TITUS

TITUS

¹ Surat enda i bas aku nari, Paulus, persuruhen Dibata dingen rasul Jesus Kristus. Aku ipilih Dibata jenari isuruhNa mpegegehi kiniteken anak-anakNa si terpilih janah mabai ia ku si ngena ate Dibata rikutken pengajaren agamanta, ² si erpalasken pengarapen kerna kegeluhen si tuhu-tuhu si la erkeri-kerin. Kegeluhen si tuhu-tuhu si la erkeri-kerin enggo ipadanken Dibata man banta ope denga lit paksa-paksa; Dibata labo erbual. ³ Janah i bas paksa si itetapkenNa, enggo ipetangkasNa kegeluhen e arah KataNa. Enda me si niendeskenNa man bangku. E maka kupembarken KataNa e bekas persuruhen Dibata Si Engkelini kita. ⁴ Surat enda man Titus, anakku si tuhu-tuhu rikutken kinitekenta ersada. Dibata Bapa ras Kristus Jesus Singkelini kita mereken lias ate ras kemalemen ate man bandu gelah. ⁵ Kutadingken kam mbaru enda i Pulau Kreta gelah ipejorendu dahin si perlu idungi, bage pe gelah ngangkat pertua-pertua i bas tep-tep kuta. Ingetlah si kukataken man bandu: ⁶ sekalak pertua ola min lit si man pandangen; sekalak ngenca ndeharana, janah anak-anakna erkiniteken man Kristus dingen la icap kalak gutul ntah pe la terajarken. ⁷ Erkiteken dahin peminpin perpulungen e ngaturken dahin Dibata, ola min lit i bas ia si man pandangen. La banci meganjang ukurna ntah sukah merawa, ntah pemabuk, ntah pengamuk, merangap nandangi duit. ⁸ Arus ia pertemue, ngena atena si mehuli. Pentar, bersih, dingen terkuasaisa dirina. ⁹ Arus nteguh itagangina Berita si rehna i bas Dibata nari e, e me Berita si banci iteki bagi si enggo iajarken man bana. Alu bage ngasup ia mpegegehi kalak si deban alu pengajaren si tuhu-tuhu e, dingen ngasup ia ncidahken salah kalak si ngelawan pengajaren e. ¹⁰ Sabap nterem kalak lanai patuh, terlebih-lebih si teriket denga i bas sunat; itipuna kalak si deban alu cakapna si la erguna. ¹¹ Kalak si bage ola bere ngerana, sabap ngguluti jabu kalak saja ngenca perasatna alu pengajaren si la bage arusna. Kai si ibahanna e man kemelanken, sabap sura-surana ndarami duit saja nge. ¹² Sekalak nabi i Kreta nari pernah ngataken, "Kalak Kreta perguak, bali ras rubia-rubia si merawa, kalak rangap si perkisat." ¹³ Kai si ikataken nabi e tuhu, e maka ajarken ia alu la tangung-tanggung, gelah tuhu-tuhu kinitekenna, ¹⁴ janah gelah olanai ia tek turi-turin kalak Jahudi ras aturen-aturen manusia si erlawanen ras pengajaren si benar. ¹⁵ Nandangi kalak si bersih pusuh-peratenna kai pe bersih kap; tapi nandangi kalak si la bersih pusuh-peratenna dingen la erkiniteken, kai pe la bersih, sabap enggo meluat ukur ras pusuh-peratenna. ¹⁶ Ngaku ia maka itandaina Dibata, tapi arah perbahanenna teridah labo itandaina. Perukurenna mbau, janah la nggit patuh; kalak enda la ngasup erbahan kai pe si mehuli.

¹ Tapi kam, ajarkenlah si sentudu ras pengajaren si payo. ² Katakenlah man dilaki si enggo metua gelah jore min ukurna, mehuli lagu-langkahna, dingen ngasup min ngkuasai dirina; bage pe gelah tuhu-tuhu sehat kinitekenna, erkeleng-ate dingen megenggeng. ³ Bage pe kataken man diberu-diberu si enggo metua gelah bersih lagu-langkahna, bagi arusna. La banci ia ncekuraki kalak si deban, bage pe la banci nagih minem anggur. Ia arus ngajarken si mehuli: ⁴ ngajari diberu si nguda denga gelah keleng atena perbulangenna ras anak-anakna, ⁵ gelah ngasup ia ngkuasai dirina dingen nggeluh badia, gelah beluh ia ngaturken jabuna dingen jadi ndehara si patuh man perbulangenna; gelah alu bage ise pe la ncekuraki berita si rehna i bas Dibata nari. ⁶ Bage pe ajari anak-anak perana gelah ngasup ngkuasai dirina. ⁷ Janah kam, i bas kai pe arus jadi usihen kerna dahin si mehuli. Tutus min atendu dingen ergiah-giahlah ukurndu ngajar. ⁸ Pakelah kata-kata si payo si la banci ipandang kalak, gelah alu bage mela iakap imbang-imbangndu sabap la lit i bas kita si man pandangenna. ⁹ Budak arus ngikutken kata tuanna dingen i bas kai pe senang min ate tuanna ibahanna. La banci isimbakna kata tuanna, ¹⁰ ntah pe nangko barang-barang tuanna. Tapi arus icidahkenna maka ia tetap bujur dingen tutus, gelah i bas kerinana si ilakokenna tama ulina man pengajaren kerna Dibata si Engkelini kita. ¹¹ Sabap enggo ipetangkas Dibata lias ateNa guna keselamaten kerina manusia. ¹² Lias ateNa e ngajari kita nadingken kegeluhen si la ngena ate Dibata ras sura-sura doni, gelah nggeluh kita ngkuasai dirinta, bujur dingen si sembah Dibata alu kegeluhenta i doni enda. ¹³ Genduari kita paksa nimai Wari kemalemen ate si iarapken kita e me kerehen sinalsal Dibatanta si Mbelin ras si Engkelini kita Jesus Kristus. ¹⁴ Enggo iendeskenNa diriNa guna kita, lako nebusi kita i bas kerina si jahat nari, jenari ibahanNa kita jadi sikerajangenNa, jadi bangsa si bersih, si mesikel erbahan mehuli. ¹⁵ Ajarkenlah si enda kerina, janah pakelah kerina kuasandu i bas kam ngajuk dingen mandang kalak. Ola pelepas kalak mapas man bandu.

¹ Persingetilah ia kerina gelah patuh man pemerentah ras si erkuasa. Ibegikennalah katana, dingen nggit ndalanken kerina dahin si mehuli. ² Katakenlah man bana gelah ola ia ncekuraki kalak si deban, tapi erdame dingen meriahlah, janah mehulilah min perbahanenna katawari pe nandangi kerina manusia. ³ Sabap kita pe nai labo sieteh mehuli, nggit ngelawan dingen erbahan salah. Kita ikuasai kerincuhen kula ras erbage-bage sura-sura. Kita nggeluhken kegeluhen si jahat dingen dem ate cian. Segat ate kalak kita, janah kita pe segat ateta kalak. ⁴ Tapi asum Dibata si Engkelini kita nehken perkuah ate ras kiniulinNa man banta, ⁵ kita enggo ikeliniNa. Kita ikeliniNa labo erkiteken perbahanenta si mehuli, tapi erkiteken perkuah ateNa nge. Kita ikelini Dibata arah Kesah Si Badia si erbanca kita tubuh peduakaliken gelah sialoken kegeluhen si mbaru alu mbersihken kita. ⁶ Dibata nguseken Kesah Si Badia si la ersibar man banta arah Jesus Kristus si Engkelini kita, ⁷ gelah erkiteken lias ateNa banci kita rembak ras Ia dingen ngaloken kegeluhen si tuhu-tuhu si la erkeri-kerin, si iarapken kita. ⁸ Kata enda tuhu kap. Ateku min gelah igegehindu ngajarken kerna si enda, gelah kalak si enggo tek man Dibata tutus ndahiken dahin si mehuli, si metunggung dingen erguna man manusia. ⁹ Silahkenlah ranan sijabapen si sia-sia, kerna terombo nini-nini nai. Ola rubat, dingen ola sijabapen kerna Undang-undang. Enda kerina si lang-lang dingen la lit gunana. ¹⁰ Kalak si erbahan perpecahen i bas perpulungen ajarken seh dua kali jenari sirangi ia. ¹¹ Ietehndu maka kalak si bage jahat kap. Dosa-dosana nuduhkenca maka ia ersalah. ¹² Kenca kusuruh Artemas ntah Tikikus ndahi kam, usahakenndu kal ndahi aku ku Nikopolis, sabap enggo kutetapken ringan i jah asum musim mbergeh. ¹³ Usahakenndulah nampati Senas, si meteh undang-undang, ras Apolos i bas ia menaken perdalanenna, janah usahaken maka kerina keperlunna icukupi. ¹⁴ Teman-temanta arus erlajar make kesempaten si lit guna ndahiken dahin si mehuli, gelah icukupina kai si perluna kal. Ola min ia sia-sia nggeluh. ¹⁵ Kerina senina-seninanta si ras aku i jenda ngataken mejuah-juah man bandu. Kataken mejuah-juah i bas kami nari man teman-temanta si sada kiniteken. Lias ate Dibata ras kam kerina gelah.