PILIPI

PILIPI

¹ Surat enda i bas aku nari, Paulus ras Timotius, persuruhen-persuruhen Kristus. Surat enda man anak-anak Dibata si ringan i Pilipi, si ersada ras Kristus Jesus, bage pe man peminpin-peminpin ras si nampati i bas perpulungen. ² Dibata Bapanta ras Tuhan Jesus Kristuslah mereken lias ate ras kemalemen ate man bandu. ³ Kuinget kenca kam, kukataken bujur man Dibatangku erkiteken kam. ⁴ Tep-tep aku ertoto kerna kam kerina, ertoto aku alu meriah ukur. ⁵ Nginget kuga kam nampati aku i bas dahin meritaken Berita Si Meriah, tangtangna nari seh genduari. ⁶ Bage pe tek aku maka iterusken Dibata nge dahin si mehuli si enggo ibenakenNa i bas kam seh ku warina Kristus reh mulihken. ⁷ Kuinget kam lalap! Janah patut nge bagenda penggejapenku kerna kam. Sabap kerina kam enggo ras aku ngenanami lias ate si ibereken Dibata man bangku, subuk genduari asum aku i bas penjara, bage pe nai asum aku bebas denga mpertahanken ras mpeteguhi Berita Si Meriah e alu tutus ate. ⁸ Tuhu-tuhu tedeh kal ateku nandangi kam kerina alu keleng ate si rehna i bas Jesus Kristus nari. Dibata saksingku maka kai si kukataken enda la guak. ⁹ Pertotonku kerna kam e me: Ertoto aku man Dibata gelah ertambahna min keleng atendu janah rikut ras pemeteh si tuhu-tuhu ras pengangkan si serta, ¹⁰ gelah ietehndu milihsa apai si mehulina. Alu bage bersih kam pagi dingen la erpandangen i bas warina Kristus reh pedua kaliken guna ngadili kerina manusia. ¹¹ Geluhndu pagi itambahi alu biak si tuhu-tuhu mehuli. Si enda Jesus Kristus ngenca ngasup njadikenca, e me guna muji dingen pehagaken Dibata. ¹² O senina-senina, gelah ietehndu, maka kai si enggo jadi man bangku erbahanca reh mbarna Berita Si Meriah e. ¹³ Seh maka kerina si erjaga i bas istana bage pe kerina kalak si ringan i jenda meteh maka aku ipenjaraken erkiteken aku suruh-suruhen Kristus. ¹⁴ Janah erkiteken aku ipenjaraken e, senina-senina si sada kiniteken teremen reh tekna man Tuhan, seh maka katawari pe reh pangna ia meritaken Berita Si Meriah e. ¹⁵ Tuhu lit piga-piga kalak si meritaken Kristus erkiteken cian ate ntah erkiteken ia kalak perubat-rubat, tapi si debanna meritakenca arah ukurna ersuruh. ¹⁶ Si e idalankenna erpalasken keleng ate, sabap ietehna maka enggo ibereken Dibata man bangku dahin guna mpertahanken Berita Si Meriah e. ¹⁷ Kalak si deban, labo arah ukurna ersuruh mberitaken Berita Si Meriah e, tapi erkiteken rangapna nge. Iakapna reh suhsahna kuakap ibahanna asum aku i penjara. ¹⁸ Labo dalih! Meriah nge ukurku subuk mehuli ntah la gia mehuli sura-surana, gelah Kristus e iberitaken asa bancina. Tetap nge meriah ukurku, ¹⁹ sabap kueteh maka bebas nge pagi aku erkiteken pertotonndu ras penampat Kesah Jesus Kristus. ²⁰ Sura-surangku dingen si kuarapken kal e me maka ola kal min sia-sia aku i bas dahinku, tapi maka tetap min ergiah-giah ukurku alu la biar-biaren, terlebih-lebih genduari, gelah i bas kerina percibalku tama pujin man Kristus, subuk aku nggeluh ntah mate gia. ²¹ Sabap kai kin ertina nggeluh! Man bangku, nggeluh e me Kristus, janah mate reh untungna. ²² Tapi adi banci mbue kubahan dahin si mehuli i bas geluhku enda, lanai kueteh milihsa nggeluh ntah mate. ²³ Duana ngerintak aku. Mesikel kal aku nadingken kegeluhenku enda gelah banci ras Kristus. Sabap e me si mehulina! ²⁴ Tapi man gunandu ulin aku tetap nggeluh. ²⁵ Tek kal aku kerna si enda. E me sabapna maka kueteh maka langa bo aku mate. Tetap denga nge aku ras kam kerina guna nambahi kemajun ras keriahenndu i bas kiniteken. ²⁶ E maka kenca ras kam ka aku pagi, reh litna dalanna iakapndu megah kerna aku i bas kegeluhenndu i bas persadanndu ras Kristus Jesus. ²⁷ Saja ngenca, sue min lagu-langkahndu bagi si iaturken Berita Si Meriah kerna Kristus e, gelah subuk aku reh ndahi kam ntah lang, tetap kubegi ersada ukurndu dingen ersada arihndu i bas mpertahanken kiniteken si turah erkiteken Berita Si Meriah. ²⁸ Ola kam mbiar nandangi imbang-imbangndu; piherkenlah ukurndu. E me tanda man bana maka bene me ia janah selamat me kam. Sabap Dibata kap si mereken keterkelinen e man bandu. ²⁹ Dibata enggo mereken kesempaten man bandu guna erdahin man Kristus, labo saja gelah kam tek man Kristus, tapi pe gelah kam ngenanami kiniseran guna Ia. ³⁰ Genduari banci kam ikut ras aku i bas perbeben e. Perbeben e bali ras perbeben si iidahndu kunanami nai, dingen si ibegindu kunanami denga genduari.

¹ Kegeluhenndu i bas Kristus erbahanca kam megegeh. Ma kin keleng ateNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna? ² Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu. ³ Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban. ⁴ Ola keperlunndu saja ngenca iperdiatekenndu tapi perdiateken pe keperlun kalak si deban. ⁵ Perukurenndu bali min ras perukuren Kristus Jesus: ⁶ Aminna gia tetap lit i bas Ia biak Dibata, erkuasa dingen ermulia Ia bali ras Dibata, tapi si enda la ipertahankenNa. ⁷ Arah ukurna jine itadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma. ⁸ Meteruk ukurNa, janah erkemalangen Ia man Dibata seh matena pe; e me mate i kayu persilang. ⁹ Erkiteken si e ipehaga Dibata kal Ia. Ibereken Dibata man baNa kuasa si meganjangna kal. ¹⁰ Gelah kerina si enggeluh i Surga, i babo doni ras i teruh doni erjimpuh nembah man baNa. ¹¹ Janah ngakuken maka Jesus Kristus e tuhu-tuhu Tuhan, guna kemulian Dibata Bapa. ¹² E maka, o teman-temanku, bagi tetap ikutkenndu katangku, asum aku ras kam, terlebih pe genduari ikutkenlah katangku asum aku ndauh i bas kam nari. Tetaplah erdahin alu mbiar dingen gentar enggenepi keselamatenndu. ¹³ Sabap Dibata pe tetap erdahin i bas kam gelah kam nggit dingen ngasup ndalanken si ngena ateNa. ¹⁴ Dahikenlah kerina dahin alu la jungut-jungut ntah nimbak. ¹⁵ Gelah kam la ersalah dingen la erpandangen selaku anak-anak Dibata si serta si nggeluh i bas doni kalak si jahat dingen erdosa. Ersinalsal min kam i tengah-tengahna bagi bintang-bintang nerangi langit. ¹⁶ Asum iberitakenndu Berita Kegeluhen e man bana. Adi bage ibahanndu lit pagi dalanna megah kuakap kerna kam i bas Wari Kristus reh mulihken, sabap si e nuduhkenca maka kerina usahangku ras pendahinku la sia-sia. ¹⁷ Banci jadi mambur me darehku jadi persembahen i babo persembahen si ipersembahkenndu man Dibata alu kinitekenndu. Adi bage meriah ukurku, janah kerina kam kubahan ngenanami keriahenku e. ¹⁸ Bage pe min kam, meriahlah min ukurndu, janah bahanlah maka aku pe ngenanami keriahenndu e. ¹⁹ Tek aku maka arah penampat Tuhan Jesus banci pedas kusuruh Timotius ndahi kam, gelah alu megi berita kerna kam reh tetapna ukurku. ²⁰ Timotius ngenca ngangka ukurku dingen si tuhu-tuhu nggit rukur kerna kam. ²¹ Kalak si deban ngukurken urusenna saja, labo dahin Jesus Kristus. ²² Kam jine pe ietehndu nge kuga Timotius enggo ncidahken kengasupenna, kuga ia ras aku, bagi sekalak anak ras bapa, ras-ras erdahin erkiteken Berita Si Meriah e. ²³ E maka ngarap aku maka banci minter ia kusuruh ndahi kam, kenca kueteh kuga pagi keputusen perkarangku. ²⁴ Tek aku maka alu penampat Tuhan, aku pe banci pagi minter reh ndahi kam. ²⁵ Perlu pe kuakap kusuruh seninanta Epaproditus ndahi kam, si enggo erdahin janah erjuang ras aku dingen enggo isuruhndu erdahin nampati aku. ²⁶ Mesikel kal ia jumpa ras kam kerina janah ndele atena sabap ibegindu berita kerna ia sakit. ²⁷ Tuhu sakit ia mbaru enda, janah menam pe mate. Tapi mekuah ate Dibata ia; janah labo saja ia, tapi aku pe mekuah ka nge ate Dibata, ipulahiNa aku i bas ceda ate si mbelin e nari. ²⁸ Reh tetapna ukurku nuruh ia ndahi kam gelah meriah mulihi ukurndu kenca kam jumpa ras ia, janah lesap pe ceda ateku. ²⁹ E maka meriahlah ukurndu ngalo-ngalo ia, bagi sekalak senina i bas Tuhan. ³⁰ Mehamatlah man kalak si bagi ia, sabap ia enggo ngasamken kesahna janah menam pe mate, erkiteken dahin Kristus, guna mereken penampat man bangku si la kam ngasup merekenca man bangku.

¹ Kedungenna, o senina-seninangku, meriahlah iakapndu erkiteken persadanndu ras Tuhan. Labo kuakap dalih ngulihisa kai si enggo kusuratken man bandu, janah tama ngenana man bandu. ² Metengetlah nandangi kalak si ndalanken perbahanen-perbahanen si jahat, e me biang, si tetap mpertahanken undang-undang sunat. ³ Sabap kita me si enggo ngaloken sunat si tuhu-tuhu, labo ia; sabap kita nembah man Dibata arah Kesah Dibata, janah meriah i bas kegeluhenta erkiteken kita nggeluh i bas persadan Kristus Jesus. Kita labo ernalem nandangi adat-adat si teridah. ⁴ Tentu saja aku pe banci nge ernalem man barang-barang si bage. Adi lit kalak erpengakap maka banci ia ernalem nandangi adat-adat si teridah, bancin aku erpengakap bage. ⁵ Aku isunatken asum umurku waluh wari. Aku tubuh selaku kalak Israel, suku Benyamin, janah kalak Heber asli me aku. Kerna ndalanken Undang-undang, kalak Parisi kap aku. ⁶ Janah perbahan tutusna ateku ndalanken Undang-undang e, kugasgasi pe gereja. Bicara sekalak jelma banci rembak ras Dibata arah ndalanken Undang-undang aku me si labo pernah ersalah. ⁷ Tapi kerina si nai kuakap untung, genduari kinirugin kuakap erkiteken Kristus. ⁸ Labo kerna si e saja, tapi kai pe kinirugin kuakap rimbangken si meherga e, e me penandai kerna Jesus Kristus Tuhanku. Erkiteken Kristus, enggo kuambekken kerinana, janah kupedirep si e kerina sampah-sampah, gelah banci kudat Kristus dingen. ⁹ Tuhu-tuhu ersada aku ras Ia. Lanai bo kuusahaken ngerembakken diringku man Dibata arah ndalanken Undang-undang. Tapi aku enggo rembak ras Dibata arah kinitekenku man Kristus. Dibata jine si enggo ngerembakken aku kempak diriNa erkiteken kinitekenku. ¹⁰ Sada ngenca sura-surangku e me gelah kutandai Kristus dingen kugejap kuasa kekekenNa janah ikut aku ngenanami kiniseranNa, dingen bali ras Ia i bas kematenNa, ¹¹ alu pengarapen maka aku ipekeke Dibata i bas si mate nari ku kegeluhen. ¹² Labo kukataken maka aku enggo ndatken si enda ntah pe enggo serta. Aku tetap erpala-pala guna ndatken pemere si enggo isikapken Kristus Jesus. Guna si e me aku iteguNa janah ijadikenNa jadi sikerajangenNa. ¹³ Situhuna o senina-senina, labo aku erpengakap maka enggo aku ndatken pemere e. Tapi sada ngenca si kubahan, e me ngelupaken kai si arah pudingku janah erpala-pala ndatken si arah lebe. ¹⁴ E maka pinter aku kiam ku tujun guna ndatken pemere e, e me pendilo Dibata guna kegeluhen i Surga, si ipesehNa man bangku arah Kristus Jesus. ¹⁵ Kerina kita si enggo mbages erkiniteken man Jesus Kristus bage min perukurenta. Tapi adi lit i bas kam si la bage perukurenna, Dibata me pagi mpetangkassa man bandu. ¹⁶ Kai gia jadi, siteruskenlah ngikutken usihen si enggo siikutken seh genduari. ¹⁷ O, senina-senina tetaplah usih aku. Enggo itamaken kami kalak si man usihenndu, e maka perdiatekenlah kalak si enggo ngikutken usihen e. ¹⁸ Enggo megati si enda kukataken man bandu, janah genduari kuulihi alu iluh mambur: nterem kalak si kegeluhenna erbahanca ia perimbang ras kayu persilang Kristus. ¹⁹ Kalak si bage lawesna la banci lang kempak kebenen, sabap dibatana, e me peraten kulana. Megah iakapna i bas si patut iakapna mela, janah si iukurina kerna barang doni ngenca. ²⁰ Tapi kita, warga Surga kap. Genduari alu ate metedeh sitimai kerehen si Engkelini kita i Surga nari, e me Tuhanta Jesus Kristus. ²¹ IsalihkenNa me pagi kulanta si kote dingen si ermasap-masap enda, jadi bali ras kulaNa si mulia. Si e banci ilakokenNa erkiteken i bas Ia lit kuasa guna ngelakoken si e kerina.

¹ Dage, o senina-seninangku si kukelengi, bagendalah min tetap pergeluhndu jadi kalak Kristen. Keleng kal ateku kam janah tedeh pe ateku! Malem kal ateku ibahanndu janah tuhu-tuhu megah kuakap kerna kam! ² O Eiodia ras Sintike, mindo aku gelah ersadalah min arihndu bagi si ersenina i bas Tuhan. ³ Janah kam pe o temanku sada dahin si tutus, sampatilah diberu enda duana. Sabap duana ia enggo latih erdahin ras aku i bas meritaken Berita Si Meriah e, bage pe ras Klemen ras kerina temanku si deban, si gelarna kerina lit tersurat i bas Kitap Kegeluhen. ⁴ Meriahlah min akapndu katawari pe erkiteken persadanndu ras Tuhan. Sekali nari kukataken: Meriahlah! ⁵ Cidahkenlah perbahanenndu si mehuli man ise pe. Tuhan pedas me reh. ⁶ Ola aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur. ⁷ Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Jesus. ⁸ Kedungenna o senina-seninangku, ukurilah kerna si mehuli, e me kerna si bujur, mulia, benar, bersih, mejile ras kerna kerina si patut ipuji. ⁹ Dalankenlah kai si enggo ipelajarindu dingen ialokenndu i bas aku nari, subuk arah pengeranangku bage pe arah perbahanenku. Janah Dibata si mereken kemalemen ate man banta nemani kam gelah. ¹⁰ Mbelin kal keriahen si kugejapken i bas geluhku erkiteken persadanku ras Tuhan. Kenca bage dekahna, lit ka kesempatenndu sekali nari ncidahken maka iperdiatekenndu kap aku. ¹¹ Labo maksudku maka lanai aku iperdiatekenndu, saja lanai kin lit kesempatenndu ncidahkenca. Janah si enda kukataken labo erkiteken kugejap maka aku lanai iperdiatekenndu; sabap aku enggo erlajar encukupken alu kai si lit i bas aku. ¹² Kueteh nge kai ertina nggeluh i bas kekurangen, janah kai ertina nggeluh i bas kelebihen. Enggo dat aku rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen. ¹³ Ngasup aku ngalaken kerina keadan erkiteken kuasa si ibereken Kristus man bangku. ¹⁴ Tapi mehuli kal perbahanenndu nampati aku, asum aku i bas kiniseran. ¹⁵ Kam o kalak Pilipi, ietehndu kal kap maka asum kutadingken Makedoni, asum tangtangna kuberitaken Berita Si Meriah kam ngenca perpulungen si nampati aku. Kam ngenca ikut ngenanami untung bage pe rugingku. ¹⁶ Asum perlu aku penampat i Tesalonika la sekali ngenca ikiremkenndu penampat. ¹⁷ Labo saja ateku ngaloken pemere-pemere e, tapi si kuarapken e me ngidah perkiran untungndu itambahi. ¹⁸ Enda dage tandana i bas aku nari maka enggo kualoken kerina si enggo iberekenndu man bangku. Janah lebih pe asa si kuperluken. Genduari enggo cukup kerina keperlunku, e me kenca ibaba Epaproditus kerina pemere-pemerendu. Pemere-pemerendu e jadi sada persembahen si merim man Dibata, persembahen si ialokenNa dingen si ngena ateNa. ¹⁹ Dibatangku si simpar alu kebayaken si lit i bas Kristus Jesus mereken kerina keperlunndu. ²⁰ Terpujilah Dibata Bapanta seh rasa lalap! Amin. ²¹ Kataken mejuah-juah i bas aku nari man kerina anak-anak Dibata si lit i bas persadan ras Kristus Jesus. Senina-senina si i jenda ras aku mpeseh salam man bandu. ²² Kerina anak-anak Dibata si i jenda ngataken mejuah-juah, terlebih-lebih si ringan i istana Kaisar. ²³ Lias ate Tuhan Jesus Kristus ras kam kerina gelah.