GALATI

GALATI

¹ Surat enda i bas aku nari, Paulus, si enggo idilo jadi rasul, labo erkiteken manusia ntah pe erkelang-kelangken manusia, tapi erkiteken Jesus Kristus ras Dibata Bapa si enggo mpekeke Jesus i bas si mate nari. ² Kerina senina-senina si i jenda ras aku ngataken mejuah-juah man perpulungen-perpulungen i Galati. ³ Dibata Bapanta ras Tuhan Jesus Kristus mereken lias ate ras kemalemen ate man bandu. ⁴ Guna mulahi kita i bas jaman si jahat enda nari, Kristus enggo ngendesken diriNa erkiteken dosa-dosanta, i bas kepatuhenNa nandangi sura-sura Dibata Bapanta. ⁵ Terpujilah Dibata seh rasa lalap! Amin. ⁶ Mamang ateku ngenehen kam! Sabap pedas kal kam nadingken Ia si enggo milih kam erpalasken lias ate Kristus, jenari ikutkenndu "berita si mehuli si deban". ⁷ Si tuhuna labo lit "berita si mehuli si deban", tapi si enda kukataken man bandu perbahan lit piga-piga kalak si ngguluti, atena nalihken Berita Si Meriah kerna Kristus e. ⁸ Tapi amin kami pe, ntah malekat i Surga nari, meritaken man bandu berita si mehuli si lain ras Berita Si Meriah si enggo iberitaken kami man bandu e, kena sumpahlah ia! ⁹ Si tuhuna si enda enggo pernah kukataken, tapi genduari kukataken sekali nari! Adi lit kalak meritaken berita si mehuli man bandu si lain ras Berita Si Meriah si enggo ialokenndu, kena sumpahlah ia! ¹⁰ Alu bage, kuarapken kin gelah aku iakui manusia? Lang! Pengakun i bas Dibata nari nge si kuarapken! Gelah ngena ate manusia kin si man daramenku? Adi e kin tujunku, labo aku suruh-suruhen Kristus. ¹¹ O Senina-seninangku, kukataken man bandu maka Berita Si Meriah si kuberitaken e labo manusia erbahanca. ¹² Labo kualoken i bas manusia nari; la bo ka ise pe ngajarkenca man bangku. Tapi Jesus Kristus jine nge si naksikenca man bangku. ¹³ Enggo ibegindu kuga nai kegeluhenku selaku kalak Jahudi si tutus eragama, kuga nai aku pesega-sega perpulungen-perpulungen Dibata alu kejam dingen kuusahaken ngkernepken ia. ¹⁴ Asangken kerina teman-temanku kalak Jahudi si sebekbek ras aku, lebihen aku i bas ndalanken agama Jahudi. Tutusen ateku nandangi adat-adat si isusurken nininta asangken ia kerina. ¹⁵ Tapi Dibata, i bas lias ateNa enggo milih aku ope denga aku tubuh pe, janah idiloNa aku. ¹⁶ Asum itetapken Dibata guna mpetangkas AnakNa arah aku gelah kuberitaken Berita Si Meriah kerna AnakNa e man bangsa si la kalak Jahudi, labo aku arih-arih ras ise pe. ¹⁷ Labo aku lawes ku Jerusalem guna njumpai si enggo jadi rasul leben asangken aku. Tapi minter aku lawes ku daerah Arab, jenari mulihken aku ku Damaskus. ¹⁸ Kenca telu tahun maka aku ku Jerusalem gelah kutandai Petrus. Dua minggu dekahna aku ras ia. ¹⁹ Ras rasul-rasul si deban la aku jumpa, seakatan Jakup senina Tuhan. ²⁰ Kai si kusuratken enda tuhu. Kukataken i lebe-lebe Dibata maka labo aku erbual! ²¹ Kenca si e lawes aku ku daerah-daerah Siria ras Kiliki. ²² Paksa si e kalak Kristen si lit i daerah Judea la nandai aku. ²³ Kai si ikataken kalak ngenca ietehna, e me, "Si mbaru enda rusur pesega-sega kami, genduari sangana meritaken Berita Si Meriah kerna Kristus si nai ikernepkenna atena!" ²⁴ Bage me ipujina Dibata erkiteken aku.

¹ Sepulu empat tahun kenca si e mulihken ka aku nangkeng ku Jerusalem ras Barnabas. Ikut pe Titus kubaba. ² Lawes aku nangkeng ku Jerusalem sabap ipetangkas Dibata man bangku maka aku arus berkat. Janah i bas perjumpan si khusus ras peminpin-peminpin si i Jerusalem, kubukaken man bana Berita Si Meriah si kuberitaken man kalak si labo Jahudi. Sabap la ateku sia-sia kai si enggo kudahiken i bas paksa si enggo lepas, ntah si genduari. ³ Temanku Titus, aminna pe ia kalak Junani, la ia ipaksa guna isunatken. ⁴ Aminna pe lit piga-piga kalak si pekulah-kulah jadi senina, bengket ku bas perpulungen e, janah ersura-sura nunatken ia. Ipepayona kami alu nangko-nangko, atena guna meteh kerna kebebasen si ialoken kami erkiteken persadan kami ras Kristus Jesus. Ibahanna atena kami jadi juak-juak. ⁵ Tapi sitik pe kami la surut, gelah kebenaren Berita Si Meriah e banci ijaga kami guna kam. ⁶ Tapi lit kalak si ipetempa-tempa peminpin. Maka bage ningku, sabap labo pangkatna kunehen. I bas Dibata la erpendobahen kerna pangkat manusia. Pangkat la nambahi kai pe nandangi Berita Si Meriah si kuberitaken e. ⁷ Tapi iakuina maka aku enggo isuruh Dibata guna meritaken Berita Si Meriah e man kalak si labo Jahudi, bali ras Petrus enggo isuruh Dibata guna meritaken Berita Si Meriah man kalak Jahudi. ⁸ Sabap alu kuasa Dibata aku enggo jadi rasul nandangi kalak si labo Jahudi, bali ras Petrus enggo jadi rasul nandangi kalak Jahudi. ⁹ Jakup, Petrus ras Johanes, si kepeken si jadi peminpin e ngenca ngidah bekas pemere Dibata si khusus man bangku, minter isalamina aku ras Barnabas. Selaku teman si sada dahin, ersada arih kami kerina maka aku ras Barnabas erdahin i tengah-tengah kalak si labo Jahudi, janah rasul-rasul si deban erdahin i tengah-tengah kalak Jahudi. ¹⁰ Sada ngenca pemindonna e me gelah ola kami lupa nandangi kalak si musil i daerah Judea. Janah si enda kal me tuhu-tuhu ateku kudalanken. ¹¹ Asum reh Petrus ku Antiokia, kupandang ia i lebe-lebe jelma si nterem, sabap terang ia ersalah. ¹² Ope denga piga-piga kalak si isuruh Jakup seh i Antiokia, enggo biasa Petrus man ras senina-senina si labo kalak Jahudi. Tapi kenca seh kalak e, surut Petrus, janah isirangina senina-senina si la kalak Jahudi e. Lanai ia ras man, sabap mbiar ia nandangi si erpengakap maka sunat e penting tuhu-tuhu. ¹³ Senina-senina kalak Jahudi si deban e pe ikut pekulah-kulah, bali ras Petrus, janah Barnabas pe ikut ipengaruhina pekulah-kulah. ¹⁴ Asum kuidah maka perbahanenna la rikutken Berita Si Meriah, ngerana aku man Petrus i lebe-lebe jelma si nterem e kerina, "Kam kalak Jahudi, tapi piga-piga wari si enggo lepas pergeluhndu bagi pergeluh kalak si labo kalak Jahudi. Dage, kuga nge nindu maksaken kalak si labo kalak Jahudi nggeluh bagi pergeluh kalak Jahudi?" ¹⁵ Tuhu, rikutken pertubuh kami, kami kalak Jahudi, janah la kami kalak si semal igelari: "kalak perbegu si perdosa". ¹⁶ Tapi amin bage gia ieteh kami maka manusia rembak ras Dibata, arah erkiniteken man Jesus Kristus ngenca, la arah ndalanken Undang-undang. Kami pe enggo tek man Kristus Jesus gelah iperembakken kami ras Dibata arah kiniteken man Kristus, janah labo arah ndalanken Undang-undang. Sabap labo lit sekalak pe iperembakken ras Dibata arah ndalanken Undang-undang. ¹⁷ E maka iusahaken kami gelah rembak ras Dibata arah persadan ras Kristus. Erkiteken si e lit piga-piga kalak ngataken maka kami enggo ka jadi kalak perdosa bali ras kalak perbegu. Bahanlah payo kai si ikatakenna e; adi bage Kristus kin si mabai kami gelah erdosa? Tentu lang! ¹⁸ Tapi adi mulihken ka kami ku cara ndalanken Undang-undang gelah rembak ras Dibata e me si enggo kutadingken, si e ertina maka tuhu-tuhu aku sekalak perdosa. ¹⁹ Nandangi Undang-undang e aku situhuna enggo mate, janah lanai lit sitik pe kuasa Undang-undang e nandangi aku seh maka banci aku nggeluh guna Dibata. Aku enggo ipakuken ras Kristus i kayu persilang. ²⁰ Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erkiteken kiniteken man Anak Dibata, si ngkelengi aku dingen ngendesken diriNa man gunangku. ²¹ La ateku nia-niaken lias ate Dibata. Adi sekalak jelma banci rembak ras Dibata arah ndalanken Undang-undang, si enda ertina maka sia-sia nge kematen Kristus e!

¹ O kalak Galati, bodoh! Ise kin erbahanca maka kam kena si bage? Kematen Kristus i kayu persilang enggo tangkas kugambarken i lebe-lebe matandu! ² Jabaplah penungkunen enda: Erkiteken idalankenndu Undang-undang kin maka ialokenndu Kesah Dibata, ntah kin erkiteken ibegindu jenari tek kam Berita Si Meriah e? ³ Oh, seh kal bodohndu! Enggo ibenakenndu geluhndu si mbaru e alu Kesah Dibata; atendu kin kegeluhenndu e ibahanndu jadi serta alu kuasandu jine? ⁴ La kin lit gunana kerina pengalamenndu si pagit e? Tentu lit! ⁵ Dibata enggo mereken KesahNa man bandu janah ibahanNa tanda-tanda sengget i tengah-tengahndu: si enda jadi erkiteken idalankenndu Undang-undang kin ntah erkiteken ibegindu jenari tek kam Berita Si Meriah e? ⁶ Si enda bali ras si tersurat i bas Pustaka Si Badia kerna Abraham, "Tek Abraham man Dibata, janah kinitekenna e iperkiraken Dibata jadi kebenaren Abraham si erbahanca ia rembak ras Dibata." ⁷ Dage arus ietehndu maka si tuhuna si jadi kesusuren Abraham e me kalak si tek man Dibata. ⁸ Pustaka Si Badia enggo leben ngidah maka Dibata ngerembakken si labo kalak Jahudi ras DiriNa erkiteken kinitekenna. Bage pe nai enggo leben iberitaken Dibata Berita Si Meriah man Abraham bagi si tersurat i bas Pustaka Si Badia nina, "Kupasu-pasu kerina manusia i doni enda arah kam." ⁹ Tek Abraham man Dibata, janah ipasu-pasuNa ia. Bage me pe kerina kalak si tek man Dibata ipasu-pasu bagi Abraham. ¹⁰ Kalak si ernalem man kengasupenna ndalanken Undang-undang geluhna tetap iancam ukumen Dibata. Sabap i bas Pustaka Si Badia lit tersurat, "Kalak si la tetap ndalanken kerina si tersurat i bas Kitap Undang-undang, isumpahi Dibata me ia!" ¹¹ Tangkas dage maka labo ise pe iperembakken ras Dibata arah ndalanken Undang-undang; sabap lit tersurat i bas Pustaka Si Badia, "Kalak si iperembakken ras Dibata erkiteken kinitekenna, nggeluh me." ¹² Undang-undang labo erpalasken kiniteken, tapi erpalasken perbahanen. Bagi lit tersurat i bas Pustaka Si Badia, "Kalak si ndalanken kerina si tersurat i bas Undang-undang nggeluh me i bas Undang-undang e nari." ¹³ Tapi Kristus enggo mulahi kita i bas ancamen ukumen si lit i bas Undang-undang e. Enda ibahanNa alu ngendesken diriNa iukum erkiteken kita. Sabap i bas Pustaka Si Badia lit tersurat, "Kalak si igantung i das batang kayu isumpahi Dibata kap." ¹⁴ Si enda igengken Kristus gelah pasu-pasu si enggo ipadanken Dibata man Abraham banci ibereken man si labo kalak Jahudi arah Kristus Jesus. Gelah kita, arah kiniteken, banci ngaloken Kesah Si Badia si ipadanken Dibata. ¹⁵ O senina-senina, kubuat sada contoh i bas kegeluhenta si tep-tep wari: Adi lit dua kalak si enggo ersada arihna dingen enggo iesahken i bas runggun, apai pe ia lanai banci ngataken maka arihna e la esah ntah pe nambahisa. ¹⁶ Dibata enggo erpadan man Abraham ras kesusurenna. I bas Kitap si Badia labo ikataken, "ras man kesusuren-kesusurenndu," ertina nterem jelma. Tapi isuratken, "ras man kesusurenndu," ertina sekalak saja, e me Kristus. ¹⁷ Maksudku e me: Dibata enggo erbahan sada iketen padan janah erpadan guna nehkenca. Undang-undang si reh empat ratus telu puluh tahun kenca si e la ngasup erbahanca mosar iketen padan e seh maka masap ibahanna padan Dibata e. ¹⁸ Sabap adi pemere si ibereken Dibata erpalasken Undang-undang kin, maka si e labo erpalasken padan Dibata. Tapi erkiteken Dibata enggo erpadan nge maka iberekenNa man Abraham. ¹⁹ Adi bage, kai kin tujun Undang-undang e? Undang-undang itambahken guna nuduhken si salah. Undang-undang e erguna seh reh sekalak i bas Kesusuren Abraham, si man baNa ibereken padan e. Undang-undang e isehken malekat-malekat arah sekalak kelang-kelang. ²⁰ Tapi sekalak kelang-kelang labo perlu adi labo lit dua pihak; janah "Dibata sada kap", e me palas kinitekenta. Si enda la teridah alu tangkas arah mereken Undang-undang arah sekalak kelang-kelang, tapi tangkas i bas Dibata erbahan padan man Abraham secara langsung. ²¹ Ntah kin si enda ertina maka Undang-undang e erlawanen ras padan Dibata? Tentu lang! Adi banci kin kepe manusia ndat kegeluhen alu patuh nandangi Undang-undang, si enda ertina maka manusia banci rembak ras Dibata arah Undang-undang e. ²² Tapi rikutken si tersurat i bas Pustaka Si Badia kerina manusia i doni enda ikuasai dosa; erkiteken si e pemere si ipadanken erpalasken kiniteken man Jesus Kristus e banci ibereken man kalak si tek. ²³ Ope denga kiniteken enda reh, kita ipenjaraken Undang-undang bagi kalak tahanen, seh maka kiniteken e ipetangkas. ²⁴ Alu kata si deban Undang-undang e desken sekalak pengawas si tugasna naruhken kita kempak gurunta, e me kap Kristus, gelah kita iperembakken ras Dibata erkiteken kinitekenta. ²⁵ Genduari erkiteken enggo seh kita i bas kiniteken e, Undang-undang e lanai erkuasa man banta. ²⁶ Arah kiniteken me maka kam kerina jadi anak-anak Dibata i bas persadanndu ras Kristus Jesus. ²⁷ Kam enggo ipersada ras Kristus arah lakon peridin, e maka enggo lit i bas kam biak-biak Kristus e. ²⁸ Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus. ²⁹ Adi kam sikerajangen Kristus, kesusuren Abraham me kam, janah ialokenndu me kai si enggo ipadanken Dibata.

¹ Tapi perlu kutambahken: Asum anak-anak denga si ngalo tading-tadingen, bagi budak ia ibahan aminna pe ia nge si tuhuna si mada kerinana. ² Asum ia nguda denga, lit si ngepkep ia dingen si nggancih ia i bas kerina urusenna seh ku paksa si itetapken bapana. ³ Bage me pe nai, asum kita langa dewasa, kita pe jadi budak kuasa-kuasa si lit i doni enda. ⁴ Tapi kenca enggo genep paksana, enggo isuruh Dibata AnakNa. AnakNa e tubuh arah sekalak diberu, janah nggeluh i teruh Undang-undang kalak Jahudi. ⁵ Guna nebusi kalak si i teruh Undang-undang, gelah banci kita iangkat jadi anak-anak Dibata. ⁶ Tandana maka kam anak-anak Dibata, isuruh Dibata Kesah AnakNa ku bas pusuhta, e me Kesah si erlebuh, "Bapa, o Bapangku." ⁷ E maka lanai bo kam budak, tapi anak. Janah erkiteken kam anakNa, ibereken Dibata me man bandu kerina si enggo isikapkenNa guna anak-anakNa. ⁸ Nai la itandaindu Dibata, e maka kam iperbudak dibata-dibata situhuna si e labo Dibata. ⁹ Tapi genduari enggo itandaindu Dibata ntah pe ulin ikataken Dibata enggo nandai kam; ma la metunggung adi mulihken ka kam italuken kuasa-kuasa si la ergegeh dingen musil e? Engkai maka mulihken atendu jadi budakna? ¹⁰ Ipegermetkenndu kerna wari-wari, bulan, paksa-paksa erkerja ras tahun-tahun si tertentu. ¹¹ Aru ateku nandangi kam. Sia-sia kin ndia kerina kelatihenku man bandu? ¹² O senina-seninangku, kupindoken man bandu: jadilah kam bagi aku, sabap aku pe bali nge ras kam. Kam labo pernah ersalah man bangku. ¹³ Ingetndu denga kin ngkai maka kuberitaken Berita Si Meriah e man bandu tangtangna nai? E me perbahan penakitku. ¹⁴ Janah aminna pe penakit si lit i bas kulangku e jadi sada percuban man bandu, la aku ihinandu ntah pe itulakndu. Tapi ialokenndu aku tempa-tempa bagi malekat Dibata, tempa-tempa bagi Kristus Jesus. ¹⁵ Meriah kal ukurndu! Kai kin si enggo jadi? Kueteh maka paksa si e nai, adi banci nggit kam ncungkil matandu jenari merekenca man bangku. ¹⁶ Imbangndu kin iakapndu aku genduari erkiteken kuturiken man bandu si tuhu-tuhu e? ¹⁷ Kalak si deban ndai iperdiatekenna kal kam, tapi sura-surana la mehuli. Ia ersura-sura guna nirangken kam ras aku, gelah iperdiatekenndu ia bagi ia mperdiateken kam. ¹⁸ Mehuli nge mperdiateken kalak, adi mehulilah tujunna. Katawari pe mehuli bage labo saja paksa aku ras kam. ¹⁹ O anak-anakku si kukelengi! Erkiteken kam, ngenanami kiniseran aku sekali nari bagi sekalak pernanden asum mupus, seh biak Kristus lit i bas kam. ²⁰ Mesikel kal aku ras kam genduari, gelah banci kusambari pengeranangku alu si deban man bandu. Aru kal ateku kerna kam! ²¹ Man bandu si ersura-sura nggeluh i teruh Undang-undang nungkun aku: La kin ibegindu kai si ikataken i bas Kitap Undang-undang? ²² I je lit tersurat maka Abraham dua anakna: Sekalak anak diberu budak, sekalak nari anak diberu si bebas. ²³ Anakna si tubuh i bas diberu budak e nari, tubuh rikutken sura-sura manusia, tapi anakna si tubuh i bas diberu si bebas e nari tubuh erkiteken padan Dibata. ²⁴ Enda banci ibahan jadi sada anding-andingen: diberu si dua kalak e, e me dua iketen padan, sada si Hagar asalna i Deleng Sinai nari, janah anak-anakna tubuh i bas perkawanen. ²⁵ Hagar iandingken ras Deleng Sinai i taneh Arab, janah ia me iandingken ras kota Jerusalem si genduari, si jadi budak ras kerina si ngianisa. ²⁶ Tapi Jerusalem si i datas, bebas, janah ia me nandenta. ²⁷ Sabap i bas Pustaka Si Badia lit tersurat: "Meriahlah atendu o diberu si la banci mupus! Rendelah dingen ersuraklah alu meriah, o kam si la pernah ngenanami kiniseran mupus! Sabap teremen me anak diberu si itadingken perbulangenna, asangken anak diberu si erperbulangen." ²⁸ Genduari o kam senina-seninangku, kam me anak-anak Dibata erkiteken padanNa e, bali ras si Isak. ²⁹ Paksa si e nai igasgasi anak si tubuh rikutken sura-sura manusia e anak si tubuh erkiteken sura-sura Kesah Dibata. Bage me pe genduari. ³⁰ Tapi kai si ikataken Pustaka Si Badia? I je lit tersurat, "Pelaweslah diberu budak e ras anakna; sabap anak diberu juak-juak e labo ikut dat bagin i bas tading-tadingen bapana ras anak diberu si bebas e." ³¹ Bage me o senina-seninangku, kita labo anak diberu budak tapi anak diberu si bebas.

¹ Kita enggo bebas genduari, sabap Kristus enggo mbebasken kita! Erkiteken si e tetaplah bagi kalak bebas, janah olanai kam nggit itindih pasangen bagi budak. ² Begikenlah! Aku, Paulus, ngataken man bandu: Adi ipelepasndu dirindu isunatken, e nuduhken maka Kristus la lit ertina man bandu. ³ Sekali nari kupersingeti: Kalak si mpelepas dirina isunatken, arus idalankenna kerina si tersurat i bas Kitap Undang-undang. ⁴ Janah kam si ersura-sura iperembakken ras Dibata arah ndalanken Undang-undang, isirangkenndu kap dirindu i bas Kristus nari. Kam enggo sirang i bas lias ate Dibata nari. ⁵ Adi kami, iarapken kami maka Dibata ngerembakken kami ras DiriNa. Enda me si itimai kami alu dem pengarapen, alu kuasa Kesah Dibata si erdahin arah kiniteken kami. ⁶ Sabap adi ersada kita ras Kristus Jesus, lanai bo jadi soal ersunat ntah la ersunat. Si pentingna kal e me erkiniteken man Jesus Kristus janah kiniteken e teridah arah nehken keleng ate. ⁷ Nai mehuli kal perbahanenndu! Ise kin erbahanca maka lanai kam patuh nandangi pengajaren si tuhu-tuhu e? Kuga ibahanna ngerintak kam? ⁸ Si ngerintak kam e labo Dibata si milih kam. ⁹ Bagi si ikataken kalak, "Ragi si sitik banci ibahanna macem tepung si melala." ¹⁰ Amin bage gia erkiteken persadanta ras Tuhan, tek denga nge aku maka labo sambar ukurndu, janah tek aku maka kalak si ngguluti ukurndu e, aminna ise gia ia, la banci lang iukum Dibata me. ¹¹ Kerna aku o senina-senina, adi tetap kin kuberitaken maka ersunat e perlu, tentu aku lanai bo tetap iayak-ayak! Sabap adi tuhu kin si enda, tentu kai si kuberitaken kerna kayu persilang Kristus labo mpeturah permusuhen. ¹² Ateku min maka kalak si ngguluti kam e labo saja isunatkenna bana, tapi pe iburihinalah bana. ¹³ Kerna kam o senina-seninangku, kam enggo ipilih Dibata gelah bebas. Tapi jagailah maka ola kebebasenndu e jadi alasen si erbahanca kam ikuasai perukurenndu secara manusia. Tapi berelah maka keleng ate njemba-njemba kam guna si sampat-sampaten. ¹⁴ Sabap kerina Undang-undang ipersada i bas sada pedah, e me, "Kelengilah temanndu manusia bagi kam ngkelengi dirindu." ¹⁵ Tapi adi bagi rubia-rubia perbahanenndu, si karaten dingen si atahen kam, metengetlah; adi la kam metenget nandangi kernep me persadanndu e. ¹⁶ Sura-surangku e me: Kesah Si Badia min si negu-negu kegeluhenndu maka ola iikutkenndu perukurenndu secara manusia. ¹⁷ Sura-sura ukur manusia erlawanen ras Kesah Si Badia, janah Kesah Si Badia erlawanen ras sura-sura ukur manusia. Si dua enda ermusuhen, janah si enda ertina maka la banci idalankenndu peratenndu. ¹⁸ Adi Kesah Si Badia negu-negu kam lanai bo kam iteruh Undang-undang. ¹⁹ Perbahanen-perbahanen si erpalasken sura-sura ukur manusia tangkas kap. Si enda teridah i bas: erlua-lua, si nggesuh, la meteh mela; ²⁰ nembah man berhala ras erbahan ilmu sihir; simusuhen, rubati, mecimberu, perampus dingen kepentingenna saja ngenca iukurina. Erbahan perpecahen dingen erpihak-pihak. ²¹ Sician-cianen, mabuk, pesta minem-minem seh mabuk ras si debanna. Kukataken man bandu genduari, bagi enggo kukataken bandu nai maka, kalak si ndalanken perbahanen-perbahanen si bagi enda labo banci dat bagin i bas Kinirajan Dibata si reh pagin. ²² Tapi ulih Kesah Si Badia e me: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia. ²³ Meteruk ukurna dingen ngasup engkuasai diri. Kerna si enda la lit isingetken pe i bas Undang-undang. ²⁴ Bage me kalak si enggo jadi sikerajangen Kristus Jesus; perukurenna secara manusia enggo ibunuhna i kayu persilang rikut ras kerincuhen dagingna bage pe sura-surana. ²⁵ Erkiteken Kesah Si Badia me si mereken kegeluhen man banta, e maka lagu langkahta pe arus rikutken peraten Kesah e. ²⁶ La banci meganjang ukurta, ntah sitokoh-tokohen, ntah pe sician-cianen.

¹ O senina-seninangku, adi lit sekalak si terdat ersalah, kam si nggeluh rikutken Kesah Si Badia arus min negu ia alu manjar-anjar gelah mulihken ia ku dalan si mehuli. Janah jagalah dirindu sekalak-sekalak sabap kam pe banci ka nge kena percuban. ² Sisampat-sampatenlah kam i bas maba baban geluh enda. Alu bage isehkenndu kap Undang-undang Kristus. ³ Adi lit kalak erpengakap maka ia mehaga, tapi kai pe ia lang, itipuna me bana. ⁴ Sekalak-sekalak arus nguji lagu langkahna jine. Alu bage banci megah akapna kerna dirina jine alu la mbanding-mbandingken dirina ras kalak si deban. ⁵ Sabap sekalak-sekalak simaba babanna nge. ⁶ Kalak si ngaloken pengajaren Kristus arus iraskenna kerina si mehuli si lit i bas ia ras guruna. ⁷ Ola tipu bandu; ise pe labo ngasup nokohi Dibata. Si isuan manusia e ka nge iperanina. ⁸ Adi merdang kalak i bas juma perukuren secara manusia, iperanina, me ulihna si la banci la macik i bas juma perukurenna e nari. Adi nuan ia i bas juma Kesah Si Badia, iperanina me kegeluhen si rasa lalap i bas Kesah Si Badia e nari. ⁹ E maka ola min kita erleja-leja erbahan si mehuli; sabap adi tetap tutus ateta ndalanken si e, seh me paksana siperani ulihna. ¹⁰ E maka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken. ¹¹ Nehenlah kuga belinna tulisenku enda si kusuratken alu tanku jine! ¹² Kalak si peganjang-ganjangken bana janah si megah akapna kerna barang-barang si arah darat, ia me si ersura-sura maksa kam gelah isunatken. Si enda idalankenna gelah ola ia iayak-ayak erkiteken kayu persilang Kristus. ¹³ Sabap kalak si nunatken pe la ndalanken Undang-undang. Ersura-sura ia nunatken kam gelah megah iakapna erkiteken patuh kam man adat e. ¹⁴ Adi aku, kerna kayu persilang Tuhanta Jesus Kristus e ngenca kuakap megah. Sabap erkiteken kayu persilang e, doni enda enggo kuakap mate, janah aku pe enggo mate iakap doni enda. ¹⁵ E maka lanai jadi soal sekalak isunatken ntah lang. Si pentingna e me gelah kalak jadi tinepa si mbaru. ¹⁶ Janah man kalak si patuh nandangi cara si enda, kupindoken man Dibata gelah ibereken Dibata man bana kemalemen ate ras perkuah ate bage pe man kerina Israel Dibata. ¹⁷ Si perpudina, olanai min ise pe nuhsahi aku, sabap i bas kulangku lit cining-cining si nuduhken maka aku juak-juak Jesus. ¹⁸ Lias ate Tuhanta Jesus Kristus ras kam kerina min o senina-senina. Amin.