JAKUP

JAKUP

¹ Surat enda i bas aku nari, Jakup, persuruhen Dibata ras Tuhan Jesus Kristus. Mejuah-juah man bandu kerina anak-anak Dibata si merap i taneh perlajangen. ² O senina-seninangku, sangap min iakapndu bandu adi reh erbage-bage percuban ngkenai kam. ³ Sabap ietehndu adi kinitekenndu tetap tahan ngalaken percuban-percuban e, kam jadi kalak megenggeng. ⁴ Tetaplah kam megenggeng seh kinigenggengenndu serta, maka kam dewasa i bas kai-kai pe, dingen la kekurangen. ⁵ Tapi adi lit i bas kam si kurang kepentarenna, ertotolah ia man Dibata si mereken kepentaren man bandu. Sabap Dibata kap mereken kepentaren man kerina jelma alu melumbar dingen dem perkuah ate. ⁶ Tapi ertoto arus tek, ola monce-once. Kalak si monce-once bali kap ras gelumbang i lawit si ibentuken angin ku jah ku jenda. ⁷ - ⁸ Kalak si bage ertupang ukurna; la ia ngasup muat keputusen i bas kerina si ibahanna. E maka la pada iarapkenna ndatken kai pe i bas Tuhan nari. ⁹ Megahlah iakap kalak musil adi ipeganjangken, ¹⁰ bage pe megahlah iakap kalak bayak adi ipeteruk. Sabap kalak bayak kernep me pagi bagi bunga dukut. ¹¹ Asum matawari reh ganjangna, wari pe reh lasna, melus dukut e, e maka nartar bungana janah bene pe jilena. Bage me pe kalak bayak, kernep me sanga ndahiken dahinna. ¹² Ketuahen kalak si megenggeng ibas erbage-bage percuban. Sabap kenca menang i bas percuban e, ialokenna me ulih kemenangenna, e me kegeluhen si enggo ipadanken Dibata man kalak si ngkelengi Dibata. ¹³ Adi lit kalak ikenai percuban, ola min nina, "Percuban enda rehna i bas Dibata nari." Sabap Dibata la banci icubai si jahat, janah ise pe labo icubai Dibata. ¹⁴ Tapi kalak kena percuban adi ia tergoda jenari kena siding sura-surana si jahat. ¹⁵ Janah adi sura-surana si jahat e ipejangjang, tubuh me dosa. Adi dosa e enggo ilakoken, buahna e me kematen. ¹⁶ Ola kam tertipu o senina-senina si kukelengi! ¹⁷ Kerina pemere si mehuli ras serta rehna i Surga nari; pemere e ipesusur Dibata, si njadiken kerina si ersinalsal i langit. Dibata tetap nge; labo Ia erdauhna i bas kita nari seh maka itadingkenNa awih-awih si gelap i sekelewetta. ¹⁸ Rikutken peratenNa kita enggo ipekuanakNa arah kataNa si tuhu-tuhu, gelah kita si meganjangna i bas kerina si ijadikenNa. ¹⁹ O senina-seninangku, ingetlah! Kerina arus metinggel, tapi ola minter ngerana, dingen ola sukah merawa. ²⁰ Rawa manusia labo ngasup erbahan si mehuli si ngena ate Dibata. ²¹ E maka pedauhlah i bas kam nari kebiasan-kebiasan si melket ras lagu langkah si jahat. Alokenlah alu meteruk ukur kata si isuanken Dibata i bas pusuhndu, sabap kata e ngasup nelamatken kam. ²² Ola tipu bandu alu megi-megi kataNa saja, tapi dalankenlah kai si iajarken Kata e. ²³ Kalak si megi Kata e tapi la idalankenna, bali me ia ras kalak si ercurmin, janah idahna kuga rupana jine. ²⁴ Ipepayona dirina, jenari lawes ia, janah minter lupa ia kuga rupana. ²⁵ Kalak si mperdiateken pedah Dibata alu mehuli, si terus mpergermetkenca, si la megi-megi saja, kalak si bage ipasu-pasu Dibata i bas kerina pendahinna. Sabap pedah Dibata e serta kap dingen ngasup mbebasken manusia. ²⁶ Ise kin erpengakap maka ia kalak si eragama? Adi la ijagana dilahna sia-sia me ia eragama e, janah itipuna dirina. ²⁷ Agama si tuhu-tuhu dingen si mehuli rikutken pengakap Dibata Bapanta e me: pekena-kena anak-anak melumang ras kalak si enggo mbalu si lit i bas kiniseran, bage pe njaga diri gelah ola icedaken doni enda.

¹ O senina-seninangku, selaku kalak si tek man Tuhanta Jesus Kristus, Tuhan Simulia, ola kam rayo-ayo. ² Umpamana reh ku perpulungenndu sekalak bayak, make cincin emas, ruisken uis mejile; bage pe reh ka sekalak musil, uisna merigat-rigat. ³ Adi hamaten kam man si mejile uisna janah nindu, "Mari, ku tengah kam kundul," tapi si musil ipelepasndu tedis ntah pe nindu, "Arah duru ena me kundulken," ⁴ salah kam. Rayo-ayo kam, dingen perbahanenndu e erpalasken sura-sura si la mehuli. ⁵ O senina-seninangku si kukelengi, begikenlah! Ipilih Dibata kalak musil i bas doni enda gelah bayak ia i bas kinitekenna. Kalak enda pagi dat bagin ngenanami kemalemen ate i bas kinirajan si ipadanken Dibata man kalak si erkeleng ate man baNa. ⁶ Tapi kam megombang man kalak musil! Ma kin kalak bayak nge si ndedeh kam dingen ngaduken kam ku pengadilen! ⁷ Ma kin ia nge si enggo megombang nandangi gelar si mehuli si enggo ibereken man bandu, e me gelar Kristus? ⁸ Adi iikutkenndu Undang-undang kinirajan Dibata, bagi lit tersurat i bas Pustaka Si Badia, "Kelengilah temanndu manusia bagi kam ngkelengi dirindu," mehuli kap perbahanenndu e. ⁹ Tapi adi rayo-ayo kam, erdosa kam, janah Undang-undang ngukum kam selaku kalak si ngelanggar Undang-undang. ¹⁰ Sada la idalanken kalak Undang-undang e, kerina enggo ilanggarna. ¹¹ Sabap Ia si ngataken, "Ola erlua-lua," Ia pe si ngataken, "Ola munuh." Jadi aminna la pe kam erlua-lua, tapi adi munuh kam, kam enggo ngelanggar Undang-undang. ¹² Ngerana dingen erdahinlah bagi kalak si nandangi iadili alu Undang-undang si erbahanca manusia bebas. ¹³ Kalak si la rate mekuah man kalak si deban, iukum alu la lit perkuah ate. Tapi perkuah ate gegehen asa ukumen. ¹⁴ O senina-seninangku! Kai gunana ikataken kalak, "Tek aku man Dibata," adi labo teridah arah perbahanenna? Banci kin kinitekenna e nelamatken ia? ¹⁵ Umpamana lit seninanta ntah turangta si sada kiniteken, si la lit uisna dingen la lit nakanna, ¹⁶ kai gunana ikatakenndu man bana, "Mejuah-juah! Pake pakenndu gelah ola kam bergehen, besuri man," adi labo iberekenndu keperlun geluhna? ¹⁷ Bage me pe kerna kiniteken. Adi kiniteken labo sue rikut ras perbahanen, kiniteken si bage mate kap. ¹⁸ Tapi lit si ngerana, "Sekalak lit kinitekenna, sekalak si deban lit perbahanenna." Jabapku man kalak si ngerana bage, "Cidahkenlah man bangku kuga banci kalak erkiniteken adi la rikut ras perbahanenna. Aku, kucidahken man bandu kinitekenku arah perbahanenku." ¹⁹ Ma tek kin kam maka sada ngenca Dibata? Merandal! Setan-setan pe tek nge, mbiar dingen nggirgir pe ia. ²⁰ Oh, motu kal kam! Icidahken kin atendu man bandu maka kiniteken la rikut ras perbahanen e sia-sia nge? ²¹ Kuga nai nininta Abraham maka rembak ras Dibata? Arah perbahanenna nge; e me asum ipersembahkenna anakna Isak i babo batar-batar persembahen. ²² Langa kin iangkandu? Kinitekenna ras perbahanenna erdahin ras-ras. Kiniteken Abraham jadi serta arah perbahanenna. ²³ Alu bage tuhu me si tersurat i bas Pustaka Si Badia, "Abraham tek man Dibata, janah erkiteken kinitekenna ialoken Dibata ia rembak ras diriNa." Erkiteken si e maka igelari ia teman Dibata. ²⁴ Dage ietehndu maka manusia rembak ras Dibata labo erkiteken kinitekenna saja, tapi erkiteken perbahanenna. ²⁵ Bage me pe kerna Rahap, diberu si dahinna ndayaken dirina e. Ia irembakken ras Dibata erkiteken perbahanenna, asum ialo-alona mata-mata e ku rumahna, bage pe isampatina kalak e lompat arah dalan si deban. ²⁶ E maka bali ras kula la rikut ras kesah mate kap, bage me pe kiniteken la rikut ras perbahanen mate kap.

¹ O senina-seninangku, ola kam nterem jadi si ngajari. Bagi ietehndu maka kita si ngajari lebihen pagi iadili asangken kalak si deban. ² Kerina kita megati erbahan salah. Kalak si la enggo erbahan salah i bas ngerana serta kap, dingen terkuasaisa kap dirina. ³ I bas babah kuda lit sitamaken sangam gelah patuh ia man banta janah gelah banci sitegu ku ja ateta. ⁴ Bage pe kerna kapal, aminna pe galang kapal e, janah iembusken angin si meter, banci iatur dalanna alu kemudi si kitik. Kapal e erdalan rikutken sura-sura jurumudi. ⁵ Bage me pe kerna dilah, aminna kitik gia dilah e, banci nge megah akapna sabap mbelin pengaruhna. Nehenlah, sada kerangen si mbelang banci iciluk alu api si kitik. ⁶ Dilah e bali ras api. Dilah e kap ulu kejahaten. Dilah e ringan i bas kulanta janah icurnakenna kerina dirinta. Icilukna perdalanen kegeluhenta alu api si rehna i neraka nari. ⁷ Manusia ngasup pelemuk kerina rubia-rubia, janah enggo pe ipelemukna rubia-rubia si meliar, perik-perik, rubia-rubia si njoler, bage pe nurung. ⁸ Tapi ise pe la ngasup pelemuk dilah. Dilah e jahat dingen la terkuasai, dem racun si maba kematen. ⁹ Dilah e sipake guna ngataken bujur man Tuhan ras Bapanta, tapi sipake ka pe guna numpahi temanta manusia, si enggo ijadiken Dibata rikutken tempasNa. ¹⁰ Pengataken bujur ras sumpah ndarat i bas sada babah nari. O senina-seninangku, si enda la kal banci! ¹¹ Labo lit ndarat lau si entebu ras lau si pagit i bas sada sumbul nari. ¹² O seninangku, labo banci batang galiman erbuahken buah kembiri; labo banci batang anggur erbuahken galiman; bage pe labo banci sumbul lau masin pedarat lau malem. ¹³ Lit kin sekalak i tengah-tengahndu pentar dingen erpengangkan? Arus icidahkenna e arah kegeluhenna si mehuli, alu perbahanen mehuli si idalankenna alu meteruk ukur dingen kepentaren. ¹⁴ Tapi i bas ukurndu kam percian, perngilas, dingen dirindu saja ngenca iranakenndu. Ola megah iakapndu kerna si e, janah ola erbual nandangi si tuhu. ¹⁵ Si enda labo kepentaren si rehna i Surga nari, tapi biakna biak doni, biak binatang, biak setan. ¹⁶ I ja lit cian ate, ras ngukuri kepentingen diri sendiri saja, i je lit erbage-bage perubaten ras perjengilen. ¹⁷ Tapi kepentaren si rehna i datas nari si pemena e me bersih pusuh peraten, nggit erdame, lemah lembut, la megogo. Dem perkuah ate i bas ia dingen erbuahken perbahanen si mehuli. La rayo-ayo, ras tangkas ukur tangkas kata. ¹⁸ Tuhu payo maka si mehuli e me buah si iperani i bas benih perdamen si isuan kalak si erngena ate nandangi perdamen.

¹ I ja nari kin rehna perjengilen ras perubaten si lit i tengah-tengahndu? Si e rehna i bas kerincuhenndu nandangi kesenangen, si la erngadi-ngadi erperang i bas dirindu. ² Mengga atendu, tapi la idatndu, e maka munuh kam. Lit sura-surandu, tapi la seh, e maka erjengil ras rubat kam. La idatndu si isura-surakenndu perbahan la ipindondu man Dibata. ³ Janah adi ipindondu la idatndu, sabap erkiteken tujunndu la mehuli; kai si ipindondu guna pesenangken dirindu saja ngenca. ⁴ O kalak si erlua-lua i bas kiniteken! La kin ietehndu maka adi erteman kam ras doni enda, kam jadi imbang Dibata? Ise ersura-sura jadi teman doni enda, ibahanna kap dirina jadi musuh Dibata. ⁵ Ola iakapndu sia-sia si tersurat i bas Pustaka, "Kesah Si Badia si itamaken Dibata i bas kita ersura-sura gelah kita setia man baNa." ⁶ Amin bage gia belinen nge lias ate si iberekenNa asangken cemburuNa. Bagi lit tersurat i bas Pustaka Si Badia, "Itulak Dibata nge kalak si meganjang ukurna, tapi man kalak si meteruk ukurna iberekenNa lias ateNa." ⁷ E maka endeskenlah dirindu man Dibata. Lawanlah Iblis; kiam me Iblis e i bas kam nari. ⁸ Rembakkenlah dirindu ku Dibata, e maka Ia pe ngerembakken diriNa man bandu. Bersihkenlah tanndu o kam si erdosa! Bersihkenlah ukurndu o kalak si ertupang ukur! ⁹ Erceda atelah, tangis dingen ngandunglah; jadikenlah tawandu e jadi tangis; jadikenlah keriahenndu e jadi ndele ate! ¹⁰ Peteruklah bandu i lebe-lebe Tuhan, e maka ipeganjangNa kam. ¹¹ O senina-seninangku, ola kam sipandang-pandangen. Ise mandang seninana, ntah nalahisa, mandang dingen nalahken Undang-undang kap ia. Adi isalahkenndu Undang-undang, ertina lanai ikutkenndu Undang-undang, tapi iadilindu. ¹² Dibata ngenca si mereken Undang-undang dingen si ngadili manusia. Ia ngenca ngasup nelamatken ntah pe ngkernepken. Ise kin iakapndu kam maka iadilindu temanndu manusia? ¹³ Genduari begikenlah katangku man bandu, o kam si ngataken, "Sendah ntah pagi berkat kami ku kuta si deban; i je kami ringan sada tahun dekahna, erbinaga ndatken untung si mbelin." ¹⁴ Si tuhuna kai jadi i bas geluhndu pagi pe la ietehndu! Kam bali ras remang si kentisik ngenca lit, jenari bene. ¹⁵ Arusna min ikatakenndu, "Adi ibere Tuhan, nggeluh denga kami janah ilakoken kami me si ah ntah si enda." ¹⁶ Tapi genduari meganjang ukurndu dingen meganjang kam ngerana. Kerina pengeranandu si meganjang e salah. ¹⁷ E maka erdosa me kalak si la ndalanken si mehuli si meteh kai patut idalankenna.

¹ Genduari, begikenlah katangku, o kalak bayak! Tangis ras ngandunglah kam erkiteken kiniseran si nandangi reh ngkenai kam! ² Kebayakenndu enggo macik, janah uisndu enggo ipangani ngetnget. ³ Emas ras pirakndu enggo tembesin, janah tembesina e me pagi ersaksi ngelawan kam. Itutungna me dagingndu bagi api. I bas wari-wari si arah pudi enda enggo ipepulungndu erta-erta. ⁴ La igalarindu upah kalak si rani i jumandu. Begikenlah penderkuhna! Penderkuh kalak si rani i jumandu enggo ibegi Dibata, Tuhan si Mada Kuasa. ⁵ Mewah dingen senang kal pergeluhndu i doni enda. Ipeburndu bandu guna wari penggelehen. ⁶ Kalak si la ersalah iukumndu dingen ibunuhndu, janah la kam ilawanna. ⁷ Dage o senina-seninangku, saberlah kam ngayak reh Tuhan. Nehenlah sekalak perjuma kuga ia saber nimai seh jumana mereken ulih si erguna. Saber ia nimai udan si reh nandangi merdang ras udan si reh kenca rumpah page. ⁸ Kam pe arus saber. Tetap min kam erpengarapen, sabap wari kerehen Tuhan seh me. ⁹ O senina-seninangku, ola kam jungut-jungut dingen sisalah-salahen, gelah ola kam iukum Dibata. Hakim e reh me; bengket me Ia. ¹⁰ O seninangku, ingetlah nabi si ngerana nai i bas gelar Tuhan. Usihlah saber atena ras kinigenggengenna i bas ngenanami kiniseran. ¹¹ Sikataken malem atena erkiteken megenggeng ia. Enggo ibegindu kerna saber ate Jop, bage pe ietehndu maka dungna isampati Tuhan ia. Sabap Tuhan e perkuah dingen dem keleng ate. ¹² I babo si e kerina o senina-seninangku, ola kam ersumpah tupung erpadan. Ola kam ersumpah alu gelar langit, ntah doni, ntah kai pe si debanna. Katakenlah "Ue" adi ue kin, janah "Lang" adi lang kin atendu, gelah ola kam kena ukumen. ¹³ Adi lit sekalak i bas kam ngenanami kiniseran, ertotolah ia man Dibata. Adi lit si ermeriah ukur, rendelah ia muji Dibata. ¹⁴ Adi lit si sakit, idilonalah pertua-pertua i bas perpulungen, gelah itotoken pertua-pertua e ia dingen iminakina i bas gelar Tuhan. ¹⁵ Pertoton si bage, si ibahan alu tek man Tuhan tentu pepalem kalak si sakit e. Malem me ia ibahan Tuhan i bas penakitna e nari, janah ialemi Tuhan me dosana si enggo ibahanna. ¹⁶ E maka akukenlah dosandu sekalak-sekalak i lebe-lebe temanndu, janah ertotolah kam pekepar kerna teman, gelah malem kam. Pertoton kalak si bujur ergegeh kal. ¹⁷ Nabi Elia pe manusia nge bali ras kita. Alu tutus ate ertoto ia gelah ola nusur udan, jenari lego telu setengah tahun dekahna. ¹⁸ Kenca ertoto ka ia mulihken, reh udan i langit nari, jenari taneh mereken asilna. ¹⁹ O senina-seninangku! Adi lit sekalak i tengah-tengahndu nari papak i bas pengajaren si tuhu-tuhu nari, jenari lit ka sekalak si negu ia mulihken, ²⁰ ingetlah kata enda: Ise si negu kalak si erdosa gelah itadingkenna si papak e, iselamatkenna kap tendi si erdosa e i bas si mate nari, janah erkiteken ia, melala dosa ialemi Dibata.