MALAKI

Sa’ona yã

¹ Yã kɛ̀ Dii ò Isarailinↄnɛ Malaki gãzĩn yɛ̀. ² Mamↄma Dii ma bè má yeazi, ben a bè ma yeazi diamɛ? Mamↄma Dii ma bè Isau nɛ́ Yakubu vĩ̀inloo? Baa kↄ̃n beeeo Yakubun má yezi ³ ma gi Isauzi, ben ma à gusĩsĩdee lì gugbagaaga ũ, ma à bùsu kɛ̀ gbáa gbɛ̃ngboonↄ kúkii ũ. ⁴ Ɛdↄmu gbɛ̃ pìnↄ bè wà ń wɛ́tɛnↄ dúgu zↄ̃̀, weé ɛara wà ń bɛzĩnↄ fɛɛ. Ben mamↄma Dii Zĩ̀kpɛde ma bè: Tó wà kɛ̀kɛ wà kàɛ, mɛ́ gboro, weé beńnɛ Bùsu Zaa gbɛ̃nↄ, gbɛ̃ kɛ̀ Dii pɛ̃tɛ̃ kɛ̀ńzi ai gurↄ pínginↄ! ⁵ É wɛ́ɛ si yã pìlɛ à be Dii bíta ai Isarailinↄ bùsu baa kãa kpa.

⁶ Nɛ́ è a de kpe da bensↄ̃ zↄ̀bleri è a dii kpe da. Kɛ̀ má dɛ a De ũ, ée ma kpe daaↄ́? Kɛ̀ má dɛ a Dii ũ, á ma vĩa vĩↄ́? Mamↄma Dii Zĩ̀kpɛde mámbe mɛ́ɛ a laa. A sa’orinↄ ámbe ée kya kaamagu. Eè be: Dian wa kya kàngu nà? ⁷ Kɛ̀ a kya kà ma teebun yãnzimɛ. Eè mↄ́ ma gbãgbãkiia kↄ̃n pↄ́ble gbãsĩo. Eè be: Dian wa n gbãgbãkii gbãsĩ lɛ̀? ⁸ Kɛ̀ a mↄ saa oma kↄ̃n pↄ́kãde vĩ̀anↄ, yã zaaan gweroo? Kɛ̀ a saa òma kↄ̃n pↄ́ ɛrɛnↄ kↄ̃n à gyãreenↄ, yã zaaan gweroo? À gá kpá bùsu gbɛ̃nsia à gwa, tó a yã é kánɛ à a sáabu kpá. Mamↄma Dii Zĩ̀kpɛde mámbe mɛ́ɛ a laa.

⁹ À agbaa kpámɛ mà a wɛ̃nda gwa. Mↄde tó pↄ́ beee takanↄↄ kú a ↄzĩ, mɛ́ síↄ́? Mamↄma Dii Zĩ̀kpɛde mámbe mɛ́ɛ a laa. ¹⁰ Wà be a gbɛ̃ke gàa à ma ua zɛ́ tàta yã, lɛ wàton gɛ̃ wà tɛ́ pɛkↄ̃rɛ ma gbãgbãkiia pãro. Beee sã̀ↄ. Mamↄma Dii Zĩ̀kpɛde mámbe má ò. A yã e kɛɛmɛ nnaro, mɛ́ a gba síro. ¹¹ Zaa ↄfãntɛ̃bↄɛ kpa ai à gɛ̃kiia ma tↄ́ égↄ̃ bíta boriinↄ tɛ́. Weé tuaetiti kpátamɛ weé mↄ́mɛ kↄ̃n gba gbãsĩsainↄ gu píngia, zaakɛ ma tↄ́ égↄ̃ bíta boriinↄ tɛ́. Mamↄma Dii Zĩ̀kpɛde mámbe má ò. ¹² Mↄde apinↄ eè dↄkɛ kↄ̃n ma tↄ́o eè be ma teebu gbãsĩ vĩ, ben eè saa oa kↄ̃n pↄ́kãde ginanↄ. ¹³ Mamↄma Dii Zĩ̀kpɛde ma bè: Eè be a kpasao kↄ̃n yã pìo, ben eè lɛ́zukii kɛa. Tó a mↄ ma gbãgbã kↄ̃n pↄ́ kↄ̃̀ↄkũnanↄ kↄ̃n pↄ́ ɛrɛnↄ kↄ̃n pↄ́ gyãreenↄ, mɛ́ beeenↄ síↄ́? Mamↄma Dii mámbe mɛ́ɛ a laa. ¹⁴ Mↄnafikidee kɛ̀ pↄ́ kyà vĩ a kpàsan kɛ̀ à lɛ́ gbɛ̃̀mɛ, ben à gàa à ma gbãgbã kↄ̃n pↄ́ seedeeo à gɛ̃ɛ ũ, ma láari kɛ̀ adeea. Zaakɛ mámbe Kína bíta ũ, ma tↄ́ è boriinↄ naasi kũ. Mamↄma Dii Zĩ̀kpɛde mámbe má ò.

¹ Mamↄma Dii Zĩ̀kpɛde ma bè: A sa’orinↄ a yãn yɛ̀ sa. ² Tó ée ma yã maro, tó ée da a swɛ̃̀n à ma tↄ́ bↄro, mɛ́ láari kɛawa lɛ àton gↄ̃ aubarika vĩro. Má bↄ̀agu se kↄ̀, zaakɛ ée da a swɛ̃̀n a ma tↄ́ bↄ̀ro. ³ À ma! Mɛ́ kpãkɛ̃ a boriinↄzi a yãnzi, mɛ́ zĩbaa sa’opↄnↄ gbↄ̃̀ lↄ́lↄ a uua, weé a sɛ́ɛ wà a kwɛ́. ⁴ Égↄ̃ dↄ̃ sa kɛ̀ ma yã beee dìɛare lɛ ma bà kuuna kↄ̃n Levi boriinↄ gↄ̃ kuu. Mamↄma Dii Zĩ̀kpɛde mámbe má ò. ⁵ Ma bà kuunańyo pì guu ma wɛ̃̀ndi kↄ̃n aafiao kpàḿma lɛ aↄ̃gↄ̃ ma vĩa kɛɛ, ben aↄ̃ ma vĩa kɛ̀, ma tↄ́ naasi ń kũ. ⁶ Yãdannɛna yãpuraa da ń lɛ́n, wèe ɛgɛyã ma ń lɛ́nlo. Aↄ̃ táa òmao kↄ̃n lɛdolɛo kↄ̃n nↄ̀sɛ puraao, aↄ̃ gbɛ̃nↄ bↄ̀ à zaaa guu pari. ⁷ À maa sa’ori gↄ̃ dↄ̃na vĩ lɛ gbɛ̃nↄ e wà yãdannɛna ma à lɛ́zĩ, zaakɛ àmbe mamↄma Dii Zĩ̀kpɛde zĩ̀ri ũ. ⁸ Amↄa sↄ̃ a kɛ̃ zɛ́a, a yãdannɛnanↄↄ tò gbɛ̃nↄ fù pari, a ma bà kuuna kↄ̃n Levi boriinↄ gbòro. Mamↄma Dii Zĩ̀kpɛde mámbe má ò. ⁹ Ben má tò wà kya kàagu ma a kɛ̃sã gbɛ̃ píngi kiia, kɛ̀ ée tɛ́ ma tuubaziro bensↄ̃ eè gbɛ̃nↄ tɛ̃̀ bo doka musu.

Gina nↄↄzi yã

¹⁰ À dɛ wa píngi De mɛ̀n domɛ? À dɛ Luda dↄ̃nkↄ̃ bé à wa kɛɛ? Bↄ́ bé à tò weè yãfɛɛ kɛkↄ̃nɛ? Wa Luda bà kuuna kↄ̃n wa dezinↄ yã gbòro. ¹¹ Yudanↄ yãfɛɛ kɛ̀ aↄ̃ yã zaaa kɛ̀ Isarailinↄ bùsun kↄ̃n Yerusalɛmuo, zaakɛ aↄ̃ nↄ tãagbãgbãrinↄ sɛ̀ wà Dii kpɛ́ kɛ̀ à yezi gbãsĩ lɛ̀o. ¹² Gbɛ̃ kɛ̀ yã beee taka kɛ̀, Dii à kɛ̃ Yakubu boriinↄa, baa tó démɛ, baa tó à mↄ̀ kↄ̃n gbaanↄ Dii Zĩ̀kpɛdenɛ.

¹³ Yã plaadee kɛ̀ eè kɛɛn yɛ̀. Eègↄ̃ ↄ́ↄ dↄↄ àgↄ̃ wii pɛɛ, a wɛ́ɛ’i ègↄ̃ kú Dii gbãgbãkiia, kɛ̀ èe wɛ́ɛ sɛ́ à gbaa kɛ̀ a mↄonɛ gwa gbasa à sìro yãnzi. ¹⁴ Eè be: Bↄ́ bé à mↄ̀ kↄ̃n yã kɛ̀o? Kɛ̀ Dii bé sèedadee ũ a dagura kↄ̃n n gↄ̃kparɛkɛgurↄ nↄkpammao yãnzimɛ. Zaakɛ n nↄkpamma pìn n gbɛ̃ndoo kɛ̀ a kↄ̃ yã mà ũ, ben n yãfɛɛ kɛ̀nɛ. ¹⁵ À dɛ Dii a kɛ mɛ̀ dↄ̃nkↄ̃ ũ lɛ a mɛ̀ kↄ̃n a lɛ́o gↄ̃ dↄ̃nkↄ̃ yãnzimɛ? Bↄ́n Ludaa e pɛɛa a mɛ̀dↄ̃nkↄ̃kɛɛ pì musuu? Lɛ a nɛ́nↄ e wà à yã ma yãnzimɛ. Beee yãnzi àgↄ̃ a zĩnda kũna dↄ̃ lɛ àton yãfɛɛ kɛ a nↄkpammanɛro. ¹⁶ Mamↄma Dii Isarailinↄ Luda ma bè, ma za yìgidɛnan yãn kↄ̃n nↄ kpɛbↄnao. Mamↄma Dii Zĩ̀kpɛde mámbe má ò. Àgↄ̃ a zĩnda kũna dↄ̃, àton yãfɛɛ kɛnɛro.

¹⁷ Á tò Dii kpàsa kↄ̃n a yã’onao. Eè be: Wa yã kparee bé à à kpàsa? Kɛ̀ eè be zaakɛrinↄↄ maa Diinɛ, ben aↄ̃ yã è kánɛ yãnzi. Eè be dↄ Luda kɛ̀ è yãkpaɛ kɛ kↄ̃n gbɛ̃nↄo a zɛ́a pì kú mámɛ?

Dii yãkpaɛkɛgurↄↄ zĩ

¹ Mamↄma Dii Zĩ̀kpɛde ma bè: À ma! Mɛ́ ma zĩ̀ri gbarɛ à dↄmɛ aɛ à zɛ́ kɛkɛmɛ. Dii kɛ̀ eè à kii wɛtɛ é gɛ̃ a kpɛ́n kãndo. À ma, ma bà kuunaao Malaika kɛ̀ a pↄↄ dↄa pì e mↄↄ! ² Mↄde dé bé eé à mↄ́gurↄↄ fↄ̃ↄ? Tó à bↄ̀ gupuraaa, dé bé eé fↄ̃ à zɛɛ? Zaakɛ eégↄ̃ dɛ lán mↄ̀baasari tɛ́ bàmɛ, lán pↄ́pipiri mↄsↄrↄ gbãaa bà. ³ Eé vɛ̃ɛ à gbɛ̃nↄ baasa à ń gbãsĩ bↄ. Eé gbãsĩ bↄ Levi boriinↄn lán wè kɛ vura kↄ̃n kondogionɛ nà, gbɛ̃nↄ é gbasa wà mↄ́ Diinɛ kↄ̃n gbaanↄ a zɛ́a. ⁴ Zĩ pìa Yerusalɛmudeenↄ kↄ̃n Yudanↄ ń píngi gbaa é ká Diinɛ lán yãa bà, lán à zii bà.

⁵ Mamↄma Dii Zĩ̀kpɛde ma bè: Mɛ́ mↄ́azi yãkpaɛkɛkiia mɛ́gↄ̃ wãa mà gbɛ̃ kɛ̀ aↄ̃ↄ ma vĩa vĩroonↄ bↄbↄ ń dàn: Pↄ́dammarinↄ kↄ̃n zinakɛrinↄ kↄ̃n gbɛ̃ kɛ̀ aↄ̃è la da ɛgɛyã musunↄ kↄ̃n gbɛ̃ kɛ̀ aↄ̃è gbãaa mↄ ń zĩkɛrinↄnɛ kↄ̃n gyaanↄnↄ kↄ̃n tonɛnↄ kↄ̃n bↄ̀amↄnↄ.

Kpãi’ona Ludaa

⁶ Mamↄma Dii mɛɛ̀ liɛro. Beee yãnzin a Yakubu boriinↄ ée kaatɛro. ⁷ Mamↄma Dii Zĩ̀kpɛde ma bè: Zaa a dezinↄ gurↄↄa a pã ma yãnɛ á tɛ́ziro. À aɛ dↄma, mɛ́ aɛ dↄawa. Eè be, dian wé aɛ dↄmmaa?

⁸ Gbɛ̃ntee è kpãi o Ludaaↄ́? Mↄde ée kpãi ooma. Eè be, bↄ́ musun ée kpãi oomaa? A pↄ́ kuride kↄ̃n a gbaanↄ yã musumɛ. ⁹ A bori píngi gↄ̃̀ láari pↄ́ ũ kɛ̀ ée kpãi ooma yãnzi. ¹⁰ À mↄ́ kↄ̃n pↄ́ kurideeo píngi à ká ma auzikikaɛkiin, lɛ pↄ́blee gↄ̃ kú ma kpɛ́n. Mamↄma Dii Zĩ̀kpɛde mámbe má ò. À ma lɛ́ beee musu à gwa, tó mɛ́ɛ musu zɛ́ wɛ̃ ma aubarika pìsiare a kora à kákiiziro. ¹¹ Mamↄma Dii Zĩ̀kpɛde ma bè: Mɛ́ kpá a bura pↄ́ yàkarinↄnɛ lɛ aↄ̃ton a pↄ́nↄ kaatɛro. A geepi línↄ nɛ́ é wororo. ¹² Bori píngi é be aubarikadeenↄn a ũ, zaakɛ a bùsu égↄ̃ nna. Mamↄma Dii Zĩ̀kpɛde mámbe má ò.

¹³ Mamↄma Dii ma bè: A yã pãsĩ ò ma musu. Eè be, bↄ́ yãn wá ò n musuu? ¹⁴ A bè zↄ̀blena Ludanɛ nɛ́ yã pãamɛ. Kɛ̀ wa zĩi kɛ̀ Dii Zĩ̀kpɛde yãa bensↄ̃ wa pↄsia utanↄ dà à yãnzi, bↄ́ àren wá è? ¹⁵ Tia la eè be wadadeenↄn aubarikadeenↄ ũ. Ée daa zaakɛrinↄ bé wèe kãsãa pɛɛɛ, gbɛ̃ kɛ̀ è be Luda pita wà ↄsi ká sↄ̃, yãke è à lero.

¹⁶ Ben gbɛ̃ kɛ̀ aↄ̃ↄ Dii vĩa vĩinↄ yã ò kↄ̃o, ben à swã kpà ń yãzi à mà. Ben wà gbɛ̃ kɛ̀ aↄ̃ↄ Dii vĩa vĩi kɛ̀ aↄ̃è laasuu lɛ́anↄ tↄ́ kɛ̃̀ dↄngu takadan à aɛ. ¹⁷ Mamↄma Dii Zĩ̀kpɛde ma bè gurↄↄ kɛ̀ ma bↄ kↄ̃n yão, aↄ̃égↄ̃ dɛ ma pↄ́ ũ ma auziki ũ. Mɛ́ sùu kɛńyo lán gbɛ̃ è sùu kɛ kↄ̃n a nɛ́ kɛ̀ èe zĩi kɛɛnɛo nà. ¹⁸ É gbɛ̃ maaanↄ kↄ̃n gbɛ̃ zaaanↄ dↄ̃kↄ̃zi sa, gbɛ̃ kɛ̀ aↄ̃ↄe dↄↄ Ludazinↄ kↄ̃n gbɛ̃ kɛ̀ aↄ̃ↄe dↄↄziroonↄ.

Dii mↄ́gurↄↄ

¹ Mamↄma Dii Zĩ̀kpɛde ma bè: À ma! Gurↄↄ pì e mↄↄ, eégↄ̃ wãa lán mↄ̀datɛ bà, bensↄ̃ wadadeenↄ kↄ̃n zaakɛrinↄ égↄ̃ dɛ lán sɛ̃̀ kori bà. Gurↄↄ pì é ń kpata ń píngi, aↄ̃ kãsãa ke aↄ̃ ↄnɛ é gↄ̃ro. ² Amↄa kɛ̀ á ma vĩa vĩinↄ sↄ̃, a mìsina Ɔfãntɛ̃ é bↄ, aafia égↄ̃ kú à gupuraazi. É bↄɛ àgↄ̃ vĩvĩi lán zùnɛ kɛ̀ wà ń gbáɛnↄ bà. ³ Mamↄma Dii Zĩ̀kpɛde ma bè: Gurↄↄ kɛ̀ ma bↄ kↄ̃n yão, é kìti pá gbɛ̃ zaaanↄa, aↄ̃égↄ̃ dɛ lán túbu bà a gbá gĩzĩ.

⁴ À tó doka kɛ̀ má kpà ma zↄ̀bleri Musaa zaa Orɛbu gↄ̃ dↄagu, yã kɛ̀ má dìɛ Isarailinↄnɛ kↄ̃n yã kɛ̀ má dàńnɛo. ⁵ À ma! Mɛ́ annabi Ilia zĩawa ai ma mↄ́gurↄ bíta naasidee gↄ̃ gá ká. ⁶ Eé tó denↄ pↄↄ gↄ̃ kú ń nɛ́nↄa bensↄ̃ nɛ́nↄ pↄↄ égↄ̃ kú ń denↄa. Tó lɛnlo, mɛ́ mↄ́ mà ↄ pãɛ a bùsua mà lɛ́ kɛare.