LUKAS
11 Teopilus si ihamati. Nterem kalak enggo nuratken alu ratur kerna kejadin-kejadin si terjadi i tengah-tengahta. 2 Kalak enda nuratken kai si enggo ituriken man banta, e me si ituriken kalak si ngidah kejadin e tangtangna nari dingen meritakenca. 3 Dage, perbahan enggo kupepayo alu megermet kerina kejadin e i bas mula-mulana nari, e maka mehuli kuakap adi kusuratken ka alu ratur man bandu. 4 Kubahan e gelah tangkas man bandu, maka tuhu-tuhu nge kerina si enggo iajarken man bandu e. 5 Asum Herodes jadi raja i taneh Judea, lit me i je sekalak imam, gelarna Sakaria; ia i bas terpuk Abia nari. Ndeharana Elisabet gelarna; ia pe kesusuren imam. 6 Duana ia nggeluh rikutken ate Dibata ngena janah idalankenna kerina pedah ras Undang-undang Tuhan bagi patutna. 7 Anakna la lit, perbahan si Elisabet la ertuah, janah duana ia enggo metua. 8 I bas sada wari Sakaria sangana ndahiken dahin imam i lebe-lebe Dibata, rikutken giliren terpukna ndahiken dahin i bas kebaktin pelayanen si tep-tep wari. 9 Rikutken kebiasan imam-imam, ibahan me tikam tanduk, e maka Sakaria me si terpilih bengket ku bas Kamar si Badia guna nutung kumenen i je. 10 Jelma si nterem ertoto i darat seh dung kumenen e itutung. 11 Paksa si e, reh me malekat Tuhan ndahi Sakaria. Malekat e tedis arah kemuhen batar-batar ingan nutung kumenen. 12 Ngidah malekat e, sengget dingen mbiar kal Sakaria. 13 Tapi nina malekat man bana, "O, Sakaria ola kam mbiar! Pertotonndu enggo ibegiken Dibata. Ndeharandu Elisabet ipupusna me pagi sada anak dilaki. Bahan gelarna Johanes. 14 Meriah dingen malem pagi atendu, janah kalak si deban pe meriah ukurna arah ketubuhenna. 15 Ia jadi kalak si mbelin i lebe-lebe Tuhan. La banci inemna lau anggur tah pe inemen keras si deban. Mulai tubuhna pe ia enggo dem alu Kesah Si Badia. 16 Arah ia nterem pagi kalak Israel mulihken erkemalangen man Tuhan Dibatana. 17 Leben pagi Ia reh asa Tuhan; ia megegeh dingen erkuasa bagi Nabi Elia. Idamekenna pagi bapa ras anak-anakna; ibahanna kalak jahat jadi bujur; alu bage isikapkenna man Tuhan bangsa si metunggung." 18 Ngaloi Sakaria man malekat ndai, "Kai dage tanda man bangku maka kueteh tuhu si ikatakenndu e? Sabap aku ras ndeharangku enggo metua." 19 Erjabap malekat, "Aku kap Gabriel suruh-suruhen Dibata. IsuruhNa aku ngerana ras kam guna peseh Berita Si Meriah enda man bandu. 20 Tapi la kam tek si kuberitaken enda, si tuhu-tuhu pagi jadi i bas paksana. Erkiteken si e e maka lanai kam banci ngerana, pekak kam seh idahndu jadi si kukataken ndai." 21 Paksa si e, tertima-tima kalak si nterem, janah mamang atena sabap ndekahsa akapna si Sakaria i bas Kamar si Badia. 22 Dungna kenca Sakaria ndarat lanai ia banci ngerana man kalak si nterem, e maka iangka kalak si nterem maka Sakaria enggo ngidah sada pengenehenen i bas Kamar si Badia e. Perbahan lanai banci ia ngerana, e maka ibahanna tanda-tanda alu tanna man kalak si nterem. 23 Kenca dung masa penugasenna i Rumah Pertoton e, mulih ia ku rumah. 24 Jenari mehuli me kula ndeharana Elisabet janah seh lima bulan ia la ndarat i rumah nari. 25 Nina Elisabet, "Dungna isampati Tuhan ka nge aku, janah ibahanNa aku lanai medungu i lebe-lebe jelma si nterem." 26 Kenca enggo enem bulan Elisabet natang tuah, Dibata nuruh malekat Gabriel ku kuta Nasaret i daerah Galilea. 27 Gabriel isuruh ndahi sekalak singuda-nguda tergelar si Maria. Singuda-nguda e enggo ertunangen ras sekalak anak perana tergelar si Jusup, kesusuren Raja Daud. 28 Idahi malekat ndai Maria nina, "Mejuah-juah! Tuhan kap ras kam janah enggo iberekenNa pasu-pasuNa si mbelin man bandu!" 29 Sengget kal Maria megi kata malekat e, jenari nungkun i bas ukurna ntah kai erti kata e. 30 E maka nina malekat ndai man bana, "Ola kam mbiar, Maria, sabap enggo ibereken Dibata perkuah ateNa man bandu. 31 Mehuli pagi kulandu janah ipupusndu sada anak dilaki, bahanlah gelarna Jesus. 32 Ia pagi jadi kalak si mbelin dingen igelari pe Anak Dibata si Meganjangna kal. Tuhan Dibata pagi njadiken Ia jadi Raja bagi ninina Daud, 33 janah Ia me pagi raja man kesusuren Jakup seh rasa lalap; KinirajanNa la erkeri-kerin." 34 Ngaloi Maria man malekat ndai, "Kuga banci jadi e man bangku, sabap aku singuda-nguda denga?" 35 Erjabap malekat nina, "Kesah Si Badia pagi nusur ku babondu janah kuasa Dibata ringan i bas kam. Perbahan si e me, maka anak si ipupusndu e pagi Badia janah igelari Anak Dibata. 36 Nehenlah kade-kadendu Elisabet. Ikataken kalak maka ia la banci mupus, tapi enggo peenem bulanken mehuli kulana, aminna gia ia enggo metua. 37 Sabap la lit si metahat i bas Dibata." 38 Ngaloi Maria, "Kuendesken diringku man Tuhan. Janah jadilah i bas aku bagi si enggo ikatakenndu e!" Kenca bage itadingken malekat ndai ia. 39 Minter kenca si e, lawes Maria ku sada kuta i Judea i daerah si erdeleng-deleng. 40 I je lawes ia ku rumah Sakaria. Janah sanga ia bengket ku rumah e ikatakenna man Elisabet, "Mejuah-juah." 41 Asum ibegi Elisabet sora Maria, minter kemuit anak si lit i bas bertinna. Elisabet dem alu Kesah Si Badia. 42 E maka alu sora megang nina, "Kerina diberu, Kam me si mbelinna daten pasu-pasu! Ipasu-pasu gelah anak si ipupusndu! 43 Ise kin aku, maka nande Tuhan reh ndahi aku? 44 Sabap kenca kubegi sorandu, minter kemuit anak si lit i bas bertinku alu meriah ukur. 45 Malem tuhu-tuhu atendu sabap tek kam maka kai si iberitaken Tuhan man bandu tuhu-tuhu jadi." 46 Nina Maria, "Tendingku muji Tuhan. 47 Meriah ukurku perbahan Dibata Penebusku. 48 Sabap enggo ingetNa aku, kawanNa si meteruk! Genduari nari kerina kalak ngataken maka aku daten tuah. 49 Sabap Dibata si Mada Kuasa ncidahken perbahanenNa man bangku. Badia me gelarNa. 50 IcidahkenNa perkuah ateNa man kalak si erkemalangen man baNa. 51 IcidahkenNa KuasaNa alu perbahanen tanNa, janah iambatiNa gelah ola seh sura-sura kalak si meganjang ukurna. 52 IpeterukNa raja-raja si erkuasa, janah ipeganjangkenNa kalak si meteruk. 53 Kalak si melihe ibesuriNa alu kerina si mehuli, janah kalak bayak isuruhNa lawes ngambe-ngambe. 54 IngetNa padan si enggo ibahanNa ras nini-nininta, janah reh Ia nampati kalak Israel kawanNa. 55 La Ia lupa ncidahken perkuah ateNa man Abraham, bage pe man kerina kesusurenna seh rasa lalap." 56 Kira-kira telu bulan dekahna Maria ringan i rumah Elisabet; e maka mulih ia ku rumahna. 57 Enggo seh paksana Elisabet mupus, e maka ipupusna me sada anak dilaki. 58 Kenca ibegi anak kutana ras kade-kadena maka enggo icidahken Tuhan perkuah ateNa si mbelin e man bana, e maka kerina ia ermeriah ukur ras Elisabet. 59 Kenca sada minggu umur anak e, reh ka ia kerina nunatken anak ndai. Ate kalak ndai Sakaria ibahan gelarna, seri ras gelar bapana. 60 Tapi nina nandena, "Ola! Gelarna e me Johanes." 61 Nina kalak ndai man Elisabet, "Tapi la kap lit gelar e i bas jabunta." 62 E maka ibahan kalak ndai tanda man Sakaria guna nungkun ntah ise bahan gelar anak e. 63 Ipindo Sakaria me sada batu tulis, jenari isuratkenna, "Gelarna e me Johanes." Mamang ate kalak ndai kerina. 64 Paksa si e pe minter Sakaria mulihi ngerana, jenari ipujina Dibata. 65 Kerina kalak si deherken rumahna mbiar, janah berita kerna kejadin e mbar ku belang-belang daerah deleng-deleng Judea. 66 Kerina kalak si megi berita e ngukuri kejadin e, janah nungkun, "Jadi kai nge ndia pagi anak e?" Enggo tangkas maka kuasa Tuhan ras ia kap. 67 Sakaria, bapa Johanes dem alu Kesah Si Badia. Iturikenna kata Dibata nina, 68 "Marilah sipuji Tuhan, Dibata kalak Israel Ia reh ndahi bangsana janah mulahisa. 69 IberekenNa man banta Penebus si erkuasa e me kesusuren kawanNa si Daud. 70 Bagi enggo ikatakenNa nai-nai nari arah nabi-nabiNa si Badia, 71 erpadan Ia mulahi kita i bas musuh-musuhta nari, bage pe i bas kuasa kalak si er elem-elem man banta. 72 IkatakenNa maka icidahkenNa nge perkuah ateNa man nini-nininta, janah ingetNa padanNa si Badia. 73 - 74 Enda me padanNa ras nininta Abraham, asum ersumpah Ia maka ipulahiNa kita i bas musuh-musuhta nari, gelah lanai kita mbiar ersembah man baNa. 75 IbahanNa kita Badia dingen bujur ilebe-lebeNa, i bas gedang-gedang geluhta. 76 O, anakku, kam pagi igelari Nabi Dibata Si Meganjangna kal. Kam reh leben asa Tuhan, guna nikapken dalan man baNa; 77 guna mpebetehken man bangsaNa, maka bangsa-bangsa e pagi itebusi alu nasapken dosa-dosana. 78 Dibatanta perkeleng dingen dem perkuah ate. IsehkenNa pagi man banta sinalsal Keselamaten. 79 Janah isalsalina pe ku kerina kalak si ringan i bas kegelapen e me awih kematen, Ia mabai kita erdalan ku bas kegeluhen si dame." 80 Anak ndai reh belinna dingen ertambahna ukurna. Ia ringan i taneh si mesawang seh paksa maka terang-terangen icidahkenna bana man kalak Israel.
21 Paksa si e Agustus kepala pemerentahen Roma, nuruh kerina rayat si lit i bas daerah kekuasanna gelah isensus. 2 Enda me sensus si pemena. Sanga si e, Kirenius me gubernur i Siria. 3 E maka kerina kalak berkat ku kuta pengulihenna gelah isensus. 4 Jusup pe berkat i kuta Nasaret i Galilea nari ku kuta Betlehem i daerah Judea, kuta ketubuhen Raja Daud; sabab Jusup kesusuren Daud kap. 5 Jusup nuratken gelarna ras tunangenna Maria si enggo mehuli kulana. 6 Kenca seh i Betlehem, seh me paksana ia mupus. 7 E maka ipupusna me anakna sintua dilaki, ibalutina alu ampan janah ipepedemna i bas pelangkah sabap lanai lit ingan i bas rumah penginapen. 8 I bas daerah e lit piga-piga kalak permakan sangana ngiani asuh-asuhen i mbalmbal. 9 Rempet tedis sekalak malekat Tuhan ilebe-lebe permakan ndai, janah terang si rehna i bas Tuhan nari ersinalsal ku sekelewetna. Mbiar kal permakan-permakan e, 10 tapi nina malekat man bana, "Ola mbiar: Aku reh maba Berita Si Meriah, si mereken keriahen si mbelin man kerina manusia. 11 Sendah i Kuta Daud enggo tubuh Juruselamat man bandu, e me Kristus Tuhan. 12 Si jadi tanda kari man bandu e me: idapetindu kari anak-anak ibaluti alu uis, medem i bas pelangkah." 13 Rempet teridah nterem malekat Surga tedis ras malekat si ndai dingen rende muji Dibata, 14 "Terpujilah Dibata i bas Surga si meganjangna. Janah dame i doni man manusia si ngena ateNa." 15 Kenca malekat-malekat mulihken ku Surga nina permakan sapih-sapih ia, "Ota lawes kita ku Betlehem ngenehen kejadin si lit i je, bagi ikatakan malekat Tuhan ndai man banta." 16 E maka pedas-pedas berkat permakan ndai janah idapetina Maria ras Jusup dingen idahna pe Anak e medem i bas pelangkah. 17 Asum permakan-permakan ngidah Anak e, iturikenna man Jusup ras Maria kai si enggo ikataken malekat man bana kerna Anak e. 18 Jenari iturikenna pe man kalak si deban, janah kemamangen kerina kalak si megi berita si ikataken permakan e. 19 Tapi rukur Maria kerna erti kata e janah ibunikenna i bas ukurna. 20 Jenari mulih permakan-permakan janahna rende muji Tuhan, sabap kerina si enggo ibegina ras idahna payo bagi si ikataken malekat ndai man bana. 21 Kenca umur waluh wari isunatkenna Anak ndai. Janah ibahanna gelarNa Jesus, e me gelar si enggo ibereken malekat ope denga Ia lit i bas bertin. 22 Seh me paksana Jusup ras Maria ngelakoken lakon pembersihen rikutken kai si iaturken Musa. E maka ibabana Anak e ku Jerusalem gelah ipersembahken man Tuhan. 23 Sabap bagenda kap tersurat i bas kitap perentah-perentah Tuhan, "Kerina anak sintua dilaki arus ipersembahken man Tuhan." 24 Bage pe ibabana ka nge man persembahen sada pasang ndukur ntah dua nderapati si nguda denga, rikutken si itetapken i bas kitap undang-undang Tuhan. 25 I bas paksa e lit i Jerusalem sekalak dilaki gelarna Simeon. Ia kalak bujur dingen si erkemalangen man Dibata, janah tertima-tima ia nandangi Keselamaten kalak Israel. Kesah Dibata nemani ia, 26 ngataken man bana maka la ia mate adi langa kin idahna Mesias si enggo ipadanken Tuhan. 27 Alu ibabai Kesah Dibata bengket ia ku Rumah Pertoton. Asum Jesus, anak si kitik e ibaba orang tuaNa ku bas Rumah Pertoton gelah ilakoken man bana kai si enggo itentuken rikutken ajaren agama, 28 ialo-alo janah iangkip Simeon me Ia, ikatakenna bujur man Dibata nina, 29 "Genduari o Tuhan, enggo isehkenNdu padanNdu. Malem ateku aminna mate pe aku. 30 Sabap enggo kuidah alu matangku jine, penampat si rehna i bas Kam nari. 31 Penampat si isikapkenNdu man kerina bangsa, 32 bali ras terang si ersinalsal man bangsa si deban, gelah reh ndahi Kam e me terang si mereken kemulian man bangsaNdu Israel." 33 Mamang ate Jusup ras Maria megi si ikataken Simeon kerna Anak e. 34 Ipasu-pasu Simeon ia, jenari nina man Maria, "Anak enda enggo itetapken Dibata maka erkiteken Ia nterem kalak Israel guling tah pe tedis. Ia pagi jadi tanda i bas Dibata nari, si itulak nterem kalak, janah 35 alu bage jadi tangkas me kerina perukuren-perukuren si terbuni. Kam o Maria, ceda pagi atendu. Tempa-tempa itebak pedang pagi pusuhndu." 36 Lit sekalak nabi diberu si enggo metua kal. Gelarna Hanna, anak si Panuel i bas suku Aser nari. Pitu tahun dekahna ia erjabu. 37 Anna enggo mbalu, umurna genduari 84 tahun, la pernah nadingken Rumah Tuhan. Suari berngi ia muji Tuhan, alu ertoto ras erpuasa. 38 Asum Simeon masu-masu Anak e reh Anna ndeheri Jesus ikatakenna bujur man Dibata, janah iturikenna kerna Anak e, man kerina kalak si nimai-nimai warina Jerusalem ibebasken Dibata. 39 Kenca dung ilakokenna kerina rikutken si iaturken i bas perentah Tuhan, mulihken me ia ku kutana e me Nasaret i daerah Galilea. 40 Anak e reh belinna dingen reh gegehna; pentar Ia janah tetap ipasu-pasu Dibata. 41 Tep-tep tahun orang tua Jesus berkat ku Jerusalem guna ngerayaken Wari Paskah. 42 Kenca umur Jesus sepuluh dua tahun, berkat Ia teluna ngerayaken Wari Paskah bagi biasana. 43 Kenca dung perayan e, mulih ia, tapi Jesus tading i Jerusalem. Orang tuana la meteh kerna si e. 44 Iakapna kin Jesus sangana erdalan ras kalak si nterem si mulih i Jerusalem e nari. Kenca erdalan sada wari e maka idaramina ku kade-kadena ras teman-temanna. 45 Perbahan lalap la ia jumpa, e maka mulihken Jusup ras Maria ku Jerusalem ndaramisa. 46 I bas wari si peteluken idapetina Jesus kundul ras guru-guru agama Jahudi i bas Rumah Pertoton. Ibegiken Jesus pengajaren guru-guru e janah isungkuniNa pe. 47 Janah adi nungkun guru-guru e man baNa mamang ate kalak kerina megi jabapNa si dem kepentaren e. 48 Orang tuana pe mamang atena ngidah Ia, jenari nina nandeNa man baNa, "O Anakku, ngkai maka bagenda perbahanenNdu man kami? Aku ras bapandu enggo ndarami Kam alu aru ate." 49 Erjabap Jesus man bana, "Engkai maka idaramindu Aku? La kin ietehndu Aku arus i rumah BapangKu?" 50 Tapi la iangka nande ras bapaNa kai si ikatakenNa e. 51 Jenari mulih Ia radu ras orang tuaNa ku Nasaret; ibegikenNa kata orang tuaNa. Kerina si enggo jadi enda itimbangken nandeNa i bas ukurna. 52 Jesus pe reh belinna dingen reh tambahna pemetehNa, janah reh tambahna pe ngena ate Dibata ras manusia man baNa.
31 Tiberius enggo sepuluh lima tahun jadi Kepala Pemerentah Roma. Tupung si e Pontius Pilatus jadi gubernur i Judea, Herodes raja i Galilea. Janah sangana Pilipus jadi raja i daerah Iturea ras Trakhonitis; Lisanius jadi raja i Abilene, 2 janah Annas ras Kayapas jadi Imam si Mbelin. Tupung e reh Kata Dibata man Johanes anak Sakaria, i taneh si mesawang. 3 E maka isiari Johanes kerina daerah aluren Lau Jordan. Iberitakenna Berita i bas Dibata nari nina, "Jeralah i bas dosa-dosandu nari! Tandana kam enggo jera, kam arus iperidiken, gelah dosa-dosandu ialemi Dibata." 4 Bagi enggo isuratken Nabi Jesaya i bas kitapna, "Lit sekalak si erlebuh i taneh si mesawang nari, ’Pesikap dalan Tuhan -- Pepinter dalanNa! 5 Kelbung-kelbung arus itambusi, uruk-uruk ras deleng arus ipekendit dalan si meluk-eluk arus ipepinter janah si erlubang-lubang iperata. 6 Kerina pagi manusia ngidah keselamaten si reh i bas Dibata nari!’ " 7 Nterem jelma reh ndahi Johanes gelah iperidikenna. E maka nina man kalak ndai, "O, kalak jahat, ise ngatakenca man bandu, maka banci kam pulah i bas ukumen Dibata si reh pagi? 8 Cidahkenlah arah perbahanenndu tandana kam enggo jera i bas dosa nari. Ola nindu i bas ukurndu, ’Abraham kap nini kami.’ Kukataken man bandu maka Dibata ngasup nge njadiken batu-batu enda jadi kesusuren Abraham. 9 Kapak enggo sikap guna nabah batang kayu; kerina batang kayu si la mehuli buahna itabah janah iambekken ku bas api." 10 Nungkun kalak e man bana nina, "Kai dage si arus ibahan kami?" 11 Erjabap si Johanes, "Ise lit dua bajuna, arus iberekenna sada man kalak si la lit bajuna, bage pe ise si lit nakanna, arus ibagikenna." 12 Reh pe ku je kalak pengalo cuke, atena gelah iperidiken, jenari nungkun ia man Johanes nina, "O guru, kai arus ibahan kami?" 13 Erjabap si Johanes, "Ola pindo buen asa si enggo itentuken." 14 Nungkun ka piga-piga tentera nina, "Kuga kami enda? Kai nge arus ibahan kami?" Ngaloi Johanes, "Ola ngerampas ntah ngataken salah man si la ersalah. Janah pebias-biaslah gaji si ibereken man bandu." 15 Erkiteken kalak si nterem e paksana nima-nimai dingen ngarapken kerehen Mesias si ipadanken Dibata, e maka mamang atena kerna Johanes dingen nungkun i bas ukurna ntah Johanes e kin Mesias si ipadanken e. 16 E maka nina Johanes man bana kerina, "Aku mperidiken kam alu lau, tapi reh me sekalak si belinen asang aku. Ngosari nali sepatuNa pe labo aku metunggung. Ia mperidiken kam pagi alu Kesah Si Badia ras api. 17 Ndiruna enggo sikap i bas tanNa guna miari. Ipepulungna page si perngis ku bas lumbung, tapi lapung-lapungna itutungNa i bas api si la ernimpet-nimpet." 18 Alu erbage-bage pengajaren iberitaken Johanes Berita Si Mehuli i bas Dibata nari man jelma si nterem. 19 Raja Herodes pe iajarkenna sabap iempoina Herodias ndehara seninana janah perbahan enggo melala kejahaten ibahanna. 20 E maka itambahi Herodes pe tole kejahatenna alu namaken Johanes ku bas rumah tutupen. 21 Kenca kerina kalak si nterem iperidiken, Jesus pe iperidiken ka. Sanga Jesus ertoto talang me langit, 22 janah Kesah Si Badia nusur ku baboNa bagi nderapati. Terbegi pe sora i Surga nari nina, "Kam kap AnakKu si Kukelengi. Kam kap si ngena ateKu." 23 Sanga Jesus mulai menaken dahinNa, umurna kira-kira telu puluh tahun. Rikutken pengakap kalak Ia e me anak Jusup, anak Eli, 24 anak Mattat, anak Lewi, anak Melki, anak Jannai, anak Jusup, 25 anak Matatias, anak Amos, anak Nahum, anak Esli, anak Nagai, 26 anak Maat, anak Matatias, anak Simei, anak Josek, anak Joda, 27 anak Johanan, anak Resa, anak Serubabel, anak Sealtiel, anak Neri, 28 anak Melki, anak Addi, anak Kosam, anak Elmadam, anak Er, 29 anak Josua, anak Elieser, anak Jorim, anak Matat, anak Lewi, 30 anak Simeon, anak Juda, anak Jusup, anak Jonam, anak Eliakim, 31 anak Malia, anak Menna, anak Matata, anak Natan, anak Daud, 32 anak Isai, anak Obed, anak Boas, anak Salmon, anak Nahesson, 33 anak Aminadap, anak Admin, anak Arni, anak Hesron, anak Peres, anak Juda, 34 anak Jakup, anak Isak, anak Abraham, anak Terah, anak Nahur, 35 anak Seruh, anak Rehu, anak Peleh, anak Heber, anak Selah, 36 anak Kenan, anak Arpaksat, anak Sem, anak Nuah, anak Lameh, 37 anak Metusalah, anak Enoh, anak Jaret, anak Mahalalel, anak Kenan, 38 anak Enos, anak Set, anak Adam, anak Dibata.
41 Asum Jesus mulih i Lau Jordan nari, idemi Kesah Si Badia Ia, janah ibabai Kesah Si Badia e Ia ku taneh gurun pasir. 2 I je me Ia icubai Iblis empat puluh wari dekahna. Kidekah i je kai pe la lit ipanNa, e maka kenca si e igejapNa melihe. 3 E maka nina Iblis man baNa, "Adi Anak Dibata kin Kam salihken dage batu-batu enda jadi roti." 4 Ngaloi Jesus, "Lit kap tersurat i bas Pustaka Si Badia, ’Labo ibahan pangan ngenca maka manusia nggeluh.’ " 5 Jenari ibabai Iblis Jesus ku ingan si meganjang, janah icidahkenna kerina kerajan doni. 6 Nina Iblis man baNa, "Kerina kuasa ras kinibayaken enda kubereken man baNdu, sabap kerina e enggo iendesken man bangku janah banci kubereken man ise ateku. 7 Adi nggit Kam nembah mungkuk man bangku, kerina enda kubereken man baNdu." 8 Ngaloi Jesus, "Lit kap tersurat i bas Pustaka Si Badia, ’Sembahlah Tuhan Dibatandu, janah Ia saja ngenca si man sembahen!’ " 9 Kenca bage ibabai Iblis ka Jesus ku Jerusalem janah ipetedisna i babo ingan si meganjangna i bas tarum Rumah Pertoton, jenari nina man Jesus, "Adi kam kin Anak Dibata, dabuhken dage baNdu ku teruh. 10 Sabap lit kap tersurat i bas Pustaka Si Badia, ’Isuruh Dibata kap malekat-malekatNa reh njagai Kam,’ 11 bage pe itatang malekat-malekat e nge Kam alu tanna gelah naheNdu pe ola terantuk ku batu." 12 Nina Jesus, "Lit kap tersurat i bas Pustaka Si Badia, ’Ola cubai Tuhan Dibatandu.’ " 13 Kenca Iblis dung ncubai Jesus arah kerina dampar itadingkenna Ia seh lit kesempaten si deban. 14 E maka mulihken Jesus ku Galilea, janah ikuasai Kesah Si Badia Ia. Mbar me berita kerna Jesus ku belang-belang daerah e. 15 Ngajar Ia i bas rumah-rumah pertoton si lit i je janah kerina kalak muji Ia. 16 Seh ka pe Jesus i Nasaret, e me kuta inganNa ipebelin. Sanga wari Sabat ku rumah pertoton Ia bagi biasana. Tedis Ia guna ngoge Pustaka Si Badia. 17 Jenari ibereken kalak man baNa kitap Nabi Jesaya. Kenca ipepayoNa, idahNa me ayat-ayat si ateNa iogekenNa e me, 18 "Kesah Tuhan lit i babongKu, sabap enggo ipilihNa Aku guna meritaken Berita Si Meriah man kalak si musil. IsuruhNa Aku erberita man kalak si tertaban maka ipulahi me ia, janah kalak si pentang erpengidah me, kalak si itindas ipulahi me. 19 Janah mpebetehken masana Tuhan mulahi bangsaNa." 20 Kenca dung Ia ngoge, igulungNa kitap ndai, iulihkenNa man si erdahin i je, jenari kundul Ia. Kerina mata kalak i bas rumah pertoton e ngenen ku Ia. 21 E maka ibenaken Jesus ngajar nina, "Sendah enggo seh isi Pustaka Si Badia si ibegindu ndai." 22 Tuhu iakap kalak si nterem kai si ikataken Jesus, tapi mamang atena sabap Jesus mbelaskenca kata si mehuli e. E maka nina kalak ndai, "Ma anak si Jusup kin Ia?" 23 E maka ngerana Jesus man bana kerina, "La banci lang maka ibelaskenndu atendu man bangKu kata enda, ’O dokter, pepalemlah bandu.’ Bage pe ikatakenndu atendu man bangKu, ’Bahanlah i kutaNdu enda bagi si enggo ibegi kami ibahanNdu i Kapernaum.’ " 24 Tole nina Jesus, "Kukataken pe man bandu, maka labo lit sekalak pe nabi ipehaga i bas kutana. 25 Tapi ingetlah: nai paksa Elia nggeluh, sanga musim kemarau telu tahun enem bulan dekahna terjadi kelihen si mesangat i belang-belang taneh enda, nterem kal diberu si enggo mbalu i bas kalak Israel. 26 Amin bage pe la isuruh Dibata maka Elia lawes ndahi sekalak diberu balu-balu ndai, tapi Elia isuruhNa ku sada diberu balu-balu i Sarpat i daerah Sidon ngenca. 27 Bage ka pe sanga paksa Nabi Elisa, nterem nge kalak Israel si gadamen. Tapi labo lit sekalak pe ipepalem, seakatan Naman kalak Siria ngenca ipepalem." 28 Megi kata Jesus e, merawa kerina kalak si i bas rumah pertoton e. 29 Tedis ia kerina irintakna Jesus ku darat kota jenari ibabana Ia ku das uruk ingan kota e ipanteki. I das uruk e nari ianjumkenna atena Jesus ku embang. 30 Tapi erdalan Jesus arah tengah-tengah kalak si nterem e, jenari lawes Ia. 31 Jenari ngincuah Jesus ku Kapernaum, e me sada kuta i Galilea. I bas wari-wari Sabat ngajar Ia man kalak si nterem. 32 Mamang ate kalak megi pengajarenNa sabap Ia ngajar alu kuasa. 33 I bas rumah pertoton e lit sekalak setanen; serko ia alu megang sorana nina, 34 "Oh, man kadeNdu kin kami o Jesus kalak Nasaret? Reh Kam gelah meneken kami? Kueteh nge ise Kam. Kam me si Badia si reh i bas Dibata nari!" 35 Isergangi Jesus setan ndai nina, "Sinik! Ndaratlah i bas ia nari!" E maka idampes-dampesken setan e kula si setanen e, i lebe-lebe kalak si nterem, jenari ndarat setan e i bas ia nari alu la nakiti ia. 36 Kerina kalak kemamangen, janah sisungkun-sungkunen ia, nina, "Kata-kata si kuga nge enda ndia? Erdolat dingen erkuasa Ia merentahken setan-setan e, janah setan-setan e pe ndarat." 37 E maka berita kerna Jesus mbar ku belang-belang daerah e. 38 Kenca ndarat i bas rumah pertoton nari, berkat Jesus ku rumah Simon. Mami Simon sakit mekelek; perbahan e ipindoken kade-kadena man Jesus gelah ipepalemNa min ia. 39 E maka idahi Jesus mami Simon, tedis la deherken ingan medemna, jenari ipelawesNa penakit e, janah penakit e pe nadingken mami Simon. Minter keke mami Simon, kuskas ia nikapken pangan dingen ngelai Jesus ras kalak ndai kerina. 40 Kenca matawari enggo sundut, kerina kalak maba kade-kadena si erbage-bage penakitna man Jesus. Ipepalem Jesus kerina alu namaken tanNa ku babo kalak si penakiten e sekalak-sekalak. 41 Setan-setan pe ndarat i bas kerina kalak si setanen nari, alu serko nina, "Kam kap Anak Dibata." Isuriangi Jesus setan-setan e, janah la ibereNa ngerana, sabap ieteh setan-setan e pe maka Ia kap Kristus, si Engkelini si ipadanken Dibata. 42 Kenca terang wari itadingken Jesus kuta e, berkat Ia ku sada ingan si melenget. Kalak si nterem ndarami Ia, janah kenca jumpa lanai iberena Jesus lawes sabap atena ola min ia itadingken Jesus. 43 Tapi nina Jesus man bana, "Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata." 44 E maka erkotbah Jesus i bas rumah-rumah pertoton i belang-belang daerah Judea.
51 Sekali jadi sanga Jesus tedis i tepi Dano Genesaret, kalak si nterem siasak-asaken ngkeleweti Ia guna megiken Berita i bas Dibata nari. 2 Idah Jesus lit dua perahu ngadi i tepi dano; penjala-penjala si mada perahu e enggo nusur janah sangana nikapken jalana. 3 Idatasi Jesus perahu e, e me perahu Simon; jenari isuruhNa Simon njembaken perahu e sitik ku lau nirangken tepi dano e. Kundul Jesus i bas perahu e, janah ije nari Ia ngajar man jelma si nterem. 4 Kenca dung Ia ngajar nina man Simon, "Baba perahundu tertengahen ku ingan si mbages. Amburkenlah jalandu guna nangkap nurung." 5 Ngaloi Simon, "O Guru, sada berngi enda latih kal akap kami erdahin, kai pe la lit dat kami! Tapi adi Kam kal nuruhsa banci kuamburken jala e." 6 E maka iamburken kalak ndai jalana janah melala kal datsa nurung seh maka merigat atena jala ndai. 7 E maka ikiapi kalak enda teman-temanna si lit i bas perahu si sada nari ndai gelah reh nampati. Reh kalak ndai janah isina perahu e duana seh dem, janah menam gedap pe. 8 Kenca idah Simon Petrus kai si enggo jadi, erjimpuh ia nembah man Jesus nina, "O Tuhan, laweslah Kam i bas aku nari! Aku kalak perdosa kap!" 9 Mamang ate Simon Petrus ras teman-temanna perbahan melala kal nurung si idatsa e. 10 Bagepe temanna anak-anak Sebedeus e me Jakup ras Johanes. Nina Jesus man si Simon, "Ola kam mbiar, mulai genduari nari kam jadi penjala jelma." 11 Kenca ikayuhna perahu e ku tepi, e maka itadingkenna me e kerina, jenari ikutkenna Jesus. 12 Sekali jadi asum Jesus i bas sada kota, lit me i je sekalak dilaki si kerina dagingna gadamen. Kenca idahna Jesus, minter isembahna dingen mindo nina, "O, Tuan, bicara nggit Kam, ngasup kap Kam pepalem aku!" 13 E maka idudurken Jesus tanNa, idadapNa kalak si gadamen ndai, jenari nina, "Nggit nge Aku, malemlah kam!" Minter malem gadamna ndai janah mejelis pe dagingna. 14 Jenari nina Jesus man bana, "Ola turiken man ise pe kerna si enda, tapi laweslah, cidahken bandu man imam. Gelah tek kalak maka kam enggo malem, bahanlah persembahenndu bagi iperentahken Musa." 15 Berita kerna Jesus reh mbarna, janah nterem kalak reh megiken Ia dingen mindo gelah ipepalemNa ia i bas penakitna nari. 16 Tapi ulin iakapNa Ia lawes ku ingan si melenget, janah i je Ia ertoto. 17 I bas sada wari sanga Jesus ngajar, lit me i je piga-piga kalak Parisi ras guru-guru agama kundul megiken Ia. Kalak enda ndai reh i bas tep-tep kuta i Galilea ras Judea nari, bage pe i Jerusalem nari. Kuasa Tuhan lit i bas Jesus guna pepalem kalak si sakit. 18 Asum si e reh piga-piga kalak si ngelanja sekalak si pangpangen i bas ingan medem. Ibabana ku bas rumah, ku lebe-lebe Jesus. 19 Perbahan nterem kal jelma i rumah, e maka la lit dalanna mabasa ku bas. E maka inangkihna rumah e, ibukana tarumna, janah arah e itantanna kalak si pangpangen ndai ras ingan medemna ku tengah-tengah jelma si nterem pas i lebe-lebe Jesus. 20 Kenca idah Jesus maka tek kal kalak e, e maka nina man kalak si pangpangen e, "O senina, dosandu enggo ialemi." 21 Guru-guru agama ras kalak Parisi mulai sisungkun-sungkunen, nina, "Ise kin Ia maka bagenda kal pengeranaNa ngelawan Dibata? La kap ise pe ngasup ngalemi dosa seakatan Dibata!" 22 Ieteh Jesus kai si lit i bas ukur kalak enda ndai, e maka nina man kalak e, "Kai nge si lit i bas ukurndu e? 23 Apai kin sukahen, ’Dosandu enggo ialemi,’ asa ngataken, ’Kekeken, erdalanken!’? 24 Genduari Kucidahken man bandu maka lit nge kuasa i bas Anak Manusia si isuruh Dibata guna ngalemi dosa manusia i doni enda." E maka nina Jesus man kalak si pangpangen e, "Kukataken man bandu: Kekeken, angkat ingan medemndu, dingen mulihlah ku rumahndu." 25 Minter keke si pangpangen ndai i lebe-lebe jelma si nterem, iangkatna ingan medemna, jenari mulih ia ku rumah janah ipujina Dibata. 26 Mamang kal ate kalak si nterem, alu dem kebiaren ipujina Dibata nina, "I bas wari enda enggo idah kami kejadin si luar biasa." 27 Kenca si e, lawes Jesus nadingken kuta ndai, jenari idahNa sekalak pengalo cuke, gelarna Lewi, kundul i bas kantorna. Nina Jesus man bana, "Ikutken Aku." 28 Tedis Lewi, itadingkenna kerina, jenari ikutkenna Jesus. 29 Kenca bage, ibahan Lewi i bas rumahna kerja man-man si mbelin guna Jesus. Nterem pe pengalo cuke bage pe kalak si deban ikut man ras kalak enda ndai i je. 30 Perbahan si e, piga-piga kalak Parisi ras guru-guru agama jungut-jungut man ajar-ajar Jesus nina, "Engkai maka kam man dingen minem ras kalak pengalo cuke, kalak perdosa?" 31 Megi penungkunen e, erjabap Jesus, "Kalak si sehat labo iperlukenna dokter, tapi kalak si sakit nge. 32 Aku reh labo guna ndilo kalak si bujur akapna bana, tapi guna ndilo kalak perdosa gelah ia jera." 33 E maka nina kalak nungkun man Jesus, "Ajar-ajar si Johanes megati kal erpuasa dingen melasken pertoton, bage pe ajar-ajar kalak Parisi; tapi ajar-ajarNdu tetap ia man ras minem." 34 Ngaloi Jesus, "Metunggung kin iakapndu adi temue i bas kerja erdemu bayu erpuasa kidekah ia ras si empo denga? Tentu lang! 35 Tapi lit pagi masa sirang ia ras si empo, janah i bas paksa si e me ia erpuasa." 36 Ituriken Jesus pe sada perumpaman nina, "Labo lit kalak ngerigatken baju si mbaru guna ngerangkapi baju si enggo buruk. Sabap adi bage ibahanna, baju si mbaru ndai pe enggo merigat, janah uis si mbaru e la kabo tengteng jadi pengerangkapi baju si enggo buruk. 37 Bage pe labo itamaken kalak lau anggur si mbaru ku bas tambe kuling-kuling si enggo metua. Sabap adi bage ibahanna, pecah me tambe ndai ibahan anggur e; jadi anggur pe mambur, tambe kuling-kuling pe pecah. 38 Dage, tamakenlah anggur si mbaru kubas tambe kuling-kuling si mbaru! 39 Janah ise pe labo nggit nginem anggur si mbaru adi enggo iinemna anggur si ndekah. Sabap nina, ’Ulin anggur si ndekah.’ "
61 Sekali jadi rembang tupung wari Sabat mentas Jesus arah juma gandum. Iputiki ajar-ajar ruhi gandum e, ipiyuina alu tanna, jenari ipanna buahna. 2 Piga-piga kalak Parisi nungkun, "Engkai maka ibahanndu si la banci ilakoken rikutken peraturen agamanta i bas wari Sabat?" 3 Erjabap Jesus man kalak Parisi e, "La kin iogendu kuga perbahanen Daud asum ia ras teman-temanna melihe? 4 Bengket ia ku bas rumah Dibata, ibuatna roti si ipersembahken man Dibata, ipanna janah iberekenna pe man teman-temanna. Rikutken peraturen-peraturen agamanta ise pe la banci man roti e, seakatan imam-imam." 5 Tole nina Jesus, "Anak Manusia si isuruh Dibata, Ia kap Tuhan si engkuasai wari Sabat e." 6 I bas wari Sabat si debanna ka bengket Jesus ku bas rumah pertoton, i je ngajar Ia. I je lit kalak tanna si kemuhen enggo kesip perban mate serapen. 7 Piga-piga kalak Parisi ras guru-guru agama ndarami kesalahen Jesus gelah lit dalanna ngaduken Ia. E maka iperdiatekenna kal Jesus ntah mawen ipepalemNa kin kalak sakit i bas wari Sabat. 8 Tapi ieteh Jesus perukuren kalak ndai, e maka nina man kalak si mate serapen tanna e, "Mari tedis kam ku lebe enda!" Keke ia, jenari tedis ia arah lebe. 9 E maka nina Jesus man kalak si nterem, "Kusungkun kam; rikutken peraturen agamanta kai kin banci si bahan i bas wari Sabat? Erbahan si mehuli ntah si jahat? Nampati geluh manusia ntah munuh?" 10 Ipernehen Jesus kerina jelma si lit ikelewetNa jenari nina man kalak si mate serapen tanna sembelah, "Pepinter tanndu." E maka ipepinterna tanna janah minter malem. 11 Tapi merawa kal ate kalak Parisi ras guru-guru agama, e maka arih-arih ia kerina ntah kai banci ibahanna nandangi Jesus e. 12 Paksa si e, lawes Jesus ku datas sada uruk-uruk; i je Ia ertoto man Dibata seh terang wari. 13 Kenca terang wari, idiloNa ajar-ajarNa, jenari ipilihNa sepuluh dua kalak i bas si e nari, si igelariNa rasul, e me: 14 Simon (igelari pe Petrus) ras seninana Andreas; Jakup ras Johanes, Pilipus, Bartolomeus, 15 Matius ras Tomas, Jakup anak Alpius, Simon (si igelari pe Pejuang), 16 Judas anak Jakup, Judas Iskariot si ndayaken Jesus. 17 Ngincuah Jesus ras rasul-rasul e kerina, jenari ngadi Ia i bas ingan si kendit. I je lit ka piga-piga ajar-ajarNa si deban ras nterem jelma reh i belang-belang daerah Judea ras i Jerusalem nari, bage pe i kuta Tirus ras Sidon nari si i tepi lawit. 18 Reh ia kerina guna megiken pengajaren Jesus dingen mindo gelah penakitna ipepalem. Kalak si setanen pe reh janah penakitna ipepalem. 19 Kerina kalak erpala-pala njemak Jesus, sabap lit Kuasa ndarat i bas Ia nari dingen pepalem ia kerina. 20 Kenca bage, ipernehen Jesus ajar-ajarNa, jenari nina, "Ketuahen me kam, o kalak musil, sabap man bandu me Kinirajan Dibata. 21 Ketuahen kam si melihe genduari, sabap ibesuri me kam. Ketuahen kam si tangis genduari, sabap tawa me kam pagi. 22 Ketuahen kam adi segat ate kalak kam janah itulak dingen iisak-isakken ras ikatakenna kam jahat erkiteken Anak Manusia si isuruh Dibata! 23 Meriahlah ukurndu dingen ersurak-suraklah i bas paksa si e, erkiteken pemere si mbelin isikapken man bandu i Surga. Sabap nini-ninina pe nai bage perbahanenna man nabi-nabi. 24 Tapi, cilaka me kam kalak bayak, sabap enggo ialokenndu kepuasen i bas geluhndu. 25 Cilaka me kam si besur genduari; sabap melihe kam pagi! Cilaka me kam si tawa genduari; sabap ceda atendu dingen tangis kam pagi! 26 Cilaka me kam adi kerina kalak muji kam; sabap nini-ninina pe nai bage perbahanenna man nabi-nabi perguak." 27 "Tapi man bandu si megiken Aku, Kukataken, Kelengilah imbang-imbangndu, mehulilah perbahanenndu man kalak si ernembeh ate nandangi kam, 28 pasu-pasu kalak si numpahi kam, janah totokenlah kalak si erbahan la mehuli man bandu. 29 Adi iparap kalak pipindu sembelah, bereken pe parapna pipindu si sembelah nari. Adi ibuat kalak bajundu, bereken pe ras bajundu si deban. 30 Adi lit kalak mindo man bandu, berekenlah, janah adi enggo i bas ia olanai pindo mulihken. 31 Bahanlah man kalak si deban bagi atendu ngena ibahanna man bandu. 32 Adi kalak si engkelengi kam ngenca ikelengindu, kai nge dalanna maka kam dat pasu-pasu? Kalak perdosa pe keleng nge atena kalak si engkelengi ia. 33 Adi man kalak si mehuli perbahanenna bandu ngenca ibahanndu mehuli kai nge dalanna maka kam dat pasu-pasu? Kalak perdosa pe bage nge perbahanenna. 34 Adi man kalak si ngasup ersimulih ngenca ipinjamkenndu kai nge dalanna kam dat pasu-pasu? Kalak perdosa pe ipinjamkenna nge man kalak perdosa, janah ialokenna pe mulihken asa si iberekenna e. 35 Tapi kam, kelengilah imbang-imbangndu janah mehulilah perbahanenndu man bana; pinjamken janah ola arapken mulih. Alu bage maka ialokenndu pagi upahndu si mbelin janah kam jadi anak-anak Dibata si Meganjangna. Sabap Dibata mehuli nge man kalak si la ngataken bujur bage pe man kalak si jahat. 36 Mekuah atendu bagi ate Bapandu mekuah!" 37 "Ola isalahkenndu kalak si deban, maka kam pe pagi la isalahken Dibata; ola ukum kalak si deban, maka kam pe pagi la iukum Dibata; alemilah kalak si deban, maka kam pagi ialemi Dibata. 38 Berelah kalak si deban, maka kam pe pagi ibere Dibata; ialokenndu me pagi sada persukaten si dem, sada bagin si sampur si itungtungken ku bas tanndu asa ngasup kam ngalokenca. Sukat-sukat si ipakendu e ka nge isukatken man bandu." 39 Jenari ituriken Jesus ka perumpaman enda, "Sekalak si pentang labo ngasup negu-negu kalak pentang; sabap adi bage duana me ia ndabuh ku parik. 40 Bage pe labo lit murid belinen asa guruna; tapi adi murid enggo tammat pelajarenna, bali me ia ras guruna. 41 Engkai maka idahndu rintep si i bas mata seninandu, tapi beloti si i bas matandu la igejapndu? 42 Kuga nindu ngatakenca man seninandu, ’O, senina, bere maka kuagui rintep si i bas matandu,’ tapi beloti si i bas matandu la iidahndu? O, kalak pekulah-kulah, agui lebe beloti si lit i bas matandu, sabap kenca bage maka banci terang pengidahndu guna ngagui rintep si lit i bas mata seninandu." 43 "Labo lit batang kayu si mehuli erbuahken si la mehuli, bage pe labo lit batang kayu si la mehuli erbuahken si mehuli. 44 Kerina batang kayu itandai arah buahna; sabap labo iputikkenndu buah ara i bas dukut-dukut si erduri nari, ntah pe ipepulungndu buah anggur i bas batang bungke rimbang nari. 45 Kalak si bujur tentu ndarat i bas ia nari si mehuli, reh i bas pusuh peratenna si mehuli nari; janah kalak si jahat ndarat me kejahaten i bas pusuh peratenna si jahat nari. Sabap kai si ibelasken kalak arah babahna, e reh i bas pusuh peratenna nari." 46 "Engkai maka kam erlebuh man bangKu, ’O Tuhan, O Tuhan,’ adi labo ikutkenndu kai si Kukataken man bandu? 47 Ise si reh ku Aku, si megiken katangKu dingen si ngikutkenca -- bali ras ise ia banci ipeseri? -- Kukataken man bandu. 48 Ia bali ras sekalak si erbahan rumah: Ikalina taneh mbages seh jumpa batu, janah i babo batu e me ipajekkenna palas rumah e. E maka adi reh banjir ras lau mbelin nderpa rumah e, la mugur pe ibahanna, sabap rumah e seh kal teguhna. 49 Janah ise si megi katangKu tapi la ikutkenna, bali ia ras sekalak si erbahan rumah si la erpalas; e maka adi reh banjir nderpa rumah e, minter runtuh mesangat pe runtuhna."
71 Kenca dung Jesus ngajar man kalak si nterem, lawes Ia ku Kapernaum. 2 I je lit sekalak perwira Roma; keleng kal atena suruh-suruhenna. Suruh-suruhenna e paksana sakit dingen menam mate pe. 3 Sanga ibegi perwira e kerna Jesus, isuruhna piga-piga peminpin-peminpin Jahudi ndahi Jesus guna mindo gelah ipepalemNa suruh-suruhenna e. 4 E maka idahi peminpin-peminpin ndai me Jesus janah mindo alu meseksek nina, "O Tuhan, tuhu-tuhu patut kal perwira e isampatindu, 5 sabap keleng kal atena bangsanta, janah ibahanna pe sada rumah pertoton man kami." 6 E maka berkat Jesus ras kalak ndai. Asum lanai ndauhsa Jesus i bas rumah perwira nari, isuruh perwira e teman-temanna ndahi Jesus guna ngataken, "O Tuan, olanai gia Kam latih. Kuakap labo aku metunggung ngalo-ngalo Kam i bas rumahku, 7 bage pe la kuakap metunggung aku reh njumpai Kam. E maka katakenlah sengkebabah kal lah gia, tentu malem suruh-suruhenku e. 8 Sabap aku pe lit nge perwira-perwira si ganjangen asangken aku, lit ka pe si teruhen asangken aku. Adi ningku man bana, ’Lawes!’, lawes ia; adi ningku man si deban ’Mari!’, reh ia, jadi adi man sekalak suruh-suruhen ningku, ’Bahan bagenda!’, ibahanna pe minter." 9 Mamang ate Jesus asum ibegiNa kata e. JanahNa nulih kempak kalak si nterem si ngikutken Ia nina, "Kukataken man bandu: Langa pernah Aku jumpa ras sekalak si bagenda kal belinna kinitekenna. I bas kalak Israel pe langa pernah Aku jumpa." 10 Kenca mulihken kerina si isuruh perwira ndai, idapetina suruh-suruhen e enggo malem. 11 Kenca si e, minter lawes Jesus ku sada kuta, gelarna Nain; ajar-ajarNa ras jelma si nterem ikut ras Ia. 12 Seh kenca Ia i kerabangen kuta e, simbel Ia ras rombongen si ngelanja kalak mate, ndarat i bas kuta e nari. Si mate e sekalak anak perana, e me anak sada diberu balu-balu. Nterem kal anak kuta ikut naruhkenca. 13 Megogo dingen mekuah ate Tuhan Jesus ngidah nande si kepaten e, e maka nina man bana, "Ola kam tangis." 14 Ideheri dingen ijemak Jesus peti mait e, e maka ngadi si ngelanjasa. Nina Jesus, "O anak perana, Kukataken man bandu: kekeken!" 15 E maka keke si mate ndai janah ngerana ia, jenari ibereken Jesus ia man nandena. 16 Mbiar kalak e kerina, janah ipujina Dibata nina, "Enggo reh nabi si mbelin ku tengah-tengahta! Enggo reh Dibata mulahi bangsaNa!" 17 E maka berita kerna Jesus mbar ku kerina taneh Judea ras ku daerah-daerah sekitarna. 18 Kerina kejadin e seh man Johanes Peridiken perbahan ituriken ajar-ajarna. E maka idilo Johanes Peridiken dua kalak ajar-ajarna, 19 jenari isuruhna duana ndahi Tuhan guna nungkun, "Kam kin si ikataken Johanes Peridiken si enggo ndeher kerehenna e, ntah itimai kami denga si deban?" 20 Kenca si dua kalak e jumpa ras Jesus, e maka nina, "Kami isuruh Johanes Peridiken nungkun man baNdu, ’Kam kin si ikataken Johanes Peridiken si enggo ndeher kerehenna e, ntah itimai kami denga si deban?’ " 21 Paksa si e ka, ipepalem Jesus nterem kalak penakiten si erbage-bage persuina ras si setanen, janah ibahanNa jadi erpengidah kalak si pentang. 22 E maka erjabap Jesus man persuruhen Johanes Peridiken e, nina, "Mulihlah, janah turiken man Johanes Peridiken kai si enggo idah dingen ibegindu, e me: kalak pentang enggo erpengidah, si pangpangen enggo ngasup erdalan, si gadamen enggo malem, si pasek enggo erpemegi, si enggo mate nggeluh mulihi, janah Berita Si Meriah iberitaken man kalak musil. 23 Malem tuhu-tuhu ate kalak si tetap erkiniteken man bangKu." 24 Kenca lawes persuruhen Johanes Peridiken ndai, ibenaken Jesus ngerana man kalak si nterem kerna Johanes Peridiken nina, "Asum idahindu mbaru enda Johanes Peridiken ku taneh si melungun, kai kin min atendu nehenenndu? Atendu kin ngenehen dukut si iole-oleken angin? Tentu lang! 25 Jadi, kai dage nehenenndu? Sekalak si mejile uisna? Tentu lang, sabap kalak si mejile uisna dingen nggeluh mewah inganna i bas istana raja nge. 26 Katakenlah, kai dage nehenenndu? Sekalak nabi? Payo, Kukataken pe man bandu maka si enggo idahndu e lebihen asa sekalak nabi. 27 Sabap kerna Johanes Peridiken enggo isuratken i bas Pustaka Si Badia, ’Nina Dibata: Kusuruh persuruhenKu leben asa Kam, ia kap nikapken dalan man baNdu.’ " 28 Tole nina Jesus, "Kukataken man bandu maka i doni enda la lit pernah manusia belinen sangken Johanes Peridiken. Tapi si kitikna i bas Kinirajan Dibata belinen asangken Johanes Peridiken." 29 Kerina kalak si nterem: pengalo cuke, si megi pengajaren Johanes Peridiken ngakui kebenaren Dibata, dingen enggo pe ialokenna peridin arah Johanes. 30 Tapi kalak Parisi ras guru-guru agama nulak rencana Dibata nandangi dirina, dingen la ia nggit iperidiken Johanes Peridiken. 31 Tole nina Jesus, "Dage alu kai nge banci Kuumpamaken manusia si genduari enda? Ras kai nge ia bali? 32 Kalak si genduari enda bali ras anak-anak si erguro-guro i tengah kesain. Nina sada terpuk man terpuk si deban, ’Enggo ipalu kami gendang guro-guro tapi la kam landek! Enggo iendeken kami lagu tangis-tangis, tapi la kam tangis!’ 33 Sabap Johanes Peridiken enggo reh, la ia ikut man-man i bas pesta dingen la inemna anggur, janah ikatakenndu, ’Setanen ia!’ 34 Reh ka Anak Manusia si isuruh Dibata, ikut Ia man ras minem i bas pesta, janah nindu, ’Nehenlah! Ia sekalak si rangap dingen peminem-minem; meriah Ia ras pengalo cuke bage pe kalak si enggo terbuang i tengah-tengah jelma si nterem nari!’ 35 Tapi amin bage pe, kepentaren Dibata nge si payo. E lit buktina i bas kerina kalak si ngalokenca." 36 Sekalak i bas kalak Parisi nari ngundang Jesus man ku rumahna. Lawes Jesus ku rumah e janah kundul Ia man i je. 37 I bas kuta e lit sekalak diberu perdosa. Ibegina berita maka Jesus sangana man i rumah kalak Parisi e, e maka reh ia, ibabana sada botol marmar minak merim. 38 Tedis ia i pudi Jesus deher naheNa, tangis ia seh litap pe nahe Jesus ibahan iluhna, jenari isapuina alu bukna. Iemaina nahe Jesus dingen iminakina alu minak si merim ndai. 39 Ngidah si e mecekurak ukur kalak Parisi si ngundang Jesus ndai nina, "Adi tuhu-tuhu kin Ia nabi, tentu ietehNa nge ise diberu si njemak Ia e dingen kalak si kuga kin ia. Tentu ietehNa maka diberu enda kalak perdosa." 40 E maka nina Jesus man bana, "O, Simon, lit ateKu Kukataken man bandu." Ngaloi Simon, "Katakenlah Guru." 41 E maka nina Jesus, "Lit me dua kalak rutang man kalak si peraihken duit. Sekalak rutang lima ratus duit pirak sekalak nari rutang lima puluh duit pirak. 42 Duana kalak enda lanai ngasup nggalari utangna e, e maka isasapken perutangenna e utangna ndai. Adi bage, si apai nge i bas si dua kalak enda ndai si lebih erkeleng ate nandangi perutangenna e?" 43 Erjabap Simon, "Kuakap kalak si mbuena utangna isasapken." Ngaloi ka Jesus, "Payo jabapndu e." 44 E maka erkusur Jesus man diberu e, jenari nina man Simon, "Idahndu kin diberu enda? Reh Aku ku rumahndu, la iberendu lau man pemurihi nahengKu, tapi ia enggo iburihina nahengKu alu iluhna dingen isapuina alu bukna. 45 La iemandu Aku, tapi ia la erngadi-ngadi ngema nahengKu. 46 La iminakindu takalKu alu minak, tapi ia enggo iminakina nahengKu alu minak si merim. 47 Perbahan si e, Kukataken man bandu maka dosana si melala enggo ialemi! Sabap melala icidahkenna kekelengen. Tapi kalak si sitik ialemi tentu kekelengenna pe sitik." 48 E maka nina Jesus man diberu e, "Dosandu enggo ialemi!" 49 Kalak si deban si ras Jesus kundul i je nungkun i bas ukurna nina, "Ise kin kalak enda maka banci ialemiNa dosa?" 50 Tole nina Jesus man diberu ndai, "Kinitekenndu erbahanca kam terkelin. Mulihlah alu mejuah-juah!"
81 La ndekahsa kenca si ndai isiari Jesus kota-kota ras kuta-kuta, iberitakenNa Berita Si Meriah kerna Kinirajan Dibata. Ajar-ajar si sepuluh dua kalak ikut ras Ia, 2 bage pe piga-piga diberu si enggo ipepalemNa i bas setan ras penakit-penakit nari, e me: Maria (si igelari Magdalena) si enggo ipelawes pitu setan i bas ia nari; 3 Johana ndehara Kusa menteri Herodes, Susanna bage pe nterem diberu-diberu si deban. Diberu-diberu enda ndai me si nampati Jesus ras ajar-ajarNa alu erta-ertana. 4 Nterem kalak rehen i kuta-kuta nari ndahi Jesus, e maka asum pulung ia kerina ituriken Jesus perumpaman enda nina, 5 "Sekalak perjuma lawes ku juma ngambur benih. Asum ia ngambur benih ndai, deba ndabuh ku dalan, e maka idedehi kalak jenari reh perik-perik manganisa seh keri. 6 Deba ka ndabuh ku taneh si erbatu-batu, kenca turah, la ndekahsa kerah ia, sabap kerah taneh e. 7 Lit ka deba ndabuh ku tengah peren duri; turah raduken peren duri e, tapi iasak peren duri e benih ndai seh mate pe. 8 Tapi deba ndabuh ku taneh si mehumur, mehuli perturahna, jenari erbuah seratus kali ganda." Kenca ituriken Jesus si e, e maka nina, "Begikenlah adi lit kin cupingndu!" 9 E maka nungkun ajar-ajar Jesus man baNa kerna maksud ras tujun perumpaman ndai. 10 Erjabap Jesus nina, "Man bandu enggo ibereken pemeteh kerna rahasia Kinirajan Dibata; tapi man kalak si deban ituriken alu perumpaman, e maka aminna gia ipernehenna, tapi labo idahna, aminna gia ibegikenna tapi labo iangkana." 11 "Bagenda me antusenna perumpaman ndai. Benih ndai e me kata Dibata. 12 Benih si ndabuh ku dalan iandingken man kalak si megiken berita e, ibegikenna, tapi reh Iblis muat kata e i bas ukurna nari gelah ola ia tek dingen terkelin. 13 Benih si ndabuh ku taneh si erbatu-batu iandingken man kalak si megiken berita e, ibegikenna dingen ialokenna alu meriah ukur. Tapi la mbages uratna, kentisik ngenca ia tek. Reh kenca percuban minter ia murtad. 14 Benih si ndabuh ku peren duri, iandingken man kalak si megiken berita e, tapi aru atena janah jadi kalak bayak atena. Ersenang-senang atena i bas doni enda. Kerina si e nindih ia seh maka buahna la sempat metua. 15 Benih si ndabuh ku taneh si mehumur iandingken man kalak si megiken berita e, ibegikenna, ibunikenna i bas ukurna si mehuli dingen tetap, janah megenggeng ia seh erbuah." 16 "Labo lit kalak nagani lampu jenari itutupina alu tumba ntah pe itamakenna ku teruh ingan medem. Tentu itamakenna ku ingan sangket gelah terang iakap kalak si bengket ku bas. 17 Sabap kerina si terbuni teridah nge pagi janah kerina rahasia terbongkar dingen tangkas nge pagi. 18 Megermetlah kam kerna kai si ibegindu; sabap kalak si enggo lit i bas ia man bana itambahi tole. Tapi kalak si la lit kai pe i bas ia si iakapna lit i bas ia pe ibuat i bas ia nari." 19 Nande Jesus ras senina-seninaNa reh ndahi Ia, tapi perbahan teremna jelma i je, e maka la terbahanca jumpa. 20 Tapi lit sekalak si ngatakenca man Jesus nina, "NandeNdu ras senina-seninaNdu tedis i darat, atena njumpai Kam." 21 E maka nina Jesus man kalak si nterem, "NandengKu ras senina-seninangKu, e me kalak si megiken dingen si ngikutken Kata Dibata." 22 I bas sada wari idatasi Jesus ras ajar-ajarNa sada perahu, janah nina Jesus man ajar-ajarNa, "Ota ku lepar ah." E maka berkat ia. 23 Asum kalak e erlayar, tunduh Jesus. Rempet rembus angin meter ku dano e, janah mulai bengket lau ku bas perahu si erbahanca kalak e i bas bahaya tuhu-tuhu. 24 E maka iingeti ajar-ajar me Jesus nina, "O Guru, Guru! Cilaka kita!" Keke Jesus, isergangiNa angin ras galumbang si merawa ndai. Angin ras galumbang e minter jeneng kal. 25 Kenca bage nina Jesus man kalak ndai, "Engkai maka kam mbiar? I ja kinitekenndu?" Tapi mamang ate ajar-ajar dingen mbiar pe ia, janah nina sapih-sapih ia, "Ise kin ndia Ia? IperentahkenNa angin ras galumbang, janah angin ras galumbang e pe patuh nandangi perentahNa." 26 Terus Jesus ras ajar-ajarNa erlayar ku Gerasa pekepar-kepar ras daerah Galilea. 27 Seh kenca Jesus idaraten, reh me sekalak dilaki i kuta nari njumpai Ia. Dilaki enda ndai setanen. Enggo ndekah ia la ruis dingen lanai ia i rumah, tapi ringan ia i tengah-tengah kuburen. 28 Asum idahna Jesus serko ia, nembah-erjimpuh i lebe-lebe Jesus janah alu sora megang nina, "O Jesus, Anak Dibata si Meganjangna, kuga ateNdu aku ibahanNdu? Kupindo maka Ola aku iukumNdu!" 29 Enda ikatakenna perbahan isuruh Jesus setan e ndarat i bas ia nari. Enggo megati ia ikuasai setan e, seh maka aminna gia ia enggo ipenjaraken janah tanna ras nahena iiket alu rante, banci denga ka nge iretapkenna rante e, jenari ibaba setan ia ku ingan si mesawang. 30 E maka isungkun Jesus ia nina, "Ise gelarndu?" Erjabap ia, "Gelarku Meribu-ribu," sabap melala setan si neluki ia. 31 Ipindoken setan-setan e man Jesus gelah ola ia ipelawesNa ku bas kelbung si mbages. 32 I bas mbalmbal i ture-ture uruk e, lit me sada rarasen babi sangana nungke-nungke. E maka ipindoken setan-setan e man Jesus gelah ibere Jesus min ia kerina lawes neluki babi-babi e. Pemindonna enda ibere Jesus. 33 Kenca bage, ndarat me setan-setan ndai bas dilaki e nari, jenari iselukina babi-babi e. Kerina babi si sada rarasen ndai minter kiamen janah megulang, ndabuhen ku dano mate gedap kerina i je. 34 Kenca idah permakan babi ndai kai si enggo jadi e, kiam ia jenari iturikenna kejadin e ku kuta-kuta sekelewetna. 35 E maka rehen kalak ngenehen kai si enggo jadi. Idahina Jesus janah idapetina kalak si enggo itadingken setan ndai kundul i deher Jesus; enggo ruis ia dingen enggo jore ukurna. E maka mbiar kalak enda ndai kerina. 36 Kalak si enggo ngidah kejadin e, nuri-nuri man kalak si reh ndai kuga dalanna maka kalak si setanen ndai enggo malem. 37 E maka kerina kalak si i bas daerah Gerasa e mindo man Jesus gelah itadingkenNa min daerah e, sabap tuhu-tuhu mbiar ia kerina. Perbahan si e, idatasi Jesus perahu jenari lawes Ia. 38 Kalak si enggo itadingken setan ndai mindo man Jesus gelah ia ikut. Tapi isuruh Jesus ia lawes nina, 39 "Mulihlah kam ku rumahndu janah beritakenlah kai si enggo ibahan Dibata man bandu." E maka lawes ia isiarina kuta e janah iberitakenna kai si enggo ibahan Jesus man bana. 40 Kenca seh ka Jesus i lepar, ialo-alo jelma si nterem Ia, sabap kerina enggo tertima-tima. 41 E maka reh me sekalak pengulu rumah pertoton gelarna Jairus. Isembahna nahe Jesus janah ipindokenna gelah Jesus reh ku rumahna, 42 sabap anakna narus mate. Anakna e diberu, umurna kira-kira sepuluh dua tahun janah ia anak sada-sada. Asum erdalan Jesus ku rumah Jairus, siasak-asaken jelma si nterem ndeheri Ia. 43 Lit i je sekalak diberu enggo sepuluh dua tahun dekahna bluding rusur. Enggo keri erta-ertana guna pertambarna man dokter-dokter, tapi la lit sekalak pe si ngasup pepalem ia. 44 Ideherina Jesus i pudi nari dingen idadapna rambu-rambu uis Jesus, janah paksa e pe minter ngadi dareh e. 45 E maka nungkun Jesus nina, "Ise si ndadap Aku?" Perbahan la lit kalak si ngaku, e maka nina Petrus, "O Guru, nterem kap jelma i kelewetNdu janah siasak-asaken ndeheri Kam." 46 Tapi nina Jesus, "Lit kap sekalak si ndadap Aku, sabap Kugejap lit kuasa ndarat i bas Aku nari." 47 Asum ieteh diberu ndai maka kai si enggo ibahanna e la terbuniken, e maka reh ia ku lebe, nggirgir ia, janah erjimpuh nembah man Jesus. I lebe-lebe jelma si nterem iturikenna kai sabapna maka idadapna Jesus ras kerna penakitna si minter malem e. 48 E maka nina Jesus man diberu e, "O anakKu, kinitekenndu enggo nampati kam, mulihlah alu ermeriah ukur." 49 Sanga Jesus ngerana denga, reh me sekalak si maba berita i rumah pengulu e nari. Nina man Jairus, "Anakndu ndai enggo mate, man kai nari ngelatihi Guru enda?" 50 Tapi kata e ibegi Jesus, e maka nina man Jairus, "Ola kam mbiar, tek sajalah, malem nge kari anakndu e." 51 Kenca seh Jesus i rumah, ise pe la ibereNa ikut ras Ia ku bas selain Petrus, Johanes, Jakup ras bapa dingen nande anak e. 52 Kerina kalak si i je erceda ate dingen nangisi anak e. Tapi nina Jesus, "Ola kam tangis; anak enda labo mate, tunduh saja nge ia!" 53 Itawai kalak ndai Jesus, sabap ietehna nge maka anak e enggo mate. 54 Tapi ijemak Jesus tan anak ndai, janah nina alu sora megang, "O beru, kekeken!" 55 E maka erkesah anak ndai mulihken janah minter ia keke. Jenari isuruh Jesus gelah ibere man anak e. 56 Jengang orang tuana, tapi ipedahi Jesus gelah ola iturikenna man ise pe kai si enggo jadi e.
91 Idilo Jesus ajar-ajarNa si sepuluh dua kalak jenari iberekenNa kuasa man bana guna mpelawes setan-setan dingen pepalem penakit. 2 Kenca bage isuruhNa ajar-ajar lawes meritaken kerna Kinirajan Dibata, janah pepalem kalak si penakiten. 3 Nina Jesus man ajar-ajar e, "Ola kai pe baba i bas perdalanenndu, ola baba ciken, gajut-gajut, roti, duit, bage pe ola baba baju man osendu. 4 Adi i bas sada kuta ialo-alo kalak kam kesilang i bas rumahna, i je saja kam ngayak kam berkat ku kuta si deban. 5 Adi i bas sada kuta labo lit kalak ngalo-ngalo kam, tadingken kuta e, apusi abu si leket i bas nahendu. Enda pagi tanda bukti si jadi saksi man bana." 6 E maka lawes me ajar-ajar ndai, isiarina kuta-kuta janah iberitakenna Berita Si Meriah dingen ipepalemna kalak si penakiten. 7 Herodes raja wilayah Galilea pe megi kerna kejadin e. Lanai ia tenang sabap lit piga-piga kalak ngatakenca, "Johanes Peridiken enggo nggeluh mulihi!" 8 Deba ngatakenca maka Elia enggo reh, janah lit ka pe si ngatakenca maka sekalak i bas nabi-nabi si nai enggo nggeluh mulihi. 9 Nina Herodes, "Enggo kusuruh itampul kalak takal Johanes, tapi ise dage ia, si rikutken beritana ngasup ngelakoken perbahanen-perbahanen si mbelin?" E maka idarami Herodes dalan gelah jumpa ras Jesus. 10 Kenca mulih rasul-rasul ndai, iturikenna man Jesus kai si enggo ibahanna. Jenari ibabai Jesus rasul-rasul e lawes ku sada kuta gelarna Betsaida, ateNa gelah ia saja ngenca i je. 11 Tapi tereteh man jelma si nterem, e maka berkat ia ndapeti Jesus. Ialo-alo Jesus jenari iturikenNa kerna Kinirajan Dibata janah ipepalemNa kalak si penakiten. 12 Asum wari nandangi gelap, reh ajar-ajar si sepuluh dua kalak ndahi Jesus, janah nina, "Suruhlah kalak enda lawes ku kuta-kuta i sekelewet enda gelah banci idaramina nakanna ras inganna medem, sabap ingan enda ingan si melungen." 13 Tapi ngaloi Jesus man ajar-ajar nina, "Kam lah mereken nakanna." Nina ka ajar-ajar, "Si lit i bas kami lima ngkibul roti ras dua ikan ngenca. Pala lawes kami nukur nakan guna kalak si nterem enda?" 14 Teremna jelma si i je dilaki lit kira-kira lima ribu kalak. Nina Jesus man ajar-ajarNa, "Suruhlah kalak si nterem e kundul, tep-tep terpuk teremna kira-kira lima puluh kalak." 15 Kerina si ikataken Jesus ilakoken ajar-ajar, isuruhna kalak si nterem kundul. 16 Jenari ibuat Jesus roti si lima ngkibul ras ikan si dua ndai, janah ertoto Ia ngataken bujur man Dibata. E maka icepik-cepikNa roti e jenari iberekenNa man ajar-ajar gelah ielakenna man kalak si nterem. 17 Kerina ia man seh besur. Kenca elah, ipepulung ajar-ajar kerina si iba, buena lit sepuluh dua sumpit. 18 Sekali jadi asum Jesus ertoto sisada-sisada, reh ajar-ajarNa ndahi Ia. E maka isungkun Jesus ajar-ajar e nina, "Ise kin Aku nina kalak?" 19 Erjabap ajar-ajar nina, "Lit si ngatakenca Kam kap Johanes Peridiken. Deba ngatakenca maka Kam kap Elia. Janah lit ka pe si ngatakenca maka Kam kap sekalak i bas nabi-nabi si nai si enggo nggeluh mulihi." 20 Nungkun ka Jesus nina, "Kam kuga nindu? Ise kin akapndu Aku?" Erjabap Petrus nina, "Kam kap Mesias si ipadanken Dibata." 21 Jenari ilarang Jesus ajar-ajarNa ngataken si e man ise pe. 22 Tole nina Jesus, "Anak Manusia si isuruh Dibata la banci la ngenanami mbue kiniseran, janah itulak peminpin-peminpin, imam-imam si mbelin, bage pe guru-guru Undang-undang. Ia ibunuh jenari keke i bas wari si peteluken." 23 Janah nina Jesus man bana kerina, "Ise atena ikut ras Aku arus maka ipersilahangna dirina, ipersanna kayu persilangna tep-tep wari janah ikutkenna Aku. 24 Sabap ise si mpertahanken kegeluhenna, bene kap kegeluhenna, tapi ise si bene kegeluhenna erkiteken Aku terkelin me. 25 Kai kin gunana man sekalak jelma aminna gia bana kerina doni enda tapi bene ia ntah pe iukum? Tentu la lit! 26 Adi sekalak jelma mela ia ngakuken Aku ras pengajarenKu, Anak Manusia si isuruh Dibata pe pagi mela ngakuken kalak si bage sanga Anak Manusia e reh alu kemulian si mbelin bage pe alu kemulian Bapa ras kemulian malekat-malekat si badia. 27 Inget katangKu enda! I bas si pulung enda lit piga-piga kalak si la ia mate adi langa kin idahna Kinirajan Dibata." 28 Kira-kira seminggu kenca ituriken Jesus kerna kiniseran ras kematenNa, ibabaNa Petrus, Jakup ras Johanes berkat ku das sada uruk guna ertoto. 29 Asum Jesus ertoto, salih ayoNa dingen uisNa jadi mbentar ersinalsal. 30 Rempet lit i je dua kalak dilaki, e me Musa ras Elia ercakap-cakap ras Jesus. 31 Duana ikeleweti sinalsal kemulian Surga. Ercakap-cakap ia duana ras Jesus kerna kematen Jesus si lanai ndekah jadi i Jerusalem sue ras si enggo iaturken Dibata. 32 Paksa e Petrus ras temanna si dua kalak munduk-unduk seh tunduh pe. Janah asum ia keke idahna ersinalsal kemulian Jesus, ras si dua kalak ndai tedis ras Ia. 33 Asum berkat ate si dua kalak ndai nadingken Jesus nina Petrus man Jesus, "O Guru! Malem kal ate kami i jenda. Ibahan kami saja telu sapo-sapo, sada man baNdu, sada man Musa, janah sada nari man Elia." (Tapi si tuhuna la ierti Petrus kai si ibelaskenna e.) 34 Sanga Petrus ngerana denga, reh embun ngelinggemi ia kerina. Perbahan e mbiar ajar-ajar. 35 Terbegi pe sora i bas embun e nari nina, "Enda me AnakKu si enggo Kupilih. Begikenlah Ia." 36 Asum terbegi sora e, Jesus nari ngenca i je idah ajar-ajar. Kerina kejadin si enggo idahna e irahasiakenna janah la iturikenna man ise pe. 37 Pepagina asum Jesus ras ajar-ajarNa si telu kalak ndai nusur i das uruk nari, nterem kal kalak reh njumpai Ia. 38 Sekalak i bas jelma si nterem e erlebuh man Jesus nina, "O, Guru! Ngarap aku maka iperdiatekenNdu min anakku enda, sabap e ngenca anakku. 39 Adi iseluki setan e ia, rempet ia nderkuh, idampes-dampeskenna bana dingen rugup-ugup babahna. Mesui kal atena ibahan setan e janah menam-menam lanai erleka setan e ras ia. 40 Enggo kupindoken man ajar-ajarNdu gelah ipelawesna min setan e, tapi la ia ngasup." 41 Nina Jesus man kerina kalak si i je, "O, kam kalak si la erkiniteken dingen si enggo papak, asa kai nari dekahna Aku ras kam? Asa kai nari dekahna Aku tahan ras kam?" Jenari nina man bapa anak e, "Baba kujenda anakndu e." 42 Sanga anak e ibaba ndahi Jesus, nggirgir ia dingen idampes-dampeskenna bana. Tapi isergangi Jesus setan e dingen ipepalemNa anak ndai. Kenca malem iberekenNa mulihi man bapana. 43 Mamang ate jelma si nterem erkiteken Kuasa Dibata si mbelin e. Asum kemamangen denga jelma si nterem kerna kerina perbahanen Jesus nina Jesus man ajar-ajarNa, 44 "Begikenlah dingen pegermetkenlah kai si Kukataken man bandu. Anak Manusia si isuruh Dibata iendesken pagi ku bas kuasa manusia." 45 Tapi la ieteh ajar-ajar kai ertina si ibelasken Jesus e. La tangkas man bana ertina, e maka la iangkana. Janah nungkunsa man Jesus pe la ia pang. 46 Turah me persoalen i bas perukuren ajar-ajar, e me kerna ise kin si mbelinna i bas ajar-ajar e. 47 Tapi ieteh Jesus kai si iukurken ajar-ajar e, e maka idiloNa sekalak danak-danak, ipetedisNa deherken Ia, 48 jenari nina man ajar-ajarNa, "Ise si ngaloken danak-danak enda i bas gelarKu ia me kap si ngaloken Aku; bage pe ise si ngaloken Aku, labo Aku saja ialokenna, tapi ialokenna pe Ia si nuruh Aku. Sabap ise si kitikna kal i bas kam kerina, ia me si mbelinna." 49 E maka ngaloi Johanes man Jesus nina, "O, Guru, lit idah kami sekalak si mpelawes setan i bas gelarNdu. Perbahan labo ia bengket i bas terpukta enda, e maka ilarang kami ia." 50 Ngaloi Jesus man Johanes ras ajar-ajar si deban nina, "Ola ambati ia, sabap ise si la ngelawan kam, temanndu kap." 51 Asum enggo ndeher paksana Jesus iangkat Dibata ku Surga, e maka itetapkenNa ukurNa guna lawes ku Jerusalem. 52 Isuruhna piga-piga kalak persuruhenNa ngelebei Ia. Lawes persuruhen ndai, bengket ia ku sada kuta kalak Samaria guna nikapken ingan kesilang man Jesus. 53 Tapi kalak Samaria e la nggit ngalo-ngalo Jesus, sabap tujun perdalanen Jesus e me kap ku Jerusalem. 54 Asum ibegi Jakup ras Johanes berita e, e maka nina man Jesus, "O Guru, setuju Kam adi isuruh kami api nusur i langit nari ngkernepken kalak Samaria e?" 55 Erkusur Jesus janah ipandangNa Jakup ras Johanes. 56 Jenari lawes ia kerina ku kuta si deban. 57 Sanga Jesus ras ajar-ajarNa nerusken perdalanenNa, lit sekalak dilaki ngerana man Jesus nina, "Kuikutken nge Kam aminna ku ja gia Kam lawes." 58 Ngaloi Jesus man bana, "Serigala lit liang inganna, perik-perik pe lit asarna, tapi Anak Manusia si isuruh Dibata la lit inganNa pekesahken pe." 59 Man sekalak si deban nina Jesus, "Ikutken Aku." Tapi ngaloi ia man Jesus nina, "O Bapa, mulih aku lebe ngkuburken bapangku." 60 Ngaloi Jesus, "Pelepaslah kalak mate ngkuburken si matena; tapi kam, to lawes beritakenlah kerna Kinirajan Dibata." 61 Nina ka sekalak si deban man Jesus, "O Tuan, ateku maka ikut ras Kam, tapi mulih aku lebe erkata man keluargangku." 62 Ngaloi Jesus man bana, "Kalak si enggo njemak tenggala, jenari ngenen ia ku pudi, kalak si bage la erguna i bas Kinirajan Dibata."
101 Kenca si e, ipilih Tuhan pitu puluh kalak nari jadi ajar-ajarNa. Ajar-ajar enda ndai isuruhNa dua-dua kalak sendalanen ngelebei Ia ku kerina kuta ras ingan si minter ateNa idahiNa. 2 Nina Jesus man kalak e, "Mbelang si man peranin, tapi kurang si ranisa. Dage, ertotolah man si Mada peranin e, gelah isuruhNa si erdahin guna mperanisa. 3 Berkatlah! Kusuruh kam lawes bagi anak biri-biri ku tengah-tengah serigala. 4 Ola baba dompet, gajut-gajut, ntah sepatu, ola kam ngadi i tengah dalan guna ercakap ras kalak. 5 Adi bengket kam ku bas sada rumah katakenlah lebe, ’Dame man isi jabu enda.’ 6 Janah adi lit i bas rumah e kalak si ngarapken dame, maka dame si isehkenndu ringan i bas ia. Tapi adi la lit, dame si isehkenndu mulih man bandu. 7 Kesilanglah i bas rumah e, pan dingen inemlah kai si iberekenna man bandu, sabap kalak si erdahin patut kap dat upah. Ola sambar-sambar inganndu kesilang. 8 Adi bengket kam ku sada kuta janah i je ialo-alo kalak kam, panlah kai si iberekenna man bandu; 9 janah pepalemlah kalak si penakiten i je. Kataken pe man anak kuta e, ’Kinirajan Dibata enggo ndeher ku tengah-tengahndu!’ 10 Tapi adi bengket kam ku sada kuta janah i je la kam ialoken kalak, laweslah kam ku pasar-pasar, jenari momokenlah, 11 ’Abu kutandu si leket i bas nahe kami iapusi kami i lebe-lebendu; tapi ingetlah, maka Kinirajan Dibata enggo ndeher ku tengah-tengahndu.’ 12 Kukataken man bandu maka i bas wari pendungi e pagi, nahangen ukumen si isehken Dibata man kota Sodom asangken man kota e." 13 "Andiko, cilaka kal kam pagi o, Korasin. Kam pe o Betsaida, cilaka me kam! Sabap adi tanda-tanda sengget si enggo ibahan i tengah-tengahndu ibahan i Tirus ras i Sidon, ndekah me ia erkadiola ras erceda ate. Tentu enggo itamakenna abu ku badanna guna mbuktiken maka enggo ia jera i bas dosa-dosana nari. 14 E maka i bas wari pendungi e pagi, liten denga perkuah ate Dibata man Tirus ras Sidon asangken man bandu. 15 Bage pe kam, o Kapernaum! Atendu kin maka ipeganjangkenndu bandu seh ku langit? Kam pagi idampesken ku naraka." 16 Nina Jesus man ajar-ajarNa, "Ise si megiken kam, ia megiken Aku; ise si nulak kam, itulakna pe Aku; janah ise si nulak kam, itulakna pe Ia si nuruh Aku." 17 Ajar-ajar si pitu puluh kalak ndai mulih alu dem keriahen. Nina man Jesus, "O Tuhan, setan-setan pe ngikutken kata kami adi isergangi kami ia i bas gelarNdu!" 18 Ngaloi Jesus man bana kerina nina, "Kuidah Iblis ndabuh i langit nari bagi kilap. 19 Begikenlah! Enggo kubereken man bandu kuasa merjati nipe ras kacip gelang, bage pe kuasa naluken musuh e, janah kai pe la banci encilakai kam. 20 Tapi ola meriah ukurndu perbahan setan-setan ngikutken perentahndu, tapi meriahlah ukurndu perbahan gelarndu enggo isuratken i Surga." 21 Paksa si e, meriah iakap Jesus ibahan Kesah Dibata janah nina, "O Bapa, Tuhan si mada langit ras doni! Kukataken bujur man baNdu, sabap enggo icidahken Kam man kalak si la erpemeteh, kerina si ibuniken Kam man kalak si pentar dingen erpemeteh. Payo bage me jadina Bapa, sabap bage me si ngena ateNdu. 22 Kerina enggo iendesken BapangKu man bangKu. Ise pe la meteh ise Anak e seakatan Bapa; janah ise pe la meteh ise kin Bapa e seakatan Anak ras kalak si man bana ipebetehken Anak e." 23 Asum Jesus nari ngenca i je ras ajar-ajarNa nina Jesus, "Malem tuhu-tuhu atendu sabap kam enggo ngidah kai si idahndu! 24 Kukataken pe man bandu maka nterem nge nabi ras raja merincuh ngidah kai si idahndu tapi la idahna, bage pe merincuh ia megi kai si ibegindu, tapi la ibegina." 25 Sekali jadi reh sekalak guru agama Jahudi ncubai Jesus. Isungkunna Jesus nina, "O Guru, kai arus kubahan gelah kualoken kegeluhen si rasa lalap?" 26 Erjabap Jesus nina, "Kai kin si tersurat i bas Pustaka Si Badia? Kai si iogendu i je?" 27 Erjabap guru Undang-undang e, "Kelengilah Tuhan Dibatandu asa ukurndu, asa tendindu dingen asa gegeh ras kepentarenndu lit; bage pe kelengilah temanndu manusia bagi kam ngkelengi badanndu." 28 Ngaloi Jesus, "Payo jabapndu e. Bahanlah bage gelah ialokenndu kegeluhen si rasa lalap." 29 Tapi ate guru agama e pebujur-bujurken bana, e maka nungkun ia man Jesus nina, "Ise kin temanku manusia?" 30 Erjabap Jesus alu perumpaman nina, "Lit sekalak ngincuah i Jerusalem nari ku Jeriho. I tengah dalan jumpa ia ras pengerampuk. La saja barang-barang irampukna, tapi igudamina pe ia seh menam mate, jenari itadingkenna. 31 Rembang mentas sekalak imam arah dalan e; kenca idahna kalak si enggo ampar e, isilahkenna, jenari iteruskenna perdalanenna. 32 Bage pe mentas ka sekalak Lewi; kenca idahna, ia pe nilah jenari iteruskenna perdalanenna. 33 Tapi sekalak Samaria si mentas ka arah dalan e mekuah atena asum idahna kalak si ampar e. 34 E maka ideherina jenari itamakenna minak ras anggur ku luka-lukana dingen ibalutina pe. Kenca bage iangkatna ku datas kaldena, ibabana ku ingan penginapen guna itambari. 35 Pepagina iberekenna dua duit pirak man si empu penginapen e janah nina, ’Tambari ia janah adi la bias enda kutambahi pagi asum aku reh mulihken.’ " 36 E maka nungkun Jesus man guru agama e nina, "Si apai nge iakapndu i bas si telu e jadi teman manusia kalak si irampok e?" 37 Erjabap guru Undang-undang e, "Kalak si enggo nampati ia." Ngaloi Jesus, "Kam pe laweslah, janah bahanlah bage." 38 Asum Jesus ras ajar-ajarNa nerusken perdalanenna, seh ia i bas sada kuta. I je lit sekalak diberu gelarna Marta; ialo-alona Jesus i rumahna. 39 Lit pe sekalak seninana gelarna Maria. Maria kundul i deher nahe Tuhan megiken pengajarenNa. 40 Tapi Marta kuskas nikapken pangan; e maka murkas ia ideherina Jesus janah nina, "O Tuhan, la iperdiatekenNdu ipeturut seninangku aku sisada ndahiken kerina dahin e? Suruh min ia nampati aku!" 41 Erjabap Jesus man Marta nina, "O Marta, Marta! Suhsah dingen gulut ukurndu sabap melala atendu ibahanndu, 42 tapi sada ngenca si la banci lang. Enggo ipilih si Maria si mehuli e janah lanai banci ibuat i bas ia nari."
111 Sekali jadi ertoto Jesus i bas sada ingan. Kenca dung Ia ertoto nina sekalak ajar-ajarNa, "O Tuhan, ajari min kami ertoto bagi Johanes ngajari ajar-ajarna." 2 Ngaloi Jesus man ajar-ajarNa nina, "Adi ertoto kam nindulah, ’O Bapa, Terpujilah gelarndu si Badia; Rehlah min KinirajanNdu, 3 Bereken min man kami nakan cukup tep-tep wari. 4 Alemi min dosa-dosa kami, bagi kami pe ngalemi kalak si ersalah kempak kami. Ola min kami ibaba Kam ku bas percuban.’ " 5 Tole nina Jesus man ajar-ajarNa, "Adi sekalak i bas kam lawes ku rumah temanndu i tengah berngi janah nindu, ’O teman, kupinjam min rotindu telu ngkibul, 6 sabap temanku si i bas perdalanen singgah ku rumahku janah la lit si man berenken man bana.’ 7 Banci jadi temanndu e erjabap i rumah nari, ’Ola ganggundu aku! Pintun enggo ieruk, janah aku ras anak-anakku enggo medem. La terbahan aku keke guna merekenca man bandu.’ 8 Bage gia, Kukataken pe man bandu, aminna gia ia la keke mereken roti man bandu erkiteken ia temanndu, tapi perbahan la kam mela mindo alu meseksek, keke nge ia, iberekenna man bandu kai si iperlukenndu. 9 Perbahan si e Kukataken man bandu: Pindolah tentu ngalo kam; daramilah, tentu idatndu; tuktuklah, tentu italangi pintun man bandu. 10 Sabap ise si mindo ngalo kap, janah ise si ndarami idatna kap, bage pe ise si nuktuk pintun italangi kap. 11 Tentu la lit i bas kam selaku bapa mereken nipe man anakndu adi ipindona nurung. 12 Ntah iberekenndu kacip gelang man bana adi ipindona tinaruh. 13 Dagina, adi kam pe kalak si jahat ietehndu mereken si mehuli man anak-anakndu, apai denga ka Bapa si i Surga. Tentu iberekenNa nge man bandu Kesah si Badia man si mindo man baNa." 14 Sekali jadi ipelawes Jesus setan i bas sekalak pekak nari. Kenca ndarat setan e, ngasup ia ngerana. Ngidah si e mamang ate kalak si nterem. 15 Tapi piga-piga kalak ngataken, "Balsebul, pengulu setan nge si mereken kuasa man baNa mpelawesken setan-setan." 16 Lit ka deba nidingi Jesus atena, e maka ipindona gelah ibahan Jesus sada tanda sengget si nusur i Surga nari. 17 Tapi ieteh Jesus perukuren-perukuren kalak e, e maka nina, "Kerajan si lit i je perpecahen, la banci lang runtuh me kerajan e, jenari runtuhen pe rumah-rumahna. 18 Dage, adi kerajan setan erbelah-belah ia sapih-sapih ia, tentu kerajan e la ndekah. Ikatakenndu maka Balsebul nge si mereken kuasa man bangKu guna pelawesken setan-setan. 19 Adi bage kin carangKu pelawesken setan-setan, kuga dage teman-temanndu pelawessa? Temanndu e jinelah ertimbang kerna kam. 20 Labo Balsebul si mereken kuasa man bangKu, tapi Aku pelawesken setan-setan alu kuasa Dibata si nuduhken maka i tengah-tengahndu enggo ndeher Kinirajan Dibata. 21 Adi sekalak si megegeh njagai rumahna alu senjata lengkap, tentu aman kerina erta-ertana. 22 Tapi adi reh kalak si gegehen ngelawan ia, italukenna ia janah irampasna me kerina senjata si lengkap si iarapken tuan rumah ndai, jenari ibagi-bagikenna man teman-temanna kai si enggo irampasna e. 23 Ise si la mihak Aku si tuhuna ngelawan Aku kap; ise si la ras Aku pepulungken, si tuhuna ia engkerapi kap." 24 "Adi enggo ndarat setan i bas manusia nari, lawes ia, niari kerina taneh gurun pasir ndarami ingan ngadi. Adi la lit idatna ingan ngadi e maka nina i bas ukurna, ’Mulihlah aku ku rumahku si enggo kutadingken.’ 25 E maka mulihken ia, idapetina rumah e enggo bersih isapui dingen sikap. 26 Jenari lawes ia, idilona pitu setan si jahaten asa ia. E maka ringan ia kerina i bas rumah ndai seh maka si ibengketi setan e enggo keleken asang si tangtangna ndube." 27 Kenca enggo ikataken Jesus si enda ndai, sekalak diberu i bas jelma si nterem e nari ngerana alu megang nina, "Malem tuhu-tuhu ate diberu si mupus dingen pebelin Kam!" 28 Tapi ngaloi Jesus, "Malemen tuhu-tuhu ate kalak si megiken Kata Dibata dingen ndalankenca!" 29 Asum jelma si nterem ngkeleweti Jesus, iteruskenNa ngerana nina, "Andiko jahatna jelma si genduari! Ipindona tanda sengget, tapi sada pe la ibereken man bana seakatan tanda sengget Nabi Juna. 30 Sabap bagi Nabi Juna jadi tanda man kalak Niniwe, bage me pe Anak Manusia si isuruh Dibata jadi sada tanda man bangsa si genduari. 31 I bas wari pendungi pagi i lebe-lebe Pengadilen Dibata keke Ratu negeri Selatan nuduhken kelepaken kalak jaman enda. Sabap lako megiken kepentaren Salomo, Ratu ndai enggo reh erdalan i bas tampuk doni nari. Tapi i jenda genduri lit kalak si belinen asangken Salomo! 32 I bas wari pendungi pagi i lebe-lebe Pengadilen Dibata keke kalak Niniwe ras bangsa si genduari enda. Iaduken kalak Niniwe me pagi bangsa si genduari, sabap kalak Niniwe jera i bas dosana nari asum ibegina pengajaren Nabi Juna; janah Kukataken man bandu maka si tuhuna lit i jenda si belinen asa Nabi Juna!" 33 "Labo lit kalak nagani lampu, jenari itamakenna i teruh ingan si terligen ntahpe nutupisa alu tumba; tapi itamakenna nge ku nahe lampu, gelah sinalsalna nerangi kalak si bengket ku bas. 34 Matandu kap lampu i bas badanndu. Adi matandu sehat, kerina badanndu terang; tapi adi matandu la sehat, kerina badanndu gelap. 35 E maka jagalah gelah terang si lit i bas kam ola jadi gelap. 36 Adi kerina badanndu terang, lanai lit bagin si gelap, e maka sempurna nge terangna, bali ras isalsali terang lampu kam." 37 Kenca dung Jesus ngerana, iundang kalak Parisi Ia man ku rumahna. E maka bengket Jesus ku rumah e, jenari kundul dingen man. 38 Mamang ate kalak Parisi e asum iperdiatekenna Jesus la erburih ope denga man. 39 Tapi nina Tuhan man bana, "O kalak Parisi, tuhu iburihindu cangkir ras pinggan e arah darat, tapi arah bas dem alu rampasen ras kejahaten. 40 O kalak lenge! Ma kin Dibata nge si njadiken si arah darat e bage pe si njadiken si arah bas e? 41 Si lit i bas mangkuk ras piringndu e nge arus iberekenndu man kalak musil. Alu bage kerina enggo bersih man bandu. 42 Tapi andiko, cilaka kal kam o kalak Parisi: Ipersembahkenndu sepersepuluh i bas ulihndu nuan-nuan nari: jera, sere, ras gule-gulen; tapi la ibahanndu bujur man manusia dingen la atendu keleng Dibata. Tapi e nge si tuhuna si arus ilakokenndu alu la ngelupaken si debanna. 43 Andiko, cilaka kal kam o kalak Parisi! Atendu ngkunduli kursi-kursi si arah lebe i bas rumah pertoton dingen atendu iperkuanken kalak kam i tengah dalan alu mehamat. 44 Andiko, cilaka kal kam! Sabap kam bagi kuburen si la ertanda; kalak si erdalan arah datasna la meteh maka e kuburen." 45 Ngaloi sekalak guru agama Jahudi nina, "O Guru, alu kataNdu si bage, kami pe enggo ikenaiNdu." 46 Ngaloi Jesus, "Kam pe cilaka nge o guru-guru agama! Iberekenndu baban si mberat man kalak seh maka la ngasup ia mabasa, tapi kam jine alu sada jari pe la kam nggit ngkuitsa baban e. 47 Andiko, cilaka kal kam! Ipekena kam kuburen nabi-nabi si enggo ibunuh nini-ninindu. 48 Alu bage enggo tangkas maka setuju kam ras si ibahan nini-ninindu nai; sabap nini-ninindu munuh nabi-nabi e janah kam erbahan kuburenna. 49 Arah kepentarenNa maka nina Dibata, ’Kusuruh pagi reh nabi-nabi ras rasul-rasul ndahi ia; piga-piga pagi ibunuhna janah si deban isiksana.’ 50 E maka bangsa si genduari enda ituntut pagi perbahan dareh nabi-nabi si enggo ibunuh mula-mula tembe doni nari, 51 e me pembunuhen i bas Abil nari seh ku pembunuhen Sakaria si ibunuh i kelang-kelang batar-batar persembahen ras Rumah Tuhan. Kukataken man bandu maka kalak jaman enda la banci la iukum pagi erkiteken perbahanenna e. 52 Andiko guru Undang-undang, cilaka kal kam! Enggo ibuatndu kunci pemeteh; tapi kam jine la bengket ku bas janah kam jine erbahanca maka kalak la banci bengket ku bas!" 53 Kenca lawes Jesus i bas ingan e nari, guru-guru Undang-undang ras kalak Parisi lalap ndarami salah Jesus. Isungkunna erbage-bage soal guna nidingi Jesus arah rananNa. 54 I bas si e iusahakenna gelah salah jabap Jesus, maka banci Ia iaduken rikutken kesalahenNa e.
121 Asum enggo pulung jelma meribu-ribu kalak seh maka enggo rincet-incet ia kerina, perlebe ngerana Jesus man ajar-ajarNa nina, "Metengetlah kam nandangi ragi kalak Parisi, e me biakna si pekulah-kulah. 2 Kerina si terligen teridah kap pagi, janah kerina rahasia ipetangkas kap pagi. 3 Kai pe si enggo ikatakenndu i bas gelap terbegi nge pagi i bas terang, janah kai pe si enggo ikusikkenndu ku cuping kalak i bas kamar si tertutup imomoken nge man jelma si nterem." 4 "O temanku, kukataken man bandu: ola kam mbiar nandangi kalak si ngasup munuh badan tapi kenca si e lanai ngasup erbahan kai pe. 5 Kukataken man bandu ise arusna si man kebiaren: Mbiarlah kam man Dibata, si kenca munuh, lit ka kuasaNa ngambengkenca ku bas naraka. Ingetlah, tuhu-tuhu lah min kam erkemalangen man Dibata! 6 Ma kin idayaken kalak lima cipcip alu dua sen saja? Amin bage gia labo sada pe ilupaken Dibata. 7 Buk takalndu pe kerina enggo ibeligaiNa. E maka ola kam mbiar, sabap ergan kap kam asa cipcip." 8 "Kukataken man bandu, ise si ngakuken Aku i lebe-lebe manusia ia ajar-ajarKu, Anak Manusia si isuruh Dibata pe pagi ngakuken ia i lebe-lebe malekat Dibata. 9 Tapi ise la ngakui maka ia ajar-ajarKu i lebe-lebe manusia, Anak Manusia si isuruh Dibata pe pagi mersoken ia i lebe-lebe malekat Dibata. 10 Ise si pengeranana nimbak Anak Manusia si isuruh Dibata, ia banci ialemi, tapi kalak si nggombangi Kesah Si Badia la banci ialemi. 11 Adi iaduken kalak kam ku Pengadilen Agama, ntah ku pemerentah ntah ku kalak si erkuasa, ola aru atendu kerna kuga kam mpertahanken dirindu, ntah pe kerna si arus ikatakenndu. 12 Sabap paksa si e pagi iajari Kesah Si Badia nge kam kerna kai arus ikatakenndu." 13 Sekalak i bas jelma si nterem e ngerana nina, "O Guru, katakenlah man seninangku maka erbagi kami kerna erta-erta si itadingken bapa kami." 14 Ngaloi Jesus man bana, "O senina, ise kin ngangkat Aku guna ngerunggui kam duana? Labo dahinKu mbagiken erta-ertandu." 15 Tole nina Jesus man bana kerina, "Jaga dingen metengetlah maka ola kam merangap nandangi kai pe; sabap kegeluhen manusia si tuhu-tuhu labo erpalasken erta-erta si lit i bas ia, aminna uga gia ia bayakna." 16 E maka ituriken Jesus man jelma si nterem e perumpaman enda, "Lit me sekalak bayak, melala kal ulih jumana. 17 E maka rukur ia nina, ’Lanai siat lumbung ingan ulih jumangku e kerina. Kuga nge ndia kubahan?’ 18 Nina ka i bas ukurna, ’Bagenda kubahan: Kuruntuhken lumbungku enda, jenari kupajekken si tergalangen; i je me pagi kutamaken ulih jumangku ras kerina erta-ertangku. 19 Kenca bage ningku i bas ukurku: Malem atendu, o tendingku! Sabap melala enggo ergun-gun erta-ertandu, cukup guna piga-piga tahun. Pesenangkenlah man bandu, man dingen minemlah.’ 20 Tapi nina Dibata man bana, ’O, bodoh! I bas berngi enda kam arus mate; man ise nge kerina erta-erta si enggo ipepulungndu e?’ " 21 Tole nina Jesus, "Bagenda me jadina nandangi kalak si pepulung kinibayaken man dirina jine, tapi la bayak i bas adep-adepen Dibata." 22 Kenca bage nina Jesus man ajar-ajarNa, "Perbahan si e Kukataken man bandu: ola aru atendu kerna nakan si iperlukenndu i bas geluhndu ntah pe kerna uis si iperlukenndu guna dagingndu. 23 Sabap ergan nge geluhndu asa pangan, dingen ergan pe badanndu asa uis. 24 Nehenlah perik kak: la merdang, la rani, la lit lumbungna; tapi bage gia man nge ia ibahan Dibata. Kam ndauh ergan asa perik-perik e. 25 Ise kin i bas kam ngasup pegedangken umurna alu aru ate? 26 Adi labo kam ngasup erbahan si kitik e pe, ngkai maka aru atendu kerna kai-kai si debanna? 27 Nehenlah perturah bunga ncole, labo ia ertenun ntah pe erbahan uisna. Tapi kukataken man bandu maka raja Salomo si bage kal bayakna labo lit uisna bagi bunga enda jilena. 28 Dibata nge si erbahanca mejile dukut-dukut i mbalmbal -- dukut-dukut si sendah lit, pagi iambekken ku bas api. Makin lebihen kam iuisiNa? Andiko, kitikna kinitekenndu! 29 Dage, ola aru atendu, ola gulut ukurndu kerna pangan ras inemenndu. 30 (Sabap kalak si la nandai Dibata nge si aru atena kerna si e.) Ieteh Bapandu nge maka iperlukenndu si e. 31 Arus maka buen kam rukur kerna Kinirajan Dibata gelah kerina si debanna pe ibereken Dibata ka man bandu." 32 "Ola kam mbiar, o rarasen si kitik sabap meriah ukur Bapandu mereken Kinirajan man bandu. 33 Dayaken kerina erta-ertandu jenari bereken duitna man kalak musil. Bahanlah dompetndu si nteguh janah pepulunglah kinibayakenndu i Surga. I je la urak beliganna sabap la ibengketi penangko ntah pe ipan ngetnget. 34 Sabap i ja erta-ertandu i je pe ukurndu." 35 "Tetap min kam erbenting kibul dingen ersinalsal pe lampundu. 36 Bagi sekalak budak si nimai tuanna mulih i bas kerja erdemu bayu nari min kam. Asum reh tuan e dingen nuktuk pintun, minter italangina. 37 Sangap me budak si idapeti tuanna erjaga-jaga nimai ia mulih. Kukataken man bandu, erbenting kibul me tuan e, isuruhna budak e kundul jenari kuskas ia ngelaisa. 38 Sangap me budak e adi idapeti tuanna ia erjaga-jaga aminna gia tuan e mulih tengah berngi ntah pe tekuak manuk. 39 Ingetlah katangKu enda: Adi ieteh tuan rumah katawari penangko reh, tentu erjaga-jaga ia dingen la ipelepasna rumah e ibongkar. 40 Bage pe kam, tetaplah min erjaga-jaga sabap Anak Manusia si isuruh Dibata reh i bas paksa si la arapndu." 41 Nina Petrus man Jesus, "O Tuhan, man kami saja kin iturikenNdu perumpaman e, ntah man kerina manusia?" 42 Erjabap Tuhan, "Ise dage budak si pentar dingen tutus? Ia me ipercayaken tuanna jadi kepala budak si deban guna mbagiken pangan man budak e kerina i bas paksana. 43 Sangap me budak si asum mulih tuanna idapetina ia sangana ndalanken tugasna! 44 Kukataken man bandu, tuhu-tuhu iangkat tuan e me ia jadi pengawas i bas kerina erta-ertana. 45 Tapi adi nina budak e i bas ukurna, ’Tuanku ndekah denga nge maka mulih,’ jenari ipekpekina budak si deban si dilaki ras si diberu, mangani dingen minem ia seh mabuk. 46 Jenari alu la iarapna rempet reh tuanna. Ibunuh tuanna ndai ia janah bali ibahanna ras kalak si la patuh. 47 Budak si meteh sura-sura tuanna, tapi la ia ersikap dingen la ibahanna bagi si ngena ate tuanna, ia mekelek iligasi. 48 Tapi budak si la meteh sura-sura tuanna, jenari ibahana kesalahen seh maka arus ia iligasi, budak e la mekelek iligasi. Sabap kalak si enggo ibereken man bana melala, i bas ia nari ituntut melala. Bage me pe man kalak si iendesken man bana melala, i bas ia nari ipindo ka melala." 49 "Aku reh namaken api ku doni enda; mehuli kal adi api e enggo gara! 50 Aku pagi ngaloken peridin si tertentu, janah kuga sedakna pusuhku ope denga si e enggo erkedungen! 51 Akapndu kin maka Aku reh ku doni enda maba dame? Kukataken man bandu, labo maba dame, tapi pertentangen. 52 Genduari nari terjadi pertentangen i bas si lima kalak sada jabu, telu kalak ngelawan dua, janah si dua kalak ngelawan telu. 53 Bapa ngelawan anakna si dilaki janah anak si dilaki ngelawan bapana; nande ngelawan anakna si diberu, janah anak si diberu ngelawan nandena; simetua ngelawan permainna janah permain ngelawan simetuana." 54 Tole nina Jesus man jelma si nterem, "Adi idahndu reh embun i Barat nari, minter ikatakenndu, ’Udan atena,’ janah tuhu bage. 55 Bage pe adi igejapndu rembus angin i Selatan nari, minter ikatakenndu, ’Las me wari,’ janah tuhu bage. 56 O, kalak pekulah-kulah! Ietehndu ertina tanda-tanda i bas doni ras i bas langit. Tapi ngkai maka la iangkandu tanda-tanda masa si genduari enda?" 57 "Engkai maka la itetapkenndu i bas ukurndu kai arus ibahanndu? 58 Adi kam iaduken imbangndu dingen ibabana ku pengadilen, cubakenlah asa ngasupndu erdame ras ia asum kam i bas perdalanen denga gelah ola kam isehkenna ku lebe-lebe hakim, janah hakim nerahken kam ku polisi, jenari itamaken polisi kam ku bas penjara. 59 Kukataken man bandu maka labo kam ndarat i bas penjara e nari, adi langa kin igalarindu utangndu seh bali."
131 Paksa si e, reh piga-piga kalak maba berita man Jesus kerna kalak Galilea si enggo ibunuh Pilatus asum ia mpersembahken persembahenna man Dibata. 2 Ngaloi Jesus man kalak ndai nina, "Perbahan kalak Galilea e ibunuh alu cara si bage, akapndu kin maka keleken dosana asangken dosa kalak Galilea si deban? 3 Kukataken man bandu, labo bage! Kam pe adi la kin kam jera, mate nge kam pagi bagi kalak ah ndai. 4 Kuga kerna si sepuluwaluh kalak si mate itindihi menara i Siloam? Akapndu kin maka keleken dosana asangken dosa kerina kalak si ringan i Jerusalem? 5 Kukataken man bandu, labo bage! Kam pe adi la kin kam jera, mate nge kam pagi bagi kalak ah ndai." 6 Jenari ituriken Jesus man kalak e perumpaman enda, "Lit me sekalak empu kebun anggur; i bas kebun anggur e turah sada batang ara. Lawes ia ku je ndarami buahna tapi la lit sada pe idatna. 7 E maka nina man si ngiani kebun e, ’Enggo telu tahun tep-tep aku reh ndarami buah batang ara enda, tapi la pernah lit buahna. Tabah sajalah! Percuma ia turah i bas taneh enda.’ 8 Tapi nina si ngiani kebun e, ’O Tuan, pelepas i je setahun nari; kukuruk lebe taneh i kelewetna gelah kutama pupukna. 9 Mbera-mbera erbuah ia tahun si reh; tapi adi lang tabah saja.’ " 10 Sekali sanga wari Sabat kalak Jahudi ngajar Jesus i bas rumah pertoton. 11 Lit me i je sekalak diberu enggo sepuluwaluh tahun dekahna bangger iulahi setan, si erbahanca ia mbengkung dingen lanai ngasup tedis pajek. 12 Asum idah Jesus diberu e, ilebuhNa nina, "Nande, penakitndu enggo malem!" 13 Itamaken Jesus tanNa ku babo diberu e jenari minter ia tedis pajek. Kenca bage ipujina Dibata. 14 Tapi merawa pengulu rumah pertoton e, sabap ipepalem Jesus ia i bas wari Sabat. E maka ngerana ia man jelma si nterem nina, "Lit kap enem wari guna erdahin; e maka rehlah i bas salah sada wari e gelah ipepalem, labo i bas wari Sabat." 15 Ngaloi Jesus man bana nina, "O kam kalak pekulah-kulah! Ma kin kerina nge kam peluar lembuna ntah kaldena i bas karangna nari pemincepsa i bas wari Sabat pe? 16 Diberu enda kesusuren Abraham; enggo sepuluwaluh tahun dekahna ia itaban Iblis; ma patut nge ia ipulahi i bas wari Sabat gia?" 17 Asum ikataken Jesus bage, mela kerina imbang-imbangNa, tapi kalak si nterem ermeriah ukur ngidah tanda sengget si ilakoken Jesus. 18 E maka iterusken Jesus ngerana nina, "Bali ras kai kin Kinirajan Dibata e? Alu kai kin e banci Kuandingken? 19 E me bagi sengkebuah benih sawi si ibuat kalak dingen isuankenna i jumana; turah me sawi e jadi meganjang bagi batang kayu seh banci perik-perik rasar i bas dahanna." 20 Tole nina Jesus, "Alu kai kin banci Kuandingken Kinirajan Dibata e? 21 E me bagi ragi si ibuat diberu jenari icampurna ras telu tumba tepung seh serser kerina." 22 Iterusken Jesus perdalanenNa ku Jerusalem janah i bas perdalanenNa singgah Ia arah kuta-kuta si meriah bage pe kuta-kuta si kitik dingen ngajar Ia i je. 23 Lit sekalak si nungkun man baNa nina, "O Tuan, la kin pagi nterem kalak si terkelin?" Erjabap Jesus man bana, 24 "Cubakenlah asa ngasupndu bengket arah pintun si kitik e; Kukataken pe man bandu maka nterem nge kalak si ncubakenca bengket ku bas tapi la banci. 25 Adi kenca keke tuan rumah e dingen kenca ierukna pintun kam tedis i darat nuktuk, janah nindu, ’O, Tuan, talangi pintun man kami!’, ialoina me kam, ’La kam kutandai!’ 26 Jenari nindu ka, ’Enggo pernah kami man dingen minem ras kam, bage pe enggo pernah Kam ngajar i pasar-pasar kuta kami.’ 27 Ngaloi ka ia man bandu, ’La kam kutandai! Laweslah i bas Aku nari o kalak jahat!’ 28 I je me pagi kam tangis dingen mesui kal atendu asum idahndu Abraham, Isak, Jakup ras kerina nabi-nabi ermeriah-meriah i bas Kinirajan Dibata, tapi kam iambekken ku darat. 29 Janah rehen me kalak i Timur, i Barat, i Utara, ras i Selatan nari ermeriah-meriah i bas Kinirajan Dibata. 30 Kalak si genduari arah pudi jadi arah lebe kap pagi; janah kalak si genduari arah lebe jadi arah pudi kap pagi." 31 I bas paksa e reh piga-piga kalak Parisi ndahi Ia, janah nina, "To lawes, tadingken ingan enda sabap ibunuh Herodes atena Kam." 32 Ngaloi Jesus man kalak ndai nina, "To kataken man serigala e, ’Kupelawes setan-setan dingen Kupepalem si sakit i bas wari si sendah ras si pepagi, janah i bas wari peteluken dung me dahinKu.’ 33 Amin bage gia, la banci lang kuterusken nge perdalanenKu sendah, pagi ras kedun; sabap labo mungkin sekalak nabi ibunuh pala i Jerusalem. 34 O Jerusalem, Jerusalem! Ibunuhndu nabi-nabi, ibenterindu persuruhen si enggo isuruh Dibata reh ndahi kam! Enggo piga-piga kali ateKu mpepulung bangsandu, bagi indung manuk pepulung anak-anakna i teruh kabengna, tapi la kam nggit! 35 Tuhu-tuhu me pagi rumahndu itadingken seh melungun. Kukataken pe man bandu, lanai pagi Aku idahndu seh waktuna ikatakenndu, ’Ipasu-pasu gelah Ia si reh i bas gelar Tuhan.’ "
141 Sekali i bas wari Sabat Jesus man i rumah peminpin kalak Parisi. Tuan rumah ras teman-temanna mperdiateken Ia. 2 Jenari reh me sekalak sakit busungen ku lebe-lebe Jesus nahena ras tanna besar. 3 E maka nungkun Jesus man guru-guru agama Jahudi ras kalak Parisi nina, "Rikutken agama Jahudi, banci ntah lang pepalem kalak sakit i bas wari Sabat?" 4 Tapi sada pe kalak ndai la ngaloi. E maka ijemak Jesus tan kalak sakit ndai, ipepalemNa, jenari isuruhNa mulih. 5 Kenca bage nina Jesus man kalak si lit i bas rumah e, "Adi ndabuh anakndu ntah lembundu ku bas sumur i bas wari Sabat, ma kin minter irintakndu ndarat i bas wari Sabat e ka?" 6 Lanai teraloi kalak ndai ranan Jesus e. 7 Perbahan idah Jesus piga-piga temue milih ingan kundul arah ingan si mehamat, e maka iturikenNa perumpaman enda man kerina kalak si pulung i bas rumah e. 8 "Adi iundang kalak kam ku kerja-kerja erdemu bayu, ola kam kundul arah ingan si mehamat, gelah bicara lit gia kalak si belinen asa kam iundangna, 9 la ikatakenna man bandu, ’Miser kam, temanta enda i je kundul!’ Sabap adi bage mela iakapndu sabap kam arus miser ku ingan si arah suah. 10 Dage, adi iundang kalak kam, ulin kam kundul arah suah, gelah reh si mada kerja nina man bandu, ’O, teman, mari kundulken i bas ingan si mehamat enda.’ Alu bage kam ipehaga i lebe-lebe kalak si nterem. 11 Sabap ise si peganjangken bana ia me pagi ipeteruk, janah ise si peteruk bana ia me pagi ipeganjangken." 12 Jenari nina Jesus man si ngundang Ia, "Adi kam erbahan kerja suari ntah berngi, ola undang teman-temanndu, ntah senina-seninandu, ntah kade-kadendu, ntah pe anak kutandu si bayak-bayak gelah ola ia ersimulih man bandu alu ngundang kam ka. 13 Tapi adi atendu erbahan kerja man-man, undanglah kalak musil, kalak cempang-cempang, kalak pangpangen ras kalak pentang, 14 maka malem tuhu-tuhu atendu sabap la ia ngasup ersimulih man bandu. Dibata nge pagi si ersimulih man bandu i bas wari kekeken kalak si benar." 15 Megi kai si ikataken Jesus e, ngerana sekalak temue e man Jesus nina, "Malem tuhu-tuhu ate kalak si itenahken Dibata ku kerja i bas Kinirajan Dibata." 16 Ngaloi Jesus man bana, "Lit me sekalak si erbahan man-man si mbelin; nterem kalak iundang. 17 Kenca seh waktuna kerja man-man e, isuruhna juak-juakna ngelegi kalak si enggo iundangna, alu ngataken, ’Ota, enggo sikap kerina!’ 18 Tapi sekalak-sekalak ia ngataken alangenna. Si pemena nina, ’Sentabi aku man bandu, sabap mbaru denga kal aku nukur juma; ateku lawes ngenehenca.’ 19 Deba nina, ’Enggo kutukur lembungku lima nioga, lembu penenggala; kucubaken ateku nenggalakenca, e maka sentabi aku man bandu.’ 20 Si deban ka nina, ’Mbaru denga aku erjabu, perbahan si e aku la banci reh.’ 21 E maka mulihken me juak-juak ndai, iturikenna kerina si e man tuanna. Megi si e merawa tuan ndai, e maka nina man juak-juakna, ’To lawes ku pasar-pasar ras ku kesain kuta, baba ku jenda kalak musil-musil, kalak cempang-cempang, kalak pangpangen ras kalak pentang.’ 22 La ndekahsa ngelapur juak-juak ndai nina, ’O tuan, kai si ikatakenndu ndai enggo kudalanken, tapi lit denga ingan langa isin.’ 23 E maka nina tuan e man juak-juakna, ’To lawes ku simpang-simpang ras ku pasar-pasar, iahken kerina kalak si i je ku bas rumahku enda gelah dem. 24 Kukataken man bandu maka labo sekalak pe si enggo Kuundang ndube ngenanami pangan si enggo Kusikapken.’ " 25 Asum nterem kalak si erdalan ngikutken Jesus, itulihken Jesus kalak si nterem e jenari nina, 26 "Ise pe si reh ndahi Aku labo banci ia jadi ajar-ajarKu, adi la kin kelengen atena man Dibata asangken man bapana ras nandena, ndeharana ras anak-anakna, turangna ras seninana janah bage pe dirina jine. 27 Ise pe labo banci jadi ajar-ajarKu adi la kin ipersanna kayu persilangna dingen ikutkenna Aku. 28 Adi lit sekalak i bas kam atena erbahan menara, tentu ibahanna lebe anggaren biaya guna meteh ntah cukup kin duitna ntah lang i bas ndungi menara e. 29 Sabap adi la bage, banci jadi kenca ipajekkenna palasna, lanai ia ngasup ndungisa. Jenari kerina kalak si ngidah dahinna si lolo e ncakapken ia, 30 nina, ’Kalak enda icubakenna majekken, tapi la ia ngasup ndungisa!’ 31 Adi sekalak raja lawes ras sepuluh ribu kalak erperang ngelawan raja si deban si ras dua puluh ribu kalak, tentu iukurkenna lebe ngasup kin ia ntah lang. 32 Adi iakapna kin pe maka labo ia ngasup, tentu ikirimna utusenna mindo perdamen asum ndauh denga raja e." 33 Tole nina Jesus, "Alu bage, apai pe kam la metunggung jadi ajar-ajarKu, adi la kin itadingkenndu kerina si lit i bas kam." 34 "Sira tuhu mehuli, tapi adi sira e pe lanai masin alu kai nari banci ipemasin? 35 Tuhu lanai erguna man juma ntah man campur pupuk; tapi iambekken nge. Begikenlah adi lit kin cupingndu!"
151 Sekali jadi nterem reh pengalo cuke ras kalak perdosa si deban megiken pengajaren Jesus. 2 Ngidah si e jungut-jungut kalak Parisi ras guru-guru agama nina, "Ialo-aloNa kalak perdosa janah man pe Ia ras." 3 E maka ituriken Jesus man bana perumpaman enda, 4 "Adi sekalak i bas kam lit seratus biri-birina janah bene sada kuga nge ibahanna? Tentu itadingkenna biri-biri si siwah puluh siwah i mbalmbal, lawes ia ndarami biri-biri si bene e seh dat. 5 Kenca idatna biri-biri e, meriah kal ukurna, itamakenna biri-biri e ku datas barana, 6 jenari ibabana mulih. Kenca bage, idilona teman-temanna ras si ndeher-ndeher rumahna janah nina, ’Meriah kal ukurku sabap enggo ku dat biri-biringku si bene e. Marilah kita ermeriah ukur ras-ras.’ 7 Kukataken man bandu: Belinen pe keriahen i Surga nandangi sekalak perdosa si jera asangken si siwah puluh siwah kalak si akapna ia benar dingen la perlu jera." 8 "Ntah pe sekalak diberu lit sepuluh duit pirakna, janah bene sada kuga nge ibahanna? Tentu isaganina lampu isapuina jabuna, idaramina manjar-anjar seh dat. 9 Kenca idatna duitna e, idilona teman-temanna ras tetanggana, janah nina, ’Ermeriah ukur gelah kita, sabap enggo ku dat duitku si bene e!’ 10 Kukataken man bandu, bage me pe malekat-malekat ermeriah ukur nandangi sekalak perdosa si jera." 11 Iterusken Jesus ngerana nina, "Lit me sekalak perbapan, dua kalak anakna dilaki. 12 Nina si nguda man bapana, ’O bapa, bereken genduari man bangku erta-erta sikerajangenku.’ E maka ibagi bapana erta-erta e man anakna duana. 13 Kenca piga-piga wari, idayaken anak si nguda e me sikerajangenna, jenari lawes ia ku negeri si ndauh. I je isia-siakenna duitna e. 14 Kenca keri ibahanna duitna e, jadi me kelihen i bas negeri e, janah mulai me iakapna suhsah. 15 E maka erdahin ia ras sekalak anak negeri e. Isuruhna ia ku juma ermakan babi. 16 Nakan iba-iba babi e pe meriah nge min ukurna manca, tapi ise pe la mereken kai pe man bana. 17 Dungna rukur ia, janah nina i bas ukurna, ’Kerina si erdahin bapangku riba-iba panganna, tapi aku i jenda menam mate kelihen. 18 Laweslah aku ndahi bapangku janah ningku man bana, O bapa, aku enggo erdosa man Dibata dingen ersalah man bandu. 19 Lanai metunggung pe aku igelari anakndu.’ 20 E maka berkat ia ndahi bapana. Ndauh denga pe ia i rumah nari enggo idah bapana ia. Mekuah ate bapana, e maka kiam ia ngayakisa, idakepna janah iemaina. 21 Nina anakna e man bana, ’O bapa, aku enggo erdosa man Dibata dingen ersalah man bandu. Lanai metunggung pe aku igelari anakndu.’ 22 Tapi idilo bapana juak-juakna nina, ’Pedasken baba ku jenda uis si mejilena janah pakeken man bana! Tamaken cincin ku jari-jarina janah sepatui ia. 23 Jenari geleh sada anak lembu si mburna, gelah erbahan pesta man-man kita. 24 Sabap anakku enda nai enggo mate, tapi genduari enggo nggeluh mulihi; ia enggo bene, tapi genduari mulihken ia.’ E maka ibenakenna erpesta ras ermeriah-meriah. 25 Tapi anakna sintua paksa e i juma. Asum ia i bas perdalanen i juma nari, lanai ndauhsa ku rumah, ibegina sora gendang ras sora rende. 26 E maka idilona sekalak juak-juak, isungkunna nina, ’Kai si jadi e?’ 27 Erjabap juak-juak man bana, ’Agindu enggo reh mulihken janah isuruh bapandu igeleh sada anak lembu si mburna, sabap agindu si enggo bene e enggo reh mulihken i bas mejuah-juah.’ 28 E maka nembeh kal ate anak sintua e dingen la ia nggit ku rumah. E maka reh bapana nami-nami ia i darat. 29 Ngaloi ia man bapana, ’Enggo piga-piga tahun aku erdahin ras kam bagi sekalak juak-juak janah la pernah kusimbak katandu. Kai kin enggo iberekenndu man bangku? Sada anak kambing pe la iberekenndu man bangku gelah aku man-man ras teman-temanku. 30 Tapi anakndu ah, enggo ikerikenna erta-ertandu ras diberu perdenggal, janah kenca ia mulihken minter igelehndu sada anak lembu pilihen si mbur!’ 31 Ngaloi bapana, ’O anakku, kam tetap ras aku janah kerina erta-ertangku sikerajangenndu kap. 32 Tapi patut pe kita erbahan kerja man-man dingen ermeriah ukur, sabap agindu si nai enggo mate, genduari enggo nggeluh mulihi; ia enggo bene, tapi genduari enggo reh mulihken.’ "
161 Jenari nina ka Jesus man ajar-ajarNa, "Lit me sekalak bayak, lit pe sekalak bendaharana. Iaduken kalak man bana maka bendaharana e korupsi. 2 E maka idilona bendahara e janah nina, ’Kuga nge perbahanenndu e? Bahan perkiranna kerina dahinndu, sabap kam kupengadi jadi bendahara.’ 3 Nina bendahara e i bas ukurna, ’Ipengadi tuanku aku jadi bendahara, kai nge ndia kubahan? Ncangkul la aku ngasup, mindo-mindo mela aku. 4 Enggo kueteh kai si kubahan, gelah kenca aku ipengadi lit kalak si ngaloken aku i bas rumahna.’ 5 E maka idilona sekalak-sekalak peridon tuanna. Isungkunna si pemena nina, ’Asa kai utangndu man tuanku?’ 6 Erjabap ia, ’200 kaleng minak makan.’ E maka nina bendahara e, ’Enda surat utangndu, kundulken, jenari minter suratken 100.’ 7 Kenca bage isungkunna ka kalak si deban nina, ’Kam kasa kai utangndu?’ Erjabap ia, ’300 guni page.’ E maka nina bendahara e, ’Enda surat utangndu, suratken 250.’ 8 Kenca bage ipujiken tuan ndai bendahara si la bujur e sabap cerdik kal ia; sabap cerdiken kap anak-anak doni enda i bas urusenna sapih-sapih ia asangken anak-anak terang." 9 Iterusken Jesus ngerana nina, "Kukataken man bandu: Pakelah erta doni enda guna ndatken teman man bandu gelah aminna gia erta doni e lanai lit, kam ialoken me i bas ingan si rasa lalap." 10 "Ise pe situtus i bas si kitik, tentu tutus pe ia i bas si mbelin; ise si la bujur i bas si kitik, tentu pe la ia bujur i bas si mbelin. 11 Dage, adi la kam tutus i bas erta doni, labo ibereken man bandu erta si tuhu-tuhu. 12 Janah adi la kam terteki nandangi sikerajangen kalak ise nge si nggit mereken ertandu jine man bandu? 13 Labo mungkin sekalak juak-juak dua tuanna. Sabap adi bage ugapa pe nembeh atena nandangi si sekalak, janah si sekalak nari ikelengina; sekalak ihamatina janah sekalak nari igombangina. Kam la banci erkeleng ate man Dibata janah erngena ate man erta doni enda." 14 Kerina si ikataken Jesus e ibegi kalak Parisi; perbahan ia rangap nandangi duit, e maka icacina Jesus. 15 Tapi nina Jesus man bana, "Kam pekulah-kulahndu bujur i lebe-lebe jelma si nterem, tapi ieteh Dibata nge isi pusuhndu. Sabap kai si meherga iakap manusia la kap lit ergana i bas Dibata." 16 "Undang-undang si ibereken Musa, ras pengajaren nabi-nabi, kerina e tetap ipake seh masa Johanes Peridiken. Kenca si e Berita Si Meriah kerna Kinirajan Dibata terus iberitaken. Merincuh kalak jadi bangsa Dibata, e maka rehen ia ku je. 17 Tapi sukahen nge langit ras doni masap asangken bagin si kitikna i bas Undang-undang e masap. 18 Ise si ngulihken ndeharana, jenari iempoina diberu si deban, ia enggo erlua-lua; janah ise si ngempoi diberu si enggo iulihken perbulangenna, ia pe enggo erlua-lua." 19 "Lit me sekalak bayak; pakenna uis si meherga-meherga janah tep-tep wari ia erbahan pesta. 20 Tapi lit ka pe sekalak kalak musil, gelarna Lasarus. Kerina dagingna ugahen janah biasana medem ia deher pintun rumah kalak bayak e. 21 Ia ngarapken rimah-rimah kalak si erpesta guna ngisi beltekna si lume. Biang pe rehen ndilati ugahna. 22 La ndekahsa mate si musil e, e maka ibaba malekat-malekat ia kundul deher Abraham. Kalak bayak e pe mate jenari ikuburken. 23 I bas kerajan kematen ia ngenanami kiniseran. Asum jurgak ia idahna Abraham bage pe Lasarus deherken ia. 24 E maka erlebuh ia nina, ’O bapangku Abraham! Mekuah min atendu kempak aku. Suruhlah sitik Lasarus ncebukken jari-jarina ku bas lau gelah itaktakkenna ku bas dilahku sabap muas kal kuakap i bas api si gara enda.’ 25 Tapi nina Abraham, ’O anakku, ingetlah maka sanga kam nggeluh enggo ialokenndu kesenangen, janah Lasarus enggo ngaloken kegeluhen si mesera. Tapi genduari malem atena i jenda, janah kam ngaloken kiniseran. 26 Tambah si e pe, lit kelang-kelangta kelbung si mbages si la terkepari, si erbahanca la banci ku jena kalak si i jenda janah kalak si i jena pe la banci ku jenda.’ 27 E maka nina ka kalak bayak e, ’Adi bage, kupindoken man bandu bapa, suruhlah min Lasarus ku rumah bapangku. 28 I je lit lima nari seninangku. Suruh Lasarus mpersingeti ia kerina, maka ola ia seh ku ingan si mesui enda.’ 29 Tapi nina Abraham, ’Lit kap i bas ia kitap-kitap Musa ras kitap-kitap nabi-nabi! Pelepas iikutkenna kai si ikataken i bas kitap e.’ 30 Ngaloi ka ia, ’O bapangku Abraham, labo cukup adi e saja. Tapi adi sekalak si enggo keke i bas si mate nari reh ndahi ia, tentu jera ia.’ 31 Tapi nina Abraham, ’Adi la kin ibegikenna kai si tersurat i bas kitap Musa ras nabi-nabi, labo ia jera aminna gia lit kalak mate nggeluh mulihi.’ "
171 Jenari nina Jesus man ajar-ajarNa, "La banci lang ndabuh kalak ku bas dosa arah erbage-bage dalan; tapi andiko cilaka kal si arah ia dalanna maka kalak ndabuh ku bas dosa. 2 Ulin me irakuti batu penggilingen i bas kerahungna jenari iambekken ia ku lawit asangken kalak si kitik enda ibabaina erdosa. 3 Jagailah dirindu! Adi erdosa seninandu, ajarkenlah ia. Janah adi robah ia, alemilah. 4 Bage pe adi ersalah ia pitu kali sada wari nandangi kam, janah tep-tep ersalah, reh ia ndahi kam, janah nina, ’Aku enggo robah, arus maka ialemikam ia.’ " 5 E maka nina rasul-rasul e man Tuhan, "Pegegehi min kiniteken kami." 6 Ngaloi Tuhan, "Adi lit kinitekenndu sengkebuah sabi lah gia, banci ikatakenndu man batang ara enda, ’Meruahlah kam, suanken bandu i bas lawit!’, janah minter pe ikutkenna katandu e." 7 "Adi sekalak i bas kam lit suruh-suruhenna sangana nenggala ntah pe ermakan biri-biri. Mulih kenca ia i juma nari, minter kin idilondu ia man? 8 Tentu lang! Tapi nindu, ’Pesikap nakanku; erbenting kibul kam janah elai aku. Kenca aku elah, e maka banci kam man.’ 9 Ikatakenndu kin bujur man suruh-suruhenndu adi idalankenna kerina kewajipen e? 10 Bage pe kam; adi enggo idalankenndu kerina kewajipenndu, nindulah, ’Kami enda suruh-suruhen si la erguna, kewajipen kami ngenca idalanken kami.’ " 11 I bas perdalanen Jesus ku Jerusalem, mentas Ia arah perbatasen Samaria ras Galilea. 12 Asum bengket Ia ku bas sada kuta, reh sepuluh kalak gadamen njumpai Ia. Si sepuluh kalak enda tedis i dauh-dauh nari, 13 janah alu megang sora erlebuh ia nina, "O, Jesus! O, Tuhan! Mekuah min atendu kami." 14 Kenca idah Jesus kalak e nina, "To lawes, cidahken badanndu man imam." I tengah dalan enggo malem penakit kalak enda ndai. 15 Sekalak i bas si sepuluh kalak e, kenca idahna maka enggo mejelis kulana, mulihken, ia, ipujina Dibata alu sora megang. 16 Erjimpuh ia i lebe-lebe Jesus janah ikatakenna bujur. Kalak si mulihken enda e me kalak Samaria. 17 E maka nina Jesus, "Ma sepuluh kalak kin si malem ndai? I ja siwah kalak nari? 18 Engkai maka kalak si lain bangsa enda ngenca mulihken ngataken bujur man Dibata?" 19 Jenari nina Jesus man bana, "Kekeken to mulihken; kinitekenndu enggo erbahanca kam malem." 20 Piga-piga kalak Parisi nungkun man Jesus kerna ndigan kin rehna Kerajan Dibata e. Erjabap Jesus, "Kinirajan Dibata labo reh alu tanda-tanda si banci iidah manusia. 21 E maka labo beluh kalak ngatakenca, ’Enda kap, mari nehen ku jenda,’ ntah pe, ’Ah, adah i jah kap Ia.’ Sabap Kinirajan Dibata e enggo kap i bas kam." 22 Jenari nina man ajar-ajarNa, "Reh me pagi paksana maka mesikel kam ngidah sada wari i bas wari-wari Anak Manusia si isuruh Dibata, tapi la banci idahndu. 23 Ikataken kalak me pagi man bandu, ’Nehenlah, i jenda kap Ia!’, ntah, ’I jah kap Ia!’ Tapi ola kam ku je ngenehenca. 24 Sabap kerehen Anak Manusia persuruhen Dibata i bas warina, bali kap ras kilap si erbinar i langit ngencer i tampukna nari seh seh ku tampukna si deban. 25 Tapi ope denga reh warina e, la banci lang maka inanamiNa lebe melala kiniseran dingen itulak bangsa si genduari enda Ia. 26 Bagi sanga Nuah nai, bage me pe pagi kerna kerehen Anak Manusia persuruhen Dibata e. 27 Kerina kalak, man, minem, sereh bage pe empo, seh warina Nuah bengket ku bas perahuna. Jenari reh banjir si mbelin janah kerina kalak mate gedap. 28 Bage me pe tupung paksa Lut. Kerina kalak man, minem, erbinaga, nukur, nuan-nuan bage pe majekken rumah. 29 Tapi i bas warina Lut nadingken Sodom, ipesusur Dibata me udan api ras kertah i langit nari si erbahanca jelma si nterem mate. 30 Bage me pe pagi jadi i bas warina Anak Manusia persuruhen Dibata ncidahken diriNa. 31 Ise pagi paksa si e kundul-kundul pekesahken i darat, olanai ia bengket ku rumah muat erta-ertana; bage pe kalak si i juma olanai ia mulihken ku rumah ngelegi erta-ertana. 32 Ingetlah ndehara Lut! 33 Ise si mpertahanken kegeluhenna, ia kebenen geluhna si tuhu-tuhu; tapi kalak si kebenen geluhna, si tuhuna ia enggo mpertahanken kegeluhenna si tuhu-tuhu. 34 Kukataken pe man bandu, i bas berngi si e pagi lit dua kalak medem i bas sada ingan medem: sekalak ibuat, sekalak nari itadingken. 35 Dua kalak diberu sanga nutu, sekalak ibaba sekalak nari itadingken." 36 [Dua kalak dilaki si i juma: sekalak ibaba, sekalak nari itadingken.] 37 E maka nungkun ajar-ajar man Jesus nina, "I ja e pagi jadi Tuhan?" Erjabap Jesus, "I ja lit bangke, i je pulung perik-perik si man bangke."
181 Kenca bage, guna ngajari ajar-ajar gelah ia ertoto rusur maka ola peltep pengarapenna, 2 ituriken Jesus perumpaman enda nina, "I bas sada kuta lit sekalak hakim si la erkemalangen man Dibata dingen la erkeleng ate man manusia. 3 Lit ka pe i bas kuta e sekalak diberu enggo mbalu. Ia rusur reh ndahi hakim e, janah nina, ’Sampati min aku i bas perkarangku nandangi imbangku.’ 4 Ndekah la nggit hakim e, tapi dungna nina i bas ukurna, ’Aminna gia aku la erkemalangen man Dibata dingen la erkeleng ate man manusia, 5 tapi perbahan rusur aku igangguna, kupejore gia perkarana e; gelah olanai ia reh rusur dingen dungna iraukina ayongku.’ " 6 Iterusken Tuhan nina, "Begindu kai si enggo ikataken hakim si la bujur e? 7 Ma kin ibegiken Dibata nge kalak pilihenNa si erlebuh suari ras berngi mindo penampat man baNa? Melawen kin Ia nampati kalak pilihenNa? 8 Kukataken pe man bandu, pedas nge iberekenNa keadilen man kalak si mindo man baNa. Tapi asum reh pagi Anak Manusia si isuruh Dibata lit nge pagi idapetiNa kalak si erkiniteken i doni enda?" 9 Man kalak si pebujur-bujur bana dingen si erpengakap maka kalak si deban la lit ergana, ituriken Jesus perumpaman enda, 10 "Lit me dua kalak si lawes ku Rumah Pertoton guna ertoto. Sekalak e me kalak Parisi janah sekalak nari pengalo cuke. 11 Kalak Parisi e tedis janah ertoto ia i bas ukurna nina, ’O Dibata, bujur kukataken man baNdu, sabap aku la merangap, la nipu, la erlua-lua bagi kalak si deban. Bujur kukataken man baNdu sabap aku labo bagi pengalo cuke ah. 12 Aku erpuasa dua kali seminggu, janah kupersembahken man baNdu sepersepuluh i bas kerina ulihku erdahin nari.’ 13 Tapi pengalo cuke tedis ndauh i bas ia nari, janah la ia pang nare ku langit, itemtemina bana janah nina, ’O Dibata, mekuah min atendu aku kalak perdosa!’ " 14 Nina Jesus, "Kukataken man bandu: Mulih kalak enda ku rumah janah pengalo cuke enda me si ibenarken Dibata, labo kalak Parisi e. Sabap kalak si peganjangken bana ipeteruk Dibata, janah kalak si peteruk bana ipeganjangken Dibata kap." 15 Reh me piga-piga kalak orang tua maba anak-anakna si kitik denga man Jesus. Atena gelah ipasu-pasu Jesus anak-anak e. Asum idah ajar-ajarNa, e maka ilarangna. 16 Tapi idilo Jesus anak-anak e janah nina, "Pelepas anak-anak e reh ndahi Aku, ola ambati ia. Sabap kalak si bagi enda kap empuna Kinirajan Dibata. 17 Ingetlah! Kalak si la ngaloken Kinirajan Dibata bali ras sekalak anak-anak, la ia banci bengket ku bas Kinirajan Dibata." 18 Lit me sekalak peminpin kalak Jahudi nungkun man Jesus nina, "O Guru si bujur, kai nge ndia arus kubahan gelah kudat kegeluhen si rasa lalap?" 19 Erjabap Jesus, "Engkai maka ikatakenndu Aku si bujur? Ma ise pe labo bujur seakatan Dibata ngenca? 20 Tentu enggo ietehndu pedah Dibata, ’Ola munuh; ola erlua-lua; ola nangko; ola ngataken si la tuhu; ola nipu; mehamat man nande ras bapandu.’ " 21 E maka ngaloi ia, "O Guru, kerina pedah e enggo kuikutken kitik-kitikku nari." 22 Kenca ibegi Jesus jabapna e nina, "Sada nari kekurangenndu, dayaken erta-ertandu janah duitna bereken man kalak musil, gelah idatndu erta-erta i Surga; jenari reh kam, ikutken Aku." 23 Kenca ibegina kata Jesus e gulut ukurna, sabap bayak kal ia. 24 Asum idah Jesus bage kal cedana atena, e maka nina, "Tuhu-tuhu mesera kal kalak bayak bengket ku bas Kinirajan Dibata. 25 Sukahen sada unta mentas arah lubang jarum asangken sekalak kalak bayak bengket ku bas Kinirajan Dibata." 26 Kalak si megi Ia nungkun nina, "Adi bage ise nari nge pagi terkelin?" 27 Erjabap Jesus, "Kai si la banci jadi i bas manusia, e me banci jadi i bas Dibata." 28 Jenari nina Petrus, "Kami enggo nadingken sikerajangen kami guna ngikutken Kam." 29 Ngaloi Jesus, "Tuhu, janah Kukataken pe man bandu maka ise pe si nadingken rumahna ntah ndeharana ntah seninana ntah orang tuana ntah anak-anakna erkite-kiteken Dibata dingen erkite-kiteken dahin Dibata, 30 ialokenna nge erganda-ganda i bas jaman enda pe, dingen pagin ialokenna kegeluhen si tuhu-tuhu si rasa lalap." 31 Idilo Jesus ajar-ajarNa si sepuluh dua kalak, jenari nina, "Begikenlah! Genduari kita i bas perdalanen ku Jerusalem. I je me pagi jadi kerina si enggo isuratken nabi-nabi kerna Anak Manusia si isuruh Dibata. 32 Sabap Ia pagi iendesken man kalak si la nandai Dibata. Isaling-saling kalak e pagi Ia, igombang-gombangina janah icidurina. 33 Iligasina jenari ibunuhna Ia, tapi i bas wari peteluken nggeluh Ia mulihi." 34 Bage gia labo iangka ajar-ajar kai si ikataken Jesus. La tangkas man bana erti kata e, e maka labo iangkana maksud Jesus. 35 Asum Jesus nandangi seh i Jeriho, lit me sekalak pentang kundul i tepi dalan mindo-mindo. 36 Asum ibegina mentas jelma si nterem, nungkun ia nina, "Kai e?" 37 Erjabap kalak man bana, "Mentas Jesus kalak Nasaret." 38 Jenari erlebuh ia alu sora megang, "O Jesus! Anak Daud! Mekuah min ateNdu aku." 39 Ilarang kalak si arah lebe ia, gelah ola ia gejek. Tapi reh gangna ia erlebuh nina, "O Anak Daud! Mekuah min ateNdu aku." 40 E maka ngadi Jesus erdalan, jenari isuruhNa kalak negu si pentang e ku Ia. Kenca seh ia i lebe-lebe Jesus, isungkun Jesus ia nina, 41 "Kai kin atendu Kubahan man bandu?" Erjabap ia, "O Tuan, ateku min gelah aku erpengidah mulihi." 42 E maka nina Jesus man bana, "Erpengidahlah kam! Kinitekenndu erbahanca kam enggo malem." 43 Minter ia erpengidah, jenari ikutkenna Jesus, janah ikatakenna bujur man Dibata. Asum kalak si nterem ngidah si e, kerina ia muji Dibata.
191 Jesus bengket ku kuta Jeriho janah terus Ia erdalan mentasi kota e. 2 I bas kota e lit me sekalak kepala pengalo cuke, gelarna Sakeus. Ia bayak. 3 Ia merincuh kal ngidah ise kin Jesus e. Tapi la idahna perbahan nterem kal jelma arah lebena dingen ia pe gendek ka. 4 E maka kiam ia ngelebei jelma si nterem e, jenari inangkihna batang kayu, guna ngenehen Jesus si mentas arah dalan e. 5 Asum Jesus seh i bas ingan e, itatap Jesus ku datas janah nina man Sakeus, "O Sakeus pedasken nusurken! Sabap sendah kesilang ateKu i rumahndu." 6 Minter nusur Sakeus janah ialo-alona Jesus alu ermeriah ukur. 7 Tapi jungut-jungut kalak si nterem ngidah si e nina, "Kesilang Ia i rumah kalak perdosa." 8 Tapi tedis Sakeus janah nina man Tuhan, "Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat." 9 Ngaloi Jesus nina, "I bas wari enda enggo reh keselamaten man isi jabu enda. Kam pe kesusuren Abraham kap. 10 Sabap Anak Manusia si isuruh Dibata reh guna nelamatken kalak si papak." 11 Tupung jelma si nterem sangana denga megiken Jesus ngerana, ituriken Jesus sada perumpaman. Paksa e nandangi seh me Ia ku Jerusalem, janah iakap kalak maka pedas me i idah manusia Kinirajan Dibata. 12 Erkiteken si e nina Jesus man kalak enda, "Lit me sekalak si biak raja berkat atena ku kuta si ndauh guna iesahken jadi raja. Kenca iesahken e atena minter mulih. 13 Tapi ope denga ia berkat, idilona sepuluh kalak juak-juakna. Jenari iberekenna sekalak-sekalak sepuluh duit mina. Janah nina man kalak enda, ’Pergunaken duit enda jadi pokokndu erbinaga seh aku mulih.’ 14 Tapi anak kutana erelem-elem man bana, e maka ikirimna utusenna ndapeti alu ngataken, ’Kami la setuju ia jadi raja kami.’ 15 Kenca ia iesahken jadi raja, mulihken ia. Jenari idilona juak-juak si sepuluh kalak ndube ngadap man bana guna meteh asa kai buena untung si idatna sekalak-sekalak. 16 Ngadap me juak-juak si pemena nina, ’O, tuan, enggo kudat untungna sepuluh duit mina alu duit si iberekenndu mbarenda.’ 17 Nina tuan man bana, ’Merandal, kam juak-juak si mehuli! Perbahan kam tutus i bas si kitikna, e maka kubereken man bandu kuasa i bas sepuluh kota.’ 18 Ngadap si peduaken nina, ’O tuan alu sada sepuluh duit mina si iberekenndu bangku mbarenda, enggo dat aku untungna lima duit mina.’ 19 Man bana nina tuan e, ’Kam erkuasa i bas lima kota.’ 20 Ngadap si peteluken, ’O tuan, enda duitndu mbarenda; kubuniken gelgel nari i bas saputanganku. 21 Mbiar kal aku kam, sabap kam kalak kejam. Ibuatndu si labo sikerajangenndu janah iperanindu si la isuanndu.’ 22 Ngaloi tuan e man bana, ’Kam juak-juak si jahat! Kam kuukum rikutken pengeranandu. Bahanlah maka aku kalak kejam, kubuat si labo sikerajangenku janah kuperani si labo kusuan. 23 Adi bage, ngkai maka la itamakenndu duitku e ku bas bank? Gelah kenca aku mulih banci kualoken ras bungana.’ 24 Jenari nina man kalak si tedis i je, ’Buatlah duit e i bas ia nari, jenari bereken man kalak si enggo idatna sepuluh duit emas.’ 25 Nina kalak ndai, ’O tuan, enggo kap lit sikerajangenna sepuluh duit mina.’ 26 Ngaloi raja e, ’Kukataken man bandu maka man kalak si lit ibereken kap tole; tapi kalak si la lit bas ia, si sitik i bas ia pe ibuat ka ibas ia nari. 27 Genduari baba ku jenda kerina imbang-imbangku si la ia setuju aku jadi rajana, jenari bunuh ia i lebe-lebengku!’ " 28 Kenca ikataken Jesus perumpaman e, iteruskenNa perdalanenNa ku Jerusalem. 29 Asum Ia enggo ndeher ku Betpage ras Betani, e me daerah i Uruk Seton, isuruhNa dua kalak ajar-ajarNa leben, 30 nina, "To lawes ku kota si arah lebendu ah. Seh kenca kam ku bas kota e, idapetindu kari sada kelede tambat, kelede si langa pernah iersak kalak. Osari nalina, jenari baba ku jenda. 31 Adi lit kari kalak nungkun man bandu, ’Engkai maka iosarindu?’, nindulah, ’Perlu Tuhan.’ " 32 E maka lawes si dua kalak ndai janah idapetina kerina bagi si enggo ikataken Jesus e. 33 Asum iosarina nali kelede ndai nina empu kelede man bana, "Engkai maka iosarindu?" 34 Erjabap ia, "Perlu Tuhan." 35 Jenari ibabana kelede e man Jesus. Ikimbangkenna uisna ku gurung kelede e jenari isampatina Jesus ngersaksa. 36 Asum iterusken Jesus perdalanenNa, ikimbangken kalak uis i bas pasar. 37 Kenca Ia enggo ndeher ku Jerusalem, ngincuah i Uruk Seton nari, mulai me ajar-ajar si nterem si ngikutken Ia ersurak-surak. Alu sora si megang ipujina Dibata, meriah ukurna perbahan tanda sengget si idahna. 38 Ersurak-surak ia nina, "Ipasu-pasu gelah Raja si reh i bas Gelar Tuhan! Keriahen i Surga ras pujin man Dibata!" 39 Piga-piga kalak Parisi si ikut i bas kalak si nterem e ngerana man Jesus nina, "O Guru, suruh min sinik ajar-ajarNdu e." 40 Ngaloi Jesus, "Adi sinik kalak enda, batu-batu enda me si ersurak." 41 Reh deherna me Jesus ku Jerusalem, janah kenca idahNa kota e itangisiNa, 42 nina, "Ah andiko, mehuli kal adi ietehndu kai si banci erbahan perdamen. Tapi genduari la kam ngasup ngidahsa! 43 Reh me pagi paksana maka ikeleweti imbang-imbangndu kam alu benteng-benteng pertahanen, jenari ikepungna janah ijapa nari pe reh serangen. 44 Kerina kam pagi ikernepkenna ras anak-anakndu. La ipelepasna sada batu pe i bas inganna si gelgel, sabap la ipegermetkenndu ndigan reh Dibata ndahi kam!" 45 Jenari bengket Jesus ku bas Rumah Pertoton. IpelawesNa kerina kalak si erbinaga i je. 46 Nina man kalak e, "Lit kap tersurat i bas Pustaka Si Badia, maka nina Dibata, ’RumahKu Rumah Pertoton kap.’ Tapi enggo ijadikenndu jadi asar penamun." 47 Tep-tep wari Jesus ngajar i bas Rumah Pertoton e. Imam-imam si mbelin ras guru-guru agama Jahudi bage pe peminpin-peminpin bangsa Jahudi sanga ndarami dalan guna munuh Jesus. 48 Tapi la ietehna kuga carana, sabap jelma si nterem erngena ate nandangi Jesus janah meriah ukurna megiken pengajaren Jesus.
201 I bas sada wari, Jesus ngajar i bas Rumah Pertoton dingen meritaken Berita Si Meriah i bas Dibata nari man kalak si nterem. Paksa si e, reh imam-imam si mbelin, guru-guru agama Jahudi ras peminpin-peminpin Jahudi, 2 jenari nina man Jesus, "Kataken man kami, kuasa kai kin si lit i bas Kam erbahan si enda kerina? Ise mereken kuasa e man Bandu?" 3 Erjabap Jesus man kalak e nina, "Kusungkun kam lebe. 4 Kuasa Johanes Peridiken mperidiken e reh i bas Dibata nari, ntah i bas manusia nari?" 5 E maka sisungkun-sungkunen ia kerina nina, "Kuga ninta? Adi ninta, ’I bas Dibata nari,’ ugapa pe nina, ’Adi bage ngkai maka la kam tek man Johanes Peridiken.’ 6 Tapi adi ninta, ’I bas manusia nari,’ merawa kari kalak si nterem enda janah ibenterina kita alu batu, sabap kalak si nterem tek maka Johanes Peridiken sekalak nabi." 7 E maka erjabap ia man Jesus nina, "La ieteh kami i ja nari rehna." 8 Nina Jesus man bana, "Adi bage, Aku pe la Kukataken man bandu alu kuasa kai Kubahan enda kerina." 9 Jenari ituriken Jesus perumpaman enda man kalak si nterem nina, "Lit me sekalak si nuan anggur i bas kebunna. Jenari lawes ia ku negeri si ndauh. Perbahan ndekah atena i bas negeri si ndauh e, e maka isewakenna kebun anggur e. 10 Kenca seh paksa peranin buah anggur, isuruhna sekalak juak-juakna ndahi si newa kebun anggur e, guna mindo sikerajangenna. Tapi ipekpeki si newa kebun anggur juak-juak ndai jenari isuruhna mulih alu la maba kai pe. 11 E maka isuruh tuan si mada kebun anggur juak-juak si deban. Tapi ia pe ipekpeki si newa e, igombang-gombangi janah isuruhna mulih alu la maba kai pe. 12 Jenari isuruh tuan si mada kebun anggur juak-juak si peteluken. Ia pe ipekpeki si newa e seh luka janah iambekkenna ku darat kebun e. 13 E maka rukur tuan si mada kebun anggur nina, ’Kai nge ndia arus kubahan? Kusuruh me anakku si kukelengi enda; tentu mehangke kari ia.’ 14 Tapi kenca idah si newa kebun anggur anak tuan e nina sapih-sapih ia, ’Enda kap anak tuan si mada kebun anggur enda. Sibunuhlah ia gelah man banta kebunna enda!’ 15 E maka iambekkenna anak tuan e ku darat kebun, jenari ibunuhna." Jenari nungkun Jesus nina, "Kenca bage kuga nge ibahan tuan si mada kebun anggur nandangi si newa e? 16 Tentu reh ia, ibunuhna kerina si newa kebun anggur e, jenari isewakenna kebun e man kalak si deban." Megi kata e nina kalak si nterem, "Mbera-mbera ola bage!" 17 Itatap Jesus ia kerina janah nina, "Adi bage, kai nge erti kata si tersurat i bas Pustaka Si Badia enda? ’Batu si iambekken tukang, enggo jadi batu palas.’ 18 Ise si ndabuh ku batu e getem me ia, janah ise si idabuhi batu e meripuk me ia." 19 Paksa si e pe guru-guru agama Jahudi ras imam-imam si mbelin ersura-sura nangkap Jesus. Sabap ietehna maka ia nge tujun perumpaman si ituriken Jesus ndai. Tapi mbiar ia kalak si nterem. 20 E maka idaramina kesempaten si deban. Isogokna piga-piga kalak gelah ipekulah-kulahna bana bujur. Kalak enda isuruhna ncubai Jesus alu penungkunen-penungkunen, gelah alu bage banci iendeskenna Jesus man gubernur gelah itutup. 21 Nina kalak enda ndai man Jesus, "O Guru, ieteh kami maka kai si ikatakenndu ras si iajarkenNdu e tuhu. La erpilihen temanNdu ngerana. La ipernehenNdu pangkat manusia, tapi iajarkenNdu kerna kai si tuhu-tuhu ngena ate Dibata ibahan manusia. 22 Kataken dage man kami, rikutken aturen agamanta banci ntah lang galar pajak man Kepala Pemerentah Roma?" 23 Tapi ieteh Jesus kai tujun ranan kalak si pekulah-kulah enda, e maka nina, 24 "Cidahken lebe man bangKu sada duit pirak. Gambar ras gelar ise kin lit i bas duit e?" Erjabap kalak ndai, "Gambar ras gelar Kepala Pemerentah Roma." 25 E maka nina Jesus, "Adi bage, berekenlah man Kepala Pemerentah Roma kai sikerajangen Kepala Pemerentah Roma janah bereken man Dibata kai sikerajangen Dibata." 26 La ngasup kalak ndai nidingi cakap Jesus i lebe-lebe jelma si nterem. Mamang pe atena megi jabap Jesus, e maka sinik nari nge ia. 27 Reh me piga-piga kalak Saduki ndahi Jesus. Kalak enda la tek maka kalak mate nggeluh mulihken. Isungkunna Jesus nina, 28 "O Guru, man banta enggo isuratken Musa Undang-undang enda, ’Adi sekalak dilaki mate nadingken ndeharana, janah la lit pupusna, e maka diberu si enggo mbalu ndai arus ilakomangani senina si mate e gelah ipupusna anak jadi gancih senina si enggo mate ndai.’ 29 Lit me pitu kalak dilaki si ersenina. Sintua enggo empo, janah mate ia, la lit pupusna. 30 E maka ilakomangani seninana si nomor dua diberu e, 31 jenari seninana si nomor telu ngelakomanganisa. Bage me jadi man pituna si ersenina ndai -- kerina ia mate, sada pe la nadingken anak. 32 Dungna diberu ndai pe mate ka. 33 Adi bage, kenca nggeluh kerina si mate ndai i bas wari kekeken, si apai nge perbulangen diberu ndai? Sabap pituna ia enggo pernah erjabu ras diberu e." 34 Ijabap Jesus kalak ndai nina, "Kalak si nggeluh i bas paksa enda sereh dingen empo. 35 Tapi kalak si metunggung ngaloken kegeluhen si mbaru kenca ipekeke i bas si mate nari lanai bo ia sereh dingen empo. 36 Ia enggo bali ras malekat-malekat janah lanai banci mate. Ia enggo ipegeluh i bas si mate nari, janah enda me tandana maka ia anak-anak Dibata. 37 Kerna si mate nggeluh mulihi enggo tangkas ituriken Musa i bas bagin turi-turin kerna rambah si gara. I je ikataken maka Tuhan e, e me Dibata si tetap isembah Abraham. Dibata si tetap isembah Isak ras Dibata si tetap isembah Jakup. 38 Enda ertina maka Ia Dibata kalak si nggeluh labo Dibata si mate, sabap i bas adep-adepenNa kerina jelma nggeluh." 39 Megi si enda nina piga-piga guru-guru agama Jahudi, "Payo kal jabapNdu e Guru!" 40 E maka lanai ia pang nungkun kai pe man Jesus. 41 Nina Jesus man kalak e, "Kuga banci ikataken kalak maka Mesias si ipadanken Dibata e, e me kesusuren Daud? 42 Sabap Daud jine ngatakenca i bas kitap Masmur, ’Nina TUHAN man TuhanKu Kundulken arah kemuhenKu 43 seh Kutamaken imbang-imbangNdu i teruh tapak-tapak naheNdu.’ 44 Daud jine ngatakenca maka Ia Tuhan. Kuga banci maka Mesias si ipadanken e kesusuren Daud ka?" 45 Asum kalak si nterem pe megiken Ia nina man ajar-ajarNa, 46 "Metengetlah nandangi guru-guru agama Jahudi, si megati erdalan-dalan erbaju gedang, si atena ihamati i gedang-gedang dalan ras itiga. Ia nggit kal kundul arah lebe i bas rumah pertoton. Idaramina ingan si mehamat i bas kerja-kerja. 47 Ibuatna keuntungenna i bas kalak si enggo mbalu nari ras ngerampasi rumah diberu balu-balu. Ibahanna pertoton si gedang alu pekulah-kulah. Kalak si bage pasti iukum alu ukumen si seh kal beratna."
211 I bas Rumah Pertoton iidah Jesus piga-piga kalak bayak namaken duit persembahen ku bas ingan persembahen. 2 IdahNa pe sekalak diberu si enggo mbalu si musil kal, namaken dua peser. 3 Jenari nina Jesus, "Kukataken man bandu maka si tuhuna buen persembahen diberu si enggo mbalu si musil e asangken kerina persembahen kalak si deban. 4 Sabap kalak si deban mere alu labo kurang i bas ia, tapi diberu e seh kal musilna; tapi amin bage pe iberekenna kerina si lit i bas ia." 5 Lit piga-piga kalak ncakapken kerna jilena Rumah Pertoton, si ihiasi alu batu-batu si mejile dingen erbage-bage persembahen si iendesken man Dibata. Nina Jesus, 6 "Kerina si iidahndu enda lit pagi masana maka lanai lit sada batu pe pagi tading i bas inganna; kerina pagi iruntuhken." 7 Nungkun ajar-ajar man Jesus nina, "O Guru, ndigan kin e jadi? Janah kai nge pagi tanda-tandana kejadin e?" 8 Erjabap Jesus, "Metengetlah gelah ola kam kena tipu. Sabap nterem pagi kalak reh i bas gelarKu nina, ’Aku kap Ia,’ janah, ’Enggo ndeher waktuna.’ Tapi ola ikutken ia. 9 Bage pe ola kam mbiar adi ibegindu kerna perang ras pemberontaken-pemberontaken. Kerina si e arus jadi, tapi labo berarti maka enggo seh ku kedungenna." 10 Tole nina Jesus, "Bangsa pagi ngelawan bangsa, kerajan ngelawan kerajan. 11 Ijapa pe terjadi pagi taneh linuren, kelihen ras penakit cacar. Lit pe pagi kejadin si mehantu ras tanda-tanda sengget i langit nari. 12 Ope denga jadi si enda kerina, kam pagi itangkap dingen isiksa. Kam pagi iendesken ku bas rumah pertoton guna icubai janah itamaken ku bas penjara. Kam pagi ibaba ku lebe-lebe raja ras ku lebe-lebe kalak si erkuasa erkite-kiteken Aku. 13 Enda pagi jadi kesempaten man bandu guna meritaken Berita Si Mehuli si i bas Dibata nari e. 14 E maka tetapkenlah i bas ukurndu, maka la atendu ndele kerna kai si man katanken guna mbela dirindu. 15 Aku pagi mereken man bandu jabapenna, ras kepentaren gelah la lit sekalak pe imbang-imbangndu ngasup ngelawan ntah nimbak kai si ikatakenndu e. 16 Kam pagi iendesken orang-tuandu, senina-seninandu, kade-kadendu ras teman-temanndu. Piga-piga i bas kam ibunuh pe pagi. 17 Kerina kalak e rate segat man bandu erkite-kiteken Aku. 18 Tapi labo bene selambar buk pe i bas takalndu nari. 19 Megenggenglah kam, sabap alu bage maka kam banci engkelini geluhndu." 20 "Adi idahndu pagi Jerusalem ikepung tentera, tentu ietehndu maka keruntuhenna enggo ndeher. 21 Asum si e pagi kalak si ringan i Judea arus kiam ku deleng-deleng; kalak si i kuta arus mengongsi janah kalak si i daraten kuta olanai ia bengket ku bas kuta. 22 Sabap wari e me wari pengukumen, gelah alu bage seh me rikutken si isuratken i bas Pustaka Si Badia. 23 Andiko, cilaka kal pernanden-pernanden si sangana mehuli kula ras si sangana pepinemken i bas paksa si e! Sabap reh me pagi kiniseran si mesangat ku doni enda janah ukumen Dibata nandangi bangsa enda. 24 Lit kalak si ibunuh alu pedang. Si debanna ibaba jadi tabanen ku kerina negeri. Jerusalem italuken kalak si la nandai Dibata seh pagi genep paksa si enggo itetapken Tuhan." 25 "Teridah me pagi tanda-tanda i bas matawari, bulan ras bintang-bintang. Bage pe kerina bangsa i babo doni enda bene ukurna dingen mbiar ia nandangi galumbang ras lawit si merawa. 26 Manusia pagi labuh perbahan biarna i bas ia nimai kai si jadi ku doni enda, sabap kuasa-kuasa langit pe mugur-ugur. 27 Sanga si e me pagi teridah Anak Manusia si isuruh Dibata reh i bas embun alu kemulian si mbelin dingen erdolat. 28 Adi si enda kerina enggo mulai jadi, kekekenlah janah jurgakken, sabap penebusenndu enggo ndeher." 29 Jenari ituriken Jesus man kalak e perumpaman enda, "Nehenlah batang ara bage pe batang kayu si deban. 30 Adi idahndu batang kayu e enggo ertunas, ietehndu pe maka musim lego enggo ndeher. 31 Bage pe adi idahndu pagi jadi kerina si Kukataken ndai, ingetlah, maka Kinirajan Dibata enggo ndeher. 32 Kerina si e pagi jadi ope denga mate kerina manusia. 33 Langit ras doni masap kap pagi tapi katangKu tetap rasa lalap." 34 "Jagalah bandu, gelah pusuhndu la iberati alu barang si erbahanca kam ketagih minem si erbahanca mabuk, ntah kearun ate kerna kegeluhen enda, seh maka erkiteken si e la kam ersikap sanga wari e rempet reh. 35 Sabap wari e rempet pagi reh bagi siding man kerina jelma ibelang-belang doni enda. 36 Erjagalah dingen tetap ertoto gelah kam pulah i bas kerina kejadin e, janah ngasup kam tedis i lebe-lebe Anak Manusia si isuruh Dibata." 37 Suari Jesus ngajar i bas Rumah Pertoton janah berngi lawes Ia ku daraten kuta, erberngi Ia i datas Uruk Seton. 38 Tep-tep wari lampas kerina kalak reh ndahi Ia ku Rumah Pertoton guna megiken pengajarenNa.
221 Wari Raya Roti la erragi si igelari Paskah enggo ndeher. 2 Imam-imam si mbelin ras guru-guru agama Jahudi ndarami dalan guna munuh Jesus, sabap mbiar ia kalak si nterem. 3 Judas, si igelari Iskariot sekalak i bas ajar-ajar si sepuluh dua kalak, ikuasai Iblis ukurna. 4 E maka lawes ia, jenari arih-arih ia ras imam-imam si mbelin bage pe pengulu Rumah Pertoton kerna kengasupenna ndudurken Jesus man kalak e. 5 Meriah kal ukur kalak e janah erpadan ia mereken duit man Judas Iskariot. 6 Judas setuju kerna si e. Jenari idaramina me kesempaten si cocok guna ndudurken Jesus alu la ieteh kalak si nterem. 7 Seh me Wari Raya Roti si La Itama Ragi. I bas wari e kerina kalak nggeleh biri-biri guna man-man Paskah. 8 Isuruh Jesus Petrus ras Johanes nina, "To pesikap pangan Paskah man banta gelah ras-ras kita man." 9 Nungkun kalak e nina, "I ja atendu isikapken kami?" 10 Erjabap Jesus, "Begiken! Seh kenca kam kari i bas kuta ah, jumpa kam ras sekalak dilaki si maba lau tare tambe. Ikutken ia ku rumah. 11 Sungkun kari si mada rumah e, Guru nungkun bandu, ’Kamar si apai banci Kupake ras ajar-ajarKu guna man-man Paskah?’ 12 E maka ituduhkenna kari man bandu sada kamar si mbas i datas loteng, si enggo sikap. I je me sikapken kerina si perlu guna ngerayaken Paskah." 13 E maka lawes me Petrus ras Johanes. Idapetina kerina bagi si enggo ikataken Jesus man bana, jenari isikapkenna pangan guna Paskah e. 14 Kenca seh jam man, kundul Jesus ras rasul-rasul e. 15 Nina Jesus man kalak e, "Mesikel kal aku ngerayaken Paskah ras kam ope denga Aku ngenanami kiniseran. 16 Sabap lanai bo pagi kupan e seh Wari Paskah si tuhu-tuhu i bas Kinirajan Dibata." 17 Jenari ibuat Jesus calung, itotokenNa ngataken bujur man Dibata, e maka nina man ajar-ajarNa, "Buat enda, jenari bagi-bagiken i bas kam kerina. 18 Sabap lanai bo pagi kuinem anggur enda, genduari nari seh ngayak kerehen Kinirajan Dibata." 19 Kenca bage ibuatNa roti, ertoto Ia ngataken bujur man Dibata. Icepik-cepikNa roti e jenari iberekenNa man rasul-rasul nina, "Enda me dagingKu [si ibereken man gunandu. Bahanlah bagenda guna peringet-ingeten man bangKu." 20 Bage me pe, kenca elah man e ibereken Jesus calung nina, "Arah calung enda Dibata erbahan Padan si Mbaru si iesahken alu darehKu si mambur man gunandu.] 21 Tapi, nehenlah! Sekalak si ndudurken Aku i bas meja enda ras Aku. 22 Sabap Anak Manusia si isuruh Dibata la banci lang mate bagi si enggo itetapken Dibata. Tapi andiko, cilaka me kalak si ndudurkenca e!" 23 Jenari mulai me ajar-ajar e sisungkun-sungkunen ntah ise kin i bas ia si atena erbahan bage. 24 Turah me perubaten i bas ajar-ajar kerna ise kin si mbelinna i bas ia. 25 Nina Jesus kalak e, "Raja bangsa-bangsa si la nandai Dibata erbahan mesui ate bangsana janah si erkuasa ibahan gelarna ’Teman Kalak si nterem.’ 26 Tapi kam ola bage; kalak si mbelinna i bas kam arus jadi si kitikna, janah si atena jadi peminpin arus bali ras suruh-suruhen. 27 Apai kin ergan kalak si kundul man asangken kalak si ngelai ia? Tentu kalak si kundul. Tapi Aku i tengah-tengahndu bagi kalak si ngelai kap. 28 Kam enggo ras Aku nggengken kerina kiniseranKu. 29 Bali ras Bapa enggo mereken man bangKu Kinirajan e, Kubereken ka pe man bandu Kinirajan e. 30 Banci kam ikut man ras minem ras Aku i bas KinirajanKu. Janah man bandu ibereken pagi ingan kundul jadi pemerentah guna ngadili suku Israel si sepuluh dua." 31 "O, Simon, Simon! Begikenlah! Iblis enggo iijinken ncubai kam kerina bagi kalak si miari gandum. 32 Tapi enggo Kutotoken kam Simon, gelah kinitekenndu ola nimpet. Janah adi enggo kam jera, pegegehilah senina-seninandu gelah tetap kinitekenna." 33 Ngaloi Petrus, "O Tuhan, aku enggo pang ku bas penjara ntah pe mate ras Kam." 34 Ngaloi Jesus, "O Petrus, Kukataken man bandu: Ope tekuak manuk enggo ipersokendu Aku telu kali." 35 Tole nina Jesus man ajar-ajarNa, "Asum Kusuruh kam mbaru enda lawes alu la maba dompet, gajut-gajut ntah sepatu, lit kin si kurangenndu tupung e?" 36 Erjabap kalak e, "La lit kai pe si kurang." Nina Jesus, "Tapi genduari ise lit dompetna ntah gajut-gajutna, babalah. Bage pe ise si langa lit pedangna, idayakennalah uisna guna nukur pedang. 37 Kukataken man bandu maka i bas Pustaka Si Badia lit tersurat ’Ia iperseri ras kalak jahat’ la banci la jadi man Bangku. Sabap si tersurat i bas Pustaka Si Badia kerna Aku sangana terjadi." 38 Nina ajar-ajar, "O Tuhan! Enda dua pedang." Ngaloi Jesus, "Enggo me bias." 39 Kenca bage itadingken Jesus kuta e. Bagi biasana lawes Ia ku Uruk Seton ras ajar-ajarNa. 40 Kenca seh i bas ingan e nina man ajar-ajarNa, "Ertotolah gelah ola kam kena percuban." 41 Jenari iserapken Jesus baNa i bas ajar-ajar e nari, dauhna asa gegeh mbenterken batu. I je erjimpuh Ia dingen ertoto, 42 nina, "O Bapa, adi banci pedauh min calung kiniseran enda i bas Aku nari. Tapi labo peratenKu, peratenNdulah jadi." [ 43 Teridah me man baNa sekalak malekat i Surga nari si pegegehi Ia. 44 Perbahan bage getemna pusuhNa, e maka reh gegehna Ia erbebe i bas pertotonNa seh maka panasNa naktaken ku taneh bagi taktak dareh.] 45 Kenca dung Ia ertoto mulihken Ia ndahi ajar-ajarNa. IdapetiNa ajar-ajar e tunduh perbahan cedana atena. 46 Jenari nina Jesus man kalak e, "Engkai maka kam tunduh? Kekeken janah ertotolah gelah ola kam kena percuban." 47 Sanga Jesus ngerana denga, reh sada rombongen kalak nterem. Judas, sekalak i bas ajar-ajar si sepuluh dua kalak, mabai rombongen e. Ideheri Judas e Jesus jenari iemana. 48 Tapi nina Jesus, "O, Judas, alu ema enda kin kam ndudurken Anak Manusia si isuruh Dibata?" 49 Asum idah ajar-ajar ras Jesus kai si nandangi jadi nina man Jesus, "O Tuhan, ilawan kami ia alu pedang enda?" 50 Jenari sekalak ajar-ajar e minter ngelawan sekalak suruh-suruhen Imam si Mbelin seh maka retap cupingna si arah kemuhen. 51 Tapi nina Jesus, "Enggo me." Jenari idadap Jesus cuping kalak ndai jenari ipepalemNa. 52 E maka ngerana Jesus man imam-imam si mbelin, pengulu Rumah Pertoton ras peminpin-peminpin Jahudi si reh ku Ia nina, "Iakapndu kin Aku enda sekalak pengerampok maka reh kam maba pedang ras perpalu? 53 Tep-tep wari Aku ras kam i bas Rumah Pertoton janah labo Aku itangkapndu. Tapi enda me paksa si cocok man bandu, asum kuasa kegelapen erkuasa." 54 Jenari itangkap kalak si reh e Jesus janah ibabana ku rumah Imam si Mbelin. Petrus ngikutisa i dauh-dauh nari. 55 I tengah kesain lit kalak pegara api janah kundul kalak e i kelewetna cudu. Petrus pe ku je kundul. 56 Sekalak juak-juak diberu ngidah Petrus kundul i deher api e. Ipepayona kal jenari nina, "Ia pe teman Jesus kap!" 57 Tapi merso Petrus nina ngaloi, "O bibi, la kutandai pe Ia!" 58 La ndekahsa kenca si e, lit ka kalak si deban ngidah ia janah nina, "Kam pe temanNa kap!" Tapi ngaloi Petrus, "Lang teman, aku labo!" 59 Kira-kira sada jam kenca si e, lit kalak si deban ngerana alu tegas nina, "Enggo pasti ia pe pengikutNa, sabap ia pe kalak Galilea!" 60 Tapi ngaloi Petrus, "La kueteh kai si ikatakenndu e!" Asum Petrus ngerana denga minter tekuak manuk. 61 Jenari itulihken Tuhan kempak Petrus. Inget Petrus pe maka enggo ikataken Tuhan man bana, "Ope denga tekuak manuk i bas berngi enda, enggo ipersokenndu Aku telu kali." 62 E maka lawes Petrus ndarat janah tangis ia perbahan ceda atena. 63 Kalak si erjaga nggombang-gombangi Jesus dingen mekpeki Ia. 64 Itutupina ayo Jesus jenari nina, "Kataken, ise si mekpek Kam?" 65 Melala denga pe cekurak si deban ibelaskenna man Jesus. 66 Kenca terang wari pulung me pertua-pertua kalak Jahudi, imam-imam si mbelin ras guru-guru agama. Jenari ibabana Jesus ku lebe-lebe Pengadilen Agama. 67 Nina kalak e, "Kataken man kami, Kam kin Mesias si ipadanken Dibata?" Erjabap Jesus, "Adi Kukataken pe man bandu, labo kam tek. 68 Janah adi Kusungkun pe kam, labo ka ijabapndu. 69 Tapi mulai genduari nari Anak Manusia si isuruh Dibata kundul arah kemuhen Dibata si Mada Kuasa." 70 Nina kalak ndai kerina, "Dage, Kam kin Anak Dibata?" Erjabap Jesus, "Bagi katandu e me!" 71 Jenari nina kalak e, "Kita lanai perlu saksi! Enggo si begi kai si ikatakenNa."
231 Jenari tedis kerina anggota sidang e. Ibabana Jesus ngadap man Pilatus. 2 Iadukenna Jesus nina, "Enggo tangkas man kami uga pemabaiNa bangsa kami papak. Iajuk-ajukna kalak gelah ola nggalar pajak man Pemerentah Roma janah ikatakenNa maka Ia kap Kristus, Raja e." 3 Nungkun Pilatus man Jesus nina, "Kam kin Raja kalak Jahudi?" Erjabap Jesus, "Bagi katandu e me!" 4 Jenari nina Pilatus man imam-imam si mbelin ras kalak si nterem, "La lit ku dat kesalahen kai pe i bas Ia." 5 Tapi igegehi kalak ndai ngatakenca, "Iajuk-ajukNa kerina rayat taneh Jahudi alu pengajarenNa. Ibenakenna i Galilea janah genduari enggo seh ku jenda." 6 Kenca ibegi Pilatus si e, nungkun ia nina, "Kalak Galilea kin Ia?" 7 Kenca ietehna maka Jesus i taneh si ikuasai Herodes nari, e maka isuruhna Jesus ngadap man Herodes. Paksa si e Herodes pe i Jerusalem. 8 Asum idah Herodes Jesus meriah kal ukurna. Sabap ndekah me ibegina berita kerna Jesus dingen mesikel ia ngidahsa. Ngarap pe ia ngidah Jesus erbahan tanda-tanda sengget. 9 E maka melala penungkunenna man Jesus, tapi sengkebabah ranan pe la ijabap Jesus. 10 Paksa si e pe, reh ku lebe imam-imam si mbelin ras guru-guru agama kalak Jahudi. Alu merawa-rawa ikatakenna pengadunna nandangi Jesus. 11 E maka Herodes ras tentera-tenterana mulai nggombang-gombangi dingen ngisak-ngisakken Jesus. Ipakekenna baju si mehaga man bana jenari isuruhna mulih ku Pilatus. 12 Mulai i bas wari si ndai enggo erteman Herodes ras Pilatus. Ope denga si e la ia meriah. 13 Kenca bage ipepulung Pilatus imam-imam si mbelin ras peminpin-peminpin bage pe kalak si nterem. 14 Nina man kalak e, "Enggo ibabandu Ia ngadap man bangku janah ikatakenndu maka iajariNa bangsa enda papak. Genduari enggo Ia kuperiksa i lebe-lebendu, tapi la lit kudat salahNa bagi si ikatakenndu e. 15 Herodes pe la lit idatna salahNa, e maka isuruhna Ia mulihken man banta. Si tuhuna labo lit salahNa si sue ras ukumen mate. 16 Perbahan si e, iligasi saja me Ia jenari ibebasken." 17 [I bas tep-tep Wari Raya Paskah, Pilatus arus mulahi sekalak kalak tahanen man kalak si nterem.] 18 Nina kalak si nterem e alu megang, "Bunuh Ia! Pulahi Barabas man kami!" ( 19 Barabas enda ipenjaraken asum ia ikut i bas pemberontaken ras pembunuhen si jadi i bas kuta e.) 20 Ngerana ka Pilatus alu megang man kalak si nterem sabap atena mulahi Jesus. 21 Tapi ngaloi kalak si nterem alu sora si megang nina, "Pakukenlah Ia! Pakukenlah Ia ku kayu persilang!" 22 Petelu kaliken ngerana Pilatus nina, "Kejahaten kai kin si tuhuna enggo ibahanNa? La kap lit kudat salahNa sue ras ukumen mate. Iligasi saja me Ia jenari ipulahi." 23 Tapi igegehi kalak e asa gangna sorana gelah Jesus ipakuken ku kayu persilang. Dungna menang me kalak si nterem e. 24 E maka iputusken Pilatus ukumen Jesus bagi pemindon kalak si nterem. 25 Ipulahina sekalak si ipindoken kalak si nterem, e me kalak si ipenjaraken erkiteken pemberontaken ras pembunuhen. Tapi Jesus iendeskenna man kalak si nterem gelah ibahanna bagi ate-atena. 26 Jesus ibaba ku darat kota. I tengah dalan simbel ras sekalak dilaki si atena bengket ku kota e, gelarna Simon i Kireni nari. Itangkap serdadu e ia, jenari ipaksana mersan kayu persilang Jesus janah erdalan ngikutken Ia. 27 Nterem kal jelma si ngarakken Jesus. I bas si e lit piga-piga diberu; itangisi diberu e me Jesus. 28 Itulihken Jesus kempak diberu e, jenari nina, "O diberu-diberu Jerusalem! Ola tangisindu Aku, tapi tangisilah bandu ras anak-anakndu. 29 Sabap reh me pagi warina maka ikataken kalak, ’Sangap kal diberu si la ertuah, si la pernah mupus dingen si la pernah pepinemken!’ 30 Paksa si e pe ikataken kalak man deleng-deleng, ’Runtuhlah, dabuhi min kami!’, janah man uruk-uruk nina, ’Tamburi min kami!’ 31 Sabap adi bagenda me perbahanen kalak nandangi kayu si meratah, apai denga ka nandangi kayu si kerah?" 32 Lit pe dua kalak nari ibaba kalak e, e me kalak si jahat guna iukum mate raduken Jesus. 33 Kenca seh kalak e i bas ingan si igelari "Takal-takal", ipakukenna Jesus ku kayu persilang. Penjahat si dua kalak e pe ipakukenna ka, sekalak arah kemuhen Jesus, sekalak arah kawesNa. 34 Nina Jesus ertoto, "O Bapa, alemi min kalak enda, sabap la iangkana kai si ibahanna enda." Ibagiken kalak e uis Jesus alu erbahan tikam tanduk. 35 Kalak si nterem tedis janahna ngenen-ngenen, janah peminpin-peminpin kalak Jahudi nokoh-nokohi Jesus nina, "Kalak si deban isampatiNa; pelepaslah Ia mulahi baNa adi Ia kin Mesias si ipadanken Dibata e." 36 Perajurit-perajurit pe nokoh-nokohi Jesus; ideherina Ia janah iberekenna anggur macem man baNa, 37 jenari nina, "Adi Kam kin Raja kalak Jahudi, pulahilah baNdu!" 38 I babo Jesus lit isuratken, "Enda me Raja kalak Jahudi." 39 Sekalak i bas penjahat si ipakuken i je igombangina Jesus, nina, "Ma Kam kin Mesias si ipadanken Dibata e? Pulahilah baNdu dingen pulahi pe kami!" 40 Tapi ipandang sekalak nari ia nina, "La kin kam mbiar Dibata? Kita seri ukumenta ras Ia. 41 Adi kita ma bujur nge bagenda, sabap kita iukum sue nge ras perbahanenta. Tapi Ia labo lit perbahanenNa si salah." 42 Jenari nina man Jesus, "O Jesus, inget aku asum Kam reh pagi jadi Raja!" 43 Ngaloi Jesus man bana, "Kukataken man bandu maka sendah me kam ras Aku i Pardis." 44 Kira-kira pukul sepuludua matawari lanai ersinalsal janah gelap kerina negeri e seh pukul telu. 45 Kire-kire Rumah Pertoton merigat erbelah dua. 46 Serko Jesus alu megang soraNa nina, "O Bapa, ku bas tanNdu Kuendesken tendingKu!" Kenca ikatakenNa si e, mate Ia. 47 Asum idah kepala perajurit kai si enggo jadi ipujina Dibata nina, "Tuhu-tuhu Ia la ersalah!" 48 Kalak si nterem si pulung i je ngenen-ngenen, mulih ku rumahna nemtemi bana kenca idahna kai si enggo jadi e. 49 Kerina teman-teman Jesus, ikut pe diberu-diberu si enggo ngikutken Ia i Galilea nari, i dauh-dauh nari ia tedis ngenehen kejadin e kerina. 50 - 51 Lit i je sekalak gelarna Jusup. Asalna i kuta Arimatea i taneh Judea nari. Ia kalak bujur dingen ihamati kalak si nimai kerehen Kinirajan Dibata. Aminna gia anggota Sidang Mahkamah Agama, tapi ia la setuju keputusen ras tindaken Mahkamah e. 52 Lawes ia ngadap man Pilatus guna mindo mait Jesus. 53 Kenca ipesusurna mait e ibalutina alu uis mbentar. Jenari itamakenna ku bas kuburen si itukak i bas lingling batu kuburen si langa pernah ipake. 54 Wari e wari Jumat; jam persikapen wari Sabat nandangi seh. 55 Diberu-diberu si ngikutken Jesus i Galilea nari e ikut ras Jusup. Iperdiatekenna kuburen e, janah idahna pe kuga mait Jesus itamaken ku bas kuburen e. 56 Kenca bage mulih ia ku rumah nikapken rempah-rempah si merim ras minak wangi guna mait Jesus. I bas wari Sabat la ia banci erdahin bagi si iperentahken Undang-undang.
241 Erpagi-pagi si lampas i bas wari Minggu, berkat diberu-diberu e ku kuburen. Ibabana rempah-rempah si merim si enggo isikapkenna. 2 Idapetina batu si nutupi lubang kuburen e enggo igulingken. 3 E maka bengket ia ku bas; tapi lanai i je mait Tuhan Jesus. 4 Asum kalak e tedis i je dingen mamang atena, rempet tedis i deherna dua kalak dilaki, uisna terang ersinalsal. 5 Mbiar kal diberu-diberu e, e maka nembah mungkuk ia seh ku taneh. Tapi nina si dua kalak e man bana, "Engkai maka idaramindu Kalak si nggeluh i tengah-tengah kalak si enggo mate? 6 Ia lanai i jenda; Ia enggo ipekeke. Ingetlah kai si enggo ikatakenNa man bandu asum Ia i Galilea denga, e me, 7 ’Anak Manusia si isuruh Dibata la banci lang iendesken man kalak perdosa, ipakuken ku kayu persilang janah i bas wari peteluken nggeluh mulihi.’ " 8 Kenca bage i inget diberu-diberu e kai si enggo ikataken Jesus. 9 Jenari mulih ia i kuburen nari, e maka iturikenna kerina kejadin enda man ajar-ajar si sepuluh sada bage pe man ajar-ajar si deban. 10 Gelar diberu-diberu e: Maria Magdalena, Johana ras Maria nande Jakup. Bage pe diberu-diberu si deban si ikut ras kalak enda nurikenca man rasul-rasul e. 11 Tapi la tek rasul-rasul e. Iakapna maka kai si ikataken diberu-diberu e guak saja. 12 Tapi keke Petrus jenari kiam ia ku kuburen. Asum itungkirna ku bas, uis mbentar balut mait e nari ngenca idahna, lain si e kai pe la lit. E maka mulih ia ku rumah dingen mamang atena kerna kai si enggo jadi e. 13 I bas wari e pe lit dua kalak ajar-ajar Jesus lawes ku sada kuta. Gelar kuta e Emaus. Kuta e kira-kira sepuluh sada kilometer i Jerusalem nari. 14 I tengah dalan ercakap-cakap ia duana kerna kerina si enggo jadi e. 15 Asum ia ercakap-cakap, reh me Jesus ndeheri ia dingen erdalan ras. 16 Idah si dua kalak e nge Jesus, tapi la itandaina. 17 Nina Jesus man bana duana, "Kerna kai nge si icakapkenndu janah erdalan e?" Jengang kalak e janah teridah i bas ayona maka ceda atena. 18 Sekalak i bas ia gelarna Keleopas ngaloi man Jesus nina, "Ntah kam kal nge ngenca kalak pertandang i Jerusalem si la meteh kerna kejadin-kejadin i bas wari-wari si perpudi enda?" 19 "Kai kin e?" nina Jesus nungkun. Erjabap kalak e, "Kerna kai si enggo jadi man Jesus kalak Nasaret e. Ia sekalak nabi janah erkuasa i bas kata ras perbahanen subuk iakap Dibata bage pe kerina manusia. 20 Tapi Ia enggo idudurken imam-imam si mbelin ras kalak si erkuasa gelah iukum mate. Ia ipakuken ku kayu persilang. 21 Pada hal enggo iarapken kami maka Ia me si mbebasken bangsa Israel. Tapi i babo si e kerina sendah me petelu wariken kenca kejadin e. 22 Lit ka pe piga-piga teman kami si diberu si erbahanca kami sengget. Ndai erpagi-pagi si lampas lawes ia ku kuburen, 23 tapi lanai lit i je idapetina mait Jesus. Jenari mulihken ia janah iturikenna maka ia enggo ngidah malekat-malekat. Ikataken malekat-malekat e man bana maka Jesus nggeluh kap. 24 Kenca bage piga-piga kalak teman kami lawes ku kuburen. Idapetina payo kal bagi si ikataken diberu-diberu e. Tapi la idahna Jesus." 25 Jenari nina Jesus man si dua kalak e, "Bodoh kal kam tuhu dingen mesera kal iakapndu tek nandangi kai si ikataken nabi-nabi. 26 Ma kin Mesias si ipadanken Dibata e arus ngenanami kiniseran e janah alu bage bengket kemulianNa?" 27 Jenari iterangken Jesus man si dua kalak e kai si enggo isuratken i bas Pustaka Si Badia kerna Ia, mulai i bas kitap-kitap Musa ras kerina kitap nabi-nabi. 28 Kenca seh kalak e ku kuta si man dahinna, Jesus tempa-tempa nerusken perdalanenNa. 29 Tapi si dua kalak e mindo alu meseksek nina, "I jendalah kita sendah, sabap wari enggo ben nandangi gelap me." E maka bengket Jesus ku rumah janah tading Ia ras kalak ndai. 30 Ibuat Jesus roti, ikatakenNa bujur man Dibata jenari icepik-cepikNa janah iberekenNa man kalak e. 31 Kenca bage minter terang pengidah si dua kalak e janah itandaina Jesus. Tapi i je ka minter lanai iidahna Jesus. 32 Nina si dua kalak e sapih-sapih ia, "Ma malem kal tuhu ateta dingen ergiah-giah ukurta asum Ia ngerana ras kita i gedang-gedang dalan dingen iterangkenNa man banta kerna isi Pustaka Si Badia?" 33 Keke ia duana dingen minter mulihken ku Jerusalem. I je idapetina ajar-ajar si sepuluh sada kalak pulung ras teman-temanna si deban. 34 Nina si pulung e ngalo-ngalo ia, "Tuhu-tuhu Tuhan enggo nggeluh mulihken! Enggo icidahkenNa baNa man Simon." 35 Jenari si dua kalak e pe nuriken, kai si enggo jadi i tengah dalan janah kuga ia enggo nandai Tuhan asum icepik-cepikNa roti. 36 Asum kalak ndai ercakap-cakap kerna kejadin e, rempet tedis Tuhan i tengah-tengahna janah nina, "Mejuah-juah man bandu." 37 Sengget dingen mbiar kal kalak e. Iakapna maka ia ngidah begu. 38 Tapi nina Tuhan man bana, "Engkai maka kam mbiar? Engkai maka turah ukur la tetap i bas kam? 39 Nehenlah tanKu ras nahengKu. Perdiateken, ma idahndu Aku nge enda. Dadaplah Aku gelah ietehndu maka adi begu labo lit daging ras tulanna bagi iidahndu lit i bas Aku." 40 Asum Ia ngerana e icidahkenNa tanNa ras naheNa man kalak e. 41 Tapi langa denga kalak e tek perbahan ia dem alu keriahen dingen mamang denga atena; e maka nungkun Tuhan nina, "Lit pangan i bas kam?" 42 Ibereken kalak ndai man baNa sada potong ikan si enggo ipanggang. 43 Ibuat Jesus ikan e jenari ipanNa i lebe-lebe kalak ndai. 44 Jenari nina Tuhan man kalak ndai, "Kai si enggo jadi enda enggo Kukataken nai man bandu asum Aku ras kam denga e me: Kerina si isuratken kerna Aku i bas Undang-undang Musa ras surat nabi-nabi bage pe i bas Masmur enggo jadi kap." 45 Kenca bage ibuka Tuhan perukuren kalak e gelah iangkana si tersurat i bas Pustaka Si Badia. 46 Nina man kalak ndai, "Lit kap tersurat maka Mesias si ipadanken Dibata e arus ngenanami kiniseran, janah i bas wari si peteluken arus keke i bas si mate nari. 47 Bage pe i bas gelarNa berita kerna jera ras pengalemi dosa arus ipeseh man kerina bangsa, ibenaken i Jerusalem nari. 48 Kam me jadi saksi si enda kerina. 49 Janah Aku jine nuruhsa man bandu kai si enggo ipadanken BapangKu. Tapi arus itimaindu i bas kuta enda seh nusur kuasa i datas nari man bandu." 50 Jenari ibabai Jesus kalak e ku darat kuta, seh ku Betani. I je iangkatNa tanNa janah ipasu-pasuNa kalak e. 51 Asum Ia masu-masu, sirang Ia ras kalak e; iangkat Ia ku Surga. 52 Nembah erjimpuh kalak e man baNa, jenari meriah kal ukurna mulih ku Jerusalem. 53 Gedang-gedang wari ipujina Dibata i bas Rumah Pertoton.