ƐZƐRA

ƐZƐRA

Sirusu Isarailinↄ gbarɛna

¹ Pɛsianↄ kí Sirusu kíblena wɛ̃̀ káaku guu Dii tɛ́ kàn lɛ yã kɛ̀ à dà Yɛrɛmayanɛ à ò e à kɛ yãnzi. Ben Sirusu kpàakpa kɛ̀ a bùsun píngi, gbasa à kɛ̃̀ takadan à bè: ² Yã kɛ̀ mamↄma Sirusu, Pɛsianↄ kína má òn yɛ̀. Dii Luda Musudee tò anduna kpata píngi gↄ̃̀ ma pↄ́ ũ, ben à ma diɛ mà kpɛ́ boare Yerusalɛmu, Yudanↄ bùsun. ³ Gbɛ̃ kɛ̀ dɛ à gbɛ̃ ũ a tɛ́, Luda gↄ̃ kúo à tá Yerusalɛmu, Yudanↄ bùsun, à kpɛ́ bo Dii Isarailinↄ Luda kɛ̀ dɛ Dii ũ Yerusalɛmunɛ gwe. ⁴ Aↄ̃ gbɛ̃ kɛ̀ aↄ̃ gↄ̃̀ pìnↄ gbɛ̃daaanↄ dↄńlɛ kↄ̃n kondogio kↄ̃n vurao kↄ̃n auzikinↄ kↄ̃n pↄ́kãdeenↄ kↄ̃n Luda kpɛ́ kɛ̀ aↄ̃ↄe gaa bo Yerusalɛmu gbaanↄ.

⁵ Ben Yudanↄ kↄ̃n Bɛyãminↄ uabɛdeenↄ kↄ̃n sa’orinↄ kↄ̃n Levinↄ kↄ̃n gbɛ̃ kɛ̀ Luda tɛ́ kàńgunↄ fɛ̀ɛ aↄ̃ↄe gaa Dii kpɛ́ bo Yerusalɛmu. ⁶ Aↄ̃ gbɛ̃daaanↄ ↄ dàḿma aↄ̃ ń gbá kondogi pↄ́nↄ kↄ̃n vura pↄ́nↄ kↄ̃n auzikinↄ kↄ̃n pↄ́kãdeenↄ kↄ̃n pↄ́ ↄↄdeenↄ kↄ̃n Dii kpɛ́ gbaanↄ píngi. ⁷ Ben Pɛsianↄ kí Sirusu bↄ̀ kↄ̃n Dii kpɛ́ pↄ́ kɛ̀ Nɛbukanɛza sɛ̀ɛ yã zaa Yerusalɛmu à kàɛ a tãa kpɛ́ guunↄo. ⁸ À bè a ↄↄ’utɛri Mitirɛdanɛ à pↄ́ pìnↄ naro à kpá Yudanↄ kí Sesebazaa, ben à kɛ̀ lɛ. ⁹ Pↄ́ pìnↄ pari lɛ́n yɛ̀:

Vura taa baaakuri,

kondogi taa bↄrↄ do,

tapɛɛnti baaakuri dosai,

¹⁰ vura togoo baaakuri,

kondogi togoo wàa plaa kↄ̃n kurio,

ta bori pãndenↄ bↄrↄ do.

¹¹ Vura kↄ̃n kondogi taanↄ fɛ̀ɛ píngi mɛ̀n bↄrↄ sↄↄro kpɛ́ wàa plaa. Kɛ̀ zĩ̀zↄ pìnↄ bↄ̀ɛ Babilↄnu aↄ̃ sù Yerusalɛmu, ben Sesebaza mↄ̀ kↄ̃n pↄ́ pìnↄ píngi.

Zĩ̀zↄ kɛ̀ aↄ̃ sùnↄ

¹ Babilↄnu kí Nɛbukanɛza Isarailinↄ kũ̀kũ zĩ̀zↄnↄ ũ yã à tàńyo Babilↄnu, ben aↄ̃ gbɛ̃kenↄ bↄ̀ zĩ̀zↄkɛɛ pìn aↄ̃ sù Yerusalɛmu, Yudanↄ bùsun sa, ben ń baade tà a wɛ́tɛ. ² Aↄ̃ dↄn’aɛdeenↄn yɛ̀: Zɛrubabɛli, Yesua, Nɛɛmaya, Seraya, Relaya, Mↄdekai, Bilisã, Misipa, Bigivai, Reumu kↄ̃n Baanao. Isaraili gↄ̃gbɛ̃ kɛ̀ aↄ̃ sùnↄ pari lɛ́n yɛ̀.

³ Parↄsu boriinↄ gↄ̃ↄn bↄrↄ plaa kↄ̃n mɛ̀n basↄraagↄ̃ akuri awɛɛplaao.

⁴ Sefatia boriinↄ gↄ̃ↄn wàa do kↄ̃n mɛ̀n basↄraagↄ̃ akuri awɛɛplaao.

⁵ Ara boriinↄ gↄ̃ↄn wàa aagↄ̃ kↄ̃n mɛ̀n bakɛ̃ndo sↄↄrosaio.

⁶ Pamↄabu borii kɛ̀ aↄ̃ↄ dɛ Yesua kↄ̃n Yoabuo boriinↄ ũunↄ gↄ̃ↄn wàa gɛ̃ro dosai kↄ̃n kuri awɛɛplaao.

⁷ Elamu boriinↄ gↄ̃ↄn wàa swɛɛdo kↄ̃n mɛ̀n baplaa akuri awɛɛsiigↄ̃o.

⁸ Zatu boriinↄ gↄ̃ↄn wàa siigↄ̃ kↄ̃n mɛ̀n baswɛɛplaa asↄↄroo.

⁹ Zakai boriinↄ gↄ̃ↄn wàa aagↄ̃ kↄ̃n mɛ̀n basↄraagↄ̃o.

¹⁰ Bani boriinↄ gↄ̃ↄn wàa aagↄ̃ kↄ̃n mɛ̀n baplaa awɛɛplaao.

¹¹ Bebai boriinↄ gↄ̃ↄn wàa aagↄ̃ kↄ̃n mɛ̀n baro awɛɛ’aagↄ̃o.

¹² Azagada boriinↄ gↄ̃ↄn wàa swɛɛdo kↄ̃n mɛ̀n baro awɛɛplaao.

¹³ Adonikamu boriinↄ gↄ̃ↄn wàa aagↄ̃ kↄ̃n mɛ̀n baaagↄ̃ awɛɛswɛɛdoo.

¹⁴ Bigivai boriinↄ gↄ̃ↄn bↄrↄ plaa kↄ̃n mɛ̀n baplaa akuri awɛɛswɛɛdoo.

¹⁵ Adini boriinↄ gↄ̃ↄn wàa plaa kↄ̃n mɛ̀n baplaa akuri awɛɛsiigↄ̃o.

¹⁶ Ata boriinↄ gↄ̃ↄn basↄↄro plaasai.

¹⁷ Bezai boriinↄ gↄ̃ↄn wàa do kↄ̃n mɛ̀n baswɛɛdo awɛɛ’aagↄ̃o.

¹⁸ Yora boriinↄ gↄ̃ↄn basↄↄro akuri awɛɛplaa.

¹⁹ Asumu boriinↄ gↄ̃ↄn wàa do kↄ̃n mɛ̀n baro awɛɛ’aagↄ̃o.

²⁰ Giba boriinↄ gↄ̃ↄn basↄↄro sↄↄrosai.

²¹ Bɛtɛlɛmudeenↄ gↄ̃ↄn baswɛɛdo awɛɛ’aagↄ̃.

²² Nɛtofadeenↄ gↄ̃ↄn baplaa akuri awɛɛswɛɛdo.

²³ Anatodeenↄ gↄ̃ↄn baswɛɛdo akuri plaasai.

²⁴ Azamavɛdeenↄ gↄ̃ↄn baplaa awɛɛplaa.

²⁵ Kiriayarimudeenↄ kↄ̃n Kɛfiradeenↄ kↄ̃n Berodeenↄ gↄ̃ↄn wàa aagↄ̃ kↄ̃n mɛ̀n baswɛɛplaa awɛɛ’aagↄ̃o.

²⁶ Ramadeenↄ kↄ̃n Gɛbadeenↄ gↄ̃ↄn wàa aagↄ̃ kↄ̃n mɛ̀n baro awɛɛdoo.

²⁷ Mikimasadeenↄ gↄ̃ↄn baswɛɛdo awɛɛplaa.

²⁸ Bɛtɛlideenↄ kↄ̃n Aideenↄ gↄ̃ↄn wàa do kↄ̃n mɛ̀n baro awɛɛ’aagↄ̃o.

²⁹ Nɛbodeenↄ gↄ̃ↄn baplaa akuri awɛɛplaa.

³⁰ Magbisideenↄ gↄ̃ↄn baswɛɛplaa akuri awɛɛswɛɛdo.

³¹ Elamu pãnde boriinↄ gↄ̃ↄn wàa swɛɛdo kↄ̃n mɛ̀n baplaa akuri awɛɛsiigↄ̃o.

³² Arimu boriinↄ gↄ̃ↄn wàa do kↄ̃n mɛ̀n baswɛɛdoo.

³³ Lodudeenↄ kↄ̃n Adidideenↄ kↄ̃n Onↄdeenↄ gↄ̃ↄn wàa aagↄ̃ kↄ̃n mɛ̀n baswɛɛdo asↄↄroo.

³⁴ Yɛrikodeenↄ gↄ̃ↄn wàa do kↄ̃n mɛ̀n baswɛɛplaa asↄↄroo.

³⁵ Senadeenↄ gↄ̃ↄn wàa baro plaasai kↄ̃n mɛ̀n baaakurio.

³⁶ Sa’ori borii kɛ̀ aↄ̃ sùnↄn yɛ̀:

Yesua bori Yedaya boriinↄ gↄ̃ↄn wàa siigↄ̃ kↄ̃n mɛ̀n basↄraagↄ̃ akuri awɛɛ’aagↄ̃o.

³⁷ Ima boriinↄ gↄ̃ↄn bↄrↄ do kↄ̃n mɛ̀n baplaa akuri awɛɛplaao.

³⁸ Pasu boriinↄ gↄ̃ↄn wàa swɛɛdo kↄ̃n mɛ̀n baplaa awɛɛswɛɛplaao.

³⁹ Arimu boriinↄ gↄ̃ↄn bↄrↄ do kↄ̃n mɛ̀n gɛ̃ro awɛɛplaao.

⁴⁰ Levi kɛ̀ aↄ̃ sùnↄn yɛ̀:

Odavia bori Yesua kↄ̃n Kadamiɛlio boriinↄ gↄ̃ↄn baaagↄ̃ akuri awɛɛsiigↄ̃o.

⁴¹ Asafa bori lɛ̀sirinↄ gↄ̃ↄn baswɛɛdo akuri plaasai.

⁴² Zɛ́dãkpari kɛ̀ aↄ̃ↄ dɛ Salumu kↄ̃n Atao kↄ̃n Talamↄo kↄ̃n Akubuo kↄ̃n Atitao kↄ̃n Sobaio borii ũunↄ gↄ̃ↄn baswɛɛplaa dosai.

⁴³ Gbɛ̃ kɛ̀nↄ boriinↄ bé Luda ua zĩkɛrinↄ ũ:

Zia, Asufa, Tabao,

⁴⁴ Kerosu, Sia, Padↄ̃,

⁴⁵ Lebana, Agabu, Akubu,

⁴⁶ Agabu, Salamai, Anana,

⁴⁷ Gidɛli, Gaa, Raya,

⁴⁸ Rezĩ, Nɛkoda, Gazamu,

⁴⁹ Uza, Pasea, Besai,

⁵⁰ Asana, Mɛunimu, Nɛfusimu,

⁵¹ Bakabuku, Akufa, Aru,

⁵² Bazalu, Mɛida, Asa,

⁵³ Bakosi, Sisera, Tema,

⁵⁴ Nɛzia kↄ̃n Atifao.

⁵⁵ Sulemanu zↄ̀bleri kɛ̀nↄ boriinↄ bé wà bↄ̀ zĩ̀zↄkɛɛn wà sù:

Sotai, Asofɛrɛ, Peruda,

⁵⁶ Yaala, Dakↄ̃, Gidɛli,

⁵⁷ Sefatia, Atili, Pↄkɛrɛ Azebaimu kↄ̃n Amio.

⁵⁸ Luda ua zĩkɛri pìnↄ kↄ̃n Sulemanu zↄ̀bleri borii pìnↄ kà gↄ̃ↄn wàa do kↄ̃n mɛ̀n bakɛ̃ndo akuri awɛɛplaao.

⁵⁹ Gbɛ̃kenↄ bↄ̀ Tɛlɛmɛla kↄ̃n Tɛlasao kↄ̃n Kɛrubuo kↄ̃n Adↄ̃o kↄ̃n Ima o, ben aↄ̃ↄe e wà ń bori bↄzia òńnɛ kɛ̀ Isarailinↄn ń ũro. ⁶⁰ Delaya kↄ̃n Tobiao kↄ̃n Nɛkodao boriinↄmɛ, aↄ̃ kà gↄ̃ↄn wàa aagↄ̃ kↄ̃n mɛ̀n baplaa akuri awɛɛplaao. ⁶¹ Sa’ori borii kɛ̀ aↄ̃ↄ dɛ Obaya kↄ̃n Akozuo kↄ̃n Bazilaio boriinↄ ũu sù dↄ. Bazilai pì Giliada bùsu gbɛ̃ Bazilai nɛ́ sɛ̀ yã, ben à a anzure pì tↄ́ sɛ̀. ⁶² Gbɛ̃ pìnↄ ń tↄ́ wɛ̀tɛ bori bↄzia takadan, mↄde aↄ̃ↄe bↄaro, ben wà gìńnɛ sa’orikɛɛo. ⁶³ Bùsu dↄn’aɛdee bèńnɛ, tó èe kɛ sa’ori ń yã gwà kↄ̃n Urimuo kↄ̃n Tumimuo baasiro, aↄ̃ton sa’opↄ blero.

⁶⁴ Gbɛ̃ pìnↄ ń píngi gↄ̃ↄn bↄrↄ baplaa awɛɛplaa kpɛ́ wàa do kↄ̃n basↄraagↄ̃omɛ. ⁶⁵ Aↄ̃ zↄ̀bleri gↄ̃gbɛ̃nↄ kↄ̃n nↄgbɛ̃nↄↄ kuu dↄ gↄ̃ↄn bↄrↄ swɛɛplaa kpɛ́ wàa do kↄ̃n baswɛɛdo akuri awɛɛswɛɛplaao. Lɛ̀sirinↄ gↄ̃gbɛ̃ kↄ̃n nↄgbɛ̃o kúńyo dↄ gↄ̃ↄn wàa do. ⁶⁶ Aↄ̃ↄ sↄ̃ vĩ mɛ̀n wàa aagↄ̃ kↄ̃n baswɛɛdo akuri awɛɛswɛɛdoo, bãagãsↄ̃ mɛ̀n wàa do kↄ̃n baplaa asↄↄroo, ⁶⁷ lakumi wàa plaa kↄ̃n baplaa sↄↄrosaio, zaaki bↄrↄ swɛɛdo kpɛ́ wàa aagↄ̃ kↄ̃n baswɛɛdoo.

⁶⁸ Kɛ̀ aↄ̃ kà Dii kpɛ́ bokiia Yerusalɛmu, aↄ̃ uabɛdeenↄ gba dàda lɛ wà e wà Luda kpɛ́ kɛkɛ wà boo a gbɛ̀n. ⁶⁹ Aↄ̃ gba dà kpɛ́ zĩ ↄↄdakii guu ń gbãa lɛ́n, vura kiloo wàa plaa kpɛ́ basↄↄro, kondogi tↄn aagↄ̃ kↄ̃n sa’ori gyabanↄ basↄↄro. ⁷⁰ Sa’orinↄ kↄ̃n Levinↄ kↄ̃n lɛ̀sirinↄ kↄ̃n zɛ́dãkparinↄ kↄ̃n Luda ua zĩkɛrinↄ kↄ̃n gbɛ̃ kpaa kenↄ vɛ̃̀ɛvɛ̃ɛ lakutu kɛ̀ wà kɛ̀kɛńnɛnↄ guu, ben Isaraili kpaaanↄ vɛ̃̀ɛ ń wɛ́tɛnↄ guu.

Dii gbãgbãki bona

¹ Kɛ̀ wɛ̃̀ mↄ swɛɛplaadee kà, Isarailinↄↄ vɛ̃ɛna ń wɛ́tɛnↄ guu, ben aↄ̃ kↄ̃ kàkↄ̃a Yerusalɛmu gbɛ̃ dↄ̃nkↄ̃ ũ. ² Yozadaka nɛ́ Yesua kↄ̃n a sa’ori daanↄ kↄ̃n Sealatiɛli nɛ́ Zɛrubabɛlio kↄ̃n a gbɛ̃nↄ Isarailinↄ Luda gbãgbãkii bò, lɛ wà sa’opↄ kɛ̀ wè ká tɛ́n à tɛ́ kũ oa lán Luda gbɛ̃ Musa ò a doka guu nà. ³ Baa kɛ̀ aↄ̃ↄe vĩa kɛɛ gbɛ̃ kɛ̀ aↄ̃ↄ kú bùsu pì guunↄnɛ, aↄ̃ gbãgbãkii pì bò a gbɛ̀mmɛ, ben aↄ̃ sa’opↄ kɛ̀ wè ká tɛ́n à tɛ́ kũ ò Diia kↄngↄ kↄ̃n uusiɛo. ⁴ Aↄ̃ Kutadↄna zĩbaa kɛ̀ lán à kú takada guu nà, aↄ̃ègↄ̃ sa’opↄ kɛ̀ wè ká tɛ́n à tɛ́ kũ oo lán guu e dↄↄ nà lán wà à lɛ́ dìɛ nà. ⁵ Beee gbɛra aↄ̃ sa’opↄ kɛ̀ wègↄ̃ ká tɛ́n à tɛ́ kũ gurↄ píngi ò kↄ̃n mↄ dufu pↄ́o kↄ̃n zĩbaa kɛ̀ Dii dìɛnↄ pↄ́o kↄ̃n gbaa kɛ̀ wè mↄ́onɛnↄ. ⁶ Mↄ swɛɛplaade gurↄ káaku zĩn aↄ̃ nà Dii gbãgbãnaa lɛ, baa kɛ̀ wèe à kpɛ́ bo kↄ̀ro.

⁷ Aↄ̃ ↄↄ kpà gbɛ̀’arinↄ kↄ̃n lí’arinↄa, ben aↄ̃ pↄ́ble kↄ̃n íminao kↄ̃n nↄ́sio kpà Sidↄ̃deenↄ kↄ̃n Tayadeenↄa, lɛ aↄ̃ sida lí zↄ̃zↄ̃ Lɛbanↄ bùsun aↄ̃ yiyi wà gáo ai Yↄpa funa ísiaala, lán Pɛsianↄ kína Sirusu ń gbá zɛ́ nà. ⁸ Aↄ̃ kana Luda kpɛ́ bokiia Yerusalɛmu wɛ̃̀ plaade mↄ plaadee guu, Sealatiɛli nɛ́ Zɛrubabɛli kↄ̃n Yozadaka nɛ́ Yesuao nà zĩia kↄ̃n ń gbɛ̃ kpaaanↄ, sa’orinↄ kↄ̃n Levinↄ kↄ̃n gbɛ̃ kɛ̀ aↄ̃ bↄ̀ zĩ̀zↄkɛɛn wà sù Yerusalɛmunↄ ń píngi. Aↄ̃ Levi kɛ̀ aↄ̃ kà wɛ̃̀ baro ke aↄ̃ↄ dɛàlaanↄ dìɛ Dii kpɛ́ zĩi pì gbɛ̃nsinↄ ũ. ⁹ Yesua kↄ̃n a boriinↄ nàkↄ̃a kↄ̃n Kadamiɛlio kↄ̃n à nɛ́ Odavia boriinↄ, ben aↄ̃ gↄ̃̀ zĩi pì gbɛ̃nsinↄ ũ kↄ̃n Enadadao kↄ̃n à boriinↄ. Levinↄmɛ ń píngi. ¹⁰ Kɛ̀ Dii kpɛ́borinↄↄ e kpɛ́ pì ɛ̃ɛ daɛɛ, sa’orinↄↄ zɛzɛ gwe sa’ori pↄ́kãsãanↄ dadana, aↄ̃ ń kuunↄ kũkũna, bensↄ̃ Levi nɛ́ Asafa boriinↄↄ kú gwe dↄ kↄ̃n sɛ̃̀gɛ̃nↄ lɛ wà Dii táaki lɛ́o, lán Isarailinↄ kí Dauda dìɛ yã nà. ¹¹ Aↄ̃ lɛ̀ sì aↄ̃ Dii táaki lɛ̀ aↄ̃ à sáabu kpà wà bè:

Dii maa,

à gbɛ̃kɛɛ kɛna wa Isarailinↄnɛ yãana vĩro.

Ben baade píngi wii gbãaa lɛ̀ aↄ̃ Dii táaki lɛ̀, kɛ̀ wà Dii kpɛ́ ɛ̃ɛ dàɛ yãnzi. ¹² Mↄde sa’ori parideenↄ kↄ̃n Levinↄ kↄ̃n bɛdee kɛ̀ aↄ̃ zi kũ̀ aↄ̃ wɛ́ɛ sì kpɛ́ káakulɛnↄ, kɛ̀ aↄ̃ kpɛ́ pì ɛ̃bona è, aↄ̃ sósobi ↄ́ↄ dↄ̀. Gbɛ̃ parideenↄ sↄ̃, aↄ̃ↄe pↄnna wii lɛɛ. ¹³ Gbɛ̃kee e pↄnna wiii dↄ̃kↄ̃zi kↄ̃n sósobi ↄ́ kɛ̀ wèe dↄↄo dↄro, kɛ̀ baade e wii gbãaa lɛɛ yãnzi, bensↄ̃ wà wisↄ̃ↄ pì mà zã̀.

Íbɛtɛkpana kↄ̃n Dii kpɛ́borinↄ

¹ Kɛ̀ Yudanↄ kↄ̃n Bɛyãminↄ ibɛɛnↄ mà zĩ̀zↄ kɛ̀ aↄ̃ sùnↄↄ e kpɛ́ boo Dii Isarailinↄ Ludanɛ, ² aↄ̃ mↄ̀ wà Zɛrubabɛli kↄ̃n uabɛdeenↄ lè aↄ̃ bèńnɛ: À tó wà kpɛ́ boao, zaakɛ weè a Luda kii wɛtɛ lán a bàmɛ se. Weègↄ̃ à gbãgbãamɛ zaa gurↄↄ kɛ̀ Asirianↄ kí Esaradↄ̃ sùwao kɛ̀. ³ Ben Zɛrubabɛli kↄ̃n Yesuao kↄ̃n Isaraili bɛde kpaaanↄ bèńnɛ: Wa Luda kpɛ́ bona dɛ a yã ũro. Wé wa pↄ́ bo Dii Isarailinↄ Ludanɛ watɛ̃ɛ lán Pɛsianↄ kí Sirusu dìɛwe nà. ⁴ Ben bùsu pì deenↄↄ e wɛtɛɛ aↄ̃ Yudanↄ nↄ̀sɛ yaka, aↄ̃ↄe wɛ́ɛ tãaḿma lɛ aↄ̃ton kpɛ́ pì boro yãnzi. ⁵ Aↄ̃ fĩa bò kína lɛ́dammarinↄnɛ zaa Sirusu gurↄↄ ai à gàa pɛ́ Pɛsianↄ kí Dariusu kíblegurↄↄa, ben aↄ̃ gìńnɛ kↄ̃n yã kɛ̀ aↄ̃ↄe pɛɛao.

⁶ Aↄ̃ takada kɛ̃̀ Asuerunɛ à kíblenao gↄ̃̀ↄ, aↄ̃ gbɛ̃ kɛ̀ aↄ̃ↄ kú Yerusalɛmunↄ kↄ̃n Yudanↄ bùsuo píngi káara kpà à kiia. ⁷ Bisilamu kↄ̃n Mitirɛdao kↄ̃n Tabɛlio kↄ̃n ń gbɛ̃ kpaaanↄ takada kɛ̃̀ Pɛsianↄ kí Atasɛsɛnɛ dↄ à kíblegurↄↄa. Aↄ̃ kɛ̃̀nɛ kↄ̃n Siria yão, ben wà bↄ̀kↄ̃tɛnɛ. ⁸ Bùsu gbɛ̃nsi Reumu kↄ̃n a takadakɛ̃ri Simisaio takada kɛ̃̀ kí Atasɛsɛnɛ Yerusalɛmu yã musu dↄ wà bè: ⁹ Bùsu gbɛ̃nsi Reumu kↄ̃n a takadakɛ̃ri Simisaio kↄ̃n ń gbɛ̃ kpaa yãkpaɛkɛrinↄ kↄ̃n gbãadeenↄ kↄ̃n Tiripↄlideenↄ kↄ̃n Pɛsianↄ kↄ̃n Ɛrɛkideenↄ kↄ̃n Babilↄnudeenↄ kↄ̃n Susadee kɛ̀ aↄ̃ bↄ̀ɛ Elamu bùsu guunↄ ¹⁰ kↄ̃n gbɛ̃ kɛ̀ kína bíta bɛ̀ɛde Asubanipali ń bↄ́ɛ ń bùsun à ń vɛ̃ɛvɛ̃ɛ Samaria wɛ́tɛn kↄ̃n Yuflati baa kɛ̀ kpa gu pãndenↄ, ¹¹ wamↄwa Yuflati baakɛkpadeenↄ n zↄ̀blerinↄ bé wà takada kɛ̀ kɛ̃̀nnɛ, kí Atasɛsɛ, wa bè:

¹² Kí, ǹgↄ̃ dↄ̃ kɛ̀ Yuda kɛ̀ aↄ̃ bↄ̀ n kiia aↄ̃ sù kɛ̀nↄ gàa wèe Yerusalɛmu wɛ́tɛ zaa pãsĩ pì kaɛɛ, aↄ̃ ɛ̀ara wèe à bĩi boo dↄ, aↄ̃ↄe à bɛzĩ fɛɛɛ. ¹³ Kí, ǹgↄ̃ dↄ̃ dↄ, tó aↄ̃ ɛ̀ara wà wɛ́tɛ pì kàɛ aↄ̃ à bĩi bò wà yã̀a, aↄ̃é tángba kpámma dↄro ke yàra’ↄↄ ke bùsu’ↄↄ, n ↄↄ kɛ̀ nɛɛ̀ sí é lago. ¹⁴ Tia lán kɛ̀ bà kí, lán n bɛ wisin weè ble nà, èe kↄ̃ sío wà n kpɛɛ ero. Beee yãnzin wa takada kɛ̀kii kpã̀sãnnɛzi lɛ wà yã pì onnɛ. ¹⁵ Ǹ wɛtɛ n dezinↄ takadanↄ guu ǹ gwa, nɛ́ e ǹ dↄ̃ dia wɛ́tɛ pì deenↄ swã gbãa, aↄ̃ ĩa dà kínanↄa kↄ̃n bùsu gbãadeenↄ. Zaa zi wɛ́tɛ pì deenↄ yãkete kɛ̀ bíta. Beee yãnzin wà wɛ́tɛ pì gbòrozi. ¹⁶ Kí, wée oonnɛ, tó wà ɛ̀ara wà wɛ́tɛ pì fɛ̀ɛ wà ɛ̀ara wà à bĩi bò wà yã̀a, nɛ́gↄ̃ pↄ́ke vĩ Yuflati baa kɛ̀ kpa dↄro.

¹⁷ Beee gbɛra kína takada kpã̀sãńnɛ à bè: Bùsu gbɛ̃nsi Reumu kↄ̃n à takadakɛ̃ri Simisaio kↄ̃n a gbɛ̃ kpaaa kɛ̀ aↄ̃ↄ kú Samaria kↄ̃n Yuflati baa kãa kpaanↄ, ma ì kpàawa. ¹⁸ Takada kɛ̀ á kpã̀sãmɛ, wà à kyó kɛ̀ wà bↄ̀kↄ̃tɛmɛ. ¹⁹ Ma bè wà wɛtɛ takada ziinↄ guu, ben wà è yãpuramɛ, wɛ́tɛ pì deenↄ ègↄ̃ bↄↄ kínanↄ kpɛɛmɛ. Zaa zi yãketedeenↄmɛ. ²⁰ Kína ìsinↄ kpata blè Yerusalɛmu gwe, aↄ̃ gbãaa blè Yuflati baakãakpadeenↄa ń píngi, wà tángba kpàḿma kↄ̃n yàra’ↄↄo kↄ̃n bùsu’ↄↄo. ²¹ À yã diɛ gbɛ̃ pìnↄnɛ aↄ̃ kámma bo sa. Aↄ̃ton ɛara wà wɛ́tɛ pì vuro ai mà ń gba lɛ́. ²² À làakari kɛ! Àton nigãzĩi kpá yã pìziro, lɛ à zaaa pì tón ↄ tá à wa ásaru kɛro yãnzi.

²³ Kɛ̀ wà kí Atasɛsɛ lá pì kyó kɛ̀ wà bↄ̀kↄ̃tɛ Reumunɛ kↄ̃n à takadakɛ̃ri Simisaio kↄ̃n ń gbɛ̃ kpaaanↄ, ben aↄ̃ fɛ̀ɛ wà gàa wà Yudanↄ lè Yerusalɛmu gↄ̃ↄ. Aↄ̃ gìńnɛ pãsĩpãsĩ wà bè aↄ̃ kámma bo. ²⁴ Lɛn aↄ̃ kámma bò lɛ kↄ̃n Luda kpɛ́ zĩi kɛ̀ aↄ̃ↄe kɛɛ Yerusalɛmuo ai Pɛsianↄ kí Dariusu kíblena wɛ̃̀ plaadee guu.

Tatenai takadakɛ̃na kí Dariusunɛ

¹ Annabi Agai kↄ̃n annabi Zakari, Ido nɛ́o annabikɛɛ kɛ̀ Yuda kɛ̀ aↄ̃ↄ kú Yerusalɛmunↄ kↄ̃n Yudanↄ bùsuo kↄ̃n Isarailinↄ Luda tↄ́o. ² Ben Sealatiɛli nɛ́ Zɛrubabɛli kↄ̃n Yozadaka nɛ́ Yesuao fɛ̀ɛ wà nà Luda kpɛ́ bonaa Yerusalɛmu. Luda annabi pìnↄↄ kúńyo aↄ̃ↄe dↄↄńlɛ. ³ Gwe gↄ̃ↄ Yuflati baa kɛ̀ kpa dↄn’aɛde Tatenai kↄ̃n Seta Bozɛnaio kↄ̃n ń gbɛ̃nↄ mↄ̀ wà ń lé aↄ̃ ń lá wà bè: Dé bé à a gba zɛ́ à kpɛ́ kɛ̀ kɛkɛ à boo? ⁴ Aↄ̃ gbɛ̃ kɛ̀ aↄ̃ↄe kpɛ́ pì boonↄ tↄ́ gbèka dↄ. ⁵ Mↄde Ludaa e wɛ́ɛ tɛ́ Yuda gbɛ̃nsi pìnↄzi, ben aↄ̃ↄe ońnɛ aↄ̃ kámma boro. Aↄ̃ bè weé lɛ́kpãsã kɛ Dariusunɛ gĩa, weé takada kɛ̀ eé kɛ̃ à yã musu e. ⁶ Yuflati baa kɛ̀ kpa dↄn’aɛde Tatenai kↄ̃n Seta Bozɛnaio kↄ̃n ń gbɛ̃ Pɛsianↄ takada kɛ̃̀, ben aↄ̃ kpã̀sã kí Dariusunɛ. ⁷ Lɛ́kpãsã kɛ̀ aↄ̃ kɛ̀nɛn yɛ̀, aↄ̃ bè:

Kí Dariusu, wa ì kpàmma maamaa. ⁸ Kí, ǹgↄ̃ dↄ̃ kɛ̀ wa gaa Yudanↄ bùsun ai Luda kɛ̀ bíta kpɛ́n. Wèe kpɛ́ pì boo kↄ̃n gbɛ̀ gbɛ̃̀ntɛ̃nↄ wèe lí lɛ̀ɛtɛgɛ kpaɛɛ kpɛ́ pì gũ̀nↄn. Wèe zĩi pì kɛɛ kↄ̃n làakario èe táa oo. ⁹ Wa yã làla ń gbɛ̃nsinↄa wa bè: Dé bé à a gba zɛ́ à kpɛ́ kɛ̀kii kɛkɛ à boo? ¹⁰ Wa ń tↄ́ gbèka lɛ wà e wà onnɛ, ben wa ń dↄn’aɛdee pìnↄ tↄ́ dà takadan. ¹¹ Dia aↄ̃ yã sìwala nàn yɛ̀. Aↄ̃ bè, musu kↄ̃n tↄↄtɛo Luda zↄ̀blerinↄn ń ũ. Kpɛ́ kɛ̀ wà bò yã à wɛ̃̀ kɛ̀n wà kɛ̀kɛ wèe boo dↄ. Isarailinↄ kí bíta bé à bò yã. ¹² Aↄ̃ bè ń dezinↄ Luda Musude pↄ fɛ̃̀, ben à ń ná Kaladia bori Nɛbukanɛza, Babilↄnu kínanɛ a ↄzĩ, ben à kpɛ́ pì wìwi à gbɛ̃ pìnↄ sɛ̀ɛ à tàńyo Babilↄnu. ¹³ Mↄde Babilↄnu kí Sirusu kíblena wɛ̃̀ káaku guu à yã dìɛ à bè wà ɛara wà Luda kpɛ́ pì bo dↄ. ¹⁴ Baa vura kↄ̃n kondogi pↄ́ kɛ̀ Nɛbukanɛza sɛ̀ɛ Luda kpɛ́n zaa Yerusalɛmu à kàɛ a tãa kpɛ́n Babilↄnunↄ, kí Sirusu bↄ̀ɛ à kpà Sesebaza kɛ̀ à dìɛ bùsu dↄn’aɛdee ũua. ¹⁵ À bènɛ à pↄ́ pìnↄ sɛ́ à gá à káɛ Luda kpɛ́n zaa Yerusalɛmu, tó wà kpɛ́ pì kɛ̀kɛ wà bò. ¹⁶ Ben Sesebaza mↄ̀ Luda kpɛ́ ɛ̃ɛ dàɛ. Wèe kpɛ́ pì boo zaa gurↄ beeea ai kↄ̃n a gbã̀ao, mↄde èe yãa kↄ̀ro. ¹⁷ Kí, tó à kɛ̀nnɛ maa, ǹ takada wɛtɛ kínanↄ takadakaɛkiia zaa Babilↄnu ǹ gwa tó kí Sirusu yã dìɛ wà Luda kpɛ́ bo Yerusalɛmu. Lán ń è nà, ǹ lɛ́kpãsã kɛwe.

Dariusu yãdiɛna Luda kpɛ́ bona yã musu

¹ Kí Dariusu yã dìɛ, ben wà takada wɛ̀tɛ takada kɛ̀ wà kàɛ Babilↄnu takadakaɛkiianↄ tɛ́. ² Ben wà bↄ̀ takada kokonaa Ɛkɛbatana wɛ́tɛ bĩideen Midiã bùsun. Yã kɛ̀kii kú à guu lɛ wàton sãńlo yãnzi:

³ Kí Sirusu kíblena wɛ̃̀ káaku guu à yã dìɛ Luda kpɛ́ kɛ̀ kuu Yerusalɛmu musu, à bè wà kpɛ́ pì bo sa’okii ũ. Wà à ɛ̃ɛ daɛ, kpɛ́ pì lezĩ ká gã̀sãsuu baaagↄ̃, à yàasa gã̀sãsuu baaagↄ̃. ⁴ Wàgae gbɛ̀ gbɛ̃̀ntɛ̃ mɛ̀n aagↄ̃ↄ didikↄ̃a, lí lɛ̀ɛtɛgɛ mɛ̀n do, gbɛ̀ gbɛ̃̀ntɛ̃ aagↄ̃, lí lɛ̀ɛtɛgɛ mɛ̀n do. Weé à fĩa bo kↄ̃n kíbɛ ↄↄo. ⁵ Vura kↄ̃n kondogi pↄ́ kɛ̀ Nɛbukanɛza sɛ̀ɛ Luda kpɛ́n Yerusalɛmu à sùo Babilↄnunↄ sↄ̃, weé ɛara wà gá káɛ à gbɛ̀n Luda kpɛ́n Yerusalɛmu.

⁶ Ben kí Dariusu lɛ́kpãsã kɛ̀ à bè: Tia sa Yuflati baa kãa dↄn’aɛde Tatenai kↄ̃n Seta Bozɛnaio kↄ̃n a gbɛ̃ kɛ̀ aↄ̃ↄ kú Yuflati baa gweenↄ, à a zĩnda gá gwe. ⁷ À Luda kpɛ́ bòrinↄ tó tɛɛɛ. À tó Yuda dↄn’aɛdeenↄ kↄ̃n ń gbɛ̃nsinↄ Luda kpɛ́ pì kɛkɛ wà bo. ⁸ Mɛ́ɛ yã kɛ̀ àton kɛ Yuda gbɛ̃nsinↄnɛ Luda kpɛ́ pì bona musu diɛɛare. À pↄ́ kɛ̀ aↄ̃ↄ yezinↄ sɛ́ɛ ma auzikikaɛkiin gwe kↄ̃n Yuflati baa kãa kpa tángba kɛ̀ wà kpào, à kpáḿma píngi lɛ zĩi pì tón zɛ dↄro yãnzi. ⁹ Pↄ́ kɛ̀ aↄ̃ↄ yezi píngi, zùswaree, sãkaro, sãnɛ bↄ̀rↄ kɛ̀ aↄ̃è Luda Musude gbãgbão, pↄ́wɛɛ, wisi, geepiwɛ̃ɛ, nↄ́si, àgↄ̃ kpaa Yerusalɛmu sa’orinↄa lán guu e dↄↄ nà lán aↄ̃ↄ gbèka nà funa sai, ¹⁰ lɛ aↄ̃ e wà saa kɛ̀ kà Luda Musuden oa, aↄ̃ wɛ́ɛ kɛamɛ kↄ̃n ma nɛ́gↄ̃gbɛ̃nↄ. ¹¹ Tó gbɛ̃ke yã kɛ̀ má dìɛ kɛ̀kii lìɛ, weé adee kpɛ́ lí wo wà à páa wà pɛ́ɛ wà à bɛɛ kɛ tuburaa ũ. ¹² Tó kína ke bori kee e wɛtɛɛ à yã pì liɛ ke èe wɛtɛɛ à Luda kpɛ́ kɛ̀ kú Yerusalɛmu pì wí, Luda kɛ̀ tò a tↄ́ kúa à kaatɛ. Mamↄma Dariusu mámbe ma yã pì dìɛ. Wà zĩi kɛa maamaa.

Luda kpɛ́ kyakɛna

¹³ Kɛ̀ kí Dariusu lɛ́kpãsã pì kɛ̀ lɛ, Yuflati baa kɛ̀ kpa dↄn’aɛde Tatenai kↄ̃n Seta Bozɛnaio kↄ̃n ń gbɛ̃nↄ yã pì kɛ̀ kↄ̃n làakario. ¹⁴ Ben Yuda gbɛ̃nsinↄ kpɛ́bona e gaa aɛ lán annabi Agai kↄ̃n annabi Zakari Ido nɛ́o annabikɛɛ kɛ̀ nà. Aↄ̃ kpɛ́ pì dↄ̀ wà yã̀a lán Isarailinↄ Ludaa ò nà, lán Pɛsianↄ kínanↄ Sirusu kↄ̃n Dariusuo kↄ̃n Atasɛsɛo à yã dìɛ nà. ¹⁵ Aↄ̃ Luda kpɛ́ mì dɛ̀ Ada gurↄ aagↄ̃dee zĩ kí Dariusu kíblena wɛ̃̀ swɛɛdodee guu. ¹⁶ Ben Isarailinↄ Luda kpɛ́ kyakɛ̀ kↄ̃n pↄnnaao, sa’orinↄ kↄ̃n Levinↄ kↄ̃n gbɛ̃ kpaaa kɛ̀ aↄ̃ sù kↄ̃n zĩ̀zↄkɛɛonↄ ń píngi. ¹⁷ Luda kpɛ́ kyakɛna pì yãnzi aↄ̃ saa ò kↄ̃n zùswareenↄ mɛ̀n basↄↄro kↄ̃n sãkaronↄ mɛ̀n wàa do kↄ̃n sãnɛ bↄ̀rↄnↄ mɛ̀n wàa plaa, ben aↄ̃ saa ò kↄ̃n blèkofĩinↄ mɛ̀n kuri awɛɛplaa Isaraili bori pari lɛ́n aↄ̃ píngi durun agbaakpabↄ ũ.

¹⁸ Aↄ̃ sa’orinↄ dìɛdiɛ gãli kↄ̃n gãlio, ben aↄ̃ Levinↄ dìɛdiɛ gãli kↄ̃n gãlio dↄ lɛ aↄ̃ zĩi kɛ Ludanɛ Yerusalɛmu lán à kú Musa takada guu nà. ¹⁹ Mↄ káaku gurↄ kuri awɛɛsiigↄ̃dee zĩ, zĩ̀zↄ kɛ̀ aↄ̃ sù pìnↄ Banla zĩbaa kɛ̀. ²⁰ Sa’orinↄ kↄ̃n Levinↄ gbãsĩ bↄ̀ ń zĩndan aↄ̃ gↄ̃̀ gbãsĩ sai ń píngi, ben aↄ̃ Banla sã kòto kpàkpa zĩ̀zↄ kɛ̀ aↄ̃ sùnↄnɛ kↄ̃n ń sa’ori daanↄ pↄ́o kↄ̃n ń zĩnda pↄ́o. ²¹ Isaraili zĩ̀zↄ kɛ̀ aↄ̃ sù pìnↄ bé wà sò kↄ̃n gbɛ̃ kɛ̀ aↄ̃ ń zĩnda kɛ̃̀ bori pãndenↄ yãbɛ̃ɛkɛnanↄa aↄ̃ↄe Dii Isarailinↄ Luda kii wɛtɛɛnↄ. ²² Ben aↄ̃ Burɛdi Sɛ́sɛ’ɛ̃zɛ̃sai zĩbaa kɛ̀ kↄ̃n pↄnnaao ai gurↄ swɛɛplaa. Dii tò aↄ̃ pↄↄ kɛ̀ nna, zaakɛ à tò Asirianↄ kína nↄ̀sɛ lìɛ ń yã musu, ben à dↄ̀ńlɛ à kpɛ́ bona zĩi guu, Isarailinↄ Luda pì.

Ɛzɛra su à Yerusalɛmu sorukɛna

¹ Yã beeenↄ gbɛra Pɛsianↄ kí Atasɛsɛ kíblegurↄↄa Ɛzɛra bↄ̀ Babilↄnu à sù. Sa’oriki ìsi Aruna bé à Ɛlɛaza ì, Ɛlɛaza Finɛasi ì, Finɛasi Abisua ì, Abisua Buki ì, Buki Uzi ì, Uzi Zeraya ì, Zeraya Mɛrayo ì, Mɛrayo Azaria ì, Azaria Amaria ì, Amaria Aitubu ì, Aitubu Zadↄki ì, Zadↄki Salumu ì, Salumu Ilikia ì, Ilikia Azaria ì, Azaria Seraya ì, ben Seraya Ɛzɛra pì ì. ⁶ Ɛzɛra nɛ́ yãdannɛrimɛ, à Musa doka kɛ̀ Dii Isarailinↄ Ludaa dìɛ dↄ̃ sãnsãn. Lán Dii à Luda ↄↄ kúa nà, kína pↄ́ kɛ̀ à wɛ́ɛ kɛ̀a kpàa píngi. ⁷ Kí Atasɛsɛ kíblena wɛ̃̀ swɛɛplaadee guu Isaraili kenↄ sù Yerusalɛmu dↄ. Sa’orinↄↄ kú ń tɛ́ kↄ̃n Levinↄ kↄ̃n lɛ̀sirinↄ kↄ̃n zɛ́dãkparinↄ kↄ̃n Luda ua zĩkɛrinↄ. ⁸ Ɛzɛra kà Yerusalɛmu kína kíblena wɛ̃̀ swɛɛplaade mↄ sↄↄrodee guu. ⁹ À fɛ̀ɛ Babilↄnu mↄ káaku gurↄ káaku zĩ, ben à kà Yerusalɛmu mↄ sↄↄro gurↄ káaku zĩ. À Luda ↄↄ kúa, ¹⁰ zaakɛ Ɛzɛra mɛ̀ kpà Dii doka wàaripanaa kↄ̃n à kɛnao, lɛ à e à à yãdiɛnanↄ kↄ̃n à dokayãnↄ dada Isarailinↄnɛ.

Takada kɛ̀ kí Atasɛsɛ kpà Ɛzɛraa

¹¹ Takada kɛ̀ kí Atasɛsɛ kpà sa’ori Ɛzɛraa yãn yɛ̀, kɛ̀ è Dii yãdiɛnanↄ kↄ̃n à dokayãnↄ da Isarailinↄnɛ. ¹² Atasɛsɛ, kínanↄ kí bé à takada kɛ̀kii kɛ̃̀ Luda Musude dokadannɛri sa’ori Ɛzɛranɛ. Ma ì kpàmma. ¹³ Ma yã dìɛ, ma bè Isaraili ke sa’ori ke Levi kɛ̀ kú ma bùsun kɛ̀ yezi à gányo Yerusalɛmu gá. ¹⁴ Mapi kↄ̃n ma ìba gↄ̃ↄn swɛɛplaaanↄ bé wa n gbarɛ, lɛ ǹ gá Yerusalɛmu kↄ̃n Yudanↄ bùsuo píngi yã gwagwa n Luda doka kɛ̀ ń kũna musu. ¹⁵ Ǹ kondogi kↄ̃n vura kɛ̀ mapi kↄ̃n ma ìbanↄ wa Isarailinↄ Luda kɛ̀ à bɛɛ kú Yerusalɛmu gbà sɛ́ɛ ǹ gáo ¹⁶ kↄ̃n kondogio kↄ̃n vura kɛ̀ ń è Babilↄnu bùsun-o píngi kↄ̃n pↄ́ kɛ̀ gbɛ̃nↄ kↄ̃n sa’orinↄↄ kpà ń Luda kpɛ́ pↄ́ ũ Yerusalɛmuo. ¹⁷ Ǹ zùswareenↄ kↄ̃n sãkaronↄ kↄ̃n sãnɛ bↄ̀rↄnↄ lúlu kↄ̃n ↄↄ pìo n làakaria ǹ saa kɛ̀ oo n Luda kpɛ́ gbãgbãkiia zaa Yerusalɛmu kↄ̃n flawa gbaao kↄ̃n pↄ́mina gbaao. ¹⁸ Mpi kↄ̃n n gbɛ̃nↄ à kɛ kↄ̃n kondogio kↄ̃n vura kɛ̀ gↄ̃̀o lán à kɛ̀are maa nà, lán a Ludaa yezi nà. ¹⁹ Ǹ pↄ́ kɛ̀ wà nànnɛ n ↄzĩ n Luda kpɛ́ dↄnzikɛbↄ ũunↄ kpá Luda kɛ̀ kú Yerusalɛmu pìa. ²⁰ Tó ń ye Luda kpɛ́ pↄ́ kpaaanↄzi, tó à kɛkɛna gↄ̃̀ n yã ũmɛ, ǹ sɛ́ ma làasin gwe. ²¹ Ma kí Atasɛsɛ, ma yã dìɛ Yuflati baa kãa kpa ↄↄ’utɛrinↄnɛ ń píngi. À wɛ́ɛkɛɛ kɛ̀ Luda Musude dokadannɛri sa’ori Ɛzɛra kɛ̀awa kpáa gↄ̃ↄ píngi. ²² Kondogi tón dɛ tↄn aagↄ̃ↄlaro. Pↄ́wɛɛ tón dɛ tↄn baaakurilaro. Geepiwɛ̃ kↄ̃n nↄ́sio tón dɛ lita wàa basↄsↄↄrolaro. Wisi sↄ̃, lán à yezi nà lɛ́n. ²³ Lán Luda Musudee dìɛ píngi nà, à kpá gↄ̃ↄ à kpɛ́ pↄ́ ũ, lɛ àton pɛ̃tɛ̃ kɛ kↄ̃n ma kíkɛɛo ke kↄ̃n ma nɛ́nↄoro. ²⁴ Àgↄ̃ dↄ̃ sↄ̃ kɛ̀ á zɛ́ vĩ à tángba ke yàra’ↄↄ ke bɛ’ↄↄ sí Luda ua pì zĩkɛrinↄaro ke sa’orinↄ ke Levinↄ ke lɛ̀sirinↄ ke zɛ́dãkparinↄ ke zĩkɛri pãndenↄ.

²⁵ Mpi sↄ̃ Ɛzɛra, ǹ yãkpaɛkɛrinↄ kↄ̃n yãgↄ̃gↄ̃rinↄ diɛdiɛ ↄ̃ndↄ̃ↄ kɛ̀ n Ludaa kpàmma lɛ́n, lɛ aↄ̃gae yã kɛkɛ a zɛ́a gbɛ̃ kɛ̀ aↄ̃ↄ kú Yuflati baa kãa kpaanↄnɛ ń píngi. Aↄ̃égↄ̃ dɛ gbɛ̃ kɛ̀ aↄ̃ↄ n Luda doka dↄ̃ↄnↄ ũ. Gbɛ̃ kɛ̀ aↄ̃ↄ dↄ̃roonↄ sↄ̃, ǹ dadańnɛ. ²⁶ Gbɛ̃ kɛ̀ n Luda doka kↄ̃n bùsu dokao kũna ↄplaplaaro, weé yã daàla, à dɛna ke à bↄna bùsun ke à auziki sinaa ke à dana kpɛ́siaann yoo.

²⁷ Ben Ɛzɛra bè: Wà Dii wa dezinↄ Luda sáabu kpá! À laasuu maaa dà kínanɛ a swɛ̃̀n, ben kína pì gbãaa kpà à kpɛ́ kɛ̀ kú Yerusalɛmua lɛ. ²⁸ À tò ma yã kà kína kↄ̃n a ìbanↄn kↄ̃n à kí gbãade daanↄ ń píngi. Lán Dii ma Luda ↄↄ kúma nà, ma kù kɛ̀ gbãa, ben ma Isaraili dↄn’aɛdeenↄ kàkↄ̃a aↄ̃ gámao.