AYUBA

Setãn Ayuba yↄ̃na 1:1-2:13

Ayuba kyakana a igurↄↄn 3:1-3:26

Ayuba gbɛ̃nnanↄ yãsialana 4:1-5:22

Ayuba wena a gbɛ̃nnanↄ 14, 19, 31

Dii wena Ayubala 38:1-41:34

Ayuba yã mìdɛna 42:1-42:17

Setãn Ayuba yↄ̃na káaku

¹ Gↄ̃gbɛ̃ kee kú Uzu bùsun yã à tↄ́n Ayuba. Gbɛ̃ maaamɛ, ègↄ̃ taari vĩro. À Luda vĩa vĩ bensↄ̃ à gì yãzaakɛnazi. ² À nɛ́gↄ̃gbɛ̃nↄ vĩ gↄ̃ↄn swɛɛplaa, nɛ́nↄgbɛ̃nↄ gↄ̃ↄn aagↄ̃. ³ À sãanↄ vĩ bↄrↄ swɛɛplaa, lakuminↄ bↄrↄ aagↄ̃, zùnↄ bↄrↄ do, zaakinↄ wàa plaa kpɛ́ basↄↄro, bensↄ̃ à zĩkɛrinↄↄ pari maamaa. À auziki bíta dɛ ↄfãntɛ̃bↄɛ kpa gbɛ̃nↄ pↄ́la píngi. ⁴ À nɛ́gↄ̃gbɛ̃nↄ ègↄ̃ pↄnna pↄ́blee kɛɛkↄ̃nɛ bɛ kↄ̃n bɛɛo, aↄ̃è ń dãre pìnↄ sísi aↄ̃ mↄ́ wà pↄ́ ble wà í mińyo lɛdo. ⁵ Gurↄↄ kɛ̀ aↄ̃ pↄnna pↄ́ blè wà yã̀a píngi, Ayuba è gbɛ̃ zĩḿma wà gbãsĩ bↄńgu. Tó à guu dↄ̀, è fɛɛ kↄngↄ idɛ’idɛ à sa’opↄ kɛ̀ wè ká tɛ́n à tɛ́ kũ o aↄ̃ baadenɛ à be: Wègↄ̃ dↄ̃ro ma nɛ́nↄ durun kɛ̀ aↄ̃ dↄkɛ̀ kↄ̃n Ludao ń swɛ̃̀n gwɛɛ. Lɛn Ayuba ègↄ̃ kɛɛ lɛ gurↄ píngi.

⁶ Zĩkea malaikanↄ mↄ̀ wà zɛ̀ Dii aɛ, bensↄ̃ Setãn kú ń tɛ́. ⁷ Ben Dii bè Setãnnɛ: N bↄ mámɛ? À wèàla à bè: Mɛ́ɛ gaa mɛ́ɛ suu mɛ́ɛ likↄ̃aa zↄ̃ↄ anduna guumɛ. ⁸ Ben Dii bènɛ: N ma zↄ̀bleri Ayuba èↄ́? À sáa kú anduna guuro. Gbɛ̃ maaamɛ, à taari vĩro. À ma vĩa vĩ bensↄ̃ à gì yãzaakɛnazi. ⁹ Ben Setãn bè Diinɛ: Ayuba n vĩa vĩ pãn yↄ́? ¹⁰ Ḿbe n kara kpà n ligazi kↄ̃n à bɛɛo kↄ̃n pↄ́ kɛ̀ à vĩinↄ píngi. N aubarika dà à zĩin, ben à pↄ́nↄ kↄ̃̀ à dàgula. ¹¹ Ǹ ↄ bↄ ǹ pá à pↄ́nↄa píngi ǹ gwa, tó èe yã zaaa onnɛro. ¹² Ben Dii bènɛ: Tↄ̀! Ma à pↄ́ píngi nànnɛ n ↄzĩ, mↄde ǹton ↄ pá à mɛ̀aro. Ben Setãn gù Dii aɛ.

¹³ Zĩkea Ayuba nɛ́gↄ̃gbɛ̃nↄ kↄ̃n à nɛ́nↄgbɛ̃nↄↄ e pↄ́ blee aↄ̃ↄe geepiwɛ̃ɛ mii ń vĩ̀i bɛ. ¹⁴ Ben gbɛ̃ke mↄ̀ Ayuba kiia à bè: Zùnↄↄ e bú wii bensↄ̃ zaakinↄↄ e sɛ̃̀ blee ń saɛ, ¹⁵ ben Sɛbanↄ lɛ̀ɛḿma aↄ̃ ń sɛ́ɛ wà tàńyo, aↄ̃ ń dã̀rinↄ dɛ̀dɛ kↄ̃n fɛ̃ɛdaao. Mámbe ma bↄ mado ma mↄ à baaru kpánnɛ. ¹⁶ Èe yã o à yã̀aro, ben gbɛ̃ pãnde mↄ̀ à bè: Laa pɛ̀ɛ n sã kpàsanↄa aↄ̃ tɛ́ kũ̀, pↄ́dãrinↄ gàga. Mámbe ma bↄ mado ma mↄ à baaru kpánnɛ. ¹⁷ Èe yã o à yã̀aro, ben gbɛ̃ pãnde mↄ̀ à bè: Kaladianↄ kↄ̃ kpàatɛ gãli aagↄ̃ aↄ̃ mↄ̀ wà lɛ̀ɛ n lakuminↄa wà ń sɛ́ɛ wà tàńyo, wà ń dã̀rinↄ dɛ̀dɛ kↄ̃n fɛ̃ɛdaao. Mámbe ma bↄ mado ma mↄ à baaru kpánnɛ. ¹⁸ Èe yã o à yã̀aro, ben gbɛ̃ pãnde mↄ̀ à bè: N nɛ́gↄ̃gbɛ̃nↄ kↄ̃n n nɛ́nↄgbɛ̃nↄↄ e pↄ́ blee aↄ̃ↄe geepiwɛ̃ɛ mii ń vĩ̀i bɛ, ¹⁹ ben zàga’ĩa gbãaa kàka à bↄ̀ gbáan à sù ń kpɛ́ gooda siigↄ̃ↄnↄa, ben à lɛ̀ɛ à sì nɛ́ pìnↄa aↄ̃ gàga. Mámbe ma bↄ mado ma mↄ à baaru kpánnɛ.

²⁰ Ben Ayuba fɛ̀ɛ à a uta gà à kɛ̃̀ à a mì bò. Ben à dàɛ a puua à dↄnzi kɛ̀ Ludanɛ ²¹ à bè:

Ma bↄ ma da gbɛɛɛn ↄkori

bensↄ̃ mɛ́ ɛara mà tá ↄkori.

Dii kpàma ben à ɛ̀ara à sìma.

Wà Dii sáabu kpá.

²² Yã pìnↄ guu píngi Ayuba e durun kɛ à Luda taari èro.

Setãn Ayuba yↄ̃na gɛ̃̀n plaadee

¹ Zĩkea malaikanↄ ɛ̀ara wà mↄ̀ wà zɛ̀ Dii aɛ, Setãn sↄ̃ↄ kú ń tɛ́. À zɛ̀ Dii aɛ, ² ben Dii à là à bè: N bↄ mámɛ? À wèàla à bè: Mɛ́ɛ gaa mɛ́ɛ suu mɛ́ɛ likↄ̃aa zↄ̃ↄ anduna guumɛ. ³ Ben Dii bènɛ: N ma zↄ̀bleri Ayuba èↄ́? À sáa kú anduna guuro. Gbɛ̃ maaamɛ, à taari vĩro. À ma vĩa vĩ bensↄ̃ à gì yãzaakɛnazi. Baa kɛ̀ n ma swã vùmɛ, ma mↄ́nzi kpàzi pã, à kpɛ́ kuu taari sai ai tia. ⁴ Ben Setãn bènɛ: Ǹ kɛmɛ mà kɛnnɛ. Pↄ́ kɛ̀ gbɛ̃ vĩ píngi eé kpá a mìsina yãnzi. ⁵ Ǹ n ↄↄ bↄ ǹ pá à mɛ̀a ǹ gwa. Eé yã zaaa onnɛ. ⁶ Ben Dii bènɛ: Tↄ̀! Ma à nànnɛ n ↄzĩ, mↄde ǹ à wɛ̃̀ndi tó.

⁷ Setãn gù Dii aɛ, ben à bↄ̀gĩi zĩ̀ Ayubaa sɛna zaa à kɛ̀sɛa ai à gàa pɛ́ à mìdangura. ⁸ Ben Ayuba takaso sɛ̀ à gàa à vɛ̃̀ɛ tubura, èe a zĩnda waao. ⁹ À naↄ̃ bènɛ: Nɛ́gↄ̃ kpɛɛ kuu taari sai ai tian yↄ́? Ǹ yã zaaa o Ludanɛ ǹ ga. ¹⁰ Ben à bènɛ: Nɛ́ɛ yã oo lán nↄgbɛ̃ yↄ̃nkↄↄ bà. Wégↄ̃ à maaa ee Luda ↄzĩ wà gí à zaaa eziↄ́? Yã pìnↄ guu píngi Ayuba e durun kɛ a yã’ona guuro.

Ayuba gbɛ̃nnanↄ mↄna à kiia

¹¹ Kɛ̀ Ayuba gbɛ̃nna gↄ̃ↄn aagↄ̃ↄnↄ kisia kɛ̀ à à lènↄ baaru mà, aↄ̃ baade bↄ̀ a bɛ aↄ̃ kↄ̃ kàkↄ̃a, ben aↄ̃ gàa wà sósobi kɛo aↄ̃ à làakari kpáɛnɛ. Aↄ̃ tↄ́nↄn yɛ̀: Temana gbɛ̃ Ɛlifaza, Sua gbɛ̃ Bilidada kↄ̃n Naamati gbɛ̃ Zofao. ¹² Kɛ̀ aↄ̃ à wɛ̃ndɛ̃ kɛ̀ zã̀azã, aↄ̃ↄe à dↄ̃ro, ben aↄ̃ ↄ́ↄ dↄ̀, baade a uta gà à kɛ̃̀, ben aↄ̃ bùsu kↄ̀ wà fã̀ musu à kú ń mìa. ¹³ Ben aↄ̃ vɛ̃̀ɛo tↄↄtɛ gurↄ swɛɛplaa fãantɛ̃ kↄ̃n gwãavĩo. Aↄ̃ gbɛ̃kee e yãke ooro, zaakɛ aↄ̃ↄ è lán à nawɛ̃a kɛ̀ bíta nà.

Ayuba kyakana a igurↄↄn

¹ Beee gbɛra Ayuba lɛ́ wɛ̃̀ à yã zaaa ò a igurↄↄ musu ² à bè:

³ Luda ma igurↄↄ kɛ pã

atɛ̃nsa gwãavĩ kɛ̀ wà ma nↄ̀ sì pì.

⁴ Gurↄↄ pì li gusiaa ũ,

zaa musu Luda tón à yã daro,

àton tó guu puaro.

⁵ Gusia kũ níginigi gurↄↄ pìa,

ludambɛ siaa kúɛa,

gusia bìtim daàla.

⁶ Gwãavĩ pì sↄ̃ sia kũ níginigi,

wàton da wɛ̃̀ gurↄↄnↄ tɛ́ dↄro,

wàton naro mↄ gurↄↄnↄ guuro.

⁷ Gwãavĩ pì kɛ gwãavĩ fĩi ũ,

guda tóngↄ̃ dↄ gurↄↄ beeearo.

⁸ Pↄ́dammari kɛ̀ aↄ̃è tó ↄfãntɛ̃ guu puroonↄ láari kɛ gurↄↄ pìa,

gbɛ̃ kɛ̀ aↄ̃ↄ dↄ̃ lán wè ↄ ká kùkukuzi pìnↄ.

⁹ À gudↄnao sↄsↄnɛnↄ sia kũ,

weé à gudↄna dã pã, guwɛɛ é kɛ̃ro.

¹⁰ Zaakɛ gurↄↄ pì e ma da nɛ́’isↄ zɛ́ tatamalɛro,

à tò ma wɛ́ɛ sì nawɛ̃alɛ.

¹¹ À kɛ̀ dia wèe ma i gɛ̀ ũroo?

Bↄ́yãnzi mɛ́ɛ bↄ gbɛɛɛn ma sↄkpa gↄ̃ↄroo?

¹² À kɛ̀ dia wà ma kpa gbálaa?

Bↄ́yãnzin wà yↄ̃ kpàma má mìzi?

¹³ Tó ma ga yã, lɛ ma gↄ̃ kítikiti,

lɛ ma ii ò ma kámma bò

¹⁴ kↄ̃n kínanↄ kↄ̃n anduna guu lɛ́dammari

kɛ̀ aↄ̃ kíbɛ ziinↄ kɛ̀kɛ wà bò ń zĩndanɛnↄ,

¹⁵ wɛ̃ɛnɛ kɛ̀ aↄ̃ vura kàkↄ̃ańzinↄ

bensↄ̃ aↄ̃ kondogi kà ń kpɛ́n à pà.

¹⁶ À maa yã wà ma vĩi lán nↄ̀bↄɛnɛ bà,

lán nɛ́ kɛ̀ mↄ̀ gɛ̀ ũ èe anduna eroo bà.

¹⁷ Gwen zaakɛrinↄ è ń zaakɛna tón

bensↄ̃ gbɛ̃ busananↄ è kámma bon.

¹⁸ Zĩ̀zↄnↄ è ĩampakii e gwe,

aↄ̃è ń wɛ́ɛtãmmarinↄ kòto ma dↄro.

¹⁹ Gbãadeenↄ kↄ̃n talakanↄↄ kú gwe ń píngi,

bensↄ̃ zↄ̀ ègↄ̃ dɛ a dii pↄ́ ũ gwe dↄro.

²⁰ Bↄ́yãnzi Luda è guu pu wɛ̃ndadeenↄnɛzi?

À kɛ̀ dia è wɛ̃̀ndi kpá gbɛ̃ kɛ̀ aↄ̃ pↄↄ siaanↄa?

²¹ Aↄ̃ wɛ́ɛ ègↄ̃ dↄ gaazi aↄ̃è ero,

aↄ̃è kpáɛ kɛzi dɛ auziki kɛ̀ utɛnala.

²² Tó aↄ̃ gà wà ń vĩi, aↄ̃è pↄnnaa kɛ,

aↄ̃ nↄ̀sɛ è kɛ nna.

²³ Luda ń zia yã ùtɛńnɛ,

à kara lìgańzi kpa sãnda píngia.

²⁴ Wesakakↄ̃a à bo bé à gↄ̃̀ ma pↄ́blee ũ,

ma m̀bona è yãaro.

²⁵ Yã kɛ̀ ma vĩa kɛ̀nɛ pì bé à ma le,

yã kɛ̀ ma kã gìzi pì bé à sùma.

²⁶ Má ĩampana vĩro, ma làakari kpaɛnaro.

Má kámmabona vĩro, ma nawɛ̃akɛna è yãaro.

Ɛlifaza yãsina Ayubala

¹ Ben Temana gbɛ̃ Ɛlifaza yã sìàla à bè:

² Asa tó gbɛ̃ yã ònnɛ, nɛ́ pↄ fɛ̃roo?

Zaakɛ mɛ́ fↄ̃ màgↄ̃ yĩtɛnaro.

³ Ǹ dↄn lán n lɛ́ dà gbɛ̃nↄa pari nà,

n gbɛ̃ kɛ̀ aↄ̃ gbãaa yã̀anↄ gbà swɛ̃̀.

⁴ N yã gbɛ̃ kɛ̀ aↄ̃ↄe fuunↄ sɛ̀ lezĩ,

n gbɛ̃ kɛ̀ aↄ̃ↄ busananↄ gbà gbãaa.

⁵ Kɛ̀ yã n le sa, ben nɛ́ɛ fuu,

kɛ̀ à sùmma, ben n bídi kɛ̀.

⁶ N vĩakɛna Ludanɛ e n làakari kpáɛroo?

N kuuna taari sai è tó ǹgↄ̃ tãmaa vĩroo?

⁷ Ǹ laasuu lɛ́ ǹ gwa!

Kisia taarisaidee lè ziki ai à gàↄ́?

Mán wà gbɛ̃ maaanↄ kàatɛn zikii?

⁸ Gbɛ̃ kɛ̀ yã zaa bú wì à yãkete tↄ̃̀a,

má è beee bé è bↄɛnɛ.

⁹ Luda lɛ́’ĩa bé è à kaatɛ,

à pↄ́ bↄna a yĩn bé è à dúgu zↄ̃.

¹⁰ À pũtãna kↄ̃n kòto gbãaao lán músu bà è yãa,

Luda è à swaa woronɛ.

¹¹ È ga lán músu kɛ̀ nↄ̀bↄ wɛ̀tɛ à kòrazi bà,

à nɛ́nↄ é gbasa wà fãakↄ̃a.

¹² Ma yã kpãi mà ĩala,

yã pì asii gɛ̃̀ ma swãn.

¹³ Gurↄↄ kɛ̀ mɛ́ɛ nana bɛ̃̀ɛ oo gwãavĩ,

gurↄↄ kɛ̀ gbɛ̃nↄ ii ò wà kà zã̀,

¹⁴ vĩa ma kũ mɛ́ɛ lugalugaa,

ma mɛ̀ píngi e lugaa.

¹⁵ Ĩa ke borii ma pa ma uua,

ma mɛ̀kãsɛsɛ fɛ̀ɛ à zɛ̀.

¹⁶ Kɛ̀ à zɛ̀, mɛ́ɛ à taka dↄ̃ro,

pↄ́ pì kú ma aɛ,

ben ma à kòto kpãi mà à bè,

¹⁷ gbɛ̃ntee é fↄ̃ àgↄ̃ dɛ yãnnadee ũ Ludanɛↄ́?

Gbɛ̃ é fↄ̃ àgↄ̃ zɛ̃na a Kɛ̀ri aɛↄ́?

¹⁸ Zaakɛ Luda è a malaikanↄ náanɛ kɛro,

bensↄ̃ è a zↄ̀bleri pìnↄ taari e,

¹⁹ wamↄwa kɛ̀ wa mɛ̀ dɛ lán gũ̀ kpɛ́ bà,

wa kasana dɛ bùsu kori ũ

bensↄ̃ wè wa dúgu zↄ̃ lán dã̀mboo bà,

weé wa pↄ́ o dↄↄ́?

²⁰ Zaa kↄngↄ ai uusiɛ gbɛ̃nↄ è gaga,

aↄ̃è kaatɛ ai gurↄ píngi,

wè ń tàasi kɛro.

²¹ Luda è ń kuta lí gborońnɛ,

ben aↄ̃è ga ↄ̃ndↄ̃kũsai.

¹ Ǹ lɛ́ zú sa ǹ ma, tó gbɛ̃ke é wenla.

Malaika kpareen nɛ́ aɛ dↄa?

² Íbɛtɛkpana è yↄ̃nkↄↄ dɛ,

nↄ̀sɛgↄ̃aanↄ è mìsaidee kaatɛ.

³ Má è yↄ̃nkↄↄ kãsãa pɛ̀ɛ,

ben kãsãa pì yↄ̀ kãndo.

⁴ À nɛ́nↄↄ zã̀ kↄ̃n aafia’ekiio,

wè ń yã máɛmaɛńnɛ yãkpaɛkɛkiia,

gbɛ̃ke è zɛ ń kpɛɛro.

⁵ Nↄadɛrinↄ è à bura pↄ́nↄ ble,

baa pↄ́ kɛ̀ à lɛ̀ lìgazinↄ,

ímidɛrinↄ è luga à auzikizi.

⁶ Kisia è fɛɛ bùsunlo,

nawɛ̃a è bↄɛ tↄↄtɛro.

⁷ Lán tɛ́pũtãna gana musu seka vĩro nà,

lɛn gbɛ̃ kɛ̀ wà ì píngi è nawɛ̃a e lɛ.

⁸ Tó mámbee sↄ̃, Ludan mɛ́ gbeka,

mɛ́ ma yã kpáɛ à aɛzĩ.

⁹ È yã bíta kɛ kɛ̀ weé fↄ̃ wà à gbá dↄ̃ro,

weé fↄ̃ wà à yãbↄnsaɛkɛnanↄ lɛ́ dↄ̃ro.

¹⁰ È tó lou ma tↄↄtɛa,

è tó à í dagula sɛ̃̀tɛ.

¹¹ È gbɛ̃ busananↄ sɛ́ lezĩ,

è sósobikɛrinↄ gba pↄnnaa.

¹² È yã kɛ̀ mↄnafikideenↄↄ e pɛɛa gboro,

lɛ ń ↄzĩi tóngↄ̃ aubarika vĩro yãnzi.

¹³ È ↄ̃ndↄ̃rinↄ kũ ń wɛ́ɛzɛ̃ɛ guu,

è tó yãlɛkpɛɛ’orinↄ yãgↄ̃gↄ̃na kɛ pã.

¹⁴ Guu è sia kũḿma fãantɛ̃,

aↄ̃è ↄ máɛmaɛ fãantɛ̃ lán gwãavĩ bà.

¹⁵ È takaasideenↄ bↄ gaa lɛ́zĩ,

è pↄ́saideenↄ bↄ gbãamↄnnɛrinↄ ↄzĩ.

¹⁶ Beee yãnzi gbãasaideenↄↄ tãmaa vĩ,

yãzɛdesaideenↄ è yĩtɛ kyↄ̃.

¹⁷ Aubarikadeen gbɛ̃ kɛ̀ Luda è à tòto kɛɛ ũ.

Tó Gbãapingidee e n swã gagaa, ǹton yãbuu tãro.

¹⁸ Zaakɛ è gbɛ̃ kɛ̃nna ben è à bↄ̀ gwa,

è gbɛ̃ wíwi ben è à kɛ̃kↄ̃a.

¹⁹ Eé n bↄ yãn gɛ̃̀n swɛɛdo,

baa tó à kà gɛ̃̀n swɛɛplaa, kisia é n lero.

²⁰ Eé n sí gaaa dekaagurↄ,

eé n bↄ fɛ̃ɛdaa lɛ́zĩ zĩ̀lan.

²¹ Dii é n bↄ gbɛ̃yakarinↄ ↄzĩ,

tó mↄ́nzi mↄ̀, vĩa é n kũro.

²² Nɛ́ mↄ́nzi kↄ̃n nↄaao yáa dↄ,

nɛ́ vĩa kɛ nↄ̀bↄ pãsĩnↄnɛro.

²³ Zaakɛ nɛ́gↄ̃ kuu aafia kↄ̃n gbɛ̀nↄ,

nɛ́gↄ̃ nna kↄ̃n nↄ̀bↄsɛ̃tɛnↄ,

²⁴ nɛ́gↄ̃ dↄ̃ kɛ̀ n ua égↄ̃ nna,

tó n gaa n kpàsan, pↄ́ke é kɛ̃sãro.

²⁵ Nɛ́gↄ̃ dↄ̃ kɛ̀ n nɛ́nↄ é kɛ pari,

n boriinↄ é dagula lán sɛ̃̀ bà.

²⁶ Nɛ́ zi kũ kótokoto ǹ gbasa ǹ ga

lán ése kɛ̀ mà wà kɛ̃̀ à gurↄↄa bà.

²⁷ Kɛ̀ wa yã pì asii gbèka, lɛn à dɛ lɛ.

Ǹ yã pì sí nɛ́gↄ̃ dↄ̃ kɛ̀ n zĩnda yãmɛ.

Ayuba yã’ona Ludanɛ

¹ Gbɛ̃ntee è bↄ nↄgbɛ̃ kiiamɛ,

à wɛ̃̀ndi kusu, ègↄ̃ kuu yãkete sairo.

² È pia lán lávu bà è kori kũ,

è gɛ̃tɛ lán ↄra bà è gì kɛro.

³ Gbɛ̃ beee takan nɛ́ wɛ́ɛ dↄnɛ

ǹ yãkpaɛ kɛoↄ́?

⁴ Pↄ́ gbãsĩ é fↄ̃ à pↄ́ gbãsĩsai iↄ́?

Eé sí kɛro.

⁵ N gbɛ̃ntee gurↄↄ dìɛnɛ,

à mↄ lɛ́ kú n ↄzĩ,

n à wɛ̃̀ lɛ́ dànɛ, eé fↄ̃ à vĩàlaro.

⁶ Ǹ wɛ́ɛ goa ǹ à tó gwe

ai à gurↄ lɛ́ papa lán ayazĩkɛri bà.

⁷ Lí ègↄ̃ tãmaa vĩmɛ,

zaakɛ tó wà zↄ̃̀, è ɛara à pìto pá,

bensↄ̃ à pìto dufu pì è furo.

⁸ Baa tó à kãsãa zi kũ̀ tↄↄtɛ guu,

bensↄ̃ à kusu gà bùsun,

⁹ tó à í gũu mà, eé pìto pá,

eé gã̀ bↄ lán lí kɛ̀ wà pɛ̀ bà.

¹⁰ Tó gbɛ̃ gà sↄ̃, ègↄ̃ daɛna sↄ̀rↄrↄ,

è tá ègↄ̃ kuu dↄro.

¹¹ Lán sɛ̀bɛ’i è lago nà,

bensↄ̃ swa’i è baba à yãa,

¹² lɛn gbɛ̃ntee è daɛ lɛ è fɛɛ dↄro,

ai ludambɛɛ gá gɛ̃tɛo, eé vuro,

eé vu kↄ̃n ii pìoro.

¹³ Tó nɛ́ ma utɛ gɛ̀wãan

ǹ ↄ kúma ai n pↄↄ wèrema dé!

Tó nɛ́ gurↄ lɛ́ diɛmɛ gwe

gbasa ǹ dↄ ma yãn dé!

¹⁴ Tó gbɛ̃ gà, eé ɛara àgↄ̃ kuuↄ́?

Tó lɛmɛ, mɛ́gↄ̃ wɛ́ɛ dↄↄ ma vunazi

ma ↄsikana guu gurↄ píngi.

¹⁵ Nɛ́ lɛ́ zumazi mɛ́ wenla,

nɛ́ mamↄma kɛ̀ má dɛ n ↄzĩi ũu bɛgɛɛ kɛ.

¹⁶ Gurↄↄ beeea n wɛ́ɛ égↄ̃ tɛ́ ma yãkɛnanↄzi,

mↄde nɛ́ ma durun yã da dↄro.

¹⁷ Nɛ́ ma taarinↄ ká bↄ̀kↄn ǹ yi ǹ diɛ,

nɛ́ lá kú ma zaakɛna pìnↄla.

¹⁸ Lán kpiii è gboro à fãakↄ̃a nà,

bensↄ̃ sĩ̀sĩ musu gbɛ̀ gbɛ̃̀ntɛ̃ è sↄ̃ki kpá,

¹⁹ lán swa’i è gbɛ̀ lↄ́lↄ nà,

bensↄ̃ í è bùsu sɛ́ɛ à táo,

lɛn nɛɛ̀ gbɛ̃ntee tãmaa nɛnɛ lɛ.

²⁰ Nɛɛ̀ gbãaa mↄ́nɛ à tá, è su dↄro,

nɛɛ̀ tó à uu liɛ à anduna tó.

²¹ Tó à nɛ́nↄ gↄ̃̀ gbɛ̃ bɛ̀ɛdeenↄ ũ, eé dↄ̃ro,

tó aↄ̃ kɛ̀ gbɛ̃ fétenↄ ũmɛ sↄ̃, eé ero.

²² Wãwãan eégↄ̃ maa ado,

à zĩnda pↄsiaan ègↄ̃ kɛɛ.

Ayuba wena a gbɛ̃nnanↄla

¹ Ben Ayuba wè a gbɛ̃nnanↄla à bè:

² Ai bↄrɛn égↄ̃ ĩa daama,

àgↄ̃ ma nↄ̀sɛ yakaamɛ kↄ̃n yãzↄ̃zↄ̃ↄo?

³ A ma sↄ̃sↄ̃ à kɛ̀ gɛ̃̀n kuri sa,

ée ma faboo, wí è a kũro.

⁴ Tó ma sãsãmɛ yãpura,

ma taari dɛ ma zĩnda yã ũmɛ.

⁵ Tó a gi ée a zĩnda sɛɛ lezĩ dɛmala,

bensↄ̃ ée ma taari ee yã kɛ̀ ma lee musu,

⁶ àgↄ̃ dↄ̃ kɛ̀ Luda bé à yã kɛ̀ kɛ̀mɛ kpɛɛgãnda,

à takutɛɛ kpàkpamɛ à ma kũ.

⁷ Mɛɛ̀ faaba wii lɛ́, gbɛ̃ke è wemalaro,

mɛɛ̀ mìsina ↄ́ↄ dↄ, yãzɛdee kuuro.

⁸ Luda zɛ́ zↄ̃̀mɛ, gɛ̃kii kuuro,

à gusiaa dà ma zɛ́la.

⁹ À ma kpɛ bↄ̀,

à ma fùra gò.

¹⁰ È ma wíwi kpɛ píngia ai ma yãa,

è ma tãmaa nɛ lán wè lí nɛ nà.

¹¹ È a pↄfɛ̃ bↄbↄma,

è ma diɛ a ibɛɛ ũ.

¹² À zĩ̀kpɛɛnↄ è fɛɛmazi lɛdo,

aↄ̃è ma kagura kɛ,

aↄ̃è bùra káɛ wà liga ma kpɛ́zi.

¹³ À tò ma gbɛ̃nↄ è kakↄ̃amao dↄro,

gbɛ̃ kɛ̀ aↄ̃ↄ ma dↄ̃ↄnↄ lɛ̀ zↄ̃̀ wà tàtamalɛ.

¹⁴ Ma danɛnↄ pã kpàmazi,

ma gbɛ̃nnanↄ sã̀ ma yãn.

¹⁵ Ma gↄ̃ nibↄ ũ ma bɛ zĩkɛrinↄnɛ,

ma gↄ̃ńnɛ lán bori zĩ̀tↄ bà.

¹⁶ Tó ma a bɛgwari sìsi, è wemala dↄro,

baa tó ma agbaa kpànɛ kↄ̃n ma zĩnda lɛ́o.

¹⁷ Ma lɛ́’ĩa è kɛ ma naↄ̃nɛ lɛ́fↄna ũmɛ,

ma vĩ̀inↄ kↄ̃n ma dãaronↄ yemazi dↄro.

¹⁸ Baa nɛ́ ketenↄ è kya kámagu,

tó ma tɛna, aↄ̃ègↄ̃ ma faboomɛ.

¹⁹ Ma kpàasinↄↄ ye ma yãziro,

ma gbɛ̃ yenzideenↄ bↄ̀ ma kpɛɛ.

²⁰ Ma mɛ̀ yitoo kũ̀,

à gↄ̃̀ féte kɛ̀ mɛ́ ga.

²¹ À ma wɛ̃nda gwa ma gbɛ̃nnanↄ,

à ma wɛ̃nda gwa, zaakɛ Luda ↄ tↄ̃̀mamɛ.

²² À kɛ̀ dia eè wɛ́ɛ dↄmɛ lán Luda è wɛ́ɛ dↄmɛ nà?

Ma nↄ̀bↄ sona e mↄ́awa lɛroo?

²³ Lɛ wà ma yãnↄ kɛ̃̀

wà kà lán.

²⁴ Lɛ wà kɛ̃̀ gbɛ̀a kↄ̃n gão,

wà beoma kpàɛn àgↄ̃ kuu ai gurↄ píngi.

²⁵ Zaakɛ má dↄ̃ kɛ̀ ma Zɛnyodee kuu,

eé fɛɛ à zɛ ma sèedadee ũ zãazãa.

²⁶ Tó ma mɛ̀baa kɛ̀kii kàatɛ,

mɛ́ wɛ́ɛ si Ludalɛ mɛ̀ sai.

²⁷ Mɛ́ wɛ́ɛ siàlɛ ma zĩnda,

eé kɛmɛ gbɛ̃ zĩ̀tↄ ũro.

Yã pì ma kũna gbãa ma swɛ̃̀ guu.

²⁸ À kɛ̀ dia a wɛ́ɛ dↄ̀mɛ,

a bè mámbe ma a zĩnda lèo?

²⁹ À vĩa kɛ Luda fɛ̃ɛdaanɛ,

zaakɛ eé pↄfɛ̃ bↄbↄo zaakɛrinↄa,

lɛ àgↄ̃ dↄ̃ kɛ̀ yãkpaɛ e a dãa.

Ayuba zɛna kↄ̃n a taarisaikɛɛo

¹ Ma la dà kɛ̀ ma wɛ́ɛ égↄ̃ kú nↄkparɛaro.

² Bↄ́ bé eé gↄ̃ gbɛ̃ntee baka ũ Luda kiia zaa musuu?

Bↄ́ túbin eé e Gbãapingide kiia zaa ludambɛɛ?

³ Gbɛ̃ zaaanↄn kisia è ń leroo?

Zaakɛrinↄn mↄ́nzi è gɛ̃ńziroo?

⁴ À dɛ Ludaa e ma yãkɛnanↄ ee

à ma kɛ̀sɛsɛna lɛ́ dↄ̃roo?

⁵ Mɛɛ̀gↄ̃ táa oo kↄ̃n mↄnafikion yↄ́?

Mɛɛ̀ wã mà gbɛ̃ sãsãn yↄ́?

⁶ Luda ma yↄ̃ a zɛ́a à gwa,

eé dↄ̃ kɛ̀ má taari vĩro.

⁷ Tó ma pã zɛ́nɛ,

bensↄ̃ pↄ́ kɛ̀ ma wɛ́ɛ ènↄ bé èe ma swɛ̃̀ blee,

ke tó ma ↄↄ kú yã zaa ke guu,

⁸ ɛ̃ndɛ̃ mà pↄ́ tↄ̃ gbɛ̃ pãndenↄ ble,

wà pↄ́ kɛ̀ má bànↄ biɛbiɛ.

⁹ Tó gbɛ̃ke nↄↄ nii gɛ̃̀ ma swɛ̃̀n,

tó ma naguzi ma gbɛ̃daaa nↄↄ yãnzi,

¹⁰ ɛ̃ndɛ̃ gbɛ̃ pãnde gbá di ma naↄ̃a,

àgↄ̃ kĩi kɛɛ danↄnɛ.

¹¹ Zaakɛ tó ma yã pì kɛ̀, dà zaaamɛ,

durun kɛ̀ à kà wà à yã gↄ̃gↄ̃mɛ.

¹² Yã pì nɛ́ tɛ́ pↄ́kaatɛrimɛ,

kɛ̀ dɛ à dↄ ma bura pↄ́nↄa à tɛ́ kũ kororo.

¹³ Tó ma gↄ̃gbɛ̃ ke nↄgbɛ̃ zĩkɛri yã vĩmao,

tó mɛ́ɛ gↄ̃gↄ̃ a zɛ́aro,

¹⁴ mɛ́ kɛ diamɛ, tó Luda fɛ̀ɛmazii?

Tó à mↄ̀mazi, mɛ́ benɛ diamɛ?

¹⁵ Luda kɛ̀ à ma í kàsa nɛ́’isↄn bé à adee í kàsa seroo?

Luda mɛ̀n doo pì bé à wa baade kɛ̀ à da gbɛɛɛnloo?

¹⁶ Tó ma takaasidee tɛ̃̀ pↄ́ kɛ̀ èe à nii dɛɛ,

tó ma gi gyaanↄↄ wɛ̃nda bozi,

¹⁷ tó ma pↄ́ blè,

ma tonɛ kɛ̀ gwàri vĩroo tɛ̃̀ sↄ̃, tↄ̀!

¹⁸ Lɛnlo! Zaa ma gↄ̃kparɛkɛgurↄ

tonɛnↄ den ma ũ.

Zaa lán ma bↄ ma da nɛ́’isↄn nà

gyaanↄnↄ dↄnlɛrin ma ũ.

¹⁹ Tó ma gbɛ̃ke è kɛ̀ ĩa e à dɛɛ,

ke tó ma takaasidee è kɛ̀ à bisa vĩ à kúalaro,

²⁰ tó èe ma sáabu kpá

kɛ̀ ma a sãkã bisa kùàla à mɛ̀ kɛ̀ lↄ́gↄlↄgↄro,

²¹ tó ma gbãaa mↄ̀ tonɛnɛ,

kɛ̀ má dↄ̃ kɛ̀ weé zɛmao yãkpaɛkɛnan yãnzi,

²² ma gã̀ bↄkũn,

ma gã̀sã wó a pɛ́kiia.

²³ Má Luda wɛ́ɛtãmmana vĩa vĩ,

à bítakɛ yãnzi mɛ́ fↄ̃ mà yã beee taka kɛro.

²⁴ Tó vuran ma gbãaa èa,

tó ma bè vura atɛ̃ɛn má náanɛkɛna,

²⁵ tó ma auziki bítan ma pↄↄ dↄa,

ↄↄdaa kɛ̀ à gɛ̃̀ ma ↄzĩ pì,

²⁶ tó ↄfãntɛ̃ tɛ́kɛnan má tɛ́zi,

ke mↄvura táa’ona kↄ̃n à maakɛɛo,

²⁷ ben aↄ̃ yã e ma swɛ̃̀ blee busɛbusɛ,

ai ma lɛ́ pɛ̀ ma ↄↄa ma ì kpàoḿma,

²⁸ beee nɛ́ durun kɛ̀ à kà wà à yã gↄ̃gↄ̃mɛ,

mↄnafikikɛna Luda Musudenɛn gwe.

²⁹ Mɛ́ɛ pↄnnaa kɛ ma zanguri mↄ́nzi’ena yã musuro,

mɛ́ɛ à yáa dↄ kɛ̀ yã à lè yãnziro.

³⁰ Mɛ́ɛ we ma durun kɛ̀ ma à kàro.

³¹ Dé bé à pìtama kɛ̀ èe pↄ́ ble à kã̀roo?

Ma bɛdeenↄn ma sèedadeenↄ ũ.

³² Ma bɛ zɛ́ ègↄ̃ wɛ̃na nibↄnↄnɛ,

mɛɛ̀ we gbɛ̃ kɛ̀ èe gɛ̃tɛɛ ì gãalɛro.

³³ Ma a taarinↄ ùtɛ gbɛ̃nↄnɛↄ́?

Ma lá kù ma durunnↄan yↄ́?

³⁴ Parii vĩa ma kũ ai ma fua mà yã oↄ́?

Kɛ̀ weé kya kámagu yãnzin ma gi bↄ kpɛ́nziↄ́?

³⁵ O’o! Dé bé eé ma yã kɛ̀ mamaa?

Ma zɛo. Gbãapingide wemala sa.

Luda kɛ̀ yã vĩmao pì kɛ̃ takadan.

³⁶ Mɛ́ takada pì sɛ́ mà da ma gã̀n,

mɛ́ kú fùra ũ,

³⁷ mɛ́ gá mà yã kɛ̀ má kɛ̀nↄ tↄ̃kɛ̃nɛ píngi,

mɛ́ gázi lán wɛ̃ɛnɛ bà.

³⁸ Tó ma buraa e giimazi,

bensↄ̃ à dↄ̀rↄnↄↄ e wii lɛɛma,

³⁹ tó ma bura pↄ́ blè bensↄ̃ mɛ́ɛ tↄↄtɛ pì fĩa boro,

ke tó ma gbɛ̃ kɛ̀ aↄ̃ↄ vĩ yãanↄ dɛ̀dɛ,

⁴⁰ ɛ̃ndɛ̃ lɛ̀kara bↄɛ gbado gɛ̃ɛ ũ,

pampaa sↄ̃ bↄɛ ése gbɛ̀n.

Ayuba yã lɛ́n gwe.

Dii a kíkɛɛ ↄdↄana Ayubanɛ

¹ Ben Dii yã sì Ayubala zàga’ĩa guu à bè:

² Dé bé èe faasaiyã kaa ma ↄ̃ndↄ̃ↄlaa?

³ Ǹ fɛɛ ǹ zɛ lán nɛ́gↄ̃gbɛ̃ bà,

mɛ́ n la yãzi, nɛ́ wemala.

⁴ Kɛ̀ ma anduna kàɛ, ń kú mámɛ?

Tó ń dↄ̃na vĩ, ǹ omɛ.

⁵ Dé bé à à tↄↄtɛ lɛ́zɛkiinↄ lɛ̀?

Dé bé à bà yↄ̃̀a à gwà? À dɛ ń dↄ̃ↄ?

⁶ Bↄ́ bé à tↄↄtɛ kũna?

Dé bé à à ɛ̃ɛ dàɛ

⁷ gurↄↄ kɛ̀ gudↄna sↄsↄnɛnↄↄ e guda kɛɛ,

Luda malaikanↄ pↄnna wiii dↄ ń píngii?

⁸ Kɛ̀ ísiaa guu fↄ̃̀ à bↄ̀,

dé bé à zɛ́ tàtaàlɛɛ?

⁹ Ma ludambɛ luguu dànɛ pↄ́kãsãa ũ,

ma gusiaa yìnɛ bisa ũ.

¹⁰ Ma à lɛ́zɛkii dànɛ,

ma zɛ́nↄ tàtaàlɛ ma gbãnganↄ dàdan.

¹¹ Ma bènɛ: Nɛ́gae ká kɛ̀ ǹton vĩàlaro,

n ísↄ̃kana gbãaanↄ é zɛ kɛ̀.

¹² Zaa lán wà n i nà n yã dìɛ kↄngↄnɛↄ́?

N bↄkii ↄ̀dↄa gudↄnanɛ zikiↄ́?

¹³ Gudↄna è anduna kũ a lɛ́a

lɛ à gbãkɛ lán bisa bà à zaakɛrinↄ kwɛ́ɛ.

¹⁴ È anduna liɛ kodekode lán kwã kpɛɛ bà,

kpiiinↄ è bↄ gupuraaa lán uta yiyikↄ̃ana bà.

¹⁵ È gí zaakɛrinↄnɛ aↄ̃ ń gusia yã kɛ,

è ń ↄ sɛna musu ɛ́’ɛ.

¹⁶ N gaa ai zaa ísia íbↄkiinↄaↄ́?

N táa ò í lↄ̀ pì gãnulɛa zikiↄ́?

¹⁷ Wà gaa kpɛɛlɛ gbànↄ ↄ̀dↄannɛↄ́?

N gɛ̀wãa gãnulɛnↄ èↄ́?

¹⁸ N anduna yàasa lɛ́ tàasi kɛ̀ↄ́?

Tó ń yã beeenↄ dↄ̃ píngi, ǹ omɛ.

¹⁹ Gupuraa bɛ zɛ́n máa?

Ń gusiakukii dↄ̃ↄ́?

²⁰ Nɛ́ fↄ̃ ǹ gáńyo ń bùsun-ↄ́?

Ń ń bɛ zɛ́ dↄ̃roo?

²¹ Ń dↄ̃ sɛra, à dɛ wà n i gurↄↄ beeea!

À dɛ n wɛ̃̀ lɛ́ vĩroo?

²² N gɛ̃ làasi kɛ̀ ma gu yĩi kàɛn-ↄ́?

N ma lougbɛ dↄ̃̀ èↄ́?

²³ Mɛɛ̀ utɛ ai nawɛ̃akɛgurↄↄa,

mɛɛ̀ gbarɛ zĩ̀kagurↄↄ zĩ.

²⁴ Gupuraa è bↄ mámɛ à dagulaa?

Ɔfãntɛ̃bↄɛ kpa ĩa è bↄ à da tↄↄtɛla diamɛ?

²⁵ Dé bé è zɛ́ bↄ lou bítanɛ?

Dé bé è guu para lapatananɛ?

²⁶ È mↄdↄ pisi tↄↄtɛ kɛ̀ gbɛ̃kee kúnlooa,

baa gbáa kɛ̀ gbɛ̃ntee kúnloo.

²⁷ È bɛzia kↄ̃n taagaao yĩi kũ,

è tó sɛ̃̀ bↄɛ gwe.

²⁸ Lou de vĩↄ́?

Dé bé à kpíi ì?

²⁹ Dé nɛ́’isↄn lougbɛ è bↄn?

Dé bé è sukaa i gbasa à kpáa?

³⁰ Dé bé è tó í li à kɛ gbɛ̀ ũ

è tó ísia musu kɛ kpàkpaakpa?

³¹ Nɛ́ fↄ̃ ǹ sↄsↄnɛ mɛ̀n swɛɛplaaanↄ yi ǹ kakↄ̃aↄ́?

Nɛ́ fↄ̃ ǹ sↄsↄnɛ flɛ̃ngonↄ fãakↄ̃aↄ́?

³² Nɛ́ fↄ̃ ǹ mↄgaakiblee bↄ a gurↄↄaↄ́?

Nɛ́ fↄ̃ ǹ guu ↄdↄa sↄsↄnɛ ko nɛ́dande kↄ̃n a nɛ́nↄnɛↄ́?

³³ Ń musu pↄ́nↄ doka dↄ̃ↄ́?

Nɛ́ fↄ̃ ǹ ń kpá kpatan tↄↄtɛlaↄ́?

³⁴ Nɛ́ fↄ̃ ǹ lɛ́ zu louzi lɛ à sisi

à í bↄ à n yakuↄ́?

³⁵ Nɛ́ fↄ̃ ǹ loupinanↄ gbarɛ aↄ̃ da zɛ́n yↄ́?

Aↄ̃è mↄ́ wà bennɛ wáɛ kɛ̀ↄ́?

³⁶ Dé bé à ↄ̃ndↄ̃ↄ dà ludambɛ luguunↄnɛ à lou maa?

Dé bé à dↄ̃na kpà sukaaa à kpáa?

³⁷ Dé ↄ̃ndↄ̃ↄ bé à kà à ludambɛ luguunↄ naroo?

Dé bé eé fↄ̃ à musu orozãnↄ kpákaziaa?

³⁸ Tó à í bↄ̀ɛ, bùsu kori è gↄ̃ bↄtↄnga ũ,

làkpakↄ̃ↄnↄ è nanakↄ̃a.

³⁹ Ḿbe nɛɛ̀ tofe ká músudaanɛ,

tó èe nↄ̀bↄ dãdãa dàko guuↄ́?

Ḿbe nɛɛ̀ pↄ́blee kpá à nɛ́nↄa aↄ̃ kã

gurↄↄ kɛ̀ aↄ̃ↄ kú ń tòn-ↄ́?

⁴¹ Tó gbáa kãnkãna nɛ́nↄↄ e ligaligaa guuzi,

aↄ̃ↄe lɛ́ zuu Ludazi kɛ̀ pↄ́blee kɛ̃̀sãḿma yãnzi,

dé bé è pↄ́blee kpáḿmaa?

¹ Ń zↄ̃ nɛ́’igurↄↄ dↄ̃ↄ́?

N gãsi è gurↄↄ kɛ̀ èe nɛ́ iiↄ́?

² Nɛɛ̀ ń nↄ̀ mↄↄ dↄdↄↄ́?

Nɛɛ̀ ń nɛ́’igurↄↄ dↄ̃ↄ́?

³ Aↄ̃è kúɛ wà nɛ́ imɛ,

ben aↄ̃ nɛ́’iwãwãa è kpáɛ.

⁴ Aↄ̃ nɛ́nↄ è gbãa kũ sɛ̃̀n aↄ̃è pɛ́ɛ,

aↄ̃è gɛ̃ zɛ́la aↄ̃è su ń danↄa dↄro.

⁵ Dé bé à tò zaakisɛ̃tɛ gↄ̃̀ a zĩndanɛ?

Dé bé à à pòro à à gbàrɛɛ?

⁶ Ma sɛ̃̀tɛ dìɛnɛ à bɛɛ ũmɛ,

ma tↄↄtɛ wisidee kɛ̀nɛ à kúkii ũ.

⁷ È pã kpá wɛ́tɛ kĩizi,

è a kpàkɛri zↄka maro.

⁸ Ègↄ̃ tɛ́ sĩ̀sĩnↄa àgↄ̃ sɛ̃̀ wɛtɛɛ,

ègↄ̃ kpáɛ kɛɛ pↄ́ ísinↄzi píngi.

⁹ Zùsɛ̃tɛ é we à zĩi kɛnnɛↄ́?

Eé we à i n zùnↄ karan yↄ́?

¹⁰ Nɛ́ bà dↄa lɛ à bú wínnɛↄ́?

Nɛ́ gbóngo danɛ lɛ à kpasee kɛ̃nnɛↄ́?

¹¹ Nɛ́ náanɛ dↄa à gbãa bíta yãnzii?

Nɛ́ n zĩi tónɛↄ́?

¹² Nɛ́ à náanɛ kɛ à n pↄ́wɛɛ sɛ́sɛ

à suonnɛ pↄ́wɛɛgbɛ̃kiiaↄ́?

¹³ Taataa è a dɛ̀bɛkãnↄ poro kↄ̃n pↄnnaao,

mↄde eé sí lɛ́kↄ̃zi kↄ̃n tokũ dɛ̀bɛkãoro.

¹⁴ È nɛ́gbere da tↄↄtɛ,

è tó bùsu’ãatɛ̃ nɛ́gbere pìnↄ wã à pipi.

¹⁵ À sã̀n kɛ̀ weé gà wà kɛ̀sɛ pɛ́ɛa à wíwi,

kesↄ̃ nↄ̀bↄsɛ̃tɛnↄ é táa oa.

¹⁶ Ègↄ̃ pãsĩ kↄ̃n a nɛ́nↄ,

nɛ́gↄ̃ dↄ̃ se à zĩnda nɛ́nↄnlo,

zĩ pã kɛna è kɛnɛ yãke ũro.

¹⁷ Zaakɛ mɛ́ɛ à gba ↄ̃ndↄ̃ↄro,

mɛ́ɛ à baka da faadeenↄ tɛ́ro.

¹⁸ Mↄde tó à fɛ̀ɛ à bↄ̀ kↄ̃n bào,

è gɛ̃ sↄ̃la à à dìri yáa dↄ.

¹⁹ Ḿbe nɛɛ̀ tó sↄ̃ gↄ̃ gbãaa vĩↄ́?

Ḿbe n sɛ̀sɛkã pɛ̀pɛnɛ à waaaↄ́?

²⁰ Ḿbe nɛɛ̀ tó àgↄ̃ vĩvĩi lán kwaa bàↄ́?

À pↄ́ bↄna à yĩn kĩi gbãaa è tó vĩa ń kũ.

²¹ È a gbá gáɛgaɛ guzurɛn,

è pↄnnaa kɛ a gbãaa yãnzi,

ben è gá da zĩ̀kpɛɛnↄlɛ.

²² È pↄ́ kɛ̀ wè vĩa kɛnɛ yáa dↄ,

swɛ̃̀ è kɛ̃nlo, è bↄru kpɛɛ fɛ̃ɛdaanɛro.

²³ Kà ègↄ̃ kĩi kɛɛ gbàran à musu,

sári lɛ̀ɛtɛgɛ kↄ̃n sári gésedeeo è pí.

²⁴ Tó wà zĩ̀kuu pɛ̀, ègↄ̃ a zĩnda dakii dↄ̃ro,

ègↄ̃ tↄↄtɛ lɛ́lɛɛ ègↄ̃ vĩvĩi ègↄ̃ kɛɛ kɛ̀ɛkɛɛ.

²⁵ Tó wà kuu pɛ̀,

è pↄ́ bↄ a yĩn à be, ɛ̃hɛ̃!

Ègↄ̃ zĩ̀ ĩa sɛ́sɛɛ zaa zã̀azã

kↄ̃n gbɛ̃nsinↄ wii gbãaao kↄ̃n kuukɛnao.

²⁶ N ↄ̃ndↄ̃ↄ bé à tò blɛa è yàa pá,

à a dɛ̀bɛ poro à gá sↄↄmɛtɛ kpaↄ́?

²⁷ Ḿbe ń dìɛ kúunɛ

àgae vĩa zãazãa à a sà da zaa musuↄ́?

²⁸ Ègↄ̃ kú gbɛ̀ musu, gwen è in,

è zↄ̃ gbɛ̀ mìsↄ̃ntɛ̃a a aafia’ekii ũ.

²⁹ Zaa gwen ègↄ̃ kpáɛ kɛɛ pↄ́bleezi,

è wɛ́ɛ pá pↄ́nↄa kãaa.

³⁰ Arun à nɛ́nↄ pↄ́blee ũ,

guu kɛ̀ pↄ́ gɛ̀ kún, gwen ègↄ̃ kún.

Gbɛ̃ntee è fↄ̃ à Luda zaaa boro

¹ Ben Dii ɛ̀ara à bè Ayubanɛ:

² Mamↄma Gbãapingide,

nɛ́ ma taari e ǹ ma gba làakariↄ́?

Ludazaabori, ǹ yã wemala sa.

³ Ben Ayuba wèàla à bè:

⁴ Pↄ́ken ma ũro fá! Dian mɛ́ wenla nà?

Séde mà ↄ kú ma lɛ́a.

⁵ Ma yã ò gɛ̃̀n do, mɛ́ ɛara mà o dↄro,

má ò gɛ̃̀n plaa se, mɛ́ yã sínla dↄro.

⁶ Ben Dii ɛ̀ara à yã ò Ayubanɛ zàga’ĩa guu à bè:

⁷ Ǹ fɛɛ ǹ zɛ lán nɛ́gↄ̃gbɛ̃ bà,

mɛ́ n lala yãzi, nɛ́ wemala.

⁸ Nɛ́ lá kú ma yãkɛna a zɛ́alan yↄ́?

Ń yezi ǹ ma taari e lɛ n yã bↄ nnan yↄ́?

⁹ N gã̀sã gbãaa kà ma pↄ́ ũↄ́?

N kòto é fↄ̃ à guu nigã lán ma pↄ́ bàↄ́?

¹⁰ Ǹ bítakɛ kↄ̃n kíkɛɛo da pↄ́kãsã maaanↄ ũ,

ǹ gakui kↄ̃n bɛ̀ɛo da utadaa ũ.

¹¹ Ǹ n pↄfɛ̃ bↄbↄḿma,

ǹ ĩadãrinↄ gwa kↄ̃n wɛ́ɛ zaaao ǹ wí daḿma.

¹² Ǹ ĩadãrinↄ gwa kↄ̃n wɛ́ɛ zaaao ǹ ń pãɛ,

ǹ ń dúgu zↄ̃ guu kɛ̀ aↄ̃ↄ kún,

¹³ ǹ ń ká tú ń píngi,

ǹ ń yiyi ǹ ń ká gɛ̀wãan,

¹⁴ mɛ́ gbasa mà n sáabu kpá,

kɛ̀ n zĩ̀ blè kↄ̃n n gã̀sã gbãaao yãnzi.

Bↄrɛ yã

¹⁵ Ǹ bↄrɛ gwa,

kɛ̀ ma à kɛ̀ lán ma n kɛ nà.

È sɛ̃̀ ble lán zù bàmɛ.

¹⁶ À gbãaa kú à wógbaamɛ,

à yɛ̃̀ɛ kú à gbɛɛ báasiamɛ.

¹⁷ À vlãa porona lán sida lí bà,

à gbáda tĩi dɛ lán bàtãna bà.

¹⁸ À wánↄↄ gbãa lán mↄ̀gotɛ̃ bà,

à gbánↄↄ dɛ lán mↄ̀ gò bà.

¹⁹ À bíta bé à dɛ pↄ́ bɛ̃ɛ kɛ̀ má kɛ̀nↄla píngi,

à Kɛ̀ri ado bé eé à fↄ̃.

²⁰ Sĩ̀sĩnↄ musun è pↄ́ blen,

gwen nↄ̀bↄsɛ̃tɛnↄ è kↄ̃kↄ̃ on ń píngi.

²¹ È daɛ lɛ̀’itɛ gbáru,

ègↄ̃ sↄtↄↄ vↄ̃n dã̀dã guu.

²² Lɛ̀’itɛ ↄra è daàla,

swagbaranↄ è ligazi.

²³ Baa tó ísↄ̃ e vĩvĩi, è bídi kɛro,

tó Yoda ísↄ̃pɛɛna e à lɛ́ paa,

à làakari ègↄ̃ kpaɛnamɛ.

²⁴ Weé fↄ̃ wà à wɛ́ɛ wíwi wà à kũↄ́?

Weé fↄ̃ wà ↄ̃ndↄ̃ↄ daɛzi wà à yĩ fↄ̃ↄ́?

Kùkuku

¹ Nɛ́ fↄ̃ ǹ kùkuku kũ kↄ̃n daburuo

ǹ gáɛ ǹ bↄoↄ́?

Nɛ́ fↄ̃ ǹ bà dↄ à nɛ́nɛaↄ́?

² Nɛ́ fↄ̃ ǹ bà ká à yĩn-ↄ́?

Nɛ́ fↄ̃ ǹ à lɛ́tãnka fↄ̃ kↄ̃n kúraoↄ́?

³ Eé agbaa kpákpannɛ ǹ a gbarɛↄ́?

Eé bennɛ ǹ sùu kɛↄ́?

⁴ Eé wennɛ ǹ a sɛ́ n zↄ̀ ũ

ai a wɛ̃̀ndi lɛ́n yↄ́?

⁵ Nɛ́ à dato lán wè bãa dato nàↄ́?

Nɛ́ bà dↄa ǹ kpá n nɛ́nↄgbɛ̃nↄaↄ́?

⁶ Sↄrↄkↄnↄ é kùkuku pì tↄkɛḿmaↄ́?

Aↄ̃é à líli latarinↄnɛↄ́?

⁷ Nɛ́ fↄ̃ ǹ à pápa kↄ̃n sakao ǹ à báa fↄ̃ↄ́?

Nɛ́ fↄ̃ ǹ à mì kɛ gyágya kↄ̃n sárioↄ́?

⁸ Ǹ wɛtɛ ǹ ↄ kɛa ǹ gwa!

Ɔsii pì yã é sãnguro,

nɛ́ si ǹ à taka kɛ dↄro.

⁹ Tó nɛ́ɛ daa nɛ́ à fↄ̃, nɛ́ɛ n zĩnda kɛkɛɛmɛ,

tó n wɛ́ɛ sìàlɛ, n mɛ̀ è ganzimɛ.

¹⁰ Zaakɛ gbɛ̃ke kùgbãaa e ká à à go a gbɛ̀nlo,

dé bé eé fↄ̃ à zɛ ma aɛ sↄ̃ↄ?

¹¹ Dé fĩa bé à dↄma, kɛ̀ mɛ́ bonɛ?

Pↄ́ kɛ̀ kú anduna guu píngi nɛ́ ma pↄ́mɛ.

¹² Mɛ́ gí kùkuku pì gbánↄ yã oziro

ke à gↄ̃sagbãakɛɛ ke à maakɛɛ.

¹³ Dé bé eé fↄ̃ à à tɛ̀ɛ gogoo?

Dé bé eé we à aizi kánɛ?

¹⁴ Dé bé eé we à à lɛ́ wɛ̃kↄ̃a?

À swaa kà à gbɛ̃ naasi kũ.

¹⁵ À tɛ̀ɛ dɛ lán sɛngbangonↄ bà à kpɛɛa,

à didikↄ̃ana foo sai dↄ̀rↄdↄrↄ.

¹⁶ À tɛ̀ɛ pìnↄ nana kↄ̃amɛ,

baa ĩa è gɛ̃kii ero.

¹⁷ Aↄ̃ pɛ́pɛkↄ̃rɛna gíngin,

aↄ̃é sí gokↄ̃aro.

¹⁸ Tó à yĩ sã̀, guu è pumɛ,

à wɛ́ɛ dɛ lán ↄfãntɛ̃ bↄɛna kↄngↄ bà.

¹⁹ Tɛ́nɛnɛ è bↄ à lɛ́n,

tɛ́pũtãna è bↄn dↄ.

²⁰ Tɛ́sukpɛ ègↄ̃ bↄɛ à yĩn

lán í kɛ̀ wà dì tɛ́a èe pipii puusu bà.

²¹ À lɛ́’ĩa è tó sĩsĩi tɛ́ sɛ́,

tɛ́nɛnɛ è bↄ à lɛ́n.

²² À gbãaa kú à waaamɛ,

gbɛ̃ kɛ̀ bↄ̀a mɛ̀ è kɛ kpã̀m.

²³ À báasi ègↄ̃ sↄ̃sↄ̃kↄ̃ana gíngin,

à naa gbãngbãn, è nigãro.

²⁴ À kù gbãa lán gbɛ̀ bà,

lán wísilↄgbɛ daa bà.

²⁵ Tó à fɛ̀ɛ, swɛ̃̀ è kɛ̃ gↄ̃sagbãaanↄn,

aↄ̃è kↄ̃ kɛ̃guu wà kora gákiizi.

²⁶ Fɛ̃ɛdaa kɛ̀ wà à lɛ̀o píngi è bↄaro

ke sári ke kà ke saka.

²⁷ È mↄ̀si gwa lán kàba bàmɛ,

mↄ̀gotɛ̃ ègↄ̃ dɛnɛ lán lí mùna bàmɛ.

²⁸ È bàa lɛ́ kànɛro,

gbɛ̀mba gbɛ̀ ègↄ̃ dɛnɛ lán ése ũkã bàmɛ.

²⁹ Ègↄ̃ gò gwaa lán sɛ̃̀ kori bàmɛ,

sári kĩi ègↄ̃ dɛnɛ yáadↄziyã ũmɛ.

³⁰ À gbɛɛ tɛ̀ɛ dɛ lán takaso bà,

à gbɛ̀ ègↄ̃ tɛ́ bↄtↄngan

lán zùswaaro guwibↄ bà.

³¹ È í ya a lↄ̀n lán í kɛ̀ èe pipii oroon bà,

è ísiaa dɛ lán nↄ́sidɛna bà.

³² Í kutuwina ègↄ̃ tɛ́ à kpɛɛ,

ísiaa pì è ya à kpɛɛ púu.

³³ À sáa kú anduna guuro,

ma pↄ́kɛnanↄ tɛ́ àmbe à vĩa vĩro.

³⁴ È nↄ̀bↄ kɛ̀ aↄ̃è ń zĩnda diɛ bítanↄ da pↄ́ke ũro,

àmbe nↄ̀bↄ kɛ̀ aↄ̃ dìɛ wà kànↄ kína ũ.

Ayuba mìsiɛna Ludanɛ

¹ Ben Ayuba bè Diinɛ:

² Má dↄ̃ kɛ̀ nɛ́ fↄ̃ ǹ yã píngi kɛ,

gbɛ̃ke é fↄ̃ à kpá n pↄyezinanɛro.

³ N bè, dé bé èe kpaa ↄ̃ndↄ̃ↄnɛ dↄ̃saii?

Yãpuramɛ, ma yã kɛ̀ má à gbá dↄ̃roo ò,

yãbↄnsaɛ kɛ̀ dɛ ma dↄ̃nalaa.

⁴ N bè mà swã kpá, nɛ́ yã o,

nɛ́ yã lalama, mɛ́ wenla.

⁵ Ma n yã mà kↄ̃n swãomɛ yã,

tia sa ma wɛ́ɛ sìnlɛ.

⁶ Beee yãnzi ma kya kà ma zĩndan,

ma a nↄ̀sɛ lìɛ ma vɛ̃ɛ bùsutin tubura.

Dii ɛara à Ayuba kãsã pɛɛna

⁷ Dii yã beeenↄ ona gbɛra à yã ò Temana gbɛ̃ Ɛlifazanɛ à bè: Ma pↄ fɛ̃̀nzi kↄ̃n n gbɛ̃nna gↄ̃ↄn plaaanↄ, zaakɛ ée ma yã o a zɛ́a lán ma zↄ̀bleri Ayuba bàro. ⁸ À zùsware sɛ́ mɛ̀n swɛɛplaa kↄ̃n sãkaroo mɛ̀n swɛɛplaa, à gáo ma zↄ̀bleri Ayuba kiia à sa’opↄ kɛ̀ wè ká tɛ́n à tɛ́ kũ oo, ma zↄ̀bleri Ayuba é adua kɛare. Mɛ́ à aduakɛna sí mɛ́ kɛare a yↄ̃nkↄkɛnaaro. Ée ma yã o a zɛ́a lán ma zↄ̀bleri Ayuba bàro. ⁹ Ben Temana gbɛ̃ Ɛlifaza kↄ̃n Sua gbɛ̃ Bilidadao kↄ̃n Naamati gbɛ̃ Zofao gàa wà kɛ̀ lán Dii òńnɛ nà, ben Dii Ayuba aduakɛnnɛna sì.

¹⁰ Ayuba aduakɛna a gbɛ̃nnanↄnɛ gbɛra Dii tò à sù a gwena ziin. À ɛ̀ara à pↄ́ kɛ̀ à vĩ yãa kàaranɛ lɛo plaa. ¹¹ À vĩ̀i kↄ̃n à dãaronↄ mↄ̀ à kiia ń píngi kↄ̃n à gbɛ̃ dↄ̃nanↄ ń píngi. Aↄ̃ pↄ́ blèo a bɛ aↄ̃ sósobi kɛ̀o, aↄ̃ à làakari kpàɛnɛ yã kɛ̀ Dii tò à à lè píngi yãnzi. Ben aↄ̃ baade à gbà kondogi ↄↄ kↄ̃n vura tãngao mɛ̀n doodo.

¹² Dii aubarika dà Ayuban zãa dɛ káakupↄla. À sãanↄ vĩ bↄrↄ gɛ̃ro dosai, lakuminↄ bↄrↄ swɛɛdo, zùnↄ bↄrↄ plaa kↄ̃n zaakinↄ bↄrↄ do. ¹³ À nɛ́gↄ̃gbɛ̃nↄ ì gↄ̃ↄn swɛɛplaa kↄ̃n nɛ́nↄgbɛ̃nↄ mɛ̀n aagↄ̃ dↄ. ¹⁴ À nɛ́nↄgbɛ̃ káakudee tↄ́n Yemima, à plaade tↄ́n Kezia, à aagↄ̃de tↄ́n Kɛrɛnapuku. ¹⁵ Bùsu pì guu píngi nↄgbɛ̃ kee kuu à maaa kà Ayuba nɛ́nↄgbɛ̃ pìnↄ ũro. Aↄ̃ de ń túbi dìɛńnɛ kↄ̃n ń dãgↄ̃nↄ.

¹⁶ Ayuba nawɛ̃akɛna gbɛra à kɛ̀ wɛ̃̀ baswɛɛplaa dↄ, à wɛ́ɛ sì a dionↄ kↄ̃n a swãkpɛɛnↄ kↄ̃n a nasionↄlɛ. ¹⁷ À zi kũ̀ kótokoto àton gà.