1 PITA

PITA TAKADA KAAKU

Tãmaa kɛ̀ è ń nɛroo

¹ Mamↄma Pita, Yesu Kirisi zĩ̀ri bé à takada kɛ̀ kɛ̃̀ Luda gbɛ̃ kɛ̀ aↄ̃ↄ dɛ nibↄnↄ ũ anduna kɛ̀ guu, kɛ̀ aↄ̃ↄ fãakↄ̃ana bùsu kɛ̀kiinↄ guunↄnɛ: Pↄntu, Galatia, Kapadosia, Asia kↄ̃n Bitiniao. ² De Luda gĩakɛ à a dↄ̃, ben à a sɛ, a gↄ̃ à pↄ́ ũ kↄ̃n à Ninii gbãaao, lɛ à mì siɛ Yesu Kirisinɛ, à aru a gbãsĩ gogo. Luda gbɛ̃kɛ kↄ̃n aafiao kaaraare.

³ Wà Luda wa Dii Yesu Kirisi De sáabu kpá! À sùu bíta guu à wa i dufu kↄ̃n Yesu Kirisi fɛɛna gaan gbãaao, ben wá tãmaa kɛ̀ è ń nɛroo vĩ, ⁴ zaakɛ túbi kɛ̀ diɛnaare ludambɛɛ pì è yakaro, è gbãsĩ kpáro, à maaa è yãaro. ⁵ Luda sorumi mà, lɛ à a mì sí a náanɛ kɛ̀ ée kɛɛ yãnzi, ben èe a dãkpaa kↄ̃n a gbãaao ai à gá bↄ mìsina pìo gupuraaa gurↄ zãanↄa. ⁶ Ée pↄnnaa kɛɛ kↄ̃n yã pìo, baa kɛ̀ é nawɛ̃a kɛ gĩa féte yↄ̃agwana bori sãnda píngi yãnzi. ⁷ Lán wè vura maaa dↄ̃ tɛ́ guu nà, lɛn yↄ̃agwana pìnↄↄ e a ludanaanɛkɛna yↄ̃ↄ à gwa lɛ, zaakɛ a ludanaanɛkɛna pì bɛ̀ɛ vĩ dɛ vura kɛ̀ à gakui è yãala maamaa. Tó a bↄ maa, Luda é a sáabu kpá Yesu Kirisi sugurↄↄ zĩ, eé a kpe da kↄ̃n gakuio. ⁸ Baa kɛ̀ ée à ero, á yezi. Baa kɛ̀ ée wɛ́ɛ siàlɛ zikiro, ée à náanɛ kɛɛ, ben ée pↄnna bíta kɛ̀ gɛ̃̀ onalaa kɛɛ, ⁹ kɛ̀ ée a ludanaanɛkɛna gbɛ̀ ee a mìsina ũ yãnzi.

¹⁰ Annabinↄ gĩakɛ wà gbɛ̃kɛɛ kɛ̀ Luda é kɛao yã ò, aↄ̃ mìsina pì yã gwà, aↄ̃ à tàasi kɛ̀. ¹¹ Kirisi Ninii kɛ̀ kú ń guu gĩakɛ à nawɛ̃a kɛ̀ Kirisi pì é kɛɛ òńnɛ kↄ̃n gakui kɛ̀ eé e à gbɛraao, ben aↄ̃ↄ wɛ̀tɛ wà yã pì zɛ́ dↄ̃ kↄ̃n à gurↄↄo. ¹² Ben Ludaa tò aↄ̃ dↄ̃̀ kɛ̀ yã kɛ̀ aↄ̃ↄe oo pì dɛ ń gurↄ pↄ́ ũro, a pↄ́mɛ. Tia sa baarunnakparinↄ yã pì òare kↄ̃n Luda Nini kɛ̀ Luda pì zĩ̀ bↄna ludambɛɛ gbãaao. Baa malaikanↄↄ e ↄsi kaa yã pì dↄ̃nazi.

Kuuna adona

¹³ Beee yãnzi à a laasuu vu iin, àgↄ̃ a zĩnda kũna dↄ̃, a wɛ́ɛ gↄ̃ dↄ gbɛ̃kɛɛ kɛ̀ Luda é kɛare Yesu Kirisi sugurↄↄ zĩzi seka sai. ¹⁴ Lán á dɛ Luda nɛ́ kɛ̀ aↄ̃ↄe à yã maanↄ ũ nà, àton tó dà zaaa kɛ̀ á vĩ yã a wɛ́ɛsiagurↄↄ dↄare aɛro. ¹⁵ Ludaa kú adonamɛ. Lán à a sisi à a sɛ nà, àgↄ̃ kú adona a yãkɛna píngi guu. ¹⁶ Zaakɛ wà kɛ̃̀ Luda yãn wà bè:

Àgↄ̃ kú adona,

zaakɛ má kú adonamɛ.

¹⁷ Zaakɛ Luda è yãkpaɛ kɛ kↄ̃n baadeo a yãkɛnaa ń wɛ́ɛ gwana sai, tó ée à sisii De, à vĩa kɛnɛ a nibↄkɛɛ guu kɛ̀. ¹⁸ Á dↄ̃ lán Luda a bↄ kuuna kori kɛ̀ dɛ a fɛɛakaarayã ũu guu nà. Ludaa e a bo kↄ̃n pↄ́ kɛ̀ à gakui è yãaoro lán vura ke kondogi bà, ¹⁹ à a bo kↄ̃n Kirisi aru gakuideeomɛ, kɛ̀ dɛ lán sãnɛ bↄ̀rↄ kɛ̀ bↄ̀gbɛ vĩro à gbãsĩ vĩroo bà. ²⁰ Luda gĩakɛ à à dìɛ zaalɛ èe anduna káɛro, ben à bↄoare gupuraaa gurↄ zãa kɛ̀nↄ zĩ. ²¹ Beee yãnzin ée Luda náanɛ kɛɛzi. Luda à bↄ̀ gaan à gakui kpàa, lɛ à e à a náanɛ kɛ, a wɛ́ɛ gↄ̃ dↄzi.

²² Lán mìsiɛna yãpuraanɛ a gbãsĩ gògo nà, ben á gbɛ̃kɛɛ vĩ kↄ̃o mↄnafiki sai, àgↄ̃ yekↄ̃zi kↄ̃n nↄ̀sɛo do. ²³ Luda a i dufu kↄ̃n a yã wɛ̃̀ndidee kɛ̀ ègↄ̃ kuu gbãaao. Yã pì dɛ pↄ́borii kɛ̀ è gaa ũro, pↄ́borii kɛ̀ è garoomɛ.

²⁴ Baade píngi dɛ lán sɛ̃̀ bàmɛ,

aↄ̃ gakui dɛ lán sɛ̃̀vu bàmɛ píngi.

Sɛ̃̀ è gaga, à vú è kwɛ́,

²⁵ mↄde Dii yã ègↄ̃ kuu gurↄ sãnda píngi.

Yã pì bé à dɛ baaru nnaa kɛ̀ wà kpàaree ũ.

Gbɛ̀ wɛ̃̀ndidee

¹ Beee yãnzi à yã zaa píngi tó kↄ̃n ɛgɛtona píngio kↄ̃n mↄnafikio kↄ̃n nↄ̀sɛgↄ̃aanↄo kↄ̃n kↄ̃yakanao. ² Lán nɛ́kpãntɛ̃nↄ ègↄ̃ yↄ̃’i ni dɛɛ nà, àgↄ̃ Luda yã kɛ̀ dɛ lán zwi’ipu wásawasa bà ni dɛɛ lɛ se, lɛ à e à bíta kũ a mìsina zɛ́ guu, ³ tia sa kɛ̀ á dↄ̃̀ kɛ̀ Dii maa. ⁴ À sↄ̃zi, àmbe gbɛ̀ wɛ̃̀ndidee kɛ̀ wà gìzi ũ, mↄde Luda à sɛ̀ bɛ̀ɛdee ũ. ⁵ Apinↄ sↄ̃, ámbe gbɛ̀ wɛ̃̀ndidee kɛ̀ Ludaa e a kpɛ́ ɛ̃ɛ booonↄ ũ. Ámbe à gbã̀gbãrinↄ ũ, eè saa kɛ̀ è kánɛ o kↄ̃n à Ninii gbãaao Yesu Kirisi gãzĩ. ⁶ Zaakɛ wà kɛ̃̀ Luda yãn wà bè:

Ǹ gwa, mɛ́ɛ gbɛ̀ diɛɛ Zayↄn,

ɛ̃daɛgbɛ bɛ̀ɛdee kɛ̀ má sɛ̀ ũ.

Wí é gbɛ̃ kɛ̀ èe à náanɛ kɛɛ kũro.

⁷ À dɛ gbɛ̀ bɛ̀ɛdee ũ amↄa kɛ̀ ée à náanɛ kɛɛnↄnɛ, mↄde à dɛ lɛ gbɛ̃ kɛ̀ aↄ̃ↄe à náanɛ kɛɛroonↄnɛro.

Gbɛ̀ kɛ̀ kpɛ́borinↄ pã kpàzi

bé à gↄ̃̀ kpɛ́ gooda gbɛ̀ mìdee ũ.

⁸ Lɛmɛ dↄ à dɛ:

Gbɛ̀ kɛ̀ wè gɛ̃̀n sía ũ,

gbɛ̀si kɛ̀ wè kpáàla wà lɛ́ɛ ũ.

Aↄ̃ gɛ̃̀n sìa, kɛ̀ aↄ̃ↄe Luda yã daro yãnzi. Lɛn Ludaa dìɛńnɛ lɛ.

⁹ Ámbe borii kɛ̀ Luda ń sɛ́nↄ ũ, kínanↄ kↄ̃n sa’orinↄ ũ, à gbɛ̃ kɛ̀ aↄ̃ↄ kú adonanↄ ũ, lɛ àgae Luda kɛ̀ à a sisi a bↄ gusiaan, à gɛ̃̀ao a gupura bↄnsaɛ guu sáabu kpá.

¹⁰ Á dɛ Luda gbɛ̃nↄ ũ yãro,

mↄde tia a gↄ̃ ń ũ.

Ludaa e sùu kɛao yãro,

mↄde tia à kɛ̀ao.

Kuuna ludanaanɛkɛrisainↄ tɛ́

¹¹ Ma gbɛ̃ yenzideenↄ, lán á dɛ nibↄ kↄ̃n bↄ̀amↄnↄ ũ nà anduna kɛ̀ guu, mɛ́ɛ lɛ́ daaawamɛ, à mì kɛ̃ a dà zaaa kɛ̀ aↄ̃è zĩ̀ káaonↄa. ¹² Àgↄ̃ kuu gbɛ̃ bɛ̀ɛdeenↄ ũ kifiinↄ tɛ́. Lɛmɛ baa tó aↄ̃ a diɛ zaakɛrinↄ ũ, tó aↄ̃ yã maaa kɛ̀ ée kɛɛnↄ è, aↄ̃é Luda sáabu kpá gurↄↄ kɛ̀ eé mↄ́ńzi.

¹³ À mì siɛ ikodee kɛ̀ gbɛ̃ntee dìɛnↄnɛ ń píngi Dii yãnzi, kína kɛ̀ gbãa vĩ dɛńlaan yoo, ¹⁴ ke gbãadee kɛ̀ à dìɛ à wɛ́ɛ tã zaakɛrinↄa à maakɛrinↄ sáabu kpá. ¹⁵ Luda pↄyezin yɛ̀: A yãmaakɛna sàabu é yↄ̃nkↄ wɛ́ɛsiadeenↄ lɛ́ yĩtɛńnɛ. ¹⁶ Àgↄ̃ wɛ̃ɛnɛnↄ ũ, mↄde àton tó a gↄ̃na wɛ̃ɛnɛnↄ ũu gↄ̃are zaakɛna zɛ́ ũro. Àgↄ̃ kuu Luda zↄ̀blerinↄ ũ. ¹⁷ À bɛ̀ɛ li gbɛ̃ pínginɛ. Àgↄ̃ ye a Yesude daanↄzi. À vĩa kɛ Ludanɛ. À bɛ̀ɛ lí kínanɛ.

¹⁸ Zĩkɛrinↄ, à mì siɛ a diinↄnɛ, à bítakɛɛ dↄ̃ńnɛ yã píngi guu. Èe kɛ dii maa nↄ̀sɛdodeenↄnɛ ńtɛ̃ɛnlo, mↄde kↄ̃n ń gbɛ̃ pãsĩnↄomɛ se. ¹⁹ Tó wà wɛ́ɛ tã̀awa pã, tó a mɛna fↄ̃̀ Luda yãnzi, bee sáabu vĩare. ²⁰ Tó wà a gbɛ̃ a taari yãnzi, tó a mɛna fↄ̃̀, bee tↄ́ nnaa vĩ máa? Mↄde tó a nawɛ̃a kɛ̀ yã maaa kɛ̀ á kɛ̀ yãnzi, tó a mɛna fↄ̃̀, Luda é a sáabu kpá. ²¹ Beee yãnzin Luda a sisi à a sɛzi. Kirisi nawɛ̃a kɛ̀are, à zɛ́ ↄ̀dↄaare, lɛ àgↄ̃ tɛ́ à kɛ̀sɛgbɛzi yãnzi.

²² Èe durun kɛro,

wèe ma à ɛgɛɛ tòro.

²³ Kɛ̀ wà à sↄ̃̀sↄ̃, èe yã síńlaro. Kɛ̀ à nawɛ̃a kɛ̀, èe yã pãsĩ ke ońnɛro, à zɛ̀ kↄ̃n Luda yãkpaɛkɛri maaaomɛ. ²⁴ Àmbe à wa durunnↄ dì a mìa à gào lía, lɛ wa bà tóngↄ̃ kú kↄ̃n durunnↄ dↄro, wàgↄ̃ kú maakɛna guu. À flã̀gbɛnↄ bé wà wa gba aafia. ²⁵ Zaakɛ a sãsã lán sãanↄ bà yã, ben a aɛ dↄ̀ a Dã̀ri kↄ̃n a Dãkparioa tia sa.

Kuuna kↄ̃o

¹ Nↄgbɛ̃nↄ sↄ̃, à a zĩnda kpá a zãnↄa. Tó aↄ̃ gbɛ̃kenↄ e Luda yã daaro, a kuuna é ń liɛ. Baa tó ée yãke ońnɛro, ² aↄ̃é e kɛ̀ á kuu gbãsĩ sai, bensↄ̃ a a zĩnda kpàḿma. ³ Àton tó a nↄmaakɛɛ gↄ̃ mɛ̀baa pↄ́ ũro, mìtãna ke nↄmaablebↄnↄ ke pↄ́kãsãdanan yoo. ⁴ Mↄde àgↄ̃ dɛ a nↄ̀sɛ guu yã kɛ̀ è yãaroo ũ, nↄ̀sɛyĩi kↄ̃n zĩndabusanao. Beee bé à bɛ̀ɛ vĩ Ludanɛ. ⁵ Zaakɛ lɛn nↄgbɛ̃ dↄnziri kɛ̀ aↄ̃ wɛ́ɛ dↄ Ludazi yãanↄ ń zĩnda kɛ̀kɛ lɛ, aↄ̃ ń zĩnda kpà ń zãnↄa. ⁶ Lɛn Sara dɛ lɛ, è Ibraĩ yã ma, è à sísi Baa. Tó ée yã maaa kɛɛ, tó ée pↄ́ kɛ̀ wè vĩa kɛnɛ yã daaro, a Sara dà sɛ̀n gwe. ⁷ Gↄ̃gbɛ̃nↄ sↄ̃, àgↄ̃ kúńyo nↄgbɛ̃kɛɛ dↄ̃nańnɛ guu, àgae yã maḿma, lɛ pↄ́ke tón kpáare a aduakɛna guuro, zaakɛ á dɛ wɛ̃̀ndi gbablerinↄ ũ lɛdomɛ.

⁸ Beee gbɛra àgↄ̃ lɛdolɛ vĩ kↄ̃o a píngi. Àgↄ̃ kↄ̃ wɛ̃nda dↄ̃, àgↄ̃ yekↄ̃zi, àgↄ̃ gbɛ̃kɛɛ vĩ kↄ̃o, à busakↄ̃nɛ. ⁹ Àtongae à zaaa fĩa bo kↄ̃n à zaaaoro. Àtongae gbɛ̃ kɛ̀ à a sↄ̃sↄ̃ sↄ̃sↄ̃ro. À sa maaa onɛ, zaakɛ Luda a sisi, lɛ à aubarika daagu yãnzimɛ.

¹⁰ Gbɛ̃ kɛ̀ yezi a wɛ̃̀ndi gↄ̃ maa,

bensↄ̃ à yezi a kuuna gↄ̃ nna,

à a lɛ́ kũ kↄ̃n yãzaa’onao,

àton tó ɛgɛɛ bↄ a lɛ́nlo.

¹¹ Adee kpɛɛ li à zaaanɛ, à à maaa kɛ,

à aafia zɛ́ wɛtɛ, àgↄ̃ tɛ́zi.

¹² Zaakɛ Dii ègↄ̃ gbɛ̃ maaanↄ tàasi kɛ,

è swã kpá ń aduakɛnanↄzi,

mↄde è mìkpɛɛ zu zaakɛrinↄnɛ.

Nawɛ̃akɛna maakɛna yãnzi

¹³ Tó á aĩa vĩ kↄ̃n maakɛnao, dé bé eé wɛ́ɛ tãawaa? ¹⁴ Baa tó a nawɛ̃a kɛ̀ maakɛna yãnzi, á aubarika vĩ. Àtongae vĩa kɛ aↄ̃ wɛ́ɛtãmmananɛro, àton tó a swɛ̃̀ degero. ¹⁵ À Kirisi dↄ̃ Dii ũ a swɛ̃̀ guu. Àgↄ̃ kú soru guu gurↄ píngi, lɛ à e à yã we gbɛ̃ kɛ̀ èe a laa yã kɛ̀ á wɛ́ɛ dↄzi mìzila. ¹⁶ Àgae ońnɛ busɛbusɛ kↄ̃n bɛ̀ɛlinnɛnao. À ońnɛ kↄ̃n nↄ̀sɛpuraao dↄ, lɛ wí gbɛ̃ kɛ̀ aↄ̃ↄe a sↄ̃sↄ̃ↄ a yãmaakɛna Yesu zɛ́n yãnzinↄ kũ. ¹⁷ Nawɛ̃akɛna Luda pↄyezi guu yãmaakɛna yãnzi maa dɛ nawɛ̃akɛna yãzaakɛna yãnzila.

¹⁸ Kirisi gà gɛ̃̀n do durunkɛ̃nnɛna yãnzi. Taarisaidee gà wamↄwa taarideenↄ yãnzi, lɛ à e à gáwao Luda kiia. Wà à dɛ̀ mɛ̀baa guu, ben Luda à vù ninikɛɛ guu. ¹⁹ À ninikɛɛ pì guu à gàa à waazi kɛ̀ gɛ̀wãadee kɛ̀ wà ń ká kpɛ́siaannↄnɛ. ²⁰ Aↄ̃ bↄ̀ Luda yã kpɛɛmɛ yã, gurↄↄ kɛ̀ à mɛna ai Nuu gàa à góro’itɛ kɛ̀ à yã̀ao. Gbɛ̃ kɛ̀ aↄ̃ bↄ̀ ín aafia góro pì gãzĩnↄↄ pariro, gↄ̃ↄn sↄraagↄ̃mɛ. ²¹ Í pì bé à dɛ a batisikɛna kɛ̀ è a mì sí tiaa taka ũ. Batisikɛna pì nɛ́ mɛ̀ gbãsĩgogona yãnlo, lɛ́gbɛ̃na Ludanɛ kↄ̃n nↄ̀sɛpuraaomɛ. È ń mì sí, kɛ̀ Yesu Kirisi bↄ̀ gaan yãnzi. ²² À gbãaa blè malaikanↄa kↄ̃n tãanↄo kↄ̃n ń gbãadeenↄ kↄ̃n ń ikodeenↄ, ben à tà ludambɛ, à kú Luda ↄplaazi.

Bↄna kuuna ziin

¹ Lán Kirisi nawɛ̃a kɛ̀ a mɛ̀baan nà, apinↄ se à nↄ̀sɛ beee bori sɛ́, zaakɛ gbɛ̃ kɛ̀ nawɛ̃a kɛ̀ a mɛ̀baan, adee mì kɛ̃̀ durun-amɛ. ² Gurↄↄ kɛ̀ gↄ̃̀are a kuuna guu, a dà zaaa tóngae dↄare aɛ dↄro, sé Luda pↄyezi. ³ A kuuna kifiinↄ yãkɛna guu yãa mↄ̀ lɛ. Yã á kú wísaiyãkɛna guu kↄ̃n mɛ̀baayã nidɛnao kↄ̃n wɛ̃dɛkɛnao kↄ̃n pãpã kↄ̃kↄ̃o kↄ̃n wɛ̃mikↄ̃kↄ̃ bɛ̃̀ɛo kↄ̃n tãagbãgbãna kɛ̀ Luda zàn-o. ⁴ Kɛ̀ eè kakↄ̃ańyo aↄ̃ pãpã bíta pì kɛna guu dↄro, è kɛńnɛ yãbↄnsaɛ ũ, ben aↄ̃è a tↄ́ zaaa sí. ⁵ Aↄ̃é ń yãkɛnanↄ tↄ̃kɛ̃ Ludanɛ, kɛ̀ à yãkpaɛkɛna kↄ̃n gbɛ̃ bɛ̃ɛnↄ kↄ̃n gɛ̀wãadeenↄ sorumi mà. ⁶ Wà baaru nnaa kpà baa gɛ̀wãadee pìnↄnɛ se, lɛ aↄ̃ e wàgↄ̃ kú ninikɛɛ guu lán Luda bà, baa kɛ̀ yã vɛ̃̀ɛḿma mɛ̀baa guu lán gbɛ̃ píngi bà.

Ludayãdarinↄ

⁷ Pↄ́ píngi yãana kà kĩi. Beee yãnzi àgↄ̃ kuu làakarideenↄ ũ, àgↄ̃ a zĩnda kũna dↄ̃, lɛ àgↄ̃ adua kɛɛ yãnzi. ⁸ Yã kɛ̀ dɛ à píngilaan yɛ̀: Àgↄ̃ yekↄ̃zi kↄ̃n nↄ̀sɛo do, zaakɛ yenzi è pↄ́ kúɛ durunnↄa pari. ⁹ À kↄ̃ yàari kɛ yãketekana sai. ¹⁰ Lán Luda gba dà a baadenɛ nà, à dↄokↄ̃lɛ ludangba bori doodo zĩkɛri maaanↄ ũ. ¹¹ Gbɛ̃ kɛ̀ dɛ waazikɛri ũ, à Luda yã ońnɛ. Gbɛ̃ kɛ̀ dɛ dↄnlɛri ũ, à dↄńlɛ kↄ̃n gbãaa kɛ̀ Luda à gbào, lɛ à Luda tↄ́ kpá yã píngi guu Yesu Kirisi gãzĩ. Àmbe à gakui vĩ kↄ̃n gbãaao gurↄ píngi! Aami.

Nawɛ̃akɛna tɛna Yesuzi yãnzi

¹² Ma gbɛ̃ yenzideenↄ, àton tó yↄ̃agwana pãsĩ kɛ̀ èe a lee bↄ a saɛ lán yã dufu bé à a lee bàro. ¹³ Lán a bà kú Kirisi nawɛ̃akɛna guu nà, à pↄnnaa kɛo, lɛ à e àgↄ̃ pↄnna bíta vĩ gurↄↄ kɛ̀ Kirisi pì é bↄ gupuraaa kↄ̃n gakuio. ¹⁴ Tó wà a sↄ̃sↄ̃ Kirisi tↄ́ kɛ̀ kúawa yãnzi, á aubarika vĩ, zaakɛ Luda Nini Gakuidee kúawa. ¹⁵ A gbɛ̃ke tón nawɛ̃a kɛ gbɛ̃dɛna ke kpãi’ona ke zaakɛna ke gudɛ yãnziro. ¹⁶ Tó a nawɛ̃a kɛ̀ a Yesudekɛ yãnzi, àton kɛare wíyã ũro. À Luda sáabu kpá kɛ Yesu tↄ́ kúawa yãnzi. ¹⁷ Zaakɛ wɛ́ɛtãmmagurↄↄ kà, Luda gbɛ̃nↄn à nàańyo. Lán wámbe à nàawao káaku nà, eé mì dɛ kↄ̃n gbɛ̃ kɛ̀ aↄ̃ gì Luda baaru nnaa mazinↄo diamɛ?

¹⁸ Zaakɛ gbɛ̃ maaanↄ mìsina kɛ̀ zĩ’ũ,

yã é bↄ kↄ̃n ludayãdarisainↄ kↄ̃n durunkɛrinↄo diamɛ?

¹⁹ Beee yãnzi gbɛ̃ kɛ̀ aↄ̃ↄe nawɛ̃a kɛɛ Luda pↄyezi guunↄ ń zĩnda na ń Kɛ̀ri náanɛdeenɛ a ↄzĩ, aↄ̃ↄ kpɛ́ gↄ̃ yã maaa kɛɛ.

Luda sã kpàsa gwana

¹ Mɛ́ɛ lɛ́ daa a gbɛ̃nsinↄa sa. Gbɛ̃nsin ma ũ se. Má dɛ nawɛ̃a kɛ̀ Kirisi kɛ̀ sèedadee ũ, bensↄ̃ ma bà kú kↄ̃n gakui kɛ̀ eé bↄ gupuraaao se. ² Àgↄ̃ dɛ kpàsa kɛ̀ Ludaa kàɛaree dã̀rinↄ ũ. À ↄ ligazi kↄ̃n pↄyezinao, èe kɛ tiasinlo, lán Ludaa yezi nà. Èe kɛ ↄↄwɛtɛna yãnzinlo. À kɛ kↄ̃n nↄ̀sɛo do. ³ Àtongae gbãaa ble gbɛ̃ kɛ̀ wà ń náare a ↄzĩ pìnↄaro. À tó a kuuna gↄ̃ a sãa pìnↄ daa zɛ́a, ⁴ é kífura kɛ̀ à gakui è yãaroo e gurↄↄ kɛ̀ Sãdãriki é mↄ́.

⁵ A gↄ̃kparɛnↄ sↄ̃, à a zĩnda kpá gbɛ̃nsinↄa. A píngi à a zĩnda busakↄ̃nɛ, zaakɛ:

Luda è íbɛtɛ kpá kↄ̃n ĩadãrinↄ,

mↄde à gbɛ̃kɛɛ vĩ kↄ̃n zĩndabusarinↄ.

⁶ Beee yãnzi à a zĩnda busa Luda gbãadeenɛ, eé a sɛ́ lezĩ gurↄↄ kɛ̀ à dìɛa. ⁷ À a yã’ↄ̃ammanↄ tónɛ píngi, zaakɛ è làakari dↄawa.

⁸ A wɛ́ɛ gↄ̃ dↄ, àgↄ̃ kú a làakaria. A ibɛɛ Ibilisi dɛ lán músu ↄ́ↄdↄri bàmɛ. Èe kpáɛ kɛɛazi, èe gbɛ̃ wɛtɛɛ à kũ. ⁹ À gínɛ, à zɛ gbãa ludanaanɛkɛna guu, zaakɛ á dↄ̃ kɛ̀ a Yesude daa kɛ̀ aↄ̃ↄ kú anduna guunↄ ń píngi e nawɛ̃a dↄ̃nkↄ̃ pì kɛɛmɛ se. ¹⁰ Luda Aubarikapingide a sisi a gakui kɛ̀ è yãarooa Kirisi guu. Tó a nawɛ̃a kɛ̀ féte, eé a bↄ maa, eé a zɛ gíngin, eé a gba gbãaa, eé a kãsãa pɛ́ɛ. ¹¹ Àmbe à gbãa vĩ ai gurↄ píngi! Aami.

Lɛ́zammana

¹² Wa gbɛ̃ndo Silasi bé à lá nɛ́ngo kɛ̀ kɛ̃̀mɛare. À kuumɛ gbɛ̃ náanɛdee ũ. Ma lɛ́ dàawa, má dɛ à sèedadee ũ kɛ̀ yã kɛ̀ má ò dɛ Luda gbɛ̃kɛ yãpuraa ũ. À zɛo gíngin. ¹³ Babilↄnu gbɛ̃ kɛ̀ Luda ń sɛ́ lán a bànↄ ì kpàawa. Ma nɛ́ Maaku ì kpàawa dↄ. ¹⁴ À ì kpákↄ̃a kↄ̃n lɛ́pɛkↄ̃anao yenzi guu. Luda amↄa kɛ̀ á kú Kirisi guunↄ gba aafia a píngi.