MATIUS

MATIUS

¹ Enda me terombo Jesus Kristus. Jesus e me kesusuren Daud, dingen Daud e me kesusuren Abraham. ² Abraham e me bapa Isak; Isak e me bapa Jakup; Jakup e me bapa Juda ras senina-seninana; ³ Juda e me bapa Peres ras Sera (Tamar e me ndehara Juda); Peres e me bapa Hesron; Hesron e me bapa Aram; ⁴ Aram e me bapa Aminadap; Aminadap e me bapa Nahesson; Nahesson bapa Salmon; ⁵ Salmon e me bapa Boas (Rahap e me ndehara Salmon); Boas e me bapa Obet (Rut e me ndehara Boas); Obet e me bapa Isai; ⁶ Isai e me bapa Daud. Daud e me bapa Salomo (nande Salomo e me ndehara Uria nai); ⁷ Salomo e me bapa Rehabeam; Rehabeam bapa Abia; Abia bapa Asa; ⁸ Asa bapa Josapat; Josapat e me bapa Joram; Joram e me bapa Usia; ⁹ Usia e me bapa Jotam; Jotam e me bapa Ahas; Ahas e me bapa Hiskia; ¹⁰ Hiskia e me bapa Manase; Manase e me bapa Amon; Amon e me bapa Josia; ¹¹ Josia e me bapa Jekonia ras senina-seninana. Kalak enda nggeluh i bas paksa Israel i buang ku Babil. ¹² Kenca lepas paksa pembuangen i taneh Babil e, ipupus Jekonia si Sealtiel; Sealtiel e me bapa Serubabil; ¹³ Serubabil e me bapa Abiud; Abiud e me bapa Eliakim; Eliakim e me bapa Asor; ¹⁴ Asor e me bapa Sadok; Sadok e me bapa Ahim; Ahim e me bapa Eliud; ¹⁵ Eliud e me bapa Eleasar; Eleasar e me bapa Mattan; Mattan e me bapa Jakup; ¹⁶ Jakup e me bapa Jusup; Jusup e me perbulangen Maria. Arah Maria me tubuh Jesus si igelari Mesias si ipadanken Dibata. ¹⁷ Jadi i bas Abraham nari seh ku paksa Daud lit sepuluh empat kesusuren; janah i bas paksa Daud nari seh ku paksa pembuangen bangsa Israel i taneh Babil lit sepuluh empat kesusuren, janah i bas paksa pembuangen i taneh Babil nari seh ku paksa Kristus tubuh lit sepuluh empat kesusuren. ¹⁸ Kerna ketubuhen Jesus Kristus, bagenda me: Maria nande Jesus ertunangen ras Jusup. Tapi ope denga erjabu Maria enggo mehuli kulana arah Kuasa Kesah Si Badia. ¹⁹ Jusup tunangen Maria e kalak bujur. Labo lit sura-surana ngaduken Maria gelah ola mela iakap Maria. Saja ngenca ersura-sura ia nirangken Maria alu sinik-sinik. ²⁰ Tapi asum ia rukur-rukur kerna si e, teridah man bana malekat Dibata arah nipina. Nina malekat e man bana, "O Jusup, kesusuren Daud, ola kam mbiar muat Maria jadi ndeharandu. Sabap anak si lit i bas bertinna e jadi erkiteken kuasa Kesah Dibata. ²¹ Ipupusna pagi sekalak anak dilaki janah arus ibahanndu gelarna Jesus -- sabap Ia me pagi si nebusi bangsaNa i bas dosa-dosa nari." ²² Kerina si enda jadi gelah seh kai si ikataken Tuhan arah nabi nina, ²³ ’Singuda-nguda e pagi mehuli kulana, jenari ipupusna sekalak anak dilaki. Anak e pagi igelari Immanuel’ (ertina: "Dibata ras kita"). ²⁴ E maka kenca keke Jusup, ikutkenna kata malekat Tuhan e. Ialokenna Maria jadi ndeharana. ²⁵ Tapi Jusup ras Maria langa erjabu, ipupusna anak dilaki. Kenca tubuh anak e ibahanna gelarna Jesus.

¹ Jesus tubuh i kuta Betlehem i taneh Judea asum Herodes jadi raja. La ndekahsa kenca si e reh me ku Jerusalem piga-piga kalak guru i Timur nari. ² Nungkun guru-guru Timur e nina, "I ja kin raja kalak Jahudi si mbaru tubuh e? Sabap idah kami bintangna i Timur, janah kami enggo reh guna nembah man baNa." ³ Megi kata e sengget kal Raja Herodes ras kerina anak kuta Jerusalem. ⁴ E maka ipepulung Raja Herodes kerina imam-imam si mbelin ras guru-guru agama Jahudi. Jenari nungkun ia nina, "I ja kin Mesias e tubuh?" ⁵ Ngaloi kalak e nina, "I kuta Betlehem i taneh Judea, sabap enggo isuratken nabi: ⁶ ’O kam Betlehem i taneh Juda, labo kam kuta si kitikna i daerah Juda; sabap i bas kam nari reh me sekalak peminpin si mpermakani bangsaNgku bangsa Israel.’ " ⁷ Kenca megi kai si ikataken e, idilo Herodes guru-guru i Timur nari e alu erbuni-buni. Jenari isungkunina ndiganai bintang e mulai teridah. ⁸ Kenca bage isuruhna guru-guru e lawes ku Betlehem. Nina, "Berkatlah janah pepayo alu mehuli i ja ingan anak e, janah adi enggo kam jumpa, beritaken man bangku, gelah aku pe ku jah nembah man baNa." ⁹ - ¹⁰ Kenca bage berkat guru-guru Timur e. Idahna ka bintang si enggo idahna mbarenda i Timur. La tanggung riahna ukurna ngidahsa. Bintang e erdalan arah lebena jenari ngadi tepat i babo ingan anak e. ¹¹ E maka bengket ia ku bas idahna Anak ndai ras Maria, nandeNa. Jenari erjimpuh ia nembah man Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-erta si ipersembahkenna e, e me: emas, kumenen ras mur. ¹² Perbahan ikataken Dibata man guru-guru e arah nipina gelah ola ia mulihken ndahi Herodes, e maka mulih ia arah dalan si deban ku negerina. ¹³ Kenca berkat guru-guru Timur e, teridah malekat Tuhan man Jusup i bas nipina. Nina malekat e man bana, "Kekeken, baba Anak e ras nandena mengongsi ku Mesir. I jahlah kam lebe seh aku erkata man bandu, sabap idarami Herodes anak enda janah ibunuhna pe atena." ¹⁴ E maka keke Jusup, janah i bas berngi e ibabana Anak e ras nandena ku Mesir. ¹⁵ I Mesir ia ringan seh Herodes mate. Kerina si enda jadi gelah seh kai si ikataken Tuhan arah nabi nina, "Enggo Kudilo AnakKu i taneh Mesir nari." ¹⁶ Asum ieteh Raja Herodes ia enggo itipu guru-guru si reh i Timur nari e, merawa-rawa kal ia. Isuruhna perajurit-perajurit munuhi anak-anak dilaki si lit i Betlehem ras sekelewetna. Anak-anak si ibunuhi umur dua tahun kuteruh. Enda icocokkenna ras dekahna bintang e enggo teridah bagi si ituriken guru Timur man bana. ¹⁷ Alu bage seh me kata si ikataken Nabi Jeremia nina, ¹⁸ "Lit sora terbegi i Rama, sora nderkuh dingen tangis ceda ate. Itangisi Rahel anakna, tangis ia janah lanai terapuli, sabap kerina anakna mate." ¹⁹ Kenca mate Herodes, teridah malekat Tuhan man Jusup i bas nipina asum ia i Mesir denga. ²⁰ Nina malekat e man bana, "Kekeken, baba Anak e ras nandena mulih ku taneh Israel, sabap kalak si ersura-sura munuh Anak e enggo mate." ²¹ E maka keke Jusup, ibabana Anak e ras nandena mulihken ku negeri Israel. ²² Tapi kenca ibegi Jusup berita maka Arkelaus enggo jadi raja i negeri Judea, mbiar ia ku Judea sabap Arkelaus anak Herodes. Tole perbahan enggo ka ipersingeti Dibata ia kerna si e arah nipina, e maka lawes ia ku daerah Galilea. ²³ Kenca seh ia i Galilea ibahanna jabuna i kuta Nasaret. Kerina enda jadi gelah seh kai si ikataken nabi-nabi nina, "Ia pagi igelari kalak Nasaret."

¹ Paksa si e mulai me Johanes Peridiken encidahken dirina i gurun pasir Judea, janah iberitakenna kata Dibata nina, ² "Jeralah i bas dosa-dosandu nari, sabap Kinirajan Surga enggo ndeher!" ³ Johanes Peridiken enda me maksud Nabi Jesaya sanga ikatakenna, "Lit sekalak erlebuh i taneh mesawang ’Sikapkenlah dalan Tuhan. Pepinter dalan man baNa!’ " ⁴ Paken Johanes Peridiken e me: jubahna i bas mbulu unta nari, genditna i bas kuling-kuling nari. Nakanna: labang ras tengguli kerangen. ⁵ Jenari reh me ndahi ia kalak si ringan i Jerusalem, ras kerina kalak si ringan i daerah Judea bage pe kerina kalak si ringan i daerah sekitar Lau Jordan. ⁶ Kenca kalak si nterem ngakuken dosana, e maka iperidiken Johanes i Lau Jordan. ⁷ Tapi asum idah Johanes Peridiken nterem kalak Parisi ras kalak Saduki reh ndahi ia guna iperidiken nina Johanes Peridiken man bana, "O kam kesusuren nipe -- ise ngatakenca man bandu maka banci kam pulah i bas ukumen Dibata si reh pagi? ⁸ Tuduhken arah perbahanenndu tandana kam enggo jera. ⁹ Ola iakapndu banci kam ialemi alu ngataken, ’Kesusuren Abraham kap kami.’ Kukataken man bandu Dibata ngasup njadiken batu-batu enda jadi kesusuren Abraham! ¹⁰ Kapak enggo sikap nektek batang kayu. Kerina batang kayu si la mehuli buahna itektek jenari iambekken ku api. ¹¹ Tandana kam enggo jera, kuperidiken kam alu lau. Tapi reh me arah pudingku si lebih erkuasa asangken aku. Ngosari nali sepatuna pe la aku metunggung. Ia pagi mperidiken kam alu Kesah Si Badia ras api. ¹² NdiruNa enggo sikap i bas tanNa guna miari. IpepulungNa page ku bas lumbung, tapi lapungna itamakenNa ku bas api si la ernimpet-nimpet." ¹³ Paksa e reh Jesus i Galilea nari ku Lau Jordan. Idahina Johanes Peridiken, jenari ipindona gelah Johanes mperidiken Ia. ¹⁴ Tapi Johanes Peridiken la nggit mperidikenca nina, "Aku nge aturenna iperidikenNdu; enda Kam ka ngadap man bangku!" ¹⁵ Ngaloi Jesus nina, "Labo dalih. Sabap alu bage sidalanken kai si ngena ate Dibata!" ¹⁶ E maka Johanes pe setuju mperidiken Jesus. Kenca Jesus iperidikenna, ndarat Ia i bas lau nari. Rempet talang langit janah idahna Kesah Dibata nusur bagi nderapati ku baboNa. ¹⁷ Jenari terbegi sora i Surga nari ngatakenca nina, "Enda me Anakku si Kukelengi. Ia me si ngena ateKu."

¹ Kenca bage Kesah Dibata mabai Jesus ku gurun pasir guna icubai Iblis. ² Kenca empat puluh wari empat puluh berngi Jesus la man igejapNa melihe. ³ E maka reh Iblis ncubai Ia nina, "Erkiteken Kam Anak Dibata salihken dage batu enda jadi roti." ⁴ Ngaloi Jesus nina, "Lit kap tersurat i bas Pustaka Si Badia: Labo alu roti saja manusia enggeluh, tapi arah tep-tep kata si ibelasken Dibata." ⁵ Jenari ibabai Iblis me Jesus ku Jerusalem janah isuruhna Ia tedis i babo anjung-anjung Rumah Pertoton. ⁶ Jenari nina man Jesus, "Adi Anak Dibata kin kam, dabuhken man baNdu ku teruh, sabap lit tersurat i bas Pustaka Si Badia bagenda: ’Isuruh Dibata kap malekat-malekatNa reh njagai Kam, itatangna nge Kam alu tanna gelah naheNdu pe la terantuk ku batu.’ " ⁷ Ngaloi Jesus, "Tapi lit tersurat i bas Pustaka Si Badia ’Ola cubai Tuhan Dibatandu.’ " ⁸ Ibabai Iblis e ka Jesus ku deleng si seh kal ganjangna. Jenari ituduhkenna man Jesus kerina kerajan doni enda ras kinibayakenna. ⁹ Nina Iblis e man Jesus, "Kerina kerajan doni enda ras kiniulinna kubereken man baNdu, adi nggit Kam erjimpuh nembah man bangku." ¹⁰ E maka ngaloi Jesus nina, "Laweslah Iblis! Lit kap tersurat i bas Pustaka Si Badia: ’Sembahlah Tuhan Dibatandu, janah Ia saja ngenca patut man sembahen!’ " ¹¹ Kedungenna itadingken Iblis e Jesus; e maka reh malekat-malekat nampati Ia. ¹² Kenca ibegi Jesus berita maka Johanes Peridiken enggo ipenjaraken, lawes Ia ku Galilea. ¹³ ItadingkenNa Nasaret e maka lawes Ia ringan i Kapernaum. Kapernaum e me sada kuta i tepi Dano Galilea, daerah Sebulon ras Naptali. ¹⁴ Alu bage seh me kai si ikataken Nabi Jesaya nina, ¹⁵ "Taneh Sebulon ras taneh Naptali, dalan kempak lawit, i lepar Lau Jordan, daerah Galilea si ni ingani kalak si labo bangsa Jahudi! ¹⁶ Kalak si ringan i bas gelap, enggo ngidah terang si mbelin e! Man kalak si ringan i bas taneh si ikuasai kematen enggo mbincar terang e!" ¹⁷ I bas paksa si e nari me ibenaken Jesus ngajar nina, "Jeralah kam i bas dosandu nari, sabap Kinirajan Surga enggo reh deherna." ¹⁸ Asum Jesus erdalan-dalan i tepi Dano Galilea, idahNa dua kalak si sembuyak sangana njala nurung. Si dua kalak e, e me Simon (igelari Petrus) ras Andereas. ¹⁹ Nina Jesus man bana, "Mari, ikutken Aku, maka Kuajari kam ndilo kalak si deban jadi ajar-ajarKu." ²⁰ Minter itadingken kalak e jalana jenari ikutkenNa Jesus. ²¹ Asum iterusken Jesus erdalan, idahNa ka dua kalak si sembuyak. Si dua kalak e, e me anak Sebedeus, gelarna Jakup ras Johanes. Kalak enda i datas perahu ras bapana sangana pesikap jala. Asum idilo Jesus ia duana, ²² minter itadingkenna perahu e bage pe itadingkenna bapana. Jenari ikutkenna Jesus. ²³ Isiari Jesus kerina daerah Galilea. Ngajar Ia i bas rumah-rumah pertoton dingen iberitakenNa Berita Si Meriah kerna Kinirajan Surga. IpepalemNa kerina penakit bage pe si mesui i bas daging kalak e nari. ²⁴ Perbahanen Jesus e mbar beritana ku belang-belang negeri Siria seh maka nterem kalak ndahi Jesus. Itaruhken kalak man baNa kerina si penakiten. Erbage-bage penakit kalak si reh e; lit si setanen, lit si tabun, janah lit si pangpangen. Kerina ipepalem Jesus. ²⁵ E maka nterem kal kalak si ngikut-ngikut Jesus; lit i Galilea nari, i Dekapolis nari, i Jerusalem nari; i Judea nari bage pe i daerah lepar Lau Jordan nari.

¹ Kenca Jesus ngidah jelma si nterem, inangkihNa sada uruk. Kenca Ia kundul reh ajar-ajarNa pulung deherken Ia. ² Jenari ibenakenNa ngajari ajar-ajarNa e. ³ Nina Jesus, "Ketuahen kalak si nggejap maka ia labo kai pe ertina i lebe-lebe Dibata; sabap man bana me Kinirajan Surga. ⁴ Ketuahen kalak si erceda ate erkiteken dosa; sabap Dibata me ngapuli ia. ⁵ Ketuahen kalak si meteruk ukurna; sabap isehken Dibata me padanNa man bana. ⁶ Ketuahen kalak si muas melihe nehken peraten Dibata; sabap ibesuriNa me ia. ⁷ Ketuahen kalak si perkuah ate dingen perkeleng; sabap ia me ngaloken perkuah ate Dibata. ⁸ Ketuahen kalak si meciho pusuh peratenna; sabap itandaina me tuhu-tuhu Dibata. ⁹ Ketuahen kalak si erbahan perdamen; sabap iakui Dibata me ia anakNa. ¹⁰ Ketuahen kalak si ngenanami kiniseran erkite-kiteken nehken peraten Dibata; sabap man bana me Kinirajan Surga. ¹¹ Ketuahen me kam adi erkite-kiteken kam ajar-ajarKu igombang-gombangi, ipesega-sega dingen ipelawes kalak kam janah alu kata guak ipalitkenna si jahat man bandu. ¹² Ermengkah dingen meriahlah atendu, sabap enggo isikapken Dibata upahndu si mbelin i Surga; sabap bage me pe nabi-nabi si nggeluh leben asangken kam ipesega-sega kalak." ¹³ "Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak. ¹⁴ Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah. ¹⁵ Labo isagani kalak lampu kenca bage itutupina alu tumba; tapi itamakenna ku datas nahe pertendangen, gelah terang iakap kalak kerina si lit i bas rumah e. ¹⁶ Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga." ¹⁷ "Ola iakapndu Aku reh ncedai Undang-undang si ibereken Musa ras si iajarken nabi-nabi. Aku reh labo ncedai, tapi guna nehken si enggo isuratkenna e. ¹⁸ Ingetlah katangKu enda! Seh masap langit ras doni, sada titik ntah sada bagin si kitikna pe i bas Undang-undang e la bene adi langa kin seh kerina kai si enggo isuratken e. ¹⁹ E maka ise la ngikutken si enggo isuratken e, aminna gia bagin si kitikna, janah ibabaina papak kalak si deban, ia me si la mehergana i bas Kinirajan Surga. Tapi ise ngikutkenca janah ibabaina kalak si deban ngikutken si enggo isuratken e, ia me si mbelinna i bas Kinirajan Surga. ²⁰ Kukataken pe man bandu maka labo kam banci bengket ku bas Kinirajan Surga adi la kin tutusen atendu erbahan si ngena ate Dibata asa guru-guru agama ras kalak Parisi." ²¹ "Enggo ietehndu maka nai ikataken man nini-nininta, ’Ola munuh; kalak si munuh iadili.’ ²² Tapi genduari Kukataken man bandu: Ise merawa nandangi seninana, iadili pagin, ise si ngisakken kalak, arus iadili i lebe-lebe Pengadilen Agama. Janah ise ngataken seninana: ’O kemali!’, ia pagin itamaken ku api naraka. ²³ Dage, adi asum atendu nehken persembahen man Dibata ingetndu maka sangkut ukur seninandu nandangi kam, ²⁴ tadingkenlah lebe persembahenndu e jenari erdame ras ia. Kenca bage persembahkenlah persembahenndu e man Dibata. ²⁵ Adi iaduken kalak kam janah ibabana ku pengadilen, erdamelah ras ia ope denga seh i pengadilen. Sabap adi enggo seh i pengadilen iendeskenna me kam man hakim, jenari iendesken hakim kam man polisi. Kenca bage itamaken polisi kam ku bas penjara. ²⁶ Adi kam i bas penjara, lanai kam ipulahina adi langa kin bali utangndu e kerina." ²⁷ "Enggo ietehndu maka lit ikataken, ’Ola erlua-lua.’ ²⁸ Tapi genduari Kukataken man bandu: Ise ngenehen sekalak diberu, jenari leket ukurna ras diberu e, si tuhuna ia enggo erlua-lua i bas ukurna. ²⁹ Dage, adi matandu si kemuhen erbahanca kam erdosa, pulditkenlah e jenari ambekkenlah! Sabap ulin sada bagin badanndu bene asa kerina iambekken ku bas naraka. ³⁰ Adi tanndu si kemuhen erbahanca kam erdosa, keretlah e jenari ambekken! Sabap ulin bene sada tanndu asangken kerina badanndu iambekken ku bas naraka." ³¹ "Lit ka pengajaren bagenda, ’Ise ngulihken ndeharana, arus ibahanna surat mulih man ndeharana!’ ³² Tapi genduari Kukataken man bandu: Ise ngulihken ndeharana labo erkiteken ndeharana e erlua-lua ras kalak si deban, ia si erbahanca ndeharana e erlua-lua adi sereh ia man kalak si deban, janah si ngempoi diberu e pe erlua-lua." ³³ "Enggo pe ietehndu maka i bas nini-nininta nai lit pengajaren bagenda, ’Ola ersumpah kerna si la tuhu, tapi bahanlah kai si enggo isumpahkenndu i lebe-lebe Tuhan.’ ³⁴ Tapi genduari Kukataken man bandu: Ola ersumpah kerna kai-kai pe, ola ersumpah i bas gelar langit, sabap langit kap ingan kundul Dibata; ³⁵ ola ersumpah i bas gelar doni, sabap doni kap ingan naheNa; bage pe ola ersumpah i bas gelar Jerusalem, sabap Jerusalem kuta Raja Simbelin kap. ³⁶ I bas gelar takalndu pe ola kam ersumpah, sabap labo kam erkuasa nalihken selambar buk pe jadi mbentar ntah mbiring. ³⁷ Katakenlah, ’ue’ adi tuhu janah katakenlah, ’lang’ adi la tuhu. Lain asangken si e i bas Iblis nari kap rehna." ³⁸ "Enggo ietehndu maka nai lit bagenda pengajaren, ’Mata gancih mata, janah ipen gancih ipen.’ ³⁹ Tapi genduari Kukataken man bandu: Ola erbalas nandangi kalak si enggo ersalah man bandu. Adi iparap kalak kurumndu si kemuhen, bereken parapna kurumndu si kawes. ⁴⁰ Janah adi iaduken kalak kam erkiteken morah atena bajundu, bereken pe ras cabinndu man bana. ⁴¹ Adi ipaksa kalak kam maba barangna sada kilometer dauhna, babalah barang e dua kilometer dauhna. ⁴² Adi mindo kalak man bandu berekenlah; bage pe ola tulak adi kalak minjam kai-kai pe man bandu." ⁴³ "Enggo pe ietehndu kerna ajaren enda, ’Kelengilah temanndu, janah elem-elemlah man imbang-imbangndu.’ ⁴⁴ Tapi genduari Kukataken man bandu: Kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran. ⁴⁵ Alu bage kam enggo jadi anak-anak Dibata. Sabap labo saja man kalak si mehuli ibereken Dibata matawariNa, tapi pe man kalak si jahat. Bage pe labo saja man kalak si bujur ibereken Dibata udan, tapi pe man kalak si la bujur. ⁴⁶ Sabap adi si ngkelengi kam saja ngenca ikelengindu, man kade Dibata mbalas perbahanenndu e? La kin kalak si muat cuke pe bage ka nge perbahanenna? ⁴⁷ Janah kai kin lainna kam ras kalak si deban adi ras temanndu saja ngenca kam siperkuanen? Kalak si la nandai Tuhan pe bage nge perbahanenna. ⁴⁸ E maka kam arus serta bagi Bapandu si ni Surga pe serta."

¹ "Ingetlah! Ola ilakokenndu aturen agamandu i lebe-lebe kalak si nterem alu tujun gelah idah kalak. Sabap adi bage ibahanndu la kam dat upah i bas Bapandu si i Surga. ² Dage, adi mere kam man kalak musil, ola gejek-gejekken bagi kalak si pekulah-kulah i rumah-rumah pertoton ntah pe i tengah dalan. Kalak si pekulah-kulah e tujunna gelah ndatken pujin. Inget! Ia lanai ngaloken upah i bas Dibata nari. ³ Tapi adi mere kam man kalak musil, bahanlah maka temanndu meriah pe la meteh. ⁴ Labo perlu igejek-gejekken i bas kam mere e. Alu bage, Bapandu si ngidah perbahanenndu e mereken upah man bandu." ⁵ "Adi ertoto kam, ola bagi kalak si pekulah-kulah. Kalak si pekulah-kulah e megati tedis ertoto i rumah-rumah pertoton bage pe i simpang-simpang gelah iidah kalak. Inget! Ia lanai ngaloken upah i bas Dibata nari. ⁶ Tapi adi ertoto atendu, bengketlah ku bas kamarndu, eruk pintun jenari ertotolah man Dibata si la iidah e. Dibata si ngidah perbahanenndu e mereken upah man bandu. ⁷ Bage pe adi ertoto kam ola mulih-ulih bagi kalak si la nandai Tuhan. Ia erpengakap maka adi gedang pertotonna ibegiken Dibata kap. ⁸ Tapi kam, ola bage. Sabap ope denga ipindondu, enggo leben ieteh Bapandu kai si iperlukenndu. ⁹ Dage, bagendalah nindu ertoto, O Bapa kami si ni Surga. GelarNdu ipebadia min; ¹⁰ reh min KinirajanNdu; sehlah min peratenNdu, i bas doni enda bagi ni Surga. ¹¹ Bereken min man kami nakan cukup i bas wari si sendah enda. ¹² Alemi min salah kami bagi nialemi kami salah kalak kempak kami. ¹³ Ola min kami ibaba Kam kubas percuban, tapi olangilah kami idur si ilat nari. [Sabap Kam kap si mada Kinirajan, ras kuasa, ras kemulian si ndekah-ndekahna. Amin.] ¹⁴ Adi ialemindu salah kalak, salahndu pe ialemi Bapandu si i Surga ka nge. ¹⁵ Tapi adi la ialemindu salah kalak, salahndu pe la ialemi Bapandu." ¹⁶ "Adi erpuasa kam, ola peberjut-berjutndu ayondu bagi kalak pekulah-kulah. Kalak pekulah-kulah ipeberjut-berjutna ayona bagi kalak melihe, gelah ieteh kalak ia erpuasa. Inget! Ia lanai ngaloken upah i bas Dibata nari. ¹⁷ Tapi adi erpuasa kam, erduhaplah jenari suri bukndu, ¹⁸ gelah la ieteh kalak kam erpuasa. Tapi Bapandu si ngidah perbahanenndu e, Ia nge si mereken upahndu." ¹⁹ "Ola pepulung erta-erta i doni enda man bandu. Sabap erta-erta doni banci ipan nget-nget, tembesin dingen itangko pinangko. ²⁰ Tapi pepulunglah erta-erta i Surga. Sabap i Surga la banci ipan nget-nget, tembesin dingen itangko pinangko. ²¹ Sabap i ja ertandu, i je pe ukurndu." ²² "Mata kap tendang kula. Adi terang pengidahndu, kulandu pe terang. ²³ Tapi adi gelap pengidahndu kulandu pe gelap. Dage, adi tendang si lit i bas kam gelap, seh nari kal nge gelapna!" ²⁴ "Ise pe labo ngasup ngikutken dua tuan. Sabap adi dua tuanna, la banci lang sekalak keleng atena janah sekalak nari nembeh atena; ntah pe mejingkat ia nandangi sekalak tuan, tapi tuan si sada nari la diatena pe. Labo kam ngasup erdahin guna Dibata adi erdahin ka kin kam guna duit. ²⁵ Perbahan si e, ola aru atendu kerna nakan ras inemen si iperlukenndu i bas geluhndu ntah kerna uis si man pakenndu. Ergan nge kesah asangken nakan janah ergan nge kula asangken uis. ²⁶ Perdiatekenlah perik-perik si kabang. Labo ia merdang, labo ia rani, labo ipepulungna ulihna rani ibas lumbung, tapi man nge ia ibahan BapaNdu si i Surga. Ergan nge kam asang perik-perik e! ²⁷ Sekalak pe kam labo ngasup nambahi umurndu alu aru ate e! ²⁸ Engkai maka aru atendu kerna uis si man pakenndu? Perdiatekenlah bunga ncole si turah i mbalmbal. Bunga e la erdahin dingen la ertenun. ²⁹ Tapi Raja Salomo si bayak nai pe la lit pakenna bagi bunga ncole e jilena. ³⁰ Dage ingetlah! O kalak si kurang kiniteken! Adi dukut-dukut si sendah nggeluh pagi iambekken ku bas api pe bage jilena ibahan Dibata, apai ka kam! ³¹ E maka ola aru atendu ntah kai pagi ipanndu, ntah kai pagi inemndu bage pe ntah kai pagi uisndu. ³² (Kalak si la nandai Tuhan nge maka bage perukurenna). Kam ola bage, sabap ieteh Dibata nge maka kerina enda perlu man bandu. ³³ Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu. ³⁴ E maka ola aru atendu kerna wari si pepagi, sabap pepagi lit denga ka nge si man ndelenken. Labo pada itambahi kiniseran si sendah alu kiniseran si pepagi."

¹ "Ola isalahindu kalak si deban, gelah kam pe la isalahi Dibata, ² sabap uga penalahkenndu kalak bage ka kam penalahken Dibata. Sarat-sarat si ituntutndu man kalak, sarat-sarat e ituntut Dibata ka man bandu. ³ Engkai maka idahndu rintep i bas mata seninandu, tapi beloti si lit i bas matandu la igejapndu? ⁴ Kuga maka pang kam ngerana, ’O senina, enta kuagui rintep si lit i bas matandu,’ sedangken i bas matandu jine pe lit beloti si galang? ⁵ O kalak si pekulah-kulah! Agui lebe beloti si lit i bas matandu e, sabap kenca bage maka ngasup kam ngagui rintep si lit i bas mata seninandu. ⁶ Ola iberekenndu barang si Badia man biang sabap ilawanna nge kam; ola itamakenndu mutiara ku lebe-lebe babi sabap kugapa pe iperjatina nge." ⁷ "Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu. ⁸ Sabap si mindo, ngalo, si ndarami dat me, janah si nuktuk, italangi pintun man bana. ⁹ Tentu labo lit i bas kam bapa mereken batu man anakna adi ipindona roti man bandu. ¹⁰ Bage pe tentu la iberekenndu nipe adi ipindona nurung. ¹¹ Kuga gia jahatna kam ietehndu nge kai si mehuli man berenken man anakndu. Apai denga ka Dibata, tentu iberekenNa nge si mehuli man kalak si mindo man baNa! ¹² Bahanlah man kalak si deban bagi ngena atendu ibahanna man bandu. Enda me ertina Undang-undang si isuratken Musa ras kai si enggo isuratken nabi-nabi." ¹³ "Bengketlah arah pintun si kitik, sabap mbelang me pintun dingen mbelang pe dalan ku naraka, janah nterem kalak arah e erdalan. ¹⁴ Pintun si kitik dingen dalan si mesera nuju ku kegeluhen si rasa lalap, janah piga-piga kalak ngenca ngasup arah e erdalan." ¹⁵ "Metengetlah nandangi nabi-nabi perguak; reh ia ndahi kam bagi biri-biri si melemuk, tapi si tuhuna ukurna bagi serigala si merawa. ¹⁶ Itandaindu nge ia arah perbahanenna. Batang bungke rimbang labo anggur buahna, janah batang lateng labo galiman buahna. ¹⁷ Batang si mehuli tentu mehuli nge buahna, tapi batang si la mehuli tentu pe la mehuli buahna. ¹⁸ Labo banci la mehuli buahna batang si mehuli, bage pe labo banci mehuli buahna batang si la mehuli. ¹⁹ Batang si la mehuli buahna itektek me jenari itamaken ku bas api. ²⁰ E maka itandaindu nge nabi si palsu e arah perbahanenna." ²¹ "Labo kerina kalak si erlebuh man bangKu, ’O Tuhan, Tuhan!’ bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e. ²² I bas wari pendungi pagi, nterem kalak ngataken man bangKu, ’O Tuhan, Tuhan! I bas gelarNdu ernubuat kami, i bas gelarNdu ipelawes kami setan-setan dingen ibahan kami tanda-tanda sengget.’ ²³ Tapi ningKu pagin njabapsa, ’La kam Kutandai pe. Laweslah i bas Aku nari, o kalak jahat!’ " ²⁴ "Ise megi katangKu enda dingen ngikutkenca, ia bali ras kalak pentar si majekken rumahna i babo batu. ²⁵ Rumah e labo runtuh aminna gia reh banjir ras angin si meter nderpasa, sabap rumah e ipajekken i babo batu. ²⁶ Ise si megi katangKu enda tapi la ikutkenna, ia bali ras kalak lenge si majekken rumahna i babo kersik. ²⁷ Asum reh banjir ras angin meter, minter runtuh dingen sontar rumah e." ²⁸ Kenca dung Jesus ngerana, mamang ate kalak si nterem kerna pengajarenNa. ²⁹ Sabap Jesus ngajar la bali ras guru-guru agama kalak enda; Ia ngajar alu erkuasa.

¹ Kenca nusur Jesus i uruk e nari, nterem kal jelma ngikutken Ia. ² Jenari reh sekalak gadamen ndahi Jesus. Erjimpuh ia i lebe-lebe Jesus jenari nina, "O Tuan, adi nggit Kam, ngasup kap Kam pepalem aku." ³ Ijemak Jesus kalak si gadamen e jenari Nina, "Nggit nge aku. Malemlah kam!" Minter malem ia i bas penakitna e nari. ⁴ Jenari nina Jesus man bana, "Ola kataken man ise pe kerna si enda, tapi cidahkenlah man Imam. Kenca bage, bahanlah persembahenndu bagi isuruh Musa, gelah kerina kalak meteh maka kam enggo malem." ⁵ Asum Jesus bengket ku kuta Kapernaum, reh sekalak perwira njumpai Ia. ⁶ Nina perwira e man baNa, "O Tuan, sekalak suruh-suruhenku sakit i rumah. Mekelek kal iakapna, lanai ia ngasup muit pe." ⁷ Ngaloi Jesus, "Banci reh Aku pepalemca." ⁸ Tapi nina perwira e, "O Tuan, la metunggung aku ngalo-ngalo Kam i rumahku. Sengkebabah ranan sajalah gia ibelaskenNdu, tentu malem suruh-suruhenku e. ⁹ Sabap aku pe lit nge si ganjangen asa aku, janah lit ka nge perajurit-perajurit teruhenku. Adi kusuruh perajurit e lawes, minter nge ia lawes; adi kusuruh ka perajurit si deban reh, minter nge ia reh; janah adi bahan enda ningku man suruh-suruhenku, minter nge ibahanna." ¹⁰ Mamang ate Jesus megi ranan perwira e. E maka nina Jesus man kalak si ngikutken Ia, "Langa pernah Aku jumpa ras kalak Israel si bagenda belinna kinitekenna. ¹¹ Ingetlah! Nterem pagi si labo kalak Jahudi reh i Timur ras i Barat nari ersada ras Abraham, Isak, Jakup i bas Kinirajan Surga. ¹² Sedangken bangsa si kin aturenna bengket ku bas Kinirajan e iambekkenNa ku ingan si seh kal gelapna. I je tangis ras mesui kal atena." ¹³ Jenari nina Jesus man perwira e, "Mulihlah ku rumahndu, jadilah man bandu bagi si enggo ibelaskenndu arah kinitekenndu." I bas paksa si e ka malem me suruh-suruhen perwira ndai. ¹⁴ Lawes Jesus ku rumah Petrus. I bas rumah e idahNa mami Petrus medem erkiteken sakit. ¹⁵ Ijemak Jesus tan mami Petrus e, jenari minter malem. Keke ia jenari isikapkenna pangan man Jesus. ¹⁶ Nandangi gelap, rehen kalak maba si penakiten ras si setanen man Jesus. Alu sengkebabah ranan saja ipelawes Jesus setan-setan e janah ipepalemNa kerina kalak si penakiten. ¹⁷ Ibahan Jesus bage, gelah seh si enggo isuratken Nabi Jesaya, "Ia kap mulahi kita i bas kiniseranta nari janah Ia kap pepalem penakitta." ¹⁸ Asum idah Jesus kalak si nterem ngkeleweti Ia, isuruhNa ajar-ajarNa gelah berkat ngepari dano. ¹⁹ Paksa si e, reh sekalak guru agama ndahi Jesus janah nina, "O Guru, ikut ateku ras Kam aminna ku ja gia Kam lawes." ²⁰ Ngaloi Jesus, "Serigala lit liang inganna, perik-perik pe lit asarna, tapi Aku, Anak Manusia si isuruh Dibata la lit inganKu pekesahken." ²¹ Sekalak ajar-ajar si deban ngerana man Jesus nina, "O Bapa, mulih lebe aku gelah kukuburken bapangku." ²² Tapi ngaloi Jesus, "Ikutkenlah Aku. Pelepaslah kalak mate ngkuburken kalak matena jine." ²³ Jenari idatasi Jesus perahu, ajar-ajarNa pe ikut ras Ia. ²⁴ Asum erlayar, rempet rembus angin meter seh maka galumbang pe nderpa perahu e. Tapi tunduh Jesus paksa si e. ²⁵ E maka iingeti ajar-ajarNa Ia nina, "O Tuan, sampati min! Enggo cilaka kita!" ²⁶ Tapi nina Jesus man ajar-ajarNa e, "Engkai maka kam mbiar? Kurang kal tuhu kinitekenndu!" Jenari keke Jesus, isergangina angin meter ras galumbang ndai. E maka enggo seh kal tenengna. ²⁷ Mamang ate ajar-ajarNa e kerina nina, "Kalak si kuga kin nge enda ndia? Angin ras galumbang pe ngikutken kataNa." ²⁸ Seh kenca Jesus i daerah Gadara reh dua kalak setanen njumpai Ia. Kalak setanen e reh i kuburen nari. Ise pe la pang mentas arah e sabap mehantu kal ia duana. ²⁹ Kenca ndeher ia ras Jesus, minter ia serko nina, "O Anak Dibata, kuga atendu kami ibahanNdu? IsiksaNdu kin ateNdu kami langa pe seh paksana?" ³⁰ La ndauhsa i bas ingan e nari, lit babi sada rarasen sangana nungke-nungke ndarami nakanna. ³¹ Nina setan-setan e man Jesus, "Adi ipelawesNdu kami, suruhlah kami neluki babi-babi ah." ³² Nina Jesus, "Laweslah!" Itadingken setan si dua kalak e jenari iselukina babi-babi e. E maka kiamen babi e, ndabuh ku dano jenari mate gedap kerina. ³³ Kalak si mpermakani babi e kiam ku bas kuta. Iturikenna man kalak si nterem kerna babi dingen kerna si dua kalak ndai. ³⁴ E maka reh kerina anak kuta e ndahi Jesus. Kenca jumpa, ipindokenna gelah lawes Jesus i daerahna e nari.

¹ Kenca Jesus ku das perahu, ngepar Ia, jenari seh Ia ku kutaNa. ² E maka itaruhken kalak ku Ia sekalak si pangpangen tare ingan medem. Perbahan idah Jesus maka tek kal kalak e man baNa, e maka Nina man si pang-pangen e, "Tetapkenlah ukurndu, o anakKu! Dosandu enggo ialemi." ³ Perbahan si e piga-piga kalak guru agama jungut-jungut i bas ukurna nina, "IlawanNa kap Dibata arah cakapNa e." ⁴ Ieteh Jesus kai si lit i bas ukur kalak enda, e maka nina, "Engkai maka jahat i bas ukurndu? ⁵ Apai kin sukahen ngatakenca, ’Dosandu enggo ialemi,’ asangken ngatakenca, ’Kekekenlah, jenari erdalanken!’ ⁶ Tapi Kucidahken man bandu maka Aku, Anak Manusia si isuruh Dibata erkuasa ngalemi dosa i doni enda." Jenari nina Jesus man si pang-pangen e, "Kekekenlah angkat ingan medemndu, jenari mulihlah!" ⁷ Keke ia jenari mulih ia ku rumah. ⁸ Mbiar kalak si nterem ngidah kejadin e. Ipujina Dibata si enggo mereken kuasa si bage belinna man manusia. ⁹ Lawes Jesus i bas ingan ndai nari janah asum Ia erdalan idahNa sekalak pengalo cuke kundul i bas kantorna. Gelarna Matius. Nina Jesus man bana, "Ikutken Aku." Tedis Matius jenari ikutkenna Jesus. ¹⁰ Asum Jesus ras ajar-ajarNa man i rumah Matius, nterem pengalo cuke ras kalak perdosa ikut man ras Jesus ras ajar-ajarNa. ¹¹ Piga-piga kalak Parisi ngidah si enda. E maka nina man ajar-ajar Jesus, "Engkai maka Gurundu e man ras pengalo cuke bage pe ras kalak perdosa?" ¹² Ibegi Jesus penungkunen kalak Parisi enda, e maka erjabap Ia, "Kalak si sehat labo ia perlu dokter, tapi kalak si sakit nge. ¹³ Laweslah, jenari pelajari kata si tersurat i bas Pustaka Si Badia enda, ’Keleng atendu nge si kuperluken, labo asuh-asuhen si ipersembahkenndu.’ Aku reh labo guna ndilo kalak si bujur akapna bana, tapi guna ndilo kalak perdosa." ¹⁴ Kenca bage reh ajar-ajar Johanes ndahi Jesus. Nungkun ia man Jesus nina, "Kami ras kalak Parisi megati erpuasa; engkai maka ajar-ajarNdu la erpuasa?" ¹⁵ Ngaloi Jesus, "Atendu kin maka temue i bas kerja erdemu bayu erceda ate adi si empo e ras ia denga? Tentu lang! Lit nge paksana ia sirang ras si empo e. Kenca si e me ia erpuasa. ¹⁶ Labo uis mbaru ibahan kalak guna ngerangkapi uis si enggo buruk. Sabap adi bage, reh belangna me rigatna ibahan pengerangkapina e. ¹⁷ Bage pe labo itamaken kalak lau anggur mbaru ku bas tambe kuling-kuling si enggo male. Sabap adi bage, pecah me tambe e, janah anggur pe mambur dingen tambe e pe lanai terpake. Tapi lau anggur mbaru itamaken kalak ku bas tambe kuling-kuling si mbaru. Alu bage anggur ras tambe tetap mehuli duana." ¹⁸ Asum Jesus ngerana denga ras ajar-ajar Johanes Peridiken, reh sekalak pengulu rumah pertoton kalak Jahudi. Erjimpuh ia i lebe-lebe Jesus, jenari nina, "Anakku e denga kal mate. Reh min Kam namaken tanNdu ku babona gelah ia nggeluh mulihi." ¹⁹ E maka keke Jesus, ikutkenNa pengulu e janah ajar-ajarNa pe ikut ras Ia. ²⁰ Asum Jesus erdalan, reh sekalak ndeheri Ia i pudi nari. Diberu e enggo sepuluh dua tahun dekahna bluding rusur. Idadapna uis Jesus, ²¹ sabap nina i bas ukurna, "Kudadap saja lah gia uis Jesus e, tentu malem penakitku." ²² Itulihken Jesus diberu e, jenari nina, "Malem atendu, o anakKu! Malem penakitndu erkiteken tek kam man bangKu." I bas paksa si e malem penakit diberu ndai. ²³ Jenari iterusken Jesus erdalan ku rumah pengulu ndai. Kenca seh i rumah, idahNa piga-piga kalak penarune janah kerina kalak nderkuhen. ²⁴ E maka nina Jesus, "Ndarat kam kerina! Anak enda labo mate, tunduh saja nge ia!" Tapi itawai kalak ndai Jesus. ²⁵ Kenca ndarat kalak e kerina, minter bengket Jesus ku kamar anak ndai. Ijemak Jesus tan anak e jenari minter nggeluh mulihi. ²⁶ Berita kerna si enda mbar ku belang-belang daerah e. ²⁷ Lawes Jesus i bas rumah pengulu e nari. Asum ia erdalan lit dua kalak pentang ngikut-ngikut Ia. Alu sora megang nina man Jesus, "Mekuah min atendu kami, o Anak Daud!" ²⁸ Kenca bengket Jesus ku bas sada rumah, reh duana kalak pentang e. Isungkun Jesus nina, "Tek kin kam ngasup Aku erbahan kam erpengidah?" Erjabap si pentang e, "Tek kami Tuan!" ²⁹ E maka idadap Jesus mata kalak pentang e jenari nina, "Jadilah bagi kinitekenndu e." ³⁰ Minter terang pengidahna duana. Jenari telkas pengerana Jesus man bana, niNa,"Ula kataken man ise pe kerna si enda!" ³¹ Tapi lawes kalak e duana, jenari iturikenna kerna Jesus ku belang-belang daerah e. ³² Asum ndarat si dua kalak e i rumah nari, reh ka piga-piga kalak ndahi Jesus. Ibabana sekalak si lanai beluh ngerana erkiteken iseluki setan. ³³ Kenca ipelawes Jesus setan e, minter ia beluh ngerana. Mamang ate kalak si nterem nina, "Langa pernah jadi bagenda i Israel!" ³⁴ Tapi nina kalak Parisi, "Pengulu setan kap mereken kuasa man baNa maka ngasup Ia mpelawes setan." ³⁵ Jenari isiari Jesus kuta-kuta si meriah ras kuta-kuta si kitik. Ngajar Ia i rumah-rumah pertoton kalak Jahudi. IberitakenNa Berita Si Meriah kerna Kinirajan Surga. IpepalemNa erbage-bage penakit kalak si nterem. ³⁶ Mekuah ate Jesus ngenehen kalak si nterem e, sabap enggo kote dingen lanai lit si ngepkepsa, bagi biri-biri si la ipermakani. ³⁷ E maka nina Jesus man ajar-ajarNa, "Mbelang man peranin, tapi kurang si ranisa. ³⁸ E maka pindolah man si Mada juma e, gelah isuruhNa si erdahin guna peranin e."

¹ Idilo Jesus ajar-ajarNa si sepuluh dua kalak, jenari iberekenNa man ajar-ajarNa e kuasa pelawesken setan ras pepalem erbage-bage penakit. ² Gelar rasul si sepuluh dua kalak e: Simon (igelari Petrus) ras Andereas, duana ia sembuyak; Jakup ras Johanes, duana ia anak Sebedeus; ³ Pilipus ras Bartolomeus; Tomas ras Matius pengalo cuke; Tadius ras Jakup anak Alpeus; ⁴ Simon Pejuang ras Judas Iskariot si ndayaken Jesus. ⁵ Jesus nuruh rasul si sepuluh dua kalak e. Ope berkat nina Jesus man kalak enda, "Ola kam bengket ku daerah si labo kalak Jahudi ntah ku kuta-kuta kalak Samaria. ⁶ Tapi dahilah kalak Israel biri-biri si enggo papak e. ⁷ Berkatlah jenari nindu erberita, ’Kinirajan Surga enggo reh deherna.’ ⁸ Pepalemlah kalak si penakiten, pegeluh kalak si enggo mate; pepalemlah kalak si gadamen, janah pelaweslah setan-setan. Kerina e ialokenndu la ertukur. E maka berekenlah man kalak si deban alu la ngaloken upah. ⁹ Ola baba emas, pirak ntah tembaga. ¹⁰ I bas perdalanenndu ola baba bekal, baju ose, sepatu ntah ciken, sabap kalak si erdahin patut ngaloken kai si iperlukenna. ¹¹ Adi bengket kam ku kuta si meriah ntah kitik, pepayolah lebe i bas kuta e ise si patut inganndu kesilang. Jenari kesilanglah kam ras ia ngayak kam lawes nadingken kuta e. ¹² Adi bengket kam ku sada rumah nindulah, ’Mejuah-juah!’ ¹³ Adi meriah ukur si empu rumah e ngalo-ngalo kam, tading i bas ia pasu-pasundu, tapi adi la kam ialo-alona, mulih man bandu pasu-pasundu e. ¹⁴ Adi i bas sada rumah ntah sada kuta la kam ialo-alo kalak ntah la kam ibegikenna, tadingkenlah rumah ntah kutana e, kisamken abu si lit i bas nahendu. ¹⁵ Inget! I bas wari pendungi pagi, beraten ukumenna asangken ukumen anak kota Sodom ras Gomora." ¹⁶ "Begikenlah! Kam Kusuruh bagi biri-biri ku tengah-tengah serigala. E maka kam arus cerdik bagi nipe janah lemah-lembut bagi nderapati. ¹⁷ Metengetlah, sabap nandangi lit me kalak si nangkap kam; ibabana kam ku pengadilen agama janah iligasna kam i bas rumah-rumah pertoton. ¹⁸ Iaduken kalak me kam man si erkuasa ras man raja-raja erkite-kiteken Aku. Alu bage banci iturikenndu Berita Si Meriah man si erkuasa ras raja-raja e bage pe man si labo kalak Jahudi. ¹⁹ Sanga kam ibaba ku pengadilen e, ola aru atendu kerna kai ras uga arus ikatakenndu, sabap i bas paksa si e Dibata petangkassa bandu kai si man turinkenndu. ²⁰ Kata-kata si ibelaskenndu e labo kata-katandu, tapi Kesah Bapandu nge si ngerana i bas kam. ²¹ Kalak si sembuyak ngendesken sembuyakna pagi gelah ibunuh, bapa pe bage nandangi anakna. Anak ngelawan orang tuana pagi janah ngendeskenca gelah ibunuh. ²² Segat pagi ate kalak kerina man bandu erkite-kiteken Aku. Tapi kalak si megenggeng seh ku kedungenna terkelin kap. ²³ Adi i bas sada kuta isiksa kalak kam, lompatlah ku kuta si deban. Inget! Ope denga serser isiarindu kuta-kuta Israel, enggo reh Aku, Anak Manusia si isuruh Dibata. ²⁴ Labo lit murid ganjangen asangken guruna; labo lit suruh-suruhen belinen asangken tuanna. ²⁵ Cukup min iakap murid adi enggo bali ia ras guruna, janah suruh-suruhen enggo bali ras tuanna. Adi tuan rumah igelari Balsebul, apai denga ka isi jabuna?" ²⁶ "Dage ola kam mbiar man manusia. Kerina si terligen teridah nge pagi, janah kerina buni-buni tereteh nge pagi. ²⁷ Si Kukataken man bandu i bas gelap, turikenlah e i bas terang, janah si ibegindu alu kusik-kusik momokenlah man kalak si nterem. ²⁸ Ola kam mbiar man kalak si ngasup munuh kula tapi la ngasup munuh tendi; tapi mbiarlah man Dibata si erkuasa namaken kula ras tendi ku naraka. ²⁹ Dua perik cipcip banci itukurndu alu piga-piga rupia saja; tapi labo sada pe perik e ndabuh ku taneh adi la bage peraten Bapandu. ³⁰ Janah buk takalndu pe enggo ibeligaiNa. ³¹ E maka ola kam mbiar, sabap ergan kap kam asangken melala perik cipcip!" ³² "Ise ngaku i lebe-lebe manusia maka ia ajar-ajarKu, ia pe pagi Kuakui i lebe-lebe BapangKu si i Surga. ³³ Tapi ise si merso i lebe-lebe manusia maka ia ajar-ajarKu, ia pe pagi Kupersoken i lebe-lebe BapangKu si i Surga." ³⁴ "Ola akapndu Aku reh ku doni enda maba dame. Aku reh labo maba dame, tapi erbahan perang. ³⁵ Aku reh erbahanca rubati anak si dilaki ras bapana, anak si diberu ras nandena, permain ras simetuana, ³⁶ janah kerina si lit i bas jabuna imbangna kerina. ³⁷ Ise kelengen atena bapana ntah nandena asangken Aku, la metunggung ia ras Aku; ise kelengen atena anakna si dilaki ntah si diberu asangken Aku, la metunggung ia ras Aku. ³⁸ Ise la mersan kayu persilangna ngikutken Aku, la metunggung jadi ajar-ajarKu. ³⁹ Kalak si mpertahanken kesahna ia kebenen kesah, tapi kalak si kebenen kesah erkiteken Aku, ia ndatken kegeluhenna." ⁴⁰ "Ise ngalo-ngalo kam, ia kap ngalo-ngalo Aku; janah ise ngalo-ngalo Aku, ialo-alona kap Ia si nuruh Aku. ⁴¹ Ise ngalo-ngalo nabi erkiteken ia sekalak nabi, ialokenna me upahna bagi ialoken sekalak nabi. Ise ngalo-ngalo kalak bujur erkiteken ia sekalak si bujur, ialokenna me upahna bagi ialoken kalak bujur. ⁴² Inget! Ise mereken sada cangkir lau mbergeh lah gia man sekalak ajar-ajarKu si kitikna kal erkiteken ia ajar-ajarKu, tuhu ialokenna nge pagi upahna."

¹ Kenca Jesus ngerana man ajar-ajarNa si sepuluh dua kalak, lawes Ia ku kuta-kuta si ndeher ngajar meritaken Berita Si Meriah. ² Johanes Peridiken si lit i bas penjara megi berita kerna pendahin Kristus. E maka isuruhna piga-piga kalak ajar-ajarna ndahi Jesus. ³ Nungkun ajar-ajarna e man Jesus nina, "Kam kin si ikataken Johanes si enggo ndeher e ntah itimai kami denga kalak si deban?" ⁴ Erjabap Jesus man bana, "Dahilah Johanes Peridiken, turiken man bana kerina si ibegindu ras iidahndu genduari enda; ⁵ kalak pentang erpengidah, si pang-pangen erdalan, si gadamen malem, si pasek erpemegi, si mate nggeluh mulihi janah Berita Si Meriah iberitaken man kalak musil. ⁶ Ketuahen kalak adi la tondel ukurna erkiniteken man bangKu!" ⁷ Kenca lawes ajar-ajar Johanes Peridiken, ibenaken Jesus ngerana man kalak si nterem kerna Johanes nina, "Asum idahindu ndube Johanes Peridiken ku taneh si melungun, kai kin si man nehenenndu? Atendu kin ngenehen beski si mole-ole iembus angin? Tentu lang! ⁸ Kai dage nehenenndu ku je? Sekalak si mejile uisna? Tentu lang, sabap kalak si mejile uisna inganna i bas istana raja nge. ⁹ Kataken man bangKu, kai nehenenndu ku je? Sekalak nabi? Payo, Kukataken pe man bandu maka si enggo idahndu e lebihen asangken sekalak nabi. ¹⁰ Sabap kerna Johanes Peridiken enggo isuratken i bas Pustaka Si Badia, ’Kusuruh persuruhenKu leben asangken Kam,’ nina Dibata, ’Ia kap nikapken dalan man bandu.’ ¹¹ Ingetlah! Johanes Peridiken kap si mbelinna i bas kerina manusia si enggo pernah nggeluh. Tapi si kitikna i bas Kinirajan Surga belinen asangken Johanes Peridiken. ¹² Mulai kin Johanes Peridiken ngajar seh genduari, Kinirajan Surga tetap ilawan kalak janah ikuasaina atena. ¹³ Sabap kerina pengajaren nabi-nabi ras Undang-undang si ibereken Musa ernubuat kerna Johanes. ¹⁴ Janah adi tek kam kai si ikataken nabi e, Johanes kap Elia si aturna reh. ¹⁵ Begikenlah, adi lit kin cupingndu! ¹⁶ Bagi kai nge ndia banci Kuandingken kalak si genduari enda? Kalak si genduari enda bali kap ras anak-anak erguro-guro i tengah kesain. Nina sada terpuk man terpuk si deban, ¹⁷ ’Enggo ipalu kami gendang guro-guro tapi la kam nggit landek. Enggo iendeken kami lagu tangis-tangis tapi la kam nggit tangis!’ ¹⁸ Sabap Johanes la ikut i bas kerja man-man ras minem-minem e maka ikataken kalak, ’Enggo setanen ia!’ ¹⁹ Genduari reh Aku, Anak Manusia si isuruh Dibata, ku kerja man-man ras minem-minem, e maka ikataken kalak, ’Nehenlah! Ia kalak rangap dingen peminem! TemanNa pengalo cuke ras kalak perdosa.’ Amin bage gia Dibata pentar kap janah kepentarenNa enggo ibenarken arah kerina pendahinNa." ²⁰ Kenca bage isumpahi Jesus kuta-kuta si i je enggo melala ibahanNa tanda-tanda sengget, sabap kalak kuta e la nggit jera i bas dosana nari. ²¹ Nina Jesus, "Cilaka me kam o Korasin! Cilaka me kam o Betsaida! Bicara i Tirus ras i Sidon min ndai ibahan tanda-tanda sengget si enggo ibahan i tengah-tengahndu, enggo min ndai jera kalak si i je. ²² Ingetlah! I bas wari pendungi pagi beraten ukumenndu asangken ukumen kalak Tirus ras kalak Sidon. ²³ Kam pe, o Kapernaum! Sura-surandu meganjang seh ku langit. Idabuhken nge kam pagi ku naraka! Bicara i Sodom min ndai ibahan tanda-tanda sengget si enggo ibahan i tengah-tengahndu, lit denga min ndai Kota Sodom e seh asa genduari. ²⁴ Ingetlah! I bas wari pendungi pagi beraten ukumenndu asangken ukumen Sodom." ²⁵ Paksa e nina Jesus, "O Bapa, Tuhan si erkuasa i Surga ras i doni! Bujur Kukataken man baNdu sabap enggo ipetangkasNdu man kalak si la erpemeteh kai si ibunikenNdu man kalak pentar ras erpemeteh. ²⁶ O Bapa, enda kap si ngena ateNdu." ²⁷ "Enggo ibereken BapangKu kerinana man bangKu. Ise pe la nandai Anak seakatan Bapa, janah ise pe la nandai Bapa seakatan Anak ras kalak si man bana enggo ipetangkasken Anak e." ²⁸ "Marilah kam si latih janah beraten, maka Kubereken pengadi-ngadinndu. ²⁹ Tamakenlah pasangenKu ku kudukndu janah erlajarlah i bas Aku nari. Sabap Aku melias janah meteruk ukurKu; alu bage idatndu me kemalemen ate. ³⁰ Sabap pasangen si Kubereken man bandu ntabeh mabasa, dingen baban si Kutamaken ku babondu menahang kap."

¹ La ndekahsa kenca si e, tupung wari Sabat kalak Jahudi, mentas Jesus arah perjuman gandum. Iputikken ajar-ajarNa gandum e, jenari igugutna sabap melihe ia. ² Ngidah si e nina kalak Parisi man Jesus, "Nehenlah, ajar-ajarNdu erbahan kai si la banci ibahan i bas wari Sabat rikutken Undang-undang Agama." ³ Ngaloi Jesus, "Langa kin pernah iogendu i bas Pustaka Si Badia kai ibahan Daud asum melihe ia ras teman-temanna? ⁴ Bengket ia ku rumah Dibata, ibuatna roti si enggo ipersembahken man Dibata, jenari ipanna ras teman-temanna. Rikutken Undang-undang Agama, imam-imam ngenca banci man roti e. ⁵ Langa kin iogendu i bas Undang-undang si isuratken Musa maka i bas tep-tep wari Sabat si tuhuna imam-imam ngelanggar Undang-undang wari Sabat i bas Rumah Pertoton, tapi la ia ersalah? ⁶ Tapi ingetlah, maka i jenda lit si lebihen asa Rumah Pertoton. ⁷ Lit kap tersurat i bas Pustaka Si Badia, ’Ate keleng nge si Kuperluken, labo asuh-asuhen si ipersembahkenndu.’ Adi tuhu-tuhu kin iertindu kata enda, labo iukumndu kalak si la ersalah. ⁸ Sabap Anak Manusia si isuruh Dibata, Ia kap Tuhan si engkuasai wari Sabat e." ⁹ Kenca bage, lawes Jesus ku rumah pertoton kalak Jahudi. ¹⁰ I rumah pertoton e lit sekalak sembelah tanna enggo kesip perban mate serapen. Piga-piga kalak si i je ersura-sura ndarami kesalahen Jesus. E maka isungkunna Jesus nina, "Rikutken Undang-undangta, banci kin ipepalem kalak sakit i bas wari Sabat?" ¹¹ Ngaloi Jesus nina, "Adi lit sekalak i bas kam ndabuh biri-birina ku bas lubang si mbages i bas wari Sabat, tentu itangkapna dingen ipedaratna biri-birina e. ¹² Manusia ergan nge asa biri-biri! E maka rikutken Undang-undangta mehuli nge nampati kalak i bas wari Sabat." ¹³ Jenari nina Jesus man si mate serapen tanna e, "Pepinter tanndu." Ipepinterna tanna, jenari minter malem bagi tanna si sembelah nari. ¹⁴ Ndarat kalak Parisi e, arih-arih ia guna munuh Jesus. ¹⁵ Kenca ieteh Jesus sura-sura kalak Parisi e, lawes Ia i bas rumah pertoton kalak Jahudi e nari. Nterem kalak ngikutken Ia. IpepalemNa kerina kalak si penakiten, ¹⁶ jenari ipersingetiNa gelah man ise pe ola ituriken kerna Ia. ¹⁷ Si enda jadi gelah seh kai si enggo ikataken Dibata arah Nabi Jesaya nina, ¹⁸ "Enda me persuruhenKu si enggo Kupilih, Ia me si Kukelengi dingen si ngena ateKu. Kubereken me KesahKu man baNa, janah Ia me si meritaken kebujurenKu man kerina bangsa. ¹⁹ Tapi labo Ia pagi rubat ntah serko bage pe labo Ia ngerana alu sora megang i pasar si meriah. ²⁰ Buluh si enggo mbeltuk la ipenggelkenNa, lampu si milep-ilep la inimpetiNa, la Ia erngadi-ngadi seh menang ibahanNa keadilen e. ²¹ Janah i bas Ia me kerina bangsa-bangsa erpengarapen." ²² Jenari itaruhken kalak man Jesus sekalak pentang dingen lanai beluh ngerana perbahan iseluki setan. Kenca Jesus mpelawes setan e, beluh ia ngerana dingen erpengidah. ²³ Mamang ate kalak si nterem nina sapih-sapih ia, "Banci jadi Ia nge Anak Daud si ipadanken e." ²⁴ Asum ibegi kalak Parisi kata enda ngaloi ia nina, "Balsebul pengulu setan nge mereken kuasa man baNa mpelawes setan e." ²⁵ Ieteh Jesus perukuren kalak Parisi enda e maka nina, "Kerajan si erbelah-belah kugapa pe sontar nge. Janah kuta ntah rumah tangga si erbelah-belah kugapa pe sontar nge. ²⁶ Bage pe adi Iblis pelawes Iblis, erbelah-belah kap ia. Adi bage ma sontar kerajanna? ²⁷ Dage, adi Balsebul kin mereken kuasa man bangKu, ise dage mereken kuasa man teman-temanndu mpelawes setan-setan e? Teman-temanndu e lah ertimbang kerna cakapndu e. ²⁸ Erkiteken Kupelawes setan-setan alu kuasa Kesah Dibata, e tandana maka Kinirajan Dibata enggo reh man bandu. ²⁹ Ise pe labo banci bengket ku rumah si mbisa ngerampasi erta-ertana, pala iketna lebe kalak si mbisa e. Kenca bage maka banci irampasina erta-erta si lit i bas rumah e. ³⁰ Ise si la mihak Aku ngelawan Aku kap; ise la ras Aku pepulungken, ia engkerapi kap. ³¹ E maka Kukataken man bandu: Kerina dosa ras cakap si encekuraki Dibata banci ialemi; tapi kalak si encekuraki Kesah Si Badia la ialemi Dibata ndigan pe. ³² Kalak si encekuraki Anak Manusia si isuruh Dibata banci ialemi Dibata; tapi kalak si encekuraki Kesah Si Badia asa ndigan pe la ialemi Dibata, subuk i bas kegeluhen si gundari, bage pe ibas kegeluhen si pagin." ³³ "Guna ndatken buah si mehuli arus lit batang si mehuli; adi batang la mehuli tentu buahna pe la mehuli. Sabap arah buahna itandai kap batangna. ³⁴ O, kesusuren nipe si jahat! Kuga nindu ngataken si mehuli adi ukurndu pe jahat nge? Sabap kai si ibelasken, e me si erburak i bas pusuh nari. ³⁵ Kalak bujur tentu teridah i bas ia nari si mehuli, ndarat i bas pusuh peratenna si mehuli nari; janah kalak jahat ndarat me si jahat i bas pusuh peratenna si jahat nari." ³⁶ "Tapi ingetlah! I bas wari pendungi pagi kerina si la mehuli si enggo ibelaskenndu arus ipertanggung-jawabken. ³⁷ Sabap arah kai si enggo ibelaskenndu me kam iadili." ³⁸ Jenari ngerana piga-piga guru agama ras kalak Parisi man Jesus nina, "O Guru, merincuh kal kami ngidah tanda sengget i bas Kam nari." ³⁹ Ngaloi Jesus, "Andiko, jahatna jelma si genduari enda! Kam kalak jahat mindo maka Kubahan tanda sengget? Labo Kubahan! La ibereken sada tanda sengget pe man bandu seakatan tanda sengget Nabi Juna ngenca. ⁴⁰ Sabap bagi Nabi Juna telu wari telu berngi dekahna i bas beltek nurung galang, bage ka me pagi Anak Manusia si isuruh Dibata e telu wari telu berngi dekahna i bas beltek taneh enda. ⁴¹ I bas wari pendungi pagi i lebe-lebe Pengadilen Dibata tedis kalak Niniwe ngaduken kam, sabap ia jera i bas dosana nari kenca ibegina Nabi Juna ngajar; janah si tuhuna i jenda lit beliden asa Nabi Juna! ⁴² I bas wari pendungi pagi i lebe-lebe Pengadilen Dibata tedis me Kemberahen i Selatan nari ngaduken kam, sabap ia reh i bas ingan si ndauh nari guna megiken pengajaren Salomo; janah si tuhuna i jenda lit beliden asa Salomo." ⁴³ "Adi enggo ndarat setan i bas sekalak jelma nari, lawes setan e, isiarina gurun pasir ndarami ingan ngadi. Adi la idatna ingan e, ⁴⁴ nina i bas ukurna, ’Mulihlah aku ku rumahku si enggo kutadingken e.’ E maka mulihken ia, idapetina rumah e enggo bersih isapui dingen enggo sikap. ⁴⁵ Jenari lawes ia, idilona pitu setan si jahaten asa ia. Kerina ia bengket ku bas janah i je me ia ringan seh maka reh kelekna kalak si ibengketina e. Bage me pagi jadina kalak jahat si genduari enda." ⁴⁶ Asum Jesus ngerana denga, reh nandeNa ras senina-seninaNa. Tedis ia i darat, sabap atena njumpai Jesus. ⁴⁷ E maka nina sekalak si i je man Jesus, "I darat nandeNdu, senina-seninaNdu, jumpa atena ras Kam." ⁴⁸ Tapi ngaloi Jesus, "Ise kin nandengKu? Ise kin seninangKu?" ⁴⁹ Jenari ituduh Jesus ajar-ajarNa janah nina, "Enda kap nandengKu ras senina-seninangKu! ⁵⁰ Ise ndalanken kai si ngena ate Dibata, BapangKu, ia kap seninangKu, turangKu, ras nandengKu."

¹ I bas wari si e berkat Jesus i rumah e nari ku tepi dano. I tepi dano kundul Ia guna ngajar. ² Perbahan nterem kal kalak pulung ngkeleweti Ia, e maka idatasiNa sada perahu. Kundul Ia i datas perahu e, janah kalak si nterem tedis i daraten, i tepi dano. ³ Jenari ituriken Jesus man kalak e erbage-bage pengajaren alu perumpaman. Nina Jesus, "Lit me sekalak perjuma lawes ku jumana ngambur benih. ⁴ Asum ia ngambur benih e, lit ndabuh ku dalan, jenari reh perik-perik manganisa. ⁵ Lit ka ndabuh ku taneh si erbatu-batu, si la mbages tanehna, e maka minter turah benih e. ⁶ Tapi kenca reh las matawari, minter melus dingen kerah sabap la mbages uratna. ⁷ Lit ka pe ndabuh ku tengah peren duri, turah benih e, tapi talu ibahan peren duri. ⁸ Tapi lit pe ndabuh ku taneh si mehumur, mehuli perturahna seh erbuah; lit si seratus buahna, lit si enem puluh janah lit si telu puluh. ⁹ Begikenlah adi lit kin cupingndu!" ¹⁰ Jenari reh ajar-ajar nungkun man Jesus nina, "Engkai maka alu perumpaman Kam ngerana man kalak si nterem e?" ¹¹ Erjabap Jesus, "Man bandu enggo ibereken Dibata kengasupen guna meteh rahasia Kinirajan Surga, tapi man kalak enda lang. ¹² Sabap man kalak si lit i bas ia itambahi gelah reh buena i bas ia; tapi man kalak si la lit, si lit i bas ia e pe ibuat i bas ia nari. ¹³ Aku ngerana man kalak e alu perumpaman sabap: aminna gia inehenna tapi la idahna, janah aminna gia idengkehna tapi la ibegi dingen la iangkana. ¹⁴ Alu bage enggo seh Kata Dibata si isuratken Nabi Jesaya, nina: ’Idengkehkenndu tapi la iangkandu; ipernehenndu tapi la idahndu. ¹⁵ Sabap enggo batu-batun ukur kalak enda; enggo pasek cupingna, ipit-pitkenna matana. Sabap adi la bage tentu erpengidah nge mata ras erpemegi nge cuping kalak enda, janah ukur kalak enda tentu erpengangka, e maka reh kalak enda ndahi Aku, nina Dibata, janah Kupepalem me kalak enda.’ ¹⁶ Tapi malem tuhu-tuhu atendu, sabap matandu erpengidah dingen cupingndu erpemegi. ¹⁷ Ingetlah! Nterem nabi bage pe nterem kalak si erkemalangen man Dibata, merincuh ngidah kai si iidahndu genduari e, tapi la banci, janah merincuh ia megi kai si ibegindu, tapi la dorek." ¹⁸ "Begikenlah dage, kai ertina perumpaman enda. ¹⁹ Kalak si megi Berita kerna Kinirajan e, tapi la iangkana bali kap ia ras benih si ndabuh ku tepi dalan. Si jahat reh nangko berita si enggo iamburken ku bas pusuhna e. ²⁰ Benih si ndabuh ku taneh si erbatu-batu bali ras kalak si minter ngaloken Berita e alu meriah ukur asum ibegina. ²¹ Tapi la mbages janah kentisik ngenca i bas ia. Adi ia ngenanami kesusahen ras iayak-ayak erkiteken Berita e, minter tondel ukurna. ²² Benih si ndabuh ku tengah-tengah peren duri bali ras kalak si ngaloken Berita e; tapi aru atena kerna geluhna ras merincuh kal ia bayak e maka kicat Berita e, janah e me erbahanca la erbuah. ²³ Tapi benih si ndabuh ku taneh si mehumur bali ras kalak si megi Berita dingen iangkana, jenari erbuah pe; lit si erbuah seratus, lit si enem puluh, lit si telu puluh." ²⁴ Jenari ituriken Jesus ka perumpaman man kalak e nina, "Adi Kinirajan Surga e banci iandingken ras kalak si nuan benih si mehuli i jumana. ²⁵ Tapi i bas sada berngi, asum kerina kalak enggo tunduh, iamburken musuhna ku juma e buah sesa. ²⁶ Kenca turah page e dingen kenca rumpah teridah me sesa ndai. ²⁷ E maka isungkun si erdahin i bas juma e perjuma ndai nina, ’O tuan, ma benih si mehuli nge mbaru enda isuanndu i jumandu e? I ja nari nge rehna sesa e?’ ²⁸ Erjabap tuan e, ’Musuh nge si ngamburken benih sesa ku je.’ Jenari nina si erdahin e, ’Iruahi kami dage sesa e?’ ²⁹ Erjabap tuan e, ’Ola, sabap adi iruahindu sesa e, banci jadi page e pe ikut meruah. ³⁰ Pelepas saja sesa e turah ras page seh rani. I bas paksa peranin e pagi kusuruh kalak si rani pepulung sesa lebe, jenari iberkisi gelah iambekken ku bas api. Kenca si e kusuruh ipepulungna page ku bas lumbungku.’ " ³¹ Ituriken Jesus ka perumpaman si deban nina, "Kinirajan Surga banci iandingken ras sengkebuah benih sawi si isuanken kalak i bas jumana. ³² Tuhu benih sawi benih si kitik i bas kerina benih sinuan-sinuan. Tapi kenca turah, batangna si galangna i bas batang gule-gulen si debanna. Bagi batang kayu kap sawi e seh maka perik-perik pe banci rasar i bas dahan-dahanna." ³³ Ituriken Jesus ka perumpaman si deban nina, "Kinirajan Surga e banci iandingken alu ragi. Ibuat sekalak diberu me ragi e, jenari iadukna ras telu tumba tepung seh niar jadi kembang." ³⁴ Kerina enda ipeseh Jesus man kalak si nterem alu perumpaman. Adi la arah perumpaman labo kai pe ikataken Jesus man kalak si nterem e. ³⁵ Alu bage seh me kai si ikataken Dibata arah nabi nina, "Alu perumpaman-perumpaman me Aku ngerana ras kalak e; Kuturiken me kai si terbuni mula tembe doni nari." ³⁶ Jenari mulih Jesus, itadingkenNa kalak si nterem e. Idahi ajar-ajarNa Ia, jenari nina man Jesus, "Turiken min man kami erti perumpaman sesa si turah i juma e." ³⁷ Ngaloi Jesus, "Si ngambur benih si mehuli e, e me Anak Manusia si isuruh Dibata; ³⁸ juma e, e me doni enda; benih si mehuli e, e me kalak si enggo ngendesken dirina man Dibata. Sesa e, e me kalak si ikuasai si Iblis; ³⁹ musuh si ngambur benih sesa e, e me Iblis. Paksa peranin, e me kedungen doni enda, janah si rani e me malekat-malekat. ⁴⁰ Bagi sesa ipepulung kalak si rani jenari itutungna, bage ka me pagi i bas pendungi doni enda. ⁴¹ Isuruh Anak Manusia e me malekat-malekatNa gelah ipepulungna kerina si mabai manusia erdosa i bas kinirajanNa, bage pe kerina manusia si erbahan jahat, ⁴² jenari iambekkenNa me kerina ku api. I bas api e, tangis me kerina dingen seh kal suina atena. ⁴³ Tapi kalak si ngelakoken si ngena ate Dibata ersinalsal bagi matawari i bas Kinirajan Bapana. Begikenlah, adi lit kin cupingndu!" ⁴⁴ "Kinirajan Surga e banci iandingken ras erta-erta si terbuni i tengah juma. Idat kalak erta e, jenari itamburina mulihi. Meriah kal ukurna, e maka lawes ia, idayakenna kerina erta-ertana, jenari itukurna juma e." ⁴⁵ "Adi Kinirajan Surga e banci iandingken ras sekalak perbinaga si ndarami mutiara si mejilena. ⁴⁶ Kenca jumpa ia mutiara si mejile e, lawes ia, idayakenna kerina si lit i bas ia, jenari itukurna mutiara ndai." ⁴⁷ "Kinirajan Surga e banci iandingken ras jala si iamburken ku lawit. Erbage-bage nurung ku bas jala e. ⁴⁸ Kenca dem jala e, irintak penjala me ku duru, jenari kundul ia milihi nurung e. Si mehuli itamakenna ku bas tong, janah si la mehuli iambekkenna. ⁴⁹ Bage pe i bas wari pendungi pagi: reh me malekat-malekat nerapken kalak jahat i bas kalak si ngelakoken si ngena ate Dibata. ⁵⁰ Kalak jahat e iambekkenna ku api. I bas api e tangis me ia kerina dingen mesui kal atena i je." ⁵¹ Jenari isungkun Jesus ajar-ajarNa e nina, "Iangkandu nge perumpaman enda kerina?" Erjabap kalak e, "Iangka kami." ⁵² E maka nina Jesus, "Bageme tep-tep guru Undang-undang si enggo jadi murid i bas Kinirajan Surga bali kap ia ras sekalak tuan rumah; ipedaratina erta-ertana si meherga si mbaru ras erta-ertana si enggo ndekah." ⁵³ Kenca dung ituriken Jesus perumpaman e, lawes Ia i bas ingan e nari ku kutaNa. ⁵⁴ Kenca Ia seh i kutaNa, ngajar Ia i bas rumah pertoton kalak Jahudi man anak kutaNa e. Mamang ate kalak nina, "I ja nari nge pemetehNa e dingen i ja nari nge KuasaNa erbahan tanda-tanda sengget e? ⁵⁵ Ma Anak tukang kayu kin Ia? Ma Maria kin nandeNa, janah Jakup, Joses, Simon ras Judas nge seninaNa? ⁵⁶ Ma turangNa pe i jenda nge kerina?" ⁵⁷ E maka la ialoken kalak Nasaret e Jesus. Perbahan si e nina Jesus man kalak e, "Sekalak nabi ipehaga kalak nge i japa pe; tapi i kutana ras i tengah-tengah keluargana lang." ⁵⁸ Perbahan la tek anak kuta e man Jesus, e maka la piga ibahan Jesus i je tanda-tanda sengget.

¹ Paksa si e, berita kerna Jesus seh man Herodes raja i daerah Galilea. ² E maka nina Herodes man pegawaina, "Si tuhuna Ia me Johanes Peridiken si enggo nggeluh mulihi. Perbahan si e nge maka erdahin kuasa-kuasa e i bas Ia." ³ Ope si e, enggo isuruh Herodes perajuritna nangkap Johanes Peridiken dingen namakenca ku bas penjara. Bage ibahan Herodes erkiteken lit sanditna ras Herodias ndehara sembuyakna Pilipus. ⁴ Perbahan pernah ikataken Johanes Peridiken man Herodes, "La patut iempoindu Herodias perbahan ia ndehara sembuyakndu," ⁵ e maka ersura-sura Herodes munuh Johanes Peridiken. Tapi mbiar Herodes man kalak Jahudi, sabap kalak Jahudi tek maka Johanes Peridiken e me kap sekalak nabi. ⁶ Asum iperingeti wari tubuh Herodes, landek anak Herodias si diberu i lebe-lebe Herodes ras temuena. Meriah kal ukur Herodes, ⁷ e maka erpadan ia man anak e nina, "Kubereken man bandu aminna kai pe ipindondu!" ⁸ Kenca iajar-ajari nandena nina, "Genduari, bereken dage man bangku takal Johanes Peridiken tare talam!" ⁹ Megi pemindonna enda, ceda ate Raja Herodes. Tapi perbahan enggo ia erpadan i lebe-lebe temuena, e maka isehkenna pemindonna e. ¹⁰ Isuruhna perajuritna ku penjara nampul kerahung Johanes Peridiken. ¹¹ E maka ibaba perajurit takal Johanes Peridiken tare talam, iberekenna man anak e, jenari ibereken anak e man nandena. ¹² Kenca bage reh ajar-ajar Johanes Peridiken ku penjara, ibuatna mait Johanes, jenari ikuburkenna. Kenca ikuburkenna, iberitakenna man Jesus. ¹³ Kenca ibegi Jesus berita kerna Johanes enggo mate, lawes Ia sisada-sisada tare perahu ku sada ingan si melenget. Tapi ieteh jelma si nterem ku ja Ia lawes, e maka berkat ia i bas kutana nari ngikutken Jesus arah daraten. ¹⁴ Asum nusur Jesus i perahu nari, idahNa kalak si nterem e. Mekuah ateNa, e maka ipepalemNa asakai kalak penakiten si lit i je. ¹⁵ Kenca ben wari, reh ajar-ajarNa ndahi Ia, jenari nina, "Ingan enda melungun janah wari pe enggo ben. Suruhlah kalak si nterem enda lawes gelah itukurna nakanna i kuta-kuta si ndeher i jenda nari." ¹⁶ Ngaloi Jesus, "Labo perlu ia lawes. Kamlah mereken nakanna." ¹⁷ Nina ajar-ajarNa, "Lima ngkibul roti ras dua ikan ngenca lit i bas kami." ¹⁸ Nina Jesus, "Baba ku jenda roti ras ikan e!" ¹⁹ Jenari isuruhNa kalak si nterem e kundul i bas dukut. Kenca ialokenNa roti ras ikan e, ertoto Ia ngataken bujur man Dibata, icepik-cepikna roti e, jenari iberekenNa man ajar-ajarNa gelah ielaken man kalak si nterem e. ²⁰ Kerina ia man seh besur. Kenca elah man ipepulung ajar-ajar asakai si iba, buena sepuluh dua sumpit. ²¹ Teremna kalak si man e kira-kira lima ribu kalak dilaki, janah la ikira diberu ras anak-anak. ²² Kenca man, isuruh Jesus ajar-ajarNa nangkih perahu gelah leben berkat ngepari dano. Berkat kenca ajar-ajarNa e, isuruhNa ka kalak si nterem mulih. ²³ Kenca bage lawes Jesus ku sada uruk guna ertoto. Seh berngi Jesus i bas ingan e sisada. ²⁴ Paksa si e perahu si idatasi ajar-ajar enggo ndauh ku tengah dano, janah menam-menam gedap sabap rembus angin meter nungsang perahu e. ²⁵ Tekuak manuk reh Jesus ndahi ajar-ajarNa; erdalan Ia i babo lau. ²⁶ Asum idah ajar-ajar e Jesus erdalan i babo lau, sengget dingen mbiar kal ia. Serko ajar-ajar e nina, "Begu!" ²⁷ Tapi minter ngerana Jesus man bana nina, "Tetapkenlah ukurndu! Aku kap enda, ola kam mbiar!" ²⁸ Jenari ngaloi Petrus, "O Tuhan, adi Kam kin e, suruhlah aku erdalan i babo lau ndahi Kam." ²⁹ Nina Jesus, "Marilah!" E maka nusur Petrus i perahu e nari, erdalan ia i babo lau ndahi Jesus. ³⁰ Tapi asum igejapna meter angin, mbiar ia, jenari menam pe ia gedap. Perbahan si e, serko ia nina, "O Tuhan sampati aku!" ³¹ Minter itangkap Jesus tan Petrus, jenari nina, "O kam si kurang kiniteken, ngkai maka la tetap ukurndu?" ³² Kenca Jesus ras Petrus nangkih perahu, minter ngadi angin si meter e. ³³ Jenari isembah ajar-ajar si idas perahu e Jesus nina, "Tuhu-tuhu me Kam Anak Dibata!" ³⁴ Seh me kalak e i tepi dano i taneh Genesaret. ³⁵ I Genesaret itandai kalak Jesus, e maka iberitakenna man kerina kalak si penakiten si lit i belang-belang daerah e, jenari ibabana kalak si penakiten e man Jesus. ³⁶ Ipindokenna man Jesus gelah banci min uisNa lah gia idadap kalak si penakiten e. Kerina kalak si ndadap uis Jesus e malem i bas penakitna nari.

¹ Jenari reh piga-piga kalak Parisi ras guru-guru agama Jahudi ndahi Jesus. Nina man Jesus, ² "Engkai maka ajar-ajarNdu la ngikuti adat nini-nininta? Ope man la iburihina tanna rikutken adat si dekah." ³ Ngaloi Jesus, "Kam pe ngkai maka ilanggarndu pedah Dibata erkiteken, atendu patuh man adat si ndekah saja? ⁴ Sabap nina Dibata, ’Mehamatlah man bapandu ras nandendu.’ Ise numpahi bapana ntah nandena la banci lang iukum mate kap ia. ⁵ Tapi nindu ngajar: Adi lit kalak si ngataken man orang tuana, ’Kai si banci ialokenndu i bas aku nari enggo kupersembahken man Dibata,’ ⁶ e maka kalak si bage lanai iarusken enghamati orang tuana e. Alu bage lanai meherga man bandu Kata Dibata erkiteken adat nini-ninindu. ⁷ O kalak si pekulah-kulah! Tuhu kal kai si ikataken Nabi Jesaya kerna kam, ⁸ ’Nina Dibata, bangsa enda ipujina Aku i bas biberna ngenca, tapi ukurna ndauh sirang i bas Aku nari. ⁹ La lit ertina isembahna Aku, sabap undang-undang agama si ajarkenna e me peraturen-peraturen manusia!’ " ¹⁰ Kenca bage idilo Jesus kalak si nterem e, jenari nina, "Begiken dingen ertikenlah! ¹¹ Labo si bengket arah babah erbahanca kalak keliamen, tapi si ndarat arah babahna nari nge erbahanca ia keliamen." ¹² Jenari reh ajar-ajarNa ndeheri Ia nina, "IetehNdu ka nge maka kitik ukur kalak Parisi megi KataNdu e?" ¹³ Erjabap Jesus, "Kerina si turah, si labo BapangKu si i Surga nuansa iruah nge pagi. ¹⁴ Labo man ukuren kalak Parisi e. Ia peminpin si pentang. Adi kalak pentang negu kalak pentang tentu duana ia ndabuh ku parik." ¹⁵ Jenari nina Petrus, "Turiken dage man kami erti perumpaman e." ¹⁶ Ngaloi Jesus, "Kam pe dage langa denga bo ngerti? ¹⁷ La iangkandu perumpaman e, maka si bengket ku bas babah jelma terus kap ku bas beltek jenari ipedarat ka? ¹⁸ Tapi kai si ndarat arah babah, i bas pusuh nari kap rehna; si e me erbahanca kalak keliamen. ¹⁹ Sabap i bas pusuh nari nge rehna sura-sura si jahat, si erbahanca ia munuh, erlua-lua, erlagu la mehuli, nangko, jadi saksi si perguak dingen numpahi. ²⁰ Enda me erbahanca kalak keliamen. Tapi man ope erburih bagi si ikatakenna labo erbahanca kalak la bersih rikutken aturen agama." ²¹ Jenari lawes Jesus ku daerah deherken Kuta Tirus ras Sidon. ²² I je reh sekalak diberu kalak Kanaan ndahi Jesus nina, "O Tuhan, Anak Daud! Mekuah min ateNdu aku sabap anakku iseluki setan. Mekelek kal iakapna." ²³ Tapi sengkebabah ranan pe Jesus la ngaloi. E maka ideheri ajar-ajarNa ia, jenari nina, "Pelawes min diberu e, sabap gejek ia arah pudinta." ²⁴ E maka ngaloi Jesus man diberu e, "Bangsa Israel desken biri-biri si enggo lalar kap, janah Aku isuruh Dibata man guna ia ngenca." ²⁵ Minter erjimpuh diberu e i lebe-lebe Jesus, jenari nina, "O Tuhan sampati min aku!" ²⁶ Ngaloi Jesus, "La patut ibuat nakan anak-anak jenari ibereken man biang." ²⁷ Nina diberu e, "Tuhu Tuhan, tapi biang pe man rimah-rimah si ndabuh i bas meja tuanna nari." ²⁸ E maka nina Jesus man bana, "Kam sekalak diberu si tuhu-tuhu tek man Dibata. Perbahan si e jadi me man bandu bagi sura-surandu." Janah paksa si e minter malem anakna ndai. ²⁹ Itadingken Jesus ingan e, jenari lawes Ia erdalan arah tepi dano Galilea. InangkihNa sada uruk, i je kundul Ia. ³⁰ Nterem jelma rehen ndahi Jesus; ibabana kalak si mate serapen, si cempang-cempang, si pentang, si pekak ras erbage-bage penakit si deban. Ipepedemna si penakiten e i lebe-lebe Jesus. Jenari ipepalem Jesus kerina. ³¹ E maka mamang ate kalak si nterem ngidah kalak pekak enggo banci ngerana, si mate serapen ipepalem, si cempang-cempang enggo banci erdalan alu mehuli, si pentang enggo erpengidah. Jenari ipujina Dibata si isembah kalak Israel. ³² Kenca bage idilo Jesus ajar-ajarNa jenari nina, "Mekuah ateKu ngenehen kalak si nterem enda, sabap enggo telu wari ia ras Aku janah genduari lanai lit kai pe i bas ia si man panganna. La ia Kupelepas lawes adi langa kin ia man, sabap banci kari lumben ia i tengah dalan." ³³ Nungkun ajar-ajarNa, "I bas ingan si melungun enda i ja ibuat pangan guna mesuri jelma si bagenda teremna?" ³⁴ Nina Jesus, "Piga lit i bas kam roti?" Erjabap ajar-ajarNa, "Pitu ngkibul roti janah lit piga-piga ikan." ³⁵ E maka isuruh Jesus jelma si nterem e kundul i bas taneh. ³⁶ IbuatNa roti si pitu ngkibul ras ikan e, jenari ertoto Ia ikatakenNa bujur man Dibata. Kenca bage icepik-cepikNa, jenari iberekenNa man ajar-ajarNa guna ielaken man kalak si nterem. ³⁷ Kerina ia man seh besur. Kenca elah man ipepulung ajar-ajar kerina si iba, buena lit pitu sumpit. ³⁸ Teremna si man e lit kira-kira empat ribu kalak, diberu ras anak-anak la ikira. ³⁹ Janah kenca isuruh Jesus kalak si nterem e mulih, lawes Ia ku perahu jenari erlayar ku Magdala.

¹ Piga-piga kalak Parisi ras kalak Saduki reh ncubai Jesus, e maka ipindona gelah icidahken Jesus tanda sengget mbuktikenca maka Dibata si nuruh Ia. ² Tapi ngaloi Jesus, "Kenca ben wari, adi megara langit, ikatakenndu, ’Berngi enda ugapa pe salang kal.’ ³ Tapi adi erpagi-pagi megara langit janah embun mekapal, ikatakenndu, ’Sendah ugapa pe udan me.’ Ietehndu kerna musim arah rupa langit, tapi la iangkandu kerna tanda-tanda jaman. ⁴ Andiko, jahatna kalak si genduari enda! Ipindondu tanda man bangKu. Labo Kubahan! Seakatan tanda Nabi Juna ngenca." Jenari lawes Jesus, itadingkenNa kalak Parisi ras kalak Saduki e. ⁵ Asum Jesus ras ajar-ajarNa ngepari dano, lupa ajar-ajarNa maba roti. ⁶ Nina Jesus man ajar-ajarNa, "Metenget dingen erjaga-jagalah kam nandangi ragi kalak Parisi ras kalak Saduki." ⁷ Rukur ajar-ajarNa e, jenari nina sapih-sapih ia, "Perbahan lupa kita maba roti maka bage nina." ⁸ Tapi ieteh Jesus kai si icakapken ajar-ajar e, e maka nina, "Engkai maka kerna la lit roti icakapkenndu? Kurang kal tuhu kinitekenndu! ⁹ Langa kin lalap iangkandu? La kin ingetndu asum Kucepik-cepik roti si lima ngkibul guna lima ribu kalak? Piga sumpit asum si e ipepulung ibana? ¹⁰ Bage pe kerna roti si pitu ngkibul guna empat ribu kalak, piga sumpit asum si e ipepulung ibana? ¹¹ Kuga maka la iangkandu, maka si Kukataken man bandu e labo kerna roti? Metengetlah kam nandangi ragi kalak Parisi ras kalak Saduki!" ¹² Kenca bage maka enggo iangka ajar-ajar maka maksud Jesus labo metenget nandangi ragi si lit i bas roti, tapi metenget nandangi ajaren kalak Parisi ras kalak Saduki. ¹³ Kenca seh Jesus i daerah Kesarea Pilipi, nungkun Ia man ajar-ajarNa nina, "Nina kalak, ise nge Anak Manusia si isuruh Dibata e?" ¹⁴ Erjabap ajar-ajarNa, "Lit ngatakenca maka Kam kap Johanes Peridiken. Lit ka ngatakenca Elia, bage pe lit ngatakenca maka Kam Jeremia ntah pe sekalak i bas nabi-nabi si deban." ¹⁵ Isungkun Jesus ka ajar-ajarNa, "Tapi iakapndu ise Aku enda?" ¹⁶ Erjabap Simon Petrus, "Kam kap Mesias, Anak Dibata si Nggeluh." ¹⁷ Ngaloi Jesus, "O Simon, anak Jona, ketuahen me kam, sabap labo manusia ngataken si enda man bandu, tapi BapangKu si i Surga kap. ¹⁸ Janah Kukataken pe man bandu: Kam kap Petrus, batu si enteguh, janah i babo batu palas enda me Kupajekken perpulungenKu, si la tertaluken aminna pe alu kinirajan kematen. ¹⁹ Kubereken me man bandu kunci Kinirajan Surga. Kai si irakutindu i doni enda, i Surga pe enggo kap irakuti; kai si iosarindu i bas doni enda, i Surga pe enggo kap iosari." ²⁰ Jenari ikataken Jesus man ajar-ajarNa gelah ola iturikenna man ise pe maka Ia kap Mesias si ipadanken Dibata. ²¹ I bas paksa si e nari mulai me ituriken Jesus alu jelas man ajar-ajarNa nina, "Aku la banci lang lawes ku Jerusalem, la banci lang Kunanami erbage-bage kiniseran i bas peminpin-peminpin Jahudi, imam-imam si mbelin ras i bas guru-guru agama Jahudi nari. Aku ibunuh tapi i bas wari si peteluken ipekeke ka i bas si mate nari." ²² Tapi iawin Petrus me Jesus, e maka ipandangna Ia nina, "Mbera-mbera ipedauh Dibata si e i bas Kam nari o Tuhan! Labo banci jadi e man baNdu!" ²³ Itulihken Jesus, jenari nina man Petrus, "Laweslah i bas Aku nari, o, Iblis! Isidingindu kap Aku. Perukurenndu perukuren manusia, labo perukuren Dibata." ²⁴ Jenari nina Jesus man ajar-ajarNa, "Ise atena ikut ras Aku arus ipersilahangna bana, ipersanna kayu persilangna jenari iikutkenna Aku. ²⁵ Sabap ise mpertahanken kegeluhenna, bene kap kegeluhenna e, tapi ise kebenen kegeluhenna erkiteken Aku, ialokenna me kegeluhenna e. ²⁶ Lit kin gunana man sekalak jelma, adi man bana gia kerina erta-erta doni enda tapi bene kegeluhenna si tuhu-tuhu? Tentu lang! Kai pe labo banci ibahan manusia gancih kesahna. ²⁷ Sabap reh me Anak Manusia si isuruh Dibata alu kemulian si mbelin dingen iarakken malekat-malekat Dibata. I bas paksa e pagi ibalasNa man sekalak-sekalak sue ras kai si enggo ibahanna. ²⁸ Ingetlah! I bas si pulung enda lit piga-piga kalak si langa mate ope denga idahna Anak Manusia si isuruh Dibata i bas KinirajanNa."

¹ Enem wari kenca si e Jesus mabai Petrus, Jakup, ras sembuyakna Johanes serap ku das deleng si meganjang. ² I lebe-lebe kalak enda teluna, salih rupa Jesus: ayoNa ersinalsal bagi terang matawari janah uisNa mbentar erndilap-ndilap. ³ Jenari idah ajar-ajar si telu kalak e Musa ras Elia ercakap-cakap ras Jesus. ⁴ E maka nina Petrus man Jesus, "O Tuhan, senang kal iakap kami i jenda; adi mehuli iakapNdu banci kubahan i jenda telu sapo-sapo, sada man baNdu, sada man Musa, janah sada nari man Elia." ⁵ Asum Petrus ngerana denga, rempet nusur embun ersinalsal ngelinggemi Jesus, Musa ras Elia. Jenari terbegi sora i bas embun e nari, "Enda me AnakKu si Kukelengi, Ia me si nehken peratenKu begikenlah Ia!" ⁶ Kenca ibegi ajar-ajar sora e, nembah ia, ayona seh ku taneh, janah mbiar kal ia. ⁷ Tapi ideheri Jesus ajar-ajar e, ikuitNa, jenari nina, "Tediskenlah! Ola kam mbiar!" ⁸ E maka jurgak ajar-ajar e ise pe lanai idahna i je seakatan Jesus. ⁹ Tupung erdalan nusur ku berneh, ngerana Jesus man ajar-ajarNa nina, "Ola iturikenndu man ise pe kerna kai si enggo idahndu ndai ope denga Anak Manusia si isuruh Dibata ipekeke i bas si mate nari." ¹⁰ Jenari nungkun ajar-ajar man Jesus, "Adi bage, ngkai maka ikataken guru agama Jahudi maka Elia arus reh lebe?" ¹¹ Ngaloi Jesus, "Tuhu Elia leben reh guna mpesikap kerinana. ¹² Tapi Kukataken man bandu: Elia si tuhuna enggo reh, tapi la ia itandai kalak, e maka ibahan kalak man bana bagi ate-atena. Bage me pe, Anak Manusia nandangi ngenanami kiniseran erkiteken perbahanen kalak e." ¹³ Kedungenna iangka ajar-ajar maka si imaksudken Jesus e me kap kerna Johanes Peridiken. ¹⁴ Kenca seh Jesus ras ajar-ajarNa ku jelma si nterem, reh sekalak dilaki ndahi Jesus. Erjimpuh ia i lebe-lebe Jesus ¹⁵ jenari nina, "O Tuan, mekuah min ateNdu man anakku! Anakku e tabun mekelek kal. Megati ia guling ku bas api bage pe ku bas lau. ¹⁶ Enggo kupindoken man ajar-ajarNdu gelah ipepalemna, tapi la ia ngasup pepalemsa." ¹⁷ E maka nina Jesus man ajar-ajarNa e, "O kam kalak si la erkiniteken, kam enggo salah! Asakai nari dekahna Aku ras kam? Asa kai nari dekahna Aku tahan ras kam? Baba anak e ku jenda!" ¹⁸ Isuruh Jesus gelah ndarat setan si neluki anak e. E maka ndarat setan e, jenari minter malem penakit anak e i bas paksa e ka. ¹⁹ Kenca bage reh ajar-ajar ndeheri Jesus. Asum la nai sada pe i je kalak si nterem, nungkun ajar-ajar e man Jesus nina, "Engkai maka la kami ngasup mpelawes setan e?" ²⁰ Ngaloi Jesus, "Perbahan kam kurang tek! Inget! Adi lit kinitekenndu asa buah sawi lah gia, banci kap ikatakenndu man uruk enda, ’Miser i bas inganndu enda nari ku jah!’, janah miser me uruk e. Labo lit kai pe si metahat man bandu. ²¹ [Tapi setan si bagi enda ndai labo terpelawes adi la kin alu gegeh ertoto dingen erpuasa."] ²² Asum Jesus ras ajar-ajarNa i Galilea, ngerana Jesus man ajar-ajarNa e nina, "Anak Manusia si isuruh Dibata lanai ndekah iendesken ku bas kuasa manusia. ²³ Ibunuhna me Ia, tapi i bas wari peteluken ipekeke Dibata Ia mulihi i bas si mate nari." Megi kata Jesus e ceda ate ajar-ajarNa. ²⁴ Kenca seh Jesus ras ajar-ajarNa i Kapernaum reh si ngutip yuren Rumah Pertoton njumpai Petrus. Nina man Petrus, "Gurundu nggalari yuren Rumah Pertoton ntah lang?" ²⁵ Erjabap Petrus, "Nggalar." Kenca Petrus mulih, Jesus leben mperkuanken ia nina, "O Simon, kuga nge iakapndu? I bas ise nari nge raja-raja doni enda ngutip yuren ntah pajak? I bas rayatna nari ntah i bas kalak si deban nari?" ²⁶ Ngaloi Petrus, "I bas kalak si deban nari." E maka nina Jesus, "Adi bage, rayatna la nggalar. ²⁷ Tapi gelah ola tondel ukur kalak e erkiteken kita, to lawes ku dano ngkawil. Apai nurung si pemena itangkapndu, uak babahna. I bas babahna idatndu kari duit pirak cukup guna nggalari yurenKu ras yurenndu. Buat duit pirak e jenari galari yurenta."

¹ Paksa si e reh ajar-ajar Jesus ndeheri Ia, jenari nina, "Ise si mbelinna i bas Kinirajan Surga?" ² Idilo Jesus sekalak danak-danak, isuruhNa tedis i lebe-lebe ajar-ajar, ³ jenari nina, "Ingetlah! Adi la kin kam tuhu-tuhu robah dingen bali ras danak-danak, asa ndigan pe kam labo banci bengket ku bas Kinirajan Surga. ⁴ Si mbelinna i bas Kinirajan Surga e me kalak si peteruk bana bali ras anak-anak enda. ⁵ Bage pe ise ngaloken danak-danak si bagenda i bas gelarKu, ialokenna kap Aku pe." ⁶ "Ise erbahanca maka sekalak i bas si kitik enda tondel ukurna erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit. ⁷ Cilaka kal doni enda sabap erbage-bage i je si erbahanca kalak erdosa! Tuhu la tersilahken si enda kerina tapi cilaka kal kalak si erbahanca dosa e jadi! ⁸ Adi tanndu ntah nahendu erbahanca kam erdosa, tekteklah e jenari ambekken! Ulin kam nggeluh sada tan ntah sada nahe asangken dua tanndu ras dua nahendu tapi iambekken kam ku bas api naraka si la ernimpet-nimpet. ⁹ Bage pe adi matandu erbahanca kam erdosa, pulditken ras ambekkenlah matandu e. Ulin kam nggeluh sada mata asangken dua matandu tapi kam iambekken ku bas api naraka." ¹⁰ "Ingetlah, ola la meherga iakapndu kalak si kitik enda. Sabap lit kap malekatna si katawari pe natap ku ayo BapangKu si i Surga. ¹¹ [Sabap Anak Manusia si isuruh Dibata reh engkelini si enggo papak!] ¹² Kuga kin pengakapndu? Adi lit sekalak lit biri-birina seratus, jenari bene sada, kuga nge ibahanna? Tentu itadingkenna biri-birina si siwah puluh siwah e i mbalmbal, jenari lawes ia ndarami biri-biri si bene e. ¹³ Kenca idatna, tentu riahen ukurna kerna biri-biri si sada e asangken biri-biri si siwah puluh siwah si la papak. ¹⁴ Bage pe Dibata, Bapandu, labo ateNa sekalak pe danak-danak enda papak." ¹⁵ "Adi ersalah seninandu man bandu, katakenlah man bana salahna e, asum kam dua-dua. Adi erkadiola ia, enggo kap idatndu ia mulihi. ¹⁶ Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: ’Tep-tep pengadun enggo sah adi lit dua ntah telu kalak saksi.’ ¹⁷ Tapi adi teman-temanndu e pe la ibegikenna, sehkenlah persoalen e man perpulungen. Adi perpulungen e pe la ibegikenna anggap sajalah ia bali ras kalak perbegu ntah pe kalak si muat cuke. ¹⁸ E maka Kukataken man bandu kerina: Kai si irakutindu i doni enda, enggo kap irakuti i Surga; kai si iosarindu i doni enda enggo kap mosar i Surga. ¹⁹ Tole Kukataken man bandu: Adi lit i bas kam dua kalak i doni enda ersada ukur kerna kai si ipindondu i bas pertotonndu man Dibata, tentu ibereken BapangKu si i Surga nge pemindonndu e. ²⁰ Sabap i ja lit dua ntah telu kalak pulung i bas gelarKu, Aku lit i tengah-tengahna." ²¹ Jenari reh Petrus ndeheri Jesus nina, "O Tuhan, piga kali banci kualemi seninangku si ersalah man bangku? Cukup pitu kali?" ²² Erjabap Jesus, "Lang, labo cukup pitu kali, tapi pitu puluh kali pitu kali. ²³ Sabap Kinirajan Surga bali kap ras sekalak raja si erkira atena ras juak-juakna. ²⁴ Kenca ibenakenna perkiran e, isuruhna ngadap sekalak juak-juak si rutang erjuta-juta. ²⁵ Tapi perbahan la ia ngasup nggalari utangna e, e maka isuruh raja gelah ia ndayaken dirina ras ndeharana bage pe anak-anakna bage ka pe kerina erta-ertana guna nggalari utangna e. ²⁶ Tapi erjimpuh juak-juak e i lebe-lebe raja, jenari nina, ’Sabar kam nimaisa tuan, kugalari nge pagi utangku e kerina.’ ²⁷ Mekuah ate raja e, e maka isasapkenna utang juak-juak e jenari isuruhna mulih. ²⁸ Asum juak-juak e erdalan mulih, jumpa ia ras sekalak juak-juak si deban si rutang man bana piga-piga ribu. Itangkapna dingen icekakna temanna e, jenari nina, ’Galari utangndu.’ ²⁹ Erjimpuh temanna e i lebe-lebena, jenari nina, ’Sabar kam nimaisa teman, kugalari nge pagi utangku e kerina.’ ³⁰ Tapi la ia sabar; itamakenna temanna e ku bas penjara seh bali utangna. ³¹ Ngidah si enda ceda ate teman-temanna si deban, e maka ipesehna man tuanna. ³² E maka isuruh raja me juak-juak ndai ngadap, jenari nina, ’Kam kalak jahat! Erkiteken pemindonndu, utangndu si bage buena enggo kusasapken. ³³ Kam pe aturna mekuah atendu temanndu sapih juak-juak bagi mekuah ateku kam.’ ³⁴ Merawa-rawa kal raja e, jenari itamakenna juak-juak e ku bas penjara seh igalarina kerina utangna." ³⁵ Tole nina, "Bage ka nge ibahan BapangKu si i Surga man bandu kerina adi la kin ialemindu seninandu terus ku bas pusuhndu."

¹ Kenca dung Jesus ngajar, itadingkenNa Galilea, lawes Ia ku daerah Judea, ku lepar Lau Jordan. ² Nterem kal jelma ngikutken Jesus. I je nterem kalak si penakiten ipepalemNa. ³ Jenari reh piga-piga kalak Parisi njumpai Jesus sabap atena ncubai Ia. Nungkun ia man Jesus nina, "Rikutken Undang-undang agamanta banci kin iulihken kalak ndeharana bagi ate-atena saja?" ⁴ Erjabap Jesus, "Langa kin iogendu kata si tersurat i bas Pustaka Si Badia, i ja ikataken maka mula-mulana ijadiken si Nepasa sekalak dilaki ras sekalak diberu? ⁵ Jenari nina si Nepasa e, ’Erkiteken si enda itadingken si dilaki me nande-bapana jenari ersada ia ras ndeharana janah si dua e enggo jadi sada.’ ⁶ E maka lanai bo ia dua, tapi sada. Dage si enggo ipersadaken Dibata la banci isirangken manusia." ⁷ Nina ka kalak Parisi, "Adi bage, ngkai maka ipelepas Musa kalak ngulihken ndeharana alu erbahan surat mulih?" ⁸ Erjabap Jesus, "Perbahan la kam terajarken maka ipelepas Musa kam ngulihken ndeharandu. Tapi tang-tangna nari labo bage. ⁹ Ise ngulihken ndeharana, adi labo erkiteken ndeharana e erlagu la mehuli, ia enggo erlua-lua adi iempoina diberu si deban." ¹⁰ Jenari nina ajar-ajarNa man baNa, "Adi bage kin, ulin me la erjabu." ¹¹ Ngaloi Jesus, "Labo kerina kalak ngaloken kata enda ndai, seakatan kalal si enggo itentuken Dibata. ¹² Sabap erbage-bage kap dalanna maka kalak la banci erjabu: lit erkiteken pertubuhna kin erbahanca ia la banci erjabu, lit erkiteken kalak si deban erbahanca ia la banci erjabu, janah lit ka erkiteken igejapna maka ia idilo guna dahin i bas Kinirajan Surga. Ise ngasup ngaloken kata enda, alokennalah." ¹³ Jenari reh piga-piga kalak maba danak-danak man Jesus. Atena gelah ipasu-pasu dingen itotoken Jesus danak-danak e. Tapi iambati ajar-ajar Jesus kalak e. ¹⁴ E maka nina Jesus man ajar-ajarNa, "Pelepaslah danak-danak e reh ndahi Aku, ola ambati ia, sabap man kalak si bagi enda kap Kinirajan Surga." ¹⁵ Ipasu-pasu Jesus danak-danak e kerina, jenari lawes Ia i bas ingan e nari. ¹⁶ I bas sada wari, reh sekalak dilaki njumpai Jesus. Nungkun ia man Jesus nina, "O Guru, perbahanen si mehuli si kuga nge arus kubahan gelah aku dat kegeluhen si tuhu-tuhu si la erkeri-kerin?" ¹⁷ Erjabap Jesus, "Engkai maka isungkunndu Aku kerna si mehuli? Si sada e kap ngenca si mehuli. Ikutken kerina pedah Dibata adi bengket atendu ku kegeluhen si tuhu-tuhu." ¹⁸ Nungkun ka ia, "Pedah si apai kin?" Erjabap Jesus, "Ola munuh; ola erlua-lua; ola nangko; ola jadi saksi si la tuhu; ¹⁹ mehamatlah man bapa ras nandendu; kelengi temanndu manusia bagi ikelengindu bandu." ²⁰ Nina anak perana e, "Kerina e enggo kudalanken. Kai nari kin si kurang?" ²¹ Erjabap Jesus, "Adi atendu gelah kam serta, laweslah, dayaken kerina erta-ertandu, jenari bereken duitna man kalak musil, alu bage ialokenndu me erta Surga; Jenari reh kam ngikutken Aku." ²² Kenca ibegi anak perana e kata Jesus, lawes ia, gulut ukurna sabap bayak kal ia. ²³ Jenari nina Jesus man ajar-ajarNa, "Kukataken man bandu: Tuhu-tuhu mesera kal kalak bayak bengket ku bas Kinirajan Surga. ²⁴ Kukataken pe tole man bandu: sukahen unta mentas arah lubang jarum asangken kalak bayak bengket ku bas Kinirajan Surga." ²⁵ Mamang kal ate ajar-ajar megi kata e, e maka nina, "Adi bage, ise nge banci terkelin?" ²⁶ Ipernehen Jesus ajar-ajarNa, jenari nina, "Si enda la banci jadi i bas manusia, tapi i bas Dibata kai pe banci jadi." ²⁷ Jenari nina Petrus man Jesus, "Nehenlah, enggo itadingken kami kerinana gelah ngikutken Kam. Dage kai nge pagi ialoken kami?" ²⁸ Nina Jesus man ajar-ajarNa, "Kukataken man bandu i bas doni si mbaru pagi, asum Aku, Anak Manusia si isuruh Dibata kundul erkuasa i bas kursi Kinirajan, kam pe kerina ajar-ajarKu kundul kundul pagi i bas sepuluh dua kursi guna ngadili bangsa Israel si sepuluh dua suku. ²⁹ Man kalak si enggo nadingken rumahna, seninana ntah turangna, bapana ntah nandena, anak-anakna ntah jumana erkiteken Aku, ibereken Dibata man bana seratus kali lipat janah ialokenna me kegeluhen si tuhu-tuhu si la erkeri-kerin. ³⁰ Tapi nterem kalak si arah lebe genduari jadi arah pudi pagi, janah nterem kalak si arah pudi genduari jadi arah lebe pagi."

¹ "Sabap Kinirajan Surga bali kap ras si mada kebun anggur. Erpagi-pagi si lampas ndarat ia i rumah nari ndarami kalak upahen guna erdahin i kebun anggurna. ² Kenca ersada arihna ras kalak upahen e maka upahna sada duit pirak sada wari rikutken gaji biasa, isuruhna kalak upahen ku kebun anggurna. ³ Jam siwah erpagi-pagi ndarat ka ia i rumah nari, idahna kalak dongal-dongal i tiga. ⁴ Nina man kalak e, ’To, berkatlah kam pe ku kebun anggurku erdahin. Bujur nge kari kubahan upahndu.’ ⁵ E maka berkat kalak e. Kira-kira jam sepuluh dua, bage pe jam telu karaben ndarat ka ia i rumah nari, janah bagi si ndai ka me perbahanenna. ⁶ Kira-kira jam lima karaben ndarat ka ia i rumah nari, jenari jumpa ia ras piga-piga kalak si tedis-tedis la erkai pe. Nungkun ia man kalak e nina, ’Engkai maka dongal-dongal saja kam gedang-gedang wari?’ ⁷ Erjabap kalak e, ’Sabap la lit si ndilo kami ngemo i jumana.’ Nina tuan e, ’To berkatlah kam pe ku kebun anggurku erdahin.’ ⁸ Nandangi gelap nina tuan e man mandurna, ’To dilo kalak upahen e, jenari galari upahna; si perpudina erdahin lebe bereken upahna janah si lebe erdahin pudi bereken.’ ⁹ Man kalak si mulai erdahin jam lima karaben iberekenna sada duit pirak sekalak. ¹⁰ Ngidah si enda, kalak si perlebena kal erdahin erpengakap maka lebih asa si e ialokenna. Tapi man bana igalari sada duit pirak ka nge sekalak. ¹¹ Kenca ialokenna duit e, jungut-jungut ia man tuan e. ¹² Nina, ’Kalak si pudin reh enda, sada jam ngenca erdahin, tapi kami erpagi-pagi nari seh ben iparpari las matawari ipeserindu ka nge upah kami.’ ¹³ Ngaloi tuan e man sekalak si jungut-jungut e, ’O teman, begiken! Bujur kap kubahan man bandu. Enggo kap ndai sue arihta maka sada duit pirak upahndu sada wari. ¹⁴ E maka to mulih, baba upahndu e. Man kalak si pudin erdahin asa kam, bali ateku kubahan ras man bandu. ¹⁵ Ma ate-ateku nge adi duitku? Ntah cian kin atendu ngidah aku melumbar?’ " ¹⁶ Jenari idungi Jesus kataNa nina, "Dage kalak si arah pudi jadi si arah lebe kap pagi, janah kalak si arah lebe jadi si arah pudi." ¹⁷ Sanga Jesus lawes ku Jerusalem, i tengah dalan iserapkenNa ajar-ajar si sepuluh dua, jenari nina, ¹⁸ "Begiken! Genduari kita i bas perdalanen ku Jerusalem. I jah iendesken kalak me Anak Manusia si isuruh Dibata, man imam-imam si mbelin ras guru-guru agama Jahudi, guna iukum mate. ¹⁹ Jenari iendeskenna man kalak si la nandai Dibata. Isaling-saling kalak si la nandai Dibata e Ia, iligasina, Jenari ipakukenna ku kayu persilang; tapi i bas wari si peteluken ipekeke Dibata mulihi." ²⁰ Jenari reh ndehara Sebedeus ras anakna ndahi Jesus. Nembah-erjimpuh ia i lebe-lebe Jesus nuriken pemindonna. ²¹ Nungkun Jesus man bana, "Kai kin atendu?" Erjabap pernanden e, "Ateku min maka duana anakku enda kundul sekalak arah kemuhen, sekalak arah kawesNdu, kenca Kam jadi Raja pagi." ²² Tapi nina Jesus man bana ras anakna si dua kalak e, "La kap iangkandu kai si ipindondu e. Ngasup kin kam minem tare calung kiniseran si nandangi reh man bangKu e?" Erjabap kalak e duana, "Ngasup." ²³ Nina ka Jesus man bana, "Payo katandu e, kam pe nandangi minem me tare calung kiniseranKu. Tapi kerna ise kundul arah kemuhen ras arah kawesKu labo Aku nentukenca. Ingan e pagi ibereken BapangKu man kalak si enggo ipilihNa." ²⁴ Kenca ajar-ajar si sepuluh kalak nari megi kerna si enda, merawa ia man si dua kalak enda. ²⁵ Perbahan si e idilo Jesus ajar-ajar e kerina jenari nina, "Enggo ietehndu maka pemerentah erkuasa nandangi rayatna janah peminpin-peminpin rate-ate nuruh rayatna. ²⁶ Tapi i bas kam labo bage. Ise atendu jadi si mbelinna, ia arus ngelai nandangi kam kerina; ²⁷ janah ise atendu jadi peminpin, ia arus jadi suruh-suruhenndu kerina ²⁸ bagi Anak Manusia si isuruh Dibata, reh labo guna ielai tapi guna ngelai, janah iendeskenNa kesahNa guna nebusi nterem jelma." ²⁹ Asum Jesus berkat ras ajar-ajarNa i Jeriho nari, nterem kal jelma ngikutken Ia. ³⁰ I tepi dalan si ibentasi Jesus lit kundul dua kalak pentang. Kenca ibegina Jesus sangana mentas erlebuh ia nina, "O, Tuhan! O, Anak Daud! Mekuah min atendu ngenehen kami." ³¹ Itembehi kalak si nterem e ia, tapi reh gangna ia erlebuh nina, "O, Tuhan! O, Anak Daud! Mekuah min atendu ngenehen kami." ³² Ngadi Jesus erdalan, idiloNa kalak pentang e duana. Kenca bage nina Jesus, "Kai kin atendu Kubahan man bandu?" ³³ Erjabap ia duana, "O, Tuhan, bahanlah min maka kami erpengidah!" ³⁴ Mekuah ate Jesus ngenehen ia duana. Idadap Jesus matana, e maka minter erpengidah, jenari ikutkenna Jesus.

¹ Kenca Jesus ras ajar-ajarNa seh i Betpage, i uruk Seton, enggo ndeher ku Jerusalem, isuruh Jesus dua kalak ajar-ajarNa leben. ² Nina, "To lawes ku kuta si arah lebendu ah; kenca seh kam ku bas kuta e, idapetindu kari sada kelede tambat dingen anakna deherken ia. Osari nalina jenari tegu duana ku jenda. ³ Adi lit kalak nungkun nindulah, ’Perlu Tuhan’; kenca bage nindu minter nge kari ipelepasna kelede e ibabandu." ⁴ Si enda jadi gelah seh kai si enggo ikataken Dibata arah nabi nina, ⁵ "Katakenlah man Kuta Sion, genduari reh Rajandu ndahi kam, meteruk ukurNa iersakNa kelede, anak kelede singuda denga." ⁶ Jenari lawes ajar-ajar ndai, idalankenna kai si enggo ikataken Jesus man bana. ⁷ Iteguna kelede e ras anakna. Kenca ikimbangken ajar-ajar e uisna i gurung kelede ndai, kenca bage maka iersak Jesus. ⁸ Kalak si nterem ngkimbangken uisna i dalan. Lit ka deba itektekna lambe jenari iamparkenna i dalan. ⁹ Kalak si nterem si erdalan arah lebe Jesus ras arah pudiNa ersurak-surak nina, "Pujin man Anak Daud! Ipasu-pasu Dibata Ia si reh i bas gelar Tuhan! Pujilah Dibata!" ¹⁰ Kenca bengket Jesus ku bas kuta Jerusalem guntar belang-belang kuta e. Nungkun anak kuta e nina, "Ise kin Ia?" ¹¹ Erjabap kalak si nterem e, "Enda kap Jesus, Nabi i kuta Nasaret daerah Galilea nari." ¹² Bengket Jesus ku Rumah Pertoton ipelawesNa kerina kalak si erbinaga ras si nukur i je. ItunggalingkenNa meja-meja kalak si nukari duit bage pe bangku-bangku kalak si erbinaga nderapati. ¹³ Jenari nina man kalak e, "Lit kap tersurat i bas Pustaka Si Badia maka nina Dibata, ’RumahKu igelari me pagi Rumah Pertoton.’ Tapi ijadikenndu Rumah e jadi asar penamun." ¹⁴ Jenari reh kalak pentang ras kalak mate serapen ndahi Jesus i bas Rumah Pertoton e; ipepalem Jesus ia. ¹⁵ Ngidah tanda sengget si ibahan Jesus e, ngilas ate imam-imam si mbelin ras guru-guru agama. Bage pe ngilas atena anak-anak si ersurak-surak i bas Rumah Pertoton si ngataken, "Pujin man Anak Daud!" ¹⁶ E maka isungkun kalak enda Jesus nina, "IbegiNdu nge kai si ikataken anak-anak enda?" Erjabap Jesus, "Kubegi! Langa kin pernah iogendu i bas Pustaka Si Badia kerna si e? I je lit kap tersurat, ’Enggo iajariNdu danak-danak ras anak si minem denga guna nehken puji-pujin si serta.’ " ¹⁷ Jenari itadingken Jesus kalak e, lawes Ia ku Betani janah i je Ia erberngi. ¹⁸ Pepagina lampas erpagi-pagi, asum Jesus ibas perdalanen mulih ku Jerusalem, melihe Ia. ¹⁹ I tepi dalan idahNa batang ara. IdeheriNa batang ara e, tapi la lit buahna, bulungna ngenca mbur. E maka nina Jesus man batang ara e, "Asa ndigan pe kam lanai erbuah!" Jenari minter kerah batang ara ndai. ²⁰ Ngidah si e mamang kal ate ajar-ajarNa. E maka nina ajar-ajar e man Jesus, "Kuga maka bage kal pedasna batang ara e kerah?" ²¹ Erjabap Jesus, "Ingetlah! Adi tek kam man Dibata dingen la monce-once ukurndu, ngasup kap kam erbahanca bagi si enggo Kubahan nandangi batang ara enda; janah labo terjeng si e saja, tapi ngasup pe kam ngataken man uruk enda, ’Angkatken bandu jenari benterken bandu ku lawit,’ e maka jadi me bage! ²² Adi tek kam, ialokenndu kap i bas Dibata nari kai saja si ipindondu man baNa arah pertotonndu." ²³ Jenari bengket ka Jesus ku Rumah Pertoton kalak Jahudi; asum Ia ngajar reh piga-piga imam si mbelin ras peminpin-peminpin kalak Jahudi njumpai Ia nina, "Kuasa kai lit i bas Kam erbahan si enda kerina? Ise mereken Kuasa e man baNdu?" ²⁴ Erjabap Jesus, "Kusungkun kam lebe, janah adi ijabapndu kari penungkunenKu, Kukataken man bandu Kuasa kai lit i bas Aku erbahan si enda kerina. ²⁵ I ja nari rehna kuasa Johanes Peridiken, ibas Dibata nari ntah ibas manusia nari?" E maka sisungkun-sungkunen ia sapih-sapih ia nina, "Kuga ninta? Adi ninta, ’I bas Dibata nari,’ kugapa pe niNa, ’Adi bage, ngkai maka la kam tek man Johanes Peridiken?’ ²⁶ Tapi adi ninta, ’I bas manusia nari,’ mbiar kita jelma si nterem, sabap kerina kalak e erpengakap maka Johanes Peridiken nabi." ²⁷ E maka erjabap kalak e man Jesus, "La ieteh kami." Perbahan si e nina Jesus man bana, "Aku pe la Kukataken man bandu alu kuasa kai Kubahan si enda." ²⁸ "Tapi kuga pengakapndu kerna si enda? Lit me sekalak perbapan, anakna dua kalak dilaki. Nina man anakna sintua, ’O anakku, to erdahin kam sekali enda i kebun anggur.’ ²⁹ Erjabap anakna e, ’Banci bapa,’ tapi la idalankenna. ³⁰ Jenari ikatakenna man anakna singuda si ikatakenna man anakna sintua ndai. Ngaloi anakna singuda e, ’Aku lang,’ tapi dungna erkadiola ia, e maka lawes ia erdahin ku kebun anggur e. ³¹ Si apai dage i bas si dua kalak enda nehken sura-sura bapana?" Erjabap kalak e, "Anak singuda." E maka nina Jesus man bana, "Leben nge pemungut cukai ras diberu si dahinna erlua-lua bengket Kinirajan Dibata asa kam. ³² Sabap kerehen Johanes Peridiken nuduhken man bandu dalan kegeluhen si ituduhken Dibata, janah la kam tek; tapi pengalo cuke ras diberu-diberu si pendahinna erlua-lua e, tek. Janah aminna enggo pe idahndu si e, lalap la erkusur ukurndu dingen lalap kam la tek man Tuhan." ³³ Nina Jesus, "Begiken lah perumpaman enda. Lit sekalak si nuan anggur i bas jumana. Jenari ibidena kelewet. Ikurukna lubang ingan merehi buah anggur janah ipajekkenna sada menara ingan erjaga. Kenca bage isewakenna kebun e man kalak si newa. Jenari lawes ia ku negeri si deban. ³⁴ Kenca seh peranin buah anggur, isuruh tuan e juak-juakna ngelegi sewa kebun e. ³⁵ Tapi itangkap si newa kebun ndai juak-juak e, deba ipekpekina, deba ibunuhna janah deba ibenterina alu batu. ³⁶ Isuruh tuan e ka juak-juak si deban teremen asa si arah lebe, tapi e pe bagi si arah lebe ndai ka nge ibahanna. ³⁷ E maka dungna anakna jine isuruhna, sabap nina i bas ukurna, ’Tentu mehangke ia ngenehen anakku.’ ³⁸ Tapi asum idah si newa ndai anak tuan e nina sapih-sapih ia, ’Enda kap anak tuan si mada kebun anggur enda. Mari si bunuh ia gelah man banta kebunna enda.’ ³⁹ E maka itangkapna anak tuan e, iambekkenna ku darat kebun, jenari ibunuhna. ⁴⁰ Dage, kenca reh tuan si mada kebun e, kuga nge ibahanna si newa kebun anggur ndai?" ⁴¹ Ngaloi kalak e man Jesus, "Tentu ibunuhna si newa kebun anggur si jahat e, jenari ipesewakenna kebun e man kalak si deban si nggit mereken sewana i bas paksa peranin." ⁴² Nina Jesus man bana, "Langa kin pernah iogendu kai si tersurat i bas Pustaka Si Badia? Nina, ’Batu si iambekken tukang e kap jadi batu palas. Enda perbahanen Tuhan kap; janah e tuhu-tuhu sengget kita natapsa ban ulina!’ " ⁴³ "Dage ingetlah," nina Yesus, "kerina hakndu i bas Kerajan Dibata ibuat ibas kam nari jenari ibereken man bangsa si patuh ngikutken perentah Dibata. ⁴⁴ [Ise ndabuh ku batu enda getem me ia; janah ise idabuhi batu e meripuk me ia."] ⁴⁵ Kenca ibegi imam-imam si mbelin ras kalak Parisi perumpaman e, ietehna maka kerna ia me si ikataken Jesus i bas perumpaman e. ⁴⁶ E maka idaramina dalan nangkap Jesus. Tapi mbiar ia man kalak si nterem sabap kalak si nterem ngakui Jesus sekalak nabi.

¹ Ngerana ka Jesus man kalak si nterem alu perumpaman nina, ² "Kinirajan Surga e bali kap ras sekalak raja erbahan kerja erdemu bayu anakna. ³ Isuruhna suruh-suruhenna ngelegi kalak si enggo iundangna, tapi sekalak pe la nggit reh. ⁴ E maka isuruh raja e ka suruh-suruhenna si deban nina, ’Katakenlah man kalak si enggo iundang e: Nina raja, enggo sikap kerina pangan; lembu ras asuh-asuhenku si mbur enggo igeleh; e maka marilah ku kerja erdemu bayu enda!’ ⁵ Tapi kalak si enggo iundang e la megiken kalak si erlegi enda. Lit lawes ku juma, lit lawes ndahiken usahana, ⁶ janah lit ka pe si nangkap suruh-suruhen raja ndai, iligasina jenari ibunuhna. ⁷ Perbahan si e merawa raja. Isuruhna perajurit-perajuritna ngkernepken kalak si munuh ndai bage pe enciluk kuta kalak si munuh e. ⁸ Jenari nina man suruh-suruhen, ’Enggo sikap pangan guna kerja erdemu bayu, tapi kalak si enggo kuundang erpenulak. ⁹ E maka to lawes ku simpang-simpang pasar, undanglah ku kerja enda asakai jelma si ijumpaindu.’ ¹⁰ Berkat suruh-suruhen e ku simpang-simpang pasar, iundangna kerina kalak si ijumpaina subuk kalak jahat bagepe kalak bujur seh maka enggo dem ingan kerja erdemu bayu ndai. ¹¹ Asum reh raja e ku bas njumpai temue, idahna sekalak si la isambarina uisna asum ia bengket ku bas ingan erdemu bayu e. ¹² Nungkun raja e man bana nina, ’O teman, ngkai maka la isambarindu uisndu muatndu bengket ku bas ingan enda?’ Sinik saja ia. ¹³ E maka nina raja man suruh-suruhenna, ’Iketlah tanna ras nahena, jenari ambekken ia ku ingan si gelapna kal. I je tangis ras mesui kal atena!’ " ¹⁴ E maka idungi Jesus cakapNa nina, "Sabap nterem kalak si idilo, tapi la piga si ipilih." ¹⁵ Jenari lawes kalak Parisi e arih-arih guna ncubai Jesus alu penungkunen. ¹⁶ E maka raduken piga-piga kalak i bas parte Herodes nari, Kalak Parisi nuruh ajar-ajarna ndahi Yesus. Nina persuruhen e, "O, Guru, ieteh kami maka Kam kalak bujur. Kam ngajar alu terus terang kerna sura-sura Dibata nandangi manusia, alu la biar-biaren man ise pe. Sabap la erpilihen manusia man Bandu. ¹⁷ Kataken dage man kami, la kin ngelanggar Undang-undang agama Jahudi adi igalari pajak man pemerentah Roma?" ¹⁸ Tapi ieteh Jesus maka jahat ukur kalak enda e maka nina, "O kalak pekulah-kulah! Engkai maka icubaindu Aku? ¹⁹ Cidahken lebe man bangKu selambar duit!" Icidahken kalak e selambar duit man Jesus. ²⁰ Jenari nina Jesus, "Gambar ras gelar ise kin enda?" ²¹ Erjabap kalak ndai, "Gambar ras gelar kepala pemerentah Roma." Jenari nina Jesus man bana, "Adi bage, bereken man pemerentah Roma kai patut ibereken man bana, janah berekenlah man Dibata kai patut ibereken man Dibata." ²² Megi si enda jengang kalak ndai. Jenari lawes ia nadingken Jesus. ²³ I bas wari si ndai reh piga-piga kalak Saduki ndahi Jesus. Kalak enda me si ngatakenca maka manusia labo lit keke i bas si mate nari. ²⁴ Nungkun ia man Jesus nina, "O Guru! Nina Musa, ’Adi sekalak dilaki mate nadingken ndeharana, janah la lit pupusna, e maka diberu si enggo mbalu e arus ilakomangani senina si mate ndai gelah ipupusna anak jadi gancih si enggo mate e.’ ²⁵ Lit me nai i jenda ringan pitu kalak dilaki, pituna ia sembuyak. Empo si ntua, jenari mate ia. Janah perbahan la lit pupusna e maka ilakomangani si nomor dua diberu e. ²⁶ Mate ka si nomor dua e, la lit pupusna. Bage ka me pe jadi nandangi si nomor telu janah bage me seterusna seh pituna ia enggo ngempoi diberu e. ²⁷ Dungna diberu e pe mate. ²⁸ Dage, asum manusia keke i bas si mate nari, ndehara ise nge pagi ia? Sabap pituna ia enggo erjabu ras diberu e." ²⁹ Ngaloi Jesus, "Enggo lepak kal kam! Sabap la iangkandu Pustaka Si Badia, bage pe la iangkandu Kuasa Dibata. ³⁰ Sabap kenca manusia keke i bas si mate nari, ia bali kap ras malekat-malekat i Surga, lanai ia empo ntah pe sereh. ³¹ Dage kerna si mate nggeluh mulihi, langa kin pernah iogendu i bas Pustaka Si Badia kai si ikataken Dibata man bandu? Nina Dibata, ³² ’Aku kap Dibata si tetap isembah Abraham, Dibata si tetap isembah Isak ras Dibata si tetap isembah Jakup.’ Ertina Ia labo Dibata si isembah kalak mate tapi Dibata si isembah kalak si nggeluh." ³³ Jengang kal kalak si nterem megi pengajaren Jesus enda. ³⁴ Kenca idah kalak Parisi maka lanai pang kalak Saduki nungkun man Jesus, arih-arih ia, ³⁵ jenari sekalak i bas ia nari, e me guru agama, ncubai Jesus alu penungkunen nina, ³⁶ "O Guru, perentah si apai kin si pentingna kal i bas kerina Undang-undang agama?" ³⁷ Erjabap Jesus, "Kelengilah Tuhan Dibatandu asa ukurndu, asa tendindu, dingen asa gegehndu lit. ³⁸ Enda me perentah si mbelinna dingen si pentingna. ³⁹ Si peduaken bali ras si ndai e me, ’Kelengilah temanndu manusia bagi kam ngkelengi dirindu.’ ⁴⁰ Kerina Undang-undang agama si ibereken Musa ras nabi-nabi erpalasken duana perentah enda ndai kap." ⁴¹ Asum kalak Parisi e pulung denga, nungkun Jesus man bana, nina, ⁴² "Kuga pengakapndu kerna Mesias si ipadanken Dibata e? Kesusuren ise kin Ia?" Erjabap kalak e, "Kesusuren Daud." ⁴³ Jenari nina Jesus, "Adi bage, ngkai maka ikataken Daud Ia Tuhan? Sabap Daud si ipengaruhi Kesah Si Badia ngataken, ⁴⁴ ’Nina Tuhan man Tuhanku: Kundulken arah kemuhenku, seh Kutamaken imbang-imbangndu i teruh tapak-tapak nahendu.’ ⁴⁵ Dage, adi Daud erlebuh man Mesias si ipadanken Dibata e ’Tuhan’, kuga banci Mesias e kesusuren Daud ka?" ⁴⁶ Sekalak pe la lit ngasup ngaloi Jesus; janah mulai i bas wari nari ise pe lanai pang nungkun man Jesus.

¹ Jenari ngerana Jesus man kalak si nterem bage pe man ajar-ajarNa, ² nina, "Guru-guru agama ras kalak Parisi e, si nerusken ajar-ajaren Musa kap. ³ E maka ikutkenlah kai si ikatakenna man bandu. Tapi ola usih si ibahanna, sabap kai si iajarkenna la idalankenna. ⁴ Baban si mberat iampekenna ku bara kalak tapi ia sitik pe la nggit mabasa. ⁵ Ntah kai gia ibahanna, tujunna e me gelah ia idah kalak. Perdiatekenlah tulisen ayat-ayat Pustaka Si Badia si ililetken i perdempakenna ras i bas pergelangen tanna! Bage pe perdiatekenlah ambu-ambu uisna si nggedang! ⁶ Lit kenca kerja-kerja kundul ia arah ingan si mehamat, janah i bas rumah pertoton pe arah lebe ia kundul; ⁷ atena gelah mehamat kalak man bana i tiga janah atena ikataken kalak ia ’Guru’. ⁸ Tapi kam, ola kam nggit ikataken kalak ’Guru’, sabap sada ngenca Gurundu, janah kam kerina ersenina. ⁹ Ola ise pe i doni enda ikatakenndu ’Bapa’, sabap sada ngenca Bapandu e me Dibata. ¹⁰ Bage pe ola kam nggit ikataken kalak ’Peminpin’, sabap sada ngenca Peminpinndu, e me Mesias si ipadanken Dibata. ¹¹ Ise si mbelinna i bas kam, ialah si ngelai kam kerina. ¹² Ise si peganjangken bana, ipeteruk Dibata me, janah ise si peteruk bana, ipeganjangken Dibata me Ia." ¹³ "Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah! Iolang-olangindu kalak gelah ola bengket ku bas Kinirajan Surga. Kam jine la nggit jadi rayat Kinirajan Surga, janah kalak si deban pe iolang-olangindu. ¹⁴ [Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Ibuatndu erta-erta diberu si enggo mbalu jenari ibahanndu pertoton si nggedang i lebe-lebe jelma si nterem. Perbahan si enda, kugapa pe reh beratna ukumenndu.] ¹⁵ Andiko, cilaka kal kam o guru-guru agama, janah kam pe o, kalak Parisi! O, kalak pekulah-kulah! Isiarindu lawit ras daraten si mbelang guna ndatken sekalak jelma gelah ikutkenna agamandu; tapi kenca idatndu, ijadikenndu ia jadi calon naraka si dua kali lipat jahaten asangken kam. ¹⁶ Andiko, cilaka kal kam, o peminpin-peminpin si pentang! Sabap nindu, ’Adi lit kalak ersumpah i bas gelar Rumah Pertoton, sumpahna e la esah; tapi adi ersumpah i bas gelar emas si lit i bas Rumah Pertoton, sumpahna e esah.’ ¹⁷ Kam kalak motu dingen pentang! Apai kin pentingen, emas ntah Rumah Pertoton si erbahanca emas e badia? ¹⁸ Bage pe nindu, ’Adi lit kalak ersumpah i bas gelar batar-batar ingan ersembah, sumpahna e la esah; tapi adi ersumpah kalak i bas gelar persembahen si lit i datas batar-batar e, sumpahna e esah.’ ¹⁹ Kam kalak pentang! Apai kin pentingen, persembahen ntah batar-batar si erbahanca persembahen e badia? ²⁰ Dage ise ersumpah i bas batar-batar, ia ersumpah i bas gelar batar-batar ras i bas gelar persembahen si lit i datas batar-batar e. ²¹ Bage pe ise ersumpah i bas gelar Rumah Pertoton, ia ersumpah i bas gelar Rumah Pertoton ras i bas gelar Dibata si ringan i je. ²² Ise ersumpah i bas gelar Surga, ia ersumpah i bas gelar kursi Kinirajan Dibata ras i bas gelarNa si kundul i bas kursi e. ²³ Andiko, cilaka kal kam o, guru-guru agama, janah kam pe o, kalak Parisi! O, kalak pekulah-kulah. Ipersembahkenndu man Dibata sepersepuluh i bas ulihndu nuan-nuan nari, seh maka jera, lenga ras serei pe ipersembahkenndu. Tapi si pentingna i bas Undang-undang la iperdiatekenndu, e me kap keadilen, keleng ate, ras kinibujuren. Si enda arus idalankenndu alu la ngelupaken si debanna. ²⁴ O, peminpin-peminpin si pentang! Iaguindu laneng i bas inemendu, tapi unta ibendutndu. ²⁵ Andiko, cilaka kal kam, o, guru-guru agama, janah kam pe o, kalak Parisi! O, kalak pekulah-kulah! Arah darat ngenca iburihindu cangkir ras pinggandu, tapi arah bas meluat kal. ²⁶ O, kalak Parisi si pentang! Burihi lebe cangkir e arah bas gelah arah darat pe bersih. ²⁷ Andiko, cilaka kal kam o, guru-guru agama, janah kam pe o kalak Parisi! O, kalak pekulah-kulah! Bali kal kam ras kuburen si icet mbentar; arah darat tatapen mejile, tapi i bas dem tulan-tulan kalak mate ras si macik-macik. ²⁸ Bage me kam! Tatapen bujur, tapi kam pekulah-kulah janah ukurndu jahat kal kepe." ²⁹ "Andiko, cilaka kal kam, o guru-guru agama janah kam pe o, kalak Parisi! O, kalak pekulah-kulah! Iseminndu kuburen nabi-nabi janah ipejilendu tugu kalak bujur, ³⁰ janah nindu, ’Adi enggo min nai kami lit asum nini-nininta nggeluh, tentu la kami nggit munuh nabi-nabi e.’ ³¹ Alu bage, si tuhuna kam enggo ngaku maka kam kesusuren si munuh nabi-nabi e. ³² Dage terusken dingen dungilah kai si enggo ibenaken ninindu! ³³ O, nipe! O, kesusuren nipe upar. Arah apai nari dalanndu pulah i bas ukumen naraka nari? ³⁴ Kukataken man bandu: Kusuruh pagi reh ndahi kam piga-piga kalak nabi, kalak pentar ras guru; tapi deba pagi ibunuhndu, ipakukenndu ku kayu persilang janah deba iligasindu i bas rumah pertotondu, janah iayak-ayakndu i bas sada kuta nari ku kuta si deban. ³⁵ E maka man bandu me ndabuhna ukumen kalak si enggo munuh kalak si la ersalah, mulai i bas pembunuhen Abil nari seh ku pembunuhen Sakaria, anak Barahia, si ibunuhndu kelang-kelang Rumah Pertoton ras batar-batar ingan persembahen. ³⁶ Kukataken man bandu: Kerina ukumen kalak si munuh e ndabuh man kalak si genduari enda." ³⁷ "O Jerusalem, Jerusalem! Ibunuhindu nabi-nabi janah ibenterindu alu batu kalak si isuruh Dibata ndahi kam! Enggo piga-piga kali ateKu pepulung bangsandu bagi indung manuk ngkeremken anakna i teruh kabengna, tapi la kam nggit! ³⁸ Tuhu-tuhu me pagi itadingken Dibata rumahndu. ³⁹ Kukataken man bandu: Lanai bo pagi Aku idahndu seh paksana ikatakenndu, ’Dibata kap si masu-masu Ia si reh i bas gelar Tuhan.’ "

¹ Ndarat Jesus i bas Rumah Pertoton nari. Asum Ia lawes nadingken Rumah Pertoton e, ideheri ajar-ajarNa Ia, jenari ituduhken ajar-ajar e man baNa Rumah Pertoton. ² Nina Jesus man ajar-ajarNa, "Ma idahndu kin kerina enda? Kukataken man bandu: Kerina nge pagi runtuh, lanai sada batu pe pagi tading i bas inganna." ³ Kenca kundul Jesus i Uruk Seton, reh ajar-ajarNa ndeheri Ia jenari ercakap-cakap ia ras. Nina ajar-ajarNa man baNa, "Kataken min man kami: Ndigan kin kerina enda jadi? Kai nge pagi tanda-tanda kerehenNdu dingen kai nge pagi tanda-tanda kedungen jaman enda?" ⁴ Erjabap Jesus, "Jagalah gelah ola kam papak ibahan kalak. ⁵ Nterem pagi kalak reh i bas gelarKu nina, ’Aku kap Mesias si ipadanken Dibata,’ janah nterem ibahanna jelma papak. ⁶ Ibegindu pagi sora perang ras berita kerna perang i bas ingan si ndauh. Amin bage gia ola aru atendu, sabap kerina si enda arus jadi, tapi e pe langa bo seh ku kedungenna. ⁷ Bangsa pagi ngelawan bangsa, kerajan ngelawan kerajan. I jah-i je terjadi kelihen ras taneh pe linuren. ⁸ Tapi kerina enda permulan denga nge, seri ras penggejapen mesui sanga kalak nandangi mupus. ⁹ I bas paksa e pagi kerina kalak rate segat man bandu erkiteken Aku. Isiksana me kam jenari ibunuhna. ¹⁰ Nterem pagi kalak murtad; si adun ras si cian-cianen. ¹¹ Rehen pe nabi perguak erbahanca nterem kalak papak. ¹² Perbahan reh buena kejahaten e maka nterem kalak reh kurangna kekelengenna. ¹³ Tapi kalak si megenggeng seh ku kedungenna terkelin kap. ¹⁴ Janah kenca Berita Si Meriah kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e." ¹⁵ "Idahndu pagi kejahaten si ciga ate encedai tedis i bas Ingan si Badia, bagi enggo ikataken Nabi Daniel. (Iantusi si ngogesa min kai erti kata enda!) ¹⁶ Paksa si e pagi kalak si ringan i Judea arus kiam ku uruk-uruk. ¹⁷ Kalak si kundul-kundul i darat pekesahken olanai bengket ku rumah ngelegi barang-barangna. ¹⁸ Kalak si sangana i juma olanai ku rumah ngelegi uisna. ¹⁹ O, andiko kuahna ate pernanden si sangana mehuli kulana bage pe pernanden si sangana pepinemken i bas paksa si e! ²⁰ Ertotolah man Dibata gelah si enda kerina ola jadi i bas paksa-paksa perudan tah pe wari Sabat! ²¹ Sabap kiniseran si jadi paksa si e pagi ndauh keleken asa si enggo pernah jadi, mulai kin tembe doni seh ku wari enda, janah kenca si e lanai bo pagi lit kejadin si bage. ²² Tapi beligan warina enggo ipegendeki Dibata; adi la kin enggo ipegendekiNa ise pe la bo lit terus nggeluh. Ipegendeki Dibata me wari kiniseran e nginget kalak si enggo ipilihNa. ²³ Paksa si e pagi adi lit kalak si ngataken man bandu, ’I jenda kap Mesias si ipadanken Dibata’ ntah nina, ’I jah kap Ia’, ola kam tek. ²⁴ Sabap reh me Mesias palsu ras nabi-nabi perguak; ibahanna me tanda-tanda sengget si mbelin, sabap atena, adi banci, gelah papak kalak si enggo ipilih Dibata. ²⁵ Ingetlah! Kerina enda enggo leben Kukataken man bandu ope denga jadi. ²⁶ Ntah pe, adi lit kalak ngatakenca man bandu, ’Mesias si ipadanken Dibata e genduari i taneh si melungun,’ ola dahi ku je; ntah pe adi nina, ’I jenda Ia cebuni,’ ola kam tek. ²⁷ Sabap Anak Manusia si isuruh Dibata e reh pagi bagi kilap erkincar i Timur nari ku Barat. ²⁸ I ja lit bangke i je pulung kuliki, si man bangke." ²⁹ "Kenca lepas wari-wari kiniseran e, minter gelap matawari, bulan la nai ersinalsal, bintang-bintang nartar i langit nari janah kuasa-kuasa si lit i langit mugur-ugur. ³⁰ Jenari teridah tanda Anak Manusia si isuruh Dibata i langit janah tangis kerina bangsa manusia i doni enda. Idahna me pagi Anak Manusia si isuruh Dibata e reh i datas embun; alu kuasa ras kiniulin si mbelin. ³¹ Kenca bage terbegi me sora trompet si megang jenari isuruhNa me malekat-malekatNa ndarat ku belang-belang doni enda. Ipepulung malekat-malekat e me kalak si enggo ipilih Dibata i bas tampuk doni nari ku tampukna si deban." ³² "Bahanlah batang ara jadi pelajaren man bandu. Adi idahndu dahanna meratah janah erbulung nguda ia, ietehndu maka musim perlego enggo ndeher. ³³ Bage me pe, adi idahndu pagi jadi kerina si Kukataken enda ndai, ietehndu me maka enggo ndeher kedungen doni enda. ³⁴ Ingetlah! Si enda pagi kerina jadi ope denga keri mate kalak si genduari enda. ³⁵ Langit ras doni masap kap pagi; tapi KatangKu tetap rasa lalap." ³⁶ "Kerna warina ntah jamna kejadin e la lit kalak si metehsa. Malekat-malekat si i Surga pe lang, janah Anak e pe lang; Bapa ngenca metehsa. ³⁷ Kerehen Anak Manusia si isuruh e pagi bali kap ras kai si jadi i bas paksa Nuah nai. ³⁸ Bagi nai ope denga reh lau mbelin kerina kalak si nggeluh paksa si e man dingen minem, sereh dingen empo seh ku warina Nuah bengket ku bas perahu; ³⁹ sitik pe la ietehna kai nandangi jadi man bana ope denga reh lau mbelin si erbahanca ia mombak kerina. Bage ka me pagi jadi asum reh Anak Manusia si isuruh Dibata e. ⁴⁰ Paksa si e pagi lit dua kalak dilaki erdahin i juma: sekalak pagi ibuat, janah si sekalak nari itadingken. ⁴¹ Dua kalak diberu sangana nutu: sekalak pagi ibuat, sekalak nari itadingken. ⁴² E maka erjaga dingen ersikaplah, sabap la ietehndu ndigan Tuhanndu reh. ⁴³ Ingetlah! Adi ieteh tuan rumah katawari reh pinangko, tentu erjaga-jaga ia dingen la ipelepasna rumahna e ibongkar pinangko. ⁴⁴ E maka kam pe erjaga-jagalah, sabap Anak Manusia si isuruh Dibata e reh i bas paksa si la iarapndu." ⁴⁵ "Adi bage, ise dage juak-juak si tutus dingen pentar? Ia me si ipercayaken tuanna jadi kepala juak-juak si deban guna mbagiken pangan man juak-juak e i bas paksana. ⁴⁶ Malem me ate juak-juak e adi idapeti tuanna ia sangana ndahiken dahinna. ⁴⁷ Kukataken man bandu: Tuhu-tuhu iangkat tuan e me ia jadi pengawas i bas kerina erta-ertana. ⁴⁸ Tapi adi la mehuli ukur juak-juak e tentu nina i bas ukurna, ’Tuanku ndekah denga nge maka mulih,’ ⁴⁹ jenari ipekpekina juak-juak si deban, mangani dingen minem ia seh mabuk. ⁵⁰ Jenari reh me tuan e i bas paksa si la ietehna dingen la isangka-sangkana. ⁵¹ Ibunuh tuan e me ia janah bali ia ibahanna ras kalak pekulah-kulah. I je tangis dingen mesui kal atena."

¹ "I bas paksa e Kinirajan Surga bali ras sepuluh kalak singuda-nguda. Isaganina lampuna jenari lawes ia ngalo-ngalo kalak empo. ² Ibas si sepuluh kalak e, lima kalak lenge, lima kalak pentar. ³ Si lenge ibabana lampuna tapi la ibabana minak persedian; ⁴ si pentar ibabana lampuna ras minak persedianna tare botol. ⁵ Perbahan melawen maka reh si empo e, munduk-unduk ia kerina jenari tunduh ia. ⁶ Tengah berngi terbegi sora erlebuh nina, ’Enda si empo ndai! Alo-alolah ia!’ ⁷ E maka keke singuda-nguda ndai kerina, ipesikapna lampuna. ⁸ Nina singuda-nguda si lenge man si pentar, ’Man kami min sitik minakndu sabap nimpet atena lampu kami.’ ⁹ Ngaloi singuda-nguda si pentar e, ’Lanai kari bias minak kami adi man bandu deba, e maka ulin tukur minakndu ku kede.’ ¹⁰ Asum ia lawes nukur minak reh si empo e. Singuda-nguda si enggo sikap nimaisa bengket ras si empo ku ingan si enggo isikapken guna kerja e, jenari pintun ieruk. ¹¹ Kenca bage reh si nguda-nguda si lenge ndai, erlebuh ia, nina, ’O tuan, tuan! Talangi min pintun enda gelah bengket kami.’ ¹² Ngaloi si empo e, ’Tuhu-tuhu la kam kutandai.’ " ¹³ Jenari nina Jesus, "Dage ersikap-sikaplah sabap la ietehndu warina ntah pe jamna Tuhan reh." ¹⁴ "Paksa si e pagi, Kinirajan Surga e bali kap ras sekalak tuan si berkat atena ku negeri si ndauh. Idilona juak-juakna jenari iberekenna erta-ertana gelah ipokokken juak-juak e. ¹⁵ Sekalak iberekenna lima talenta, sekalak dua talenta janah sekalak nari iberekenna sada talenta; sekalak-sekalak iberekenna rikutken kengasupen juak-juak e. Kenca bage berkat tuan ndai. ¹⁶ Juak-juak si ngaloken lima talenta e minter ibahanna usahana; idatna untungna lima talenta. ¹⁷ Juak-juak si ngaloken dua talenta pe bage ka nge ibahanna; idatna untungna dua talenta. ¹⁸ Tapi juak-juak si ngaloken sada talenta e la bage; ibunikenna saja duit tuan ndai. ¹⁹ Kenca ndekah, mulih tuan ndai, idilona juak-juak guna erkira ras. ²⁰ Reh juak-juak si ngaloken lima talenta, ibabana bungana lima talenta janah nina, ’O tuan, lima talenta mbaru enda iberekenndu man bangku, genduari enggo kudat lima talenta nari.’ ²¹ Ngaloi tuan e, ’Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas, ersenang-senang ras aku.’ ²² Jenari reh juak-juak si ngaloken dua talenta, nina, ’O tuan, dua talenta mbaru enda iberekenndu man bangku; genduari enggo kudat dua talenta nari.’ ²³ Ngaloi tuan e, ’Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas ersenang-senang ras Aku.’ ²⁴ Kenca bage reh juak-juak si ngaloken sada talenta, nina, ’O Tuan, kueteh maka Kam kalak kejam. IperaniNdu ateNdu si la isuanNdu, ipepulungndu ateNdu ulih benih si la Kam nuansa. ²⁵ Perbahan si e mbiar aku, e maka kutanemken duit si iberekenNdu e. Enda duitNdu ndai.’ ²⁶ Ngaloi tuan e, ’Kam juak-juak si jahat dingen perkisat. Bahanlah kuperani si la kusuan, kupepulung si la kuerapken, ²⁷ ma patut min ndai iberekenndu duitku e man si mbungaken duit? Ma banci kenca aku mulih kualoken ras bungana? ²⁸ Buatlah duit e i bas ia nari, jenari bereken man si enggo lit i bas ia sepuluh talenta. ²⁹ Sabap man kalak si lit ibereken tole gelah idatna lebih asa cukup; tapi kalak si la lit i bas ia, si lit sitik i bas ia e pe ibuat i bas ia nari. ³⁰ Juak-juak si la terpake enda sampetkenlah ku bas ingan si gelap; je tangis me ia dingen mesui kal atena.’ " ³¹ "Asum reh pagi Anak Manusia persuruhen Dibata e jadi Raja janah kerina malekat-malekat ras Ia, kundul me Ia i kursi KinirajanNa. ³² Jenari pulung me kerina manusia i lebe-lebeNa. Kenca bage ibagiNa me manusia e jadi dua terpuk, bagi permakan nerapken biri-biri i bas kambing nari; ³³ biri-biri arah kemuhen, kambing arah kawes. ³⁴ Jenari nina Raja man kalak si arah kemuhenNa, ’Marilah kam si enggo ipasu-pasu BapangKu; alokenlah Kinirajan si enggo isikapken Dibata man bandu mulai kin ijadikenNa doni enda. ³⁵ Sabap asum melihe Aku iberendu man Aku, asum muas Aku iberendu minem; asum tandang Aku idilondu kesilang ku rumahndu, ³⁶ asum manjang-anjang Aku iuisindu, asum sakit Aku iadep-adepndu, janah asum Aku i bas penjara idahindu.’ ³⁷ Jenari ngaloi kalak si arah kemuhen e, ’O Tuhan, ndiganai Kam idah kami melihe jenari ibere kami man, tah muas jenari ibere kami minem? ³⁸ Ndiganai Kam idah kami tandang, jenari idilo kami Kam kesilang ku rumah kami, ntah la Kam ruis jenari ibereken kami uisndu? ³⁹ Ndiganai Kam idah kami sakit ntah i bas penjara jenari idahi kami Kam?’ ⁴⁰ Erjabap Raja e nina, ’Kukataken man bandu: Kai si ibahanndu man sekalak si musilna i bas seninangKu enda, e me si tuhuna perbahanenndu man bangKu.’ ⁴¹ Jenari ngerana Raja e man si arah kawesNa nina, ’Laweslah i bas Aku nari o kam si enggo isumpahi Dibata! Laweslah ku bas api si la ernimpet-nimpet si enggo isikapken man Iblis ras malekat-malekatna! ⁴² Sabap asum melihe Aku la iberendu man, asum muas Aku la iberendu minem. ⁴³ Asum tandang Aku la idilondu kesilang ku rumahndu, asum Aku la ruis la iberekenndu uis man bangKu; janah asum Aku sakit ntah i bas penjara la dahindu.’ ⁴⁴ E maka ngaloi si arah kawes e nina, ’O Tuhan, ndiganai Kam idah kami melihe, ntah muas, ntah tandang, ntah la ruis, ntah sakit, ntah i bas penjara, jenari la Kam isampati kami?’ ⁴⁵ E maka erjabap Raja e, ’Kukataken man bandu: Asum la kam nggit nampati sekalak i bas seninangKu si musilna enda, Aku kap si la isampatindu e.’ ⁴⁶ Jenari bengket me kalak si arah kawes e ku bas ukumen si rasa lalap; janah si arah kemuhen bengket ku bas kegeluhen si tuhu-tuhu si la erkeri-kerin."

¹ Kenca dung ituriken Jesus si enda kerina nina man ajar-ajarNa, ² "Bagi ietehndu, dua wari nari irayaken me Wari Paskah, janah Anak Manusia persuruhen iendesken kalak me guna ipakuken ku kayu persilang." ³ Paksa si e pulung imam-imam si mbelin ras peminpin kalak Jahudi i bas rumah Kayapas, Imam si Mbelin. ⁴ Arih-arih ia kerina guna nangkap dingen munuh Jesus alu erbuni-buni. ⁵ Ibas ia arih-arih e nina, "Ola asum Wari Paskah Ia sibunuh, gelah ola guntar kalak si nterem." ⁶ Asum Jesus i Betani i rumah Simon si enggo malem ibas penakit gadamen nari, ⁷ reh sekalak diberu ndahi Ia. Ibaba diberu e sada botol mar-mar isin minak merim si meherga. Icurcurkenna minak e ku takal Jesus si sangana man. ⁸ Ngidah si e ngeranai ajar-ajar nina, "Engkai maka isia-siaken minak e? ⁹ Adi idayaken meherga kap janah duitna e banci ibereken man kalak musil!" ¹⁰ Ieteh Jesus kai si icakapken ajar-ajar e e maka nina, "Engkai maka iganggundu ia? Ia enggo erbahan si mehuli man bangKu. ¹¹ Kalak musil lalap nge pagi ras kam, tapi Aku labo lalap ras kam. ¹² Sabap diberu enda enggo erbahan persikapen man bangKu alu ncurcurken minak ku dagingKu ope denga Aku ikuburken. ¹³ Ingetlah! I japa pe pagi iberitaken Berita Si Meriah i belang-belang doni enda, ituriken pe kerna perbahanen enda guna nginget ia." ¹⁴ Jenari sekalak i bas ajar-ajar si sepuluh dua e, gelarna Judas Iskariot lawes ndahi imam-imam si mbelin. ¹⁵ Nina man imam-imam si mbelin e, "Kai iberekenndu upahku adi kuendesken Jesus man bandu?" Minter ibereken imam-imam si mbelin e telu puluh duit pirak man Judas Iskariot. ¹⁶ E maka mulai i bas wari e idarami Judas dalan ndudurken Jesus. ¹⁷ I bas wari pemena Wari Raya Roti si La Itama Ragi reh ajar-ajar ndahi Jesus nina, "I ja sura-suraNdu isikapken kami lakon Paskah man baNdu?" ¹⁸ Ngaloi Jesus, "To lawes ku kuta njumpai si Anu, kataken man bana: nina Guru lanai ndekah waringKu. I bas rumahndu ateKu ras ajar-ajarKu ngerayaken Wari Paskah." ¹⁹ Ikutken ajar-ajar kata Jesus e; isikapkenna pangan Paskah. ²⁰ Kenca gelap wari kundul Jesus ras ajar-ajarNa jenari man. ²¹ Paksa man nina Jesus man ajar-ajarNa, "Kukataken man bandu: Si tuhuna sekalak i bas kam nari me si ndudurken Aku." ²² Ceda ate ajar-ajar jenari pegancih-gancih ia nungkun man Jesus nina, "Ma labo aku kataNdu Tuhan?" ²³ Erjabap Jesus, "Si ncelupken roti ku bas pinggan raduken Aku, ia me si ndudurken Aku. ²⁴ Bicara kugapa pe mate nge Anak Manusia persuruhen Dibata e, sue ras si ikataken Pustaka Si Badia tapi andiko, cilaka kal si ndudurken Anak Manusia e. Ulin min nai la ia tubuh." ²⁵ Jenari ngerana Judas penghianat e nina, "Aku kin kataNdu Guru?" Ngaloi Jesus, "Bagi katandu e me!" ²⁶ Asum ia man denga kerina, ibuat Jesus roti, ikatakenNa bujur man Dibata, jenari icepik-cepikNa roti e, iberekenNa man ajar-ajarNa nina, "Buatken, panken, enda me dagingKu." ²⁷ Kenca bage ibuatNa calung, ikatakenNa bujur man Dibata, jenari iberekenNa man ajar-ajarNa nina, "Minemken, kerina kam tare calung enda. ²⁸ Enda me darehKu si ngesahken padan si ibahan Dibata, si iamburken guna nterem jelma lako pengalemi dosana. ²⁹ Kukataken pe man bandu: Kenca wari enda lanai Kuinem lau anggur enda seh warina Aku ras kam nginem lau anggur si mbaru i bas Kinirajan BapangKu." ³⁰ Kenca Jesus ras ajar-ajarNa rende muji Dibata lawes ia kerina ku Uruk Seton. ³¹ Jenari nina Jesus man ajar-ajarNa, "I bas berngi enda kiamen me kam kerina nadingken Aku, sabap lit tersurat i bas Pustaka Si Badia, ’Ibunuh Dibata me permakan e, jenari marpar kerina biri-biri e.’ ³² Tapi kenca Aku ipekeke Dibata i bas si mate nari leben Aku asa kam ku Galilea." ³³ Ngaloi Petrus man Jesus, "Kiam pe kalak enda kerina, aku labo nggit nadingken Kam!" ³⁴ E maka nina Jesus man Petrus, "Ingetlah! I bas berngi enda, ope tekuak manuk enggo ipersokenndu Aku telu kali." ³⁵ Ngaloi Petrus, "Asa ndigan pe la Kam kupersoken, aminna gia terpaksa aku mate ras Kam!" Ajar-ajar si deban pe ngaloi bagi si ikataken Petrus enda. ³⁶ Jenari seh Jesus ras ajar-ajarNa ku sada ingan si igelari Getsemane. Nina Jesus man ajar-ajarNa, "Kundul kam i jenda, Aku ertoto lebe ku jah." ³⁷ Petrus ras duana anak Sebedeus ibabaNa. Paksa e ceda ate Jesus dingen getem kal pusuhNa. ³⁸ E maka nina man ajar-ajarNa si telu kalak e, "Ceda kal ateKu perbahan Kugejap maka Aku nandangi mate. Timai i jenda janah erjaga-jagalah ras Aku." ³⁹ Lawes Jesus terdauhen sitik nari, i je erjimpuh Ia jenari ertoto man Dibata nina, "O Bapa, adi banci buat min calung kiniseran enda i bas Aku nari. Tapi labo peratenKu, peratenNdulah jadi." ⁴⁰ Kenca bage mulihken Ia ndahi ajar-ajarNa si telu kalak ndai. IdapetiNa ajar-ajar e tunduh. E maka nina Jesus man Petrus, "Sada jam pe la kam ngasup erjaga ras Aku? ⁴¹ Erjaga dingen ertotolah gelah ola kam ndabuh ku bas percuban. Ukur mehuli me, tapi daging kote kap!" ⁴² Jenari lawes Jesus pedua kaliken ertoto nina, "O Bapa, adi la kin banci la Kuinem calung e, peratenNdulah jadi." ⁴³ Mulihken ka Jesus ndahi ajar-ajarNa si telu kalak, idapetiNa ajar-ajar e tunduh, perbahan madat kal matana. ⁴⁴ Ipelepas Jesus ajar-ajar e tunduh, lawes Ia petelu kaliken ertoto; pertotonNa bali ras si ndai. ⁴⁵ Kenca bage mulihken Ia ndahi ajar-ajarNa si telu kalak e, nina, "Tunduh dingen pekesahken denga kam? Nehenlah! Enggo seh paksana, Anak Manusia iendesken man kalak perdosa. ⁴⁶ Kekekenlah, ota lawes kita. Enggo reh si ndudurken Aku." ⁴⁷ Sanga Jesus ngerana denga seh me Judas, sekalak i bas ajar-ajar si sepuluh dua. Ibabana sada rombongan si maba pedang ras perpalu. Rombongan enda isuruh imam-imam si mbelin ras peminpin-peminpin kalak Jahudi. ⁴⁸ Judas enggo mereken tanda man rombongen e nina, "Ise kari kuema e me kalakna. Tangkaplah Ia!" ⁴⁹ Kenca seh Judas e minter ideherina Jesus nina, "Mejuah-juah Guru," jenari iemana Jesus. ⁵⁰ Tapi ngaloi Jesus man bana, "O teman, kai atendu reh ku jenda?" Itangkap kalak ndai Jesus, dingen nteguh itagangina. ⁵¹ Perbahan si e ngelawan sekalak ajar-ajar Jesus. Idekdekna pedangna jenari itampulna sekalak juak-juak Imam si Mbelin seh retap cupingna. ⁵² Tapi nina Jesus man ajar-ajarNa e, "Sembungken pedangndu e, sabap kalak si make pedang mate pagi ibahan pedang. ⁵³ La kin ietehndu maka banci Kupindo penampat BapangKu gelah isuruhNa lebih sepuluh dua pasuken tentera malekat nampati Aku? ⁵⁴ Tapi adi bage, ma lanai seh kai si enggo tersurat i bas Pustaka Si Badia, maka arus jadi bage?" ⁵⁵ Jenari nina Jesus man rombongen e, "Akapndu kin Aku enda pengerampok maka reh kam maba pedang ras perpalu nangkap Aku? Tep-tep wari nge Aku ngajar i bas Rumah Pertoton janah la itangkapndu. ⁵⁶ Tapi kerina enda arus jadi gelah seh kai si tersurat i bas Pustaka Si Badia." Jenari kiamen kerina ajar-ajar Jesus nadingken Ia. ⁵⁷ Kenca bage ibaba kalak ndai Jesus ku rumah Kayapas, Imam si Mbelin. I bas rumah e enggo pulung guru-guru agama Jahudi ras peminpin-peminpin kalak Jahudi. ⁵⁸ Petrus ngikut-ngikut i dauh-dauh nari seh ku kesain rumah Imam si Mbelin e. Kenca seh i bas kesain e, kundul ia ras pengawal guna ngenehen kuga kedungenna. ⁵⁹ Imam-imam si mbelin ras kerina si ersidang ndarami saksi si nalahken Jesus gelah banci Jesus ibunuh. ⁶⁰ Tapi la idatna salah Jesus aminna gia nterem saksi si ngerana. Dungna tedis ku lebe dua kalak saksi, ⁶¹ Jenari nina, "Pernah ikatakenNa, ’Aku ngasup ngeruntuhken Rumah Pertoton Dibata janah i bas wari si peteluken enggo ka dung Kubangun mulihi.’ " ⁶² Jenari tedis Imam si Mbelin nina man Jesus, "La lit jabapndu nandangi saksi si ngelawan Kam enda?" ⁶³ Tapi sinik saja Jesus. Ngerana ka Imam si Mbelin man Jesus, "I bas gelar Dibata si nggeluh kupindo gelah ersumpah kam man kami: Tuhu kin Kam Mesias si ipadanken Dibata e?" ⁶⁴ Erjabap Jesus, "Bagi si ikatakenndu e me. Tapi Kukataken man bandu: Mulai genduari nari idahndu me, Anak Manusia si isuruh Dibata kundul arah kemuhen si Mada Kuasa janah reh pagi i datas embun i langit." ⁶⁵ Megi kata Jesus e, icaingken Imam si Mbelin uisna jenari nina, "Enggo igombangina Dibata! Man kadenta nari kin saksi? Genduari enggo ibegindu Ia nggombangi Dibata. ⁶⁶ Kuga iakapndu?" Erjabap kalak si ersidang, "Ia enggo ersalah janah arus ibunuh." ⁶⁷ Jenari iciduri kalak ndai ayo Jesus, itinjuina, deba nggudamisa, ⁶⁸ janah nina, "Kataken dage ise nggudam Kam, o Mesias!" ⁶⁹ Asum Petrus kundul i kesain, reh sekalak singuda-nguda ndeheri ia; singuda-nguda e juak-juak Imam si Mbelin. Nina man Petrus, "Kam pe megati kap ras Jesus kalak Galilea ah." ⁷⁰ Tapi merso Petrus i lebe-lebe kalak e kerina nina, "La kuangka katandu e." ⁷¹ Jenari lawes Petrus ku pintu gerbang. Sekalak diberu, e me juak-juak si deban, ngidah ia, jenari nina man kalak si i je, "Ia kap teman Jesus kalak Nasaret e." ⁷² Merso ka Petrus nina, "Pang aku ersumpah, la kutandai pe Ia!" ⁷³ La ndekahsa reh ka kalak tedis-tedis i je ndahi Petrus, jenari nina, "Pasti kam sekalak ibas temanNa e. Ketandan kap arah cakapndu!" ⁷⁴ Jenari ersumpah Petrus nina, "La kutandai Ia!" Paksa e tekuak minter manuk. ⁷⁵ Janah minter inget Petrus kai si ikataken Jesus man bana, asum nina Jesus man bana, "Ope denga tekuak manuk enggo ipersokenndu Aku telu kali." Jenari lawes ia ndarat, tangis ia sabap ceda atena.

¹ I bas erpagi-pagi si lampas pulung kerina imam-imam si mbelin ras pertua-pertua kalak Jahudi. Enggo ersada arihna guna munuh Jesus. ² Igarikenna Jesus jenari iendeskenna man Pilatus, Gubernur Pemerentah Roma. ³ Ngidah Jesus ibaba ku pengadilen erkadiola Judas. Jenari iulihkenna duit pirak si telu puluh e man imam-imam si mbelin ras peminpin-peminpin kalak Jahudi. ⁴ Nina Judas, "Aku enggo erdosa sabap kududurken kalak si la ersalah guna ibunuh." Ngaloi imam-imam si mbelin ras peminpin e, "Kerna si e la urusen kami. Ena urusenndu." ⁵ Ibenterken Judas duit e ku bas Rumah Pertoton, jenari lawes ia ndelis. ⁶ Ibuat imam-imam si mbelin duit e, jenari nina, "Duit enda duit dareh, e maka rikutken Undang-undang agamanta la banci ipersembahken man Dibata." ⁷ Kenca icakapken ras-ras itukurkenna duit e ku Taneh Pande Kudin, guna ijadiken kuburen kalak pertandang. ⁸ Perbahan si e me maka seh asa genduari taneh e igelari "Taneh Dareh". ⁹ Alu bage enggo seh kai si ikataken Nabi Jeremia nina, "Ibuatna duit pirak telu puluh, e me erga sekalak jelma si itetapken kalak Israel, ¹⁰ jenari itukurkenna ku taneh pande kudin, bagi enggo ikataken Tuhan man bangku." ¹¹ Kenca e Jesus ibaba ku adep-adepen Gubernur. Jenari nungkun Gubernur e man Jesus, nina, "Kam kin Raja kalak Jahudi?" Erjabap Jesus, "Bagi katandu e me." ¹² Tapi pengadun imam-imam si mbelin ras peminpin-peminpin e kerna Ia sengkebabah ranan pe la ijabapNa. ¹³ E maka nina Pilatus man baNa, "La kin ibegindu pengadun kalak enda kerina?" ¹⁴ Tapi sengkebabah ranan pe la ijabap Jesus, e maka mamang kal ate Gubernur e. ¹⁵ Enggo jadi kebiasan maka i bas tep-tep Wari Raya Paskah ibebasken Pilatus sekalak kalak tahanen si ipilih kalak si nterem. ¹⁶ Paksa si e lit sekalak i bas penjara terberita kal kejahatenna, gelarna Barabas. ¹⁷ E maka kenca pulung jelma si nterem nungkun Pilatus nina, "Ise atendu kubebasken, Barabas ntah Jesus si igelari Mesias e?" ¹⁸ Terang ieteh Pilatus maka Jesus iendesken man bana erkite-kiteken cian ate kalak ngenehen Jesus. ¹⁹ Asum Pilatus kundul i bas ingan ersidang, isuruh ndeharana pertenahen, ndahi ia ngataken, "Ola campurindu urusen kalak si bujur e, sabap gulut kal nipingku nderbinai kerna Ia." ²⁰ Imam-imam si mbelin ras pertua-pertua kalak Jahudi ngendik-ngendik jelma si nterem guna ngataken man Pilatus gelah Barabas ibebasken janah Jesus ibunuh. ²¹ Tapi nungkun Gubernur, "Apai atendu kubebasken i bas si dua kalak enda?" Erjabap jelma si nterem e, "Barabas!" ²² Nungkun ka Pilatus, "Adi bage, kuga dage kubahan Jesus si igelari Mesias enda?" Erjabap kalak e kerina, "Pakukenlah Ia ku kayu persilang!" ²³ Tapi nina Pilatus, "Kai kin salahNa?" Lanai ibegiken jelma si nterem Gubernur e ngerana. Tapi reh gangna sorana nina, "Pakukenlah Ia ku kayu persilang!" ²⁴ Ngidah si e lanai akap Pilatus tersuriangi kalak si nterem sabap reh gejekna nari nge maka banci, e maka ibuatna lau, iburihina tanna i lebe-lebe kalak si nterem janah nina, "Aku la ertanggung jawab i bas kematenNa! Kamlah si ertanggung jawab!" ²⁵ Ngaloi kerina kalak si nterem nina, "I bas kematenNa kami kerina ertanggung jawab ras anak-anak kami." ²⁶ Jenari ibebasken Pilatus si Barabas, tapi Jesus isuruhna iligasi perajurit dingen iendeskenna pe gelah ipakuken ku kayu persilang. ²⁷ Ibaba perajurit Jesus ku istana gubernur, ije kerina perajurit engkeleweti Ia. ²⁸ Itangtangina uis Jesus, jenari ipakekenna man Jesus uis si megara. ²⁹ Kenca bage ibahanna sada tengkuluk duri jenari itamakenna ku takal Jesus janah itamakenna pe ciken buluh ku tan Jesus si kemuhen. Igombang-gombangi kalak e Jesus, erjimpuh ia i lebe-lebeNa, jenari nina, "Tabi, o Raja kalak Jahudi!" ³⁰ Jenari icidurina, ibuatna buluh e, ipekpekkenna ku takal Jesus. ³¹ Kenca puas akapna nggombang-gombangi Jesus, itangtangina uis si megara e jenari ipakekenna ka mulihken uis Jesus si tangtangna ndai. Kenca bage ibabana Jesus ndarat gelah ipakuken ku kayu persilang. ³² Asum rombongen e erdalan ku darat kuta, jumpa ia ras Simon kalak Kireni. Simon enda me ipaksa perajurit-perajurit maba kayu persilang Jesus. ³³ Jenari seh me ia kerina ku sada ingan si igelari Golgota, ertina: "Ingan takal-takal". ³⁴ I je ibereken kalak ndai inem Jesus anggur si enggo icampur ras pegu; tapi kenca icecap Jesus, la Ia nggit nginemsa. ³⁵ Kenca Jesus ipakuken perajurit-perajurit e, itikam-tandukkenna uis Jesus. ³⁶ Jenari kundul ia njagai Jesus. ³⁷ Arah babo takal Jesus isuratkenna kesalahen si erbahanca Ia iukum mate: "Enda Jesus, Raja kalak Jahudi". ³⁸ Jenari ipakukenna ka dua kalak jahat, sekalak arah kemuhen Jesus, janah sekalak nari arah kawesNa. ³⁹ Kalak si mentas arah ingan e ngupir, janah icekurakina Jesus nina, ⁴⁰ "IruntuhkenNdu ateNdu Rumah Pertoton dingen majekkenca i bas telu wari! Adi Kam kin Anak Dibata, pulahilah baNdu. Nusurlah i kayu persilang e nari!" ⁴¹ Imam-imam si mbelin pe ras guru-guru agama bage pe peminpin-peminpin kalak Jahudi nggombang-gombangi Jesus nina, ⁴² "Kalak si deban ipulahiNa tapi Ia jine la terpulahiNa baNa. Ma Ia kin Raja kalak Israel? Adi nusur Ia genduari, tek kami man baNa! ⁴³ Ia tek man Dibata janah ikatakenNa maka Ia me Anak Dibata. Sinehenlah ntah nggit kin Dibata mulahi Ia genduari." ⁴⁴ Kalak jahat si ipakuken ras Ia e pe nggombang-gombangi Ia. ⁴⁵ Mulai ciger gelap kerina negeri e, telu jam dekahna. ⁴⁶ Kira-kira jam telu karaben serko Jesus alu sora megang, nina, "Eli, Eli, lama sabakhtani?" ertina: "O, DibatangKu, o, DibatangKu, ngkai maka itadingkenNdu Aku?" ⁴⁷ Piga-piga kalak si tedis i je megi sora Jesus, e maka nina, "IlebuhNa Elia!" ⁴⁸ Minter kiam sekalak muat bunga karang. Icelupkenna bunga karang e ku bas anggur si macem, jenari idudurkenna ku babah Jesus alu galah. ⁴⁹ Tapi nina kalak si deban, "Timai lebe, sinehen ntah reh kin Elia e mulahi Ia!" ⁵⁰ Sekali nari serko Jesus jenari keri kesahNa. ⁵¹ Paksa si e merigat kire-kire Rumah Pertoton idas nari seh ku teruh. Taneh linuren, uruk-uruk batu pecah, ⁵² kuburen-kuburen talang, janah nterem kalak si badia si enggo mate ipekeke Dibata i bas si mate nari. ⁵³ Itadingkenna kuburen e; janah kenca keke Jesus i bas si mate nari bengket ia ku Jerusalem; i je nterem kalak ngidah ia kerina. ⁵⁴ Asum perwira ras perajurit-perajurit si erjaga ngidah kejadin e kerina, mbiar kal ia, janah nina, "Tuhu-tuhu me Ia Anak Dibata." ⁵⁵ I dauh-dauh nari nterem diberu ngenehenca. Diberu e, e me si ngikutken Jesus i Galilea nari dingen si enggo nampati Jesus. ⁵⁶ Piga-piga i bas si e, e me Maria Magdalena, Maria nande Jakup ras Jusup bage pe ndehara Sebedeus. ⁵⁷ Kenca ben wari, reh sekalak kalak bayak; ia kalak Arimatea, gelarna Jusup. Ia enggo tek man Jesus. ⁵⁸ Ngadap ia man Pilatus guna mindo mait Jesus. Isuruh Pilatus perajurit-perajurit mereken mait e man Jusup. ⁵⁹ Ibuat Jusup mait Jesus e, ibalutina alu kain dagangen mbaru, ⁶⁰ jenari itamakenna ku bas kuburenna jine. Kuburen e mbaru denga itukakna i bas lingling batu. Kenca igulingkenna batu si mbelin guna nutupi kuburen e lawes ia. ⁶¹ Maria Magdalena ras Maria si deban kundul ngalaken kuburen e. ⁶² Pepagina kenca wari persikapen wari Sabat ngadap imam-imam si mbelin ras kalak Parisi man Pilatus. ⁶³ Nina man Pilatus, "O tuan, inget kami maka nina penipu e asum Ia nggeluh denga, ’Kenca telu wari ipekeke me Aku.’ ⁶⁴ E maka suruhlah perajurit-perajurit erjaga i kuburen seh wari peteluken. Adi lang, banci reh ajar-ajarNa nangkosa jenari ikatakenna man kalak si nterem, ’Ia enggo ipekeke ibas si mate nari.’ Adi bage penipun si peduaken enda keleken asa si arah lebe." ⁶⁵ Ngaloi Pilatus, "Babalah perajurit-perajurit, to lawes janah jagailah kuburen e asa ngasupndu." ⁶⁶ E maka lawes ia ku kuburen, ibahanna cap ibas batu kuburen e jenari isuruhna perajurit-perajurit njagaisa.

¹ Kenca lepas wari Sabat, erpagi-pagi si lampas wari Minggu, lawes Maria Magdalena ras Maria si deban ku kuburen Jesus. ² Rempet jadi linur mehantu kal. Sekalak malekat Tuhan nusur i Surga nari, igulingkenna batu e jenari kundul ia i babona. ³ Ayona ersinalsal bagi kilap janah uisna mbentar bagi kapas. ⁴ Mbiar kal perajurit-perajurit si erjaga e, nggirgir ia jenari ampar bagi kalak mate. ⁵ Ngerana malekat e man diberu ndai, "Ola kam mbiar! Kueteh nge maka idaramindu Jesus si enggo ipakuken ku kayu persilang e. ⁶ Ia lanai i jenda. Ia enggo ipekeke Dibata i bas si mate nari bagi enggo pernah ikatakenNa man bandu. Mari, nehenlah inganNa cibal e. ⁷ To pedas-pedaslah kam lawes, katakenlah man ajar-ajarNa, ’Ia enggo ipekeke i bas si mate nari, janah genduari leben Ia ku Galilea asa kam. I jah idahndu me Ia.’ Ingetlah kai si kukataken man bandu enda." ⁸ E maka minter itadingken diberu ndai kuburen e. Mbiar kal ia janah meriah ka ukurna. Kiam-kiam ia, ijumpaina ajar-ajar Jesus guna ngatakenca. ⁹ Rempet reh Jesus njumpai diberu e nina, "Mejuah-juah!" Ideheri kalak e Jesus, ijemakna nahe Jesus janah isembahna. ¹⁰ Nina Jesus man bana, "Ola kam mbiar to lawes, suruh senina-seninangKu ku Galilea. I jah idahna me Aku." ¹¹ Asum diberu-diberu e nerusken perdalanenna, piga-piga perajurit si erjaga i kuburen mulihken ku kuta. Iturikenna man imam-imam si mbelin kerina si enggo jadi. ¹² E maka arih-arih imam-imam si mbelin ras peminpin-peminpin kalak Jahudi. Jenari iberekenna melala duit man perajurit-perajurit e, ¹³ nina, "Arus ikatakenndu maka rebinai asum kam tunduh reh ajar-ajarNa nangko maitNa. ¹⁴ Adi ibegi Gubernur berita enda, kami ngerana ras ia, ola aru atendu kerna si e." ¹⁵ Ialoken perajurit-perajurit duit e jenari idalankenna kai si isuruh imam-imam si mbelin ras peminpin-peminpin e. Seh i bas wari enda berita kerna si enda mbar i tengah-tengah kalak Jahudi. ¹⁶ Ajar-ajar si sepuluh sada kalak lawes ku uruk i Galilea, ku ingan si enggo ikataken Jesus man bana. ¹⁷ Asum idah ajar-ajar e Jesus, isembahna Ia, aminna gia piga-piga kalak ibas ia sangsi. ¹⁸ Ideheri Jesus ajar-ajar, jenari nina, "Enggo ibereken Dibata man bangKu kerina kuasa i Surga ras i doni. ¹⁹ Laweslah ku kerina bangsa manusia, bahanlah ia jadi ajar-ajarKu: Peridiken ia ibas gelar Bapa, gelar Anak, ras gelar Kesah Si Badia, ²⁰ janah ajari ia ngikutken kerina si enggo Kupedahken man bandu. Janah ingetlah! Aku tetap kap ras kam seh ku kedungen jaman."