KETANGKASEN

KETANGKASEN

¹ Enda me ketangkasen si ibereken Dibata man Jesus Kristus guna ncidahken man persuruhen-persuruhen Dibata kai si nandangi pedas jadi. Si enda ipetangkas Kristus man persuruhenNa Johanes alu nuruh malekatNa ndahi Johanes. ² E maka ituriken Johanes me kerina si enggo idahna e. Enda me si ipesehna kerna Kata Dibata dingen si ibenarken Jesus Kristus. ³ Ketuahen kalak si ngogeken Kitap enda. Ketuahen kalak si megiken kata nubuat dingen ngikutken kai si tersurat i bas Kitap enda! Sabap enggo ndeher paksana jadi me kerina si tersurat enda. ⁴ I bas Johanes nari, man perpulungen si pitu i Propinsi Asia. Simparlah man bandu keleng ate ras dame si rehna i bas Dibata nari, e me Dibata si nai nari lit seh asa genduari dingen si lit seh rasa lalap, bage pe si rehna i bas Kesah si pitu nari si ringan i lebe-lebe kursi kinirajan Dibata. ⁵ Bage pe alokenlah perkuah ate ras dame si rehna i bas Jesus Kristus nari, saksi si tutus, Anak sintua si enggo ipekeke Dibata i bas si mate nari, si erkuasa nandangi kerina raja-raja i doni enda. Keleng ate Jesus kita, janah arah kematenNa ipulahiNa kita i bas dosa-dosanta nari. ⁶ Ia me si erbahanca kita jadi kinirajanNa, e me jadi imam-imam guna ndahiken dahin Dibata, BapaNa. Iakuilah kemulian ras kuasaNa seh rasa lalap. Amin. ⁷ Nehenlah, ia reh ras embun! Kerina kalak ngidah Ia pagi, subuk kalak si enggo nebak ia pe. Kerina suku-suku bangsa i doni enda nangisi Ia. Payo, bage me jadina. Amin. ⁸ "Aku kap si perlebe ras si pendungina," nina Tuhan, Dibata si Mada Kuasa, nai nari, genduari, seh rasa lalap. ⁹ Aku Johanes, seninandu, erkiteken persadanta i bas Jesus Kristus. Aku ikut ras kam ngenanami kiniseran ras i bas kinirajanNa bage pe ikut megenggeng nimai kerehen Jesus. Aku ibuang ku Pulau Patmos erkiteken kuberitaken Kata Dibata ras ersaksi kerna Jesus. ¹⁰ I bas wari Tuhan ikuasai Kesah Dibata aku, jenari kubegi sora megang bagi sora terompet, ngerana i pudingku. ¹¹ Nina, "Suratkenlah kai si idahndu, jenari kirimken Kitap e man perpulungen si pitu e me Epesus, Semirna, Pergamon, Tiatira, Sardes, Piladelpia ras Laodikea." ¹² Kutulihken ku pudi guna ngenen ise si ngerana man bangku e. Kuidah pitu nahe lampu si ibahan i bas emas nari. ¹³ I tengah-tengahna lit kuidah tedis bagi Anak Manusia. IpakeNa jubah si gedang seh ku naheNa janah sada gendit emas ililetken i bas tentenNa. ¹⁴ Bukna mbentar bagi kapas, bagi embun si mbentar, janah mataNa ernala, bagi dilah api; ¹⁵ naheNa erkilat-kilat bagi tembaga si enggo ilebur i bas pertukangen jenari isepuh. SoraNa bali ras sora sampuren si mbelin. ¹⁶ TanNa si kemuhen njemak pitu bintang, i bas babahNa nari ndarat sada pedang si ntelap, ermata dua. AyoNa ersinalsal bagi matawari tupung ciger. ¹⁷ Asum kuidah Ia, nerunuk aku i lebe-lebe naheNa bali ras kalak mate. Jenari itamakenNa tanNa si kemuhen ku babongku, janah nina, "Ola mbiar! Aku kap si perlebena dingen si pendungina. ¹⁸ Aku kap si nggeluh! Mbarenda mate Aku, tapi nehenlah, Aku nggeluh rasa lalap. Aku njemaksa kunci kematen ras doni kematen. ¹⁹ E maka suratkenlah kai si enggo idahndu, si jadi genduari, bage pe kai si nandangi jadi pagin. ²⁰ Enda me antusenna rahasia bintang si pitu si enggo idahndu i bas tanKu si kemuhen bage pe nahe lampu si pitu si ibahan i bas emas nari; bintang si pitu e, e me malekat-malekat perpulungen si pitu, janah nahe lampu si pitu e, e me perpulungen si pitu e."

¹ "Man malekat perpulungen i Epesus suratkenlah bagenda: Enda me berita i bas Ia nari, Ia si njemak bintang si pitu i bas tanNa si kemuhen, si erdalan i tengah-tengah nahe lampu emas si pitu. ² Kueteh kai si enggo idahikenndu; Kueteh kuga latihna iakapndu erdahin, janah Kueteh kerna saber atendu. Kueteh maka la atendu bage ngenehen kalak jahat. Kueteh maka enggo iujindu kalak si ngakuken dirina rasul tapi si tuhuna labo ia rasul, janah ietehndu maka perguak nge ia. ³ Kam megenggeng, enggo inanamindu kiniseran erkiteken Aku, tapi la kam surut. ⁴ Tapi pandangenKu nandangi kam, e me genduari lanai atendu keleng Aku bagi tangtangna nai. ⁵ E maka ingetlah uga dauhna kam enggo ndabuh! Jeralah kam! Bahanlah bagi si ilakokenndu tangtangna nai. Adi la kam jera Kudahi me kam janah Kubuat nahe lampundu i bas inganna nari. ⁶ Tapi kiniulinndu pe Kueteh nge, maka la atendu ngena perbahanen kalak Nikola, si Aku pe la ateKu ngena. ⁷ Adi lit kin cupingndu, begikenlah kai si ikataken Kesah Dibata man perpulungen-perpulungen! Man kalak si enggo menang, Kupelepas ipanna buah batang kayu kegeluhen si turah i bas Pardis." ⁸ "Man malekat perpulungen i Semirna, suratken bagenda: Berita enda i bas Ia nari, Ia si perlebe dingen si perpudina, si enggo mate tapi enggo nggeluh mulihken. ⁹ Kueteh nge kiniseranndu; Kueteh maka musil kam tapi si tuhuna bayak kap kam! Kueteh nge maka jahat ranan kalak kerna kam, e me kalak si ngaku bana kalak Jahudi, tapi si tuhuna labo ia kalak Jahudi; kalak enda anggota perpulungen Iblis kap! ¹⁰ Ola kam mbiar kerna kiniseran si nandangi inanamindu. Nehenlah! Iuji Iblis me kam. Piga-piga i bas kam ibuangkenna ku penjara. Sepuluh wari pagi dekahna kerina kam ngenanami kiniseran. Tapi tetaplah kinitekenndu man bangKu seh mate pe, gelah Kubereken man bandu rudang-rudang kegeluhen tanda kemenangenndu. ¹¹ Adi lit kin cupingndu begikenlah kai si ikataken Kesah Dibata man perpulungen-perpulungen! Kalak si menang lanai pagi isakiti kematen si peduaken." ¹² "Man malekat perpulungen i Pergamon, suratken bagenda: Berita enda i bas Aku nari, Aku Si Mada pedang si ntelap, si dua babahna. ¹³ Kueteh i ja kam ringan genduari, e me i kursi kinirajan Iblis. Kam erkemalangen man bangKu, janah tetap kam tek man bangKu, subuk pe i bas paksa Antipas, saksingKu si tutus, si ibunuh i bas ingan Iblis. ¹⁴ Tapi pandangenKu nandangi kam e me kap: Lit piga-piga i bas kam si ngikutken pengajaren Bileam. Ia me nai si ngajari Raja Balak gelah ibabaina kalak Israel erdosa alu man pangan si ipersembahken man berhala-berhala dingen gelah erlua-lua. ¹⁵ Bage pe lit piga-piga i bas kam si ngikutken pengajaren kalak Nikola. ¹⁶ E maka jeralah! Adi lang minter me kam Kudahi janah Kulawan me kalak si la nggit jera e alu pedang si ndarat i bas babahKu nari. ¹⁷ Adi lit kin cupingndu begikenlah kai si ikataken Kesah Dibata man perpulungen-perpulungen! Man kalak si enggo menang Kubereken sada bagin i bas manna si terbuni nari. Bage pe Kubereken man sekalak-sekalak sada batu si mbentar, si enggo isurati alu gelar si mbaru, si labo ise pe metehsa, seakatan si ngaloken batu e." ¹⁸ "Man malekat perpulungen i Tiatira suratkenlah bagenda: Enda me berita i bas Anak Dibata nari, si mataNa erkinar-kinar bagi api, janah naheNa erkilat bagi tembaga si enggo isepuh. ¹⁹ Kueteh kai si idahikenndu. Kueteh nge kerna keleng atendu, kerna tutus atendu, kerna penampatindu, bage pe kerna saber atendu. Kueteh maka buen si idahikenndu genduari asangken si tangtangna nai. ²⁰ Tapi pandangenKu nandangi kam e me kap: Ipelepasndu si Isebel, diberu e, ngakuken dirina nabi Dibata. Ngajar ia, janah ibabaina persuruhenKu papak erlagu la mehuli, dingen man pangan si enggo ipersembahken man berhala-berhala. ²¹ Enggo Kubereken kesempaten man bana gelah ia jera i bas dosa-dosana nari, tapi la ia nggit jera i bas erlagu la mehuli e nari. ²² Nehenlah, genduari Kusampetken me ia ku bas ingan medem kiniseran, janah temanna erlua-lua e ngenanami kiniseran si mberat, pala jera kin ia i bas perbahanen Isebel e nari. ²³ Ajar-ajarna pe Kubunuh. Alu bage kerina perpulungen metehsa maka Aku me si meteh ukur ras sura-sura manusia. Kubalas me man bandu sekalak-sekalak rikutken kai si enggo ibahanndu. ²⁴ Tapi temanndu si deban, si ringan i Tiatira la ngikutken pengajaren si jahat enda. La ipelajarindu kai si ikatakenna ’bagesna rahasia Iblis’. Kukataken man bandu maka labo Kutambahi babanndu. ²⁵ Tapi tetaplah dalanken pengajaren si enggo lit i bas kam genduari seh Aku reh pagi. ²⁶ - ²⁸ Man kalak si menang, si tetap ndalanken si ngena ateKu seh ku kedungenna, Kubereken pagi bana kuasa bagi si Kualoken ibas BapangKu nari. Kubereken pagi man bana kuasa ngkuasai bangsa-bangsa alu ciken besi, dingen merperkenca bagi kudin taneh. Kubereken pe man bana bintang si cahar. ²⁹ Adi lit cupingndu begikenlah kai si ikataken Kesah Dibata man perpulungen-perpulungen."

¹ "Man malekat perpulungen i Sardis suratkenlah bagenda: Enda me berita i bas Ia nari, si lit i bas Ia pitu Kesah Dibata dingen bintang si pitu e. Kueteh kai si ibahanndu. Gelarna ngenca kam nggeluh tapi si tuhuna mate. ² E maka kekekenlah, pegegehilah kai si lit denga i bas kam ope denga mate kerina. Sabap la lit Kuidah serta perbahanenndu i lebe-lebe DibatangKu. ³ Dage ingetlah kuga nai kam iajari dingen kuga nai kam megikenca. Ikutkenlah kai si iajarken man bandu e, janah jeralah. Adi la kam erjaga-jaga, reh me Aku ndahi kam bagi pinangko, janah la ietehndu katawari Aku reh. ⁴ Tapi lit piga-piga i tengah-tengahndu si i Sardis si tetap njaga pakenna bersih. Ras Aku pagi ia kerina erdalan make uis mbentar, sabap metunggung ia. ⁵ Kalak si menang iuisi me alu uis mbentar si bagenda, janah asa ndigan pe la Kusasapken gelarna i bas Kitap Kegeluhen nari. I lebe-lebe BapangKu, bage pe i lebe-lebe malekat-malekatNa terang-terangen Kuakui maka ia me sikerajangenKu. ⁶ Adi lit cupingndu begikenlah kai si ikataken Kesah Dibata man perpulungen-perpulungen!" ⁷ "Man perpulungen i Piladelpia suratkenlah bagenda: Enda me berita i bas Ia nari, Ia si Badia dingen Bujur, si njemak kunci Daud; adi italangiNa, ise pe la ngasup ngeruksa, janah adi ierukNa ise pe la ngasup nalangisa. ⁸ Kueteh kai si ibahanndu. Kueteh maka labo asa kai gegehndu; enggo ikutkenndu katangKu janah la ipersokenndu gelarKu. Nehenlah enggo Kutalangi pintun i lebe-lebendu, si ise pe la ngasup ngeruksa. ⁹ Nehenlah! Kalak si ngikutken peraten Iblis, kalak perguak si ngakuken dirina kalak Jahudi, kalak enda anggota perpulungen Iblis kap. Kubahan ia ngadap man bandu janah nembah erjimpuh i lebe-lebendu. Meteh me ia kerina maka keleng ateKu kam. ¹⁰ Erkiteken ijagandu dirindu tetap ngikutken perentahKu alu saber, e maka kam pe Kujaga gelah terkelin i bas paksa kesusahen, e me kesusahen si nandangi reh ku belang-belang doni enda, guna nguji kerina manusia. ¹¹ Pedas Aku reh! Jagalah kai si lit i bas kam, gelah ola lit kalak si ngerebuti pemere kemenangenndu. ¹² Kalak si menang Kubahan jadi binangun i bas Rumah Pertoton DibatangKu, janah asa ndigan pe la itadingkenNa ingan e. Kusuratken i bas ia gelar DibatangKu bage pe gelar Kuta DibatangKu, Jerusalem si Mbaru si nandangi nusur i Surga nari, i bas DibatangKu nari. Kusuratken pe i bas ia gelarKu si mbaru. ¹³ Adi lit kin cupingndu, begikenlah kai si ikataken Kesah Si Badia man perpulungen-perpulungen!" ¹⁴ "Man malekat perpulungen i Laodikea, suratkenlah bagenda: Enda me berita i bas si Amin nari, saksi si tutus dingen bujur, ulu kerina si enggo ijadiken Dibata. ¹⁵ Kueteh kai si enggo ibahanndu. Kueteh maka mbergeh pe kam lang janah melas pe kam lang. Ulin min kam mbergeh ntah melas. ¹⁶ Tapi perbahan kam mbernge, melas pe lang, mbergeh pe lang, Kuutahken kam i bas babahKu nari. ¹⁷ Ikatakenndu, ’Bayak aku janah terus tambah kebayakenku, e maka labo aku kurang kai pe.’ Tapi si tuhuna la ietehndu maka musil nge kam janah ceda kal ate kalak ngidah percibalndu. Kam musil, pentang dingen manjang-anjang. ¹⁸ E maka Kukataken man bandu, tukurlah emas i bas aku nari, emas tulen, gelah kam bayak. Tukur pe uis si mbentar man pakenndu, guna nutupi kulandu si manjang-anjang, si man kemelanken e. Bage pe tukurlah salap mata guna tambar matandu gelah kam erpengidah. ¹⁹ Kalak si Kukelengi Kuligas ras Kuajarken. E maka tutus janah jeralah. ²⁰ Nehenlah! Aku tedis i lebe-lebe pintun janah kutuktuk. Adi lit kalak megi sorangKu jenari italangina pintun, bengket me Aku ku bas rumahna jenari man Aku ras ia janah man ia ras Aku. ²¹ Kalak si menang Kuatanken kundul ras Aku i kursi KinirajanKu, bagi genduari Aku enggo menang, kundul Aku ras BapangKu i kursi KinirajanNa. ²² Adi lit kin cupingndu begiken kai si ikataken Kesah Dibata man perpulungen-perpulungen!"

¹ Kenca bage kuidah ka sada nari pengenehenen. Kuidah talang pintun i Surga. Janah kubegi pe sora bagi sora terompet, si enggo kubegi ngerana man bangku. Nina sora e, "Mari ku datasken; Kucidahken man bandu kai arus jadi kenca si enda." ² Jenari minter aku ikuasai Kesah Dibata. Kuidah sada kursi kinirajan i Surga, janah lit sekalak kundul i je. ³ Ayona ersinalsal bagi permata Jaspis ras permata Sardis. I kelewet kursi kinirajan e lit benteha si erbage-bage rupana. ⁴ Kursi kinirajan e ikeleweti dua puluh empat kursi kinirajan. Janah i bas si dua puluh empat kursi e kundul pertua-pertua, uisna mbentar janah ipakena mahkota emas. ⁵ I bas kursi kinirajan e nari ndarat kilap, sora ergeruhguh ras lenggur. I lebe-lebe kursi kinirajan e lit pitu lampu gara. E me Kesah Dibata si pitu e. ⁶ I lebe-lebe kursi kinirajan e lit bagi lawit kaca, meciho kal. I kelewet kursi kinirajan e lit empat mahluk si nggeluh, sada rep-tep dampar, si dem mata arah lebe ras arah pudi. ⁷ Mahluk si pemena bagi singa. Mahluk si peduaken bagi lembu jenggina. Mahluk si peteluken ayona bagi manusia. Mahluk si peempatken bagi rajawali kabang. ⁸ Teptep mahluk lit enem kabengna janah kerina kabeng e dem mata arah bas ras arah darat. Mahluk e la erngadi-ngadi rende suari ras berngi nina, "Badia, badia, badia me Tuhan, Dibata si Mada Kuasa, nai nari, genduari seh rasa lalap." ⁹ Mahluk si empat ngendeken puji-pujin, mpehaga dingen ngataken bujur man baNa si kundul i kursi Kinirajan e, si nggeluh rasa lalap seh rasa lalap. Asum rende mahluk si empat e, ¹⁰ erjimpuh pertua-pertua si dua puluh empat kalak i lebe-lebe si kundul i kursi Kinirajan e, janah isembahna Ia, si nggeluh rasa lalap seh rasa lalap e. Ibenterken pertua-pertua e mahkotana i lebe-lebe Kursi Kinirajan e jenari nina, ¹¹ "O Tuhan Dibata kami Kam me si metunggung ngaloken kemulian, kehamaten ras Kuasa. Sabap Kam njadikenca kerina si nasa lit, janah erkiteken peratenNdu nge maka kerina e lit dingen nggeluh."

¹ Kuidah sada Kitap i bas tan si kemuhen kalak si kundul i kursi kinirajan e. Kitap e isurati dua mbelahna, janah isegel alu pitu meterai. ² Jenari kuidah sada malekat si mbisa ermomo alu sora megang nina, "Ise kin metunggung ngagui meterai-meterai dingen nalangi kitap e?" ³ Tapi subuk i Surga, ntah i doni, ntah i teruh doni, sekalak pe la lit si ngasup nalangi kitap e dingen ngenehenca ku bas. ⁴ Tangis kal aku dingen ceda kal ateku sabap la lit sekalak pe si metunggung nalangi kitap e ntah ngenehenca ku bas. ⁵ Jenari ngerana sekalak pertua e man bangku nina, "Ola kam tangis. Nehenlah! Singa i bas suku Juda nari, kesusuren si ipebelin i bas Daud enggo menang. Ia metunggung mecahken meterai si pitu e ras nalangisa." ⁶ Jenari kuidah sada Anak Biri-biri tedis i tengah-tengah kursi kinirajan e, ikeleweti mahluk si empat, ras pertua-pertua e. Anak Biri-biri e tempa enggo igeleh. Pitu tandukna ras pitu matana e me pitu Kesah Dibata si enggo isuruh Dibata ku belang-belang doni enda. ⁷ Erdalan Anak Biri-biri e ku lebe jenari ibuatNa kitap ndai i bas tan si kemuhen kalak si kundul i bas kursi kinirajan e nari. ⁸ Asum bage, mahluk si empat ras pertua-pertua si dua puluh empat ndai erjimpuh nembah i lebe-lebe Anak Biri-biri e. Sekalak-sekalak pertua e njemak sada kulcapi ras sada mangkuk emas isin kumenen, e me pertoton anak-anak Dibata. ⁹ Kerina ia ngendeken ende-enden si mbaru, "Kam me si metunggung muat kitap e dingen mecahken meterai-meteraina. Sabap Kam enggo ibunuh, janah erkiteken kematenNdu enggo itukurNdu manusia guna Dibata i bas kerina suku, cakap, negara ras bangsa nari. ¹⁰ Enggo ibahanNdu ia jadi Kinirajan imam-imam ndahiken dahin Dibatanta, janah irajaina pagi doni enda." ¹¹ Jenari kunehen ka, janah kubegi sora malekat meribu-ribu dingen erjuta-juta teremna! Tedis ia kerina ngkeleweti kursi kerajan e, mahluk si empat ras pertua-pertua e. ¹² Alu sora megang rende malekat-malekat e, "Anak Biri-biri si enggo igeleh e metunggung ngaloken kuasa, kinibayaken, kepentaren, gegeh, kehamaten, kemulian ras puji-pujin!" ¹³ Jenari kubegi rende kerina mahluk, subuk si i langit, i doni, i teruh doni, ras si i bas lawit; gendekna kerina si nggeluh si nasa lit, "Ia si kundul i kursi kinirajan e ras Anak Biri-biri e, man baNalah puji-pujin, kehamaten, kemulian, ras kuasa rasa lalap seh rasa lalap!" ¹⁴ Jenari ngaloi mahluk si empat ndai nina, "Amin!" Janah pertua-pertua e erjimpuh dingen ersembah.

¹ Jenari kuidah Anak Biri-biri e mecahken meterai si pemena i bas meterai si pitu ndai, janah kubegi sada i bas mahluk si empat ndai ngerana alu sora si bali ras sora lenggur nina, "Mari!" ² Kunehen, janah kuidah sada kuda mbentar. Si ngersak kuda e njemak panah janah ialokenna sada mahkota. Lawes ia ndarat bagi kalak si erperang ngerebut kemenangen. ³ Jenari ipecahken Anak Biri-biri e meterai si peduaken, janah asum e kubegi mahluk si peduaken ngerana nina, "Mari!" ⁴ E maka ndarat ka sada kuda gara. Si ngersak kuda e ngaloken pedang si mbelin ras ncedai perdamen i doni, gelah manusia si bunuhen. ⁵ Jenari ipecahken Anak Biri-biri e meterai si peteluken, janah asum e kubegi mahluk si peteluken ngerana nina, "Mari!" Kunehen, janah kuidah sada kuda mbiring. Si ngersak kuda e njemak sada timbangen. ⁶ Kubegi bagi sada sora i tengah-tengah mahluk si empat e nari nina, "Segantang beras gaji sada wari, telu gantang jaba gaji sada wari. Tapi ola cedaken batang seton ras batang anggur e." ⁷ Jenari ipecahken Anak Biri-biri e meterai si peempatken, janah asum e kubegi mahluk si peempatken ngerana nina, "Mari!" ⁸ Kunehen, janah kuidah sada kuda si mbulan rupana. Si ngersak kuda e gelarna Kematen, janah arah pudina ngikut Doni Kematen. Man bana ibereken kuasa nandangi seperempat doni enda, guna munuhisa alu pedang, kelihen, pinakit langket-langket janah alu rubia-rubia si merawa si lit i doni enda. ⁹ Jenari ipecahken Anak Biri-biri e meterai si pelimaken. Janah asum e kuidah i teruh batar-batar persembahen tendi kalak si enggo ibunuh erkite-kiteken iberitakenna Kata Dibata janah tutus atena i bas kesaksinna. ¹⁰ Alu sora megang erlebuh ia nina, "O Tuhan si Mada Kuasa, Badia dingen Bujur! Asakai nari dekahna la iadiliNdu bangsa i doni dingen la iukumNdu kalak si munuh kami?" ¹¹ Kerina tendi e ngaloken jubah mbentar, janah man bana ikataken gelah pekesahken kentisik nari, seh kuh bilangenna suruh-suruhen ras senina-senina si nandangi ibunuh bali ras ia. ¹² Jenari kuidah ipecahken Anak Biri-biri e meterai si peenemken. Asum e jadi linur si mehantu. Matawari jadi mbiring bagi uis kelam-kelam janah bulan megara bagi dareh. ¹³ Bintang-bintang nartar i langit nari ku doni bagi buah mbacang si langa tasak nartar i bas batangna nari asum rembus angin meter. ¹⁴ Langit talang, lit bali ras kire-kire si igulung, janah kerina deleng ras pulo miser i bas ingana nari. ¹⁵ Jenari kerina raja, pemerentah-pemerentah, puanglima-puanglima perang, kalak bayak ras kalak si erkuasa bage pe kerina manusia si deban, subuk budak ntah la budak, kerina cebuni i bas liang ras i selat-selat batu i deleng. ¹⁶ Erlebuh ia kempak deleng ras batu e nina, "Dabuhi kami janah tamburi gelah ola kami idah kalak si kundul i kursi Kinirajan e, janah gelah ola kami kena pernembeh Anak Biri-biri e! ¹⁷ Sabap enggo seh wari pernembehNa si mbelin e, janah ise kin ngasup ngelawansa?"

¹ Kenca bage kuidah empat malekat tedis i empat penjuru doni. Iambangna empatna angin i doni enda gelah ola rembus kempak daraten, kempak lawit ntah kempak batang kayu apai pe. ² Janah kuidah ka malekat si deban nangkih i Timur nari maba meterai Dibata e me Dibata si nggeluh. Alu sora megang erlebuh ia man malekat si empat, si man bana enggo ibereken Dibata kuasa ncedaken daraten ras lawit. ³ Nina malekat e, "Ola lebe cedaken daraten, lawit ntah batang kayu, adi langa dung sitamaken meterai i bas perdempaken suruh-suruhen Dibatanta." ⁴ Janah man bangku ipebetehken lit 144.000 kalak si itamaken meterai Dibata i bas perdempakenna. Kalak e ibuat i bas suku bangsa Israel si sepuluh dua; ⁵ 12.000 kalak ibas tep-tep suku nari e me: 12.000 ibas suku Juda nari, 12.000 ibas suku Ruben nari, 12.000 ibas suku Gad nari, ⁶ 12.000 ibas suku Aser nari, 12.000 ibas suku Naptali nari, 12.000 ibas suku Manase nari ⁷ 12.000 ibas suku Simeon nari, 12.000 ibas suku Lewi nari, 12.000 ibas suku Isasar nari, ⁸ 12.000 ibas suku Sebulon nari, 12.000 ibas suku Jusup nari, ras 12.000 i bas suku Benyamin nari. ⁹ Kenca bage kunehen ka, janah kuidah i je nterem kal jelma. Ise pe la ngasup meligaisa! Kalak si nterem e rehna i bas kerina bangsa, suku, negara ras i bas kerina cakap nari, janah kerina ia tedis i lebe-lebe kursi kinirajan dingen i lebe-lebe Anak Biri-biri e. Kerina ia make jubah mbentar janahna njemak lambe. ¹⁰ Kerina ia ngerana alu sora megang, "Keselamatenta reh i bas Dibatanta nari, e me si kundul i kursi kinirajan e dingen i bas Anak Biri-biri e nari!" ¹¹ Kerina malekat tedis ngkeleweti kursi kinirajan, pertua-pertua ras mahluk si empat e. Jenari erjimpuh ia i lebe-lebe kursi kinirajan e ayona seh ku taneh janahna nembah man Dibata ¹² nina, "Amin! Pujin ras kemulian, kepentaren ras pengataken bujur, kehamaten, gegeh, ras kuasa man Dibatanta seh rasa lalap. Amin!" ¹³ Jenari sekalak i bas pertua-pertua e nungkun man bangku nina, "Ise kerina kalak si erjubah mbentar enda, janah i ja nari kin ia?" ¹⁴ Erjabap aku, "La kueteh Pa! Kam me metehsa." Nina pertua e man bangku, "Enda me kalak si enggo ngasup mentasi kiniseran si mbelin e. Enggo ibersihkenna jubahna dingen ipebentarina alu Dareh Anak Biri-biri e. ¹⁵ Erkiteken si e maka tedis ia kerina i lebe-lebe kursi kinirajan Dibata, janah suari ras berngi isembahna Dibata i bas Rumah Pertoton. Ia, Si kundul i kursi kinirajan e, tetap ngampang-ngampangi ia. ¹⁶ Lanai ia muas ntah melihe bage pe lanai ia iparpari matawari ntah las; ¹⁷ sabap Anak Biri-biri si i tengah-tengah kursi kinirajan e jadi permakanna, janah Anak Biri-biri e si mabai ia ku ulu lau kegeluhen. Janah Dibata me ngapusi iluhna si mambur."

¹ Asum ipecahken Anak Biri-biri e meterai si pepituken, setengah jam dekahna la lit sora kai pe i Surga. ² Jenari kuidah pituna malekat si tedis i lebe-lebe Dibata ngaloken pitu terompet. ³ Reh sekalak malekat si deban, si lit i bas ia mangkuk emas ingan kumenen, jenari lawes ia tedis i lebe-lebe batar-batar persembahen. Ialokenna melala kumenen nambahi pertoton-pertoton anak-anak Dibata dingen mpersembahkenca i babo batar-batar persembahen emas si lit i lebe-lebe kursi kinirajan e. ⁴ Radu ras pertoton anak-anak Dibata, asap kumenen si gara e nangkih i bas tan malekat e nari kuadep-adepen Dibata. ⁵ Jenari ibuat malekat e ingan kumenen ndai, itamana ku bas rara api si ibuat i bas batar-batar persembahen, jenari iamburkenna ku doni. Kenca bage jadi me lenggur, sora si ergeruhguh, kilap, ras linur. ⁶ Jenari ersikap malekat si pitu e ngembus terompet si lit i bas ia. ⁷ Iembus malekat si pemena terompetna jenari reh udan baho bage pe api singgur ras dareh mambur ku doni. E maka meseng sepertelu doni enda, sepertelu batang kayu ras kerina dukut-dukut si meratah. ⁸ Jenari iembus malekat si peduaken terompetna. Paksa e lit meseng tempasna bagi deleng meganjang, iambengken ku lawit. E maka sepertelu lawit salih jadi dareh; ⁹ sepertelu rubia-rubia si nggeluh i lawit mate, janah sepertelu kapal kernep. ¹⁰ Jenari iembus malekat si peteluken terompetna. Paksa e ndabuh i langit nari sada bintang galang gara bagi obor. Idabuhina sepertelu lau mbelin ras sumbul-sumbul lau. ¹¹ (Gelar bintang e Pagit.) E maka sepertelu lau e salih jadi pagit, janah nterem kalak mate erkiteken nginem lau si enggo salih jadi pagit e. ¹² Jenari iembus malekat si peempatken terompetna. Paksa e gelap sepertelu matawari, sepertelu bulan ras sepertelu bintang janah bene terangna sepertelu. Bage pe sepertelu suari ras sepertelu berngi jadi gelap kerina. ¹³ Jenari kunehen, janah kubegi serko rajawali si paksa kabang meganjang i tengah awang-awang nina, "Cilaka! Cilaka! Cilaka kal kerina kalak si nggeluh i doni adi ibegina denggo sora terompet si iembus malekat si telu kalak nari!"

¹ Jenari iembus malekat si pelimaken terompetna. Paksa e kuidah sada bintang si enggo ndabuh i langit nari ku doni. Man bana ibereken kunci embang si la ersibar bagesna. ² Italangi bintang e embang si la ersibar bagesna ndai jenari erdipul cimber i bas nari bagi cimber dapur si mbelin. Sinalsal matawari ras awang-awang gelap ibahan cimber si reh i bas embang e nari. ³ Jenari rehen labang ku babo taneh enda i bas cimber e nari, janah man labang ibereken kuasa bali ras kuasa kacip gelang i doni enda. ⁴ Man labang e ipebetehken maka la banci icedakenna dukut-dukut, ntah batang kayu ntah sinuan-sinuan. Manusia si la lit meterai i bas perdempakenna ngenca banci icedakenna. ⁵ Labang e la banci munuh manusia, tapi seh kal akap kalak suina ibanna, dekahna lima bulan. Suina isiksa labang e bali ras, icit kacip gelang. ⁶ I bas si lima bulan e idarami manusia e kematen, tapi la idatca; merincuh ia mate, tapi kematen nilah i bas ia nari. ⁷ Labang e bagi kuda si enggo ersikap erperang. I babo takalna lit mahkota bali ras emas. Ayona bagi ayo manusia. ⁸ Bukna bagi buk diberu, janah ipenna bagi ipen singa. ⁹ Ampang-ampang tentenna tempa-tempa baju besi. Sora kabengna bagi sora gereta kuda kiam lawes erperang. ¹⁰ Kerina rikur bage pe serenna bali ras kacip-gelang. I bas ikur e lit kuasa pesega-sega manusia lima bulan dekahna. ¹¹ Labang e lit rajana si ngaturken ia, e me malekat si ertanggung jawab kerna embang si la ersibar bagesna e. Gelar rajana e i bas cakap Heber e me Abaddon; i bas cakap Junani Apolion (ertina, si ngkernepken). ¹² Cilaka si pemena enggo lepas. Kenca si e reh ka cilaka dua kali nari. ¹³ Jenari iembus malekat si peenemken terompetna. Paksa si e kubegi sora i bas empatna tanduk batar-batar persembahen nari, e me batar-batar persembahen emas si lit i lebe-lebe Dibata. ¹⁴ Nina sora e man malekat si ngembus terompet ndai, "Pulahi malekat si empat si irante i tepi Lau Eprat si mbelin e." ¹⁵ E maka ipulahi me malekat si empat e. Malekat e enggo isikapken i bas jam e, wari e, bulan e, dingen tahun e guna munuh sepertelu i bas kerina manusia. ¹⁶ Man bangku ipebetehken teremna barisen tentera si erkuda e lit dua ratus juta kalak. ¹⁷ Janah i bas pengenehenen ka kuidah kuda e ras si ngersaksa: Baju ampang-ampangna, rupana megara bagi api, megara metua bagi permata nilam janah megersing bagi kertah. Takal kuda e bagi takal singa, janah i bas babahna nari ndaraten api, cimber ras kertah. ¹⁸ Sepertelu manusia mate erkiteken mara si telu e; api, cimber ras kertah si ndarat i bas babah kuda e nari. ¹⁹ Sabap kuasa kuda e lit i bas babah ras i bas ikurna. Ikur kuda e bagi nipe, lit takal ikurna e janah alu takal ikurna e me ia pesega-sega manusia. ²⁰ Manusia si deban, e me manusia si la mate kena mara enda ndai la ka bo ia jera i bas perbahanenna nari. La ingadikenna ersembah man setan-setan ras man berhala-berhala emas, pirak, tembaga, batu ras kayu, si la erpengidah, la erpemegi dingen la ngasup erdalan. ²¹ Bage pe la ia jera munuh, ndalanken kinigurun, erlua-lua ntah pe nangko.

¹ Jenari kuidah sada nari malekat megegeh sanga nusur i Surga nari. Malekat e ruisken embun, janah i babo takalna lit benteha. Ayona bagi matawari janah nahena bagi binangun api. ² I bas tanna lit talang kitap kitik. Nahena si kemuhen idedehkenna ku lawit, janah nahena si kawes i daraten. ³ Jenari ngerana ia alu sora megang bagi singa erdengum. Kenca ia ngerana, ngaloi lenggur si pitu. ⁴ Ngadi kenca lenggur si pitu e, kusuratken ateku. Tapi kubegi sora ngerana i Surga nari nina, "Rahasiaken kai si ikataken lenggur si pitu e, ola suratken." ⁵ Jenari malekat si kuidah ndedeh lawit ras daraten, ngangkat tanna si kemuhen ku langit. ⁶ Janah ersumpah ia i bas gelar Dibata si nggeluh rasa lalap, si njadiken langit ras kerina isina, doni ras kerina isina, bage pe lawit ras kerina isina. Nina malekat e, "Warina lanai bo icuncun! ⁷ Tapi asum iembus malekat si pepituken terompetna, ikuhi Dibata me rahasiaNa, bagi si enggo iberitakenNa berita si mehuli e man suruh-suruhenNa, e me nabi-nabi." ⁸ Jenari kubegi ka sora i Surga nari, nina, "To buat kitap si talang i bas tan malekat si tedis i bas lawit dingen i daraten." ⁹ Kudahi malekat e jenari kupindoken gelah iberekenna kitap si kitik e man bangku. Nina man bangku, "Buatlah jenari pan; i bas beltekndu salih me jadi pagit, tapi i bas babahndu ntebu bagi tengguli." ¹⁰ Kubuat kitap si kitik e i bas tanna nari jenari kupan, janah i bas babahku ntebu nanamna bagi tengguli. Tapi kenca kubelgek, salih jadi pagit i bas beltekku. ¹¹ Jenari ipebetehken man bangku, "Arus kam ernubuat denga kerna pemerentahen, bangsa-bangsa, cakap, dingen raja-raja!"

¹ Jenari man bangku ibereken sada kayu penibari bali ras ciken. Man bangku ikataken, "To sibari Rumah Pertoton Dibata ras batar-batar persembahen, janah beligai teremna kalak si ersembah i bas. ² Tapi kesain si arah darat ola sibari, sabap si e enggo iendesken man bangsa si labo kalak Jahudi. Idedehina pagi Kuta si Badia empat puluh dua bulan dekahna. ³ Kusuruh pagi dua kalak saksingku make uis guni tanda ate ceda. Iturikenna pagi Kata Dibata dekahna 1260 wari." ⁴ Saksi si dua e, e me batang seton si dua ras lampu si dua si lit i lebe-lebe Tuhan doni enda. ⁵ Adi lit kalak si atena nggasgasisa ndarat api i bas babahna nari ngkernepken musuh-musuhna. Alu bage ise nggasgasi ia mate me. ⁶ Lit kuasana nutupi langit gelah ola nusur udan kidekah ia ernubuat denga. Lit me kuasana nandangi sumbul-sumbul lau, e me guna nalihkenca jadi dareh. Bage pe lit kuasana ngerehken erbage-bage mara ku doni enda piga-piga kali pe atena. ⁷ Kenca dung ia ersaksi, rubia-rubia si reh i bas embang e nari ngelawan ia. Italuken rubia-rubia e me ia duana dingen ibunuhna, ⁸ janah maitna ampar me i bas pasar kuta si meriah, i ja Tuhan ipakuken ku kayu persilang. Kuta e iumpamaken gelarna Sodom ntah Mesir. ⁹ Kerina pemerentahen, suku, cakap, ras bangsa ngenehen maitna telu setengah wari dekahna janah la iberena mait e ikuburken. ¹⁰ Meriah me ukur manusia si i doni e i bas kematen saksi si dua enda. Erpesta ia kerina dingen mereken luahna ia sekalak nandangi si debanna, sabap nabi si dua e enggo ngerehken kiniseran-kiniseran nandangi manusia si i doni enda. ¹¹ Kenca si telu setengah wari e, reh kesah si nggeluh i bas Dibata nari, mengketi nabi si dua kalak e. Jenari tedis ia duana, janah mbiar kal kalak kerina si ngenehen ia. ¹² Kenca bage ibegi nabi si dua e sora si megang i Surga nari, ngerana man bana nina, "Marilah ku datasken!" Asum itatap musuh-musuhna ia, nangkih ia ku Surga, ras embun. ¹³ Paksa si e kal pe jadi me linur si mesangat. Kernep sepersepuluh kuta e, janah mate pitu ribu kalak jelma ibahan linur e. Jelma si debanna mbiar kal janah iberekenna kemulian man Dibata si i Surga. ¹⁴ Cilaka si peduaken enggo lepas. Tapi nehenlah! Reh me cilaka si peteluken. ¹⁵ Jenari iembus malekat si pepituken e terompetna. Paksa si e terbegi sora-sora si megang i Surga nari nina, "Kuasa guna ngerajai doni enda genduari enggo i bas tan Tuhanta dingen Mesias si ipadankenNa janah Ia ngerajaisa rasa lalap seh rasa lalap." ¹⁶ Jenari pertua-pertua si dua puluh empat si kundul i bas kursi kinirajan i lebe-lebe Dibata erjimpuh dingen nembah man Dibata, ¹⁷ nina, "O Tuhan Dibata si Mada Kuasa si enggo lit genduari ras nai nari. Bujur ikataken kami man bandu sabap enggo ipakeNdu kuasaNdu, si mbelin e, janah enggo Kam ngerajaisa kerina. ¹⁸ Merawa kalak si la nandai Tuhan, sabap enggo seh paksana icidahkenNdu rawaNdu, janah iadiliNdu kalak si enggo mate. Genduari me paksana guna mereken upah man suruh-suruhenNdu, e me nabi-nabi bage pe man kerina anak-anakNdu, kerina kalak si erkemalangen man baNdu subuk si kitik bage pe si mbelin. Genduari me paksana guna ngkernepken kalak si ncedaken doni." ¹⁹ E maka talang Rumah Pertoton Dibata i Surga, janah teridah i je Peti Perpadanen. Jenari reh kilap, sora si ergeruhguh, lenggur, linur ras udan baho si mehantu.

¹ Jenari lit teridah sada tanda si mbelin i langit, e me sekalak diberu si ruisken matawari; lit bulan i teruh nahena, janah i bas takalna lit mahkota, e me sepuluh dua bintang. ² Diberu e sangana mehuli kulana, janah erkiteken enggo ndeher paksa mupus, nderkuh-nderkuh ia perban suina. ³ Jenari teridah ka sada tanda si deban i langit, e me sada naga si galang, megara rupana. Naga e pitu takalna janah sepuluh tandukna. Pituna takalna ermahkota. ⁴ Alu ikurna isarenna sepertelu bintang-bintang i langit jenari isampetkenna ku doni. Naga e tedis i lebe-lebe diberu e, gelah kenca tubuh anak e minter itelenna. ⁵ E maka ipupus diberu e sada anak dilaki, si pagin mpermakani kerina bangsa alu ciken besi. Tapi anak e irebut i bas diberu e nari, jenari ibaba ku Dibata dingen ku kursi kinirajanNa. ⁶ Diberu e kiam ku taneh si melungun, ku ingan si enggo isikapken Dibata man bana, i ja ia ikepkep pagin seribu dua ratus enem puluh wari dekahna. ⁷ Kenca bage jadi perang i Surga. Mikael ras malekat-malekatna erperang ngelawan naga e. Janah naga e ras malekat-malekatna ngelawan Mikael, ⁸ tapi talu naga e. Naga e ras malekat-malekatna lanai ipelepas ringan i Surga. ⁹ Naga si galang e isampetken ndarat! Enda me nipe si nuria si igelari Iblis ntah Setan, si nipu i belang-belang doni enda. Isampetken ia ku doni ras kerina malekat-malekatna. ¹⁰ Jenari kubegi sora megang i Surga nina, "Genduari me paksana Dibata ngkelini bangsaNa! Genduari enggo icidahken Dibata kuasaNa selaku Raja! Genduari Mesias si ipadanken Dibata e pe ncidahken kuasaNa! Sabap si nalahken senina-seninanta, e me si ngaduken ia i lebe-lebe Dibata suari ras berngi enggo isampetken i Surga nari. ¹¹ Senina-seninanta enggo menang ngelawan ia alu dareh Anak Biri-biri e, dingen alu Kata Dibata si isaksikenna; janah senina-seninanta e la ngkelengi kesahna seh mate pe. ¹² E maka ersuraklah o Surga, bage pe kerina kam si ringan i bas! Tapi andiko, cilaka me doni enda ras lawit, sabap Iblis enggo nusur ku kam, janah merawa ia sabap ietehna maka kentisik nari ngenca kesempaten lit i bas ia." ¹³ Kenca ieteh naga e ia enggo isampetken ku doni, iayakina diberu si enggo mupus anak dilaki ndai. ¹⁴ Tapi man diberu e ibereken dua kabeng rajawali si galang, gelah banci ia kabang ku inganna i taneh si melungun, i ja ia ikepkep dekahna sada paksa, dua paksa ras setengah paksa ndauh i bas nipe e nari. ¹⁵ Jenari isemburken nipe e lau mbelin i bas babahna nari kempak diberu e, atena ngombakkenca. ¹⁶ Tapi isampati doni diberu e. Talang babah doni enda, jenari itelenna lau si ndarat i bas babah naga e nari. ¹⁷ Merawa kal ate naga e kempak diberu ndai, e maka lawes naga e merangi kesusuren diberu si deban, e me kerina kalak si ngikutken perentah Dibata dingen patuh ndalanken si ngena ate Dibata sue ras si ipetangkas Jesus. ¹⁸ Janah naga e tedis i babo kersik i tepi lawit.

¹ Kenca bage kuidah sada rubia-rubia mulgap i bas lawit nari. Tandukna sepuluh janah takalna pitu. Pituna takalna ermahkota, janah i bas kerina takalna e lit tersurat gelar si nggombangi Dibata. ² Rubia-rubia si kuidah e tempa-tempa bagi arimo tultul, nahena bagi nahe beruang, janah babahna bagi babah singa. Man rubia-rubia e ibereken naga ndai gegeh si lit i bas ia, kursi kinirajanna, ras kuasana si mbelin. ³ Sada takal rubia-rubia ndai tempa-tempa enggo luka mekelek si maba kematen, tapi luka si mekelek e enggo malem. Belang-belang doni kemamangen janah ikutkenna rubia-rubia e. ⁴ Kerina manusia nembah man naga ndai sabap enggo iberekenna kuasana man rubia-rubia e. Rubia-rubia e pe isembahna nina, "Ise kin seri ras rubia-rubia e? Ise kin ngasup ngelawan ia?" ⁵ Rubia-rubia e ipelepas melasken kerna si jahat kal, ia ipelepas erkuasa empat puluh dua bulan dekahna. ⁶ Mulai me ia ngerana nggombangi Dibata, gelar Dibata ras ingan Dibata bage pe kerina kalak si ringan i Surga. ⁷ Ipelepas ia ngelawan anak-anak Dibata dingen nalukenca. Man bana ibereken kuasa nandangi kerina suku, negara, cakap ras bangsa. ⁸ Kerina manusia si nggeluh i doni nembah me man bana: e me kerina kalak si langa isuratken i bas Kitap Kegeluhen. Gelar-gelar si lit i bas Kitap e enggo isuratken ope denga tembe doni enda, janah Kitap e Anak Biri-biri si enggo igeleh empuna. ⁹ Adi lit kin cupingndu begikenlah! ¹⁰ Kalak si enggo itetapken guna itaban, tentu itaban me. Janah kalak si enggo itetapken guna ibunuh alu pedang, tentu ibunuh me alu pedang. Erkiteken si enda me maka anak-anak Dibata arus megenggeng dingen tetap tek man Dibata. ¹¹ Jenari kuidah sada rubia-rubia si deban mulgap i doni nari. Rubia-rubia e lit dua tandukna bagi tanduk anak biri-biri, janah pengeranana bagi naga. ¹² I lebe-lebe rubia-rubia si pemena e ipakena kuasa si mbelin si lit i bas rubia-rubia si pemena e. Ipaksana doni ras kerina si ringan i doni guna nembah man rubia-rubia si pemena, si lukana enggo malem ndai. ¹³ Rubia-rubia si peduaken erbahan e tanda-tanda sengget si mbelin. I lebe-lebe kerina manusia ipesusurna ku doni api i langit nari. ¹⁴ Itipuna kerina manusia si nggeluh i doni alu tanda-tanda sengget si ibahanna i lebe-lebe rubia-rubia si pemena e. Isuruhna kerina manusia i doni enda erbahan sada gana-gana guna mpehaga rubia-rubia si la mate amin pe enggo ilukai alu pedang. ¹⁵ Man rubia-rubia e ibere kengasupen ngembusken kesah ku bas gana-gana rubia-rubia si pemena, seh maka gana-gana e banci ngerana, bage pe munuhi kerina kalak si la nggit nembah man bana. ¹⁶ Ipaksa rubia-rubia e kerina manusia, subuk si kitik bage pe si mbelin, subuk si bayak bage pe si musil, subuk juak-juak bage pe si la juak-juak, gelah itamaken sada cap i bas tanna si kemuhen ntah i bas perdempakenna. ¹⁷ Cap enda e me kap gelar rubia-rubia e ntah nombor gancih gelarna. Ise pe la banci erbinaga ntah nukur adi la lit i bas ia cap enda. ¹⁸ I bas si enda perlu kepentaren! Kalak si beluh ngasup ia ngangkasa nombor rubia-rubia e, sabap nombor e, e me kap sekalak manusia. Nomborna e, e me 666.

¹ Jenari kuidah tedis Anak Biri-biri e i Deleng Sion, janah ras Ia lit jelma teremna 144.000 kalak. Ibas perdempakenna kerina enggo isuratken gelar Anak Biri-biri e ras gelar BapaNa. ² Jenari kubegi sora i langit nari bagi sora sampuren si mbelin ntah pe bagi sora lenggur si megang. Sora si kubegi e bagi sora kalak erkulcapi. ³ Si 144.000 kalak e tedis ngalaken kursi kinirajan, bage pe ngalaken mahluk si empat ras pertua-pertua e. Kerina ia ngendeken ende-enden si mbaru. Ende-enden e, kalak si enggo itukur i bas doni enda nari ngenca ngasup mpelajarisa. ⁴ Kalak enda kerina bersih sabap la icemarkenna bana alu diberu. Tetap ia suci bagi singuda-nguda. Iikutkenna Anak Biri-biri e ku ja gia Ia lawes. Ia enggo itebusi i bas manusia si deban nari, janah ia me si pemena ipersembahken man Dibata ras man Anak Biri-biri e. ⁵ La ia pernah ketunduken erguak. La lit si man pandangen i bas ia. ⁶ Jenari kuidah sada malekat si deban kabang meganjang i awang-awang. Ibabana Berita Si Meriah si la ermasap-masap guna iberitaken man manusia i doni enda, man kerina bangsa, suku, cakap ras negara. ⁷ Alu sora megang nina malekat e, "Erkemalangenlah man Dibata janah pujilah Ia. Sabap enggo seh paksana Dibata ngadili manusia. Sembahlah Ia si njadiken langit, doni, lawit ras kerina ulu lau!" ⁸ Reh malekat si peduaken ngikutken malekat si pemena, alu sora megang nina, "Enggo tombang! Enggo tombang Negeri Babilon si mbelin e! Enggo iberekenna anggurna man kerina bangsa, seh maka bangsa-bangsa jadi mabuk dingen jadi perlua-lua!" ⁹ Reh ka malekat si peteluken ngikutken malekat si dua ndai janah alu sora megang nina, "Kalak si ersembah man rubia-rubia ras gana-ganana e, dingen si lit cap i bas perdempakenna ntah i bas tanna, ¹⁰ inemna me anggur Dibata e, e me anggur pernembeh Dibata si ikuseken la lit campurna ku bas calung pernembeh Dibata. Kerina kalak si bagenda, isiksa me i bas api ras i bas kertah i lebe-lebe malekat si Badia ras Anak Biri-biri e. ¹¹ Cimber api si pesega-sega kalak e erdipul seh rasa lalap. Kalak si nembah rubia-rubia ras gana-ganana e, bage pe kalak si lit i bas ia cap gelar rubia-rubia e, la erngadi-ngadi, suari ras berngi ngenanami kiniseran." ¹² Erkiteken si e maka anak-anak Dibata si ngikutken pedah-pedah Dibata dingen setia man Jesus arus megenggeng. ¹³ Jenari kubegi sora i Surga nari nina, "Suratkenlah enda, ’Ketuahen kalak si mate, si mate i bas kiniteken man Tuhan, mulai genduari nari!’ Ngaloi Kesah Dibata, ’Payo bage me jadina!’ Pekesahken me ia i bas latihna nari, sabap perbahanen-perbahanenna ngarak-ngarak ia." ¹⁴ Jenari kupernehen, e maka kuidah embun mbentar, janah lit tempa-tempa bagi manusia kundul i babo embun e. I bas takal si kundul e lit mahkota emas janah i bas tanna lit sada sabi-sabi si ntelap. ¹⁵ Jenari ndarat sekalak malekat si deban i bas Rumah Pertoton nari. Alu sora si megang nina man si kundul i babo embun e, "Sabikenlah sabi-sabindu janah ranilah genduari sabap enggo seh paksa peranin, doni enggo seh paksana iperani!" ¹⁶ Jenari si kundul i babo embun e ngawatken sabi-sabina ku doni, janah iperanina me doni enda. ¹⁷ Jenari kuidah ka sekalak nari malekat ndarat i bas Rumah Pertoton Dibata nari i Surga. Ia pe lit sabi-sabina ntelap. ¹⁸ Kenca bage ndarat ka i bas batar-batar persembahen nari sekalak malekat si erkuasa nandangi api. Alu sora megang erlebuh ia man malekat si ncikep sabi-sabi si ntelap e nina, "Sabiken sabi-sabindu, janah perani anggur si lit i kebun anggur i doni, sabap enggo tasak buahna!" ¹⁹ E maka iawatken malekat ndai sabi-sabina ku doni, isabina buah anggur i bas batangna nari, jenari iambekkenna ku bas ingan mereh anggur pernembeh Dibata si mbelin. ²⁰ Buah anggur e ipereh i ingan mereh anggur i darat kuta. I bas ingan e nari maler dareh bagi lau mbelin, seh telu ratus kilometer dauhna janah bagesna menam dua meter.

¹ Kenca bage, kuidah ka sada tanda si mbelin dingen si erbahanca ate mamang i langit. Lit pitu malekat maba pitu mara e me mara si pendungi, sabap enda me tanda pernembeh ate Dibata si perpudina. ² Jenari lit kuidah tempa-tempa bagi lawit kaca singgur ras api. Kuidah pe kalak si enggo menang ngelawan rubia-rubia ras gana-ganana e, bage pe menang ngelawan kalak si gelarna itandai alu numbur. Kalak si enggo menang enda tedis i tepi lawit kaca e janah njemak kulcapi si enggo ibereken Dibata man bana. ³ Iendekenna ende-enden Musa, suruh-suruhen Dibata e, dingen ende-enden Anak Biri-biri nina, "O Tuhan, Dibata si Mada Kuasa, seh kal belinna perbahanenNdu, si erbahanca ate mamang. O Raja kerina bangsa, seh kal bujurna perbahanenNdu, seh kal payona pendalankenNdu. ⁴ Ise kin la erkemalangen man baNdu o Tuhan? Ise kin la nggit muji gelarNdu? Kam kap ngenca Badia. Reh me kerina bangsa nembah i lebe-lebeNdu, sabap kerina ia enggo ngidah perbahanenNdu si bujur." ⁵ Janah kuidah talang Rumah Pertoton i Surga, janah i bas lit kemah ingan Papan Batu Perpadanen. ⁶ Malekat si pitu si maba ukumen si pitu ndai ndarat i bas Rumah Pertoton e nari. Uisna kain si bersih erkilat-kilat janah sada gendit emas ililetken i bas tentenna. ⁷ Jenari sada i bas mahluk si empat e mereken pitu mangkuk emas man malekat si pitu e, e me mangkuk emas si dem pernembeh ate Dibata, e me Dibata si nggeluh rasa lalap. ⁸ Rumah Pertoton e dem asap kemulian dingen Kuasa Dibata. Ise pe la banci bengket ku bas Rumah Pertoton e adi langa keri mara si pitu si ibaba malekat si pitu e.

¹ Jenari kubegi sora megang i bas Rumah Pertoton e nari ngerana man malekat si pitu ndai nina, "Laweslah, tungtungken ku doni pituna mangkuk pernembeh ate Dibata e!" ² Berkat malekat si pemena jenari itungtungkenna isi mangkukna ku daraten. E maka turah me bareh si jahat ras mesui i bas kalak si lit i bas ia cap rubia-rubia e, bage pe kalak si nembah gana-gana rubia-rubia e. ³ Kenca bage itungtungken malekat si peduaken isi mangkukna ku lawit. E maka salih lau lawit e bagi dareh kalak mate, janah kerina si nggeluh i bas lawit e mate. ⁴ Jenari itungtungken malekat si peteluken isi mangkukna ku kerina lau bage pe ku kerina ulu lau. E maka salih lau e jadi dareh. ⁵ Paksa e kubegi ngerana malekat si erkuasa nandangi lau e nina, "O si Badia, si lit genduari ras nai nari pe, adil kap Kam i bas ukumen-ukumen si enggo ibahanNdu! ⁶ Enggo iamburkenna dareh anak-anakNdu ras dareh nabi-nabiNdu, janah genduari ibahanNdu ia nginem dareh. Patut nge bage!" ⁷ Jenari kubegi sora i bas batar-batar persembahen nari nina, "Payo, bage me jadina. O Tuhan, Dibata si Mada Kuasa! Bujur dingen adil nge ukumen-ukumen si ibahanNdu!" ⁸ Jenari itungtungken malekat si peempatken isi mangkukna ku matawari. E maka lit kuasa i bas matawari guna nutung manusia alu lasna si nderngit. ⁹ Meseng manusia ibahan lasna si nderngit e, e maka isumpahina gelar Dibata, si erkuasa nandangi mara e. Tapi la ia jera janah la ia nggit pemuliaken Dibata. ¹⁰ Jenari itungtungken malekat si pelimaken isi mangkukna ku kursi kinirajan rubia-rubia e. Erkiteken si e gelap kerina kerajan rubia-rubia e. Ikerep manusia biberna perbahan suina akapna, ¹¹ janah isumpahina Dibata si i Surga erkiteken suina dingen erkiteken bareh-barehna e. Tapi la ia jera kerna perbahanenna si jahat. ¹² Kenca bage itungtungken malekat si peenemken isi mangkukna ku Lau Eprat si mbelin. E maka kerah me lau e, guna nikapken dalan man raja-raja si reh i Timur nari. ¹³ Jenari kuidah telu kesah si melket, si ndarat i bas babah naga nari, i bas babah rubia-rubia e nari, bage pe i bas babah nabi si perguak nari. Kesah si melket e tempa-tempa bagi katak. ¹⁴ Enda me kesah setan-setan si erbahan tanda-tanda sengget. Kesah si telu enda lawes ndahi raja-raja i belang-belang doni enda; ipepulungna raja-raja e guna erperang i bas wari si mbelin e, e me wari Dibata si Mada Kuasa! ¹⁵ "Nehenlah! Reh me Aku bagi sekalak penangko! Ketuahen kalak si la tunduh janah si la nangtangi uisna, gelah ola ia erdalan manjang-anjang, janah mela iakapna i lebe-lebe kalak si nterem!" ¹⁶ Kenca bage ipepulung kesah-kesah e raja-raja i bas sada ingan si igelari i bas cakap Heber, Harmagedon. ¹⁷ Jenari itungtungken malekat si pepituken isi mangkukna ku awang-awang. Paksa si e terbegi sora megang i bas kursi kinirajan i bas Rumah Pertoton nari nina, "Enggo dung!" ¹⁸ E maka jadi kilap, sora ergeruhguh, lenggur ras linur si mehantu. Kidekah lit manusia langa pernah jadi linur si adum e. Enda me linur si mehantuna kal! ¹⁹ Kuta si meriah e pecah jadi telu bagin, janah kuta bangsa-bangsa kernep kerina. Janah iinget Dibata Babilon si meriah e. IbahanNa kuta e minem i bas calung Dibata nari anggur pernembeh ate Dibata. ²⁰ Masap kerina pulo-pulo janah deleng-deleng pe lanai teridah. ²¹ Udan baho si kegalangen, si beratna lit lima puluh kilo sada, ndabuhen i langit nari ngkenai manusia. E maka isumpahi manusia me Dibata erkiteken mara udan baho e, sabap seh kal mehantuna mara e.

¹ Kenca bage reh ndahi aku sekalak i bas malekat si pitu si lit pitu mangkukna, janah nina, "Mari, maka kutuduhken man bandu ukumen si jadi nandangi diberu si pencarinna erlua-lua, e me kuta si mbelin si ipanteki i tepi-tepi lau. ² Raja-raja doni erlua-lua ras diberu si perlua-lua si mbelin e, janah manusia i doni enda mabuk sabap iinemna anggur perlua-lua e." ³ Ibengketi Kesah Si Badia aku jenari ibaba ku taneh mesawang. I je kuidah sekalak diberu ngersak rubia-rubia si megara metua rupana; takal rubia-rubia e pitu janah tandukna sepuluh. I bas kerina kulana lit gelar-gelar si nggombangi Dibata. ⁴ Uis diberu e rupana bunga terong ras megara metua, itutupi alu barang-barang emas, permata ras mutiara. I bas tanna lit calung emas si dem alu si mbau ras si nggesuh, si rehna i bas perbahanenna erlua-lua nari. ⁵ I bas perdempakenna lit isuratken sada gelar rahasia e me, "Babilon si mbelin, indung kerina perlua-lua ras si nggesuh i doni enda." ⁶ Jenari kuidah diberu e mabuk erkiteken dareh anak-anak Dibata dingen erkiteken dareh kalak si enggo ibunuh perbahan kesaksinna kerna Jesus. Mamang kal ateku ngidah diberu e. ⁷ Tapi nina malekat e man bangku, "Engkai maka mamang atendu? Kuturiken me man bandu rahasia kerna diberu e bage pe kerna rubia-rubia si maba ia, rubia-rubia si pitu takalna janah tandukna sepuluh. ⁸ Rubia-rubia si iidahndu e, nai lit, tapi genduari lanai lit. Pagin mulgap ia i bas embang si la ersibar bagesna nari, tapi guna ikernepken. Manusia si nggeluh i doni enda, si gelarna langa isuratken i bas Kitap kegeluhen ope denga tembe doni enda, kemamangen me ngidah rubia-rubia e. Nai rubia-rubia e lit, genduari lanai, tapi pagin mulgap me ia mulihi. ⁹ I bas si e perlu kepentaren ras kebeluhen. Takal si pitu e me uruk si pitu ingan diberu e kundul. Bage pe takal si pitu e me raja si pitu: ¹⁰ lima i bas si pitu e enggo ndabuh, sekalak erkuasa denga janah si sekalak nari langa reh. Kenca ia pagi reh, arus ia erkuasa kentisik saja. ¹¹ Janah rubia-rubia si nai lit e, tapi genduari lanai lit, e me raja si pewaluhken. Asalna i bas raja si pitu ndai nari, janah lawes guna ikernepken. ¹² Tanduk si sepuluh si iidahndu e, e me sepuluh raja si langa mulai erkuasa tapi si pagin ibereken man bana kuasa jadi raja-raja sada jam dekahna ras rubia-rubia e. ¹³ Raja si sepuluh e ersada kerina tujunna. Kerina ia ngendesken gegehna ras kuasana man rubia-rubia e. ¹⁴ Erperang me ia ngelawan Anak Biri-biri e, tapi Anak Biri-biri e rikut ras kalak si enggo idiloNa, si enggo ipilihNa dingen ajar-ajarNa si setia, la banci lang naluken raja-raja e. Sabap Anak Biri-biri e kap Tuhan i babo kerina tuan-tuan dingen Raja i bas kerina raja-raja." ¹⁵ Tole ngerana malekat e man bangku, "Kerna lau si iidahndu, lau ingan diberu perlua-lua e kundul, e me negara-negara jelma si nterem, bangsa-bangsa bage pe kerina manusia i bas erbage-bage cakap nari. ¹⁶ Tanduk si sepuluh si iidahndu e bage pe rubia-rubia ndai nembeh atena man diberu perlua-lua e. Ibuatna me kerina si lit i bas diberu e janah itadingkenna diberu e manjang-anjang. Ipanganina me daging diberu e janah ikernepkenna alu api. ¹⁷ Sabap enggo itamaken Dibata ukur i bas pusuh raja-raja si sepuluh e guna ndalanken sura-sura Dibata; ersada ukurna guna mereken kerajanna man rubia-rubia e ngayak seh kai si enggo ikataken Dibata. ¹⁸ Diberu si enggo idahndu e, e me kuta si mbelin, si erkuasa nandangi raja-raja i doni enda."

¹ Kenca bage kuidah sekalak nari malekat nusur i Surga nari. Lit kuasana si mbelin janah sinalsalna nerangi kerina doni enda. ² Alu sora megang nina, "Enggo runtuh Babilon! Enggo runtuh diberu, e me Babilon si mbelin e. Genduari rehen setan-setan ras kesah-kesah si melket ndahi diberu e. Erbage-bage perik si melket dingen si ciga ate kalak rasar i bas ia. ³ Iberekenna anggurna man kerina bangsa janah ibahanna kerina bangsa e nginem anggur lagu langkahna si perlua-lua e. Raja-raja doni erlua-lua ras ia, janah saudagar-saudagar i doni jadi bayak erkiteken kerincuhen diberu e erlua-lua lanai tertahan." ⁴ Jenari kubegi ka sora si deban i Surga nari nina, "Ndaratlah o, bangsangKu! Ndaratlah i bas kuta e nari! Ola kam ngikut i bas dosa-dosana janah ikut i bas mara si reh man bana! ⁵ Sabap dosana ergun-gun seh ku langit, janah inget Dibata kap kerina perbahanenna si jahat. ⁶ Bahanlah man bana bali ras perbahanenna man bandu, balaslah dua kali lipat asa perbahanenna man bandu. Isilah calungna dua kali lipat kerasna asangken inemen keras si isikapkenna man bandu. ⁷ Bahanlah ia ngenanami kiniseran ras ceda ate rikutken buena pujin ras kemewahen si ibahanna nandangi dirina. Sabap katawari pe nina man dirina, ’I jenda aku kundul bagi kemberahen! Aku labo diberu balu-balu; asa ndigan pe la kunanami ate ceda!’ ⁸ Erkiteken si enda me maka i bas sada wari reh man bana mara si erbage-bage: penakit, ate ceda ras kelihen. Meseng me ia ibahan api, sabap erkuasa kap Tuhan, Dibata Si ngadili ia e." ⁹ Tangis ngandung kerina raja-raja i doni si erlua-lua dingen ngikutken kerincuhen diberu e. Bage pe ngandung me raja-raja e ngidah cimber api si nutung kuta e. ¹⁰ Tedis ia idauh-dauh nari perbahan mbiar ngenehen kiniseranna e, janah nina, "Cilaka! Cilaka kota Babilon si mbelin dingen si nteguh e! I bas sada jam saja enggo kam iukum!" ¹¹ Itangisi ras ingandungi saudagar-saudagar i doni me diberu e sabap lanai lit sekalak pe si nukur barang-barangna. ¹² Lanai lit sekalak pe si nukur emas, pirak, permata, ntah mutiarana. Bage pe lanai lit sekalak pe si nukur barang-barangna e, e me: kain putih, uis ungu, sutera, uis megara metua, kayu si merim, erbage-bage perkakas si ibahan i bas kayu si meherga nari, i bas gading nari, tembaga, besi, marmar, ¹³ kulit manis, rempah-rempah, si merim-merim, mur, kumenen, anggur, minak, tepung ras gandum, lembu, biri-biri, kuda, gereta, juak-juak bage pe manusia. ¹⁴ Nina saudagar-saudagar e man kota Babilon e, "Kerina si atendu jadi sikerajangenndu enggo kernep janah kerina kinibayaken ras jilendu enggo bene. Asa ndigan pe lanai idatndu mulihi!" ¹⁵ Tokeh-tokeh si enggo bayak erkiteken perbinaganna i bas kuta e, tedis me i dauh-dauh nari, sabap mbiar ia ngenehen kiniseran kuta e. Tangis dingen ngandung me ia, ¹⁶ janah nina, "Cilaka! Cilaka kal kuta si mbelin e! Biasana ipakena kain putih, uis ungu, bage pe uis megara metua, janah ipakena barang-barang emas, batu permata ras mutiara! ¹⁷ Tapi i bas sada jam enggo bene kerina kinibayakenna enda!" Kerina kapten kapal, penumpang-penumpang ras pegawai-pegawai kapal bage pe kerina si erdahin i lawit tedis i dauh-dauh nari, ¹⁸ asum idahna cimber kuta e nina alu sora si megang, "Langa pernah lit kuta bagi kuta si mbelin enda!" ¹⁹ Icaburina takalna alu abu. Tangis dingen ngandung ia, nina, "Cilaka! Cilaka kal kuta si mbelin e! Kuta si erbahanca bayak kalak si lit kapalna erlayar ku lawit erkiteken kinibayaken kuta e! Tapi i bas sada jam saja kerina enggo kernep! ²⁰ Ersuraklah, o Surga erkiteken kuta enggo kernep. Ersuraklah o anak-anak Dibata, o rasul-rasul bage pe kam nabi-nabi! Sabap ia enggo iukum Dibata sue ras kai si ibahanna man bandu!" ²¹ Kenca bage sekalak malekat si megegeh ngangkat sada batu penggilingen si galang, jenari iambekkenna ku lawit janah nina, "Bagenda me pagi kota Babilon si mbelin e iambekken ku teruh, janah asa ndigan pe lanai teridah. ²² Asa ndigan pe lanai ibegi i tengah-tengahndu sora kalak ngkuit kulcapi, musik dingen sora kalak ngembus suling ras terompet. Lanai pagi lit sekalak tukang pe i tengah-tengahndu subuk i bas dahin apai pe, sora batu gilingen pe lanai pagi ibegi. ²³ Lanai pagi lit sinalsal lampu i tengah-tengahndu; asa ndigan pe lanai ibegi sora si empo ras si sereh i tengah-tengahndu nari. I belang-belang doni enda saudagar-saudagarndu me si mbelinna, janah alu ilmu sihirndu, itipundu kerina manusia i doni enda!" ²⁴ Babilon iukum sabap dareh nabi-nabi ras dareh anak-anak Dibata terdat i bas ia, gendekna dareh kerina manusia si enggo ibunuh i doni enda.

¹ Kenca bage kubegi tempa-tempa sora megang i bas perpulungen jelma si nterem si lit i Surga e nari nina, "Pujilah Dibata! Ia kap si mulahi kita, janah Ia kap si erkuasa. ² Ukumen si iberekenNa bujur dingen adil kap. Enggo iukumNa diberu perlua-lua si mbelin, si mabai doni enda papak alu lagu langkahna si perlua-lua e. Enggo iukum Dibata diberu e perbahan ibunuh diberu e suruh-suruhen Dibata." ³ Tole nina sora e, "Pujilah Dibata! Cimber api si rehna i bas kuta e nari la erkeri-kerin nangkih." ⁴ Pertua-pertua si dua puluh empat ras rubia-rubia si empat e, erjimpuh nembah man Dibata si kundul i bas kursi kinirajan e nina, "Amin! Haleluya!" ⁵ Kenca bage terbegi sora i bas kursi kinirajan e nari nina, "O kerina juak-juakNa, subuk si mbelin bage pe si kitik, si erkemalangen man baNa, pujilah Dibata!" ⁶ Jenari kubegi bagi sora sada perpulungen si mbelin, bagi sora air sampuren si mbelin nina, "Pujilah Dibata! Sabap Tuhan Dibatanta si Mada Kuasa e, enggo kap jadi Raja! ⁷ Ersuraklah kita janah meriahlah siakap. Sipujilah Ia! Sabap enggo seh paksana kerja erdemu bayu Anak Biri-biri e, janah Pengantin si Diberu enggo dung ersikap guna kerja e. ⁸ Pengantin si Diberu e enggo make uis mbentar si erkilat-kilat." (Uis mbentar e, e me perbahanen si mehuli si ilakoken anak-anak Dibata.) ⁹ Kenca bage nina man bangku, "Suratkenlah enda, ’Ketuahen kalak si enggo iundang ku kerja erdemu bayu Anak Biri-biri e.’ " Tole nina man bangku, "Kata-kata enda tuhu-tuhu i bas Dibata nari." ¹⁰ Erjimpuh aku i lebe-lebe naheNa, ateku nembah man bana, tapi nina man bangku, "Ola sembah aku, sabap aku pe suruh-suruhen nge, bali ras kam, bage pe bali ras senina-seninandu, e me kalak si tetap ncikep kebenaren si ipetangkas Jesus. Sembahlah Dibata!" Sabap si mpegegehi ukur nabi-nabi e me kebenaren si ipetangkas Jesus. ¹¹ Jenari kuidah langit talang, janah i je lit sada kuda mbentar. Si ngersak kuda e gelarNa si Setia dingen Bujur. Ia ngadili alu bujur ras erperang pe alu bujur. ¹² MataNa bagi gara api, janah i bas takalNa melala mahkota. I bas Ia lit tersurat sada gelar, tapi ise pe la ngangkasa seakatan Ia. ¹³ Jubah si ipakeNa icelup alu dareh. Gelar si igelarken man baNa e me Kata Dibata. ¹⁴ Tentera-tentera Surga ngikutken Ia alu ngersak kuda mbentar, dingen make baju mbentar si bersih. ¹⁵ I bas babahNa nari ndarat sada pedang si ntelap janah alu e pagi italukenNa bangsa-bangsa. IperentahNa me bangsa-bangsa alu ciken besi. IerikNa me anggur i bas ingan ngerik anggur pernembeh ate Dibata si Mada Kuasa. ¹⁶ I bas jubahNa bage pe i bas naheNa isuratken gelar, "Raja i babo kerina raja, dingen Tuan i babo kerina tuan." ¹⁷ Jenari kuidah sekalak malekat tedis i babo matawari. Alu sora si megang ngerana ia man kerina perik-perik si sangana kabang i tengah awang-awang nina, "Marilah ras-ras pulung guna kerja man-man si mbelin si ibahan Dibata! ¹⁸ Marilah man daging raja-raja, puanglima-puanglima ras prajurit-prajurit bage pe daging kuda ras si ngersaksa dingen daging kerina manusia, subuk juak-juak, bage pe la juak-juak, si mbelin bage pe si kitik!" ¹⁹ Jenari kuidah rubia-rubia e, ras raja-raja doni bage pe tentera-tenterana pulung guna ngelawan si ngersak-kuda ndai ras tentera-tenterana. ²⁰ Tapi rubia-rubia e ipenjaraken ras nabi perguak si enggo erbahan tanda-tanda sengget i lebe-lebe rubia-rubia e. (Alu tanda-tanda sengget e me itipu rubia-rubia e kerina kalak si lit i bas ia cap rubia-rubia dingen kerina kalak si nembah gana-gana rubia-rubia e.) Rubia-rubia ras nabina si perguak e, duana iambekken geluh-geluhen ku bas lawit api si gara ras kertah. ²¹ Tentera-tenterana ibunuh alu pedang si ndarat i bas babah si ngersak kuda e nari; jenari kerina perik-perik e mangani dagingna asa besurna.

¹ Kenca bage kuidah sekalak malekat nusur i Surga nari. I bas tanna lit kunci embang si la ersibar bagesna e ras rante galang. ² Itangkapna naga, nipe si nuria e, e me Iblis ntah pe Setan, jenari igarikenna seh seribu tahun dekahna. ³ Kenca bage iambekkenna naga e ku bas embang e jenari ikuncina kelbung e janah itamana meteraina gelah olanai itipu Iblis e bangsa-bangsa seh lepas si seribu tahun e. Kenca lepas si seribu tahun e arus ia ipulahi kentisik. ⁴ Jenari kuidah melala kursi kinirajan ras si ngkundulisa, si enggo ibereken man bana kuasa guna ngadili. Bage pe kuidah tendi-tendi kalak si enggo mate itampul erkiteken meritaken Kata Dibata ras ersaksi kerna Jesus. Kalak si enggo mate enda ndai, la pernah nai isembahna rubia-rubia e ntah pe gana-ganana. Bage pe labo lit cap rubia-rubia e i bas perdempakenna ntah i bas tanna. Kalak enda ndai nggeluh mulihi janah erkuasa ras Kristus seribu tahun dekahna. ⁵ (Kalak mate si deban la nggeluh mulihi seh lepas paksa si seribu tahun e.) Enda me kekeken si pemena. ⁶ Ketuahen kalak si ikut i bas kekeken si pemena e sabap ia enggo iserapken jadi anak-anak Dibata. Kematen si peduaken lanai erkuasa nandangi ia. Ia me pagi jadi imam-imam Dibata ras Kristus. Ras Kristus kalak enda erkuasa i bas si seribu tahun e. ⁷ Lepas si seribu tahun e, ipulahi me Iblis i bas penjara nari, ⁸ jenari ndarat ia nipu bangsa-bangsa i belang-belang doni, e me Gog ras Magog. Ipepulung Iblis e me bangsa-bangsa e ku peperangen, bagi kersik i tepi lawit teremna. ⁹ Merap me ia kerina ku doni enda; ikepungna benteng anak-anak Dibata ras kuta si ikelengiNa. Tapi nusur api i Surga nari ngkernepken bangsa-bangsa e. ¹⁰ Jenari Iblis si enggo nipu bangsa-bangsa e, iambekken ku lawit api si singgur ras kertah, ingan ngambengken rubia-rubia ras nabi perguak e. Isiksa me kalak enda rasa lalap suari ras berngi. ¹¹ Jenari kuidah sada kursi kinirajan ras si ngkundulisa. Kursi kinirajan e mbelin dingen mbentar rupana. Langit ras doni kiam i bas ia nari seh lanai teridah. ¹² Jenari kuidah kalak si enggo mate, subuk si mbelin bage pe si kitik, tedis i lebe-lebe kursi kinirajan e. Kitap-kitap italangi. Jenari italangi ka sada Kitap nari, e me Kitap Kegeluhen. Kenca bage kalak si enggo mate iadili rikutken kai si enggo ibahanna, bagi lit isuratken i bas Kitap-kitap e. ¹³ E maka lawit ngendesken kalak mate si lit i bas ia. Kematen ras doni kematen pe ngendesken kalak mate si lit i bas ia, janah iadili me kerina rikutken perbahanenna sekalak-sekalak. ¹⁴ Kenca bage kematen ras doni kematen iambekken ku bas lawit api. (Lawit api enda me kematen si peduaken.) ¹⁵ Ise la lit gelarna tersurat i bas Kitap Kegeluhen e iambekken me ku bas lawit api e.

¹ Jenari kuidah Surga si mbaru ras doni si mbaru. Langit si pemenana ras doni si pemenana enggo lesap, dingen lawit pe lanai lit. ² Janah kuidah Kuta si Badia e, Jerusalem si mbaru, nusur i Surga nari, i bas Dibata nari, enggo sikap bagi sekalak penganten si enggo ipetik guna njumpai perbulangenna. ³ Kubegi sora si megang ngerana i bas kursi Kinirajan e nari, nina, "Genduari Kemah Dibata lit i tengah-tengah manusia! Ras manusia me Ia nggeluh, janah manusia jadi anak-anakNa me. Ringan me Ia i tengah-tengah manusia janah Ia me jadi Dibata manusia. ⁴ Iapusi Dibata me kerina iluh anak-anakNa e. Lanai pagi lit kematen, ceda-ate, tangis ntah pe si mesui. Sabap si pemena enggo lepas." ⁵ Jenari ngerana si kundul i bas kursi kinirajan e nina, "Nehenlah, genduari Kubahan kerina jadi mbaru!" Kenca bage nina, "Suratkenlah enda, sabap kata enda tuhu janah terteki kap." ⁶ Tole nina, "Enggo dung! Aku kap si erkuasa mula-mulana nari seh ku kedungenna. Aku kap Tuhan mula-mulana nari seh ku si pendungina. Man kalak si muas Kubereken me lau inemen i bas ulu lau kegeluhen nari la ertukur. ⁷ Kalak si menang ialokenna me si enda. Aku me Dibatana janah ia me jadi anakKu. ⁸ Tapi kalak si percikcik, si la erkiniteken, si mbau lagu langkahna, pemunuh, kalak si perlua-lua, tukang sihir, kalak si nembah berhala-berhala ras kerina si perguak, inganna e me lawit api ras kertah si gara, e me kematen si peduaken." ⁹ Sekalak i bas malekat si pitu si lit i bas ia pitu mangkuk dem pitu mara si perpudi, reh ndahi aku, jenari nina, "Mari, gelah kutuduhken man bandu Pengantin si Diberu, ndehara Anak Biri-biri e." ¹⁰ Ikuasai Kesah Dibata aku, jenari ibaba malekat e aku ku ancuk-ancuk deleng si seh kal ganjangna. Ituduhkenna man bangku Jerusalem, Kuta si Badia e, nusur i Surga nari, i bas Dibata nari, ¹¹ ersinalsal ibahan kemulian si rehna i bas Dibata nari. Kuta e ersinalsal bagi permata, bagi batu jaspis, meciho bagi kaca kristal. ¹² Kuta e meganjang tembokna, dingen lit sepuluh dua pintu gerbangna si niiani sepuluh dua kalak malekat. I babo pintu gerbang e lit tersurat gelar-gelar suku kalak Israel si sepuluh dua. ¹³ Gerbangna si sepuluh dua e, e me: telu arah Purba, telu arah Daksina, telu arah Utara janah telu arah Pustima. ¹⁴ Tembok kota e ipanteki i babo sepuluh dua palas batu, janah i bas batu e tersurat sepuluh dua gelar rasul Anak Biri-biri e. ¹⁵ Malekat si ngerana man bangku e lit ciken penibarina, si ibahan i bas emas nari, janah lakonna guna nibari kuta e, pintu gerbangna ras tembokna. ¹⁶ Kuta e segi empat, bali gedangna ras bertengna. Isibari malekat ndai kota e alu ciken penibarina: gedangna 2400 kilometer, janah bertengna ras ganjangna bali ras gedangna. ¹⁷ Isibari malekat ndai pe tembok kuta e: ganjangna 72 meter sue ras patoken ukuren si ipakena. ¹⁸ Tembok kota e ibahan i bas batu jaspis nari, janah kota e ibahan i bas emas tulen nari, meciho bagi kaca. ¹⁹ Palas tembok kota e ipejile alu erbage-bage permata. Palas si pemena batu jaspis si meratah, si peduaken nilam biru, peteluken kasidon abu-abu, si peempatken jamrud si meratah, ²⁰ si pelimaken sardonik si meruntik, si peenemken sardion si megara, si pepituken kerusolit si megersing, si pewaluhken beril si meratah biru, si pesiwahken topas si megersing, si pesepuluhken kerosoperas meratah-ratah, si pesepuluh sadaken huakin biru nguda, si pesepuluh duaken ametis bunga terong rupana. ²¹ Pintu gerbang si sepuluh dua e, e me sepuluh dua mutiara. Teptep gerbang sada mutiara. Pasar kota e ibahan i bas emas tulen nari, meciho bagi kaca. ²² La lit kuidah Rumah Pertoton i bas kota e sabap Rumah Pertoton e me Tuhan Dibata si Mada Kuasa ras Anak Biri-biri e. ²³ Matawari ras bulan la perlu guna nerangi kota e, sabap kemulian Dibata ersinalsal ku kota e, janah Anak Biri-biri jadi lampuna. ²⁴ Bangsa-bangsa doni enda erdalan-dalan me i teruh sinalsal kota e, janah raja-raja doni enda pe maba kebayakenna ku bas kota e. ²⁵ Pintu gerbang kota e talang gedang-gedang wari. Lalap la ipintu sabap lanai bo lit i je berngi. ²⁶ Kiniulin ras kebayaken bangsa-bangsa ibaba pagi ku bas kota e. ²⁷ Tapi si ngelakoken perbahanen-perbahanen si meluat ras kalak perguak -- gendekna kerina si meluat -- la banci bengket ku bas kota e. Si bengket ku bas, e me kalak si gelarna lit tersurat i bas kitap Anak Biri-biri e, e me Kitap Kegeluhen.

¹ Ituduhken malekat e man bangku lau si mereken kegeluhen. Lau e erkilat-kilat bagi kristal. Lau e rehna i bas kursi Kinirajan Dibata ras Anak Biri-biri e nari, ² janah maler arah tengah-tengah pasar kota e. Arah kawes ras kemuhen lau e lit batang kayu kegeluhen, si erbuah sepuluh dua kali setahun, e me sebulan sekali. Bulungna ipake guna pepalem bangsa-bangsa. ³ La lit i bas kota e si kena sumpah Dibata. Kursi Kinirajan Dibata ras Anak Biri-biri e lit i bas kota e, janah suruh-suruhenNa nembah me man baNa. ⁴ Idah suruh-suruhen e me ayoNa, janah isuratken pe gelar Dibata i bas perdempaken suruh-suruhen e. ⁵ Lanai lit berngi, janah terang lampu ras sinalsal matawari pe lanai perlu sabap Tuhan Dibata me si nerangi suruh-suruhen e, janah kalak enda erkuasa jadi raja seh rasa lalap. ⁶ Jenari nina man bangku, "Kata enda kerina tuhu, janah terteki. Tuhan Dibata si mereken KesahNa man nabi-nabi, dingen si enggo nuruh malekatNa encidahken man suruh-suruhenNa kai si nandangi jadi minter." ⁷ "Nehenlah!" nina Yesus, "Minter Aku reh! Ketuahen kalak si ngikutken Kata nubuat si tersurat i bas Kitap enda!" ⁸ Aku, Johanes, enggo megi dingen ngidah si enda kerina. Janah kenca kubegi dingen kuidah si enda kerina, erjimpuh aku nembah i lebe-lebe malekat si ncidahkenca e man bangku. Kusembah ateku ia. ⁹ Tapi nina man bangku, "Ola sembah aku! Aku pe suruh-suruhen nge, bali ras kam, bali ras senina-seninandu nabi-nabi e; bage pe bali ras kerina kalak si ngikutken kata-kata si tersurat i bas Kitap enda. Sembahlah Dibata!" ¹⁰ Tole nina malekat e man bangku, "Ola tutupi Kata nubuat si tersurat i bas Kitap enda, sabap enggo ndeher paksana si enda kerina jadi. ¹¹ Kalak jahat iteruskennalah erbahan jahat; kalak si melket lagu-langkahna iteruskennalah erlagu langkah si melket; kalak si mehuli iteruskennalah erbahan mehuli janah kalak si enggo iserapken guna Dibata teruslah ia nggeluh guna Dibata." ¹² Nina Jesus, "Nehenlah! Pedas me Aku reh! Kubaba me upah man kerina jelma rikutken kai si enggo ibahanna. ¹³ Aku kap si erkuasa mula-mulana nari seh ku kedungenna; Aku kap Tuhan mula-mulana nari ku pendungina." ¹⁴ Ketuahen kalak si naptapi jubahna seh bersih. Lit hakna man buah batang kayu kegeluhen e ras bengket arah pintun-pintun gerbang ku bas kota e. ¹⁵ Idaraten kuta e ringan kalak si mbau lagu langkahna, tukang sihir, perlua-lua, pemunuh, kalak si nembah berhala bage pe kalak si perguak subuk i bas kata ras i bas perbahanen. ¹⁶ "Aku, Jesus, enggo nuruh malekatKu meritaken si enda man bandu kerina guna kiniulin perpulungen-perpulungen. Aku kap urat ras kesusuren Daud; Aku me bintang erpagi-pagi si terang e." ¹⁷ Nina Kesah Dibata ras Pengantin si Diberu e, "Marilah!" Kerina si megi kata enda pe arus ikatakenna, "Marilah!" Ise si muas rehlah ia! Janah ise si mesikel, ibuatnalah lau kegeluhen e, la pada nggalar. ¹⁸ Kusehken kata pertenget man kerina kalak si megi kata-kata nubuat si tersurat i bas kitap enda, "Adi lit kalak si nambah-nambahi isi kitap enda itambahi Dibata me man bana mara-mara si enggo isuratken i bas kitap enda. ¹⁹ Janah adi lit kalak si ngkurangi sitik lah gia kata-kata nubuat si tersurat i bas kitap enda, maka ikurangi Dibata baginna i bas buah batang kayu kegeluhen nari, bage pe baginna i bas kuta si Badia si enggo isuratken i bas kitap enda." ²⁰ Ia, si naksiken kerina enda ngataken, "Payo, bage me jadina. Pedas Aku reh!" Amin. Marilah, o Tuhan Jesus! ²¹ Lias ate Tuhan Jesus ras kam kerina gelah.