EPESUS

EPESUS

¹ Surat enda i bas aku nari, Paulus, si enggo jadi rasul Kristus Jesus rikutken peraten Dibata. Man anak-anak Dibata i Epesus, kalak si tutus i bas kegeluhenna i bas persadan ras Kristus Jesus. ² Lias ate Dibata Bapanta ras Tuhan Jesus Kristus dingen kemalemen ate man bandu gelah. ³ Terpujilah Dibata Bapa Tuhanta Jesus Kristus! Sabap erkiteken persadanta ras Kristus, enggo ipasu-pasuNa kita, alu erbage-bage pemere pertendin si lit i bas ingan si meganjang. ⁴ Ope denga ijadiken Dibata doni enda, enggo ipilihNa kita jadi sikerajangenNa arah persadanta ras Kristus gelah kita badia dingen la ersalah i lebe-lebeNa. Erkiteken keleng ateNa. ⁵ Enggo itetapkenNa maka arah Jesus Kristus ialokenNa kita jadi anak-anakNa. Enda me si ngena ateNa dingen sura-suraNa. ⁶ Terpujilah Dibata erkiteken kiniulinNa si mulia, si icidahkenNa man banta arah pemereNa i bas AnakNa si ikelengiNa. ⁷ Sabap erkiteken Kristus enggo kita itebusi, e me dosa-dosanta enggo ialemi Dibata. Seh kal belinna kiniulin Dibata. ⁸ Si ikusekenNa man banta seh riba-iba, alu dem kepentarenNa dingen pengertinNa. ⁹ Rikutken sura-suraNa, ipetangkasNa man banta sura-suraNa si terligen, si enggo kin itetapkenNa guna isehkenNa arah Kristus. ¹⁰ Rencana Dibata si isehkenNa kenca seh paksana e, e me guna mpersadaken kerina si nasa lit, subuk i Surga bage pe si i doni, gelah Kristus jadi kepalana. ¹¹ Kerina ibahan Dibata sue ras si ngena ateNa dingen rikutken si enggo itetapkenNa. Tangtangna nari kita enggo ipilih Dibata sabap Ia ersura-sura gelah kita dat bagin i bas kai si enggo jadi sikerajangen Kristus. ¹² Janah gelah kita, kalak si pemena erpengarapen man Kristus, nggeluh tama pujin man kemulian Dibata. ¹³ Bage pe kerna kam: Asum ibegindu berita si tuhu-tuhu, Berita Si Meriah si maba keselamaten man bandu, tek kam man Kristus, janah itamaken Dibata cap i bas kam, tandana kam sikerajangenNa, alu mereken Kesah Si Badia si enggo ipadankenNa. ¹⁴ Kesah e me jadi jaminen maka sialoken me kai si enggo ipadanken Dibata man anak-anakNa. Kesah e pe jadi jaminen man banta maka la banci lang idungi Dibata dahinNa guna nebusi kita, kalak si enggo jadi sikerajangenNa. Terpuji dingen ermulialah Dibata. ¹⁵ Erkiteken si e, kenca kubegi maka kam enggo erkiniteken man Tuhan Jesus, dingen keleng atendu man kerina anak-anak Dibata. ¹⁶ La aku erngadi-ngadi ngataken bujur man Dibata kerna kam. La aku lupa notoken kam. ¹⁷ Kupindoken man Dibata Tuhanta Jesus Kristus, Bapa si ermulia, gelah iberekenNa man bandu kesah kepentaren dingen ipetangkasNa diriNa man bandu gelah itandaindu Ia. ¹⁸ Kupindo man Dibata gelah italangiNa pusuh peratenndu gelah terang pengangkanndu. Alu bage banci ietehndu kai si banci iarapkenndu i bas Dibata si ndilo kam, bage pe gelah ietehndu maka seh kal buena erta-erta si mulia si isikapken Dibata man anak-anakNa. ¹⁹ Ras gelah ietehndu maka seh kal belinna Kuasa Dibata erdahin i bas kita si tek man Kristus. Kuasa si erdahin i bas kita e, bali ras kuasaNa si mbelin. ²⁰ Si ipakeNa asum Ia mpekeke Kristus i bas si mate nari, janah ipekundulNa Ia arah kemuhenNa i bas ingan si meganjangna. ²¹ Kuasa Kristus e ndauh kal ganjangen asangken kerina kuasa pemerentah ras penguasa si la teridah, dingen ganjangen asangken kerina peminpin ras tuan-tuan si la teridah, janah pangkatNa ganjangen asangken kerina pangkat si terbelasken, subuk i bas paksa enda, bage pe i bas paksa si reh pagin. ²² Dibata namaken kerina si nasa lit ku teruh tapak-tapak nahe Kristus, janah ibereken Dibata Ia man perpulungen jadi kepala i bas kai-kai pe. ²³ Perpulungen e me kula Kristus, janah kula e me si ngkuhi Ia, janah Kristus me si ngkuhi kerina si nasa lit subuk i japa pe.

¹ I bas paksa si lewat, erkiteken salahndu ras dosa-dosandu, mate pertendinndu. ² Paksa si e nai iikutkenndu kebiasan doni si jahat. Iikutkenndu peminpin penguasa-penguasa si lit i bas awang-awang, e me kesah si genduari erdahin i bas kalak si la nggit erkemalangen man Dibata. ³ Si tuhuna kita pe nai bali nge ras kalak enda. Kita nai nggeluh rikutken sura-suranta saja janah sidalanken si sentudu ras sura-sura kulanta ras ukurta. Sue ras biakta, kita pe bali ras kalak si deban, patut ngenanami pernembeh ate Dibata. ⁴ Tapi perkuah ate Dibata la ersibar, janah mbelin kal keleng ateNa man banta. ⁵ Seh maka asum kita mate i bas pertendin erkiteken salahta, ipegeluhNa kita mulihi radu ras Kristus. Erkiteken lias ate Dibata nge maka kam enggo terkelin. ⁶ I bas persadanta ras Kristus Jesus, ipekeke Dibata kita ras Kristus, janah ipekundulNa kita ras Ia i bas ingan si meganjang. ⁷ Si enda ibahan Dibata gelah seh rasa lalap icidahkenNa kiniulinNa si lanai kal lang-lang belinna, e me lias ateNa man banta i bas Kristus Jesus. ⁸ Sabap erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e. ⁹ Labo ulih pendahinndu e, e maka labo lit dalanna ise pe muji bana. ¹⁰ Tinepa Dibata kap kita; i bas persadanta ras Kristus Jesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e. ¹¹ Kam si labo kalak Jahudi, ingetlah kuga nai kam. Kalak Jahudi nggelari kam kalak si "la ersunat" tapi dirina igelarina kalak si "ersunat" e me kerna adat si ilakoken manusia nandangi kulana. ¹² Paksa e nai kam sirang ras Kristus. Nai kam kalak tandang-tandang si la atan i bas warga Israel si terpilih. La lit baginndu i bas iketen padan si erpalasken padan Dibata man anak-anakNa. Kam nggeluh i doni enda la erpengarapen, dingen la er-Dibata. ¹³ Tapi genduari i bas persadanndu ras Kristus Jesus, kam si nai ndauh, genduari enggo ibaba rembak ras kami erkiteken kematen Kristus. ¹⁴ Sabap Kristus e kap si ndameken kita, alu njadiken si dua pihak e jadi sada. Kristus jine alu dareh dagingNa enggo ngeruntuhken tembok si nirangken bangsa-bangsa e dingen si erbahanca ia tetap ermusuhen. ¹⁵ ImasapkenNa Undang-undang agama Jahudi alu pedah-pedahNa ras aturen-aturenNa, gelah bangsa si dua e ijadikenNa jadi manusia si mbaru si ersada ras Kristus. Alu bage ibahanNa perdamen man banta. ¹⁶ Alu kematenNa i kayu persilang ikernepkenNa permusuhen e. Alu kayu persilang ipersadakenNa si dua bangsa e jadi sada kula janah iperdamekenNa ras Dibata. ¹⁷ Bage me Kristus reh, janah iberitakenNa Berita Si Meriah kerna perdamen man kerinana, subuk man bandu si nai ndauh sirang ras Dibata bage pe man kami si rembak ras Ia. ¹⁸ Erkiteken Kristus me maka kita dua mbelahna ndat hak ngadap man Bapa arah Kesah si Sada e. ¹⁹ E maka kam si labo kalak Jahudi lanai kam kalak asing ntah pe pertandang. Kam pe genduari enggo jadi sada warga ras anak-anak Dibata dingen enggo jadi anggota keluargaNa. ²⁰ Kam pe ipajekken i babo palas si itamaken rasul-rasul ras nabi-nabi, janah Kristus jine me palas persukina. ²¹ Si nentuken susunen kerina bagin-bagin bahan-bahanen e. Bahan-bahanen e tambah belinna janah jadi Rumah Pertoton si Badia i bas Tuhan. ²² I bas persadanndu ras Kristus, kam pe ras kerina kalak si deban iranggut jadi sada rumah, i ja Dibata ringan alu KesahNa.

¹ Erkiteken si enda me maka ertoto aku man Dibata, aku Paulus, si ipenjaraken erkiteken Kristus man gunandu kalak si labo Jahudi. ² Tentu enggo ibegindu uga Dibata ngangkat aku jadi serayanNa guna nehken lias ateNa guna kepentingenndu. ³ Dibata nge si petangkassa man bangku maka kuertiken rahasiaNa si terbuni. Kerna si enda enggo kusuratken alu gendek man bandu, ⁴ janah adi iogendu kai si enggo kusuratken e, tentu iangkandu uga bagesna pengertinku kerna rahasia Kristus e. ⁵ Gelgel nari rahasia enda la ipebetehkenNa man manusia, tapi genduari enggo ipetangkas Dibata alu KesahNa man rasul-rasul ras nabi-nabiNa. ⁶ RahasiaNa enda e me: Arah Berita Si Meriah, kalak si labo Jahudi pe ikut dat bagin kai si enggo isikapken Dibata. Kalak enda enggo ikut jadi ring-ring i bas sada kula, janah ikut pe dat bagin i bas padan si enggo ibahan Dibata i bas Kristus Jesus. ⁷ Aku enggo iangkat jadi serayan Berita Si Meriah arah pemereNa si khusus, si iberekenNa alu gegeh kuasaNa. ⁸ Aku me si la metunggungna i bas kerina anak-anak Dibata. Amin bage pe erkiteken lias ateNa iberekenNa ka nge man bangku tugas istimewa, e me guna meritaken Berita Si Meriah man si labo kalak Jahudi kerna kinibayaken Kristus si la ersibar. ⁹ Janah gelah kerina manusia ngidah pelaksanan rencana Dibata si terbuni e. Dibata si njadiken kerina si nasa lit, muniken rahasia enda nai-nai nari. ¹⁰ Gelah genduari arah perpulungen, kerina peminpin penguasa-penguasa ingan si meganjang meteh kepentaren Dibata si melala tempasna. ¹¹ Si enda ibahan Dibata rikutken rencana si kekal, si idungiNa arah Kristus Jesus Tuhanta. ¹² I bas kita ersada ras Kristus dingen erkiteken tek kita man baNa lit hakta guna ngadap ku lebe-lebe Dibata alu la biar-biaren. ¹³ E maka kupindoken man bandu ola kam biar-biaren kerna kiniseran si kunanami erkiteken kam; si tuhuna kiniseranku enda arus erbahanca megah akapndu. ¹⁴ Erkiteken si e maka aku erjimpuh i lebe-lebe Bapa. ¹⁵ I bas Ia nari me kerina kinibapan i doni enda ras i Surga ndatken pengesahen. ¹⁶ Kupindoken man Dibata gelah i bas kinibayakenNa si la ersibar nari iberekenNa man bandu kuasa arah KesahNa guna mpegegehi pusuh peratenndu. ¹⁷ Janah gelah Kristus ringan i bas pusuhndu erkiteken kam tek man baNa. Ertoto aku gelah kam rurat dingen erpalas i bas keleng ate. ¹⁸ Gelah raduken kerina anak-anak Dibata ngasup kam ngangka kuga belangna, gedangna, ganjangna ras bagesna keleng ate Kristus e. ¹⁹ Tuhu, mbera-mbera ietehndu keleng ateNa e aminna gia keleng ateNa ngelebihi kerina pemeteh, seh maka kam idemi alu biak Dibata si serta. ²⁰ Pujin man Dibata si ngasup erbahan kai pe ndauh beliden asangken ngasup kita mindosa ntah pe ngukurisa alu kuasaNa si sangana erdahin i bas kita. ²¹ Kemulian man baNa i bas perpulungen ras i bas Kristus Jesus, rasa lalap seh rasa lalap. Amin.

¹ E maka aku, si i bas penjara erkiteken kudahi dahin Tuhan, mindo man bandu: Nggeluh lah sue ras kecibalndu si enggo iaturken Dibata man bandu, asum tangtangna kam idiloNa guna ngikut Kristus. ² Meteruk min ukurndu, lemah lembut, dingen saber. Ola kam pergelut sapih-sapih kam, erkiteken kekelengen si lit i bas kam. ³ Usahakenlah tuhu-tuhu maka persadanndu si ibereken Kesah e tetap irakut alu enteguh i bas perdamen. ⁴ Sada ngenca kula, janah sada ngenca Kesah. Bage me pe kam kerina idilo ku bas sada pengarapen. ⁵ Sada ngenca Tuhan, sada kiniteken, sada peridin; ⁶ sada ngenca Dibata, e me Bapa kerinana. Ia i babo kerina si nasa lit, si erdahin arah kerina si nasa lit dingen si nggeluh i bas kerinana. ⁷ Man banta sekalak-sekalak enggo ibereken kengasupen si khusus sue ras baginta si patut si ibereken Kristus erpalasken lias ateNa. ⁸ Bagi lit tersurat i bas Pustaka Si Badia, "Asum Ia nangkih ku ingan si meganjangna, nterem ibabana kalak tabanen i bas barisen arak-arakenNa; dingen iberekenNa pemere-pemere man manusia." ⁹ Kai kin ertina "Ia nangkih" e? Ertina e me: perlebe Ia nusur ku ingan si meterukna kal, i doni enda. ¹⁰ Ia si nusur e, Ia ka si nangkih ku ingan si ganjangen dingen dauhen asa kerina langit, gelah idemiNa kerinana. ¹¹ Ia si "mereken pemere-pemere man manusia." Deba ibahanNa jadi rasul, deba jadi nabi; lit deba jadi perBerita si Mehuli, lit deba jadi si mpermakani perpulungen ras guru-guru. ¹² Si enda ibahanNa gelah kerina anak-anak Dibata sikap ndahiken dahin pelayanen majekken kula Kristus. ¹³ Alu bage dungna ersada kinitekenta ras penandainta kerina nandangi Anak Dibata; kita dewasa, janah dungna seh kita ku tingkat kedewasan Kristus si serta e. ¹⁴ Alu bage lanai kita bali ras anak-anak, iombang-ambingken galumbang dingen ijole-joleken ku jah ku je alu angin pengajaren kalak penipu; ibabaina kalak si deban papak alu penebu-nebuna si guak. ¹⁵ Tapi alu nuriken si tuhu-tuhu alu dem ate keleng, reh belinna kita jenari seh ku tingkat kesempurnan Kristus. Ia kap takal janah, ¹⁶ ku Ia me kerina kula e irakut. Kerina ringring e iranggut dingen ipersada alu penampat urat si lit i bas ringring e. ¹⁷ I bas gelar Tuhan kukataken man bandu gelah itengetindu enda: olanai kam nggeluh bagi kalak si la nandai Dibata, si la erguna perukurenna, ¹⁸ dingen gelap pengertinna. La lit baginna i bas kegeluhen si ibereken Dibata, sabap lanai kal lang-lang ia bodohna, dingen mersik ukurna. ¹⁹ Lanai sitik pe ia meteh mela; ipelepasna dirina italuken sura-surana si jahat, janah ilakokenna kerina si la mehuli alu la alang-alangen. ²⁰ Labo e si ipelajarindu i bas Kristus. ²¹ Ma enggo ibegindu kerna Kristus, janah selaku ajar-ajarNa, ma enggo kam iajari kerna si mehuli si lit i bas Ia? ²² Dage tangtangilah manusia si male, si erbahanca kam nggeluh bagi si nggo-nggona. Manusia si male si meneken bana alu sura-surana si nipu. ²³ Pusuh peratenndu ras perukurenndu kerina arus ipelimbarui. ²⁴ Pakelah manusia si mbaru si itepa rikutken tempas Dibata, dingen encidahken bana i bas kegeluhen si tuhu-tuhu adil dingen badia. ²⁵ Olanai erbual! Kerina arus nuriken si tuhu-tuhu man seninana, sabap kerina kita ringring i bas sada kula. ²⁶ Adi merawa kam, ola seh erdosa. Janah ola simpan rawandu seh ben wari. ²⁷ Ola bere kesempaten man si Iblis. ²⁸ Kalak si nangko gelgel nari, olanai ia nangko. Erdahinlah ia alu mehuli guna ncariken keperlunna, janah gelah lit i bas ia guna nampati kalak si i bas kepiceten. ²⁹ Adi kam ngerana ola sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa. ³⁰ Ola ceda ate Kesah Dibata ibahanndu, sabap Kesah e kap capna maka kam sikerajangen Dibata. Kesah e jaminen maka reh me warina Dibata ndungi dahinNa mulahi kam. ³¹ Tadingken cian ate, perampus ras pernembeh. Olanai kam si isak-isaken ntah si cekurak-cekuraken. Olanai sitik pe erelem-elem. ³² Tapi melias dingen mesayanglah sapih-sapih kam. Si alem-alemenlah bagi Dibata enggo ngalemi kam i bas Kristus.

¹ Erkiteken kam anak-anak kekelengen Dibata, usihlah Ia. ² Geluhndu arus erpalasken keleng ate, bagi Kristus enggo engkelengi kita, dingen ngendesken kesahNa man gunanta. Ia enggo mpersembahken diriNa jadi persembahen si merim si ngena ate Dibata. ³ Erkiteken kam anak-anak Dibata, la patut terjadi i tengah-tengahndu erlua-lua, erlagu la mehuli ntah pe merangap; ibelasken pe ola. ⁴ Bage pe la patut ibelaskenndu cakap caram, cakap si lang-lang ntah pe cakap si kemali. Tapi pujilah Dibata. ⁵ Perlu ietehndu maka kalak si erlua-lua, kalak si erlagu la mehuli ntah pe kalak merangap (merangap bali kap ras nembah man berhala) la dat bagin i bas Kinirajan Kristus ras Dibata. ⁶ Ola pelepas ise pe nipu kam alu kata si sia-sia; sabap erkiteken si e me kerina maka reh rawa Dibata man kalak si la nggit ngikutken Ia. ⁷ E maka ola erkandu-kandu ras kalak si bage. ⁸ Kam gelgel nari i bas gelap, tapi genduari enggo i bas terang, erkiteken kam enggo jadi anak-anak Tuhan. E maka kam arus nggeluh bagi kalak i bas terang. ⁹ Sabap mbelin perulihen terang, e me erbage-bage si mehuli, si bujur ras si tuhu-tuhu. ¹⁰ Daramilah kai si ngena ate Tuhan. ¹¹ Ola kam ikut i bas perbahanen kalak si gelap si sia-sia. Tapi bukakenlah perbahanen-perbahanen si bage. ¹² Si tuhuna ncakapken kerna kai si ibahanna alu erbuni-buni e pe mereha nge. ¹³ Janah kai si ibukaken i bas terang, tangkas me. ¹⁴ Janah kerina si banci idah alu tangkas, e terang gelarna. E me sabapna maka ikataken i bas ende-enden: "Medakkenlah, o, kam si tunduh, janah kekekenlah i bas si mate nari! Ersinalsal me Kristus ku babondu." ¹⁵ E maka perdiatekenlah lagu langkahndu. Ola kam nggeluh bagi kalak motu, tapi bagi kalak pentar min. ¹⁶ Pergunakenlah kesempaten si lit i bas kam alu mehuli, sabap wari-wari enda la kap mehuli. ¹⁷ Dage ola bodoh, tapi pergermetkenlah kai si ngena ate Tuhan guna idalankenndu. ¹⁸ Ola kam mabuk ibahan anggur, sabap si e encedaken man bandu. Tapi idemi Kesah Dibata min kam. ¹⁹ Ercakap-cakaplah kam sapih-sapih kam alu make masmur, ende-enden pujin dingen ende-enden pertendin. Endekenlah ende-enden ras masmur man Tuhan alu ukur dem ngataken bujur. ²⁰ Katawari pe katakenlah bujur man Dibata Bapa subuk kerna kai pe, i bas gelar Tuhanta Jesus Kristus. ²¹ Patuhlah sekalak nandangi si debanna, erkiteken kam mehamat man Kristus. ²² O kam ndehara, patuhlah man perbulangenndu bagi patuh man Tuhan. ²³ Sabap perbulangen nge takal ndeharana, bali ras Kristus takal perpulungen, janah Kristus nge si Engkelini perpulungen si jadi kulaNa e. ²⁴ Erkiteken si e ndehara arus patuh kal man perbulangenna i bas kai-kai pe, bali ras perpulungen patuh man Kristus. ²⁵ Kam perbulangen, kelengilah ndeharandu, bagi Kristus engkelengi perpulungen, dingen ngendesken kesahNa guna perpulungen e. ²⁶ Kristus erbahan bage guna mpersembahken perpulungen e man Dibata, alu kataNa, kenca ibersihkenNa e alu mbasuhsa alu lau. ²⁷ Tole pe gelah iendeskenNa perpulungen e man DiriNa alu dem kinijilen desken sekalak penganten diberu bersih dingen la ersalah, la lit cungikna ntah ringutna, bage pe la lit si man pandangen. ²⁸ Perbulangen arus engkelengi ndeharana bagi ia engkelengi kulana. Kalak si engkelengi ndeharana, engkelengi dirina kap. ²⁹ Labo pernah lit kalak elem-elem nandangi kulana. Tapi ipekena-kenana dingen ikawalina kulana e bagi Kristus mpekena-kena dingen engkawali perpulungen. ³⁰ Sabap kita me ringring kula Kristus. ³¹ Bagi lit tersurat i bas Pustaka Si Badia, "Erkiteken si e, sekalak dilaki nadingken nande bapana, jenari ersada ia ras ndeharana, janah si dua e jadi sada kula me." ³² Si enda ncidahken rahasia si mbelin kal ertina. Janah aku jine ngidah, maka si enda nuduhken persadan Kristus ras perpulungen. ³³ Tapi pe kerna kam: Tep-tep perbulangen arus engkelengi ndeharana bagi ia engkelengi dirina, janah tep-tep ndehara arus mehamat man perbulangenna.

¹ O kam anak-anak! Ikutkenlah ajar orang tuandu, sue ras peraten Tuhan sabap patut idalankenndu. ² "Pehagalah nande-bapandu," e me pedah si pemena ibereken Dibata radu ras padanNa. ³ E me, "gelah mejuah-juah kam, janah ndekah kam nggeluh i doni enda." ⁴ Kam orang tua! Ola pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi si ngena ate Tuhan. ⁵ O kam budak-budak, patuhlah man tuanndu alu mbiar dingen gentar; ikutkenlah alu bulat ukurndu, tempa-tempa idahikenndu e guna Kristus. ⁶ Bagelah ibahanndu labo saja tupung ia i je tempa-tempa kam ndarami pujin i bas manusia nari saja; tapi dalankenlah alu tutus kai si ngena ate Dibata, selaku budak-budak Kristus. ⁷ Dahilah dahinndu alu meriah ukur. Anggaplah kam erdahin guna Tuhan labo guna manusia. ⁸ Ingetlah! Kerina manusia, subuk budak-budak ntah si la budak-budak, ngaloken balasen i bas Tuhan nari erkiteken kerina dahinna si mehuli. ⁹ O kam tuan-tuan! Kam pe bage ka lah perbahanenndu nandangi budak-budakndu. Olanai ia ipesega-segandu. Ingetlah! Subuk kam, bage pe budak-budakndu sada kap Tuanndu i Surga. Janah labo erndobahen kam i lebe-lebeNa. ¹⁰ Kedungenna, megegehlah kam erkiteken persadanndu ras Tuhan dingen erkiteken KuasaNa si mbelin. ¹¹ Pakekenlah kerina senjata si ibereken Dibata gelah ngasup kam tedis ngelawan akal Iblis si jahat e. ¹² Sabap labo manusia si man lawanenta, tapi kuasa pemerentah ras penguasa si la teridah, kuasa doni si gelap enda, ras kesah si jahat i bas ingan si meganjang. ¹³ E maka genduari pakekenlah kerina senjata si ibereken Dibata, gelah adi reh pagi paksa si jahat e, ngasup kam ngelawan serangen-serangen musuh, janah kenca erperang seh ku kedungenna, tetap denga kam tedis alu megegeh. ¹⁴ E maka tedislah kam! Pakekenlah ketuhu-tuhun jadi bentingndu; pakekenlah kinibujuren jadi baju besi guna erperang. ¹⁵ Janah pakekenlah keriahen ukurndu meritaken Berita Si Meriah kerna kemalemen ate jadi sepatundu. ¹⁶ Bahanlah kinitekenndu jadi ampang-ampangndu katawari pe. Alu e banci inimpetindu kerina anak panah si gara si ipanahken si Jahat. ¹⁷ Alokenlah keterkelinen jadi topi waja man bandu, janah kata Dibata jadi pedang si ibereken Kesah Dibata man bandu. ¹⁸ Bahanlah si e kerina alu ertoto, mindo penampat man Dibata. Ertotolah i bas bukuna alu kuasa Kesah. Erkiteken si e erjaga-jaga dingen tutuslah kam i bas ertoto. Ertotolah rusur guna kerina anak-anak Dibata. ¹⁹ Janah ertoto pe man gunangku, gelah ibereken Dibata man bangku kata-kata si payo adi aku ngerana, dingen gelah pang aku ngerana dingen mpetangkas rahasia Berita Si Meriah e. ²⁰ Sabap guna Berita Si Meriah e maka aku jadi utusen Dibata, janah ipenjaraken pe. Ertotolah kerna aku, gelah pang aku ngerana kerna Berita Si Meriah e, bagi arusna aku ngerana. ²¹ Gelah ietehndu kuga percibalku, Tikikus nurikenca man bandu. Seninanta Tikikus si ikelengi enda sekalak serayan si tutus i bas dahin Tuhan. ²² Kusuruh ia ndahi kam gelah iturikenna man bandu kerna percibal kami kerina, janah gelah alu bage reh tetapna ukurndu. ²³ Dibata Bapa ras Tuhanta Jesus Kristus mereken kemalemen ate, kekelengen ras kiniteken man bandu gelah. ²⁴ Lias ate Dibata rembak ras kerina kalak si erkeleng ate man Tuhanta Jesus Kristus alu keleng ate si la erkeri-kerin.