta’alae ki sui. 8 Ma lelea sa kolu ka thaea thasa ’e langi kolu si ilia bo ta si doo garo, kolu suke kolu bakolu ’i talakolu neri. Lelea sa kolu ka bae ’urineri, ’e langi kolu si thaitamana bo na mamanaa nia tha God. 9 Sui ta, lelea sa kolu ka faatalo ’ania garolae kolu ki fuana tha God, nia kau manatalukea na garolae kolu ki, ma ka faafaalu kolu faasia ta’alae kolu ki teefau, sulia nia kau faamamanea na alangaia nia ’ana ililana si doo neri, ma nia ka ilia naa si doo ’o’olo. 10 Ma lelea sa kolu thaea thasa ’e langi kolu si ilia bo ta si doo garo, ’urineri kolu thaea bakolu thasa tha God ’i tala’ana na ngwane susuke bana, ma na baelana tha God ka langi si too bo ’i laona mooria kolu.
21 Ngwela nau ki ’ae, nau ku kedaa si doo neri ki fuamolu, fasi molu ka too faasia abulo ta’alae. Sui ta, lelea sa ta imole ka ilia ta si doo ta’ae, tha Jisas Kraes na ngwane ’ana ’o’oloa naa ka gania Maka nia fuakolu. 2 Ma tha Jisas Kraes naa na afuafulae ’uria lafulana ta’alae kolu ki. Ma langi lau ta’alae kolu ki bana talifilia, ta’alae kera laubo na imole ki sui. 3 Ma lelea sa kolu ka roosulia si baefifiilae nia ki tha God, kolu thaitamana mamana naa ne kolu thaitamana tha God. 4 Ma na ngwane ne ’e thaea ’e thaitamana tha God, sui ka langi si roosulia bo si baea fifii nia ki, na ngwane neri ’e suke ’asiana, ma ka langi si thaitamana bo mamanaa nia tha God. 5 Ma sa ni ti ne ka roosulia baelana tha God, nia na ngwane ne ’e liothau mamana ’ana tha God. Ma si doo ne ’e faatana ne kolu ofu fonea tha God ’e ’urii: 6 Sa ni ti ne thaea ’e too ofu fonea tha God, nia ka ilia si doo ’okae ki, ka ilingia laubo bae tha Jisas Kraes ’e ilia. 7 Imole kwaimani nau ki ’ae, si baea fifii ne ku kedaa kau fuamolu, ’e langi lau ta doo faalu, boroi ’ana, ma si baea fifii bae molu thaitamana ’ua na mai, ’ana thafalilana si manga bae molu manata mamana ’ania. Ma si baea fifii neri naa na faarongolae bae molu rongoa sui naa, ne molu ka liothau ’ani kamolu kwailiu. 8 Ma si baea fifii neri naa nee ku kedaa kau fuamolu ’e faalu laubo, sulia na mooria tha Kraes ma na mooria kamolu ne faatana naa mamanalana si baea fifii neri, sulia na maerodo ’e karangia kau sui naa, ma na folaalae mamana ’e tala naa ’i laona moorilamolu. 9 Ma sa ni ti ne ’e thaea nia ’e too ’i laona folaalae nia tha God, sui ma nia ka maasusuala bana ’ana doorana, nia ’e too ’ua bana ’i laona maerodo. 10 Ma sa ni ti ne ka liothau ’ana doorana, nia ’e too sulia ’ana folaalae nia tha God. Ma ’e langi nia si faagaroa ta ngwane. 11 Ma sa ni ti ne ’e maasusuala ’ana doorana, nia ’e too ’ua ’i laona maerodo. Ma nia ka tatha ’i laona maerodo, ma ’e langi si thaitamana bo si kula ne ’e lea ’uria, sulia na maerodo ’e faarorodoa na maana. 12 - 14 Ngwela nau ki ’ae, nau ku kekeda kau fuamolu, sulia tha God ’e manatalukea naa na ta’alae kamolu ki sulia tha Kraes, ma molu ka thaitamana tha God na Maka. Ma nau ku kekeda kau fuamolu maka ki, sulia ne molu thaitamana na Kraes ne ’e too ’ua na mai ’ana thafalilana molaagali. Ma nau ku kekeda kau fuamolu daraa ki, sulia molu suukwai, ma na baelana tha God ka too ’ani kamolu, ma molu ka siitatha naa ’ana tha Saetan, na ngwane ne ’e ta’ae ka tatha. 15 Nia nee ku thaea fuamolu, ka langi molu si dooria na bibirangaa ta’ae ki ’ana mooria nee ma si doo ta’ae ki ’i laona molaagali. Lelea sa molu ka liothau ’ana molaagali, ’e langi molu si liothau bo ’ana tha God na Maka. 16 Na kwaidooria ’uria doo ta’ae ki, ma na doo ne imole ki da rikia ma da ka dooria, ma na totodaa ki ne ngwane ki da naunau ’ania, ma na doo ta’ae ki sui laona molaagali, ’e langi ta si doo ’urineri si lea bo mai faasia na Maka. Da lea sui bo mai faasia na molaagali. 17 Sui ta, na molaagali ma na doo ki sui ’i laona ne imole ki da dooria, kau funu. Ma sa ni ti ne ka ade sulia na kwaidooria nia tha God, nia kau too ’ana mooria firi. 18 Ngwela nau ki ’ae, suilana molaagali ’e karangi naa! Ma molu ka rongoa sui naa bae, na Maalimae tha Jisas Kraes kau dao mai. Ma ’ana si manga neri, na maalimae ’oro nia ki da dao naa. Nia nee, kolu ka thaitamana na suilana molaagali ’e karangi naa. 19 Na maalimae neri ki da lea naa faasi kolu, sulia ’e langi da si too mamana bo ’i laona ofulakolu na imole manata mamana ki. Ma lelea sa da too ’i laona ofulakolu na imole manata mamana ki, da ka too ofu ’ua bada fone kolu neri. Sui ta, ’ana si manga da lea naa faasi kolu ’urineri, ’e faatana ne kera teefau langi lau ngwane mamana ki ’i laona ofufua kolu. 20 Sui ta, tha Kraes na ngwane ne abu ’e fala sui naa Mangoedoo Abu fuamolu, fasi kamolu sui bo molu ka thaitamana na mamanaa. 21 Nau ku kekeda kau fuamolu langi lau sulia ne molu lalafusia na mamanaa. Nau ku kekeda kau fuamolu, sulia molu thaitamana na mamanaa, ma molu ka thaitamana laubo ne langi ta sukelae si lea mai faasia na mamanaa. 22 ’Urineri ma ni ti nee na ngwane susuke? Ta ngwane boroi ’ana ne thaea thasa tha Jisas ’e langi lau na ngwane fifilia nia tha God. Na ngwane ’urineri, nia nee na maalimae tha Jisas Kraes, sulia ’e otenia ’ana tha God na Maka ma na Ngwela nia. 23 Ma na imole ki sui ne da otekera ’ana Ngwela, da otekera laubo ’ana Maka. Sui ta, na imole ki sui ne da thaea thasa da manata mamana ’ana Ngwela, da too ofu laubo fonea Maka. 24 Molu ka alua si faarongolae ne molu rongoa ’ua na mai ’i laona liomolu. Ma lelea sa molu ka alua si faarongolae neri, molu ka too ofu fonea na Ngwela ma na Maka sulia dani. 25 Ma kolu ka too ’ana mooria firi ne tha Kraes ’e alangana ’uria falelana fuakolu. 26 Nau ku kedaa kau si doo nee ki fuamolu, fasi molu ka thaitamana ngwane ki ne da thasi ’uria sukelamolu. 27 Sui ta, tha Kraes ’e fala naa na Mangoedoo Abu fuamolu. ’E langi molu si rofe naa ’uria ta imole fasi ka toodoo lau fuamolu, sulia na Mangoedoo Abu ’e too naa fone kamolu. Ma na Mangoedoo Abu ne tha Kraes ’e fala fuamolu, ’e toodoo naa fuamolu sulia doo ki sui. Ma si doo ki sui ne ’e toolamana fuamolu ’e mamana, ma ’e langi si garo. Nia nee molu ka too ofu fonea tha Kraes, ilingia na Mangoedoo Abu ’e toodoo sulia fuamolu. 28 Ngwela nau ki ’ae, molu ka too ofu fonea tha Kraes, fasi ’ana si manga nia kau oli mai, ka langi kolu si mau, ma ka langi kolu si anggwa lau faasi nia ’ana ’idalae ’ana fe Dani neri nia kau dao mai ’ania. 29 Ma kamolu molu ka thaitamana sui naa ne tha God ’e ’o’olo. Nia nee, molu ka thaitamana laubo ne na imole ki sui ne da ilia doo ’o’olo ki, kera naa na ngwela nia ki tha God.
31 Molu ka manata fasi sulia tha God na Maka ’e liothaua ’asiana ’ani kolu! Na liothaua nia ’e baita ’asiana, nia nee ka ’alangi kolu ’ana ngwela nia ki, ma ka mamana naa. Na imole ki ’i laona molaagali ’e langi da si thaitamana ne kolu naa na ngwela nia ki tha God, sulia ’e langi da si thaitamana tha God. 2 Imole liliothau nau ki ’ae, kolu ngwela nia ki naa tha God nee, ma tha God si faatana ’ua fuakolu si tatalalae ne nia kau talakolu ’ania si manga neri nia kau dao mai. Sui ta, kolu thaitamana naa, ’ana si manga neri tha Jisas Kraes kau oli mai, kolu kau ilingi nia, sulia kolu kau riki nia mamana naa. 3 Ma na imole ki sui ne da kwaimaakwali ’urineri ’ana tha Kraes, da tanggi suli kera ’i talada da ka too folaa, ilingia tha Kraes ne ’e too folaa. 4 Ma imole ki sui ne da abulo ta’ae, da ’oia na bibirangaa nia ki tha God, sulia na abulo ta’alae naa ne na ’oilana bibirangaa nia ki tha God. 5 Ma kamolu molu thaitamana sui naa, tha Jisas Kraes ’e lea na mai fasi ka lafua na ta’alae kolu ki, ma ’e langi si too bo’ana ta ta’alae. 6 Ma sa ni ti ne ka too ofu fonea tha Kraes, ’e langi nia si too ngado bana ’uria abulo ta’alae. Ma sa ni ti ne ka too ngado bana ’uria abulo ta’alae, ’e langi nia si filoa ma si thaitamana bo tha Kraes. 7 Ngwela nau ki ’ae, molu si manata mamana ’ana ta imole ne kau suke kamolu. Sa ni ti ne ’e ilia doo ’o’olo ki, nia ’e ’o’olo naa ’i maana tha God, ilingia laubo ne tha Kraes ’e ’o’olo. 8 Ma sa ni ti nee ka too ngado bana ’uria abulo ta’alae, nia na ngwela nia tha Saetan, sulia tha Saetan ’e abulo ta’ae ’ito ’ua mai ’ana thafalilana molaagali. Aia, na Ngwela nia tha God ’e lea mai ’uria faafunuilana doo ki ne tha Saetan ’e ilia. 9 Ma na ngwela nia ki sui tha God, ’e langi da si too ngado bada ’ana abulo ta’alae, sulia da too naa ’ana mooria nia tha God ne ’e too ’ani kera. Ma ’e ’afitai fuada fasi da ka too ngado bada ’uria abulo ta’alae, sulia tha God naa na Maka kera. 10 Si doo neri ’e faatana na ’e’etelana ngwela nia ki tha God faasia na ngwela nia ki tha Saetan: Ta imole ne langi si abulo ’o’olo, ma ka langi si liothau ’ana doorana ki, nia ’e langi lau ngwela nia tha God. 11 Si faarongoa bae molu rongoa na mai ’ana thafalilae ’e ’urii: Kolu ka liothau ’ani kolu kwailiu. 12 Ma ka langi kolu si ilingia lau tha Kein, na ngwane bae tha Saetan ’e funguli nia, ma ka thaumaelia tha Ebol na ngwane ’i burina. ’Urifita nee tha Kein ka thaumaelia? Sulia si doo ki ne tha Kein ’e ilia ’e ta’ae, ma si doo ki ne tha Ebol ilia ka ’o’olo. 13 Doora ki ’ae, langi molu si kwele, lelea sa na imole ta’ae ki ’i molaagali da otekera ’ani kamolu. 14 Kolu thaitamana naa si doo neri: ’I nao mai, kolu too ’i farana suukwaia ’ana maea, sui ta, si manga nee kolu too naa ’ana mooria ne totoo firi. Kolu thaitamana si doo neri, sulia kolu liothau ’ana doora kolu ki. Ma sa ni ti ne langi si liothau ’ana doorana, nia ’e too ’ua ’i farana suukwaia ’ana maea. 15 Ma lelea sa ta imole ka liota’a ’ana doorana, nia na ngwane thaungwane. Ma molu ka thaitamana naa na ngwane ne ’e thaungwane ’e langi si too ’ana mooria firi. 16 Si manga tha Jisas Kraes ’e mae ’usi kolu, nia ’e faatana na bibirangaa fuakolu fasi kolu ka liothau ’ana imole ki. Nia nee kolu laubo, fulingana sa kolu ka nonimaabe laubo ’uria maelae ’usia na doora kolu ki. 17 Lelea sa ta ngwane ne too ’ana doo ki sui ne ’e ’atongia, ma nia ka rikia doorana ’e thasi bana ’uria ta si doo, sui ka langi si manatainia bo ngwane neri, ma ka langi si ’adomia bo, ’e ’afitai thasa nia ka thaea mamana thasa nia ’e liothau ’ana tha God. 18 Ngwela nau ki ’ae, ’e langi kolu si liothau bo ’ana tofa si baea bana. Kolu ka faatana liothaua mamana kolu ’ana si doo ki ne kolu ilia. 19 Si manga kolu liothau ’urineri, nia nee adea kolu ka thaitamana ne kolu too ’ana mamanaa, ma ka langi kolu si manata ’a’abo si manga kolu foasia tha God. 20 Sui ta, lelea sa na manatalakolu ’e tooketa kolu, kolu thaitamana na manatalana tha God ne baita ka talua na manatalakolu, ma nia ka thaitamana doo ki sui. 21 ’Urineri doora liliothau nau ki ’ae, lelea sa na manatalakolu ’e langi si tooketa kolu, ’e langi kolu si mau si manga kolu foasia tha God. 22 Ma kolu kau ngala ta si doo bana ne kolu gania tha God ’uria, sulia kolu roosulia si baea fifii nia ki, ma kolu ka ilia si doo ki ne ’e faanonithathala nia. 23 Aia, si baea fifii nia ’e ’urii: Kolu ka manata mamana ’ana tha Jisas Kraes na Ngwela nia, ma kolu ka liothau ’ani kolu kwailiu, ilingia bae tha Jisas Kraes ’e bae fifii mai ’ana fuakolu. 24 Ma sa ni ti ne ka roosulia si baea fifii nia ki tha God, nia ’e too ’ana tha God, ma tha God ka too laubo ’ani nia. Ma sulia na Mangoedoo Abu nee ’e fala fuakolu, ne kolu ka thaitamana ne tha God ’e too ’ani kolu.
41 Imole liliothau nau ki ’ae, langi molu si manata mamana ’ana baelada na imole ki sui ne da thaea thasa da too ’ana Mangoedoo Abu. Nia nee molu ka ilitooda fasi molu ka daotoona lelea sa na mangoedoo ne da too ’ania ’e ’ito mai faasia tha God. Sulia na profet susuke ’oro ki da lea naa ’ana fera ki sui. 2 Molu kau daotoona lelea sa nia ’e too ’ana Mangoedoo mamana faasia tha God, ma lelea sa molu ka ade ’urineri: Imole ki sui ne da thaea tha Jisas Kraes ne dao mai ma ka thau ’ana imole, na ngwane neri ’e too ’ana Mangoedoo ne ’ito mai faasia tha God. 3 Sui ta, lelea sa ta imole ne tofea si doo neri sulia tha Jisas, nia si too bo ’ania Mangoedoo neri ne ’e lea mai faasia tha God. Na mangoedoo ne nia ’e too ’ania, ’e lea ’ana mai faasia Maalimae nia tha Jisas Kraes. Ma kamolu molu rongoa sui naa na Maalimae nia tha Jisas Kraes kau dao mai, ma ’ana si manga neri nia ’e too naa ’i laona molaagali. 4 Ngwela nau ki ’ae, kamolu naa na imole nia ki tha God, ma molu ka siitatha naa ’ana profet susuke ki. Sulia na Mangoedoo Abu ne too ’ani kamolu, ’e suukwai ka tatha ’ana tha Saetan ne ’e too ’ana imole ta’ae ki ’i laona molaagali. 5 Ma na profet susuke neri ki, da bae sulia si doo ’ana ta’alana molaagali, ma na imole ta’ae ki ’i laona molaagali da roo sulida, sulia na profet neri ki kera na imole ki ’ana uuni imole ta’ae ki ’i laona molaagali nee. 6 Sui ta, kolu naa na imole nia ki tha God. Ma sa ni ti ne thaitamana tha God, nia ka roo suli kolu. Ma ni ti ne ’e langi lau na ngwane nia tha God, ’e langi ka si roo suli kolu. Nia nee adea kolu ka rikia ma kolu ka lio thaitamana na ’e’etelae ’i malutana na Mangoedoo mamana ma na mangoedoo susuke. 7 Imole liliothau nau ki ’ae, kolu ka liothau ’ani kolu kwailiu, sulia na liothaua ’e ’ito mai faasia tha God. Ma ni ti ne ka liothau, nia naa na ngwela nia tha God, ma nia ka thaitamana laubo tha God. 8 Ma sa ni ti boroi ’ana ne langi si liothau, ’e langi nia si thaitamana tha God, sulia tha God naa na liothaua. 9 Ma tha God ’e faatana liothaua nia fuakolu ’ana falelana mai tee fe Ngwela muutaia nia ’i molaagali, fasi kolu ka too ’ana mooria mamana sulia nia. 10 Aia, na liothaua mamana ’e langi lau thasa kolu liothau ’ana tha God, tha God ’ana ne ’e liothau ’ani kolu, ma nia ka fala mai Ngwela nia fasi ka ilingia na afuafulae ’uria lukelana ta’alae kolu ki. 11 Imole liliothau nau ki ’ae, sulia tha God ’e liothau ’ani kolu ’urineri, kolu ka liothau laubo ’ani kolu kwailiu. 12 Langi ta imole si rikia ’ua tha God. Sulia lelea sa kolu ka liothau ’ani kolu kwailiu, tha God ka too ’ani kolu ma na liothaua nia ka fono ’ani kolu. 13 Ma kolu thaitamana ne kolu too ofu fonea tha God ma nia ka too ofu fone kolu, sulia ’e fala naa Mangoedoo Abu nia fuakolu. 14 Ma meli ka rikia naa na Ngwela nia, ma meli ka thaea naa fuana imole ki ne tha God na Maka ’e fala na mai fasi ka faamooria imole ki sui ’i molaagali. 15 Ma lelea sa ta ngwane ka faatalo ’ana tha Jisas naa na Ngwela nia tha God, nia ka too ofu fonea tha God, ma tha God ka too ofu laubo fone nia. 16 Kolu thaitamana naa, ma kolu ka manata mamana naa ’ana liothaua ne tha God ’e too ’ania fuakolu. Tha God naa na liothaua, ma sa ni ti ne ka liothau, nia ’e too ofu naa fonea tha God, ma tha God ka too ofu naa fone nia. 17 Lelea sa kolu ka liothau mamana ’ana imole ki, na mooria kolu ’i molaagali ka ilingia laubo na moorilana tha Jisas Kraes. Ma lelea sa ’e ’urineri, ’e langi kolu si mau ’ana fe dani ni tooketalae. 18 Sa ni ti ne ’e too ’ana liothaua, ’e ’afitai nia ka mau, sulia si manga kolu liothau ’ana imole ki, ’e langi kolu si maungia na kwakwaelae nia tha God. Sui ta, ni ti ne langi si liothau ’ana imole ki, nia kau mau, sulia nia kau mau ’ana kwakwaelae nia tha God. Sulia lelea sa ta ngwane ka mau ’ana tha God, ’e faatana ne langi nia si liothau mamana bo ’ana imole ki. 19 Kolu liothau sulia tha God naa ne liothau ’ani kolu totongenao. 20 Lelea sa ta ngwane ka thaea thasa nia ’e liothau ’ana tha God, sui ma ka maasusuala ’ana doorana, nia na ngwane susuke. Lelea sa ’e langi nia si liothau ’ana doorana, na ngwane ne ’e rikia, ’urineri ’e ’afitai ’asiana ka liothau ’ana tha God ne ’e langi nia si rikia. 21 Ma si baea fifii nee tha God ’e fala fuakolu ’e ’urii: Sa ni ti ne ka liothau ’ana tha God, nia ’e liothau laubo ’ana doorana.
51 Imole ki sui ne da manata mamana ’ana tha Jisas naa na Kraes, na ngwane ne tha God ’e filia, kera naa na ngwela nia ki tha God. Ma na imole ki sui ne da liothau ’ana na Maka, da liothau laubo ’ana ngwela nia ki. 2 Aia, kolu thaitamana ne kolu liothau ’ana ngwela nia ki tha God, sulia kolu liothau ’ana tha God, ma kolu ka roosulia si baea fifii nia ki. 3 Ma lelea sa kolu ka liothau ’ana tha God, kolu ka faatana ’ana roosulilana si baea fifii nia ki. Ma si baea fifii nia ki si ’afitai bo fuakolu, 4 sulia na ngwela nia ki sui tha God, da siitatha naa ’ana ta’alae ki ’i laona molaagali. Ma kolu siitatha naa ’ana ta’alae sulia na manata mamanalae kolu ’ana tha Jisas. 5 Talifilia bo na ngwane ki ne da manata mamana ’ana tha Jisas naa na Ngwela nia tha God, sulia da siitatha naa ’ana ta’alae. 6 Tha Jisas Kraes naa na ngwane ne ’e dao mai fonea na kafo ’ana sisiuabulae ma si ’abu ’ana maelana. ’E langi nia si dao mai fonea na kafo bo talitoona, nia ’e lea ’ana mai fonea na roo si doo neri ki sui bo, na kafo ma si ’abu. Na Mangoedoo Abu ’e faarongo laubo ’ani nia, sulia na Mangoedoo ’e bae ’ana mamanaa. 7 Na olu si doo neri ki da faatai folaa ’ana tha Jisas fuakolu: 8 Na Mangoedoo Abu, ma na kafo, ma si ’abu. Ma olu si doo neri ki, da faatana bo tee si doo. 9 Kolu manata mamana ’ana baelana ngwane bana. Sui ta, na baelana tha God ne suukwai ka tatha, ma ka faamamanea sui naa sulia Ngwela nia. 10 Sa ni ti ne ’e manata mamana ’ana Ngwela nia tha God, nia ’e manata mamana ’ana si doo ne tha God ’e thaea sulia Ngwela nia. Sui ta, ni ti ne langi si manata mamana ’ana si doo ne tha God ’e thaea sulia Ngwela nia, nia ’e thaea tha God ’ana ngwane susuke, sulia ’e langi nia si manata mamana bo ’ana si doo ne tha God ’e thaea sulia Ngwela nia. 11 Ma si faarongolae ne tha God ’e faamamanea sulia Ngwela nia ’e ’urii: Tha God ’e fala naa mooria ne totoo firi fuakolu, ma na mooria neri ’e ’ito mai faasia Ngwela nia. 12 Ma sa ni ti ne ’e too ofu fonea Ngwela nia tha God, nia ’e too ’ana mooria ne totoo firi. Ma sa ni ti ne langi si too ofu fonea Ngwela nia tha God, ’e langi si too laubo ’ana mooria ne totoo firi. 13 Nau ku kedaa si doo nee fuamolu na imole ki ne molu manata mamana ’ana Ngwela nia tha God, fasi molu ka thaitamana ne molu too naa ’ana mooria ne totoo firi. 14 Ma kolu ka thaitamana ’okae ’ana ne tha God ’e rongoa na foalae kolu ki, ’ana si manga kolu gani nia ’uria ta si doo ne ’e lea sulia na kwaidooria nia. 15 Nia ’e rongo kolu bana si manga ki sui ne kolu gani nia ’ana. ’Urineri, kolu ka thaitamana laubo ne nia ’e fala si doo ki ne kolu gania faasi nia. 16 Ma lelea sa ’oko rikia ta doora ’amu ka ilia ta si doo ta’ae ne langi si maelia, ’e tala’ana ’oko foasia tha God fuana, ma nia ka fala mooria nia fuana. Nau ku bae sulia na ngwane ki ne ta’alae kera ki ’e langi si talaia kera ’ua ’uria maea. Sui ta, tee si ta’alae laubo ’e talaia imole ki ’uria maea. ’E langi kwasi thaea lau thasa molu ka foasia tha God fuana sulia si doo neri. 17 Si doo ki sui ne kolu ilia ka ta’ae, ’e garo sui bo. Sui ta, tai si ta’alae ki ’e langi si talaia bo imole ’uria maea. 18 Kolu ka thaitamana na ngwela nia ki tha God ’e langi da si ililado ’ana abulo ta’alae, sulia tha Jisas na Ngwela nia tha God ’e lio sulida, ma ’e ’afitai na ta’alae nia tha Saetan na ngwane ne ’e ta’ae ka naga kera. 19 Aia, kolu thaitamana sui naa ne kolu na imole nia ki tha God, ma tha Saetan ka ’inito faafia na imole ’e’ete ki ’i molaagali. 20 Kolu ka thaitamana laubo na Ngwela nia tha God ’e dao na mai, ma ka fala naa thaitamedooa fuakolu, fasi kolu ka thaitamana na God mamana. Ma kolu ka too ofu fonea na God mamana ’ana ofulae fonea tha Jisas Kraes na Ngwela nia. Nia naa na God mamana, ma na mooria ne totoo firi. 21 Ngwela liliothau nau ki ’ae, molu ka tanggi suli kamolu ’i tala’amolu faasia si doo ne tai imole ki da thaea ’ana tha God, sui ta ’e langi lau na God mamana.