BƆNA

Musa takada plaadee

Musa kuuna Igipiti 1:1-11:10

Luda bↄna kↄ̃n Isarailinↄ Igipiti 12:1-15:21

Isarailinↄ likↄ̃azↄ̃na gbáan 15:22-18:27

Luda bà kuuna kↄ̃n Isarailinↄ 19:1-20:26, 23:1-24:18

Bisakuta yã 31:1-18

Isarailinↄ Luda bà kuunańyo yã gborona 32:1-34:35

Bisakutadↄna 40:1-38

Wɛ́ɛtãna Isarailinↄa Igipiti

¹ Isaraili nɛ́ kɛ̀ aↄ̃ tà Igipiti kↄ̃n ń de Yakubuo, baade kↄ̃n a bɛ gbɛ̃nↄ tↄ́n yɛ̀: ² Rubɛni, Simɛↄ, Levi, Yuda, ³ Isaka, Zɛbuluni, Bɛyãmi, ⁴ Dani, Nafatali, Gada kↄ̃n Asao. ⁵ Yakubu borii pìnↄ ń píngi gↄ̃ↄn baaagↄ̃ akurimɛ. Yusufu sↄ̃ gĩakɛ à kú Igipiti kↄ̀. ⁶ Ben Yusufu gà kↄ̃n a vĩ̀inↄ kↄ̃n gbɛ̃ kɛ̀ aↄ̃ↄ kuu a gurↄↄanↄ ń píngi. ⁷ Isarailinↄ nɛ́ ì wà kↄ̃̀, aↄ̃ kàara wà pari kũ̀ maamaa, aↄ̃ dà bùsu pìla píngi.

⁸ Kína dufu kɛ̀ Yusufu dↄ̃roo kpata blè Igipiti, ⁹ ben à bè a gbɛ̃nↄnɛ: À Isarailinↄ gwa, aↄ̃ pari kũ̀ wà dàwala. ¹⁰ Wà gá wà ↄ̃ndↄ̃ↄ daɛńzi lɛ aↄ̃ton kaararo yãnzi. Tó zĩ̀ fɛ̀ɛ, aↄ̃é na wa ibɛɛnↄa aↄ̃ zĩ̀ káwao aↄ̃é bↄɛ wa bùsun.

¹¹ Ben wà gbɛ̃nↄ dìɛńnɛ ń diinↄ ũ aↄ̃ wɛ́ɛ tãḿma kↄ̃n zĩ gbãaa kɛnao. Lɛn aↄ̃ Pitomu kↄ̃n Ramɛsɛo kàɛ Fili’aunanɛ a pↄ́blekaɛkiinↄ ũ lɛ. ¹² Mↄde dian wèe ĩa daaḿma nà, lɛn aↄ̃ègↄ̃ kaara lɛ aↄ̃ↄe daagula, ben swɛ̃̀ kɛ̃̀ Igipitinↄn ń yã musu. ¹³ Ben wà ń dá zↄ̀zĩ pãsĩn ¹⁴ wà ń nↄ̀sɛ yàka wà gũ̀ zĩ gbãaa dàńnɛ kↄ̃n kúnkubↄnanↄ kↄ̃n bura zĩ píngio. Wà zĩi pìnↄ dàńnɛ píngi pãsĩpãsĩ.

¹⁵ Ben Igipiti kína Eberu nɛ́sɛɛrinↄ sìsi, à doo tↄ́n Sifira, à doo sↄ̃ tↄ́n Pua. ¹⁶ À bèńnɛ: Tó é nɛ́ i Eberu nↄgbɛ̃nↄnɛ sa, tó gↄ̃gbɛ̃mɛ, à à dɛ. Tó nↄgbɛ̃mɛ sↄ̃, à à tó. ¹⁷ Nↄgbɛ̃ pìnↄↄ Luda vĩa vĩ, aↄ̃ↄe yã kɛ̀ à òńnɛ kɛro, aↄ̃ↄe nɛ́gↄ̃gbɛ̃nↄ too. ¹⁸ Ben kína pì ń sísi à ń lá à bè: À kɛ̀ dia á kɛ̀ lɛ a nɛ́gↄ̃gbɛ̃nↄ tò? ¹⁹ Aↄ̃ wèàla wà bè: Eberu nↄgbɛ̃nↄↄ dɛ lán Igipiti nↄgbɛ̃nↄ bàro, aↄ̃ↄ wãa, ai wàgↄ̃ gá ká, aↄ̃è nɛ́ i. ²⁰ Lɛn Isarailinↄↄ e kaara lɛ aↄ̃ↄe pari kũu. Ben Luda yã maaa kɛ̀ nɛ́sɛɛri pìnↄnɛ ²¹ à ń gbá nɛ́nↄ, kɛ̀ aↄ̃ↄ à vĩa vĩ yãnzi. ²² Ben Fili’auna yã dìɛ a gbɛ̃nↄnɛ ń píngi à bè: À Eberu nɛ́gↄ̃gbɛ̃ kɛ̀ wà ń ínↄ ká Nili ín ń píngi, mↄde à nɛ́nↄgbɛ̃nↄ tó.

Musa ina

¹ Levi bori gↄ̃gbɛ̃ Levi bori nↄgbɛ̃ sɛ̀. ² Nↄↄ pì nↄ̀ sì à nɛ́ ì gↄ̃gbɛ̃ ũ. Kɛ̀ à è nɛ́ pì maa, ben à à ùtɛ mↄ aagↄ̃. ³ Kɛ̀ èe fↄ̃ à à ùtɛ dↄro, à kɛbu gbíi sɛ̀ à kↄntaa lɛ̀a lɛ í tón gɛ̃ à guuro. Ben à nɛ́ pì dàn à gàa à dìɛ Nili í lɛ́a waa guu. ⁴ Nɛ́ pì dãree zɛ kãaa èe gwaa yã kɛ̀ eé à le.

⁵ Ben Fili’auna nɛ́nↄgbɛ̃ gàa zú o swaa pìzi, à gbɛ̃nↄↄ e lili oo swaa pì lɛ́a. À gbíi è diɛna waan, ben à a zↄ̀nↄkpare zĩ̀ à gàa à à sɛ̀. ⁶ Kɛ̀ à wɛ̃̀, à nɛ́ è dan, èe ↄ́ↄ dↄↄ. À kɛ̀nɛ wɛ̃nda à bè: Eberu nɛ́gↄ̃gbɛ̃mɛ. ⁷ Ben nɛ́ pì dãre mↄ̀ à bè Fili’auna nɛ́ pìnɛ: Ń yezi mà gá mà Eberu nↄgbɛ̃ sísinnɛ àgↄ̃ yↄ̃ kpaannɛ nɛ́ pìan yↄ́? ⁸ À wèàla à bè: Ee, ǹ gá! Ben nɛ́nↄgbɛ̃ pì gàa à nɛ́ pì da sìsi. ⁹ Fili’auna nɛ́nↄgbɛ̃ pì bènɛ: Ǹ nɛ́ pì sɛ́ ǹ táo ǹgↄ̃ à gwaamɛ, mɛ́gↄ̃ fĩa boonnɛ. Ben à nɛ́ pì sɛ̀ à tào, èe à gwaa. ¹⁰ Kɛ̀ nɛ́ pì bíta kũ̀, à à sɛ̀ à gàao Fili’auna nɛ́nↄgbɛ̃ pìnɛ, ben à à sì a nɛ́ ũ. À tↄ́ kpànɛ Musa, zaakɛ à bè, a à bↄ̀ í guumɛ.

Musa bàa lɛ́ à tana Midiã bùsun

¹¹ Zĩkea kɛ̀ Musa kɛ̀ bíta, à gàa a bori Eberunↄ gwa, ben à zĩ gbãaa kɛ̀ aↄ̃ↄe kɛɛ è. À è Igipiti gbɛ̃ e a bori daa gbɛ̃ɛ. ¹² Kɛ̀ à guu gwàgwa, èe gbɛ̃ke ero, ben à Igipiti gbɛ̃ pì dɛ̀ à à ùtɛ bùsu’ãatɛ̃n.

¹³ Kɛ̀ guu dↄ̀, à bↄ̀ à Eberunↄ è gↄ̃ↄn plaa, aↄ̃ↄe swèe kɛɛ. Ben à gbɛ̃ kɛ̀ à yã nnaroo là à bè: Bↄ́yãnzi nɛ́ɛ n gbɛ̃ndoo gbɛ̃ɛzi? ¹⁴ À wèàla à bè: Dé bé à n diɛ kí yãgↄ̃gↄ̃ri ũwee? Ń yezi ǹ ma dɛ lán n Igipiti gbɛ̃ dɛ̀ nàn yↄ́? Ben vĩa Musa kũ̀ à bè: Wà yã kɛ̀ má kɛ̀ dↄ̃̀ fá!

¹⁵ Kɛ̀ Fili’auna yã pì mà, èe wɛtɛɛ à Musa dɛ, ben à bàa lɛ̀nɛ à tà Midiã bùsun, ben à vɛ̃̀ɛ lↄ̀gↄ saɛ gwe. ¹⁶ Midiã sa’ori nɛ́nↄgbɛ̃nↄ vĩ gↄ̃ↄn swɛɛplaa, ben aↄ̃ mↄ̀ wà í tↄ̀, aↄ̃ↄ kà pↄ́kãdeenↄ gbãngo ímikiin ń de pↄ́kãdeenↄnɛ. ¹⁷ Kɛ̀ sãdãri kenↄ mↄ̀ aↄ̃ↄe pɛɛḿma, ben Musa fɛ̀ɛ à yã sìńyo, ben à í kpàńnɛ ń pↄ́kãdeenↄa. ¹⁸ Kɛ̀ aↄ̃ tà ń de Ruɛli kiia, à ń lá à bè: À kɛ̀ dia a su idɛ lɛ gbã̀a? ¹⁹ Aↄ̃ wèàla wà bè: Igipiti gↄ̃gbɛ̃ ke bé à wa si sãdãrinↄa. Àmbe se à í tↄ̀ à kpàwe wa pↄ́kãdeenↄa. ²⁰ Ben à ń lá à bè: Adee pì kú mámɛ? Bↄ́yãnzi a gↄ̃gbɛ̃ pì tò gwezi? À à sísi à mↄ́ à pↄ́ blewao. ²¹ Musa mↄ̀, ben à wè à vɛ̃̀ɛ kↄ̃n gↄ̃gbɛ̃ pìo, ben gↄ̃gbɛ̃ pì a nɛ́nↄgbɛ̃ Zipora kpàa nↄↄ ũ. ²² Ben Zipora nɛ́ ì gↄ̃gbɛ̃ ũ, ben Musa tↄ́ kpànɛ Gɛsↄmu, à bè: Gbɛ̃ zĩ̀tↄn ma ũ gbɛ̃ pãndenↄ bùsun kɛ̀.

²³ Kɛ̀ à gì kɛ̀, ben Igipiti kína gà. Isarailinↄↄ e mboo zↄ̀zĩi kɛ̀ aↄ̃ↄe kɛɛ yãnzi, aↄ̃ↄe wii lɛɛ, ben aↄ̃ wii pì Luda lè. ²⁴ À ń mbona mà, à bà kɛ̀ kú kↄ̃n Ibraĩo kↄ̃n Isaakuo kↄ̃n Yakubuo e sãnlo. ²⁵ Luda Isarailinↄ gwà, ben aↄ̃ kɛ̀nɛ wɛ̃nda.

Luda Musa sisina

¹ Musa e a anzure Midiã bùsu sa’ori pↄ́kãdeenↄ dãa à vĩ̀ gbáala ai à kà kpiii kɛ̀ wè sísi Orɛbu kiia. ² Ben Dii Malaika bↄ̀ à mↄ̀zi tɛ́vura guu gyanton. Musa gyanto pì gwà à è tɛ́ kúa, mↄde èe tɛ́ kũro. ³ Ben à bè: Mɛ́ gá mà dabuyã pì gwa mà dↄ̃ pↄ́ kɛ̀ tò gyanto pì e tɛ́ kũuro. ⁴ Kɛ̀ Dii è à mↄ̀ gwa, ben à lɛ́ zùzi zaa gyanto pì guu à bè: Musa! Musa! Ben à wèàla à bè: Maɛ kɛ̀! ⁵ Luda bènɛ: Ǹton sↄ̃ziro. Ǹ n kyatee bↄbↄ, zaakɛ guu kɛ̀ ń zɛn kú adonamɛ. ⁶ Ben à bè: Mámbe n dezinↄ Ibraĩ kↄ̃n Isaakuo kↄ̃n Yakubuo Luda ũ. Ben Musa pↄ́ kù a wɛ́ɛa, kɛ̀ à Luda gwana vĩa vĩ yãnzi. ⁷ Ben Dii bè: Ma yã’ↄ̃amma kɛ̀ ma gbɛ̃nↄↄ kúo Igipiti è, ma wiii kɛ̀ aↄ̃ wɛ́ɛtãmmarinↄↄ tò aↄ̃ↄe lɛɛ mà. Má wahaa kɛ̀ aↄ̃ↄ kúo dↄ̃. ⁸ Ma pita mà ń sí Igipitinↄa mà ń bↄɛ bùsu pìn mà gáńyo bùsu maa yàasan, guu kɛ̀ zwi kↄ̃n zↄ́’io din, bùsu kɛ̀ Kanaanↄↄ kún kↄ̃n Itinↄ kↄ̃n Amↄrinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo. ⁹ Isarailinↄ wiilɛna kà ma kiia tia sa, ma ĩaa kɛ̀ Igipitinↄↄ e daaḿma è. ¹⁰ Ǹ gá tia sa, ma n zĩ Fili’aunaamɛ lɛ ǹ ma gbɛ̃ Isarailinↄ bↄɛ Igipiti. ¹¹ Ben Musa bè Ludanɛ: Dén ma ũ kɛ̀ mɛ́ gá Fili’auna kiia mà Isarailinↄ bↄɛ Igipiti? ¹² Luda bènɛ: Mɛ́gↄ̃ kúnyo. Zĩna kɛ̀ ma n zĩi sèedan yɛ̀. Tó n ń bↄ́ɛ Igipiti, é dↄnzi kɛmɛ kpiii kɛ̀ kiia.

¹³ Ben Musa bè Ludanɛ: Tó ma gaa má ò Isarailinↄnɛ ma bè, aↄ̃ dezinↄ Luda bé à ma zĩḿma, tó aↄ̃ ma la n tↄ́zi sↄ̃ nɛ́? Mɛ́ beńnɛ diamɛ? ¹⁴ Luda wèàla à bè: Mámbe gbɛ̃ kɛ̀ má dɛ à ũu ũ. Ǹ ońnɛ kɛ̀ mámbe ma n zĩḿma. ¹⁵ Luda bènɛ dↄ: Ǹ o Isarailinↄnɛ kɛ̀ mamↄma Dii aↄ̃ dezinↄ Ibraĩ kↄ̃n Isaakuo kↄ̃n Yakubuo Luda bé à n zĩḿma. Ma tↄ́n gwe gurↄ píngi. Àgↄ̃ ma sisii lɛ ai a boriia. ¹⁶ Ǹ gá ǹ Isaraili gbɛ̃nsinↄ kakↄ̃a ǹ ońnɛ kɛ̀ mamↄma Dii aↄ̃ dezinↄ Ibraĩ kↄ̃n Isaakuo kↄ̃n Yakubuo Luda bé à bↄ̀ à mↄ̀nzi. Ǹ ońnɛ kɛ̀ mɛ́ɛ ń ee ma yã kɛ̀ wèe kɛɛńnɛ Igipiti è. ¹⁷ Mɛ́ ń bↄɛ Igipiti guu kɛ̀ wèe wɛ́ɛ tãaḿma pìn, mɛ́ gáńyo bùsu kɛ̀ Kanaanↄↄ kún kↄ̃n Itinↄ kↄ̃n Amↄrinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo, guu kɛ̀ zwi kↄ̃n zↄ́’io din. ¹⁸ Aↄ̃é n yã ma. Mpi kↄ̃n Isaraili gbɛ̃nsinↄ à gá à Igipiti kína le à onɛ kɛ̀ mamↄma Dii Eberunↄ Luda ma bↄ ma mↄazi, ma bè à a gba zɛ́ à gá gurↄ aagↄ̃ↄ kɛ gbáan lɛ à saa o mamↄma Dii a Ludaa. ¹⁹ Má dↄ̃ kɛ̀ Igipiti kína é we à gáro, séto ma gã nàa. ²⁰ Mɛ́ ↄ tↄ̃ Igipitinↄa, mɛ́ dabuyãnↄ kɛ mà kpáońzi, eé gbasa à a gbarɛ. ²¹ Mɛ́ tó Igipitinↄ a wɛ́ɛ gwa, lɛ tó ée taa, é tá ↄkoriro. ²² A nↄgbɛ̃ píngi kondogi ke vura nↄmaablebↄnↄ kↄ̃n pↄ́kãsãanↄ gbeka a Igipiti nↄgbɛ̃ daa kↄ̃n ń nↄgbɛ̃ kɛ̀ aↄ̃ↄ kú a bɛɛnↄ, à da a nɛ́gↄ̃gbɛ̃nↄnɛ kↄ̃n a nɛ́nↄgbɛ̃nↄ. Lɛn é Igipitinↄ pↄ́nↄ síḿma lɛ maamaa.

Musa gbana dabuyãkɛna zɛ́

¹ Musa wèàla à bè: Tó aↄ̃ↄe ma náanɛ kɛro, ben aↄ̃ↄe ma yã maro, tó aↄ̃ bè ḿbe n bↄ n mↄmaziro sↄ̃ nɛ́? ² Ben Dii a là à bè: Bↄ́n ń kũna gwee? À wèàla à bè: Gòmɛ. ³ Dii bènɛ: Ǹ gò pì pãɛ tↄↄtɛ. Kɛ̀ à pã̀ɛ, ben à lì mlɛ̃̀ ũ, ben Musa bↄ̀ru kpɛɛ. ⁴ Dii bènɛ: Ǹ ↄ bↄ ǹ kũ à vlãa. Kɛ̀ à kũ̀, ben à ɛ̀ara à lì gò ũ à ↄzĩ. ⁵ Dii bènɛ: Lɛn nɛ́ kɛ lɛ, lɛ aↄ̃ sí kɛ̀ mamↄma Dii aↄ̃ dezinↄ Ibraĩ kↄ̃n Isaakuo kↄ̃n Yakubuo Luda bé à bↄ̀ à mↄ̀nzi.

⁶ Dii ɛ̀ara à bènɛ dↄ: Ǹ n ↄↄ sↄtↄ n utan. Ben à sↄ̀tↄn. Kɛ̀ à bↄ̀, à è a ↄↄ lì kusu ũ, à kɛ̀ púu lán buu bà. ⁷ Dii bènɛ: Ǹ ɛara ǹ n ↄↄ sↄtↄ n utan. À ɛ̀ara à sↄ̀tↄn. Kɛ̀ à bↄ̀, à è à kɛ̀ a gbɛ̀n. ⁸ Dii bènɛ: Tó aↄ̃ↄe n náanɛ kɛ wà sèeda káakupↄ sìro, aↄ̃é à zãa pↄ́ sí. ⁹ Tó aↄ̃ↄe sèeda plaaa pìnↄ sí wà n yã mà sↄ̃ro, ǹ Nili í tↄ́ ǹ kwɛ́ɛ tↄↄtɛ, eé li aru ũ.

¹⁰ Ben Musa bènɛ: N yã nna Dii! Zaa zi yã’ona aagamaoro. Baa zaa gurↄↄ kɛ̀ n yã òmɛ, ma lɛ́ tìisimɛ. ¹¹ Ben Dii bènɛ: Dé bé à lɛ́ dↄ̀ gbɛ̃nteenɛ? Dé bé è à nɛ́nɛ naɛ ke è à swãdo kũu? Dé bé è tó à guu e ke è à vĩ̀a kũu? Mamↄma Dii, mámbeeroo? ¹² Ǹ gá! Mɛ́ n ĩan ká yã’onao, mɛ́ yã kɛ̀ nɛ́ oo dannɛ. ¹³ Ben à bè: N yã nna Dii! N yã nna! Ǹ gbɛ̃ pãnde zĩ. ¹⁴ Ben Dii pↄ fɛ̃̀ Musazi à bè: N vĩ̀i Aruna Levi borii kuuroo? Má dↄ̃ kɛ̀ yã’ona zĩ’ũoro. Èe mↄↄ danlɛ. Tó à wɛ́ɛ sìnlɛ, à pↄↄ é kɛ nna. ¹⁵ Ǹ yã oo ǹ yã kɛ̀ eé oo danɛ. Mapi, mɛ́gↄ̃ à ĩan ká kↄ̃n yã’onao, mɛ́gↄ̃ yã kɛ̀ é kɛɛ daaare. ¹⁶ Eé yã o gbɛ̃nↄnɛ n gɛ̃ɛ ũ, eégↄ̃ dɛ n lɛ́gbɛkpari ũ, nɛ́gↄ̃ dɛnɛ lán Luda bà. ¹⁷ Ǹ gò kɛ̀ sɛ́ ǹgↄ̃ kũna ǹ sèedanↄ kɛo.

Musa ɛarana Igipiti

¹⁸ Musa tà a anzure Yɛtoro kiia à bènɛ: Ǹ ma gba zɛ́ mà tá ma gbɛ̃nↄ kiia Igipiti, mà e tó aↄ̃ↄ kpɛ́ kú wɛ̃̀ndio ai tia. Yɛtoro bènɛ: Ǹ pita aafia. ¹⁹ Àɛ sↄ̃ Dii gĩakɛ à bè Musanɛ Midiã bùsun: Ǹ fɛɛ ǹ tá Igipiti, zaakɛ gbɛ̃ kɛ̀ aↄ̃ↄe n wɛtɛɛ wà n dɛ yãanↄ gàga ń píngi. ²⁰ Ben Musa a naↄ̃ sɛ̀ kↄ̃n a nɛ́gↄ̃gbɛ̃nↄ à ń dí zaakia, à lìara èe taa Igipiti à Luda gò pì kũna. ²¹ Ben Dii bènɛ: Tó n ka Igipiti, ǹ dabuyã kɛ̀ ma à gbãaa kpàmmaanↄ kɛ Fili’auna aɛ píngi. Mↄde mɛ́ à kùgbãa kũ, eé gí gbɛ̃nↄ gbarɛzi. ²² Ǹ onɛ mamↄma Dii ma bè, Isaraili boriin ma daudu ũ, ²³ ben ma bènɛ à ma daudu gbarɛ à gá dↄnzi kɛmɛ. Lán à gì à gbarɛzi nà, mɛ́ à daudu dɛ sa.

²⁴ Zɛ́ guu Musa e ii gukea, ben Dii à lè gwe à yezi à à dɛ. ²⁵ Ben Zipora gbɛ̀ fɛ̃ɛ sɛ̀ à a nɛ́ bã̀ngu kɛ̀o à a gɛfↄↄ nà Musa gbáa à bè: Yãpuramɛ, ń dɛmɛ gↄ̃ arudee ũ. ²⁶ Bã̀ngukɛna beee yãnzin à bènɛ gↄ̃ arudeezi. Ben Dii Musa tò.

²⁷ Dii bè Arunanɛ: Ǹ gá da Musalɛ gbáan. Ben à gàa à à lè Luda kpiii kiia, à lɛ́ pɛ̀ à gasua. ²⁸ Musa yã kɛ̀ Dii a zĩ à oo tↄ̃kɛ̃̀ Arunanɛ kↄ̃n sèeda kɛ̀ à bènɛ à kɛɛnↄ. ²⁹ Ben Musa kↄ̃n Arunao tà Igipiti aↄ̃ Isaraili gbɛ̃nsinↄ kàkↄ̃a. ³⁰ Aruna yã kɛ̀ Dii ò Musanɛ tↄ̃kɛ̃̀ńnɛ ń píngi, ben Musa dabuyã pìnↄ kɛ̀ Isarailinↄ wáa. ³¹ Aↄ̃ yã pì sì. Kɛ̀ aↄ̃ↄ mà Dii bé à mↄ̀ ń gwa à ń yã’ↄ̃amma è, ben aↄ̃ kùɛ wà dↄnzi kɛ̀nɛ.

Musa kↄ̃n Arunao gana Fili’auna aɛzĩ

¹ Beee gbɛra Musa kↄ̃n Arunao gàa wà Fili’auna lè aↄ̃ bènɛ: Yã kɛ̀ Dii Isarailinↄ Ludaa òn yɛ̀. À bè ǹ a gbɛ̃nↄ gbarɛ aↄ̃ gá zĩbaa kɛare gbáan. ² Fili’auna wèńla à bè: Dén Dii ũ kɛ̀ mà à yã ma mà Isarailinↄ gbarɛɛ? Má Dii dↄ̃ro. Mɛ́ Isarailinↄ gbarɛro. ³ Ben aↄ̃ bènɛ: Eberunↄ Luda bé à bↄ̀ à mↄ̀wazi. Ǹ wa gba zɛ́ wà gá wà gurↄ aagↄ̃ↄ kɛ gbáan wà saa o Dii wa Luda pìa, lɛ àton gyãa káwaguro kesↄ̃ zĩ̀. ⁴ Ben Igipiti kína pì bè Musa kↄ̃n Arunaonɛ: À kɛ̀ dia á tò gbɛ̃nↄ làakari e goo ń zĩia? À sↄkpa a zĩia. ⁵ Ben à ɛ̀ara à bè: Kɛ̀ gbɛ̃nↄ pari kũ̀ sa, ben á yezi aↄ̃ kámma bo kↄ̃n ń zĩioↄ́?

⁶ Zĩ beeea Fili’auna yã dìɛ Isaraili wɛ́ɛtãmmarinↄnɛ kↄ̃n ń dↄn’aɛdeenↄ à bè: ⁷ Àton sɛ̃̀buru kpáḿma aↄ̃ kúnku bↄo lán eè kɛ nà yã dↄro. Aↄ̃ gá wà ń pↄ́ kɛ̃ ń zĩnda. ⁸ Mↄde aↄ̃ kúnku bↄ lán aↄ̃è bↄ nà yã lɛ́n. Àton lagońnɛro, zaakɛ mɛadeenↄmɛ. Beee yãnzi aↄ̃ wiii ègↄ̃ dↄ, aↄ̃ↄe bee wà yezi wà gá saa o ń Ludaazi. ⁹ À zĩi kaarańnɛ lɛ aↄ̃ton ĩampakii e aↄ̃ làakari kpá ɛgɛyãnↄa dↄro.

¹⁰ Ben aↄ̃ wɛ́ɛtãmmari pìnↄ kↄ̃n ń dↄn’aɛdeenↄ mↄ̀ aↄ̃ bèńnɛ: Fili’auna bè wàton sɛ̃̀buru kpáawa dↄro. ¹¹ À gá à wɛtɛ a zĩnda guu kɛ̀ é en. Baa kↄ̃n beeeo wé zĩi lagoarero, baa féte. ¹² Ben aↄ̃ fã̀akↄ̃a wà gàa Igipiti gu píngi sɛ̃̀ kɛ̃ sɛ̃̀buru ũ. ¹³ Aↄ̃ wɛ́ɛtãmmari pìnↄ ègↄ̃ nakↄ̃rɛɛḿma lán guu e dↄↄ nà, lɛ aↄ̃ ń zĩ nɛ lán aↄ̃è nɛ nà gurↄↄ kɛ̀ wèe sɛ̃̀buru kpaaḿma. ¹⁴ Wà gbɛ̃na kɛ̀ Isaraili dↄn’aɛdee kɛ̀ aↄ̃ wɛ́ɛtãmmarinↄↄ dìɛnↄnɛ wà bèńnɛ: À kɛ̀ dia ée kúnku bↄ gbã̀a ke gĩa à kà lán wà a lɛ́ dìɛare nà yãroo? ¹⁵ Ben Isaraili dↄn’aɛdeenↄ gàa wà wii lɛ̀ Fili’aunaa wà bè: À kɛ̀ dia nɛ́ɛ kɛɛ wamↄwa n zↄ̀blerinↄnɛ lɛɛ? ¹⁶ Wèe sɛ̃̀buru kpaawa dↄro, ben wèe bee wà kúnku bↄ. Wèe wa gbɛ̃ɛ, mↄde n gbɛ̃nↄ bé wà taari vĩ. ¹⁷ Ben à bè: Mɛadeenↄn a ũ. Lɛn á dɛ lɛ! Beee yãnzi eègↄ̃ bee é gá saa o Diiazi. ¹⁸ À gá zĩi kɛ. Weé sɛ̃̀buru kpáawa dↄro, baa kↄ̃n beeeo é kúnku bↄ lán wà dàare nà lɛ́mmɛ.

¹⁹ Kɛ̀ wà ò Isaraili dↄn’aɛdeenↄnɛ aↄ̃ton gurↄ doo kúnkubↄna lagoro, aↄ̃ↄ dↄ̃̀ kɛ̀ wà yã è sa. ²⁰ Kɛ̀ aↄ̃ bↄ̀ Fili’auna kiia, aↄ̃ dàkↄ̃rɛ kↄ̃n Musao kↄ̃n Arunao, aↄ̃ↄe ń dãa, ²¹ ben aↄ̃ bèńnɛ: Dii a yã gwa à yãkpaɛ kɛao, zaakɛ á tò Fili’auna kↄ̃n a gbɛ̃nↄↄ ye wa kãziro. A wa dɛna gbãaa kpàḿman gwe. ²² Ben Musa lìara à gàa à bè Diinɛ: Dii, bↄ́yãnzi n ĩa dà gbɛ̃ pìnↄa? Beee yãnzin n ma zĩziↄ́? ²³ Zaa gurↄↄ kɛ̀ ma gaa ma yã ò Fili’aunanɛ kↄ̃n n tↄ́o, ben èe ĩa da n gbɛ̃nↄa, ben nɛ́ɛ ń bↄ sↄ̃ro nɛ́!

Dii lɛ́gbɛ̃na Musanɛ Isarailinↄ mìsina yã musu

¹ Ben Dii bènɛ: Nɛ́ yã kɛ̀ mɛ́ kɛ Fili’aunanɛ e tia. Eé ń gbarɛ ma gbãa bíta yãnzi. Eé pɛ́ḿma a bùsun ma gbãa bíta yãnzi. ² Ben Luda ɛ̀ara à yã ò Musanɛ à bè: Mámbe Dii ũ, ³ ma bↄ ma mↄ Ibraĩ kↄ̃n Isaakuo kↄ̃n Yakubuozi Luda Gbãapingide ũ, mↄde aↄ̃ↄe ma dↄ̃ ma tↄ́ Diiaro. ⁴ Ma bà kúńyo, ma bè mɛ́ Kanaa bùsu kɛ̀ aↄ̃ↄ kú à guu gbɛ̃ zĩ̀tↄ ũ kpáḿma. ⁵ Ma Isarailinↄ mbona mà aↄ̃ zↄ̀blena Igipitinↄnɛ yãnzi, ben ma bà kɛ̀ kúńyo pì yã e sãmaguro. ⁶ Beee yãnzi ǹ o Isarailinↄnɛ kɛ̀ mámbe Dii ũ. Mɛ́ a bↄ zĩ gbãaa kɛ̀ Igipitinↄↄ dàaree guu, mɛ́ a bↄ zↄ̀bleen. Mɛ́ yãkpaɛ kɛńyo mà a bↄ kↄ̃n ma gã̀sã gbãaao. ⁷ Mɛ́ a sɛ́ ma gbɛ̃nↄ ũ, mɛ́gↄ̃ dɛ a Luda ũ, égↄ̃ dↄ̃ kɛ̀ mámbe Dii a Luda kɛ̀ à a bↄ Igipiti zĩ gbãaa guu ũ. ⁸ Mɛ́ gáao bùsu kɛ̀ ma à lɛ́ gbɛ̃̀ Ibraĩnɛ kↄ̃n Isaakuo kↄ̃n Yakubuo guu. Mɛ́ a gba àgↄ̃ vĩ. Mámbe Dii ũ.

⁹ Musa yã pì ò Isarailinↄnɛ, mↄde aↄ̃ↄe à yã maro kɛ̀ zↄ̀zĩ pãsĩ ń mɛ̀ yↄ̀ yãnzi. ¹⁰ Ben Dii ò Musanɛ à bè: ¹¹ Ǹ gá ǹ o Igipiti kí Fili’aunanɛ à Isarailinↄ gbarɛ aↄ̃ bↄɛ a bùsun. ¹² Ben Musa wè Diila à bè: Lán Isarailinↄ è ma yã maro nà, mamↄma kɛ̀ ma lɛ́ tìisi, dian Fili’auna é ma yã ma nà?

Musa kↄ̃n Arunao bori bↄzia

¹³ Dii yã ò Musanɛ kↄ̃n Arunao Isarailinↄ yã musu kↄ̃n Igipiti kínao, à òńnɛ aↄ̃ bↄɛ kↄ̃n Isarailinↄ Igipiti. ¹⁴ Aↄ̃ bori uabɛde káakunↄ tↄ́n yɛ̀. Isaraili daudu Rubɛni nɛ́gↄ̃gbɛ̃nↄn yɛ̀: Anↄku, Palu, Ɛzɛrↄnu, Kaami. Rubɛni boriinↄn gwe danɛdanɛ. ¹⁵ Simɛↄ nɛ́gↄ̃gbɛ̃nↄn yɛ̀: Yemuɛli, Yami, Oada, Yakĩ, Zoa kↄ̃n Kanaa nↄgbɛ̃ nɛ́ Soluo. Simɛↄ boriinↄn gwe danɛdanɛ. ¹⁶ Levi nɛ́gↄ̃gbɛ̃nↄ tↄ́n yɛ̀ aↄ̃ boriinↄa: Gɛsↄnu, Koa, Mɛrari. Levi kɛ̀ wɛ̃̀ baswɛɛdo akuri awɛɛswɛɛplaamɛ. ¹⁷ Gɛsↄnu nɛ́gↄ̃gbɛ̃nↄn yɛ̀ aↄ̃ boriinↄa danɛdanɛ: Libini kↄ̃n Simɛio. ¹⁸ Koa nɛ́gↄ̃gbɛ̃nↄ tↄ́n yɛ̀: Amlamu, Iza, Ɛblↄnu, Uziɛli. Koa kɛ̀ wɛ̃̀ baswɛɛdo akuri awɛɛ’aagↄ̃mɛ. ¹⁹ Mɛrari nɛ́gↄ̃gbɛ̃nↄn Mali kↄ̃n Musio ũ. Levi boriinↄn gwe danɛdanɛ.

²⁰ Amlamu a dasɛ̃ Yↄkɛbɛdi sɛ̀ nↄↄ ũ, ben à Aruna kↄ̃n Musao ìo. Amlamu kɛ̀ wɛ̃̀ baswɛɛdo akuri awɛɛswɛɛplaamɛ. ²¹ Iza nɛ́gↄ̃gbɛ̃nↄn Kora kↄ̃n Nɛfɛgio kↄ̃n Zikirio ũ. ²² Uziɛli nɛ́gↄ̃gbɛ̃nↄn Misaili kↄ̃n Ɛlɛzafão kↄ̃n Sitirio ũ. ²³ Aruna Aminadabu nɛ́ Ɛlisɛba, Nasↄ̃ dãre sɛ̀ nↄↄ ũ, ben à Nadabu kↄ̃n Abiuo kↄ̃n Ɛlɛazao kↄ̃n Itamao ìo. ²⁴ Kora nɛ́gↄ̃gbɛ̃nↄn Asi kↄ̃n Ɛlɛkanao kↄ̃n Abiasafao ũ. Kora boriinↄn gwe danɛdanɛ. ²⁵ Aruna nɛ́ Ɛlɛaza Putiɛli nɛ́nↄgbɛ̃nↄ doke sɛ̀ nↄↄ ũ, ben à Finɛasi ìo. Levi bori uabɛde káakunↄn gwe danɛdanɛ.

²⁶ Aruna kↄ̃n Musa kɛ̀ Dii òńnɛ aↄ̃ Isarailinↄ bↄɛ Igipiti gãli kↄ̃n gãlion gwe. ²⁷ Aↄ̃pinↄ bé wà yã ò Igipiti kí Fili’aunanɛ lɛ aↄ̃ Isarailinↄ bↄɛ Igipiti. ²⁸ Kɛ̀ Dii yã ò Musanɛ Igipiti, ²⁹ à bè ambe Dii ũ, yã kɛ̀ ée oonɛn à o Fili’aunanɛ píngi. ³⁰ Ben Musa bènɛ a lɛ́ tìisi, dian Fili’auna é a yã ma nà?

Kisia mɛ̀n kuri zĩna Igipitia

¹ Ben Dii bè Musanɛ: Ǹ gwa! Ma n kɛ lán ma bà Fili’aunanɛ, bensↄ̃ n vĩ̀i Aruna dɛ n lɛ́gbɛkpari ũ. ² Ǹ yã kɛ̀ má ònnɛ píngi o n vĩ̀i Arunanɛ, eé o Fili’aunanɛ à Isarailinↄ gbarɛ aↄ̃ bↄɛ a bùsun. ³ Baa kↄ̃n beeeo mɛ́ à kùgbãa kũ. Mɛ́ sèedanↄ kↄ̃n dabuyãnↄ kɛ Igipiti pari, ⁴ mↄde Fili’auna é a yã maro. Mɛ́ ↄ tↄ̃ Igipitia mà yãkpaɛ kɛńyo pãsĩpãsĩ, mɛ́ bↄ kↄ̃n ma zĩ̀kpɛ Isarailinↄo. ⁵ Tó ma bↄ ma gbãaao Igipitia, mɛ́ Isarailinↄ bↄɛn, Igipitinↄ é dↄ̃ sa kɛ̀ mámbe Dii ũ. ⁶ Ben Musa kↄ̃n Arunao kɛ̀ lán Dii òńnɛ nà. ⁷ Gurↄↄ kɛ̀ aↄ̃ yã ò Fili’aunanɛ, Musa kuu wɛ̃̀ basiigↄ̃, Aruna sↄ̃ wɛ̃̀ basiigↄ̃ awɛɛ’aagↄ̃.

⁸ Ben Dii bè Musanɛ kↄ̃n Arunao: ⁹ Tó Fili’auna dabuyã gbèkamma, ǹ o Arunanɛ à a gò sɛ́ à pãɛ à aɛ, eé li mlɛ̃̀ ũ. ¹⁰ Kɛ̀ Musa kↄ̃n Arunao gàa Fili’auna kiia, aↄ̃ↄ kɛ̀ lán Dii òńnɛ nà. Aruna a gò sɛ̀ à pã̀ɛ Fili’auna kↄ̃n a ìbanↄ aɛ, ben à lì mlɛ̃̀ ũ. ¹¹ Ben Fili’auna Igipiti wɛ́ɛzɛ̃rinↄ kↄ̃n ɛ̃zɛ̃deenↄ sìsi, ben aↄ̃ dabuyã dↄ̃nkↄ̃ pìnↄ kɛ̀ se ń ɛ̃zɛ̃dekɛɛ guu. ¹² Kɛ̀ aↄ̃ baade a gò pã̀ɛ, ben aↄ̃ gò pìnↄ lì mlɛ̃̀nↄ ũ, ben Aruna gò ń pↄ́nↄ mↄ̀mↄ. ¹³ Fili’auna swã gbãa, èe ń yã maro lán Dii ò nà.

Ínↄ lina aru ũ

¹⁴ Dii bè Musanɛ: Fili’auna kù gbãa à gì gbɛ̃nↄ gbarɛzi. ¹⁵ Ǹ gá ǹ à le zia kↄngↄ gurↄↄ kɛ̀ èe gaa swaazi. Ǹgↄ̃ à dãa Nili saɛ gwe. Ǹgↄ̃ n gò kɛ̀ lì mlɛ̃̀ ũu pì kũna. ¹⁶ Ǹ benɛ mamↄma Dii Eberunↄ Luda ma n zĩa, ń ònɛ à ma gbɛ̃nↄ gbarɛ aↄ̃ gá dↄnzi kɛmɛ gbáan, mↄde ai tia à gìmazi. ¹⁷ Mamↄma Dii ma bè, yã kɛ̀ eé tó àgↄ̃ dↄ̃ kɛ̀ mámbe Dii ũun yɛ̀. Tó n Nili í lɛ̀ kↄ̃n gò kɛ̀ ń kũnao, eé li aru ũ. ¹⁸ Kpↄ̀ kɛ̀ aↄ̃ↄ kú í pì guunↄ é gaga, Nili í é gũu sↄ̃, Igipitinↄ é fua wà mi.

¹⁹ Ben Dii ɛ̀ara à bè Musanɛ: Ǹ o Arunanɛ à a gò sɛ́ à dↄ Igipiti ínↄla, aↄ̃ swaanↄ kↄ̃n ń swa’ↄnɛnↄ kↄ̃n ń íbↄkiinↄ kↄ̃n ń íkakiinↄ píngi é gↄ̃ aru ũ. Aru égↄ̃ dagula Igipiti, baa kpɛ̃ɛnↄ kↄ̃n orozã guunↄ.

²⁰ Ben Musa kↄ̃n Arunao kɛ̀ lán Dii òńnɛ nà. Aruna a gò pì sɛ̀, à Nili í lɛ̀o Fili’auna kↄ̃n a ìbanↄ wáa, ben í pì gↄ̃̀ aru ũ píngi. ²¹ Kpↄ̀ kɛ̀ aↄ̃ↄ kú à guunↄ gàga, ben Nili í pì gũu sↄ̃̀, Igipitinↄ fùa wà mi. Aru dagula Igipiti. ²² Igipiti ɛ̃zɛ̃deenↄↄ kɛ̀ lɛ se ń ɛ̃zɛ̃dekɛɛ guu, ben Fili’auna kùgbãa kũ̀, èe ń yã maro lán Dii ò nà. ²³ Fili’auna lìara à tà a bɛ, èe yã pì da sero. ²⁴ Igipitinↄ íbↄkii yↄ̃̀yↄ̃ Nili baa lɛ wà í mi, zaakɛ aↄ̃ↄe fↄ̃ wà swada í mìro. ²⁵ À kuu lɛ ai gurↄ swɛɛplaamɛ Dii Nili lɛna gbɛra.

Blↄ̀nↄ dagulana

¹ Ben Dii bè Musanɛ: Ǹ gá ǹ o Fili’aunanɛ, mamↄma Dii ma bè à ma gbɛ̃nↄ gbarɛ aↄ̃ gá dↄnzi kɛmɛ. ² Tó à gì ń gbarɛzi sↄ̃, mɛ́ tó blↄ̀nↄ da à bùsu gu píngila. ³ Blↄ̀nↄ é Nili pa ai aↄ̃ bikũ baa, aↄ̃é gɛ̃ à ua guu ai à kpɛ́n, aↄ̃é didi à gádoa. Aↄ̃é gɛ̃ à ìbanↄ uanↄ guu kↄ̃n à gbɛ̃nↄ uanↄ. Aↄ̃é ká à kĩinↄ kↄ̃n à gónↄ guu. ⁴ Blↄ̀nↄ é didia kↄ̃n à gbɛ̃nↄ kↄ̃n à ìbanↄ ń píngi.

⁵ Dii ɛ̀ara à bè Musanɛ: Ǹ o Arunanɛ à a gò sɛ́ à dↄ swaanↄla kↄ̃n swa’ↄnɛnↄ kↄ̃n íbↄkiinↄ, blↄ̀nↄ é da Igipiti bùsula. ⁶ Kɛ̀ Aruna a gò dↄ̀ Igipiti ínↄla, ben blↄ̀nↄ bↄ̀ɛ wà dà bùsu pìla. ⁷ Ben ɛ̃zɛ̃dee pìnↄↄ kɛ̀ lɛ se ń ɛ̃zɛ̃dekɛɛ guu, aↄ̃ↄ tò blↄ̀nↄ dà Igipitila.

⁸ Ben Fili’auna Musa kↄ̃n Arunao sìsi à bè: À agbaa kpá Diinɛ à blↄ̀nↄ kɛ̃ma kↄ̃n ma gbɛ̃nↄ, mɛ́ a gbɛ̃nↄ gbarɛ aↄ̃ gá saa oa. ⁹ Ben Musa bè Fili’aunanɛ: Ǹ gurↄↄ diɛmɛ mà agbaa kpánnɛ Diinɛ kↄ̃n n ìbanↄ kↄ̃n n gbɛ̃nↄ, lɛ à blↄ̀nↄ kɛ̃mma kↄ̃n n uanↄ aↄ̃égↄ̃ kú swaazi ado. ¹⁰ Fili’auna bè: Zia. Ben Musa bè: Eé kɛ lán ń ò nà lɛ ǹgↄ̃ dↄ̃ kɛ̀ gbɛ̃kee dɛ lán Dii wa Luda bàro. ¹¹ Blↄ̀nↄ é kɛ̃mma kↄ̃n n uanↄ kↄ̃n n ìbanↄ kↄ̃n n gbɛ̃nↄ aↄ̃égↄ̃ kú swaazi ado.

¹² Kɛ̀ Musa kↄ̃n Arunao gù Fili’auna kiia, Musa wɛ́ɛ kɛ̀ Diia blↄ̀ kɛ̀ aↄ̃ dà Fili’aunalaanↄ yã musu. ¹³ Dii Musa wɛ́ɛkɛɛ sì, ben blↄ̀nↄ gàga kpɛ́nↄ guu kↄ̃n uanↄ kↄ̃n buraanↄ. ¹⁴ Wà ń kákakↄ̃a, ben bùsu gũu sↄ̃̀ píngi. ¹⁵ Kɛ̀ Fili’auna è à kɛ̀ sã̀ↄ, à swã kpɛ́ gbãa, ben à gì Musa kↄ̃n Arunao yã mazi lán Dii ò nà.

Gãi dagulana

¹⁶ Dii bè Musanɛ: Ǹ o Arunanɛ à a gò sɛ́, à tↄↄtɛ lɛ́o, bùsuti é li gãi ũ Igipiti gu píngia. ¹⁷ Ben aↄ̃ↄ kɛ̀ lɛ. Aruna a gò sɛ̀ à tↄↄtɛ lɛ̀o, ben bùsuti lì gãinↄ ũ, aↄ̃ dà gbɛ̃nteenↄla kↄ̃n nↄ̀bↄnↄ. Igipiti bùsuti lì gãinↄ ũ píngi. ¹⁸ Ɛ̃zɛ̃deenↄↄ yↄ̃̀ wà gwà se ń ɛ̃zɛ̃dekɛɛ guu, ben aↄ̃ fùa. Gãinↄ dà gbɛ̃nteenↄla kↄ̃n nↄ̀bↄnↄ. ¹⁹ Ben ɛ̃zɛ̃deenↄ bè Fili’aunanɛ: Luda ↄgbɛmɛ. Mↄde Fili’auna swã kpɛ́ gbãa, à gì ń yã mazi lán Dii ò nà.

Ifĩinↄ dagulana

²⁰ Dii bè Musanɛ: Ǹ fɛɛ kↄngↄ idɛ’idɛ ǹ gá ǹ Fili’auna le gurↄↄ kɛ̀ èe gaa swaazi, ǹ onɛ mamↄma Dii ma bè, à ma gbɛ̃nↄ gbarɛ aↄ̃ gá dↄnzi kɛmɛ. ²¹ Tó à gì ń gbarɛzi, mɛ́ ifĩinↄ daàla kↄ̃n à ìbanↄ kↄ̃n à gbɛ̃nↄ kↄ̃n à kpɛ́nↄ. Igipiti kpɛ́nↄ é pa kↄ̃n ifĩinↄ, baa tↄↄtɛ aↄ̃é daàla. ²² Gurↄ beeea mɛ́ Gosɛ̃ bùsu guu kɛ̀ ma gbɛ̃nↄↄ kún tó ado. Gwen ifĩinↄ é dan gularo, lɛ àgↄ̃ dↄ̃ kɛ̀ mámbe Dii ũ à bùsun. ²³ Mɛ́ ma gbɛ̃nↄ dↄ̃kↄ̃zi kↄ̃n à gbɛ̃nↄ. Zian sèeda pì é kɛ.

²⁴ Ben Dii kɛ̀ lɛ. Ifĩinↄ kà Fili’auna ua guu kↄ̃n à ìbanↄ uanↄ. Igipiti yàka píngi ifĩinↄ yãnzi. ²⁵ Ben Fili’auna Musa kↄ̃n Arunao sìsi à bè: À gá saa o a Ludaa bùsu kɛ̀n. ²⁶ Ben Musa bènɛ: Eé sí kɛ wà kɛ lɛro, zaakɛ pↄ́ kɛ̀ wé saa oo Dii wa Ludaa pì dɛ Igipitinↄnɛ tɛ̃̀ ũmɛ. Tó wa saa ò kↄ̃n pↄ́ kɛ̀ dɛńnɛ tɛ̃̀ ũuo ń wáa, aↄ̃é wa pápa gbɛ̀o wà wa dɛdɛroo? ²⁷ Wé táa o gbáan gurↄ aagↄ̃mɛ, wé gbasa wà saa o Dii wa Ludaa lán à òwe nà. ²⁸ Ben Fili’auna bè: Mɛ́ a gbarɛ à gá saa o Dii a Ludaa gbáan, mↄde àton gá zã̀ro. À agbaa kpanɛmɛ sa. ²⁹ Musa bènɛ: Tó ma ta, mɛ́ agbaa kpánɛ, eé ifĩinↄ kɛ̃mma zia kↄ̃n n ìbanↄ kↄ̃n n gbɛ̃nↄ. Mↄde ǹton mↄnafiki kɛ dↄro. Ǹ tó gbɛ̃nↄ gá saa o Diia. ³⁰ Kɛ̀ Musa bↄ̀ Fili’auna kiia, à agbaa kpànɛ Diinɛ. ³¹ Dii à wɛ́ɛkɛɛ sì, ben ifĩinↄ kɛ̃̀ Fili’aunaa kↄ̃n a ìbanↄ kↄ̃n a gbɛ̃nↄ. Èe gↄ̃ gukearo, baa mɛ̀n do. ³² Mↄde Fili’auna swã kpɛ́ gbãa ai tia, à gì ń gbarɛzi.

Pↄ́kãdeenↄ gagana

¹ Dii bè Musanɛ: Ǹ gá ǹ Fili’auna le ǹ onɛ Dii Eberunↄ Luda bè à ma gbɛ̃nↄ gbarɛ aↄ̃ gá dↄnzi kɛmɛ. ² Tó à gì ń gbarɛzi, tó à kpɛ́ ń kũna ai tia, ³ mɛ́ ↄ tↄ̃ à pↄ́kãdeenↄa bura. Mɛ́ gagyã pãsĩ ká à sↄ̃nↄn kↄ̃n à zaakinↄ kↄ̃n à lakuminↄ kↄ̃n à zùnↄ kↄ̃n à sãanↄ kↄ̃n à blènↄ. ⁴ Mɛ́ Isaraili pↄ́kãdeenↄ dↄ̃kↄ̃zi kↄ̃n Igipitinↄ pↄ́nↄo. Isarailinↄ pↄ́kãdeenↄ ke é garo. ⁵ Mamↄma Dii ma à gurↄↄ dìɛ. Zian mɛ́ beee kɛ bùsu kɛ̀n.

⁶ Kɛ̀ guu dↄ̀, ben Dii kɛ̀ lɛ. Igipitinↄ pↄ́kãdeenↄ gàga píngi, mↄde Isarailinↄ pↄ́kãdeenↄ kee e garo. ⁷ Fili’auna yã kɛ̀ kɛ̀ pì gbèka, à mà Isarailinↄ pↄ́kãdeenↄ kee e garo, mↄde à swã kpɛ́ gbãa, à gì gbɛ̃ pìnↄ gbarɛzi.

Bↄ̀gĩi kana Igipitinↄn

⁸ Dii bè Musanɛ kↄ̃n Arunao: À mↄ̀dakpɛ túbu kↄ ↄkũ doodo, Musa fã Fili’auna aɛ. ⁹ Eé da Igipiti bùsula píngi lán lutɛ̃ bà, eé ká gbɛ̃nteenↄn kↄ̃n nↄ̀bↄnↄ bↄ̀gĩi ũ gu píngia. ¹⁰ Ben aↄ̃ mↄ̀dakpɛ túbu sɛ̀ɛ aↄ̃ gàao Fili’auna kiia. Kɛ̀ Musa túbu pì fã̀ musu, ben à kà gbɛ̃nteenↄn kↄ̃n nↄ̀bↄnↄ bↄ̀gĩi ũ. ¹¹ Ɛ̃zɛ̃deenↄↄ e fↄ̃ wà gàa Musa kiiaro bↄ̀gĩi pìnↄ yãnzi, zaakɛ à dàńla kↄ̃n Igipitinↄ ń píngi. ¹² Ben Dii Fili’auna kù kɛ̀ gbãa lán à ò Musanɛ nà, ben à gì ń yã mazi.

Lougbɛ mana

¹³ Dii bè Musanɛ: Ǹ fɛɛ kↄngↄ idɛ’idɛ ǹ gá ǹ Fili’auna le, ǹ onɛ mamↄma Dii Eberunↄ Luda ma bè à ma gbɛ̃nↄ gbarɛ aↄ̃ gá dↄnzi kɛmɛ. ¹⁴ Tia sa mɛ́ yã pãsĩ píngi daàla kↄ̃n a ìbanↄ kↄ̃n à gbɛ̃nↄ, lɛ àgↄ̃ dↄ̃ kɛ̀ anduna guu píngi gbɛ̃kee dɛ lán ma bàro. ¹⁵ Zaakɛ tó ma ↄ tↄ̃̀ḿma ma gagyãa kàńgu yã, lɛ àpi kↄ̃n a gbɛ̃nↄ yã̀a anduna guu. ¹⁶ Ma à kà kpatan lɛ mà a gbãaa ↄdↄanɛ, wà ma tↄ́ kpá anduna guu píngi. ¹⁷ Lán èe a zĩnda sɛɛ lezĩ dɛ ma gbɛ̃nↄla nà ai tia, èe ń gbarɛro, ¹⁸ zia mↄndaa’i mɛ́ tó lougbɛ pãsĩ ma maamaa, lougbɛ kɛ̀ a taka e ma Igipiti zikiro zaa lán wà à kàɛ nà ai mↄna gbã̀a. ¹⁹ Ǹ onɛ à gbɛ̃nↄ zĩ aↄ̃ à pↄ́kãdeenↄ kↄ̃n pↄ́ kɛ̀ à vĩ buraanↄ sɛ́ɛ wà káka kpɛ́n píngi. Gbɛ̃nteenↄ kↄ̃n pↄ́ kɛ̀ aↄ̃ↄ kú bàazinↄ, tó wèe gɛ̃ńyo kpɛ́nlo, lougbɛ é maḿma aↄ̃é gagamɛ.

²⁰ Fili’auna ìba kenↄ vĩa kɛ̀ Dii yãnɛ, aↄ̃ ń zĩkɛrinↄ kↄ̃n ń pↄ́kãdeenↄ kàka kpɛ́n. ²¹ Mↄde gbɛ̃ kɛ̀ aↄ̃ↄe Dii yã daroonↄ ń zĩkɛrinↄ kↄ̃n ń pↄ́kãdeenↄ tò bàazi. ²² Ben Dii bè Musanɛ: Ǹ ↄ sɛ́ musu, lougbɛ é ma gbɛ̃nteenↄ kↄ̃n pↄ́kãdeenↄ kↄ̃n bura pↄ́nↄa Igipiti bùsu gu píngia. ²³ Kɛ̀ Musa a gò dↄ̀ musu, Dii tò lou e pũtãa èe maa kↄ̃n gbɛ̀o èe pii, ben laa e pɛɛɛ tↄↄtɛa. Dii tò lougbɛ mà Igipitinↄla. ²⁴ Lougbɛ e maa, lou e pii. Lougbɛ pì pãsĩ. Zaa lán Igipiti bùsu kuu nà, lou beee taka e ma zikiro. ²⁵ Lougbɛ pì pↄ́ kɛ̀ kú bàazi Igipiti bùsu guunↄ ásaru kɛ̀ píngi, gbɛ̃nteenↄ kↄ̃n pↄ́kãdeenↄ kↄ̃n bura pↄ́nↄ píngi. À sɛ̃̀tɛ línↄ ɛ̀’ɛ píngi. ²⁶ Gosɛ̃ bùsu guu kɛ̀ Isarailinↄↄ kúnn lougbɛ pì e kánlo ado.

²⁷ Fili’auna Musa kↄ̃n Arunao sìsi à bèńnɛ: Tia sa ma durun kɛ̀. Dii yã bé à nna, mapi kↄ̃n ma gbɛ̃nↄ taarideenↄn wa ũ. ²⁸ À agbaa kpánɛ. Lapatana kↄ̃n lougbɛ kɛ̀kiio mↄ̀ lɛ. Mɛ́ a gbarɛ sa, mɛ́ gíare dↄro. ²⁹ Musa bènɛ: Tó ma bↄ wɛ́tɛ kpɛɛ, mɛ́ ma ↄↄnↄ dↄ Dii kúkiia, lapatana é zɛ, lougbɛ é yãa, lɛ ǹgↄ̃ dↄ̃ kɛ̀ tↄↄtɛ nɛ́ Dii pↄ́mɛ. ³⁰ Mↄde má dↄ̃ kɛ̀ mpi kↄ̃n n ìbanↄ, ée vĩa kɛɛ Dii Ludanɛro ai tia.

³¹ Nagã kↄ̃n gbadoo yàka, zaakɛ nagãa gĩakɛ à pìa, gbado mↄree bↄ̀. ³² Ése kↄ̃n weaao e yakaro kɛ̀ aↄ̃è ma zãa yãnzi. ³³ Musa bↄ̀ Fili’auna kiia à gàa wɛ́tɛ kpɛɛ à a ↄↄnↄ dↄ̀ Dii kúkiia, ben lapatana kↄ̃n lougbɛo zɛ̀, lou e ma dↄro. ³⁴ Kɛ̀ Fili’auna è lou kↄ̃n lougbɛo kↄ̃n lapatanao zɛ̀, ben à kpɛ́ èe durun kɛɛ, à swã kpɛ́ gbãa, àpi kↄ̃n a ìbanↄ. ³⁵ À kù kpɛ́ gbãa à gì Isarailinↄ gbarɛzi lán Ludaa dà Musanɛ à ònɛ nà.

Sutɛ̃nↄ dagulana

¹ Dii bè Musanɛ: Ǹ gá Fili’auna kiia, zaakɛ ma à kùgbãa kũ̀ kↄ̃n à ìbanↄ, lɛ mà a dabuyã kɛ̀kiinↄ kɛ ń tɛ́, ² lɛ ǹ e ǹ o n nɛ́nↄnɛ kↄ̃n n dionↄ lán ma wɛ́ɛ tã̀ Igipitinↄa nà kↄ̃n dabuyã kɛ̀ má kɛ̀ ń tɛ́nↄ, àgↄ̃ dↄ̃ kɛ̀ mámbe Dii ũ. ³ Ben Musa kↄ̃n Arunao gàa wà bè Fili’aunanɛ: Dii Eberunↄ Luda bè nɛ́gↄ̃ kuu mìsiɛnaare sai ai bↄrɛmɛ? Ǹ a gbɛ̃nↄ gbarɛ aↄ̃ gá dↄnzi kɛare. ⁴ Tó n gi ń gbarɛzi, zia eé sutɛ̃nↄ ká n bùsun. ⁵ Aↄ̃é da tↄↄtɛla, weé guu ero. Aↄ̃é lɛ́ɛ pↄ́ kɛ̀ gↄ̃̀nnɛ lougbɛ gbɛraanↄa kↄ̃n línↄ píngi. ⁶ Aↄ̃é pa n kpɛ́nↄ guu kↄ̃n n ìbanↄ pↄ́nↄ kↄ̃n Igipitinↄ pↄ́nↄ píngi. N denↄ kↄ̃n n dezinↄ e à taka e zikiro zaa gurↄↄ kɛ̀ aↄ̃ vɛ̃̀ɛ bùsu kɛ̀n ai mↄna gbã̀a. Ben Musa lìara à bↄ̀ Fili’auna kiia.

⁷ Fili’auna ìbanↄ bènɛ: Gbɛ̃ pìnↄ égↄ̃ mↄ́nzi kpaawazi lɛ ai bↄrɛmɛ? Ǹ gbɛ̃ pìnↄ gbarɛ aↄ̃ gá dↄnzi kɛ Dii ń Ludanɛ. Ń dↄ̃ kɛ̀ Igipiti kàatɛroo? ⁸ Ben wà ɛ̀ara wà sù kↄ̃n Musao kↄ̃n Arunao Fili’auna kiia, à bèńnɛ: À gá dↄnzi kɛ Dii a Ludanɛ. A dénↄ bé wé gáa? ⁹ Musa wèàla à bè: Nɛ́ féte gbɛ̃nsi. Wé gá wa píngimɛ kↄ̃n wa nɛ́gↄ̃gbɛ̃nↄ kↄ̃n wa nɛ́nↄgbɛ̃nↄ kↄ̃n wa sãanↄ kↄ̃n wa blènↄ kↄ̃n wa zùnↄ, zaakɛ Dii zĩbaan wée gaa kɛ. ¹⁰ Ben à bèńnɛ: Tó ma a gbarɛ kↄ̃n a nↄgbɛ̃nↄ kↄ̃n a nɛ́nↄ a píngi, ásarumɛ, Dii a bↄ! À làakari kɛ! Ée wɛtɛɛ à fɛ̃maomɛ. ¹¹ Auo! A gↄ̃gbɛ̃nↄ bé wé gá dↄnzi kɛ Diinɛ, zaakɛ lɛn á gbèka lɛ. Ben wà pɛ̀ḿma Fili’auna aɛzĩ.

¹² Dii bè Musanɛ: Ǹ n ↄↄ dↄ Igipiti bùsula, sutɛ̃nↄ é ká wà sɛ̃̀ kↄ̃n lá kɛ̀ bↄ̀ɛ lougbɛ gbɛraanↄ ble píngi. ¹³ Kɛ̀ Musa a gò dↄ̀ Igipitila, Dii bↄ̀ kↄ̃n ĩao ↄfãntɛ̃bↄɛ kpa, èe paa bùsu pìa fãantɛ̃ kↄ̃n gwãavĩo zɛna sai. Kɛ guu dↄ̀, ↄfãntɛ̃bↄɛ ĩa pì sù kↄ̃n sutɛ̃nↄ. ¹⁴ Ben sutɛ̃ pìnↄ mↄ̀ wà dà Igipiti bùsula píngi. Aↄ̃ↄ pari dɛ à yã pↄ́nↄla, à taka é kɛ ziki dↄro. ¹⁵ Aↄ̃ dà tↄↄtɛla gu píngi, ben tↄↄtɛ sia kũ̀. Aↄ̃ sɛ̃̀ kↄ̃n lánↄ kↄ̃n líbɛɛ kɛ̀ bↄ̀ lougbɛ gbɛraanↄ blè píngi. Sɛ̃̀ kↄ̃n láo kú Igipiti bùsun dↄro.

¹⁶ Gwe gↄ̃ↄ Fili’auna Musa kↄ̃n Arunao sìsi à bè: Ma durun kɛ̀ Dii a Ludanɛ kↄ̃n apinↄ. ¹⁷ À sùu gɛ̃̀n doo kɛ̀kii kɛmɛ kↄ̃n ma durun-o à agbaa kpámɛ Dii a Ludanɛ à gagana kɛ̀kii kɛ̃ma. ¹⁸ Kɛ̀ à bↄ̀ Fili’auna kiia, à agbaa kpà Diinɛ. ¹⁹ Ben Dii bↄ̀ kↄ̃n ĩa gbãaao ↄfãntɛ̃gɛ̃kpɛn kpa, à mↄ̀ à sutɛ̃nↄ sɛ̀ɛ à kà Isia Tɛ̃aan. Baa sutɛ̃ mɛ̀n doo e gↄ̃ Igipiti dↄro. ²⁰ Mↄde Dii Fili’auna kù kɛ̀ gbãa, ben à gì Isarailinↄ gbarɛzi.

Gusia dana Igipitila

²¹ Dii bè Musanɛ: Ǹ ↄ sɛ́ musu, gusiaa kɛ̀ weé fↄ̃ wà ↄ kɛa é da Igipitila. ²² Kɛ̀ Musa a ↄↄ dↄ̀ musu, ben gusia níginigi dà Igipiti gu píngia ai gurↄ aagↄ̃. ²³ Wè kↄ̃ ero, gbɛ̃kee e gu a gbɛ̀nlo ai gurↄ aagↄ̃ↄ pìa. Mↄde gupuraa kú guu kɛ̀ Isarailinↄↄ kún píngi.

²⁴ Ben Fili’auna Musa sìsi à bè: À gá dↄnzi kɛ Diinɛ kↄ̃n a nↄgbɛ̃nↄ kↄ̃n a nɛ́nↄ a píngi, mↄde à a sãanↄ kↄ̃n a blènↄ kↄ̃n a zùnↄ tó. ²⁵ Musa bè: Ǹ tó wàgↄ̃ wa sa’opↄnↄ kↄ̃n sa’opↄ kɛ̀ wè ká tɛ́n à tɛ́ kũnↄ kũna, lɛ wà e wà Dii wa Luda gbãgbão. ²⁶ Séto wà gá kↄ̃n wa pↄ́kãdeenↄ, baa mɛ̀n doo é gↄ̃ro, zaakɛ aↄ̃ tɛ́n wé sa’opↄnↄ bↄn wà Dii wa Luda gbãgbão. Lɛ wà kpɛ́ wà ká gwe, wá dↄ̃ pↄ́ kɛ̀ wé sɛ́ wà saa ooa gĩaro. ²⁷ Dii Fili’auna kùgbãa kũ̀, èe we à ń gbarɛro. ²⁸ Fili’auna bè Musanɛ: Ǹ gu ma aɛ! Ǹton tó wa wɛ́ɛ kɛ siigↄ̃ dↄro. Zĩ kɛ̀ wa wɛ́ɛ sìkↄ̃lɛ, n gamɛ. ²⁹ Ben Musa bè: Lán ń ò nà, nɛ́ wɛ́ɛ simalɛ dↄro.

Igipiti daudunↄ gagana yã

¹ Àɛ sↄ̃ Dii gĩakɛ à bè Musanɛ: Mɛ́ ĩa da Fili’aunaa kↄ̃n Igipiti bùsuo gɛ̃̀n do dↄ, eé gbasa à a gbarɛ. Tó èe a gbarɛɛ, eé pɛ́awamɛ! ² Ǹ o gbɛ̃nↄnɛ aↄ̃ baade gↄ̃gbɛ̃ kↄ̃n nↄgbɛ̃o kondogi pↄ́nↄ kↄ̃n vura pↄ́nↄ gbeka a Igipiti gbɛ̃daaaa. ³ Mɛ́ tó Isarailinↄ kɛ Igipitinↄo nna. Musa sↄ̃ ègↄ̃ bɛ̀ɛ vĩ Igipiti guu Fili’auna ìbanↄnɛ kↄ̃n a gbɛ̃nↄ.

⁴ Ben Musa bè Fili’aunanɛ: Dii bè gwãavĩ lezãndo é ba Igipiti bùsula, ⁵ Igipiti daudunↄ é gaga ń píngi sɛna zaa Fili’auna kɛ̀ vɛ̃ɛna kpatan nɛ́a ai à gàa pɛ́ nↄgbɛ̃ zĩkɛri kɛ̀ aↄ̃è wísi lↄ́nↄ nɛ́a kↄ̃n pↄ́kãde nɛ́kya káakunↄ ń píngi. ⁶ Weé sósobi ↄ́ gbãaa dↄ Igipiti gu píngia, à taka e kɛ yãro, eé kɛ ziki dↄro. ⁷ Mↄde Isarailinↄ tɛ́ baa gbɛ̃ é gbon kɛ gbɛ̃ntee ke pↄ́kãdeearo, lɛ ǹgↄ̃ dↄ̃ kɛ̀ Dii Igipitinↄ dↄ̃kↄ̃zi kↄ̃n Isarailinↄ. ⁸ N ìba kɛ̀kiinↄ é mↄ́ ma kiia ń píngi aↄ̃é kúɛmɛ, aↄ̃é be mà gá kↄ̃n ma gbɛ̃nↄo ń píngi. Beee gbɛra sa mɛ́ gá. Ben Musa bↄ̀ Fili’auna kiia kↄ̃n pↄfɛ̃ bítao.

⁹ Dii bè Musanɛ yã: Fili’auna é n yã maro, lɛ ma dabuyãkɛnanↄ e à pari kũ Igipiti. ¹⁰ Musa kↄ̃n Arunao dabuyã pìnↄ kɛ̀ Fili’auna aɛ píngi, ben Dii à kùgbãa kũ̀. À gì Isarailinↄ gbarɛzi aↄ̃ bↄ a bùsun.

Banla zĩbaa

¹ Dii yã ò Musanɛ kↄ̃n Arunao Igipiti à bè: ² Mↄↄ kɛ̀kii égↄ̃ dɛare mↄ káaku ũ wɛ̃̀ kↄ̃n wɛ̃̀o. ³ À o Isarailinↄnɛ ń píngi, mↄↄ kɛ̀ki gurↄ kuridee zĩ aↄ̃é sãa bↄbↄ mɛ̀n doodo ualɛ kↄ̃n ualɛo píngi. ⁴ Tó ua gbɛ̃nↄ parii e ká aↄ̃ sã mɛ̀n doo só sↄ̃ro, aↄ̃ kpaatɛ kↄ̃n ua kɛ̀ aↄ̃ↄ kú kↄ̃ saɛo à gbɛ̃nↄ lɛ́n, lɛ a kpaaa tón gↄ̃ro yãnzi. ⁵ À sãkaro ke blèkofĩi nɛ́ bↄ̀rↄ kɛ̀ see vĩroo bↄ. ⁶ Isarailinↄ píngi, baade a pↄ́ gwa ai mↄↄ kɛ̀ki gurↄ gɛ̃ro dosaidee zĩ. Uusiɛn weé dɛ, ⁷ weé à aru ma kpɛ́ kɛ̀ weé à nↄ̀bↄ són kpɛɛlɛ gũ̀nↄa ↄplazi kↄ̃n ↄzɛzio kↄ̃n musuo. ⁸ Gwãavĩ dↄ̃nkↄ̃ pìa weé nↄ̀bↄ pì kpá tɛ́a, weé só kↄ̃n burɛdi sɛ́sɛ’ɛ̃zɛ̃saio kↄ̃n lá kyã̀kyão. ⁹ Àton só búsu ke fùfukɛnaro. À kpá tɛ́a kↄ̃n a mìo kↄ̃n a gbánↄ kↄ̃n a pↄ́guunↄ. ¹⁰ Àton tó guu dↄ à kpaaaaro. Tó à kpaaa gↄ̃̀, à kpáta à tɛ́ kũ. ¹¹ Tó ée soo, à asaa dↄawa à kyatee kpá, a gò gↄ̃ nana a ↄzĩ. À só kpakpaa, zaakɛ Dii Banla sa’opↄmɛ.

¹² Gwãavĩ pìa mɛ́ ba Igipitila mà daudunↄ dɛdɛ bùsu pì gu píngia kↄ̃n pↄ́kãde nɛ́kya káakunↄ ń píngi, mɛ́ wí da Igipiti tãanↄa. Mámbe Dii ũ. ¹³ Aru pì égↄ̃ dɛ sèeda ũ kpɛ́ kɛ̀ á kú à guunↄa. Tó mɛ́ɛ ↄ tↄ̃ↄ Igipitinↄa, tó ma aru pì è, mɛ́ gɛ̃ala, gagana pì é a lero. ¹⁴ À gurↄↄ pì diɛ ma zĩbaa gurↄↄ ũ dↄngu yãnzi, àgↄ̃ zĩbaa pì kɛɛ kɛ̀atokↄ̃nɛpↄ ũ ai a boriia.

Burɛdi Sɛ́sɛ’ɛ̃zɛ̃sai zĩbaa

¹⁵ Gurↄ swɛɛplaaa guu à burɛdi sɛ́sɛ’ɛ̃zɛ̃sai só. À gurↄ káakudee zĩ à burɛdisɛsɛ’ɛ̃zɛ̃ kɛ̀ kú a kpɛ́ guunↄ kwɛ́ɛ, zaakɛ gbɛ̃ kɛ̀ pↄ́sɛsɛna sò gurↄ swɛɛplaaa pì guu, weé a bↄ Isarailinↄ tɛ́ wà à dɛmɛ. ¹⁶ À gurↄ káakudee zĩ kↄ̃n à gurↄ swɛɛplaadeeo à kↄ̃ kakↄ̃a à dↄnzi kɛmɛ. Àton zĩi ke kɛ gurↄↄ mↄ̀nↄaro, sé pↄ́blekɛna baade pínginɛ baasiro, à lɛ́n gwe. ¹⁷ À Burɛdi Sɛ́sɛ’ɛ̃zɛ̃sai zĩbaa kɛ, zaakɛ zĩ beeean ma a bↄɛ Igipiti lán zĩ̀kpɛɛnↄ bà. A boriinↄ gↄ̃ zĩbaa pì kɛɛ kɛ̀atokↄ̃nɛpↄ ũ. ¹⁸ Mↄ káaku gurↄ gɛ̃ro dosaidee zĩ uusiɛ, àgↄ̃ burɛdi sɛ́sɛ’ɛ̃zɛ̃sai soo ai à gurↄ baro awɛɛdodee zĩ uusiɛ. ¹⁹ Gurↄ swɛɛplaaa guu burɛdisɛsɛ’ɛ̃zɛ̃ tón gↄ̃ kú a bɛro, zaakɛ gbɛ̃ kɛ̀ pↄ́sɛsɛna sò, gbɛ̃ zĩ̀tↄn yoo, bɛdeen yoo, weé à bↄ Isarailinↄ tɛ́ wà à dɛmɛ. ²⁰ Àton pↄ́sɛsɛna só gurↄ pìaro. Guu kɛ̀ á kún píngi, àgae burɛdi sɛ́sɛ’ɛ̃zɛ̃sai só.

Banla zĩbaa káaku

²¹ Musa Isaraili gbɛ̃nsinↄ sìsi ń píngi à bèńnɛ: À gá à a ua sã kũ à dɛ Banla zĩbaakɛpↄ ũ. ²² À sɛ̃̀sↄ̃vlãa sɛ́ à zↄ̃ aru kɛ̀ kú taa guua à máma a kpɛɛlɛ gũ̀a, ↄplazi kↄ̃n ↄzɛzio kↄ̃n à musuo. A gbɛ̃ke tón bↄ bàaziro ai guu dↄ. ²³ Tó Dii e baa bùsula èe Igipitinↄ dɛdɛɛ, tó à aru è kpɛɛlɛ gũ̀nↄa, eé gɛ̃àlamɛ. Eé tó gbɛ̃dɛdɛri gɛ̃azi à a dɛdɛro. ²⁴ Apinↄ kↄ̃n a boriinↄ àgↄ̃ yã pì kũna kɛatokↄ̃nɛpↄ ũ ai a boriia. ²⁵ Tó a gɛ̃ bùsu kɛ̀ Dii é a gbaan lán à à lɛ́ gbɛ̃̀are nà, àgↄ̃ dↄnziyã pì kũna. ²⁶ Tó a nɛ́nↄ dↄnziyã pì mì gbèkaawa, ²⁷ à ońnɛ kɛ̀ Banla saa kɛ̀ wè o Diiamɛ, zaakɛ kɛ̀ à Igipitinↄ dɛ̀dɛ, à gɛ̃̀ wa Isarailinↄ kpɛ́la, èe wa dɛdɛro. Ben gbɛ̃nↄ kùɛ aↄ̃ dↄnzi kɛ̀ Diinɛ. ²⁸ Kɛ̀ aↄ̃ tà, aↄ̃ↄ kɛ̀ lán Dii ò Musa kↄ̃n Arunaonɛ nà.

Igipiti daudunↄ gagana

²⁹ Gwãavĩ lezãndo Dii Igipiti daudunↄ dɛ̀dɛ ń píngi, naana zaa Fili’auna kɛ̀ vɛ̃ɛna kpatan nɛ́a ai à gàa pɛ́ pisinanↄ nɛ́nↄa kↄ̃n pↄ́kãde nɛ́kya káakunↄ ń píngi. ³⁰ Fili’auna fɛ̀ɛ gwãavĩ kↄ̃n a ìbanↄ kↄ̃n Igipitinↄ ń píngi, ben sósobi ↄ́ dà Igipitila, zaakɛ ua kee kuu gɛ̀ sairo. ³¹ Gwãavĩn Fili’auna Musa kↄ̃n Arunao sìsi à bèńnɛ: À fɛɛ kↄ̃n Isarailinↄ à bↄɛ ma gbɛ̃nↄ tɛ́. À gá dↄnzi kɛ Diinɛ lán á ò nà. ³² À a blènↄ kↄ̃n a sãanↄ kↄ̃n a zùnↄ sɛ́ɛ lán á ò nà. À gá à sa maaa omɛ se.

³³ Igipitinↄ nàkↄ̃rɛ gbɛ̃ pìnↄa aↄ̃ bↄɛńnɛ ń bùsun kpakpaa, zaakɛ aↄ̃ bè: Wé gaga wa píngimɛ. ³⁴ Isarailinↄ ń flawadɛnanↄ kà taanↄ guu a sɛ́sɛ’ɛ̃zɛ̃ sai, aↄ̃ ń utanↄ fĩ̀fĩa aↄ̃ↄ dàda ń gã̀n. ³⁵ Aↄ̃ↄ kɛ̀ lán Musa òńnɛ nà, aↄ̃ kondogi pↄ́nↄ kↄ̃n vura pↄ́nↄ kↄ̃n pↄ́kãsãanↄ gbèka Igipitinↄa. ³⁶ Dii tò aↄ̃ↄ kɛ̀ kↄ̃o nna, ben aↄ̃ↄ kpàḿma. Lɛmɛ aↄ̃ Igipitinↄ pↄ́nↄ sìḿma lɛ.

Isarailinↄ dana zɛ́n

³⁷ Isarailinↄↄ dà zɛ́n kɛ̀sɛ, aↄ̃ bↄ̀ɛ kↄ̃n Ramɛsɛo aↄ̃ tà Suko. Gↄ̃gbɛ̃nↄ gↄ̃ↄn bↄrↄ wàa aagↄ̃mɛ, nɛ́nↄ kↄ̃n nↄgbɛ̃nↄ baasi. ³⁸ Bori zĩ̀tↄnↄ tàńyo pari dↄ. Blènↄ kↄ̃n sãanↄ kↄ̃n zùnↄ parii kɛ̀ bíta. ³⁹ Aↄ̃ burɛdi sɛ́sɛ’ɛ̃zɛ̃sai kɛ̀ kↄ̃n flawadɛna kɛ̀ aↄ̃ bↄ̀o Igipitio. Aↄ̃ↄ kɛ̀ sɛ́sɛ’ɛ̃zɛ̃ sai, zaakɛ wà pɛ̀ḿma Igipiti kãndomɛ. Aↄ̃ↄe e wà pↄ́blee kɛ̀ wà sɛ̀ kũsãɛ ũro.

⁴⁰ Isarailinↄ kuuna Igipiti kɛ̀ wɛ̃̀ wàa plaa kↄ̃n baaakurio. ⁴¹ Wɛ̃̀ wàa plaa kↄ̃n baaakurio pì papana gbɛra, zĩbaa pì zĩn Dii zĩ̀kpɛɛ pìnↄ bↄ̀ɛ Igipiti ń píngi. ⁴² Gwãavĩ pì nɛ́ Dii pↄ́mɛ. Isarailinↄ égↄ̃ a itɛ̃ kɛɛ ai ń boriia, zaakɛ gwãavĩ pìn Dii Isarailinↄ bↄna Igipiti itɛ̃ kɛ̀.

Banla zĩbaa

⁴³ Dii bè Musanɛ kↄ̃n Arunao: Banla yã kɛ̀ má dìɛn yɛ̀. Bori zĩ̀tↄ ke toga à à nↄ̀bↄ sóro, ⁴⁴ mↄde zↄ̀ kɛ̀ á lù, tó à bã̀ngu kɛ̀, eé só. ⁴⁵ Nibↄ ke asaiazĩkɛri toga à sóro. ⁴⁶ À só kpɛ́n, àton bↄ kↄ̃n à nↄ̀bↄ pìo bàaziro. Àton sãa pì wá ke ɛ́ro. ⁴⁷ Isarailinↄ píngi gae zĩbaa pì kɛ. ⁴⁸ Tó gbɛ̃ zĩ̀tↄ kú a tɛ́, tó à yezi à Banla zĩbaa kɛ Diinɛ, à a bɛ gↄ̃gbɛ̃nↄ bã̀ngu kɛ ń píngi à gↄ̃ bɛdee ũ, eé gbasa à kɛ. Gɛfↄↄdee toga à sóro. ⁴⁹ Bɛde kↄ̃n gbɛ̃ zĩ̀tↄ kɛ̀ kúao, doka dↄ̃nkↄ̃ pìmɛ. ⁵⁰ Ben Isarailinↄↄ kɛ̀ lán Dii ò Musa kↄ̃n Arunaonɛ nà ń píngi. ⁵¹ Zĩ beeean Dii Isarailinↄ bↄ̀ɛ Igipiti gãli kↄ̃n gãlio.

Burɛdi Sɛ́sɛ’ɛ̃zɛ̃sai zĩbaa kↄ̃n daudunↄ kpana Ludaao

¹ Dii yã ò Musanɛ à bè: ² Àgae Isaraili daudunↄ kↄ̃n pↄ́kãde nɛ́kya káakunↄ kpáma, zaakɛ ma pↄ́nↄmɛ ń píngi.

³ Musa bè gbɛ̃nↄnɛ: A bↄna Igipiti zↄ̀blenan gurↄↄ kɛ̀ki yã gↄ̃ dↄagu, zaakɛ Dii bé à a bↄɛ Igipiti kↄ̃n a ↄ gbãaao. Àton pↄ́sɛsɛna só gurↄↄ pìaro. ⁴ Ée bↄɛɛ Igipiti gbã̀amɛ mↄ káaku kɛ̀ wè sísi Abibu guu. ⁵ Dii lɛ́ gbɛ̃̀ a dezinↄnɛ à bè é bùsu kɛ̀ zwi kↄ̃n zↄ́’io din, kɛ̀ Kanaanↄ kↄ̃n Itinↄ kↄ̃n Amↄrinↄ kↄ̃n Ivinↄ kↄ̃n Yebusinↄↄ kún kpáawa. Tó à tò a ka, à zĩbaa pì kɛ mↄↄ kɛ̀kiin. ⁶ Àgae burɛdi sɛ́sɛ’ɛ̃zɛ̃sai só ai gurↄ swɛɛplaa. À gurↄ swɛɛplaadee pì zĩ égↄ̃ dɛare Dii zĩbaa gurↄↄ ũ. ⁷ Àgae burɛdi sɛ́sɛ’ɛ̃zɛ̃sai só ai gurↄ swɛɛplaaa pì papa. Pↄ́sɛsɛna ke burɛdi ɛ̃zɛ̃ ke tóngↄ̃ kú ua ke guu a bùsunlo. ⁸ Zĩ pìa àgae o a nɛ́gↄ̃gbɛ̃nↄnɛ ée kɛɛ lɛ yã kɛ̀ Dii kɛ̀are kɛ̀ à a bↄɛ Igipiti yãnzimɛ. ⁹ Zĩbaa pì égↄ̃ dɛare sèeda ũ lán pↄ́ dana ↄↄa bà, ke lán dↄngu pↄ́ yina mì’aɛa bà, lɛ Dii doka gↄ̃ kú a lɛ́n, zaakɛ àmbe à a bↄɛ Igipiti kↄ̃n a ↄ gbãaao. ¹⁰ Àgae dokayã pì kɛ a gurↄↄa wɛ̃̀ kↄ̃n wɛ̃̀o.

¹¹ Tó Dii tò a ka Kanaa bùsun, ben à kpàawa lán à à lɛ́ gbɛ̃̀are nà kↄ̃n a dezinↄ, ¹² àgae a daudunↄ kpáa ń píngi. A pↄ́kãde nɛ́kya káakunↄ ègↄ̃ dɛ à pↄ́ ũ ń píngi. ¹³ Àgae a zaaki nɛ́kya káaku tↄↄba bo kↄ̃n sãnɛo. Tó ée boro, à à waa fĩ. Àgae a daudunↄ tↄↄba bo ń píngi. ¹⁴ Tó a nɛ́gↄ̃gbɛ̃nↄ a la à mìzi zia wà bè, bↄ́ yãn gwee, à beńnɛ kɛ̀ Dii a bↄɛ zↄ̀bleen Igipiti yã kↄ̃n a ↄ gbãaao yãnzimɛ. ¹⁵ Kɛ̀ Fili’auna kùgbãaa kɛ̀ à gì wa gbarɛzi, ben Dii Igipiti daudunↄ dɛ̀dɛ ń píngi kↄ̃n pↄ́kãde nɛ́kya káakunↄ ń píngi. Beee yãnzin weè saa oa kↄ̃n pↄ́kãde nɛ́kya káakunↄzi píngi, weè wa daudunↄ tↄↄba bo. ¹⁶ Kɛ̀kii égↄ̃ dɛ sèeda ũ lán pↄ́ dana wa ↄↄa bà ke pↄ́ yina wa mì’aɛa bà, zaakɛ Dii bé à wa bↄɛ Igipiti kↄ̃n a ↄ gbãaao.

Isarailinↄ bↄna Igipiti

¹⁷ Kɛ̀ Fili’auna Isarailinↄ gbàrɛ, Luda e bↄńyo Filisitininↄ bùsu zɛ́ kparo, baa kↄ̃n à kĩkɛɛo, zaakɛ à bè: Tó wà fɛ̀ɛńzi kↄ̃n zĩ̀o, aↄ̃é ń nↄ̀sɛ liɛ wà liara Igipiti. ¹⁸ Luda pã̀ zɛ́ pìnɛ, ben à gbáa zɛ́ sɛ̀ńyo Isia Tɛ̃aa kpa. Isarailinↄ bↄ̀ɛ Igipiti aↄ̃ ń gↄ̃kɛbↄnↄ kũna.

¹⁹ Musa Yusufu wánↄ sɛ̀ èe taao, zaakɛ Yusufu tò Isarailinↄ lɛ́ gbɛ̃̀are yã à bè, tó Luda mↄ̀ ń bↄ, aↄ̃é a wánↄ sɛ́ɛ wà bↄo gwe.

²⁰ Kɛ̀ aↄ̃ bↄ̀ Suko, aↄ̃ gàa wà bùra kàɛ gbáa lɛ́a zaa Etamu. ²¹ Dii ègↄ̃ dↄↄńnɛ aɛ tɛ́luguu guu fãantɛ̃ lɛ àgↄ̃ zɛ́ ↄdↄↄańnɛ. Gwãavĩ sↄ̃ ègↄ̃ dↄↄńnɛ aɛ tɛ́nɛnɛ guu, lɛ àgↄ̃ guu puuńnɛ aↄ̃gↄ̃ táa oo fãantɛ̃ kↄ̃n gwãavĩo. ²² Tɛ́luguu pì è gu ń aɛ fãantɛ̃ro, tɛ́nɛnɛ pì è gu ń aɛ gwãavĩro.

Igipitinↄ pɛɛna Isarailinↄzi

¹ Dii bè Musanɛ: ² Ǹ o Isarailinↄnɛ aↄ̃ ɛara wà gá bùra káɛ Pi’airo saɛ Migidolu kↄ̃n ísiaao dagura, aɛdↄkↄ̃ana kↄ̃n Baali Zɛfↄ̃o. À bùra káɛ ísiaa saɛ gwe. ³ Fili’auna égↄ̃ daa a sãsã, gbáa a kũmɛ. ⁴ Mɛ́ a kùgbãa kũ, eé pɛɛazi, mɛ́ tↄ́ bↄ Fili’auna kↄ̃n a zĩ̀kpɛɛnↄ yã sàabu, Igipitinↄ égↄ̃ dↄ̃ kɛ̀ mámbe Dii ũ. Ben Isarailinↄↄ kɛ̀ lɛ.

⁵ Kɛ̀ wà ò Igipiti kí Fili’aunanɛ gbɛ̃ pìnↄ bàa lɛ̀, ben àpi kↄ̃n a ìbanↄ nↄ̀sɛ lìɛ Isarailinↄ yã musu wà bè: Bↄ́n wá kɛ̀, ben wá tò aↄ̃ bↄ̀ zↄ̀blenaween? ⁶ Ben Fili’auna góro dↄ̀ a sↄ̃nɛ à a zĩ̀kpɛɛnↄ kàkↄ̃a. ⁷ À sↄ̃goro maaanↄ sɛ̀ mɛ̀n wàa aagↄ̃ kↄ̃n Igipiti sↄ̃goronↄ píngi kↄ̃n zĩ̀kari gbɛ̃nsinↄo ká ń guu. ⁸ Dii Igipiti kí Fili’auna kùgbãa kũ̀, ben à pɛ̀ɛ Isaraili kɛ̀ aↄ̃ↄe bↄɛɛ kↄ̃n kùgbãaaonↄzi. ⁹ Ben Igipitinↄ pɛ̀ɛńzi kↄ̃n Fili’auna sↄ̃nↄ kↄ̃n à sↄ̃goronↄ kↄ̃n à sↄ̃deenↄ kↄ̃n à zĩ̀kpɛɛnↄ ń píngi, ben aↄ̃ↄe mↄↄ ń le ń bùran ísiaa saɛ kĩi kↄ̃n Pi’airoo aɛdↄkↄ̃ana kↄ̃n Baali Zɛfↄ̃o.

¹⁰ Kɛ̀ Fili’auna kà kĩi, Isarailinↄ wɛ́ɛ sɛ̀, ben aↄ̃ Igipitinↄ è tɛ́ ń kpɛɛ. Vĩa ń kũ maamaa, ben aↄ̃ wii pɛ̀ Diizi. ¹¹ Aↄ̃ bè Musanɛ: Miranↄↄ kú Igipitinloo? Bↄ́yãnzi n mↄwao gbáan kɛ̀ wà gagazi? À kɛ̀ dia n bↄwao Igipiti? ¹² Asa wá ònnɛ Igipiti wà bè ǹ wa tó tɛɛɛ wà zↄ̀ ble Igipitinↄnɛ! Zↄ̀blenańnɛ maawe dɛ gagana gbáa kɛ̀nla. ¹³ Musa bèńnɛ: Àton tó vĩa a kũro. À zɛ tɛɛɛ é e lán Dii é a mì sí nà gbã̀a, zaakɛ Igipiti kɛ̀ ée ń ee gbã̀a kɛ̀nↄ, é ń e ziki dↄro. ¹⁴ Dii bé eé zĩ̀ káare. Àgↄ̃ yĩtɛna kítikiti dé!

Isarailinↄ bikũna Isia Tɛ̃aala

¹⁵ Dii Musa là à bè: Bↄ́ wiiin nɛ́ɛ pɛɛmazii? Ǹ o gbɛ̃nↄnɛ aↄ̃ fɛɛ wà bↄ kↄ̃n táo. ¹⁶ Ǹ n gò dↄ ísiaala à zↄ̃kↄ̃rɛ, lɛ Isarailinↄ e wà gɛ̃tɛ à dagura gukoria. ¹⁷ Mapi, mɛ́ Igipitinↄ kùgbãa kũ, aↄ̃é gɛ̃n ń gbɛra, mɛ́ tↄ́ bↄ Fili’auna kↄ̃n a zĩ̀kpɛɛnↄ kↄ̃n a sↄ̃goronↄ kↄ̃n a sↄ̃deenↄ yã sàabu. ¹⁸ Tó ma tↄ́ bↄ̀ Fili’auna kↄ̃n a sↄ̃goronↄ kↄ̃n a sↄ̃deenↄ yã sàabu, Igipitinↄ égↄ̃ dↄ̃ sa kɛ̀ mámbe Dii ũ. ¹⁹ Luda Malaika kɛ̀ dↄ Isarailinↄnɛ aɛ lìara à gàa ń kpɛɛ kpa, ben tɛ́luguu kɛ̀ kú ń aɛ lìara à gàa ń kpɛɛ dↄ ²⁰ aↄ̃pinↄ kↄ̃n Igipitinↄ dagura. Tɛ́luguu pì guu pù Isarailinↄnɛ à gusiaa kpà Igipitinↄnɛ, ben aↄ̃ gbɛ̃kee e e à sↄ̃̀ a daazi gwãavĩ beeearo.

²¹ Kɛ̀ Musa a ↄↄ dↄ̀ ísiaala, ben Dii bↄ̀ kↄ̃n ĩa gbãaao ↄfãntɛ̃bↄɛ kpa. À kàka ai guu gàa dↄ̀o à ísiaa lɛ̀ à kpàatɛkↄ̃rɛ, ben gukori bↄ̀. Kɛ̀ í zↄ̃̀kↄ̃rɛ, ²² ben Isarailinↄ táa ò gukoria aↄ̃ bikũ̀. Í bĩi bò aↄ̃ ↄplaazi kↄ̃n ↄzɛzio. ²³ Ben Igipitinↄ pɛ̀ɛńzi. Fili’auna sↄ̃nↄ kↄ̃n a sↄ̃goronↄ kↄ̃n a sↄ̃deenↄ píngi tɛ́ ń kpɛɛ ísiaa guu. ²⁴ Gudↄnao Dii Igipiti zĩ̀kpɛɛnↄ gwà zaa tɛ́nɛnɛ guu, ben à tò aↄ̃ lìkↄ̃a. ²⁵ À tò aↄ̃ sↄ̃goronↄ vlɛ̃̀ɛ, à tò aↄ̃ táa’ona kɛ̀ zĩ’ũ, ben aↄ̃ bè: Wà bàa lɛ́ Isarailinↄnɛ, zaakɛ Dii e zĩ̀ kaawaońnɛmɛ.

²⁶ Dii bè Musanɛ: Ǹ n ↄↄ dↄ ísiaala, í é da Igipitinↄla kↄ̃n ń sↄ̃goronↄ kↄ̃n ń sↄ̃deenↄ. ²⁷ Ben Musa a ↄↄ dↄ̀ ísiaala, ben í e suu a gbɛ̀n gudↄnao. Lán í e suu nà, ben Igipitinↄ bàa sì aↄ̃ↄ yezi wà bↄɛ. Gwen Dii tò ísiaa dàńlan. ²⁸ Í sù a dà sↄ̃goronↄla kↄ̃n sↄ̃deenↄ kↄ̃n Fili’auna zĩ̀kpɛɛ kɛ̀ aↄ̃ gɛ̃̀ ísiaa guu Isarailinↄ gbɛraanↄ ń píngi. Aↄ̃ kee e bↄro, baa mɛ̀n do. ²⁹ Isarailinↄ sↄ̃ táa ò í dagura gukoriamɛ. Í bĩi bò aↄ̃ ↄplaazi kↄ̃n ↄzɛzio. ³⁰ Zĩ beeean Dii Isarailinↄ sì Igipitinↄa, ben Isarailinↄ Igipiti pìnↄ gɛ̀nↄ è ísiaa baa. ³¹ Kɛ̀ Isarailinↄ Dii gbãa bíta kɛ̀ à mↄ̀ Igipitinↄnɛ è, aↄ̃ vĩa kɛ̀nɛ, ben aↄ̃ à náanɛ kɛ̀ kↄ̃n à zↄ̀bleri Musao.

Isarailinↄ lɛ̀

¹ Ben Musa kↄ̃n Isarailinↄ ń píngi lɛ̀ kɛ̀ sì Diinɛ wà bè:

Mɛ́ lɛ̀ sí Diinɛ, zaakɛ à tↄ́ bↄna,

à sↄ̃deenↄ kↄ̃n ń sↄ̃nↄ kà ísiaan.

² Dii bé ma gbãaa ũ, mɛ́ lɛ́ maa,

àpi bé à ma mì sì.

Àmbe ma Luda ũ, mɛ́ à tↄ́ kpá.

Àmbe ma de Luda ũ, mɛ́ à tↄ́ sɛ́ lezĩ.

³ Dii nɛ́ zĩ̀karimɛ, à tↄ́n Dii.

⁴ À Fili’auna sↄ̃goronↄ kↄ̃n à zĩ̀kpɛɛnↄ kà ísiaan,

à zĩ̀kari gbɛ̃nsinↄ vlɛ̃̀ɛ Isia Tɛ̃aan.

⁵ Í lↄ̀dee pì dàńla,

aↄ̃ kpàɛ gĩzĩ lán gbɛ̀ bà.

⁶ Dii, n ↄplaan gbãaa kún kↄ̃n bítakɛɛo,

Dii, n n ibɛɛnↄ dúgu zↄ̃̀ kↄ̃n n ↄplaao.

⁷ N n zangurinↄ nɛ̀ n gakui bíta guu,

n pↄ fɛ̃̀ n ń náɛ lán sɛ̃̀ bà.

⁸ N pↄ́ bↄ̀ n yĩzĩ, ben í zↄ̃̀kↄ̃rɛ,

à gↄ̃̀ zɛna lán bĩi bà,

ísiaa ì ai a guragura.

⁹ Wa ibɛɛ pìnↄ bè,

aↄ̃é pɛ́ɛwazi aↄ̃ wa lemɛ,

aↄ̃é wa pↄ́nↄ sɛ́ɛ lán aↄ̃ↄ yezi nà,

aↄ̃é ń fɛ̃ɛdaanↄ woto aↄ̃ wa dɛdɛo.

¹⁰ N n lɛ́’ĩa vù, ben ísiaa dàńla,

aↄ̃ kpàɛ lán beoma bà í bíta pìn.

¹¹ Dii, tãanↄ tɛ́ à kparee bé à dɛ lán n bà?

Dén weé lɛ́kↄ̃zinyo?

Yãbↄnsaɛkɛri, n bítakɛɛ adona,

n gakui naasi vĩ.

¹² N n ↄplaa pòro, ben tↄↄtɛ ń mↄmↄ.

¹³ Wamↄwa kɛ̀ n wa bo zↄ̀bleennↄ

nɛ́ dↄwe aɛ n gbɛ̃kɛɛ guu,

nɛ́ gáwao n bùsun kↄ̃n n gbãaao.

¹⁴ Tó boriinↄ mà, aↄ̃é lugaluga,

Filisitini bùsudeenↄ kù égↄ̃ vĩi.

¹⁵ Ɛdↄmunↄ kínanↄ é bídi kɛ,

swɛ̃̀ é kɛ̃ Mↄabu dↄn’aɛdeenↄn,

Kanaa bùsudeenↄ mɛ̀ é yↄ́ ń píngi.

¹⁶ Vĩa bíta é ń kũ, swɛ̃̀ é kɛ̃ńgu,

aↄ̃é gↄ̃ kítikiti lán gbɛ̀ bà

n gbãa bíta yãnzi Dii,

ai wamↄwa kɛ̀ n wa sɛ n pↄ́ ũunↄ gɛ̃tɛ.

¹⁷ Dii, nɛ́ gáwao kpiii kɛ̀ ń sɛ̀ n pↄ́ ũu kiia,

nɛ́ wa kãsãa pɛ́ɛ guu kɛ̀ ń dìɛ n vɛ̃ɛkii ũun,

n kúkii kɛ̀ ń kɛ̀kɛ n zĩndanɛ pì.

¹⁸ Dii égↄ̃ kí blee gurↄ píngimɛ.

¹⁹ Kɛ̀ Fili’auna sↄ̃nↄ kↄ̃n à sↄ̃goronↄ kↄ̃n à sↄ̃deenↄ gɛ̃̀ ísiaa guu, ben Dii sù kↄ̃n ío à dàńla, mↄde Isarailinↄ táa ò gukoria ísiaa pì guu. ²⁰ Ben annabi Miriamu, Aruna dãre, a sɛ̃gɛ̃sɛ̃gɛ̃ sɛ̀, ben nↄgbɛ̃nↄ bↄ̀ wà tɛ́zi ń píngi, aↄ̃ↄe sɛ̃gɛ̃sɛ̃gɛ̃ paa aↄ̃ↄe ↄ̃ wãa. ²¹ Miriamu lɛ̀ sìńnɛ à bè:

À lɛ̀ sí Diinɛ, zaakɛ à tↄ́ bↄna,

à sↄ̃deenↄ kↄ̃n ń sↄ̃nↄ kà ísiaan.

Í kyã̀kyã

²² Musa dà zɛ́n kↄ̃n Isarailinↄ, aↄ̃ kɛ̃̀ Isia Tɛ̃aaa aↄ̃ gɛ̃̀ Suru gbáan. Aↄ̃ táa ò gurↄ aagↄ̃ gbáa pìn aↄ̃ↄe í ero. ²³ Kɛ̀ aↄ̃ kà guu kɛ̀ wè sísi Mara, aↄ̃ↄe fↄ̃ wà à í mìro kɛ̀ à kɛ̀ kyã̀kyã yãnzi. Beee yãnzi wà tↄ́ kpà guu pìnɛ Mara. ²⁴ Ben gbɛ̃nↄ zↄka kà Musazi wà bè: Bↄ́n wé mii? ²⁵ Musa wii pɛ̀ Diizi, ben Dii lí ↄ̀dↄanɛ. Kɛ̀ Musa lí pì zù ín, ben í pì kɛ̀ nna. Gwen Dii yã dìɛńnɛ kↄ̃n dokao à ń lɛ́ à ń gwá ²⁶ à bè: Tó a làakari dↄ̀ mamↄma Dii a Luda yãa ée yã kɛ̀ má yezi kɛɛ, tó a yã kɛ̀ má dìɛnↄ mà, ben á ma dokanↄ kũna píngi, mɛ́ gyãa kɛ̀ má kà Igipitinↄn ke káaguro, zaakɛ mámbe Dii kɛ̀ è a gba aafia ũ. ²⁷ Beee gbɛra aↄ̃ kà Ɛlimu, guu kɛ̀ íbↄki mɛ̀n kuri awɛɛplaaanↄↄ kún kↄ̃n damina lí mɛ̀n baaagↄ̃ akurinↄo. Ben aↄ̃ bùra kàɛ í pì saɛ gwe.

Mana kↄ̃n bùrunↄ

¹ Isarailinↄ fɛ̀ɛ Ɛlimu ń píngi, ben aↄ̃ kà Sini gbáa kɛ̀ kú Ɛlimu kↄ̃n Sinaio dagura aↄ̃ bↄna Igipiti mↄ plaadee guu gurↄ gɛ̃rodee zĩ. ² Ben aↄ̃ zↄka kà Musa kↄ̃n Arunaozi gbáan gwe ń píngi ³ aↄ̃ bèńnɛ: Bↄ́yãnzi Dii e wa dɛdɛ Igipitirozi? Gwe weè vɛ̃ɛ wà pↄ́ ble kↄ̃n nↄ̀bↄo ai wà kã, ben a mↄwao gbáan kɛ̀ à wa dɛdɛ kↄ̃n nↄaao.

⁴ Dii bè Musanɛ: Bↄna musu mɛ́ pↄ́blee fãkɛare. Gbɛ̃nↄ é bↄɛ wà gurↄ doo pↄ́ sɛ́ɛ lán gu e dↄↄ nà ń blena lɛ́n, lɛ mà ń yↄ̃ mà gwa tó aↄ̃ↄ ma doka kũna. ⁵ Gurↄ swɛɛdodee zĩ gurↄ plaaa pↄ́n aↄ̃é sɛ́ɛ aↄ̃ à pↄ́blee kɛ. ⁶ Ben Musa kↄ̃n Arunao bèńnɛ ń píngi: Uusiɛa é dↄ̃ kɛ̀ Dii bé à a bↄɛ Igipiti, ⁷ zia kↄngↄ é Dii gakui e. À zↄka kɛ̀ á kàazii mà. Bↄ́n wa ũ kɛ̀ é gbasa a zↄka kàwazii? ⁸ Musa ɛ̀ara à bè: Dii é a gba nↄ̀bↄ à só uusiɛa, zia kↄngↄ eé pↄ́blee kpáawa a blena lɛ́n, kɛ̀ à zↄka kɛ̀ á kàazii mà yãnzi. Pↄ́ken wa ũro. Èe kɛ wámbe a zↄka kàwaziro, Diimɛ.

⁹ Ben Musa bè Arunanɛ: Ǹ o Isarailinↄnɛ ń píngi aↄ̃ sↄ̃ Diizi, zaakɛ à ń zↄkakana mà. ¹⁰ Kɛ̀ Aruna e yã oońnɛ, aↄ̃ aɛ dↄ̀ gbáa kpa, ben aↄ̃ↄ è Dii gakui bↄ̀ à mↄ̀ńzi tɛ́luguu guu. ¹¹ Ben Dii yã ò Musanɛ à bè: ¹² Ma Isarailinↄ zↄkakana mà. Ǹ ońnɛ uusiɛa aↄ̃é nↄ̀bↄ só, zia kↄngↄ aↄ̃é pↄ́ ble wà kã, aↄ̃é dↄ̃ kɛ̀ mámbe Dii ń Luda ũ.

¹³ Uusiɛ bùrunↄ mↄ̀ wà dà ń bùrala. Kɛ̀ guu dↄ̀ kpíi kpà à lìgańzi. ¹⁴ Kɛ̀ kpíi kɛ̃̀, ben pↄ́ gↄ̃̀ kaɛna tↄↄtɛa púu ketekete lán pↄ́ kokũ bà. ¹⁵ Kɛ̀ Isarailinↄↄ è, aↄ̃ bèkↄ̃nɛ: Bↄ́n gwee? Zaakɛ aↄ̃ↄe dↄ̃ tó bↄ́nlo. Musa bèńnɛ: Pↄ́ kɛ̀ Dii kpàawa à bleen gwe. ¹⁶ Yã kɛ̀ Dii dìɛareen yɛ̀: A baade sɛ́ɛ a blena lɛ́n. À sɛ́ɛ a baade mìa zaka lɛ́ doodo a uadeenↄ pari lɛ́n. ¹⁷ Isarailinↄↄ kɛ̀ lɛ. Aↄ̃ↄ sɛ̀ɛ, gbɛ̃kenↄ pↄ́ bíta, gbɛ̃kenↄ pↄ́ nɛ́ngo. ¹⁸ Kɛ̀ wà zaka dàn, gbɛ̃ kɛ̀ sɛ̀ɛ bíta pↄ́ e diziro, gbɛ̃ kɛ̀ sɛ̀ɛ féte pↄ́ e kɛ̃sãaro. ¹⁹ Musa bèńnɛ: Gbɛ̃ke tón à kpaa tó ai guu dↄaro. ²⁰ Gbɛ̃kenↄ e Musa yã maro, aↄ̃ à kpaaa tò ai guu dↄ̀, ben à kↄ̀kↄ kà à vã̀, ben Musa pↄ fɛ̃̀ gbɛ̃ pìnↄzi.

²¹ Lán guu e dↄↄ nà baade è sɛ́ɛ a blena lɛ́n. Tó ↄfãntɛ̃ gbã̀, à kɛ̀ gↄ̃̀ tↄↄtɛa è yↄ́mɛ. ²² Gurↄ swɛɛdodee zĩ aↄ̃ pↄ́blee sɛ̀ɛ lɛo plaa, baade mìa zaka lɛ́ plaplaa. Ben aↄ̃ gbɛ̃nsinↄ gàa wà ò Musanɛ ń píngi. ²³ À bèńnɛ: Lɛn Dii dìɛ lɛ. Zia nɛ́ kámmabogurↄↄ zĩmɛ, Dii gurↄↄmɛ. À pↄ́ kɛ̀ á yezi à kpá tɛ́a kpá tɛ́a. À pↄ́ kɛ̀ á yezi à disa disa, à à kpaaa kɛ̀ gↄ̃̀ diɛ ai guu dↄ̀. ²⁴ Aↄ̃ↄ dìɛ ai guu dↄ̀ lán Musa ò nà. Beekii e vãro èe kↄ̀kↄ káro. ²⁵ Ben Musa bèńnɛ: À ble gbã̀a, zaakɛ kámmabogurↄↄ zĩmɛ, é e gukea gbã̀aro. ²⁶ Àgae sɛ́ɛ ai gurↄ swɛɛdo. À gurↄ swɛɛplaadee nɛ́ kámmabogurↄↄ zĩmɛ, eégↄ̃ kuu zĩ pìaro.

²⁷ Gurↄ swɛɛplaadee zĩ gbɛ̃kenↄ bↄ̀ wà gàa sɛ́ɛ, ben aↄ̃ↄe ero. ²⁸ Ben Dii bè Musanɛ: Égↄ̃ kú kↄ̃n doka kɛ̀ má dìɛ masaio ai bↄrɛmɛ? ²⁹ Àgↄ̃ dↄ̃ kɛ̀ mamↄma Dii mámbe ma kámmabogurↄↄ dìɛare. Beee yãnzi gurↄ swɛɛdodee zĩ mɛɛ̀ gurↄ plaaa pↄ́blee kpáawa. Baade gↄ̃ kú a gbɛ̀n, gbɛ̃ke tón gu a gbɛ̀n gurↄ swɛɛplaadee pì zĩro. ³⁰ Ben aↄ̃ kámma bò gurↄ swɛɛplaadee zĩ. ³¹ Isarailinↄ tↄ́ kpà pↄ́blee pìnɛ mana. À dɛ lán pↄ́wɛɛ pura keteketenↄ bàmɛ. À í nna lán kàra zↄ́dee bà.

³² Musa bè: Yã kɛ̀ Dii dìɛn yɛ̀: Wà mana zaka lɛ́ doo diɛ wa boriinↄnɛ, lɛ aↄ̃ pↄ́blee kɛ̀ à kpàwa wá blè gbáan wa bↄna Igipiti gbɛraa e se. ³³ Ben Musa bè Arunanɛ: Ǹ loo sɛ́ ǹ mana zaka lɛ́ doo kán ǹ diɛ Dii aɛ, lɛ àgↄ̃ diɛna wa boriinↄnɛ. ³⁴ Ben Aruna dìɛ gbɛ̀ walaanↄ saɛ lɛ àgↄ̃ diɛna lán Dii ò Musanɛ nà. ³⁵ Isarailinↄ mana blè wɛ̃̀ baplaa ai aↄ̃ gàa wà kào bùsu kɛ̀ gbɛ̃nↄↄ kún. Aↄ̃ mana pì blè ai aↄ̃ gàa wà kào Kanaa bùsu lɛ́a. ³⁶ Zaka lɛ́ doo nɛ́ lita plaaamɛ.

Í bↄna gbɛ̀n

(Nar 20:2-13)

¹ Isarailinↄ fɛ̀ɛ Sini gbáan ń píngi, aↄ̃ↄe bùra káɛkaɛɛ lán Dii òńnɛ nà, ben aↄ̃ gàa wà bùra kàɛ Rɛfidimu. Aↄ̃ↄe í e wà mì gwero, ² ben aↄ̃ zↄka kà Musazi wà bè: Ǹ wa gba í wà mi. À bèńnɛ: Bↄ́yãnzi ée lɛokpakↄ̃a kɛɛmaozi? A kɛ̀ dia ée Dii lɛɛ ée gwaa? ³ Kɛ̀ ímii e ń dɛɛ, ben aↄ̃ zↄka kà Musazi wà bè: Bↄ́yãnzi n bↄwao Igipitizi? Ń yezi ímii wa dɛ kↄ̃n wa nɛ́nↄ kↄ̃n wa pↄ́kãdeenↄon yↄ́? ⁴ Ben Musa wii pɛ̀ Diizi à bè: Dian mɛ́ kɛ kↄ̃n gbɛ̃ pìnↄ nà? À gↄ̃̀ féte kɛ̀ aↄ̃é ma pápa gbɛ̀o wà ma dɛ. ⁵ Dii bènɛ: Ǹ Isaraili gbɛ̃nsinↄ sɛ́ɛ à dↄ gbɛ̃ pìnↄnɛ aɛ. Ǹ n gò kɛ̀ n Nili lɛ̀o sɛ́ dↄ. ⁶ Mɛ́ zɛ n aɛ Orɛbu gbɛ̀si saɛ gwe. Ǹ gbɛ̀si pì lɛ́, í é bↄ lɛ aↄ̃ mi. Ben Musa kɛ̀ lɛ Isaraili gbɛ̃nsinↄ wáa. ⁷ Ben wà tↄ́ kpà guu pìnɛ Masa, zaakɛ gwen aↄ̃ Dii yↄ̃̀n wà gwà wà bè: Dii kúwaon gweↄ́? Wà tↄ́ kpànɛ Mɛriba dↄ, kɛ̀ Isarailinↄ zↄka kà gwe yãnzi.

Zĩ̀kana kↄ̃n Amalɛkinↄ

⁸ Amalɛkinↄ mↄ̀ zĩ̀ ká kↄ̃n Isarailinↄ Rɛfidimu. ⁹ Ben Musa bè Yↄsuanɛ: Ǹ gbɛ̃nↄ plɛplɛ wa tɛ́ à gá zĩ̀ ká kↄ̃n Amalɛkinↄ. Zia mɛ́gↄ̃ zɛna sĩ̀sĩ kɛ̀kii mìsↄ̃ntɛ̃a kↄ̃n Luda gòo kũna. ¹⁰ Yↄsua kɛ̀ lán Musa ònɛ nà, à gàa zĩ̀ ká kↄ̃n Amalɛkinↄ. Ben Musa kↄ̃n Arunao kↄ̃n Uruo dìdi sĩ̀sĩ pì mìsↄ̃ntɛ̃a. ¹¹ Tó Musa a ↄↄnↄ sɛ̀, Isarailinↄ ègↄ̃ zĩ̀ blee Amalɛkinↄamɛ, mↄde tó à a ↄↄnↄ dìɛ sↄ̃, Amalɛkinↄ ègↄ̃ zĩ̀ blee Isarailinↄa. ¹² Kɛ̀ Musa ↄↄnↄ wã̀, wà gbɛ̀ sɛ̀ wà dìɛ à gbáru à vɛ̃̀ɛa, ben Aruna kↄ̃n Uruo à ↄↄnↄ kũkũna, gbɛ̃ doo ↄplazi, gbɛ̃ doo ↄzɛzi, ben à ↄↄnↄ gↄ̃̀ zɛna ai ↄfãntɛ̃ gàa à gɛ̃̀o kpɛ́n. ¹³ Ben Yↄsua zĩ̀ blè Amalɛkinↄa à ń dɛ́dɛ kↄ̃n fɛ̃ɛdaao.

¹⁴ Dii bè Musanɛ: Ǹ kɛ̀kii kɛ̃ takada guu lɛ àgↄ̃ dɛ dↄngu pↄ́ ũ ǹ o Yↄsuanɛ, zaakɛ mɛ́ Amalɛkinↄ borii bↄ anduna guu ń píngi. ¹⁵ Musa gbãgbãkii bò, ben à tↄ́ kpànɛ Diin ma tuuta ũ ¹⁶ à bè: Ma ↄↄ sɛ̀ Dii kpata kpa. Dii égↄ̃ zĩ̀ ká kↄ̃n Amalɛkinↄ gurↄ píngi.

Yɛtoro gana Musa gwa

¹ Musa anzure Yɛtoro, Midiã sa’ori, yã kɛ̀ Ludaa kɛ̀ Musanɛ kↄ̃n a gbɛ̃ Isarailinↄo mà, lán Dii ń bↄ́ɛ Igipiti nà. ² Àɛ kɛ̀ sↄ̃ Musa gĩakɛ à a naↄ̃ Zipora zĩ̀ bɛ ³ kↄ̃n a nɛ́gↄ̃gbɛ̃ mɛ̀n plaaanↄ. À doo tↄ́n Gɛsↄmu, zaakɛ Musa bè gbɛ̃ zĩ̀tↄn a ũ danↄ bùsun. ⁴ À doo tↄ́n Ɛliɛza, zaakɛ Musa bè a de Luda a faaba kɛ̀ à a bↄ Fili’auna fɛ̃ɛdaa lɛ́zĩ. ⁵ Ben Yɛtoro fɛ̀ɛ èe mↄↄ Musa kiia kↄ̃n à nɛ́nↄ kↄ̃n à naↄ̃o guu kɛ̀ à bùra kàɛn Luda kpiii saɛ gbáan. ⁶ À lɛ́kpãsã kɛ̀ Musanɛ à bè: Mɛ́ɛ mↄↄ n kiia kↄ̃n n naↄ̃o kↄ̃n n nɛ́ mɛ̀n plaaanↄo. ⁷ Musa bↄ̀ à gàa à dà a anzurelɛ à kùɛ à lɛ́ pɛ̀ à gasua. Aↄ̃ kↄ̃ aafia gbèka, ben aↄ̃ gɛ̃̀ kpɛ́n. ⁸ Musa yã kɛ̀ Dii kɛ̀ Fili’aunanɛ kↄ̃n Igipitinↄ Isarailinↄ yãnzi tↄ̃kɛ̃̀nɛ píngi kↄ̃n nawɛ̃a kɛ̀ aↄ̃ↄ è zɛ́ guunↄ píngi kↄ̃n lán Dii ń bↄ́ nào. ⁹ Yɛtoro pↄↄ kɛ̀ nna yã maaa kɛ̀ Dii kɛ̀ Isarailinↄnɛa píngi kↄ̃n lán à ń bↄ́ Igipitinↄ ↄzĩ nào. ¹⁰ Ben à bè: Wà Dii sáabu kpá lán à a bↄ Fili’auna kↄ̃n Igipitinↄ ↄzĩ nà. ¹¹ Má dↄ̃̀ sa kɛ̀ Dii bíta dɛ tãanↄla ń píngi. Kɛ̀ Igipitinↄ kya kàagu, à yã mↄ̀ńnɛ. ¹² Ben Yɛtoro sa’opↄ kɛ̀ wè ká tɛ́n à tɛ́ kũ ò Ludaa kↄ̃n sa’opↄ pãndenↄ dↄ. Ben Aruna kↄ̃n Isaraili gbɛ̃nsinↄ ń píngi mↄ̀ wà pↄ́ blèo Luda aɛ.

Yãgↄ̃gↄ̃rinↄ diɛna

¹³ Kɛ̀ guu dↄ̀ Musa vɛ̃̀ɛ èe yã gↄ̃gↄ̃ↄńnɛ, aↄ̃ↄ káɛzi zaa kↄngↄ ai uusiɛ. ¹⁴ Kɛ̀ Musa anzure yã kɛ̀ èe kɛɛńnɛ è píngi, ben à à là à bè: Bↄ́n nɛ́ɛ kɛɛ kↄ̃n gbɛ̃ kɛ̀nↄ lɛɛ? Bↄ́yãnzi nɛ́ɛ yãkpaɛ kɛɛńnɛ ndo, baade píngi káɛnzi zaa kↄngↄ ai uusiɛ? ¹⁵ Musa wèàla à bè: Gbɛ̃nↄ è mↄ́ ma kiia aↄ̃ Luda pↄyeziyã mamɛ. ¹⁶ Tó aↄ̃ yãkete vĩ, aↄ̃è mↄ́ ma kiia mà yã pì gↄ̃gↄ̃ńnɛ mà Luda doka kɛ̀ à dìɛnↄ ońnɛ.

¹⁷ Musa anzure bènɛ: Yã kɛ̀ nɛ́ɛ kɛɛ maaro. ¹⁸ Nɛ́ kpasa, gbɛ̃ kɛ̀ aↄ̃ↄ kúnyonↄ é kpasa dↄ, zaakɛ zĩi pì dɛnla, nɛ́ fↄ̃ ǹ kɛ ndoro. ¹⁹ Ǹ ma yã ma sa, mɛ́ lɛ́ damma, Luda égↄ̃ kúnyo. Nɛ́gↄ̃ dɛńnɛ yãgↄ̃gↄ̃ri ũ, nɛ́gↄ̃ gaa kↄ̃n ń yãnↄ Luda kiia, ²⁰ nɛ́gↄ̃ doka kɛ̀ Ludaa dìɛnↄ daańnɛ, nɛ́gↄ̃ zɛ́ kɛ̀ dɛ aↄ̃ sɛ́ ↄdↄↄańnɛ kↄ̃n yã kɛ̀ aↄ̃é kɛɛnↄ. ²¹ Ǹ gbɛ̃ làakaride náanɛdee kɛ̀ aↄ̃ↄ Luda vĩa vĩ ben aↄ̃è ↄdↄnkpɛɛgbaa síroonↄ plɛplɛ ń tɛ́, ǹ ń diɛ gↄ̃ↄn wàa sↄsↄↄroonↄ dↄn’aɛdeenↄ ũ kↄ̃n gↄ̃ↄn basↄsↄↄroo kↄ̃n gↄ̃ↄn baplaa akurio kↄ̃n gↄ̃ↄn kurikurio, ²² lɛ aↄ̃gↄ̃ yã gↄ̃gↄ̃ↄ gbɛ̃ pìnↄnɛ gurↄ píngi. Aↄ̃é mↄ́ n kiia kↄ̃n yã zĩ’ũunↄ píngi, mↄde aↄ̃é yã nɛ́ngonↄ gↄ̃gↄ̃ ń zĩnda. Beee bé eé n asoo lagonnɛ. ²³ Tó Dii wènnɛ, tó ń kɛ̀ lɛ, nɛ́ fuaro, gbɛ̃ pìnↄ é tá bɛ làakario kpaɛna.

²⁴ Musa a anzure yã mà à kɛ̀ lán à òare nà píngi. ²⁵ À gbɛ̃ làakarideenↄ plɛ̀plɛ Isaraili boriinↄ tɛ́ píngi à ń díɛ gↄ̃ↄn wàa sↄsↄↄroonↄ dↄn’aɛdeenↄ ũ kↄ̃n gↄ̃ↄn basↄsↄↄroo kↄ̃n gↄ̃ↄn baplaa akurio kↄ̃n gↄ̃ↄn kurikurio. ²⁶ Ben aↄ̃ègↄ̃ yã gↄ̃gↄ̃ↄńnɛ gurↄ píngi. Yã zĩ’ũun aↄ̃è mↄ́o Musa kiia, ben aↄ̃è yã nɛ́ngonↄ gↄ̃gↄ̃ ń zĩnda. ²⁷ Musa gàa à zɛ̀ a anzurenɛ, ben à tà a bùsun.

Sinai kpiii saɛ

¹ Isarailinↄ bↄna Igipiti mↄ aagↄ̃dee guu ² aↄ̃ fɛ̀ɛ Rɛfidimu. Kɛ̀ aↄ̃ kà Sinai gbáan, ben aↄ̃ bùra kàɛ gwe Sinai kpiii saɛ. ³ Musa dìdi à gàa Luda kiia kpiii pì musu, ben Dii lɛ́ zùzi à bè: Ǹ yã kɛ̀kii o Yakubu bori Isarailinↄnɛ: ⁴ Á è lán má kɛ̀ Igipitinↄnɛ nà, lán ma a sɛ ma suao ma kiia, lán kúu è a nɛ́ sɛ́ a dɛ̀bɛa nà. ⁵ Tó a ma yã mà á ma bà kuunaao yã kũna tia sa, égↄ̃ dɛ ma gbɛ̃ yenzideenↄ ũ bori píngi tɛ́. Baa kɛ̀ anduna dɛ ma pↄ́ ũ píngi, ⁶ égↄ̃ dɛmɛ kínanↄ kↄ̃n sa’orinↄ ũ, ma gbɛ̃ kɛ̀ aↄ̃ↄ kú adonanↄ ũ. Yã kɛ̀ nɛ́ o Isarailinↄnɛn gwe.

⁷ Musa pìta à gbɛ̃nsinↄ sìsi, ben à yã kɛ̀ Dii ònɛ tↄ̃kɛ̃̀ńnɛ píngi. ⁸ Gbɛ̃nↄ wèàla ń píngi wà bè: Yã kɛ̀ Dii òwe píngi wé kɛ. Ben Musa gàa à yã kɛ̀ wà ò tↄ̃kɛ̃̀ Diinɛ. ⁹ Dii bènɛ: Mɛ́ mↄ n kiia tɛ́sukpɛ gègete guu, lɛ gurↄↄ kɛ̀ mɛ́ɛ yã oonnɛ, aↄ̃é ma aↄ̃égↄ̃ n náanɛ vĩ gurↄ píngi. Ben Musa yã kɛ̀ gbɛ̃nↄↄ ò tↄ̃kɛ̃̀ Diinɛ. ¹⁰ Ben Dii bènɛ: Ǹ gá ń kiia ǹ ońnɛ aↄ̃ gbãsĩ bↄ ń zĩndan gbã̀a kↄ̃n ziaao, aↄ̃ ń pↄ́kãsãanↄ pípi. ¹¹ Aↄ̃gↄ̃ kú soru guu ziando, zaakɛ à gurↄ aagↄ̃dee zĩ mɛ́ pita mà zɛ Sinai kpiii musu baade píngi wáa. ¹² Ǹ tↄↄtɛ lɛ́ sèeda dańnɛ kpiii pì gɛɛzi ai à lìgazi píngi. Ǹ ońnɛ aↄ̃ làakari kɛ. Aↄ̃ton didi kpiii pìaro. Aↄ̃ gbɛ̃ke tón ↄ kɛa sero. Gbɛ̃ kɛ̀ ↄ kɛ̀a, wà adee dɛ. ¹³ Wàton ↄ kɛ adeearo. Wà à pápa gbɛ̀o ke wà à pápa kào wà dɛ. Pↄ́kãdeen yoo, gbɛ̃nteen yoo, à gàmɛ. Tó aↄ̃ↄ mà wà kuru pɛ̀ wà à bà gà, aↄ̃ sↄ̃ kpiii pìzi.

¹⁴ Musa pìta kpiii pìa à mↄ̀ à gbɛ̃nↄ lè à òńnɛ aↄ̃ gbãsĩ bↄ ń zĩndan aↄ̃ ń pↄ́kãsãanↄ pípi. ¹⁵ À ɛ̀ara à bèńnɛ: Àgↄ̃ kú soru guu gurↄ aagↄ̃dee zĩ yãnzi. Àton daɛ kↄ̃n nↄgbɛ̃oro. ¹⁶ Kɛ̀ guu dↄ̀ à gurↄ aagↄ̃dee pìa, ben laa e pataa èe pii, ben lou sìsi kpiii musu. Kɛ̀ aↄ̃ kuru’ↄ gbãaa mà, ben vĩa gbɛ̃ kɛ̀ aↄ̃ↄ kú bùrannↄ kũ̀ ń píngi aↄ̃ↄe lugalugaa. ¹⁷ Musa bↄ̀ńyo bùran à gàańyo Luda kiia, ben aↄ̃ zɛ̀ gĩzĩ kpiii pì saɛ. ¹⁸ Tɛ́sukpɛ dà Sinai kpiiila kɛ̀ Dii pìta gwe kↄ̃n tɛ́o yãnzi. Tɛ́sukpɛ pì fɛ̀ɛ lán mↄ̀da tɛ́sukpɛ bà, ben kpiii pì e nigãnigãa maamaa. ¹⁹ Kuru’ↄ gbãaa e kaara. Kɛ̀ Musa yã ò, ben Luda wèàla lapatana guu.

²⁰ Dii pìta à zɛ̀ Sinai kpiii mìsↄ̃ntɛ̃a à Musa sìsi, ben à dìdi à gàa gwe. ²¹ Dii bènɛ: Ǹ pita ǹ kpãkɛ̃ gbɛ̃nↄzi, aↄ̃ton vĩ gulɛla aↄ̃ mↄ́ wà ma gwaro, lɛ aↄ̃ paridee tón gagaro yãnzi. ²² Baa sa’ori kɛ̀ aↄ̃è sↄ̃maziinↄ, aↄ̃ gbãsĩ bↄ ń zĩndan lɛ màton fɛ̃ńziro yãnzi. ²³ Musa bè Diinɛ: Aↄ̃é didiro, zaakɛ n kpãkɛ̃wazi n bè wà tↄↄtɛ lɛ́ sèeda da kpiii pì gɛɛzi à gↄ̃ n pↄ́ ũmɛ. ²⁴ Ben Dii bènɛ: Ǹ pita ǹ Aruna sɛ́ ǹ suo, mↄde sa’orinↄ kↄ̃n gbɛ̃ kpaaanↄ tón vĩ guu baa aↄ̃ mↄ́ ma kiiaro lɛ màton fɛ̃ńziro yãnzi. ²⁵ Ben Musa pìta gbɛ̃ pìnↄ kiia à yã pì òńnɛ.

Dokayã mɛ̀n kurinↄ

¹ Luda yã kɛ̀kii ò píngi à bè: ² Mámbe Dii a Luda ũ. Ma a bↄɛ zↄ̀bleen Igipiti.

³ Àtongↄ̃ dii ke vĩ ma gbɛraro.

⁴ Àton pↄ́ke taka kɛ à kúɛ à dↄnzi kɛnɛro, pↄ́ kɛ̀ kú musu ke tↄↄtɛa ke í guun yoo, zaakɛ mamↄma Dii a Luda má nↄ̀sɛgↄ̃aanↄ vĩ. Mɛɛ̀ gbɛ̃ kɛ̀ yemaziroonↄ yã zaa wí ń boriinↄ musu ai à gá pɛ́ ń swãkpɛɛnↄa kↄ̃n ń nasionↄ. ⁶ Gbɛ̃ kɛ̀ aↄ̃ↄ yemazi aↄ̃ↄ ma dokayãnↄ kũnanↄ sↄ̃, mɛɛ̀gↄ̃ gbɛ̃kɛɛ vĩńyomɛ ai ń boriia.

⁷ Àton mamↄma Dii a Luda tↄ́ sí pãpãro, zaakɛ gbɛ̃ kɛ̀ ma tↄ́ sì pãpãa mɛ́ tó à bↄ pãro.

⁸ Àgae dↄn kámmabogurↄↄ zĩ nɛ́ ma pↄ́mɛ. ⁹ Àgae a bura zĩ kↄ̃n a zĩ píngio kɛ gurↄ swɛɛdo, ¹⁰ à swɛɛplaadee gↄ̃ dɛare kámmabogurↄↄ ũ, zaakɛ mamↄma Dii a Luda ma pↄ́mɛ. Àton zĩi ke kɛ gurↄↄ pì zĩro, apinↄ ke a nɛ́gↄ̃gbɛ̃ ke a nɛ́nↄgbɛ̃ ke a zĩkɛri gↄ̃gbɛ̃ ke nↄgbɛ̃ ke a pↄ́kãdee ke nibↄ kɛ̀ kú a bɛ. ¹¹ Zaakɛ gurↄ swɛɛdon ma musu kↄ̃n tↄↄtɛo kɛ̀ kↄ̃n ísiaao kↄ̃n pↄ́ kɛ̀ kú ń guunↄ píngi, ben ma kámma bò à gurↄ swɛɛplaadee zĩ. Beee yãnzi ma aubarika dà kámmabogurↄↄ pìnzi, má dìɛ ma pↄ́ ũ. ¹² Àgae bɛ̀ɛ lí a de kↄ̃n a daonɛ, lɛ à gì kɛ bùsu kɛ̀ mamↄma Dii a Luda mɛ́ɛ kpaaawaan.

¹³ Àton gbɛ̃ dɛro.

¹⁴ Àton zina kɛro.

¹⁵ Àton kpãi oro.

¹⁶ Àton yã di a gbɛ̃daaaaro.

¹⁷ Àton a gbɛ̃daaa ua ni dɛro. Àton à nↄↄ ni dɛro ke à zĩkɛri gↄ̃gbɛ̃ ke nↄgbɛ̃ ke à zù ke à zaaki ke pↄ́ kɛ̀ à vĩinↄ píngi.

¹⁸ Baade píngi lapatana mà kↄ̃n kuru’ↄo, aↄ̃ loupina è kↄ̃n tɛ́sukpɛo dↄ kpiii musu, ben vĩa ń kũ aↄ̃ↄe lugalugaa aↄ̃ↄ zɛ kãaa. ¹⁹ Aↄ̃ bè Musanɛ: Ǹ yã owe n zĩnda, wé ma. Ǹton tó Luda yã owero, lɛ wàton gagaro yãnzi. ²⁰ Musa bèńnɛ: Àton tó vĩa a kũro, zaakɛ kɛ̀ à a yↄ̃ à gwa yãnzin à mↄ̀zi, lɛ àgↄ̃ à vĩa vĩ bensↄ̃ àton durun kɛro yãnzi. ²¹ Aↄ̃ↄ zɛ kãaa, ben Musa sↄ̃̀ tɛ́sukpɛ gègete pìzi, guu kɛ̀ Ludaa kún pìn.

Dii gbãgbãki yã

²² Ben Dii bè Musanɛ: Ǹ yã kɛ̀kii o Isarailinↄnɛ: Á mà a zĩndanda lán ma yã òare zaa musu nà. ²³ Àton tãa ke kɛ à namaro. Àton kondogi ke vura pi tãanↄ ũro. ²⁴ À ma gbãgbãkii bo kↄ̃n ɛ̃ɛo à saa oa kↄ̃n sãanↄ kↄ̃n zùnↄ, sa’opↄ kɛ̀ wè ká tɛ́n à tɛ́ kũ kↄ̃n kɛnnakↄ̃o sa’opↄo. Guu kɛ̀ má dìɛare àgↄ̃ ma sísin, mɛ́ mↄ́ a kiia mà aubarika daagu. ²⁵ Tó ée ma gbãgbãkii pì boo kↄ̃n gbɛ̀o, àton bo kↄ̃n gbɛ̀ anaoro, zaakɛ tó a gã pɛ̀ɛa, á tò à gbãsĩ lɛ̀n gwe. ²⁶ Àton ma gbãgbãkii bo à à didikii kɛro, lɛ a bũukɛɛ tón ↄdↄaaro yãnzi.

Yãkɛna a zɛ́a

¹ Àton wàpe baaru kpáro. Àton zɛ kↄ̃n gbɛ̃ zaaao ɛgɛ sèedadee ũro. ² Àton tɛ́ pariizi yãzaakɛna guuro. Àton zɛ kↄ̃n pariio yãkpaɛ guu à bↄ yãzɛdee kpɛɛro. ³ Tó takaaside yã nnaro, àton zɛoro. ⁴ Tó n ibɛɛ zù ke à zaaki sã̀sã bensↄ̃ n kpakũo, ǹ kũ ǹ gáonɛ bɛ. ⁵ Tó n n zanguri zaaki è èe fuu asooa, ǹ à ĩan ká, ǹton à tónlo.

⁶ Tó takaaside yã nna, àton bↄ à kpɛɛro. ⁷ À zã̀ kũ kↄ̃n mↄnafikio. Àton taarisaidee ke gbɛ̃ maaa dɛro, zaakɛ mɛ́ tó taaridee bↄ pãro. ⁸ Àton ↄdↄnkpɛɛgbaa síro, zaakɛ ↄdↄnkpɛɛgbaa è tó wɛ́ɛdeenↄ vĩa kũmɛ, bensↄ̃ è gbɛ̃ maaanↄ yã liɛ kpɛɛgãnda. ⁹ Àton wɛ́ɛ tã bↄ̀amↄaro. Á bↄ̀amↄkɛɛ dↄ̃, zaakɛ bↄ̀amↄnↄn a ũ yã zaa Igipiti. ¹⁰ Àgae pↄ́ tↄ̃ a buraanↄa à kɛkɛ ai wɛ̃̀ swɛɛdo, ¹¹ à wɛ̃̀ swɛɛplaadeen à tó tↄↄtɛ kámma bo à ĩam pá, lɛ a takaasideenↄ e wà à zã̀ kɛ̀ bↄ̀ɛ gweenↄ kↄ̃ↄ wɛ, nↄ̀bↄsɛ̃tɛnↄ e wà à kpaa só. À kɛ lɛ dↄ kↄ̃n a geepi búo kↄ̃n a kùkpɛo. ¹² Àgaegↄ̃ zĩi kɛɛ ai gurↄ swɛɛdo, à swɛɛplaadeen àgae kámma bo, lɛ a zùnↄ kↄ̃n a zaakinↄ e wà kámma bo, bensↄ̃ a zↄ̀nↄ kↄ̃n bↄ̀amↄnↄ é e wà ĩam pá. ¹³ Àgↄ̃ yã kɛ̀ má òareenↄ kũna píngi. Àton tãanↄ tↄ́ síro. Wàton ń tↄ́ ma a lɛ́n sero.

Zĩbaa mɛ̀n aagↄ̃ↄnↄ

(Bↄn 34:18-26)

¹⁴ Wɛ̃̀ kↄ̃n wɛ̃̀o àgae mↄ́ zĩbaa kɛmɛ gɛ̃̀n aagↄ̃. ¹⁵ Àgae Burɛdi Sɛ́sɛ’ɛ̃zɛ̃sai zĩbaa kɛ lán má dìɛare nà, àgae burɛdi sɛ́sɛ’ɛ̃zɛ̃sai só ai gurↄ swɛɛplaa mↄↄ kɛ̀ wè be Abibu guu a gurↄↄa, zaakɛ mↄↄ pì guun a bↄɛ Igipiti. Gbɛ̃ke tón mↄ́ ma kiia ↄkoriro. ¹⁶ Àgae Pↄ́kɛkɛna zĩbaa kɛ gurↄↄ kɛ̀ a na pↄ́kɛkɛnaa, à a bura pↄ́ káakunↄ kpáma. Àgae Pↄ́dufublena zĩbaa kɛ wɛ̃̀ yãanaa, gurↄↄ kɛ̀ a a bura pↄ́nↄ kàkↄ̃a píngi. ¹⁷ Wɛ̃̀ kↄ̃n wɛ̃̀o gɛ̃̀n aagↄ̃ a gↄ̃gbɛ̃ píngi mↄ́ kakↄ̃ana kɛ mamↄma Dii a Luda aɛzĩ. ¹⁸ Àton pↄ́sɛsɛna kpáma lɛdo kↄ̃n sa’opↄ aruoro. Àton zĩbaa sa’opↄ nↄ́si diɛ guu dↄaro. ¹⁹ Àgae gá mamↄma Dii a Luda ua kↄ̃n a bura pↄ́ káakunↄ. Àton blènɛ nↄ̀bↄ kuku kↄ̃n à da yↄ̃’ioro.

Luda Malaika é dↄ a gbɛ̃nↄnɛ aɛ

²⁰ Mɛ́ Malaika gbarɛ à dↄare aɛ à a dãkpa zɛ́n à káao guu kɛ̀ má kɛ̀kɛn. ²¹ À làakari dↄ à yãa à à yã ma. Àton bↄ à kpɛɛro, zaakɛ eé sùu kɛao a taari yã musuro kɛ̀ ma tↄ́ kúa yãnzi. ²² Tó a à yã mà bensↄ̃ a yã kɛ̀ má òaree kɛ̀ píngi, mɛ́gↄ̃ dɛ a ibɛɛnↄ ibɛɛ ũmɛ, a wɛdɛrinↄ wɛdɛri ũ. ²³ Ma Malaika pì é dↄare aɛ à gá zɛare bùsu kɛ̀ Amↄrinↄↄ kún kↄ̃n Itinↄ kↄ̃n Pɛrizinↄ kↄ̃n Kanaanↄ kↄ̃n Ivinↄ kↄ̃n Yebusinↄo, mɛ́ ń kaatɛ. ²⁴ Àton kúɛ ń tãanↄnɛ à zↄ̀ bleńnɛro, àton ń kɛna kɛro. À ń gboro à ń gbɛ̀nↄ wíwi. ²⁵ À dↄ Dii a Ludazi, eé aubarika daare a pↄ́bleen kↄ̃n a íminao, eé gyãanↄ kɛ̃awa. ²⁶ Nↄgbɛ̃nↄ é nↄ̀ bↄɛ a bùsunlo bensↄ̃ pãaa égↄ̃ kuuro. Mɛ́ a wɛ̃̀ndi bà dↄare kↄ̃n mↄ̀kyakooo. ²⁷ Mɛ́ vĩa dada gbɛ̃ kɛ̀ aↄ̃ↄ kú a aɛnↄzi mɛ́ tó bídi gɛ̃ borii kɛ̀ a ka ń kiianↄn, mɛ́ tó a ibɛɛnↄ kpɛɛ kpáare. ²⁸ Mɛ́ zↄ̃mantɛ̃nↄ gbarɛ a aɛ aↄ̃ ká Ivinↄn kↄ̃n Kanaanↄ kↄ̃n Itinↄ aↄ̃ pɛ́ḿmaare. ²⁹ Èe kɛ mɛ́ pɛ́ḿmaare wɛ̃̀ doo guu gↄ̃ↄnlo, lɛ bùsu pì tón gↄ̃ lákpɛ ũ nↄ̀bↄsɛ̃tɛnↄ daalaro yãnzi. ³⁰ Mɛ́gↄ̃ pɛ́ḿmaare busɛbusɛmɛ ai à gá pari kũ à ká à bùsu pì sí. ³¹ Mɛ́ a bùsu lɛ́ kɛare zaa Isia Tɛ̃a lɛ́a ai Filisitininↄ Isia lɛ́a, zaa gbáa lɛ́n ai Yuflati lɛ́a. Mɛ́ bùsu pì deenↄ naare a ↄzĩ à pɛ́ḿma. ³² A bà tóngↄ̃ kú ń yãn ke ń tãanↄ yãnlo. ³³ Àton tó aↄ̃gↄ̃ kú a bùsunlo, lɛ aↄ̃ton tó à durun kɛmɛro, zaakɛ tó a ń tãanↄ gbã̀gbã, a takutɛɛ kpàkpa a zĩndanɛmɛ.

Luda bà kuuna kↄ̃n Isarailinↄo sèeda

¹ Dii bè Musanɛ: Mmↄn kↄ̃n Arunao kↄ̃n Nadabuo kↄ̃n Abiuo kↄ̃n Isaraili gbɛ̃nsi gↄ̃ↄn baaagↄ̃ akurinↄ, à didi kpiiia à mↄ́ ma kiia, à dↄnzi kɛmɛ zaa kãaa. ² Ḿbe nɛ́ sↄ̃mazi ndo, gbɛ̃ kpaaanↄ tón mↄ́ kĩiro bensↄ̃ parii tón didińyo kpiii kɛ̀ musuro.

³ Musa gàa à yã kɛ̀ Dii ò tↄ̃kɛ̃̀ńnɛ píngi kↄ̃n dokayãnↄ píngi. Aↄ̃ wè lɛdolɛ ń píngi wà bè: Yã kɛ̀ Dii ò píngi wé kɛ. ⁴ Ben Musa yã kɛ̀ Dii ò pìnↄ kɛ̃̀ takada guu píngi.

À fɛ̀ɛ kↄngↄ idɛ’idɛ à gbãgbãkii bò kpiigɛɛzi, ben à gbɛ̀ pɛ̀ɛpɛɛ mɛ̀n kuri awɛɛplaa Isaraili bori kuri awɛɛplaaanↄ pↄ́ ũ. ⁵ À Isaraili gↄ̃kparɛnↄ zĩ̀ kↄ̃n zùswarenɛ bↄ̀rↄnↄ, ben aↄ̃ sa’opↄ kɛ̀ wè ká tɛ́n à tɛ́ kũ òo Diia kↄ̃n sáabukpana sa’opↄnↄ. ⁶ Ben Musa zù pìnↄ aru sì à kpàatɛ lɛo plaa. À à lɛo doo dìɛ kↄ̃n taao à à lɛo doo àɛ gbãgbãkiia. ⁷ Ben à Dii bà kuunańyo takada sɛ̀ à à kyó kɛ̀ńnɛ. Ben aↄ̃ bè: Yã kɛ̀ Dii ò píngi, wé kɛ wé mì siɛnɛ. ⁸ Ben à aru pì sɛ̀ à fã̀ḿma à bè: Dii bà kuunaao arun gwe lán á mà nà píngi.

⁹ Musa kↄ̃n Arunao kↄ̃n Nadabuo kↄ̃n Abiuo kↄ̃n Isaraili gbɛ̃nsi gↄ̃ↄn baaagↄ̃ akurinↄ dìdi kpiiia. ¹⁰ Aↄ̃ Isarailinↄ Luda è. Safia gbɛ̀ gusararaa kaɛna à gbá gĩzĩ, à í dɛ búgu wásawasa lán ludambɛ búgu bà. ¹¹ Ludaa e pↄ́ke kɛ Isaraili gbãadee pìnↄnɛro. Aↄ̃ wɛ́ɛ sìàlɛ, ben aↄ̃ pↄ́ blè aↄ̃ í mì.

Musa kuuna Sinai kpiii musu

¹² Dii bè Musanɛ: Ǹ didi kpiiia ǹ mↄ́ ma kiia ǹgↄ̃ kú gwe. Mɛ́ gbɛ̀ walaa kɛ̀ ma a dokayãnↄ kɛ̃̀anↄ kpámma, lɛ ǹ e ǹ dańnɛ. ¹³ Ben à fɛ̀ɛ kↄ̃n a kpàasi Yↄsuao, aↄ̃ↄe gaa didi Luda kpiiia. ¹⁴ Ben Musa bè gbɛ̃nsinↄnɛ: Àgↄ̃ wa dãa kɛ̀, wé ɛara wà su a kiia. Aruna kↄ̃n Uruo égↄ̃ kúao. Tó gbɛ̃ke yãke vĩ, à gáo ń kiia. ¹⁵ Ben Musa dìdi kpiii pìa. Tɛ́sukpɛ dà à mìsↄ̃ntɛ̃la, ¹⁶ ben Dii gakui pìta Sinai kpiii pìa. Tɛ́sukpɛ pì daàla lɛ ai gurↄ swɛɛdo, à gurↄ swɛɛplaadeen Dii lɛ́ zù Musazi zaa tɛ́sukpɛ pì guu. ¹⁷ Isarailinↄ Dii gakui è lán tɛ́ kɛ̀ è ń blee bà kpiii pì mìsↄ̃ntɛ̃a. ¹⁸ Ben Musa gɛ̃̀ tɛ́luguu pì guu à ɛ̀ara à dìdi kpiii pìa. À kú gwe ai gurↄ baplaa fãantɛ̃ kↄ̃n gwãavĩo.

Luda bisakutaa

¹ Dii yã ò Musanɛ à bè: ² Ǹ ma! Ma Uri nɛ́ Bezalɛli, Uru dio, Yuda borii sɛ̀. ³ Má tò ma Ninii kúa, ben à ↄ̃ndↄ̃ kↄ̃n gonio kↄ̃n dↄ̃nao è ↄzĩ píngi guu. ⁴ À zã ble pↄ́nↄa dↄ̃ kↄ̃n vurao kↄ̃n kondogio kↄ̃n mↄ̀gotɛ̃o. ⁵ À gbɛ̀ bɛ̀ɛde ana dↄ̃ kↄ̃n à dana pↄ́ guuo kↄ̃n lí’anao kↄ̃n ↄzĩ sãnda píngio. ⁶ Beee gbɛra ma Aisamaki nɛ́ Ɔↄliabu, Dani borii dìɛ à dↄnlɛri ũ. Ma ↄzĩkɛrinↄ gbà ↄ̃ndↄ̃ↄ ń píngi, lɛ aↄ̃ e wà pↄ́ kɛ̀ má dìɛnnɛɛnↄ kɛ píngi: ⁷ Dakↄ̃rɛki kuta kↄ̃n doka àkpatio kↄ̃n à nɛ́kpaɛo kↄ̃n kpɛ́ pì pↄ́ ketenↄ píngi, ⁸ teebu kↄ̃n a pↄ́ ketenↄ, vura atɛ̃ɛ dabu kↄ̃n a pↄ́ ketenↄ píngi, tuaetitikpatakii, ⁹ sa’opↄ kɛ̀ wè ká tɛ́n à tɛ́ kũ oki kↄ̃n a pↄ́ ketenↄ píngi, dàga kↄ̃n a dibↄo, ¹⁰ pↄ́kãsãa kɛ̀ wà tã̀nↄ, sa’ori Aruna pↄ́kãsãa kɛ̀ eé sↄ̃omaziinↄ kↄ̃n à nɛ́nↄ sa’opↄkãsãanↄ píngi, ¹¹ pↄ́ kyakɛnↄsi kↄ̃n bisakuta tuaetiti gũ nnaao. Aↄ̃ pↄ́ pìnↄ kɛ, lán má dìɛnnɛ nà píngi.

Kámmabogurↄ yã

¹² Dii yã ò Musanɛ à bè: ¹³ Ǹ o Isarailinↄnɛ aↄ̃ kámmabogurↄↄ kɛ̀ má dìɛ yã da, zaakɛ à dɛ sèeda ũ mapi kↄ̃n apinↄ dagura ai a boriia, lɛ à e à dↄ̃ mamↄma Dii ma a sɛ ma gbɛ̃nↄ ũ. ¹⁴ Àgae kámmabogurↄↄ pì yã da, zaakɛ gurↄↄ pì kuuare adonamɛ. Gbɛ̃ kɛ̀ gurↄↄ pì tɛ̃̀ kɛ̀, adee gàmɛ. Gbɛ̃ kɛ̀ zĩi kɛ̀ gurↄↄ pìa, wà adee bↄ a gbɛ̃nↄ tɛ́ wà dɛ. ¹⁵ Àgae zĩi kɛ gurↄ swɛɛdo, à gurↄ swɛɛplaadeen é kámma bo, zaakɛ mamↄma Dii ma pↄ́mɛ. Gbɛ̃ kɛ̀ zĩi kɛ̀ kámmabogurↄↄa gàmɛ. ¹⁶ Isarailinↄ gaegↄ̃ kámmabogurↄↄ pì yã kũna aↄ̃ diɛ gurↄ ìsi ũ ai ń boriia ma bà kuunańyo yã ũ. ¹⁷ Eégↄ̃ dɛ sèeda ũ mapi kↄ̃n Isarailinↄ dagura gurↄ píngi, zaakɛ mamↄma Dii ma musu kↄ̃n andunao kɛ̀ gurↄ swɛɛdomɛ, ben má yã̀a ma kámma bò à gurↄ swɛɛplaadee zĩ. ¹⁸ Kɛ̀ Dii yã ò Musanɛ Sinai kpiii musu à yã̀a, ben à dokayã kɛ̃̀ gbɛ̀ walaanↄa mɛ̀n plaa kↄ̃n a zĩnda ↄnɛo à kpàa.

Vura zùswarenɛ bↄ̀rↄ

¹ Kɛ̀ gbɛ̃nↄↄ è kɛ̀ Musa e pita kpiii musu kpaaro, aↄ̃ kàkↄ̃a Arunazi aↄ̃ bènɛ: Ǹ fɛɛ ǹ tãa kenↄ kɛwe lɛ aↄ̃ dↄwe aɛ, zaakɛ Musa kɛ̀ wa bↄɛ Igipiti pì, wá dↄ̃ yã kɛ̀ à à lèro. ² Ben Aruna bèńnɛ: À a nↄgbɛ̃nↄ vura swãinↄ bↄɛ kↄ̃n a nɛ́gↄ̃gbɛ̃nↄ pↄ́nↄ kↄ̃n a nɛ́nↄgbɛ̃nↄ pↄ́nↄ à mↄ́omɛ. ³ Ben ń píngi a vura swãinↄ bↄ̀bↄ aↄ̃ↄ kpà Arunaa. ⁴ À sì à kàsa lán zùswarenɛ bↄ̀rↄ bà, ben à lↄ̀lↄ. Ben wà bè: Isarailinↄ, a tãan yɛ̀! Àmbe à a bↄɛ Igipiti. ⁵ Kɛ̀ Aruna è lɛ, à sa’okii bò zù pì aɛ, ben à kpàakpa kɛ̀ à bè: Dii zĩbaa kuu zia. ⁶ Kɛ̀ guu dↄ̀, gbɛ̃nↄ fɛ̀ɛ wà sa’opↄ kɛ̀ wè ká tɛ́n à tɛ́ kũ òa kↄ̃n kɛnnakↄ̃o sa’opↄo. Gbɛ̃nↄ vɛ̃̀ɛ wèe pↄ́ blee wèe í mii, ben aↄ̃ fɛ̀ɛ wèe pãpãa kɛɛ.

⁷ Ben Dii bè Musanɛ: Ǹ pita ǹ gá! N gbɛ̃ kɛ̀ n bↄńyo Igipitinↄ yàka. ⁸ Aↄ̃ kɛ̃̀ zɛ́ kɛ̀ má ↄ̀dↄańnɛa kpakpaa, aↄ̃ vura kàsa tãa ũ lán zùswarenɛ bↄ̀rↄ bà, aↄ̃ kùɛnɛ aↄ̃ saa òa wà bè, Isarailinↄ tãa kɛ̀ à ń bↄ́ɛ Igipitin gwe. ⁹ Ben Dii lìara à bè Musanɛ: Má è gbɛ̃ pìnↄ swã gbãamɛ. ¹⁰ Ǹ gumala lɛ mà a pɛ̃tɛ̃ fɛɛńzi mà ń kaatɛ, mↄde mɛ́ n boriinↄ kɛ bíta. ¹¹ Ben Musa agbaa kpà Dii a Ludanɛ à bè: Dii, bↄ́yãnzin n pɛ̃tɛ̃ é fɛɛ n gbɛ̃nↄazi kɛ̀ n ń bↄ́ɛ Igipiti kↄ̃n n gbãa bítao kↄ̃n n gã̀sã gbãaao? ¹² Igipitinↄ é be aↄ̃ kaatɛna yãnzin n ń bↄ́ɛzi, lɛ ǹ e ǹ ń dɛdɛ kpiiinↄ musu ǹ ń yãa anduna guu. Ǹ n pↄfɛ̃ kpáɛ ǹ yã kɛ̀ ń yezi ǹ pita n gbɛ̃nↄa pì bↄ n nↄ̀sɛn. ¹³ Ǹ dↄ n zↄ̀blerinↄ Ibraĩ kↄ̃n Isaakuo kↄ̃n Isarailio yãn, zaakɛ ń sìńnɛ kↄ̃n n kuunao n bè, nɛ́ ń borii kaara lán sↄsↄnɛnↄ bà, nɛ́ bùsu kɛ̀ n à yã òńnɛ kpá ń boriinↄa wàgↄ̃ vĩ gurↄ píngi. ¹⁴ Ben Dii yã kɛ̀ à bè é pita a gbɛ̃nↄa pì bↄ̀ a nↄ̀sɛn.

¹⁵ Musa ɛ̀ara à pìta kpiiia, à doka gbɛ̀ walaa mɛ̀n plaaa pìnↄ kũna a ↄzĩ. Yã kɛ̃na gbɛ̀ pìnↄa kpa plaplaa píngi. ¹⁶ Luda bé à gbɛ̀ walaa pìnↄ à, àmbe à yã kɛ̃̀ḿma. ¹⁷ Yↄsua gbɛ̃nↄ wiii mà, ben à bè Musanɛ: Ǹ zĩ̀ wii ma dↄ bùran. ¹⁸ Musa bè: Zĩ̀blena wiii bé à dↄ gwero, wɛ̃nda ↄ́ↄdↄnan gwe sↄ̃ro, gbɛ̃nↄ lɛ̀sinan mɛ́ɛ maa. ¹⁹ Kɛ̀ à kà kĩi kↄ̃n bùrao, à è wèe ↄ̃ wãa zùswaree pì aɛ, ben à pↄ fɛ̃̀. À gbɛ̀ walaa kɛ̀ à kũna pìnↄ pã̀ɛ kpiigɛɛzi gwe, aↄ̃ wìwi. ²⁰ Ben à zùsware kɛ̀ wà pì pì sɛ̀ à dà tɛ́n. À à tí bò, ben à kà ín à kpà Isarailinↄa, aↄ̃ mì. ²¹ Ben Musa Aruna là à bè: Bↄ́n gbɛ̃ pìnↄↄ kɛ̀nnɛ, gbasa ń tò aↄ̃ durun bíta kɛ̀ taka kɛ̀? ²² Ben à wèàla à bè: Ǹton pↄ fɛ̃ro, mare. Ń gbɛ̃ pìnↄ dↄ̃, kɛ̀ aↄ̃ↄ zaa. ²³ Aↄ̃mbe aↄ̃ bèmɛ mà tãa ke kɛ à dↄńnɛ aɛ. Aↄ̃ bè Musa kɛ̀ wa bↄɛ Igipiti pì, wà dↄ̃ yã kɛ̀ à à lèro. ²⁴ Ben ma bèńnɛ gbɛ̃ kɛ̀ aↄ̃ vura vĩinↄ bↄɛ wà mↄ́o. Kɛ̀ aↄ̃ mↄ̀o, ben má kà tɛ́n, ben à bↄ̀ zùswarenɛ bↄ̀rↄ pì ũ.

²⁵ Musa è Aruna tò gbɛ̃nↄↄ e ń pↄyezi kɛɛ, ben aↄ̃ gↄ̃̀ fabona pↄ́ ũ ń ibɛɛnↄnɛ. ²⁶ Ben à zɛ̀ bùra gɛ̃kiia à bè: Gbɛ̃ kɛ̀ aↄ̃ↄ kú Dii kpaanↄ mↄ́ ma kuu. Ben Levi boriinↄ kàkↄ̃a à kuu. ²⁷ À bèńnɛ: Dii Isarailinↄ Luda bè, a baade a fɛ̃ɛdaa logo à dↄdↄ bùrazi gulɛ kↄ̃n gulɛo, a baade a gbɛ̃nↄ kↄ̃n a gbɛ̃nnanↄ kↄ̃n a gbɛ̃daaanↄ dɛdɛ. ²⁸ Levi boriinↄↄ kɛ̀ lán Musa dàńnɛ nà. Gbɛ̃ kɛ̀ wà ń dɛ́dɛ zĩ pìanↄ kà gↄ̃ↄn bↄrↄ aagↄ̃ taka. ²⁹ Ben Musa bè Levi borii pìnↄnɛ: Lán a bↄ a nɛ́nↄ kↄ̃n a gbɛ̃nↄ kpɛɛ nà, a a zĩnda kpà Diia gbã̀a, Dii aubarika dàagu gbã̀an gwe.

Musa agbaakpana Diinɛ Isarailinↄnɛ

³⁰ Kɛ̀ guu dↄ̀ Musa bè gbɛ̃nↄnɛ: A durun bíta kɛ̀, baa kↄ̃n beeeo mɛ́ ɛara mà didi kpiiia mà gá Dii kiia dↄ, wègↄ̃ dↄ̃ro ke mɛ́ e mà agbaa kpánɛare a durun yã musu. ³¹ Ben à ɛ̀ara à gàa Dii kiia à bè: N yã nna! Gbɛ̃ pìnↄ durun bíta kɛ̀, aↄ̃ tãa ke kɛ̀ ń zĩndanɛ kↄ̃n vurao. ³² Ǹ sùu kɛ! Ǹ ń durun kɛ̃ńnɛ. Tó lɛnlo, ǹ ma tↄ́ gogo takada kɛ̀ ń kɛ̃̀ guu. ³³ Dii bènɛ: Gbɛ̃ kɛ̀ durun kɛ̀mɛ tↄ́n mɛ́ gogo ma takada guu. ³⁴ Ǹ gá kↄ̃n gbɛ̃nↄ guu kɛ̀ má ònnɛɛn sa. Ma Malaika é dↄnnɛ aɛ. Baa kↄ̃n beeeo tó ma wɛ́ɛtãmmana gurↄↄ kà, mɛ́ wɛ́ɛ tãḿma ń durun yãnzi. ³⁵ Ben Dii gagyãa kà gbɛ̃nↄn zùswaree kɛ̀ aↄ̃ↄ tò Aruna pì pì yãnzi.

¹ Dii bè Musanɛ: Ǹ fɛɛ ǹ gu kɛ̀, mpi kↄ̃n gbɛ̃ kɛ̀ n bↄńyo Igipitinↄ, ǹ gáńyo bùsu kɛ̀ má la dà Ibraĩnɛ kↄ̃n Isaakuo kↄ̃n Yakubuo ma bè mɛ́ kpá ń boriinↄan. ² Mɛ́ Malaika gbarɛ à dↄare aɛ mɛ́ pɛ́are Kanaanↄa kↄ̃n Amↄrinↄ kↄ̃n Itinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo. ³ À gá bùsu kɛ̀ zwi kↄ̃n zↄ́’io din pì guu. Mↄde mɛ́ gáaoro, lɛ màton a kaatɛ zɛ́nlo yãnzi, zaakɛ swãgbãadeenↄn a ũ. ⁴ Kɛ̀ gbɛ̃nↄ yã pãsĩ pì mà, aↄ̃ ↄ́ↄ dↄ̀, ben gbɛ̃kee e a zãblebↄnↄ da dↄro. ⁵ Zaakɛ Dii gĩakɛ à yã ò Musanɛ à o Isarailinↄnɛ à be: Swãgbãadeenↄn ń ũ, baa tó ma táa òńyo kɛ̀sɛ do, mɛ́ ń kaatɛ. Aↄ̃ baade ń zãblebↄnↄ bↄbↄ, mɛ́gↄ̃ dↄ̃ dian mɛ́ kɛńyo nà. ⁶ Ben Isarailinↄ ń zãblebↄnↄ bↄ̀bↄ, aↄ̃ↄe da dↄro zaa Orɛbu kpii kiia.

⁷ Musa è bisakuta sɛ́ à gá à dↄ bùra kpɛɛ bↄruna kↄ̃n bùra pìo féte. À tↄ́ kpà kutaa pìnɛ dakↄ̃rɛki kutaa. Gbɛ̃ kɛ̀ ye Dii yãzi adee è bↄ à gá dakↄ̃rɛki kutaa pì kiia bùra kpɛɛ gwe. ⁸ Tó Musa bↄ̀ èe gaa kpɛ́ pì kiia, baade è bↄ à zɛ a kpɛɛlɛa àgↄ̃ à gwaa ai à gá à gɛ̃n. ⁹ Tó Musa gɛ̃̀ kpɛ́ pìn, tɛ́luguu è pita àgↄ̃ dↄ kpɛɛlɛa, ben Dii è yã oo. ¹⁰ Tó gbɛ̃nↄↄ è tɛ́luguu pì dↄ kpɛɛlɛ pìa, baade è dↄnzi kɛ a kpɛɛlɛ. ¹¹ Dii è yã o kↄ̃n Musao tɛ̃tɛ̃ntɛ̃, lán gbɛ̃ è yã o kↄ̃n a gbɛ̃nnao nà. Musa è ɛara à su bùran, mↄde Nuni nɛ́ Yↄsua à kpàasi è bↄ kpɛ́ pìnlo.

Dii bↄ à mↄna Musazi

¹² Musa bè Diinɛ: N bèmɛ mà gá kↄ̃n gbɛ̃ pìnↄ, mↄde nɛ́ɛ gbɛ̃ kɛ̀ nɛ́ɛ daamɛɛ omɛro. Àɛ kɛ̀ sↄ̃ n bè, ń ma dↄ̃ n gbɛ̃nna ũ bensↄ̃ ma n pↄnnaa è. ¹³ Zaakɛ ma n pↄnnaa è, ǹ tó mà n laasuunↄ dↄ̃ sa, lɛ mà e màgↄ̃ n dↄ̃ màgↄ̃ nnanyo yãpura. Ǹgↄ̃ dↄ̃ kɛ̀ borii kɛ̀kii nɛ́ n gbɛ̃nↄmɛ. ¹⁴ Ben Dii wèàla à bè: Ma wɛ́ɛ égↄ̃ tɛ́azi mà a gba kámmabona. ¹⁵ Musa bè: Tó nɛ́ wɛ́ɛ tɛ́waziro, ǹton wa fɛɛ kɛ̀ro. ¹⁶ Tó nɛ́ɛ gáwaoro, dian weé e wà dↄ̃ kɛ̀ mapi kↄ̃n n gbɛ̃ pìnↄ wá nnanyo? Weé wa dↄ̃kↄ̃zi kↄ̃n bori pãndenↄ anduna guu diamɛ? ¹⁷ Dii bènɛ: Yã kɛ̀ ń gbèkamaa pì mɛ́ kɛ, zaakɛ n ma pↄnnaa è, má n dↄ̃ ma gbɛ̃nna ũ.

¹⁸ Musa bè: Ǹ n gakui ↄdↄamɛ. ¹⁹ Ben Dii wèàla à bè: Mɛ́ tó ma maakɛ píngi bↄ n aɛ, mɛ́ ma tↄ́ Dii sísi n aɛ, zaakɛ gbɛ̃ kɛ̀ má yezi mà sùu kɛon mɛ́ kɛo, bensↄ̃ gbɛ̃ kɛ̀ má yezi mà wɛ̃nda dↄ̃nɛn mɛ́ dↄ̃nɛ. ²⁰ Ben à bè: Nɛ́ fↄ̃ ǹ ma uu gwaro, zaakɛ gbɛ̃ntee é fↄ̃ à wɛ́ɛ simalɛ àgↄ̃ kuuro. ²¹ Dii bè: Ǹ guu gwa da ma saɛ kɛ̀. Ǹ zɛ gbɛ̀ musu gwe. ²² Tó ma gakui pì e gɛ̃ɛ, mɛ́ n sↄtↄ gbɛ̀kotoon mà a ↄↄ kúnla ai mà gɛ̃tɛ. ²³ Tó ma a ↄↄ gònla, nɛ́ ma kpɛɛ kpaa e sa, mↄde weé fↄ̃ wà ma uu ero.

Gbɛ̀ walaa dufunↄ

¹ Dii bè Musanɛ: Ǹ gbɛ̀ walaa kɛ mɛ̀n plaa lán káakupↄnↄ bà, mɛ́ yã kɛ̀ kú à káakupↄ kɛ̀ ń wìnↄa kɛ̃ḿma. ² Ǹgↄ̃ kú soru guu kↄngↄ. Ǹ didi Sinai kpiiia ǹ zɛ ma aɛ à mìsↄ̃ntɛ̃a. ³ Gbɛ̃ke tón mↄ́nyoro. Wàton gbɛ̃ke e gukea kpiii pìa sero. Baa sãa ke zù tón mↄ́ pↄ́ ble à gĩzĩro.

⁴ Musa gbɛ̀ walaa à mɛ̀n plaa lán káakupↄnↄ bà. À fɛ̀ɛ kↄngↄ idɛ’idɛ, ben à dìdi Sinai kpiiia à gbɛ̀ walaa mɛ̀n plaaa pìnↄ kũna a ↄzĩ lán Dii ònɛ nà. ⁵ Dii pìta tɛ́sukpɛ guu à zɛ̀ à saɛ, ben à a zĩnda tↄ́ sìsi. ⁶ Kɛ̀ Dii e gɛ̃ɛ à aɛ, à a tↄ́ sìsi à bè: Dii, Dii Luda wɛ̃ndadↄ̃nnɛri sùudeen ma ũ. Ma pↄↄ è fɛ̃ kpaaro, má gbɛ̃kɛ kↄ̃n náanɛo vĩ bíta. ⁷ Mɛɛ̀gↄ̃ gbɛ̃kɛɛ vĩ kↄ̃n gbɛ̃nↄo ai ń bori lɛ́mmɛ, mɛ́ ń yã zaaanↄ kɛ̃ńnɛ kↄ̃n ń taarinↄ kↄ̃n ń durunnↄo. Mↄde mɛɛ̀ tó taaridee bↄ pãro. Mɛɛ̀ denↄ yã zaaa wí ń nɛ́nↄ musu kↄ̃n ń dionↄ kↄ̃n ń swãkpɛɛnↄ kↄ̃n ń nasionↄo. ⁸ Musa dàɛ a puua à dↄnzi kɛ̀nɛ gↄ̃ↄ ⁹ à bè: Dii, zaakɛ ma n pↄnnaa è, ǹ gáwao. Baa kɛ̀ gbɛ̃ pìnↄ swã gbãa, ǹ sùu kɛwao kↄ̃n wa yã zaaanↄ kↄ̃n wa durunnↄo, ǹ wa sɛ́ n pↄ́nↄ ũ.

Luda bà kuuna kↄ̃n Isarailinↄ

(Bↄn 23:14-19)

¹⁰ Dii bè: Ma bà égↄ̃ kúaomɛ. Mɛ́ yãbↄnsaɛ kɛ a píngi wáa kɛ̀ gbɛ̃kee e a taka kɛ bori ke guu andunan zikiro. Borii kɛ̀ aↄ̃ↄ ligaaziinↄ é ma yãkɛna e, zaakɛ mɛ́ yã naasidee kɛao. ¹¹ Àgↄ̃ yã kɛ̀ má òare gbã̀a kũna, mɛ́ pɛ́are Amↄrinↄa kↄ̃n Kanaanↄ kↄ̃n Itinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo. ¹² À làakari kɛ! Àton lɛdolɛ kɛ kↄ̃n bùsu kɛ̀ ée gaa gɛ̃n deenↄoro, lɛ àton takutɛɛ kpákpa a zĩndanɛro yãnzi. ¹³ À ń sa’okiinↄ gboro à ń tãa gbɛ̀nↄ wíwi à Asɛra línↄ zↄ̃zↄ̃. ¹⁴ Àton kúɛ tãanɛro, zaakɛ mamↄma Dii ma tↄ́n Nↄ̀sɛgↄ̃aanↄ, mɛɛ̀ nↄ̀sɛgↄ̃aanↄ kpá. ¹⁵ À làakari kɛ! Àton lɛ́dolɛ kɛ kↄ̃n bùsu pì deenↄoro, zaakɛ tó aↄ̃ↄe pãpãa kɛɛ ń tãanↄ yã musu, aↄ̃ↄe saa ooḿma, aↄ̃é a sísi à ń sa’onↄbↄ sóńyomɛ. ¹⁶ Àton nↄↄ sɛ́ a nɛ́nↄnɛ ń tɛ́ro, zaakɛ tó aↄ̃ nɛ́nↄgbɛ̃nↄↄ e pãpãa kɛɛ ń tãanↄ yã musu, aↄ̃é tó a nɛ́nↄ pãpãa kɛńyo se. ¹⁷ Àton mↄ̀ pi tãa ũro.

¹⁸ Àgae Burɛdi Sɛ́sɛ’ɛ̃zɛ̃sai zĩbaa kɛ. Àgae burɛdi sɛ́sɛ’ɛ̃zɛ̃sai só gurↄ swɛɛplaa mↄↄ kɛ̀ wè sísi Abibu guu lán má dìɛare nà, zaakɛ mↄↄ pì guun a bↄɛ Igipiti. ¹⁹ A daudunↄ nɛ́ ma pↄ́nↄmɛ ń píngi kↄ̃n a pↄ́kãde nɛ́kya káakunↄ ń píngi, zù ke pↄ́ ketenↄ. ²⁰ Àgae zaaki nɛ́kya káaku bo kↄ̃n sãao. Tó ée boro, à à waa fĩ à dɛ. Àgae a daudunↄ bo. Gbɛ̃ke tón mↄ́ ma kiia ↄkoriro. ²¹ Àgae zĩi kɛ gurↄ swɛɛdo à kámma bo à gurↄ swɛɛplaadee zĩ, baa búwigurↄ ke pↄ́kɛ̃gurↄ.

²² Àgae Pↄ́kɛ̃na zĩbaa kɛ gurↄↄ kɛ̀ a na bura pↄ́ káaku kɛkɛnaa. Àgae Pↄ́dufublena zĩbaa kɛ wɛ̃̀ yãanaa. ²³ Wɛ̃̀ kↄ̃n wɛ̃̀o gↄ̃gbɛ̃ píngi gae mↄ́ mamↄma Dii Isarailinↄ Luda aɛzĩ gɛ̃̀n aagↄ̃. ²⁴ Mɛ́ pɛ́are boriinↄa mɛ́ a bùsu lɛ́ kaaraare. Gbɛ̃ke é a bùsu nii dɛ gurↄↄ kɛ̀ ée mↄↄ mamↄma Dii a Luda aɛzĩ wɛ̃̀ kↄ̃n wɛ̃̀o gɛ̃̀n aagↄ̃ro. ²⁵ Àton pↄ́sɛsɛna kpáma lɛdo kↄ̃n sa’opↄ aruoro. Àton Banla sa’onↄbↄ diɛ guu dↄ̀aro. ²⁶ Àgae gá mamↄma Dii a Luda ua kↄ̃n a bura pↄ́ káakunↄ. Àton blènɛ nↄ̀bↄ kuku kↄ̃n à da yↄ̃’ioro.

²⁷ Ben Dii bè Musanɛ: Ǹ yã pìnↄ kɛ̃ takadan, zaakɛ ma bà kuunanyo kↄ̃n Isarailinↄ yãnↄmɛ. ²⁸ Musa kú kↄ̃n Diio gwe ai gurↄ baplaa fãantɛ̃ kↄ̃n gwãavĩo pↄ́blena sai ímina sai. Ben Dii a bà kuunańyo yã mɛ̀n kurinↄ kɛ̃̀ gbɛ̀ walaa pìnↄa.

Musa uu tɛ́kɛna

²⁹ Kɛ̀ Musa pìta Sinai kpiiia, à gbɛ̀ walaa mɛ̀n plaaa kɛ̀ doka kɛ̃a pìnↄ kũna a ↄzĩ. À dↄ̃ kɛ̀ a uu e tɛ́ kɛɛ aↄ̃ yã’ona kↄ̃n Diio yãnziro. ³⁰ Kɛ̀ Aruna kↄ̃n Isarailinↄ à è ń píngi, à uu e tɛ́ kɛɛ, vĩa ń kũ wà sↄ̃zi. ³¹ Ben Musa ń sísi. Aruna kↄ̃n gbɛ̃nsinↄ ɛ̀ara wà mↄ̀ à kiia, ben à yã òńyo. ³² Beee gbɛra Isarailinↄ sↄ̃̀zi ń píngi, ben à yã kɛ̀ Dii dìɛnɛ Sinai kpiii musu òńnɛ píngi. ³³ Kɛ̀ à yã òńnɛ à yã̀a, à sáta kù a uua. ³⁴ Tó à gɛ̃̀ à yã o Diio, è sáta go lɛ à kpɛ́ à bↄ. Tó à bↄ̀, è yã kɛ̀ Dii dìɛnɛ o Isarailinↄnɛ, ³⁵ ben aↄ̃è e kɛ̀ à uu e tɛ́ kɛɛ. Musa è ɛara à sáta kú a uua lɛ à kpɛ́ à gɛ̃ à yã o Diio.

Bisakuta kyakɛna

¹ Dii bè Musanɛ: ² Ǹ kutaa dↄ kɛ̀ dɛ dakↄ̃rɛki kutaa ũ mↄ káakun gurↄ káaku zĩ ³ ǹ àkpati kɛ̀ doka gbɛ̀ walaanↄↄ kú à guu diɛn ǹ lábure mↄ̀ kpázi. ⁴ Ǹ gɛ̃ kↄ̃n teebu mↄ̀o ǹ à taanↄ káɛa zɛ́azɛa. Ǹ gɛ̃ kↄ̃n dabu mↄ̀o ǹ à fitianↄ kɛkɛ. ⁵ Ǹ vura tuaetitikpatakii mↄ̀ diɛ doka àkpati aɛ ǹ kuta kpɛɛlɛ lábure logo ǹ tataàlɛ. ⁶ Ǹ sa’opↄ kɛ̀ wè ká tɛ́n à tɛ́ kũ okii diɛ dakↄ̃rɛki kpɛɛlɛa, ⁷ ǹ dàga mↄ̀ diɛ dakↄ̃rɛki kutaa dagura kↄ̃n sa’okiio ǹ í kán. ⁸ Ǹ kara mↄ̀ kpá ǹ ligazi, ǹ lábure kpá kara pì lɛ́a.

⁹ Ǹ pↄ́ kyakɛnↄsi mↄ̀ sɛ́ ǹ kú kpɛ́ pìa kↄ̃n pↄ́ kɛ̀ kú à guunↄ píngi ǹ diɛ ma pↄ́ ũ kↄ̃n à zĩkɛbↄnↄ, aↄ̃é gↄ̃ ma pↄ́ ũ. ¹⁰ Ǹ nↄ́si pì kú sa’okii pìa kↄ̃n a zĩkɛbↄnↄ píngi. Ǹ sa’okii pì diɛ ma pↄ́ ũ, eégↄ̃ dɛ ma pↄ́ ũ dɛńla. ¹¹ Ǹ nↄ́si pì kú dàga pìa kↄ̃n a dibↄo, aↄ̃é gↄ̃ ma pↄ́ ũ. ¹² Ǹ mↄ́ kↄ̃n Arunao kↄ̃n a nɛ́nↄ dakↄ̃rɛki kpɛɛlɛa ǹ ń zú o gwe. ¹³ Ǹ sa’ori pↄ́kãsãa mↄ̀nↄ da Arunanɛ, ǹ nↄ́si kúa ǹ à diɛ ma pↄ́ ũ, eé gↄ̃ ma gbã̀gbãri ũ. ¹⁴ Ǹ mↄ́ kↄ̃n à nɛ́nↄ dↄ ǹ utagyaba mↄ̀nↄ dadańnɛ, ¹⁵ ǹ nↄ́si kúkuḿma lán ń kù ń dea nà, aↄ̃é ma gbãgbã. Nↄ́sikuḿmana pì bé eé tó aↄ̃gↄ̃ dɛ ma gbã̀gbãrinↄ ũ ai ń boriia. ¹⁶ Musa kɛ̀ lán Dii ònɛ nà píngi.

¹⁷ Aↄ̃ bↄna Igipiti wɛ̃̀ plaade mↄ káaku gurↄ káaku zĩn wà kutaa pì dↄ̀. ¹⁸ Kɛ̀ Musa e kutaa pì dↄↄ, à à zɛbↄ mↄ̀nↄ pɛ̀ɛpɛɛ gĩa, ben à à lípɛɛ mↄ̀nↄ pɛ̀pɛn à à líkpannↄ kpàkpan, ben à lípɛɛnↄ pɛ̀ɛpɛɛ. ¹⁹ À bisa dààla, ben à báa kpààla lán Dii ònɛ nà. ²⁰ À sèeda gbɛ̀ walaanↄ sɛ̀ à kà àkpati pì guu, à àkpati pì sɛ́linↄ dà à zãanↄ guu, ben à à nɛ́ kùɛa. ²¹ À gɛ̃̀o kpɛ́n, ben à lábure kpà sèeda àkpati pìzi lán Dii ònɛ nà. ²² À teebu dìɛ dakↄ̃rɛki kutaan lábure pì kpɛɛlɛ kpa gu’igbãroo kpa. ²³ À burɛdi kàɛa Diinɛ zɛ́azɛa lán à ònɛ nà. ²⁴ À dabu dìɛ dakↄ̃rɛki kutaan aɛdↄkↄ̃ana teebua sↄↄmɛtɛ kpa, ²⁵ à fitianↄ nàna Dii aɛ lán à ònɛ nà. ²⁶ Ben à vura tuaetitikpatakii pì dìɛ dakↄ̃rɛki kutaan lábure saɛ, ²⁷ ben à tuaetiti gũ nnaa kpàtaa lán Dii ònɛ nà. ²⁸ Ben à lábure kpà kutaa pì lɛ́a.

²⁹ À sa’opↄ kɛ̀ wè ká tɛ́n à tɛ́ kũ okii dìɛ dakↄ̃rɛki kpɛɛlɛa, ben à sa’opↄ kɛ̀ wè ká tɛ́n à tɛ́ kũ òa kↄ̃n flawao lán Dii ònɛ nà. ³⁰ À dàga mↄ̀ dìɛ dakↄ̃rɛki kutaa dagura kↄ̃n sa’okiio, ben à í kàn. ³¹ Gwen Musa kↄ̃n Arunao kↄ̃n a nɛ́gↄ̃gbɛ̃nↄ è ń ↄↄnↄ kↄ̃n ń gbánↄ pípin. ³² Tó aↄ̃ↄe gɛ̃ɛ dakↄ̃rɛki kutaan, ke tó aↄ̃ↄe sↄ̃ↄ sa’okiizi, aↄ̃è ń ↄↄnↄ kↄ̃n ń gbánↄ pípin lán Dii ò Musanɛ nà. ³³ Ben à kara kpà à lìga kutaa pìzi kↄ̃n sa’okiio, ben à lábure kpà kara pì lɛ́a. Lɛn Musa zĩi pì kɛ̀ à yã̀a lɛ.

Dii gakui pitana bisakutaan

(Nar 9:15-23)

³⁴ Ben tɛ́luguu pì dà dakↄ̃rɛki kutaa pìla, Dii gakui kutaa pì pà. ³⁵ Musa e fↄ̃ à gɛ̃̀ dakↄ̃rɛki kutaa pìnlo, kɛ̀ tɛ́luguu dààla bensↄ̃ kɛ̀ Dii gakui kutaa pì pà yãnzi.

³⁶ Isarailinↄ táa’ona guu, tó tɛ́luguu pì gò kutaa pìa, ben aↄ̃è fɛɛ kↄ̃n táo. ³⁷ Tó tɛ́luguu pì e goaro, aↄ̃è fɛɛ kↄ̃n táoro, sé zĩ kɛ̀ à gòa. ³⁸ Fãantɛ̃ Dii tɛ́luguu è da kutaa pìla, gwãavĩ sↄ̃ tɛ́ ègↄ̃ kú tɛ́luguu pì guu. Lɛn Isarailinↄ è e lɛ ń píngi ń táa’ona guu píngi.