MARKUS

MARKUS

¹ Enda me Berita Si Meriah kerna Jesus Kristus Anak Dibata. ² Ibenaken sue ras si isuratken Nabi Jesaya, "Nina Dibata, ’Nehenlah, Kusuruh persuruhenKu leben asa Kam, ia me si nikapken dalan man baNdu.’ ³ Lit sekalak si erlebuh i taneh si mesawang, ’Pesikaplah dalan man Tuhan; pepinter dalanNa!’ " ⁴ Sue ras si tersurat e, reh me Johanes Peridiken ku taneh si mesawang. Iperidikenna kalak janah ipesehna berita ibas Dibata nari nina, "Jeralah, maka kam iperidiken, gelah dosa-dosandu ialemi Dibata." ⁵ E maka kerina jelma i taneh Judea ras i kota Jerusalem reh megiken Johanes. Iakukenna dosana janah iperidiken Johanes ia i bas Lau Jordan. ⁶ Paken Johanes e me kap: jubahna ibas mbulu unta nari, genditna ibas kuling-kuling nari, nakanna labang ras tengguli kerangen. ⁷ Ikatakenna pe man kalak ndai nina, "Reh me sekalak si lebih erkuasa asangken aku. Mungkuk ngosari tinali sepatuna pe aku la metunggung. ⁸ Aku, mperidiken kam alu lau, tapi Ia pagi, mperidiken kam alu Kesah Si Badia." ⁹ La ndekahsa kenca si e, reh Jesus i Nasaret taneh Galilea nari. Ia pe iperidiken Johanes i bas Lau Jordan. ¹⁰ Ndarat kenca Jesus ibas lau nari, rempet idahNa langit talang, janah Kesah Si Badia nusur ku baboNa bagi nderapati. ¹¹ Terbegi pe sora i Surga nari, "Kam kap AnakKu si Kukelengi, Kam kap si ngena ateKu." ¹² Kenca si e minter Ia ibabai Kesah Si Badia ku taneh si mesawang. ¹³ Dekahna Ia i je lit empat puluh wari. I je me Ia icubai si Iblis. I bas ingan e, melala pe rubia-rubia si meliar. Tapi malekat-malekat reh nampati Ia. ¹⁴ Kenca Johanes Peridiken ipenjaraken, lawes Jesus ku Galilea. IberitakenNa Berita Si Meriah si rehna ibas Dibata nari nina, ¹⁵ "Enggo seh paksana maka reh me Kinirajan Dibata! Jeralah, janah teklah nandangi Berita Si Meriah!" ¹⁶ Sanga Jesus erdalan arah tepi Dano Galilea, idahNa dua kalak penjala nurung sangana njala. Gelarna Simon ras Andreas; duana ia sembuyak. ¹⁷ Nina Jesus man si dua kalak e, "Mari ikutken Aku, maka Kuajari kam jadi penjala jelma." ¹⁸ Minter itadingkenna jalana janah ikutkenna Jesus. ¹⁹ La ndauhsa Jesus erdalan idahNa ka dua kalak si ersembuyak, e me Jakup ras Johanes anak Sebedeus, sanga nikapken jalana i bas perahuna. ²⁰ Minter idilo Jesus duana. E maka itadingkenna bapana Sebedeus ras kalak upahen i bas perahuna jenari ikutkenna Jesus. ²¹ Seh ia kerina i kota Kapernaum. Asum wari Sabat kalak Jahudi minter lawes Jesus ku rumah pertoton jenari ibenakenNa ngajar. ²² Ia ngajar la bali ras guru-guru agama. Ia ngajar alu kuasa. E maka mamang ate kalak si megi pengajarenNa. ²³ Paksa si e reh sekalak setanen ku bas rumah pertoton janah serko ia nina, ²⁴ "Man kadendu kin kami o, Jesus kalak Nasaret? Reh ateNdu munuh kami kin? Kueteh nge ise Kam. Kam me si Badia ibas Dibata nari!" ²⁵ Isergangi Jesus setan ndai nina, "Sinik! Ndaratlah ibas ia nari!" ²⁶ Idampes-dampesken setan e si setanen ndai, e maka ndarat setan e ibas ia nari janahna serko. ²⁷ Kerina kalak kemamangen. Si sungkun-sungkunen ia sapih-sapih ia nina, "Kai kin enda ndia? Pengajaren si mbaru? I bas Ia lit kuasa. IpelawesNa setan-setan, janah setan-setan ngikutken kataNa!" ²⁸ E maka berita kerna Jesus pedas mbar ku belang-belang taneh Galilea. ²⁹ Jesus ras ajar-ajarNa nadingken rumah pertoton, lawes ku rumah Simon ras Andreas, ikut pe Jakup ras Johanes. ³⁰ Mami Simon ampar i bas ingan medem perbahan sakit. Kenca seh Jesus i rumah, minter seh baNa berita enda. ³¹ Idahi Jesus mami Simon ndai, ijemakNa tanna, e maka ipekekeNa, janah minter malem penakitna. Jenari kuskas mami Simon ngelai Jesus ras kalak ndai kerina. ³² Kenca sundut matawari enggo, nandangi gelap, ibaba kalak man Jesus kerina si penakiten ras si setanen. ³³ Kerina anak kuta e pulung i lebe-lebe rumah ndai. ³⁴ Erbage-bage penakit jelma si nterem ipepalemNa, janah setan-setan pe ipelawesNa. La ipediat Jesus pe setan-setan e ngerana, sabap ieteh setan-setan ise Ia. ³⁵ Pepagina erpagi-pagi si lampas ope denga terang wari keke Jesus lawes Ia ku ingan si melenget. I je ertoto Ia. ³⁶ Tapi Simon ras teman-temanna lawes ndarami Ia. ³⁷ Kenca jumpa nina man Jesus, "Kerina kalak ndarami Kam." ³⁸ Erjabap Jesus, "Kita arus berkat ku kuta-kuta si deban, i taneh Galilea enda, gelah i je pe Kuberitaken ka Berita Si Meriah. Sabap guna si e kap maka Aku reh." ³⁹ E maka isiari Jesus kerina kuta-kuta i Galilea. Ngajar Ia i bas rumah pertoton kalak Jahudi janah ipelawesNa setan-setan. ⁴⁰ Reh me sekalak gadamen ndahi Jesus, nembah erjimpuh i lebe-lebe Jesus mindo perkuah ateNa nina, "Bicara nggit Kam, ngasup kap Kam pepalem aku." ⁴¹ Mekuah ate Jesus idudurkenNa tanNa janah ijemakNa kalak gadamen ndai jenari nina Jesus man bana, "Nggit Aku, malemlah kam." ⁴² Minter malem gadamna janah mejelis pe dagingna. ⁴³ Jenari isuruh Jesus ia lawes janah ipedahiNa, ⁴⁴ "Jaga, ola turiken man ise pe kerna si enda. Tapi laweslah, cidahken bandu man imam. Gelah tek kalak maka kam enggo malem, bahan persembahenndu bagi isuruh Musa." ⁴⁵ E maka lawes kalak si enggo malem ndai. Tapi la tergengkenca sinik. Ku ja ia lawes, i je iturikenna kerna Jesus si pepalem ia. Perbahan si e, lanai terang-terangen Jesus reh ku bas sada-sada kuta. E maka i bas ingan si melenget Ia. Bage gia rehen nge kalak i ja nari pe ndahi Ia.

¹ Kenca lepas piga-piga wari mulihken Jesus ku Kapernaum. Minter mbar berita maka Ia i rumah. ² E maka nterem jelma rehen seh maka rumah ndai enggo picet. I lebe-lebe pintun pe nterem jelma. Sanga Jesus ngajar, ³ reh empat kalak dilaki ngelanja sekalak si pangpangen. ⁴ Perbahan picetna rumah, lanai lit dalan naruhken si pangpangen e man Jesus. E maka italangi si empat kalak ndai tarum rumah ibabo ingan Jesus. Kenca talang, itantanna kalak si pangpangen e ras tilamna ku teruh. ⁵ Ngidah belinna kiniteken kalak enda nina Jesus man si pangpangen ndai, "O, anakKu, dosandu enggo ialemi." ⁶ Piga-piga guru agama si kundul i je nungkun i bas ukurna, ⁷ "Engkai maka bage kal pangna Ia ngerana? Ia encekuraki Dibata. Ise pe labo ngasup ngalemi dosa, seakatan Dibata." ⁸ Minter ieteh Jesus perukuren kalak enda, e maka nina Jesus man bana, "Engkai maka bage perukurenndu? ⁹ Apai kin sukahen ngatakenca man kalak si pangpangen enda: ’Dosandu enggo ialemi,’ asangken, ’Kekeken, angkat tilamndu, erdalanlah?’ ¹⁰ Kucidahken pe man bandu, maka lit kuasa i bas Anak Manusia persuruhen Dibata guna ngalemi dosa i doni enda." E maka nina Jesus man kalak si pangpangen ndai, ¹¹ "Kukataken man bandu, kekeken, angkat tilamndu, jenari mulihlah ku rumahndu!" ¹² Sanga si e minter ia keke i lebe-lebe jelma si nterem, janah iangkatna tilamna jenari berkat ia. Mamang kal ate kalak ngidahsa. E maka ipujina Dibata nina, "Langa pernah idah kami kejadin si bagenda!" ¹³ Lawes ka Jesus ku tepi Dano Galilea. Kalak si nterem reh ndahi Ia. E maka ibenakenNa ngajar. ¹⁴ Kenca Jesus erdalan ka ibas ingan si ndai nari, idahNa sekalak pengalo cuke, gelarna Lewi anak Alpeus, kundul i bas kantorna. E maka nina Jesus man bana, "Ikutken Aku." Minter keke Lewi ikutkenna Jesus. ¹⁵ Sekali jadi, man Jesus ras ajar-ajarNa i rumah Lewi. Nterem pengalo cuke ras kalak perdosa reh ngikutken Jesus. Janah nterem ibas kalak e nari man nemani Jesus ras ajar-ajarNa. ¹⁶ Piga-piga guru agama kalak Parisi ngidahsa. E maka isungkunna ajar-ajar Jesus nina, "Engkai maka Ia man dingen minem ras pengalo cuke bage pe ras kalak perdosa e?" ¹⁷ Penungkunen enda ibegi Jesus e maka ijabapNa, "Kalak sakit nge si perlu dokter, labo kalak sehat. Aku reh labo guna ndilo kalak si bujur akapna bana tapi guna ndilo kalak perdosa." ¹⁸ Sekali jadi sanga ajar-ajar Johanes Peridiken ras kalak Parisi erpuasa, reh kalak nungkun man Jesus nina, "Engkai maka ajar-ajarNdu la erpuasa, sedangken ajar-ajar Johanes Peridiken ras kalak Parisi erpuasa?" ¹⁹ Erjabap Jesus nina, "Metunggung kin akapndu adi temue i bas kerja erdemu bayu erpuasa? Tentu lang. Sanga ia ras si empo denga tentu la ia erpuasa. ²⁰ Tapi lit masana maka sirang ia ras si empo. I bas paksa si e pagi erpuasa ia. ²¹ La lit kalak ngerangkapi uis si enggo buruk alu uis si mbaru. Sabap adi bage ibahanna maka reh belangna rigat uis si buruk ndai. ²² Bage pe labo itamaken kalak lau anggur si mbaru ku bas tambe kuling-kuling si enggo male, gelah ola pecah tambe ndai. Sabap adi bage ibahanna sia-sia anggur ras tambe ndai. Si mehulina min anggur si mbaru itamaken ku bas tambe kuling-kuling si mbaru!" ²³ Sekali jadi, sanga wari Sabat kalak Jahudi, Jesus ras ajar-ajarNa mentas arah juma gandum. Janahna erdalan iputikken ajar-ajar ruhi gandum e. ²⁴ E maka nina kalak Parisi man Jesus, "Nehenlah! Ajar-ajarNdu ngelanggar Undang-undang agamanta. Ibahanna kai si la banci ilakoken i bas wari Sabat." ²⁵ Ngaloi Jesus, "Langa kin pernah iogendu kuga perbahanen Daud sanga ia ras teman-temanna ibas kepiceten ras kelihen? ²⁶ Kejadin e paksa Abiatar jadi Imam si Mbelin. Bengket Daud ku bas rumah Dibata janah ibuatna roti si ipersembahken man Dibata. Rikutken Undang-undang imam-imam ngenca banci man roti e. Tapi e me ipan Daud janah iberekenna pe man teman-temanna." ²⁷ Tole nina Jesus man kalak ndai, "Wari Sabat iaturken guna manusia. Labo manusia guna wari Sabat. ²⁸ Jadi Anak Manusia si isuruh Dibata pe erkuasa nandangi wari Sabat."

¹ E maka bengket ka Jesus ku rumah pertoton kalak Jahudi. I je lit sekalak si sembelah tanna enggo kesip perban mate serapen. ² I bas si pulung e lit piga-piga kalak si ndaram-ndarami kesalahen Jesus gelah banci iaduken. E maka terus iperdiatekenna Jesus ntah ipepalemNa kin kalak i bas wari Sabat. ³ Nina Jesus man si mate serapen tanna ndai, "Mari tedis kam i lebe enda!" ⁴ E maka isungkun Jesus kalak ndai nina, "Rikutken agama, kai kin banci ibahan i bas wari Sabat? Erbahan si mehuli ntah si jahat? Nampati geluh manusia ntah munuhsa?" Tapi sinik saja kalak ndai. ⁵ Merawa Jesus, ipernehenNa jelma sekelewetNa. Tapi ceda ka ateNa ngidah perukuren kalak Parisi ndai. E maka nina man si mate serapen tanna ndai, "Pepinter tanndu." Ipepinterna tanna janah minter malem. ⁶ Jenari lawes kalak Parisi, ijumpaina piga-piga kalak Herodiani. Arih-arih ia guna munuh Jesus. ⁷ Jesus ras ajar-ajarNa lawes ku Dano Galilea janah nterem jelma ngikutken Ia. ⁸ Jelma si nterem enda ndai reh i Galilea nari, i Judea nari, i Jerusalem nari, i Idumea nari, i lepar Lau Jordan nari ras kuta-kuta deherken Tirus ras Sidon nari. Kalak si nterem e reh ndahi Jesus sabap ibegina berita kerna perbahanen Jesus. ⁹ Perbahan seh kal teremna jelma si reh e, e maka isuruh Jesus ajar-ajarNa nikapken sada perahu guna Ia. Alu bage jelma si nterem lanai ngasak-ngasak ku Ia. ¹⁰ Sabap enggo nterem jelma ipepalemNa, e maka kerina kalak si penakiten siasak-asaken ndahi Jesus, atena njemak Jesus gelah malem penakitna. ¹¹ Bage pe adi lit kalak si setanen ngidah Jesus, minter ia reh, iguling-gulingna bana i lebe-lebe Jesus janahna serko nina, "Kam kap Anak Dibata!" ¹² Tapi alu mesangat ilarang Jesus kalak nuriken ise kin Ia. ¹³ E maka lawes Jesus ku das uruk-uruk, janah idiloNa kalak rikutken si payo iakapNa. Kalak enda ndai reh ndahi Jesus. ¹⁴ E maka itetapken Jesus sepuluh dua kalak jadi Rasul. Nina Jesus man si sepuluh dua kalak ndai, "Kam enggo Kupilih gelah ras Aku. Kusuruh kam ngajar, ¹⁵ janah lit kuasandu mpelawes setan-setan." ¹⁶ Enda me gelarna si sepuluh dua kalak si ipilih Jesus; Simon (igelari Petrus), ¹⁷ Jakup ras seninana Johanes anak Sebedeus (duana ia igelari Jesus si Boanergis, ertina, "Anak lenggur"). ¹⁸ Andreas, Pilipus, Bartolomeus, Matius, Tomas, Jakup anak Alpeus, Tadius, Simon Pejuang, ¹⁹ janah Judas Iskariot, si ndayaken Jesus. ²⁰ Kenca Jesus mulih ku rumah, minter ka pulung jelma si nterem, seh maka lanai sempat Jesus ras ajar-ajarNa man. ²¹ Sanga ibegi keluarga cakap maka Ia lanai sehsa, e maka reh ia ngelegi Jesus. ²² Guru-guru agama si reh i Jerusalem nari ngatakenca maka i bas Ia lit Balsebul. "Pengulu setan e nge si mereken kuasa man baNa maka terpelawesNa setan-setan," nina. ²³ E maka idilo Jesus kalak ndai, jenari iturikenNa piga-piga perumpaman nina, "Kuga banci setan pelawesken setan? ²⁴ Adi i bas sada negara lit perubaten ras perpecahen tentu la ndekah umur negara ndai. ²⁵ Bage pe adi i bas sada jabu turah rusur perubaten, tentu la ndekah umur jabu e. ²⁶ Jadi adi kerajan setan erbelah-belah tentu lanai ia erkuasa, janah enggo seh pe kedungenna. ²⁷ Ise pe labo ngasup bengket ku bas rumah kalak si megegeh guna ngerampasi erta-ertana, pala iketna lebe kalak si megegeh ndai, e maka banci irampasina. ²⁸ Ingetlah! Kerina dosa-dosa ras cakap si ncekuraki Dibata banci ialemi Dibata. ²⁹ Tapi kalak si nimbak Kesah Si Badia asa ndigan pe la ialemi. Sabap enggo ibahanna dosa si rasa lalap." ³⁰ Enda ikataken Jesus sabap piga-piga enggo ngatakenca maka Ia keseluken setan. ³¹ E maka reh nande Jesus ras senina-seninaNa. Isuruhna kalak ku rumah ndilo Jesus, janah ia kerina nimai i darat. ³² Ikataken kalak si nterem si kundul i kelewet Jesus e man baNa nina, "Ah nandeNdu ras senina-seninaNdu i darat, Kam atena." ³³ Erjabap Jesus nina, "Ise kin nandengKu? Ise kin seninangKu?" ³⁴ Ipernehen Jesus kerina kalak si kundul i kelewetNa jenari nina, "Nehenlah! Enda me nandengKu ras seninangKu! ³⁵ Ise si nehken peraten Dibata, ia me seninangKu, turangKu ras nandengKu."

¹ Ngajar ka Jesus mulihi i tepi Dano Galilea. Perbahan teremna jelma reh, e maka inangkihNa sada perahu si lit i je ngadi-ngadi. I bas perahu ndai me Jesus kundul janah ngajar. Kalak si nterem tedis i tepi dano. ² Melala pengajaren iajarkenNa man kalak ndai alu perumpaman. Nina i bas pengajarenNa, ³ "Begikenlah! Lit me sekalak perjuma, lawes ku juma ngambur benih. ⁴ Sanga ia ngambur benih deba ndabuh ku dalan. E maka reh perik-perik manganisa seh keri. ⁵ Deba ka ndabuh ku taneh si erbatu-batu. Perbahan la mbages tanehna e maka pedas turah benih ndai. ⁶ Tapi kenca iparpari las matawari minter melus dingen kerah, sabap la mbages uratna. ⁷ Lit ka ndabuh kempak peren duri. Peren duri ndai pedas perturahna janah iasakna benih si enggo turah e seh maka la banci erbuah. ⁸ Tapi deba ndabuh ku taneh si mehumur. Mejile perturahna, janah erbuah pe. Lit deba buahna telu puluh kali lipat, deba enem puluh, janah lit ka pe seratus kali lipat." ⁹ E maka idungi Jesus pengajarenNa nina, "Begikenlah adi lit kin cupingndu." ¹⁰ Sanga Jesus serap sisada, reh ajar-ajarNa si sepuluh dua kalak ras piga-piga kalak si megi perumpaman ndai ndahi Ia. Jenari isungkunna Jesus kerna maksud ras tujun perumpaman ndai. ¹¹ Erjabap Jesus nina, "Man bandu enggo ibereken rahasia Kinirajan Dibata. Tapi kalak si deban si i darat, ibegikenna kerina alu perumpaman saja, ¹² e maka, ’Aminna gia ipernehenna, tapi labo idahna, aminna gia ibegina, tapi labo iangkana. Sabap adi idahna janah iangkana tentu jera ia janah Dibata ngalemi ia.’ " ¹³ Jenari isungkun Jesus kalak ndai nina, "La kin iangkandu perumpaman enda? Adi lang kuga ka banci iangkandu perumpaman si deban? ¹⁴ Si ngambur benih e kalak si meritaken berita ibas Dibata nari. ¹⁵ Mawen-mawen berita e ndabuh ku dalan e me kalak si megi berita e, i je ibegina, i je ka minter ibuat Iblis ibas ia nari Berita si enggo iamburken i bas ia e. ¹⁶ Berita si ndabuh ku taneh si erbatu-batu e me perumpaman kerna kalak si megi berita e, minter ialokenna alu meriah ukur. ¹⁷ Tapi kentisik ngenca, sabap berita e la rurat i bas ia. Reh kenca kiniseran ntah iayak-ayak kalak ia perbahan Berita e, minter ia murtad. ¹⁸ Berita si ndabuh ku bas peren duri e me perumpaman kerna kalak si megi Berita e, ¹⁹ kearun kerna geluh enda, bage pe erkiteken kebayaken nipu ia, ras erbage-bage sura-sura si deban ngasak Berita e seh lanai erbuah. ²⁰ Berita si iamburken ku taneh si mehumur e me perumpaman kalak si megikenca, ialokenna Berita e, erbuah pe. Lit telu puluh, lit enem puluh janah lit ka pe seratus kali lipat buahna." ²¹ Tole nina Jesus, "Pernah kin isagani kalak lampu jenari itutupi alu tumba ntah pe itamana ku teruh ingan medem? Ma kin itamakenna ku datas nahe pertendangen? ²² Kerina si terbuni teridah nge pagi, janah kerina rahasia tangkas kap pagi. ²³ Begikenlah, adi lit kin cupingndu!" ²⁴ Ikataken Jesus pe man kalak ndai, "Ukurkenlah kai si ibegindu! Sukat-sukat si ipakendu man kalak si deban, e ka nge ipake man bandu, janah ibereken pe tambahna. ²⁵ Kalak si lit i bas ia itambahi man bana, tapi kalak si la lit i bas ia, si sitik i bas ia e pe ibuat ibas ia nari." ²⁶ Iterusken Jesus ngerana nina, "Kinirajan Dibata banci iandingken ras sekalak si ngambur benih i jumana. ²⁷ Paksa berngi tunduh ia; suari idahina dahinna. Kidekah si e benih ndai ersuli, turah pe. Tapi kuga carana turah labo ieteh perjuma ndai. ²⁸ Mahan bana taneh enda mereken ulihna. Tangtangna ersuli, jenari ertangke, kenca bage maka erbuah. ²⁹ Kenca metua buahna ndai, mulai isabina sabap paksa rani enggo seh." ³⁰ Nina Jesus, "Bagi kai kin Kinirajan Dibata banci iandingken? Kai contohna banci si pake guna nerangkenca? ³¹ Kinirajan e bali ras benih sawi, e me benih si kitikna si isuanken i bas taneh. ³² Tapi kenca isuan turah me ia janah belinen asangken kerina gule-gulen. Lit dahan-dahanna seh maka perik-perik pe banci rasar i teruh bulungna si mbur." ³³ Alu perumpaman-perumpaman si bagenda me Jesus meritaken Berita ibas Dibata nari. Iajarken Jesus bagi ngasupna kalak ndai ngertikenca. ³⁴ Adi la arah perumpaman labo kai pe ituriken Jesus man kalak si nterem. Tapi adi man ajar-ajarNa iturikenNa kerina. ³⁵ Karaben i bas wari si ndai nina Jesus man ajar-ajarNa, "Ota ku lepar ah." ³⁶ E maka itadingken kalak ndai jelma si nterem. Inangkihi ajar-ajar perahu si enggo idatasi Jesus janah berkat ia ras. Perahu-perahu si deban pe lit i je. ³⁷ - ³⁸ Jesus arah pudi i bas perahu e, iamparkenNa takalNa i babo bantal jenari tunduh Ia. Paksa e rembus angin meter ras galumbang si merawa. Iombang-ambingkenna perahu e, dingen lau pe bengket ku bas. E maka ingeti ajar-ajar me Jesus nina, "O Guru, la kin kutera pe ukurndu amin bene pe kita?" ³⁹ Keke Jesus, isergangiNa lau ras angin ndai nina, "Sinik!" Jenari nina man lau, "Jenenglah!" E maka minter angin ndai ngadi, janah lau ndai pe enggo jeneng kal. ⁴⁰ Jenari nina Jesus man ajar-ajarNa, "Engkai maka kam mbiar kal? Langa kin kam tek?" ⁴¹ Reh biarna pe kalak ndai nina sapih-sapih ia, "Ise kin ndia Ia, maka angin ras galumbang ngikutken kataNa?"

¹ Seh me kalak ndai i lepar Dano Galilea daerah kalak Geraseni. ² Nusurkenca Jesus i perahu nari, minter reh sekalak jelma i kuburen nari. ³ Si reh e setanen janah ringan i kuburen-kuburen. ⁴ Enggo piga-piga kali igariken tanna ras nahena alu rante besi, tapi icedakenna ras iretapina rante e. Perbahan seh kal gegehna, ise pe la ngasup nangkap ia. ⁵ Suari ras berngi ia erdalan-dalan i kuburen ras ku das uruk-uruk. Nderkuh-nderkuh ia janah itemtemina bana alu batu. ⁶ Kenca idahna Jesus i dauh-dauh nari, kiam ia ndahi Jesus janah isembahna. ⁷ Alu sora megang nderkuh ia nina, "O Jesus Anak Dibata si Meganjang. Kuga ateNdu aku ibahanNdu? I bas gelar Dibata kupindo maka ola aku isiksaNdu." ( ⁸ Ikatakenna bagenda sabap enggo megati iperentahken Jesus man bana, "Setan, laweslah ibas ia nari.") ⁹ E maka isungkun Jesus ia nina, "Ise gelarndu?" Erjabap ia, "Gelarku si Meribu-ribu sabap nterem kami!" ¹⁰ Alu meseksek ipindo setan-setan e man Jesus gelah ola ia ipelawes ibas daerah e nari. ¹¹ I bas mbalmbal ture-ture deleng e lit me sada rarasen babi paksana nungke-nungke ndarami nakanna. ¹² Meseksek pemindon setan ndai man Jesus nina, "Suruh kami ku bas babi ah gelah iseluki kami ia." ¹³ E maka ibere Jesus bagi si ipindona. Lawes setan-setan e, jenari iselukina babi ndai. Babi si lebih kurang dua ribu e, minter kiamen janah megulang, ndabuhen ku dano, mate gedap kerina i je. ¹⁴ Kiam permakan babi ndai janah iturikenna berita e ku kuta-kuta ras ku dusun-dusun. E maka berkat kalak ngenehen si enggo jadi. ¹⁵ Idahina Jesus janah idahna kundul kalak si gelgel setanen e, ia enggo ruis janah enggo jore ukurna. ¹⁶ Mbiar pe kalak kerina. Ituriken kalak si enggo ngidah kejadin e man kalak si reh ndai kai si enggo jadi nandangi kalak si setanen e ras kerna babi-babi ndai. ¹⁷ E maka meseksek ipindo kalak ndai maka lawes min Jesus i bas daerah e nari. ¹⁸ Sanga Jesus nangkih perahu, kalak si setanen ndai mindo man Jesus gelah banci min ia ikut. ¹⁹ Tapi la ibere Jesus. IkatakenNa pe man bana, "Mulihlah ku rumahndu, ku tengah-tengah keluargandu, beritaken man bana kuga belinna perbahanen ras perkuah ate Tuhan man bandu." ²⁰ E maka lawes ia ku kerina daerah Dekapolis, iberitakenna kai si enggo ibahan Jesus man bana. Kerina kalak sengget megi berita e. ²¹ Lawes ka Jesus ngepari dano e. Kenca seh Ia i lepar, nterem jelma engkeleweti Ia. ²² Sanga Jesus i tepi dano e denga reh sekalak pengulu rumah pertoton, gelarna Jairus. Sanga idahna Jesus minter isembahna. ²³ Mindo ia alu meseksek nina, "Anakku si diberu sakit mekelek. Reh min Kam, tamaken tanNdu ku babona, gelah ola ia mate tapi gelah malem min." ²⁴ E maka lawes Jesus ras Jairus. Nterem jelma ngikutken Ia, janah siasak-asaken ndeheri Jesus. ²⁵ I bas jelma si nterem e lit sekalak diberu si enggo sepuluh dua tahun dekahna bluding rusur. ²⁶ Enggo nterem dokter si nambari ia, enggo keri pe duitna, amin bage pe la lit terakapna, tapi reh kelekna lalap. ²⁷ Berita kerna Jesus enggo ibegina, e maka reh ia ku tengah-tengah jelma si nterem e, idadapna uis Jesus i pudi nari. ²⁸ Sabap nina i bas ukurna, "UisNa lah gia kudadap, tentu malem penakitku." ²⁹ Kenca idadapna uis Jesus minter igejapna dareh ndai enggo ngadi. ³⁰ Minter ka pe ieteh Jesus, maka lit kuasa ndarat ibas Ia nari. E maka itulihkenNa kempak jelma si nterem janah nungkun nina, "Ise ndadap uisKu?" ³¹ Erjabap ajar-ajarNa, "Ma idahNdu kuga teremna jelma si asak-asaken ndeheri Kam? Engkai maka isungkunNdu ise si njemak uisNdu?" ³² Tapi ipepayo Jesus sekelewetNa ndarami kalak si enggo ndadapsa ndai. ³³ Sabap ieteh diberu ndai kai si enggo jadi man bana, e maka mbiar janah nggirgir ia. Idahina Jesus, isembahna terus ku naheNa, janah iturikenna kerina kai si enggo jadi. ³⁴ Nina Jesus man bana, "Malem penakitndu perbahan tek kam man bangKu. Mulihlah alu meriah ukur, lanai bo mulihken penakitndu." ³⁵ Sanga Jesus ngerana denga reh piga-piga kalak si erlegi i rumah Jairus nari. Nina man Jairus, "Anakndu ndai enggo mate, man kai nari ngelatihi Guru ena?" ³⁶ Tapi la jadi soal man Jesus kai si ikataken kalak ndai. Nina man pengulu rumah pertoton, "Ola kam mbiar, tek sajalah." ³⁷ Jenari ise pe lanai ibere Jesus ikut selain Petrus, Jakup ras seninana Johanes. ³⁸ Tupung seh i rumah Jairus, idapeti Jesus lit gejek-gejek i je, janah ibegiNa sora tangis ras serko. ³⁹ Kenca Jesus seh i rumah nina man kalak ndai, "Engkai maka kam kerina serko ras tangis? Anak enda labo mate tapi tunduh saja nge ia!" ⁴⁰ Itawai kalak ndai Jesus. Kenca bage isuruh Jesus kalak si nterem ndarat. E maka idilo Jesus bapa ras nande anak ndai bage pe ajar-ajarNa si telu kalak ku bas kamar anak e. ⁴¹ E maka ijemak Jesus tan anak ndai, ikatakenna man bana nina, "Talitakumi," ertina, "O beru, Kukataken man bandu, kekeken!" ⁴² Minter keke anak ndai janah erdalan pe ia (sabap umurna enggo sepuluh dua tahun). Ngidah kejadin e sengget kalak kerina. ⁴³ Tapi ipedahi Jesus, gelah ola iturikenna man ise pe. Jenari nina Jesus, "Bere man ia."

¹ Itadingken Jesus ingan e, mulih ia ku kutaNa. Ikut pe ajar-ajarNa. ² Sanga wari Sabat ibenaken Jesus ngajar i bas rumah pertoton. Kalak si nterem si megi pengajarenNa kemamangen, nina, "I ja nari nge pemetehNa e? Kepentaren kai nge si lit i bas Ia? Kuga banci tanda sengget si bagenda jadi arah tanNa? ³ Ma kin Ia tukang kayu, anak Maria, senina Jakup, Joses, Judas ras Simon? Ma i jenda kin turangNa pe?" E maka itulak kalak ndai Jesus. ⁴ Nina Jesus man kalak e, "Sekalak nabi ipehaga i japa pe, tapi adi ikutana, i tengah-tengah keluargana ras i tengah-tengah jabuna, lang." ⁵ I Nasaret e, Yesus la erbahan sada tanda sengget pe, seakatan pepalem piga-piga kalak sakit alu namaken tanNa ku babona. ⁶ Mamang kal ate Jesus sabap la lit kiniteken kalak ndai. Jenari lawes Jesus ngajar ku kuta-kuta sekelewet Nasaret. ⁷ IdiloNa ajar-ajar si sepuluh dua, janah isuruhNa dua-dua kalak sendalanen. IberekenNa man ajar-ajar e kuasa pelawesken setan, ⁸ janah ipedahiNa nina, "Ola kai pe baba i bas perdalanndu seakatan ciken. Ola baba roti, ntah gajut-gajut, ntah duit i bas kantongndu. ⁹ Banci kam erselop, tapi ola dua lapis bajundu." ¹⁰ Tole nina Jesus, "Adi i bas sada kuta ialo-alo kalak kam kesilang i bas rumahna, i jelah kam ngayak kam berkat ka ku kuta si deban. ¹¹ Tapi adi i bas sada ingan la kam ialoken kalak ntah la kam ibegikenna, tadingkenlah ingan e, janah apusi pe abu si leket i bas nahendu. Enda pagi sada tanda bukti si jadi saksi man bana." ¹² E maka lawes ajar-ajar ndai, iberitakenna man kalak si nterem gelah jera kalak si nterem ibas dosa-dosana nari. ¹³ Melala setan ipelawesna janah nterem kalak sakit isapukenna alu minak pepalemsa. ¹⁴ Raja Herodes pe megi berita kerna Jesus, sabap ku japa pe enggo terberita gelarNa. Piga-piga kalak ngatakenca, "Johanes Peridiken enggo keke ibas si mate nari, e maka ngasup Ia erbahan tanda-tanda sengget." ¹⁵ Nina ka kalak si deban, "Ia me Elia." Bage pe lit ka ngatakenca, "Ia sekalak nabi, bali ras nabi-nabi si gelgel e." ¹⁶ Sanga ibegi Herodes kerna perbahanen Jesus nina, "Ia kap Johanes Peridiken, si enggo kusuruh gelah itampul kerahungna. Tapi genduari enggo nggeluh mulihken." ¹⁷ Herodes enda me ndube si nuruhsa maka Johanes Peridiken itangkap, igariken janah ipenjaraken erkiteken Herodias. Herodias ndehara seninana Pilipus, si enggo ibuatna jadi ndeharana. ¹⁸ Herodes pernah iajarken Johanes Peridiken nina, "La patut iempoindu ndehara seninandu!" ¹⁹ Perbahan e nembeh ate Herodias janah ibunuhna pe atena Johanes Peridiken. Tapi la surung perbahan Herodes engkawali ia. ²⁰ Herodes mbiar ngenehen Johanes Peridiken sabap ietehna Johanes Peridiken kalak bujur ras badia. Meriah pe ukurna megiken pengajaren Johanes Peridiken, amin gia megati mela akapna ibahan isi pengajaren e. ²¹ Sanga peringeten wari tubuh Herodes, ibahanna pesta, janah iundangna pegawai-pegawaina, puanglima-puanglima ras pembesar-pembesar i Galilea nari. ²² Kesempaten enda ipergunaken Herodias. Sanga e landek anak Herodias, e maka meriah kal ukur raja ras temue-temuena. E maka nina Raja man anak ndai, "Kai sura-surandu kataken man bangku, maka kubereken." ²³ Ersumpah pe Herodes nina, "Kai pe ipindondu kubere, aminna gia setengah ibas kerajanku enda!" ²⁴ E maka ndarat diberu ndai nungkun man nandena nina, "Kai dage kupindo nande?" Erjabap nandena, "Pindo takal Johanes Peridiken." ²⁵ Minter mulihken diberu ndai ngadap man raja nina, "Ateku maka genduari iberekenndu man bangku takal Johanes Peridiken tare pinggan." ²⁶ Ceda kal ate raja, tapi la ia pang nulak pemindon enda, nginget sumpahna i lebe-lebe temuena. ²⁷ Minter isuruhna sekalak juak-juakna ngelegi takal Johanes Peridiken. E maka lawes juak-juak ndai ku penjara, itampulna kerahung Johanes Peridiken, ²⁸ jenari ibabana takal e tare pinggan, janah iberekenna man diberu ndai. Ibereken diberu e ka takal ndai man nandena. ²⁹ Kenca ibegi ajar-ajar Johanes Peridiken kerna si e, reh ia ngelegi maitna, jenari ikuburkenna. ³⁰ Mulih ka kerina rasul-rasul ndahi Jesus. Iturikenna man Jesus kai si enggo ibahanna ras kai si enggo iajarkenna. ³¹ Perbahan nterem jelma rehen, lanai sempat Jesus ras ajar-ajarNa man. E maka nina Jesus man ajar-ajarNa, "Ota kita ku ingan si teneng, gelah banci kam pekesahken kentisik." ³² Jenari berkat ia kerina tare perahu ku ingan si melenget. ³³ Tapi sanga i bas perdalanen, nterem jelma ngidahsa. Itandai kalak pe Jesus. E maka ibas kerina kuta nari berkat kalak erdalan ku ingan si i tuju Jesus, janah leben pe kalak si nterem seh asa Jesus. ³⁴ Kenca nusur Jesus i perahu nari janah kenca idahNa jelma si nterem, mekuah ateNa sabap jelma si nterem e bali ras biri-biri si la lit permakanna. E maka ibenaken Jesus ngajari jelma si nterem alu erbage-bage pengajaren. ³⁵ Sabap wari nandangi gelap, e maka reh ajar-ajarNa ndahi Ia nina, "Ingan enda melenget, janah wari pe enggo nandangi ku gelapna. ³⁶ Suruhlah kalak enda lawes, gelah banci itukurna nakanna i kuta-kuta sekelewet enda." ³⁷ Ngaloi Jesus nina, "Kam lah mereken nakanna." Nina ka ajar-ajarNa, "Pala lawes kami nukur nakan alu erga dua ratus duit pirak guna kalak enda?" ³⁸ E maka isungkun Jesus ajar-ajarNa nina, "Piga lit roti i bas kam? Cuba nehen!" Kenca inehen ajar-ajar ikatakenna man Jesus nina, "Roti lima ngkibul, janah ikan dua." ³⁹ Jenari ikataken Jesus man ajar-ajar, gelah kerina kalak si nterem kundul erterpuk-terpuk i bas mbalmbal si meratah e. ⁴⁰ E maka kundul kerina erterpuk-terpuk, lit seratus, lit lima puluh kalak sada terpuk. ⁴¹ Kenca bage ibuatNa roti si lima ras ikan si dua ndai, ertoto Ia ikatakenNa bujur man Dibata. E maka icepik-cepikNa roti e, iberekenNa man ajar-ajarNa gelah ielaken man kalak si nterem. Ikan si dua ndai pe iberekenNa man kalak e. ⁴² Maka man me kerina seh besur. ⁴³ Kenca elah man, ipepulung ajar-ajar roti ras ikan si iba, buena lit sepuluh dua sumpit. ⁴⁴ Teremna dilaki si man ndai kira-kira lima ribu kalak. ⁴⁵ Kenca bage, minter isuruh Jesus ajar-ajarNa nangkih perahu gelah leben berkat ngepar ku Betsaida. Jelma si nterem pe isuruhNa mulih. ⁴⁶ Kenca berkat ajar-ajarNa lawes Ia ku sada uruk-uruk janah ertoto Ia i je. ⁴⁷ Kenca wari enggo gelap, perahu ndai enggo seh i tengah-tengah dano, tapi Jesus sisada i daraten. ⁴⁸ Idah Jesus maka mesera iakap ajar-ajar engkayuhken perahuna ngelawan angin si nungsang perahu e, e maka kira-kira jam telu erpagi-pagi reh Jesus erdalan i babo lau ndahi ajar-ajar; menam ibentasi Jesus kalak ndai. ⁴⁹ Tapi sanga idah ajar-ajar Ia erdalan i babo lau, iakapna begu, ⁵⁰ e maka serko ia kerina perbahan biarna. Sabap kerina ia ngidahsa e maka sengget kal ia. Minter ngerana Jesus nina, "Tetapkenlah, ukurndu! Aku nge enda, ola kam mbiar." ⁵¹ E maka idatasi Jesus perahu ndai, janah angin pe ngadi. Mamang kal ate ajar-ajar, ⁵² sabap kerna roti ndai pe langa iangkana janah la ia ngasup ngukurisa. ⁵³ Seh me ia i lepar, i Genesaret. I je itambatkenna perahu e. ⁵⁴ Asum berkat nadingken perahu, minter itandai kalak Jesus. ⁵⁵ Kiam kalak si nterem ngelegi keluargana si penakiten janah ilanjana tare tilam. Ku ja Jesus lawes ku je me ibabana. ⁵⁶ Ku ja pa pe Jesus reh, ku dusun-dusun, ku kuta-kuta, ntah ku kota-kota, nterem kalak si penakiten itaruhken kade-kadena ku pasar-pasar janah ipindona alu mesangat man Jesus gelah kalak si sakit e banci ndadap uisNa lah gia. Janah kerina kalak si ndadap uis Jesus jadi malem.

¹ Sekali jadi reh rombongen kalak Parisi ras piga-piga guru agama i Jerusalem nari njumpai Jesus. ² Iperdiatekenna maka piga-piga ajar-ajar Jesus man alu tan melket, ertina la ia murihi tanna bagi aturen kalak Parisi. ³ Kalak Parisi ras kalak Jahudi si deban ikutina adat kebiasan ninina. La ia man adi la kin iburihina lebe tanna bagi si enggo iaturken. ⁴ Bage pe labo ipanna kai pe si ibaba i tiga nari adi la iburihina lebe (ntah pe adi ia i tiga nari ibersihkenna lebe dirina maka man). Melala denga pe aturen-aturen si deban si ikutina, umpamana: cara-cara murihi calung, kudin, perkakas-perkakas tembaga ras ingan medem. ⁵ E maka nungkun kalak Parisi ras guru-guru agama man Jesus nina, "Engkai maka ajar-ajarNdu la ngikuti adat nininta? Engkai maka man ia salu tan si melket?" ⁶ Erjabap Jesus nina, "Payo me tuhu bagi nubuat Nabi Jesaya kerna kam, o kalak pekulah-kulah, bagi enggo tersurat, ’Nina Dibata: bangsa enda muji Aku alu biberna, tapi ukurna ndauh sirang ibas Aku nari. ⁷ La lit gunana ia ersembah man bangKu, sabap si iajarkenna labo Undang-undang Dibata, tapi undang-undang manusia nge, janah e ikatakenna Undang-undang Dibata!’ ⁸ Itundalkenndu pedah Dibata, gelah ngikuti adat kebiasan manusia." ⁹ Tole pe ikataken Jesus, "Tuhu beluh kam nulak Undang-undang Dibata, gelah ngergaken adat-kebiasanndu. ¹⁰ Sabap adi nina Musa, ’Pehaga bapandu ras nandendu’ janah, ’Kalak si nggombangi bapana ras nandena arus ibunuh.’ ¹¹ Tapi ajarkenndu maka sekalak si lit ibas ia, si banci nampati bapana ras nandena, tapi adi nina, ’Enda Kurban kap’ (ertina sikerajangen Dibata), ¹² e maka nindu la ia ersalah amin la gia isampatina bapana ras nandena e. ¹³ I bas si e enggo lanai iergakenndu Pedah Dibata alu pengajaren si isehkenndu. Janah melala denga pe adum si enda ibahanndu." ¹⁴ E maka idilo Jesus sekali nari jelma si nterem janah ikatakenNa man bana nina, "Kam kerina, begikenlah janah ertiken kata enda. ¹⁵ Kai pe si i darat nari si bengket ku bas manusia, la erbahanca ia keliamen. Tapi si ndarat ibas manusia nari, e nge erbahanca ia keliamen." [ ¹⁶ Begikenlah adi lit kin cupingndu!] ¹⁷ Kenca itadingkenNa jelma si nterem, lawes Ia ras ajar-ajarNa ku rumah. Jenari isungkun ajar-ajarNa Ia kerna perumpaman ndai. ¹⁸ E maka ngaloi Jesus nina, "Kam pe la lit pemetehndu lebih asa kalak si deban? La dage iangkandu? Kai pe si darat nari, si bengket ku bas manusia, la e erbahanca ia keliamen. ¹⁹ Sabap labo seh ku bas ukurna, tapi ku bas beltekna, janah ndarat kang." (Alu bagenda ipebetehken Jesus maka kerina pangan banci ipan.) ²⁰ Tole nina Jesus, "Kai si ndarat ibas manusia nari, e me si erbahanca ia keliamen. ²¹ Sabap ibas nari, ibas ukur manusia nari reh sura-sura si jahat, si erbahanca ia ndalanken lagu la mehuli, nangko, munuh, ²² erlua-lua, rangap, erbahan jahat, nipu, la meteh mela, percian, percekurak, sombong, la terajar. ²³ Kerina si la mehuli enda reh ibas manusia nari, janah e me erbahanca ia keliamen." ²⁴ Kenca bage lawes ka Jesus ku taneh Tirus. Bengket Ia ku bas sada rumah, ateNa gelah ola ise pe meteh Ia i je. Tapi la terrahasiaken. ²⁵ Lit sekalak pernanden, anakna iseluki setan. Kenca ibegina kerna Jesus, minter idahina Jesus janah isembahna terus ku naheNa. ²⁶ Diberu enda ndai kalak Junani, tubuh i Siro Penesia. Ipindona man Jesus gelah ipelawes Jesus min setan e ibas anakna nari. ²⁷ Tapi nina Jesus man bana, "Peturut lebe anak-anak man seh besur, sabap la patut ibuat nakan anak-anak jenari iambengken man biang." ²⁸ Erjabap diberu ndai, "Tuhu, Tuhan. Tapi biang si i teruh meja pe kenan nge rimah-rimah si ndabuh iban anak-anak e." ²⁹ Minter ngaloi Jesus man bana nina, "Perbahan jabapndu si bagenda, mulihlah ku rumahndu, setan enggo ndarat ibas anakndu nari." ³⁰ E maka mulih diberu ndai ku rumahna, idapetina anakna medem i bas ingan medem janah tuhu-tuhu setan ndai enggo lawes ibas ia nari. ³¹ Jenari itadingken Jesus taneh Tirus. Lawes Ia arah Sidon bage pe arah daerah Dekapolis ku Dano Galilea. ³² Itaruhken kalak man Jesus sekalak pasek dingen pekak. Ipindokenna man Jesus gelah itamaken Jesus min tanNa ku babo si pasek dingen pekak e. ³³ E maka ipeserap Jesus ia ibas jelma si nterem nari. ItamakenNa jari-jariNa ku bas cuping kalak ndai, iciduriNa janah ikuitNa dilah kalak ndai. ³⁴ Jenari itare Jesus ku langit. Mbelin kesahNa janah ikatakenNa man kalak ndai, "Epata", ertina, "Talanglah". ³⁵ Minter talang cuping kalak ndai, longgar pe dilahna janah ngerana alu terang. ³⁶ Kenca bage inasihati Jesus kalak ndai kerina, gelah ola iturikenna man ise pe. Tapi akin ilarang reh mbarna pe ituriken kalak ndai. ³⁷ Sengget kalak kerina megisa janah nina, "Mehuli kal kerina si ibahanNa. Kalak si pasek ibahanNa erpemegi, kalak si pekak ibahanNa banci ngerana."

¹ La ndekahsa kenca si e, enggo ka nterem jelma pulung. Kenca lanai lit kai pe man pangan, e maka idilo Jesus ajar-ajarNa janah nina, ² "Mekuah ateKu ngenehen jelma si nterem enda, sabap enggo telu wari ia ras Aku janah genduari lanai lit kai pe si man panganna. ³ Adi Kusuruh pe ia mulih ope denga man, tentu kote ia i tengah dalan, sabap ndauh deba kutana." ⁴ Ngaloi ajar-ajarNa nina, "I bas ingan si melenget enda, i ja kin banci ibuat pangan cukup guna mere man kalak enda kerina?" ⁵ Nungkun Jesus nina, "Piga ngkibul lit roti i bas kam?" Erjabap ajar-ajar nina, "Pitu ngkibul." ⁶ E maka isuruh Jesus jelma si nterem kundul i taneh. IbuatNa roti si pitu ngkibul e, ikatakenNa bujur man Dibata, icepik-cepikNa, jenari iberekenNa man ajar-ajarNa gelah ielaken. E maka ielaken ajar-ajar roti e man jelma si nterem. ⁷ Lit pe i bas ia piga-piga ikan. Ertoto Jesus ngataken bujur man Dibata kerna ikan e, jenari isuruhNa ajar-ajar ngelakenca. ⁸ Kerina ia man seh besur. Teremna lit empat ribu kalak. ⁹ Kenca elah man ipepulung ajar-ajar roti ras ikan si iba, buena lit pitu sumpit. Jenari isuruh Jesus kalak si nterem mulih. ¹⁰ Jesus pe ras ajar-ajarNa minter nangkih perahu, janah lawes ku daerah Dalmanuta. ¹¹ Reh me piga-piga kalak Parisi ndahi Jesus janah ibenakenna ersoal ras Ia. Atena encubai Jesus, e maka isuruhna Jesus erbahan tanda guna encidahken kuasa Dibata. ¹² Kelsehen Jesus nina, "Engkai maka kalak jaman enda mindo tanda? Kukataken man bandu maka ndigan pe labo ibereken tanda man kalak si bage." ¹³ Kenca bage itadingken Jesus kalak ndai; mulih Ia ku perahu janah lawes Ia ngepar. ¹⁴ Ajar-ajar Jesus lupa maba roti. Sada ngenca lit rotina i bas perahu e. ¹⁵ Ipersingeti Jesus ajar-ajarNa nina, "Jagalah, metengetlah kerna ragi kalak Parisi ras ragi Herodes." ¹⁶ Rukur ajar-ajar jenari ngerana sapih-sapih ia nina, "Sabap la sibaba roti, e maka bage nina Jesus." ¹⁷ Ieteh Jesus kai si icakapken ajar-ajar. E maka nina Jesus, "Engkai maka iranakenndu kerna la lit roti? Langa kin ietehndu janah iangkandu? Mersik denga kin lalap ukurndu? ¹⁸ Lit kap matandu la kin idahndu? Lit cupingndu, la kin ibegindu? La kin ingetndu, ¹⁹ sanga Kucepik-cepik roti si lima man lima ribu kalak? Piga sumpit lit ibana ipepulungndu?" Erjabap ajar-ajarNa, "Sepulu dua." ²⁰ Tole nina Jesus, "Bage pe sanga Kucepik-cepik roti si pitu ngkibul man empat ribu kalak, piga sumpit lit ibana ipepulungndu?" Erjabap ajar-ajar nina, "Pitu." ²¹ E maka nina Jesus man bana, "Kuga dage maka langa denga iertindu?" ²² Seh me Jesus ras ajar-ajarNa i Betsaida. Ibaba kalak man Jesus sekalak pentang. Ipindokenna gelah idadap Jesus min kalak pentang e. ²³ E maka itegu Jesus si pentang ndai ku daraten kuta. Kenca iciduriNa mata kalak pentang e, itamaNa tanNa ku babo kalak si pentang e janah isungkunNa nina, "Kai lit idahndu?" ²⁴ Inehenna ku lebe, jenari nina, "Kuidah manusia, tapi bagi batang kayu erdalan." ²⁵ Jenari itamaken Jesus ka tanNa ku mata kalak ndai. Kenca bage icubakenna ka ngenehen. Enggo malem matana, janah enggo terang pengidahna. ²⁶ E maka isuruh Jesus ia mulih janah ipedahiNa nina, "Olanai kam mulihken ku bas kuta e." ²⁷ Jenari lawes Jesus ras ajar-ajarNa ku kuta-kuta sekelewet Kesarea Pilipi. I tengah dalan isungkun Jesus ajar-ajarNa nina, "Ise kin aku nina kalak e?" ²⁸ Erjabap ajar-ajarNa nina, "Piga-piga kalak ngatakenca maka Kam me Johanes Peridiken. Deba ngatakenca maka Kam sekalak nabi ibas nabi-nabi si nai nari." ²⁹ Nungkun ka Jesus nina, "Kam kuga nindu? Ise kin akapndu Aku?" Erjabap Petrus nina, "Kam me Mesias si ipadanken Dibata." ³⁰ E maka inasihati Jesus ajar-ajarNa nina, "Ola kataken man ise pe kerna Aku." ³¹ E maka iajari Jesus ka ajar-ajarNa nina, "Anak Manusia si isuruh Dibata la banci lang ngenanami mbue kiniseran, janah itulak peminpin-peminpin ras imam-imam si mbelin bage pe guru-guru agama. Ia ibunuh janah kenca telu wari keke Ia ibas si mate nari." ³² Kerina kiniseranNa enda jelas kal iturikenNa man ajar-ajar. Perban si e iawin Petrus me Jesus e maka ipandangna. ³³ Tapi erkusur Jesus, ipernehenNa ajar-ajarNa janah irawaiNa Petrus nina, "Laweslah ibas Aku nari, Iblis! Perukurenndu e, perukuren manusia kap, la bagi perukuren Dibata." ³⁴ Jenari idilo Jesus jelma si nterem ras ajar-ajarNa. Nina man kalak e, "Ise atena ikut ras Aku, arus maka ipersilahangna bana, ipersanna kayu persilangna jenari iikutkenna Aku. ³⁵ Sabap ise si mpertahanken kegeluhenna, bene kap kegeluhenna e, tapi ise si bene kegeluhenna erkiteken Aku ras erkiteken Berita Si Meriah, terkelin me. ³⁶ Lit kin gunana man sekalak jelma, amin bana gia kerina doni enda tapi bene kesahna? Tentu lang! ³⁷ La kai pe banci ibereken manusia guna gancih kesahna. ³⁸ Adi sekalak jelma mela ia ngakuken Aku ras KatangKu i tengah-tengah manusia si genduari bage pe i tengah-tengah kalak perdosa, e maka Anak Manusia si isuruh Dibata pe pagi mela ngakuken ia, sanga Anak Manusia si isuruh Dibata e reh ibas kemulian si mbelin si reh ibas Bapana nari ras malekat-malekat si badia."

¹ Tole nina Jesus, "Inget katangKu enda! Lit si pulung i jenda, langa mate ope denga idahna Kinirajan Dibata reh alu kuasa." ² Enem wari kenca si ndai Jesus maba Petrus, Jakup ras Johanes ku datas sada deleng si meganjang. I lebe-lebe ajar-ajarNa salih rupa Jesus. ³ UisNa mbentar erkilat-kilat. La lit sekalak pe i doni enda si ngasup nucisa seh bage mbentarna. ⁴ Kenca bage idah ajar-ajar si telu kalak ndai nabi Elia ras Musa sangana ercakap-cakap ras Jesus. ⁵ Nina Petrus man Jesus, "O Guru, senang kal i jenda. Ibahan kami saja i jenda telu sapo, sada man baNdu, sada man Musa janah sada nari man Nabi Elia." ⁶ Enda ikataken Petrus, sabap mbiar ia teluna, lanai ietehna kai si man katanken. ⁷ Jenari reh embun, ilinggemina ia, lit pe sora ibas embun e nari nina, "Enda me AnakKu si Kukelengi, begikenlah Ia!" ⁸ Minter ipernehen ajar-ajar sekelewetna tapi lanai ise pe idahna, seakatan Jesus ras ia teluna. ⁹ Sanga kalak ndai nusur i datas deleng e nari, iperentahken Jesus ajar-ajarNa e nina, "Ola kataken man ise pe kai si enggo iidahndu, ope denga Anak Manusia si isuruh Dibata keke ibas si mate nari." ¹⁰ Kai si ikataken Jesus ndai ibegiken ajar-ajar, tapi nungkun ia sapih-sapih ia nina, "Kai kin ertina keke ibas si mate nari?" ¹¹ Jenari isungkunna Jesus nina, "Engkai maka ikataken guru-guru agama maka Elia arus leben reh?" ¹² Erjabap Jesus nina, "Tuhu nge nabi Elia leben reh guna nikapken kerinana. Tapi kuga kin si enggo tersurat kerna Anak Manusia si isuruh Dibata, ma Ia denggo ngenanami mbue kiniseran janah igombang-gombangi kalak? ¹³ Kukataken man bandu maka nabi Elia enggo reh janah ibahan kalak man bana bagi ate-atena, bagi enggo isuratken kerna ia." ¹⁴ Sanga Jesus ras ajar-ajarNa si telu kalak ndai mulihken ndahi ajar-ajar si deban, idahNa ajar-ajar e ikeleweti jelma si nterem. Piga-piga kalak guru-guru agama sangana ersoal ras ajar-ajar e. ¹⁵ Kenca idah jelma si nterem Jesus, minter terdejep pusuhna janah kiam ia ngalo-ngalo Jesus. ¹⁶ Isungkun Jesus ajar-ajarNa nina, "Kai si ipersoalkenndu ras kalak enda?" ¹⁷ Erjabap sekalak ibas jelma si nterem e nari nina, "O Guru, anakku enda kubaba man baNdu, sabap iseluki setan ia, seh maka lanai banci ia ngerana. ¹⁸ Tep-tep kali adi ia iseluki setan e, idampes-dampeskenna bana ku taneh, rugup-ugup babahna, erderik ipenna janah mekeng pe dagingna. Enggo kupindo penampat man ajar-ajarNdu gelah ipelawesna setan e, tapi la ia ngasup." ¹⁹ Ngaloi Jesus nina man kalak ndai, "O kam kalak si la erkiniteken, asa kai nari dekahna Aku ras kam? Asa kai nari dekahna Aku tahan ras kam? Baba anak e ku jenda." ²⁰ E maka ibaba kalak ndai. Kenca idah setan e Jesus, minter nggirgir anak e, idampes-dampeskenna bana ku taneh, janah rugup-ugup babahna. ²¹ Isungkun Jesus bapa anak e nina, "Asa kai enggo dekahna ia bagenda?" Erjabap bapana, "Kitik-kitikna nari. ²² Enggo rusur ia menam mate, sabap megati setan e maba ia ku api ras ku bas lau. E maka mekuah min ateNdu ngenehen kami, sampati min kami adi ngasup Kam." ²³ "Kai nindu? Adi Aku ngasup?" nina Yesus ngaloi. "Kai pe banci, adi kalak erkiniteken!" ²⁴ Minter serko bapa anak ndai nina, "Tek nge aku! Tapi kinitekenku langa cukup. Sampati min aku ibas kinitekenku si kurang." ²⁵ Asum idah Jesus maka reh teremna jelma si pulung, e maka isergangiNa setan e nina, "O setan, si erbahanca kalak pasek ras pekak, ndaratlah ibas anak e, janah olanai bengketi ia!" ²⁶ E maka nderkuh setan e idampes-dampeskenna anak e, jenari ndarat ia. Ndarat setan e e maka anak ndai enggo bali ras mait, seh maka nterem pe kalak ngatakenca maka ia enggo mate. ²⁷ Tapi ijemak Jesus anak ndai, ipekekeNa jenari minter ia tedis. ²⁸ Kenca Jesus i rumah, sanga Ia ngenca i je ras ajar-ajarNa, nungkun ajar-ajar man baNa nina, "Engkai maka la kami ngasup pelawes setan e?" ²⁹ Erjabap Jesus, "Alu ertoto (ras erpuasa) ngenca maka terpelawes setan bagi si ndai." ³⁰ E maka itadingken Jesus ras ajar-ajarNa ingan e, janah berkat ia kempak Galilea. La ate Jesus ieteh ise pe i ja Ia ringan, ³¹ sabap Ia sangana ngajari ajar-ajarNa. Nina man ajar-ajarNa, "Anak Manusia si isuruh Dibata iendesken pagi ku bas kuasa manusia, ibunuh manusia pe Ia; tapi kenca telu wari, mulihi Ia nggeluh." ³² La ierti ajar-ajar kerna kata enda, tapi mbiar ia nungkun Jesus. ³³ Seh me Jesus ras ajar-ajarNa i Kapernaum. Kenca seh i rumah isungkun Jesus ajar-ajarNa nina, "Kai si ipersoalkenndu i tengah dalan ndai?" ³⁴ Tapi ajar-ajar sinik saja, sabap i tengah dalan ndai ersoal ia sapih-sapih ia kerna ise si mbelinna ibas ia. ³⁵ E maka kundul Jesus, idilona ajar-ajarNa si sepuluh dua kalak. Nina man ajar-ajarNa, "Ise atena jadi si arah lebe, arus maka ia arah pudi janah ia pe si ngelai kerinana." ³⁶ Jenari idilo Jesus sekalak danak-danak janah ipetedisna i lebe-lebe ajar-ajar. IangkipNa anak e janah nina, ³⁷ "Ise si ngaloken danak-danak si bagenda ibas gelarKu, ia kap si ngaloken Aku. Janah ise si ngaloken Aku, labo Aku saja si ialokenna tapi ialokenna pe si nuruh Aku." ³⁸ Nina Johanes man Jesus, "O Guru, lit idah kami sekalak mpelawes setan ibas gelarNdu. Perbahan labo ia masuk terpukta, e maka ilarang kami." ³⁹ Ngaloi Jesus, "Ola ambati ia! Sabap labo lit sekalak pe si erbahan tanda sengget ibas gelarKu, jenari terus ibelaskenna cakap si jahat kerna Aku. ⁴⁰ Sabap ise la ngelawan kita, temanta kap. ⁴¹ Ingetlah! Ise pe si mereken lau inemen man bandu erkiteken kam pengikut Kristus, tentu ia dat upah." ⁴² "Ntah ise gia si erbahanca maka sekalak jelma lanai erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit. ⁴³ Bage pe adi tanndu erbahanca kam erdosa, tekteklah e. Sabap ulin kam nggeluh alu sada tan asangken dua tanndu, tapi ku naraka kam, ku api si la ernimpet-nimpet. ⁴⁴ I je bernga si ngkarati ia la ermate-mate, janah api la ernimpet-nimpet!] ⁴⁵ Adi nahendu erbahanca kam erdosa, keretlah e. Sabap ulin kam nggeluh alu sada nahe asangken dua nahendu tapi kam ku naraka. [ ⁴⁶ I je bernga si ngkarati ia la ermate-mate, janah api la ernimpet-nimpet!] ⁴⁷ Janah adi matandu erbahanca kam erdosa, pulditkenlah matandu e, sabap ulin kam alu sada mata bengket ku bas Kinirajan Dibata asangken dua matandu tapi kam iambekken ku naraka. ⁴⁸ I je bernga si ngkarati ia la ermate-mate janah api la ernimpet-nimpet! ⁴⁹ Sabap kerina manusia isirai pagi alu api. ⁵⁰ Sira tuhu mbelin gunana, tapi adi sira lanai masin, alu kai kin ibanndu maka banci masin mulihi? Lit min tetap sira ibas kam, janah tetaplah kam erdame sapih-sapih kam ibas geluhndu."

¹ Kenca bage itadingken Jesus ingan ndai, lawes Ia ku taneh Judea, ras ku lepar Lau Jordan. I bas ingan e pe nterem jelma reh ndahi Ia. Janah bagi si nggona, iajari Jesus ka jelma si nterem e. ² Reh piga-piga kalak Parisi atena ncubai Jesus. Isungkunna Jesus nina, "Rikutken Undang-undang agamanta, banci kin sekalak perbulangen ngulihken ndeharana? Katakenlah man kami!" ³ Ijabap Jesus alu penungkunen ka nina, "Undang-undang si kuga kin enggo ibereken Musa man bandu?" ⁴ Ngaloi kalak ndai nina, "Adi Musa iberena sekalak dilaki ngulihken ndeharana alu erbahan surat mulih." ⁵ Nina Jesus man kalak ndai, "Perbahan kam la terajarken, e maka isuratken Musa Undang-undang e man bandu. ⁶ Tapi mula-mulana ijadiken doni enda, i je pe enggo me ikataken, ’Dibata njadiken manusia dilaki ras diberu. ⁷ E maka sekalak dilaki arus nadingken nande bapana, ersada ras ndeharana, ⁸ janah si dua kalak enda enggo jadi sada.’ E maka lanai bo ia dua tapi sada nge. ⁹ E me sabapna si enggo ipersadaken Dibata, lanai banci isirangken manusia." ¹⁰ Kenca Jesus ras ajar-ajarNa enggo ka seh i rumah, isungkun ajar-ajar Ia kerna si ikatakenNa ndai. ¹¹ Nina Jesus man ajar-ajarNa, "Kalak si ngulihken ndeharana, jenari erjabu ka ia ras diberu si deban, dilaki ndai erlua-lua nandangi ndeharana e. ¹² Bage pe sekalak ndehara si nadingken perbulangenna, janah erjabu ka ia ras dilaki si deban, ia pe erlua-lua nge." ¹³ Lit me piga-piga kalak maba anak-anak man Jesus. Atena gelah anak-anak e ipasu-pasu Jesus, tapi merawa ajar-ajarNa man kalak ndai. ¹⁴ Sanga idah Jesus e, merawa Ia man ajar-ajarNa nina, "Pelepas anak-anak e reh ndahi Aku, ola ambati ia, sabap kalak si bage nge kap empuna Kinirajan Dibata. ¹⁵ Ingetlah katangKu enda! Ise si la nggit ngaloken Kinirajan Dibata bagi sekalak anak-anak, kalak si bage labo pagi bengket ku bas Kinirajan Dibata e." ¹⁶ Jenari idakepNa anak-anak e sekalak-sekalak, itamakenNa tanNa ku babona janah ipasu-pasuNa. ¹⁷ Asum berkat ka Jesus nerusken perdalanenNa, reh me sekalak dilaki kiam-kiam njumpai Ia. Erjimpuh ia i lebe-lebe Jesus jenari nina, "O Guru si bujur, kai nge ndia arus kubahan maka dat aku kegeluhen situhu-tuhu si la erkeri-kerin?" ¹⁸ Ngaloi Jesus nina, "Engkai maka ikatakenndu Aku bujur? Ma ise pe labo bujur seakatan Dibata? ¹⁹ Tentu enggo ietehndu pedah Dibata, ’Ola munuh, ola erlua-lua, ola nangko, ola erguak, ola nipu, mehamat man nande bapandu.’ " ²⁰ E maka ngaloi kalak ndai, "O Guru, kerina pedah e enggo kuikutken kitik-kitikku nari." ²¹ Itatap Jesus ka ia janah mekuah ateNa. E maka nina Jesus man bana, "Sada nari kekurangenndu. Laweslah, dayaken kerina erta-ertandu janah bereken man kalak musil gelah idatndu erta-erta i Surga; jenari reh kam, ikutken Aku." ²² Kenca ibegina kata Jesus e ceda atena, e maka lawes ia. Berjut ia sabap bayak kal ia. ²³ Ipernehen Jesus ajar-ajarNa jenari nina, "Seh kal serana kalak bayak bengket ku Kinirajan Dibata!" ²⁴ Sengget ajar-ajar megi kataNa e, tapi Jesus terus ngerana, "O anakKu, tuhu-tuhu mesera bengket ku Kinirajan Dibata. ²⁵ Sukahen sada unta mentas arah lubang jarum asa sekalak bayak bengket ku bas Kinirajan Dibata." ²⁶ Reh mamangna ate ajar-ajar, e maka sisungkun-sungkunen ia, nina, "Adi bage ise nari nge banci terkelin?" ²⁷ Ipernehen Jesus ajar-ajarNa, jenari nina, "Si enda la banci jadi rikutken pengakap manusia, tapi ibas Dibata banci kap. Sabap kai pe banci nge jadi ibas Dibata." ²⁸ Jenari nina Petrus man Jesus, "Adi kami, kerina enggo itadingken kami lako ngikutken Kam!" ²⁹ Ngaloi Jesus nina, "Kukataken pe man bandu, maka ise pe si nadingken rumahna, seninana ntah turangna, nandena ntah bapana, anak-anakna ntah juma, erkite-kiteken Aku dingen erkite-kiteken Berita Si Meriah, ³⁰ genduari e pe ialokenna buen asa si ndai. Ialokenna seratus kali lipat: rumah, senina, turang, nande, bapa, anak ras juma, aminna gia mesera akapna erkiteken iayak-ayak kalak janah ialokenna pe pagi kegeluhen si tuhu-tuhu si la erkeri-kerin. ³¹ Nterem kalak si arah lebe genduari jadi arah pudi pagi, janah nterem kalak si arah pudi genduari jadi pagi arah lebe." ³² Jesus ras ajar-ajarNa sangana ibas perdalanen ku Jerusalem. Jesus erdalan arah lebe ajar-ajar. Aru ate ajar-ajar bage pe mbiar kalak si deban si ngikutken Ia arah pudi. Sekali nari idilo Jesus ajar-ajar si sepuluh dua jenari iturikenNa kerna kai pagi si jadi man baNa. ³³ Nina man ajar-ajar e, "Begikenlah! Genduari kita ibas perdalanen ku Jerusalem. I je me pagi Anak Manusia si isuruh Dibata iendesken man imam-imam si mbelin ras guru-guru agama. Iukumna pe rutang kesah. Bage pe iendeskenna man kalak si la nandai Dibata. ³⁴ Kalak si la nandai Dibata e pagi nokoh-nokohi Ia, icidurina, iligasina janah ibunuhna pe Ia. Tapi kenca telu wari keke ka Ia mulihi ibas si mate nari." ³⁵ Reh me anak-anak Sebedeus e me Jakup ras Johanes ndahi Jesus, janah nina, "O Guru, lit pemindon kami man baNdu, ngarap kami gelah iberekenndu." ³⁶ E maka isungkun Jesus ia, "Kai kin atendu si Kubahan man bandu?" ³⁷ Erjabap kalak si dua ndai, "Ate kami, kundul min arah kawes ras kemuhenNdu kune pagi Kam erkuasa ibas KinirajanNdu." ³⁸ Tapi nina Jesus man kalak ndai, "La kap ietehndu kai si ipindondu e. Ngasup kin kam minem tare calung kiniseran si arus Kuinem e? Ngasup kin kam iperidiken alu peridin si arus Kualoken e?" ³⁹ Erjabap kalak ndai, "Ngasup." Nina ka Jesus man bana, "Payo katandu e; kam pe nandangi minem me tare calung kiniseranKu janah kam iperidiken alu peridin si arus Kualoken. ⁴⁰ Tapi kerna ise kundul arah kawes ras arah kemuhenKu labo Aku metehsa. E pagi ibereken Dibata man kalak si enggo itentukenNa." ⁴¹ Sanga ibegi ajar-ajar si sepuluh kalak nari kata e, irawaina Jakup ras Johanes. ⁴² E maka idilo Jesus ia kerina jenari nina, "Enggo ietehndu maka si iakui jadi pemerentah erkuasa nandangi rayatna janah peminpin-peminpin rate-rate nandangi bawahenna. ⁴³ Tapi ibas kam la banci bage. Ise atena ibas kam jadi mehaga, ia arus jadi si ngelai nandangi kam. ⁴⁴ Ise atena jadi si arah lebe, arus maka ia jadi suruh-suruhen temanna kerina. ⁴⁵ Sabap Anak Manusia si isuruh Dibata reh labo guna ielai, tapi guna ngelai. Janah iendeskenNa kesahNa guna nebusi nterem jelma." ⁴⁶ Seh me Jesus ras ajar-ajarNa i Jeriho. Asum Jesus ras ajar-ajarNa bage pe ikut jelma si nterem ndarat i Jeriho nari, lit sekalak pemindo-mindo kundul i tepi dalan. Ia pentang, gelarna Bartimeus anak si Timeus. ⁴⁷ Asum ibegina maka si reh e Jesus kalak Nasaret, erlebuh ia, nina, "O Jesus! Anak Daud! Mekuah min ateNdu aku!" ⁴⁸ Nterem jelma ngelarang ia gelah sinik. Tapi reh gangna ia erlebuh nina, "O Anak Daud! Mekuah min ateNdu aku!" ⁴⁹ Ngadi Jesus erdalan jenari nina, "Dilolah ia ku jenda!" E maka idilo kalak me si pentang ndai nina, "Malem atendu! Tediskenlah! IdiloNa kam." ⁵⁰ Minter itangtangina cabinna, tedis ia jenari idahina Jesus. ⁵¹ Isungkun Jesus ia nina, "Kai kin atendu Kubahan man bandu?" Erjabap si pentang ndai, "O Guru, ateku min gelah aku erpengidah mulihi." ⁵² E maka nina Jesus, "Mulihlah, kinitekenndu erbahanca kam malem." Minter ia erpengidah, e maka ikutkenna Jesus, ras ia erdalan.

¹ Asum Jesus ras ajar-ajarNa lanai ndauhsa ku Jerusalem, seh me Ia i Uruk Seton, deherken Betpage ras Betani. Isuruh Jesus dua kalak ajar-ajarNa ² nina, "To lawes, leben kam ku kuta si arah lebendu ah. Seh kenca kam ku bas kuta e, idapetindu kari sada kelede tambat, si langa pernah iersak kalak. Osari nalina jenari baba kelede e ku jenda. ³ Adi lit kari kalak nungkun man bandu, ’Engkai maka itangtangindu?’ katakenlah, ’Perlu Tuhan, minter ka kari iulihkenNa ku jenda.’ " ⁴ E maka lawes ajar-ajar si dua kalak ndai. Idapetina sada kelede deher dalan, tambat ibas pintun rumah. Asum ia ngosari nali kelede e, ⁵ piga-piga kalak si tedis i je nungkun nina, "Engkai maka iosarindu kelede e?" ⁶ Erjabap ajar-ajar bagi si enggo ikataken Jesus man bana, e maka ipelepas kalak ndai ibabana. ⁷ Ibaba ajar-ajar si dua kalak ndai kelede e, e maka iersak Jesus. ⁸ Nterem jelma ngkimbangken uisna ibas pasar, lit ka pe deba ngamparken lambe si itektekna i juma. ⁹ Kerina jelma si ngikutken Jesus, si arah lebe ras si arah pu di mulai ersurak-surak nina, ¹⁰ "Pujilah Dibata! Ipasu-pasu Dibata gelah Ia si reh ibas gelar Tuhan. Dibatalah si masu-masu Kinirajan si mulihi ipanteki, e me Kinirajan bapanta Daud; Pujilah Dibata i bas ingan Simeganjangna!" ¹¹ Kenca seh Jesus i Jerusalem, lawes Ia ku Rumah Pertoton. IperdiatekenNa kerina si lit i je. Tapi perbahan wari nandangi gelap e maka lawes Ia ku Betani ras ajar-ajarNa si sepuluh dua kalak e. ¹² Pepagina, kenca berkat ia kerina i Betani nari, melihe Jesus. ¹³ I dauh-dauh nari idahNa sada batang ara, mbur bulungna. Lawes Ia ku je ngenehen ntah lit kin buahna. Tapi kenca seh Ia i je, la lit kai pe idatNa seakatan bulung si mbur e, sabap paksa si e la musim erbuah. ¹⁴ E maka isumpahi Jesus batang ara ndai nina, "Lanai ise pe pagi man buahndu." Ajar-ajarNa pe megisa kai si ikatakenNa e. ¹⁵ Kenca seh ia kerina i Jerusalem, lawes Jesus ku Rumah Pertoton. IpelawesNa kerina si erbinaga ras si nukur ibas kesain Rumah Pertoton e. Meja-meja kalak si nukar duit ras bangku-bangku si erbinaga nderapati itunggalingiNa. ¹⁶ La ibereNa ise pe maba barang arah kesain Rumah Pertoton e. ¹⁷ Kenca bage iajariNa kalak si nterem nina, "Enggo isuratken ibas Pustaka Si Badia, maka nina Dibata, ’RumahKu pagi igelari Rumah Pertoton man kerina manusia.’ Tapi enggo ijadikenndu jadi asar penamun." ¹⁸ Ibegi imam-imam si mbelin ras guru-guru agama pe kai si ikataken Jesus e, e maka idaramina dalan guna munuh Jesus. Mbiar ia ngenehen Jesus sabap cocok iakap jelma si nterem megi pengajarenNa. ¹⁹ Nandangi gelap, Jesus ras ajar-ajarNa lawes ibas kuta e nari. ²⁰ Pepagina, erpagi-pagi si lampas asum Jesus ras ajar-ajarNa mentas, idahna batang ara si nderbih, enggo kerah seh ku uratna. ²¹ Teringet Petrus kai si enggo jadi, e maka nina man Jesus, "O Guru, nehenlah batang ara si isumpahiNdu e, enggo kerah." ²² Ngaloi Jesus, "Ingetlah! Adi kam erkiniteken man Dibata, ²³ banci pe ikatakenndu man uruk-uruk enda, ’Angkat bandu, janah miserlah ku lawit.’ Adi tetap ukurndu janah tek maka kai si ikatakenndu e jadi, la banci lang jadi nge bagi si ikatakenndu e. ²⁴ Perbahan si e Kukataken pe man bandu: Adi ertoto kam bage pe mindo janah tek maka enggo ialokenndu, ibere Dibata nge man bandu kai pe si ipindondu. ²⁵ Bage pe adi tedis kam ertoto, alemilah kerina kalak si ersalah man bandu, gelah Bapandu si i Surga pe ialemiNa dosa-dosandu. ²⁶ Adi la ialemindu salah kalak si deban, Bapandu si i Surga pe labo ngalemi dosa-dosandu.]" ²⁷ Jesus ras ajar-ajarNa mulihken ka ku Jerusalem. Sanga Jesus erdalan ibas kesain Rumah Pertoton, reh imam-imam si mbelin, guru-guru agama ras peminpin-peminpin Jahudi ndahi Ia. ²⁸ Isungkunna Jesus nina, "Kuasa kai kin si lit ibas Kam erbahan si enda kerina? Ise mereken kuasa e man baNdu?" ²⁹ Erjabap Jesus man kalak ndai, "Kusungkun kam lebe, alu sada penungkunen saja, janah adi ijabapndu, Kukataken ka pe man bandu kuasa kai kin si lit ibas Aku erbahan si enda kerina. ³⁰ I ja nari rehna kuasa Johanes Peridiken maka ia mperidiken? I bas Dibata nari ntah ibas manusia nari? Jabap dage!" ³¹ E maka sisungkun-sungkunen ia sapih-sapih ia nina, "Kuga ninta? Adi ninta, ’I bas Dibata nari,’ kugapa pe nina, ’Adi bage ngkai maka la kam tek Johanes Peridiken?’ ³² Tapi adi ninta, ’I bas manusia nari ...’ " (Mbiar ia ngenehen jelma si nterem, sabap kerina kalak tek maka Johanes Peridiken e tuhu-tuhu sekalak nabi.) ³³ E maka erjabap ia man Jesus, "La ieteh kami." Nina Jesus man bana, "Aku pe la Kukataken man bandu alu kuasa kai kin Kubahan enda kerina."

¹ E maka ngerana Jesus man kalak ndai alu perumpaman nina, "Lit me sekalak si nuan anggur ibas jumana. Juma ndai ibidena kelewet, ikurukna lubang erbahan bak ingan mereh buah anggur, janah ipajekkenna sada menara ingan erjaga. Kenca bage isewakenna kebun ndai man kalak si newa, ² jenari lawes ia ku negeri si deban. Kenca seh paksa peranin buah anggur, isuruhna sekalak juak-juakna ndahi si newa kebun anggur ndai, guna mindo sikerajangenna. ³ Tapi itangkap si newa kebun e juak-juak ndai, ipekpekina, isuruhna mulih alu la maba kai pe. ⁴ E maka isuruh si empu kebun anggur ndai ka sekalak juak-juak si deban. E pe ipekpekina seh luka takalna janah igombang-gombangina pe. ⁵ Isuruh si empu kebun anggur ndai ka sekalak juak-juak si deban, janah ibunuh kalak ndai ka. Nterem juak-juak si deban isuruhna pegancih-gancih, tapi e pe ipekpekina janah deba ibunuhna. ⁶ Sekalak nari ngenca tading ras si empu kebun anggur ndai, e me anakna si ikelengina. Dungna anakna enda pe isuruhna ndahi si newa kebun anggur e nina, ’Adi anakku enda kusuruh tentu mehangke nge ia.’ ⁷ Tapi nina si newa kebun anggur ndai sapih-sapih ia, ’Enda kap anak si empu kebun anggur enda. Marilah sibunuh ia, gelah man banta kebun enda.’ ⁸ E maka itangkapna anak si empu kebun anggur e, ibunuhna jenari iambekkenna ku darat kebun." ⁹ Jenari nungkun Jesus nina, "Kenca bage kai nge ibahan si empu kebun anggur ndai? Tentu reh ia, janah ibunuhina kerina si newa kebun anggur e, jenari isewakenna kebun anggur e man kalak si deban. ¹⁰ Ma enggo kin iogendu ibas Pustaka Si Badia, ’Batu si iambekken tukang e kap jadi batu palas. ¹¹ Perbahanen Dibata kap enda, andiko, jilena lanai kap teralang!’ " ¹² E maka peminpin-peminpin kalak Jahudi ndarami dalan guna nangkap Jesus, sabap ietehna maka ia kap si imaksud Jesus ibas perumpaman e. Tapi perbahan mbiar ia ngenehen jelma si nterem, e maka lawes ia, itadingkenna Jesus. ¹³ Kenca bage, isuruh peminpin-peminpin kalak Jahudi me piga-piga kalak Parisi ras piga-piga ibas partai Herodes nari encubai Jesus alu penungkunen. ¹⁴ E maka idahi kalak ndai Jesus nina, "O Guru, ieteh kami maka kerina si ikatakenNdu e tuhu. La erpilihen temanNdu ngerana: La ipernehenNdu pangkat manusia, iajarkenNdu pe kerna kai si ngena ate Dibata idalanken manusia. Kataken dage man kami: La kin ngelanggar Undang-undang agamanta adi igalari pajak man Kepala Pemerentah Roma? Arus kin igalari kami ntah lang?" ¹⁵ Tapi ieteh Jesus maka kalak ndai pekulah-kulah, e maka nina, "Engkai maka icubaindu Aku? Enta lebe sada lembar duitndu gelah Kupepayo." ¹⁶ Kenca ibereken kalak ndai nungkun Jesus man bana nina, "Gambar ras gelar ise kin enda?" Erjabap kalak ndai nina, "Gambar ras gelar Kepala Pemerentah Roma." ¹⁷ E maka nina Jesus, "Adi bage, berekenlah man Kepala Pemerentah si patut ibereken man bana janah berekenlah man Dibata kai si patut ibereken man baNa." E maka jengang kalak ndai megi kata Jesus e. ¹⁸ Reh me piga-piga kalak Saduki ndahi Jesus. (Kalak Saduki enda me salah sada golongen si ngatakenca maka labo lit kekeken i bas si mate nari.) ¹⁹ Nina man Jesus, "O Guru, man banta enggo isuratken Musa enda, ’Adi sekalak dilaki mate nadingken ndeharana janah la lit pupusna, e maka diberu si mbalu ndai arus ilakomangani senina si mate ndai, gelah ipupusna anak jadi gancih seninana si enggo mate ndai.’ ²⁰ Sekali jadi lit me pitu kalak dilaki si ersenina; sintua enggo empo, janah mate ia, la lit pupusna. ²¹ E maka ilakomangani seninana si nomor dua diberu e, janah mate ka ia la lit pupusna. Bage ka pe jadi nandangi seninana si nomor telu. ²² Janah bage me pe seterusna, seh pituna ia ngempoi diberu ndai janah mate sada pe la nadingken anak. Dungna diberu ndai pe mate. ²³ Kenca nggeluh kerina si mate ndai ibas wari pendungi pagi, ndehara ise dage diberu ndai? Sabap pituna ia enggo erjabu ras diberu ndai." ²⁴ Ijabap Jesus kalak ndai nina, "Kam enggo lepak kal. Janah ietehndu kin kai sabapna? Sabap la iangkandu Pustaka Si Badia ras Kuasa Dibata. ²⁵ Kenca kalak keke ibas si mate nari, bali nge ia ras malekat-malekat i Surga. Lanai bo ia empo tah sereh. ²⁶ Dage kerna si mate ipekeke ka, langa kin pernah iogendu i bas Kitap si isuratken Musa kerna turi-turin rambah duri si gara? I je isuratken, maka nina Dibata man Musa, ’Aku kap Dibata si tetap isembah Abraham, Dibata si tetap isembah Isak dingen Dibata si tetap isembah Jakup.’ ²⁷ Ertina, Ia Dibata kalak si nggeluh, labo Dibata kalak si mate. Tuhu-tuhu kal kam enggo lepak." ²⁸ E maka reh me sekalak guru agama megiken percakapen Jesus ras kalak ibas golongen Saduki e. Ibegina maka jabap si ikataken Jesus man kalak Saduki ndai tengteng kal. E maka isungkunna ka Jesus nina, "Undang-undang si apai nge si pentingna kal ibas kerina Undang-undang?" ²⁹ Erjabap Jesus nina, "Si pentingna kal e me kap, ’Begikenlah o kalak Israel! Tuhan Dibata ngenca Tuhan. ³⁰ Arus ikelengindu Tuhan Dibatandu asa atendu, asa tendindu lit, asa ukurndu lit ras asa gegehndu.’ ³¹ Si peduaken e me kap, ’Arus ikelengindu temanndu manusia bagi ikelengindu badanndu.’ Lanai lit undang-undang si deban si pentingen asa undang-undang si dua enda." ³² E maka nina guru agama ndai man Jesus, "Payo Guru! Tuhu bagi si ikatakenNdu e. Tuhan ngenca Dibata, lanai lit Dibata si deban lain Ia. ³³ E maka arus manusia engkelengi Dibata asa ukurna lit, alu kerina kengasupenna ngukurisa ras alu kerina gegeh si lit ibas ia. Janah manusia arus engkelengi temanna manusia bagi ikelengina bana. Pentingen ngikutken undang-undang si dua enda asangken erbahan persembahen tutungen ras persembahen gelehen man Dibata." ³⁴ Idah Jesus, maka pentar kal guru agama e erjabap, e maka nina Jesus man bana, "Enggo mulai kam ngerti uga dalanna bengket ku bas Kinirajan Dibata." Kenca si e, ise pe lanai pang nungkun Ia. ³⁵ Sanga Jesus ngajar ibas Rumah Pertoton, nungkun Ia nina, "Kuga maka ikataken guru-guru agama maka Mesias si ipadanken Dibata e anak Daud? ³⁶ Sedangken Daud pe, erkiteken ikuasai Kesah Si Badia ernubuat nina, ’Nina Tuhan man Tuhanku, kundulken arah kemuhenKu seh Kutamaken imbang-imbangNdu i teruh tapak-tapak naheNdu.’ ³⁷ Daud pe ngataken, maka Ia me Tuhan. Kuga ka banci jadi maka Mesias si ipadanken Dibata e anak Daud?" Meriah ukur jelma si nterem megiken Jesus. ³⁸ I bas pengajarenNa nina, "Metengetlah nandangi guru-guru agama, si megati erdalan-dalan erbaju gedang, si atena gelah ihormati i gedang-gedang dalan ras i tiga. ³⁹ Merincuh kal ia kundul arah lebe ibas rumah pertoton, bage pe ndarami ingan si arah gugung ibas kerja. ⁴⁰ Itipuna diberu balu-balu ras irampasina rumahna. E maka guna nutup-nutupi kejahatenna e, gedang-gedang ibahanna pertotonna. E maka mberat kal denggo ukumenna." ⁴¹ Asum Jesus kundul deher ingan persembahen, iperdiatekenNa kalak si namaken persembahen ku bas. Nterem kalak bayak namaken persembahen si melala. ⁴² Reh ka pe sekalak diberu mbalu si musil kal, itamakenna dua peser, e me duit si kitikna kal. ⁴³ E maka idilo Jesus ajar-ajarNa, jenari nina, "Kukataken man bandu: si tuhuna buen persembahen diberu si enggo mbalu si musil e asangken kerina persembahen kalak si debanna. ⁴⁴ Sabap kalak si deban ipersembahkenna ibas kinibayakenna si lebih nari, tapi diberu balu-balu e ipersembahkenna ibas kemusilenna nari, itamakenna kerina si lit ibas ia."

¹ Sanga Jesus ndarat ibas Rumah Pertoton nari, ngerana sekalak ajar-ajarNa man baNa nina, "O Guru, nehenlah seh kal galangna batu enda janah seh kal jilena gedung enda." ² Ngaloi Jesus nina, "Idahndu gedung si galang enda? Lanai lit sada batu pe pagi tading ibas inganna; kerina pagi iruntuhken." ³ Asum kundul Jesus i datas Uruk Seton petingtang Rumah Pertoton, reh me Petrus, Jakup, Johanes ras Andreas ndahi Ia. Sanga si e ise pe la lit i je, ia ngenca kerina. E maka nungkun ajar-ajar si empat kalak enda man Jesus nina, ⁴ "Katakenlah man kami ndigan kin jadi e? Kai tanda-tandana si encidahkenca maka enggo ndeher kejadin e?" ⁵ E maka nina Jesus man bana, "Jagailah bandu, ola kam pagi papak ibahan kalak. ⁶ Nterem pagi kalak reh ibas gelarKu nina, ’Aku kap Ia!’ Janah nterem jelma itipuna. ⁷ Bage pe ola gulut ukurndu adi ibegindu sora perang, ntah berita-berita kerna perang. Kerina si e arus jadi, tapi labo ertina maka enggo seh kedungenna. ⁸ Negara pagi ngelawan negara, kerajan pagi ngelawan kerajan. I jah i je jadi taneh linuren, ras paksa kelihen. Kerina e bagi persui sekalak diberu si nandangi mupus ngenca. ⁹ E maka jagalah bandu! Kam pagi itangkap janah iadili i pengadilen agama. Kam pagi ipekpeki ibas rumah pertoton; kam pagi tedis i lebe-lebe kalak si erkuasa ras raja-raja erkiteken Aku gelah iturikenndu Berita Si Meriah man bana. ¹⁰ Berita Si Meriah e arus ipeseh lebe man kerina bangsa. ¹¹ Janah adi itangkapna kam dingen iadilina, ola gulut ukurndu kerna kai si arus ikatakenndu. Katakenlah kai si ibereken Dibata man bandu paksa e. Sabap kai si ikatakenndu e labo ibas kam nari, tapi reh ibas Kesah Si Badia nari. ¹² Kalak si ersenina ndudurken seninana gelah ibunuh, bage pe sekalak bapa nandangi anakna. Anak-anak pe ngelawan orang tuana, janah ibunuhna pe orang tuana e. ¹³ Kerina kalak rate segat man bandu erkite-kiteken Aku. Tapi kalak si megeng-geng seh ku kedungenna terkelin kap." ¹⁴ "Idahndu pagi ’Kejahaten si Encedai’ tedis ibas ingan si la kin arusna. (Iantusi si ngogesa min kai erti kata enda.) Paksa si e pagi kalak si ringan i Judea arus kiam ku uruk-uruk. ¹⁵ Kalak si kundul-kundul i darat pekesahken olanai bengket ku rumah ngelegi barang-barangna. ¹⁶ Kalak si sangana i juma olanai ku rumah ngelegi uisna. ¹⁷ Andiko, kuahna ate pernanden si sangana mehuli kulana bage pe pernanden si sangana pepinemken paksa si e. ¹⁸ Ertotolah man Dibata gelah si enda ola jadi ibas paksa perudan. ¹⁹ Sabap ibas paksa si e pagi reh me kiniseran si seh kal ngerina, langa pernah jadi bage mulai kin ijadiken Dibata doni enda, seh asa genduari enda, janah lanai bo denggo jadi bagi si e. ²⁰ Tapi beligan warina enggo ipegendeki Tuhan. Adi la kin ipegendekiNa, ise pe lanai bo lit terus nggeluh. IpegendekiNa wari kiniseran e nginget kalak pilihen si enggo ipilihNa. ²¹ Jenari adi lit pagi kalak si ngatakenca man bandu, ’Nehenlah, i jenda nge Mesias si ipadanken Dibata!’, ntah ’Ah i jah kap Ia,’ ola kam tek katana e. ²² Sabap reh me pagi Mesias perguak ras nabi-nabi perguak. Ibahanna tanda-tanda sengget, adi banci, gelah papak kalak si enggo ipilih Dibata. ²³ E maka metengetlah kam! Enggo Kuturiken enda kerina man bandu ope denga jadi." ²⁴ "Kenca lepas wari-wari kiniseran e, matawari jadi gelap, bulan pe lanai ersinalsal. ²⁵ Bintang-bintang nartar i langit nari janah kuasa-kuasa i langit mugur-ugur. ²⁶ Jenari teridah me Anak Manusia si isuruh Dibata reh ibas embun, alu kuasa si mbelin ras erdolat. ²⁷ Asum e pagi isuruhNa malekat-malekat lawes ku Utara, Timur, Selatan bage pe ku Barat janah ipepulungNa kerina kalak si enggo ipilih Dibata i tampuk doni nari seh ku tampuk langit." ²⁸ "Erlajarlah kam ibas batang ara nari. Adi dahanna enggo ertunas janah bulungna mulai meratah, ietehndu maka musim perlego enggo ndeher. ²⁹ Bage pe adi idahndu pagi si Kukataken ndai kerina jadi, maka enggo ietehndu, paksana enggo ndeher, janah molai me. ³⁰ Ingetlah! Kerina si e jadi pagi ope denga mate kerina manusia si nggeluh genduari enda. ³¹ Langit ras doni masap kap pagi, tapi KatangKu tetap rasa lalap." ³² "Kerna warina ntah pe jamna, ise pe la lit si metehsa. Malekat-malekat i Surga pe lang, janah Anak Dibata pe la meteh tapi Bapa ngenca metehsa. ³³ Metenget janah erjaga-jagalah kam, sabap la ietehndu ndigan paksana. ³⁴ Si enda bali me ras sekalak si lawes ku negeri si ndauh nadingken rumahna. Iberekenna kuasa man kerina si erdahinna gelah ertanggung jawab ia ibas dahinna sekalak-sekalak. Man si njaga pintun ikataken tuan ndai gelah ia erjaga-jaga. ³⁵ E maka erjaga-jaga kam, sabap la ietehndu katawari tuan rumah ndai reh, banci jadi karaben, banci jadi tengah berngi, banci ka pe tekuak manuk ntah pe erpagi-pagi. ³⁶ Gelah adi rempet ia reh, la kam tunduh idapetina. ³⁷ Kai si Kukataken man bandu enda, Kukataken pe man kerina jelma: Erjaga-jaga ras metengetlah."

¹ Dua wari nari Wari Raya Paskah ras Roti si La Itama Ragi, idarami imam-imam si mbelin ras guru-guru agama me dalan guna nangkap Jesus alu erbuni-buni janah ibunuhna atena. ² Nina kalak e sapih-sapih ia, "Ola asum Wari Raya e sidalanken, gelah ola guntar kalak si nterem." ³ Asum Jesus i rumah Simon si nai sakit gadamen, i Betani, paksa man reh me sekalak diberu, ibabana sada botol dem minak si merim si meherga kal. Minak e ibahan ibas urat sinuan-sinuan si merim nari. Ipecahkenna botol minak e jenari icurcurkenna ku takal Jesus. ⁴ Piga-piga kalak si lit i je jungut-jungut nina sapih-sapih ia, "Engkai maka iambur-ambur minak si merim e? ⁵ Ma kin banci idayaken lebih telu ratus duit pirak, janah duitna e ibereken man kalak musil?" Jenari irawaina pe diberu e. ⁶ Tapi nina Jesus, "Pelepaslah! Engkai maka iganggundu ia? Ia enggo erbahan si mehuli man bangKu. ⁷ Adi kalak musil usur nge pagi ras kam janah adi bage atendu banci isampatindu katawari pe. Tapi Aku labo lalap ras kam. ⁸ Diberu enda ibahanna asa ngasupna. Iminakina dagingKu ope denga Aku ikuburken. ⁹ Ingetlah! I japa pe pagi iberitaken Berita Si Meriah i belang-belang doni enda, ituriken pe kerna kai si enggo ibahan diberu enda ndai guna nginget ia." ¹⁰ Judas Iskariot e me sekalak ibas ajar-ajar si sepuluh dua; lawes ia ndahi imam-imam si mbelin guna ngataken maka ia nggit ngendesken Jesus man bana. ¹¹ Meriah kal ukur imam-imam si mbelin megi kai si ikataken Judas Iskariot e. Jenari mulai me idaramina kesempaten si mehuli guna ngendesken Jesus. ¹² I bas wari si pemena wari raya roti si La Itama Ragi, e me sanga kalak nggeleh biri-biri Paskah, nungkun ajar-ajar man Jesus nina, "I ja sura-suraNdu kami nikapken pangan Paskah man Bandu?" ¹³ E maka isuruh Jesus dua kalak ajar-ajarNa nina, "To lawes ku kota ah; i je jumpa kam kari ras sekalak dilaki si maba lau tare tambe. Ikutken ia ku rumah, janah sungkun kari si mada rumah e; ¹⁴ ’Nina Guru: Kamar si apai banci Kupake ras ajar-ajarKu guna man-man Paskah?’ ¹⁵ E maka ituduhkenna kari man bandu sada kamar si mbas i datas loteng, si enggo sikap. I je me sikapkenndu kerina kai si perlu guna man-man Paskahta." ¹⁶ Berkat me si dua kalak e janah seh kenca ia i kota, idapetina kerina bagi si enggo ikataken Jesus man bana. Jenari isikapkenna pangan guna Paskah e. ¹⁷ Kenca gelap reh me Jesus ras ajar-ajarNa. ¹⁸ Paksa ia man kerina, ngerana Jesus nina, "Begikenlah: sekalak ibas kam nari si sangana man ras Aku paksa enda, ndudurken Aku kap kari." ¹⁹ Ceda ate ajar-ajar e, jenari pegancih-gancih ia nungkun man Jesus nina, "Ma labo aku kataNdu?" ²⁰ Erjabap Jesus, "Jelmana e me kap sekalak ibas kam si sepuluh dua enda, si encalehken roti ras Aku bas mangkuk. ²¹ Anak Manusia si isuruh Dibata la banci lang mate nge pagi bagi isuratken kerna Ia ibas Pustaka Si Badia. Tapi andiko, cilaka kap kalak si ndudurken Anak Manusia si isuruh Dibata e. Ulin kin min mbarenda la ia tubuh." ²² Sanga Jesus ras ajar-ajarNa man, ibuat Jesus roti, ertoto Ia ngataken bujur man Dibata, jenari icepik-cepikNa roti e janah iberekenNa man ajar-ajarNa. Nina Jesus, "Buatlah, enda me badanKu." ²³ Kenca bage ibuatNa ka calung, ertoto Ia ngataken bujur man Dibata jenari iberekenNa man ajar-ajarNa, janah kerina ia minem tare calung e. ²⁴ Nina Jesus, "Enda me darehKu si iamburken guna nterem jelma, si ngesahken padan Dibata. ²⁵ Kukataken pe man bandu, maka lanai bo pagi Kuinem lau anggur. Tapi denggo Kuinem anggur si mbaru ibas Kinirajan Dibata." ²⁶ Kenca bage kerina ia ngendeken ende-enden pujin, jenari lawes Ia ku Uruk Seton. ²⁷ Nina Jesus man ajar-ajarNa, "Kerina kam pagi kiam nadingken Aku, sabap enggo tersurat ibas Pustaka Si Badia, ’Permakan e pagi ibunuh Dibata janah biri-biri e kerina merap.’ ²⁸ Tapi kenca Aku ipekeke, leben pagi Aku ku Galilea asa kam." ²⁹ Ngaloi Petrus nina, "Aku labo pagi nggit nadingken Kam, aminna gia kerina kalak enda kiam." ³⁰ Nina Jesus man Petrus, "Ingetlah! I bas berngi enda pe, ope tekuak manuk dua kali, enggo ipersokenndu Aku telu kali." ³¹ Reh lantangna Petrus ngaloi nina, "Asa ndigan pe la Kam kupersoken, amin terpaksa pe aku mate ras Kam!" Janah ajar-ajar si deban pe kerina ngataken bagi si ikataken Petrus enda. ³² Seh me Jesus ras ajar-ajarNa ibas sada ingan gelarna Getsemane. Nina Jesus man ajar-ajarNa, "Kundul kam i jenda, Aku ertoto lebe." ³³ Ibabana Petrus, Jakup ras Johanes ngikut ras Ia. Paksa e ceda ate Jesus dingen getem kal pusuhNa, ³⁴ janah nina man ajar-ajarNa si telu kalak, "Ceda kal ateKu, bagi si mate atena Aku. Timai i jenda, ola kam tunduh." ³⁵ Lawes Ia terdauhen sitik nari, jenari erjimpuh Ia i taneh, janah ertoto Ia gelah adi banci, ola min ibentasiNa paksa kiniseran e. ³⁶ Nina ibas pertotonNa, "O BapangKu, o BapangKu! La kap lit si metahat ibas Kam. Agui min calung kiniseran enda ibas Aku nari. Tapi labo peratenKu, peratenNdu lah jadi." ³⁷ Kenca bage mulihken Ia, idapetiNa ajar-ajar si telu kalak ndai tunduh. E maka nina man Petrus, "O Simon, tunduh kam e? La kam ngasup la tunduh sada jam pe?" Nina ka Jesus man bana teluna, ³⁸ "Erjaga janah ertotolah gelah ola kam ndabuh ku bas percuban. Ukurndu mehuli kap tapi dagingndu kote." ³⁹ Jenari lawes ka Ia ertoto bagi si ndai. ⁴⁰ Asum Ia mulihken ka, idapetina ajar-ajar si telu ndai tunduh; la termedakkenca matana, bage pe lanai teraloisa Jesus. ⁴¹ Asum mulihken Jesus petelu kaliken, isungkunNa ajar-ajarNa si telu e nina, "Medem dingen tunduh denga kin kam? Enggo me bias! Enggo seh paksana, maka Anak Manusia si isuruh Dibata iendesken ku bas kuasa kalak perdosa. ⁴² Kekeken, ota lawes kita. Nehenlah, si ngendesken Aku enggo reh." ⁴³ Sanga Jesus ngerana denga, reh Judas, e me sekalak ibas ajar-ajar si sepuluh dua kalak e. Ibabana sada rombongen si maba pedang ras perpalu, e me rombongen si isuruh imam-imam si mbelin ras guru-guru agama bage pe peminpin-peminpin kalak Jahudi. ⁴⁴ Si ndudurken Jesus enggo mereken tanda man kalak ndai, nina, "Si kuema e me kari kalakna, tangkap janah baba, olanai pulah." ⁴⁵ Kenca seh Judas ndai minter ideherina Jesus nina, "O Guru!" Jenari iemana Jesus. ⁴⁶ E maka itangkap kalak ndai Jesus jenari iketna. ⁴⁷ Tapi sekalak ibas ia si tedis i je isintakna pedangna, jenari itampulna juak-juak Imam si Mbelin seh retap cupingna. ⁴⁸ E maka ngerana Jesus man kalak si reh ndai nina, "Iatekndu kin Aku enda sekalak pengerampok maka reh kam maba pedang ras perpalu guna nangkap Aku? ⁴⁹ Idahndu nge Aku tep-tep wari ngajar ibas Rumah Pertoton, janah labo itangkapndu Aku. Tapi arus nge isehken kai si tersurat ibas Pustaka Si Badia." ⁵⁰ Kenca bage kiam kerina ajar-ajar nadingken Jesus. ⁵¹ Lit me sekalak anak perana si ngikutken Jesus, uisna selambar kain putih ngenca. Icubaken kalak ndai pe nangkap ia, ⁵² tapi itadingkenna uisna e jenari kiam ia manjang-anjang. ⁵³ E maka ibaba kalak ndai Jesus kurumah Imam si Mbelin. I je enggo pulung kerina imam-imam si mbelin, peminpin-peminpin ras guru-guru agama. ⁵⁴ Petrus ngikut-ngikut i dauh-dauh nari seh ku kesain rumah Imam si Mbelin e. I je ia kundul ras pengawal-pengawal janahna cudu deher api. ⁵⁵ Imam-imam si mbelin bage pe Pengadilen Agama e ndarami bukti-bukti si nalahken Jesus, gelah banci Ia ibunuh; tapi la lit idatna. ⁵⁶ Nterem saksi si ngataken si la tuhu kerna Jesus, tapi sada pe la seri katana. ⁵⁷ Dungna tedis piga-piga kalak saksi ngelawan Jesus alu tuduhen palsu, ⁵⁸ nina, "Enggo pernah ibegi kami maka nina Jesus enda, ’Kuruntuhken pagi Rumah Pertoton si ibahan manusia enda, janah kenca telu wari Kupajekken ka sada si labo bekas manusia erbahan.’ " ⁵⁹ Kesaksin enda pe la seri ras kesaksin kalak si deban. ⁶⁰ E maka tedis me Imam si Mbelin i lebe-lebe kalak si ersidang e jenari isungkunna Jesus nina, "La kin lit jabapndu nandangi tuduhen saksi-saksi enda man bandu?" ⁶¹ Sinik saja Jesus, kai pe nina lang. E maka isungkun Imam si Mbelin ndai ka Ia sekali nari nina, "Kam kin Mesias si ipadanken e, e me Anak Dibata si Badia e?" ⁶² Erjabap Jesus nina, "Aku me, janah pagin idahndu Anak Manusia si ipadanken Dibata kundul arah kemuhen si Mada Kuasa janah reh me ras embun i langit nari!" ⁶³ Minter icaingken Imam si Mbelin ndai baju dinasna, janah nina, "Man kai nari kin saksi? ⁶⁴ Enggo ibegindu uga pencekurakiNa Dibata. Kuga pengakapndu kerina?" Kerina ia ngatakenca maka Jesus e ersalah janah ersada arihna gelah Jesus ibunuh. ⁶⁵ Piga-piga kalak mulai enciduri Jesus, itutupina ayo Jesus jenari itinjuina janah nina, "Kataken ise si ninju Kam!" Pengawal-pengawal pe ikut mbalmbal Ia. ⁶⁶ Asum Petrus i teruh denga, i kesain rumah Imam si Mbelin, reh me sekalak diberu, suruh-suruhen Imam si Mbelin e. ⁶⁷ Sanga idahna Petrus cicudu, ipernehenna kal janah nina, "Kam kap teman Jesus kalak Nasaret e." ⁶⁸ Tapi merso Petrus nina ngaloi, "La kueteh, la kuangka pe kai si ikatakenndu e." Jenari lawes ia ku kesain si arah lebe. Paksa e pe tekuak manuk sekali. ⁶⁹ Idah diberu ndai denga ka Petrus i je, e maka ikatakenna man kalak si lit i je nina, "Ia kap sekalak ajar-ajar Jesus e!" ⁷⁰ Tapi e pe ipersoken Petrus ka nge. Lanai ndekahsa kenca si e lit kalak nuduh ia nina, "Lanai bo terpersoken; ugapa pe kam teman kalak e, sabap kam pe i Galilea nari!" ⁷¹ E maka ersumpah Petrus nina, "Mate gia aku, adi kutandai kin tuhu si ikatakenndu e!" ⁷² Paksa e pe minter tekuak manuk si pedua kaliken. Inget Petrus pe kai si enggo ikataken Jesus man bana, e me, "Ope denga tekuak manuk dua kali, enggo ipersokenndu Aku telu kali!" E maka erkadiola kal Petrus e maka tangis kal ia kesi-kesi.

¹ Erpagi-pagi si lampas enggo ersada arih ibas imam-imam si mbelin, peminpin-peminpin Jahudi, guru-guru agama ras kerina anggota sidang, janah ibahanna rencana. Igarikenna Jesus jenari ibabana ngadap man Pilatus ras ngendeskenca man Pilatus. ² Nungkun Pilatus man Jesus nina, "Kam kin raja kalak Jahudi e?" Erjabap Jesus, "Bagi katandu e me melaskenca!" ³ Jenari erbage-bage tuduhen ibahan imam-imam si mbelin nandangi Jesus. ⁴ E maka nungkun ka Pilatus man Jesus nina, "La kam ngasup njabapsa? Kuga buena tuduhen-tuduhen kalak enda man baNdu!" ⁵ Tapi sitik pe la ngaloi Jesus, e maka mamang kal ate Pilatus. ⁶ Enggo jadi kebiasan maka ibas tep-tep Wari Raya Paskah ibebasken Pilatus sekalak tahanen, e me si ipindo jelma si nterem. ⁷ Paksa si e lit me sekalak gelarna Barabas ipenjaraken ras pemberontak-pemberontak si deban. Kalak enda kerina munuh sanga ia berontak ngelawan pemerentah. ⁸ Asum kalak si nterem reh mindo man Pilatus gelah kebiasan si gelgel ilakoken. ⁹ E maka ngaloi Pilatus alu penungkunen nina, "Atendu kin maka raja kalak Jahudi enda kubebasken man bandu?" ¹⁰ Si tuhuna ieteh Pilatus nge maka iendesken imam-imam si mbelin Jesus e man bana perbahan cian ate imam-imam si mbelin nandangi Jesus. ¹¹ Tapi iajar-ajari imam si mbelin kalak si nterem mindo man Pilatus gelah Barabaslah ibebasken. ¹² Ngaloi ka Pilatus man kalak si nterem nina, "Adi bage, kai dage kubahan nandangi kalak enda, si ikatakenndu raja kalak Jahudi e?" ¹³ Alu sora si megang ngaloi kalak ndai nina, "Pakukenlah Ia ku kayu persilang!" ¹⁴ Jenari nina Pilatus man kalak e, "Kejahaten kai kin enggo ibahanNa?" La ibegiken kalak ndai penungkunen enda, tapi reh gangna sorana nina, "Pakukenlah Ia ku kayu persilang!" ¹⁵ Perbahan ate Pilatus muat ukur kalak si nterem, e maka ipulahina Barabas man kalak si nterem. Tapi Jesus isuruhna iligas perajurit-perajurit jenari iendeskenna gelah ipakuken ku kayu persilang. ¹⁶ E maka ibaba perajurit-perajurit me Jesus ku bas istana gubernur, jenari idilona pulung kerina perajurit-perajurit si deban. ¹⁷ Ipakekenna uis megara man Jesus. Ibayuna tengkuluk duri, jenari itamakenna ku takal Jesus. ¹⁸ Kenca bage "ihormati" na Jesus nina, "Tabi, o raja kalak Jahudi!" ¹⁹ Jenari ipaluna takal Jesus alu ciken, icidurina, janah erjimpuh ia nembah man Jesus. ²⁰ Kenca puas akapna kerina nggombang-nggombangi Jesus, itangtangina ka uis si megara e. Ipakekenna mulihi uis Jesus si gelgel. Jenari ibabana Jesus ndarat gelah ipakuken. ²¹ I tengah dalan jumpa kalak ndai ras sekalak dilaki gelarna Simon. Simon e rehna i kuta nari. Ia me ipaksa perajurit-perajurit mersan kayu persilang Jesus. (Simon enda kalak Kireni bapa Alexander ras Rupus.) ²² Ibaba perajurit-perajurit ndai Jesus ku sada ingan si igelari Golgota, ertina, "Ingan takal-takal". ²³ I je ibereken man Jesus anggur si icampur ras mur. Tapi Jesus la nggit nginemsa. ²⁴ Kenca bage ipakukenna Jesus ku kayu persilang jenari itikam tandukkenna uis Jesus ibas ia erbagi. ²⁵ Jesus ipakuken ku kayu persilang jam siwah erpagi-pagi. ²⁶ I datas kayu silang itulis i je, "Raja Kalak Jahudi". ²⁷ Raduken ras Jesus lit ka pe dua kalak pengerampok ipakuken kalak ndai. Sekalak arah kemuhenNa, sekalak arah kawesNa. [ ²⁸ Alu bage enggo seh isi Pustaka Si Badia e me, "Ia ipeseri ras kalak jahat".] ²⁹ Kalak si mentas arah e ncekuraki Ia janahna ngupir nina, "Oh! AteNdu ngeruntuhken Rumah Pertoton janah majekkenca ka i bas telu wari. ³⁰ Genduari nusurkenlah janah pulahilah baNdu!" ³¹ Bage ka pe imam-imam si mbelin ras guru-guru agama isindir-sindirna Jesus nina sapih-sapih ia, "Kalak si deban isampatiNa, tapi diriNa jine la tersampatiSa. ³² Adi Ia kin raja Israel, Mesias si ipadanken e, nusur dage Ia ibas kayu persilang e nari, gelah kami tek man baNa." Perampok si dua kalak si ipakuken ras Jesus e pe isindirna ka nge Jesus. ³³ Jam sepuluh dua ciger seh jam telu, gelap kerina daerah e. ³⁴ Jam telu serko Jesus alu megang, "Eloi, Eloi, lama sabakhtani!" Ertina, "O DibatangKu, o DibatangKu, ngkai maka Aku itadingken Kam?" ³⁵ Piga-piga kalak si tedis i je megi Jesus serko e maka nina, "Begikenlah, idilona Elia." ³⁶ E maka minter kiam sekalak encelupken bunga karang ku bas anggur si macem, jenari icucukkenna ku ujung galah. Kenca bage idudurkenna gelah icecap Jesus. Nina, "Sitimai cuba, ntah reh kin Elia pesusur Ia i datas kayu persilang e nari!" ³⁷ E maka nderkuh Jesus alu megang soraNa jenari keri kesahNa. ³⁸ Paksa e pe merigat kire-kire Rumah Pertoton; erbelah dua das nari ku teruh. ³⁹ Kepala perajurit si tedis i je ngidah Jesus nderkuh seh mate, e maka nina, "Tuhu-tuhu Ia Anak Dibata." ⁴⁰ Lit piga-piga diberu natap i dauh-dauh nari. I je pe Maria Magdalena, Salome, ras Maria nande Jakup si kitik ras Joses. ⁴¹ Kalak enda enggo ngikutken Jesus janah nampati Ia sanga i Galilea. Nterem denga i je diberu-diberu si deban si ras Jesus reh ku Jerusalem. ⁴² - ⁴³ Ope seh jam wari Sabat, reh me Jusup kalak Arimatea. Ia sekalak anggota Pengadilen Agama si ihamati. Ia pe sekalak si tertima-tima nandangi kerehen Kinirajan Dibata. Sendah enda wari Persikapen (e me wari ope wari Sabat). E maka alu la biar-biaren Jusup pang ngadap man Pilatus mindo mait Jesus. ⁴⁴ Mamang ate Pilatus, asum ibegina berita kerna Jesus enggo mate. E maka idilona kepala perajurit jenari isungkunna ntah tuhu kin Jesus enggo mate. ⁴⁵ Kenca ibegina keterangen kepala perajurit e, e maka ipelepasna Jusup muat mait Jesus e. ⁴⁶ Itukur Jusup dagangen si meherga, ipesusurna mait Jesus jenari ibalutina alu e. Kenca bage itamakenna mait e ku bas sada kuburen si itukak ibas lingling batu. E maka igulingkenna sada batu si mbelin nutupi kubur e. ⁴⁷ Idah Maria Magdalena ras Maria nande Joses i ja Jesus ikuburken.

¹ Kenca lepas wari Sabat, Maria Magdalena, Maria nande Jakup ras Salome lawes nukur rempah-rempah si merim, gelah mait Jesus iminakina alu e. ² E maka asum wari Minggu erpagi-pagi si lampas, pultak kenca matawari, berkat me ia ku kuburen. ³ - ⁴ I tengah dalan nungkun ia sapih-sapih ia nina, "Ise kari nampati kita nggulingken batu si nutupi kuburen e?" Batu e seh kal galangna. Tapi kenca ia seh, idahna kuburen e enggo talang. ⁵ E maka bengket ia ku bas, janah idahna i je sekalak anak perana, mbentar uisna kundul arah kemuhen. Mamang kal atena. ⁶ Tapi iperkuanken anak perana ndai ia nina, "Ola mamang atendu! Kueteh nge maka idaramindu Jesus kalak Nasaret si ipakuken ku kayu persilang. Ia lanai i jenda. Ia enggo keke! Nehenlah! Enda kap inganNa. ⁷ Genduari mulihlah janah beritaken man Petrus ras ajar-ajarNa, nindu, ’Ia enggo leben ku Galilea; i jah kam itimaiNa bagi si enggo ikatakenNa man bandu.’ " ⁸ E maka ndarat kalak ndai ibas kuburen e nari jenari kiam ia perbahan mamang atena dingen mbiar kal ia. Perbahan biarna lanai iturikenna man ise pe. ⁹ [Asum wari Minggu erpagi-pagi, kenca Jesus keke ibas si mate nari, man Maria Magdalena lebe icidahkenNa baNa. Maria Magdalena enda me si pernah ipelawes Jesus pitu setan ibas ia nari. ¹⁰ E maka lawes Maria Magdalena meritakenca man teman-teman Jesus. Kalak enda ndai kerina sangana erceda ate dingen tangis. ¹¹ E maka la ia tek sanga iberitaken Maria Magdalena maka Jesus e enggo nggeluh mulihi dingen enggo pe idahna. ¹² Jenari Jesus ncidahken diriNa ibas rupa si la bagi biasa man dua kalak ajar-ajarNa. Ajar-ajar e sangana ibas perdalanen ku bas sada kuta. ¹³ E maka mulihken ajar-ajar si dua e, iberitakenna man teman-temanna si deban, tapi teman-temanna e la tek. ¹⁴ Dungna Jesus ncidahken baNa man ajar-ajar si sepuluh sada kalak, asum ia paksa man kerina. Ipandang Jesus ia kerina sabap la lit kinitekenna dingen mersik ukurna. La ia tek nandangi kalak si enggo ngidah Jesus nggeluh mulihi; ¹⁵ jenari nina Jesus man ajar-ajarNa, "Laweslah, siari doni enda jenari beritaken Berita Si Meriah man kerina manusia. ¹⁶ Ise si tek dingen iperidiken terkelin kap pagi. Tapi ise si la tek ia pagi iukum. ¹⁷ Kalak si tek lit pagi tandana e me: Ipelawesna setan-setan ibas gelarKu, ngerana ia ibas cakap si mbaru e. ¹⁸ Adi icikepna nipe ntah inemna racun labo kaden pe ia. Itamakenna tanna ku babo kalak sakit, malem penakit e." ¹⁹ Kenca Tuhan Jesus ngerana man ajar-ajar, iangkat me Ia ku Surga. I jah Ia kundul arah kemuhen Dibata. ²⁰ Lawes ajar-ajar, janah erberita ia ku japa pe. Tuhan nampati ia ibas dahinna, janah Tuhan pe ikut erdahin ras-ras kalak enda. Ibahan Tuhan maka i japa pe kalak enda meritaken berita si ibas Dibata nari e i je pe jadi tanda kuasa ras tanda sengget.] (9) [Diberu-diberu ndai lawes ndahi Petrus ras teman-temanna. Alu gendek iturikenna kerina kai si enggo ikataken anak perana ndai man bana. (10) Tapi kenca si e, Jesus jine nenahken Berita Si Badia si tetap nggeluh, kerna keterkelinen si rasa lalap e. Si enda ibahanNa erkelang-kelangken ajar-ajarNa i Timur nari seh ku Barat.]