HEBER

HEBER

¹ Nai enggo megati Dibata ngerana man nini-nininta arah nabi-nabi alu erbage-bage cara. ² Tapi i bas paksa-paksa si arah pudi enda ngerana Ia man banta arah AnakNa. Arah AnakNa e me Dibata njadiken kerina si nasa lit; AnakNa e itetapkenNa jadi si mada kerina si nasa lit. ³ Arah Ia ersinalsal terang kemulian Dibata, janah Ia tuhu-tuhu gambar Dibata. Ia me si natang kerina si nasa lit alu kataNa si erkuasa. Kenca ibersihkenNa manusia i bas dosa-dosa nari, kundul Ia i Surga arah kemuhen Dibata si Mada Kuasa si meganjangna. ⁴ Anak e enggo jadi ndauh ganjangen asangken malekat-malekat, bagi gelarNa pe enggo ibereken Dibata ganjangen asangken gelar malekat-malekat. ⁵ Sabap man malekat-malekat labo pernah ikataken Dibata, "Kam me anakKu; sendah Aku jadi Bapandu." Man malekat si apai pe labo pernah ikataken Dibata, "Aku me jadi BapaNa, janah Ia me jadi AnakKu." ⁶ Tapi asum isuruh Dibata ateNa anakNa sintua ku doni enda, ikatakenNa, "Kerina malekat Dibata arus nembah man Anak e." ⁷ Kerna malekat-malekat ikataken Dibata, "Ibahan Dibata malekat-malekatNa angin, janah suruh-suruhenNa dilah api." ⁸ Tapi kerna Anak e ikataken Dibata, "Kursi pemerentahenNdu o Dibata, rasa lalap me! PemerentahenNdu e me pemerentahen si adil. ⁹ Ngena atendu si bujur, janah nembeh atendu nandangi si jahat; erkiteken si e me maka Dibata, e me Dibatandu, enggo ngangkat Kam, jenari ipehagaNa Kam lebih asa temanNdu, si erbahanca meriah ukurNdu." ¹⁰ IkatakenNa pe tole, "Kam o Tuhan, mula-mulana enggo njadiken doni enda, janah alu tanNdu jine enggo ijadikenNdu langit. ¹¹ Masap me pagi si enda kerina, tapi Kam tetap nge rasa lalap; reh mawesna me pagi kerina bagi uis. ¹² IlipatNdu me pagi kerina si nasa lit bagi uis, jenari isambari pagi alu si deban. Tapi Kam tetap nge rasa lalap, umurNdu la erkeri-kerin." ¹³ Man malekat-malekat si apai pe labo pernah ikataken Dibata, "Kundullah i jenda arah kemuhenKu, seh kutamaken imbang-imbangNdu jadi dedeh-dedehen naheNdu." ¹⁴ Adi bage kai dage malekat-malekat e? Malekat-malekat e, e me kesah penampat persuruhen Dibata guna nampati kalak si ngaloken keselamaten pagi.

¹ Erkiteken si e arus nteguh sicikep pengajaren si enggo sibegi, gelah ola kita mombak. ² Sepuluh Pedah Dibata si ipeseh malekat-malekat man Musa enggo tangkas maka tuhu, janah kalak si la ndalankenca ntah si la ngikutkenca iukum bagi patutna. ³ Adi bage banci kin kita pulah adi la siperdiateken berita keselamaten si bage belinna? Tuhan si tangtangna meritaken keselamaten e, jenari kalak si megisa enggo ncidahken man banta maka si e tuhu. ⁴ Bage pe arah erbahan tanda-tanda kuasa, kejadin-kejadin ras erbage-bage tanda sengget, itambahi Dibata maka tuhu kesaksin kalak e. Ielaken Dibata pe erbage-bage pemere Kesah Si Badia rikutken sura-suraNa. ⁵ Dibata labo njadiken malekat-malekat gelah erkuasa nandangi doni si nandangi reh e me doni si icakapken kita e. ⁶ Tapi bagi lit tersurat i bas Pustaka Si Badia, "O Dibata, kai kin manusia e maka ingetNdu ia; kai kin anak manusia e, maka iperdiatekenNdu ia? ⁷ I bas paksa si kentisik enggo ibahanNdu ia teruhen asangken malekat-malekat; ipehagaNdu ia alu kiniulin dingen pujin, ⁸ janah ibahanNdu ia erkuasa nandangi kerina si nasa lit." Ikataken pe maka ibahan Dibata manusia "erkuasa nandangi kerina si nasa lit"; adi bage labo lit kai pe si la i teruh kuasana. Genduari si idah manusia labo erkuasa i bas kerinana. ⁹ Tapi teridah man banta maka Jesus si erkuasa! I bas paksa si kentisik, ibahan Dibata Ia teruhen asangken malekat-malekat, gelah arah lias ate Dibata inanamiNa kiniseran kematen guna kerina manusia. Siidah genduari Ia ipehaga alu kiniulin dingen pujin erkiteken kematen si enggo inanamiNa. ¹⁰ Patut maka Dibata si njadiken dingen pekena-kena kerina si nasa lit, njadiken Jesus serta arah kiniseran. Gelah nterem kalak ibabaNa ngenanami kemulianNa ras Ia. Sabap Jesus ngenca mabai manusia ku keselamaten. ¹¹ Ibersihken Jesus manusia i bas dosa-dosa nari, janah Ia ras si ibersihkenNa e kerina sada Bapa. Erkiteken si e maka Jesus la mela ngakui manusia jadi seninaNa. ¹² Bagi ikatakenNa, "O Dibata, ngerana aku kerna Kam man agi-agingku kupujiken Kam i tengah-tengah perpulungen." ¹³ Tole pe ikatakenNa, "Ernalem Aku man Dibata." Bage pe ikatakenNa, "I jenda Aku ras anak-anak si enggo iendesken Dibata man bangKu." ¹⁴ Erkiteken anak-anak e, bagi si igelariNa, e me manusia si erdaging dingen erdareh, Jesus pe enggo bali ras anak-anak e i bas kemanusianNa. Si enda ibahanNa gelah arah kematenNa banci italukenNa Iblis si engkuasai kematen. ¹⁵ Alu bage ibebaskenNa kalak si kidekah geluhna iperbudak erkiteken kebiarenna nandangi kematen. ¹⁶ Tangkas maka labo malekat si isampatiNa. Tapi bagi lit tersurat i bas Pustaka Si Badia, "IsampatiNa kita manusia, e me kesusuren Abraham." ¹⁷ E me sabapna maka i bas kai pe arus bali Ia ras senina-seninaNa, gelah Ia jadi Imam si Mbelin si erkeleng ate dingen si tutus i bas ndahiken dahin Dibata gelah dosa-dosa manusia ialemi Dibata. ¹⁸ Janah genduari ngasup Ia nampati kalak si i bas percuban, sabap Ia pe enggo ngenanami percuban ras kiniseran.

¹ O senina-seninangku si sada kiniteken, si enggo pe ipilih Dibata! Ukurilah mbages-mbages kerna Jesus, e me Rasul ras Imam si Mbelin, si iakuken kita i bas kinitekenta. ² Jesus erkemalangen man Dibata si milih Ia guna dahin e, bagi Musa nai patuh ndahiken dahinna i bas rumah Dibata. ³ Kalak si majekken rumah lebih ipehaga asangken rumah e. Bage me Jesus, tunggungen Ia ipehaga asangken Musa. ⁴ Tuhu kerina rumah lit si majekkenca, tapi Dibata nge njadiken kerina si nasa lit. ⁵ Musa patuh erdahin i bas rumah Dibata bagi persuruhen. Iturikenna kai si pagin ikataken Dibata. ⁶ Tapi Kristus patuh bagi Anak si ertanggung jabap i bas rumah Dibata. Kita enda me rumah Dibata adi tetap ukurta ergiah-giah dingen tek kita maka sidat nge kai si iarapken kita. ⁷ E maka bagi si ikataken Kesah Si Badia, "Adi ibegindu sora Dibata wari enda, ⁸ ola pemersik ukurndu bagi asum nai isimbakndu Dibata, bagi nai asum kam i gurun pasir, asum iujindu Dibata. ⁹ I je me nai iuji ninindu Dibata, icubaina Aku nina Dibata, aminna pe idahna kai si enggo Kubahan kidekah empat puluh tahun. ¹⁰ Erkiteken si e maka nembeh ateKu ia, alu ngataken, ’Megati ia nimbak, la ikutkenna pedah-pedahKu.’ ¹¹ Merawa Aku dingen ersumpah, ’Ndigan pe ia la bengket ku bas pengadi-ngadinKu!’ " ¹² O senina-seninangku, metengetlah gelah ola sekalak pe i bas kam jahat ukurna dingen la tek seh maka itundalkenna Dibata si Nggeluh e! ¹³ Tapi gelah ola sekalak pe i bas kam itipu dosa seh maka mersik ukurna, siajar-ajarenlah kam tep-tep wari, kidekah kata "wari enda" bagi si tersurat i bas Pustaka Si Badia lit denga man banta. ¹⁴ Sabap kita kerina enggo dat bagin i bas Kristus adi tetap kita tek bagi si tangtangna nai seh ku kedungenna. ¹⁵ I bas Pustaka Si Badia lit tersurat, "Adi ibegindu sora Dibata sendah, ola pemersik ukurndu bagi nini-ninindu nai asum ia berontak ngelawan Dibata." ¹⁶ Ise kin megi sora Dibata jenari isimbakna Dibata? E me kerina si ibabai Musa ndarat i Mesir nari. ¹⁷ Ise kin si irawai Dibata kidekah si empat puluh tahun e? E me kalak si erbahan dosa, si mate i gurun pasir. ¹⁸ Kerna ise kin si ikataken Dibata asum Ia ersumpah, "Ndigan pe la ia bengket ku bas pengadi-ngadinKu?" Tentu kerna kalak si nimbak Dibata! ¹⁹ Dage enggo sieteh maka labo ia banci bengket sabap la ia tek.

¹ Genduari lit padan Dibata man banta maka kita banci bengket ku bas pengadi-ngadinNa. Dage metengetlah gelah ola lit sekalak pe i bas kam gagal bengket ku bas pengadi-ngadinNa e. ² Sabap enggo sibegi Berita Si Meriah e, bali ras kalak ndai. Ibegina berita e tapi la erguna man bana sabap la ialokenna e alu kiniteken. ³ Tapi kita si tek, bengket ku bas pengadi-ngadin e. Bagi si ikataken Dibata, "Merawa Aku dingen ersumpah, ’Ndigan pe ia la bengket ku bas pengadi-ngadinKu!’ " Si enda ikataken Dibata aminna pe enggo dung dahinNa kenca ijadikenNa doni enda. ⁴ Sabap kerna wari si pepituken lit tersurat i bas Pustaka Si Badia, "I bas wari si pepituken ngadi Dibata erdahin." ⁵ Tapi pe lit tersurat, "Asa ndigan pe ia la bengket ku bas pengadi-ngadinKu." ⁶ Kalak si tangtangna megi Berita Si Meriah la bengket ku bas pengadi-ngadin Dibata erkiteken la ia tek. Adi bage tentu lit kalak si deban si banci bengket ku bas pengadi-ngadin Dibata e. ⁷ Si enda tangkas sabap enggo itetapken Dibata sada wari si deban, si igelari "wari enda". Ndekah kenca si e ngerana Dibata kerna si e arah Daud bagi enggo tersinget arah lebe, "Adi ibegindu sora Dibata wari enda, ola pemersik ukurndu." ⁸ Adi enggo min ndai ibabai Josua bangsa e ku bas pengadi-ngadin Dibata, lanai nari bo min ndai Dibata ngerana kerna sada wari si deban. ⁹ Tapi genduari lit denga nge wari pengadi-ngadin guna anak-anak Dibata, bagi Dibata ngadi i bas wari si pepituken e. ¹⁰ Sabap kalak si bengket ku bas pengadi-ngadin Dibata, ngadi me ia i bas dahinna nari, bagi Dibata ngadi i bas dahinNa nari. ¹¹ Dage sipala-palailah gelah kita bengket ku bas pengadi-ngadin Dibata. Ola lit sekalak pe i bas kita la patuh bagi kalak nai, seh maka la ia bengket ku bas. ¹² Kata Dibata e nggeluh dingen erdahin. Kata Dibata e telapen asangken pedang si dua babahna. Mbages kal bekas penebakna seh maka isirangkenna tendi ras kesah, buku-buku ras utuk tulan. Ihakimina perukuren ras sura-sura manusia. ¹³ La lit kai pe si terligen man Dibata. Kerina si nasa lit tangkas dingen talang i lebe-lebeNa. Man baNa me sipertanggung jabapken kerina perbahanen-perbahanenta. ¹⁴ E maka tetaplah si gelem kiniteken si iakuken kita. Sabap lit kap Imam si Mbelinta si mulia si enggo seh ku lebe-lebe Dibata jine, e me Jesus Anak Dibata. ¹⁵ Imam si Mbelinta e labo kalak si la nggejapken kekoten-kekotenta. Tapi Imam si Mbelinta e pernah ngenanami percuban si kuga pa pe, bali ras kita; saja ngenca Ia la erdosa! ¹⁶ E maka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita.

¹ Kerina Imam si Mbelin ipilih i tengah-tengah manusia nari, jenari itangkuhken lako ndahiken dahin Dibata guna manusia, gelah ipersembahkenna pemere-pemere bage pe persembahen kerna dosa manusia. ² Erkiteken ia pe melala kekotenna, e maka kepate ia nandangi kalak si la erpemeteh dingen si papak. ³ Janah erkiteken ia kote, arus ipersembahkenna persembahen, labo saja kerna dosa-dosa kalak tapi pe kerna dosa-dosana. ⁴ Labo lit kalak milih dirina ndatken kehamaten jadi Imam si Mbelin. Dibata nge si ndilo kalak jadi Imam si Mbelin, bagi Arun nai. ⁵ Bage me pe Kristus, labo Ia milih diriNa guna ipehaga jadi Imam si Mbelin. Tapi Dibata ngataken man baNa, "Kam me AnakKu; i bas wari enda Aku enggo jadi BapaNdu." ⁶ I bas bagin si deban i bas Pustaka Si Badia ikataken Dibata ka pe, "Jadi Imam me Kam rasa lalap, rikutken golongen Imam Malkisedek." ⁷ Paksa Jesus nggeluh i doni enda, ertoto Ia mindo alu serko ras iluh mambur man Dibata si ngasup nelamatken Ia i bas kematen nari. Erkiteken ipeteruk Jesus diriNa dingen erpengendes man Dibata, ibegiken Dibata pemindonNa. ⁸ Tapi aminna pe Jesus Anak Dibata, erlajar patuh Ia arah kiniseranNa. ⁹ Erkiteken si e me maka kenca Ia serta ibahan Dibata, Ia jadi ulu keselamaten si rasa lalap, nandangi kerina kalak si erkemalangen man baNa. ¹⁰ Janah itetapken Dibata Ia jadi Imam si Mbelin "rikutken golongen Imam Malkisedek." ¹¹ Melala denga si arus ikataken kami kerna si enda, tapi mesera iakap kami nurikenca sabap kai pe melet kam ngangkasa. ¹² Si tuhuna enggo cukup kesempaten man bandu gelah banci kam jadi guru, tapi seh asa genduari perlu denga kam iajari i bas bena-benana nari kerna ajaren-ajaren Dibata. Langa bo kam man nakan keras, tapi minem susu denga nge kam. ¹³ Kalak si arus denga minem susu, anak-anak denga kap ia, la ietehna kai si benar ras kai si salah. ¹⁴ Tapi nakan keras e me guna kalak si mbelin, si arah pengalamenna ngasup ia meteh apai si bujur apai si jahat.

¹ Erkiteken si e lanai pada siajarken ajaren-ajaren Kristen si pemena, tapi majulah kita ku pelajaren-pelajaren si terbagesen kerna kegeluhen Kristen. Olanai siulihi pelajaren si pemena, e me kerna nadingken perbahanen-perbahanen si la erguna janah arus tek man Dibata; ² ntah kerna lakon-lakon pembersihen ras namaken tan ku babo kalak, ntah kerna kekeken i bas si mate nari ras ukumen si rasa lalap. ³ E maka marilah kita maju! Janah enda me sidalanken adi bage peraten Dibata! ⁴ Sabap kalak si enggo nundalken Dibata kuga banci ia ibaba mulihken seh jera? Enggo pernah ia nggeluh i bas terang Dibata. Enggo iakapina uga tabehna pemere Dibata, dingen ialokenna baginna i bas pemere Kesah Si Badia nari. ⁵ Enggo inanamina maka Kata Dibata mehuli, janah enggo igejapna kerna kuasa jaman si reh pagin. ⁶ Tapi kenca si e murtad ia! Ja nge ia tertegu mulihken seh jera sabap ipakukenna denga ka Anak Dibata erbahanca megombang kalak man baNa. ⁷ Taneh si ngaloken udan nge si ipasu-pasu Dibata, e me taneh si peturah sinuan-sinuan si erguna man kalak si nuanisa. ⁸ Tapi adi taneh e peturah rih ras dukut-dukut, labo ia erguna; banci jadi isumpahi Dibata ia janah kedungenna iciluk alu api. ⁹ Tapi o senina-senina si ikelengi kami, amin bage gia ikataken kami, kerna kam tek nge kami maka lit i bas kam si terulin si lit pertalinna ras keselamatenndu. ¹⁰ Dibata bujur nge. Labo pagi ilupakenNa dahin si enggo idahikenndu e. IingetNa nge keleng atendu nandangi Ia, si icidahkenndu arah nampati teman-temanndu kalak Kristen, subuk si enggo idalankenndu bage pe si paksana idalankenndu. ¹¹ Ngarap kami gelah kerina kam tetap ergiah-giah ukurndu, gelah kai si iarap-arapkenndu e ialokenndu pagi dungna. ¹² Ate kami ola min kam mekisat. Tapi nggeluhlah kam ngusih kalak si enggo tek dingen saber, gelah ialokenndu kai si enggo ipadanken Dibata. ¹³ Asum Dibata erpadan man Abraham, ersumpah Ia maka kai si enggo ipadankenkenNa e isehkenNa me. Erkiteken labo lit ise pe belinen asangken Ia, e maka gelarNa nge ipakeNa asum Ia ersumpah. ¹⁴ Nina, "Erpadan Aku maka Kupasu-pasu kam dingen nterem Kubahan kesusurenndu." ¹⁵ Erkiteken saber Abraham nimai padan e, e maka ialokenna kai si ipadanken Dibata e. ¹⁶ Adi manusia ersumpah, ipakena gelar kalak si belinen asangken ia. Sumpah e ndungi perubaten-perubaten si lit i tengah-tengah manusia. ¹⁷ Dibata ersura-sura kal petangkassa man kalak si patut ngaloken padaanNa, maka padanNa e tetap nge. Erkiteken si e maka ersumpah Ia kerna padanNa e. ¹⁸ Dage lit dua erbage si la banci mobah, e me padan ras sumpahNa, janah kerna si dua e tentu Dibata labo erbual. Erkiteken si e kita si enggo ndat perlindungen i bas Dibata, iajuk kal gelah tetap ncikep pengarapen si lit i lebe-lebenta. ¹⁹ Pengarapen enda bali ras jangkar i bas geluhta. Pengarapen e aman dingen tetap, janah enggo mentasi kire-kire rumah Dibata si i Surga, janah sangkut nteguh i bas ingan ersembah si arah bas. ²⁰ Jesus enggo leben asangken kita bengket ku je man gunanta. Ia enggo jadi Imam si Mbelin seh rasa lalap rikutken golongen Imam Malkisedek.

¹ Malkisedek Raja Salem, imam Dibata si Meganjangna. Asum Abraham mulih i bas erperang nari, kenca ibunuhna piga-piga kalak raja, ijumpai Malkisedek ia, jenari ipasu-pasuna. ² Sepersepuluh i bas erta si lit ibaba Abraham, iberekenna man Malkisedek. (Malkisedek antusenna si pemena e me, "Raja si Bujur" janah erkiteken ia Raja Salem, gelarna e pe antusenna "Raja Dame".) ³ La lit turi-turin kerna nande-bapa Malkisedek ntah pe kerna nini-ninina. La lit ituriken kerna pertubuhna ntah kerna kematenna. Ia bali ras Anak Dibata; ia jadi imam seh rasa lalap. ⁴ Dage idahndu maka mbelin tuhu ia! Abraham, bapa bangsanta, mereken sepersepuluh i bas kerinana si idatna i bas peperangen man Malkisedek. ⁵ Kesusuren kalak Lewi si jadi imam, rikutken Undang-undang arus mpepulung sepersepuluh i bas erta-erta kalak Israel. Si sepersepuluh e ipepulung i bas kalak e nari aminna pe ia kesusuren Abraham. ⁶ Malkisedek labo kesusuren Lewi, tapi ialokenna si sepersepuluh e i bas Abraham nari, kenca bage ipasu-pasuna Abraham, e me kalak si enggo ngaloken padan Dibata. ⁷ Dage tangkas maka belinen nge si masu-masu asa si ipasu-pasu. ⁸ Imam-imam si mpepulung si sepersepuluh e, e me manusia biasa si mate i bas sada paksa, tapi lit tersurat i bas Pustaka Si Badia maka Malkisedek nggeluh rasa lalap. ⁹ Banci ikataken maka asum Abraham nggalari si sepersepuluh e, ikut pe Lewi nggalar (e me Lewi si kesusurenna mpepulung si sepersepuluh e). ¹⁰ Sabap asum Abraham ijumpai Malkisedek, Lewi langa tubuh. Banci ikataken Lewi enggo lit i bas dareh Abraham, e me nini-nini Lewi. ¹¹ Erpalasken kiniimamen Lewi me maka Undang-undang ibereken man kalak Israel. Bicara serta nai imam-imam kalak Lewi e, labo min ndai perlu lit imam si deban. Tapi erkiteken keimamen Lewi la serta, perlu lit imam i bas golongen si deban nari, e me rikutken golongen Imam Malkisedek si ipadanken Dibata si la i bas golongen Imam Arun, kesusuren Lewi nari. ¹² Adi sambar kiniimamen, Undang-undang pe la banci lang sambar. ¹³ Tuhanta si ikataken i jenda, i bas suku si deban nari kap. La pernah sekalak pe i bas suku e nari erdahin jadi imam. ¹⁴ Kerina kalak meteh maka Tuhan e tubuh i tengah-tengah suku Juda nari. Janah Musa la pernah ngingetken suku bangsa enda asum ia ngerana kerna imam-imam. ¹⁵ Kerna si e enggo reh tangkasna, enggo reh sekalak imam si deban, si bali ras Imam Malkisedek. ¹⁶ Ia jadi imam labo rikutken Undang-undang ntah pe aturen-aturen manusia. Ia jadi imam arah kuasa kegeluhen si la ermasap-masap. ¹⁷ Sabap i bas Pustaka Si Badia lit tersurat, "Kam jadi imam rasa lalap rikutken golongen Imam Malkisedek." ¹⁸ Alu bage, peraturen si ndekah lanai ipake, sabap la ergegeh dingen la erguna. ¹⁹ Sabap Undang-undang Musa la ngasup njadiken kai pe serta. E maka genduari i bas kita lit pengarapen si terulin, dalanta ngerembaki Dibata. ²⁰ Tambah si e lit ka sumpah Dibata. Asum kalak Lewi jadi imam la lit sumpah Dibata e. ²¹ Tapi Jesus jadi imam arah sumpah; e me asum nina Dibata man baNa, "Tuhan enggo ersumpah, janah asa ndigan pe la mobah ukurNa, ’Kam jadi imam rasa lalap.’ " ²² Kelebihen sumpah enda erbahan Jesus enggo jadi jaminen kerna iketen padan si terulin. ²³ Kelebihen si deban e me imam-imam Lewi e nterem, sabap lawes mate ia kerina, e maka la ia ngasup nerusken dahinna. ²⁴ Tapi Jesus nggeluh rasa lalap, janah dahinNa selaku imam la igantiken kalak si deban. ²⁵ E maka kalak si ndahi Dibata arah Ia, ngasup Ia nelamatkenca seh rasa lalap alu serta, sabap Ia nggeluh rasa lalap guna ertoto man Dibata kerna kalak e. ²⁶ Dage Jesus me Imam Simbelin si ncukupi kerina keperlunta. Ia badia; la lit salahNa ntah pe dosaNa. Ia enggo ipeserap Dibata i bas manusia si erdosa nari, dingen enggo ipeganjang Dibata ganjangen asa langit. ²⁷ Labo bali Ia ras Imam-imam si Mbelin si deban. Ia la perlu mpersembahken persembahen tutungen tep-tep wari, subuk kerna dosaNa bage pe kerna dosa jelma si nterem. Sada ngenca ipersembahkenNa, sekali seh rasa lalap, e me asum ipersembahkenNa diriNa. ²⁸ Undang-undang Musa netapken manusia si la serta jadi Imam si Mbelin; tapi padan Dibata si ibahanNa alu sumpah, si pudin reh asangken Undang-undang, netapken Anak e si enggo ibahan Dibata serta seh rasa lalap.

¹ Palasna percakapenta enda e me: Lit sekalak Imam si Mbelinta si bage, si kundul arah kemuhen kursi Raja Sibadia i Surga. ² Ia erdahin selaku Imam Simbelin i bas Ingan Sibadiana kal, e me i bas kemah si tuhu-tuhu, si ipanteki Tuhan, labo si ipanteki manusia. ³ Kerina Imam Simbelin itugasken gelah mpersembahken pemere ras persembahen rubia-rubia man Dibata. Bage me pe Imam si Mbelinta, arus lit si man persembahenkenNa. ⁴ Bicara i doni enda Ia ringan, labo Ia imam, sabap enggo lit imam-imam si mpersembahken pemere rikutken Undang-undang kalak Jahudi. ⁵ Si tuhuna dahin si idahiken imam-imam e sada usihen dingen awih-awih kerna kai si lit i Surga nge ngenca. Bage me pe kerna Musa nai. Asum ipajekken Musa atena Kemah e nina Dibata man bana, "Perdiateken maka kerinana ibahanndu bali ras gambar si enggo icidahken man bandu i datas deleng e." ⁶ Tapi genduari, Jesus ngaloken dahin imam si ndauh ganjangen asa dahin imam si deban. Sabap padan si ibahan Dibata ras manusia erkelang-kelangken Jesus, e me padan si ndauh ulin, erkiteken palasna e me padan kerna barang si terulin. ⁷ Bicara la lit lepakna i bas padan si pemena, labo min ndai perlu padan si peduaken. ⁸ Tapi Dibata ndatken salah i bas bangsaNa, bagi si ikatakenNa i bas Pustaka Si Badia, "Nina Tuhan, ’Reh me warina Kubahan sada iketen padan si mbaru man bangsa Israel, bage pe man suku Juda.’ ⁹ Padan e labo pagi bali ras iketen padan si enggo Kubahan man nini-ninina nai asum Kubabai ia ndarat i taneh Mesir nari. Nini-ninina e la patuh nandangi padan si Kubahan man bana, e me sabapna maka la ia Kuperdiateken nina Tuhan. ¹⁰ Genduari, enda me padan si Kubahan man kalak Israel i bas wari-wari si reh nina Tuhan: Kutamaken me Undang-undangKu ku bas ukurna, janah Kusuratken i bas pusuhna. Aku me jadi Dibatana janah ia me jadi bangsangKu. ¹¹ Lanai bo pagi sekalak pe perlu ngajari temanna sada bangsa ntah ngataken man temanna sada kuta, ’Tandai min Tuhan.’ Sabap kerina pagi ia nandai Aku, i bas si kitikna nari seh ku si mbelinna. ¹² Kualemi pagi kerina salahna, janah Kulupaken dosa-dosana." ¹³ Alu ngerana kerna padan si mbaru e, icap Dibata maka padan si pemena enggo male; janah kerina si enggo male dingen la erguna e minter me masap.

¹ I bas padan si pemena e, lit aturen-aturen cara ersembah bage pe cara erbahan ingan ersembah si ibahan manusia. ² Sada kemah ipajekken, janah bagin si arah lebe igelari Ingan si Badia. I je lit tangke lampu, bage pe meja ras roti si ipersembahken man Dibata. ³ Bagin si arah bas, e me i pudi kire-kire si peduaken, lit ingan si igelari Ingan Sibadiana kal. ⁴ I je lit batar-batar emas si ipake man ingan nutung kumenen, bage pe Peti Perpadanen si ilapisi alu emas. I bas Peti e lit kudin emas si isin manna, bage pe ciken Arun si pernah ertunas, ras dua batu tulis si i je isuratken padan e. ⁵ I babo Peti e lit gana-gana mahluk si erkabeng, si nggambarken maka Dibata ringan i je. Kabengna kimbang i babo ingan e, e me ingan dosa-dosa ialemi. Tapi genduari la paksana nuriken si enda sada-sadai. ⁶ Bage me kerina barang-barang e iatur inganna. Imam-imam tep-tep wari bengket ku bas Kemah bagin si arah lebe e guna ndahiken dahinna. ⁷ Tapi si bengket ku bas Kemah bagin si arah bas, Imam Simbelin saja, e pe sekali setahun ngenca. Ibabana ku bas dareh si ipersembahken man Dibata man guna dirina bage pe man guna dosa-dosa si enggo ibahan bangsana alu la sengaja. ⁸ Arah litna aturen-aturen enda, tangkas iajarken Kesah Si Badia maka kidekah pajek denga Kemah bagin si arah lebe e, langa talang dalan ku Ingan Sibadiana kal. ⁹ Endame gambaren paksa si genduari. Ertina, maka kerina pemere ras persembahen rubia-rubia si ipersembahken man Dibata labo ngasup erbahan serta pusuh peraten kalak si ersembah e. ¹⁰ Peraturen-peraturen e kerina terjeng pangan, inemen ras erbage-bage cara lakon-lakon pembersihen nge ngenca. Si enda kerina aturen-aturen si arah darat, si ipake seh paksa ipebarui Dibata kerina si nasa lit ngenca. ¹¹ Tapi Kristus enggo reh jadi Imam Simbelin kerna si mehuli si enggo lit i tengah-tengahta. Kemah inganNa erdahin terbelinen dingen tersertaan. Kemah inganNa erdahin e la manusia erbahanca; ertina Kemah e labo sada bagin i bas doni si itepa enda. ¹² Sekali ngenca seh rasa lalap Kristus bengket ku bas Ingan Sibadiana kal. Asum Ia bengket ku je, la ibabaNa dareh kambing bajarna ntah anak lembu guna ipersembahken, tapi darehNa jine ipersembahkenNa lako ndatken keselamaten si rasa lalap man banta. ¹³ Dareh kambing bajarna ras dareh lembu jenggina bage pe abu lembu persembahen tutungen, ipirpirken ku kalak si la bersih rikutken aturen agama. Janah alu bage dareh ras abu ndai enggo mbersihken ia arah darat. ¹⁴ Adi dareh ras abu pe banci mbersihken, lebihen kap dareh Kristus! Arah kesah si la ermasap-masap ipersembahken Kristus diriNa jadi persembahen si serta man Dibata. DarehNa e mbersihken pusuh peratenta i bas perbahanen si sia-sia nari, gelah banci sisembah Dibata si nggeluh. ¹⁵ E me sabapna maka erkelang-kelangken Kristus, Dibata erbahan padan si mbaru, gelah kalak si enggo ipilih Dibata banci ngaloken pasu-pasu si la ermasap-masap si enggo ipadanken Dibata. Si enda banci seh sabap enggo lit sada kematen si nebusi manusia i bas salahna nari, asum ia i teruh kuasa padan si arah lebe e. ¹⁶ I ja lit surat wasiat i je arus ibuktiken maka si erbahan surat wasiat e enggo mate. ¹⁷ Sabap surat wasiat labo lit ertina adi nggeluh denga si erbahanca. Surat wasiat e esah adi enggo mate si erbahanca. ¹⁸ E me sabapna maka padan si arah lebe e pe merluken dareh guna pengesahenna. ¹⁹ Perlebe, ipebetehken Musa man bangsa e kerina pedah-pedah bagi si ikataken i bas Undang-undang. Jenari ibuatna dareh anak lembu ras lau, ipirpirkenna ku Kitap Undang-undang bage pe ku kerina bangsa e, alu hisop ras mbulu kambing si megara. ²⁰ Nina Musa, "Enda me dareh si ngesahken padan si isuruh Dibata gelah idalankenndu." ²¹ Bage pe ipirpirken Musa dareh ndai ku babo Kemah ras ku kerina barang-barang si ipake i bas kebaktin. ²² Situhuna rikutken Undang-undang, menam kai pe ibersihken alu dareh. Bage pe dosa ialemi alu ngamburken dareh ngenca. ²³ Dage kerina barang-barang si jadi gambar barang-barang Surga arus ibersihken alu cara si enda ndai. Tapi guna barang-barang Surga e, situhuna merluken persembahen si ndauh terulin. ²⁴ Sabap Kristus labo bengket ku bas Ingan Sibadia si ibahan manusia, si jadi gambar Ingan Sibadia si tuhu-tuhu. Tapi Ia bengket ku Surga, i ja genduari ia ngadap ku Dibata man gunanta. ²⁵ Imam si mbelin kalak Jahudi tep-tep tahun bengket ku Ingan si Badia alu maba dareh asuh-asuhen. Tapi Kristus labo rusur ku bas mpersembahken diriNa. ²⁶ Sabap adi bage enggo minndai megati Ia ngenanami kiniseran kidekah tembe doni enda. Tapi situhuna sekali ngenca Ia reh seh rasa lalap, asum nandangi seh ku kedungenna jaman enda, guna nasapken dosa alu mpersembahken diriNa. ²⁷ Kerina manusia la banci la mate sekali, janah kenca bage iadili Dibata. ²⁸ Bage pe sekali ngenca Kristus mpersembahken diriNa guna ngangkut dosa jelma si nterem. Kenca bage reh me Ia sekali nari, e maka dosa pe masap, janah kalak si nimai Ia selamat.

¹ Undang-undang kalak Jahudi labo Undang-undang si serta si la lit man pandangen. Tapi Undang-undang e awih-awih kerna si mehuli si reh pagin. Tep-tep tahun persembahen si gelgel saja ngenca ipersembahken. Banci kin serta kalak si ndahi Dibata ibahan Undang-undang arah nehken persembahen? ² Adi tuhu-tuhu kin enggo bersih kalak si nembah Dibata e i bas dosa-dosana nari, lanai akapna salah bana, janah lanai ia perlu erbahan persembahen. ³ Tapi persembahen si ibahanna tep-tep tahun e ngingetken kalak kerna dosa-dosana. ⁴ Sabap dareh lembu jenggi ras dareh kambing bajarna ndigan pe la ngasup nasapken dosa. ⁵ Erkiteken si e me maka asum Kristus nandangi reh ku doni enda nina man Dibata bagi si tersurat i bas Pustaka Si Badia, "La atendu bage persembahen ras pemere, tapi enggo isikapkenNdu sada kula man bangKu. ⁶ La ateNdu ngena asuh-asuhen si itutung i babo batar-batar persembahen, ntah persembahen-persembahen guna nasapken dosa. ⁷ E maka ningku, ’I jenda Aku, o Dibata, guna ndalanken si ngena ateNdu, bagi isuratken kerna Aku i bas Pustaka.’ " ⁸ Perlebe ikatakenNa, "La ateNdu bage dingen la ateNdu ngena persembahen ras pemere ntah rubia-rubia si itutung i babo batar-batar persembahen ras persembahen guna nasapken dosa." IkatakenNa si enda aminna pe kerina persembahen e ipersembahken rikutken Undang-undang. ⁹ Jenari nina, "I jenda Aku, o Dibata, guna ndalanken si ngena ateNdu." Erkiteken si e lanai ipake Dibata persembahen si ndekah, janah isambariNa alu persembahen Kristus. ¹⁰ Arah peraten Dibata kita enggo bersih i bas dosa nari, erkiteken Jesus Kristus enggo mpersembahken kulaNa sekali saja ngenca. ¹¹ Kerina imam kalak Jahudi tedis ndahiken dahinna tep-tep wari. Bali lalap persembahen si ipersembahkenna. Tapi ndigan pe persembahen e la ngasup nasapken dosa. ¹² Tapi Kristus sekali ngenca erbahan persembahen guna dosa, e me persembahen si erguna seh rasa lalap; jenari kundul Ia arah kemuhen Dibata. ¹³ I je me Ia genduari nimai, seh itamaken Dibata imbang-imbangNa jadi dedeh-dedehen naheNa. ¹⁴ Dage alu persembahen si serta, ibahan Kristus jadi serta kalak si ibersihken i bas dosa-dosana nari. ¹⁵ Kesah Si Badia pe ersaksi man banta. Perlebe nina, ¹⁶ "Enda me si nandangi Kubahan ras ia kerina i bas wari-wari si reh nina Tuhan: Kutamaken me Undang-undangKu ku bas pusuhna, janah Kusuratken me ku bas ukurna." ¹⁷ Tole nina, "Kulupaken me dosa-dosana ras perbahanenna si jahat." ¹⁸ Dage adi enggo ialemi dosa-dosa ras perbahanen si jahat e, lanai lit gunana nehken persembahen pengalemi dosa. ¹⁹ Dage erkiteken kematen Jesus, o senina-senina, enggo bebas kita bengket ku bas Ingan Sibadiana kal. ²⁰ Enggo italangi Jesus man banta sada dalan si mbaru, sada dalan si nggeluh, arah kire-kire, e me kap kulaNa. ²¹ Lit Imam si Mbelinta; e me si jadi kepala i bas rumah Dibata. ²² Dage sirembakkenlah dirinta ku Dibata alu tutus ate dingen kiniteken si tetap. Alu pusuh peraten si bersih i bas penggejapen ersalah nari, bage pe alu kula si enggo ibersihken alu lau meciho, sideherilah Ia. ²³ Tetaplah si gelem pengarapen si enggo siakui, sabap tek kita maka isehken Dibata nge padanNa. ²⁴ Marilah kita sisampat-sampaten gelah keke ukurta guna nehken keleng ate ras ndalanken si mehuli. ²⁵ Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabap sieteh maka wari Tuhan, e me wari kerehenNa, reh me. ²⁶ Sabap adi tetap denga kita sengaja erbahan dosa, aminna pe enggo sieteh kai si ngena ate Dibata, lanai lit persembahen si deban si banci nasapken dosanta. ²⁷ Si lit denga e me si man kebiaren si nandangi jadi: ukumen ras api si merawa si engkernepken kalak si ngelawan Dibata! ²⁸ Si la patuh man Undang-undang Musa iukum seh mate, alu la lit ampunen, kenca tereteh salahna arah dua ntah telu kalak saksi. ²⁹ Apai denga ka kalak si la ngergaken Anak Dibata sitik pe! Kalak si mekarus nandangi padan Dibata si enggo mbersihken ia i bas dosa nari! Si megombang nandangi Kesah Dibata si melias man ia! Gejaplah maka ndauh beraten ukumenna! ³⁰ Sabap sitandai nge si ngataken, "Kuukum me pagi! Kubalas me pagi!" Tole pe ikatakenNa, "Iadili Tuhan me pagi bangsaNa." ³¹ Ngeri kal adi ndabuh ku bas tan Dibata si nggeluh. ³² Ingetlah kuga nai pergeluhndu. Paksa e nai, kenca kam iterangi sinalsal Dibata, melala reh kiniseran man bandu, tapi la kam talu i bas perbeben e. ³³ Megati nai kam igombangi dingen isakiti kalak i lebe-lebe jelma si nterem. Megati pe kam nggit ikut ras kalak si bage. ³⁴ Ikut pe kam erceda ate ras kalak si ipenjaraken. Janah keri erta-ertandu irampas kalak, igengkenndu e alu meriah ukur, sabap ietehndu maka lit denga si terulin man bandu, si tahan seh rasa lalap. ³⁵ Dage ola pulahi pengarapenndu, sabap ietehndu pengarapen e mbelin upahna. ³⁶ Perlu kal kam megenggeng guna ndalanken si ngena ate Dibata gelah ialokenndu kai si ipadankenNa. ³⁷ Sabap bagi lit tersurat i bas Pustaka Si Badia, "Lanai bo ndekah reh me si padan reh e, labo ipelawen-lawenna kerehenNa. ³⁸ Kalak si bujur ndat kegeluhen arah kiniteken. Tapi adi lit si murtad la ateKu ngena ia." ³⁹ Kita enda labo kalak si murtad dingen bene. Tapi kita kalak si erkiniteken seh tendinta selamat.

¹ Erkiniteken ertina tek nandangi kai si iarapken kita, tek kerna si la idah. ² Erkiteken kinitekenna kalak sinuria ipujiken Dibata. ³ Erkiteken tek man Dibata kap maka siangka kerina si nasa lit Dibata njadikenca arah kataNa; kerina si teridah ijadikenNa i bas si la teridah nari. ⁴ Erkiteken kiniteken Abil man Dibata maka ipersembahkenna man Dibata persembahen si ulin asangken persembahen Kain. Perbahan ia tek, dat pujin ia i bas Dibata nari maka ia kalak bujur, sabap ialoken Dibata persembahenna. Erkiteken tek maka ngerana denga ia genduari aminna pe ia enggo mate. ⁵ Erkiteken kiniteken Enoh man Dibata maka la ia mate. Tapi ia iangkat ku Dibata, janah ise pe la ngasup njumpai ia, sabap ia enggo iangkat Dibata. I bas Pustaka Si Badia lit tersurat maka ope denga Enoh iangkat enggo leben ibahanna si sentudu ras peraten Dibata. ⁶ Ise pe la ngasup ndalanken si sentudu ras peraten Dibata adi la kin erkiniteken. Sabap kerina si reh ndahi Dibata arus tek maka Dibata lit dingen iberekenNa upah man kalak si ndarami Ia. ⁷ Erkiteken tek Nuah man Dibata maka ibegina kata pertenget i bas Dibata nari, kerna si nandangi reh si la idahna. Ikutkenna kata Dibata, jenari ibahanna sada perahu si dungna nelamatken ia ras keluargana. Erkiteken si e doni isalahken, janah Nuah ikataken Dibata benar erkiteken kinitekenna. ⁸ Erkiteken tek Abraham man Dibata maka asum Dibata erdilo man bana, patuh ia, berkat ia ku negeri si ipadanken Dibata man bana. Itadingkenna negerina la ietehna ku ja ia lawes. ⁹ Erkiteken tek man Dibata maka ia nggit lajang i bas negeri si enggo ipadanken Dibata man bana. Ia ringan i bas kemah bali ras Isak ras Jakup si ngaloken padan si seri i bas Dibata nari. ¹⁰ Sabap Abraham nimai kuta si enggo irencanaken dingen ipanteki Dibata, e me kuta si nteguh palasna. ¹¹ Erkiteken tek Sara man Dibata maka banci mupus aminna pe ia enggo metua. Tek ia maka isehken Dibata kai si enggo ipadankenNa. ¹² Aminna pe paksa e nai Abraham tempa-tempa enggo mate, tapi i bas si sekalak enda nari reh kesusuren si nterem bagi bintang i langit dingen kersik i tepi lawit si la terbeligai. ¹³ Kerina kalak enda mate i bas kiniteken. Kai si ipadanken Dibata la ialokenna, tapi i dauh-dauh nari enggo idahna si e, e maka meriah iakapna. Terang-terang iakuina maka ia kalak perlajang dingen kesilang i doni enda. ¹⁴ Kalak si ngakui si e terang icidahkenna maka ia ndarami negeri si jadi negerina jine. ¹⁵ Lanai atena tedeh nandangi negerina si mbarenda si enggo itadingkenna. Adi tedeh kin atena banci denga nge min ndai ia mulihken ku je. ¹⁶ Tapi tedehen atena negeri si terulin, e me negeri si i Surga. E me sabapna maka la mela Dibata jadi Dibata kalak ndai, sabap enggo isikapkenNa sada kuta man kalak enda kerina. ¹⁷ Erkiteken tek Abraham man Dibata maka ipersembahkenna anakna Isak, asum ia iuji Dibata. Man Abraham me ibahan Dibata padan e, tapi amin bage gia nggit nge Abraham mpersembahken anakna si tonggal e. ¹⁸ Enggo ikataken Dibata man Abraham, "Arah Isak me iterusken kesusurenndu." ¹⁹ Tek Abraham maka Dibata erkuasa pekeke Isak i bas si mate nari; janah banci ikataken maka i bas si mate nari me ialoken Abraham si Isak. ²⁰ Erkiteken tek Isak man Dibata maka erpadan ia mereken pasu-pasu man Jakup ras Esau kerna kegeluhen kalak enda denggo. ²¹ Erkiteken tek Jakup man Dibata me maka ipasu-pasuna anak Jusup sada-sadai ope denga ia mate. Alu erciken-ciken isembahna Dibata. ²² Erkiteken tek Jusup man Dibata maka ngerana ia muatna mate kerna perberkat kalak Israel i taneh Mesir nari bage pe kerna kai si arus ibahan nandangi tulan-tulanna. ²³ Erkiteken tek orang tua Musa man Dibata maka ibunikenna Musa seh umur telu bulan. Idahna maka anak e seh kal jilena, la ia mbiar ngelawan peraturen si ibahan raja. ²⁴ Erkiteken tek Musa man Dibata maka kenca ia mbelin lanai ia nggit ikataken anak Putri Raja Mesir. ²⁵ Ulin iakapna ngenanami kiniseran ras bangsa Dibata asangken ntabeh kentisik i bas dosa. ²⁶ Igejapna maka ndauh ergan ngenanami kiniseran igombang-gombangi kalak guna Mesias e asangken kerina erta-erta negeri Mesir, sabap ia ngenehen upah si reh pagin. ²⁷ Erkiteken tek Musa man Dibata maka itadingkenna Mesir alu la mbiar man pernembeh raja. La ia nggit mulihken tempa-tempa idahna Dibata si la teridah e. ²⁸ Erkiteken kinitekenna e me maka ia ngelitken Paskah, janah isuruhna kalak mirpirken dareh ku pintun, gelah anak sintua dilaki i bas jabu kalak Israel ola ibunuh Malekat Kematen. ²⁹ Erkiteken tek man Dibata maka bangsa Israel banci ngepari Lawit Merah, tempa-tempa erdalan ia arah daraten. Asum kalak Mesir erdalan ka arah e, itelen lau e ia. ³⁰ Erkiteken tek bangsa Israel man Dibata maka runtuh benteng kota Jeriho kenca kalak Israel erdalan engkeleweti kota e pitu wari dekahna. ³¹ Erkiteken Rahap, diberu si dahinna ndayaken dirina e, tek man Dibata me maka la ia ikut ibunuh ras kalak si ngelawan Dibata, sabap ialo-alona alu dame mata-mata kalak Israel e. ³² Perlu denga kin kuterusken? Lanai aku sempat nuriken kerna Gideon, Barak, Simson, Jepta, Daud ras Samuel, bage pe kerna nabi-nabi. ³³ Erkiteken tek kalak enda man Dibata maka iperangina negeri-negeri dingen menang ia. Idalankenna kai persuruhen Dibata, e maka ialokenna kai si enggo ipadanken Dibata. Isompelna babah singa. ³⁴ Inimpetina api si mejin pergarana. Pulah ia i bas babah pedang nari. Kote ia, tapi dungna jadi megegeh. Megegeh ia i bas perang. Italukenna serdadu-serdadu bangsa si deban. ³⁵ Erkiteken tek diberu-diberu e man Dibata me maka ipekeke Dibata keluargana i bas si mate nari. Si debanna la nggit ngaloken kebebasen, tapi mate isiksa ia, gelah nggeluh ia mulihi ku bas kegeluhen si terulin. ³⁶ Lit isaling-saling dingen icambuk. Lit pe si igariken dingen si ipenjaraken. ³⁷ Lit ibenteri alu batu, lit ikeret duaken kulana alu gaji, janah lit ka pe ibunuh alu pedang. Perlajang ia erdalan-dalan makeken uis i bas kulit biri-biri ntah i bas kulit kambing nari; kalak enda musil, iayak-ayak, dingen isiksa. ³⁸ Lanai metunggung doni enda inganna! Bagi kalak si mengongsi ia ku gurun pasir bage pe ku deleng-deleng. Cebuni ia i bas guha bage pe i bas lubang. ³⁹ Mbelin kal kemenangen si idatken kalak enda erkiteken tek ia man Dibata. Amin bage gia langa bo ialokenna kai si enggo ipadanken Dibata. ⁴⁰ Sabap lit sura-sura Dibata si terulin man banta. Dibata ersura-sura maka raduken kita ngenca kalak ndai banci jadi serta.

¹ Dage man banta, nteremkap saksi si ngkeleweti kita. E maka siaguilah kerina si ngambati i bas perdalanenta, bage pe dosa e si lalap ncerawisi kita. Tutuslah ateta ngikuti perlumban si lit i lebe-lebenta. ² Kempak Jesuslah kita natap, sabap ia me sumbul ras tujun kinitekenta. IgengkenNa ngenanami kiniseran i kayu persilang! Tapi erkiteken keriahen si nimai Ia, lanai iukuriNa mela mate i kayu persilang. Janah genduari kundul Ia arah kemuhen kursi kinirajan Dibata. ³ Ukurilah kuga belinna kiniseran Jesus ngalaken perlawanen si rehna i bas kalak perdosa nari. E maka ola kitik ukurndu, dingen ola kam putus asa. ⁴ Sabap i bas kam erbebe ngelawan dosa langa kam seh ngamburken dareh. ⁵ Lanai kin ingetndu pengajaren si ikataken Dibata man bandu selaku anak-anakNa? "O anakKu, perdiatekenlah adi iajarken Tuhan kam, janah ola kitik ukurndu adi irawaiNa kam. ⁶ Sabap iajarken Tuhan kalak si ikelengiNa, janah iligasNa tep-tep kalak si ialokenNa jadi anakNa." ⁷ Gengkenlah kiniseran si reh man bandu. Alokenlah e bagi ajar i bas sekalak bapa nari, sabap kiniseranndu e ncidahken maka ibahan Dibata kam bagi anak-anakNa. Lit kin sekalak anak si la ididik bapana? ⁸ Adi la kam iajarken bagi anak-anakNa si deban, labo kam anak si sah, tapi anak haram. ⁹ I doni enda lit bapanta. Bapanta e ndidik kita, janah mehamat kita man bana. Adi bage tentu arus pe lebihen sibahan nandangi Bapanta si i Surga, gelah kita nggeluh. ¹⁰ Bapanta si i doni enda kentisik ngenca kita iajarkenna, bagi mehuli iakapna. Tapi kita iajarken Dibata guna kiniulinta, gelah banci kita dat bagin i bas kebadianNa. ¹¹ Asum kita iajarken, ceda ateta, la siakap meriah. Tapi dungna, kita si enggo terdidik, pengajaren e erbahanca kita nggeluh rikutken si ngena ate Dibata, seh maka malem ateta. ¹² E maka angkatlah tanndu si kote, janah pegegehlah tiwenndu si la ergegeh! ¹³ Tetaplah kam erdalan i bas dalan si pinter gelah nahendu si tersiher la ersuina, tapi gelah malem. ¹⁴ Meriahlah ras ise pe, janah usahakenlah nggeluh bagi si ngena ate Tuhan, sabap adi la bage ise pe labo banci ngidah Tuhan. ¹⁵ Jagalah maka sekalak pe ola surut i bas lias ate Dibata. Jagalah maka sekalak pe ola bagi sinuan-sinuan si pagit uratna, si turah nuhsahi nterem jelma alu racunna. ¹⁶ Jagalah maka ola sekalak pe erlagu la mehuli ntah la ngergai si meherga iakap Dibata bagi si Esau, si ndayaken hakna selaku anak sintua, erkiteken sada mangkuk pangan. ¹⁷ Ietehndu maka dungna ersura-sura Esau ngaloken pasu-pasu i bas bapana nari; tapi itulak ia aminna pe ipindona alu iluh mambur, sabap la lit idatna dalan guna ngobah kai si enggo ibahanna. ¹⁸ Kam labo reh ku Deleng Sinai, deleng si banci idadap; i je lit api si gurlah, gelap mesangat, angin meter; ¹⁹ sora terompet, Sora Ngerana. Asum ibegi bangsa Israel sora e, mindo ia alu mesangat gelah olanai min ibegina. ²⁰ La ia ngasup megisa sabap lit perentah i bas Sora e nari, "Kasa kai si ndadap deleng e, subuk jelma ntah asuh-asuhen, la banci la ibenteri alu batu seh mate." ²¹ Kai si teridah i je seh kal mejinna, seh maka Musa pe ngerana nina, "Mbiar dingen ngirgir kal aku!" ²² Tapi kam enggo reh ku Deleng Sion bage pe ku Kuta Dibata si nggeluh, e me Jerusalem si i Surga ras meribu-ribu malekatNa. ²³ Kam enggo reh ku perpulungen si meriah, e me perpulungen kerina anak sintua i bas Dibata, si gelarna enggo tersurat i Surga. Kam enggo reh ku Dibata, Hakim kerina manusia, bage pe ku kerina tendi kalak bujur si enggo serta ibahan Dibata. ²⁴ Kam enggo reh ku Jesus, e me kelang-kelang padan si mbaru, bage pe ku dareh si ipirpirken, si maba berita si ndauh ulin asangken si ibaba dareh Abil. ²⁵ E maka jaga gelah ola la ibegikenndu Si Ngerana e. Adi kalak si la megiken Ia Si Ngerana i Deleng Sinai mbarenda pe la pulah, apai denga ka kita si la megiken Ia si ngerana i Surga nari, tentu la banci pulah i bas Ia nari! ²⁶ Paksa si e nai meger doni enda ibahan soraNa. Tapi genduari enggo erpadan Ia, "Sekali nari ngenca pagi Kuugur, labo saja doni enda, tapi Surga pe." ²⁷ Kata "sekali nari ngenca" ngataken maka kerina si nasa lit si enggo ijadiken Dibata si banci iugur nandangi isambari, gelah tading kai si la terugur. ²⁸ E maka sikataken bujur man Dibata, sabap iberekenNa man banta kerajan si la terugur. Sikatakenlah bujur dingen sisembah Dibata bagi si ngena ateNa, alu mehamat dingen mbiar; ²⁹ sabap Dibatanta situhuna api si ngkernepken kap.

¹ Tetaplah kam sikeleng-kelengen bagi kalak si ersenina i bas Kristus. ² Ingetlah ngalo-ngalo kalak si reh kesilang ku rumahndu. Lit piga-piga, asum ialo-alona kalak si kesilang ku rumahna, alu la ietehna enggo ialo-alona malekat. ³ Ingetlah kalak si i bas penjara, tempa-tempa kam pe i bas penjara. Ingetlah kalak si ngenanami kiniseran erkite-kiteken perbahanen kalak, tempa-tempa kam pe ikut ngenanami kiniseran. ⁴ Kerinalah kam ngergaken perjabun. Kegeluhen perbulangen ras ndehara i bas perjabun la banci melket. Dibata pagi ngukumsa kalak si erlagu la mehuli bage pe si erlua-lua. ⁵ I bas geluhndu ola kam merangap nandangi duit. Ermengkahlah atendu asa si lit i bas kam. Sabap nina Dibata, "Asa ndigan pe la kam Kutadingken, asa ndigan pe la kam Kupulahi." ⁶ E maka melciklah ukurta ngatakenca, "Tuhan kap si nampati aku. E maka labo aku mbiar. Kai kin banci ibahan kalak man bangku?" ⁷ Ingetlah peminpin-peminpin si nai, si peseh Kata Dibata man bandu. Ingetlah kuga nai pergeluhna ras perpatena, janah usihlah kinitekenna man Dibata. ⁸ Jesus Kristus bali kap nderbih, sendah, seh rasa lalap. ⁹ Ola pelepas erbage-bage pengajaren si nggeduk mabai kam papak. Simehulina, pegegehilah pertendinndu alu lias ate Dibata, labo alu ndalanken peraturen-peraturen kerna pangan. Kalak si ndalanken peraturen-peraturen e, labo lit gunana man bana. ¹⁰ Lit kap batar-batar ingan persembahenta; imam-imam kalak Jahudi si erdahin i bas Kemah e la banci muat pangan i bas batar-batar e nari. ¹¹ Imam si Mbelin kalak Jahudi maba dareh ku Ingan si Badiana kal gelah ipersembahkenna jadi persembahen guna dosa; tapi daging asuh-asuhen e itutung i daraten ingan erkemah. ¹² Rikutken si e me pe maka Jesus ngenanami kiniseran seh mate i darat gerbang kota, guna mersihken anak-anak Dibata i bas dosa nari alu darehNa. ¹³ Dage marilah kita lawes ndahi Ia ku darat ingan erkemah janah ikut igombang-gombangi kalak ras Ia. ¹⁴ Sabap labo lit kuta si tetap man banta i doni enda; kita ndarami kuta si tetap pagin. ¹⁵ E maka sisehkenlah puji-pujin man Dibata katawari pe, si jadi persembahenta arah Kristus, e me persembahen arah babah si ngakui maka Ia kap Tuhan. ¹⁶ Ola lupa erbahan si mehuli dingen sisampat-sampaten, sabap si e me persembahen si ngena ate Dibata. ¹⁷ Patuhlah kam man peminpinndu janah ikutkenlah katana. La erlatih-latih ikepkepna pertendinndu, sabap ia ertanggung jabap man Dibata. Adi patuh kam man bana, meriah ukurna erdahin. Tapi adi lang, ceda atena ndahi dahin e, janah adi bage la lit gunana man bandu. ¹⁸ Tetaplah ertoto kerna kami. Tek kami maka bersih pusuh peraten kami, sabap lalap nge kami ersura-sura ndalanken si mehuli. ¹⁹ Tole kupindoken man bandu, maka ertoto kam man Dibata gelah banci pedas aku mulih ndahi kam. ²⁰ Dibata enggo mpekeke Tuhanta Jesus i bas si mate nari. Ia me Permakan Simbelin nandangi kita biri-biriNa. Janah arah kematenNa iesahken Dibata padan si rasa lalap e. ²¹ Dibata, sumbul kemalemen ate e gelah si ncukupi keperlunndu guna ndalanken si sentudu ras peratenNa. Janah Dibatalah erdahin i bas kita arah Jesus Kristus gelah kita ngelakoken kai si ngena ateNa. Man Kristuslah kemulian seh rasa lalap. Amin. ²² O senina-seninangku, kupindoken man bandu, begikenlah alu saber kata pengajuk enda; sabap surat si kubahan enda labo gedang kal. ²³ Perlu kuakap ietehndu maka seninanta Timotius enggo ndarat i bas penjara nari. Adi pedas ia reh, ras kami pagi ndahi kam. ²⁴ Kataken mejuah-juah i bas kami nari man kerina peminpinndu ras man kerina teman-temanta si sada kiniteken. Senina-seninanta kalak Itali ngataken mejuah-juah man bandu. ²⁵ Lias ate Dibata ras kam kerina gelah.