ROMA

ROMA

¹ Surat enda rehna i bas aku nari, Paulus. Aku me suruh-suruhen Kristus Jesus, rasul si enggo ipilih dingen iserapken Dibata guna meritaken Berita Si Meriah si reh i bas Dibata nari. ² Berita Si Meriah e ipadanken Dibata nai-nai arah nabi-nabiNa janah enggo isuratken i bas Pustaka Si Badia. ³ Berita e kerna AnakNa, Tuhanta Jesus Kristus: Ia manusia, Ia tubuh arah kesusuren Daud. ⁴ Janah erkiteken Kesah Si Badia tangkas maka Ia Anak Dibata si erkuasa. Enda teridah arah kekekenNa i bas si mate nari. ⁵ Arah Ia, dingen i bas gelarNa me Dibata mereken hak istimewa man kami, gelah ibabai kami kerina bangsa maka tek dingen erkemalangen man Kristus. ⁶ Ikut pe kam kerina si ringan i Roma, si enggo ipilih Dibata jadi sikerajangen Jesus Kristus. ⁷ E maka o kam kerina si ringan i Roma si ikelengi Dibata dingen si enggo ipilihNa jadi anak-anakNa: Dibata Bapanta ras Tuhan Jesus Kristuslah mereken lias ateNa man bandu janah malem atendu ibahanNa. ⁸ Perlebe kukataken bujur man Dibatangku arah Jesus Kristus, erkiteken kam kerina; sabap enggo mbar beritana i belang-belang doni enda kerna kinitekenndu. ⁹ Rusur kal kam kuinget i bas pertotonku. Dibata saksina maka kai si kukataken enda tuhu. Ia me Dibata si kusembah alu bulat ukur i bas meritaken Berita Si Meriah kerna AnakNa. ¹⁰ Kupindoken man Dibata gelah adi sentudu ras peratenNa iberekenNa min kesempaten man bangku guna ndahi kam. ¹¹ Sabap merincuh kal aku jumpa ras kam, gelah kubagi-bagiken man bandu pemere pertendin guna mpegegehi kinitekenndu. ¹² Maksudku gelah ipegegehi kita pekepar; kam kupegegehi alu kinitekenku janah aku ipegegehindu alu kinitekenndu. ¹³ O senina-seninangku, perlu ietehndu maka enggo megati ateku reh ndahi kam tapi lit rusur abatna. Ateku min erbuah pendahinku e pagi i tengah-tengahndu bagi i tengah-tengah kalak si deban. ¹⁴ Sabap aku rutang guna meritaken Berita Si Meriah man kerina manusia, subuk man kalak si enggo maju bage pe man kalak si kolot denga, subuk man kalak si erpemeteh, bage pe man kalak si la erpemeteh. ¹⁵ Erkiteken si e maka man bandu si ringan i Roma pe mesikel aku meritaken Berita Si Meriah. ¹⁶ La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi. ¹⁷ Sabap arah Berita Si Meriah tangkas uga Dibata ngerambakken manusia kempak diriNa. Si enda ibenaken i bas kiniteken janah erkedungen i bas kiniteken. Bagi lit tersurat i bas Pustaka Si Badia, "Kalak si enggo iperembakken Dibata kempak diriNa erkiteken kinitekenna nggeluh me ia." ¹⁸ Pernembeh ate Dibata ipetangkas i Surga nari ndabuh ku kerina kejahaten manusia si la nggit nembah man Dibata. Erkiteken kejahatenna, manusia encekak ketuhu-tuhun e. ¹⁹ Ersalah manusia e, sabap kai si banci ietehna kerna Dibata, tangkas me man bana. Dibata nge si petangkassa man bana. ²⁰ Mulai kin doni enda ijadiken Dibata, tangkas kap biakNa si la teridah, e me KuasaNa ras KinidibatanNa si la ermasap-masap. Si enda banci igejapken manusia arah kai si enggo ijadiken Dibata e. E maka lanai lit perdalihenna kerna kai si enggo ibahanna e. ²¹ Itandai manusia e nge Dibata, tapi la ipehagana Dibata e bagi Dibata; bage pe la ia ngataken bujur man Dibata. Tapi perukurenna kerna si sia-sia saja, janah pusuh peratenna si batu-batun e ikuasai si gelap. ²² Ngaku ia pentar, tapi motu nge ia. ²³ Itadingkenna kiniulin Dibata si la ermasap-masap jenari isembahna patung-patung manusia, perik-perik, rubia-rubia si empat nahena, bage pe rubia-rubia si njoler si biakna kerina ermasa-masap. ²⁴ Erkiteken si e ipelepas Dibata ia nehken sura-surana si melket, dingen ngelakoken perbahanen-perbahanen si cemar nandangi kulana sapih-sapih ia. ²⁵ Itukarkenna kebenaren Dibata alu guak. Labo Dibata si isembahna, tapi si ijadiken Dibata e nge ipuji dingen isembahna. Arusna kin si Njadikenca e nge ipuji seh rasa lalap! Amin. ²⁶ Erkiteken si e ipelepas Dibata ia nehken sura-surana si njuruken. Diberu-diberu erlagu la mehuli ia sapih-sapih ia diberu. Lagu langkah diberu-diberu e lanai bagi arusna. ²⁷ Bage pe si dilaki nadingken hubungenna si payo ras diberu, janah leket ukurna man sapih-sapih dilaki. Dilaki erlagu-langkah si njuruken sapih-sapih dilaki; erkiteken si e ia ndat balasen i bas dirina sue ras perbahanenna si jahat dingen la arus e. ²⁸ Perbahan lanai iakap manusia e perlu ngakui Dibata, e maka ipelepas Dibata ia i bas perukurenna si macik e, seh maka ibahanna perbahanen si la metunggung. ²⁹ I bas ia dem erbage-bage si la mehuli: kejahaten, rangap, lat-lat, cian ate, munuh, rubat, nipu, bage pe elem-elem, sicekurak-cekuraken, ³⁰ pebau-bau kalak si deban. Nembeh atena nandangi Dibata, megombang, meganjang ukur, meganjang cakapna. Rusur idaramina taki guna erbahan kejahaten si mbaru; la mehamat man orang tuana. ³¹ Pusuh peratenna batu-batun; la itepatina padanna, janah la lit kekelengen ntah pe perkuah atena man kalak si deban. ³² Ietehna maka rikutken keputusen Dibata si adil, kalak si bagenda perbahanenna arus iukum mate. Tapi amin bage gia tetap nge idalankenna bage. Janah labo saja ibahanna si jahat e, tapi lebih asa si e ipujina pe kalak si bali ras ia perbahanenna.

¹ O teman, ise kin kam maka iukumndu kalak si deban? Kam pe ersalah kap! Adi iukumndu kalak si deban, iukumndu kap bandu, sabap perbahanenndu pe bali ras perbahanen kalak si iukumndu e. ² Sieteh maka patut nge Dibata ngukum kalak si erbahan kejahaten-kejahaten e. ³ Tapi kam o teman, iukumndu kalak si deban, sedang kam pe bage nge perbahanenndu! Ntah iakapndu kin banci kam pulah i bas ukumen si rehna i bas Dibata nari? ⁴ Ntah la iergakenndu kiniulin Dibata si bage belinna, kesabaren ateNa mereken ukumen e? Ietehndu kap maka Dibata e mehuli, sabap ateNa mabai kam gelah jera. ⁵ Tapi mersik ukurndu janah la kam nggit jera. Erkiteken si e kam kap mpepulung pernembeh ate Dibata guna Wari Ukumen e, i ja ukumen Dibata si adil ipetangkas. ⁶ Ibalas Dibata me pagi man tep-tep kalak sue ras kai si enggo ibahanna. ⁷ Man kalak si ndarami kemulian ras kehamaten, labo guna kegeluhen si genduari enda saja, tapi pe guna kegeluhen si reh, e me alu la erleja-leja erbahan si mehuli, man kalak si bage ibereken Dibata kegeluhen si tuhu-tuhu si la ermasap-masap. ⁸ Tapi man kalak si ngukuri kepentingenna saja, si la ia nggit ngikuti ketuhu-tuhun, tapi si salah nge si iikutina, man kalak si bage idabuhken Dibata pernembeh ateNa. ⁹ Kerina kalak si ndalanken kejahaten la banci la ngenanami kiniseran ras kesusahen pagi, lebe man kalak Jahudi bage pe kalak si deban. ¹⁰ Tapi man kerina kalak si ndalanken si mehuli, ibereken Dibata me kemulian, kehamaten, ras kemalemen ate, lebe man kalak Jahudi, bage pe man kalak si deban. ¹¹ Sabap kerina manusia bali nge i lebe-lebe Dibata. ¹² Si labo kalak Jahudi la lit i bas ia Undang-undang Musa; tapi erdosa nge ia janah bene me aminna gia la lit i bas ia Undang-undang e. Kalak Jahudi lit i bas ia Undang-undang si ibereken Musa; erdosa ia janah iukum me ia erpalasken Undang-undang e. ¹³ Sabap labo kalak si megi Undang-undang e si rembak ras Dibata, tapi kalak si ndalankenca nge. ¹⁴ Adi si labo kalak Jahudi ndalanken Undang-undang e erkiteken ukurna ersuruh, maka aminna gia la lit i bas ia Undang-undang e, icidahkenna kap maka ietehna nge apai si mehuli janah si apai si la mehuli guna idalanken sue ras isi Undang-undang. ¹⁵ Arah perbahanenna teridah maka pedah si lit i bas Undang-undang e lit tersurat i bas pusuhna. Si enda teridah pe arah pusuh peratenna, sabap mawen-mawen ukurna nalahken ia janah mawen-mawen engkapiti ia. ¹⁶ Dage rikutken Berita Si Meriah si kuberitaken, bagenda me pagi jadina tupung warina Dibata ngadili perukuren manusia si terbuni. Dibata e ngadili arah Jesus Kristus si jadi hakim ras sukat-sukatna. ¹⁷ Kuga kerna kam? Ikatakenndu maka kam kalak Jahudi. Ernalem kam i bas Undang-undang janah megah akapndu erkiteken kam bangsa pilihen Dibata. ¹⁸ Ietehndu kai si ngena ate Dibata guna idalankenndu. Janah ietehndu pe arah Undang-undang e milih si mehuli. ¹⁹ Ikatakenndu maka kam me si negu-negu kalak si pentang, kam me terang nandangi kalak si lit i bas gelap. ²⁰ Ikatakenndu maka kam me si ngajari kalak si motu; kam me guru kalak si nguda denga. Ikatakenndu maka i bas Undang-undang e enggo lit kerina pemeteh ras ketuhu-tuhun. ²¹ Kalak si deban iajarindu -- ngkai maka la iajarindu bandu? Imomokenndu "Ola nangko" -- tapi kam la kin nangko? ²² Ikatakenndu "Ola erlua-lua" -- tapi kam la kin erlua-lua? Ciga atendu berhala -- tapi la kin irampasindu rumah pertoton ingan nembah berhala e? ²³ Megah iakapndu erkiteken lit i bas kam Undang-undang Dibata; tapi la kin icekuraki kalak Dibata erkiteken la iikutkenndu Undang-undangNa e? ²⁴ Bagi tersurat i bas Pustaka Si Badia, "O kalak Jahudi, erkiteken kam maka icekuraki bangsa-bangsa si deban gelar Dibata." ²⁵ Adi iikutkenndu Undang-undang e lit nge gunana kam isunatken. Tapi adi labo iikutkenndu, si tuhuna kam bali nge ras kalak si la isunat. ²⁶ Adi bangsa si deban, e me si la isunatken, ndalanken isi Undang-undang e, ma iakap Dibata kalak e tempa-tempa enggo isunatken? ²⁷ E maka, o kalak Jahudi, iukum bangsa si deban me kam, aminna gia lit i bas kam Undang-undang janah enggo kam isunatken, sabap la iikutkenndu Undang-undang e. Bangsa si deban e idalankenna Undang-undang aminna pe la ia isunatken secara dagingna. ²⁸ Dage ise kin kalak Jahudi si tuhu-tuhu? Kalak Jahudi si tuhu-tuhu labo kalak Jahudi si arah darat! Kai dage sunat si tuhu-tuhu? Sunat si tuhu-tuhu labo tanda si arah darat si lit i bas badan! ²⁹ Kalak Jahudi si tuhu-tuhu e me kalak Jahudi si arah bas, si enggo isunatken pusuh peratenna. Labo Undang-undang si tersurat erbahanca kalak enggo jadi kalak Jahudi si tuhu-tuhu, tapi kuasa Kesah Dibata nge. E maka kalak si bage labo ngaloken pujin i bas manusia nari tapi i bas Dibata nari nge.

¹ Adi bage i bas kai nge lebihen kalak Jahudi e asangken bangsa si deban? Ntah lit kin nge gunana isunatken e? ² Tentu mbue i bas kai pe! Perlebe: sabap man kalak Jahudi me perlebe iendesken Dibata perkatan-perkatanNa. ³ Dage adi lit piga-piga kalak Jahudi la setia man Dibata, iakapndu kin maka erkiteken si e Dibata lanai setia man padanNa? ⁴ Tentu lang! Tapi bagenda kap. Dibata e tetap nge i bas ketuhu-tuhun aminna gia kerina manusia perguak. Bagi lit tersurat i bas Pustaka Si Badia, "I japa pe Kam ngerana, Kam tetap nge ibenarken. Katawari pe menang nge Kam, adi iaduken kalak Kam." ⁵ Tapi kuga, adi arah kesalahenta e reh ulina teridah kebujuren Dibata? Kuga ninta? Salah kin perbahanen Dibata e adi iukumna kita? (Aku ngerana i jenda bagi biasana manusia ngerana.) ⁶ Tentu lang! Sabap adi la kin adil Dibata e, labo banci iadilina doni enda. ⁷ Umpamakenlah lit kalak si atena ersoal, nina, "Adi arah kejahatenku e maka ertangkasna teridah keadilen Dibata seh maka Ia ipermuliaken, ma patut min aku lanai iukum Dibata bagi kalak perdosa? ⁸ Dage ngkai maka la sibahan si jahat, gelah arah kejahaten e reh si mehuli?" Si tuhuna lit nge kalak si encekuraki aku alu ngataken maka si enda me kuajarken. Kalak enda la banci la iukum bagi patutna. ⁹ Dage, ulin kin kita kalak Jahudi asangken si labo kalak Jahudi? Sitik pe lang! Ndai enggo kupetangkas i das maka subuk kalak Jahudi bage pe bangsa si deban kerina i teruh kuasa dosa. ¹⁰ Bagi lit tersurat i bas piga-piga kitap i bas Pustaka Si Badia, "La lit ise pe bujur i lebe-lebe Dibata, ¹¹ la lit ise pe si pentar, la lit ise pe ndarami Dibata. ¹² Kerina manusia enggo nilah i bas Dibata nari; kerina ia enggo macik; la lit ise pe erbahan si mehuli, sada pe lang. ¹³ Kalah-kalahna desken lubang kubur si talang nipu ia alu dilahna, janah i bas biberna nari ndarat kata-kata desken bisa nipe si erbahanca kalak mate. ¹⁴ Babahna dem alu sumpah si pagit. ¹⁵ Nahena pedas ngayak-ngayak dingen munuh kalak. ¹⁶ Gedang-gedang dalan si ibentasina, ibahanna kecedan dingen kesusahen. ¹⁷ La pernah idalanina dalan perdamen. ¹⁸ Bage pe la diatena erkemalangen man Dibata." ¹⁹ Sieteh maka kerina si ikataken Undang-undang e, itujuken man kalak si nggeluh i teruh Undang-undang, gelah olanai lit kalak si erdalih janah gelah doni enda lanai lit ampang-ampangna nandangi ukumen Dibata. ²⁰ Sabap labo ise pe banci rembak ras Dibata adi arah ndalanken Undang-undang. Undang-undang e gunana e me gelah ierti manusia ia erdosa. ²¹ Tapi genduari cara Dibata ngerembakken manusia kempak diriNa enggo ipetangkas, janah si e la lit sangkut pautna ras Undang-undang. (Si tuhuna Undang-undang Musa ras kitap nabi-nabi mereken kesaksin maka si e tuhu kap.) ²² Dibata ngerembakken manusia kempak diriNa erkiteken kiniteken manusia e man Jesus Kristus. Kerina kalak si tek man Kristus iperembak Dibata ras diriNa sabap bali nge kerina manusia enda. ²³ Kerina manusia enggo erdosa janah enggo ndauh sirang ras sura-sura Dibata si mejile. ²⁴ Tapi arah pemere Dibata erpalasken lias ateNa, kerina manusia irembakken Dibata kempak diriNa, arah pertebusen si ibahan Kristus Jesus. ²⁵ Dibata enggo netapken Ia jadi sada persembahen gelah arah Ia engkorbanken diriNa seh mate, kerina dosa-dosa manusia isasapken dingen pernembeh ate Dibata ipepalem, adi tek ia man Jesus Kristus. Arah si enda icidahken Dibata maka Ia bujur kap. Nai nari isinikken Dibata saja kerna dosa-dosa manusia, ²⁶ janah la Ia megelut. Tapi i bas paksa si genduari enggo iukum Dibata dosa-dosa manusia i bas diri Jesus Kristus. Arah si e icidahkenNa maka Ia adil, janah radu ras si e irembakkenNa kempak diriNa kerina kalak si tek man Jesus. ²⁷ Dage labo lit si man megahenken manusia. Engkai makana bage? Sabap manusia ikelini Dibata labo erkiteken ndalanken Undang-undang, tapi erkiteken tek ia man Jesus Kristus. ²⁸ Dage, manusia banci rembak ras Dibata labo erkiteken manusia e ndalanken kai si ituntut Undang-undang, tapi erkiteken tek man Jesus Kristus ngenca. ²⁹ Ntah kin Dibata e Dibata kalak Jahudi saja ngenca? Ma kin Ia pe Dibata bangsa si deban nge? Tentu. ³⁰ Sabap Dibata e sada ngenca. Dibata ngerembakken kalak Jahudi si ersunat e kempak diriNa erkiteken ia tek man Jesus Kristus; bage pe irembakkenNa kalak si deban si la ersunat kempak diriNa erkiteken kalak enda pe tek man Jesus Kristus. ³¹ Adi tek kita man Jesus Kristus, sicedaken kin Undang-undang e? Kutera pe lang! Tapi arah si e sitamaken Undang-undang e i babo palas si lebih enteguh.

¹ Dage kuga ninta kerna nininta Abraham nai? Uga kin pengalamenna? ² Adi ia rembak ras Dibata erkiteken perbahanenna tentu lit dalanna muji bana. Tapi teridah maka i lebe-lebe Dibata labo lit dalanna ia muji bana. ³ Sabap i bas Pustaka Si Badia lit tersurat, "Abraham tek man Dibata, janah kinitekenna e iperkiraken Dibata jadi dalan guna ngerembakken Abraham kempak diriNa." ⁴ Kalak si erdahin, upah si ialokenna e labo pemere e, tapi hakna kap e. ⁵ Tapi kalak si ernalem kempak kinitekenna man Dibata, labo kempak perbahanenna, kinitekenna e me iperkiraken Dibata jadi dalan ngaloken ia rembak ras diriNa. Enda ertina Dibata enggo erbahan keputusen maka kalak si ersalah e ikataken la salah. ⁶ Kerna si enda me si ikataken Daud maka malem me ate kalak si ialoken Dibata rembak ras diriNa la arah kai si ibahanna. Nina Daud. ⁷ "Ketuahen kalak si enggo ialemi Dibata salahna si enggo itanemken Dibata dosa-dosana. ⁸ Ketuahen kalak si la iperkiraken Dibata dosa-dosana." ⁹ Kemalemen ate si ikataken Daud enda sikerajangen kalak si isunatken saja kin ngenca? Lang! Tapi kemalemen ate e jadi sikerajangen kalak si labo isunatken pe. Sabap bagi enggo ndai sikutip i bas Pustaka Si Badia nari, "Kinitekenna e iperkiraken Dibata jadi dalan ngerembakken Abraham kempak diriNa." ¹⁰ Ndiganai kin perkiran enda jadi? Ope denga Abraham isunatken ntah kenca ia isunatken? Labo kenca ia isunatken, tapi ope denga si e. ¹¹ Pudin nge ia isunatken. Sunat e ialokenna jadi tanda pengesahen maka ia enggo rembak ras Dibata erpalasken kinitekenna ope denga ia isunatken. E maka Abraham jadi bapa nandangi kerina kalak si tek man Dibata, kalak si la isunatken, si ialoken Dibata rembak ras diriNa. ¹² Ia pe bapa kerina kalak si isunatken, labo erkiteken sunat e, tapi erkiteken ia ngikuti dalan kiniteken si ibentasi Abraham bapanta, ope denga ia isunatken. ¹³ Dibata erpadan mereken doni enda man Abraham ras kesusurenna. Padan enda ibereken Dibata labo erkiteken Abraham ndalanken Undang-undang, tapi erkiteken Dibata enggo ngaloken Abraham rembak ras diriNa erpalasken kiniteken. ¹⁴ Sabap adi man kalak si ernalem man Undang-undang nge ibereken Dibata kai si ipadankenNa e, sia-sia me kiniteken manusia, janah padan Dibata kosong. ¹⁵ Si reh i bas Undang-undang Musa e nari si tuhuna e me ukumen Dibata; tapi i ja la lit undang-undang i je me la lit kalak si ngelanggar undang-undang. ¹⁶ Padan Dibata man Abraham, e me erpalasken kiniteken, janah kai si ipadankenNa e, tuhu-tuhu tangkas pemere Dibata, janah esah pe man kerina kesusuren Abraham. Labo saja man kalak si ndalanken Undang-undang, tapi pe man kalak si erkiniteken bagi Abraham. Sabap Abraham me bapanta kerina, ¹⁷ bagi lit tersurat i bas Pustaka Si Badia, "Enggo Kutetapken kam jadi bapa nterem bangsa." Alu bage padan e enggo sah i lebe-lebe Dibata, Dibata si iteki Abraham, sabap Ia me si erbahanca kalak si enggo mate nggeluh mulihi dingen si njadiken si la lit jadi lit alu kataNa. ¹⁸ Aminna gia la lit arapen, tapi Abraham tetap erkiniteken dingen erpengarapen maka ia jadi "bapa melala bangsa", bagi lit tersurat i bas Pustaka Si Badia, "Bagi buena bintang i langit bage me pagi buena kesusurenndu." ¹⁹ Paksa si ndai umur Abraham enggo nandangi seratus tahun. Tapi kinitekenna labo kote aminna gia ietehna maka kulana enggo kerah janah ndeharana Sarah la banci mupus. ²⁰ La ia sangsi, janah kinitekenna nandangi padan si ibereken Dibata la surut; kinitekenna erbahanca ia reh gegehna, seh maka ia tetap muji Dibata. ²¹ Tek ia maka ngasup nge Dibata nehken kai si enggo ipadankenNa. ²² Janah erkiteken ia tek e, "kinitekenna e iperkiraken Dibata jadi dalan guna ngerambakken Abraham kempak diriNa." ²³ Kata-kata "iperkiraken" e itulis labo man Abraham saja. ²⁴ Tapi pe man banta. Kita pe iperembakken me ras Dibata adi kita tek man Dibata si enggo mpekeke Jesus, Tuhanta, i bas si mate nari. ²⁵ IendeskenNa Jesus ku bas kematen erkiteken kesalahen-kesalahenta, jenari ipegeluhNa mulihi gelah kita iperembak ras Ia.

¹ Erkiteken kita enggo rembak ras Dibata erkiteken kinitekenta, e maka kita nggeluh i bas perdamen ras Dibata arah Tuhanta Jesus Kristus. ² Jesus Kristus me si maba kita bengket ku bas lias ate Dibata erkiteken kinitekenta. Janah i bas lias ate Dibata e me kita nggeluh dingen ringan. Dage meriah ukurta sabap lit pengarapenta maka kita ikut dat bagin i bas kemulian Dibata. ³ Janah labo terjeng je saja, tapi megah pe siakap i bas kiniseranta, sabap sieteh maka arah kiniseran turah saber ate. ⁴ I bas saber ateta e teridah maka kita enggo menang i bas pengujin, janah erkiteken kita enggo menang i bas pengujin, lit pengarapenta. ⁵ Pengarapenta enda labo erbahanca kita kecewa, sabap Dibata enggo ncurcurken kekelengenNa ku bas pusuhta arah Kesah Si Badia. Ia me pemere Dibata man banta. ⁶ Sabap asum kita kote denga, mate Kristus i bas paksa si payo, man gunanta kalak si jahat. ⁷ Labo sukah muatsa kalak si nggit mate guna kalak si bujur. Tapi adi guna kalak si mehuli banci jadi lit kalak si nggit mate. ⁸ Tapi Kristus mate asum kita perdosa denga! Arah e Dibata enggo encidahken keleng ateNa man banta. ⁹ Dage tangkas kal man banta maka kita enggo rembak ras Dibata erkiteken Jesus Kristus enggo engkorbanken diriNa seh mate; tentu terlebih-lebih pe kita terkelin i bas pernembeh ate Dibata nari arah Ia. ¹⁰ Gelgel nari kita imbang Dibata, tapi enggo iperiahken Dibata kita ras diriNa arah kematen AnakNa. Tentu terlebih-lebih genduari adi kita enggo meriah ras Dibata la banci lang ikeliniNa me kita arah kegeluhen Kristus. ¹¹ Janah labo e saja, tapi meriah pe ukurta dingen sipuji Dibata erkiteken Tuhanta Jesus Kristus si enggo mperiahken kita ras Dibata. ¹² Dosa enggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia, sabap tep-tep kalak enggo erdosa. ¹³ Ope denga ibereken Dibata pe Undang-undang arah Musa, enggo me lit dosa i doni enda, tapi dosa e la iperkiraken erkiteken la lit undang-undang. ¹⁴ Tapi kematen enggo erkuasa nandangi kerina manusia i bas paksa Adam nari seh ku bas paksa Musa, subuk pe kalak si la langsung ngelanggar perentah si rehna i bas Dibata nari bagi si Adam. Adam me gambaren Manusia si nandangi reh. ¹⁵ Tapi pemere Manusia si nandangi reh e la terpeseri belinna ras dosa si ibahan Adam. Tuhu maka nterem jelma mate erkiteken dosa Adam, tapi ndauh beliden lias ate Dibata si isehkenNa man manusia si bage teremna, dingen pemereNa erpalasken lias ate si Sekalak e, e me Jesus Kristus. ¹⁶ Janah pemere Dibata e labo terpeseri belinna ras dosa si sekalak e. Kenca Adam erbahan sada dosa, ia iadili Dibata janah ikatakenNa ia salah. Tapi kenca mbue kal dosa ibahan manusia e, ibereken Dibata pemere si la metunggung manusia ngalokenca, e me ikataken Dibata man manusia e, "Kam ibenarken." ¹⁷ Tuhu erkiteken dosa sekalak jelma, kematen enggo ngerajai kerina jelma, erkiteken si sekalak jelma e. Tapi kai si ibahan Jesus Kristus ndauh beliden asilna asangken kai si jadi erkiteken dosa si sekalak e! Kerina kalak si ngaloken lias ate Dibata si la erkeri-kerin ras pemereNa si ngerambakken manusia kempak diriNa, kalak si bage erkuasa i bas geluhna desken sekalak raja arah Kristus. ¹⁸ Bagi kerina manusia iukum erkiteken sada dosa, bage me pe kerina manusia ibebasken dingen ngaloken kegeluhen erkiteken sada perbahanen si benar. ¹⁹ Janah bagi kerina manusia jadi kalak perdosa erkiteken kinilapatuhen si sekalak jelma e, bage me pe kerina manusia iperembak ras Dibata erkiteken kepatuhen sekalak jelma si deban, e me Jesus Kristus. ²⁰ Undang-undang reh gelah erbuena kesalahen; tapi i ja reh buena dosa, i je me pe ndauh reh belinna lias ate Dibata. ²¹ Dage, bagi nai dosa erkuasa desken sekalak raja si maba manusia ku bas kematen, bage me pe lias ate Dibata genduari enggo erkuasa desken sekalak raja si ngerambakken manusia kempak Dibata, janah mabai kita ku bas kegeluhen si tuhu-tuhu si rasa lalap arah Jesus Kristus Tuhanta.

¹ Kuga dage ninta genduari? Siusur-usur dage erbahan dosa gelah erbelinna lias ate Dibata? ² Tentu lang! Kita enggo mate nandangi dosa; kuga banci kita terus nggeluh i bas dosa? ³ Sabap tentu enggo ietehndu maka asum kita iperidiken kita ipersada ras Kristus Jesus; ertina peridin e mpersadaken kita ras kematenNa. ⁴ I bas kita iperidiken e, enggo kap kita mate dingen ikuburken ras Kristus, gelah bagi Kristus ipekeke i bas si mate nari i bas kemulian Bapa, bage me pe kita nggeluh i bas kegeluhen si mbaru. ⁵ Sabap adi kita enggo ersada ras Ia i bas kematen si bali ras kematenNa, bage me pe kita tentu ersada ras Ia i bas kekeken si bali ras kekekenNa. ⁶ Janah sieteh pe maka "aku"-nta si male e enggo ikut mate i kayu persilang, gelah alu bage gegeh "aku"-nta si dem alu dosa e iruntuhken, dingen lanai kita jadi budak dosa. ⁷ Sabap kalak mate enggo bebas i bas kuasa dosa nari. ⁸ Dage erkiteken enggo mate kita ras Kristus, tek kita maka kita pe nggeluh ka nge ras Ia. ⁹ Sabap sieteh maka Kristus enggo keke i bas si mate nari jenari rasa lalap Ia lanai mate, kematen lanai erkuasa nandangi Ia. ¹⁰ Dage arah kematenNa, sekali seh rasa lalap Kristus enggo nadingken kuasa dosa; janah i bas kegeluhenNa si genduari Ia enggo bengket ku bas lingkungen i ja Dibata erkuasa. ¹¹ Sue ras si e kam pe arus nganggap dirindu enggo mate janah ndarat i bas lingkungen dosa nari, dingen nggeluh i bas lingkungen kuasa Dibata, erkiteken persadanndu ras Kristus Jesus. ¹² E maka olanai pelepas dosa ngerajai kulandu si la banci lang mate e, gelah ola iikutkenndu kinirincuhenna. ¹³ Bage pe ola pelepas ringringndu ipake dosa guna ndalanken si jahat. Tapi endeskenlah dirindu man Dibata, bagi kalak si ipekeke i bas si mate nari. Endeskenlah ringringndu guna ipake Dibata ngelakoken si ngena ateNa. ¹⁴ Dosa lanai erkuasa nandangi kam, sabap kam lanai nggeluh i teruh kuasa Undang-undang, tapi i teruh lias ate Dibata. ¹⁵ Kuga dage genduari? Sibahan dage dosa erkiteken kita lanai i teruh Undang-undang, tapi i teruh lias ate Dibata? Tentu lang! ¹⁶ Tentu ietehndu adi iendeskenndu dirindu man sekalak jelma dingen patuh kam man bana bagi sekalak budak, si tuhuna kam enggo jadi budakna. Adi iperbudakndu dirindu kempak dosa, akibatna kematen, tapi adi erkemalangen kam man Dibata, kam jadi kalak benar. ¹⁷ Tapi sikataken bujur man Dibata, sabap nai kam budak dosa, tapi genduari, alu bulat ukurndu enggo erkemalangen kam man Dibata arah kam ngikutken pengajaren si isehken man bandu. ¹⁸ Dage kam enggo ibebasken i bas dosa nari janah genduari kam enggo jadi "budak" Dibata guna ndalanken perbahanen si mehuli. ¹⁹ Kupake perumpaman budak gelah murah iakapndu ngertikenca. Bagi nai iendeskenndu ringringndu jadi budak si nggesuh ras kejahaten guna ndalanken erbage-bage kejahaten bage me pe genduari arus iendeskenndu ringringndu jadi budak nandangi perbahanen si mehuli gelah kam nggeluh khusus guna Dibata saja. ²⁰ Asum kam nai budak dosa denga, iakapndu kam la terpaksa ngelakoken kai si ngena ate Dibata. ²¹ Kai dage asilna man bandu i bas si e nari? Kerina si e erbahanca mela iakapndu genduari, sabap perbahanenndu e mabai ku kematen. ²² Tapi genduari kam enggo ibebasken i bas dosa nari, janah kam enggo jadi "budak" Dibata. Asilna man bandu e me kap, kam nggeluh khusus guna Dibata. Si enda mabai kam ku kegeluhen si tuhu-tuhu si rasa lalap. ²³ Sabap upah dosa e me kematen; tapi pemere si ibereken Dibata man banta e me kegeluhen si rasa lalap i bas persadan ras Kristus Jesus.

¹ O senina-seninangku kalak Jahudi, kuakap iangkandu nge kai si nandangi kukataken enda, terlebih-lebih kam si meteh Undang-undang. Kukataken man bandu, maka undang-undang erkuasa nandangi sekalak jelma asa dekah geluhna ngenca. ² Sekalak ndehara umpamana, lit i teruh undang-undang perjabun asa umur geluh perbulangenna ngenca. Tapi adi mate perbulangenna e, ia lanai teriket man undang-undang perjabun ras perbulangenna e. ³ Dage adi erjabu ia ras dilaki si deban asum nggeluh denga perbulangenna e, ia igelari erlua-lua. Tapi adi mate perbulangenna e, ia enggo bebas i bas undang-undang perjabun nari, janah labo ia icap perlua-lua aminna pe ia erjabu ras dilaki si deban. ⁴ Bage me pe kam o senina-seninangku, adi inehen arah dampar hubungenndu ras undang-undang, kam enggo mate, erkiteken kam enggo ersada ras kula Kristus. Janah genduari kam enggo banci "erjabu" ras kalak si deban, si enggo ipekeke i bas si mate nari, gelah banci sibahan si mehuli man Dibata. ⁵ Sabap asum nai kita nggeluh denga rikutken biakta si dekah, kerincuhenta erbahan dosa si ipekeke undang-undang e, erdahin i bas ringringta. Si enda mabai kita ku kematen. ⁶ Tapi genduari kita enggo bebas i bas Undang-undang e nari, sabap adi inehen arah segi hubungenta ras Undang-undang si mpenjaraken kita e kita enggo mate. Erkiteken si e pendahinta man Dibata lanai bo sidalanken alu perukuren si dekah, e me erpalasken kepatuhen nandangi aturen-aturen si tersurat saja nge ngenca, tapi dahin Dibata e si dalanken alu sikap si mbaru, e me kap alu pusuh si ersuruh. ⁷ Dage kuga ninta? Undang-undang e kin dosa? Tentu lang! Tapi adi la lit Undang-undang labo aku ngerti kerna dosa. Umpamana, labo kueteh kai ermengga ate adi la ikataken Undang-undang, "Ola ermengga ate!" ⁸ Arah perentah si e dosa ndat kesempaten peturah erbage-bage mengga ate i bas diringku. Adi la lit Undang-undang, dosa bagi barang mate kap. ⁹ Nai pernah menahang kuakap nggeluh asum aku langa i teruh Undang-undang; tapi asum reh perentah Dibata, dosa minter nggeluh mulihi. ¹⁰ E maka mate aku. Janah Undang-undang e si aturna kin mabai aku ku kegeluhen, rikutken pengalamenku kepeken mabai aku ku kematen. ¹¹ Dosa ndat kesempaten arah Undang-undang e janah alu Undang-undang e itipuna janah ibunuhna aku. ¹² Dage Undang-undang e badia nge. Janah pedah e badia, adil dingen mehuli. ¹³ Ntah kin enda ertina maka si mehuli e maba kematen man bangku? Tentu lang! Tapi dosa make si mehuli e ngerehken kematen man bangku, janah alu bage, tangkas me uga kin si tuhuna biak dosa e. Dage erkiteken Undang-undang e tangkas me maka dosa e tuhu-tuhu kal jahat. ¹⁴ Sieteh maka Undang-undang e biakna biak tendi kap; tapi aku biak si erkula kap, janah aku enggo terdaya jadi budak dosa. ¹⁵ Lanai kuangka kai si kubahan; sabap labo kulakoken rikutken sura-surangku, tapi si ciga ateku nge kubahan. ¹⁶ Tapi adi si kudalanken e la bagi sura-surangku, si enda nuduhkenca maka kuakui Undang-undang e bujur. ¹⁷ Dage si tuhuna labo aku erbahanca si la mehuli e; tapi dosa si ringan i bas aku e nge erbahanca. ¹⁸ Kueteh maka si mehuli la lit ringan i bas aku, e me i bas biak kulangku enda. Sabap aminna lit gia sura-surangku erbahan si mehuli, si kudalanken labo bage. ¹⁹ La kudalanken si mehuli si ateku kubahan, tapi kudalanken kai si la mehuli, si la bagi sura-surangku. ²⁰ Adi kudalanken si la bagi sura-surangku, si enda ertina maka labo aku si ndalankenca e, tapi dosa si ringan i bas aku e nge. ²¹ Dage enggo kudat biak si enda i bas diringku: Kubahan kenca ateku si mehuli, si jahat ngenca terbahan aku. ²² Pusuh peratenku ermeriah ukur nandangi Undang-undang Dibata, ²³ tapi kugejap lit sada biak si deban i bas ringringku si erlawanen ras biak si payo kuakap i bas ukurku. Si enda me erbahanca maka aku enggo itaban biak dosa si ringan i bas ringringku. ²⁴ Andiko, cilaka me tuhu aku! Ise nge si mulahi aku i bas biak kematen enda nari? ²⁵ Kukataken bujur man Dibata si mulahi aku arah Jesus Kristus Tuhanta. Dage adi aku jine, i bas ukurku ngenca aku ngikutken Undang-undang Dibata, tapi kulangku ndalanken biak dosa.

¹ Tapi genduari ukumen lanai perlu idalani kalak si lit i bas persadan ras Kristus Jesus. ² Kesah, si biakna kin mereken kegeluhen man kalak si lit i bas persadan ras Kristus Jesus, enggo mulahi kam i bas biak dosa ras kematen nari. ³ Kai si la ngasup Undang-undang erbahanca erkiteken biak kula manusia kote, enggo ibahan Dibata. Enggo iukum Dibata dosa si rurat i bas biak kula manusia alu nuruh AnakNa jine si reh bagi rupa manusia si erdosa guna naluken dosa. ⁴ Si enda ibahan Dibata gelah kita, si lanai nggeluh rikutken sura-sura ukur manusia tapi rikutken Kesah, banci ndalanken perentah si mehuli si lit i bas Undang-undang e. ⁵ Sabap kalak si nggeluh rikutken sura-sura ukur manusia, pusuhna ikuasai sura-sura e. Kalak si nggeluh rikutken sura-sura Kesah, pusuhna ikuasai sura-sura Kesah. ⁶ Adi kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena. ⁷ Pusuh si ikuasai sura-sura ukur manusia ermusuhen kap ras Dibata; sabap pusuh si bage la ngikutken Undang-undang Dibata, janah la kin ngasup pe ngikutken Undang-undang e. ⁸ Kalak si nggeluh rikutken sura-sura ukur manusia la banci ngena ate Dibata ibahanna. ⁹ Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan i bas kam. Kalak si la lit Kesah Kristus i bas ia, la ia sikerajangen Kristus. ¹⁰ Tapi adi Kristus ringan i bas kam, maka amin arus gia kulandu mate erkiteken dosa, tendindu nggeluh kap erkiteken Dibata enggo ngerembakken kam kempak diriNa. ¹¹ Adi Kesah Dibata si enggo mpekeke Jesus i bas si mate nari ringan i bas kam, maka Dibata si enggo mpekeke Kristus i bas si mate nari e la banci lang mereken geluh si mbaru man kulandu si arus mate e, arah KesahNa si ringan i bas kam e. ¹² Dage o senina-senina, tuhu rutang kita; tapi labo guna nggeluh rikutken sura-sura ukur manusia. ¹³ Sabap adi nggeluh kam rikutken sura-sura ukur manusia, kempak kematen kap perlawesndu. Tapi adi ibunuhndu perbahanen-perbahanen biak kulandu alu Kesah Dibata, maka nggeluh me kam. ¹⁴ Kasa kai kalak si itegu-tegu Kesah Dibata, anak-anak Dibata kap. ¹⁵ Sabap Kesah si ibereken Dibata man bandu labo erbahanca kam jadi budak mulihken, seh maka kam mbiar rusur, tapi Kesah e erbahanca kam jadi anak-anak Dibata, janah erkiteken si e banci kita ngerana man Dibata, "O Bapa! O Bapa kami!" ¹⁶ Kesah Dibata ikut ersaksi ras tendinta ngataken maka kita anak-anak Dibata kap. ¹⁷ Dage adi kita anak-anak Dibata tentu sialoken nge kai si enggo isikapken Dibata guna anak-anakNa. Janah kita pe ikut dat bagin i bas kai si enggo isikapken Dibata man Kristus e; sabap adi dat bagin kita i bas kiniseranNa, dat bagin ka me pe kita i bas kemulianNa. ¹⁸ Rikutken perkiranku maka kiniseran si inanami kita genduari labo kai kal pe e adi ibandingken ras kemalemen ate si pagin ipetangkas Dibata man banta. ¹⁹ Kerina si enggo ijadiken Dibata tertima-tima alu ate metedeh ndigan Dibata mpetangkas kemulian anak-anakna. ²⁰ Sabap kerina si ijadiken Dibata e enggo lanai erguna, labo erkiteken sura-surana jine, tapi erkiteken bage me sura-sura Dibata. Amin bage gia lit arapen. ²¹ Sabap i bas sada wari pagi ibebasken Dibata me kerina si enggo ijadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata. ²² Sabap ieteh maka seh paksa si genduari enda kerina si enggo ijadiken Dibata kelsehen ras-ras dingen seh kal akapna suina desken sekalak pernanden si nandangi mupus. ²³ Janah labo e saja, tapi kita pe si enggo ngaloken Kesah selaku jaminen i bas pemere-pemere Dibata si nandangi iberekenNa man banta, kelsehen nge nimai Dibata ndungi pengangkatenta jadi anak-anakNa, e me nebusi badanta. ²⁴ Sabap alu erpengarapen nge maka kita enggo ikelini; tapi adi enggo iidah kai si iarapken lanai bo e pengarapen. Sabap ise kin ngarapken kai si enggo idahna? ²⁵ Tapi adi erpengarapen kita nandangi kai si langa idah, sitimai e alu saber. ²⁶ Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah e me ertoto kerna kita man Dibata alu kelsehen si la terbelasken. ²⁷ Dibata si ngidah pusuh peraten manusia, meteh kai sura-sura Kesah; sabap Kesah e mindo man Dibata guna anak-anak Dibata, janah sue ras peraten Dibata. ²⁸ Sieteh maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah sura-suraNa. ²⁹ Kalak si enggo itandai Dibata arah lebe nai, enggo itetapkenNa gelah bali ras tempas AnakNa, Jesus Kristus, gelah Anak e jadi sintua i tengah-tengah seninana si nterem. ³⁰ E maka enggo ipilih Dibata kalak si enggo itetapkenNa e; kalak si enggo ipilihNa e enggo iperembakNa ras diriNa; janah kalak si enggo iperembakNa ras diriNa e enggo ipermuliakenNa. ³¹ Adi bage, kuga dage ninta kerna si enda kerina? Adi Dibata temanta, ise kin ngasup ngelawan kita? ³² AnakNa kal pe la itahanNa, tapi iendeskenNa AnakNa e man gunanta kerina. Adi AnakNa kal pe iberekenNa man banta, tentu iberekenNa nge kai pe man banta radu ras AnakNa e. ³³ Ise kin pang ngaduken kalak si enggo ipilih Dibata? Dibata jine mutuskenca maka ia la ersalah! ³⁴ Dage ise banci ngukumsa? Kristus Jesus nge ngenca! Tapi Ia jine enggo mate guna kita, enggo nggeluh mulihi, janah enggo merentah ras Dibata guna kita! Kristus Jesus pagi jadi pembelanta i lebe-lebe Dibata. ³⁵ Ise kin ngasup nirangken kita i bas keleng ate Kristus nari? Banci kin kiniseran nirangkenca, ntah kepiceten, penganiayan, kurang pangan tah uis, ancamen, ntah kematen? ³⁶ Bagi lit tersurat i bas Pustaka Si Badia, "Erkite-kiteken Kam me maka gedang-gedang wari kami ibunuhi kalak. Bali kami iakapna ras biri-biri si nandangi igeleh." ³⁷ Tapi i bas si enda kerina tuhu-tuhu kita lebihen asa kalak si permenang erkiteken Kristus si erkeleng ate man banta. ³⁸ Sabap aku enggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe kai si jadi pagin. ³⁹ Subuk kai pe si i babo doni tah si i teruh doni, la lit kai pe i bas kerina si enggo ijadiken Dibata si ngasup nirangken kita ras keleng ate Dibata, e me keleng ate si cidahkenNa i bas Kristus Jesus Tuhanta.

¹ Erkiteken persadanku ras Kristus kai si ateku kukataken enda tuhu kap, labo guak. Pusuh peratenku pe i bas persadan ras Kesah Si Badia ikut ngatakenca bage. ² Tuhu maka ceda kal ateku dingen megogo ateku la erngadi-ngadi. ³ Erkite-kiteken seninangku si sada bangsa ras aku. Adi banci lah labo kuakap dalih aku gia isumpahi Dibata dingen sirang ras Kristus adi alu bage banci kusampati bangsangku e. ⁴ Sabap kalak Israel e me kap bangsa pilihen Dibata, si enggo iangkat Dibata jadi anak-anakNa dingen ipetangkasNa kemulianNa man bana. Ibahan Dibata iketen padan man bana, janah ibereken Dibata Undang-undang man bana. I bas ia lit aturen uga arusna ersembah man Dibata, janah enggo ialokenna padan-padan i bas Dibata nari. ⁵ Kalak enda me kesusuren nini-nini si terberita nai-nai nari, janah Mesias si ipadanken Dibata e, si reh selaku manusia, rehna i bas bangsa e nari. Dibata si erkuasa i bas kerinana terpujilah seh rasa lalap! Amin. ⁶ Labo maka tempa-tempa kai si enggo ikataken Dibata kerna Israel e la seh; sabap labo kerina kesusuren Jahudi subuk Israel si tuhu-tuhu. ⁷ Bage pe labo kerina kesusuren Abraham anak-anakna si tuhu-tuhu. Nina Dibata man Abraham, "Kesusuren Isak nge ngenca pagi ikataken kesusurenndu." ⁸ Si enda ertina maka anak si tubuh secara biasa labo anak-anak Dibata, tapi anak-anak si tubuh erkiteken padan Dibata nge ngenca ikira anak-anak si esah. ⁹ Sabap padan Dibata man Abraham e me kap, "I bas paksa si enggo itentuken pagi, reh Aku mulihken, janah ipupus Sarah me pagi sekalak anak dilaki." ¹⁰ Janah labo e saja, tapi Rebeka pe lit nge dua anakna, bapana sada, e me nininta Isak. ¹¹ - ¹² Ope denga tubuh anak si dua e, bage pe ope denga ia erbahan si mehuli ntah si jahat nina Dibata man Rebeka, "Anakndu sintua pagi jadi si erdahin anakndu si nguda." Si enda ikataken Dibata gelah tangkas ise si pilih Dibata, e erpalasken sura-sura Dibata saja nge. Erkiteken si e tangkas maka pilihen Dibata labo erpalasken perbahanen, tapi erpalasken pilihen Dibata. ¹³ Bagi si tersurat i bas Pustaka Si Badia, "Keleng ateku kesusuren Jakup, tapi elem-elem aku man kesusuren Esau." ¹⁴ Dage kuga ninta? Sikataken kin Dibata e la bujur? Tentu lang! ¹⁵ Sabap man Musa nai enggo ikataken Dibata, "Man ise ateKu Kucidahken perkuah ateKu man bana me Kusehken, man ise ateKu erkeleng ate ia me Kukelengi." ¹⁶ Dage kerna pilihen Dibata labo erpalasken sura-sura tah pendahin manusia, tapi erpalasken perkuah ate Dibata ngenca. ¹⁷ Sabap bagi lit tersurat i bas Pustaka Si Badia, nina Dibata man raja Mesir, "Kam kuangkat jadi raja gelah arah kam teridah kuasangKu si mbelin, janah gelah arah kam gelarKu terberita i belang-belang doni." ¹⁸ Dage man ise ate Dibata icidahkenNa perkuah ateNa, man bana me icidahkenNa perkuah ateNa e, janah ukur ise ate Dibata ipemersikNa, ipemersik Dibata kap. ¹⁹ Banci jadi nungkun kam man bangku, "Adi bage ngkai ka maka isalahken Dibata manusia? Ise kin ngasup ngelawan sura-sura Dibata?" ²⁰ Tapi ise kin iakapndu kam, o manusia, maka pang kam ersoal jabap ras Dibata? Banci kin ngerana kudin taneh man si nepasa, "Engkai maka bagenda aku ibahanndu?" ²¹ Ma kin sekalak pande kudin ate-atena nge erbahan kudin i bas segumpal taneh dah nari sada jadi kudin guna pemaken si meherga, janah sada nari guna pemaken si biasa? ²² Uga adi ituduhken Dibata ateNa rawaNa ras gegehNa nandangi tinepaNa e? Uga adi radu ras si e icidahken Dibata ateNa kesabarenNa arah kalak si nembeh ateNa e, e me kalak si patut ikernepken? ²³ Uga adi ibahanNa bage guna encidahken sinalsal kemulianNa si mehaga nandangi kalak si ngaloken perkuah ateNa, e me kalak si enggo isikapkenNa nai-nai nari guna ngaloken kemulian si bage? ²⁴ Kita me si enggo ipilihNa, labo saja i tengah-tengah kalak Jahudi nari, tapi pe i tengah-tengah kalak si deban si labo kalak Jahudi nari. ²⁵ Bagi lit tersurat i bas kitap Nabi Hosea, nina Dibata, "Bangsa si gelgel nari lanai bangsangKu, Kukataken, ’BangsangKu.’ Si gelgel nari la Kukelengi, genduari Kukataken, ’Keleng ateKu.’ " ²⁶ I bas ingan i ja ikataken man kalak, ’Kam labo bangsangKu,’ i je kal pe igelari me kalak anak-anak Dibata si nggeluh. ²⁷ Tapi nina nabi Jesaya kerna bangsa Israel, "Aminna gia bagi kersik i tepi lawit teremna bangsa Israel, piga-piga kalak si tading nge ngenca pagi terkelin. ²⁸ Sabap keputusen ukumen Tuhan si pedas isehkenNa nandangi doni enda lanai tersimbak." ²⁹ Ope denga si enda, enggo pe ikataken Nabi Jesaya, "Bicara la min ndai lit piga-piga kalak kesusurennta itadingken Tuhan si mada kuasa, enggo min ndai kita kernep bagi Sodom ras Gomora." ³⁰ Kuga dage kedungenna? Kalak si deban si labo kalak Jahudi la ndarami gelah rembak ras Dibata, teridah maka ndatken kerembaken ras Dibata, erpalasken kinitekenna. ³¹ Tapi kalak Israel si ndarami gelah ia rembak ras Dibata arah Undang-undang, la ndatca. ³² Engkai maka lang? Sabap idaramina kerembaken e ras Dibata labo erpalasken kiniteken man Dibata, tapi erpalasken perbahanenna. Enggo terantuk nahena ku "batu antuken". ³³ Bagi lit tersurat i bas Pustaka Si Badia, "Nehenlah, Kutamaken sada batu i Sion si erbahanca kalak tertuktuk, sada batu si erbahanca kalak guling. Tapi kalak si tek man baNa la kecewa."

¹ O senina-seninangku, i bas pusuh peratenku ngarap kal aku gelah ikelini Dibata min bangsangku kalak Israel. Ertoto pe aku man Dibata guna si e. ² Pang aku ngatakenca maka kalak Israel e tuhu-tuhu tutus er-Dibata, tapi ketutusenna e la erpalasken pemeteh si payo. ³ La ia nggit mperdiateken kuga Dibata ngerembakken manusia kempak diriNa. Iusahakenna erbahan kebenaren jine, seh maka la ia nggit takluk man kebenaren Dibata. ⁴ Sabap Kristus e me penggenepen Undang-undang seh maka kerina kalak si tek man baNa rembak ras Dibata. ⁵ Kerna manusia rembak ras Dibata arah ndalanken Undang-undang enggo isuratken Musa, "Kalak si ndalanken kai si ipedahken Undang-undang idatna me kegeluhen arah perbahanenna e." ⁶ Tapi kerna manusia rembak ras Dibata arah kiniteken lit tersurat i bas Pustaka Si Badia, "Ola nungkun i bas ukurndu, ’Ise nge pagi nangkih ku Surga?’ (e me guna maba Kristus ku teruh, ku tengah-tengahta). ⁷ Bage pe ola nungkun i bas ukurndu, ’Ise nge pagi nusur ku teruh, ku ingan kalak si enggo mate?’ (e me mpekeke Kristus i bas si mate nari)." ⁸ Dage kai kin si ikataken i bas Pustaka Si Badia? Enda me, "Kata Dibata e rembak ras kam, enggo lit i bas babahndu dingen enggo pe lit i bas pusuhndu" -- e me kata si iberitaken kami, si nuntut gelah kam erkiniteken. ⁹ Adi ngaku kam alu babahndu, "Jesus Tuhan kap," janah tek kam i bas pusuhndu maka Jesus enggo ipekeke Dibata i bas si mate nari, maka terkelin me kam. ¹⁰ Sabap alu pusuh me kalak erkiniteken seh maka ia irembakken ras Dibata, janah alu babah kalak ngaku seh maka ia ikelini. ¹¹ I bas Pustaka Si Badia lit tersurat, "Ise tek man baNa la kecewa." ¹² Si enda maksudna kerina manusia, sabap labo lit lainna kalak Jahudi ras kalak Junani. Sada ngenca Tuhan, e me Tuhan kerina manusia. Ia melumbar mere man kalak si erlebuh man baNa. ¹³ Bagi lit tersurat i bas Pustaka Si Badia, "Kerina kalak si erlebuh mindo penampat man Tuhan, ikeliniNa nge." ¹⁴ Tapi kuga banci kalak erlebuh mindo penampat man Tuhan adi langa ia tek man baNa? Kuga banci ia tek man baNa adi langa pernah ibegina pe kerna Ia? Kuga banci ibegina adi la lit si meritakenca? ¹⁵ Kuga banci kalak meritaken berita e adi la ia isuruh? I bas Pustaka Si Badia lit tersurat, "Seh kal tuhu ulina kerehen kalak si maba Berita Si Meriah e." ¹⁶ Tapi labo kerina kalak mehuli pengalo-ngalona nandangi Berita Si Meriah e. Nina Nabi Jesaya, "O Tuhan, ise nge tek nandangi berita si ipeseh kami?" ¹⁷ Dage kiniteken rehna arah megi Berita e, janah isi Berita e, e me Kata kerna Kristus. ¹⁸ Tapi nungkun aku: Tuhu kin nge la ibegina berita e? Tentu saja enggo ibegina. Bagi lit tersurat i bas Pustaka Si Badia, "Sorana enggo terbegi ku belang-belang doni enda, janah katana enggo seh ku tampuk doni." ¹⁹ Nungkun ka aku: Uga kerna Israel? Ntah la kin iangkana? Guna njabap penungkunen enda, perlebe kubuat si enggo isuratken Musa, "Nina Dibata, ’Mecimberu kam pagi Kubahan nandangi bangsa si labo bangsa pilihenKu, merawa pagi atendu Kubahan nandangi bangsa si motu.’ " ²⁰ Janah lebih asa si e Nabi Jesaya ngerana alu la biar-biaren, nina, "Nina Dibata, ’Kalak si la ndarami Aku, jumpa ras Aku; Kucidahken diringKu man kalak si la nungkuni kerna Aku.’ " ²¹ Tapi man kalak Israel, nina Dibata, "Gedang-gedang wari Kududurken tanKu man bangsa si la patuh dingen si nimbak."

¹ Dage nungkun aku: Enggo kin itulak Dibata bangsa pilihenNa e? Tentu lang! Aku pe kalak Israel nge, kesusuren Abraham, janah i bas suku Benyamin nari. ² Labo itulak Dibata bangsaNa si enggo itandaiNa nai nari. Tentu enggo ietehndu si tersurat i bas Pustaka Si Badia kerna Elia, asum ia ertoto ngaduken bangsa Israel man Dibata, nina, ³ "O Tuhan, enggo ibunuhna nabi-nabiNdu, janah enggo irontaskenna batar-batarNdu. Aku nari ngenca tading, janah kesahku pe ibuatna atena." ⁴ Kuga nina Dibata ngaloi Elia? Nina Dibata, "Enggo Kuserapken man bangKu pitu ribu kalak si langa pernah ersembah man dewa Baal." ⁵ Bage me genduari enda: lit piga-piga kalak si tading si enggo ipilih Dibata erkiteken lias ateNa. ⁶ Dibata milih labo erpalasken kai si enggo ibahan kalak e, tapi erkiteken ateNa nge. Sabap adi erpalasken perbahanen manusia kin Dibata e milih, maka lias ateNa e lanai bo lias ate si tuhu-tuhu. ⁷ Kuga dage? Kai si idarami Israel la idatna. Tapi piga-piga kalak si enggo ipilih Dibata e ngenca si ndatsa. Si debanna e kerina ipemersik ukurna. ⁸ Bagi lit tersurat i bas Pustaka Si Badia, "Ibahan Dibata maka bene kal ukurna, janah seh paksa enda matana lanai erpengidah janah cupingna lanai erpemegi." ⁹ Bage me pe si ikataken Daud, "Mbera-mbera kerja si ibahanna jadi siding, jadi ragum, batu antuken ras ukumen man bana. ¹⁰ Mbera-mbera seleng matana gelah ola ia erpengidah; janah mbengkunglah ia rasa lalap ibahan kesusahenna." ¹¹ Nungkun ka aku: Asum kalak Jahudi tertuktuk nai, guling kin ia seh ampar? Tentu lang! Tapi erkiteken kalak Jahudi enggo erdosa, ibereken Dibata kesempaten e man bangsa si deban gelah mengga ate bangsa Jahudi nandangi bangsa si deban e. ¹² Bangsa Jahudi la erkemalangen man Dibata janah la setia man baNa. Si enda maba pasu-pasu man kerina bangsa-bangsa si deban i doni enda. Apai denga ka adi hubungen bangsa Jahudi ras Dibata jadi mehuli mulihken, tentu beliden ka pasu-pasu si ibereken Dibata. ¹³ Kukataken man bandu o kam kalak si labo Jahudi: Kidekah aku rasul guna kalak si labo Jahudi, megah kuakap i bas dahinku e. ¹⁴ Banci jadi ngasup aku erbahan bangsangku ermengga ate, gelah erkiteken si e ikelini Dibata ia deba-deba. ¹⁵ Sabap adi enggo itulak Dibata ia, doni enda jadi teman ras Dibata. Tapi kuga nge adi ialoken Dibata bangsa Jahudi e mulihken? Tentu si e bali ras si mate nggeluh mulihi. ¹⁶ Adi cimpa si pemena khusus ibereken man Dibata, maka kerina cimpa e pe jadi sikerajangenNa. Janah adi urat kayu ikhususken man Dibata maka dahan-dahan kayu e pe jadi sikerajangenNa. ¹⁷ Piga-piga dahan batang seton enggo itektek, jenari icangkokken ku batangna e sada dahan seton kerangen. Kam kalak si labo Jahudi iumpamaken bali ras batang seton si turah i kerangen e, janah genduari kam enggo ndat bagin si mehuli bagi si enggo inanami kalak Jahudi. ¹⁸ E maka ola kam megombang man kalak si bali ras dahan si enggo itektek e. La kap lit dalanna maka kam megombang. Sabap kam dahan nge ngenca, labo kam natang urat-urat tapi urat-urat nge natang kam. ¹⁹ Tapi nggit me maka nindu, "Dahan-dahan e itektek gelah aku banci icangkokken ku batang e." ²⁰ Tuhu bage. Bangsa Jahudi e enggo itektek erkiteken la ia tek, tapi kam tetap leket i bas batang e erkiteken tek kam. Amin bage pe ola meganjang ukurndu kerna si e, tapi erkemalangenlah kam man Dibata. ²¹ Sedangken bangsa Jahudi pe la Dibata alang-alangen ngambengkenca, apai denga ka kam? ²² Dage teridah man banta uga belinna lias ate Dibata bage pe kuga Ia la alang-alangen ngukum kalak. La Ia mbiar ngukum kalak si enggo erdosa, tapi melias Ia man bandu adi tetap kam erbahan si ngena ateNa, gelah tetap kam ngenanami kiniulinNa; tapi adi lang, kam pe iambekkenNa nge. ²³ Janah kalak Jahudi, adi jera ia janah tek, icangkokken Dibata me ia mulih ku batang e, sabap Dibata ngasup nge erbahan si bage pe. ²⁴ Kam kalak si labo Jahudi bali ras dahan seton kerangen si enggo itektek, jenari icangkokken ku batang seton si ipiara. Si enda erlawanen ras kebiasan. Kalak Jahudi bali ras batang seton si ipiara; tentu sukahen nge iakap Dibata encangkokken mulihi dahan asli ku batangna jine. ²⁵ O senina-seninangku, gelah ola iakapndu beluh bandu, perlu kuakap ietehndu rahasia enda: Ukur kalak Jahudi labo mersik seh rasa lalap, tapi ngayak kuh bilangen kalak si labo Jahudi jadi anak-anak Dibata. ²⁶ Dage kerina nge pagi kalak Israel ikelini. Bagi lit tersurat i bas Pustaka Si Badia, "Si Engkelini e pagi rehna i Sion nari janah imasapkenNa me kerina kejahaten kesusuren Jakup." "Nina Dibata, ²⁷ ’Kubahan me iketen padan ras ia, tupung Kualemi dosa-dosana.’ " ²⁸ Erkiteken itulak kalak Jahudi Berita Si Meriah, e maka jadi imbang Dibata ia, tapi si enda jadi keuntungen man bandu o kalak si labo Jahudi. Tapi erkiteken pilihen Dibata, kalak Jahudi e teman Dibata nge, erkiteken nini kalak Jahudi e. ²⁹ Dibata labo erkadiola adi Ia enggo milih dingen masu-masu. ³⁰ Bali nge ras kam nai, o kalak si labo Jahudi, nai la kam erkemalangen man Dibata; tapi genduari erkiteken kalak Jahudi la erkemalangen man Dibata enggo ialokenndu perkuah ate Dibata. ³¹ Bage me pe kalak Jahudi genduari la erkemalangen man Dibata gelah arah perkuah ate si enggo ialokenndu e ialokenna ka perkuah ate. ³² Sabap kerina manusia la erkemalangen man Dibata. E maka lanai lit dalanna pulah ibahan Dibata. Si enda ibahanNa alu perayaken gelah banci icidahkenNa perkuah ateNa man kerinana. ³³ Seh kal tuhu bayakna Dibata! Seh kal tuhu bagesna kepentaren ras pemetehNa! Ise kin ngasup nerangken keputusen-keputusenNa? Ise ngasup ngikuti dalan si idalaniNa? ³⁴ Bagi lit tersurat i bas Pustaka Si Badia, "Ise kin meteh perukuren Tuhan? Ise kin ngasup ngajarken Ia? ³⁵ Ise kin pernah mere man baNa gelah ndatken balasen i bas Ia nari?" ³⁶ Sabap kerina si nasa lit Dibata njadikenca, janah kerina e lit erkiteken Ia dingen man gunaNa. Terpujilah Dibata seh rasa lalap. Amin.

¹ O senina-seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur. ² Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena ateNa, janah kai si sempurna. ³ Janah erpalasken lias ate Dibata si enggo iberekenNa man bangku, kukataken man bandu kerina: Ola iakapndu ganjangen bandu asa patutna. Tapi arus maka rembang tengah pengukurindu kerna dirindu sue ras belinna kiniteken si enggo ibagi-bagiken Dibata man bandu sekalak-sekalak. ⁴ I bas kulanta si sada enda melala ringringna, janah kerina ringring e lit gunana. ⁵ Bage pe, amin nterem gia kita, tapi sada kula kap kita i bas persadanta ras Kristus, janah kita ipersada kerina bagi ringring i bas sada kula. ⁶ E maka sipergunakenlah kengasupenta si pelain-lain e si enggo ibereken Dibata man banta rikutken lias ateNa. Adi man banta ibereken Dibata kengasupen ernubuat, silakokenlah e sue ras ajaren kiniteken. ⁷ Adi man banta ibereken Dibata kengasupen guna nampati kalak, sisampatilah ia. Adi man banta ibereken Dibata kengasupen ngajar, ngajarlah kita. ⁸ Adi man banta ibereken Dibata kengasupen petetap ukur kalak, silakokenlah e. Kalak si ngasup mere man kalak si deban arus iberekenna e alu ukur menahang; kalak si lit kengasupenna jadi peminpin, arus ia tutus erdahin; kalak si ngasup encidahken perkuah ate man kalak si deban, arus ibahanna e alu ukur meriah. ⁹ Keleng ate ola min alu pekulah-kulah. Cigalah atendu si jahat janah persadalah dirindu ras si mehuli. ¹⁰ Sikeleng-kelengenlah kam bagi si ersenina. Silebe-lebenlah kam i bas mpehaga teman. ¹¹ Ola kam mekisat, tapi tutuslah erdahin. Ergiah-giahlah ukurndu i bas ndahiken dahin Tuhan. ¹² Meriahlah atendu i bas kam erpengarapen, megenggenglah kam i bas kiniseranndu, janah ertotolah kam man Dibata la erngadi-ngadi. ¹³ Raskenlah kinilitenndu ras temanndu si sada kiniteken, janah alokenlah kalak si reh kesilang ku rumahndu. ¹⁴ Pasu-pasulah kalak si pesega-sega kam, pasu-pasulah, ola sumpahi. ¹⁵ Meriahlah ukurndu ras kalak si ermeriah ukur, tangislah kam ras kalak si tangis. ¹⁶ Sekalak-sekalak kam arus mperdiateken keperlun kalak si deban. Ola meganjang ukurndu, tapi pertemanilah kalak si meteruk pe. Ola beluh iakapndu bandu. ¹⁷ Adi lit kalak erbahan jahat man bandu, ola balas alu kejahaten. Bahanlah si mehuli rikutken pengakap jelma si nterem. ¹⁸ Asa ngasupndu usahakenndulah gelah meriah kam ras kerina kalak. ¹⁹ O teman, ola kal kam erbalas, tapi berelah dalan man Dibata guna nehken rawaNa. Sabap nina Tuhan i bas Pustaka Si Badia, "Kuukum me pagi! Kubalas me pagi!" ²⁰ Tapi lit ka pe tersurat i bas Pustaka Si Badia, "Adi melihe imbangndu, bere manlah ia; adi muas ia, bere minemlah. Sabap adi bage perbahanenndu, mela dingen melas me iakapna." ²¹ Ola pelepas kam talu ibahan si jahat, tapi talukenlah si jahat e alu perbahanen si mehuli.

¹ Kerina kam arus patuh man pemerentah si erkuasa, sabap labo lit pemerentah si la i bas Dibata nari, janah pemerentah si lit genduari e pe Dibata nge netapkenca. ² Kalak si ngelawan pemerentah si lit e, ilawanna kap kai si enggo itetapken Dibata, janah kalak si bage perbahanenna, ilegina kap ukumen nandangi dirina jine. ³ Kalak si mehuli perbahanenna, labo mbiar man pemerentah; kalak si jahat perbahanenna nge si mbiar. Adi atendu gelah ola kam mbiar man pemerentah, bahanlah si mehuli, gelah pemerentah muji kam. ⁴ Sabap pemerentah e kap persuruhen Dibata si erdahin guna kiniulinndu. Tapi adi kam erbahan jahat, mbiarlah man bana, sabap labo sia-sia lit senjata i bas pemerentah guna ngukum. Persuruhen Dibata kap ia janah ia me si nehken ukumen si reh i bas Dibata nari nandangi kalak si erbahan jahat. ⁵ Erkiteken si e, patuhlah kam nandangi pemerentah, labo saja erkiteken mbiar kena ukumen, tapi erkiteken pusuh peratenndu pe nuruh kam. ⁶ Erkiteken si enda me pe maka kam arus nggalar pajak, sabap pemerentah ngaloken jabatenna i bas Dibata nari, janah alu bulat ukur idalankenna tugas-tugasna e. ⁷ E maka berekenlah man sekalak-sekalak kai si patut ialokenna. Galarilah pajakndu man si ngaloken pajak, cuke man pemungut cuke. Hamatilah kalak si patut ihamatindu, janah pehagalah kalak si patut ipehagandu. ⁸ Ola kam rutang man ise pe -- seakatan rutang sikeleng-kelengenlah sapih-sapih kam. Kalak si erkeleng ate nandangi kalak si deban, ia enggo nehken Undang-undang. ⁹ Sabap pedah "Ola erlua-lua; ola munuh; ola nangko; ola mengga ate;" -- kerina si enda ras pedah-pedah si debanna ipersada i bas pedah si sada enda, e me, "Kelengilah temanndu manusia bagi kam engkelengi dirindu." ¹⁰ Kalak si erkeleng ate man temanna manusia asa ndigan pe labo ibahanna si jahat. Dage alu nehken kekelengen enggo kap bali ras nehken kerina Undang-undang. ¹¹ Si enda arus idalankenndu, sabap ietehndu maka enda me paksa si menentuken man bandu. Enggo seh jamna maka kam medak. Sabap warina kita ikelini Dibata deheren genduari asangken asum tangtangna kita tek nai. ¹² Sabap berngi lawes ku siangna me, janah nandangi terang me wari. E maka sitangtangilah perbahanen si gelap, janah sipakelah senjata guna erperang i bas terang. ¹³ Mehulilah min lagu langkahta, bagi kalak si nggeluh i bas terang wari; ola erpesta minem-minem mabuk-mabuk; ola erlua-lua ntah la meteh mela; ola rubat ntah pe mecimberu. ¹⁴ Tapi cidahkenlah biak Jesus Kristus i bas geluhndu. Janah ola asuhi i bas ukurndu sura-sura guna ngikutken dingen pepuasken biakndu si erdosa.

¹ Alokenlah kalak si merampek kinitekenna. Ola sijabapen ras ia kerna penggejapenna. ² Kalak si deban kinitekenna erbahanca maka kai pe banci ipanna, tapi kalak si merampek kinitekenna gule-gulen saja ngenca ipanna. ³ Kalak si kai pe banci ipanna e ola megombang nandangi kalak si man gule-gulen saja; kalak si gule-gulen saja ngenca ipanna ola isalahkenna kalak si kai pe ipanna e, sabap ia enggo ialoken Dibata. ⁴ Ise kin kam maka isalahkenndu juak-juak kalak? Tuanna nge si metehsa perguling ras pertedisna. Janah si tuhuna tetap nge pertedisna, sabap Tuhan ngasup erbahanca ia tedis. ⁵ Lit kalak erpengakap maka wari-wari tertentu pentingen asangken wari-wari si deban, tapi lit ka kalak erpengakap bali nge kerina wari-wari e. Kerna si e arus maka sekalak-sekalak netapken ukurna. ⁶ Kalak si erpengakap maka lit sada wari si tertentu si lebih penting, ibahannalah e guna Tuhan. Kalak si kai pe ipanna, ibahannalah e guna Tuhan, sabap ikatakenna nge bujur man Dibata. Kalak si labo kerina pangan ipanna, ibahannalah guna Tuhan, janah ikatakennalah bujur man Dibata. ⁷ Sekalak pe kita enda labo nggeluh guna dirinta saja; sekalak pe kita enda labo mate guna dirinta saja. ⁸ Adi nggeluh kita, kita nggeluh guna Tuhan, janah adi mate kita, kita mate guna Tuhan. Dage nggeluh tah mate gia kita, sikerajangen Tuhan kap kita. ⁹ E me sabapna maka Kristus mate jenari nggeluh mulihi, gelah Ia jadi Tuhan kalak si nggeluh ras kalak si enggo mate. ¹⁰ Dage ngkai maka isalahkenndu temanndu si sada kiniteken i bas pihak si deban? Janah ngkai maka pihak si sada nari megombang kam nandangi temanndu si sada kiniteken? Sabap kerina nge pagi kita tedis i lebe-lebe Dibata guna iadili. ¹¹ Bagi lit tersurat i bas Pustaka Si Badia, "Nina Tuhan, ’Ersumpah Aku maka kerina pagi manusia erjimpuh i lebe-lebengKu,’ janah kerina pagi babah ngaku maka Aku kap Dibata." ¹² Dage sekalak-sekalak kita arus pagi mereken pertanggungen jawabenna man Dibata guna dirina jine. ¹³ Dage olanai kita sisalah-salahen pekepar. Tapi tetapkenlah i bas ukurndu maka ola ibahanndu guling ntah kitik ukur teman-temanndu si sada kiniteken. ¹⁴ Sue ras si iajarken Tuhan Jesus kueteh dingen tek aku maka labo lit pangan si biak man pantangenken; tapi adi lit kalak erpengakap maka lit deba-deba pangan si man pantangenken, ipantangkennalah e. ¹⁵ Adi menek ate senina-seninandu ibahanndu erkiteken panganndu, perbahanenndu e lanai erpalasken kekelengen. Ola pelepas kai si ipanndu meneken temanndu si sada kiniteken; ingetlah maka Kristus enggo mate guna ia. ¹⁶ Ola pelepas kai si iakapndu mehuli e icap kalak la mehuli. ¹⁷ Sabap i bas Kinirajan Dibata, aturen kerna pangan ras inemen labo penting. Si penting e me perbahanen si mehuli, kemalemen ate ras keriahen si ibereken Kesah Si Badia. ¹⁸ Kalak si bage perbahanenna selaku si erdahin Kristus, ngena ate Dibata dingen iergaken manusia pe ia. ¹⁹ E maka sidaramilah kai si erbahanca maka kalak tetap nggeluh alu dame bage pe si peteguh kinitekenta pekepar. ²⁰ Janah ola erkiteken pangan icedakenndu pendahin Dibata. Kerina pangan banci ipan tapi salah me kam adi erkiteken kai si ipanndu e kalak si deban guling. ²¹ Ulin la kam man daging ntah minem anggur ntah ngelakoken kai si debanna adi e erbahanca temanndu si sada kiniteken monggar. ²² Adi tek kam maka kerina pangan banci ipan, lakokenlah e guna dirindu jine i lebe-lebe Dibata. Ketuahen kalak si pusuh peratenna la nalahken ia i bas ia ndalanken kai si iakapna mehuli. ²³ Tapi kalak si sangsi enggo ersalah iakapna bana adi ipanna, sabap e la turah i bas kiniteken nari. Kerina si ibahan kalak si la turah i bas kiniteken nari, dosa kap.

¹ Kita si megegeh kinitekenta arus nampati kalak si merampek kinitekenna, guna mersan babanna. Ola dirinta ngenca siukuri. ² Tapi sekalak-sekalak kita arus mperdiateken temanta manusia janah ngukuri kai si mereken kiniulin man bana gelah alu bage erteguhna kinitekenna. ³ Sabap Kristus pe labo diriNa saja iukuriNa, bagi lit tersurat i bas Pustaka Si Badia, "Isak-isak kalak si ngisakken Kam enggo ndabuh man bangku." ⁴ Kerina si tersurat i bas Pustaka Si Badia isuratken ngajari kita gelah erpengarapen erkiteken kesabaren ras pergegeh si ibereken Pustaka Si Badia man banta. ⁵ Mbera-mbera Dibata ulu kesabaren ate dingen ulu pergegeh erbahanca ersada ukurndu kerina erkiteken Jesus Kristus jadi usihenndu. ⁶ Gelah kerina kam, alu ersada sora banci muji Dibata, Bapa Tuhanta Jesus Kristus. ⁷ Bagi Kristus enggo ngaloken kam, kam pe alokenlah temanndu sapih-sapih kam gelah terpuji Dibata. ⁸ Sabap kukataken man bandu maka Kristus enggo erdahin guna kalak Jahudi lako encidahken maka Dibata setia i bas nehken padanNa man nininta nai. ⁹ Janah gelah kalak si labo Jahudi pe banci muji Dibata erkiteken perkuah ateNa. Bagi lit tersurat i bas Pustaka Si Badia, "E maka kukataken bujur man baNdu, i tengah-tengah bangsa-bangsa si deban, rende me aku muji gelarNdu." ¹⁰ Tole nina, "O kam kalak si labo Jahudi, meriahlah atendu ras bangsa pilihen Dibata." ¹¹ Lit ka pe tole tersurat, "Pujilah Tuhan o kam kerina kalak si labo Jahudi; pujilah Ia o kerina bangsa." ¹² Bage pe nina Nabi Jesaya, "Turah me tunas i bas urat Isai nari, keke me Ia pagi guna merentah kalak si labo Jahudi, janah man baNa me kalak si labo Jahudi e erpengarapen." ¹³ Dibata sumbul pengarapen, Ialah ndemi kam alu keriahen ras kemalemen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa. ¹⁴ O senina-seninangku, kugejap tuhu-tuhu maka melala kal si mehuli i bas kam. Kam pe dem alu erbage-bage pemeteh maka kam ngasup siajar-ajaren. ¹⁵ Tapi i bas surat enda enggo kusuratken piga-piga persoalen man bandu alu terus terang gelah mpersingeti kam mulihken. Pang aku nurutkenca erkiteken lias ate Dibata si enggo iberekenNa man bangku. ¹⁶ Lias ateNa e enggo ngangkat aku jadi pejabat Kristus Jesus guna kalak si labo Jahudi. Aku erdahin selaku imam si meritaken Berita Si Meriah si rehna i bas Dibata nari, gelah kalak si labo Jahudi e banci desken sada persembahen si ngena ate Dibata si ikhususken Kesah Si Badia man Dibata. ¹⁷ Dage megah kuakap i bas persadanku ras Jesus Kristus erkiteken pendahinku guna Dibata. ¹⁸ Kai si ibahan Kristus arah aku, e ngenca aku pang ngatakenca, e me mabai kalak si labo Jahudi e erkemalangen man Dibata. erkemalangen ia man Dibata arah kata si kubelasken ras arah perbahanen si kubahan. ¹⁹ Arah gegeh tanda-tanda sengget si mbelin, bage pe arah gegeh Kesah Si Badia. Bage me i bas aku niari daerah-daerah mulai i Jerusalem nari seh ku propinsi Iliria enggo serser kuberitaken Berita Si Meriah kerna Kristus. ²⁰ Sura-surangku si mbelinna e me meritaken Berita Si Meriah ku ingan i ja langa pernah ibegi kalak kerna gelar Kristus, gelah ola aku tempa-tempa majekken rumah i babo palas si enggo ipajekken kalak si deban. ²¹ Bagi lit tersurat i bas Pustaka Si Badia, "Kalak si man bana langa iberitaken kerna Ia, idahna me pagi, janah kalak si langa pernah megi, iangkana me pagi." ²² E me sabapna maka lit rusur abatna man bangku guna reh ndahi kam. ²³ Tapi genduari enggo dung dahinku i daerah-daerah enda. Janah erkiteken enggo piga-piga tahun dekahna aku ersura-sura ndahi kam, ²⁴ ngarap aku maka i bas perdalanenku ku Sepanyol denggo banci aku singgah dingen jumpa ras kam. Janah ateku isampatindu aku i bas perdalanenku ku jah kenca kita ras piga-piga dekah. ²⁵ Tapi genduari lawes aku ku Jerusalem guna naruhken penampat man perpulungen si i jah. ²⁶ Sabap perpulungen-perpulungen si lit i Propinsi Makedoni ras Akaya enggo ersada arih mereken penampat guna nampati si musil i tengah-tengah perpulungen i Jerusalem. ²⁷ Si enda itetapkenna alu ukurna meriah. Janah si tuhuna rutang nge ia nampati kalak si musil e, sabap adi kalak si labo Jahudi e enggo ngaloken keperlun pertendinna i bas kalak Jahudi nari, rutang pe ia nampati kalak Jahudi e alu mereken keperlun kula si tep-tep wari. ²⁸ Kenca dung dahinku enda, janah kenca kuendesken buah kiniteken enda man bana, berkat me aku ku Sepanyol, janah i bas perdalanenku ku jah singgah aku i jena. ²⁹ Tek aku maka sanga aku reh pagi ndahi kam, dem pagi kubaba pasu-pasu si rehna i bas Kristus nari. ³⁰ O senina-seninangku, erkiteken Tuhan Jesus Kristus dingen erkiteken kekelengen si enggo ibereken Kesah Dibata man banta, kupindo man bandu maka ras-ras min kita ertoto man Dibata alu tutus ate guna aku. ³¹ Ertotolah kita gelah aku terkelin i bas bahaya si rehna i bas kalak Judea si la tek man Jesus Kristus, janah anak-anak Dibata si Jerusalem ermeriah ukur ngaloken pendahinku man bana. ³² Janah adi bage ate Dibata, reh me aku ndahi kam alu dem keriahen, gelah arah kerehenku e kita ras-ras pekesahken alu senang. ³³ Dibata sumbul kemalemen ate man banta, nemani kam kerina gelah! Amin.

¹ Ateku mpetandaken turangta Pebe man bandu. Ia sekalak diaken i bas perpulungen si lit i Kenkerea. ² Alokenlah ia i bas gelar Tuhan, bagi arusna ibahan anak-anak Dibata. Sampatilah ia i bas kai pe si iperlukenna i bas kam nari; sabap ia jine enggo nterem kalak isampatina janah aku pe enggo isampatina. ³ Mejuah-juah man Persila ras perbulangenna Akuila, temanku sada dahin i bas dahin Kristus Jesus. ⁴ Si la mbiar ngasamken kesahna man gunangku. Mbue bujur kukataken man bana, labo aku saja ngataken bujur man bana, tapi pe kerina perpulungen-perpulungen kalak si labo Jahudi. ⁵ Mejuah-juah pe kukataken man perpulungen si make rumahna jadi ingan kebaktin. Mejuah-juah man Epenetus temanku si kukelengi, kalak si pemenana tek man Kristus i Propinsi Asia. ⁶ Mejuah-juah man Maria si enggo latih erdahin gunandu. ⁷ Mejuah-juah man Andronikus ras Junias, temanku sebangsa si pernah ipenjaraken ras aku. Duana ia terberita selaku perintis i bas meritaken Berita Si Meriah janah leben nge ia duana jadi Kristen asangken aku. ⁸ Mejuah-juah man Ampliatus, temanku si kukelengi i bas Tuhan. ⁹ Mejuah-juah man Urbanus, temanta si sada dahin i bas dahin Kristus janah man Stahis temanku si kukelengi. ¹⁰ Mejuah-juah man Apeles si enggo icidahkenna kesetianna man Kristus. Mejuah-juah man Aristobulus sada jabu. ¹¹ Mejuah-juah man Herodian, temanku sebangsa, ras man senina-senina i bas keluarga Narkisus nari si lit i bas persadan ras Tuhan. ¹² Mejuah-juah man Tripena ras Triposa si enggo latih erdahin guna dahin Tuhan, bage pe man Persis si kukelengi si enggo mbue erdahin i bas dahin Tuhan. ¹³ Mejuah-juah man Rupus kalak pilihen i bas dahin Tuhan bage pe man nandena si perbahanenna man bangku bali ras man anakna jine. ¹⁴ Mejuah-juah man Asinkritus, Pelegon, Hermes, Petrobas, Hermas, ras kerina senina-seninanta si sada kiniteken si ras kalak enda. ¹⁵ Mejuah-juah man Pilologus ras Julia, man Nerus ras turangna, man Olimpas ras kerina anggota anak-anak Dibata si ras kalak e. ¹⁶ Katakenlah mejuah-juah sapih-sapih kam arah sisalam-salamen alu dem ate keleng. Kerina perpulungen-perpulungen Kristus ngataken mejuah-juah man bandu. ¹⁷ Kupindo man bandu o senina-seninangku: Metengetlah nandangi kalak si erbahanca pecah perpulungen dingen si erbahanca kalak papak alu ngelawan pengajaren si enggo ipelajarindu. Ola deherindu kalak si bage! ¹⁸ Sabap kalak si bage labo erdahin guna Tuhanta, Kristus, tapi guna beltekna saja nge. Alu ranan mehuli dingen muji-muji itipuna kalak si bujur-bujur ukurna. ¹⁹ Kepatuhenndu nandangi Dibata enggo terberita ku japa pe. E maka malem ateku erkiteken kam. Amin bage gia ateku min gelah pentar kam i bas si mehuli tapi bersih kam i bas perbahanen si jahat nari. ²⁰ Janah Dibata sumbul kemalemen ate man banta minter me engkernepken Iblis i teruh tapak-tapak nahendu. Lias ate Tuhanta Jesus ras kam kerina gelah. ²¹ Timotius temanku sada dahin, ras Lusius, Jason, bage pe Sosipatrus, e me teman-temanku sebangsa, nehken berita mejuah-juah man bandu. ²² Aku pe, Tertius, si enggo nuratken surat enda, nehken berita mejuah-juah man bandu i bas Tuhan. ²³ Gayus inganku kesilang, si i bas rumahna perpulungen pulung, nehken berita mejuah-juah man bandu. Bage pe Erastus e me bendahara kuta enda ras seninanta Kuartus nehken berita mejuah-juah man bandu. ²⁴ Lias ate Tuhanta Jesus Kristus, ras kam kerina gelah! Amin. ²⁵ Pujin man Dibata si ngasup mpeteguh kam i bas kiniteken rikutken Berita Si Meriah si kuberitaken, e me berita kerna Jesus Kristus dingen rikutken tangkasna rahasia si terbuni nai-nai nari. ²⁶ Tapi genduari rahasia e enggo tangkas arah kai si isuratken nabi-nabi. Janah erkiteken pedah Dibata, e me Dibata si rasa lalap, rahasia e ipebetehken me man kerina bangsa, gelah kerina banci erkemalangen erpalasken kiniteken man baNa. ²⁷ Terpujilah Dibata seh rasa lalap arah Jesus Kristus; Ia kap ngenca si mada kepentaren. Amin.