1 Korint
11 Na kekedalae ne ’e lea mai faasi nau tha Pol fonea na doora kolu tha Susetenes. Tha God ’e fili nau sulia na kwaidooria nia fasi nau ku thau ’ana ta aposol ’ana tha Jisas Kraes. 2 Kamiria miri kekeda kau fuamolu imole ki ne molu manata mamana ’ana tha Jisas, ma molu ka too ’i laona na maetoaa ’i Korint. Tha God ’e fili kamolu, ma ka faa abu kamolu na imole nia ki, sulia na ’adolae kamolu fonea tha Jisas Kraes. Tha God ’e fili kamolu fonea na imole ki ’ana maetoaa ki sui ne da foasia tha Jisas Kraes, nee na Aofia kera, ma na Aofia kolu laubo. 3 Nau ku foa fasi tha God na Maka kolu ma na Aofia tha Jisas Kraes ka fala ’okaelae nia ma na enoenoa fuamolu. 4 Nau ku faabaitaa tha God sulia dani suli kamolu, sulia na ’okaelae nia ne ’e faatana fuamolu ’ana tha Jisas Kraes. 5 Tha God ’e fala naa doo ’okae ’oro ki fuamolu, sulia molu too ngado fonea tha Jisas Kraes. ’Urineri molu ka thaitamana ’okae ’ana doo ’oro ki sulia tha Jisas Kraes, ma molu ka faatalo ’okae laubo sulia nia. 6 Na doo ’okae ne ’e fala fuamolu, ’e faatana fuamolu ne na faarongolae ne meli faarongo kamolu ’ania sulia tha Kraes ’e mamana. 7 Ma sulia ’e ’urineri, molu ka ngala naa doo ’okae ki sui faasia tha God, ’ana si manga ne molu kwaimaakwali ’ana fe dani ne na Aofia kolu tha Jisas Kraes kau oli lau mai ’ania. 8 Ma nia naa kau faasuukwai kamolu lelea ka dao ’ana fe dani ’i’isi, fasi ka langi ta si doo ta’ae si too ’ani kamolu ’ana fe dani ne nia kau oli lau mai ’ania. 9 Kolu ka fiitoo ’ana tha God kau ade ’urineri fuamolu, sulia ’e fili kolu fasi kolu ka too kwaimani fonea tha Jisas Kraes na Ngwela nia ma na Aofia kolu. 10 Aia, doora nau ki ’ae, nau ku gani kamolu ’ana suukwaia nia tha Jisas Kraes na Aofia kolu, molu ka too faasia olisusuulae fone kamolu kwailiu, fasi ka langi ta tagalolae ’i malutamolu. Ma ’e ’okae fasi na manatalamolu ma na kwaidooria kamolu ki ka alua bo tee doo. 11 Nau ku thaea si doo neri, sulia ne tai ngwane faasia kwalafaa ni Kloe da faarongo nau ’ana thasa molu too ’ana olisusuulae ki fone kamolu kwailiu. 12 Ma tai imole ’ani kamolu da bae ’urii, “Nau na ngwane fafurongo nia tha Pol.” Ma ta ngwane ka thaea, “Nau na ngwane fafurongo nia tha Apolos.” Ma ta ngwane lau ka thaea, “Nau na ngwane fafurongo nia tha Pita.” Ma ta ngwane lau ka thaea, “Nau na ngwane fafurongo nia tha Jisas Kraes.” 13 Si doo neri ’e ta’ae ’asiana, sulia molu tolingia tha Jisas Kraes ’ana ofulae ’e’ete ki. ’E langi lau nau tha Pol bae ku mae fuamolu ’ana ’airarafolo! Ma ’e langi molu si sisiuabu ’ana thataku fasi molu ka thau ’ana bare ngwane fafurongo nau ki! 14 Nau ku faabaitaa tha God, sulia talifilia tha Krispus ma tha Gaeas bo ne nau ku faasisiuabu keerua. 15 Nia nee, ’e langi ta ngwane boroi ’ana si thaea ’e sisiuabu fasi nia ka thau ’ana na ngwane fafurongo nau. 16 (Aia, nau ku faasisiuabua laubo tha Stafanas fonea na ’aebara nia, ma ’e langi nau kwasi manatatoona sa ni ti lau ne nau ku faasisiuabua.) 17 Sulia tha Jisas Kraes ’e langi si odu nau mai ’uria faasisiuabulana imole ki. Nia ’e odu nau ’ana mai fasi ku faarongo ’ana Faarongolae ’Okae. Ma ’e langi nau kwasi bae ’ana liotooa ’ana molaagali, ade’ana ’urineri tai imole da ka manata mamana sulia na baea ’okae nau ma ’e langi lau sulia na mamanaa ’ana maelana tha Jisas Kraes ’ana ’airarafolo. 18 ’Ana si manga tai imole ki da rongoa faarongolae sulia na maelana tha Jisas Kraes ’ana ’airarafolo, da thasa na faarongolae neri na tofa doo bana. Ma na imole neri ki, tha God naa kau fala kwakwaelae fuada. Sui ta, kolu na imole ki ne tha God ’e faamoori kolu, kolu thaitamana na faarongolae neri naa na suukwaia nia tha God ’uria faamoorilana imole ki. 19 Sulia tha God ’e thaea ’i laona Kekedalae Abu ka ’urii, “Tai imole ki ’i seenena da thaea thasa da liotoo ma da ka too ’ana lioe ngwane ’o’olo ki. Sui ta, nau kwau faatana ne ’e langi da si liotoo bo, ma nau kwau faatana ne na manatalae doo kera ki kau sui.” 20 Nia nee, kolu thaitamana na liotooa kera imole ki ’i Grik, ma na liotooa kera imole ki ’i Jiu, ma na liotooa kera imole bae ’okae ki, nia kau tofa doo bana. Tha God ’e faatana ne na liotooa kera imole ki ’e oengwanea bana. 21 Tha God ’e liotoo ’asiana. Nia ne adea ma ka ’afitai fasi na imole ki da si thaitamana tha God ’ana na liotooa kera ’i talada. Tha God ’e dooria faamoorilana imole ki ne da manata mamana ’ana faarongolae ne meli faarongo ’ania, sui boroi ’ana imole ’oro ki da ka thaea na faarongolae neri ’e oengwanea bana. 22 Ma na imole ki ’i Jiu, da dooria da ka rikia na doo ni kwelelae ’ania ki, sui fatai da fi manata mamana. Ma na imole ki ’i Grik, da dooria rongolana na baea liotoo ki sui fatai da fi manata mamana. 23 Sui ta, meli faarongo ’ania tha Jisas Kraes fonea na maelana ’ana ’airarafolo. Ma na imole ki ’i Jiu da ka otekera ’ana si faarongolae neri. Ma na imole ki ’i Grik, da thaea na faarongolae neri si baea oengwanea bana. 24 Sui ta, fuana ni ti kera ne tha God ’e filida naa, ’ana Jiu ki, ma na imole ki ne langi lau Jiu laubo, na faarongolae neri sulia tha Jisas Kraes ne faatana suukwaia nia tha God fonea na liotooa nia. 25 Sui boroi ’ana imole ’oro ki da ka thaea na liotooa nia tha God na doo oengwanea bana, na liotooa nia tha God ’e tatha ka talua na liotooa kera imole ki. Ma sui boroi ’ana imole ’oro ki da ka thaea thasa na suukwaia nia tha God na doo faekwa bana, na suukwaia nia tha God, ’e suukwai ka tatha talua na suukwaia kera imole ki. 26 Aia, doora nau ki ’ae, ’e langi molu si manataburo ’ana toolae bae molu too mai ’ania ’i nao sui fatai tha God ka fi soe kamolu ’uria manata mamanalae. Sulia ne ’i maana imole ki, ange imole bo ’ani kamolu ne da too ’ana liotooa, ma na ’initooa. Ma ange imole bo ’ani kamolu ne da lea mai faasia na kulee ngwane too ofu ki. 27 Sui boroi ’ana ka ’urineri, tha God ’e fili kamolu na imole ki ne da thaea thasa molu oengwanea, fasi nia ka faa’idaa na imole ki ne da too ’ana liotooa. Ma nia ka fili kamolu na imole ki ne da thaea thasa molu maketho, fasi nia ka faa’idaa na ngwane ’inito ki. 28 Ma tha God ’e fili kamolu na imole ki ne da si faare baita ’ani kamolu, ma da ka otekera ’ani kamolu, ma da ka thaea ni kamolu na tofa doo ki bana, fasi nia ka nagaa na doo ki ne da thaea ’ana si doo baita ki. 29 Ma sulia ’e ’urineri, ’e langi ta imole si tala’ana ka thae’okae ’ani nia ’i tala’ana ’i naofana tha God. 30 Tha God naa ne alua fasi kolu ka too ngado fonea tha Jisas Kraes, ma tha God naa ne ka fala liotooa ki fuakolu ’ana tha Jisas Kraes. Ma tha God ’e ’olosi kolu sulia tha Jisas Kraes. Ma sulia tha Jisas Kraes laubo, ne tha God ’e lafu kolu, ma nia ka faa abu kolu naa fuana. 31 Ma ’e ilingia na Kekedalae Abu bae ’e thaea ka ’urii, “Sa ni ti boroi ’ana ne dooria ka bae rara’a, nia ka bae rara’a sulia si tae ne na Aofia ’e ilia.”
21 Iuka, doora nau ki ’ae, ’ana si manga bae ku dao mai siamolu ’uria baelae sulia si baea nia ki tha God fuamolu, ’e langi kwasi bae ’ana ta si baea ’ana liotooa ilingia na ngwane thaitamedoo ki. 2 Sulia ’ana si manga bae ku too fone kamolu, nau ku doori bae sulia talifilia bo tha Jisas Kraes ma na maelana ’ana ’airarafolo. 3 ’Urineri, ’ana si manga bae ku dao kau siamolu, nau ku maketho ma ku lebelebe, sulia nau ku mau. 4 Ma ’ana si manga ku bae fone kamolu, na baelaku ’e langi lau na liotooa ’ana molaagali. Nau ku faatalo ’aku ’ana na suukwaia nia na Mangoedoo Abu. 5 ’E ’urineri fasi na manata mamanalae kamolu ka si reri ’ana liotooa kera na imole ki bana, molu ka reri ’amolu ’ana suukwaia nia tha God. 6 Fuana imole ki ne manata mamanalae kera ki ’e suukwai naa ’ana tha God, nau ku bae fuada ’ana liotooa ki. Ma na liotooa ne ku faamanatai kera ’ania ’e langi lau faasia na ngwane liotoo ki ’ana molaagali nee, ma langi na imole ki ne da ’inito faafia na molaagali nee. Na ’initooa kera ki kau sui. 7 Sui ta, ma na toodoolae ne nau ku bae sulia ne na manatalae doo nia ki tha God, ne tha God ’e langi si faatai folaa ’ania fuana imole ki ’i nao. ’I nao mai, sui fatai tha God ka fi thaungana doo ki sui, nia ’e manata naa mai sulia ne nia kau ilia si lioe ngwane neri ’uria faa’okaelakolu ’i thalo. 8 Ma na ngwane ’inito ki ’ana molaagali nee ’e langi da si thaitamana si lioe ngwane neri. Lelea sa da thaitamana, ’e ’afitai da ka fotoinia Aofia ’inito ka tatha ’i thalofana ’airarafolo. 9 Sulia na Kekedalae Abu bae ’e bae ’urii, “Si doo ne tha God ’e kwaimaakwali ’ania ’uria falelana fuana imole ki ne da liothau ’ani nia, ’e langi ta ngwane si lio thaitamana, ma ’e langi si rongo thaitamana, ma ’e langi ta ngwane si thaitamana si doo neri.” 10 Tha God ’e faatana lioe ngwane neri fuakolu ’ana Mangoedoo nia, ne ’e thaitamana doo ki sui ma na manatalana tha God laubo. 11 Talifilia bo na ngwane ’i tala’ana ne thaitamana si tae ne ’e too ’i laona manatalana ngwane. Ma ka ’urineri laubo, na Mangoedoo Abu talifilia bo ne thaitamana si tae ne ’e too ’i laona manatalana tha God. 12 Ma ni kolu na imole ki ne kolu manata mamana, ’e langi kolu si manata ilingia imole ta’ae ki ’i laona molaagali. Sui ta, na Mangoedoo Abu faasia tha God ne too ’ani kolu fasi kolu ka thaitamana doo ki sui ne tha God ’e fala fuakolu. 13 ’E ’urineri kameli meli si toodoo lau ’ana liotooa kera na imole ki. Sui ta, na Mangoedoo Abu ne ’e ’adomi kameli meli ka toodoo ’ana doo mamana ki sulia tha God fuana imole ki ne da too ’ana Mangoedoo Abu ’i laona moorilada. 14 Ma na imole ki ne ’e langi da si too ’ana Mangoedoo Abu, ’e ’afitai da ka thaitamana doo mamana ki sulia tha God ne Mangoedoo Abu ’e faatana. Sulia na imole neri ki da thaea si doo ki na Mangoedoo Abu ’e faatana na tofa doo ki bana. ’E langi da si thaitamana si doo neri, sulia da thasi ’uria na Mangoedoo Abu ka ’adomi kera fasi da ka thaitamana si doo mamana neri. 15 Sui ta, na ngwane ne ’e too ’ana Mangoedoo Abu ’i laona moorilana, nia ’e tala’ana ka thaitamana doo ki sui faasia na Mangoedoo Abu. Ma na ngwane ne ’e langi si too ’ana Mangoedoo Abu ’i laona moorilana, nia si tala’ana ka thaitamana na ngwane ne too ’ana Mangoedoo Abu. 16 Sulia ne Kekedalae Abu bae ’e bae ’urii, “’E langi ta imole si thaitamana na manatalana na Aofia. Ma ’e langi ta ngwane si tala’ana laubo ’uria faamanatailana ’ana ta si doo.” Sui ta, kolu nee kolu too naa ’ana na Mangoedoo, kolu thaitamana naa na manatana tha Jisas Kraes.
31 Doora nau ki ’ae, si manga bae ku too ’ana fone kamolu, na birangamolu ’e ilingia na birangana imole ki ’i molaagali. Nia nee, ka langi kwa si toodoo fuamolu ilingia ne ku toodoo fuada na imole ki ne da too ’ana Mangoedoo Abu. Ma kamolu molu ilingia na ngwela ki, sulia na manata mamanalae kamolu ’ana tha Kraes ’e langi si suukwai ’ua. 2 Nia nee ku toodoo fuamolu ilingia ta gaa ne ’e faasusufia kae ngwela nia, ma ka langi si fala ’ua fanga ne sadi fuana. ’Ana si manga bae, ’e ’afitai ’ua fuamolu fasi molu ka thaitamana na toodoolae nau ki. Ma boroi ’ana si manga neri, ’e langi molu si tala’ana ’ua, 3 sulia na abulolamolu ’e ilingia na abulota’alae kera na imole ki ’i laona molaagali. Molu liota’ae, ma molu ka olisusuu fone kamolu kwailiu, ’e faatana ne kwaidoorilae ta’ae kamolu ki bo ne talai kamolu. Ma bibirangaa kamolu ka ilingia na imole ki ne ’e langi da si too ’ana Mangoedoo Abu. 4 Ma tai imole ’ani kamolu da ka bae ’urii, “Kameli na bare ngwane fafurongo nia ki tha Pol.” Ma tai imole ki ’ani kera da ka bae ’urii, “Kameli na bare ngwane fafurongo nia ki tha Apolos.” Na baelamolu neri ’e faatai folaa ’asiana ’ana bibirangaa kamolu ki ’e ilingia naa imole ki ne ’e langi da si manata mamana. 5 Molu ka manata fasi suli nau, tha Pol, fonea tha Apolos. Kamiria na roo ngwane rao nia ki tha God ’uria ’adomilamolu fasi molu ka manata mamana. Ma kamiria miri ilia bo ’amiria si tae ne na Aofia ’e fala fuamiria ’uria ililana. 6 Iuka, nau ku ilingia ta ngwane ne fasia na mingge doo ki. Ma tha Apolos ’e ilingia ta ngwane ne ’ikia mingge doo ki ne ku fasia ’ana kafo. Ma tha God ’ana ne fala mooria fuana mingge doo neri ki, ma ka ilia doo neri ki da ka tae mai. 7 ’Urineri, na ngwane ne fasi doo fonea na ngwane ne ’ikia mingge doo neri ki ’ana kafo, daru ka si ’inito bo. Tha God naa ne ’inito, sulia nia ne fala mooria fuana mingge doo ki fasi da ka tae. 8 Ma na ngwane ne fasi doo fonea na ngwane ne ’ikia ’ai ki ’ana kafo, daru rao ofu. Ma tee tee ngwane ’ana roo ngwane neri ki, tha God kau kwaiarangai keerua ’uria si raoa ki ne daru ilia. 9 Nau ku rao fonea tha Apolos fuana tha God. Ma kamolu naa ne, molu ilingia na raoa nia tha God ne miri rao ’i laona. Ma kamolu molu ilingia laubo na beu nia tha God. 10 - 11 Ma tha God ’e ’adomi nau sulia ku ilingia na ngwane liotoo ne thaungana beu. Ma ’ana si manga ku eta toodoo fuamolu, nau ku labungana bae ’ai ’ana beu neri. Ma talitoona bo tha Jisas Kraes ne na bae ’ai ’ana beu neri. Ma tai imole ’e’ete ki da thaungai ’i fafona bae ’ai neri ki. Ma ka ’okae fuana ni ti ne ’e rao ’ana beu neri, nia ka ade ’okae ’ana na raoa ne nia ’e ilia. 12 Ta ngwane boroi ’ana ne thaungai ’i fafona bae ’ai neri, nia ’e ilia raoa ’okae ilingia na ngwane ne thaungana beu ’ana doo ’okae ki ilingia gol, ma na silva, ma na fau ki ne liulana ’e baita. Ma langi nia ka ilia ta si raoa ta’ae, ilingia na ngwane ne thaungana beu ’ana ’ai ma na thao. 13 Ma si manga neri kau dao mai ’ana fe Dani nia tha Jisas Kraes ’uria keketoa, nia kau ilitoona raoa kolu ki ’ana ere. Ma lelea sa na raoa ta ngwane ’e ’okae, ’e ’afitai na ere ka nagaa. Ma lelea sa na raoa ta ngwane ka ta’ae, na ere neri kau naga teefau banaa ’ania. 14 Ma lelea sa na ere ka si nagaa na raoa ta ngwane, nia kau ngala kwaiaraa ’okae. 15 Ma lelea sa na ere ka nagaa na raoa ta ngwane, ’e langi si ngala ta kwaiaraa, sui ta, tha God kau faamooria. Sui boroi ’ana nia kau ilingia na ngwane bae tafi faasia na beu ne tharufia, ma ’e langi ka si laua naa ta si doo. 16 Aia, ma kamolu imole ki ne molu manata mamana, kamolu molu thaitamana tomone ne kamolu na beu abu nia ki tha God, ma na Mangoedoo nia tha God ’e too ’i laona moorilamolu. 17 ’Urineri, lelea sa ta ngwane ka faafunuia beu abu nia tha God, tha God boroi kau faafunui nia laubo. Sulia na beu nia tha God ’e abu ’asiana, ma kamolu naa na beu abu nia tha God. 18 Aia, ’e langi molu si suke kamolu ’i tala’amolu. Lelea sa ta imole ’ani kamolu ka manata thasa nia ta ngwane liotoo ’ana manatalana imole ki bana, ’e ’okae fasi nia ka otenia ’ana liotoo neri, fasi ka thau ’ana ngwane liotoo ’i maana tha God. 19 Sulia si tae ne na imole ki ’i laona molaagali da thaea ’ana na liotooa, nia na tofa doo bana ’i maana tha God. Sulia na Kekedalae Abu bae ’e bae ’urii, “Na ngwane liotoo ki, tha God ’e faatana ne na manatalada ’e garo.” 20 Ma tee si Kekedalae Abu ’e ’urii laubo, “Na Aofia ’e thaitamana thasa na manatalana ngwane liotoo ki ’e tofa doo bana.” 21 ’Urineri, ’e langi ta ngwane ’ani kamolu si bae rara’a bo sulia kamolu molu lea bo sulia tee ngwane toodoo. Ma na doo ki sui na doo kamolu ki: 22 Kameli, tha Pol, ma tha Apolos, ma tha Pita laubo, tha God ’e alua kameli na ngwane rao kamolu ki. Na molaagali, ma na mooria fonea na maea, ma na doo ki ne fuli ’ana si manga neri, ma ’ana si manga ne kau dao mai, tha God ’e fala laubo doo neri ki sui fuamolu. 23 Ma kamolu naa na doo nia ki tha Jisas Kraes. Ma tha Jisas Kraes, naa na doo nia tha God.
41 Ma fuameli imole ki ne meli toodoo, molu ka manatatoona kameli meli ilingia ngwane rao nia ki tha Jisas Kraes. Tha God ’e fale kameli ’uria toodoolae sulia na manatalae doo ki ne nia ’e langi si faatana ’i nao. 2 Tha God ’e fala si raoa nee fuameli, ma meli ka ilia naa si raoa ’okae nee. 3 - 4 ’Urii ma na raoa nau fone kamolu ’e ’okae ma laa ’e langi? Na Aofia ’i tala’ana ne kau filo nau ma ka thaitamana. ’Urineri ta si tae boroi ’ana ne kamolu ma langi ta imole boroi ka manata sulia si raoa nau ’e langi si ’inito bo. ’E langi kwa si thaitamana ta si doo ne ku ilia ka garo, sui ta, ’e langi si faatana lau ne nau ku ilia bo si raoa ’okae ki. ’Urineri boroi ’ana na Aofia ’ana ne kau thaea. 5 ’Urineri, ’e langi molu si thaea na raoa ta ngwane ’e ’okae ma langi ’e ta’ae, ’i nao ’ana si manga neri na Aofia kau oli laubo mai ’ana. ’Ana si manga neri, nia kau faatana na manatalae agwa kera imole ki fonea na doo thaufangailana ki sui. Ma si manga neri, tha God naa kau faabaitaa na imole ki ka tala’ana ilidoolae kera ki. 6 Doora ki ’ae, ’ana si manga bae ku bae sulia tha Apolos ma ni nau, nau ku dooria molu ka thaitamana si baea ’urii, “Molu ka roosulia si tae ne na Kekedalae Abu ’e thaea.” Ma ka langi molu si faabaitaa ta ngwane toodoo ne ’okae ka talua ta imole. 7 Ma ’e langi molu si fiia thasa molu baita ka talua ta ngwane. Tha God ’e tofa fala na doo ki sui fuamolu ne molu too ’ania. Nia nee, ka langi molu si tala’ana bae naunaulae, sulia tha God talifilia bo ne fala si doo neri ki fuamolu. 8 Molu manata garo sulia ne molu too naa ’ana doo ki sui ne molu ’atongia. Ma molu ka manata garo laubo sulia ne molu fiia thasa molu too naa ’ana doo ’okae ki sui. Ma molu ka manata garo laubo sulia ne molu fiia thasa molu ilingia na ngwane ’inito ki, sui ta, kameli na aposol ki ne ’e langi. Aia, nau ku dooria fasi si manga neri ka dao naa fuamolu ’uria toolae naa ’i laona ’initooa fasi kameli laubo meli ka ’inito laubo fone kamolu. 9 Nau ku thaea si doo neri, sulia ku fiia thasa tha God ’e alu kameli, na aposol ki, kameli na ngwane kelangwanea ki, ilingia na imole ki ne da ketoa ’uria maea, fasi na imole ki sui fonea na enselo ki laubo da ka rikia maelameli. 10 Ma na imole ’oro ki da thaea thasa meli oengwanea bo ’ameli sulia na raoa kameli fuana tha Jisas Kraes. Sui ta, kamolu molu thaea thasa molu liotoo sulia molu manata mamana ’ana tha Jisas Kraes. Ma kera da thaea laubo thasa kameli meli maketho. Sui ta, molu thaea thasa molu suukwai. Ma da ka otekera ’ani kameli, da ka faare baita ’ada ’ani kamolu. 11 Ma kameli nee, si manga neri boroi, meli fiolo bo ’ameli, ma meli ka maelikuu bo ’ameli, ma na maku kameli ki ka ta’ae, ma da ka ulasi kameli, ma ka langi laubo ta beu ’ameli. 12 Ma na nonimeli ’e dadaola ’asiana sulia na rao suukwailameli. Aia, si manga na imole ki da kwalangi kameli, meli ka gania tha God fasi ka faa’okae kera. Ma si manga da ilia doo ta’ae ki ’ani kameli, ’e langi meli si firu bo fuada. 13 Ma si manga da bae naga kameli, meli ka olisida ’ana si baea ’okae ki. Ma lelea ka dao boroi ’ana si manga neri, na imole ’oro ki ’i laona molaagali da thaea thasa kameli meli ilingia naa tafu. 14 Langi kwa si kedaa si doo ne ki ’uria faa’idalamolu, sui ta, nau ku dooria kwau faamanatai kamolu. Sulia molu ilingia na ngwela nau ki ne ku liothau ’ani kera. 15 Sui boroi ’ana imole ’oro ki da ka toodoo fuamolu sulia tha Jisas Kraes, tee ngwane bo ne ’e ilingia na maka kamolu. Sulia nau ku faatalo ’ania na Faarongolae ’Okae fasi molu ka manata mamana ’ania, ma nau na ngwane ilingia ta maka fuamolu. 16 Nau ku ilingia naa maka kamolu, nau ku gani kamolu fasi molu ka ilingi nau ’ana si doo ki ne ku ilia. 17 Nau ku fala kau tha Timoti siamolu, fasi molu ka too sulia na bibirangaa neri. Nia ’e ilingia na ngwela nau ne nau ku liothau ’ania, ma nia ka rao ’okae fuana Aofia. Tha Timoti nee na kau ’adomi kamolu, ade’ana ’urineri molu ka manataburo ’ana bibirangaa ’o’olo ne tala’ana imole ki ne da manata mamana ’ana tha Jisas Kraes. Nau ku roosulia na bibirangaa ’o’olo neri, ma ku toolamana ’i malutana imole manata mamana ki sui ne ku maatooda. 18 Aia, ma tai imole ’ani kamolu, da ka thaea thasa ’e langi kwa si lea lau mai ’uria maatoolamolu. Ma da ka bae rara’a ’asiana sulida ’i talada. 19 Sui ta, lelea sa na Aofia ’e dooria, nau kwau lea ’ali’ali kau siamolu. Ma si manga kwau dao kau, nau kwau rikia lelea sa na imole ki ne da bae rara’a da too naa ’ana suukwaia, ma ka langi lau tofa si baea ki bana ne da thaea. 20 Si manga tha God ’e ’inito faafi kolu, na doo baita ’e langi lau si baea ki, na suukwaia nia ’ana. 21 Aia, ma na tae ne molu dooria? Lelea sa ’e langi molu si abulo naa faasia na abulota’alae kamolu ki, nau kwau lea mai siamolu ’uria balufilamolu. Sui ta, lelea sa na ilidoolamolu ’e ’okae, na daolaku mai ’i siamolu kau ’okae laubo, ma kwau faatana fuamolu na liothaua nau ma na ade okaelaku.
51 Aia, nau ku rongoa thasa tee ngwane ’amolu na abulolana ’e ta’ae ’asiana. Da thaea na ngwane neri ’e garoa na gaa rua nia. Ma na ngwane ki ne ’e langi da si manata mamana boroi, ’e langi da si alafaafia abulolae ’urineri. 2 Ma ’urifita nee molu ka bae rara’a bo ’amolu, sui boroi ’ana ta imole manata mamana ka ade ’urineri. Ma ’e ’okae fasi molu ka kwaimanatai. Ma ka ’okae laubo lelea sa molu si alafaafia nia ka too ’i malutamolu. 3 - 4 Si manga neri nau ku too tau boroi ’aku faasi kamolu. Sui ta, ’e ilingia bana thasa ku too baku fone kamolu, sulia na manatalaku ’e fii ’asiana suli kamolu. Ma nau ku ketoa na ngwane ne ilia si doo ta’ae ’urineri. Nau ku tala’ana ketolana sulia na suukwaia nau faasia na Aofia kolu tha Jisas. ’Ana si manga molu ofu, ’e ilingia ne nau ku too baku fone kamolu laubo, ma meli ka too ’ana suukwaia faasia na Aofia kolu tha Jisas. 5 Ma ’ana suukwaia neri, nau ku bae fifii fasi molu ka ekwatana naa na ngwane neri fasi tha Saetan ka nagaa ’ana nonina, fasi na mangona ka moori faasia na kwakwaelae ne tha God kau fala ’ana fe Dani ne na Aofia tha Jisas kau oli mai ’ania. 6 ’E langi si ’o’olo fasi molu ka bae naunau! Sulia molu thaitamana ne si baea bae ’e bae ’urii, “Ta kae si isi bana ne ’e tathafia ’i laona gwe kumu lalau ’ana berete.” Ma ’e ’urineri laubo, ta ngwane ne abulolana ’e ta’ae, ’e tala’ana kau talaia imole ’oro ’uria lealae sulia nia. 7 Nia nee, ’e ’okae fasi molu ka lafua na ngwane ta’ae neri ne ilingia isi faasi kamolu, fasi ka langi ta ta’alae ’i malutamolu. Ma lelea sa molu ka roosulia si doo neri, molu kau ilingia na berete faalu ne langi ta isi ’i laona. Ma nau ku thaitamana kamolu molu ’urineri naa. Sulia ne na fafangaa kolu ’e kwaimaakwali naa, sulia tha Jisas Kraes ne ’e ilingia na kae sipsip ne da afuafu naa ’ania ’ana fafangaa kera Jiu ne da ’alangia ’ana “Fafangaa ’ana Tathalae.” 8 Ma sulia ne ’e ’urineri, si manga kolu fanga ’ana na “Fafangaa ’ana Tathalae,” ’e langi kolu si ’ania berete ’ua naa ne ’e too ’ana isi ’ana abulota’alae ’i laona, kolu ’ania ’akolu na berete ne ’e langi ta isi ’ana abulota’alae ’i laona, sulia na abulolakolu ’e ’o’olo teefau naa, ma na baelakolu ka mamana laubo. 9 ’I laona kekedalae bae ku fala kau fuamolu ’i nao, nau ku thaea kau fuamolu ’e langi molu si ’ado lau fonea imole ki ne na oea ’e too ’i laona moorilada. 10 Ma ’e langi kwasi bae sulia imole ki ne langi da si manata mamana ’ana tha God ne na oea ’e too ’i laona moorilada, ma langi na ngwane ’agudoo, ma langi na ngwane bebeli, ma na imole ki ne da foasia nunui doo ki. Lelea sa kolu too ’i laona molaagali nee, ’e ’afitai kolu ka too faasia na imole ta’ae ki ’urineri. 11 Sui ta, si doo bae ku bae sulia ’e ’urii, ’e langi kolu si ’ado fonea na imole ki ne da thaea thasa da manata mamana ’ana tha Jisas Kraes, ma na oea ka too ’i laona moorilada, ma da ka ’agudoo, ma da ka foasia nunui doo ki, ma da ka bae ta’ae sulia imole ki, ma da ka kuu ’asiana na waen, ma da ka beli. ’E langi molu si fanga fonea imole ’urineri ki. 12 - 13 Imole ki ne ’e langi da si manata mamana ’ana tha Jisas Kraes, ’e langi kolu si tala’ana tooketalada. Tha God ’ana ne kau tooketa kera. Sui ta, lelea sa ta ngwane ’akolu na imole manata mamana ki ’e ilia ta si doo ta’ae ’urineri, kolu tala’ana kolu kau tooketa nia. Sulia na Kekedalae Abu bae ’e bae ’urii, “Lelea sa ta ngwane ’amolu ne ’e ta’ae ma ka too ’i laona figua kamolu, molu ka taria faasia ofulae fone kamolu.”
61 Si manga ta ngwane ’amolu ’e olisusuu fonea ta ngwane ne manata mamana laubo, ’e langi si ’okae fasi nia ka lea siana ngwane ni keketoa ki ne langi da si manata mamana ’ana tha Jisas Kraes ’uria ’olosilana. ’E ’okae fasi nia ka lea ’ana siana imole nia ki tha God, fasi da ka ’olosia si doo neri. 2 Fulingana sa molu ka thaitamana bo ne imole nia ki tha God dau ketoa imole ki ’i laona molaagali. Ma sulia molu tala’ana adelae ’urineri, molu thaitamana laubo ’ana ne molu kau ’olosia bo ’amolu kae si doo ki ’ana si manga neri. 3 Fulingana sa molu ka thaitamana bo ne kolu kau ketoa laubo na enselo ki. Nia nee, ’e tatha ’asiana fuakolu ne kolu tala’ana ’olosilana kae si doo ki ’ana si manga neri. 4 Lelea sa ta ngwane ’amolu ka olisusuu fonea ta ngwane laubo ne ’e manata mamana, ’e langi si ’okae fasi nia ka lea siana ngwane ki ne ’e langi da si manata mamana ’uria ’olosilana. 5 Si manga ta ngwane ’amolu ’e lea siana ta ngwane ni keketoa ’urineri, ’e ta’ae ’asiana ma ’e tala’ana ’idalae ’ania. Nau ku fiia alamia tai imole manata mamana ki ’i laona maetoaa kamolu da liotoo, ma da ka thaitamana bada ’olosilana si doo ki ’i malutamolu. 6 Sui ta, kamolu, si manga ta ngwane ’e olisusuu fonea ta ngwane laubo ’i malutamolu, nia ka lea siana na ngwane ni keketoa ne langi si manata mamana ’ana tha Jisas Kraes ’uria ’olosilana. Ma si doo neri ’e langi si ’okae! 7 Ma ’ana si manga ne molu olisusuu fone kamolu kwailiu, ’e faatana ne ’e langi molu si roo bo sulia na kwaidoorilae nia tha Jisas Kraes. Na kwaikefusilae ne molu ilia si manga neri ’i maana imole ki ne langi da si manata mamana, ’e langi si ’okae. ’E tee ore ’okae lelea sa molu ka alamatana dooramolu ki da ka ilia si doo ta’ae ki ’ani kamolu, ma da ka ngala naa si doo kamolu ki, ma ka langi molu si lea siana na ngwane ni keketoa ki. 8 Sui ta, kamolu imole ki ne molu manata mamana, molu ade ta’ae fuamolu kwailiu, ma molu ka beli kamolu kwailiu naa. 9 Kamolu molu thaitamana na imole ki ne abulolada ’e ta’ae, ’e ’afitai da ka too ’i laona toolae nee tha God ’e ’inito faafia. ’E langi molu si manata mamana ’ana ta sukelae. Na imole ki ne da too ’ana oea, ma na imole ki ne da foasia nunui doo ki, ma na imole kaubare ki, ma na imole ki ne da kaubare fonea imole ki, ma na keni ki ne da kaubare laubo fonea keni ki, 10 ma na ngwane bebeli ki, ma na ngwane ’anggu doo ki, ma na imole ki ne da kuu lilinge ’ana waen, ma na imole ki ne da bae ta’ae sulia imole ’e’ete ki, ma na ngwane susuke ki, ’e langi ta imole ’ada si ruu ’i laona ofuofulae ne tha God ’e ’inito faafia. 11 ’Ana si manga bae ’e sui na kau, tai imole ’amolu ne abulolada ’e ’urineri. Sui ta, ’ana si manga neri, tha God ’e manatalukea naa na abulota’alae kamolu ki, ma molu ka folaa naa faasia na abulota’alae kamolu ki, ma tha God ka konitai kamolu naa fuana ’i tala’ana. Sulia na Aofia kolu tha Jisas Kraes fonea na Mangoedoo nia God kolu daru adea molu ka ’o’olo naa. 12 Ta ngwane ’amolu ’e bae ’urii, “Nau ku thaitamana kwau ilia baku doo ki sui.” Nau ku olisi ’urii ’ani nia, “Sui boroi ’ana ’oko thaitamana ililana doo ki sui, na doo ki sui ’e langi si ’okae fuamu.” Nau laubo, ku thaitamana ku ilia baku na doo ki sui. Sui ta, ’e langi kwa si alamatana ta si doo ka ’inito faafi nau. 13 Ma ta ngwane ’amolu lau ’e bae ’urii, “Na fanga naa na doo fuana rakena ngwane, ma na rakena ngwane naa na doo ’uria fanga.” Nau ku olisi ’urii laubo ’ania, “Tha God kau faasuia na fanga fonea na rakena ngwane.” Ka ’urineri laubo, na nonikolu ’e langi lau doo ’uria kaubarelae, sulia na Aofia ’e thaungana nonikolu fuana ’i tala’ana. Ma na Aofia ’e tanggi laubo sulia nonikolu. 14 Tha God ’e taea na Aofia tha Jisas faasia na maea, ma nia kau taea laubo nonikolu ’ana suukwaia baita nia. 15 Molu thaitamana kolu imole ki ne kolu manata mamana, na nonikolu naa ta bali bo ’ana nonina tha Jisas Kraes. Nia nee, ’e langi si tala’ana kolu kau ilia ta si doo ’ana ta bali ’ana nonina tha Jisas Kraes ’uria ofulae fonea ta keni kaubare! 16 Fulingana sa molu ka thaitamana ne lelea sa ta ngwane ’e tio fonea ta keni kaubare, na roo nonidarua ’e thau naa ’ana tee si noni. Sulia na Kekedalae Abu bae ’e bae folaa sulia ka ’urii, “Na roo imole neri ki daru thau naa ’ana tee si noni.” 17 Aia, ma na ngwane ne manata mamana ’ana Aofia tha Jisas, na moorilana fonea na moorilana tha Jisas daru alua bo tee doo. 18 Molu ka too faasia kaubarelae. Na ta’alae ki sui ne imole ki da ilia ’e langi si nagaa bo nonida, sui ta, ma imole ki ne da too ’ana oea da nagaa sui naa nonida ’i talada. 19 Fulingana sa molu ka thaitamana bo ne na nonikolu nee na beu abu nia na Mangoedoo Abu ne tha God ’e fala fuakolu. ’Urineri, ’e langi lau kolu ’i tala’akolu ne ’e ’inito faafia na nonikolu, sulia kolu ne na doo nia ki tha God. 20 Sulia tha God ’e foli olitai kolu ’ana maelana Ngwela nia. Nia nee, na doo ki sui ne molu ilia ’ana nonimolu, molu ka ade ’okae ’ana ’uria faare ’initolae ’ana tha God.
71 Aia, nau ku kedaa na kau si olisilae nau sulia na soetoolae kamolu ki bae molu kekeda ma molu ka soetalafana mai. Molu soetoo ’urii bae, “’Urii ma, ’e ’okae bana fuana ngwane ka langi si tio ofu fonea ’afe nia?” 2 Ma nau ku thaea, ’e ’okae fasi ngwane ki sui da ka too ’ana ’afe, ma ka ’okae laubo fuana keni ki sui da ka too ’ana arai, fasi da ka too faasia kaubarelae. 3 Ma ’e ’okae fasi na arai ka tio ofu ’ana fonea ’afe nia. Ma ka ’okae laubo fuana ’afe ka tio ofu ’ana fonea arai nia. Sulia ’e langi si ’okae fuana ta imole ’adarua ka otenia ’ana ta imole ai. 4 Sulia na keni ’e langi si baita ’ana nonina ’i tala’ana, na arai ’ana ne baita ’ana ’afe nia. Ka ’urineri laubo fuana ngwane, ’e langi si baita ’ana nonina ’i tala’ana, na ’afe nia laubo ne ’e baita fuana. 5 ’E langi si ’okae fasi daru ka too ’e’ete faasi keerua kwailiu. Sui boroi ’ana ka ’urineri, lelea sa daru alafaafia toolae faasia tio ofulae ’ana ta kae si manga fasi daru ka foa suukwai, ’e ’okae bana. Sui ’ali’ali laubo daru ka oli daru ka tio ofu lau, ade’ana ’urineri tha Saetan ka siitatha ’ani keerua ’ana ilitooa ki, sulia ’e ngwaluda fuamolu ’uria roolae sulia na kwaidooria ta’ae ki. 6 Molu ka gwagwa alinga ’okae: Nau ku alamatana fasi daru ka too faasia tio ofulae fonedarua kwailiu sulia ta kae si manga kukuru. Sui ta, ma langi nau kwa si bae fifii fasi molu ka ade naa ’urineri. 7 ’I laona manatalaku ’i tala’aku, lelea sa imole ki sui da ka too ilingi nau ne langi kwasi too ’ana ’afe, nia ’e ’okae bana. Sui ta, nau ku thaitamana na falelae ne tha God ’e fala fuakolu ’e langi ka si bobola teefau. Sulia na falelae nia fuana tai imole ki ’e ngwaluda ’uria toolae talifilida. Ma na falelae nia fuana tai imole ki lau, ’e ngwaluda bana fasi da ka too ofu ’i laona maikwainalae. 8 Si manga neri ku bae fuana ’oru ngwane ki ma na ’oru keni ki, nau ku thaea ’e ’okae ’asiana lelea sa molu ka lio mai suli nau ne langi kwa si arai. 9 Sui ta, lelea sa ’e ’afitai fuana tai imole ’amolu fasi molu ka otekamolu ’ana na kwaidooria kamolu ki ’ana noni, ’e ’okae fuamolu fasi molu ka ’afe ma molu ka arai. Sulia ’e ’okae fuamolu fasi molu ka arai ’amolu ma molu ka ’afe ’amolu ade’ana ’urineri molu ka too ’ana ’afitaia ’ana kwaidooria ’ana noni. 10 Si manga neri laubo nau ku bae fuamolu ngwane ki ne molu arai sui naa ma molu ka ’afe sui naa, nau ku thaea na bibirangaa neri ’e langi lau sulia lioku, na bibirangaa nia na Aofia ’ana neri. Na ’afe ka langi si lukatana arai nia. 11 Ma lelea sa ta ’afe ka lukatana naa arai nia, ’e ’okae fasi nia ka oli naa siana fasi daru ka too ofu lau. Ma lelea sa ’e langi, ’e langi ka si tala’ana nia ka ’afe lau. Ma na ngwane ’e langi ka si lukatana ’afe nia. 12 Nau ku bae lau fuamolu imole manata mamana ki ne molu adea ta imole ne langi ka si manata mamana. Nau ku thaea si baea nau nee ’i tala’aku bana, ma ’e langi lau si baea fifii nia na Aofia. Lelea sa ta ngwane manata mamana ’ana tha Jisas Kraes, ma nia ka too ’ana ’afe ne langi si manata mamana, ma na keni neri ka langi si dooria lukatailana arai nia, na ngwane neri laubo ’e langi ka si lukatana ’afe nia. 13 Ma ka ’urineri laubo fuana keni ne manata mamana. ’E langi nia si lukatana arai nia ne ’e langi si manata mamana lelea sa na arai nia ’e dooria daru ka too ofu badarua. 14 ’E langi ’o si ’akwasia sulia ni nia ta keni manata mamana, ma na arai nia ka langi si manata mamana, tha God kau faafaalua laubo na arai nia, sulia na ’afe nia. Ma ’e ’urineri laubo, tha God kau faafaalua na keni ne langi si manata mamana sulia na arai nia ne manata mamana ’ana tha Jisas Kraes. Lelea sa si doo neri ’e langi si mamana, na ngwela keerua ki da ka ilingia na ngwela kera imole ki ne langi da si manata mamana. Sui ta, kolu thaitamana naa ne na ngwela kera ki na ngwela nia ki tha God naa. 15 Ma lelea sa ta imole ’amolu ’e too ’ana arai ma langi ta ’afe ne langi si manata mamana, ma na arai neri ma langi na ’afe neri ka otenia ’ania, molu ka alamatana fasi na arai neri ma langi na ’afe neri ka lea na ’ana. Sui boroi ’ana tha God ka alamatana si doo neri, nia ’e dooria molu ka too ’ana enoenoa fonea ’afe ma langi na arai ne langi si manata mamana ’ana tha Jisas. 16 Sulia na imole ki ne da manata mamana, ’e langi da si thaitamana ’okae ’ana ne ’afe nia ma langi na arai nia kau manata mamana, ma langi lelea sa ’e langi ka langi bo. 17 Dooraku ki ’ae, toolamolu ’e ’urifita si manga ne molu manata mamana ’ana tha God, ’e langi si ’okae ne molu ka bulasia, sui ta, molu thaitamana naa ne molu ka ekwatana ta’alae kamolu ki. Nia nee na Aofia ’e dooria. Nia naa ne toodoolae nau fuana imole manata mamana ki ’ana maetoaa ki sui. 18 Sulia ’e ’urineri, ta ngwane ne ’e ’irimamalafoa sulia na bibirangaa kera imole ki ’i Jiu, lelea sa nia ka manata mamana ’ana tha Jisas Kraes, ’e langi nia si lafua na mamalafoa neri ’ana ’irimamalafoalae. Ma ka ’urineri laubo, lelea sa na ngwane ne ’e langi lau Jiu, ma nia ka manata mamana ’ana tha Jisas Kraes, ’e langi nia si ’irimamalafoa. 19 Sulia lelea sa ta ngwane ka ’irimamalafoa ma langi ka langi, nia ka si ’inito bo. Sulia si doo ’inito ne, nia ’e roosulia na bibirangaa nia ki tha God. 20 Kamolu teefau, molu ka lea sulia toolae ne molu too mai ’ania ’i nao si manga molu thafali manata mamana ’ana Aofia kolu. 21 Sulia ’e ’urineri, lelea sa ’oe na ngwane tofa rao ’ana si manga ’o manata mamana, ’e ’okae bana, ma ’oko takwe suukwai naa. Sui ta, lelea sa ka ngwaluda bana fuamu ’oko too thakwadoloa, ’oko fala ’oe ’i tala’amu ’uria too thakwadoloalae. 22 Si manga na Aofia ’e soea ta ngwane ne tofa rao, nia ’e alua nia ka thau ’ana ngwane thakwadoloa nia na Aofia. Ma ka ’urineri laubo na ngwane too thakwadoloa ne tha Jisas Kraes ’e soea, nia ne ngwane tofa rao nia tha Jisas Kraes. 23 Aia, tha God ’e foli kamolu ’ana na maelana tha Jisas Kraes. Nia nee, ka langi molu si tofa rao fuana imole ki. 24 Dooraku ki ’ae, na toolae ’urifita ne molu too mai ’ania si manga molu manata mamana ’ana tha God, ’e langi si ’okae fasi molu ka talana, molu thaitamana naa ne molu ka ekwatana ta’alae kamolu ki. 25 Aia, si soetoolae kamolu sulia na ngwane ne langi si too ’ua ’ana ta ’afe ma na ai ne langi si too ’ua ’ana ta arai, ’e langi kwasi too ’ana ta si baea fifii faasia na Aofia. Sui ta, nau ku kedaa na manatalaku bana, ma molu ka fiitooku sulia nau na ngwane ne na Aofia ’e manatai nau. 26 Ma na manatalaku ’e ’urii: Sulia kolu imole manata mamana ki kolu daotoona ’afitaia baita ’ana si manga neri, ’e ’okae fasi molu ka too ’ana toolae ne molu too mai ’ania ’i nao. 27 Nia nee, lelea sa ta ngwane ka too naa ’ana ’afe, ’e langi nia si lukatana naa. Ma lelea sa ta ngwane ’e langi si too ’ua ’ana ta ’afe, ’e langi nia si rofe lau ’uria ta keni ’uria adelana. 28 Ma boroi ’ana ka ’urineri, lelea sa ta ngwane ka arai, nia ’e langi si garo bo. Ma ka ’urineri laubo, lelea sa ta keni ka ’afe, nia ’e langi si garo bo. Aia, sulia si tae ne nau ku thaea fuamolu ’e ’okae lelea sa ’e langi molu si arai ma langi molu si ’afe, sulia nau ku dooria fasi ka langi molu si too ’ana ’afitaia ’oro ’ana molaagali. 29 Aia, doora ki ’ae, na maalutana si baea nau ’e ’urii: Na moorilakolu ’e langi si tau bo ’i laona molaagali nee. ’E langi bo ta si doo ’ana ne lelea sa ’oko arai ma langi ka langi. 30 ’E langi bo ta si doo lelea sa ’oko angi, ma langi ’oko ngwaela, ma langi ’oko foli, ma langi ’oko langi dodoloa ’asiana ’ana ta si doo. 31 Nia ’e ’urineri laubo, na ngwane ne manata ’a’abo sulia doo ki ’ana molaagali, kera ’e langi da si ade lau ilingia na doo neri ki ’e baita ’i laona moorilada, sulia na molaagali nee ’e karangi sui naa. 32 Aia, nau ku dooria fasi na ’afitaia ki ’i laona molaagali nee ka langi si faa’aberotai kamolu. Na ngwane ne ’e langi si arai, ’e ’a’abo bana ’ana raoa fuana Aofia. Nia ’e dooria faanonithathalalana Aofia. 33 Sui ta, na ngwane ne arai naa, nia ’e manata ’asiana sulia si doo ki ’ana molaagali, sulia ’e dooria faanonithathalalana ’afe nia. 34 Ma ’ana si manga ki sui nia ’e manata sulia roo si doo, na kwaidooria nia na ’afe nia ma na kwaidooria nia na Aofia. Ma ka ’urineri laubo, na keni ne ’e langi si too ’ana arai, nia ’e manata bo ’uria na raoa fuana na Aofia, sulia nia ’e fala naa moorilana ma na nonina fuana tha God. Ma lelea sa ta keni ’e too ’ana arai, nia ’e manata bana sulia si doo ki ’i laona molaagali, sulia ’e dooria faanonithathalalana arai nia. 35 Ma ’e langi kwa si thaea si doo neri ki ’uria falelana ’afitaia fuamolu. Nau ku thaea ’aku si doo neri ki, sulia ku dooria ’adomilamolu, fasi molu ka rao ’okae, ma molu ka liothau ’ana Aofia, ma ka langi lau si doo ’uria luilamolulae faasia. 36 Aia, lelea sa da ka alu faafia ta thaari fuana ta ngwane daraa, ma lelea sa na kwaidooria nia ’ana noni ka baita ’asiana, ma nia ka dooria adelana thaarii neri, ’e ’okae fasi nia ka adea ’ana. Ma lelea sa ’e adea na keni neri, daru si abulo ta’ae bo. 37 Sui ta, lelea sa ngwane daraa neri ka otenia ’ana arailae, ma lelea sa nia ka thaitamana daulae faafia na kwaidooria nia ’ana noni, ’e ’okae fasi nia ka langi si adea ta ai. 38 Nia nee, ’e ’okae bana lelea sa molu arai ma molu ka ’afe. Ma ’e ’okae ka tatha lelea sa ’e langi molu si arai ma ka langi molu si ’afe. 39 Aia, ma lelea sa ta keni ka too ’ana arai, ’e langi si ’okae fasi nia ka lukatana arai nia. Ma lelea sa na arai nia ka mae, na keni neri ’e thaitamana ka ’afe lau ’ana ta ngwane ne ’e dooria, sui ta, ngwane ne ’e manata mamana naa ’ana tha Jisas Kraes ilingi nia laubo. 40 Ma sui boroi ’ana ka ’urineri, lelea sa nia ’e langi si ’afe lau, nia naa ne nonithathala ka tatha. Nia nee na manatalaku bana ’e ’urineri, sui ta, nau ku thaitamana na Mangoedoo Abu nia tha God naa ne faatana fuaku.
81 Aia, nau ku kedaa kau ’uria olisilana si soetoolae kamolu bae sulia na fanga ne da afuafu ’ana fuana nunui doo ki. ’E mamana, kolu sui bo kolu thaitamana doo oro ki sulia tha God. Sui boroi ’ana ka ’urineri, ’e langi si ’okae ’uria naunaulae sulia na thaitamedooa kolu ki. Sui ta, liothaua ne ’e adea ma kolu ka kwai’adomi fuakolu kwailiu. 2 Ma sa ni ti ne ka thaea nia ’e thaitamedoo doo ’asiana, ’e langi nia si thaitamana bo ta si doo. 3 Sui ta, na ngwane ne liothau ’ana tha God, tha God ’e thaitamana. 4 Iuka, sulia na fanga ne da afuafu ’ana fuana nunui doo ki, kolu thaitamana na nunui doo ki ’e langi da si moori mamana bo. Sulia kolu thaitamana talifilia tha God bo ne ’e mamana. 5 Sui boroi ’ana tai ngwane ki da ka foasia doo ’oro ki ’i thalo ma ’i laona molaagali laubo, ma da ka thaea thasa na doo neri ki naa na god ki ma na aofia ki, 6 kolu thaitamana tee God bo ne ’e too, ma nia na Maka ne thaungana doo ki sui, ma kolu ka moori fasi kolu ka rao fuana. Ma kolu too ’ana tee Aofia bo tha Jisas Kraes ne ’adomia tha God ’uria thaungailana doo ki sui, ma nia ka fala laubo mooria fuakolu. 7 Ma tai imole ki ne da manata mamana, ’e langi da si thaitamana bo na nunui doo ne ’e langi lau doo mamana ki. Ma sulia ’e tau na mai, da rikia naa imole ki da foasia na nunui doo ’oro ki, da ka manata thasa na fanga ne da afuafu ’ana fuana nunui doo ki, nia naa na fanga kera na nunui doo ki. Ma ka ngwaluda fasi da ka kwaimanatai lelea sa da ’ania na fanga ’urineri, ma da ka fiia thasa da ilia doo ta’ae ma da ka bilia ’i maana tha God. 8 Sui ta, nau ku thaea fuamolu, ’e ’afitai fuana ta fanga ka ’adomi kolu ’uria faanonithathalaa tha God. Sulia lelea sa kolu ’ania ta fanga, ’e tofa doo bana fuana tha God, ma lelea sa ’e langi kolu si ’ania, ’e langi si ’e’ete bo. 9 Sui boroi ’ana ka ’urineri, molu ka lilio ’okae, ade’ana ’urineri ka faagaroa manatalada tai imole manata mamana ki da ka ilia ta si doo ne manatalada ’i talada ’e thaea fuada thasa ’e garo ’uria ililana. 10 Molu ka liosuli ’okae ’ani kamolu ade’ana ’urineri si doo ne ka fuli: Imole manata mamana ki ne da manata sulia thasa ’e garo ’uria ’anilana fanga neri da afuafu ’ana fuana nunui doo ki. Ma da rikia ne molu ’ania fanga neri ’i laona beu abu kera na nunui doo ki. Molu thaitamana ’e langi ka si garo ’uria ’anilana fanga ’urineri ki. Sui ta, molu ka fala rakealae fuada ’uria ’anilana fanga ne da afuafu ’ana fuana nunui doo, ma da ka ilia si doo ne mangoda ’e thaea fuada ne ’e garo. 11 Ma ’urineri na dooramolu ne manata mamanalae nia si suukwai ’ua, na moorilana kau ta’ae, sulia na abulolamolu ’ana thaitamedooa kamolu. Ma na ngwane neri, tha Jisas Kraes ’e mae naa ’usi nia. 12 Si manga molu ilia doo ta’ae ’ana tai imole manata mamana ki ’ana falelana rakealae fuada ’uria ililana si doo ne da manata sulia ’e garo, molu ilia naa doo ta’ae ’ana tha Kraes laubo. 13 Nia nee, ’e ’afitai ’asiana ku ’ania ta si fanga ne dooraku ’e rikia ma ’e adea nia ka lea garo. Sulia ’e langi kwa si dooria na dooraku ka ilia ta si doo ne manatalana ’i tala’ana ’e thaea ne ’e garo fuana ’uria ililana.
91 Aia, nau nee, nau ta ngwane nonilaa nee. Ma nau ta aposol, ma ku rikia naa tha Jisas na Aofia kolu. Ma molu ka manata mamana ’ana Aofia sulia na raoa ne ku ilia fuana. 2 Nia nee, molu ka thaitamana nau naa ne ta aposol, boroi ’ana tai imole ki da ka thaea ’e langi. Molu thaitamana sui naa, sulia na manata mamanalae kamolu ki ’ana Aofia ne faatana na raoa nau ilingia ta aposol. 3 ’Ana si manga tai imole ki da balufi nau, nau ku olisi ’urii ’ani kera: 4 Nau ku too ’ana suukwaia ’uria ngalilana fanga ma na kuulae faasia ni ti kera ne nau ku toodoo fuada. Sui ka ’urineri boroi ’ana, nau kwasi ngala bo. 5 Ma ku too ’ana suukwaia ’uria adelae sulia tha Pita fonea tai aposol ki, ma na doorana ki tha Jisas, ne da too ’ana ’afe manata mamana ki ne da lea foneda ’ana leaa kera ki. Sui boroi ’ana ka ’urineri, nau kwasi too ’ana ta ’afe. 6 Tha Banabas fone nau, miri too laubo ’ana suukwaia ilingia tai aposol ki ’uria ngalilana malefo fasi miri ka si ’a’abo ’ana raoa ’e’ete. Sui boroi ’ana ka ’urineri, miri rao laubo ’uria folilana fanga kamiria ki. 7 Ma ta ngwane ni firu boroi, ’e langi ka si ilia na raoa ’e’ete ’uria folilana fanga nia. Ma ta ngwane ne ’e fasia mingge doo ki, ’e thaitamana ’anilana na fufue doo ’ana ’ai ki ne nia ’e fasia. Ka ’urineri laubo fuana ngwane ne liosulia na ferae sipsip nia, sulia ’e thaitamana ka ngala laubo na susu faasia susuda ’uria kuufilana. 8 Ma ’e langi lau si doo neri ki talifilida bo ne ku faabobolangana ’ana si doo ki ’i laona molaagali nee. Sulia na bibirangaa ki faasia tha Mosis ’e thaea laubo si doo neri. 9 Sulia ’i laona bibirangaa nia ki tha Mosis, ’e bae ’urii, “Na buluka ne rao ’uria urilana mingge doo ki, ’e thaitamana ka ’ania tai si doo, ma ’e langi ’o si bokotaa fakana.” Ma tha God ’e langi si bae sulia si doo neri sulia na buluka ki bana. 10 Sui ta, nia ’e bae laubo suli kameli na ngwane toodoo ki ’ana Faarongolae ’Okae. Nia naa nee, ngwane ne fasia na mingge doo ki ma na ngwane ne ’e koni doo, keerua sui bo ne daru kwaimaakwali ’uria ngalilana tai fufue ’ai ’ana si manga na uuni ’ai ’e maua. 11 ’E ’urineri laubo fuameli, sulia meli faatalo ’ana Faarongolae ’Okae ilingia ta ngwane bae ’e fasia mingge doo ’i laona thaegano. Nia nee, ’e ’okae fasi meli ka ngala doo ’okae ki faasi kamolu fasi meli ka moori ’ania ’i laona molaagali nee. 12 Ma lelea sa tai imole ki ne da toodoo fuamolu da tala’ana ngalilana na doo neri ki faasi kamolu, tama kameli meli tala’ana tathalae ’uria ngalilana doo neri ki faasi kamolu. Sui boroi ’ana miri ka too ’ana suukwaia ’urineri, ’e langi miri si gani kamolu bo ’uria ta si doo, sulia miri nonimaabe ’uria tathalae ’i laona ’afitaia ki, fasi imole ’oro ki da ka rongo ’ali’ali ’ana Faarongolae ’Okae sulia tha Jisas Kraes. 13 Kamolu molu thaitamana imole ki ne da rao ’i laona Beu Abu nia tha God, da ngala naa fanga kera ki faasia ’i laona Beu Abu nia tha God, sulia da ’ania na afuafulae ki faasia na fuli ere ni kwaisuusia neri. 14 Ka ’urineri laubo, na Aofia ’e thaea na ngwane ki ne da faarongo ’ana Faarongolae ’Okae, da tala’ana da ka ngala si doo ki ’uria moorilada ’i laona molaagali ’uria si raoa neri da ilia. 15 Sui boroi ’ana nau ku too ’ana suukwaia ’uria ngalilana doo neri ki faasia tai imole ki ne ku toodoo fuada, ’e langi kwa si gania ta si doo faasia ta ngwane. Ma ’i tari’ina, nau kwasi kedaa si doo neri fasi ku ngala ta si doo. Nau ku bae ’okae ’aku suli nau ’i tala’aku, sulia ’e langi kwasi ngala ta si doo faasia imole ki ne ku toodoo fuada. Ma ’e ’okae lelea sa nau ku mae ’ana fioloa sui fatai nau ku fi gani kamolu ’uria ta si doo, sulia nau kwasi dooria na bae ’okaelae nau ka thau bana ’ana ta tofa doo ’urineri. 16 Ma ’e langi si ngwaluda fasi nau ku bae ’okae sulia na faatalolae ’ana na Faarongolae ’Okae, sulia na Aofia ’e fale nau ’uria ililana. Nia nee, kwakwaelae nia fuaku kau baita lelea sa ’e langi kwa si faarongo ’ana Faarongolae ’Okae. 17 Lelea sa nau ku faatalo sulia na kwaidooria nau, ’e ngwaluda fasi nau ku ngala naa malefo. Sui ta, ’e langi kwa si maasia ta malefo, sulia tha God ’e fiitoo ’ani nau ’uria ililana raoa ne ’e fale nau mai ’uria. 18 Aia, tae ne na kwaiaraa nau ’uria raoa nee? Na kwaiaraa nau, nia ne ’uria faarongolae ’ana Faarongolae ’Okae fuana imole ki, ma ka langi kwa si ngala ta fofolilae ’uria tae ne nau ku ilia, sui boroi ’ana ka tala’ana ganilae ’uria ta si doo fuaku. 19 Si doo nee ’e ’inifitaa ne ’e langi ta ngwane ka si suumai nau ’uria roolae sulia, sulia da foli nau. Sui boroi ’ana ka ’urineri, nau ku rao suukwai fuana imole ki sui ilingia ta ngwane rao, fasi na imole ’oro ki da ka manata mamana ’ana tha Jisas Kraes. 20 Nia nee, ’ana si manga ku too fonea imole ki ’i Jiu, nau ku roosulia bibirangaa kera Jiu ki, fasi ku ’adomi kera ’uria manata mamanalae. Ma sui boroi ’ana ’e langi kwa si too bo ’i farana si baea fifii nia ki tha Mosis, nau ku roo laubo sulia ilingi kera, fasi ku ’adomi kera ’uria manata mamanalae. 21 Nia ’e ’urineri laubo ’ana si manga ku too fonea imole ki ne langi lau Jiu, nau ku roosulia laubo bibirangaa kera ki, ma ka langi kwa si roosulia bibirangaa kera Jiu ki, fasi ku ’adomi kera ’uria manata mamanalae. Ma ’e langi kwa si thaea ne nau ku aburongo ’ana baea fifii nia ki tha God, sulia nau ku roo ’aku sulia si baea fifii nia ki tha Jisas Kraes. 22 Ma ka ’urineri laubo, ’ana si manga ku too fonea na imole ki ne manata mamanalae kera ’e langi si suukwai ’ua, nau ku too ilingi kera laubo, fasi nau ku ’adomi kera. ’Urineri, ’ana bibirangaa ’oro ki, nau ku too ilingia na imole ki sui, fasi nau ku ’adomia tai imole ki ’ani kera ’uria manata mamanalae ’ana tha Jisas Kraes. 23 Nau ku ilia si doo neri ki, fasi na imole ’oro ki da ka manata mamana ’ana Faarongolae ’Okae, ma nau kwau ngala si doo ’okae ki ne na Faarongolae ’Okae ’e bae sulia. 24 Aia, molu thaitamana lelea sa na fitalae ’ana kwakwaitaluilae, ngwane ’oro ki ne ’uria kwakwaitaluilae, boroi ’ana tee ngwane bo ne kau siitatha ma ka ngala kwaiaraa. Aia, kamolu imole ki ne molu manata mamana ’ana tha Jisas Kraes, molu ka rao suukwai ’uria roolae sulia si doo ki ne tha God ’e dooria ilingia ta ngwane ne fita ’ali’ali ka siitatha ’ana kwakwaitaluilae, fasi tha God naa kau kwaiarangai kamolu. 25 Aia, na ngwane ne ’e lea ’uria fitalae, nia ka suasulia nonina ’i tala’ana, fasi na nonina ka tala’ana fita ’ali’alilae, ma nia ka ngala ta kwaiaraa ne ’e thaitamana kau funu laubana. Ma na imole ki ne kolu manata mamana, kolu ka suasulia nonikolu ’i talakolu fasi kolu ka ngala kwaiaraa ne kau totoo firi. 26 Nia nee, nau ku suasulia noniku ’i tala’aku ilingia ta ngwane ne fita ’ali’ali ma ka lea ’o’olo ’uria si kula ni faasuilana fitalae. Ma nau ku ilingia laubo ta ngwane ne firu ’ana kwaikumulilae ma na maekumu nia ki ’e totoo si tala bo. 27 Ma nau ku suasulia noniku, ade’ana ’urineri lelea sa ’e langi, boroi ’ana nau na ngwane ne ku toodoo fuana imole ki, tha God ka si kwaiarangai nau bo.
101 Aia, dooraku ki ’ae, molu ka manata sulia na kokoo abu kolu ki na imole ki ’i Jiu. ’Ana si manga tha God ’e talaida ’ana na barobaro, ma da ka too folo ’ana asi. 2 Nia ’e ilingia da sisiuabu ’ana barobaro fonea na asi fasi da ka thau ’ana bare ngwane fafurongo nia ki tha Mosis. 3 Ma kera sui bo da ka ’ania fanga tha God ’e fala fuada, 4 ma da ka kuufia laubo na kafo ne ’e fala fuada. Sulia da kuufia na kafo ne ’e lea mai faasia na fau ne tha God ’e faatana fuada. Ma na fau neri naa ne tha Jisas Kraes, ma ’e langi si lea naa faasida. 5 Ma sui boroi ’ana tha God ka ’adomi kera ’urineri, na abulolada ’e ta’ae, ma tha God ’e langi si nonithathala sulia ’orolana abulolae kera ki ’e ta’ae. Ma sulia si doo neri, ne da ka mae ’i laona bali fera kwasi ne da tatha ai. 6 Ma si doo neri ki ’e fuli ’urineri fuada fasi ka fala na bae fifiilae fuakolu ’ana si doo ki ne kau dao mai fuakolu lelea sa kolu ade sulida ’uria doorilana si doo ta’ae ki, 7 ma ’uria foasilana nunui doo ki ilingia tai imole ’ada ki da ilia ’i nao mai. Sulia na Kekedalae Abu bae ’e thaea, “Da too ’uria fanga baitalae, ma da ka kuu baita, fonea kaubarelae ilingia imole ki ’ana tale bae ’i buri.” 8 Ma kolu nee, ’e langi kolu si ilia na kaubarelae ki ilingia tai imole ki ’i Israel ’i nao mai, sulia tha God ’e fala kwakwaelae fuada ma 23,000 ’ani kera ne da mae ’ana tee fe dani. 9 Ma ’e langi kolu si ilitoona na Aofia ilingia tai imole ki ’ani kera ne da ade sulia na abulota’alae kera ki, ma fasi na baekwa tolo ka ’alamaeli kera. 10 Ma ’e langi kolu si ’uga, sulia tai imole ki ’ani kera da ade laubo ’urineri, ma tha God ka fala mai na enselo ’uria thaumaeliladalae. 11 Ma ’uria tae ne si doo neri ki ka fuli fuada? Nia ’e ’urineri fasi na imole ki sui da ka thaitamana ililana doo ’urineri ki, sui ta, tha God ne ’e langi si nonithathala bo sulia. Ma si baea neri ki ’e too naa ’i laona Kekedalae Abu ’uria bae fifiilae fuakolu ne kolu too ’i laona fe dani ’i’isi ki. 12 Aia, ma na ngwane ne fiia thasa na manata mamanalae nia ’e suukwai, nia ka thaitamana, ade’ana nia ka ilia laubo ta si doo ta’ae. 13 Si manga molu daotoona ilitooa, ’e langi lau ta doo faalu, sulia imole ’e’ete ki boroi da daotoona laubo ilitooa ’urineri ki. Ma tha God ’e ’adomia ’ana imole ki ne da fiitoo, sulia ’e langi ka si ekwatai kamolu fuana ilitooa ne kau talua na suukwaia kamolu ki. Ma si manga molu daotoona ilitooa, tha God naa kau fala na suukwaia fuamolu fasi molu ka otekamolu ’ana abulota’alae. 14 Nia nee, doora nau ki ’ae, molu ka too faasia foasilana nunui doo ki. 15 Aia, kamolu naa na imole liotoo ki. Nia nee, molu ka manata ’okae sulia si baea nau ki, ma lelea sa molu alafaafia, molu ka roosulia. 16 Aia, ma sulia na Fanga Abulae, ’ana si manga kolu kuu ’ana titiu, kolu ’ado fonea ’ana ’abuna tha Jisas Kraes. Ma na berete ne kolu niia, si manga kolu ’ania, kolu ’ado naa fonea ’ana nonina tha Jisas Kraes. Ma kolu faabaitaa naa tha God sulia si doo neri ki. 17 Ma tee fe berete bo ne tha Jisas. Sui boroi ’ana kolu ka ’oro, kolu tee nonii doo bo, sulia kolu ’ado bo ’ana tee fe berete neri. 18 Aia, molu ka manata sulia na imole ki ’i Jiu. Si manga tai imole ’ada ne da ’ania si doo ne da afuafu ’ana fuana tha God ’i fafona fuli ere, da ’ado laubo ’ana foasilana tha God. 19 Nau ku thaea na nunui doo ki ma na fanga da afuafu ’ana fuana nunui doo ’e langi si ’inito. Sulia kolu thaitamana si doo neri ki na tofa doo ki bana. 20 Ma ku thaea, ’ana si manga da foasia nunui doo, da foasia na anoedoo ta’ae ki, ma ’e langi da si foasia bo tha God. Nia nee, ’e langi kwasi dooria molu ka ’ado fonea na anoedoo ta’ae ki. 21 Sulia ’e langi molu si tala’ana kuulae ’ana titiu nia na Aofia ’ana Fanga Abu ma faasia na titiu ’ana anoedoo ta’ae ki laubo. Ma ka langi molu si tala’ana ’anilana na Fanga Abu nia na Aofia fonea na fanga nia na anoedoo ta’ae ki laubo. 22 Lelea sa kolu ka ade ’urineri, na Aofia ka rakethasu fuakolu. Ma ka langi kolu si tala’ana takwelae ’usia na kwakwaelae nia. 23 Tai imole ki da bae ’urii, “’E tala’ana kolu ka ilia bakolu kwalukaela doo ki ne kolu dooria, sulia ’e langi ka si abu bo fuakolu.” Sui ta, nau ku thaea, “Doo ki sui ’e langi si ’okae, ma na doo ki sui ’e langi si ’adomi kolu kwailiu.” 24 ’E langi kolu si manata bakolu sulia si doo ki ne ’okae fuakolu ’i tala’akolu. Sui ta, kolu ka manata laubo sulia si doo ne ’adomia laubo imole ’e’ete ki. 25 ’E ’okae bana ’uria ’anilana si doo ne molu folia ’i maana usia. Ma ka langi molu si manata ’a’abo sulia si doo neri ’e lea mai faasia ’i fai. 26 ’E langi ta fanga si abu fuakolu ’uria ’anilana, sulia na Kekedalae Abu bae ’e thaea, “Na molaagali ma na doo ki sui ’i laona, na doo nia ki sui bo na Aofia.” 27 Ma lelea sa ta ngwane ne ’e langi si manata mamana ’ana tha Jisas Kraes ka soe ’oe ’uria fangalae ’i beu nia, ma ’oko lea naa, ’oko ’ania naa fanga tae ki ne ’e fala fuamu ’uria ’anilana. ’E langi ’o si manata ’a’abo ’uria soetalafanalana lelea sa na fanga neri da afuafu ’ana fuana nunui doo ki. 28 Sui ta, lelea sa ta ngwane ka thaea fuamu, “Na fanga neri da afuafu ’ana fuana na nunui doo ki,” ’urineri ’e langi ’o si ’ania fanga neri, ade’ana ’urineri na liona manatalana neri ka ta’ae. 29 Si doo neri ’e langi lau sulia na manata lamu. Ma nau kwasi dooria ’oko faaliodilaa tai imole ’e’ete. Aia, ta ngwane ’e soetalafaku ka ’urii, “Lelea sa ’e langi ta fanga si abu fuaku, ’urifita nee ka langi kwa si tala’ana ’anilana sulia manatalana ta imole ’e’ete? 30 Ma lelea sa nau ku tangoa tha God faafia fanga nau, ’urifita nee ta ngwane ’e’ete ka ngatafi nau faafia na fanga ne nau ku tangoa tha God ’uria?” 31 Aia, nau ku olisia ku ’urii: Doo ki sui ne ’o ilia, ma lelea sa ’oko fanga, ma langi ’oko kuu, ’oko ilia si doo neri ki sui fasi na imole ki da ka tangoa tha God. 32 Molu ka too ’ana toolae ne ’e langi si fala ta ’afitaia fuana ta imole ’i Jiu, ma langi ta ngwane ne langi lau Jiu, ma langi fuana ta ngwane ne ’e manata mamana ’ana tha God. 33 Molu ka ilingi nau, sulia nau ku thasi ’uria faanonithathalalana imole ki sui ’ana si doo ki ne nau ku ilia. ’E langi kwasi manata ’uria faanonithathalalaku ’i tala’aku, sui ta, nau ku manata ’uria faanonithathalalana imole ki sui, fasi da ka too ’ana mooria ne totoo firi.
111 Nia nee, molu ka too ilingi nau, ilingia laubo ne nau ku too ilingia tha Jisas Kraes. 2 Nau ku faabaita kamolu sulia molu manatatooku sulia dani ki sui, ma molu ka lea sulia na toodoolae ne nau ku fala fuamolu. 3 Ma nau ku dooria fasi molu ka thaitamana tha Jisas Kraes ’e ’inito faafia na imole ki sui, ma na arai ki da ’inito faafia na ’afe kera ki, ma tha God ka ’inito faafia tha Jisas Kraes. 4 Nia nee, lelea sa ta ngwane ka foa ma langi ka bae ’ana na baelana tha God, ’e ’okae fasi nia ka lafua na kifi faasia na gwauna, sulia si doo neri ’e faatana faabaitalana tha Jisas Kraes ne ’e ’inito faafi nia. 5 Ma lelea sa ta keni ne ka foa ma langi ka bae ’ana na baelana tha God, ’e ’okae fasi nia ka ’afu faafia gwauna, sulia si doo neri ’e faatana faabaitalana na arai nia ne ’inito faafi nia. Na keni ne langi si ade ’urineri, ’e ilingia ta keni ne da sufi kukuru ’ana ifuna ’uria faa’idalana. 6 Si manga ’e langi si ’afu faafia na gwauna, ’e ilingia nia ’e sufi kukuru ’ana ifuna. Nia nee, ’e ’okae fasi keni ka alua si doo ’uria ’afulae faafia na gwauna, sulia si doo ni ’idalae ’ania fuana keni ka sufia ifuna ma langi ka sufi kukuru ’ana ifuna. 7 Aia, ma na ngwane ki, da si ’afu faafia gwauda, sulia tha God ’e thaungaida ilingi nia ’i tala’ana, ma da ka faatana na ’initooa nia. Ma na keni ki, da ka faatana na ’initooa kera na ngwane ki. 8 Sulia si manga tha God ’e thaungana ngwane totongenao, ’e langi lau keni ne thare nia. Ma na keni totongenao, tha God ’e thaungana faasia na nonina na ngwane totongenao neri. 9 Ma tha God ’e langi si thaungana na ngwane ’uria ’adomilana keni. Nia ’e thaungana ’ana na keni ’uria ’adomilana ngwane. 10 Nia nee, na keni ki da ka too ’ana si doo ’uria ’afulae faafia gwauda fasi na enselo ki boroi da ka thaitamana na keni ki da faare baita ’ana arai kera ki. 11 Sui ta, fuakolu imole ki ne kolu manata mamana ’ana Aofia, ngwane ma keni, kolu reri ’ani kolu kwailiu. Na keni ka ’adomia ngwane, ma na ngwane ka ’adomia keni. 12 Sui boroi ’ana na keni totongenao ka lea mai faasia nonina ngwane totongenao, ’i tari’ina na keni ne tharea ngwane. Aia, ma na doo ki sui ’e lea mai faasia tha God. 13 Molu ka manata fasi sulia si doo ne ’okae. Molu thaitamana naa, ’e langi si ’okae ne na keni ka foa lelea sa ’e langi si ’afua gwauna. 14 Ma na ngwane ki, ne kolu thaitamana tha God ’e langi si thaungana na ngwane fasi da ka too ’ana ifu tikwa ilingia keni ki. Ma lelea sa na ifuna ngwane ka ’urineri, nia ’e ’ida ’asiana. 15 Sui ta, lelea sa na keni ka alua ifu tikwa, rikilana ’e ’okae ’asiana. Sulia tha God ’e fala na ifu tikwa fuana fasi ka ’afu faafia ’ana gwauna. 16 Aia, lelea sa ta ngwane ne ’e langi si doori alafaafia toodoolae nau sulia si doo neri, na olisilae nau fuana ’e ’urii: ’E langi bo ta bibirangaa ’e’ete ne meli toolamana. Ma sa ni ti kera ne da manata mamana ’ana tha God ’i laona maetoaa ki sui, da ka ade laubo ’urineri. 17 Aia, sulia si doo ki nau ku kedaa naa fuamolu si manga neri, ’e langi kwa si faabaita kamolu. Sulia si manga molu ofu ’uria foalae, na abulolamolu ’e ta’ae, ma ’e langi molu si faasuukwaia bo na manata mamanalae kamolu ki, molu faamakethoa ’amolu. 18 Na etana si doo ku balufi kamolu faafia ne ’e ’urii: Nau ku rongoa si manga ki molu ofu, molu too ’e’ete ’i malutamolu, ma molu ka olisusuu fone kamolu kwailiu. Ma nau ku thaitamana ’okae ’ana tai si doo ku rongoa ’e mamana. 19 Mamana ’asiana, na tolilae neri ’e faatai ’okae ’ania ni ti kera ne da lea sulia mamanaa nia tha God. 20 Aia, si manga molu lea ofu mai ’uria Fanga Abulae, ’e langi lau na Fanga Abu mamana ne molu ’ania. 21 Sulia ta bali ’amolu da fanga baita ’ani kamolu, ma ’e langi molu si ’ado naa fonea ngwane ’e’ete ki. Nia nee, ta bali ’ana ngwane da ka fiolo bada, ma ta bali ’amolu molu ka kuu lelea molu ka gwaulilinge na ’amolu. 22 Nia nee, ’e ’okae fasi molu ka fanga fasi ’i beu kamolu ki, fasi ka langi molu si faa’idaa na imole ki ne fanga kera ki ’e langi ka si ’oro. Sulia si manga molu fanga baita ’i maana imole siofaa ki, molu faatana ne ’e langi molu si faare baita bo ’ana ofulada na imole manata mamana nia ki tha God. ’E ’urifita, kamolu molu fiia thasa nau ku faabaita kamolu sulia na abulolamolu ne ’urineri? ’E langi! 23 Na toodoolae sulia na Fanga Abulae ne nau ku fala fuamolu, nau ku ngala faasia na Aofia bae ’e ’urii: ’Ana fe rodo bae da ’olea maelana Aofia tha Jisas fuana maalimae nia ki, nia ’e ngala fe berete, 24 ma ka faabaitaa tha God faafia, ma ’e niia, ka bae ’urii, “Nia nee na noniku ne ku fala fuamolu. Molu ka ’ania ’uria manatatoolaku.” 25 Ma ’i burina fangalae ’e sui, ’urineri laubo tha Jisas ’e ngala na titiu ’ana waen, ma ka bae lau ’urii, “Na titiu ’ana waen nee, ’e ilingia naa na alangaia faalu ne tha God ’e thaungana ’ana ’abuku. ’Ana si manga molu kuufia, molu ka manatatooku.” 26 Nia nee, si manga ki sui ne molu Fanga Abu ’ana berete ’urineri fonea na titiu ’urineri, molu ka faatalo ’ania na maelana tha Jisas, ma molu ka ade ’urineri lelea ka dao ’ana olilana mai tha Jisas. 27 Nia nee, lelea sa ta ngwane ka ’ania na berete nia na Aofia, ma ka kuu ’ana titiu nia, ma ka ilia bibirangaa ta’ae, nia ’e abulo ta’ae fuana nonina Aofia ma na ’abuna. 28 Nia nee, sa ni ti ’akolu ne dooria ka Fanga Abu, nia ka manata fasi sulia na abulolana ’i tala’ana, sui nia ka fi ’ania na berete ma ka fi kuu ’ana na titiu neri. 29 Sulia lelea sa nia ka langi si manata fasi sulia na nonina na Aofia si manga ’e ’ania na berete ma ka kuu ’ana titiu, nia ’e ngala naa kwakwaelae fuana ’i tala’ana ’ana si manga ’e Fanga Abu ’urineri. 30 Nia ne adea ma imole ’oro ki da ka matai, ma da ka maketho, ma tai imole ki da ka mae naa. 31 Ma lelea sa kolu ka filo kolu ’i tala’akolu ’i nao, tha God ka si tooketa kolu. 32 Sui ta, na Aofia ’e tooketa kolu ma ka fala kwakwaelae ki fuakolu ’ana si manga neri, fasi nia si tooketa kolu ’uria maea fonea imole ki ’i laona molaagali ’ana si manga ne kau dao mai. 33 Nia nee, dooraku ki ’ae, si manga molu ofu mai ’uria Fanga Abulae, molu ka kwaimaakwali maasi kamolu teefau. 34 Ma lelea sa ta imole ka fiolo, ’e ’okae fasi nia ka fanga fasi mai ’ana ’i beu nia, sui fatai nia ka fi lea ’ana ofulae, ade’ana ’urineri tha God ka fala na kwakwaelae fuamolu sulia na bibirangaa kamolu ki ’ana si manga molu ofu ’ana. Ma, sulia tai si doo ’e’ete lau, nau kwau ’olosia si manga kwau lea mai siamolu.
121 Aia, doora ki ’ae, nau ku kedaa si baea ’uria olisilana si soetoolae kamolu ki sulia na falelae ki faasia na Mangoedoo Abu. Nau ku dooria molu ka thaitamana ’okae ’ana falelae ki ne na Mangoedoo Abu ’e fala fuakolu. 2 Molu thaitamana ’i nao ’ana fatai ne molu manata mamana ’ana tha Jisas, na nunui doo ki ne ’e langi si moori, da talai garo ’ani kamolu. 3 Ma nau ku dooria fasi molu ka thaitamana lelea sa na Mangoedoo nia tha God ’e talaia ta ngwane, ’e ’afitai na ngwane neri ka bae tataga ’ana tha Jisas. Ma ka ’urineri laubo, lelea sa na Mangoedoo Abu ka si talaia ta ngwane, ’e ’afitai nia ka thaea tha Jisas naa na Aofia. 4 Sui boroi ’ana na Mangoedoo Abu ka fala na falelae ’e’ete kwailiu ki, na falelae neri ki ’e ’ito sui bo mai faasia tee Mangoedoo Abu. 5 Sui boroi ’ana na raoa neri ki na Aofia ’e dooria kolu ka ilia ’e ’e’ete kwailiu, tee Aofia bo ne kolu rao fuana. 6 Sui boroi ’ana kolu ka thaitamana ililana si raoa ’e’ete kwailiu ki, tee God bo ne ’adomi kolu ’uria ililana. 7 Ma na Mangoedoo Abu ’e faatana suukwaia nia fuakolu teefau fasi kolu ka rao ’uria ’adomilakolu kwailiu. 8 Ma fuana tai imole ki, na Mangoedoo Abu ’e fala na suukwaia ’uria baelae ’ana liotooa. Ma fuana tai imole ki na Mangoedoo Abu ’e fala suukwaia ’uria baelae ’ana thaitamedooa. 9 Ma fuana tai imole ki, na Mangoedoo Abu ’e fala na fiitooa ne suukwai ’asiana. Ma fuana tai imole ki, na Mangoedoo Abu ’e fala suukwaia ’uria guralana imole matai ki. 10 Ma fuana tai imole ki, na Mangoedoo Abu ’e fala suukwaia ’uria ililana si doo ni kwelelae ’ania ki. Ma fuana tai imole ki, na Mangoedoo Abu ’e ’adomida ’uria baelae sulia baelana tha God. Ma fuana tai imole ki, na Mangoedoo Abu ’e fala suukwaia fasi da ka lio thaitamana si doo ki ne ’e ’ito mai faasia na Mangoedoo Abu ma laa ’e langi. Ma fuana tai imole ki, na Mangoedoo Abu ’e fala suukwaia ’uria baelae ’ana baea ’e’ete ki ne ’e langi da si thaitamana. Ma fuana tai imole ki, na Mangoedoo Abu ’e fala na suukwaia ’uria thaitamanalana maalutana si baea ki ne da thaea. 11 Sui boroi ’ana nia ka fala na suukwaia ’e’ete ki fuakolu teefau sulia na kwaidooria nia, ma tee Mangoedoo Abu bo ne ’e fala. 12 Kolu na imole ki ne kolu manata mamana ’ana tha Jisas Kraes, kolu ilingia tee si noni doo bo ’ana tha Jisas Kraes ne too ’ana bali doo ’oro ’e’ete ki. Ma sui boroi ’ana nia ka too ’ana bali doo ’oro ki, nia tee si nonii doo bo. 13 Kolu sui bo, na imole ki ’i Jiu, ma na imole ki ne langi lau Jiu, ma na imole ki ne da tofa rao, ma na imole ki ne da nonilaa, kolu ilingia tee si nonii doo bo, sulia tee Mangoedoo Abu bo ne kolu sisiuabu ’ania, fasi kolu ka alua tee si nonii doo. Ma tha God ’e fala tee Mangoedoo Abu bo fasi ka too ’i laona moorilakolu teefau. 14 Na nonii doo ’e langi lau tee bali doo bo, nia ’e too ’ana bali doo ’e’ete ’oro ki. 15 Ma lelea sa na ’ae ka bae ’urii, “Nau ’e langi lau ta bali ’ana noni, sulia nau ’e langi lau na ’aba,” na ’ae neri ta bali naa ’ana noni neri. 16 Ma lelea sa na alinga ka bae ’urii, “Nau ’e langi lau ta bali ’ana noni, sulia nau ’e langi lau na maa,” na alinga ne ta bali naa ’ana noni neri laubo. 17 Ma lelea sa na nonii doo teefau ne na maa bana, nia ka si tala’ana rongolana ta si doo. Ma lelea sa na nonii doo teefau ne na alinga bana, nia ka si tala’ana mokotoolana ta si doo. 18 Aia, na nonikolu ’e ’okae ’asiana, sulia si manga tha God ’e thaungai kolu, ’e alua si doo neri ki sui bo ’ana noni sulia na kwaidooria nia. 19 Ma lelea sa na noni ’e too ’ana tee bali doo bana, ’e langi lau na noni mamana neri! 20 Na noni ’e too ’ana bali doo ’oro ki, sui ta, nia ’e tee noni bo. 21 Ma sulia ’e ’urineri, na maa ’e ’afitai ka bae ’urii fuana ’aba, “’aba ’ae, nau kwasi doori ’oe bo!” Ma ka ’urineri laubo na gwai doo ’e langi si tala’ana baelae ’urii fuana ’ae, “Nau kwasi doori ’oe bo!” 22 Tai imole ki da manata thasa tai bali ’ana noni ’e maketho. Sui ta, ’e ’afitai ’asiana kolu ka moori lelea sa si kula neri ki ’e langi faasia nonikolu. 23 Ma tai si bali ’ana noni ne kolu thaea thasa ’e langi si ’inito bo, nia nee kolu ka lio ’okae sulida. Ma ta si bali ’ana noni ne rikilana si ’okae bo, nia nee kolu ka faa’afia ’ana maku. 24 Ma tai si bali ’ana noni ne rikilada ’e ’okae, ’e langi kolu si faa’afida bo. Tha God ’e thaungai ’urineri ’ana nonikolu, fasi kolu ka faabaitaa si bali neri ki ’ana nonikolu ne imole ki da thaea thasa tofa si kula ki bana. 25 Nia nee, ’e langi bo ta tolilae ’i laona nonii doo, sulia si bali ki sui bo da lio sulida kwailiu. 26 Ma lelea sa ta tee si bali ’ana noni ’e fii, si bali ki sui bo ne da fii laubo fonea. Ka ’urineri laubo, lelea sa ta si bali ’ana nonii doo da faabaitaa, na nonii doo teefau ne da ngala na faabaitalae neri. 27 Aia, kamolu teefau bo ne na nonina tha Jisas Kraes, ma tee tee imole ’akolu ne ta bali ’ana nonina. 28 Ma ’i laona ofulada na imole ki, tha God ’e fala si raoa ’e’ete kwailiu ki fuakolu. Etana, ’e fala raoa nia na aposol fuana tai imole ki. Ma ruana, nia ’e fala raoa ’ana faatalolae ’ania baelana tha God. Ma na oluna, nia ’e fala raoa ’ana toodoolae. Sui, nia ka fala suukwaia ’uria ililana doo ni kwelelae ’ania. Sui, nia ka fala suukwaia ’uria guralana imole matai ki. Sui, nia ka fala suukwaia ’uria kwai’adomia. Ma nia ka fala laubo suukwaia ’uria kwaitalailae. Ma nia ka fala laubo suukwaia ’uria baelae ’ana baelae ’e’ete ki ne ’e langi da si thaitamana. 29 Aia, kolu sui bo ’e langi lau na aposol ki, ma ’e langi lau na ngwane ki ’uria faatalolae ’ania baelana tha God, ma ’e langi lau na ngwane toodoo ki. Ma ’e langi lau imole ki sui ’ani kolu ne too ’ana suukwaia ’uria ililana doo ni kwelelae ’ania ki, 30 ma langi na suukwaia ’uria guralana imole matai ki. Ma laa ’e langi lau kolu teefau ne kolu too ’ana suukwaia ’uria baelae ’ana si baea ’e’ete ki, ma ’e langi lau kolu teefau ne kolu tala’ana thaitamanalana maalutana si baea ki ne da thaea. 31 Ma nau ku dooria fasi molu ka dooria na falelae ’inito ki. Nia nee, ’ana si manga neri, nau kwau faatana naa doo ki ne ’okae ka tatha talua si doo neri ki teefau.
131 Lelea sa nau ku thaitamana baelae ’ana baea ’e’ete kera imole ki ma na baelae kera na enselo ki laubo, sui ta, lelea sa ’e langi kwa si liothau ’ana imole ki, na baelaku na tofa doo bana, ma ’e ilingia bana lingena ta kwande thalo ne angilana ’e sasadila si manga ta ngwane ’e ’uia ’ana kakai thalo. 2 Ma lelea sa nau ku thaitamana faatalolae ’ana baelana tha God, ma nau ku too ’ana thaitamedooa ki sui, ma ku thaitamana doo agwa ki sui, ma ku too ’ana manata mamanalae ne tala’ana ’idulana tolo ki, sui ta, lelea sa ’e langi kwa si liothau ’ana imole ki, nau na tofa doo bana. 3 Ma lelea sa nau ku fala doo nau ki sui fuana imole siofaa ki, ma ku alamatana imole ki da ka thaumaeli nau ’ana ere, sui ta, lelea sa ’e langi kwa si liothau ’ana imole ki, kwa si ngala bo ta kwaiaraa. 4 Na ngwane ne liothau ’ana imole ki, nia ’e marabibi ma ka ade ’okae fuada. Ma na ngwane ne liothau ’ana imole ki, nia ka si liota’ae ma ka si bae naunau. 5 Ma na abulolana ’e langi si ta’ae, ma na ngwane ’urineri ’e langi ka si manata bo sulia doo ki ne ’e dooria, ma nia ka si rakethasu ’ali’ali. Sui ta, nia ’e tala’ana ka manatalukea ni ti ne ’e ilia doo ta’ae fuana. 6 Ma na ngwane ne liothau ’ana imole ki, nia ka si nonithathala fonea na ta’alae, sui ta, nia ’e nonithathala fonea na mamanalae. 7 Ma na ngwane ne liothau ’urineri, nia ’e marabibi, ma ’e tala’ana ka takwe suukwai ’i laona ’afitaia ki sui. Ma ’ana si manga ki sui, nia ’e manata mamana ma ka fiitoo ’ana tha God. 8 Ma na liothaua ’urineri ’e totoo firi. Sui ta, na falelae ’ana faatalolae ’ana baelana tha God, kau sui. Ma na falelae ’ana baelae ’e’ete ki, kau sui laubo. Ma na falelae ’ana thaitamedooa, kau sui laubo. 9 Sulia na thaitamedooa ki ma na faatalolae ’ania baelana tha God, ’e langi si fono ’ua ’ana si manga neri. 10 Sui ta, si manga na doo ’okae ki sui kau dao mai, ma si doo ki ne ’e langi si fono dau sui. 11 ’Ana si manga ku faekwa mai, na baelaku ’e ilingia bana ta kae ngwela, ma na manatalaku ka ilingia laubo ta kae ngwela, ma na thaitamedooa nau, ’e ilingia bana ta kae ngwela. Sui ta, si manga ku baita naa, nau ku ’akwasia naa abulolana kae ngwela ki. 12 Ka ’urineri laubo fuakolu, si manga ne na thaitamedooa kolu ki ’e tee bali doo bana, ’e ilingia ta ngwane ne ’e rikia nunui doo rorodoa nia ’i laona ta iroiro ne ’e langi si folaa. Sui ta, si manga kolu kau rikia na Aofia ’i tala’ana, kolu kau thaitamana doo ki sui, ilingia laubo tha God ne thaitamai ’okae ’ani kolu teefau. 13 ’Ana si manga neri na olu si doo bo ne kau totoo firi: na manata mamanalae, na fiitooa, ma na liothaua. Ma si doo ne ’e ’inito ka tatha banaa ’ani kera naa na liothaua.
141 Molu ka thasi suukwai ’uria liothaulae ’ana imole ki. Ma ’e ’okae laubo fuamolu fasi molu ka thasi ’uria na falelae nia ki na Mangoedoo Abu, ’e tatha ’asiana ne ’uria na falelae ’ana faarongo folaalae ’ana baelana tha God. 2 Ma lelea sa ta ngwane ka bae ’ana baea ’e’ete ne ’e langi ka si thaitamana, tha God ’ana ne ’e bae fuana, nia ’e langi si bae fuana ta ngwane, sulia kera da si thaitamana si doo ne ’e thaea. Na Mangoedoo Abu ’e adea nia ka bae sulia si doo agwa ki. 3 Sui ta, lelea sa ta ngwane ka faarongoa ’ana baelana tha God, nia ’e bae fuana imole ki fasi ka ’adomida, ma ’uria falelana rakealae fuada, ma na gwafelada. 4 Na ngwane ne ngata ’ana baea ’e’ete ki ne ’e lalafusia, talifilia na moorilana ’i tala’ana bo ne ’e ’adomi nia. Sui ta, na ngwane ne ’e faarongoa ’ana baelana tha God, nia ’e ’adomia na imole ki sui ’i laona ofufua neri. 5 Sui boroi ’ana nau ku doori kamolu sui bo molu ka bae ’ana baea ’e’ete ki ne langi molu si thaitamana, nau ku dooria ka tatha fasi molu ka thaitamana faarongolae ’ana baelana tha God. Sulia na ngwane ne faarongo ’ana baelana tha God, ’e ’inito ka talua na ngwane ne bae ’ana baelae ’e’ete ki ne ’e lalafusia. Ma lelea sa ta ngwane ’e too ’uria talamatailana maalutana si baea ki ne ’e langi ka si thaitamana, ’e ’okae laubo, sulia keerua daru kau ’adomia imole manata mamana ki sui. 6 Dooraku ki ’ae, si manga ku lea mai ’i siamolu, lelea sa ku bae ’aku ’ana baelae ne ’e langi kolu si thaitamana, ’e langi kwa si ’adomi kamolu bo. Sui ta, lelea sa nau ku faarongoa ’ana ta si doo ne tha God ’e faatana fuaku ma langi ku toodoo fuamolu, ’urineri nau ku ’adomi baita ’ani kamolu. 7 Aia, na faabobolangailana ne ’e ’uria na tale anggaa ni ufilana. Lelea sa ta ngwane ne langi si thaitamana ufilana, na imole ki ’e langi da si thaitamana na lingee doo tae ne ’e ufia. 8 Ka ’urineri laubo, lelea sa ta ngwane ’ana ngwane ni omea ki ka ufia na bungu ’uria soelana mai na ngwane ki ’uria firua, ma na lingena bungu neri ka langi si folaa, ’e langi da si lea bo mai. 9 Ka ’urineri laubo fuamolu, sulia lelea sa molu bae ’ana baea ne langi ta ngwane si thaitamana, na baelamolu ka si ilia bo ta si doo. 10 Na baea oro ’asiana ki ’e too ’i laona molaagali nee, ma na baea neri ki sui bo da too ’ana maalutana. 11 Sui ta, lelea sa ta ngwane ka bae fone nau, ma ’e langi kwasi thaitamana baelana, ’e ’afitai ’asiana miri ka thaitamamiria kwailiu. 12 Sulia ne molu dooria ’asiana molu ka too ’ana falelae ki faasia na Mangoedoo Abu, ’e ’okae fasi molu ka thasi ’uria na falelae ne tala’ana ka faasuukwaia na manata mamanalae kera imole ki. 13 Si manga ta ngwane ’e ngata ’ania baelae ’e’ete ki ne ’e lalafusia, nia ka foasia naa tha God fasi ka fala suukwaia ’uria maalutana si tae ne nia ’e thaea. 14 Sulia lelea sa nau ku foa ’ana baea ’e’ete ki ne nau ku lalafusia, na mangoku ne ’e foa, ma na manatalaku ’e langi si foa bo. 15 Nia nee, nau kwau foa ’ana mangoku, ma ku foa laubo ’ana manatalaku. Ma kwau nguu ’ana mangoku, ma kwau nguu laubo ’ana manatalaku. 16 ’Ana si manga molu ofu ’uria foalae, lelea sa molu faabaitaa tha God ’ana mangomolu bana, ta ngwane ’e langi si thaitamana baelamolu, ma ’e ’afitai nia ka thaea “Iuka nia kau ’urineri” ’uria faatailana ne ’e alafaafia si tae ki ne molu thaea. 17 Ma sui boroi ’ana na foalae kamolu ’uria faabaitalana tha God ka ’okae, ’e langi molu si ’adomia bo ta imole. 18 Nau ku faabaitaa tha God sulia ku bae ’ana baelae ’e’ete ki ne kwasi thaitamana, ma ku ade ’urineri ’ana si manga ’oro ka talu kamolu teefau. 19 Ma sui boroi ’ana ka ’urineri, si manga ku too ofu fonea na imole ki ’uria foalae, nau ku dooria fasi ku thaea bo lima si baea ki ne ’e folaa ma da ka thaitamana, faasia thaelana 10,000 si baea ki ’ana baelae ne ’e langi da si thaitamana. 20 Aia, dooraku ki ’ae, molu ka too ilingia ta kae ngwela ne ’e lalafusia ililana doo ta’ae. Sui ta, ’e langi si ’okae fasi na manatalamolu ka ilingia na manatalana kae ngwela ki. ’E ’okae fasi na manatalamolu ka ilingia na ngwane baita ki. 21 Sulia na Aofia bae ’e thaea ’i laona na Kekedalae Abu ka ’urii, “Nau kwau fala kau tai imole maadiu ki siana imole nau ki fasi da ka bae fuada ’ana baelae ’e’ete ki. Ma sui boroi ’ana ku ade ’urineri, na imole nau ki, da si dooria bo fafurongolae ’uri nau.” 22 Nia nee, kolu thaitamana naa, ne tha God ’e fala na falelae ’ana baelae ’e’ete ki fasi sa ni ti kera ne ’e langi da si manata mamana, da ka thaitamana tha God ne talaia na ngwane ne ’e bae. Ma na falelae ’ania faarongolae ’ana baelana tha God, tha God ’e fala fasi ka gwafea imole ki ne da manata mamana sui naa. 23 Nia nee, ’ana si manga imole manata mamana ki da ofu ’uria foalae, ma da ka bae ’ana baelae ’e’ete ki ne ’e langi da si thaitamana, ma lelea sa tai imole ki ne ’e langi da si manata mamana da ruu mai ’i see, ma ka langi da si thaitamana baelamolu, da kau thaea thasa molu oengwanea. 24 Sui ta, lelea sa na imole ki sui ne da ofu ’uria faarongolae ’ana baelana tha God, ma ta ngwane ne ’e langi si manata mamana ka ruu mai, nia kau thaitamana ’e too ’ana ta’alae ki. Ma sulia si tae ne ’e rongoa, nia ka thaitamana laubo ne tha God naa kau keto nia, 25 ma nia naa kau faatana na manatalae agwa nia ki, ma ka abulo faasia doo neri ki, ma nia ka boruru ’uria foasilana tha God, ma ka bae ’urii, “Mamana ’asiana, tha God ’e too fone kamolu.” 26 Doora ku ki ’ae, ’ana si manga ne molu ofu mai ’uria foalae, molu ka ade ’urii: Tee ngwane ka nguulia na faabaitalae fuana tha God, ma ta ngwane lau kau toodoo, ma ta ngwane ai ka faarongo ’ana si doo ne tha God ’e faatana fuana, ma ta ngwane ai lau kau bae ’ana baelae ne ’e langi si thaitamana, ma ta ngwane laubo kau ’inifitaa si baea neri. Aia, na doo ki sui ne da ilia bo ne na doo ’uria ’adomilana imole manata mamana ki sui. 27 Ma lelea sa tai imole ki da bae ’ana baelae ’e’ete ki ne ’e langi da si thaitamana, ’urineri tala’ana roo imole bo ma langi ta olu imole ki ne da ka bae. Ma da ka bae ’ana si manga ’e’ete ki. Ma ta ngwane ka ’inifitaa naa si baea neri ki. 28 Ma lelea sa ’e langi ta imole ka si thaitamana maalutana si baea neri ki, ’urineri ’e langi ta imole ka si bae ’ana baelae ’e’ete ki ne ’e langi da si thaitamana. Na imole ki ne da thaitamana baelae ’urineri ki, da ka enoeno bada, ma da ka bae bo ’ada ’i laona manatalada fonea tha God. 29 Ka ’urineri laubo, na imole ki ne da faarongo ’ana baelana tha God, ’e tala’ana roo imole ma langi ta olu imole bo ne dau bae. Ma na imole ki sui da ka fafurongo ’okae ’uria. 30 Sui ta, lelea sa ta ngwane ka bae ’ana baelana tha God, ma ta ngwane lau ne too ’i seeri, ma tha God ka faatana ta si doo fuana, ’e ’okae fasi ta ngwane ne ’e bae totongenao ka bona ’ana, ma nia ka alamatana ngwane ai bae ka bae ’ana. 31 ’Urineri ne imole ki sui ne da bae ’ana baelana tha God da ka fala si manga fuada teefau ’uria baelae. Molu ka ade ’urineri fasi molu ka toodoo fuamolu kwailiu ma molu ka faasuukwai kamolu kwailiu. 32 Ma ta ngwane ne faarongo ’ana baelana tha God, nia ka dau faafia baelana. 33 Sulia tha God ’e dooria kolu ka ade ’o’olo ’ana doo ki, ma kolu ka too ’ana enoenoa. Na bibirangaa ’ana foalae fuana imole ki sui ne da manata mamana ne da too ’ana maetoaa ki sui 34 ’e ’urii: ’Ana si manga molu ofu ’uria foalae, ’e langi molu si alamatana keni ki da ka bae, kera da ka too enoeno bada. ’E ilingia na bibirangaa kameli imole ki ’i Jiu ’e thaea, ne na keni ki da ka roosulia baelana arai kera ki. 35 Lelea sa ta keni ’e dooria soetalafana ta si doo, nia ka soetalafana arai nia ’ana si manga daru too ’i luma keerua, sulia si doo ni ’idalae ’ania ne na keni ka bae si manga imole ki da ofu ’uria foalae. 36 ’Urii ma kamolu imole ki ’i Korint molu manata ’amolu thasa molu baita ’asiana? Na baelana tha God ’e langi si ’ito mai faasi kamolu. Ma ’e langi lau talifili kamolu bo ne tha God ’e fala na baelana fuamolu. 37 Ma lelea sa ta ngwane ’ani kamolu ka manata ’ana thasa nia ’e too ’ana na falelae faasia na Mangoedoo Abu, ma langi nia ta ngwane ’uria faarongolae ’ana baelana tha God, ’e ’okae fasi nia ka thaitamana ne nau ku kedaa si baea fifii nia na Aofia. 38 Ma lelea sa na ngwane ’urineri ’e langi si roosulia si doo nee ki, ’urineri ’e langi molu si fafurongo ’uria si tae nee nia ’e thaea. 39 Nia nee, dooraku ki ’ae, ’e ’okae fasi molu ka thasi ’uria faarongolae ’ana baelana tha God. Ma ka langi molu si luia imole ki ne da doori bae ’ana baelae ’e’ete ne ’e langi da si thaitamana. 40 Ma ’e ’okae fasi na foalae kamolu ka ’o’olo ma ka enoeno.
151 Aia, dooraku ki ’ae, si manga neri, nau ku dooria molu ka manatatoona na Faarongolae ’Okae bae ku faarongo ’ania fuamolu ma molu ka takwe suukwai naa ’ania. 2 Lelea sa na manata mamanalae kamolu ’e suukwai ’ana Faarongolae ’Okae nee ku faarongo ’ania fuamolu, molu ka too ’ana mooria ne totoo firi. Sui ta, lelea sa molu si dau suukwai ’ana Faarongolae ’Okae neri, ’urineri na manata mamanalae kamolu na tofa doo bana. 3 Nau ku toodoo naa sulia fuamolu, si doo baita ka tatha ’asiana ki ne da faamanatai nau ’ania ne ’e ’urii: Tha Jisas Kraes ’e mae naa ’uria lafulana abulota’alae kolu ki, ilingia bae na Kekedalae Abu ’e thaea. 4 Ma da alua nia, ma tha God ka tae nia ’uria mooria ’ana oluna fe dani, ilingia na Kekedalae Abu ’e thaea. 5 Ma nia ’e dao faatai fuana tha Pita, ma sui fuana akwala ma roo aposol ki. 6 Sui ’ana tee si manga lau, nia ka dao faatai fuana imole ’oro talua 500 imole fafurongo nia ki. Ma ’orolana da ka moori ’ua bada ’i laona molaagali nee, sui ta, ta bali ’ada da mae naa. 7 Sui, nia ka dao faatai fuana tha Jemes, ma ’i buri nia ka dao faatai lau fuana aposol ki sui. 8 Ma ’i buri, nia ka dao faatai laubo fuaku ne ku ilingia ta ngwela ne ’e futa ’ana si manga ne ’e garo. 9 Sulia nau ’e langi lau ta ngwane baita ’asiana ’ana aposol ki, ma ’e langi kwa si tala’ana ’alangilaku ’ana aposol, sulia ku faangadaa imole manata mamana nia ki tha God. 10 Ma sui boroi ’ana nau ku ’urineri, nau naa ta aposol, sulia tha God ’e fili nau sulia na ade ’okaelae nia. Ma na ade ’okaelae nia ’e langi si funu, sulia ku rao suukwai ka talua na aposol ai bae ki. Aia, ’e langi lau nau ’i tala’aku ne ku rao, sulia tha God ’e liothau ’ani nau, ma ka ’adomi nau fasi ku rao fuana. 11 Ma kameli na aposol ki sui, meli ka faarongo bo ’ana tee Faarongolae ’Okae. Ma nia nee si doo ne molu manata mamana naa ’ania. 12 Aia, kameli meli toodoo fuamolu sulia ne tha God ’e taea naa tha Jisas Kraes faasia maea. Ma ’urifita nee tai imole ki ’ani kamolu da ka thaea thasa tha God ’e langi si taea lau imole ki ne da mae naa? 13 Lelea sa ’e ’afitai tha God ka taea na imole ki ne da mae naa, ’urineri tha Jisas Kraes ka si tatae laubo faasia maea. 14 Ma lelea sa tha Jisas Kraes ’e langi si tatae naa faasia maea, na toodoolae kameli ’e tofa doo bana, ma na manata mamanalae kamolu ka tofa doo laubo. 15 Ma ’e langi lau si doo neri bana, sulia lelea sa tha Jisas Kraes ’e langi si tatae naa, na baelae kameli sulia tha God na sukelae bana, sulia meli faarongo ’ania ne tha God ’e taea tha Jisas Kraes faasia maea. Sui ta, lelea sa tha God ka si taea na imole ki ne da mae naa, nia ’e langi si taea laubo tha Jisas Kraes. 16 Sulia lelea sa ’e langi si ngwaluda fuana imole mae ki da ka tatae lau, ’urineri tha Jisas Kraes ka si tatae laubo faasia maea. 17 Ma lelea sa tha God ka si taea tha Jisas Kraes, tama manata mamanalae kamolu na tofa doo bana, ma molu kau ngala naa kwakwaelae sulia na abulota’alae kamolu ki. 18 Ma ka ’urineri laubo, na imole ki ne da manata mamana ’ana tha Jisas Kraes ma da ka mae naa, da si too ’ana mooria ne totoo firi. 19 Ma lelea sa si doo ’okae ki ’ana tha Jisas Kraes ’e too naa ’ani kolu si manga kolu too ’i laona molaagali nee ma ka langi lau ’i thalo, kolu tala’ana kolu kau kwaimanatai ka tatha talua imole ki sui. 20 Sui ta, kolu thaitamana ’okae ’ana tha God ne ’e taea mamana naa tha Jisas Kraes faasia maea. Nia nee, kolu ka thaitamana laubo ne tha God kau tae kolu ne kolu manata mamana si manga kolu mae. 21 Na imole ki sui ne da mae, sulia na tee ngwane nee tha Adam. Ma ka ’urineri laubo, tha God naa kau tae kolu sulia tee ngwane nee tha Kraes. 22 Na imole ki sui da ka mae, sulia kolu ’ana kwalafaa tha Adam ne na ngwane totongenao. Ma ka ’urineri laubo, tha God naa kau tae kolu teefau ’uria mooria, sulia kolu too ngado ’ana tha Jisas Kraes. 23 Tha God ’e taea tha Kraes ’i nao. Ma kolu na imole nia ki tha Kraes, tha God naa kau tae kolu ’ana si manga tha Jisas Kraes kau oli mai. 24 Ma ’i burina, fe dani ’i’isi kau dao mai. Tha Jisas Kraes naa kau faafunuia na maalimae nia ki ne da ’inito, ma da ka too ’ana suukwaia, ma nia naa kau fala na ’initooa nia fuana Maka nia tha God. 25 Sulia tha Jisas Kraes kau ’inito lelea ka dao ’ana si manga tha God kau siitatha ’ana maalimae nia ki tha Jisas Kraes teefau, ma ka aluda fasi da ka roosulia tha Jisas Kraes. 26 Ma na maea naa na maalimae ’i’isi ne tha God kau faafunuia. 27 Sulia na Kekedalae Abu bae ’e thaea, “tha God kau alua naa doo ki sui ’i farana suukwaia nia.” Sui ta, ’e tala’ana tha God ka si alua nia ’i tala’ana ’i farana suukwaia nia tha Jisas Kraes, sulia tha God ’e alua naa doo ki sui ’i farana suukwaia nia tha Jisas Kraes. 28 Ma ’i burina doo ki sui ’e too naa ’i farana ’initooa tha Kraes na Ngwela nia tha God, nia ’i tala’ana laubo naa kau alua nia ’i tala’ana ’i farana suukwaia nia tha God ne alua naa doo ki sui ’i farana suukwaia nia tha Kraes. Ma ’ana si manga neri, tha God naa kau ’inito faafia doo ki sui. 29 Aia, tai imole ki da sisiuabu ’i talana imole ki ne da mae naa. Da sisiuabu ’urineri, sulia da thaitamana ’okae ’ana tha God naa kau taea imole ki ne da mae naa. Lelea sa tha God ka si tala’ana taelana imole ki ne da mae naa, ’urifita nee da ka sisiuabu ’urineri? 30 Aia, kameli aposol ki laubo, sui boroi ’ana doo ’oro ki ka thasi ’uria thaumaelilameli, meli faatalo naa ’ana tha Kraes. Lelea sa ’e langi meli si thaitamana tha God naa kau tae kolu, ’e ’afitai meli ka nonimaabe ’uria ililana si raoa neri. 31 Dooraku ki ’ae, ’e mamana ’asiana, ’ana fe dani ki sui bo, na doo ki da thasi ’uria thaumaelilaku. ’E mamana ’asiana laubo, nau ku nonithathala sulia manata mamanalae kamolu ki ’ana tha Jisas Kraes na Aofia kolu. 32 Nau ku daotoona ’afitaia baita ’asiana ’i see ’i Efesas, sulia maalimae nau ki da ilingia koito kwasi ki, ma da ka dooria thaumaelilaku. Lelea sa nau kwasi fiitoo ’ana tha God ne taea imole ki faasia maea, ’e langi kwasi nonimaabe bo ’uria tathalae ’i laona ’afitaia ki ’urineri. Ma lelea sa tha God ka si taea imole ki faasia na maea, ’e ’okae fuakolu fasi kolu ka roosulia na baelana bae ’e ’urii, “Kolu ka fanga baita, ma kolu ka kuu baita ’akolu, sulia ’e langi si tau kolu kau mae laubo ’akolu.” 33 Aia, ’e langi molu si manata mamana ’ana doo susuke ki. Lelea sa molu lea ofu fonea na imole ta’ae ki, molu kau ilingi kera laubo. 34 Molu ka manata ’o’olo, ma molu ka abulo faasia na abulota’alae kamolu ki. Sulia nau ku thaitamana tai imole ki ’ani kamolu ’e langi da si thaitamana ’ua tha God, molu kau ’ida sulia si doo neri. 35 Aia, alamia ta ngwane ’e soetalafana ka ’urii, “’Urii ma tha God ka tae ’urifita ’ana imole ki ne da mae naa? Ma na noni doo ’urifita ne dau too ’ania?” 36 Aia, si olisilae nau ’e ’urii: Si soetoolae neri ’e oengwanea ’asiana. Manata fasi sulia na mingge doo ne ’o fasia. ’O ’eli faafia, ma ’i buri na mingge doo neri ka tanggwasu mai. Ma na alulana nonii doo ’e ’urineri laubo. 37 Ma na doo ne ’o fasia naa na mingge doo neri. Alamia migana ta ’a’ada ma langi ta doo bana, sui ta, kolu thaitamana ’okae ’ana ne ’e langi si alua ’ua ta nonii ’ai mamana. 38 Sui ta, si manga ’e tae, tha God ka fi fala mingge doo neri ka too ’ana nonii doo ne ’e dooria. Ma tha God ’e dooria fasi ’ai ’e’ete ki ka thakatafa mai faasia mingge doo ’e’ete ki. 39 Ma ka ’urineri laubo ’ana noni ki ne tha God ’e thaungaida, sulia ’e langi da si bobola teefau. Na imole ki, ma na botho ki, ma na tha’aro ki, ma na thakwari ki, nonida ’e ’e’ete kwailiu sui bo. 40 Ma tha God ’e thaungana doo ’oro ki ’i laona molaagali nee ma ’i laona mamangaa laubo. Ma na doo neri ki, ’e thaungaida da ka lio ’okae sui bo. Ma na doo ki ne ’e thaungaida ’i mamangaa, da too ’ana kwangalae ’e’ete faasia na doo ki ’i laona molaagali nee. 41 Sulia na thato ’e too laubo ’ana kwangalae nia ’i tala’ana, ma na sinali ka too laubo ’ana ta kwangalae. Ma na bubulu ki da ka too ’ana kwangalae kera ka ’e’ete laubana. 42 Ma ka ’urineri laubo si manga tha God kau taea imole ki ne da mae naa. ’Ana si manga ta imole ’e mae, da alua naa nonina, ma nia kau fura. Ma si manga tha God kau taea, na noni faalu nia kau totoo firi. 43 Ma ’ana si manga da alua ta noni ’i laona thaegano, ’e langi si lio ’okae ma si suukwai. Sui ta, ’ana si manga tha God kau taea, nia kau tatala fasi na noni neri ka lio ’okae ma ka suukwai. 44 Ma na nonikolu nee da alua ’i laona thaegano, nia naa na noni ’ana molaagali nee. Ma si manga tha God kau tae kolu, kolu kau too ’ana noni faalu ki ne ’e tala’ana toolae ’i thalo. Sulia lelea sa kolu ka too ’ana nonikolu ne ’e tala’ana toolae ’i laona molaagali, kolu kau too laubo ’ana nonikolu ne ’e tala’ana toolae ’i thalo. 45 Sulia na Kekedalae Abu bae ’e bae ’urii, “Tha God ’e eta thaungana ngwane moori ne thatana tha Adam.” Aia, tha Kraes nee kolu thaea ’ana “Adam ’i’isi,” nia naa na Mangoedoo ne fala na mooria faalu. 46 Na noni faalu ’e langi si eta lea mai, sulia kolu moori ’ua ’i laona molaagali sui fatai kolu ka fi moori ’i thalo. 47 ’Urineri, na etana Adam, tha God ’e thaungana ’ana thaegano ’i laona molaagali. Ma na ruana Adam, ’e sifo mai faasia ’i thalo. 48 Ma na imole ki ne da too ’i molaagali, da too ’ana noni ne ilingia tha Adam bae tha God ’e thaungana ’ana thaegano ’i molaagali. Ma na imole ki ne da too ’i thalo, da too ’ana noni ne ilingia tha Kraes ne ’e sifo mai faasia ’i thalo. 49 ’Ana si manga neri, na nonikolu ’e ilingia na nonina tha Adam bae tha God ’e thaungana ’ana thaegano. Sui ta, na noni faalu kolu ki kau ilingia na nonina tha Kraes ne ’e sifo mai faasia ’i thalo. 50 Aia, dooraku ki ’ae, nonikolu nee ’i laona molaagali ’e too ’ana mariko ma na ’abu, ma ’e langi ka si tala’ana ruulae ’i laona ’initooa nia tha God. Ma na nonikolu ne ’e tala’ana maea, ’e ’afitai ka too ’ana mooria ne totoo firi. 51 Aia, molu ka fafurongo fasi ’uria si baea nau, sulia ku faarongo ’ana tee si doo agwa. Tai imole ki ne da manata mamana, ’e langi da si mae. Sui ta, tha God naa kau bulasi kolu teefau. 52 Ma si doo neri naa kau fuli ’ali’ali bana, ilingia na binalulana binabina ’i maana imole. ’Ana si manga tha God kau ufia na bungu ka angi ’ana fe dani ’i’isi ’ana molaagali nee, sui nia ka fi taea na imole manata mamana ki ne da mae sui naa, ma ’e langi da si mae lau. Ma tai imole ’akolu ne ’e langi da si mae ’ua, tha God kau bulasi kolu fasi kolu ka too ’ana nonii doo faalu ki. 53 Ma na nonikolu nee tala’ana maea, tha God kau bulasia fasi ka moori firi. 54 ’Ana si manga tha God ’e bulasia na nonikolu ’urineri ’e ’afitai kolu ka mae lau. Ma nia ka faamamanea na Kekedalae Abu bae ’e thaea, “Tha God ’e siitatha naa ’ana maea, ma na maea ka funu naa! 55 ’E ’urifita, ni ’oe na maea, na suukwaia ’oe ni siitathalae ’e nii na ’i fai? ’E ’urifita, ni ’oe na maea, na suukwaia ’oe ni nagalana imole ki ’e nii na ’i fai?” 56 Ma si doo ne adea na imole ki da ka mae ’e ’urii, sulia da ilia doo ta’ae ki. Ma da too ’ana ta’alae sulia da aburongo ’ana bibirangaa nia ki tha God. 57 Aia, kolu faabaitaa tha God, sulia na Aofia kolu tha Jisas Kraes ne faamoori kolu faasia maea. 58 Nia nee, doora ’okae nau ki ’ae, molu ka faasuukwaia manata mamanalae kamolu ki ’ana tha Kraes. Ma molu ka takwe suukwai ’ana raoa kamolu ki fuana Aofia, sulia molu thaitamana raoa kamolu ki fuana Aofia ’e langi si tofe too.
161 Aia, nau ku olisia naa kekedalae kamolu ki sulia na malefo bae molu ofua ’uria ’adomilana imole manata mamana ki bae da too ’i Jiudea. Nau ku dooria molu ka ilia si tae ne nau ku thaea laubo fuana imole manata mamana ki ’i laona bali fera ’i Galesia. 2 ’Ana Sande ki sui, ’e ’okae fasi tee tee imole ’ani kamolu ka kwaimaakwali ’ana si tae nee nia kau fala, ka tala’ana si tae ne ’e thaitamana nia kau ngala ’ana raoa nia, ma nia ka konia lelea ku dao kau. Lelea sa molu ka ade ’urineri, si manga ku dao kau siamolu, ’e langi molu si ofua lau tai malefo, sulia molu kwaimaakwali sui naa. 3 Sui, si manga ku dao kau, molu ka filia ta ngwane fasi ka ngala falelae kamolu ki ’uria ’i Jerusalem. Ma nau kwau kekeda fuana ngwane naonao ki ’ana ofulada na imole manata mamana ki ’i Jerusalem sulia na imole bae ki molu filida da ngala si falelae kamolu ki. Sui, da ka ngala kekedalae nau fonea si falelae kamolu ma da ka lea. 4 Ma lelea sa molu ka dooria ku lea laubo foneda ’uria ’i Jerusalem, ’urineri kolu kau lea kwaimani na ’akolu. 5 Nau kwau dao siamolu ’i Korint si manga ku tatha ’i laona bali fera ’i Masedonia, sulia ku manata sulia kwau lea fasi ’uria ’i Masedonia. 6 Ma si manga ku too naa ’i seeri fone kamolu, nau kwau too fone kamolu sulia ta tee fe sinali, ma alamia kwau too fone kamolu lelea ka dao ’ana si manga na uuni gwagwaria ’e sui. Ma si manga ku tatha dongaa, ’e ’okae ’asiana fasi molu ka ’adomi nau ’ana lealae nau ’uria ’i fai nee kwau lea ’uria. 7 ’E langi kwasi dooria baku daotoolamolulae sulia kae si manga bo. Ma nau ku dooria kwau too ka tee ore tau fone kamolu, lelea sa na Aofia ’e alamatana. 8 Nau ku manata thasa kwau too ’i see ’i Efesas lelea ka dao ’ana fe dani ’ana Pentekos, sui fatai kwa fi lea. 9 Sui boroi ’ana imole ’oro ne da maalimae ’ana Faarongolae ’Okae, da ka too laubo ’i see, nau kwau too ’i see, sulia ’e ngwaluda fasi nau ku ilia raoa baita fuana Aofia si manga neri. 10 Si manga tha Timoti ’e dao kau ’i siamolu, molu ka ade ’okae fuana, sulia nia na ngwane rao nia na Aofia ilingi nau laubo. 11 ’E langi molu si manata faekwa ’ana tha Timoti. Ma si manga nia ’e tatha dongaa ’ana lealae nia, molu ka ’adomia, ma molu ka faatana liothaua kamolu fuana, fasi nia ka tala’ana olilae mai ’i see ’i siaku. Sulia nau ku kwaimaakwali ’ana tha Timoti fonea tai ngwane ki laubo ne da manata mamana. 12 Aia, nau ku gania doora kolu tha Apolos fasi ka daotoomolu fonea tai doora ’akolu ki ne da dao laubo kau siamolu. Sui ta, nia ’e manata ’ana thasa ’e langi si ’okae ’uria lealae kau siamolu si manga neri. ’Ana ta si manga lau kau, lelea sa ka ngwaluda fuana, nia ka fi lea kau siamolu. 13 Aia, molu ka lilio ’okae, ma molu ka takwe suukwai ’ana manata mamanalae kamolu ki. Ma molu ka rakea ma molu ka takwe suukwai. 14 Ma ’ana doo ki sui ne molu ilia, molu ka faatana liothaua kamolu ki. 15 Aia, molu thaitamana na ngwane totongenao ne manata mamana ’i malutamolu ’i Gris, nia ne tha Stafanas fonea toaa nia. Da rao suukwai teefau ’uria ’adomilana imole nia ki tha God. Doora nau ki ’ae, nau ku gani kamolu, 16 fasi molu ka roosulia baelana imole ki ilingia tha Stafanas, ma na toaa nia fonea tai imole ki lau ne da rao foneda. 17 Nau ku nonithathala ’asiana sulia na daolana tha Stafanas, ma tha Fotunatus, ma tha Akaikus, sulia da too sui bo fone nau, sui boroi ’ana molu si tala’ana toolae fone nau. 18 Da faanonithathala nau ilingia laubo ne da faanonithathala kamolu. Molu ka faatana faare baitalae kamolu ki fuana ngwane ’urineri ki. 19 Aia, na imole manata mamana ki ’i laona bali fera ’i Eisia, da fala kau si bae ’okaelae kera ki fuamolu. Ma tha Akuila ma ni Prisila fonea sa ni ti kera ne da ofu ’i laona luma kera ’uria foalae, kera teefau ne da fala laubo kau si bae ’okaelae kera ki fuamolu. 20 Ma na imole ki ne da manata mamana sui bo ne da too ’i see, kera laubo ne da fala kau si baea ’okae kera ki fuamolu. Aia, ma kamolu sui bo molu ka faatana liothaua kamolu ki fuamolu kwailiu, ’ana si manga ki molu kau riki kamolu. 21 Aia, si baelae ’okae nau fuamolu nee, nau tha Pol ’i tala’aku, ne ku kedaa kau ’ana ’abaku. 22 Ma lelea sa ta ngwane ’e langi si liothau ’ana Aofia, nau ku dooria tha God ka fala kwakwaelae fuana. Ma nau ku dooria ’asiana thasa na Aofia tha Jisas ka oli ’ali’ali na mai. 23 Nau ku dooria na Aofia kolu tha Jisas ka ade ’okae fuamolu. 24 Ma ni nau laubo, ku liothau ’asiana ’ani kamolu sulia tha Jisas Kraes.